UNHOLY CONFESSIONS (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 1

 UNHOLY CONFESSIONS

(MIZO FICTION TEEN SLASHER/HORROR STORY)

Written by : Aaron Malsawmdawngzuala

WARNING : 18+

Chapter - 1

***********************

(Nizan ah post ka tum a, mahse khua a chhe lutuk a. Phone atangin story hi ka type ve thiam silova, computer atang zelin ka ti vek thin a, chuvang chuan nizan khan computer kha ka on ngam ta lo a ni. July 12 zanah ka ti a, mahse ka theih leh tak siloh avangin min ngaidam dawnnia. Chuan heipawh hi a thui dawn lova, chapter 6-7 vel bak a ni dawnlo tih kha min lo hriatsak leh ta ula. KA story te hi in lo share ve duh anih chuan khawngaihin blog link nen zel hian share hram ula, copy paste lo hram ang che u. Tin, thil pakhat leh...ka story te hi youtube lamah an chhiar ve nual tawh a. Story hi ka ziah hma hian youtube lama chhiar tu tur(youtuber) hi kan ruat lawk sa ve vek a, kan sawifel sa vek thin tih min hriat sak dawnnia. Youtube lama an chhiar zawh tawh hnua min rawn la dil leh chhiar nawn leh min dil hi an awm fo thin a, rem ka lo siam fel pui tawh te chungah a inthlahrunawm thei si a, chuvang chuan "KA PHALLO..CHHIAR NAWN A CHI LOH." tia han inhrilh fawk fawk hi nuamlo hle mahse hman a ngai leh thin hi a pawi ka ti thin. Tin, min dil lem lova mahni thua lo chhiar ringawt hi an awm bawk thin a, khawngaihin ti tawh lo turin ka ngen bawk che u. KA LAWM E.)

*************************

College Farewell Night zawh hlim a ni a, after party ah chuan college zirlaite chu an lam suau suau mai. Mitin mai chu hlimin an nui a, zu an in a, a then lah bang kilah an lo in fawp tawn tawn bawk. Professor leh lecturer te an awm ve lo bawk nen, chung college zirlaite chuan nuam an ti hle mai.

Mahse chung zingah chuan nuam ti ve hauh lo, a thiannu in a sawm luih tlat vanga kal ve mai mai hi a awm a, a hming chu Abawihi a ni. Party na a la kal ngailo a ni a, ruihtheihthil engmah a ti ve ngai hek lo. A thiannu a ven thawn em avang chuan peih lo leh hreh tak chungin a kal ve a, a thiannu ber, Mary lah chuan a lam san daih lehnghal.

Kil khatah chuan thu in thei tui a in a, amah chauh chuan a thu a. Sana a han en a, dar 12 a pel tawh. A chhungte lah chuan an rawn call sek tawh mai a, mahse a la ngam tawh lo hial zawk a ni. "Ninawm, ka lo kal pui kher kher a ni." tiin a phun nuah nuah mai. Chutih lai chuan an college-a lerh tak leh thawveng ve tak mai, Sawmtea chu a rawn kal a.

Abawihi bulah chuan a rawn thu a, "Hello..i va mal ve a?" tiin a han thut hnaih a. Mahse Abawihi chuan a lo eilo kher mai, "Mahnia awm nuam ka ti zawk." tiin za lo tak chuan a lo nuih a. "In tur i duh em? Ka khilai dawn che em ni?" tiin a han sawm leh a. "Ka duhlo..ka lawm e." a lo ti leh hmak mai.

Sawmtea chu a han nui deuh suk a, "Tunge i hming ni a?" tiin chibai a rawn tum a. Abawihi chuan a thut hlat a, "Abawihi.." tih ringawt chuan a chhang leh hmuk a. Sawmtea rui lutuk chuan, "I chhelo reuh hle mai." tiin a kut chu Abawihi khupah chuan ava dah a. Abawihi ngaihdan a ni ta lo, a ding thut a.

"Min khawih reng reng suh." tih pah chuan a juice in lai chuan Sawmtea hmaiah chuan a leih a. Thinrim tak chung chuan pawnah a chhuak daih mai a, midang ho chuan an lo en thap mai. Sawmtea zak lutuk chu a harh kawk kawk thei hial a, pawnah chuan a chhuak ve nghal a. Thenkhat chu an lo nui dar dar a, thenkhat chuan an lo kamkhat deuh hlak bawk.

Abawihi chuan a scooty lam ava pan a, scooty bulah chuan a ding a. A phone phawrhin a thiannu MAry chu han call a, a lo la pick up thei lo zui. Vawi 7 vel a call hnuah chuan a rawn la ve ta, "Lo chhuak rawh, haw tawh ang." a ti vin hlur mai a. "Ala hma...a ninawm, lo lam ve zawk rawh.." tiin a lo chhang a.

"Mipa ho lah hi an tenawm si..ka chhungten min rawn phone nasa tawh lutuk."

"Ninawm..lo va haw mai rawh."

"I mawl ami? Hawna tur pawh i neih loh kha.."

"Hei..bialpa thar ka nei, min rawn thlah haw mai ang."

Thinrim tak chuan phone chu a dah a, "Kawm tlak loh lutuk, a hre ve tawh viau ang." ti nang nang chung chuan haw a tum ta a. A haw hma chuan bathroom lam chu a pan a, bathroom chhungah chuan lutin zun ram te a han thiar a. Tichuan a make-up te chu a han hru reh a, a intihfai zawh hnu chuan a chhuak ta a.

Mahse a chhuak chiah chu Sawmtea a lo lang thut mai, "Zawngi, nang hian min ti zak ve khanglang amaw?" tih pah chuan a rek thut a, Abawihi hmuiah chuan a hup nghal a. Bathroom ah chuan a nawr lut a, zun in bula tumah an awm loh lai a nih avang chuan tuman an hre hauh lo. Abawihi chu bangah a rek bet a, "Min hnial ve khanglang amaw? Ka han khawih tak tak teh ang che." tiin Abawhi kawr chu a pawtthler ta mai.

Chutia an insual buai lai chuan kawngka chu a rawn inhawng thut mai a, mipakhat hi a rawn lut a. Chupa chuan kutkawr dum a bun a, jumper lukhum nei hi a ha bawk a, truck kekawr dum a ha bawk. Face Mask dum a vuah avang chuan a hmel a lang thei lova, a mit erawh chu a lang thei thung.

Sawmtea chu bangah chuan a rawn rek bet a, a lu a ri dawt mai. Abawihi chu tap zawih zawihin a rawn tho chhuak a, amah rawn chhantupa chu a en a. Chupa chuan Abawihi chu ava en ve leh a, chhuak turin zaizir chuan a hrilh a. Abawihi chuan chupa jumper hak laia chiang taka SHADOW X tih inziah chu a hmu a, rang takin pawnah chuan a chhuak ta a.

A scooty lam chu a va pan a, a la tap bang thei lo. Zunin lam chu ava en leh a, mahse kawngka chu a lo inhawng huau a, a chhung pawh a lang thei vek a. Mahse zunin chhungah chuan tumah hmuh tur an awm lo, a scooty chu ti nungin a tlan ta vang vang mai. MAhse a thiannu Mary chu a hre chhuak zawk a, "Ka hawsan angem? Nge ka let leh ang?" tiin a rilru chu a insual nasa mai a.

Khatiang khawpa mipa zaktheilo leh rapthlak tamna hmuna a thian kawmngeih ve ber, Mary rui chunga a awm tur chu a ngai ngam ngang lo. Thui pawh a la tlan lo tih ah chuan a ding a, in-turn lehin party na hmunah chuan a inkhalh let leh ta a. Reiloteah chuan a thleng a, scooty chu side tha in inchhungah chuan ava lut leh ta.

An lo la lam mup mup mai a, hmeichhe thenkhat phei chu mak lang vek khawpin an lo chatthla tawh vel. Mary chu a zawng kual a, lamtualah te chuan a va phei ve a. Mahse an tam em avang chuan a hmu zo lo, a call lahin a la thei bawk silo. Chutih lai chuan current a rawn thim thut mai, "Ava ho e.." tiin an phun nang nang hlawm a.

Chutah a rawn eng leh a, an au leh dur dur mai. Mahse mak tak maiin an hla play-na big screen ah chuan thildang a rawn lang ta daih a, an hawi chho thap mai. Screen ah chuan Sawmtea chu thi hnuang hian a lo lang a, thutthlengah phuar beh a ni bawk. "Ehe..khi chu Sawmtea ava ang ve." tiin Sawmtea thiante chu an phun sap sap hlawm a.

Thenkhat chuan, "Prank mai mai bak va ni suh." te an lo ti thul. Hla playt tu ber DJ lah chuan siamthat a han tum a, mahse video chu a la inplay zel mai si. A Switch te chu a han phawi thul, mahs engmah awmzia a nei tlat lo. Zirlai ho zawng zawng chuan Screen chu an en ta thap a, Abawihi pawh chuan a en ve kar mai.

Chutia a hma lawka pawngsual tumtu Sawmtea, thi hnuanga a han hmu chu mak a ti kher mai. Sawmtea chu nikhawhrelovin a awm reng a,"Enge awmzia? Police call rawh u." tiin thenkhat chu an mangang der tawh. Chutah Screen ah chuan mipakhat hi a rawn kal phei a, mahse a lu erawh camera chuan a cut chiah chiah thung.

Camera hma takah chuan a rawn ding a, a jumper hak laia SAHDOW X tih lo inziak chu Abawihi chuan a en ngun hle mai. A mitthla chuan chu jumper ha pa ngeiina a rawn chhan lai te chu a hmu nghal zawk zawk a, a hrethiam lo ngei mai. Chupa chu a rawn tawngchhuak ta a, mahse a aw chu robot tawng ang mai a ni a, voice effect a hmang tih chu an hrethiam nghal.

"Good Evening...invaiin chibai ka buk a che u. ZAnin hian inpuanna tenawm tak leh rapthlak tak in ngaithla dawn. A inpuangtu tur chu tuna in hmuh mek, in thianpa SAwmtea hi a ni." tih pah chuan Sawmtea chu a beng pawp a, a rawn harh ta. Chuveleh camera chu a en a, "Min chhan ru..khawngaihin min chhan ru." a ti ta chel chul mai a.

Shadow chuan a ipte atang chuan grenade halpuah hi a phawrh chhuah a, Sawmtea luah chuan halpuah pahnih chu a bek lehlam ve ve ah cello tape chuan a char hnan a. "Nilo..enge i tih? Min chhuah rawh...tunge i nih?" tiin Sawmtea chu a tap pur mai. Zirlaite chuan fiamthu mai mai chu a nih an ring ta hauh lo, "Engtin nge ni dawn? Tu emaw khan va chhan ta che u..." tiin hmeichhe ho chu an mangang tawh kher mai.

"Hey..tunge i nih a?" tiin mipa thenkhat ho chu an han au vak vak thul, mahse Shadow chuan a ngaihsak lo kher mai. Chutah camera bulah chuan a rawn ding leh a, "Nunna hi a hlu a, kan nun hi kan uluk tur a ni. Mi famkim tumah kan awm lo, tupawhin thil kan tisual vek. Nunna pakhat chauh kan nei a, chupawh chu chatuana nung tur a nilo. Thi turin kan lo piang a, chuvang chuan kan damchhung tawite ah hian kan nunna neih chhun hi kan hlut hle tur a ni." tiin a rawn tawng chhuak leh a.

"Police phone vat rawh u." tiin zirlai zinga pakhat chu a han au tuar a, chuveleh carrent chu a rawn phe zawk zawk mai. Camera hmaah chuan a rawn ding leh a, "Tumah khan police in phone tur a nilo, a nih loh chuan tunah hian Sawmtea hi a thi nghal ang." tiin lighter chu a hmet alh ta mai a.

Sawmtea hlau lutuk chuan, "Nilo...ti su...tuman call su...min khawngaih hram rawh u." a ti chel chul mai. Midang ho pawh chuan an call ngam ta hlawm lova, Abawihi erawh chuan ngawi rengin a en reng thung a, chet pawh a che eih lo. SAwmtea chuan tap chung hian, "Tunge i nih? Engvangin nge heti hian min tih?" a han ti vin vak vak a.

Shadow chuan a han en a, "A chhan chu thil i ti sual a ni.....nunna hlu tak chu nang hian awlsam takin i la a ni." tih pah chuan granade fuse chu fuse dangin a han zawm leh mual mual a. "Enge ka tihsual? Engthil nge ka tihsual a?" a han ti leh a. "Tual i that...mi nunna i la a ni." tiin a lo chhang a. "Tumah ka that lo..min hai a ni ngei ang. Khawngaihin min chhuah rawh...engthil mah ka tisual lo." tiin a au vak vak a.

"I thil tihsual chu tunah hian i zirlai puite zawng zawng hriatah i puang dawn reng alawm, Sawmte. Vawikhat i tisual a, nunna hlu takin a tawrh phah a. Chu chu tunah hian i siamtha dawn a ni, i siamthat theih ngei pawh ka ring." tiin camera lam chu ava en a, zirlai ho chuan chik tak hian Shadow hmel chu an lo en a.

Mahse face mask dum a vuah a, a mit chauh a lan theih avang leh jumper hoodie chu a khum tlat avang chuan a mit pawh chu a lang chiang thei lo. "He granade pakhat lek pawh hian a hmai chanve hi chu a ei chhe vek thei ang, mahse a pahnih a  a puak a nih erawh chuan a hmel hmuh tlak a awm tawh lovang. Ka sawi anga in awm lo a nih chuan Sawmtea hi a thi ang, Sawmtea pawh a inpuang vat lo a nih chuan a thi ang." a han ti leh a.

Zirlaite chu an mangang hle mai a, mahse an tawng rik hlek chuan Shadow chuan thah ah a vau zel mai bawk si. Granade fuse chu chhuat thleng chuan a zawm a, a sei ngang mai. Chutah camera lam chu ava en a, "In vai khan in phone phawrh vek ula, he video hi camera in la rawh u." a han ti leh a, zirlaite chuan a sawi ang chuan an ti ve zel a.

"He thil thleng mek hi he video tawp thleng in la tur a ni." tiin Sawmtea chu ava melh ve leh a, "He college a i thuruk kha puang chhuak ang che...he fuse hi ka hal anga, chumi hmaa i inpuang lo a nih chuan lu i nei tawh lovang. Inpuang rawh, anih loh chuan i thi ang." tiin fuse chu a hal tan ta mai a, a kang chho chak em em mai lehnghal.

Zirlai ho chuan an phone chuan an record thap a, hmeichhe thenkhatte chu an tap pur tawh mai. Mipa ho lah in han tih vak ngaihna an hre silo, a then pawnah an tlanchhuak thul. Abawihi pawh chuan video chu a en reng a, a hmui a hup ringawt a. Fuse chu a kang kai chho zel a, "Tihsual ka neih ka hrelo...enge ka tihsual ka hrelo." tiin Sawmtea chu a rak nasa mai.

Zirlaite chuan Sawmtea chu an au vak vak a, "Sawmte..inpuang mai rawh, inpuang mai rawh." an ti vak vak a. Sawmtea chu a tal vak vak a, "Ka hrelo..engmah ka tisual lo." ala ti fan a. Fuse chuan a dul zawn thleng chu a kang kai chho ta, "Enge ka tihsual ka hrelo..ihh..zu ka in thin a, damdawi pawh ka ti." a han ti a, mahse Shadow chu ala ding ngawi reng mai.

Sawmtea chu a hlauthawng em em a, "Enge a dang ka hrelo..ka..ka pa pawisa ka ruksak a, ka..ka...ka bialnu ka bum tawh bawk." a han ti leh hlawp hlawp mai a, mahse Shadow ber chu a la che eih lo. Fuse chu a kang chho zel a, a hnute zawn a thleng ta hial mai. "Ka hre tawhlo...enge ka hre tawh lo." tiin Sawmtea chu a rak vak vak tawh mai a.

"Sawmte...ngaihtuah rawh...ngaihtuah chiang la, inpuang mai rawh." tiin zirlaite chuan an au vak vak a, a tawpah Sawmtea chuan hreh hmel tak hian, "College building..2nd floor-a kangmai chhuak kha...ka..ka hal a ni. Mi pathum lai an kan hlum tak kha..keima hal a ni. Nunna chan an awm  ka ring biklo, mahse ka duh thu ngeia hal ka ni." a ti ta a.

Zirlaite chu an ngawi ta thiap mai, chutah Shadow chuan fuse kang lai mek chu ava hmet hlum ta a, Sawmtea pawh a thaw huai mai. Zirlaite zinga pakhat chuan, "A inpuang tawh...kal tir tawh rawh..a inpuan tawh kha.." a lo ti vat a. Mahse Shadow chuan fuse chu a hal tha leh ta mai a, "Hey..ka inpuan tawh kha..enge i tih a?" tiin Sawmtea chu a tal leh vak vak a.

Shadow chuan rum takin a melh a, "Ngaihdamna...ngaihdamna ala awm lo." a ti leh ta tlat mai. Zirlai ho chu an mangang em em a, "Kan ngaidam..kan ngaidam alawm..that suh." tiin an ngen leh a. Mahse Shadow chuan a lu a thing a, "Nangi ngaihdam ve ngawt theih a nilo...he college ah hian zirlai mai chauh in ni." a ti leh ta tlat mai.

Pakhat chuan thinrim tak hian, "Tu phiangsen nge i nih a? Mawhh...tuin nge ngaidam anga?" a ti vak vak mai a. "In principal...Professor Lalchungnunga." a ti ta daih mai. "Hetah a awm hleinem...engtin nge a ngaihdam theih ang?" tiin an han zawt leh a. "Call rawh u..video call in...he fuse a ral hma ngei hian a ngaidam tur a ni." a ti a, a kal sawn ta daih mai.

"Min..min chhan ru..khawngaihin...Sir Chungnunga chu call rawh u." tiin a rak leh chul mai a, zirlaite chuan hmanhmawh tak chuan an principal chu an call a. Mahse a busy zel mai, Abawihi chu stage ah ava chho a. Microphone chu la in, "A rualin call suh u...pakhat khan call rawh se. A ruala in call vangin a busy a nih kha..." a han ti lauh lauh va.

"Nangmah khan call rawh." tiin a bula hmeichhia chuan a lo ti a. Midang pawh chuan, "Call rawh.." tiin an lo nawr ve nghal vak vak bawk a. Abawihi chuan a call ta, mahse a inring char char ringawt a. Fuse lah chu Sawmtea khabe zawn thleng a kang tawh, "Ti vat vat teh u..khawngaihin.." tiin a tap nasa tawh mai.

A ring char char a, chutah a inreject daih mai. Rang takin a call leh a, mahse an principal chuan a dah busy ta zel mai a. Fuse chu a kang sang telh telh a, a beng bul a thleng tawh. A tawp a tawpah chuan an principal chuan a rawn la ta, "A la..hei a la e." tiin Abawihi chu a au vak a. A phone camera chu screen lamah chuan a hawi tir a, an pricipal hmel pawh a rawn lang ta.

Principal chuan screen-a Sawmtea phuarhbeh a lo thu chu ava hmu a, a hrilhhai hle mai. Mahse engmah an sawi hma chuan granade chu a puak ta a, Sawmtea lu chu a darh vek mai. Thisen a baw nuai nuai a, camera ah chuan Sawmtea thluak a la rawn per zui. An rak nuai nuai a, Abawihi chuan a phone chu a off nghal a.

Screen pawh chu a thi hmak mai, pawnah chuan a then chu an tlan chhuak sup sup bawk. Inchhung chu a ri nuai nuai hi a ni ber mai, a then chuan police an call nghal vat bawk. Abawihi chuan Screen hnuaia engemaw lo lawr chu ava hmu a, a va pan phei ta. A va enchian chuan mic a lo ni a, "Kan tawng a hre thei kha a mak ka ti reng a ni." a ti nuah nuah mai.

*******************************

(AFTER 6 MONTHS)

Abawihi pawh senior a lo ni ve ta a, Mary nen chuan an lai inkawm reng tho va. Sawmtea thihna chungchangah pawh khan engmah chhui chhuah a ni ta lova, a ruang erawh ramhnuaiah daih hmuh a ni thung. Khami hnu khan engmah a thlen zui lem loh avang chuan boruak pawh a pangngai leh tan a, mahse Sawmtea thih dan erawh chuan sawi zui a hlawh nasa hle thung.

Principal call tu ber a nih avangin Abawihi pawh khami zan khan Police a hmachhawn a, a tan chuan zan duhawm loh ber a ni hial ang. Khami hnu phei kha chuan Abawihi hian an college mipa ho chu a nel lo lehzual a, SHADOW X a mit ngeia hmutu a nih thu erawh ala zep tlat thung a ni.

Nikhat chu Abawihi chuan 1st period chu a nang hman lo hlauh mai a, call a luh chu a peih ta lo law law a. Ground lamah chuan ava phei a, amah chauh chuan thuin a phone a khawih mual mual a. Chutih lai chuan hmeichhe pakhat leh mipa pahnih hi an rawn kal a, Abawihi bulah chuan an rawn thu ve a.

An pathum chuan an titi mial mial a, Abawihin ava en chuan rawn lut thar, junior an ni tih a hrethiam nghal. Abawihi chuan a aw a han thian kharh kharh a, "Junior ami in nih a?" tiin ava zawt a. Hmeichhia chuan, "Aw ni e." tiin a lo chhang a. Mipa pakhat zawk chuan, "Ruthi..hawh..thil va lei lawk ang." a han ti a.

Mipa pakhat zawk chuan, "In ninawm..thir wheel reng hi ka ning. Va lei teh u...in bulah ka awm ve tawh lovang." a lo ti fiamthu a. Ruthi chuan nui chung hian, "Kan va kal lawk ange..kan tlai ta sa sa, hmahnawh angai lo." tiin a bialpa Bena chu a han kuah a, dawr lam pan chuan an kal ta daih a.

Abawihi chu a lo nui vur vur a, "An kawm duh na che nge?" tiin a lo fiam ve a. Chupa chu a lo nui a, "Kan fiamthu vel mai mai a nih kha...ka thian neihchhun te pahnih an nih kha." tiin a lo chhang a. "An inngaizawng ami?" tiin Abawihi chuan a han zawt leh a. "Umm..ka third wheel reng mai a nih hi." tiin a lo nui vur vur a.

"Abawihi ka nia.." tiin a chibai a, "Alex-a ka nia...senior i niang maw?" a lo ti a. "Umm..senior most chu kan ni ve tawh." tiin a lo chhang a. An pahnih chuan an titi tui ta phian mai, an sawi duhzawng lah a lo inmil em em mai lehnghal a. Chutih lai chuan Abawihi phone chu a rawn ri a, Mary a lo ni.

"Hello.."

"I lo kal dawn lo ami?"

"Ka lo kal..ka tlai a, ka rawn lut peih lo a nih kha."

"Anih chuan lo lut vat rawh."

"Sir, a chhuak tawh ami?"

"Chhuak lo se ka rawn phone thei dawn che mi? Lo lut vat rawh, teacher dang an lo kal leh hmain."

"Awle ka lo kal."

Phone chu a dah a, "Hawh...lut ila. Nge..i thiante ila nghak dawn?" tiin Abawihi chuan a han sawm a. "Ka lo nghak law law ang, lo phei san daih chu a nuam lo." tiin Alex-a chuan a lo chhang a. "Umm...anih la luhsan ang che aw." a han ti leh a, Alex-a chuan a lo nuih sak a. "Kan inkawm leh thin dawnnia." tiin Abawihi chuan a luhsan ta a.

********************************

Ban a lo hun ta a, Abawihi leh Mary te thian dun chuan scooty lam an pan mek a. Abawihi scooty bulah chuan Alex-a, Ben-a leh Ruth-i te chu an lo awm a. "Ehe...in bang ve tawh em ni?" tiin Abawihi chuan a han zawt a. "Bang han tih ah..hemite pahnih vang hian ka ban hma a ngaih phah dawn a nih hi." tiin Alexa chuan a lo chhang a.

"Enge awmzia?" tiin Abawihi chuan a han zawt leh a. Alexa chu a nui a, "Tunah last period ala awm a, mahse an lut peih tlat silova. Ka han lut ang ka tih lahin an phal bawk siloa, an hahthlak ania." tiin a han khi suk a. "I mawl thei lutuk..dawt hian min puh vak vak zel suh, mi zingah lehnghal." tiin Ruth-i chuan a han sik vak a.

Mary chuan chumite pathum chu a han en vang vang a, "Abawih, i hmelhriatte em ni?" tiin a han zawt deuh hu mai a. "Um ni e..tukin khan 1st period an lo tlai ve tho va." tiin a lo chhang a. Mary chuan nui sang hian, "Mary ka nia...juinior in niang maw?" tiin a han chibai hlawm a. "Aw ni e, kei hi Alex-a ka nia, chuan hei hi ka thiante, Bena leh Ruthi te an nih hi." tiin Alexa chuan a lo chhang a.

Mary chuan Bena te chu a han en a, "In inngaizawng chiang." tiin a han fiamthu zeuh va. An inkawm ngeih ta phian mai a, Abawihi te thiandun pawh chu haw mai lo chuan an han thu kawi leh a. Mary chuan sana a en a, "Ehe Abawih, a tlai tawh emai..keini chu haw phawt teh ang." a han ti a.

An tho dun a, "Anih kan hawsan phawt mai ang che u." tiin Abawihi chuan a han thlah hlawm a, "Ni e...keini pawh kan haw tep..anih phawt u." tiin Alexa chuan a lo chhang a. Abawihi chuan scooty chu a han ti nung a, Mary chu rawn chuangin an tlan ta a. Side glass atang chuan Abawihi chuan Alex-a chu a han melh leh zeuh va, a nui var var mai.

An tlan lai chuan, "Hey Bawihi...Alex-a kha ala naupan hmel e." a han ti zauh va. "Nia..kum 18 chauh ala nia lawm...kan inkawm hrep hman alawm." tiin a lo chhang a. Mary chu a nui a, "In inhmeh ngawt ang, ni daih ula ka ti." a han ti fiam a. Abawihi chu a khi suk a, "Awi..kan in upat hleih dawn emai." tiin a lo chhang a.

Mary te in chu an thleng a, an inthlah fel ta a. Abawihi chu a tlan leh nghal char char a, MAry te in hi a hnai zawk a, anmahni in erawh Mary te in atang hian ala hla angreng hle thung. Chutia a tlan mek lai chuan a scooty ke hnung chu a thep tlat hian a hria a, a kawi deuh zawk zawk mai. A ding a, chhuk meuh chuan a han en a.

A hlauh ang ngei ngeiin a ke hnung chu  alo thep a, "Awii pawi lutuk." a ti vawng vawng mai. Workshop hnai ber lah ala hla ropui si a, let leh dawn pawhin a hnai ber chu Mary te in thlen hma daih ala ni tho bawk si. Kawngsirah chuan a side tha a, a thu tum bur mai. A phone a han phawrh a, mahse call tur mai a hre silo.

Chutih lai tak chuan Alex-a te thian pathum chu an rawn tlan hlauh mai, Abawihi an hmuh chuan an ding a. "Ehe..U Abawihi chu..enge hetah i tih a?" tiin Alex-a chuan ava pan a. Za lo tak hian Abawihi chu a lo nui a, "Hei..a ke a thep a." a lo ti zawi sap ringawt. "Ava zialo ve aw...hmanrua i kawl em?" tiin a han zawt leh a.

"Eng hmanrua maw?"

"Aw...wrench vel..scooty hnuaiah i dah em?"

"Ka hrelo...ka khalh hi ka thiam a, abak engmah ka khawih thiam lo."

"Khawimaw chahbi..ka'n en ange."

Chabi chu a pe a, Alex-a chuan seat hnuai chu a han hawng a. "Ehe...engmah a awm lo." a ti nuah nuah mai. "Nangman i keng lo ami?" tiin BEna chuan a lo zawt a. "Ka hrelo...a inmil ange maw..ka'n en chhin ange." tiin a scooty hnuai chu ava en ve a, a lo keng hlauh mai. "BEna, in duh leh lova haw ula....U Abawihi hi ka'n pui lawk ange." a ti a.

Abawihi chu a inthlahrung hle mai, "A ngailo asin..ka pa ka phone mai ang." a lo ti vat a. "A ho lutuk...ka awm alawm." tiin Alex-a chu a nui sak a. Bena te chu an kal ta a, Alex-a chuan scooty ke hnung chu a thlawn ta a. Tichuan kawngsirah side tha in a scooty chuan Abawihi nen chuan an inphur a, workshop lam chu an pan ta a.

Hnathawk te chuan scooty ke chu an han siam mek a, Alex-a leh Abawihi te chuan pawnah an lo nghak a. "Ka lawm lutuk aw." tiin Abawihi chuan a han nuih sak a. "A ho emai..khatiang mai mai a lawmthu sawi.." tiin a lo ner suk mai. "I fel ka ti e....i la naupan teh lul nen." a han ti leh a. Alex-a chu a nui var var a, "Ka fel pawh ka inti lo." tiin a lo chhang a.

"I fel alawm...vawikhat inhmelhriatna ah pawh hei.ti hian min pui nghal duh ania."

"Nia..mipa chu nila ka pui lo maithei che." tiin a han nui vel a, an titi tui dun hle mai. "E chuan maw Alex...min u tawh suh." Abawihi chuan a han ti a. "Naaa..ngati maw? Ka u rual daih alawm i nih." tiin a lo zawt a. "Chupawh nise..kum 24 chauh alawm ka la nih...ka upat hmel emai." tiin a lo chhang leh a.

"A ho e...enge i zah vak a?"

"A nuam lo ve alawm...thian kan nia, han in u bik chu.."

"Tinge i duh loh tlat a? Ka hmel hi a upa i tih vang ami? Kum 18 hmel ka pu lemlo i tihna mi?"

"AWi ni love..ni lul love..haha..nangpawh tinge min u duh tlat a? Ka hmel hi a upa i ti zawk anilo maw?"

"Upa love...i hmelthat em kha.."

Abawihi chu a lai lek lek mai, "Kan zo ta e." tiin workshop ami te chuan an rawn hrilh a, tichuan scooty ke chu an keng phei leh a, Abawihi duhlo chung chu Alex-a chuan a man a pek sak bawk. Tichuan an inphur let leh a, Alex-a chuan a vuah sak leh thlap bawk. An inzui haw ta a, Abawihi te in chu an thleng a.

Alex-a chuan a han en vang vang a, "In in chu a mawi hle mai." tiin a nui sak a. "Chutia mi? Ka van lawm..lo leng lut la.." tiin a han zawm nghal zat a. MAhse Alex-a chuan a lu a thing a, "A tlai tawh emai...nidangah aw..ka lo la leng dawn chauh." a han ti deuh kher a, an innuih var var mai. "Ka kal ange..nih phawt aw." tiin Alex-a chu a tlan liam ta a, Abawihi chuan a en zui vawng vawng mai.

***************************

TO BE CONTINUE