PUTRID CHILD-2 : MY NAME IS FRANCIS, NOT WILLIAM (MIZO SUPERNATURAL/HORROR STORY) [A SEQUEL TO PUTRID CHILD] Written by : Aaron Malsawmdawngzuala Warning : 18+ CHAPTER - 3

 PUTRID CHILD-2 : MY NAME IS FRANCIS, NOT WILLIAM

(MIZO SUPERNATURAL/HORROR STORY)

[A SEQUEL TO PUTRID CHILD]

Written by : Aaron Malsawmdawngzuala

Warning : 18+

CHAPTER - 3

******************

Zanlai dar 12 a pel chiah a, Francis-a muhil lai chu a rawn meng kawk mai. A bula mi mek, Sangtei chu a han en a. Lehlam hawiin a lo hnar bawrh bawrh mai, zawimuang hian Francis-a chuan Sangtei ban chu a han zut a, a sam te chu a han hnim vel a. Dim te chuan a darah te chuan a han fawp a, Sangtei chu ala harh thak lo.

A zut thui telh telh a, a dul te chu a zut thla zel a. Chutih lai chuan Sangtei chu a rawn harh thut mai, rang takin Francis-a chuan a kut a la sawn vat a. Lehlam a hawi a, a muhil der zui nghal a. Sangtei chu a thu chhuak a, a ban chu a han khawih a. Tu emaw chuan a zut a ni tih chu a hre hman, Francis-a chu a han en a.

Mahse lehlam hawia a lo mut tlat avang chuan a thaw huai mai, khum atang chuan thovin bathroom lam a pan ta a. A chhuak chiah chu Francis-a chu a rawn meng leh a, a thin a rim hmel kher mai. Reilo teah Sangtei chu a rawn let leh a, khumah chuan a rawn mu ve leh a. Mahse Francis-a chuan a khawih chhunzawm bik ta lem lo, thinrim tak chung chuan a muhil ve leh mai a.

************************

A tuk zingah chuan Hlimpuia chuan Station chu ava thleng a, Abby chu a lo thleng daih tawh. Nui sang chung chuan, "Thawh i hai em ni?" a lo ti a. "Hai love Boss...ka scooty saw a tawng lutuk a." tiin a lo chhang a. Abby chuan a han nuih seih a, "I fel chuan a thar ka la lei ang che." a han ti zauh va.

Hlimpuia chu a nui deuh vur vur mai, "Bike min lei law law la.." tiin a han fiamthu ve a. Chutiia an inbiak lai chuan SP a lo lut a, "Abby..enge chanchin?" tiin a rawn zawt a. Abby chuan salute lo pe in, "Kan la chhui mek e, Sir. Vawiin chu Hlimpuia nen Hmingmawia te in lamah kan va kal ve leh thung ang, kan chhuichhuak vat ang." a lo ti a.

SP chuan Hlimpuia chu a en a, a ner deuh nung mai. Abby chu a en leh a, "Ka office ah min lo zui lawk teh." tiin a kalsan a. Abby chuan nui chung hian Hlimpuia chu a en a, "A ngei hmel khawp mai che." tiin a han nghawk zauh va. Hlimpuia chu za lo tak hian a nui a, "Nia..ka hre bik lo." a lo ti ringawt a.

Abby chu office chhungah chuan a lut a, "Thu rawh." tiin SP chuan thutna a kawh hmuh a. Abby chu a thu a, "Enge ni ta, Sir?" tiin a han zawt a. Kuhva thial nuau nuau pah chuan, "Abby..Hlimpuia saw maw i thlan a?" tiin a han zawt a. Abby chuan a lu a lo bu nghat a, "Tinge ani kher?" tiin a zawt leh a.

"Aww...nangman i duh ber thlang rawh..i kutah ka dah i ti sia."

"Ni e, ka hre tho va, mahse SI Gilbert-a saw i thlang dawn maw ka tia."

"Nilove...Hlimpuia hi a tha alawm."

"Ala junior mah mah i ti ve lo vem ni?"

"Amah saw ka ring tawk alawm, a tan pawh experience zel ania."

"A kum ala naupang si, i tisual palh ange?"

"Ka ti sual lovang, min ring rawh, Sir."

"Nangmah ka ngaihtuah vang zawk che ania, i hming chhiat ka hlau a ni. Tualthah case a ni a, kan serious angai a nia."

Abby chu a han thu tha sauh sauh va, "Sir, keichuan ka ring tawk a, amah ah sawn theihna a awm ngei pawh ka ring. I ring zo lova, midang thawhpui tura min ti anih chuan ka hnial lui lem lo." tiin a chhang a. "Nilove..ka hlauhthawn vang mai mai a nia. Ka ring lutuk che alawm, anih chuan theih tawp chhuah ang che u." tiin SP chuan duhsakna a hlan a.

Abby chu a chhuak a, Hlimpuia chuan a lo pan nghal vat a. "Ma'm..ka chungchang ami in sawi?" tiin a lo zawt a. Nui miah lo hian Abby chuan, "Aw sawi e...a rel nasa khawp mai che." a lo ti a. Hlimpuia chu a ner nung mai, "Anih chuan case atang hian min ban tihna em ni?" tiin a zawt leh a. Abby chu a nui a, "Inring rawh...Hmingmawia te inah kal angai." tiin a dawhkan lam a pan san ta daih mai.

***********************

School kal tur chuan Francis-a chu a insiam mawlh mawlh a, Sangtei chuan a pheikhawk a lo nawh tlet sak a. Darthlalang hmaah chuan dingin a kamis chu a ha mawlh mawlh a, amah leh a mah chu a in en reng a. "Ka nawt zo ve...ava han tle tha tak em. Bawiha, kha...lo bun rawn le." tiin Sangtei chuan a rawn ko va.

Francis-a chua a pheikhawk chu ava bun a, "Francis...i hman tawh em?" tiin apa chuan pawn atang chuan a rawn ko lauh lauh va. Sangtei chu tukverh ah dakin, "Aw...a lo kal animai." tiin a lo chhan sak a. Francis-a chu en leh in, "Chaw ei dawhkanah i school bag ka dah ania, ka inbual dawn aw..." tiin a kalsan ta a.

Sangtei chu a room lamah kalin a inthlak mawlh mawlh a, Francis-a chuan bag chu a la a. Towel veng chung chuan Sangtei chu a rawn chhuak leh a, Francis-a chuan a lo en dauh dauh mai. "Bye bye aw Bawiha." tiin Sangtei chuan bathroom ah chuan a luhsan ta a. Chuveleh Francis-a chu a hawi kual zeuh zeuh va.

Sangtei room lam pan chuan a kal ta, room chhungah chuan lutin a hawi kual a. Khuma Sangtei kekawrte hak zawh chiah chu ava en ran a, a la ta zauh mai. A han hnim vang vang a, a maimitchhing vawng vawng mai. Tichuan a bag ah chuan a khung hmak a, pawnah chuan a chhuak ta a.

Apa chuan car bulah chuan a lo nghak a, "I v arei ve...kal vat ang." a lo ti hlur a. Francis-a chu car chhungah chuan a chuang a, apa nen chuan school lam pan chuan an kal ta a. Maruata hian a office kal pahin Francis-a school kal tur hi a thlah nghal thin a, haw lamah pawh a lam leh zat zat thin a ni.

****************************

Hmingmawia te inah chuan Abby te chu an va thleng ta a, mi an lo leng nual mai. An va lut a, "Ehe...lo leng rawh u." tiin Hmingmawia nu Pi Thangi chuan a lo chhawn vat a. "Kan rawn tibuai leh lawk mai che u." tiin Abby chu  ahan nui sang a. Hmingmawia pa, Pu Zuala chu lo kalin, "Khaih khaih...inthlahrung mah ta che u...kan mamawh lai ber che u ania sin." a lo ti ve bawk a.

"In nupa in inkawm ho leh lawk ang u hmiang, a rei lo ang." Abby chuan a han ti leh a, inchung lamah chuan an inzui chho ta a. Hmingmawia room ah chuan an lut a, "In lo la khawih danglam lo tiraw?" a han ti a. "Aw..nimina i haw hnu atang khan i sawi ang khan engmah kan la khawih danglam lo." tiin Pu Zuala chuan a lo chhang a.

Abby chuan Hlimpuia chu a han signal zeuh va, tichuan room chu an han enfiah dun ta a. Chutih lai chuan Pi Thangi te nupa chuan an chhuksan a, "Ma'm..niminah i dap vek tawh anilawm ni?" tiin a han zawt a. "Dap vek tawh e...mahse keimah chauh ka ni bawk sia, puitu ka nei silo a...tihian uluk zawka dap leh ah ka tia...kan kal leh ta chu a nih hi." tiin a lo chhang a.

Hlimpuia chu a khi suk a,"Aww...a nih chu." a han ti zawi sap a. Abby chuan a han melh deuh khur a, "Tinge i nuih kher a?" tiin a han zawt a. Hlimpuia chu a nui tawp chat mai, "Aaa..engati mah." a lo ti ringawt a. "Ka awih lo...engemaw i ngaihtuah chiang alawm." Abby chuan a lo ti leh a, a la nui miah lo zui.

"Engmah ka ngaihtuah lo."

"Tinge i nuih si?"

"Ka nui vel mai mai anih kha...a zat vang pawh a ni lo."

Abby chuan a han melh rum a, "I ngaihtuahna ka hre mai." a han ti a. "Enge ka ngaihtuah?" tiin a lo zawt hu mai a. "Police Inspector ve si...i van uluk lo min ti...i rilru in.." tiin Abby chuan a han fiam a. "A awihawm loh...chutiang ka ngaihtuah lo hrim hrim." tiin Hlimpuia chuan a pha nasa kher mai.

Abby pawh chu  a nui a, "Dap vat rawh...engemaw tal hnu chhuina a tana tangkai i hmuhloh chuan midang ka thlang daih ang." a han ti leh a, Hlimpuia chuan a chhang tawh lo. An dap zel a, Hlimpuia chuan khum bula dawhkan chu a han hung sawn deuh va. Chutah thlalak pakhat hi a rawn tla nawlh mai, "Ma'm en teh." tiin a va pe a.

Abby chuan thlalak chu la in a han en a, Hmingmawia leh Sangtei leh mipa pakhat thlalak hi a lo ni. "Hmingmawia nu zu ko teh." tiin a tir a, Hlimpuia chuan a zu ko va. Pi Thangi chu a rawn thleng a, "Enge ni ta?" tiin a han zawt a. "Hmingmawia bul ami hi tunge?" tiin a han zawt a. "E..hei hi Bawiha thianpa, Henry-a a nih hi." tiin a lo chhang a.

"Engtia inthian nge an nih?"

"College an kal ho thin a..kan inah pawh a lo leng ziah."

"Umm a nih chu...anih leh maw ka pi, Hmingmawia ngaizawngtu hmeichhia an awm awm i hria em?"

"Awi..ka hre lo. Sangtei saw a bialnu a ni tih kan hria a, hmeichhe dang chanchin engmah kan hre ngai lo...amah atang hi chuan.."

"Anih tak chu...nileh Henry-a address min hrilh thei angem?"

"Aw thei lutuk e....nizan pawh khan a lo kal ve alawm...ka'n ziak chhuak thlap ange." tiin Pi Thangi chuan Henry-a address chu a hrilh ta a. "Kan lawm lutuk e, kan lo kal leh ang. Tunah chuan kan han kal leh phawt ange...anih phawt u." tiin in chu an chhuahsan ta a. Carah chuan lutin an tlan leh ta a, "Kan va awmrei lo em em.." Hlimpuia chuan a han ti nuah nuah a.

"Tih tur dang kan nei..."

"Enge? Henry-a te inah chuan kan kal dawn tihna ami?"

"Dawn hrih lo..."

"Anih khawnge kan kal dawn?"

"Sangtei te inah?"

"Sangtei te inah bawk maw? Enge kan tih leh dawn a?"

"Henry-a chungchang hi ka hre duh."

"Tinge Henry-a pawh chu i rinhlelh nghal em em a?"

Abby chuan thlalak chu a han phawrh a, Hlimpuia chu a hmuh tir leh a. "En chiang rawh...Hmingmawia leh Sangtei kha pangngai takin an ding dun a, mahse Henry-a khan Sangtei a hnaih dan kha...a diklo." a han ti a. Hlimpuia chuan a en vang vang a, "Enge a diklona?" a lo ti leh hu mai.

"Sangtei khan Hmingmawia kha a banah a kuah a, Hmingmawia erawh a ding pangngai. MAhse Henry-a khan camera pawh melh lovin Sangtei awm zawn kha a en a, a hnute zawnah kher a kut a dah bawk. A awmzia chu thlalak en tawp chuan hriat loh mahse, chiang taka en khan Henry-a awmdan khan Sangtei kha a ngaih melh tlatin ka hria."

Hlimpuia chuan a han en chiang leh deuh va, "I sawi takah chuan a nih deuh hi mawle...mahse han rinhlelh nghal ngawt chu a tih chi dawn em ni?" a lo ti a. "Ka ringhlel a nilo...thil ho te te pawh chipchiar taka kan chhui angai alawm..khapawh kha ho i ti viau maithei...mahse kan chhui chian tho angai. Tualthattu hian clue a hnutchhiah lo va, chuvang chuan thil awm lo pui pui anga kan ngaih atangin fimkhur taka kan chhui angai alawm." Abby chuan a lo ti leh a.

********************

Francis-a te chuan class an la mek a, zirtirtu chuan an zirlai chu a explain mawlh mawlh a. Chutih lai chuan Francis-a chuan a bag chu hawngin Sangtei kekawrte chu a han la ru zal zal a, a kekawr ipteah chuan a ak a. A ding a, "Miss, ka zung thei angem?" tiin a han dil a. An miss pawh chuan a lo phal sak mai a, tichuan a chhuak ta a.

Zuninah chuan a lut a, Sangtei kekawrte chu la chhuakin it hmel tak hian a han hnim kual leh vel a. Mahse zunin kawngka chu a lo kalh miah lo chu niin, class 10 zirlai pakhat, nghal tak mai, Nghaka chuan a rawn hawng thut mai. Francis-a lah chuan kekawrte chu a lo la keng reng a, chutah Nghaka chu a nui ta tiah tiah mai.

Francis-a chuan kawngka chu khar leh a tum a, mahse Nghaka chuan pawtbetin kekawrte chu a laksak a. A tlan ta daih mai, Francis-a chuan a um zui vat a. Nghaka thiante leh naupang dangte pawh chuan an lo en a, "Enteh u...hepa hian hmeichhe kekawrte hi zun inah a lo hnim a nih chu.." tiin a au vak vak a.

Short Break a lo ni leh chiah chiah bawk nen, Francis-a leh Nghaka lo in um mek chu an rawn en a. Nghaka lah chuan Francis-a chu a chhaih zui zel mai a, Francis-a chuan a um peih ta lo. A ding a, Nghaka chu a melhrum kher mai. Class ten mipa ho chuan kekawrte chu an in-pass kuala , Francis-a chu an nuih tiah tiah mai.

"Hur reuh ve...tu kekawrte nge, i nu a mi?" tiin an chhiah ,a Francis-a thinrim lutuk chu a khur zawih zawih mai. Chutah Nghaka chu ava kal a, "Kha...kan fiam che anih kha...a awm ve tho alawm, kan paltlang hnu vek." a han ti a, Francis-a chuan ngawi reng hian kekawrte chu a la a. Ak tha lehin class room lam a pan a, an zirtirtu pawh a lo chhuak tawh.

Bag ah chuan a khung leh a, a melh ngai melh reng chung chuan a kut a hum ruh a. Khang pawl 10 zirlaite kha a haw takzet, a bik takin Nghaka chu a haw zual em em a. A in seh ruh a, "In chak dawn lo....naupang te te si..ka fa rual lek lehnghal...in chak lo khawp ang." tiin dawhkan chu a chum bur mai.

**************************

Abby leh Hlimpuia te chu an tlan zel a, damdawiin kawtah chuan Abby chu a ding a. "Enge i tih dawn?" tiin Hlimpuia chuan a zawt vat a. "Tikhan lo awm rawh...ka rei lovang." tiin a chhuahsan daih mai. Minute 25 vel dawn chu a thang a, a tawp a tawpah chuan Abby chu a lo let ve leh ta. "Enge i tih a?" tiin a lo zawt leh a.

"Ka chhungte duty an awm ve a, ka va tlawh lawk a nih kha." a ti mai a, Hlimpuia pawh chuan a zawh chhunzawm ta lem lo. An ngawih dun vang vang hnuah chuan, "Tualthattu hi tunge a nih i rin reng reng?" tiin Abby chuan a han zawt deuh thut a. Phawk hru hian Hlimpuia chuan, "Ka hre lo ea...rin nei tur pawhin an chhui tan chauh alawm." tiin a lo chhang a.

"Anih keimah hi lo ni reng ta ila engtin nge min tih ang?"

Hlimpuia chu a phu deuh zuk a, "Engmaw? Nangmah maw? Engvangin nge i nih ngawt anga?" a ti hu mai. Abby chu a nui huah huah a, "Ka ni ka ti hleinem, ni ta ila engtin nge min tih ang ka ti mai alawm." a lo ti leh a. Inthlahrung deuh hian, "Aww...ka man ang che." a han ti zawi sap a. Abby chuan a chhang lem lo, a nui suk ringawt.

Chutih lai chuan Abby phone chu a rawn ri a, private number a lo ni. Rang takin a la a, "Hello...Hello.." a han ti vak vak a, mahse phone ami chu a ngawi tlat mai. "Hello..tunge aw?" a han ti leh a, mahse phone chu a indah hmak mai. "Tunge mawni le?" tih pah chuan Abby chuan a han call back leh a.

Mahse a a ring quit thak thak mai, engmah sawi lem lo chuan Abby chuan phone chu a dah leh mai a. Reiloteah chuan Sangtei te in chu an thleng ta a, kawngka chu an han kik leh karh karh a. Linda-i chuan a lo hawn sak a, ":Lo leng ru." tiin a luhtir a. "Sangtei a awm ang tiraw?" tiin a zawt a.

"Aw awm e, roomah a awm a, ka va ko ange."

Abby leh Hlimpuia chu an thu a, "Hlimpui...i pum enge a an?" tiin Abby chuan a han zawt a. "Engtin mah a awm lo, tinge min zawh?" tiin a lo zawt let a. Abby chuan nui chung hian, "Hun lo deuhvin san i pe leh tuah tuah ange aw?" a han ti chu Hlimpuia chu a zak ru kher mai. "Engmah a thleng tawh lovang." tiin a khi suk a.

SAngtei chu a lo kal a, choka lamah chuan an inzui phei leh ta a. "Nizan lam i mu tha em?" tiin Abby chuan a han zawt leh te te a. "Um..mu tha animai." tiin a lo chhang mai a. "Zing i tho nuam maw?" a han ti leh a. Sangtei chuan a lu a bu nghat a, Abby chuan thlalak chu a phawrh chhuak ta a.

Sangtei chuan a han en a, "Kan thlalak maw? Enge awmzia?" a ti hu mai. "In bula mi Henry-a kha...in inhre tha em?" tiin a han zawt leh a. "Aw...Hmingmawia thianpa ania..ngati nge?" tiin Sangtei chuan a hrethiam lo takzet. "Sawi nuam a nilo maithei a...mahse thudik takin min chhang rawh aw...Henry-a hian a duh che tiraw?" tiin a zawt ta tawp mai.

Inthlahrung tak hian Sangtei chua, "Umm...nia, Hmingmawia bulah pawh ka sawi ngai lo. A chhan chu a thianpa a ni a, keimah vanga hmelma a an chhuah hi ka duh lo a ni. Hmingmawia then tur leh amah nena inngaizawng turin min sawm fo thin a, mahse ka duh ngai lo. VAwikhat pawh min sual a tum tawh a, mahse a hnuah ngaidam min dil leh a." tiin a lo chhang a.

Abby leh Hlimpuia te chu an in en a, "Hmingmawia chuan engmah a hrelo amaw?" tiin a han zawt leh a. "Aw hrelo..ka sawi duhlo alawm. Tinge ka pi Henry-a chu in ringhlel deuh tihna em ni?" tiin a zawt let ve ta a. Abby chu a ngawi vang vang a, "Nangin i ringhlel em?" a ti ta daih mai.

"Min duh ngei a, min bem ngei bawk. Min sual a tum tawh ngei bawk a, mi fel tak chu a nilo tih ka hria. Mahse khatiang em em a rapthlak khan a thianpa hi a thah duh ka ringlo, chutiang mi a ni lo." tiin a chhang a. "I rin ang ngawt kha a lo ni lo thei asin." Hlimpuia chuan a lo ti ve bawk a. Mahse Sangtei chuan, "Aih...a nih ka ring lo. Kei ai mahin a tuar na a, a a lo chauh asin." a lo ti leh a.

"Anih Henry-a chu a chhungte nen an awm tihna mi? Nu leh pate a la nei em?"

"Nei e, mahse mahniin in a luah a."

Zawhna eng eng emaw an han inzawh leh hnu chuan Abby te pawh chu Sangtei te in atang chuan an chhuak ta a, motorah lutin an tlan dun leh ta a. "Ma'm..keichu Henry-a hi ka ringhlel nghal riau mai." Hlimpuia chuan a han ti a. Abby chu a nui suk a, "Nichin kha chuan i rinhlelh loh kha." a lo ti a.

"Nia...nichin chu nichin ania, tunah chuan Sangtei sawi dan hmang kha chuan a rinhlelhawm ber ka ti."

"Mahse a tuar nat thu a sawi te kha...Sangtei ber pawhin a rinloh kha."

"Lem a chang pawh a ni thei alawm, keichu ka ringhlel bur."

"Kan chhui zel anga, kan hre mai ang."

"Anih tunah khawnge kan kal dawn?"

"Henry-a te inah chuan i kal phawt teh ang."

*****************************

Lunch Break a ni a, Francis-a te class chu tiffin ei khawmin an titi nak nak hlawm a. MAhse Francis-a ber erawh chu kil khatah thuin amahin tiffin chu a ei mual mual a, a eizo rang kher mai. "Ka va han kham lo thei tak." tih nuah nuah pah chuan a tifin bawm tereuhte chu a chhin tha a, bag ah chuan a khung a.

Tichuan pawnah chhuakin Pawl 10 naupang ho awmna zawngin school compund chu a hel ta tak tak a. A tawpah chuan naupang ho meizial zukrukna, building hlui hnuai lam pan chuan a chhuk ta. Pawl 8-10 mipa naupang ho chuan zial an lo zu sap sap hlawm a, Francis-a chuan a han melh kual den den a.

A tawpah pindan hrana PAwl 10 zirlai, Nghaka, Lawma leh Terema te meizial lo zu chu ava hmu ta. Nghaka chuan a lo en a, "Ehe..kekawrte hnim-a kha a nih hi...enge i duh a?" tiin a lo nuih a, a thiante pawh chu an lo nui a. Francis-a chuan kawngka chu a khar ta hmak mai, chu class room hlui chhungah chuan an pali chauh chuan an awm a.

Zam hauh lo hian ava pan phei a, Nghaka meizial zuk lai chu ava la ringawt a. Amah chuan a han zu hlat hlat a, "Eheu...iva ngampa reuh ve." tiin Nghaka chu a nui suk a. Terema chu a tho a, "I inla nghal ve ami?" tih pah chuan Francis-a tukhumah chuan a beng pawp mai. Francis-a chu a nui a, meizial chu a han si leh sak a.

A kawr awmah chuan thamin Nghaka chuan, "ZAwnga...naupang te te...min cho ve deuh tihna mi?" tham lo tak chuan a han ti a. Chutah Francis-a chuan a kut chu meizial ling chuan a lo dep a, "A sa lutuk." tiin Nghaka chu a rak thawt mai. Terema chu a lo phei a, Francis-a chu hnek a rawn tum a.

Mahse a ngalah chuan a lo chhui pawp a, Terema chu a thingthi hnawk mai. A kut chu kuai vakin a hnungah a tlawh zui a,  chhuatah chuan a rap bet ta ran mai. Nghaka leh LAwma chuan va khawih tumin an pan a, mahse Francis-a rawn tawng chhuak chu an ding chat mai. Francis-a aw a ni mawlh lo, patling aw daih a ni.

"Pen khat pawhin rawn pen leh teh u, inthianpa kut ruh hi a tliak nghal ang." a ti ta chhur chhur mai. Chutia naupang kum 8 mi lekin hnehsawh taka kum 15 tleirawl, lian ve tak mai a han rap bet ran mai leh a aw danglam ta mai chu Nghaka leh Lawma pawh an pawr ngam ta hauh lo, an ngawi reng ringawt.

Francis-a chuan Terema chu a pawt tho lawp a, bang kil lamah chuan a theh phei thuai mai. Tichuan Nghaka chu a en leh a, "Lo kal teh." a ti leh khur khur mai a. Nghaka chuan hlau tak hian, "Ka..ka fiamthu nih kha...kan fiam mai mai che a nih kha." a ti khur dar dar mai. "Lo kal teh ka tih chu..." a ti vin leh tuar a, Nghaka chu a va kal ta.

Francis-a chuan rum zet hian a melh a, "Rawn kun hniam teh.." a han ti leh a. A hlauh em avang chuan Nghaka chu a kun hniam a, a beng bulah chuan zawite hian, "Ka duh chuan in pathum hian ka that thei che u, mahse ka khawngaih hram ang che u. In ngam phawt chuan zirtirtute bulah emaw, in chhungte bulah pawh insawi dawn nia." tih pah chuan Nghaka chu a hnek siah mai.

A hnar chu a rawn thi nghal zawih zawih a, Francis-a chuan Lawma chu ava en leh a. Lawma chu a lo zam kher mai, "Ka...ka tel ve lo..engtin mah ka ti velo che." a lo ti nghal zuah zuah a. "Midang bulah in sawi dawn em? Min report dawn em?" tiin Francis-a chuan a han vau leh hlawm a.

"Aih..kan sawi lovang." tiin Nghaka chu a tap pur mai, khati em em a kutthlak na leh chak naupang kha an la hmu ngai lo miau va, a aw zawng zawng te nen khan an rapin an hlau takzet. Chutah Francis-a mit chu chinghne mit ang mai hian a eng deuh phut mai lehnghal a, an hmu chiang em em lehnghal.

"Pakhat pawhin in sawi tih ka hriat chuan in thi vek ang, in pathum mai nilovin in chhungte zawng zawng pawhin an tuar vek ang." a ti leh khur khur a, tawng pawh an tawng ngam tawh lo. Tichuan kawngka chu a hawng a, a han hawilet leh hram a. A nui vur vur a, "KA hming chu Francis-a a ni, Francis Zothansanga." tih pah chuan a chhuahsan ta a.

**************************

Henry-a inluah  chu Abby te chuan an thleng ta a, mahse a lo invih kalh daih mai. "A chhuak amaw ni le?" tiin Hlimpuia chu a phun nuah nuah a. "A chhuak a nih hi...hei a chiang reng alawm." Abby chuan a lo ti deuh kher a. An han ngawi dun leh vang vang a, "Tala pawhin a kalh lova, a chhuak hla lovang...lo nghak phawt mai ang." tiin kawngkhar bulah chuan an ding dun a.

Mahse a chhung atang chuan thawm an hre ta tlat mai, "Shh...chu ngaithla teh." tiin Abby chuan Hlimpuia chu a signal zauh va. An pahnih chuan an ngawi ta kar mai, thawm chu an ngaithla dun zel a. Lehkhabu tla ri niawm tak te chu an hria a, mihring phun ri leh sap thin chu an hre bawk.

Abby chuan a pistol a phawrh a, zai zirin Hlimpuia chu kawngka hawng turin a hrilh a. Hlimpuia chuan thawm dim thei ang ber chuan kawngka chu a han hawng a, chutah an lut ta thut a. Abby chuan silai chu lek kangin, "Che suh..Police." a han ti vak a.  Inchhungah chuan mipa pakhat, la naupan hmel tak hian thutthleng hnuai vel chu a lo bih mek a.

Abby te a hmu chiah chu tuk verh ah chuan a zuang thla ta daih mai, "Leh lam atangin lo tlan khalh rawh." tiin Abby chuan a umzui a, Hlimpuia chu kawthlang step lamah chuan a chhuk nghal a. Abby chu tukverah chuan a han dak thla a, a lo sang lemlo khawp mai. A zuang thla ve nghal a, chupa nen chuan an inum ta chiam mai a.

Mahse rei pawh an in um lo, Abby chuan a umpha vat a. LEiah chuan rapbetin a hnung khirh a, Hlimpuia chu a rawn thleng ve nghal bawk. "Tunge i nih? Mawh..tunge i nih?" tiin Abby chuan pistol chuan a tin a. Chupa chuan hlau tak hian, "Aman a ba alawm...min pe duh silova, pawisa ka nei tawh bik silova." a ti chel chul mai a.

Abby leh Hlimpuia chu an in melh hu ringawt a, an hrethiam lo dun kher mai. "Tuin maw? Engmaw an pek duhloh che a?" tiin Abby chuan a zawt a. Chupa chuan thaw hlawp hlawp hian, "Thildang lak ka tum lo...ka zu chiah kha animai." a la ti ta deuh deuh va. Abby chuan a kai thova, Chupa chuan Abby leh Hlimpuia a en chuan mak a tih hmel kher mai.

"Ehe..Police hnenah em em a report ka ring lo asin...ka thiamloh anilo, nizanah pawisa ka pe ang che atia, min pe silova. Um 2 ngawt min bat sak a, tunah pawisa ka nei tawh silova." a han ti leh a. "Tunge i hming?" tiin a zawt a, "Eric-a." tiin a lo chhang a. "Tuin maw i zu chu batsak che a?" a han ti leh a.

"Aww...Henry-a, ka thiamloh a awm lo. Nizanah ka pe ang che atia, ka stock sa um 2 ngawt a la a. Tunah ka batna ten min rawn thing leh tawh sia, ka phone a, min chhang duh silova. Tihian an inah ka kal a, a lo inkalh bawk sia. KA mangang a, ka lut ru ta mai a ni." a han ti leh a. Abby chu a thaw hak a, "Ava han buaithlak tak." a ti nuah nuah mai.

Eric-a chuan inthlahrung tak hian, "Engtin chiah nge min puh a? Engmah thildang ka ti sual lo ania." a han ti leh a. Abby chuan a han en vang vang a, "Engzah nge a bat a?" a ti ta daih mai. "Ih...cheng 2000, um khat 1000 a nia." tiin a lo chhang a. Abby chuan a purse a phawrh a, 2000 tlang chu a phawrh chhuak a.

"Kha..kal rawh, haw vang vang rawh." tiin a pe a, hrethiam lo tak chuan Eric-a pawh chu a kal ve mai a. Hlimpuia chuan mak a ti ang reng hle mai, "Tinge i pek ringawt a? Enge awmzia?" a lo ti hu mai a. "Khatiang 2000 mai mai a uiawm loh, kan hnuchhui a pawimawh zawk." tiin a lo chhang a.

************************

TO BE CONTINUE