UNHOLY CONFESSIONS (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 3

 UNHOLY CONFESSIONS

(MIZO FICTION TEEN SLASHER/HORROR STORY)

Written by : Aaron Malsawmdawngzuala

WARNING : 18+

Chapter - 3

***********************

Alex-a leh anu chuan chaw an eidun mek a, "I pa chu zing zingah khawiah nge maw a chhuah daih le?" anu chuan a han ti nuah nuah a. "Aw..ruang an chhar a, tukin khan...a kal aniang chu.." tiin Alex-a chuan a lo chhang a. "Ehe..ruang a? Khawiah maw?" tiin Pi Ziri chuan a han zawt leh nghal a.

"Ka hre lo, ka en phawt lo chuan ka hre leh tawh lo." tiin a lo chhang leh a. "Tukin zinga phone a hmang lai kha ka mang hriat ruai ruai a, kha kha a nih dawn chu." tih pah chuan anu chuan chaw chu a bar leh mial mial a.Alex-a chu a eikham a, college kal tur chuan a insiam nghal mawlh mawlh a.

Chutih lai chuan Alex-a pa, Pu Tluanga pawh chu a rawn haw ve ta. "Tu ruang nge in hre thei tawh em?" tiin Pi Ziri chuan a lo zawt nghal ringawt a, Pu Tluanga chuan a lu a thing ringawt. Pi Ziri pawh chuan a chaw eina thleng chu a seng a, "I ei ve nghal dawn em?" a han ti a. "Dawn lo, chubakah ka kal lehnghal angai." tiin a pasal chuan a lo chhang a.

"Tinge? Hmun dangah i ei em ni?"

"Ei love...ka ei peih lo. Ruang kha a tenawm lutuk a, engmah min ti ei chak lo zo vek." tiin Pu Tluanga chuan a lo chhang a. Pi Ziri chuan a kut te chu a han sil a, thleng te chu a han seng fel zung zung a. A pasal bulah chuan ava thu a, "A rapthlak viau em ni?" tiin a han zawt leh a. "Rapthlak tih piah lam a ni...pitbull ui pahnih in a ruang an lo la ei zui." tiin a lo chhang leh a.

"Ui a? Ui seh hlum tihna em ni?"

"Chu chu kan la hrelo...a thih tawh hnuah a ruang an ei nge, an seh hlum tih pawh kan la chiang lo."

"Thah a nih in ring zawk tihna em ni?"

"Kidnap chu a ni ngei a, mahse kidnapper hian a that phawt a, chumi hnuah ui a ei tir nge, ui a seh hlum tir zawk kan la hre lo ka tihna a nih chu."

"Awi avan rapthlak...a ruang a chhe nasa viau a nimaw?"

"Ekhai..sawi vak chi pawh anilo. Hetiang em em a thihna rapthlak hi Mizoramah a thlen ka la hrelo...thla 6 kal ta a case kan chhuichhuah loh kha...kha nen khan a rapthlak dan chu a in ang vel maithei."

"Ava han pawi thin tak...ruang chhar hi a awm zeuh zeuh ta mai. Engpawh nise..thingpui ka han lum ang che."

"Ni e..ka lo in teh ang...phei leh nghal ka ngai keipawh."

***************************

Abawihi pawh a insiam zo va, scooty chu a hru fai mawlh mawlh a. Alex-a chu lo thleng har a ti tawh ngei mai, "Ka hman tawh ania...ka nghak reng che." tiin message a han thawn a. Mahse a seen miah lo, a nghak leh deuh ngat ngat a. Chutih lai chuan Mary chuan a rawn phone a, "Min rawn lam dawn lo em ni?" tiin a rawn vin deuh hlur mai.

"Alex-a ka la nghak a."

"Kan tlai ange...Alex-a ti nghal reng ringawt mai."

"A lo thleng tep ang."

"I text lo ami?"

"A seen thei lova, a lo tlan mek aniang."

"A ho e..scooty a nei ve tho alawm. Lo kal rawh, kan tlai phah ang."

"Nizanah ka lo tiam ve laklawh tawh sia....kan sawi lawk ve vek tawh a."

"A ho chutiang..ka nghak che."

Mary chuan phone a dah hmak mai, "A van lo thleng har tak." tiin Abawihi chu a phun nuah nuah a. "Ka kal mai aw..Mary a hmanhmawh tawh tlat." tiin phone chu a dah a, a scooty chu a han start a. A chuang dawn chiah tih ah chuan a hnungah chuan horn a rawn ri vak a, a phu nasa kher mai.

Rang takin ava hawi let a, Alex-a a lo ni. "Awi..kal ka lo tum chiah a...min ti phu nasa lutuk." tiin Abawihi chu a han nui har har a. "Tinge? Min lo nghah i tum lo ami?" tiin Alex-a chu a han ner deuh nang a. "Hehe..tum e, Mary a hmanhmawh lutuk a, i van rei em em, i buai ami?" tiin a lo zawt ve leh a.

"Buai love...ka hman tlai mai mai, tukin chu...kan kal dawn em ni?"

"Nia kal vat ang, Mary lah khan min rawn vin nasa tawh si."

Alex-a chu a nui suk a, tichuan an tlan ta a. Mary te inkawt an thlen chuan Mary chu a lo vei kual sek tawh mai a, Abawihi leh Alex-a a hmu chiah chu a melh rum dun kher mai. "Awiii nangni pahnih kha...engemaw in ti kawi a ni lo maw?" a han ti deuh kher a. Nui sang hian Alex-a chuan, "Engmah ti kawi love..keima thiamloh alawm, min ngaidam hram teh." a han ti a.

Abawihi scooty ah chuan Mary chu a han lawn kai a, "Kal vat teh ang u...assignment ka la ti zo bawk silova, class ah teacher lo luh hmaa tih zawh ka duh a." a la ti zui a. Alex-a chu a nui nasa mai, "A ninawm e, Mary hi chu...tikhan ti ziah suh, inah te ve mai thin la...naupang chhia ang mai." tiin Abawihi chuan a lo hau va.

"Awi..i ninawm feee..kal vat mai teh." Mary chuan a lo ti hlur a, tichuan an kal ta a. An hmaah chuan Alex-a chu a tlan a, hnunglam atang ringawt pawh chuan Abawihi chuan Alex-a chu a en ngawih ngawih mai. Mary chuan a han kheuh zeuh va, "Kan accident phah ange aw...a tukhum ringawt pawh i en ngawih ngawih mai ania." tiin a lo fiam zauh va.

"Amak ka ti e, Mary...tinge ka duh em em le?"

"Aw enge mak vak..i duhzawng ani tihna a ni mai alawm."

"Chupawh nise...midang min bemtute kha ngaihtuah la..Ricky-a te, Dawnga te..tumah kha ka duh lova, ka ten em em zawk kha ania. Mahse anmahni aia  a hmelthat vak bikna a awm loh tehreng nen, tinge maw ka duh em em le?"

"A fel em alawm...chubakah ala naupan vang aniang...catch them young policy hman a ngai ve tawh anih kha."

An thiandun chuan an nui har har a, reiloteah chuan college chu an thleng ta. Mary chu rang takin a chhuk a, "Kei chu ka lut nghal dawn, assignment ziah chawp tur ka la nei. Nangni pahnih biahthu inhlan vel ka nghak peih lo, anih u.." tiin a lut nghal daih mai. Abawihi leh Alex-a chu an in en a, an nui ringawt.

An han ngawi dun deuh vang vang a, an han inmelh lai leh ringawt thin a. Alex-a chuan a aw a han thian kharh kharh a, "Anih...banah haw rual leh ila.." a han ti a. "Nia..haw rual em em ang." tiin a lo chhang a. "A bang hmasa sa innghah ti ila." a han ti leh a, "Umm..ti daih ila, khawnge i thiante..Bena leh Ruthi?" tiin Abawihi chuan a han zawt a.

"Min kalsan ta a nih kha...ka tlai em a." tiin a lo chhang a. "Anih chu...umm, lut ila.." Abawihi chuan a han ti leh a, an inzui lut ta a. Alex-a te class chu an thleng a, "Lunch Break ah kan inhmu dawnnia aw.." tiin Abawihi chuan a han nuih sen sen a, Alex-a chuan a lu a lo bu nghat a. A lut ta a, Abawhi pawh an class lam panin a chho ve ta a.

********************

Pu Tluanga chuan a dawhkanah chuan file vel chu a chhawp hnawk nuai a, a han enkual vel a. Chutih lai chuan Mamuana chu a lo kal a, "Sir..bucket-a thisen kha vawk thisen a ni e." tiin report chu a rawn pe a. Pu Tluanga chuan a lo en nghal a, "Anih leh post mortem result hi?"  ahan ti a.

"An la peih lo...naktuk zingah chuan an peih hman tawh ang. Chuan ruang kha tunge anih kan hre tawh bawk..Lalthankima a ni a, kum 27...Mission veng ami a ni e." a lo ti leh a. "A tha lutuk e..SI Gilbert-a va ko teh." a han ti leh a. Reiloteah chuan Gilbert-a chu a rawn kal a, "Enge ni, Sir?" a rawn ti a.

"Gilbert...Lalthankima chhungte bulah an fapa a thi tih hi va hrilh la, i duh leh constable pahnih vel hruai la, nangmah a i hreh chuan.." Pu Tlianga chuan a han ti leh a, "Awle Sir." tiin Gilbert-a chu a kal ta nghal a. Pu Tluanga chu a han inngaihtuah vang vang a, "Mamuan, nimin lamah mibo report vel engmah a awm lo tiraw?" tiin a han zawt a.

"Awm lo, Sir...tinge?"

"Kima hi a chhungten a bo thu an rawn report miah bawk silova...inah a awm dawn silo a, chuvang chu mawle."

"Nizana thi a ni ngei anga..a leng haw lam te pawh a ni thei a. Chuvang chuan an ngaihtuah vak lemlo ani ngei ang."

"Nia...a mobile number hriat phawt angai a ni. Gilbert-a te lo let leh hunah kan va kal tha ve leh dawnnia, tunah chuan crime scene-ah khan va kal leh phawt teh ang."

"Awle Sir."

Pu Tluanga leh Mamuana te chu crime scene lam pan chuan an kal leh ta a, reiloteah chuan an thleng vat a. Pu Tluanga chuan X-a ui thlunna, iron pipe chu a han en vang vang a. Chain bung pawh chu a la awm a, "Finger prints an hmuh loh thu kha an sawi tiraw?" tiin Mamuana chu a han zawt a.

"Aw hmulo, Sir." tiin a lo chhang a. Pu Tluanga chuan Kima thutna thutthleng chu a han thlek leh vang vang a, thil thlen dar tur awm ang te chu a han mitthla kual vel a. "Pitbull ui pehi chu to tak a ni a, mi hausa tan lo chuan neih mai mai chi pawh a nilo. Chutah pawh pahnih lehnghal, kidnapper ui vulh lai ve ve an ni anih chuan he kidnapper hi mi hausa tak ani ngei ang." Mamuana chuan a lo ti a.

"A ruk pawh  ani thei tho....chubakah sawi tawh ang khan pitbull ui pawh hian anmahni tihnat tum emaw, chhaih kawlh tum an nih loh chuan chutin thi khawp khawpin mihring an bei ngawt ngai lo." tiin Pu Tluanga chuan a lo chhang a. "Anih Sir..enge i ngaihdan?" tiin Mamuana chuan a lo zawt veleh a.

"Bucket ah khan vawk thisen a awm a, kha vawk thisen khan Kidnapper khan Kima hi a leih anga. Tichuan heng pitbull ui te hian a rim an hria anga, Kima lah phuar beh a nih tlat avangin a che thei silo anga. Tichuan an sehhlum ta a ni thei, mahse hriatthiam loh ka la nei."

"Engmaw Sir?"

"Ui seh hlum tir a tum anih chuan tinge ui pahnihte hi a thlun kher? A chhan chu khang uite kha an nghawngkawl atanga en pawh khan chain hi an tal bung tih a chiang reng a, tinge a seh tir nghal mai loh?" a han ti nuah nuah a. "Ui bo avanga report vel engmah a awm chu ka hre miah lo...tunhnaiah phei chuan.." Mamuana chuan a lo ti ve bawk a.

"Pitbull te phei chu chaw an heh si a, chawm that an ngai bawk. Ka rindan chuan he kidnapper hian kha pitbull pahnihte kha a ru ngei anga, riltam takin a dah ngei bawk ang. Chutin mihring hi an ngam over kher lo ania, ui hrim hrim hian...mahse an ril a tam tawngkhawng tawh chuan an bei hreh chuang hauh lovang."

Chutih lai chuan Pu Tluanga phone chu a rawn ri a, "Hello Gilbert..enge chanchin?" a han ti nghat vat a. "Sir, kan hrilh tawh e. Zawhna erawh ka zawt hrih lo, nangma kutah ka lo dah ve tawp. Hei in vel an singsa mek a, ruang vel pawh post mortem a nih thu vel chu kan hrilh fiah tawh e." Gilbert-a chuan a rawn ti a.

"Kima phone number in la em?"

"Aw la e, Sir."

"Anih chuan a call log lo check ula, list lo siam bawk ang che u."

"Awle Sir..ka lo buaipui ang."

"A tha e. Station ah lo let leh ula, a tul tul lo buaipui chhunzawm ang che u. Chuan ui bo report vel tun hnaiah a awm nge awm lo tih lo check ula, pitbull neitute pawh kha zawn chhuah vat lo tum ang che u." tiin phone chu a dah a. Mamuana chu a han en a, "Kima te inah chuan va kal ve thung ang le." a han ti a.

***********************

Lunch Break a ni a, Alex-a leh Bena te chu ground lam pan chuan an phei nghal a. Mahse Abawihi erawh a lo la awm lo, an pahnih chuan thu dunin an titi a. "Ngati maw Ruthi chu a lo kal loh?" tiin Alex-a chuan a han zawt a. "Chuu...apa a dam lova, a stroke thut a. Damdawiinah an tlanchhoh pui nghal a, tukin khan.." tiin a lo chhang a.

"Anih leh tunah enge a an tawh?"

"Tunah chuan a zia deuh rih ani awm e."

"Ava zia lo tak..Ruthi te hi chu an khawngaih thlak ngawt mai."

"Chu chu lawm..anu lah a boral tawh bawk si...api lah hian a duat lo em em mai bawk sia."

"Nia..apa chauh hi duattu a nei a, a hrisello bawk si..then miah suh ang che."

"Then phal teuh lo mai...ti daih ila, enge Abawihi nen chuan in chanchin?"

Alex-a chu a han nui deuh suk a, "A awmdan vel atang hi chuan min duh ve deuh chuan ka hria mawle...mahse kan in upat hleih deuh chuan ka hria." tiin a lo chhang a. "A ho emai, kum te chu number mai mai alawm. Bem hmiah rawh...a duh em em ang che." Bena chuan a han ti leh a. "Min lo duh lo ta se...ka zak dawn e." Alex-a chuan a ti nuah nuah mai.

"I dawih emai, duhlohna chhan tur che  a nei lo...thian tha ah hian i chhuah leh hram ange aw...a chi tawh miah lovang." tiin Bena chu a han nui huah huah a. "A teuh lo lutuk...ahma ami te kha chu ka duh loh vang alawm." tiin a lo nui ve bawk a. "Daw suh aw...Abawihi lo kal hunah ka hrilh dawn." tiin a han fiam a.

Chutih lai tak chuan Abawihi leh Mary te chu an rawn kal ve ta a, "Ehe..in van break hma bik." tih pah chuan Alex-a meizial zuk lai chu Mary chuan a han laksak nghal ringawt a, an bulah chuan thu in a han zu khu hluah hluah a. "Awiii Mary hi chu aw....i va han polite lo thei tak." tiin Abawihi chuan a lo hau va.

Mary lah chuan, "Junior te laka ka polite nachhan tur hi ka hre lo reng reng." tiin a han nui thler duai duai a, Bena leh Alex-a te pawh chu an lo nui ve mai a. Abawihi chuan Bena chu a han en a, "Khawnge a changtunu?" tiin a han zawt a. "A lo kal lo...apa a dam lova...damdawiinah tukin khan an tlan chhoh pui a." tiin a lo chhang a.

"Anih chu mawle..a zia lo hle mai."

Alex-a chu a han ngawi vang vang a, "Taka...tukin ruang an chhar kha in hre ve em?" a han ti deuh thut a. "Hre ve e...awii ruang thlalak min rawn thawn a, ka thianpa in...ruang an chharna venga mi ania...ka delete rang lutuk." Mary chuan a lo ti vat a. "Naa..ka en ve duh asin, nge ilo delete thawt thawt a?" Bena chuan a lo ti nuah nuah a.

"I en duh lovang..a rapthlak lutuk, a ril a chhuak pur mai."

"Keichu thlalak tak chu ka hmu lova..mahse whatsapp news group-a an rawn post kha chu ka hmu reng." Abawihi chuan a lo ti ve bawk a. "Ka pa pawh zingkarah a chhuah phah alawm, case pawh a kutah a awm leh nghal a, chhui chhuak tak ang maw?" Alex-a'n a han tih chuan Abawihi chu a phu deuh zuk mai.

"I pa police maw?"

"Aw ni e...Inspector."

Mary chu a lo nui a, "Eheu...kan makpa tur chuan police inspector pa a lo nei reng ani maw?" tiin a lo fiamthu zeuh va, Abawihi chuan a sik hrep mai. "Ui seh hlum te kha an tiin ka hria a..enge a thih chhan an sawi chiang tawh em, Alex?" tiin Bena chuan a han zawt leh a. "Ka hre biklo, banah ka pa ka zawt chiang leh ang." tiin a lo chhang a.

Rei fe an titi hnu chuan break chu a zo leh ta der mai, Mary leh Bena te chuan an luhsan a. Muang chang chuan Abawihi leh Alex-a te chu an inzui phei a, "I pa police a ni tih ka hrelo reng reng." Abawihi chuan a han ti zawi sap a. "Nia...min zawt silova, ka sawi ta lo mai anih kha." tiin nui chung chuan a lo chhang a.

****************************

Pu Tluanga leh Mamuana te chuan Kima te in chu an thleng a, mipui an lo tam khawp mai. Constable thenkhat an lo la awm a, chanchin te inhrilhin an han inbe luam phawt a. Tichuan inchhung lam pan chuan Pu Tluanga leh Mamuana chu an inzui lut ta a, ruang erawh post mortem mek ala nih avangin vui theih ala nilo thung.

Kima nu, Pi Lapuii chu Pu Tluanga te chuan an han kawm ta a. "Nizan ah dar engzatah nge a chhuah?" tiin Pu Tluanga chuan a han zawt a. Inhnit hlap hlap pah chuan, "Chaw eikham..dar 7 pelh vel khan a chhuak nghal." tiin a lo chhang a. "A kalna in hria em? A lenna tur a sawi em?" tiin a han zawt leh a.

"Aw sawi e...Nghaka te inah a tia."

"Tunge Nghaka chu?"

"A thianpa ania, tunah pawh hian a awm ve...saw, sawlaia kawr var ha saw ania." tiin Nghaka chu ava kawk a, "Mamuan, Nghaka saw lo kal hla lo turin va hrilh rawh." tiin Pu Tluanga chuan a tir a, Mamuana chu a kal nghal a. ZAwhna chu zawh chhunzawm lehin, "Hmelma emaw, amah hawtu a neih awm i hria em?" a han ti leh a.

"Aih...hmelma a neih awm reng reng ka hrelo."

"Anih leh nangman han rinhlelh deuh te i nei em?"

"Neilo..chubakah amah hian thu hi a awih vak lova. Zu a heh si a, amah hau tu ber apa lahin nikum khan min boral san tawh bawk si." tiin a han tap leh deuh feih feih a. "Anih leh tun hnai deuh khan a mizia han danglam thut te a awm em? Entirnan, a tih ngai miah lo han tih thut te, amah ah rilru hahna awmin i hre thin em?" tiin a han zawt leh a.

"Chupawh engmah a awm ka hrelo, a thawveng ve em em a nimai."

"In inah hian tutu nge cheng che u?"

"Kei leh Kima leh anau Wendy te hi kan nimai." tiin a chhang a, chutih lai chuan Wendy chu alo kal a, kum 20 mi vel niawm tak a ni. Pu Tluanga chu thingpui a rawn pe a, a kal leh mai a. "Ka pi, Kima hian bialnu a nei em?" tiin a han zawt leh a. "Aw..nei e." tiin a lo chhang a. "A hming leh a address min hrilh thei angem?" tiin han zawt leh a.

"Aw...Jenet-i ania, kan inah pawh a rawn hruai haw fo mai. Mahse vawiin hian ka la hmu miah lo, a lo kal ve lo pawh a ni maithei."

"A tha e, nakinah kan inbe leh dawnnia."

Chutih lai chuan Nghaka chu rilru nuam lo tih hriat tak hian Kima te inkawtah chuan a vei kual sek mai a, chutih lai chuan a thianpa Siama chu a lo kal a. "Nghaka, ka zawng nasa lutuk che." a rawn ti a. "Enge?" a lo ti vin hlur mai. "Zothana leh Liantea te ka hmu zo miahlo ania, ka phone nasa tawh lutuk." Siama chuan a han ti a.

"Aw...zu an ngaihtuah leh tawh aniang chu." tiin Nghaka chuan a lo vin leh hlur a. Siama ngaih tha lo chuan, "Ngati nge...i rilru ava hah hmel ve?" tiin a han zawt a. "Police pakhat alo kal a, kawm min duh thu a rawn sawi a." tiin a lo chhang a. "Anih enge a zawh che?" Siama chuan a han ti leh a.

"Ka hrelo, lo kal hla suh a ti ringawt a."

"Engmah ala zawt lo che tihna mi?"

"Aw..constable ania, Nu Lapuii kawmtu Inspector khan min zawt dawn ani ngei ang."

"Mahse tinge nang kher?"

"Aww..nizanah Kima kan inah a lo kal a, a lenna hnuhnung ber a ni bawk sia."

Chutia an titi lai chuan Pu Tluanga leh Mamuana te chu an rawn kal a, Nghaka chu a zam kher mai. "Nangmah hi maw Nghaka chu?" tiin a rawn zawt a. A lu a lo bu ringawt a, "Inkawm lawk ang hmiang." tiin Pu Tluanga chuan a darah a han vuan a, Nghaka chu a lo la phu zuk lehnghal. Siama lah chu a la kal daih zuia, tichuan zawhna chu an inzawt tan leh ta a.

"Nizanah dar engzat velah nge Kima chu a haw?"

"Dar 11 vel a niin ka hria."

"Amahin emni a haw?"

"Aw..bike-in a haw a, a rui lutuk a. A tlu ang tih pawh kan hlau lutuk a, riak mai turin ka sawm a, mahse amah khan a duh tlat si lova."

Rei pawh an inkawm hma chuan hmeichhe pakhat hi a lo kal a, a mit te chu a bui vek lehnghal. "Ka pu..biak che ka duh." a rawn ti ringawt mai. Nghaka chuan mak tih hmel tak hian, "Ehe..Jenet, i lo lang ve chauh amaw?" a lo ti hu mai. Pu Tluanga chuan a han en vang vang a, "Nangmah hi maw Jenet-i chu?" tiin a han zawt a.

"Aw ni e, sawi duh ka nei a ni." a han ti leh a. Pu Tluanga chuan a lu a han bu nghat nghat a, "A tha e, Nghaka..i kal thei e, nakinah kan inbe leh dawnnia." a ti a, Nghaka chu a kal ta a. Jenet-i chuan a phone a phawrh a, a hma zana Kima nena an inbiakna chu a han hmet chhuak a. "Kha..en rawh." tih pah chuan Pu Tluanga chu a pe a.

Pu Tluanga chuan a han en a, mak a ti kher mai. Mamuana chu a han en tir ve leh a, ani pawh chu a ka hau ringawt. "Jenet..hei hi enge awmzia?" tiin Pu Tluanga chuan a han zawt a. Jenet-i chu a mittui a tla zawih zawih mai, "Ka pu, nikum hmasa khan kei hi pawngsual ka ni a, min hrai ruih vang a ni." tiin a mittui chu a han hru a.

"Han sawi chiang deuh teh."

"Kima hi ka bialpa a ni a, kum 5 lai kan inzui tawh. Nikum hmasa khan a birthday party ah min hruai ve a, chutah chuan beer min in tir a. Tlem te chiah ka in, mahse ka lu a hai em em a, ka chatthla ta a ni. Tichuan ka harh leh chuan kan veng school hlui kawtah saruak vekin ka lo awm a, miin min lo en luai luai a. Ka serh a na em em bawk a, tichuan pawngsual ka ni ngei tih chu ka hrethiam ta a. Ka zak em em a, a then chuan thla te min lo laksak a. Chuta tang chuan ka saruak thlalak chu a lar ta em em a, social media hrang hrangah ka thlalak chu an theh darh a. A thenin Fiamthu thawh nan te min hmang a, status ah min hmang sup sup bawk. Kan chhungkua chu kan mualpho em em a, ka pa chuan tuar zo lovin ama nunna hial a la ta a ni. Keipawh vawi tam intihhlum ka tum a, mahse min dang tu ber chu Kima hi a ni. Min hnem a, min fuih hram hram a. Engtin pawn lo hmingchhia in lo mualpho mah ila, min then a tum loh thu min hrilh thin. Tichuan kuam 2 a liam a, nizan khan tikhan a rawn inpuang ta a ni."

Pu Tluanga leh Mamuana chuan sawi tur pawh an hre mai lo, an in en leh hu ringawt a. "Anih chuan Kima message atang hian...vau bettu an awm tihna animaw? Kima hi kidnap a ni a, tichuan i bula inpuang lui turin kidnapper hian a vau tihna a niang maw?" tiin Pu Tluanga chuan a han zawt a.

"Ka hrelo..Kidnapper hi tupawh nise, Kima thattu ber pawh hi lo ni mahse...kei hi min hrechiang hle tihna a ni." tiin Jenet-i chuan a lo chhang a. Kima leh Jenet-i te conversation chu Pu Tluanga chuan a screen shot a, tichuan a phone ah chuan a inthawn a. Mamuana chu a en a, "SHADOW X kha ila hria em?" a han ti a.

Mak tih hmel tak hian Mamuana chuan, "Case hlui kha maw...Sawmtea case kha maw?" a lo ti hu mai. "Aw ni e..a video pawh kan en tawh kha." tiin a lo chhang a. "Aw hria e..mahse tinge?" alo ti leh hu mai. Pu Tluanga chu a khi suk a, "Kha case nen khan  a in ang...inpuan luih tirna tho a ni...kidnapper hi SHADOW X kha a ni." tiin a chhang a.

*****************************

TO BE CONTINUE