NATHAN SEASON-4 Written by : Aaron Malsawmdawngzuala Episode-19 (THE STOLEN LADY-2)

 NATHAN SEASON-4

Written by : Aaron Malsawmdawngzuala

Episode-19

(THE STOLEN LADY-2)

*********************

Dining hall ah bawk chuan thingpui chu kan in hova, mahse Maxie erawh ala tho lo nge ni, a rawn la tel ve lo. Nathana te nupa chu an titi dun mawlh mawlh a, kei erawh reception ami, Muani chu ka rilru ah a awm reng thung. Dining hall atang hian front desk hi a va hmuh theih loh va, hall piah chiah ah a awm a ni.

Ka va thlek leh zeuh zeuh zel a, ka rilruah chuan thildang a awm thei mawlh lo. Police ka nih thu ka sawi zawh chiah a hlauh hmel taka min en te, a kal ta daih te khan ka ngaih a ti tha lo rum rum mai. Thilsual a ti emaw ni chu aw tiin ka ngaihtuah rum rum hial a, mahse a hmel en kha chuan thilsual ti duh hmel a pu bawk si lo.

Police a hlau ve hrim hrim pawh a ni mahna, Nathana te nupa thil sawi pawh chu engmah ka lo ngaihtuah lo. Chutah Sanvi chuan, "Tiraw U Rinawm?" a rawn ti deuh thut a, ka phu zuk mai. Enge an sawi ka hre silo nen, "Eng chu maw?" ka lo ti hu mai. Nathana chu a ner sak a, "Ava hahthlak thin tak, engmah i lo ngaithla nange?" a ti deuh hlur a.

"Thildang ka lo ngaihtuah daih a...enge in sawi a?"

Sanvi chuan nui chung hian, "Maxie bawk kha aniang chu a lo ngaihtuah ni, a lo tho ve tep tawh ang." a han ti a. "Chutiang lam a nilo, thildang daih alawm ka lo ngaihtuah.." tiin ka pha vat a. "Anih leh enge i ngaihtuah a?" tiin Nathana chuan min han zawt veleh a. "Aaa..Station lam ka lo ngaihtuah deuh a lawm mawle." tiin dawt ka sawi ta ringawt a.

Nathana lah chuan, "Nang aia fing leh hnuchhui thiam vek alawm awm, ngaihtuah duh suh." min la ti zui. Chutih lai chuan Maxie chu a rawn chhuk ve ta a, "Ehe, in va tho hma hlawm bik em em." tiin kan bulah chuan a rawn thu ve a. "Good Morning, hei Rinawma hian a lo ngai tawh lutuk che a." tiin Sanvi chuan a han siai zeuh va.

MAxie chu a laih hmel kher mai, "An ti mai mai anih kha." tiin ka lo pha leh vat a. "I zei lo thei lutuk, kan tihpui ve dawn che anih hi." tiin Nathana chuan min han nghawk zeuh va. Kan titi ho leh a, mahse kei erawh Muani chu ka rilru ah ala awm reng avang chuan ka titi tui ve hlawl lo a ni.

"Vawiin lam enge tih in tum deuh?" tiin MAxie chuan min han zawt hlawm a. "Kan fang kual dawn em mawnile kan lo tia, lui bul velah te sawn kal ila kan tia." tiin Nathana chuan a lo chhang a. Sanvi pawh chuan, "Lo kal ve la, tih tur dang i neih loh chuan.." tiin a sawm ve bawk a. "Nia a chakawm khawp mai, mahse ziah tur ka la ngah deuh va." tiin a chhang a.

"Aww..hun ala tam alawm. I la fang kual bik lo ani lawm ni?" tiin Nathana chuan a han zawt a. "La fang kual bik lo, niminah tho khan ania ka lo thlen ve chauh." tiin a lo chhang leh a. "Anih chuan lo kal ve la, ziah tur i ngah sawt dawn alawm." tiin Nathana bawk chuan a han sawm leh a.

A nui sak a, "Nia, in bula tel ve in phal te chuan kal ve ila animai alawm." tiin a chhang ta a. Reilote kan titi hnu chuan Dining Hall chu kan chhuahsan ta a, room lama kan chhoh hma chuan Front desk lam chu ka va hawi a, Muani chu ka hmu ngei e. Nui sang hian guest dang te chu a lo bia a, mahse a hmel ah chuan hlim loh rukna a nei tih chu ka hmu tlang vek.

Min rawn hmu a, rang lutukin a hawi sawn leh nghal vat. Mahse va biak ka tum bik lem lo, room lam pan chuan ka chho ve ta a. 2nd Floor kan thlen chuan Sanvi chuan, "Maxie..chaw ei hunah kan inhmu dawnnia. Dar 10 velah chhuak tan ila, a tlai mah mah angem, nge a hma mah mah?" tiin a han zawt a.

"A tha alawm, in tih dan dan kha a nimai." tiin a lo chhang a. "Awle...kan inhmu dawnnia." tiin kan kalsan a, ani pawh a floor lam pan chuan a chho tlang ta a. Ka room ka luh hma chuan Nathana chuan, "Nalh deuh khan rawn inthuam ve la aw, kan haw hunah chuan in ni tawh hrim hrim." a han ti kher a, chhan pawh ka chhang peih lo.

***********************

Chaw chu kan ei kham a, tichuan a hmun hma vel fang kual tur chuan kan insiam ta a. Dar 10 a rik meuh chuan kan inpeih tlang ta a, tichuan naupang hote nen chuan kan inzui chhuak ta hlawm a. A hmasa berah chuan park ah kan kal a, naupang ho chuan nuam an ti kher mai. Nathana te nupa chuan an fate chu an infiam pui a, kei leh Maxie erawh pipu ah kan thu dun thung a.

Kan titi dun mawlh mawlh a, "Anih leh U Rinawm, nizan khan ka kum zat min zawt bawk a. Nang engzah nge i nih, i sawi ve ngei ngei tur a ni." a han tih chuan ka sawi hreh ngei mai, upa min ti dawn lutuk. Zak chung chung chuan ka sawi ta a, "Hmm...i upat loh em chu." a ti hlauh mai, ka rilru nawm nan a sawi ve mai mai pawh a ni mahna.

Nathana te nupa chu ava en a, "U Nathana saw chu ala naupang viau ang tiraw?" tiin min han zawt veleh a. "Kei ai chuan a la naupang deuh, tunkumah 41 a tling ve tawh dawn." tiin ka chhang a, Nathana kum zat ka sawi chhuak palh tlat mai, a pawilo turah ngai ang. "Ka rin aiin avan upa reuh." ala ti zui.

"Engzat turah nge i lo ngaih reng reng a?" tiin ka han zawt ve deuh kher a. Nui suk chung chuan, "30 a pelh vel chauh ka lo ring a." tiin min chhang a, a awm ve tho mai. A han ngawi leh vang vang a, "Ka sawi ve phak chu a awm hauh lo nangin, tinge hnamdang kher nupuiah a neih a?" tiin min han zawt veleh a.

Tichuan Nathana leh Sanvi te inhmangaihna kawng bumboh chhuk chho nuai mai chu ka han hrilh ta a, ngaihnawm a tih hmel kher mai. "Ka rin aiin Sanvi sawn mizo tawng a thiam, a bahlah miah lo lehnghal." a han ti leh a, ka nui suk mai. "Nia, a thiam chak ve hrim hrim...chubakah Nathana hian a zirtir nasa em alawm." tiin ka chhang a.

"Anih dawn chu...chubakah actress a nih phei chuan a thiam chak lehzual ngawt ang." a han ti veleh a. Chutia kan titi lai chuan Nathana te chu an rawn phei a, "In lo insawi fel thei em?" tiin a han khi suk a. "Kan ni tep tawh." tiin ka lo fiamthu ve hlak a. Sanvi chuan, "Hawh u, lui lamah zu kal ve tawh zawk ang u." a han ti a, lui lam pan chuan kan inzui thla veleh ta a.

***************************

Lui pawh a nuam khawp mai, naupang tana chen erawh a hlauhawm deuh thung. Nathana chuan a hmun hma vel chu a han enkual a, "Hmaikawra ava awm duh hmel ve." tiin a han nui suk a. Khua a lum deuh bawk nen, tui cheng tur chuan ka inphelh nghal mawlh mawlh a. Ka lo upat ve tawh vang nge, ka six pack a bo daih nia.

A thuk lo laiah chuan naupang ho pawh chu an cheng ve a, an hlim dar dar hlawm kher mai. Nathana pawh chu a inphelh ve a, kei ai chuan a pian chu la tha tak a ni. Mahse kum 30 chho vel a nih laia a pian erawh a tluk tawh biklo, mahse Aaron Malsawmdawngzuala te ang pian ai chuan tha tak a la ni.

Sanvi chuan camera te chuan a han la kual a, tunlai tawngkam takin a vlog ve tihna a nih chu. Chutia hlim taka kan awm lai chuan Sanvi chuan, "AWi..ka camera hi a battery a low daih ania." a rawn ti a. "Ava mak thin e aw...i charge lawk lovem ni?" tiin a lo vin hlur mai. "Ka theihnghilh daih alawm, phone hian la mai ang." tiin a lo chhang a.

"Camera sawi takah chuan ka nei asin, mahse room ah ka dah daih a. Ka va la dawn em ni?" Maxie chuan a lo ti ve bawk a. "A ngai hleinem, phone hian kan la mai dawn lawm." tiin Sanvi chuan a lo chhang a. "Ka hmang duh hrim hrim a, ka ken theihnghilh zawk mawle...ka va la ange, ka rei lovang." tiin a chhang leh a.

"Anih chuan va la raw, lo let leh ngei ngei la aw.." Sanvi chuan a han ti leh a, MAxie chu a kal ta a. Nathana chu a khi suk a, "Rinawma chu i zei lo thei e, va kalpui zeuh la tha tur ania." tiin min han fiam leh kher a, a chhan pawh ka chhang peih lo. "Chu chu lawm, i kha tih vang anih kha Tluangtei pawhin a then che." tiin Sanvi chuan a lo tuihnih veleh bawk a.

Reife hnuah pawh chuan Maxie chu a lo la thleng thei hauh lo mai, "Enge maw a tih em em le? Darkar khat chuang a ni tawh.." tiin Sanvi chu a phun nuah nuah a. Nathana chuan, "Rinawm, dar engzat nge?" tiin min zawt a. Ka sana ka en a, "Dar 2 a pel tep." tiin ka lo chhang a. "A peih tawh lo zawk te hi a nilo maw?" Nathana bawk chuan a han ti leh a.

Mary chu lo kalin, "Anu..ka ril a tam tawh e." a rawn ti a, "Nia kei pawh zeplo chuan a tam tawh khawp mai." ka lo ti ve bawk a. "I let tawh mai ang u, naktuk pawh hun ala awm alawm." tiin Sanvi chuan let leh mai chu a rawt ta a. "Nia, thil va ei ila, duh leh tlai lamah kan lengkual leh zawk dawnnia." Nathana chuan a lo ti ve bawk a, kan vai chuan lodge lamah chuan kan let leh ta a.

************************

Kan room lamah chuan kan chho a, ka inbual nghal a. Ka inbual zo ka ha inthlak chu ka sana ka dahna ka hre ta hauh lo mai, "Khawiah nge maw a awm le?" tiin ka zawng kual chiam mai a. Ka hmuh tak siloh avang chuan Nathana te room lamah ka theihnghilh tak mialin tiin ka va phei a, "Sir..ka sana ka theihnghilh mial lo maw, in room ah hian?" tiin ka han zawt a.

"Ka va hre lo ve...khawnge i dah a?" tiin min lo zawt let hu mai. "Ka hriat loh vang tak chuan alawm ka zawh che." ka lo ti let ve hlur a, kha sana kher kha chu Tluangtei min pek a ni a, amah hriatrengna a ni ve bawk si a, ka ui ve takzet a ni. Bathroom atanga Sanvi lo chhuak chuan, "I tui chen dawn khan Maxie i bun tir kha, tui a lut palh ang i tih kha." a rawn ti a.

Ka hre chhuak zawk mai, ka bun tir tak e. Nathana chu a nui vak vak a, "I tar tawh..i haihawt tawh anih kha." tiin min han chhiah nghal zat a. Sanvi pawh chuan, "Chance tha lutuk...i sana chhuanlamin a room ah han kal rawh." a lo ti ve bawk a. Ka hreh angreng kher mai, "Sanvi..nangman han la teh a.." ka han ti a.

Phur zet hian Nathana chuan, "Angai lo..nangmah han kal rawh. Mipa i nih kha, pa deuhin awm ta che. Sanvi..han kal angai lo, amah kha han kal rawh se." a lo ti leh zuah zuah mai. An nupa hian an tawng thei bawk si a, ka hnial peih lo law law. "Ka han la mai ange..chhe dun zeh zuah lutuk." tiin ka chhuak ta a.

3rd floor lam pan chuan ka chho a, room hmasa ber, MAxie room, 301 chu ka thleng nghal mai a. Ka han kik karh karh a, "Maxie..keimah Rinawma, ka sana kha.." ka han ti nghal ringawt a. Mahse a reh vang vang mai, "Maxie...i awm em?" ka han ti leh a, mahse chhanna ka dawng chuang lo.

Ka han nghak leh deuh hret a, tichuan ka han kik leh a. "Maxie..i awm em?" ka han ti leh a, mahse ala reh vang vang mai si. Tichuan kawngka chu hawn ka han tum chhin a, a lo inkalh miah lo. Ngawi renga mi room a han luh rikngawt chu ka hreh si a, "Ka lo lut ania aw.." ka han ti leh hram a.

Mahse chhanna ka dawn chuan silo avang chuan ka han lut ta a, ka thil hmuh chuan min va thawng tak em. Room chu a hnawk hian a lo hnawk nuai mai a, dawhkan te chu a lo let rem rum mai a, khum lah chu bed sheet chawpin a lo inhlim vek bawk. Ka ngaih a tha lo takzet, "Maxie..Maxie.." tiin ka au vak vak a.

Bathroom lam chu ka han check leh a, mahse tumah ka hmu lo. Bathroom erawh chu a fel fai em em thung, ka hlauthawng ta hle mai. Dawhkana a make-up leh lotion bur te chu chhuatah chuan a tla hnawk nuai mai a, MAxie room ah hian midang tu emaw ni tak an lut tih chu a chiang ta reng mai.

Parda inzar chu a tla bawk a, bangah chuan thisen ka hmu bawk. Rang takin ka chhuak lehnghal a, 3rd floor room ho chu check tha in ka hria a. Sawi tak ang khan floor tinah hian room 10 zel a awm a, a hmasa berin Maxie room bul chiah, 302 chu ka va pan a. Mahse vacant room a lo ni tlat mai, 303 chu ka en leh a, chupawh vacant room tho a lo ni.

Ka en phei zel a, 308 thleng chuan a lo vacant vek mai a. 309 leh 310 erawh occupied a ni hlauh thung. 309 chu ka kik nghal a, nu pakhat hian a rawn hawng a. "Aw enge ni ta?" a han ti a. "Thiannu, 301 ami saw a lo kal mial em?" tiin ka han zawt a. "Kal lo..tunge 301 ah awm pawh ka hrelo." tiin min lo chhang a.

"Anih leh thawm enge maw i hria em?" ka han ti leh a. "Ka van hrelo, ka lo muhil char char a, engmah ka hrelo." tiin min chhang leh a. "Awle, ka tihpalh aw...ka lawm e." tiin ka kalsan leh a. 310 chu ka han kik leh a, putar pakhat hian a lo hawng ve thung. "Enge ni ta?" tiin min han zawt ve leh a.

"Ka pu..301 ami saw a lo kal mial em?" tiin ka han zawt ve leh a, mahse ani pawh chuan a lo luh loh thu min hrilh leh ta tlat mai. Rang takin kan floor lamah chuan ka chhuk a, Nathana te roomah chuan ka lut nghal a, "A lo awm em?" tiin Nathana chuan min lo zawt nghal a. "Sir..Maxie a bo." ka han ti nghal ringawt a.

"Enga..engtia bovin maw?" a lo ti hu mai. "A room a hnawk nuai a, bangah thisen a kai bawk." tiin ka hrilh leh a. An nupa chuan an ding dun nghal a, "Ehe..khawimaw han chho teh ang." tiin Nathana chu a chhuak nghal a, Sanvi chuan lo kal ve a tum a. "Sanvi..hetah naupang lo awmpui rawh, kan lo chhuk leh vat ang." tiin Nathana chuan kal ve a phal tlat lo.

Tichuan kan chho dun a, Maxie room ah chuan kan lut a. Nathana pawh chuan mak a ti hle mai, banga thisen kai te chu a han en bawk a. Bathroom te pawh chu a han check ve a, "Enge maw awmzia ni?" a ti nuah nuah mai. Chutah khum hnuai a envelope lo tla chu a han en a, a chhar a. Envelope ah chuan 'HERE IS YOUR CLUE." tih hi a lo inziak a.

Nathana chuan min hmuh a, "Misual an awm chiang a ni..hei enrawh..clue min hnutchhiah nghal ringawt ania." a han ti a. Envelope chu a hawng a, thlalak pakhat hi a lo awm a. Kan han en a, ka rin aiin chu thlalak chu a ho hle mai. Naute pakhat muhil lai hi  ani a, chupawh sap naute niin google atanga download mai mai a ni tih chu a chiang reng.

"Enge awmzia..naute muhil lai mai mai..a va ho e." ka lo ti nuah nuah a. Mahse Nathana chu a ngawi vang vang a, a khi suk mai. "Awmzia a nei alawm..thilthleng hi a sawifiah a ni." a ti daih mai a, ka hrethiam lo kher mai. "Clue a ti bawk sia, mahse naute muhil lai thlalak mai mai a ni bawk sia. Englai tak hi nge clue chu?" tiin ka zawt a.

Thlalak chu min hmuh tir pahin, "Chiang deuhvin en la, naute hian enge a tih?" tiin min han zawt a. "Aw..a muhil." tiin ka lo chhang a. "Naute hi saptawngin enge?" a ti daih mai. "Baby a ni mai lawm..Child..pawh a ni tho va." tiin ka chhang a. "A nih leh a muhil ta, muhil tih chu saptawngin enge?" tiin min han zawt leh a.

"Sleeping..enge min zawh vak vak a?" tiin ka zawt let ve a. "Naute hi saptawng chuan baby chu a ni teh meuh mai, mahse an fate an sawina chu KID a ni, chuan a muhil a, saptawng tluang pangngaia dah dawn chuan...The kid is napping...ania, i hrethiam em?" a han ti leh a. Ka man ta, "Kidnapping.." ka han ti a.

Nathana chuan a lu a bu nghauh mai, "Ni chiah e, Maxie hi kidnap a ni." a ti ta a. "Sir, engtin nge kan tih dawn?" tiin ka zawt a. "A hmasa berah chuan hotel staff ho hi kan hriattir angai. Rinawm, reception ah zu kal la, kidnapping a thlen thu hi zu hrilh ang che. Keiin Sanvi ka zu hrilh phawt anga, ka rawn chhuk ve nghal ang." a ti a.

Rangtak chuan ka chhuk nghal a, mahse reception ah chuan Muani a lo awm tawh lo, a shift a zo tawh a ni ngei ang. Ka wallet phawrhin, "Thiante u..police officer ka ni a, ACP Lalrinawma ka ni. He lodge ah hian kidnapping a thleng a, room no 301 ah..in security guard te hrilh turin ka duh che u a ni." tiin ka badge chu ka hmuh a.

Hmeichhe pakhat zawk chuan mak ti tak hian, "Enga? Kidnapping a?" a ti hu mai. "Aw ni e, 301 ah..kan thiannu tho a ni a, a hming chu Maxie Lallawmzuali a ni." ka han ti leh a. Pakhat zawk chuan a register chu a han keu nghal a, "Aw..Maxie Lallawmzuali..nimin zing dar 11 leh minute 38 ah a lo thleng." a han ti a.

Chutih lai chuan Nathana chu a rawn chhuk a, "Hei hi ka thianpa, police tho a nih hi..SP Nathan Malsawmkima." ka lo ti leh vat a. Nathana chuan hmanhmawh hmel tak hian, "Khawnge in security te?" a ti a, "Kawngka pui bulah sawn pahnih an awm anga, Main Gate-ah pahnih an awm bawk." tiin an lo chhang a.

"Security te saw ka va hrilh anga, chuan intercom atangin guest zawng zawngte lobby-a rawn chhuk vek turin hrilh ula, police call nghal bawk ang che u. Staff zawng zawng, kitchen, hall duty, house keeping leh sweeper thleng pawhin, an vaiin hetah an awm tur a ni, tumah an chhuak tur a nilo. Rinawm, lo buaipui ang che." tiin a kal nghal a.

Receptionist ho chuan guest ho chu an call ta a, keiin duty dang ho chu ka ko khawm bawk a. Chutih lai chuan security leh Nathana te chu an lo phei ve leh bawk a, lobby ah chuan guest zawng zawngte chu an rawn chhuk a, zawhna an ngah hlawm khawp mai. Reiloteah chuan police te pawh chu an lo thleng a, buai nuai nuai tak hi kan ni.

****************************

Lobby ah chuan an thu thap hlawm a, a then erawh thutna chan loh vangin an ding bawk. Nathana chuan ro a rel ta a, "Tumah he lodge hi kan chhuahsan tur a nilo, helai hmunah hian kidnapping a thleng a, chu chu kan chhui a ngai a ni." a han ti a, an phun nuah nuah hlawm mai. Nathana bawk chuan, "3rd Floor CCTV kan check duh nghal dawn ania.." tiin receptionist pakhat chu a han hrilh a.

Mahse receptionist chuan, "3rd floor CCTV a chhia a, naktukah repair a ni chauh ang." a lo ti tlat mai. Nathana chu a ngawi vang vang a, "Rinawm, CCTV dang ho zawng lo check la, lobby...1st floor...2nd floor leh kitchen te, dining hall te, lo check vek ang che. Chuan kei leh Inspector leh midang ho hi Maxie room ah kan kal leh anga, midang pawh tumah an chhuak tur a nilo." a han ti a, an chho ta a.

Security te chu pawnah chuan ka duty tir a, tichuan CCTV chu ka check ta a. Maxie kha dar khat rik hma hret khan a phei kha a ni a, lui atanga lodge hi a hla lo a, chuvang chuan alo berah minute 5 vel bak a hmang dawn lo hrim hrim.  Ti chuan dar khat vel atang chuan rewind in  kawngka pui luhna bula CCTV chu ka check hmasa ber a, reloteah chuan a lo thleng ta ngei mai.

Tichuan 1st floor CCTV chu ka check lehnghal a, mahse step chhohna ber a lang thei bawk silo. 2nd floor check pawhin awmzia a nei dawn lo tlat, 3rd floor CCTV ber, a pawimawh ber lah a chhe bawk si. Kitchen te chu ka han check leh a, mahse rinhlelh tur pakhat mah ka hmu der lo mai.

Chutah Lobby lam en chuan ka han forward leh zung zung a, chutah elevator atang chuan sweeper form ha, trolley-a gabage bag lian tak nawr hi ka hmu ta. Ka ringhlel ta riau mai, ka en zel a, pawnah chuan a nawr chhuak a. Main gate lamah chuan a chhuah pui a, mahse CCTV chuan a cover pha tawh tlat lo.

Dar zat chu ka en a, dar 1:30 vela thil thleng a ni. "Sweeper ho zawng lo kal chhuak teh u." ka han ti leh a, pali an lo chhuak a. "Nangni zawng hi em ni?" tiin ka han zawt a. Pakhat chuan, "Aw ni e, ka pu. Kei hi chawhnu lam shift ka ni a, morning shift neitu chu a haw tawh a. Keimah hian ka thlak a, midang pahnih te hi chu day shift an ni e." tiin min chhang a.

CCTV chu ka han en tha leh a, chu trolley nawr tu chuan mask a vuah tlat a, lukhum a khum tlat bawk. A hmel chu a hmuh chian theih loh mai bakah black and white vek a nih avang leh a fiah loh em avang chuan tu ber nge a nih tih chu rin a harsa takzet. "Dar 1:30 vela trolley-a bawlhhlawh nawr chhuaktu hi tunge?" ka han ti leh a.

Mahse an in en hu hlawm mai, "NGatinge...tunge sawi ta che u?" ka han ti vin leh thak a, "Dar 1:30 velah chuan staff room ah kan awm vek, kan pali in.." tiin pakhat chuan min chhang ta mai a. "Dar khat leh a chanve ah khan tu tu nge lobby-ah awm sawi rawh u, guest te zingah pawh...CCTV-ah ka en leh vek dawn tho, inzep duh su." ka han ti leh a.

Patling pakhat leh khang zurui pathum, ahmaa Maxie lo tibuai tute kha an rawn pen chhuak ta a. CCTV chu ka han en leh a, an pali ngei chuan lobby ah chuan an lo awm a. Patling chu ka va pan a, "Tunge i hming?" tiin ka han zawt a. "Hruaia ka nia, ka pu." tiin min lo chhang a. "Hetih hunlai hian sweeper trolley rawn nawr chhuak tu hi ilo hmu ve em?" tiin ka han zawt a.

"Aw hmu e, ka pu."

"A hmel awm ang i hmu chiang thei em?"

"Mask a vuah a, lukhum a khum bawk sia..chubakah eng teh vakah ka lo ngailova, ka en liam ringawt a."

Sweeper pathum te chu ka din tlar tir a, "Hemi te zingah hian tuber nge...i hre thei angem?" ka han ti leh a. Mahse a lu a thing a, "Ka pu, ka hre thei mai lo. Ka lo ngaihtuah vak lo bawk nen, ka hrelo tak tak." tiin min chhang leh a. Sweeper hi hian puan atanga siam lukhum an khum vek a, an uniform zinga a tel miau vang a ni.

Tlangval pathum, buaina siam te chu ka va pan leh a. Min hlauh hmel hlawm khawp mai, "Nangni pathum hi tuna bo mek, Maxie chhaih buaitu te kha in ni a..in thil tih a ni em? Sawi rawh u.." ka han ti vin thak a, an hlauh hmel kher mai. Pakhat chuan, "Nilo..engmah kan hrelo ka pu." a ti khur dar dar a.

Tichuan security guard pakhat chu ka kova, "Hemite room ah hian han kal la, kil tin dap chhuak vek ang che." ka ti a, a kal ta nghal a. Sweeper te chu ka han en leh a, "Bawlhhlawh hi khawiah nge in paih thin reng reng?" tiin ka han zawt veleh a. Pakhat chuan, "Main gate bulah sawn a garbage bag chawpin kan dah thin a. Tichuan zing lamah bawlhhlawh paih motor a lo kal a, an la mai thin a." tiin min chhang leh a.

Gate bula duty te chu ka han ko chhuak leh a, "Dar 1:30 velah sweeper in bawlhhlawh a rawn paih lai in lo hmu em?" tiin ka han zawt veleh a. Pakhat zawk chuan, "Nitin hian an rawn paih ziah a, ngaiah kan nei a, chutin kan lo chhinchhiah vak lova. Paih hi chu an rawn awm ve ziah a, kan lo chhinchhiah thlap thlap bik lova." tiin min chhang a.

"A tha e, security pahnih te hian mipui hi lo veng se, pakhat khan gate bulah chuan min rawn zui rawh se." tiin ka chhuak a, guard pakhat chuan min zui ta a. GAte bulah chuan garbage bag khat vek hian bawlhhlawh chu a lo awm ngei a, bag 5 vel a lo awm a. A mal te te chuan ka han check a, mahse bawlhhlawh vek a ni.

Ka let leh tur chiah chu abul kawrah chuan garbage bag ruak, tret hnuang mai hi ka hmu a, ka chhar a. Chutah chuan thisen a lo kai bawk, fimkhur tak chuan ka keng lut a. Inchhung ka luh chiah chuan Nathana te pawh an rawn chhuk tawh a, "Rinawm, enge chanchin?" tiin min han zawt nghal a.

Ka thil hmuh te chu ka han hrilh a, tichuan garbage bag-a thisen kai pawh chu ka hmuh bawk a. Inspector bulah chuan Nathana chuan, "Inspector, he thisen hi a sample la ula, Maxie room banga thisen kai sample kan lak nen khan a in ang em tih test nghal ang che u, tunah kal vat rawh u."  a ti a, an kal ta a.

"Sir..enge hmasawnna a awm em, nangni?" tiin ka han zawt a. "Awm lo...kawi tin kan dap vek a, mahse engmah clue dang kan hmulo, thlalak kan hmuh bak kha chu." tiin min chhang a. Chutah guard pakhat, tlangval pathumte room check tura ka tirh chu a rawn chhuk leh a, "Sir..ka dap vek a, engmah ka hmulo." a rawn ti ve leh a.

Nathana chu a han ngawi vang vang a, "Kawngka pui saw kalh ula, kidnapping a thlen avangin tuman he lodge hi an dawr theih rih loh thu puang ula, darkar 1 chhung chu pawnlam mi pawh an rawn lut tur a nilo. Tichuan security leh police thenkhat ten room zawng zawng an dap kual vek anga, chumi hnuah chauh chuan in room lamah in kir leh thei ang." a ti a.

Security leh police thenkhat te chuan room zawng zawng chu an dap kual ta a, "CCTV hi ka'n check veleh hrim hrim ange." tiin Nathana chuan a han check tha ve leh a. Kei erawh Sanvi te nufa chu ka lo awmpui thung a, "AWiii...tinge maw nangni pahnih zin chhuak ve hi buaina a thlen bik ziah le?" Sanvi chuan a han ti nuah nuah a.

"Ni ngawt mai tiraw? Chutah Maxie kher lehnghal.."

"Ka ngaihtuah khawp mai, a fel ropui si a...tunge ni ang le?"

"Ka sana pawh kha ka hmuzo miah lova...ala kawl ngei ang."

"Tlangval pathum te saw keichu ka ringhlel riau mai, nimina an chhaih dan zawng zawng nen khan.."

"An ni lovang..ru bo chu nise, hetah an awm teuh lo. Hmun dangah an kal pui daih tawh ang, mahse ka la dawp leh thovang."

"U Rinawm, ka rindan leh bawk chuan maw....Maxie chu hmundangah kidnapper hian a kalpui daih tawh ka ring."

"Nia a ni thei tho mai...lungngai suh, kan hmu let leh em em ang."

**************************

DArkar khat a liam a, room pawh chu guard te chuan an check zo ta. Mahse engmah rinhlelh tur an hmu chuang bik lo, "CCTV ah pawh i hmuh chin bak kha chu thil danglam teh chiam engmah ka hmu bik lo." Nathana chuan a han ti a. "Sir, engtin nge hma kan lak zel dawn?" tiin ka han zawt a.

"Thisen sample kha a inmil anih chuan Maxie chu lodge pawn lama kan zawn angai a ni tawh mai, he resort ah hi chuan a awm tawh hauh lovang." tiin min chhang a. Tichuan lobby lamah chuan a va kal a, "Awle..in room theuh ah in kal leh thei tawh e, mahse 3rd floor ah erawh tumah kal suh ang che u." a ti a, guest ho chu an room lam pan chuan an kal darh ta sang sang hlawm a.

Ka rin lawk ang ngeiin check-out an awm nghal sup sup mai, guest awmsa chanve dawn chu an check-out nghal der a. Khang tlangval pathum te erawh kha chu an la check-out ve lo va, han rinhlelhna em em pawh ka nei hran lo. Zurui satliah ve mai an ni a, an hmel enin an la naupang bawk nen, khatiang khawpa clue dangdai hnutchhiah tur phei chuan an finna khan a pha dawn lo hrim hrim.

"Sanvi, nangni pawh naupang ho nen room lamah lo han chho ula..kawngka kalh nghal ang che u. Ka rawn luh dawn chuan ka rawn insawi mai ang, anih loh chuan tumah lo hawn suh ang che u. In thawmhnaw vel pack fel ula, tlaiah kan haw nghal ang." a ti a, Sanvi te nufa chu an chho ve nghal bawk a.

"Sir..tlaiah kan haw dawn maw?"

"An mahni kha ka thawn haw dawn, DCP Maenga ka phone mai ang."

"Anih keini kan la awm dawn tihna em ni?"

"Aw...Police kan nih hi....kan haw ve daih ten.."

"Kan case pawh a nih loh hi..."

"Chuvang renga..hemi khua police hote hmalakna te pawh kan ngaichang ve phawt ang chu."

"Anih te chuan Sanvi te chuan min lo nghak hrih mai se.."

"Thil pawi dang a thleng leh palh ang, haw zawk rawh se."

"I tih dan dan le."

Inspector te chu reiloteah chuan an rawn thleng leh a, "Sir..boold sample test result a chhuak a, a in mil chiah chiah e." a han ti a. Nathana chu a ngawi vang vanga , "Maxie thisen a nih chu rinawm viau mahse amah MAxie ber a awm bawk silo...engpawh nise, khawiah chuan nge he garbage bag ruak hi i hmuh a?" tiin min zawt a.

"Gate bulah sawn." tiin ka lo chhang a. Gate lam pan chuan kan inzui chhuak hlawm a, "Hetah, kawrah hian a lo awm a." ka han ti leh a. "Umm..kidnapper hi sweeper angin a inchei a, tichuan gate a chhuah veleh hian garbage bag atang hian a phawrh chhuak a ni ngei ang." tiin a han chawl det a, "Trolley pawh chu a ru tel tihna em mawni le? A rawn luh leh kan hmu silova..CCTV ah pawh khan.." a han ti leh nuah nuah a.

*********************************

TO BE CONTINUE