NATHAN SEASON-4 Written by : Aaron Malsawmdawngzuala Episode-18 (THE STOLEN LADY-1)

 NATHAN SEASON-4

Written by : Aaron Malsawmdawngzuala

Episode-18

(THE STOLEN LADY-1)

***********************

(He thawnthu THE STOLEN LADY hi Nathana Police a nih anga a case chhui hnuhnun ber a ni tawh dawn a, episode 18-22 thleng a daih dawn a ni.)

************************

In lo dam tlang amaw? Min la hria em aw? Keimah, ACP Lalrinawma, ASP ni char char thin ACP ni ta, Lalrinawma ngei mai kha ka ni e. Rank te a lo san ve takah chuan in boss, ka boss ni bawk, Nathan Malsawmkima hnung zui dut dut kha a rem tawh lova. Mahni a case chinfel tur ka neih ve tak zel avangin kan reh rei ta deuh va, min lo hrethiam hlawm em ang chu maw..

Nathana pawh Senior Superintendent a ni tawh a, mahniin case a chhui ngai tawh lo. Hotu lu ber a ni hrih a, kan Station ah phei hi chuan kan Head of Department a ni. SI te, Inspector te, ASP leh keimah ACP te hi case chhuitu ber kan ni tawh a, Nathana erawh an pu ber a nih tawh avangin a thuhnuaiah kan awm a, kan case chhui lai te kan report thin tawh mai zawk a ni.

Mahse tun tum chu a hnuchhuina kan ngaithla leh thei dawn ta hlauh mai, kei ACP bawn lutuk mai Lalrinawma hian ka pui leh dawn bawk a ni. Sawi tak ang khan Nathana hian hnuchhui lam a ti ve tawh ngai lova, order min pe thin tawh zawk a ni. Tin, thil pawi deuh mai sawi tur ka nei bawk a.

Chu chu engdang nilovin ka bialnu ve ngawih ngawih, ka cousin ni bawk, ka hmangaih thin em em Tluangtei nen khan kan inthen daih mai a, a chhan leh vang min zawt lo hram rawh u. Ka rilru a na ve lutuk a, mahse rilru na hman pawhin ka khawsa lo. Ka buai thei em a, department rinrawl ber ka nih avangin ka vanduaina chu ka pawm ta mai a ni.

*****************************

Nathana leh a nupui fanau te chuan vaction hmang turin khawdangah an zin dawn a, honeymoon mumal an hman loh vang kha  ani deuh ber. Mahse he Police Officer hian kei hi min ngai viau aniang nge, fiamthu in, "Min lo hruai ve." ka ti a, min hruai a tum tak tak anih chu.

Hetih hunlai hian kan department hian SI tha deuh mai kan nei a, Inspector thar kan nei bawk. Anmahni vang hian keipawh ka awl hnem phah hle a, DCP thar kan nei tel bawk a ni. Kan rin rawl ber an ni a, hnuchhui lam pawh an thiam narawh e. Kei leh Nathana erawh kan lo upa ve tawh bawk nen, rilru hah khawpa hnuchhui kan nei tawh ngai meuh lo.

Nathana chu kan head of department a nih angin a thu ber a ni hrih a, DGP, DIG te kan nei hrih lo a ni. Mahse Nathana a zin bo dawn takah chuan Station enkawltu turin kan DCP thar chu Nathana chuan incharge-ah a dah a, an zinna turah chuan min hruai ve dawn ta a nih chu. Aizawl atanga hla lutuk lo a ni a, kan thlenna tur pawh hi resort a ni.

**************************

Resort chu kan thleng ta a, a hmun hma pawh  anuam hle mai. Tui chenna tur lui a awm hnai em em a, mahse sangha man erawh an phal lo thung. Rin ai daihin chu resort chu a lian a, mikhual thleng pawh an lo awm ve nual mai. Kei leh Nathana, Sanvi leh a fate pathum, Mary, Brandon-a leh Marcus-a te chu inchhungah chuan kan lut ta a.

Front desk-ah chuan nula pahnih hi an lo awm a, an uniform pawh a mawiin an inhmeh dun kher mai. Room te chu kan han book fel a, tichuan kan lugguage chu duty dangte chuan min khai chhoh sak hlawm a. Resort hi chhawng 3 lai chu a ni ve a, chhawng khatah room 10 zel a awm thu te chu duty te chuan min hrilh pah mawlh mawlh a.

Kar khat chauh cham tur kan nih thute chu ka han hrilh ve chiam hlawm a, biak an nuamin an polite khawp mai. 2nd floor kan thleng a, room chahbi te chu min pe a. Room number 201 ah chuan Nathana te chu an awm dawn a, kei erawh a bul chiah, 202 ah ka awm dawn thung a ni. "Rinawm, zanah mengrei deuh rawh aw..kan nu mut hunah kan lem dun sak dawnnia." tiin min han hrilh ru zauh va.

Room chhung chu ka lut ta a, a zau angreng hle mai. Ka rin ai daihin a changkang bawk a, a fel thlup mai bawk. Bathroom pawh a thianghlim narawh e, chhuat pawh glass tile vek a ni. Khum lah chu king size bed a ni lehnghal a, a thawl nuam dawn kher mai. Ka chauh deuh avang chuan inbual mai lo chuan sofa ah chuan ka thu a, ka lo muhil der mai.

Kawngka kik thawmah chuan ka harh a, khua a lo thim der tawh. Sana ka en a, dar 6 a lo pel der tawh mai. Kan thlen hun kha dar tlai dar 4 leh a chanve vel a ni a, ka lo mu rei hman kher mai. Kawngka ka va hawng a, Nathana a lo ni a. Min melh hu a, "Ehe...ila inbual nange?" a han ti deuh nang nang a.

Ka lo nui suk a, "Inbual nang." tiin ka chhang a. A han thaw deuh huai a, "A mak e aw....khua  a thim tawh hi...enge ilo tih a?" tiin min han zawt leh a. "Aww ka lo muhil daih alawm...enge ni reng reng a?" tiin ka lo zawt let a. "Dining hall ah chhuk ang, chaw ei a hun dawn a...chaw ei huaina rawn lem pui turin ka rawn sawm dawn che a, ilo la inbual bawk si lova..i va hahthlak thin e aw.." a han ti leh nung nung a.

"Aww..enge dining hall ah kher? Room ah ei mai ila, hostel-a awm pawh kan nih loh hi...a ho lutuk." ka lo ti ve sak a. "Aww..midang hmelhriatna hun remchang tak alawm. Chhelo deuh deuh an awm ania, chubakah damlai lusun zo hlim i nih kha." tiin min han nuih deuh suk a, ka va han beng chak thei tak.

"Ka inbual phawt dawn...min lo nghak rawh."

"Awle..rei lo la aw, dar 7 ah dinig hall an khar dawn ania. Chaw ei huaina kan la lem dawn bawk nen, kan tlai lutuk ange."

"Khawnge Sanvi leh i fa te?"

"An chhuk tawh."

"Awle..ka han inbual vat vat ange."

Nathana chu a lo lut a, keipawh inbual tur chuan ka inphelh mawlh mawlh a. Minute 5 vel bak ka inbual lo, Nathana chuan min rawn tur sek mai. Ka intleuh thuak thuak a, tichuan bathroom atang chuan ka chhuak leh ta a. Ka inthlak pah chuan Nathana chuan  alo thli karh karh tawh mai, ka inthlak zo chu a bulah chuan ka va thu a.

No chu kan dawm dun ta a, kan titi dun bawrh bawrh a. Chutia kan titi lai chuan, "Rinawm...tunlai chu thil ka ngaihtuah nasa khawp mai." a rawn ti deuh thut a. "Englam maw?" tiin ka lo zawt vat a. A ngawi leh deuh vang vang a, "Police hna hi bansan tawh mai ka duh a ni." a han ti deuh thut a.

Ka thil in lai pawh chu ka hak teuh ngei mai, Nathana berin Police hna bansan a duh thu han hriat chu min thawng takzet. "Ngati maw? Deuh thut che chuan.." tiin ka han zawt a. "Kum 40 kan pel ve der tawh a, mahse ka rank sang ve tawh bawk si hian min tibuai a ni." tiin min chhang a. Ka nui deuh huk a, "Rank sang te chu a lawmawm zawk daih alawm, tinge chutiang te i sawi a?" tiin ka han zawt ve leh a.

"Ka rank sang hi pawi ka tilo, a nihna takah chuan a nuam ka ti daih zawk. Hnuchhui a ngai lova, naute an awm a. Mahse hetiagn ringawt a awm awl hi ka thiam lo, chubakah thildang tih chak ka nei alawm."

"Enge i tih chak a? Sumdawnna lam em ni?"

"Nilove..mipui tana tangkai leh zual hi ka duh a ni."

"I tangkai teh alawm le, hei bak bak."

"KA sawi thiam lo...chet chhuah leh tak tak ka duh a ni. Ka kum hi a tlem tawh lo nachungin hetiang rank ni tur hi chuan ka la nau deuhvin ka hria, mahni pa rual daih daih te nena rank khatah awm hi nuam ka ti lo."

"Anih enge tih i tum a?"

"Englo..ihh, private detective lamah ka insawn mai dawn mawni te ka tia.."

Han sawi mai tur ka hre lo, Nathana hmel ka en chuan a thutak hmel em em bawk si. Ka khi suk ringawt a, "I inhmeh dawn amawni le?" tiin ka han fiamthu ringawt a. "Kan department hi ka ngaihtuah thin em em a, mahse tunah chuan ngaihtuah awmloh tak a ni tawh. Team kan nei tha a, SI, Inspector leh DCP thar kan nei vek bawk a, hei bak bak a tha kan awm tawh lo." a han ti leh a.

"Nia..mahse ka ui emai, i hlawh lah nise a tam ve tawh bawk si a. Chutia i bansan daih te chuan kan khua a har dawn emai, DGP phei chu a lungawi lo ngawt ang." ka han ti ve leh a. "Ni e, a lungawi lovang. Mahse ka duhthlanna a ni a, min zahsak em em ang." tiin min chhang a. Ka hnual deuh ruih mai, "I tello chuan keima tan pawh a nuam dawn lo emai, mood i ti off vek." ka han ti nuah nuah a.

Chutih lai chuan a phone a rawn ri a, Sanvi a lo ni. "Enge in tih em em a, hei chaw ei a hun dawn...lo chhuk ru." a rawn ti vin hlur mai. Chhang lo chuan phone chu a dah a, "Vai te te si hi.." a han ti hram a. No 4 ve ve kan in a, chaw ei hma a in atang chuan a tawk thawkhar viau e, tichuan dining hall lam pan chuan kan chhuk ta a.

********************

Dining hall ah chuan chaw an lo ei sup sup tawh a, Sanvi leh a fate chuan dawhkan ruak pakhat chu an lo kil mek a. "Helamah lo phei ru.." tiin min lo hui vat a, Nathana nen chuan kan va phei ta a. He resort-a thleng ho hian tukthuan, lunck leh zanriah te hi an room ah emaw, dining hall ah emaw hian, an duh zawk zawk naah an ei thei a ni.

"Room ah kan ei mai dawn maw ka tia.." tih pah chuan ka han thu a, Sanvi chuan tum hmuk hian, "I rim a nih mai chu.." a lo ti a, ka ngawi chiang teh asin. Nathana pawh chuan, "Room a ei chu service charge a awm a, pawisa a hek mai mai." a lo ti ve bawk a. "Zu rim lah chu in nam dun ang rum rum a." Sanvi chuan a lo ti leh a.

"Ngah nge maw kan nam loh teh lul ang le...kan in miau alawm." tiin Nathana chu a khi suk a, an nu chuan a melhrum kher mai. Paper leh pen chu min rawn pe a, "U Rinawm, enge i ei ve dawn, kha ziak thla ve rawh...Nathana chu fish curry ka chah sak tawh." a lo ti a, "Nangin enge i chah?" tiin ka zawt a.

"Roti pathum ka chah, naupang ho chu artui chhum." tiin min chhang a. Vai tih takah roti a han chah ngei a, ka lawm thei reuh ania, he vainu hi chu. Chutih lai chuan hmeichhe pakhat hi a chaw ei thleng nen chuan rawn kalin, "Khawngaihin in bulah hian ka lo kil ve mai thei angem le? Ka bula mi tlangval ho saw an rui lutuk a, min chhaih vak vak a, keimaha thleng ka ni bawk sia." a rawn ti a.

A hmel lah chu a tha hrep lehnghal a, a inthlahrun hmel kher mai. "Lo thu rawh...lo thu rawh." tiin Sanvi chuan a lo chhang a. Nuih sen sen pah chuan, "Ka lawm e." tiin ka bulah chuan a rawn thu a. "Tute maw i bula thute chu?" tiin Nathana chuan a zawt a, "Saw..sawmi te saw.." tiin kan sira tlangval pathum ho chu ava kawk a.

Kan va en a, an ruih hmel hlawm kher mai. Chutih lai chuan waiter a lo kal a, kan thil chah te chu kan hrilh a, a kal ve leh mai a. "Engtin nge an tih che a?" tiin Nathana chuan a zawt a. "Ka bulah an rawn thu a, a tir chuan engtin mah min ti lo. Mahse min chhaih min chhaih a, ka chaw ei an ti tuilo vek alawm." tiin a lo chhang a.

Chung tlangval ho lah chu an nui tiah tiah mai a, an bengchheng kher mai. Chaw pawh an ei lo, chips leh hmawmsawm dang eng enge maw eiin an inchhawp hnawk nuai mai a, midang pawh chuan an en deuh thup mai. Sanvi chuan chu nula chu a han en vang vang a, "Thiannu, engtin nge kan koh ang che, tunge i hming?" tiin a han zawt a.

"Maxie ka nia, Maxie Lallawmzuali." tiin a lo chhang a. Ka lo khi deuh suk a, "I hming a nalh hle mai." ka lo ti a, ka kai ve deuh bawk nen, ka zawt ngam ve tlat mai. A lai lek lek mai a, "Hrethiam rawh aw..bialnu a zawng mek a." tiin Nathana chuan min la perh sak zui a, ka zak leh angreng khawp mai.

Tlangval zinga pakhat chuan Maxie chu a rawn au va, "Hey nula hmeltha, tinge i insawn daih a, kan hlim ve dawn chauh amaw tia.." tiin an nui vak vak a, ka insum zo lo teuh tawh khawp mai. Waiter pakhat chu lo kalin, "Thiante u, khawngaihin bengchheng lo hram ru. Hei mikhual dang an tam si a, a mawilo emai." tiin a khap a.

Pakhat chuan tham lo zet hian, "E...animaw, nia..kan tihpalh a ni e. Thian siam kan tum ve mai chauh ania, ni e..keini chu thian kawm tlak pawh kan ni hlei nem." tiin a thle nguai nguai a, an khek leh vak vak mai. Ka insum zo lo chu thawh ka tum a, mahse Nathana chuan min lo mitmei vat a.

A lu a thing a, Nathana berin chutia a tih takah chuan ka thu leh a. Mahse chutia ka tho deuh zawk chu chung tlangval ho chuan min lo hmu hman a ni ngei ang, "Hey..nangpa kha...i pawr deuh ava ang ve." a rawn ti a. Ka chhan hma ham chuan Nathana chuan, "Pawr love...tumah kan pawr lo..kan tha e." a lo ti vat a.

Mahse an pawr laklawh tlat, an pathum chuan an ding a. Pakhat chuan, "Nang kan bia che mi? I thianpa kha alawm kan biak..i lo sawi ve tur pakhat mah a awm lo." a rawn ti pung pung mai. Midang chuan min thlir thup tawh mai a, mahse security guard pahnih an lo lut hlauh mai a. Guard pakhat chuan, "Buaina a awm em ni?" a rawn ti a.

Nathana chu za lo tak hian a nui a, "Awm love...engemaw hriatthiam loh an nei a, min rawn zawt a nih hi." a lo ti sam et a. Tlangval pakhat chuan, "I va inla engemaw ve a...i duh chuan pawnah chhuak ila..kan ti dawn mi?" a lo ti leh a. Security ho chuan an hnawt kiang a, pawnah chuan an nawr chhuak a.

Inthlahrung tak hian Maxie chuan, "Awi..a pawi e. Keimah vang vek..ka zak lutuk." a ti vawng vawng mai. "Nilove..i thiam loh a ni hleinem. Khatiang zurui ho kha chu engatan mah ngai suh..hlau reng reng suh." tiin ka lo hnem vat a. Nathana chuan a wallet phawrhin, "Police Officer kan nia, vacation hmang turin kan lo zin a." tiin a badge chu a hmuh a.

Chu veleh Maxie chuan Nathana chu a en vang vang a, "Nang..nang hi Nathana maw? Nathan Malsawmkima kha maw i nih?" a ti ta hu mai. "Aw ni e...min hria em ni?" tiin Nathana chuan a lo zawt let a. Phur tak hian Maxie chuan, "Aw hria e...awii, ka ngaisang lutuk che. I thlalak phei chu ka room ah ka tar khat vek, awi ka va lawm tak." tiin min rawn en ve leh a.

"Chuan..nangmah hi...Rinawma em ni?" a han ti leh a, intithei rilru deuh tak chuan ka lu ka lo bu nghat a. "Ka van vannei tak...TV ah chiah ka la hmu che u a, ka hriat hnu in ang ka ti reng a ni. FB ah pawh in thawnthu ka chhiar ziah a, Youtube ah pawh ka ngaithla leh vek zel." a han ti a, eng tak chu awmzia nimaw.

Sanvi chu a lo nui kur kur a, "Anih min hre ve em?" a lo ti a. "Aw...Sanvi..Nathana nupui tiraw?" tiin Maxie chuan a han zawt veleh a. "Nih ve hi...hei hi kan fate an nih hi." tiin Sanvi chuan a lo chhang a. "Rinawma hian bialnu a lo zawng mek a, kan hmu hlauh che chu a van tihzia tak." tiin Nathana chu a han nui leh huah huah a.

"Maxie..eng ti turin maw hetah i lo kal ve a?" tiin Sanvi chuan a han zawt a, "Englo ania...novel ziah ka tum a, chuan helai resort thar hi a tha dawn riauvin ka hria a, bul tan nan tiin sum neih zawng zawng nen ka lo zin ve a nih hi." tiin a chhang a. Chutih lai chuan kan eitur te pawh chu a rawn thleng ve ta a, titi pah chuan chaw chu kan ei ho ta a.

***********************

Kan ei kham hnu chuan Maxie chuan a room awmna te chu a sawi a, 3rd floor niin 301 ah a awm thu te chu a sawi a. A fel phian a, kawm a nuam khawp mai. A bik takin a hmeichhiat pui a nih vang nge, Sanvi nen chuan an inkawm ngeih khawp mai. Nathana te nupa room ah Maxie chu lengin Sanvi nen chuan an inkawm a, kei leh Nathana erawh resor bula park ah chuan meizial zu in kan titi dun a.

Chutih lai chuan khang tlangval pathum te kha ruih hmel zet hian an lo kal a, an hmel en reng reng chuan kan lakah an lungawilo tih chu ka hrethiam nghal. Pakhat chuan a zu bur ruak chu ka ke zawnah chuan a rawn vawm keh chuai mai a, "Nangmahni vang vek, kan mualpho phah kha in hria em?" a rawn ti pung pung a.

Nathana chu a lo nui suk a, "Keimahni vang nilove...kha nula inrawn chhaih buai hma daih...mikhual tamtak zinga bengchheng insiam vak vak atang khan nangmahni leh nangmahni in inti mualpho daih tawh." tiin a chhang a. Pakhat leh chuan thinrim tak hian, "I va tawngthei ve a..sawisak in duh em ni?" a han ti leh pung pung a.

Ka kham ta hle mai, "Enteh thiante u..nangmahni chauh kha rui phur angah inngai suh u...a pawr tawk chiahin kan lem ve sak tho ania." tiin ka chhang ve ta a. "Nia, keiphei chu chaw ka ei kham chiah sia, a charge nuam tawk chiah lehnghal." Nathana chuan a lo ti ve bawk a. An thinrim hlawm kher mai, "Anih chuan ti ila." tiin pakhat chuan posi a han la nghal ringawt a.

"Ngawi teh u....nangni mai mai insual pui tur hian hun kan nei lo ania, in pathum khan saw lai tawlhpahrit ah sawn va infiam mai mai zawk teh u, in na lo zawk ang." Nathana chuan a han ti leh a, ka lo nui huk mai. Chutah pakhat chuan, "I va tawng hnem ve mawle." tih pah chuan Nathana chu rawn hnek a tum a.

Awlsam rapthlak uchuak leh lutuk mai hian Nathana chuan a kut chu a lo man sak a, lehlamah chuan meizial a la keng bawk. Elh pawh a elh lo, a kut chu a lo hmer sak vak mai a. "Ana..ana ana lutuk." tiin a rak tuar tuar mai. Midang pahnih chu an ding reng ringawt a, mak tih hmel taka Nathana en chung chuan an ngawi reng ringawt.

Nathana lah chuan, "Hey...bengchheng suh..buaina siam zawk in nia, tinge khatia ana ana i tih leh si?" tiin a lo hau vel. "Thlah teh ana lutuk." tiin a si hlarh hlarh mai a, Nathana chuan a thlah ta a. Chupa chuan a kut dawm ngawih ngawih pah chuan, "Min rawn chhan ve ta che u, in va nep ve a.." tiin a thiante chu a hau hrep mai.

"In room ah va chho rawh u, nat ve in duh loh chuan..ka la che ve lo mai mai zawk a nih hi aw.." ka lo ti ve a, rum taka min melh chung chuan an kal nal nal hlawm mai. Nathana nen chuan kan in en a, kan nui ringawt. "Mi kutthlak lohna a rei tawh bawk a, ka duh aiin ka la hmer na thei lo zawk anih kha." a la ti zui.

Meizial chu kan zu zo va, tichuan inchhung lamah chuan kan inzui lut ve leh ta a. Ka room ah luh ka tum chu Nathana chuan, "Nghal ringawt ache, dar 8 pawh ala rik loh hi..lo leng ve hrih rawh." a han ti a. "Aww...honeymoon hmang in nih kha..ka lo tel ve zel ten." ka lo ti vat a. "Saw...chicks chhelo deuh a awm saw, ka tihpui ang che." a han ti leh a.

Nui chung chuan, "I mawl ami? Ngaihzawng ka neih leh nghalin ka lerh hmel dawn lutuk asin." ka han ti a. Ner nung pah chuan, "Hmel nilovin i lerh sa reng alawm, i luck loh vang mai mai zawk anih kha." min la ti zui. "Ka peih lo...tikhan inkawm zawk rawh u, zanreiah ilo phei dawnnia." tiin room ah chuan luh ka tum a.

"A ho mang e awww....lo kal mai mai teh." tiin an room lamah chuan min nawr lut lui hram a. Sanvi leh MAxie te chu an lo la inkawm mek a, naupang ho chu khumah an lo infiam a. "Ehe...tinge in rawn innawr luh chiam a?" Sanvi chuan a lo ti a. "Hei pui...mut a tum nghal der a, ka rawn hruai lui a nih hi." tiin Nathana chuan a lo chhang a.

"Amak thin e aw, U Rinawma chu...ala hma alawm, damlai lu sun tih takah, nangmah a tah kerh kerh iva tum em ni?" tiin Sanvi chuan min lo fiam ve bawk a. "Chutiang lam anilo...inpa tawngthei zeh zuah lutuk hi chu a.." tiin ka nui a. Maxie chuan nui chung hian, "In fel ka ti emai keichu...thian thar ka tawng che u a, ka thla a muang huai mai." a lo ti ve bawk a.

"Maxie, engtik thleng nge awm i tum?" tiin Sanvi chuan a han zawt a. "Ka hre lo...naktuk tuk leh velah chuan haw mai ka tum tawh a." tiin a lo chhang a. "I va haw hma awm ve.." Sanvi chuan a lo ti a. "Nia..pawisa a uiawm ve bawk sia. Riah man leh thil dang vel hi a to viau tih chu ka hre thova, mahse a hmunhma hi a nawm em avangin neih zawng zawng nen ka lo kal ve a nih hi." tiin a lo chhang a.

Nathana chu a han thaw hak a, "Nia..rin ai daih chuan a nuam ka ti. Naktuk lamah fang kual tak tak ila a tha ang." a lo ti ve bawk a. "Engtia rei nge awm in tum a, nangni?" tiin Maxie chuan a han zawt ve leh a. "Ni 5 vel kan awm ang." tiin Sanvi bawk chuan a lo chhang leh a. "Kum engzat nge i nih reng reng a?" tiin ka han zawt deuh tawp a.

A laih hmel kher mai, min la chhang lawk lo zui. "Tun laiah nula te khatin an kum zat an zawt tawp tawp ngai lo." tiin Nathana chuan min han nghawk zauh va, ka inthiam lo kher mai. "A ho lutuk..kum 24 ka nia." tiin min chhang hlauh mai. Sanvi chu a nui a, "I kum zah kan sawi ve mai tur ania, mawl lutuk." min lo ti ve bawk a.

Thingpui te chu kan chah leh a, kan inkawm rei ta phian mai. Dar 10 rik dawn hnaiah chuan Maxie chuan, "Ehe..a tlai dawn tlat, ziah tur ka la ngah sia...ka phei san phawt ang che u." tiin a tho va, "Aww...ala hma alawm le, mahse ziah tur te ila neih si chuan a pawi chuang lo." Sanvi chuan a lo ti a.

Maxie chu a kal ta a, Sanvi chuan min nuih vur vur mai. "U Rinawma chu i star tih ka hrethiam nghal mai, i melh dan kha a diklo hrim hrim." a han ti a. "A awihawm loh emai, nang chu awm lo la inpa hian a bem daih tawh ang." tiin ka lo pha vat a. "Mai mai a..mizo ai chuan vai ka duh daih zawk." Nathana chuan a lo ti ve vat bawk a.

"Ka va mu teh ang keipawh...natuk lamah resort fan kual kan tum bawk si." ka han ti a. "Nia..keini pawh kan mu nghal ang, ka chau riau mai." Nathana chuan a lo ti ve bawk a. "Zanlaiah zu in in ru leh thovang." tiin Sanvi chu a lo tum hmuk mai. "Anih muttui u." tiin ka phei san ta a.

***********************************

ZAn dar 12 velah chuan ka kawngka chu a rawn in kik karh karh mai, Nathana chu a rawn lut a. Sawi lawk sa ang ngeiin zu chu kan han thli dun nghal karh karh a, "A hrim hrim in..Rinawm, Tluangtei chuan bialpa dang a lo nei amaw?" a han ti thut a. Ka sawi peihlo asin le, he vainu pasal tak hi chu.

"Nia..chubakah kan in upat hleih si a, a chhungte lam khan min duh leh ta chiah lo niin a lang."

"Kha chu thuhran ni se, Tluangtei chuan ngaihzawng dang a nei reng reng em ni?"

"Kan inthen hnuah zawk a nei, amah ang rual vel."

"A tir kha chuan a chhungte pawh khan an duh ve viau che amaw ka tia."

"Duh te chu duh e...mahse amah khan min hne tial tial ni berin ka hria."

"Police nih hi chu hahthlak deuh mai asin, SAnvi anga rinawm hi an vang ngawt ang. Ani chuan kum 10 dawnlai min nghak ngat ngat mai ania, nihleh...in inthen in i rilru ana ve tho lo maw?"

"Nat te chu na ve e..a ho emai, thildang sawi ang."

A nui huah huah a, "Kha ti dawn reng kha sin, a chhungten an duh lai che khan neih vat tur ania. Tunah i upa tawh sia, an phal tawh lo a nih kha." ala ti ta deuh deuh va. "Chuan Sir..chaw eihmaa kan sawi kha sawi leh ta ila, detective chu tinge nih i duh nachhan?" tiin ka han zawt a. "Aww...ka chak ve nimai lawm." a lo ti ringawt a.

"Aww..i chakna chhan alawm ka zawh che."

"Sawi ang khan hnuchhui a che chhuak tur chuan kan rank a sang tawh si a, mahse mahni aia upa te ka thuhnuaia dah a, tirh zuah zuah hi ka thiam ve lo. Chuabakah pa te rual nen rank khat deuh thaw ah kan awm a, anuam lo emai."

"SP i ni tawh a, i hlawh a tam ve thawkhat bawk nen, ka ui mange."

Nathana chu a nui a, "Thawhrimna avang leh beidawng lova beih tang tang avanga sum nei ka nilo...corrupt SI ka nih avang khan sum ka nei hnem a, thamna pawh ka dawng nasa. Pawisa khan ka mit a ti del a, ka dinhmun pawh a kan phah sawt a nih kha. Mahse Sanvi vang hian ka inhmuchhuak a, chuvang chuan pawisa thawk chhuak tura nasa taka bei thinte hi hriatthiam pui ve ka duh a ni." tiin min chhang a.

"Chungte chu nang tluka hrechiang an awm hleinem, nu leh pa pawh nei lovin fahrah run atangin i seilian a, chupawh ramdangah lehnghal. Nang anga nunna sual chhuak hi mizo zingah ngat phei chuan an vang ngawt ang, i chhuanlam mai mai a ni. Raymond-a i ngaihsan vang a nih kha, Raymond-a thawh dun pui i chak a nih kha." ka han ti deuh luam a.

A nui nasa mai, "Enge Raymond-a i rawn sawi chhuah daih a, a awm ang lo emai." a lo ti a. "A nia lawm, kei aiin a fing zawk a. Chuvang chuan i thlang zawk anih kha, min hne tawh a nih kha." ka han ti leh a. "Amak thin emai, naupang ang mai..pung pung a che." tiin a nui leh a. "Sir, bansan chu i tum tak tak em ni?" tiin ka han zawt leh a.

"Ka bansan ang chu ka tilo, mahse ka tum rilru ve deuh mai chauh a ni. Hun in ala hril ang chu, lungngai mai lo la. Hawh teh, i mu teh ang..hei zan a rei tawh. NAktuk ah kan vak kual nileng dawn bawk sia, kan chau lutuk ang." a ti a. "Nia, anih muttui phawt aw..." tiin ka lo chhang a. "Muttui le, ka rawn kai tho ang che." tiin min chhuahsan ta a.

******************************

Mak tak maiin a tuk zingah chuan dar 5 pelh ah ka harh hlawl mai, khua lah chu a vawt reuh phian lehnghal. Mut leh ka han tum a, mahse ka thei tawh thak lo. "Chhuak harh law law teh ang." tiin ka phun sup a, kawrlum ha in ka room chu ka chhuah san ta a. Lobby-ah chuan ka zu chhuk a, front desk ah chuan security guard hi a lo thu a.

"Ehe ka pu, i va tho hma em em ve..good morning." tiin min lo wish a. "Morning le...khawnge reception ho hi?" tiin ka han zawt veleh a. "Duty tur a lo la thleng lova, mamawh i nei em ni?" tiin min lo zawt let leh a. "Nei love...enge an duty shift hi ni hrim hrim a?" ka han ti leh a. "Zingah hian pakhat a duty a, zing dar 6 atanga chhun dar 2 thleng. Chuan dar 2 atang hian midangin an thlak a, zan dar 10 thleng." tiin min lo chhang a.

"Mahse nimin kha chuan reception ah khan pahnih an awm sia, enge awmzia?"

"Nia, zing dar 9 atanga tlai dar 5 thleng hian day-a duty pakhat an awm ve leh a."

"Chu chu staff zawng zawng ah em ni?"

"Aih nilove...reception ah bik."

"Awle..ka lawm e, ka han tei chhuak mai mai ange."

"Awle, nuam deuh khan le."

PAwnah chuan ka chhuak a, boruak chu a thiang tha kak kak hle mai. Lodge atanga hla lo te ah chuan ka han kal kual vel mai mai a, park bula pipu ah chuan hmeichhe pakhat, lo thu kun reng mai hi ka va hmu a. A thawmhnaw hak atang chuan resort-a thawk, staff ngei a ni tih a hriat theih a, reception ami a ni bawk.

Ka va kal phei a, a lo tap hawm hawm mai. Inthiar fihlim mai tha zawka hria in kal sawn ka tum a, mahse min rawn hmu hman hlauh mai. Rang takin a ding a, min hmu laklawh tawh emai tiin ka va pan phei a. "Ehe ka pu, guest em ni i nih?" tiin min lo zawt a. "Aw ni e, staff zinga mi i ni ang maw?" ka han ti a.

"Aw ni e, duty turin ka rawn kal a nih hi."

"I va hma reng reng ve a, dar 6 ani lawm ni i duty tan hun?"

"Aw ni e, engtin nge i hriat a?"

"In security guard saw ka zawt a."

A mittui chu a hru leh zauh thin a, "I tap em ni a?" tiin ka han zawt a. Za lo tih hriat tak chuan  a nui suk a, "Tap love...ka duh aiin ka thleng hma a, ka lo thu mai mai." tiin min chhang a. A aw atang pawh chuan a tah ala chhuak tih a hriat ngawih ngawih, "Manganna i nei em ni? Ka pui thei maithei che asin." ka han ti a.

"Aih neilo...ka tha alawm." tiin min lo chhang leh a. A hmel chu ka en a, hmeltha ka tih zawng tak a ni. Lerh vang a nilo, tupawn hmeltha tih zawng kan nei vek. A san chu a dum hlarh mai a, a hmui chu a senno chek bawk. Ngo lam a ni a, a pian pawh fuh tak a ni. Mahse a mit veilam ah chuan kutthlakna niawm tak, duk tluk mai chu ka hmu ta.

"Tinge i mit kha...miin kut an thlak che em ni?"

"Aih..bathroom a ka inbual naah ka tlu palh a."

"Enteh thiannu, i hmel atang khan rilru hahna i nei tih ka hai miah lo ania. Min hrilh rawh, ka pui thei ang che." ka han ti leh a. A nui leh a, "Engmah a awm lo chutiang, ka tha alawm." a ti leh tlat mai. "Tunge i hming min hrilh thei angem?" tiin ka han zawt leh a. "Lalmuanawmi ka nia, Muani min ti mai dawnnia." tiin a nui lui sen sen a.

A nui hmel te chuan min hip nghal riau mai, "Rinawma ka nia, Lalrinawma." tiin ka chibai a. A ngawi leh daih mai, "Muani..harsatna i neih chuan sawi tawp rawh, Police Officer ka nih hi." ka han ti chiah chu a meng kawk mai, a ding thut lehnghal. Keipawh chu ka ding ve a, "Ngati nge? Min hlau em ni?" ka han ti tawp a.

"Aih..chupawh anilo. Hei, ka tlai dawn tlat, anih ka kal phawt ange." tiin a kal daih mai a, ka hrilhhai angreng kher mai. A hma zawng khan tha deuh khan min be si a, Police ka nih thu ka sawi veleh a hlauh hmel taka khatia a kal ta daih mai khan rilru chu a ti nuam lo duh kher mai. Ngaih tha lo tak chuan ka thlir zui vawng vawng a, harsatna lian tak chu a nei chiang a ni.

Ka phone a rawn ri a, Nathana a lo ni. "Aw hello Sir?" ka han ti a. "Rawn kaih thawh che ka tum a, i lo awm silova..khawnge i kal daih a?" a rawn ti a. "Park ah ka leng kual vel mai mai." tiin ka lo chhang a. "I va tho hma awm ve, lo phei rawh, thingpui in ang." a rawn ti leh a, phone chu dah in lodge lamah chuan ka phei ve leh ta a.

*************************

TO BE CONTINUE