THE CURSE (MIZO : ANCHHIA) Story by : Aaron Malsawmdawngzuala MIZO FICTION HORROR STORY WARNING : 18+ CHAPTER - 6 (LAST)

 THE CURSE

(MIZO : ANCHHIA)

Story by : Aaron Malsawmdawngzuala

MIZO FICTION HORROR STORY

WARNING : 18+

CHAPTER - 6

(LAST)

Mka chuan coffee a siam mawlh mawlh a, tichuan inchung lamah chuan a keng chho va. Room ah chuan a luh pui a, a fapa chu a melh ngai melh reng hian khumah a lo thu a. Khumah chuan va thu ve in coffee chu a han pe a, "Kha in rawh le...a daih hma khan." duat tak chuan a han ti a. NGawi reng chuan Michael-a chuan a lo la a, a han chhem dai phawt a.

"Bawha, han sawi teh le...tu hmeichhe naupangin maw hruai che?"

"Nimin ami tho kha niin ka hria."

"Tu nimin ami maw?"

"Nimina kan tukverh rawn vawm tu kha."

Mka chuan a lu a bu nghat a, "Umm...a bia che em ni?" tiin a han zawt leh a. "Aih belo, tui lei ka tum a. Chumi hlan chuan thlanmual step mawngah a lo ding a, tichuan ka zui thla ta a ni." tiin a lo chhang a. "Ngati nge i zui? A ko che em ni?" a han ti leh a. "Ko lo..ka zui ve tawp." tiin a fapa chuan a lo chhang leh a.

"Tinge i zui ve ngawt a?"

"Ka hre bik lo, ka zui a ngai tlat khan ka hria a."

"Engmaw? Ava mak awm ve...lo kal hla suh ka tih mawlh mawlh kha."

"Ka hria alawm, Pa...mahse tinge ka zui nachhan pawh ka hre lo."

"A nih leh a hmel i hmu em?"

"Aih...hmu lo."

"Puan dum a sin leh em ni?"

"Aw...sin e."

Mka chuan mak a ti kher mai, "Tikhan lo awm la, rawng ka zu bawl ange aw..." a han ti a, Michael-a chuan a lu a lo bu nghat a. Mka chuan a chhuahsan a, inhnuai lamah chuan a chhuk ta a. Choka ah lutin a kut chu a sil a, a hmai phih a tum chiah chu a tawp chat mai. A mitthla in a hma zana a hmai phih lai a, tu emawin tuia a rawn hnim thut lai chu a hmu a.

A han ngawi vang vang a, "Tu phiangsen nge he naupang hi? Eng vanga min enthla reng nge maw a nih le?" tiin a phun nuah nuah a. RAwng chu a bawl ta a, mahse a rilru ah chuan thil dang a awm thei mawlh lo. In luah tur dang a awm mai bawk silo, a thianpa Papuia thil sawi te chu a han ngaihtuah let leh a.

Ruang an chhar fo thu te, a in luah lai mek chu a hran thu a hrilh laite chu a ngaihtuah chhuak a. A tir kha chuan awih lo hle mahse a thil tawn te chu a han ngaihtuah let a, hmeichhe naupang puan dum sin thinin a enthlak reng te, office bathroom-a thil hmuh te leh a fapa thlanmual lama lo chhuk ringawt te chu ngaihtuahin a rilru a hah kher mai.

*************************

Tlai dar 5:30 vel a ni a, Papuia chuan phone-in mi a be mawlh mawlh a. A thianpa Mka in luah tur a zawn pui mek a, midang dang chu a han phone kual a. Chutah in ruak pakhat a awm tih chu an rawn hrilh ta, a lawm kher mai. Rang takin Mka chu phone a han tum a, mahse a tlang thei ta tlat lo.

Message a han thawn a, mahse a tlang thei chuang lo. Vawi tam tak a call hnu pawh chuan a tlang thei mai silova, a fapa nen chauh an awm a, an in a hrang mek bawk tih a hriat ve avang chuan a ngaih a thalo nghal der mai. An khuaa rawn pem, mikhual an awm ve reng avang chuan Mka chuan in chu a changlo leh mai ang tih a hlauh pui takzet.

Chubakah chu inruak pawh chu a awl lai tak a ni a, luah duh an awm leh vat an rin thu an rawn hrilh bawk nen. Chutah Mka phone chu a call tlang thei bawk silo nen, mahni awm hnuah chuan a rilru a lo hah ve em em ringawt a. A inngaihtuah vang vang hnuah chuan va kal a, va hrilh mai a tum ta a.

Papuia hi tlangval a la ni a, kum 30 mi a ni. A nu leh pate ram an riah avangin a nau kum 18 mi nen chauh chuan inah an awm a, a nau hi pawl 12 zirlai niin Aizawl lamah school a kal char char thin a. Covid vanga school a kal theih tak loh atang khan an khuaah a rawn haw a, online class hmangin a zir chhunzawm mek a ni.

Papuia chu a insiam sawk sawk a, room atang chuan a chhuak a. Rawng lo bawl mek a nau Mapuii chuan lo enin,"Khawnge i kal dawn a?" tiin a lo zawt hu mai a. "Ka thianpa te inah, chaw chu lo ei mai rawh." tiin a lo chhang a. "Tun ang huna chhuah, chaw a ei theih tep tawh ania." Mapuii chuan a han ti leh a.

"Lo ei mai rawh, a pawimawh emai." tiin a chhuahsan ta tho va. Motor ah chuan lutin chak takin a tlan a, Mka chu call a han tum leh a. A la tlang thei chuang bawk silo, "An chang lo palh ang tih ka hlau mang e aw.." tiin a phun sap a. Khawi daiah daih a ni bawk en, Papuia pawh a tlan rei vang vang tawh kher mai.

**************************

Mka te pafa chuan chaw an ei kham a, thleng te chu an seng fel a. Mka chuan thleng a sil mek a, a fapa chuan hmun a lo phiat ve bawk. "Signal pawh a awm silova, zanin chu ava khawhar thlak dawn ve tiraw, Bawiha?" Mka chuan a han ti a, Michael-a chuan a chhang lem lo. Michael-a chuan a phiat zo va, pawn bawlhhlawh bawm a paih tum chuan kawngka lam ava pan a. Kawngka chu a hawng a, bawlhhlawh pawh chu a paih mai a.

Mahse a lut leh tur chiah chu an gate bulah chuan kha naupang, puan dum sin bawk kha ava hmu leh ta. Hmanhmawh tak hian Michael-a chu a tlan lut a, "Pa..Pa...saw..saw naupang kha a lo kal a nia." tiin a au vak vak a. Mka pawh chuan a thleng sil lai chu kalsan in, "Khawiah? Khawiah nge a awm?" tiin choka atang chuan a rawn tlanchhuak ve nghal bawk a.

"SAw...pawnah sawn, gate bulah."

Mka chu ava chhuak a, chu hmeichhe naupang chu a lo la awm reng a. Mka chuan ava pan a, "Hey..tunge i nih? Tlan chhe tawh suh, anih loh chuan ka umzui che anga, ka sawisa hrep ang che." a ti phei nghal khur khur a. Chu veleh hmeichhe naupang chu a tlan leh ta daih mai, Mka chu a ding a.

"A tha e...i tlan chhe rei lovang." tih pah chuan inah chuan a lut leh a, banga a motor chahbi khai chu a la lawk a. "Bawiha, lo kal rawh." tiin a fapa chu a ko va, kawngka pawh chu kalh lo chuan motor lam an pan nghal a. Chu naupang pawh chuan ramhnuai panna kawng, thingkung phen atang chuan an che vel chu a lo en reng.

Mka chuan a va hmu a, "Ka va han man awm e aw.." tih pah chuan motor chu a start a, a tlan ta nghal a. Chu hmeichhe naupang chu rang takin ramhnuaiah chuan a tlan lut leh nghal, mahse Mka chuan a umzui ve zel a. Ramhnuaiah chuan a tlan lut ve a, mahse a thim em avang leh kawng a chhiat em avang chuan tlan chak a har hle.

**************************

Minute 5 vel a lian leh hnu chuan Papuia pawh a rawn thleng ve ta, motor atang chuan a chhuak a. Mka te in chu a han en phei vang vang a, kawngka chu tlem a lo inhawng a. Mak ti tak hian, "Inah chuan a awm reng sia, signal a neilo amawni le?" tih nuah nuah pah chuan ava pan phei a.

Kawngka chu a han kik a, "MK...MK...THianpa?" tiin a han au lauh lauh va. Mahse tuman an chhang lo, kawngka chu a hawng a. Inthlahrung tak chuan a han dak lut a, "MK...keimah Papuia...inah i awm em?" a han ti leh a, mahse chhanna ala dawng chuang lo. Inchhungah chuan luh mai a han tum a, mahse mi ina han luh ve rikngawt chu thil mawi niin a hre silo.

A car lam pan chuan a let leh a, "Khawnge maw a awm le?" tiin car bulah chuan  a ding a. In lam ava hawi leh chu a phu zawk mai, kawngka bulah chuan hmeichhe naupang, vun dang vek, kawr fual bal khak zet mai ha hi a lo ding reng mai a. Papuia chuan mak a ti kher mai, "Tunge mawni le? Mka khan fanu a nei silova." a ti nuah nuah a.

Muang chang chuan ava pan a, "Mami...tunge i nih? Hei hi in in a ni em?" tiin a han zawt a, mahse chu naupang chuan a chhang lo. Rum zet hian Papuia chu a en reng ringawt a, a kut hnung a suih tlat bawk. Papuia ngaih chu a tha lo kher mai, "I pa Lalmuankima a ni em?" a han ti leh a.

A la chhang chuang lo, Papuia chuan a pan phei zel a. Chutah chu naupang chuan a kut chu a rawn dah chhuak a, chemte a lo hum reng mai. Papuia chu a ding chat mai, "Ehe..enge tih i tum?" a ti nghal chul a. Chutah naupang chu inchhungah chuan chemte hum chung chuan a tlan lut ta daih mai a, Papuia ngaih thalo chuan a zui lut ve nghal bawk.

Inchhung a lut chiah chu a lo lum pup mai, kha hmeichhe naupang pawh kha hmuh tur  aawm tawh lo. A luh rual chiah khan a zui lut ve kha a ni si a, mahse a lo bo hmak mai si. A hawi kual a, inchhungah chuan thli thaw vuk vuk ri ang tak tak te chu a hre leh thin a. "Muankim...MK..inah i awm em?" tiin a han au leh ngawt a, mahse chhanna a la dawng chuang lo.

Chutah inchung lam atang chuan phun ri sep sep hi a hre ta, a hawi chho vat a. Step ah chuan muang chang chuan a chho va, a thlan chu a tla bawrh bawrh mai. Phun ri chu a ring zel a, mahse inchung a thleng chiah chu a reh hmak mai. Room ah te chuan a han lut a, tumah an lo awm bawk si lo.

"Khawnge maw kha hmeichhe naupang kha a awm daih le?" tih nuah nuah pah chuan a chhuk leh a, haw mai a tum ta a. Kawngka lam a pan mek lai chuan bathroom lamah thawm a hre leh ta tlat mai, a ding leh chat a. Phun ri sep sep tho kha a ni, ava pan ve leh ta ngat a. Bathroom kawngka chu a kik a, "MK...MK...awm in awm em?" tiin a han au leh a.

Chhanna a dawn leh tak silovah chuan a hawng ta a, light chu a on a. Engmah chu a hmu lo, thawm pawh chu a reh leh hmak. A thaw hak a, "He in hi a hrang ngei a nih hi.." tiin chhuah a tum a, chutah batroom light chu nasa em em hian a rawn dim sen ruih mai. Papuia chu hlauhna chuan a thauvah a man ta, rang takin a inher let a.

Chutah le, kawngka zawnah chuan pa pakhat, vun chhuar em em mai, khabe hmul nei chhup mai hi a lo ding run mai. A mit chu a var vek a, zau em em mai hian a lo ang bawk. Papuia hlau lutu chu a au vak a, mahse chupa chuan a rawn man bet a. Chiang em em hian Papuia mit chu a en a, chutah ring mang kheng mai hian a au khum ta vak vak mai.

Papuia chu a meng phar awn awn a, chet pawh a che lo. Chutah a mit pawh chu a rawn var ve ta vek mai, a khur cher cher a, a thingthi hnawk mai. Boruak chu a reh diak a, kha pa rapthlak tak mai pawh kha a bo leh daih tawh. Papuia chu zawi muang chuan a rawn hawi chhuak a, a melh ngai a melh vung vung mai.

Ngawi reng chuan a tho chhuak a, pawn lam a pan a. A car ah chuan lutin a tlan haw ta vang vang a, a tawng eih lo. Chak takin a tlan a, reilote hnuah chuan an in chu a thleng ve ta. Car atang chuan a chhuk a, a mit lah chu a khap eih lo. Inah chuan a lut a, a nau Mapuii chuan TV a lo en a.

"Ilo va haw har ve, chaw pawh ka ei kham vek tawh asin." a lo ti a, mahse Papuia chuan a chhang lo. Ngawi reng chuan choka lam a pan a, chemte ava la ta mai. Mapuii ngaih thalo chu a ding a, "U...enge i tih a?" tiin a zawt a. Papuia chu rawn let lehin chemte chu a hum run mai a, Mapuii chuan a hlau hle mai.

"U...enge i tih a? Engthil nge tih i tum a?"

Mahse Papuia chuan a chhang lo, chemte chu a han lek kang a. "Nilo..U..ti suh..." tiin Mapuii chu a tap pur tawh mai. Ngawi reng chuan Papuia chu ava tlan thut a, a nau Mapuii chu a vit ta siah siah mai. Vawi 20 ngawt a vit lehnghal a, Mapuii chu ril uai hnuangin a thi ta der mai. Chutah amah pawh chu chemte chuan a intin a, a hrawkah chuan a vit ve siah mai a, ani pawh chu a thi ve ta.

Papuia te unau chu chhuatah chuan an let reng a, chutih lai chuan Papuia phone chu a rawn ri a. A phone chu amah hian a in pick up a, "Hello...Hello..Papuia maw?" hmeichhe aw hian a rawn ti a. Mahse Papuia ber a thi tawh avang chuan lo chhanglet tu an awm lo, "Hello..ka tawng i hre thei em? Inluah tur kha maw? A remchang leh lo a nih chu aw...midang luah turin an lo be fel tawh a...Hello...awi min chhang miah lo." a rawn ti leh a, phone chu a thi zui ta hmak mai.

***************************

REi fe an zawn kual hnu pawh chuan Mka te pafa chuan chu naupang chu an hmu ta hauh lo, "I haw phawt mai teh ang." tiin an tlan let leh ta a. REilo teah an thleng a, kawngka tlem lo inhawng chu Mka chuan a han en a. Motor atanga chhuah pah chuan, "Kawngka pawh ka lo kalh hman lo a nih hi...zawngseni mai mai chuh." a ti nuah nuah mai.

An pafa chuan inchhungah chuan an inzui lut a, Mka pawh chuan thleng te chu a sil zo ta law law a. Sitting room ah chuan an pafa chuan an thu dun a, "Bawiha, i hlau em?" tiin a fapa chu a han zawt a. "Umm.." tih ringawt chuan a lo chhang a. A samah chuan chulin, "Hlau reng reng suh aw...i pa ka la dam alawm." tiin a hnem a.

Chutih lai chuan a phone a rawn ri thut mai, "Ehe, signal a awm tawh a nih hi." tih pah chuan a phawrh a. An manager a lo ni, "Hello Sir, signal ka neilo char char a.." a han ti nghal mawlh mawlh a. MAhse an Manager thu rawn sawi chuan a tawng lai chu a tawp tir hmak mai, "Papuia..Papuia maw?" a ti zawi sap mai.

A fapa chuan apa mak ti hmel chu a lo en reng a, "Pa..ngati nge a?" tiin a lo zawt a. Mahse Mka chuan a chhang lo, a phone chu a dah hmak a. A lu a dawm a, a mittui a tla ta zawih zawih mai. "Papui...enge awmzia?" tiin a phun leh sup a, "Pa..tinge?" tiin Michael-a chuan a lo zawt ve chhen bawk a.

Mka chu a ding thut a, "Bawiha...kan thawhpuipa a thi a...va kal ve ang hmiang." a ti zawi sap ringawt a, inchung lamah chuan a chho nghal a. A fapa pawh chuan a zui ve a, an insiam dun mawlh mawlh a. Tichuan Papuia te in lam pan chuan an inkhalh phei dun ta a, rei fe hnuah chuan an va thleng ta.

Mipui an lo tam hle a, police an awm nual bawk. An lo zai tan tawh hial a, tap ri a ri chuah chuah bawk a. Ruang chu Mka chuan ava en ve a, Papuia..hmui duk veka lo mu a hmuh chuan a insum theilo teuh kher mai. A mit a hup a, a ruk chuan a tap ve hawm hawm a. Inchhungah pawh chuan lut velovin pawnah chuan a awm reng a, inchhung lamah erawh tlema upa ho chu an lo zai mek thung.

Kil khatah chuan police te chuan hmeichhe pakhat hi thu an lo zawt fiah mek a, Mka chuan ava hmu fuh a. A va pan phei nghal a, "Inluah tur a awm leh awmloh min rawn zawt a, amah hi chu ka hre lutuk lo. Chuan a ruak chu ka hmuh sak ngei a, mahse a hnu khan an remchan leh loh thu min rawn hrilh leh a. Chumi hrilh leh tum chuan ka phone a, a pick up ngei a, mahse engmah a tawng lo hrim hrim. Chubak chu engmah ka hrelo, thildang kan sawi lo." tiin chunu chu a lo insawi fiah nasa ngei mai.

Mka chuan Papuia'n inluah tur a zawn pui mek a ni tih a hrethiam nghal a, chumi thu hrilh tur chuan a inah chuan a rawn lut ve ngei a nih a ring nghal bawk. A chhan chu a thihdan an sawi atang chuan thil diklo a awm tih a hre nghal a, a nau Mapuii a vih hlum zawhah amah a inthat ve leh ni ngeia police ten an hriat thu an sawi te nen chuan a inah a rawn lut ve ngei a ni tih a ring nghet nghal hmak.

Mahse engmah a sawi duh lo, tichuan inchhungah lutin ava thu ve ta a. Mahse zai pawh a zai ve thei lo, a ngaihtuahna a kalthui takzet. Dar 12 a ri a, "Pa ka haw chak tawh e." tiin a fapa chu a thui ngui bur tawh a. "Umm..anih chuan haw mai ang." tiin an pafa chuan an inzui chhuak a, an haw leh ta a ni.

**************************

In chu an thleng a, Mka chuan chahbi a phawrh a. A vuah luh dawn chiah chuan chahbi chu a thlauh ta hlauh mai, chhuat dawh khi karah chuan a tla tlang ta daih mai a, "Ava han buaithlak tak." tih pah chuan zen a han tum a. Mahse a kut a leng ta tlat lo, A phone light chuan a zu en a, chabi chu a hmu thei ngei e.

Kawngka bula thir tiang chu la in chhuat chu a han chhun vak vak a, tlem chuan a kaw zau deuh ta. Mka chuan a zu zen leh a, chabi chu a dap fuh ta. Mahse chahbi bulah chuan thildang a dap fuh tlat mai, a han la chhuak tel a. A han en chuan phone hi a lo ni a, a lo bal em em mai lehnghal. Hman deuh va mobile phone an hman uar thin em em, flip flop phone ang chi kha a lo ni.

A hmel en reng reng pawh chuan a rei tawh tih a hriat em em a, a lo khem nasa tawh em em bawk. Phone hum reng chung chuan kawngka chu a hawng a, inchhungah chuan an lut ta. Roomah lut tlangin a inthlak mawlh mawlh a, a fapa erawh khumah a bawk thlawp a, a hnar nghal suk suk mai.

Mka chuan a phone chhar chu a han en a, a chhunglam chu a hawng a. Sim card a lo awm a, mahse a lo bung tawh thung. Memory card vuahna chu a han en leh a, SD card pakhat a lo awm hlauh mai. Rang takin a la chhuak a, a card reader ah chuan a vuah nghal a. Laptop a la chhuak leh a, card reader pawh chu a laptop ah chuan a han vuah lut leh a.

A lo la tha hlauh mai, a han lut chhin ta a. Thlalak tlem a zawng a lo awm a, mahse a fiah lo em em lehnghal. Thlalak en reng reng pawh chuan chu filp flop phone hmanga lak tih hriat tak chuan a phe ruai mai a, mahse hmuh theih loh khawpa fiah lo chu a ni lo. Thlalak 10 vel a ni a, mipa pakhat thlalak vek a ni.

Kum 25-30 vel bawr niawm tak hi  ani a, a hmel chhe lemlo lehnghal. Tichuan folder dangah te chuan a han lut leh a, video pakhat a lo awm hlauh mai. A click nghal a, video chu a rawn inplay ta. Video ah chuan thlalaka a hmuh tho kha a lo lang a, video pawh chu a quality a chhe hle a, a fiahlo hle bawk.

Chupa chu thutthlengah a thu a, camera hma chu hlauh hmel tak hian a en reng a. A mit bui luk te chu fiah lo hle mahse a hmuh theih tho va, a hlauh hmel em em bawk. A hawi kual deuh reng a, camera chu a rawn en leh zauh zauh thin a. Mka chuan a awmna lai vel chu a han enchiang a, ama inluah lai ngei hi a ni tih a hre nghal bawk. Chutah chupa chuan camera chu a rawn en leh a, hlauh avanga khur dar dar chung chuan a rawn tawng chhuak ta.

"Ka hming chu Lalrinsanga a ni a, kum 36-a upa ka ni. Thingmawi ah hian hna vangin in ka luah a, he ka in luah hi a hrang tih ka hre lawk biklo." tiin a han inhnit deuh feih feih a. Chutah sawi zawm lehin, "He khuaah hian ka thianpa a awm a, a hming chu Danny-a a ni. Danny-a hian inthiar luh vel  pawh min pui vek a, mahse ani chu tunah chuan ka be tlang thei tawh lo. He inah hian keimah chauh vin ka cheng lo, midang awm ve an awm a ni." tiin a han tap leh rih a.

"Kar 1 chhung kha chu engvak mah ka tawng lo, mahse kar hnihna atangin mumang thalo ka nei tan a. Tichuan a hnuah inchhungah hian thawm mak tak tak ka hre fo va, tap ri te, nupa inhau ri niawm tak te, naupang nui ri te...ka hlau a ni...chhan ka ngai takzet a ni. Zan engzat nge ka mut tawh loh pawh ka hre lo, ka muhil ngam lo a ni. Min pui thei awm se ka va ti em..police ka phone dawn lahin ka thei bawk silo, hna pawh ka kal thei tawh lo. Chhuah ka duh a, mahse kawngka saw ka pel thei lo. Eitur pawh ka nei tawh lo, ka tan chuan engtik lai mai pawh hi zan tihbai awm tak a ni reng. KA ril a tam a, mahse engmah eitur ka nei tawh silo. A hrehawm a ni, helai hmunah hian ka thi ngei dawn." tiin a han kun leh tlawk tlawk a.

A rawn hawi chhuak leh a, "He ka video hi en in lo awm hlauh a nih chuan...he inah hian tumah lut suh ang che u. He in hi tuman rawn luah ve suh ang che u...ka ngen che u.." tiin video chu a tawp hmuk mai. Mka chuan laptop chu a khup nghal a, "Engthil phiangsen nge ka en kha?" a ti vawng vawng mai.

A tuk hi a day off ni a ni a, inluah tur zawnga chhuah ngei chu a tum nghet bur. A fapa tui taka muhil bawrh bawrh chu a en a, "Tihpalh aw, Bawiha...i pa hi ka mawl em a ni, he inah kher hian tinge ka lo chenpui che le." tiin a hnuk a ulh hial mai. A bulah chuan a mu ve a, reilo teah a muhil zui ve ta mai a.

*****************************

A tuk zing atang chuan MKa te pafa chu inluah tur zawng chuan an chhuak ta nghal a, khaw pum deuh thaw chu fan chhuah ngai mah se Mka chuan kha ina chen chhunzawm leh ai chuan pawi pawh a ti tawh lo ngei ang le. Tichuan an pafa chuan inluah tur chu nileng chuan an zawng a, mahse in ruak an hmu hauh lo.

A zawn pui tu ber Papuia lah a thi tawh si a, a ralnaah pawh a kal ve hman ta lo chu ania. A tawp a tawpah chuan chanchin lawmawm lam a hre ta hlauh mai, mahse ava lawmawm famkim si lo em. Nu pakhat chuan, "Kan inhnuai luahte hi naktukah an chhuak dawn a, an khaw lamah an haw tawh dawn a. Naktuk zingah i rawn inpu lut thei nghal ang, zanin chiah chu lo nghak leh mai rawh." tiin a hrilh a.

Mka chu lawm tho mahse zan khat lek pawh a inluah lai meka riah leh chu a huphurh takzet tawh a ni, mahse tih theih dang a nei silo. Pawisa nei bik lo hle mahse chu zan khat lek chu a inah nilovin, hotel lama riah mai tum chuan a rilru a siam fel ta a. Tlai lam dar 5:30 a ri tawh a, kum tir ala ni bawk nen khua chu a thim chu a ni der mai.

An haw tur car lam an pan chuan in pakhat sir a mi anglo pakhat chuan Mka a hmu chu a kawk a, a t(r)e ta chel chul mai. Mka chu a ding chat a, Michael-a chuan chu mi anglo chu hlauvin car ah a lut nghal daih a. Mka erawh chu ala ding reng a, chu mi anglo, tawng pawh tawng fiah hleithei lo chuan a rawn pan ta mai.

"Nang..nang hi...kha inah khan i lut tiraw? I lut ve tiraw? Min chhang rawh..min chhang vat rawh." a ti ta khur khur mai a. Mka chuan a hrethiam lo kher mai, "Khawi inah maw? Tunge i nih a?" tiin a lo vin deuh thak a. Chupa chuan hlauh hmel tak hian, "I him lovang...saw inah sawn anchhia a awm a ni. Anchhia....anchhe dawng in a nih saw.." a ti leh ta mai a, Mka chuan chu mi anglo thil sawi chu a hrethiam ta.

Phawk zet hian a meng a, "Engmaw? Engmaw i sawi a?" tiin a zawt leh a. Chutah chupa chuan chiang fek fawk hian, "Vawikhat i pen lut tawh anih chuan....a kalsan leh tawh ngai lovang che." a ti ta khur khur mai. Mka chu ala ngawi reng a, sawi tur pawh a hrelo. Chupa bawk chuan, "Kum 2008...kum 2008 atang tawh khan min la tibuai char char a ni. An hmel rapthlak tak te kha, ngai ah ka nei thei lo. Ka bulah hian khami te chhungkaw thlarau khan minla chen chilh reng a ni, nitin ka la hmu ziah." a han ti leh a.

Chuveleh nu pakhat leh tlangval pakhat hi an lo chhuak a, "Hey..Danny, lo lut rawh...khatin mi lo tih thaih tawh suh kan tih che kha." tiin tlangval zawn chuan a rawn hau va, "Engtik laiin nge a lo chhuah a, in veng tha lo ami?" tiin anu pawh chuan tlangval chu a han hau zui ve bawk a. Chu mi anglo chu an rawn man bet a, "Ka pu, kan tihpalh aw.." tiin hruai luh nghal mai chu an tum a.

Chutah Mka chuan a hma zana video a en chu a mitthlaah chuan a rawn lang zawk mai, "Ka thianpa hming chu Danny-a a ni a, mahse tunah chuan biak pawh ka be tlang thei tawh lo." tia Rsa sawi lai chu a hrechhuak ta. "Danny..Danny-a chu sawpa saw maw?" tiin a melh tlawk tlawk ringawt.

Danny-a lah chu a tal vak vak a, "Hal rawh....hal ral rawh...anih loh chuan a tawp lovang." a ti zui lawm lawm a, inchhung lamah chuan an hruai lut ta a. A bul hnai vela mite chuan an lo thlir thup a, Mka chu a zak angreng hle mai. Motor lam a pan leh a, kawngsira lo ding, tlangval pakhat bulah chuan, "Khapa kha tunge a?" tiin a han zawt a.

"Mi ang lo anih kha...ti sawn a au vak vak zel."

"A hmain mi anglo a ni sa em ni?"

"Aih...engtik kum nge kha aw...2008 ni ta in ka hria, khata tang khan a ni tiang sawn a awm tak."

"Engtin chiah nge a awm thin a?"

"Ramhuai ka hmu te a ti thin a, min thah an tum te a ti vak vak zel."

Mka chuan a lu a bu nghat ringawt a, "Umm.. ka lawm e." tiin car lam chu a pan leh a. Chutah kha mi anglo an hruai luhna in atang ngei mai chuan hmeichhe au tuar tuar ri a hre ta, mipui chu an rawn pungkhawm chak kher mai. Inah chuan an lut sup sup a, "Ekhai aww.." tiin midang ho pawh chu an rak nuai nuai hlawm mai.

Chutah chu mi anglo chu an rawn zawn chhuak a, a mit atang chuan thisen a lo chhuak zawih zawih a, engemawni hi a hum bawk. Mka chuan a han enchiang a, a thil hum lai chu mitmu a lo ni reng mai. A awmzia chu Danny-a chuan a mitmu chu a kawm chhuak tihna  anih chu, "Damdawiinah hruai vat ru.." tiin a then chu an rak chel chul bawk a.

Danny-a lah chuan thinrim hmel zet hian, "Ka la hmu thei tho, ka la hmu thei tho. Hrep taka...ka bulah hian an la awm, ka la hmu thei." a ti tuar tuar bawk a, Mka chuan a rap ngei mai. Taxi ah an phur a, Damdawiin lam pan chuan an tlan pui ta a. Michael-a chu a mit hupin motor chhungah chuan a lo khur ngat ngat a, Mka'n chutia a fapa, hlau leh thlabar taka lo awm a hmuh chuan a rilru a na kher mai.

"Hal rawh...hal ral rawh." tia Danny-a'n a hrilh chu a bengah chuan a ri nawn tluk tluk mai a, a lu a bu nghat mai. "A tawk e...a tawk zozai ta e." tih pah chuan motor ah chuan a lut a, petrol pump lam pan chuan a kal ta. Hotel-a riah pawh chu a tum leh ta lo, chu in chu hal ral vek a tum ta a ni.

**************************

Petrol Pump ah chuan ava thleng a, galon bur lian 3 lai mai chu a la ta a. Tichuan restaurant ah a fapa nen chuan thil an ei a, chumi hnu chuan in lam pan chuan an haw leh ta a ni. In chu an thleng a, Mka chuan a fapa chu a han en a. "Bawiha, ka thusawi hi ngun takin ngaithla rawn aw.." a han ti a, a lu a lo bu nghat mai.

"Car ah hian lo awm la, khawiah mah lo kalsawn suh ang che. Tukverh te hi khar phui vek la, inkalh hnan bawk ang che. In hi ka hal dawn a, enge a chhan min zawt suh. Ka lo chhuah hma chu lo kal suh ang che, chuan hawi chhuak miah suh aw.." a han ti a, "Awle." tiin a lo chhang a, a chhuahsan ta a.

Tichuan inchhungah chuan a lut a, petrol chu a leih kual ta a, hmun tin mai chu a leih ta vek a. Chutia a leih lai chuan light a rawn phe zawk zawk mai, amah chu a bing deuh mup mai. A lu a rawn na vak a, a maimitchhing tawp. A han meng leh chu inchhungah tho chuan a awm a, mahse galon bur pawh a lo keng tawh miah lo.

Chumai nilovin khua chu a lo eng ut mai a, a inchhung te pawh chu a lo hmanlai ruih mai. Banga calendar lam chu a han en a, 1994 tih hi a lo inziak a. Sitting room lam ava en chuan nu pakhat, kum 40-45 bawr vel hi tleirawl la naupan hmel tak nen hian ruak vek titih hian thutthleng ah an lo khawsa dun a.

Nuam an tih dun hmel kher mai, Mka chu a hrilhhai takzet. Ava pan phei a, "Tute nge in nih a?" tiin a han vin deuh thak a. Mahse chumite chuan hria awm ang pawhin an lang lo, an nui dun ang bawk bawk lehnghal a. Chutah kawngka pui chu a rawn inhawng thut mai, "Ka lo haw e." tiin pa pakhat hi a rawn lut a.

A thil hmuh chuan a ti ding chat mai, chu nutling leh tleirawl te pawh chu an phu zuk a. Rang takin an inha tha nghal mawlh mawlh a, an hlauh dun hmel kher mai. Nutling chuan, "Duhtak..i va...i lo haw amaw?" a ti bah nuai mai a. Mahse chupa chuan a chhang lo, thinrim tak hian a ding khur tlawk tlawk mai.

TLeirawl pawh chu a inha fel a, tlanchhuah a tum chu patling chuan a lo man bet a. "Nangmaw....nang phiangsen hian ka nupui..." a sawi hleithei lo, a ha chu a thial ri bap bap mai. A chil a lem dawk a, "Ruata...ka zirlai naupangte zingah pawh ka duhsak ber i ni asin." a han ti leh vawng vawng a.

Chu tleirawl, Ruata chuan hlau tak hian, "Sir..Sir Tluangte..ka..ka tihpalh." a ti tham tiak a, a tap pur mai. Tluangtea chuan a nupui chu ava en leh a, "Lalparlian...nang mi hur lepchiah nu..ka zirlai naupang lakah maw minlo uire san a." tiin a thinrim kher mai. Pari chuan hlau tak hian, "Mami pa...ka sawifiah thei..ka sawi fiah thei." a han ti dek dek chu Tluangtea chuan Ruata chu a hnek thal tawp mai.

"ZAwnga leh....ka that khawp ang che." tiin a rek ta chiam mai a, Mka chu chet ngaihna pawh a hre lo. A thil hmuh mek chuan a ti hrilhhai takzet, ngawi rengin a en char char ringawt a. Pari chu rawn tlan pheiin a pasal chu dan a rawn tum a, "Duhtawk rawh TLuanga..i rek hlum ange." a ti lawm lawm a.

Mahse Tluangtea chuan a thlah duh hauh lo, a rek na telh telh a. Ruata mit chu a sen vek tawh, a tawp a tawpah chuan a thlah te nge nge a. TLuangtea chuan bang chu a chum bur bur a, "A ni theilo...a ni theilo..LALPA LEH..." tiin a tap zawih zawih mai. Pari chuan Ruata chu a sawi vak vak a, "Ruata..harh teh...i tha em?" tiin a be mawlh mawlh a.

Mahse Ruata chuan a chhang thei ta reng reng lo mai, chet pawh a che eih tawh lo. Pari chuan a hmui a hup a, "Nilo...a thi...a thi." a ti ta vak vak mai. Tluangtea pawh chu a rawn hawi let vat a, "Eng maw? A thi a?" tiin a rawn pan hnai ve leh a. Thinrim tak hian Pari chuan a pasal chu a en a, "I that der ania...engthil nge i tih hi?" tiin a vin hrep mai.

Tluangtea hlauthawng leh si chuan Ruata chu a han sawi ve leh vak vak a, "Ruata..harh teh..hey..harh teh." tiin a beng vak vak a. Pari chu a tap zawih zawih a, "Pasal tualthah hmang ka lo nei reng che a nih hi, i va nunrawng ve a." a ti hrep mai a. Tluangtea chu lo hawi chhuakin, "Nang zawk kha nunrawn chu i ni...sikul zirlai naupang lakah min lo uire san amaw? Ka awmloh hlan apiangin tihian inlo khawsa thin em ni?" tiin a vin let hrep mai a.

Pari chuan a mittui a hru hul a, "Police ka hrilh dawn...jail bang i zut khawp ang." tiin land line phone an dahna lam chu a pan ta mai a. Mahse Tluangtea chuan a man bet a, "Khawiah mah i kal lovang, Mihurnu.." tih pah chuan a rek ve leh a. Mahse Pari chuan a kutah a seh sak a, choka lamah chuan a tlanchhe ta daih mai.

Tluangtea chuan a umzui a, Pari chuan chemte a chuh nghal vat a. Tluangtea lo phei chiah chu a darah chuan a lo vih sak ta mai a, a t(r)e thawt mai. A tlu tawp a, Pari chuan bawhbetin vih leh a tum a. Mahse a pasal tha nge nge chu  ahneh ta lo, chemte chu chhuhsakin a leh thal a. Tluangtea thinrim chu a insum zo ta lo, "Nang hian min thah i tum amaw?" tiin a nupui chu a vit ta siah siah mai.

Thisen a per chhawk chhawk a, chutih lai chuan inchung atang chuan an fanu kum 6 mi lek, Mami chu a rawn chhuk a. Chutia a pa in a nu a lo bawh bet run leh chemtea a lo vit siah siah a hmuh chuan a au vak a, a pa chu zuk dan a tum ve ta a. A pa kutah chuan man bet a lo tum ve a, mahse Tluangtea chuan, "Awm sawn rawh." tih pah chuan a chem ken lai chuan a vai pawp a.

Mahse a tum loh deuh chuan a fanu bekah chuan a vit tlum ta thawih mai, a let tawp a, a thi chiang hle. Tluangtea chu a tho vat a, "Nilo...nilo..." tiin a hawi kual a, inchhugah chuan ruang pathum a let der mai a. A hmui hupin, "Engthil nge ka tih tak..a ni theilo." tiin a tap ta zawih zawih mai.

Chutah chemte chu la in a ding chhuak a, Mka chu ava melh ta run mai. Mka pawh a lo phu zawk a, a hlau nghal hle mai. Tluangtea chuan rum tak hian a melh a, "He in hi ka neih zawng zawnga ka sak a ni a, ka ta a ni. Tuman min neih sak lovang, he ina pen lut apiang te chu an thi zel ang." tiin anchhia a lawh a, chemte chu a lek kang ta vu mai.

Mka chuan hlauthawng tak hian, "Nilo..ti suh...ti suh.." a ti lawm lawm a. Mahse Tluangtea chuan chemte chuan a hrawk chu a vit ta siah mai a, a thingthi hnawk mai. Thisen a baw zawih zawih a, a thi ve ta a ni. Chuveleh boruak chu a rawn vawt ruih mai a, a rawn thim telh telh bawk.

Mka chu a harh deuh zawk a, a awmna ngaiah chuan a lo la awm reng a, khua pawh a lo thim leh vek tawh. Galon bur pawh chu a lo la keng reng a, tichuan a leih chhunzawm lehnghal a. Kawngka lam a pan a, nawh alh chu a la chhuak a. A thai alh dawn lai tak chuan hmeichhe aw hian, "Ti suh...khawngaihin ti suh." a rawn ti thut mai.

Mka chu a hawi chhuak a, a ham zawnah chuan Pari chu a lo ding a, a bulah chuan a fanu a lo ding bawk. An hmel chu a pangngai vek a, a fanu chu a hmeltha zek lehnghal. Pari chu a mittui a tla zawih zawih a, "Khawngaih takin ti suh...ka fanu hian a hlau ania." a han ti leh a. Mka chuan a en vawng vawng a, "Ka tihpalh...mangtha ule." tiin a nawt alh ta.

An hmaah chuan a va theih phei a, Pari te nufa chu an alh ta hluah hluah mai. A tir chuan sa ti takin an tap dun a, chutah thinrim hmel tak hian an rawn hawi chhuak leh a. An hmel chu rapawm tak a ni, an taksa te chu a kang sawr hneh em em a, Mka pawh chuan a hlau kher mai. Rang takin a chhuak a, mahse a car lam a pan tur chiah chu kawngka chhuat awng, ama chhut awng ngei maiah chuan a ke veilam chu a tla hawlh ta hlauh mai.

A tang ta ran mai a, in lah chu a kang nasa tulh tulh lehnghal. "Min pui ru....Bawiha...Michael..Michael.." tiin a au vak vak a, mahse Michael-a chu hawi chhuak miah lo tura  atih avang chuan a mit hupin a lo la kun reng a, mei kang ri puak tuk tuk avang chuan apa au pawh chu a hre pha lo hrim hrim bawk. 

Mka chu a mangang ta hle mai, in lah chu a alh nasa tawh mai si. A awmna zawn chu a rawn thleng ve tep tawh lehnghal, "Lalpa...min pui teh." tiin a rak chul tawh mai a. Mahse chutih lai tak chuan hmeichhe naupang, puan dum sin bawk kha a rawn lang leh ta. Mka chu a rawn pui a, reilote hnuah chuan a ke chu an phawrh chhuak thei ta.

Gate bulah chuan an tlan phei dun a, Mka chu a bawk thlawp mai. In kang chu an en dun a, a lah nasa hluah hluah kher mai. Mka chuan chu hmeichhia chu a han en a, "Tunge i nih?" tiin a han zawt a. Chunu chuan a puan sin chu a hlip a, naupang awzawng a lo ni lo. Tleirawl kum 19 mi bawr vel niawm tak, hmelchhe lemlo tak hi a lo ni.

Mka pawh chuan mak a ti kher mai, "Tunge i nih ka tih chu?" tiin a han zawt leh a. Chu tleirawl chuan, "Jenny..Ka hming chu Jenny a ni." tiin a hrilh a. Mka chu a thaw hak a, "Enge thil awmzia hi? Tinge min enthlak reng thin a? Nu leh pate i nei lo em ni?" tiin a zawt leh a. Jenny chuan, "He ina anchhia hian min thunun tlat a, ina ka haw a phal tawh lo a ni." tiin a lo chhang a.

"Enge awmzia? Ka la hre thiam lo."

Jenny chuan Mka chu kum 2017-a  a thil tawn zawng zawngte chu a hrilh ta vek a, khami tuma hmeichhe naupang bo hlen ta an tih pawh amah ngei a nih thute chu a hrilh ta vek a. "He ramhnuaiah hian min khungbet tlat a, kum 4 lai chu ka awm tawh. Tichuan he ina in rawn luah atang khan ka enthla reng che u alawm, ka ngaihtuah thei lutuk che u. A bik takin i fapa saw, a la naupang si a." a tih chuan Mka chu a nui sak a.

"Anih te chuan tinge min rawn hrilh mai loh? Tinge hlauhawm deuh deuh va i rawn lan thin kher a?"

"A chhan chu ka tawng thei lo a ni, ramhnuaia ka bo hnu khan ka tawng chhuak tawh lo hrim hrim."

Mka chuan hriatthiam loh hmel tak hian, "Mahse...kha..i tawng leh thei tawh sia." a lo ti hu mai. "He in i hal hnu khan ka pangngai chauh a ni, a chhan chu kha anchhia kha a bo tawh tlat a ni." tiin a chhang leh a. Mka lah zawhna ala ngah nasa mai, "A nih chuan kum 4 lai ramhnuaiah nangmahin i khawsa a, enge i ei thin a?" tiin a han zawt leh hram a.

Jenny chu a khi suk a, "A awm awm...ka thil ten em em thin te pawh ka ei angai a, ka taksa khan min control tlat a ni. Ka rilru chu a fim a, mahse ka taksa ka control thei lova, ka tawng theilo bawk." tiin a chhang leh a. Mka chuan Jenny chu a en vang vang a, "Ka lawm e aw..Jenny..ka nunna min chhanhim sak avangin." a ti zawi sap a.

**************************

A tuk zingah chuan Jenny pawh chu Mka chuan an in lamah a hruai haw a, khaw mipui zawng zawng chuan Mka leh Jenny te thawnthu an hriat chuan mak an ti kher mai. Kum 4 lai lo bo tawh, an fanu an han hmu let leh chu Jenny chhungte an lawm kher mai. Mka pawh Thingmawi khaw celeb a ni ta titih der mai a, an chanchin chu a lar nghal hle bawk.

Mka chu damdawiin lam panin a kal a, DAnny-a chu a va kan a. Danny-a chu a ward ah chuan khumah lo thuin tarmit dum lian tak hi  alo vuah a, "Danny..i awm maw kha?" Mka chuan a han ti a. "Tunge ni?" tiin Danny-a chu a lo hawi hu mai a, a tawng pawh a lo pangngai vek tawh.

"Keimah, Muankima.."

Danny-a chu a lawm kher mai, "Ehe..Mka an tih kha maw...i chungah ka va lawm tak em...ka lawm takzet." tiin a hnuk a ulh nghal der mai. Mka chu a bulah chuan a va thu a, "Nilove...ka lawm e, nangmah vang zawk a ni." a ti a. Tichuan 2008 kuma thil thleng te chu sawi leh in an titi dun a, reife hnuah chuan Mka chuan a haw san leh ta a ni.

Hemi hnu hian Mka leh a fapa chu Thingmawi khua atang chuan an chhuak ta vang vang a, Mka pawhin chu khua a kal leh chu a tum tawh lo bur. A hna pawh chu a ban phah ta hial a, nun bul tan turin an khaw lamah a let leh ta a ni. Hemi hnu atang hi chuan kha ina anchhia kha a bo ta a, thawm engmah hriat a ni leh tawh ngai lo.

****************************

THE END