TUALTHATTU NAUPANG TAK TAK TE CHANCHIN

 TUALTHATTU NAUPANG TAK TAK TE CHANCHIN

Written by : Aaron Malsawmdawngzuala

Source : Criminally Listed (Youtube Channel)

ANTHONY JACQUES BROUSSARD

Kum 1981 khan California rama khaw pakhat reh ve tak mai, San Jose bul hnaia awm, Milipitas khawpuia mi 38,000 vel chenna ah chuan hmeichhe naupang kum 14 mi, Marcy Conrad chuan a chawhnu class tlanbovin a thianpa Anthony Jacques Broussard te inah ava leng a. Broussard hi kum 16 mi niin Marcy nen hian school khatah an lut ho a ni. Naupang te mah nise Broussard hi a lian em em a, kg 108 niin feet 6 leh inches 4 laia sang a ni. Ama sawidan chuan Marcy chu a malchungah thu in an titi dun a, mahse a hnuah a duhloh zawng leh a huat zawng hlirin Marcy chu a tawng ta a. Ahnuah phei chuan Broussard-a nu thihna hmang te chuan fiamthu te a thawh a, a tawngkam a mawilo hle niin a sawi. Anthony Broussard hi kum 7 anih laiin a nu in a thihsan a, a nu hi bathroom-a a inbual laiin thiin chhar a ni a, chetsual palh vanga thi anga ngaih a ni. Anthony Broussard hi a nu thih hnu atang hian amah hi a chiang chiahlo niin an sawi thin bawk. Chutia Marcy-i'n a nu thihna hmanga a fiam reng takah chuan Broussard-a chu a thinrim ta a, Marcy chu a rek hlum ta mai niin a sawi a ni. A thah hnu chuan Marcy taksa chu nasa takin a suasam a, chumi hnuah a pick-up truck hnungah Marcy ruang chu phurin ramhnuaiah a kalpui ta a, chutah chuan ruang chu ava paih ta a ni.

Chumi zan chuan a fanu a lo haw tak siloah chuan Marcy nu chu a mangang hle a, police hnenah a thlen ta a. Tualthahna thlenhnu darkar 24 velah chuan local arcade hmunah Broussard-a chuan a thiante a hmu a, chutah chuan Marcy a thah thu ava hrilh ta mai a. A tir chuan athiante chuan an awihlo hle mai a, mahse Broussard-a chuan a thiante chu Marcy ruang a paihna hmun ramhnuaiah chuan hruaiin Marcy ruang chu a kawh hmuh ta hlawm a ni. Chung thianho, Marcy ruang hmu tute zingah chuan Marcy bialpa hlui leh a nau an tel ve nghe nghe a ni. Ruang an hmuh tirh chuan milem anih ringin hmawlhin an han hawlh chhin vel a, mihring taksa ngei a ni tih an fiah hnuah a la dam nge damlo tih fiah nan an zinga pakhat chuan lungin Marcy lu chu a vawm a, mahse a thi tawh ngei a ni tih an hre ve ta a ni. Chung naupang te chuan Marcy ruang an hmuh thu hi an chhungte emaw, Police te emaw tumah an hrilh lo a ni. A tukah chuan Broussard-a chu school a kal a, a thian dangte leh midang te bulah chuan Marcy a thah thu chu a hrilh kual leh ta vak mai a. Chumi ni chuan Broussard-a chuan ramhnuaiah a thian dangte chu Marcy ruang kawhhmuh turin a hruai leh a, chung zingah chuan kum 16 mi, Broussard-a thianpa Kirk Rasmussen pawha tel ve a ni. Kirk-a chuan Broussard-a bulah chuan engvanga Marcy chu that mai nge a nih a zawh chuan Broussard-a chuan chhang lovin za takin Kirk-a chu a nuih vak vak ringawt mai a ni. An haw dawn chuan Kirk-a chuan ruang chu hnahthel leh hnimin a khuh tha a, an kalsan ta a ni. Broussard-a hian Marcy ruang kawhhmuh tur hian avaiin mi 12 leh naupang kum 8 mi a hruai tawh a ni.

Marcy thih hnu darkar 48 vel ah chuan Marcy ruang hmu tute zinga mi naupang pakhat chuan atawp atawpah chuan police a hrilh ta nge nge a, he naupang hi Marcy ruang hmu hmasa zawk tute zinga mi kha a ni. A sawi dan chuan he naupang hian class-a a awm lai te, chaw a ei laite leh thildang a tih lai te chuan a Marcy ruang a mit ngeia a hmuh kha a hrechhuak zel a, tichuan a hlauthawng in police te a hrilh ta niin a sawi. Chumi ni vek chuan Marcy ruang hmu hnuhnung zawk te zinga mi naupang pakhat chuan police te chu Marcy thih thu leh a ruang a hmuh chungchang te chu a rawn hrilh ve leh a ni. Police te chuan Marcy ruang awmna ramhnuai chu rang takin an pan ve nghal a, hetih lai hian school naupang thenkhat te chu Marcy ruang en turin anlo kal leh a, mahse police motor an hmuh veleh an let leh vek a ni. Broussard-a chu police te chuan an man a, ruang hmutute pawh chu thu zawhfiah turin an la tel bawk a ni. Police te chuan ruang hmu tu naupangte chu engvanga police te hnena report vat lo nge an nih ti a an han zawh chuan thenkhat chuan Broussard-a an khawngaih vang te, an thianpa Broussard-a'n buaina a tawh an hlauh vang te in an sawi a, a then chuan police an hrilh chuan police te chuan chu tualthahnaah chuan an mahni an tel ve anga an ngaih an hlauh vang niin an sawi. Broussard-a an man hnu hian police stationah chuan hmeichhe naupang pahnih, kum 13 mi leh kum 14 mi, unau ni a insawi te chu lo kalin Broussard-a'n a tihbuai thin thute leh, an unau a khawih a tum thin thute chu an rawn report a. Broussard-a pawh chuan chu an hekna chu a lo pawm thlap mai a, kum 25 chhung jail bang zut tura hrem a ni ta a ni. Chutih laiin a thianpa Kirk Rasmussen-a chu Marcy ruang thuruk a tum vangin kum 3 chhung tang tura hrem a ni bawk. Marcy ruang hmutu naupang ten-a Marcy ruang an hmuh atanga darkar 24 lai engmah an sawilo leh police an hrilh miahlo chu California ram mipuite mak tih ber a ni. Mipui thenkhat te chuan he tualthahna thlen chhan leh naupang dangte pawhin an classmate ruang an hmuh hnu pawh a an thup tlat na chhan hi tualthahna lam chi movie en vang leh heavy metal music ngaithlak nasat lutuk vang an ti a ni.October 1997 atang khan Broussard-a hi parole-a chhuah phalsak a nih tur thu an chhuah a, mahse ahnuah chhuah chu phalsak a ni ta chuanglo a ni. Tunah hian Broussard-a hi kum 55 mi niin Soledad California jail ah a tang mek a ni.

JOSHUA PHILLIPS

November ni 3, kum 1999 tlai dar 5 a ni a, Jacksonville Florida-a cheng kum 8 mi Maddie Clifton chuan a nu Sheila hnenah chuan pawn lama infiam tura chhuah a dil a. Maddie hi naupang fel tak a nih avangin a nu chuan infiam tura chhuah chu a phalsak a, an chenna in awmna lai hi a fianrial angreng hle bawk. Maddie hi Sheila-i fate zinga naupang ber a ni a, naupang duhawm leh hmeltha tak a ni. Dar 6:30 a lo ri a, Sheila-i chuan a fate pawnlama infiam chu tlai chaw eitur chuan inchhung atang chuan a ko lut a, mahse Maddie unaunu chiah chu a lo lut a. Sheila-i'n a fanu pakhat zawk hnena Maddie awmna a zawh chuan a fanu chuan khawnge a awm tih leh an infiam dunlo hrim hrim ani ti a a chhan chuan Sheila-i chu a mangang hle. A pasal Steve-a hrilh nghalin an nupa chuan police hnenah an fanu bo thu chu an thlen ta a. Police te pawh chu reilo teah anlo thleng nghal thuai a, an thenawm khawveng te nen Maddie chu an zawng ta luai luai mai a ni. Ni 7 chhung ngawt Maddie chu an zawn hnu pawn an hmu ta reng reng lo mai a, then khat chuan an in bula ramhnuai ah khuarkhurumah a tla anga, a thi aniang te an ti a, mahse Maddie hnuhma takngial pawh an hmu lo. Ni 7 chhung tehmeuh a bo hnu chuan tuk khat chu Sheila-i te thenawm a mi, nu pakhat Missy Phillips chuan an in bul vel chu a tifai a, Missy te hi Maddie te thenawm chiah niin a pasal leh a fapa kum 14 mi Joshua Phillips te nen an chengho a ni. Missy te chhungkua pawh hian Maddie bo tirh khan Sheila-i te chu Maddie an zawnpui ve nasa hle bawk a ni. An fapa Joshua hi baseball ngaina mi leh thianhoa chhuah vah nuam ti mi a ni a, thenawm khawveng te pawn naupang fel tak hmuhin an hmu a ni. Chutia Missy-i'n an in leh a vel a tih fai lai

chuan a fapa waterbed (khum, mattress chhunga tui thunluh theih) bula tui sen (red) niawm tak lo tling chu a hmu a.A tir chuan a fapa waterbed chu a leak a nih a ring a, mahse enchiang tura a kal hnaih chuan thil rimchhe em em hi a rawn nam ta vak mai a, room pumpui chu chu rim chuan a luah hneh ta em em mai a. Mattress chu a chawikang a, a hnuaiah chuan mihring ke rawn lawr hi a hmu ta a. Rang takin pawnah a tlanchhuak a, police officer a hmu fuh hlauh mai a, police nen chuan a fapa roomah chuan an lut dun ta a. Police chuan mattress chu chawi kangin hmeichhe naupang ruang an hmu ta a, chu ruang, Phillip-a khum hnuaia lo let reng chu tu dang nilovin, ni 7 chhung teh meuh an zawn, Maddie kum 8 mi ruang ngei a ni.

Chu waterbed sir chu a keh a, tape hmanga bel that hi alo ni a. Maddie ruang chu khum hnuai tui thunluh na lai ah chuan hnawhluh niin chu a hnawhluhna sir keh chu tape hmanga char beh a ni tih an hmuchhuak ta a. A awmzia chu, Joshua Phillips-a chuan a khum hnuaia Maddie ruang chu zan 6 lai a lo riahpui tawh tihna a ni. Maddie ruang chu a kawng-a chin hnuailam ah engmah a halo a. mahse sex hmanpui leh pawngsual a nilo tih an hmuchhuak a, a kekawr leh a kekawrte te chu Phillip-a khumhnuaiah vek chuan hmuh a ni bawk a ni. A ruang tawih rimchhe tak a nam loh nan tiin Joshua pawh hian perfume chi hrang hrang leh room freshner tlem azawng chu a lo kawl ve nual bawk a. Police ten vawi 3 ngawt Joshua te in an dap hnu chuan ruang rim chhe tak chu hmun tinah alo nam kual tawh tih an hmuchhuak bawk a, a nu Missy chuan a tir chuan an sava khawi ek rim ni tura alo ngaih char char thin thu a sawi. Hetia police ten Missy te ina Maddie ruang an chhar lai hian Joshua chu school ah a awm a, police te chuan school ah va kal chilh in Joshua chu an va man a, Police station lamah an hruai phei ta a ni. Joshua chu a inpuang ta a, a sawi dan chuan khami ni khan Maddie chu Joshua te inah va kalin Joshua chu baseball khelhpui turin a va sawm a, Joshua chuan a peihloh thuin alo chhang a. Mahse Maddie-i'n a tihluih tlat avang chuan an in hnung lam ah kal puiin baseball chu a khelh pui a, Maddie chuan ball chu vawmin Joshua chuan na takin ball chu alo hlap a, Maddie lu ah tak a hlap per a, thisen nasa tak a chhuak a, Maddie chu a tap nasa hle tiin a sawi a ni. Joshua chuan sawi zelin chutia Maddie lu thi nasa em em a hmuh chuan a chi ai nasa em em a, Maddie chu an in hnung lam kawngkhar ah chuan a hnuk lut a, a room ah a luh pui a, chutia a hnuh lai chuan a kekawr leh kekawrte te chu a tawlh thla vek niin a sawi. A sawi leh dan chuan room a luh pui hnu pawh chuan Maddie chu a la t(r)e nasa hle a, a hlauthawng em em a. Joshua hi apa hian an awmloh hlana thiandangte an ina hruai lut lo tura a tih thin avangin apa in Maddie a pawm lut chu a hria ang tih a hlauh em avang leh apa chu a lo haw tep tawh bawk si avanga chi ai nasa zual angin a insawi bawk. Chutia Maddie t(r)e nasat em avang chuan Joshua chuan a baseball bat chuan Maddie lu-ah chuan na takin vawi 3 a vua a, a hrawkah vawi engemaw zat a vit bawk a, a khum hnuaiah chuan Maddie taksa chu a hnawhlut ta a ni. Joshua pa chu a lo haw ve nghal a, chutia a pa lo haw hnu reiloteah chuan Maddie rum ri a hre leh ta a, a la thi chianglo ani tih a hria a, Maddie chu a khum hnuai atang chuan a la chhuak a, a dulah leh a awmah vawi engemaw zat a vit leh a, khum hnuaiah bawk chuan a hnawhlut leh a ni. Police te chuan baseball bat leh chemte te chu Joshua room atang chuan an hmuchhuak a, Joshua chu court a kalpui a ni.

Thla engemaw zat a ral hnu chuan trial nei turin Joshua chu an ko a, kum 14 mi lek ni mahse puitling tualthattu angin an ziak a ni. Joshua insawifiahna chu Maddie a thah tawp nachhan chu a hlauhthawn leh chi ai em avang ani a, chuvangin 1st degree murder ang nilova second degree murder anga kalpui turin a lawyer chuan court chu a ngen a. Mahse prosecutor te chuan Joshua inpuanna zawng zawng te kha dawt a nih thu leh a duh vang renga Maddie that a nih thu an rawn sawi ta tlat mai. Prosecutor chuan autopsy report chu evidence atan a rawn pholang ta a, report-a a inziah dan chuan Joshua sawi dan chuan Maddie chu baseball bat hmanga vawi 3 a lu-a vuak a nih thu leh a taksa a chemte hmanga vawi 10 lai vih a nih thu sawi a, a hrawkah vawi thum vih a nih thu leh a awmah vawi 7 vih anih thu a sawi kha a ni a. A pa lo haw hnu ah Maddie chu a la nun avangin khum hnuai atanga la chhuak leh in avit leh a, khum hnuaiah bawk a hnawhlut leh tiin a sawi a. Mahse Prosecutor chuan Joshua sawi ang zawng zawng kha physical evidence engmah a awmloh thu a rawn sawi ta tlat mai le. Joshua khan Maddie chu baseball an khelh laiin ball chuan a lu ah a hlap per palh a, a lu a kak a, thisen a lo chhuak vak ni khan a sawi a. Tin, Maddie chu an in hnung lam kawngkhar atanga luh puiin a roomah a hnuk lut kha a ni a. Mahse prosecutor erawh chuan Maddie lu ah eng kak hliam mah a awm loh thu a sawi a, chubakah Joshua room tihloh ah chuan hmun dangah thisen engmah hmuh ani lo. Prosecutor chuan sawi zelin Maddie thawmhnaw hak lai ah chuan eng thisen mah a awmloh thu leh bawlhhlawh them tak ngial pawh hmuh tur a awmloh thu a sawi a. Evidence an hmuhchhuah thar chu hei hi a ni...Maddie thah a nih hma hian Joshua hian a room ah puitling film, uchuak tak leh rapthlak taka mipa in hmeichhia a pawngsualna video a en a ni tih hmuhchhuah a ni a, chumi hnuah Maddie chu a that ta a, a thah zawh hnuah puitling film chu a en chhunzawm leh tih hmuhchhuah a ni a, mahse Maddie ruang post mortem result ah chuan Maddie chu pawngsual a nih loh thu an hmuchhuak bawk.

Joshua room atanga an hmuhchhuah leh pakhat chu Maddie u kum 11 mi thlalak a ni. Maddie thih hma khan Maddie te inah hian lut ru an awm thu an hmuchhuak leh a, police te chuan chu rukru pa chu tudang nilovin Joshua niin, chutah chuan Maddie u thlalak chu a va ru chhuak ta angin an sawi a ni. Joshua lawyer chuan witness tumah a ko chhuak lo a, jury hnenah chuan naupang kum 14 mi, ahlauhthawn em avanga tual that palh angin a sawi ringawt a, abak chu han tanna vak tur a hre biklo. Darkar 2 hnuah chuan court chuan thu a ti tawp a, Joshua chu thiamloh a chan tir ta a ni. Kum 14 mi lek niin Joshua chu damchhung jail tang turin a chungthu an rel sak a, parole-a chhuah pawh phal a ni dawnlo a ni. Mipui thenkhat chuan Joshua ai mah chuan Joshua pa chu an dem zawk a, kum 14 mi lek, thian kawm nuam ti em em afapa laka a strict em em avang leh an inchhunga naupang dang lenluh a phalloh avanga he thil hi thleng ta angin an sawi a, naupang hremna nasa tak niin an ngai a ni. Kum 2012 khan Supreme Court chuan parole-a chhuah phalsak lova kum 14 mi lek damchhung tan tir nghal ngawt chu a diklo tiin a sawi a, Joshua pawh chu kum 2017 khan a chungthu rel that sak a ni. Maddie chhungte hian tunah chuan Joshua an huatna hi a nasat em em tawh loh thu leh kum a kal zel a, an huatna pawh a tla hniam ve deuh tawh ani tiin an sawi. Mahse Maddie nu Sheila chuan Joshua chu chhuah zalen a duhloh thu leh tang chhunzawm zel tura a duh thu a sawi a. Media hmaa a sawi dan chuan, "Ka fanu hi engtikah mah alo let leh tawh dawnlo a, chuvang chuan ani khan ngaihdam a phu bikna ka hrelo." a ti a ni. Maddie pa leh Maddie u te pawn Sheila-i thusawi chu tawmpuiin Joshua chuan a thil tih man chu hmu ngei se an duh thu an sawi ve bawk. Court pawh chuan Joshua chu a chungthu rel that sak leh in, dam chhunga tang turin a vawi 2-na atan a hrem leh a ni. Joshua hi jail lamah hmasawn alo zir nasa hle ni tur a ni, kum 15 a nih in model prisoner a ni a, zirna lamah lah legal assistant angin high school a graduate a, college diploma a dawng bawk a ni. A jail tanpui te tan tutor niin jail tang thenkhat te pawh a pui nasa hle a, aman a sawi dan chuan, "Misual ka nilova, ka naupan laia tual lo that tawh mai chauh ka ni, tunah chuan mi danglam ka ni tawh a, ka puitling tawh a ni." a ti a, engtik ni ah emaw chuan jail atanga a chhuah an phalsak ngei a rinthu a sawi bawk.

PHILIP CHISM

Colleen Ritzer hi kum 24 mi niin, hmeichhe fel leh hmeltha tak a ni a, Worcester, Massachussets-a Assumption College atanga graduate a ni. Colleen-i hi a nu leh pa leh a unaute nen Andover ah an khawsa a, Salem State University ah school counseling teacher a ni a, Danvers school-a zirlai naupang pakhat Philip Chism-a tutor niin Philip-a hi maths a zirtir thin a ni. Philip Chism hi anu Dianna Chism nena khawsa an ni a, Tennessee atangin zirna avangin Boston ah an pem a ni. October 22nd, 2013 a ni a, Junior Varsity Team te chuan an player pui Philip-a chu ni danga football practice naa lo ziah thin, lo kal talo chu mak an ti hle a. Chu mai bakah chumi tlaia an team chaw eikhawmnaa alo kallo chu mak an ti lehzual. Team member te chuan Philip-a chu an zawng ta a, chumi tlai vek chuan a nu Dianna chuan a fapa bo thu police hnenah alo report ve chiah bawk a ni. Investigator te chuan chumi zan dar 6:30 vel chuan Philip-a chu Danvers-a Hollywood Hits movie theatre chhung atanga a chhuak lai hmuh a nih thu an dawng a, chumi zan vek chuan Colleen Ritzer-i nu leh pate chuan an fanu Colleen-i bo thu anlo report ve leh chiah bawk a ni. Colleen-i nu leh pate sawi dan chuan school atanga alo haw loh thu leh an call pawh a chhan theihloh thu an sawi a, Colleen-i zawng tur chuan Danver High school chu police te chuan an pan ta a ni. Danvers police te chuan second floor hmeichhe toilet ah thisen farna hnuhma an hmu ta a, an chhui zel a, a tawpah school building bula an school athletic field piah lawka ramhnuai deuhah chuan Colleen-i ruang chu anva hmu ta a ni. Police te chuan ruang chu ngun takin an han enfiah a, Colleen-i chu thil hriam tak hmanga tihhlum a ni tih an hmuchhuak a ni. Police te chuan thisen an hmuhna, school building second floor CCTV footage chu an han check a, chutah chuan Philip Chism-a ngei chuan sarang pawl (blue), plastic garbage a mihring ruang niawm tak intuam, nawrh lirh (trolley) hmanga a nawr lai chu an hmu ta a. Police ten ruang an hmuh hunlai vel khan Topsfield-a police duty pakhatin Phillip-a amah chauha ruang an hmuhna atanga hla vakloa a kal phei lai alo hmu ve chiah bawk a ni.

Philip-a chu man a ni a, thu an zawtfiah nghal a. Philip-a chu police te hmaah chuan a inpuang ta a. Chumi ni chuan Philip-a chu Colleen-i algebra class ah a awm a, last period a ni. A zirlai a ngaihsak loh em avangin Colleen-i chuan ban hnuah stay back turin a hrem a, Philip-a chu a lung nilo hle. Dar 3:30 a ni a, Coleen-i chu zung turin faculty bathroom ah a kal a, mahse awm anlo awm avangin student bathroom lam a pan leh ta zawk a. Phillip-a chuan a hnugah a zui a (CCTV-a a lan dan chuan Philip-a hian a zui pah hian glove a bun mawlh mawlh a ni.), bathroom ah chuan Colleen-i chu a zui lut ta a. Bathroom an luh veleh chuan Philip-a chuan Coleen-i hmaiah chuan a hnek ta siah siah mai a, a duhtawkin a pawngsual a, tichuan box cutter knife-i'n a hrawkah a zai ta a ni. A thah hnu chuan plastic garbage pawl ah chuan ruang chu a thun a, school field hnunga thing hmun ah chuan a va dah ta a ni. Police te khan ruang an chhar khan ruang awmna atanga feet 100 vela hla ah plastic garbage chu an hmu a ni. Chumi hnuah chuan Philip-a chuan a thawmhnaw thisen kai nuai te chu thlakin Wendy's restaurant ah chaw a ei a, chumi hnuah theatre-ah kal in Woody Allen film Blue Jasmine tih movie a en thu a sawi a, movie en man leh a thil ei man atan credit card a hman thu a sawi bawk. School naupang te chuan Philip-a hi infiam mi tak, sang tak leh hmelchhe lemlo, mi zakzum tak a ni an ti a, mi fel tak a nih thu leh Junior Varsity Team-ah pawh top scorer anih thute an sawi bawk. Philip-a te awmna hmasa Tennessee-a an court document atanga an hmuh chhuah chu Philip-a nu Dianna-i hian kum 1998 khan Stacy Chism chu pasal atan a nei a, chutih lai chuan Dianna hi kum 19 a ni a, Stacy-a chu kum 23 a ni. An inneih atanga thla 4 hnuah Philip Chism hi a lo piang a, kum khat hnuah fanu an nei leh a ni. March 2001 khan an inthen a, mahse thla 3 hnu lawkah an innei leh a, reilote hnuah an inthen leh a ni. October 26, 2013 khan Dianna Chism hian Colleen-i te chhungte lakah pawi a tih thu leh a tawrh pui thu a attorney kal tlangin asawi a ni.

Philip-a chu a trial neih hun tur nghakin Dorchester, Massachusetts-a Department of Youth Services facility-ah dah a ni a, mahse chutah chuan buaina a thlen leh ta tlat mai. Class an neih apiangin a kal ve duh ngailo a, nilengin facility main room-a dawhkan chungah a thu kun ngul thin a, a che sawn duh ngailo. June 2, 2014 a ni a, female correction officer pakhat, kum 29-a upa, Philip-a thla tamtak chhung lo hre tawh tu chu a duty na hmun atangin a kalsawn a, locker room lam pan chuan a kal ta a. Chu veleh Philip-a chu rawn che chhuakin a slipper a phelh a, kun chungin ngawi rengin staff locker room bula hallway ah chuan a kal phei a. Chu officer nu lo chhuak leh lampang chu Philip-a chuan lo zuan in, abawh tlu a, a rek ta vak vak mai a. Chunu chuan arehna kut dinglam zawk chu benthlak sakin a au ta vak vak mai a, Philip-a chuan a hmaiah na tak takin vawi engemaw zat a hnek a, mahse staff dangte anlo thleng a, Philip-a chu an rawn manbet thei ta hram a ni. Chu thil thleng avang chuan June 23, 2014 ah Suffolk County Court ah a chungthu relsak leh a ni a. Philip-a chu 'attempt to murder' case-i'n dollar 250,000 hmanga bail chhuah theih ani a, a attorney erawhin engmah a sawi lo. Hun alo kal zela, Colleen-i thihna trial dang hmanchhawn leh turin Philip-a chu court-a an hruai tum ni, October 17, 2015 ah chuan judge chuan Philip-a chu trial hmachhawn turin a tlak em tih fiah phawt aduh avangin Philip-a trial neih hun tur chu a delay a, mental health problem a nei nge neilo tih fian nan Philip-a chu hun engemaw chhung mental health evaluation neih tir a ni. November 2, 2015-ah chuan a mental competence hearing nei tura courtroom-a hruai an tum chu a duh ta tlat lo mai a, chhuatah alu chu a tauh vak vak a, mi tu emawni in min kahhlum a tum tiin aw ri te a hriat thu te chu doctor te hnenah a sawi a, a tukah chuan judge chuan trial hmachhawn turin a fit tawk lo tiin a sawi a ni.

February 2016 ah chuan Philip-a chu Colleen-i thihna avanga trial nei tura court-a hruai a ni leh ta a, thiamloh chantir a ni ta a ni. Superior Court Judge David Lowry chuan Philip Chism chu Colleen Ritzer-i a thah avang leh, a credit card a ruk sak mai bakah a pawngsual avangin damchhung lung in tang tur in a chungthu a rel a, kum 25 a tan hnuah parole-a chhuah erawh phalsak a ni ang. Philip Chism hi a lo berah kum 40 tal chu a tan angai a, kum 54 a nih hma chu parole pawn a chhuak thei dawnlo tihna a nih chu.