PUTRID CHILD-2 : MY NAME IS FRANCIS, NOT WILLIAM (MIZO SUPERNATURAL/HORROR STORY) [A SEQUEL TO PUTRID CHILD] Written by : Aaron Malsawmdawngzuala Warning : 18+ CHAPTER- 2

 PUTRID CHILD-2 : MY NAME IS FRANCIS, NOT WILLIAM

(MIZO SUPERNATURAL/HORROR STORY)

[A SEQUEL TO PUTRID CHILD]

Written by : Aaron Malsawmdawngzuala

Warning : 18+

CHAPTER- 2

**********************

Hmingmawia chu an vui ta a, Sangtei chuan a tuar thiam lo takzet. A ruang lah hmuh tlak a ni der mai silo, tualthattu tur awm ang chu police te chuan an chhui nghal a. Nula kum 30-a upa, hmeltha zet mai, Inspector Abby Lalruatsangi chu Hmingmawia thihna case chhuitu tur ber a ni. A hmasa berin Hmingmawia bialnu, Sangtei, Francis-a u chu thu zawtfiah turin an vui zawh veleh chuan a va pan ta a.

Kawngka chu a han kik karh karh a, second 10 vel hnuah chuan a rawn inhawng ta. Mahse a rin loh tak maiin Francis-a a lo ni daih mai, "Ehe..Mama..i chhungte an awm em?" tiin a han zawt a. Francis-a chuan Abby a han en chuan a tualthahna chhuitu tur, a hmelma thar ber a ni dawn tih a lo hrethiam nghal vat.

Rum zet hian a melh a, a lu  abu nghat ringawt. Abby tawng leh hma hma chuan a kal daih mai, chutih lai chuan Linda-i a rawn kal ta hlauh mai. "Ehe...lo leng rawh. Enge ni ta?" ava ti a, Abby pawh chu a lut ve ta a. "Englo ania, Hmingmawia case hi ka kutah puten an dah a. In in hi a kalna hnuhnung ber a nih vangin i fanu hi biak lawk ka duh a, amah a awm em?" a han ti dam thlup mai a.

"Tehreng mai, lo leng thu rawh...ka va ko ange."

Linda-i chu a fanu room lam pan chuan a kal ta a, Abby pawh sitting room ah chuan a thu a. Francis-a chuan kil khat atang hian a lo en leh reng tawh a, Abby chuan ava hmu fuh a. A han nuih a, mahse Francis-a chuan a nuih let ve hauh lo. "He naupang hi min hua amawni le?" Abby chuan a ti rilru nuah nuah mai.

Sangtei leh anu pawh chu an rawn chhuak ta a, Sangtei chu a mit a la bui chur mai. Abby chuan nelawm tak hian a lo nuih a, "I tha maw, Sangte? Inspector Abby ka nia.." tiin a han chibai a, za lo tak hian Sangtei pawh a lo nui suk a. "Choka lamah sawn va inkawm rawh u...thingpui ka'n lum ange." tiin Linda-i chuan choka lamah chuan a hruai phei dun a.

Abby leh Sangtei chu an thu dun ta a, "Sangte...kan ringhlel che tihna a ni lo ania. I thianpa thattu hi kan hriat chhuah ngei angai a, chuvang chuan nangpawh engemaw tal ka zawh che angai a ni. Hlau lo la, thudik takin min chhang ang che aw.." Abby chuan  ahan ti leh a. Sangtei chuan a mittui chu a han hru a, "Awle." a ti zawi sap mai.

"Dar engzat velah nge Hmingmawia chu a lo thlen?"

"Chawhma dar 11 velah."

"Anih leh a haw hma in a chhuak em? KA sawi awmzia chu...la haw silovin, a chhuak zawk a, a rawn let leh emaw..chutiang chuan a awm em?"

"Aih awmlo, kan awmdun char char."

"Dar engzat velah nge a haw?"

"Dar 3 velah a haw a, a minute zat tak chu ka hre tawh lo."

"Anih leh in pahnih inkarah hian buaina a awm hrim hrim em? Ngaih loh lamah lo ngai lo la, nangmahni pahnih thiktu emaw te an awm mial lo maw?"

"Chutiang an awm ka hrelo, hmelma kan neih ka hrelo."

Chutia an inzawh lai chuan Maruata a lo haw ve chiah a, choka lama a fanu leh police inspector lo inbia a hmuh chuan a ding chat mai. Linda-i a lo kal vat a, "Duhtak...ilo haw tawh maw?" a rawn ti a. Abby pawh chuan Maruata chu ava hmu a, mahse a biak hma hma chuan room ah a lut tlang daih mai.

Abby chu a hrilhhai angreng hle a, a lai lek lek bawk. Linda-i chuan a pasal chu room ah a zui lut a, "Saw police sawn enge a rawn tih a?" thinrim lek lek chuan a han ti hlur a. "Hmingmawia thihna chhuitu tur ber ania, Sangtei thu a rawn zawt fiah mai a nih saw." tiin a nupui chuan a lo hrilhfiah vat a.

"KA fanu saw an ringhlel tihna em ni?"

"Amak thin...an rinhlelh vang a nilo."

"Anih chuan tinge sawtia a hranga a dawp vel a?"

"Patling pui si hi...engemaw i at em em le? Hmingmawia kalna hnuhnung ber chu kan in hi ania, chuvang alawm a biak."

Maruata chu a han thaw leh deuh hak a, "A va han buaithlak tak em...Sangtei mai mai chu aww..." a ti vawng vawng mai. "Insum teh...thil thleng tur chu a thleng vek tawh. SAngtei pawh a demawm chuang loh, Hmingmawia hi hetiang hian rawng taka thah a ni dawn tih a hre lawk bik hleinem." tiin Linda-i chuan a hnem hram hram a.

************************

Abby chuan Sangtei chu a zawh chhunzawm zel a, "Anih leh Sangte, i thianpa hian tunhnai deuh emaw khan danglamna riau a neiin i hria em? A mzie danglam emaw, han ngui riau emaw a neih i hria em?" tiin a han zawt leh a. "Neih awm ka hrelo...kan hlim dun lutuk." tiin a lo chhang leh a. "Anih leh i lakah zep ruk a neih i ring em?" a han ti leh a.

"Engtia zep ruk nei maw?"

"Thil zep ruk...i hriat miah loh tura thil zep a neih i ring hrim hrim em?"

"Ring lo..kan inring tawk alawm?"

Abby chu a ding a, "Ummm, vawiin atan chuan tawk phawt rawh se." a ti ta a. Linda-i te nupa pawh chu an rawn chhuak a, "Ehe..in zo der elaw?" Linda-i chuan a han ti a. "Aw...vawiin atan chuan duhtawk phawt ang." tiin Abby chuan a lo chhang a. Maruata chu a han en a, a lungawi vaklo tih chu a hrethiam nghal mai.

Abby bawk chuan, "Pu Maruat, i fanu hi kan ringhlel tihna a nilo ania...." tia sawifiah a han tum chu za lo tak hian Maruata chu a lo khi suk a, "Ka hria alawm...ka hria." a lo ti deuh hmuk mai. Abby chuan Linda-i chu a en a, "Khawngaih Pi Linda, in chhungkua hian lo fimkhur ang che u. Khawiah mah lo chhuak vak lutuk lo ula, Sangtei phei hi chu lo veng fimkhur bik ang che u." tiin a chhuah san ta a.

***********************

Abby chu Stationah chuan a let leh a, kar kal ta lawka rawn join thar, Constable Hlimpuia chuan a lo pan vat a. "Ma'm...ilo va let hma ve?" tiin a lo zawt a. "Nia...a bialnu saw chuan engmah a hre lo niin alang." tiin a chhang a. "E taka..doctor Samuela'n a nghak che." Hlimpuia bawk chuan a han ti leh a.

"Khawnge a awm?"

"Interrogation roomah."

Abby chu a nui suk a, "Teh daih a...hawh..lo kal ve rawh." tiin an pahnih chuan Interrogation room lam chu an pan a. A chhungah chuan Samuela chu lo thu in thlalak a lo en mual mual a, "Hello Doctor thu thar a awm em ni?" tiin a han zawt a. "Enteh Abby, thlalak hi en teh." a lo ti ringawt a.

Abby chu va kal hnaiin thlalak chu a va en ve a, Hmingmawia ruang thlalak a lo ni. Samuela bawk chuan, "Autopsy result a chhuak tawh a, a lan dan chuan tualthattu hian victim lu a vuak nan hian thir a hmang ngei a ni." a han ti a. Abby chuan a lu bu nghatin, "Chuan engtin zel?" a lo ti a.

"A landan chuan a lu ah hian vawi 40 ai tam chu a vua a, a thluak a chenve vel chu a hek hial a ni. Chuan a lu a hliam chhungah hian thir them tuiek lampang hmuh a ni a, ka rindan chuan thirtiang emaw, rod emaw, thir atanga siam hmanrua engemaw tak chu a hmang ngei a ni." a han ti leh a,.

Abby chu a han thaw deuh hak a, "Hetiang khawpa rapthlak tualthahna hi Mizoramah hian a la thlen awm pawh ka hrelo ea.." a ti nuah nuah a. Hlimpuia pawh chuan, "Ni e...tualthattu hi mizo pangngai a nih pawh ka ring lo ea. Hnamdang a ni ngei ngei ang, a che rapthlak emai." a lo ti ve bawk a.

Abby chu a nui suk a, "Mizovin an tih ve ngam i ring lo ami?" tiin a han zawt kher a. "Aa..mizo te chu...a rapthlak berah pawh invih tawp te, in sah tawp te a nia. Tiang em em te chu, ka la hmu ngailo." tiin a lo chhang a. Samuela chu lo inrawlhin, "Tupawh chu nise, he tualthattu hi a nunrawng hle a ni ngei ang. Thinrim tak chunga che tih a chiang a, hmel hmuh tlak awmlo khawpin a sawisa ania." a rawn ti ve leh a.

"Hmingmawia a ni tih an hriat loh nan a ti pawh a ni maithei asin, Hmingmawia identity thup nan." Hlimpuia chuan a lo ti ve leh khauh mai. Mahse Abby chuan a lu a lo thing a, "Anilo...Hmingmawia hmel thup nan ti hian sawisa ni se chu a taksa pum hian a tichhe vek ang, mahse a thawmhnaw engmah pawh hlih sak lovin a kalsan tawp a. A ruang en hian Hmingmawia hretute chuan amah a ni tih an hre dawn tho tho, a pian zawng zawng leh a thawmhnaw hak atang te hian." a lo ti ve thung a.

"A hmanraw hman hi thir chu a ni ta phawt a, mahse a hnutchhiah tlat silova. Hmingmawia thutna te pawh kha kan endik vek a, engmah finger prints a aw lo. Tualthattu hi mi satliah a nilo tih a chiang, a hnu a thup thiam emai." Samuela chuan a lo ti ve leh a. "Khami insakna neitute kha vawiin chhun khan ka bia a, anni pawhin engmah an hre biklo." Abby chuan a han ti ve leh bawk a.

Reife an titi hnu chuan an duhtawk ta a, interrogation room chu an chhuah san ta hlawm a. Abby chuan Hlimpuia chu a ko va, "Zanin enge i tih dawn" a han ti a. A beisei loh lutuk zawhna a dawng ta chu han chhan mai ngaihna pawh a hrelo, "Maw? Keimah maw?" a ti hu mai. "Aw nangmah...nangmah alawm ka biak che." tiin Abby chu a nui a.

"Hehe...engmah ti dawn love." tiin Hlimpuia chu a lai lek lek mai. Abby chuan a han melh vang vang a, "Hlimpui...kum engzat nge i nih khah?" tiin a han zawt leh a. "Kum 26.." tiin a lo chhang a. "Tualthahna case hi i khawih ve tawh ngai em?" tiin a han zawt leh a. "Aih khawih ngailo, mahse case puituah chuan vawi 2 chu ka tang ve tawh." a lo ti leh a.

Abby chuan a lu a bu nghat a, "Anih chu...zanin chu chhuak ila." a han ti chu Hlimpuia chuan a chil a lem dawk mai. A ruk taka chhelo a tih em em, a boss berin chutia a sawm ta mai chu a awih lo lek lek zawk. "Khawnge kan kal ang?" a lo ti hu mai a. Abby chu a nui huk a, "He case ah hian min pui turin ka duh che a ni." a ti ta daih mai.

A beisei loh chhanna mah nise, chutia hnuchhui pui tura sawmna a dawng chu a lawm kher mai. "Mahse...SP Sir ten an phal dawn mi? Keite chu ka lo join na pawh a la rei silova, ka la junior bawk nen." inthlahrung tak chuan a han ti a. Abby chuan confi tak hian, "SP Sir te thu a ni hleinem, case hi ka kutah an dah tawh. Ka kuta awm a ni tawh a, min puitu tur chu ka duh duh ka thlang thei alawm." tiin a chhang a.

"Kei aia thiam an tam awm emai...ka tibuai mai mai zawk ang che."

"Nangmah alawm ka duh...ka train nghal che angah i ngai dawnnia."

Hlimpuia lawm lutuk chu  a nui var var mai, "Ka theih tawp ka chhuah ang, ka lawm e, Ma'm.." a han ti a. Abby chuan lo nuih sakin, "Keipawh le...zanin chu ka rawn sawm dawn che nge minlo sawm dawn?" a han ti leh a. "E nia..mahse khawnge kan kal dawn?" a ti bah leh nuai mai. "Sangtei saw ka ngaihtuah riau mai, a dinhmun saw a him lo." a ti zawi sap a.

"Sangtei te inah kan kal dawn em ni?"

"Um...engemaw zawh leh angai a ni."

Hlimpuia chu a phur khawp mai, "Yes Ma'm...ka lo inring ang." a han ti leh a, a ruk tak chuan a duh ruk leh star ruk em em, Boss Abby bulah a awm tam tur chu nuam a ti kher mai. Chumi zan pawh chuan Hlimpuia chu a tang kher mai, police form hak a ngai lo bawk nen, a inchei nalh angreng phian lehnghal.

Date tur nei ang mai hian a in kap rimtui chuk mai a, a sam pawh a siam rei narawh e. Darthlalang hmaa a han in en vel lai chuan anu chuan a room kawngka chu rawn kik in, "Bawiha, saw Inspector Abby'n pawnah a nghak che." a rawn ti lauh lauh mai a. Hlimpuia pawh chuan, "Awle..ka lo kal." tiin pawn ah chuan a va chhuak nghal a.

Abby chuan Hlimpuia chu a han en a, a nui suk mai. Hlimpuia chuan Abby chu a han en a, simple tak mai hian a lo inchei a. Nui chung hian Abby chuan, "Nula rim nghal i tum ami?" tiin a chhaih a. Hlimpui lai lutuk chu a khi suk a, "Ka...ka inchei dan ve hrim hrim ania." a ti ringawt a. "Umm...kal ila.." tiin Abby chu motor lam a pan a, Sangtei te inlam pan chuan an inphur phei ta a.

***********************

SAngtei chuan thleng a sil mek a, a melh ngai chu a melh tlawk tlawk mai. Maruata chuan TV a en a, chutih lai chuan a phone a rawn ri a. Reilote a biak hnuah chuan Sangtei lam chu ava pan a, "Police an lo kal leh dawn a, an rawn kawm leh dawn che." tiin room ah chuan a luhsan nghal hmak mai.

Linda-i erawh a ngawi reng a, a thil t(r)ui lai chu a thui chhunzawm mual mual a. Sangtei chu a ner nung mai, "Awii..ninawm...rilru hah an ti zual." tiin a phun sap a. Chutih lai chuan Francis-a chu a room atang chuan a rawn chhuak a, Sangtei lam chu ava pan a. SAngtei thlengsilna bulah chuan ava ding a, "Au Sangte, i tap ami?" tiin ava zawt a.

SAngtei chu zalo tak chuan a nui suk a, "Tap love...ka mit a thil lutuk a." tiin a mittui chu a hru zauh va. Francis-a chuan Sangtei kutah chuan a kai a, "Zanin chu minlo riahpui...zanlaiah ka harh thin a.." tiin a han kuah a. Sangtei chuan thleng chu a silo zova, a kut chu hru hulin Francis-a chu a kuah let a.

Nui sang hian, "Um...ka room ah ilo mu ve dawnnia." tiin a biangah chuan a fawp a, Francis-a chu a maimitchhing vang vang mai. Chutih lai tak chuan an inkawtah motor rawn tlan ri chu an hre ta a, "Police an lo thleng ania aw, Sangte." Linda-i chuan a han ti a. Francis-a maimitchhing lai chu a meng kawk mai, kawngka lam chu ava pan a.

Tukverh ah chuan a han dak a, an inkawta motor lo ding chu ava hmu ta. Motor atang chuan Abby leh Hlimpuia te chu an rawn chhuak a, Francis-a chuan a melhrum dun kher mai. Kawngka chu an rawn kik ta, Francis-a chu thinrim hmel tak hian a roomah chuan a lut daih mai a. Linda-i chuan kawngka chu hawngin, "Lo leng rawh u." a han ti a.

Abby leh Hlimpuia pawh chu an lut a, "Tikhan lo thu ru, thingpui te in in duh em?" Linda-i bawk chuan a han ti leh a. Inla polite tak hian Hlimpuia chuan, "A ngailo mai...chaw kan eikham chiah a." a lo ti nghal zung zung a. Abby chuan Hlimpuia chu a en deuh hru mai a, "I duh velo maw...keichuan ka duh asin." a ti daih mai.

Hlimpuia chu a zak kher mai, "E..aw..duh...duh nang..aw duhlo." a ti bah nuai mai. Abby chuan Linda-i chu enin, "Keiman ka lo duh ang, a hangin aw.." a ti a, a thu a. Hlimpuia pawh inthlahrung tak chuan a thu ve mai a, Sangtei chuan a rawn pan ta a. An hmaah tak chuan a thu a, "Chaw i ei tam em, Sangte?" tiin Abby chuan a han zawt a.

"Umm.." tih ringawt hian a chhang a. "Englo ania, kan lo kal leh na chhan chu  engemaw dang han zawh leh che kan duh a." tiin Abby chuan a han hrilh fiah leh a. Sangtei chuan  alu a lo bu nghat ringawt, "Hmingmawia kha a phone hmuh a nilova, trace kan tum pawhin a theih miah loh mai a. In ina a rawn len hian a theihnghilh te a ni em lo maw?" tiin a han zawt a.

"Aih..theihnghilh lovang. Theihnghilh se chu ka hre em em ang."

"Umm...anih leh nimin khan in inah rawn leng lut an awm em?"

"Aih tumah an awm lo...kei leh Hmingmawia leh ka nau Francis-a te kan ni mai."

"A nih tak chu...Sangte, chhan a zahthlak deuh maithei a, mahse zawitein min chhang dawnnia, i nu leh pate ka hrilh miah lovang."

Sangtei chuan a lu a bu leh nghat ringawt a, "In school ah emaw...nangmah ngaizawngtu an awm em? Nangman i duh siloh emaw?" tiin Abby chuan a han zawt leh a. "Aaww..awm ve nual e. Mahse bialpa ka nei tih an hria a, min be chhunzawm ngai lo." tiin a chhang a. "Anih leh chung zingah chuan han sual fal deuh emaw an awm em?" tiin a han zawt leh a.

"Engtia sual fal deuh maw?"

"Entir nan school ah pawh thu awihlo fal, insual ching, ruihtheih thil ti leh an hnawhchhuah hial khawp emaw te an awm em?"

"Aa..chutiang an awm pawh ka hrelo."

Abby chuan a lu a han bu leh nghat nghat a, "Anih leh Sangte, nangmah hian rinhlelh deuh te i nei em?" tiin a han zawt leh a. Sangtei chuan a lu a thing a, "Rinhlelh tur awm ang ka hre lo." tiin a lo chhang leh a. Chutih lai chuan Hlimpuia pum chu a rawn nuam lo ta tlat mai, "A va hunlo tak." a ti rilru nuah nuah a.

Linda-i chu lo kalin Abby chu thingpui a rawn pe a, "Ka pi...in bathroom ka lo hmang lawk thei angem?" tiin Hlimpuia chuan a han zawt a. Linda-i chuan an bathroom chu kawkin, "Aw..saw ta saw." tiin a chhang a. "Ka lawm e." tih pah chuan bathroom lam chu ava pan a, a lut tur chiah chu a hnunglam atang chuan Francis-a chuan a rawn luh khalh nalh mai.

Kawngka chu chhunglam atang chuan a kalh nghal hmak bawk a, Hlimpuia chuan tih ngaihna vak a hre lo. A va let leh a, "In fapa kha..a lut daih a." a ti ringawt a. Abby chu a lo nui suk mai, "Aww avan pawi tak...pawnah sawn ek in chu a awm tho a, kan hmang ngai vak lo a. Mizopa ekin ang kha ania, i hmang thiam tho ang chu maw?" Linda-i chuan a han ti leh a.

A chhan hma hma chuan Abby chuan, "A thiam lutuk, an ekin pawh mizopa ek in alawm." tiin a lo nui a. Za lo tak leh zak ru tak chung chuan Hlimpuia chu a khi suk a, "Awle..ka lawm e." tiin a chhuak ta a. A han inthiar zawh hnu chuan kawngka chu a hawng a, a hma zawn a en chu a phu nasa kher mai.

"Ehe..karei.." a ti vak a, a tawlh hnung dawr mai. A hma zawnah chuan Francis-a chu rum zeta meng hian a lo ding reng mai a, Hlimpuia chu a inthiam lo hnuhnawh leh khawp a, "Mama..hehe...min ti phu nasa lutuk alawm." tiin a han nuih tlawn a. Mahse Francis-a chuan a chhang miah lo, Hlimpuia chuan mak a ti angreng hle mai.

"Khawnge i kal dawn a? Enge i tih a?" tiin a han zawt leh a, Francis-a chu ala ngawi reng. An in en deuh vang vang hnu chuan, "Kan zawhte ka zawng a." tiin a chhang ta a, Hlimpuia pawh a thaw huai mai. A kekawr kawng siam that pah chuan inlam chu a pan a, "Ka lo zawnpui dawn che em ni?" tiin a han hawi kual ve vel a.

Mahse chhanna a dawn tak lo avang chuan lehlam chu hawi leh in, "Mama..in zawhte chu.." a tih lai chuan a ngawi ta hmak mai, Francis-a chu a lo awm tawh reng reng lo. "Mama...Mama.." tiin a hawi kual a, a han zawng a. Mahse a hmu hauh lo mai, "Khawnge maw a kal hman daih le?" ti nuah nuah chung chuan inchhungah chuan a lut leh a.

A luh rual rual chuan Abby chu a tho a, "Kan lawm lutuk e, kan haw phawt ange." a ti ta daih mai. Linda-i pawh chu lo pheiin, "Ala hma alawm, thingpui te in leh ula." a lo ti ve bawk a. "Kan haw zawk ange, kan lo leng leh thin ang. Chuan maw Sangte, contact theih khan awm reng la, zanah chhuak lo hram ang che aw.." tiin Abby chuan a hrilh mawlh mawlh a.

Chutih lai chuan bathroom kawngka chu a rawn ri rak a, Francis-a chu a rawn chhuak ta mai a. Hlimpuia chuan mak a ti kher mai, a en vung vung ringawt a. Francis-a lah chu ngaih that hmel zet hian a room lamah a phei tlang daih a, Hlimpuia chuan a en zui vawng vawng mai. Pawn thleng chuan an inthlah a, car ah chuan chuangin an haw ta a.

**************************

An tlan lai chuan Abby chu a tawng mawlh mawlh a, mahse Hlimpuia erawh mak tiin a hma lawka a thil tawn chu a ngaihtuah let vung vung mai. A tawng a ngaithla lo nia a hriat avang chuan Abby chu a ngawi ta a, Hlimpuia chu a han en a. Hlimpuia chu a melh ngai melhin a lo la thu ngawi reng mai, "Enge i ngaihtuah a?" tih pah chuan a han nghawk zeuh va.

A la phu zuk zui a, "Aaa..eng..eng nilove." a ti bah nuai a. "Ehe..ka thil sawi kha ilo ngaithla miah nange?" tiin Abby chuan a han zawt a. "Ngaihtuah e...ka ngaithla reng alawm." tiin a chhang leh a. "I ngaithla lo anih kha...tiang te chuan thawpui i va har dawn ve?" tiin Abby chuan a han melhrum der vel a.

"Ihmaw Ma'm..pawna ka inthiar lai khan an fapa kha pawnah a rawn chhuak em?" tiin a zawt ta tawp mai a. Mak tih hmel tak hian, "Enga? Rawn chhuak nang. I rawn luh chiah khan bathroom atangin a rawn chhuak ve chauh alawm...ngatinge?" a lo ti hu mai. "Pawnah khan ka hmu bawk sia, zawhte ka tibo atia..a lo zawng a." Hlimpuia chuan a han ti leh a.

"Aww...naupang dang aniang chu."

"Ani lo...an fapa kha alawm."

"An thenawmah khan naupang amah ang rual vel an awm ve tho a, keipawn ka hmu alawm vawiin tlaiah pawh khan...an in ang reuh em a, i hriat pawlh aniang."

A lu thak lo pui chu hiah nauh nauh pah chuan, "Nia....a ni ve thei tho." a ti ve ta mai a. Hlimpuia te inkawt chu an thleng a, "Ma'm...naktuk ah enge kan tih leh dawn?" tiin a han zawt a. "Naktukah chuan Hmingmawia te inah kan kal ve thung ang." tiin a chhang a. "Umm...vawiin khan i kal amaw ka tia?" tiin a lo zawt leh a.

"Kal e..mahse boruak kha  arit hrih em a, an tuar na bawk nen. Naktukah a aia chik zawkin kan zawt leh dawnnia...Hmingmawia taksa ah khan finger prints engmah a awm lova, mahse Dr. Samuela khan kutlawnga hnekna leh benna kha a taksa ah khan a hmu nual a, chuvang chuan tualthattu hian glove a bun a ni ngei ang."

"Awle..anih chuan Boss...ka haw phawt ange aw.." tiin chhuah a tum a. Mahse a kutah chuan Abby chuan vuanin, "Ngawi teh lawk..Hlimpui, thawhpui nuam min ti em?" tiin a han zawt a. Inthlahrung tak hian, "Nuam e...ka tan pawh hmasawnna tha tak a nih ka ring." tiin Hlimpuia chuan a lo chhang a.

Abby chu a nui sak a, "Ka lawm e, muttui aw.." a han ti a. "Muttui le, Ma'm." tiin Hlimpuia chu a chhuk a. Abby nen chuan an in bye-bye a, a tlan liam ta a. KAwng kawia a tlan liam thleng chuan Hlimpuia chuan a thlir zui vawng vawng mai, "A va han hmeltha tak." tiin a phun sup a, inchhung lamah chuan a lut ta a.

******************************

TO BE CONTINUE