WILD ZONE : SEASON 1 (Episode - 8) Written by : Aaron Malsawmdawngzuala THE UNKNOWN KILLER - 2

 WILD ZONE : SEASON 1

(Episode - 8)

Written by : Aaron Malsawmdawngzuala

THE UNKNOWN KILLER - 2

***********************

"Ka pi, pawnah min lo nghak lawk dawn mi niang.." NAthana chuan a han ti a. "Awle." tiin Valpuia nu pawh chu a chhuak ve mai bawk. Valpuia room chhung chu kan han dap a, a khum sir dawhkanah chuan thlalak hi a khup zawngin a lo awm a. Ka han en chu an thianho thlalak a lo ni.

"Sir..hetah lo kal lawk teh." tiin Nathana chu ka ko va, a rawn phei nghal vat a. "Hei hi an thian ho thlalak chu a nih hmel." tiin ka han entir ve a. "Anih dawn kha." a ti ringawt a, hmun dang chu ava dap leh daih a. Kan dap kual thuak thuak hnu pawh chuan kan hnuchhui lai mek a min pui thei thil kan hmuh loh avang chuan kan chhuak leh ta a.

Valpuia nu chu sitting roomah chuan a lo thu mek a, "Ka pi, tunhnai vel khan Valpuia hi a mizia han danglam thut emaw a nei thin em? Ka sawi awmzia chu, a mizia nilo ang deuh a awm chang te a neih i hre mial em?" tiin Nathana chuan a han zawt leh a. "Chutiang a neih awm ka hre lo, amah hrim hrim hi kan hmu tlem thei bawk em a ni." tiin a chhang a.

"Umm...anih chuan kan kal phawt ange. Kan mamawh hunah che chuan kan rawn kal leh ang, lo chhuak bo lo la aw..i tan pawh pawn lam hi a hlauhawm hrih maithei a nia." Nathana chuan a han ti leh a. "Ka pu, ka fapa thattu hi zawng chhuak ngei ang che u." tiin a mittui chu a hru zauh va. "Kan theih tawp kan chhuah dawn alawm." tiin Nathana chuan a chhang a, kan hawsan ta a.

*************************

DAma te in lamah chuan kan va kal leh a, police thenkhat an lo la awm a. Kan va phei dun a, NAthana chuan a ID chu police SI pakhat bulah chuan a hmuh a. SI chuan salute a lo pe nghal thlap, "Hetah enge in la tih a?" tiin Nathana chuan a zawt a. "Nilenga helai hmunah hian awm hrih turin Inspector-in min hrilh a." tiin SI chuan a lo chhang a.

Be zui tawh lem lo chuan inchhungah chuan kan lut tlang nghal a, "Pu Nathan...enge chanchin?" tiin Dama chuan a lo zawt nghal. "Kan la chhui mek zel e..Enteh Pu Dam, in inkawt ah hian CCTV camera vuah thei ula ka va ti em..nakin zela fimkhur nan pawn." Nathana chuan a han ti a. "A dik khawp mai...ni e, a ngai a ni." tiin Dama chuan a chhang a.

"Zaninah venhimna in mamawh duh dawn em?" tiin Nathana chuan a han zawt leh a. "Engtia venhimna maw?" a lo ti hu mai. "Police ten zankhua in veng che u sela in duh chuan sawi tawp rawh u, ka ngaihtuah sak ang che u." tiin Nathana chuan a chhang a. DAma chuan a nupui chu ava en a, "Ka duh keichuan...ka thla a muang hlawl lo." a lo ti zawi sap mai.

"Aw..a theih dawn chuan kan duh ang." Dama chuan a ti ve ta a. "Awle, ka lo buaipui nghal ange. Nangni pawh he case kan buaipui chhung hi chu chhuak hnem lo ula ka duh khawp mai, in nupa hian pawn lama in inlan tam hrih loh a tha ang." Nathana chuan a han ti leh a. "Mahse...nitin office ka kal angai si a, vawiin pawh hetiang thil kan tawn avang hian ka boss-in chawlh min pe a ni mai a." Dama chuan a ti nuah nuah mai.

Nathana chu a ngawi vang vang a, "Umm..i hna chu keia lo thunun theih a ni hleinem, i kal ngei angai anih chuan kal la, mahse i fimkhur hle a ngai ang." tiin a chhang a. "Kan in hi sak lai mek ala ni bawk si a, an thawh chhunzawm zel loh chuan kan budget nen a buai dawn bawk sia, rilru ava hah ve aw.." Hmingtei chuan a rawn ti ve bawk a.

"Aw..kha chu harsatna a awm lo. Thawh chhunzawm rawh se, chuan chhunah hian tunge inah in hnathawkte lo vil thin?" tiin Nathana chuan a han zawt dun leh a. "Keichu nilengin Office ah ka awm daih zel a, kan nu hi inah hian a awm a, eiturte a lo siam sak thin." tiin Dama chuan a chhang a.

"Fa in nei lo nge.."

"Aw neilo, kan inneihna ala rei lova...kum khat pawh ala tling lo."

"Anih chu... a theih hram chuan vawiin law law hian CCTV camera chu vuah thei la ka ti khawp mai, zaninah pawh a tul thut a nih phei chuan keini pawh kan rawn duty a ngai maithei ania."

"Chutiangah chuan engmah harsatna a awm lo ania, ka pu. Engtik lai pawn a rawn riah theih a, chaw pawh a rawn ei theih vek ania."

"A lawmawm e, chuan Hmingte...in hnathawkte hi an chetdan leh an mizia vel emaw, ngun takin lo thlithlai deuh ang che aw...min hrilh leh vek dawnnia." tiin Nathana chuan Hmingtei chu a han en a. "Tehreng mai, ka pu." tiin a lo chhang a. "Kan kal phawt ange, zan lamah emaw kan lo kal leh ang." tiin kan chhuahsan veleh ta a.

************************

Motor-a kan tlan lai chuan Nathana phone chu a rawn ri a, "Inspector Danny-a a nih hi.." tih pah chuan a pick up a, loud speaker ah a dah nghal a. "Hello Danny?" a han ti a. "Sir, hei Valpuia thiante ho chu ka ko khawm tawh a, ka lo zawt nual dawn emawni aw ka tia, nge ka lo nghak dawn che?" Danny-a chuan a rawn ti a.

"Kan lo tlang law law ange...min lo nghak rawh." tiin Nathana chuan a chhang a, phone chu a dah a. "Sir, a thiante zinga mi chu i ringhlel deuh tlat tihna em ni?" tiin ka zawt a. "NGati maw?" a lo ti hu mai. "Thu kan zawhfiah ho te zawng zawng bulah an thianho zinga mi ringhlel ang deuh deuh khan i tawng zel a, chuvang mai mai mawle." tiin ka chhang a.

"Rinhlelh bik pawh ka nei chuang lo, an ni thei ve vek thova. Chubakah an thian hova relationship hi ka hre chak hrim hrim, ka rinhlelh bik em em hlawm vang pawh a nilo." tiin a han sawi kawi deuh duah a. Kan han ngawi leh dun vang vang a, "Bialpa kha i nei tiraw?" a rawn ti deuh thut mai.

"Aw...nei..aww..nei ve e." ka ti bah deuh nuai mai a, ala nui huk zui. "Tinge min zawh a?" ka han ti leh a, "Kan thawkdun tih a hre awm sia, min thik thei viau lo maw?" tiin a han khi suk a. "Thik love, a ngaihsan zia che chu a...a saiw reng zel che." tiin ka chhang a. Awihloh hmel tak hian min melh hru a, "I bialpa chuan maw..ka va awih lo e." a ti vawng vawng mai.

"Tak tak alawm, Sir. Kan inhmuh apiangin a sawi ziah che, a ngaisang lutuk che."

"Anih tunge a hming ni reng reng?"

"Lalrindika ania, Dika tiin an ko thin."

"Anih chu...sawi tur avang em a, ka zawt mai mai che."

Kan han ngawi leh dun vang vang a, "MAxie nen hian enge in relationship hi ni reng reng a, in cheng dun reng tho sia, mahse in innei chuang bawk silova?" tiin ka han zawt veleh a. A ngawi vung vung a, "Chhungkua tumah ka nei tawh lova..chuvang chuan.." a tih chuan a ngawi leh vang vang a, "Nakinah animai." a ti leh daih mai.

***************************

Station chu kan thleng a, sana ka han en chuan tlai dar 3 leh a chanve a pel tawh. Inchhungah chuan kan lut a, Valpuia thiante ho chu an lo thu tlar dal hlawm a. "Interrgation room ah a mal te te in ilo phei tir dawnnia." tiin Nathana chuan Danny-a chu a hrilh a, keini erawh room ah chuan kan lut tlang nghal.

A hmasa berah chuan an thian ho zinga a upa ber chu a rawn lut a, palian lam, sual hmel zet hi ala ni zui. Kan hma takah chuan a rawn thu a, "Tunge i hming le?" tiin Nathana chuan a han zawt a. "Zohmingthanga ka ni e." tiin a chhang thlap mai. "Valpuia nen hian engtik atanga inhria nge in nih?" tiin a han zawt leh a.

"A tette atangin ka hre tawh, ka awm hman thin hial alawm. Ka nau ang tak takin ka en a, an chhungkaw dinhmun ka hria a. An harsa ve a, theihtawpin keipawh hian ka pui thin."

"Anih leh in pahnih hian in inkawmngeih fal deuh ngei ang tiraw?"

"Kawm ngeih bik pawh a awm lo, kan thianho hi chuan kan vai hian kan inkawmngeih deuh vek a. Sawi tak ang khan Valpuia hi chu ka nau ang tak taka ka en ania, engkimah kan duhsak thin."

"Anih a thih dan chungchangah hian sawi duh i nei em?"

"A rapthlak ka ti khawp mai, hetianga kan thianpa lo that mai duh tu hi chu hria ila chu ka chhuah hauh lovang." tiin a meng rum kher mai. "Rinhlelh deuh te i nei em?" tiin Nathana chuan a han zawt leh a. A ngawi deuh vung vung a, "Ka hrethiam lo, a thattu chu tupawh lo nise...Pu Dama te inbulah kher kher a that kha amak ka ti." tiin a chhang leh a.

"Nizanah a rawn bia che em?"

"Aih belo...duh chuan ka phone pawh hi check rawh u."

"Umm...angai love, kan ring che alawm. Kal phawt rawh nang chu, i thian dangte kan han kawm leh ange." tiin Nathana chuan a chhang a. Zohmingthanga chu a chhuak a, mi pahnih hi an rawn lut leh a. "In hming min han hrilh ula..." tiin Nathana chuan a han zawt leh a. A palian zawk chuan, "Ramliana ka nia, ka thianpa hi Jonas-a ania." tiin a lo chhang vat a.

"Anih nangni nizanah Valpuia'n a rawn bia che u em? In phone check thlap te in ngam em?" tiin a zawt leh a. Jonas-a zawk chuan, "Kei chu min rawn be lo, ka chiang khawp mai. Ka bialnu te inah ka leng char char a, a bak khawiah mah ka kal lo." a lo ti nghal zuah zuah a. "Keipawh min be lo, amah hrim hrim kha nizan kha chuan a reh khawp mai, zan tir atang tawh khan." Ramliana chuan a lo ti ve bawk a.

"Engtik nge in inbiak hnuhnun ber?"

"Nimin khan hna chu kan thawk ho tho va, tlai ah khan kan inthlah haw a, a bak chu ka be leh tawh lo, phone ah pawh.." Jonas-a chuan a han ti leh a. "Tlai dar 4:30 hi kan ban hun ber ania, niminah pawh khan dar 4:45 velah kan bang a. Dar 5:30 vel kha chuan zu lak puiah min rawn sawm a, mahse ka chhuak peih lovin ka hnial ta a nih kha. Chu chu kan inbiak hnuhnun ber chu animai, a bak kan inbe lo hrim hrim." Ramliana chuan a lo ti ve leh a.

Nathana chuan a lu a han bu nghauh nghauh va, "Rinhlelh in nei em? In zinga mite hi an ni thei mai angem?" tiin a han zawt leh a. "Han rinhlelh tur awm ang ka hre lo, Pu Dama te nupa lah nupa nem tak leh zaidam tak an ni a, an tih duh ka ring si lo." tiin Ramliana chuan a lo chhang leh a. "Keipawn ka ring lo, chubakah Pu Dama phei saw chu a dam thlup mai a, chutiang a tih duh ka ring lo a ni." tiin Jonas-a pawh chuan a lo tuihnih ve bawk a.

Chumite pahnih pawh chu kan chhuah tir leh ta a, pakhat chiah a bang ta. A rawn lut a, midang zawng aiin a tuar nat hmel a, a rilru a hah hmel hle bawk. Nathana pawh chuan chupa awmdan chu a danglam bik a ti a ni ngei ang, min rawn en leh zauh thin. Chutih rual erawh chuan a hmeltha phian a, a pian pawh a sek tawk fu mai.

A ngen hmel em em bawk a, a hmel en reng reng chuan a fel vak chu a rinawm loh hrim hrim. "Tunge i hming ve le?" tiin NAthana chuan a han zawt veleh a. "Zira." a ti hmuk mai. "I hmingpum min han hrilh teh." tiin a zawt nawn leh a. "Lalzirliana." a ti bung leh hmuk mai. Nathana nen chuan kan in en a, kan khi dun suk ringawt.

"Valpuia nen hian engtik atangin nge in inkawm?" tiin Nathana chuan a han zawt leh a. "A rei ve tawh..kum 4 liam ta vel khan aniang. Mahse kan pahnih hrim hrim hi chuan kan inhriatna a rei tawh, veng khat kan ni bawk a." tiin a chhang a, a tawng pah chuan a inhum ruh tun reng mai te chuan ngaih a ti tha lo bik riau mai.

"A thihdan chungchangah hian enge i sawi duh?"

Zira chu a thaw leh hak thin a, "Kan zingah a naupang ber a, a naupan ber vang hian a zuam bik anih ka ring." a ti ringawt a. NAthana nen chuan mak kan ti dun kher mai, "A zuam bik a? Tu chuan maw?" tiin ka lo zawt vat. "Tualthattu hian mawle...Valpuia thattu hian." tiin vin lek lek chuan min chhang a.

"Zira, enge i sawi awmzia hi? Tualthattu chu i hria tihna em ni?" tiin Nathana chuan a han zawt ve leh a. "Hre lo..hria ila in chhui angai nang." a ti leh deuh hmuk mai. Ka sa deuh zak hman a, mahse Nathana chuan min rawn signal vat a. "Anih rinhlelh i nei tihna em ni?" tiin a han zawt leh a. Mahse a lu a thing ringawt, "NEi silo...enge i sawi kha awmzia ni a?" tiin ka lo zawt ve leh a.

A thu tha ang sauh sauh va, "Kan thian ho hi min hrechiang tihna a nimai, min lo enthla reng tihna a ni. Tu emaw tak chu a ni, kan him lo...kan him lo takzet." a ti leh bul bul a, ngaih chu a tha tawh lo khawp mai. "Zira..hahdam teh. Engemaw chu i hria a ni tiraw...i awmdan atang khan a chiang vek ania." zaidam tak hian Nathana chuan a han ti a.

Mangan hmel tak hian a meng kual relh relh a, "HRiat ka nei lo...engmah ka hre lo." a ti leh tlat bawk si. "Mahse i awmdan hi a va dik si lo ve.." ka han ti ve leh a. Thinrim hmel tak hian min melh a, "Kan thianpa a tual thi a, ka rilru chu a hah ve chu a nih hi...ka hlauhthawn ang chiah a ni." ala ti ta deuh deuh va.

"Rinhlelh i nei bawk silo, mahse hetiang thil hi a thleng dawn tih hre lawk awm takin tunah i tawng leh bawk si a. Rinhlelh i neih chuan sawi rawh...hlau reng reng suh." NAthana chuan a han ti leh a. "Rinhlelh tur ka hre lo ka tih chu.." a lo ti hlur mai. "A nih chuan enge i buaina chu ni a?" tiin Nathana chuan a vin ve ta lek lek mai.

Zira chu a han thaw leh hak a, "KAn thian ho..kan thian ho hrim hrim hi a bitum a nih ka ring tlat." a han ti leh a. "A mimalin Valpuia kha tualthattu hian a hua pawh a ni thei asin, in thian ho a bitum kher lo thei asin." Nathana'n a lo tih chuan Zira chuan a lu a thing nasa mai. "Ka hlauthawng a ni, ka pu. Keichu ka hlauhtawng takzet, a mal te te in min that ngei ngei ang." a ti leh bul bul mai.

Nathana chuan Zira mitah tak chuan chiang tak hian a han en vang vang a, "Umm...anih chuan kal phawt teh, nangpawh." a ti ta daih mai. Zira chu a chhuak a, "Sir, a rinhlelhawm i ti ve lo em ni? A awmdan te kha, engemawni tak chu a hria ang mawle. I kal tir hma lutuk, la dawp leh deuh chu angaiin ka hria." ka han ti deuh chiam a.

NAthana chuan a lu a thing a, "A ngai lo...a ngeng ve deuh hrim hrim a nih kha. Tu emaw tal chu danglam bik an awm ziah alawm, thianho zinga pakhat an thih reng reng hian, ka rinhleh vang nilovin hei vang hi a nia ahma pawhin Valpuia thiante chungchang ka sawi chhuah leh thin." tiin min chhang a.

"Anih tihkhan i kal tir hlawm tawp dawn em ni? Keichu Zira kha ka ringhlel riau, a mitmeng te kha a dik lo hrim hrim. Tiang nen la dawp deuh angaiin ka hria, i ti ve lo em ni?" tiin ka han zawt leh a. "Amah kha enthlak deuh bik angai dawn tihna a nimai, an in awmna kha Danny-a'n a hre tho va, kan enthla zui dawnnia. HAwh teh, chhuak phawt teh ang." tiin min chhang a, kan inzui chhuak ta a.

*****************************

Station kawtah chuan an thian pali chuan an lo la ding thap hlawm mai, NAthana nen chuan kan va kal phei a, Inspector Danny-a pawh a awm ve bawk. "Rin aiin i va zo hma ve, Sir..i duh ang i zawt thei hlawm maw?" tiin a lo zawt a. "Zawt thei e...a tha thawkhat e." tiin a chhang a. Chutah Nathana bawk chuan tlangval ho chu a han en leh hlawm a, "Naktukah pawh hna thawk tur chuan in kal leh thei thovang a, mahse in kalna reng reng ah fimkhur hle ang che u." tiin a chah hlawm a, an haw darh ta hlawm a.

"Hmasawnna te a awm em?" tiin Danny-a bawk chuan a han zawt leh a. "Danny, an in i hre vek tiraw, an vai sawn?" tiin Nathana chuan a zawt let daih a. "Hre vek e, an inah ka kal thlap thlap hlawm alawm. KA la chhinchiah vek...ngati nge, Sir?" Danny-a chuan a lo ti vat a. "I naute hrilh la, an vai khan enthlak chu an ngai a ni. A bik takin Zira kha..ka kawm hnuhnun ber kha." tiin Nathana chuan a chhang a.

"Ngati nge, a rinhlelhawm deuh em ni?" Danny-a chuan a lo ti nghal hru mai. "Rinhlelhawm tih ah, a awmdan kha a danglam bik tlat. In lo enthla deuh bik dawnnia, an dinhmun a hlauhawm ve thei tho ania." tiin a chhang a. "Sir, zaninah khan Pu Dama te khan venhimna an duh thu an sawi kha, engtin nge ni dawn?" tiin ka lo zawt ve a.

Sana a en a, "Reiloteah khua a thim mai dawn a, chuvang chuan Aizawl lama haw leh chu a buaithlak tawh dawn tlat. Zaninah kei leh nangin Pu Dama te chu kan riah chilh mai dawn em ni...i thei angem?" tiin min zawt a. "Thei tehreng e...ka chhungte ka'n hrilh ve hrim hrim ange." tiin ka chhang a.

NAthana chuan DAnny-a chu a en a, "Tlangval ho kha...ka sawi ang khan i naute nen in lo enthla deuh dawnnia aw...a bikin Zira phei kha chu thlithlai ngun bik ang che u." tiin a chah nawn leh a. Pawisa tlem azawng chu a han pe leh a, tichuan kan kalsan ta a. Motor-ah chuan chuangin kan tlan leh vang vang a, "I ril a tam em? Chhunah lah engmah kan ei hman ta silova, Pu Dama te lah kha kan hrilh lawk silova, chaw min lo chhum kep awm silo nen.." tiin a nui suk a.

"Tam chu tam ve tho, mahse a tam em em lo. NAng i ril tam zawk em, Sir?"

"Tam ve deuh tho mai, hei tunah dar 5 a ri tep tawh a, tlai chaw ei ngai lovin kan in eipuar law law mai dawn mi?"

"Umm a pawi hleinem, i tih dan dan a nimai."

Nathana chu a han tlan chak leh deuh va, restaurant pakhat bulah chuan a ding a. "Tah hian ei mai ang aw.." tih pah chuan car atang chuan a chhuk a, ka zui ve nghal a. Fish curry leh roti ala chah ngei zui, vairama seilian tih takah a che vai raih raih khawp mai. Kei erawh chu nula senior chaw heh tih takah, plain rice leh vawksa chhum ngat ka han chah pek kha.

Kan ei pah chuan kan titi dun a, “Tualthattu hi rukruk duh vang pawh a ni thei tho mai, a chhan chu Valpuia wallet leh phone kha a la ve ve a, a ruk duh vangin a that a ni mai lo maw?” ka han ti deuh nuah nuah a. “Nih theihna lai chu a awm tho mai, mahse chu chauh chu a nilo chuan a ang ka ti...Zira awmdan atang khan.” tiin min chhang a.

“Zira ber kha keichu ka ringhlel a ni.” ka han ti leh a. “Tualthattu a nih i ring nge...thildang zawk?” nui vur vur chung chuan a lo ti a. “Tualthattu a nih chu ka ring lo, a lo ni thei tho bawk a. Ka tih zawk tak chu...nangpawn i hmuh ve vek kha, a men dan ker kur te kha, a rinhlelhawm riau mai.” tiin ka chhang a.

“Kan chhui mek alawm hei...engpawh nise, Pu Dama chu ka’n phone ange...an inah kan thleng dawn tih ka’n hrilh ange.” tih pah chuan a phone chu a phawrh a. Pu Dama bulah chuan zanina an ina kan riah ve tur thu te chu a hrilh a, Dama pawh chuan CCTV an vuah mek thute chu a rawn sawi ve bawk a.

REi vaklo an inbiak hnu chuan phone chu a dah a, “Ka zawhna ni ta ber chu eng ti turin nge Valpuia kha nizan khan Pu Dama te inah khan a phei tih hi a ni.” tiin a melh ngai chu a han melh vauh vauh a. “Tualthattu hian Dama te in bulah hian ava dah te hi a ni mai lo maw?” ka lo ti ve a. “Engvangin nge ava dah kher ang?” tiin min lo zawt let nghal.

“Ama thah a ni tih an hriat loh nan leh Pu Dama te nupa thil tih anga lan tir nan te pawh a ni ve thei tho asin.”

“Ni thei tho ve, mahse a nih loh ka rinna a tam zawk?”

“Engvangin maw?”

“Valpuia kha chutia cher chhe zawk zawk a ni lova, chutia a ruang sawn kual dawn phei chuan put ve nawlh angai dawn a. Mahse mi chak ve pangngai tak tan lo chuan Pu Dama te in kil khawr ve taka va dah phei kha chu a hautak ve ang, a hnuh a hnuh phei angai dawn chiang sa. Mahse inhnuhna hnuhma engmah a awm lova, chuvang chuan khalai hmun ngeiah khan thah a nih ka ring.”

“Tualthattu hi mipakhat chauh an nilo pawh a ni maithei asin, Sir.”

“Keipawh chu chu ka rilru ah a lo awm a, a ni thei ve tho mai.”

Kan han ngawi dun leh phawt a, Nathana chuan thingpui chu a han lem deuh khawlh a, “Nizanah Pu Dama ten engmah thawm an hre lo a nih chuan tualthattu hian thawm dim a thiam hle tihna a ni a, chuvang chuan mi namai a nih ka ring lo. Tin, thil pakhat awm thei bawk chu...Pu Dama te hian hmelma an nei anga, chumite thil tih pawh chu a ni thei bawk.” a rawn ti leh hlawl mai.

“Pu Dama te zawh an ngai dawn nih chu.” tiin ka lo chhang a. “ZAnkhua in kan awm ho dawn alawm mawle, han inzawt leh chiam ila a ni mai alawm.” tiin a khi suk a, kan zanriah ei pawh chu kan zo ta. Sana ka han en a, dar 6 a lo ri dawn tawh a. Motor ah chuan kan chuang dun leh a, Dama te in lamah chuan kan phei a.

****************************

Dama te in chu kan thleng a, “Chaw in ei tawh em...duh chuan kan chhum belh thei tho ania.” Hmingtei chuan polite tak hian min lo zawt nghal a. “Kan rawn ei tawh e...a ngai love.” tiin Nathana chuan a lo chhang a. “Kan la ei lova, hei kan lo ei dawn chiah a.” Dama chuan a lo ti ve leh a.

“Umm..ei rawh u, ei rawh u...sitting room ah sawn kan lo va thu ange.” tiin Nathana chuan a chhang a. An nupa chuan chaw chu an ei mawlh mawlh a, keini erawh sitting room lamah chuan kan lo titi thung a. “Sir, kan pahnih chauh chuan a tawk dawn em ni? Group anga thil ti pawh an lo ni thei a, police tlem azawng chu tel ve a tha lo maw?” tiin ka han zawt a.

A nui deuh suk a, “Chu..keimah chauh chu min ring chiah nange?” a han ti a. Ka inthlahrung ru angreng kher mai, “Ni chuang love....bulletproof vest takngial pawh kan keng silova.” tiin za lo tak chung chuan ka nui lui a. Nui sang hian, “Lungngai suh, ka motor hnungah ka dah vek tawh, Aizawl atanga kan chhuah dawn khan ka pack tel sa vek alawm.” tiin min chhang a, ka zak ru kher mai.

Dama te inchhung chu ka han enkual a, assam type mah nise a zau nuam kher mai. A thianghlim sar mai a, a ruk tak chuan sum an ngah phian ka han ring ve ngawt a. “I bialpa te i be zawk duh lawm ni?” a rawn ti leh deuh hlawl mai. Ka nui huk ringawt, “Aih...be duh love, a hun lo emai.” tiin ka chhang a, ka lai lek lek mai.

“I pistol vel i check tha tawh maw?” tiin min zawt leh a, ka lu ka bu nghat a. Hmingtei chu a rawn kal a, “Ka eikham chiah a, thleng vel saw ka han tifai leh lawk anga, in room tur pawh ka peih fel vek tawh ania.” a rawn ti a. Nathana nen chuan kan inen deuh haw a, “Room..ihh...khum khatah em ni min muttir i tum?” tiin NAthana chuan a zawt nghal.

“Aw...khum ruak hi pakhat chiah kan nei a, guest room pawh pakhat chiah kan nei a.” tiin Hmingtei chuan inthlahrun hmel tak hian a chhang a. Za lo tak chuan Nathana chu nui luiin, “A pawi chuang lova, mahse...ihh, inngaizawng pawh kan nilova, nupa pawh kan nilova thawk dun mai chauh kan nia. Chuvang chuan puan phah tur a awm chuan chhuatah ka mu mai anga, a theih angem?” tiin a han zawt leh a.

Hmingtei’n a chhan hma chuan, “Angai hleinem, keimah zawk chhuatah ka mu thei alawm.” inla polite fahran chuan ka lo ti vat. “Theih vek e, thleng sil zawh veleh ka han siam dawnnia, min lo nghak lawk rawh u.” tiin choka lamah chuan min pheisan leh ta a. A hnu reiloteah chuan Dama chu a lo phei veleh a, “Chaw chu in ei duh tawh lo tak tak maw?” a rawn ti a.

“Aw..kan puar tawh lutuk, kan lawm tho ve. Pu Dam, i CCTV ho chu i fit tha hlawm thei maw?” tiin Nathana chuan a lo zawt let a. “Aw...kawmthlang Pa Hruaia te pafa in pui a, reiloteah kan zo mai.” tiin Dama chuan a chhang a. “Anih khawi lai nge control room atan i hman?” tiin a zawt leh a.

“Ka room saw animai, ka room computer ah sawn ka fit hmiah mai. A bak room dang ruak kan nei silova, guest room khi a nimai a.” tiin a lo chhang leh a. Nathana chuan a lu a han bu nghauh nghauh va, “Anih chuan i roomah chuan kan chho lawk thei angem? A landan te pawh en a chakawm alawm, rem i tih chuan..” a han ti leh a.

“Remlohna a awm lo..min lo zui chho ru.” tiin a room lamah chuan min chhohpui a. A computer monitor atang chuan CCTV camera chu kan han en a, a fiah tha hlawm thawkhat chuan ka hria. “Tuna kan inah hi chuan hmun thumah ka vuah a, lehlam back-door ania, chuan helai hi kan kawngkapui bul chiah ania, chuan helai hi chu kan bathroom hnung ania. Chuan helai hi kan in sak thar lai mek, a pawnlam a ni bawk a.” tiin a han kawk kual dan dan a.

“I ti tha e....mahse in nupa roomah daih computer hi a awm bawk sia, in mut duh hunah ava nuam duh awmlo ve. Zankhua deuh thawin CCTV hi kan vil reng angai dawn sia, engtin nge kan tih ang aw..” NAthana chuan a han ti nuah nuah a. “A pawi lo, Ka pu. Keini chu min ngaihtuah suh, kan mut theih pawh ka ring bik lo, kan nu hi ala shock lutuk a...a la khur der der reng mai tunah pawh.” tiin Dama chuan a chhang a.

Nathana chu a han ngawi deuh vang vang a, “Enteh Dama, hei..in inbulah Valpuia ruang kha hmuh a ni a. Valpuia hi in ina rawn kal tum a nih i ring em? Ka sawi awmzia chu...nidangah amahin a rawn leng ngai em?” tiin a han zawt a. “Aih..an rawn leng ngai lo hrim hrim zawk. An hnathawh lai hian zun ram thiar tur hian an rawn lut animai, a bak chu pawn lamah hlir sawn kan inkawm ho thin.” tiin a chhang a.

“Anih tak chu...engpawh nise Office lam hnathawh tur te i nei em?”

“Aw..tlem chu ka nei, mahse computer hi chu a ngai lovang, laptop ah ka ti thei tho.”

“A that nasat chu...anih chuan hna chu han thawk phawt la, keini pawh kan han intifai ange.”

“Awle, ka pu...min rawn venghim thei chu kan lawm hle mai.”

Dama chuan min chhuah san a, keini pawh chu kan room lamah chuan kan phei a. Khum khata mudun tur chu nilo mah ila, Dika bulah chuan engmah ka sawi ngam lo. Eng ang pawhin Nathana hi a mi ngaihsan ni mahse, room khata mipa nena kan riak dun tur hi chu a thik lo thei dawn lo tih ka hria.

Chutih rual chuan Maxie hian hria se chu min kek hrep duh hial ang, mahse lohtheihlohna avang chauh va riak dun tur kan ni miau sia lawm le. NAthana chu a inbual hmasa a, guest room ah pawh chuan bathroom hrana awm thlap nia mawle, hausa ve pangngai tak chu an ni chiang alawm.

Mipa si ala inbual rei em em mai lehnghal, darkar chanve dawn lai zu inbual a mawle. A inbual zawh hnu chuan keipawh chu ka inbual fai ve a, tih tur em em pawh ala awm lo. Danny-a leh a naute chuan Valpuia thiante ho an vil mek thu pawh a khat tawk chuan an rawn report ve reng hlawm a, Kevin-a ai ngawt chuan Danny-a hi chu sum duh viau mahse a laktlak phian mai.

******************************

TO BE CONTINUE