UNHOLY CONFESSIONS (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 2

 UNHOLY CONFESSIONS

(MIZO FICTION TEEN SLASHER/HORROR STORY)

Written by : Aaron Malsawmdawngzuala

WARNING : 18+

Chapter - 2

*********************

Zan a lo ni a, Alex-a chuan lehkha a zir mial mial a. Chutih lai tak chuan apa a lo lut a, "I zir laklawh viau em?" a rawn ti a. "Laklawh love..enge ni a?" tiin a lo zawt let a. Alex-a pa, Pu Tluanga chu a fapa bulah chuan a han thu a. A aw a han thian kharh kharh a, "Vawiin tlai ka duty haw kha...hmeichhe pakhat i phur kha ka hmu che a." a han ti a.

Alex-a chu a nui suk a, "E aw..nia, kan senior a nih kha." tiin a lo chhang mai a. "In inngaizawng em lo maw?" tiin a pa chuan a han zawt leh a. Alex-a chu a ner nung mai, "Ngawt ngawt a, a scooty ke a thep a, ka pui mai a nih kha." a lo ti hlur mai. Apa chuan a chhang lem lo, a lu a bu deuh nghat ringawt a.

"Ngati nge min zawh a?" tiin Alex-a bawk chuan a han zawt leh a. Apa chu a thaw hak a, "Englo ania, thla 6 kal ta a in college-a mipakhat, grenade halpuah hmanga tu tih hriat lohvin a thah kha ila hria em?" a han ti a. "Aw hria ang chu..case in chhuichhuah tak loh kha maw?" tiin a lo zawt let a.

"Aw ni e...class 12 in exam lai ami kha." tiin apa chuan a lo chhang leh a. Alex-a chu a han thu tha te te a, "Ngatinge chu chu i sawi chhuah a?" tiin a han zawt a. "Khata in Principal call tu ber kha ania..keimah ngei pawh hian ka awm a...vawiin tlai khan ka lo hmu fuh che u a, chuvang mai mai mawle." tiin a tho a.

Chhuah leh mai chu a tum a, "Chumi vang chuan em ni min rawn zawh a?" tiin Alex-a chuan a lo zawt leh a. Apa chu a nui sak a, "Ka zawt mai mai che anih kha...khanu kha ka hriat hnu a nih vang mai mai mawle." a lo ti leh mai a. "Kha tualthah case ah khan i ringhlel deuh tihna mi?" tiin Alex-a chuan a han zawt leh a.

"Ringhlel love...a kum zat ka hria a, nang aiin a upa a. Khami zana principal call tu a nih avang khan ka ringhlel tihna a nilo, mahse in inngaizawng ang tih ka hlau mai a ni."

"Misual a nih chuan loh te chuan..nangpawn i ringhlel chuang lova...lo inngaizawng pawh ni ila, a pawina a awm em em dawn mi?"

"Eheu..chu..i duh deuh elaw?"

Alex-a chu a nui a, "Ka duh ka ti kher hleinem...min rawn hrilh kher bawk sia, chuvang chuan ka zawt mai mai che." a lo ti ve leh a. Apa chuan a han melh a, "In in upat hleih lutuk, chubakah a mipa zawk i naupang lehnghal." a han ti leh a. "Ka duh kher hleinem...ka hmelhriat ania, ka lo pui ve mai alawm." tiin a Alex-a chuan a lo chhang leh a, apa chu ngawi rengin a chhuak a.

Alex-a pa hi Police Inspector a ni a, thla 6 kal ta a Sawmtea thihna pawh kha amah hian a chhui a, mahse a chhui chhuak ta lo a nih kha. Case chu close ni tawh mahse, Pu Tluanga hian tualthattu chu ala zawng ru reng a, case re-open leh mai theih turin a hmingin an close hrih mai chauh a ni.

Alex-a te pafa hi inkawm ngeih tak mai an ni a, Pu Tluanga hian a fapa hi a duat hle bawk. A fapa neihchhun a ni bawk a, a duh duh a tihsak thin. Pafa e tilo chuan an titi dun nasa thei hle a, Alex-a thiante pawn Pu Tluanga chu Police mah nise an nel em em a ni. Alex-a te chhungkua hi pathum an ni a, anu hi Pi Ziri niin in enkawltu ber a ni.

*********************

Zan dar 11 a pel tawh a, tlangval kum 27 a upa, Kima leng haw chu a rui kher mai. A bike ah chuan thei leh theilo chuan a han lawn a, a awn leh duai duai thin. A thiante chuan an nuih nasa mai a, "Kan inah lo riak mai rawh...khatiang te chuan i thleng lul lovang." tiin a thianpa Siama chuan a han sawm a.

"Ka thleng awm emai..hei aia rui pawh hian ka thleng fo alawm mawle." tiin a pawr nasa mai. A thian dangte pawh chuan haw lo mai turin an thlem nasa a, mahse engatan mah ngai lo chuan a haw lui ta tho va. A han tlan chiah chu a kawi deuh zawk zawk mai, mahse rei loteah chuan a khal ngil ve leh mai a.

An in lam pan chuan a han tlan vang vang a, kawngsirah chuan mi pakhat, jumper dum ha leh face mask dum vuah chu a lo ding run mai a. Kima chu a lo phar a, Kima pawh chu a ding ve mai a. "Enge i duh a?" pawr zet chuan a han ti a. Chu jumper ha chuan engtin mah a chhang lo, a kawrban chu a zen a, thir tlawn tha nelh nawlh hi a rawn phawrh chhuak ta mai a.

"Hey..enge tih i tum a?" tiin Kima chuan a han vin deuh thak a, mahse a chhang chuang lo. Na em em hian Kima lu ah chuan a hlap pawp mai a, helmet a lo khum silo nen Kima chu a bike atang chuan a let thla tawp mai. Chupa chuan Kima chu a motor lamah chuan  ahnuk phei a, a tlan pui ta daih mai.

*********************

Abawihi pawh a muhil thei lo, a rilru ah chuan Alex-a a awm reng mai. Kum lamah inthlau ve deuh mahse, a mipa duhzawng tak a ni tlat. Junior a lo ni bawk nen, a hmel lah a tha ver reuh bawk si a. Chubakah a scooty ke thep vanga a buai lai takin a rawn pui a, a ke siam man a la pek sak thlap bawk nen.

Nikhat chiah la inhmu mahse a vei nghal em em a, a tuk a class kal chu a chak zek zek tawh. Mahse phone number an inpe hman ta silova, a be chak takzet. A muhil theilo chu a inlet a inlet a, chutih lai chuan Whatsapp message a dawng ta hlauh mai. A han en a, number hraitloh atangin a lo ni.

"Hi..mu tawh em?" tih hi a lo ni a, a dp a han en lahin sap thlalak daih a lo hmang bawk si. A reply duh mai lova, a seen ta ringawt a. A hnu reilo teah chuan number ngai bawk chuan, "Van induh ve a?" a rawn ti leh a. A han enchiang a, an college whatsapp group ah a lo tel ve reng mai.

"Tunge aw?" tiin a thawn let ta nge nge a. "Keimah." tih ringawt chuan a lo reply leh a. A hrethiam lo kher mai, "Tu keimah maw?" tiin a han zawt leh a. RAng takin a rawn reply leh vat a, "Keimah...Alex-a." a rawn ti ta hlauh mai. A lawm lutuk chu a au chhuak lo chauh, "Ehe..engtin nge ka number i neih a?" tiin a han zawt a.

"Kan vei deuh te hi chu eng tin tin emaw an number kan nei mai zel...hehe."

Abawihi chu a lai lek lek mai, "Hmm..vela che, mawhh..han sawi teh." tiin a han zawt leh a. "Ka zawng nasa...lehkha ka zir zo chiah a, dar 9 vel atang khan college group tinah ka zawng char char che alawm." tiin a lo chhang a. "Ka dp ka hmang si lova...ka hmingah lah thildang ka hmang daih sia, engtin nge min hriat theih a?" tiin Abawihi chuan a zawt leh a.

"Nia...ka zawng char char che a, mahse ka hmu silo che a. A tawpah i thiannu kha ka hmuchhuak hlauh va, ka va text tawp alawm."

"Tu ka thiannu maw? Mary kha maw?"

"Aw ni e...i number ka dil tawp alawm."

"Awii..a lo pe ve mai che mi?"

"Pe ve mai e."

"Thildang sawi a nei em?"

"Engthil dang maw?"

"Aa..a sawi loh chuan a tha a nih chu."

"Nia..naktuk class i kal dawn em?"

"Umm kal ang, nang zawk?"

"Kal dawn e...ihmaw, first period class i nei em?"

"Aw nei chiang e...ngati nge?"

"Kal rual ila ka lo ti deuh va."

Abawihi thin chu a phu dep dep mai, "Nia...mahse ka thiannu lamkawi a ngai ziah a." tiin a han chhanglet a. "Aww..kan lam kawi anga nimai lawm, scooty hran ve ve ah kan chuang dawn tho va." tiin a lo chhang a. Abawihi chu a mu nui var var tawh mai, "Umm..mahse i thiante pahnih kha?" a han ti leh a.

"Lungngai suh...anni te chu an pahnih khan an hlim emai, ka tellovin an hlim daih zawk."

"Um..anih chuan kan kal rual dawnnia."

"Yes..ka lo sawm ang che...anih muttui phawt aw.."

"Awle..muttui le."

Abawihi chuan  akham lo hle mai, "Hetiang em em a duh hi ka la nei ngai lo, awii..mipa ka ngainat loh tehreng nen." tiin amah chuan a han phun nuah nuah a, nuam a ti ngang mai. Mary chu ava text a, "Ka number ilo pe ami? Alex-a kha.." tiin ava zawt a. "Pe e..a duh chiang lutuk che." tiin Mary chuan a lo chhang a.

"Awi Merrr...a nuam e, a chhe lo si." tiin smiley tam deuh chu a han dah tel ngei bawk a. "Vawiin tlai te kha chuan i duhloh kha, ala naupang emai i tih kha." tiin a rawn reply a. Abawihi chu  a ner sak a, "Ka inthup vel mai mai anih kha..kum te chu number mai mai alawm. Ka mu dawn..awi ka muttui dawn si..muttui." tiin a phone chu a dah a, reiloteah chuan a muhil ve ta a.

*****************************

Kima chu a harh a, a lu chu na a ti ngei mai. A awmna a han enkual a, a lo thim ruih mai. Thla eng nep tak mai chuan a awmna lai a rawn chhun pha a, a han enchian chuan inrel niawm takah hian a lo awm reng mai. Thutthlengah phuar a ni a, mahse a kut erawh a tiche thei thung. A awmzia chu a awm(chest) leh thutthleng chu a inphuar hnan nghet hle a, a kiu(elbow) atanga hnuailam zawng chu a ti che thei a ni.

A ke chu thutthleng ke nen chuan phuar zawm a ni bawk a, a la nghet em em zui. A hmui erawh tuamsak a ni a, phelh tum chuan  akun vak a. Mahse a kut chuan a ban pha tlat lo, a tal vak vak ringawt a. Chutih lai chuan kha jumper ha bawk kha a lo kal leh a, Kima chuan a hlau kher mai. A jumper hma taka, SHADOW X tih inziak pawh chu chiang takin a hmu thei.

X chuan pitbull ui, lian em em leh sek em em mai, riltam avanga chilthli uai duah duah mai pahnih hi a rawn kai bawk a. Kima chu a hmui tuamsak tlat a nih avang chuan a t(r)e chhuak thei silo, a tal vak vak ringawt mai. Chutah a hmazawn tak, pen 10 vela hlaah chuan X chu a ding vang a. Pitbull pahnih lah chu a thawk hian an thaw huam huam tawh mai, chutah X chu a rawn tawngchhuak ta.

Robot aw ang mai hian, "Hello Kima...inpuan a hun e." a han ti a, Kima chuan a hrethiam lo kher mai. Ui chu a bula pipe ah chuan X chuan a thlung a, "Chain hi a tuiek tawh a, chuvang chuan heng ui pahnihte hi an duh chuan an tal chhuak vat thei." a han ti leh te te a. Tichuan Kima bulah chuan ava kal hnai a, "Nunna hi a hlu tiraw? I pawm zawng a ni em?" a han ti leh a.

Mittui tla pur hian Kima chuan a lu a lo bu nghal vat a, a mit meng atang chuan a hlau tih a hriat takzet. "Kima...nunna hi a hlu i ti takzet anih si chuan...engvangin nge midang nunna i ngaihpawimawh loh?" tiin a han zawt leh a, mahse Kima chuan a hrethiam lo kher mai. "Nangmah vangin pa pakhat chu a in awk hlum ringawt asin, chumi pawh chu i hre vek tiraw?" a han tih takah chuan Kima chu a meng phawk nasa kher mai.

X chuan rum tak hian a melh a, "I thil tih sual chu puang ang che...zanin hian...anih loh chuan i thi ang." a ti leh ta mai a, Kima chu a khur zawih zawih a, zun a cheh hial mai. X chu a kal ta daih mai a, mahse reiloteah chuan bucket hi a rawn khai phei leh a. Bucket chhungah chuan thisen hlir hi a lo awm mai a, Kima chuan mak a tiin a hlau kher mai.

Thisen lah chu a la thar lam tih a hriat em em a, pitbull pahnihte pawh chuan thisen rim chu an hre ta. An ngur tan ta chhur chhur mai a, bucket chu an en ta ran mai. X chuan bucket chu chhuatah chuan a nghat a, a ipte atang chuan Kima phone chu a phawrh a. Whatsapp ah chuan a lut a, Jenet-i tih chu a hmet chhuak a.

Chu hmeichhia Jenet-i chu Kima bialnu a ni, "I mu tawh em?" tih chu X chuan a han thawn a. Reilote hnuah chuan, "La mulo...enge i reh vang vang a? Ka call nasat zia che hi i hria em? Ka mamawh lai ber che ani tih i hre reng ani lawm ni?" tiin Jenet-i chu a rawn ang nghal chiam chiam mai a.

Chutah X chuan Kima chu a han en a, "Jenet-i chunga i thil tih tenawm tak kha, i thuruk kha...zanin hian puang ang che. He thisen hi vawk thisen a ni a, i taksa ah hian ka leih dawn. Tichuan saw pitbull pahnih, thla 3 lai engmah ei mumal tawh lo te sawn i rim an hria anga, ei tum chein an chain saw an tal chat vat ang. Chumi hma chuan Jenet-i bulah hian inpuang ngei ang che, a ngaidam che anih chuan i him anga, a ngaidam lo che anih chuan heng uite hian an ei zo vek ang che. Inpuang rawh le, anih loh chuan i thi ang." a ti ta mai a.

Chutah bucket-a thisen chu Kima taksa ah chuan a leih ta vek mai a, ui pahnih te chu an bauh nasa ngang mai. An chain chu tal chah tumin an zuang vak vak a, chain lah a lo tuiek tawh nen, a ri nghal deuh thawt thawt mai. "Call erawh i hmang tur a nilo, i hmang a nih vaih chuan chain saw ka phelh nghal ang." tiin X chuan phone chu a pe ta a.

Kima phone chu a en a, "Tinge min reply leh siloh a? Lalthankim..i rui leh tawh animaw?" tiin Jenet-i chu a rawn thinrim nasa mai a. Kima chuan inpuan a hreh hle mai, ui lah chuan an rawn bauh nasa tawh mai a. Hreh tak chung chuan, "Jenet...thil hrilh tur che ka nei." tiin a thawn ta nge nge a.

"Engthil maw?" tiin a rawn zawt nghal vat a, Kima chu  amittui a tla zawih zawih mai. "Khami zan khan...pawngsual i tawh zan khan.." tih thleng chu a type a, mahse a thawn ngam thlawt lo. A tap zawih zawih ringawt mai a, mahse ui kawlh pahnih te chuan chain chu an tal bung lek lek tawh bawk si.

A maimitchhing vang vang a, "Jenet..min ngaidam rawh." tih chu ava thawn a. "Engthilah maw?" tiin a lo zawt leh a. "Khami zan khan...pawngsual i tawh zan khan maw...kha kha..ka thiamloh vek a ni." tiin ava thawn ta a. Jenet-i chuan mak a ti kher mai, "Enge i sawi awmzia? Enge i thiamlohna? Enge awmzia?" tiin a rawn zawt leh a.

Thih a hlauh em avang chuan a hrilh ta, "Jenet..kei hian maw, engtik lai mahin ka duh tak tak ngai lo che. Bialnu dang ka nei reng a, keichuan ka kawp mai mai che a ni. Mutdun pui atan chauh ka duh vang che in i bialpa angin ka awm a, keichuan engatan mah ka ngai ngai lo che. Khami zan khan ka hrai rui che a, tichuan pawngsual tu che kha..ka thiante an ni. Liantea leh Zothana te an nih kha." tiin ava hrilh ta a.

Jenet-i chu a reh ta vang vang mai, "Jenet..min ngaidam rawh, khawngaihin min ngaidam rawh. Anih loh chuan ka thi mai ang, hrehawm ka ti lutuk." tiin ava thawn leh a, mahse a rawn reply ta hauh lo mai. Kima chu a mangang em em a, a tap zawih zawih ringawt mai. "Jenet...min ngaidam hram rawh.." tiin ava thawn leh a.

A tawpah chuan a rawn reply ta, "Engtianga nasa in nge ka hmangaih che i hria em? Lem ilo chang vek amaw? Pawngsual ka ni a, khawlaiah saruakin min mut tir a. Social media ah nen, khawi hmunah pawh ka thlalak a darh chuai chuai a. Mi hnemtu ber i ni lawm ni? Nangma thil tih vek maw lo ni a? Kha ka mualphona avang khan ka pa chu a in awkhlum hial asin, engtin nge i tih theih zawk?" a rawn ti hrep mai.

"Jenet..khawngaih takin min ngaidam hram rawh...ka tihpalh takzet a ni...min ngaidam hram rawh." a han ti leh a, mahse a reh leh ta vang vang mai. Kima chu a mangang takzet, "Jenet..khawngaih takin.." a va ti leh a. Chutah Jenet-i chuan, "A teuhlo, engtikah mah ka ngaidam lovang che. Police hnenah ka hrilh dawn...in vaiin man in ni ang." tiin a rawn reply a.

"Aw a pawilo...police hnenah chuan min report rawh, hrem ka phu alawm. Mahse ka duh zawng chu i ngaihdamna a ni..khawngaihin min ngaidam rawh." a han ti leh a, mahse a reh leh vang vang mai. "Min ngaidam lo a nih chuan ka thi mai dawn ania..Jenet, khawngaihin, engpawh ka tihsak ang che." a han ti leh a.

"Aih..ka ngaidam lovang che..i duh leh thi rawh..i thih hi alawm ka duh ber...thi mawlh rawh....ka pa min pe let thei dawn chuang lo...thi mawlh ang che." a ti a, a block ta hmak mai. An text chu X chuan a lo chhiar ve zel a, Kima chuan a text nawn tluk tluk a, mahse a tlang thei tawh hauh lo.

X chuan phone chu a laksak a, "A pawi khawp mai, mangtha le...Kima." tiin a kalsan ta daih mai a, Kima chu a tal vak vak a, a tap zawih zawih bawk. Chutah ui pahnihte pawh chuan chain chu an tal chat ta a, rang lutukin Kima chu an va pan ta. Pakhat chuan thutthleng chawp chuan a zuan thlu nghal a, a hmai chu an khel nghal bawp bawp mai.

A ke ah te an seh a, Kima chuan na a ti takzet. Chutah pakhat zawk chuan Kima hrawkah chuan a seh a, a vun a thler ta duai mai. Thisen chu a baw hawk hawk mai a, reiloteah chuan a thi ta. Chung ui pahnih chuan Kima ruang chu an khel ri ta bawp bawp mai a, a dul te chu an seh thler hial a.

******************************

A tuk zingah chuan Alex-a pa, Pu Tluanga phone chu a ri ral ral mai a. Peih lo tak chung chuan a tho tuah tuah a, an thawhpuipa a lo ni. "Hello..enge ni ta?" tiin a han pick up a. Phone ami chuan, "Sir...ruang chhar a ni...Zozam Furniture Store pan thlakna hnuaiah...inrel ah khan." a rawn ti ta mai a.

Pu Tluanga chu a thu chhuak hlawl mai, "Enga? Tu ruang nge a nih in hre thei em?" a han ti nghal chul a. "A rapthlak angreng khawp mai, a hmel hriat hleih theih loh khawpin ui pahinhin a ruang an lo ei a." a rawn la ti ta deuh deuh va. "Awle..ka lo kal nghal." tiin phone chu a dah a, a insiam nghal sawk sawk a.

Reilo teah chuan a thleng a, inrel lam chu a zuk pan ve ta, mipui pawh an lo awm nuai nuai tawh. Ruang chu a han en a, a ril a lo chhuak pur mai a. A taksa ah chuan ui seh hekna hnuhma tam tak a awm a, a lu phei chu a bung lek lek hial mai. Senior Constable Mamuana, rawn phone tu ber chuan Pu Tluaga a hmuh veleh chuan ava pan nghal a.

"Ilo thleng maw, Sir?"

"Tunge ruang hi hmu hmasa ber?"

"Saw..sawpa saw.." tiin mipui zinga pakhat chu ava kawk a. Pu Tluanga chuan ava pan a, "Nangmah maw ruang hmu hmasa ber tu?" tiin a han zawt a. Zam hmel tak hian chupa chuan, "Aw ni e, ka pu." tiin a lo chhang a. "Tunge i hming?" tiin a han zawt leh a, "Hmangaiha..ka nia." tiin a lo chhang leh a.

"Engtin chiah nge i hmuh?"

"Tukinah tui chawi ka tum a, hemi inrel ka pel chiah hi tukverh sir atanga thisen rawn far ka hmu a. Mak ak ti deuh a, ka va en chiang a. Tukverh atang chuan ui pakhatin mihring lu niawm tak, a hmai zawn a khel buai buai lai hi ka va hmu ta a. Ka va en chiang a, ruang hi an lo ei mek a. Ui pahnih te hian min hmu a, min um hrep nghe nghe."

"Anih leh engtikin nge police i phone?"

"Tuikhum lamah ka tlan thla a, min rawn umzui ta lo. Tichuan ka phone che u a, vengchhung mi te ka hrilh kual nghal bawk."

"A tha e..ka lawm e."

Pu Tluanga chuan ruang chu a han enchiang leh deuh va, "Thuthhlengah hian phuar beh chu a ni ngei a, ui pahnih te hian an duhthu in an seh tawp lo. Kidnap tu an awm a ni, phuba lakna a ang ka ti." a han ti charh charh a. "Phuba lakna a? Engtia phuba lakna?" tiin Mamuana chuan a lo zawt vat a.

"Thutthlengah hian a phuarbet a, tichuan ui hi a seh luih tir a ni." a han ti leh a. "Nih chu a ni thei tho mai...mahse heng uite hian chutin mihring hi an seh hlum ngawt dawn mi? Sihal pawh an nilova, sakei pawh an nilova..chutia mihring thu lai va seh ngawt thu a awm dawn mi?" Mamuana chuan a han ti nang nang a.

"Chutak chu ka ngaihtuah mek...kidnapper hian ama ui, ama train ngei a hmang pawh a ni thei a. Chuti nilo se chuan uiin hetia thi khawp khawpa mihring a seh hi a rin awm loh." Pu Tluanga chuan a han ti a. Chutah Kima sneaker chu a han en vang vang a, glove la chhuakin a han bun nghal a.

Kima sneaker chu a phelh a, pheikhawk chhungah chuan thisen a lo tling teuh mai a, a mawza var pawh chu thisen a kai khat deuh vek bawk. Pu Tluanga chuan Kima kekawr chu a khup thleng vel chuan a han hlim chho a, a nghal te chu a han thlek kual vel a. Pheikhawk lehlam chu a han phelh leh a, thisen a rawn baw leh hawk mai.

A mawza chu a han phelh leh a, mak a tih hmel kher mai. A ding hluai a, "A sehtu ui te hian a ngalah emaw, a chawnah emaw pawh an seh si lova. Engtin nge a pheikhawk chhungah hian thisen a awm teuh theih, a mawza ah pawh a kai vek ania. A kephah ah pawh hian engmah hliam a awmlo, chuan a thawmhnaw hi thisenin a bual huh vek bawk si." a han ti nuah nuah a.

A hawi kual leh a, bang sira bucket lo let reng mai chu ava hmu ta. A va pan phei a, bucket chu a han la kang a. A chhungah chuan thisen tlem a lo la tling a, "Umm..ngaihdan chu ka nei." tiin a lu a han bu nghat nghat a. Mamuana chu a lo kal a, "Sir...engtin nge ruang hi kan tih dawn?" tiin a rawn zawt a.

"He bucket a thisen khu la ula, ran thisen nge mihring thisen a ni tih test turin lab ah thawn ang che u. Chuan mihring thisen a nih chuan hepa ruang nen hian a inmil em tih hriat tum bawk ang che u, mitthi chhungte hi tute nge an nih tih hriat vat tum bawk ula." a han ti a, "Yes Sir." tiin Mamuana chu a kal ta nghal a.

**************************

TO BE CONTINUE