UNHOLY CONFESSIONS (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 5

 UNHOLY CONFESSIONS

(MIZO FICTION TEEN SLASHER/HORROR STORY)

Written by : Aaron Malsawmdawngzuala

WARNING : 18+

Chapter - 5

*******************

Abawihi leh Alex-a te pawh chu an thleng ta, Abawihi te inzawnah chuan an ding ve ve a. "Anih naktukah kan inhmu leh dawnnia aw.."tiin Alex-a chuan a han nuih a. Abawihi pawh chuan lo nuih letin, "Tehreng mai...i thlen veleh min lo hrilh dawn nia." a lo ti ve bawk a. Alex-a tlan mai a han tum chu kawngka chu a rawn inhawng a, Pu Tluangtea leh Abawihi nu chu an rawn inzui chhuak ta mai a.

Abawihi leh Alex-a chuan an lo en hu mai a, "I dam maw? Min la hria em, Abawih?" tiin Pu Tluangtea chu a khi suk a, Abawihi chu a hrilhhai kher mai. Chutah mak tih hmel tak hian Alex-a chuan, "Pa..nang maw?" a lo ti ve hu bawk a, Abawhi chuan mak a ti tawlh tawlh mai. "I pa maw? Hei hi i pa maw?" tiin a han zawt a.

Alex-a chuan a lu a lo bu nghat a, "Aw..ka pa a nih hi?" tiin a lo chhang a. "I va rei ve...kan nghak char char che alawm." tiin Abawihi nu chu a lo vin hlar a. "Ni e, kan inbiak lawk angai a ni." tiin Pu Tluangtea chuan Abawhi chu a han en a. "Pa...enge hetah i tih a?" tiin Alex-a chuan a lo zawt ve bawk a.

"Lo va haw rawh...ka rawn haw ang." tiin apa chuan a lo chhang daih mai. Alex-a chuan a hnial ta lem lo, "Anih leh ka kal phawt ange aw.." tiin a scooty chu a han start a, a tlan ta a. Abawhi chuan inthlahrung takhian, "Awle..inchhung lamah inbia ila." a ti zawi sap a. Pu Tluanga pawh chuan a lu a lo bu nghat mai, inchhungah chuan an inzui lut leh ta hlawm a.

**************************

Zothana chuan Liantea ruang chu a kuah vawng vawng a, "Ka tihpalh thianpa, ka tlai em a ni. Min ngaidam rawh aw..thianpa." tiin a tap zawih zawih mai. Chahbi chuan ake thlunna chain chu a phelh sak ta tho va, tanpuitu ko tur leh chhuahna zawng turin tui khuah atang chuan a chhuak leh ta a.

A awmna hmun chu eng factory emaw tak chu a ni tih a hre thei mai, mahse a chhung chu a thim deuh khup avang chuan eng factory chiah nge a nih a hre thei lo. Ventilation atang chuan ni a rawn lut a, a chhung lah chu a lum em em mai lehnghal. A kal kual a kal kual hnuah engemawni hi a chhir fuh hlauh mai, rang takin a dap nghal a.

Torch light a lo ni hlauh mai, a han chhar a, a han on nghal a. Mahse a lo dim em em zui a, a hlauthawng bawk si, thinrim bawk si chu a tap pur tawh mai. Torch light hmang chuan a han en kual a, "Awm in awm em? Tunge awm?" tiin a au vak vak a, a khawk rum rum mai. Mahse chhanna erawh a dawng lo, a reh hian a reh ruih ringawt.

Reilote hnuah chuan duty room niawm tak hi a hmu fuh a, rang takin a lut nghal a. Dawhkan a lo awm a, computer pakhat a lo awm bawk. Mutna tur khum zim tak leh bal zet mai hi a lo awm bawk a, rang tak chuan plug te chu a han on a. Mahse engmah a eng thei lo, maimawm ril lah a tam em em mai lehnghal.

"Khawi hmun nge maw ni phiangsen le?" tiin a phun nuah nuah a, computer te chu on a han tum a. Mahse engmah a kal thei lo, dawhkan sirah chuan intercom telephone a hmu leh ta hlauh mai. Mahse chu pawh chu a wire a lo in-cut vek a, hman tlak a ni chuang lo. A thinrim lutuk chuan dawhkan chu a chum bur bur a, "Tunge i nih? Min chhuah vat rawh...engthil nge i duh?" tiin a au chiam chiam mai.

Chutah computer chu amahin a rawn in on ta mai a, video pakhat hi a rawn inplay a. Zothana chuan video chu a han enchiang a, a thin a phu nghal dup dup mai. Video ah chuan amah leh Liantea leh Kima'n duhtawka Jenet-i taksa an khawih lai te, an pawngsual lai te chu a rawn lang ta vek mai.

Mahse chu video chu anmahni lak a nilo, midang lak a ni. Jenet-i an pawngsual na hmun kha an veng YMA Hall hnuai a ni a, zing lam dar 2 vel, mi mut reh lai tak a ni. Khawi bang kil emaw atanga lak ni ngeiin a hriat a, tu emawni in a lo la ru reng tihna a nih chu. "Nilo...nilo...off rawh..off vat rawh." tiin a rak chiam chiam mai a.

Mahse video chu a in play zel mai si a, Zothana tihngaihna hrelo chuan computer monitor chu chhuatah a paih thuai mai. Thildang te pawh chu a paih darh a, "ZAwnga..rawn inlan ta che. Min cho chuan rawn inlan rawh...ka that khawp ang che." tiin a au vak vak mai. Khumah chuan a thu a, a lu dawmin a kun tlawk tlawk mai.

Chutih lai tak chuan inchung lamah chuan thawm a hre tlat mai, a ding nghal a. Hmanrua a zawng nghal vat a, vanneih thlak takin tiang lian ta nelh nawlh, chang tha tak mai chu khum sirah chuan a lo awm hlauh mai. A chuh nghal vat a, a torch light nen chuan duty room atang chuan a chhuak ta a.

Step ah chuan a chho ta a, banga plug lo awm apiang te chu a on chho mawlh mawlh a. Mahse engmah chu a eng thei lo, a thim ngaiin a la thim deuh mup mai. Fimkhur tak leh thawm dim thei ang ber chuan a han enkual zel a, mahse tu mihring mah a hmu lo. Chuveleh inhnuai lam zawk atang chuan thawm a rawn awm leh ta daih mai, rang tak chuan a dak thla a.

Light chuan a zu en a, mahse tumah a hmu chuang lo. Inhnuai lam pan chuan a chhuk leh a, kawngkhar awmna a zawng kual a. Mahse kawngkhar a hmuh zawng zawng chu a lo inkalh vek mai a, pawn lam atanga kalh vek a ni. A mangang chuan a tiang ken chuan kawngkhar te chu a hlap vak vak a, "Min pui ru...min pui hram teh u." tiin a au vak vak a.

Mahse a au thawm tih loh chu thawm dang engmah a awm lo, a reh hian a reh diak mai. Kawngka zawng zawng chu thir atanga siam deuh vek a lo ni bawk si nen, a tan chuan chulai hmun atang chuan chhuah ngaihna a awm tawh lo. A chau tawh bawk si chu chhuatah chuan a bawk deuh thlawp a, "Khawngaihin min chhuah tir rawh...khawngaih takin.." tiin a aw chu a chhuak tawk tawk tawh.

Thawk a han la leh te te a, a chakna zawng zawng sawm khawmin a han tho leh ta a. Chhuahna tur kawng dapin a han kal zau leh deuh va, a tawpah chuan tukverh, mihring leng tawk vek leh chu ava hmu ta. Chu tukverh atang pawh chuan ni eng a rawn lut ut mai a, a lawm kher mai. Rang tak chuan ava pan nghal a, mahse a thleng dawn tep tih ah chuan a chhuat rah lai, thing dawh chu a chim ta rup mai.

A kawng a chin hnuai lam zawng chu a tang ta tlat mai, "Nilo..min chhan ru.." tiin a au vak vak a, mahse awmzia a nei der mai si lo. Chhuah a tum a, mahse a taksa rit tak leh a sa tha em em mai avang chuan a tang nghet em em mai a. Amah lah a lo chau tawh bawk si nen, chhuah a tum nasat poh leh amah a in tina tulh tulh bawk si.

Thing zum ther fer fur mai leh zum tak tak te chuan a kawng te, a dul te chu an chhun a. A chet nasat deuh chuan a vin chu an rawn chhun pawp lek lek zel mai si a, a mangang takzet a ni. Chutih lai chuan bang kil thim atang chuan thawm a rawn awm ta tlat mai, naupang motor lem, control theih hi a rawn tlan a.

Zothana hma zawn takah chuan a rawn ding a, music a ri ret ret bawk. Tichuan chu motor lem atang chuan X-a chu a rawn tawng leh ta, "I thianpa i chhan hman loh avang khan...i thianpa a thih zawk avang khan nang hi i him bik turah i lo inngai em ni?" a rawn ti ta mai a. Zothana chuan motor lem chu a han en chiang a, a chungah chuan camera a lo invuah a, microphone tereuhte a lo awm bawk.

Amah kidnap tu chuan live-in a be mek tih a hrethiam nghal vat a, "Tunge i nih? Khawngaihin min chhuah rawh. Khawngaih takin min chhuah rawh...thih ka la duhlo." tia tap chung chuan camera chu a en a. "Tumah hian thih kan duh hleinem...kan nun a beidawng emaw, harsatna namen lo kan tawk te a nih loh chuan tu mihring mah hian thih kan duh bik lo." tiin X-a chuan a lo chhang a.

"Khawngaihin..min chhuah hram rawh. Engpawh ka ti ang, i duh apiang ka tihsak ang che. I duh chu sawi la, ka nei a nih chuan ka pe em em ang che." tiin Zothana chuan a ngen lawm lawm a. "Jenet-i zahawmna kha i pe let leh thei em? Jenet-i pa kha i dam tir leh thei em ni?" tiin X chuan a vin ta hrep hrep mai a.

Zothana chuan chhan ngaihna a hre lo, a tap a tap ringawt mai. X-a bawk chuan, "Thih i phu a ni...i thianpa ang chiah khan nangpawh hian thih i phu." a rawn ti leh ta mai a, khua a thim tan tawh tih chu tukverh a en chuan Zothana chuan a hrethiam nghal. A chil a lem dawk a, "Eng..engtin nge min tih dawn? Min that dawn tihna em ni?" a han ti khur dar dar a.

"Chu aia nasa chuan....ka that satliah dawn lo che, hrehawm takin i thi ang." tiin a lo chhang leh ta mai a. Chutah motor lem dang chu a lo tlan leh a, turck lem a ni thung. Chutah chunglam atang chuan engemaw hnang em em mai, tam tak hi a rawn baw teuh mai a. Zothana taksa ah chuan a kai vek mai a, a diak hian a diak pur mai.

Chu thil chu khawizu a ni tih a hre nghal, Zothana taksa ah chuan a kai pherh luai mai. "Engthil nge i tih a? Engtia min tih nge i tum a?" tiin Zothana chuan a vin vak vak a. "Kha truck lemin a phurh kha han en teh." X chuan a rawn ti a. Zothana'n a han en chu Truck lem chuan bur fim hi a lo phur a, a chhungah chuan fanghmir niawm tak hi an lo khat vek mai.

X bawk chuan, "Bur chhung ami kha fanghmir an ni a, fanghmir satliah nilovin khawvela fanghmir sehna ber, Bullet Ants te an ni. Pakhat lek pawh khan a seh che a nih chuan, darkar engemaw zah i khua a ti sik thei hial ang. Mi nunna i ti chhia a, i ti mualpho a, hmeichhe tamtak mawilo tak takin i fiamin i khawih lui thin bawk. Chuvang chuan hrem i phu a ni...hremna hi i tuar zo lo a nih chuan i thi a nimai." a rawn ti leh ta mai a.

Zothana chuan a hlau kher mai, "Nilo..min ngaidam rawh, ka inpuang ang..Jenet-i bulah pawh ngaihdam ka dil ang, khawngaihin min ngaidam hram rawh." a ti chul mai a. "Ngaihdam i phu lo....Jenet-i chuan in pathumin a ngaidam lo che u a, thi turin a duh che u." tiin a lo chhang a. Zothana chu a tap pur mai, "Nilo...Liantea pawh..Liantea pawh kha chance i pe a, chance min pe ve rawh. A fair lo, khawngaihin...duhthlan tur tal min siam sak rawh." tiin a ngen leh a.

X chuan zawi muang hian, "Duhthlan tur chu i nei ngei alawm...heng fanghmir te hian an seh hunah che..i duh chuan i au thei a, i duh chuan i ngawi reng thei bawk." tih chauh chuan a chhang ta mai a. Chuveleh  camera awmna car zawk chuan truck lem chu a va su ta chawrh mai a, fanghmir bur chu a rawn let thla ta.

Bur chuan chhin a neih loh avang chuan fanghmir chu an rawn vak chhuak ta sup sup mai a, Zothana chu a mangang ngei mai. "Nilo...min pui rawh u..khawngaihin..thih ka la duh lo." tiin a au vak vak a, mahse awmzia a awm der mai silo. Chung fanghmir te chuan khawizu rim chu an hre ta, Zothana awmna chu an pan ta them them hlawm mai.

Zothana chu tal chhuah a tum a, mahse a tal nasat poh leh thing zum te chuan a nak leh a dul te chu an chhun thuk telh tleh mai si. Chutah fanghmir ho chu an rawn hnai zel a, Zothana mangang lutuk chu a tal vak vak a. Thing zum chuan a dul vun chu a chhun pawp ta, thisen a rawn chhuak ta hial a.

Ana ti lutuk chu a au vak vak a, mahse fanghmir ho chu an rawn hnaih zel avang chuan chhuah ngei tum chuan na tuar chung chuan a han tal leh vak vak a. A nakah te chuan thing zum chuan a chhun a, a vun chu a tai thler ti tih hial mai. A na ti lutuk chu a han chawl leh rih a, mahse a tlai zo ta, fanghmir ho chu an rawn thleng tawh.

A theih ang ang chuan chung fanghmir te chu a lo beng vak vak a, a beng hlum nual mai. MAhse an tam lutuk tlat, a taksa ah chuan an vak chho ta sup sup mai. Chutah an han seh rawn ta tak tak mai a, pakhat lek seh pawh puitling pangngai mittui tlak zawih zawihna khawp kha a ni a. Mahse Zothana erawh a nuai tel chuan an seh rawn ta mai a, a rak hian a rak chiam chiam mai.

*************************

"SHADOW X kha a lo let leh a ni." Pu Tluanga'n a han ti chiah chu Abawihi chu a phu zuk mai. A mitthla chuan Sawmtea'n sual a tum laia, X-a'n a rawn chhan lai te chu a hmu nghal zut zut a, Sawmtea lu phuak dar vek lai te chu a hrechhuak zawk zawk mai. "Engmaw? Khapa kha...alo let leh amaw?" a ti hu mai a.

"Aw...tuna ruang chhar hi..hei pawh hi ama thah a ni."

"Mahse, engtin nge anih theih? Engtin nge i hriat?"

"Sawmtea a thah dan ang deuh khan tuna mi pawh hi a that a ni."

"Enge awmzia?"

"A inpuan tir...Sawmtea kha in Principal khan a ngaihdam hman loh avangin a thi a, tuna mi pawh hi ngaidamtu turin a ngaihdam loh avangin a thi a ni."

"Anih leh tinge min hrilh..tinge min hmuh duh nachhan?"

"A chhan chu Shadow X khan Sawmtea a thah laia, principal call tu kha i nih vang a ni."

Abawihi chuan a ring chiah lo kher mai, "Chuvang ringawt chu maw?" tiin a han zawt leh a. "Hrilh hriat che hi a ngaiin ka hria a." tiin a lo chhang leh a. Abawihi chu a khi suk a, "Khami hmunah khan, party naah khan khati zah mi kan awm a, pricipal call tu ber ka nih avangin min rawn hrilh amaw? Midang pawh a hrilh theih reng sia, tinge kei kher?" tiin a han zawt leh a.

"Investigation kan neih tan tirh atangin nangmah hi kan zawt nasa bik che a, microphone leh camera..stage bula hmu chattu pawh nangmah bawk a ni." a han ti leh a. Abawihi chu a thaw deuh hak mai, "Min ringhlel tihna em ni?" tiin a zawt ve ta deuh kher a. Nui suk pah hian Pu Tluanga chuan, "Ringhlel love." tiin a lo chhang mai a.

"Anih chuan thildang a awm tihna em ni?"

"Ni e...awm e."

"Enge ni, sawi la?"

Pu Tluanga chu a han thu tha te te a, "Ka fapa nen hian in inzui nasa viau mai a, in inngaizawng em ni?" tiin a zawt ta nge nge a. Abawihi chu a lungawilo kher mai, "Chumi min zawt tur chuan maw ilo kal?" a lo ti vat a. "Case chungchang vang a nih rual rualin ka fapa nena in chungchang zawt tur che a lo kal ka ni bawk." tiin a lo chhang leh a.

"Um..kan inngaizawng alawm."

"In inupat hleih deuh i ti ve lo em ni?"

"Enge ti tura min duh? Kalsan turin min duh em ni?"

"Nilove...ka fapa neih chhun a ni a, ala naupang bawk a, keh thei dawm tak meuh meuh a kan dawm a ni. In inhmelhriatna pawh kar khat em pawh ala ni lova...chuvang chuan inhre chiang phawt ula ka ti a ni."

Abawihi chu a zak angreng kher mai, "Awle..ka hria e." tih ringawt chuan a chhang a. "Ka haw phawt ange." tiin Pu Tluanga chu a tho a, chutih lai chuan Abawihi nu chu a lo kal a. "Ehe..i haw dawn em ni?" a rawn ti a. "Nia..hei kan inbe zo tawh a..ka haw tawh phawt mai ange." tiin a lo chhang a, Pu Tluanga chu a haw ta a.

********************************

Zan a lo thleng leh ta, Kima te thian zinga mi, Nghaka chuan phone a khawih mual mual a. Chutih lai chuan a thianpa, Siama chuan a rawn call a. "Hello Siama, enge ni ta?" tiin a han zawt a. Hlauhthawn hmel tak hian Siama chuan, "Bro..Zothana leh Liantea te hi an bo daih ania." a rawn ti ta mai a.

"Enga? Engtia bo daih in maw? Enge awmzia?" tiin Nghaka chuan a lo zawt vat a. "aKa hre biklo...tun thlengin inah an la haw lo ani awm e. An chhungten min rawn phone nasa tawh lutuk, an rawn phone ve lo che em ni?" tiin a rawn zawt let a. "Zothana nu kha chuan min rawn phone a, chaw ei kham hlim khan. An rui nawi leh tawh anilo maw? Ka ngaih a lo tha hmiah mai asin." Nghaka chuan a lo ti leh a.

"Kei chu ka ngaih a tha lo, vawiin atang tawh khan an bo char char tawh a, phone lahin a tlang thei bawk silo."

"Engtin nge kan tih ang aw? An chhungte chuan police ah report mai se a tha lo maw?"

"Nia..engemaw tal chu kan tih ve angai a ni."

"Enge kan tih vak chuan anga?"

"KA hre biklo...a zawn te pawh kan zawng ve ang chu."

"Engtin nge kan zawn anga? Tihian kan lo zawng ve tawp dawn tihna em ni?"

"Vawiin chawhma a bo tawh kha an nia, tun thlengin biak pawh theih lohvin an la awm tihna ania. Engemaw tak thil diklo chu a awm chiang alawm, ka hlauthawng tak tak."

"Enge i hlauh thawn vak a? Zan dangah pawh an haw tlai fo alawm."

"Zandang nen a in ang lo, Kima thih dan zawng zawng nen..vawiinah lah police in an kawm bawk che a. Keichu ka hlauthawng ania, Kima kidnap tu khan an pahnih hian a kidnap ve a nih te ka ring rum rum."

"Anih chuan ka chhungte hi kan hrilh ve ange..nangpawh Zothana leh Liantea chhungte bulah chuan police hnena report mai turin lo hrilh rawh."

"Awle..anih phawt le."

Phone chu an dah a, Siama chuan Zothana leh Liantea chhungte chu phone in police hnena report mai tur chuan a va hrilh ta a. Zothana leh Liantea chhungte chuan police hnenah chuan an lo report daih tawh hi a lo ni a, mahse nikhat em pawh an la bo tlin loh avang leh tlangval kum 30 chaung tawh ve ve an nih avang chuan mibo anga lo pawm chu an hreh deuh mai zawk hi a lo ni.

**************************

Alex-a chuan apa chu Abawihi te inah enge a tih a, enge a sawipui, engvanga kal nge a nih tih leh enge a biak duh chhan te chu a zawt char char a, mahse apa chuan a chhang tha duh hauh lo. Abawihi lah chuan Alex-a message chu a reply duh thak mai bawk silo nen, Alex-a ngaih chu a tha tawh lo kher mai.

Zan dar 8 leh a chanve a pel tawh a, Alex-a chuan Abawihi reply-na ala dawng chuang lo. Abawihi chu a online zeuh zeh tho va, mahse Alex-a message chu a seen duh thak lo thung. A han call a, mahse a la duh bawk silo. Ngaihdan chu a nei thiam ta nghal mai, apa roomah chuan ava lut ta nge nge a.

"PA..min hrilh teh, enge iva tih?"

"Awww..ka sawi tawh kha, case ka chhui mek ah hian i thiannu hi ka hmuh a ngai alawm."

"Enge a ngaihna? Tualthattu ah i ringhlel em ni?"

Pu Tluanga chu a nui a, "I va mawl thin tak em...chutiang lam a nilo, thu atthlak pui pui hi sawi thin teh suh." a lo ti leh mai a. Alex-a erawh a nuih aza hauh lo, a thinrim lek lek tawh zawk. "Pa...in case chhui laiah hian inrawlhna a nei em ni?" a han ti leh a. "Nei ka tih loh kha...i hriat ang khan in senior Sawmtea tual thihna ah khan principal call tu ber ania...i hriat ve vek kha." a lo ti leh a.

Alex-a ngaihdan a ni ta vak lo, "Kha thu kha chhuanlamah hmang ziah suh...engemawni chu a awm chiang alawm. Min hrilh ve mai la mawle...thil diklo a awm em ni?" a han ti vin ta deuh thak mai. Chutah apa chuan a han melh hrawk a, "Ka hna chungchang te, ka case khawih lai te hi ka fapa i nih avanga i hriat ve vek a tul lo, lehkha va zir rawh." a lo ti hmak mai.

Alex-a chuan lungawilo tak hian apa chu rum zetin a melh a, "Ka hlata awm turin i hrilh ani tiraw? Ani kha ka tan hian i duhlo a ni tiraw?" a ti ta a. Pu Tluanga pawh a meng kawk mai, "Enga? Engvangin nge chutiangah ka buai anga? I ngaihdan mai mai anih chu...ka buai, nakinah kan inbe leh dawnnia." a lo ti leh hmak a.

"Anih reng kha...kei aia a upat vang zawk a ni tiraw?"

Pu Tluanga chu a ding hluai a, "Ni e..Bawiha, tunlai hmeichhia te hi e, i rin ang an nilo ania. Khatiang after party, zirtirtu te awmlohna hmuna zu leh drugs nena lam chin tawh ho kha chu mitha an awm ngailo. A bik takin hmeichhia ah phei chuan, nang aiin a upa lehnghal. Kum lam kha chu thuhran nise, i tan a tha lo hrim hrim." tiin a hrilh ta a.

"Chutiangah ka buai lo i tih zawh chiah kha...chubakah Abawihi hi chutiang mi anilo." tiin a lo chhang let vat a. "I pa ka nih hi...nang aiin ka tawng hnem tawh. Police Inspector ka ni a, tunlai thalai, awmngaihna hrelo leh ruihtheihthil ti ho hi ka hre hnem lutuk. Khami zan, Sawmtea thih zan pawh khan hmeichhe ho incheina te kha...khatiang zingah khan i thiannu saw a tel ve ania." a han ti leh a.

Alex-a chu a thinrim kher mai, "Pa..khami hmuna a awm ve avang khan khang ho anga hmeichhe lerh leh zaktheilo a ni kher lo. Chubakah mi zawng zawng an in ang vek lo, khami zana a kal ve nachhan chu a thiannu Mary vang chauh a ni." tiin a bialnu, a hmangaih leh duh em em Abawihi thlavang chu a han hauh tang tang a.

Apa chu a han thaw huai a, "Nidangah kan sawi dawnnia...inthen rawh u pawh ka ti hleinem. I tet te atangin mi fel tak ni turin ka enkawl che a, thian sual kawm lo la ka ti bawk thin. Chuvang chuan ka ngaihtuah che a, in lo upa ve zel bawk nen, sawn te i thlak mai ang tih ka hlauh vang alawm." zaidam tak chuan a han ti a.

Za lo tak hian Alex-a chu a khi suk a, "Chutiang mai mai tura inzui kan nilo, Abawihi hi mi fel tak a ni. I ngaih ang ngawt kha  anilo ania, min ngaihtuah vang tih chu ka hria. MAhse Abawihi ah kher hi chuan min ngaihtuah suh u, hmeichhe fel tak a ni a, ruihtheihthil engmah pawh a ti ngai lo." tih pah chuan a chhuak a, kawngkhar chu a khar ri bur mai.

*************************

Richard-a chu a harh a, khumah hian phuar beh a lo ni a. A awmna room lah chu rei tak luah tawh loh tih hriat tak hian a lo bal em em a, maimawm ril a inzam nuai bawk. Khum banah chuan hrui fei tak mai hian nghet taka phuar a lo ni a, khum ban pawh chu thir atanga siam a ni. A ngheh em avang chuan a ban rek te pawh chu ana vek thei hial a, a ngaihna a hre lo kher mai.

A tal vak vak a, mahse a tal chhuak theih hauh lo. A mangang kher mai, "Min chhuah ru, tunge awm che u? Min pui ru...min pui hram teh u." tiin a au vak vak a, mahse chhanna a dawn lo chiang kher mai. Khum mawng lam chu a han en a, TV hlui zet mai hi a lo awm a. Room lah chu a rimchhe em em mai lehnghal, "Khawi hmunah nge ka awm...enge awmzia?" tiin a inbe mawlh mawlh mai.

Chutah TV chu amahin a rawn in on leh ta a, screen-ah chuan X-a chu a thuam famkim nen a rawn lang leh ta. Richard-a chuan a ngaihna a hre lo kher mai, "Enge awmzia? Tunge i nih?" tiin TV chu a han au khum vak vak ringawt a. Chutah X chu a rawn tawngchhuak leh ta, "Sir Richard..i dam tha maw?" a rawn ti te te a.

Richard-a chuan mak a ti kher mai, "Tunge i nih? Enge i duh a?" tiin a han vin vak vak a. "Ka duh maw? Ka thil duh chu maw...i thil tihsual kha puang turin ka duh che." tiin a lo chhang a. "Enge ka tihsual? Enge ka tihsual a?" tiin a au leh vak vak mai. "Kum 3 kal ta khan in college ah, 2nd floor ah kangmei a chhuak a. In security guard, Pu Zara chuan a nunna a chan phah ta a nih kha..i la hria em?" tiin a rawn zawt a.

Richard-a chu a thlan a tla nghal bawrh bawrh mai, "Ka..ka hal a nilo..engmah inhnamhnawihna ka nei velo." a ti nghal chel chul mai. "Ni e, i hal a nilo. A haltu chu a thi tawh, hremna a hmu tawh. Tunah chuan i hun a thleng ve tawh...hremna i tawrh ve angai tawh." X chuan a rawn ti leh ta mai a.

"Enge ka tihsual? Ka hal a nih loh chu...min chhuah rawh."

"Kha kangmei tichhuaktu kha Sawmtea a ni, a hal ngei a ni tih hriatpuitu pakhat a awm, chu chu nangmah i ni." a rawn ti leh ta mai a. Richard-a chu a tap nghal titih der mai, "Nilo..min...min hai aniang, engmah ka hrelo."tiin a hlau kher mai. "Ka hai lo che...nangmah ngei i ni. Pu Zara kha kanghlum tur khan engmah tihsual a nei lo, Sawmtea khan a duh reng vangin a hal a. I man nghe nghe anih kha, mahse engvangin nge i zep pui?" a rawn ti leh a.

Tap chung hian Richard-a chuan, "Min ngaidam rawh...min ngaidam hram rawh." tiin a ngen lawm lawm a. "Ngaidam tu tur che chu keimah nilovin Pu Zara nupui, Pi Rini zawk a ni." a rawn ti leh a. "Eng..enge ka tih dawn? Enge ti tura min duh?" tiin hlauthawng tak chung chuan a han zawt leh a.

"Sawmtea kha zu i ruih pui theih, suah sual rawng i bawl pui theih anih avangin i student mah nise thian angin in inkawm a. A thil tihsual a ni tih hre chung rengin i zep pui bawk, in college student hmeichhia te pawh tam tak i khawih chhe tawh bawk a, tihsual tam tak chu i nei alawm. Ngaitha rawh, kha kangmei ah khan Pu Zara chuan a nunna a chan phah a. A haltu Sawmtea i zep pui thu hi Pi Rini chu va hrilh ang che, TV screen ah hian number ka rawn dah ang. I call anga, ngaihdam i dil tur a ni. Khum sira dawhkanah khan mobile phone a awm a, i kut phuar chung khan phone chu ban i tum tur a ni. I ban theih veleh number hi call la, Pi Rini chuan a ngaidam che anih chuan nung damin i awm ang. Mahse a ngaidam lo che a nih erawh chuan i hremna tawh tur laka ta hi i chhuak thei tawh lovang...inpuang rawh, anih loh chuan i thi ang."

TV chu a thim hmuk mai a, "Hey..nilo..nilo,,lo lang leh teh. Ka insawifiahna tal hi min ngaihthlak sak ve teh...khawngaihin." tiin Richard-a chu a mangang nasa mai a. TV screen ah chuan number chu a rawn lang ta, Richard-a chu a buai kher mai. Khum sir dawhkana phone chu va ban a tum a, mahse a ban pha tlat lo.

Chutah lehlam sir thim lai atang chuan engemaw, khawl ri niawm tak hi a rawn ri vung vung ta mai a. Richard-a chu a phu nasa kher mai, reilote hnuah chuan chu khawl ri chu a rawn lang ta. Thingzaina khawl te chi, blade vir char char, hriam hmel em em mai hi a lo ni a. A hlau lutuk chu a au vak vak a, mahse awmzia a nei der mai silo.

Phone chu ban a han tum leh thin, mahse a kut phuarna chu a ngheh em avang chuan a ban pha silo. A han tang leh deuh a, a kut chu na a ti kher mai. A kutzung tang chuan a khawih fu thei tawh a, mahse a la hum nghet thei tlat lo. Chu thingzai khawl lah chu amah chuan a rawn hnai zel mai a, a rawn thleng dawn ta mai.

Chutah phone chu a ban thei ta, rang takin number chu a type nghal a. A ring char char a, Pi Rini chuan a la thei tlat lo. Thingzai khawl chuan khum sir chu a rawn thleng ta, thir atanga siam a nih avang chuan a t(r)ek ta chuai chuai mai. "Phone la rawh...khawngaihin la rawh.” tiin Richard-a chu a tap nasa tawh mai.

Matress te chu a rawn zai kai ta a, a kawng a rawn hnaih tawh. Pi Rini chuan phone chu ala ta, “Hello..tunge ni?” a rawn ti ta hlauh mai. “Pi Rin..Pi Rin..min ngaidam rawh. Khawngaihin min ngaidam rawh...ka thiam lo a ni.” a ti nghal chul mai a. Mahse thingzai khawl bengchheng lutuk avang chuan Pi Rini chuan a hre tha theilo, “Engmaw? Tunge ni? Engmah ka hre theilo, a bengchheng lutuk.” a lo ti a.

A theih patawpa ring chuan a au va, “Pi Rin...Richard-a ka ni a, i pasal thihna ah khan mawhphurtu ka ni. Ka thiamlo a ni..min ngaidam hram rawh.” a han ti leh a. Mahse phone leh a ka(mouth) chu a inhlat bawk si, a bengchheng bawk nen chuan Pi Rini chuan a hre tha thei chuang lo.

“Rawn ti tha leh mai rawh.” tiin a dah ta daih mai. “Nilo..nilo..dah suh.” tiin Richard-a chu a tap vak vak tawh mai a. A call back lehnghal a, “Hello..awii ava la benchheng tho ve..tunge ni reng reng a?” a rawn ti leh a. “Pi Rin..min ngaidam rawh.” tiin a han au leh vak vak a. “Engmaw? Tumaw ka ngaihdam a? Tunge?” tiin a lo la hrechiang thei chuang lo.

Chutah Richard-a lah chuan phone chu a la thlauh zui a, dawhkan hnuaia chuan a tla ta daih mai. “Nilo..ka duhlo.” tiin tal chhuah a tum a, khum chu a che lawih lawih mai. Mahse a kut leh ke phuarna chu a nghet lutuk tlat, a tal chhuak thei lo. Blade chuan a kawng chu a ran thleng ta, thisen a per nghal chuai chuai mai.

Second 5 vel chu Richard-a chuan na chu a tuar hman, mahse a dul a thleng phei a, a ril a chhuak ta pur mai. Khum chawp chuan Richard-a chu a laiah chuan a phel phawk mai a, a thi chiang kher mai. Thingzai khawl chu a in off a, room ah chuan X-a chu a rawn lut ta. Richard-a ruang chu a en vang vang a, phone chu la in a chhuak leh ta nghal a.

**************************

TO BE CONTINUE