WILD ZONE : SEASON 1 (Episode - 13) Written by : Aaron Malsawmdawngzuala THE MISSING CHILD - 1

********************

MAxie birthday a ni a, a kum 25-na tur chauh a lo la ni zui. Nathana lah 40+ a ni tawh a, han innei ta se an in upat hleih dawn lutuk ringawt. Mahse tute emaw sawi ang deuhvin, kum te chu number mai mai alawm an tih kha. Keipawh min sawm ve ngei a, nula awm ho zingah ka la upa ber zui.

Chaw te kan eikham hnu chuan cake te chu kan han zai leh a, kan vanglai min ti hre chhuak rum rum mai. Tunah zawng engtik nge kan birthday pawh kan hre tawh lo chu ania, Dika chu awm lo se ka theihnghlh fo tak tak in ka ring. SAwi tak ang khan Nathana leh MAxie hian tumah chhung leh khat an nei tawh lova, chuvang chuan hemi zan pawh hian kei leh Maxie thiante chauh hi birthday lawm pui tura lo kal thei te chu kan ni deuh mai.

Maxie thiante zawng zawng an haw tawh hnu chuan Nathana chuan haw ve ala phal tlat lo, la leng hrih turin min ti tlat mai a. Kan pathum chuan thukhawmin Maxie nen chuan kan titi bawrh bawrh a, Nathana erawh chuan TV a en thung. Chutia kan titi lai chuan, "Lawk, bengchheng lo lawk teh u." tiin Nathana chuan min rawn khap dun a.

TV chu kan han en ve a, news channel pakhatah chuan mibo an rawn puang tlat mai. "Lalchhandami kum 6, ITI Veng ami chu tukin dar 8 leh a chanve bawr vel atang khan chin hriat lohvin a bo hmak mai a, vawiin nilengin police ten an zawn hnuah pawh hmuh ala ni chuang lo a ni. Chhandami hian kawr eng fual a ha a, slipper senno bunin a chhungten an hmuh hnuhnun ber hian a sam a tawn a ni an ti bawk." tiin an rawn puang ta mai a.

Kan ngawi thap mai, "He case buaipui nghaltu, Police IG Pu Lalrinliana chuan media hmaah Lalchhandami hi damin an hmuh leh ngei tur thu te, kidnap a lo ni a nih chuan a kidnap tu pawh man chhuah ngei an tum thu leh a phu tawk hremna an pek ngei tur thu a sawi a ni." tiin Reporter bawk chuan a puan chhunzawm leh a.

Maxie chu a khi suk a, "Hna thar in nei dawn ava ang ve.." tiin Nathana nen chuan min melh dun a. Nathana chu a zi mar tial tial a, "Khaa..police an awm alawm. Keini duh duh huna lo va inrawlh ve theih ngawt a ni lo, Pitarte.." tiin a ner khum vak a. "An rawn pun leh thovang che u, nangni tluk an awm hleinem." tiin Maxie chuan min rawn melh zauh va.

Kan han titi leh deuh fe hnu chuan ka tho deuh thut a, "Keipawh ka'n haw tawh ange, ka puarin ka fan tha e..chuan, Maxie...Happy Birthday nawn mawlh mawlh aw.." ka han ti leh a. Maxie chu a ding a, "Umm..i lo kal thei a, ka lawm lutuk." tiin min kuah a. "Pawn thleng kan lo thlah ang che." tiin Nathana pawh chu a rawn ding chhuak ve a.

Pawn thleng chuan min thlah a, "Anih leh muttui phawt aw, tluang deuh khan i haw dawnnia." Nathana bawk chuan a han ti leh a. "Nia, fimkhur tak khan i khalh dawnnia. I thlen veleh lo sawi la, ka lo ngaichang reng dawnnia." MAxie chuan a lo ti ve bawk a. Nathana chu a khi suk a, 

"Ava over tak...chutiang thleng thleng a tul lo, i bialnu pawh a nih loh hi.." a lo ti hlur mai.

Ka nui chhuak huk ringawt, "Aww..enge? Kan ngaihtuah ve animai alaw, tiraw U Bella?" a la ti zui. "Awi, ka'n haw phawt ange....nakinah ka haw hunah in duhtawkin in inhau dawnnia." tiin ka nui huah huah a. Ka haw ve thei ta hram e, mahse ka rilru ah chuan news-a kan en, naupang bo ringawt a awm a, ka men rei phah phian lehnghal.

*************************

A tuk zing chaw ka eikham, ka ha ka nawh mek lai chuan ka phone a rawn ri a. Nathana a lo ni, "Hello Sir, enge ni ta?" tiin ka la nghal vat a. "Bella, nizana MAxie thusawi kha a thleng dik dawn a ang khawp mai." a rawn ti ringawt a. Ka bo kher mai, "Eng chu maw?" ka lo ti hu a. "Mibo kha...naupang bo kha..." a rawn ti leh a.

"News a mi kha maw?"

"AW ni e, Lalchhandami kha."

"Chu chu ngati nge?"

"A pi leh puten min rawn bia a, min hire an duh a nih chu...kan pahnih bawkin.."

Ka peih lo viau nangin ka lawm angreng khawp mai, a chhan chu naupang ka ngainat em avang chu thuhran nise, kha naupangte khan ka rilru a luah hneh em a ni. "Awle Sir, ka rawn phei nghal mai dawn em ni?" tiin ka zawt leh a. "A pawi miah lo, an inah kan va kal nghal dawnnia." tiin min chhang a.

"Awle Sir." tiin ka chhang a, phone chu kan dah ta a. Case thar kan neih apianga ka thil tih ngei ngei chu ka bialpa, Dika hi ka hrilh ve zel thin. Ka insiam hma chuan ka call a, min lo phur pui leh nghal khawp mai. Tichuan rang thei ang ber chuan ka insiam nghal sawk sawk a, case thar buaipui leh tur chuan Nathana apartment lam chu ka pan phei leh ta a.

**************************

Ka va thlen chuan pawnah min lo nghak der tawh mai, "Ehe Sir, ka va rawn tlai awm ve...min nghahna a rei tawh em?" inthlahrung tak chuan ka han ti a. A khi suk a, "A ho lutuk, tunah v akal nghal ila ka tih vang zawk ania pawnah ka lo awm mek ni." tiin min chhang a. "Anih chuan i car hian ami kan kal leh mai ang?" tiin ka zawt leh a.

"Aih, ka khalh peih lo. I scooty khan kal zawk ang, petrol chu ka thunsak mai ang che." a ti ta daih mai. "A ngai lo, petrol chu a tam alawm. Nangman khalh la, a awlsam zawk ang." ka han ti leh a. Min nuih deuh vur vur a, "I phal chiah maw?" a han ti deuh kher a. "Boss te tan chuan engpawh kan phal ang chu." tiin ka han nuihlet ve a.

Tichuan Chhandami pi leh pute inah chuan kan va kal ta a, assam type in niin hmuhsitna nilo se, in chhe ve tak chu a ni. Kawngka chu Nathana chuan a han kik dat dat a, putar pakhat hian a rawn hawng a. "Ka pu..Detective Nathana ka nia.." Nathana'n a sawi zawh hma hma chuan chu putar chuan, "Aw nangmahni maw, khawngaihin lo lut rawh u." a lo ti nghal bawrh bawrh mai.

Nathana nen chuan inchhungah chuan kan lut a, "Nu-i lo kal teh, hei detective te an lo thleng ania." tiin an nu chu a han au lauh lauh va. Room atang chuan a nupui, tar ve tawk tak mai chu a rawn chhuak a. "Hei hi ka nupui ania, Rami a nih hi. Chuan kei hi Lura ka nia, Chhandami pi leh pute kan nia...lo thu rawh u." tiin putar bawk chuan thutna te chu min kawh hmuh a.

Kan thu ho ta a, "Ka pu, Chhandami hian nu leh pate a la nei em?" tiin Nathana chuan a zawt a. "Nu chu ala nei a, mahse pa erawh a nei tawh lo." tiin Pu Lura chuan a chhang a. "A pa chu a thi tihna em ni?" tiin a zawt leh a. "Aw..Chhandami kum 1 a tlin hmain accident vangin a boral tawh a." tiin a chhang leh a.

"Anih leh anu chu khawnge a awm?" tiin ka lo zawt ve a. Pi Rami chuan, "An inah." a lo ti zawi sap mai. Nathana nen chuan an kan in en hu a, "An inah a? Anih chuan Chhandami nu chuan in hran a nei tihna maw? In awm ho lo tihna em ni?" tiin ka zawt leh a. "Aw, an indang daih tawh alawm." tiin Pi Rami bawk chuan min chhang leh a.

Nathana chu a han thu tha sauh sauh va, "Anih chuan tinge hetah min koh si a? Chhandami nu chu biak kan duh khawp mai, chuan in nupa chauh hian em ni hetah hian khawsa?" tiin a han zawt leh a. "Englo ania, Detective...Chhandami nu hming hi Teremi a nia, a pasal thih hnu khan a nun kha a buai chho ta vek a, a fanu hi a ngaihsak thlawt lova..tunah pawh a bo mek a, mahse a la rawn ngaihsak chuang lo reng reng." tiin Pu Lura chuan a chhang a.

"Kan nupa leh Teremi pasala nau, Rova nen, kan pathumin kan khawsa a. Rova erawh hna avangin vai ramah a zin daih bawk si a, nizan khan chanchin a hria a, a rawn haw mek." Pi Rami chuan a lo ti ve bawk a. "Engtia bo nge min han hrilh teh u." Nathana chuan a han ti leh a. "Heta a awm laiin ania.." tiin Pu Lura chuan min chhang ta mai a.

"Eng maw? Hetah maw? Anu bulah a awm lo tihna em ni?"

"Aw, anu hian a ngaihsak loh em avang hian kan khawngaih thin lutuk a. Mahse helama lak phei a remti duh thak bik silova, school pawh a kal tha ngai lova, zirtirtute complain kan dawng nasa thei khawp mai."

"Anih leh an nufa chauhvin em ni an khawsak?"

"Aw ni e, Chhandami chiah hi fa an la nei."

"Anih leh a bo dan tak chu han sawi teh u."

Pi Rami chuan a mittui hruk zeuh pah chuan, "Nizan hmasa khan anu zurui chuan kut a lo thlak a ni awm a, an thenawmten min rawn phone tawp a. Tichuan a zan a zanin a phal lo chung kan va la phei a, a thinrim khawp mai. Tichuan nimin zing dar 8 rik hma hret khan bazarah ka kal lawk angai a, kan pa lah huanah a lo lut daih bawk nen. Amahin ka kalh hnan a, ka chhuahsan ta a. Mahse ka let leh khan kawngka a lo inhawng huau a, Chhandami chu ka hmu ta miah lo a ni." tiin a chhang a.

"Kawngka chu tala in em ni i kalh?"

"Aih, ka vih kalh tawp."

Nathana chuan Pu Lura chu a en a, "Khawilai nge in huan chu...nimin zinga i kalna chu..a hla em?" tiin a han zawt leh a. "Hla lutuk lo, kan kawthlang lawk khu ania." tiin a lo chhang a. "Thawm engmah i hre lo em ni?" tiin a zawt leh a. "Aw ka pu, hla ka lo ngaithla a. Engmah ka hre lo, kan nu hian bawihtei a hmuh loh thu min rawn hrilh chawp zawk alawm." tiin a lo chhang ve leh a.

Nathana chuan a lu a han bu nghat nghat a, "Anih leh mihring chetna hnuhma awm ang te a awm em? Inchhung vel hi police ten an rawn check ngei anga, thil sawi te an nei em?" tiin a han zawt leh a. "Aih ka pu, mihring chetna awm ang emaw, thil chhia emaw, hnawk pawh engmah a awm lo." tiin Pi Rami chuan a lo chhang ve leh a.

Nathana chu a thaw deuh hak a, "Engpawh nise, Chhandami nu te inah chuan kan kal angai..biak ve kan duh a ni." a han ti a. "Awle, kan va kal dawnnia. Mahse ka pu, a mizia a tha lo lutuk a, a rui reng bawk si nen, chu chu kan sawilawk duh." inthlahrung tak chuan Pu Lura chuan a han ti leh a.

"Awle awle, khawi vengah nge an awm hrim hrim?" tiin Nathana chuan a han zawt leh a. "Kan vengah tho, ITI ah tho...mahse veng chung lamah ania." tiin a lo chhang leh a. "A tha e, tunah i kal nghal ang u." tiin Nathana chu a ding a. Tichuan ka scooty chuan kan inphur leh a, Pu Lura te nupa erawh an car in an inphur thung.

************************

Reiloteah chuan Teremi te in chu kan thleng thuai a, kawngka chu Pu Lura chuan a kik a. Mahse tuman an rawn hawng lo, inchhungah lah chuan TV chu ring em em hian a in play bawk a. "Terem, keimah..i pa...lo hawng vat teh." tiin Pu Lura chuan a han chum deuh bur bur a. Chutah a rawn hawng ta, Teremi chu mit sen rum leh sam pawr chhup hian a rawn chhuak a.

"Terem, hei hi Detective Nathana leh Detective BElla-i te an ni a, BAwihtei case chhuitu tur te an nih hi." Pi Rami chuan zaidam tak hian a han ti a. Rum deuh fe hian Teremi chuan Nathana nen chuan min han melh dun deuh ren rawn a, "Lo leng ru." ngaihsam hmel zet hian a ti a, a lut leh daih mai.

Inchhungah chuan kan lut ve leh a, hmeichhe tawp hmel zet leh hmelchhe ve hri hre tak mai hi a lo thu ve bawk. TV chu a ring em em mai lehnghal a, "Hei hi ka thiannu, ka bestfriend a nih hi." tiin an la nui dun tiah tiah zui a, a fanu bo chu ngaihsak lo ve tak chu a ni. "Ka pi, i fanu bo chungchangah hian rinhlelh deuh te i nei em?" tiin Nathana chuan a han zawt a.

Mahse Teremi chuan a ngaihsak lo kher mai, a thiannu chu a bia a be ringawt a. Pi Rami te nupa pawh chu an lo zah hmel kher mai, Nathana chu a thaw deuh hak a. Remote chu la in TV chu a off hmak mai, "Ka pi, khawngaihin ka thusawi ngaithla teh...i fanu a bo mek a nih hi." tiin Nathana chuan a han vin lek lek a.

Chutah rum zet hian Teremi chuan Nathana chu a melh a, "I duh leh a pi leh pu te kha zawt la ti nia, enge hetah in rawn kal? Ka phal lo chung hmanzanah min laksak lui a, an venghim zo leh si lo....engmah inrawlhna tur ka nei lo, engmah ka hre ve lo." a ti hmak mai. "Terem, i zak lawm ni? I fanu kum 6 mi lek kha i zurui in i vua a, a tap nasa lutuk thenawmte mangangin min rawn phone tawp a nih kha..engtin nge min puh theih?" tiin Pu Lura chuan a hau hrep mai.

Chutah Teremi mittui chu a tla zawih zawih mai a, a rawn ding deuh hluai mai. Vin tak hian, "Ka fanu a ni a, a sual a, thu a awih lo a nih chuan ka duh leh kut ka thlak ang, anu...a hringtu nu ngei ka nih hi. Pa tellovin kum 6 dawn lai ka enkawl tawh a, vawikhat pawh a bo tawh em ni? Nangni nupa vang vek zawk anih hi...ka fanu hi tunah hian ka ngaihtuah miah lo turah in ngai em ni?" tiin a vin let hrep mai.

Pu Lura chu a thaw deuh hak a, "Detective Nathan..khawngaihin helamah min lo zui phawt teh u." tiin choka lamah chuan a phei a, ngawi reng chuan kan zui ve mai bawk a. "Ka tihpalh khawp mai, mahse eng ang pawhin zawt mah ula a chapo lutuk, a chhang duh chuang lovang che u." inthlahrung tak chuan a han ti a.

Tah aw tuau hian Pi Rami chuan, "Ka tunu hi hmuhlet leh ngei ka duh...chu chu animai. Sum chu engzat pawh inchhiar rawh u, khawngaihin ka tunu hi min hmuhlet sak ula...pawisa pawh kan pe em em ang che u." tiin min ngen lawm lawm a, a khawngaihthlak khawp mai. NAthana chu a ngawi vang vang a, "Awle...phei leh phawt ang u." tih ringawt chuan a chhang a.

Chutih lai tak chuan kawngka chu a rawn inhawng ri rawk a, Police IG, Pu Lalrinliana leh police dang panga vel chu an rawn lut thut mai. Teremi chu a lo khi suk a, "Nangni bawk maw...niminah pawh min rawn dawp hrep ringawta, tunah detective chuti khati in rawn ti leh a, a tawpah in beidawn thu bak in sawi leh awm silo." a lo ti bul bul mai.

Pu Rinliana chuan Nathana chu a en vang vang a, "Detective NAthan Malsawmkima, Retired Police Officer...i ni tiraw?" a han ti charh charh a. "Aw ni e, Sir..Nathan Malsawmkima ngei chu ka ni e." tiin Nathana chuan a lo chhang a. "Hetah enge i tih? Chuan hei hi tunge?" tiin min kawk a. "Ka partner a nih hi." tiin Nathana chuan a chhang a.

"Sir, Detective BElla Lalmuankimi.." ka sawi zawh hma hma chuan Pu Rinliana chuan, "I hming ka zawt lo che...ka hre duh bawk hek lo. He case hi keima kutah a awm a, keima chhui tur a ni. Enge nangni hian hetah intih, Private DEtective in ni a nilawm ni?" min ti hrep mai. Pu Lura chu a rawn inrawlh vat a, "Ka pu, kan nupa hian Detective Nathana leh a partner Bella-i te hi kan ruai a ni." tiin a rawn sawifiah a.

Rum fe hian Pu Rinliana chuan a lo melh a, "Animaw? Anih chuan keini police te hi min ring vak lo tihna em ni? Detective te hi i ring zawk tihna em ni?" a han ti leh deuh kher a. "Chu...chutiang a nilo, ka pu..kan..kan mangang em a ni." Pu Lura chuan a ti bah deuh nuai mai. Nathana nen erawh kan la ngawi reng thung a, IG chu a ngawi vang vang mai.

A bula inspector pahnih te chu a en dun vang vang a, tichuan Nathana nen chuan min rawn en leh a. "A tha e, mibo chhungten an hire a nih che u chuan sawisel theih kan nei hleinem. Mahse sawi tak ang khan hei hi kan case a ni a, chuvang chuan kan vaia kan thawh ho a ngai. Hei hi Inspector Nicky-a leh Richard-a te an ni a, an pahnih hian an pui dawn che u a ni. Information zawng zawng in rawn report anga, chu chu thil kal dan tur ni rawh se." tiin in atang chuan a chhuak leh daih mai.

Police IG meuh ina khatia min han tawng khum chu ka zak kher mai, Inspector kan thawhpui tur pahnih te lah chu an chapo hmel em em mai lehnghal a, an mitmeng atang chuan inla fing chi, engvak ni mang silo an ni tih a hriat theih nghal. Nathana chuan IG chu a zui chhuak a, keipawh chu ka va chhuak ve nghal.

"IG Sir, khawngaihin min hrethiam lawk teh." Nathana chuan a han ti a, Pu Rinliana pawh chu a ding ve mai bawk. "Sir, ni e..thawh ho chu a tha teh meuh mai. Mahse keimahni pawh hian kan chingfel thei em em ang, assistant kan tam lutuk hian keimah ah phei chuan buaina a awm duh lutuk ania." a han ti a.

Pu Rinliana chu a rawn hawi let a, "Nathan, he naupang Chhandami bo atang khan darkar 24 chuang a liam leh der tawh asin, tunah hian a thi nge a dam pawh hriat va ni suh. Mawhphurhna lian tak i kovah a tla mek tih hria la, ka thusawi chu zawm mai rawh. Tunah pawh case buaipui tura lo kal kan ni a, mahse nangni inlo awm tawh si anih chuan ti tlang law law ula, ka naute pahnih hian an pui bawk ang che u, keichu inrawlhna tur ka nei tawh lo." tiin motorah chuan a chuang a, a tlan ta daih mai.

Pu Lura chu lo chhuakin, "A pawi ka ti khawp mai, police ho kha ka lo hrilh lawk hmasa lo a ni." inthlahrung tak chuan thupha a rawn chawi mawlh mawlh a. "A pawi love, ka pu...Teremi sawn khawiah emaw kal zin bikna deuh te a nei em? Anih loh pawn khawi ami nge zu a lak thin..in hre mial em?" tiin Nathana chuan a lo zawt daih a.

"Aw....Ralte Lounge bula bar ah khan a kal fo mai, nitin deuh thaw a kal thin a, a chang phei chuan Bawihtei pawh a hruai thin nghe nghe. Miin an sawi duh phian bawk a, min ti zak thei khawp mai. Ka fapa nupui a nih angin ka fanu ang chiahin ka en ve lo thei silova, amah vang hian kan nupa hian kan tap nasa thin asin." tiin Pu Lura chuan a chhang a.

"A tha e, anih chuan nangni pawh lo va haw leh phawt ula..Bella-i nen barah chuan kan va kal anga, kan thil hriat ang ang te kan rawn hrilh leh dawn che u nia." Nathana chuan a han ti a. An nupa chuan an haw leh ta phawt a, Teremi pawh chu kan biak chhunzawm ta lem lo. Nathana chu a thaw hak a, "Ka ning...police dang thawhpui hi..ka hne hluah hluah." a ti bul bul mai.

"An lo fel phian maithei asin." ka lo ti vat a. "Fel ringawt a ni lo, an chapo hmel si." a lo ti leh hlur a. Kan ngawi dun vang vang a, "Hawh teh, barah chuan i va kal phawt mai teh ang, kan chet zung zung a ngai." tih leh scooty ah chuan chuan a rual nghal a, ka chuang ve nghal a, bar lam pan chuan kan tlan phei ta a.

*************************

REiloteah chuan bar chu kan thleng thuai a, ka vawikhat kalna chauh ala ni. Engtin nge maw Nathana hian a hmun a lo hriat leh thawt thawt ni? Zawt mah ila, "Rinawma min hrilh ania." tih bakin min chhang leh dawn chuang lova, ka zawt peih lo law law. Bartender thau deuh mai hian phone a lo khawih mual mual a, a bulah chuan kan va thu a.

"Lo leng rawh u...enge in in duh ang?" a lo ti a. "Eng duh love..zawhna tlem zawh duh che kan nei a." tiin Nathana chuan a lo chhang a. Chuveleh bartender chu a meng dur nghal khup mai, "Police em ni in nih? Enteh u, he bar hi Sawrkar phalna thlapa siam kan ni a, zu man theihna dan engmah in nei lo, police pawh ni mah ula.." a lo ti nghal zuah zuah mai.

Nathana chu a khi suk a, "Chutiang lam a nilo, police pawh kan ni lo. Englo ania thianpa, Teremi a lo kal thin tiraw..ITI veng ami kha?" tiin a han zawt a. Melh pawh min melh loh chuan chu bartender chuan, "Intur in chah dawn lo anih chuan chhuak rawh u, Teremi ka hre ngai lo." a lo ti hmuk mai.

Nathana chu a thaw hak a, "Enge i in duh ang?" tiin min zawt ta daih mai. Ka ngawi vung vung a, "Beer a ni mai." tiin ka chhang a. "Beer no 2 aw.." Nathana chuan a han ti a. Bartender chuan beer chu a rawn la a, Nathana nen chuan kan in dun ta a. Kan ngawi dun reng a, chutah NAthana chuan bar a lo chawl ve mek, lukawlh pakhat chu a en vung vung a.

"Saw chu MAwitea ava ang ve.." a ti nuah nuah mai. Chu lukhawlh pawh chu a rawn hawi a, "Ehe...Nathan..nangmah i ni em?" a rawn ti ve ta nge nge a. "Mawite..nangmah tiraw?" tiin Nathana pawh chuan a lo zawt let a. "Aw ni e, i va vang ve.." tih pah chuan a rawn phei a. An han inchibai a, an titi dun nghal bawrh bawrh mai.

Kan pathum chuan dawhkan khat kan kil ho a, "Enge in rawn tih reng reng a, hei hi tunge, innu em ni?" tiin min kawk a. "Hehe, nilove..ka partner a nih hi. Englo ania, case pakhat buaipui kan nei a. Teremi i hre ngai em? Hemi barah pawh hian a lo kal fo ang." tiin Nathana chuan a han zawt let leh a.

"Hria e...a lo kal fo alawm."

"In inhmelhriat em?"

"Kan inhre lutuk lo...ngati nge?"

Nathana chuan Mawitea bulah chuan thil engkim chu a hrilh a, Teremi fanu bo thu te chu a hrilh bawk a. Mawitea chu a ngawi vang vang a, "A rawn kal ziah alawm, nizan hmasa pawh khan a rawn kal. A bialpa nen darkar hnih ngawt he barah hian an awm char char alawm, mahse a fanu erawh ka hmu miah lo." a han ti a.

"Tunge a bialpa hming chu?" tiin Nathana chuan a zawt leh a. "Lawmtea ania, kum 30 vela upa aniang." tiin a chhang a. Chutih lai chuan kil khat atang chuan palian ve tak pakhat hian, "MAwite, duh ai chuan i tawng hnem mah mah lo maw?" a rawn ti khur khur mai. Nathana chuan rum zet hian a melh a, "Enge ilo buai vak a? Duhleh a tawng hnem anga, nang i tawng tlem ziah tihna em ni?" tiin a vin hrep mai.

Chupa chu a pawr kher mai, "I va inla pa awm ve a, kan ti dawn mi?" a rawn ti khur khur a, ka thinphu a rang nghal kher mai. Nathana chu a ding a, "Lo kal la, enge kan tih dawn han sawi ve phawt la..." tiin a chhang leh a. Chupa chu thinrim hmel tak hian a rawn phei a, a thiante pawh chuan an rawn zui ve bawk.

Chutah Nathana chuan pistol chu a phawrh a, "Detective kan nih hi....case buaipui tura lo kal kan ni. A ngam chu rawn che ula, in thal nghal tawp tawp animai." a ti ta khur khur mai a, beer kha no 4 lai a in tawh bawk nen, a rui ve deuh niin a lang, ka boss Nathana hi...chung tlangval ho pawh chu an che zui ngam lo.

Nathana chu a pawt chhuak a, "Sir, a tih chi loh emai. Chhuak phawt ang, nakinah kan kawm tha leh mai dawnnia." tiin ka thleh hram hram a. "In ngam chuan kuttumin kan ching fel dawn mi? Khanglang hlawma, zurui mai mai lehnghal." tiin Nathana chuan a au zui vak vak a, ka nuih aza angreng kher mai, pakhat chu a hnek thluk hram kha.

NAthana chu ka khap dai thei ta hram a, a thinrim pawh a reh deuh ta. A phone a rawn ri a, "Ehe...number ringawt? Tunge maw ni le?" tih nuah nuah pah chuan a pick up a. "Hello, aw keimah Nathana...awle, kan lo kal ang." tiin phone chu a dah leh mai a. "Tunge ni a?" tiin ka lo zawt nghal vat a.

"Insepctor Richard-a ania...min puitu tur te kha...an awmna hmuna kal turin kei veteran Police retired hi min rawn tir anih chu mawle." tiin za lo tak chuan a nui suk a. "Khawiah nge an awm a?" tiin ka lo zawt leh a. "OMEGA restaurant ah...rinhlelh an nei a ni awm mange...va kal phawt mai ang." tiin min chhang a, kan va kal leh ta a.

******************************

Restaurant chu kan va thleng a, Inspector Richard-a leh Nicky-a te pawh chu an lo awm ngei a. An bulah chuan kan va thu a, kan han inhmelhriat leh te te phawt a. Tichuan Nicky-a zawk chuan thlalak pathum hi a rawn dahthla a, "Khangho kha kan suspect mek te chu an ni." a han ti a. THlalak chu kan han en a, kum 40-50 vel hmel vek an pu a.

Mipa pahnih leh hmeichhe pakhat, zu heh ve hmel tak an lo ni hlawm a. "Lalthanchama kum 44, Zolianzuala kum 47 leh Rebecca Zohmingmawii te an ni. An vai khan in khatah an awm vek a, Zorinzuala leh Rebecca-i te hi nupa niin an bulah Chamliana kha a awm ve a ni. Chama hian hman kumah case a lo nei tawh a, a u fanu kum 7 mi a lo pawngsual tawh a ni awm e." Richard-a zawk chuan a lo ti ve leh a.

"An vai hian drugs addict vek an ni a, Chhandami hi Lalthanchama hian a kidnap a nih theihna lai chin a awm bawk." Nicky-a chuan a lo ti veleh a. Nathana chu a ngawi vang vang a, "Teremi hian bialpa a nei a, a hming chu Lawmtea a ni. Hepa hi va hmu phawt ila, kawng a kaw deuh duak thei mai ang ka ring." a han ti a.

Richard-a leh Nicky-a te thiandun chu an inen hu a, "Lawmtea a? Teremi bialpa maw?" Nicky-a chuan a han ti deuh hu a. "Aw ni e, a kal thinna bar atangin kan rawn phei zo chiah alawm." tiin Nathana chuan a chhang a. "Anih chu, engpawh nise Teremi chu kan biak ve leh phawt angai a ni." tih pah chuan Richard-a chuan sana a han en a.

"Tunah dar 11 leh a chanve a ni a, dar 1 ah Teremi te inbula lu mehna dawrah khan kan innghak khawm dawnnia." amah bawk chuan a han ti leh a. "Awle, ni rawh se." tiin Nathana chu a khi deuh suk a. An pahnih chuan restaurant chu an chhuahsan a, "Mi tu emaw hmuh lawk tur kan nei." Nathana chuan a ti deuh thut a.

"Tumaw?" tiin ka lo zawt nghal a. "Ka thianpa ania, drug dealer thin a nia, amah atangin engemaw chu kan hriat belh em em ang, a customer hlun te kan zawt anga." tiin min chhang a. Ka nui huk mai, "Drug dealer thian i nei amaw? Nang hi changtupa nge i nih misualpa?" tiin ka zawt fiam a.

Min nuih suk a, "A pahnihin, haha..tak tak ana, tiang mite hi hmelhriat an pawimawh ve ania, an tangkai lutuk." tiin min chhang a. "Um..mahse police dangten min hmu ange aw..min ringhlel vel ange?" tiin ka han khi leh suk a. "Lungngai suh, ka awm alawm." tiin min chhang a. Scooty ah chuan kan inphur leh a, drug dealer te in lam pan chuan kan tlan leh ta a.

**************************

Nathana thianpa te in chu kan thleng a, Nathana chuan kawngka a han kik dat dat a. Thau lampang, la naupan hmel tak hian a rawn hawng a. "Ehe, Nathan...teh hlawl che chuan, lo lut rawh." tiin a lo nuih sang a. "I dam maw, Bobby..inhmuhlohna a va rei ta ve.." tiin Nathana chuan a chhang a, inchhungah chuan kan lut a.

Kan han thu khawm a, "Enge i duh ve teh mial a, chuan hei hi khawilam chicks nge?" tiin min han nuih suk a. Nathana chuan nui chung hian, "Khatin ti suh...detective a nih hi." a han ti chiah chu Bobby-a chu a inthlahrun hmel kher mai. "Ka tihpalh lutuk...ka fiamthu mai mai a nih kha." tiin thupha a chawi nghal char char a.

"A ho lutuk." ka lo ti vat a, ka khawngaih letling zawk. Nathana chuan suspect te pathum thlalak chu dawhkanah chuan a han tlar phei a, "Hemite hi i hre ngai em? An rawn dawr tawh che em?" tiin a han zawt a. Bobby-a chuan a han en vang vang a, "Ka la hmu ngai hauh lo." tiin a lo chhang a.

"Anih leh Teremi tih hmingpu emaw, Lawmtea tih hmingpu..customer hlun ve tak, an awm mial em?" tiin a zawt leh a. Bobby-a chu a han inngaihtuah vang vang a, "Ngawiteh...Lawmtea i tih takah chuan ka sumdawnna a ka hmelma lian ber, vai Suresh-a..drug lord ve tho kha, khapa hnuaiah khan a thawk thin." tiin a chhang a.

"A address i hria em?"

"Hria e."

"Khawngaihin min hrilh thei angem?"

Bobby-a chu a ngawi deuh vang vang a, "Hrilh thei tho ve, mahse an fimkhur ve lutuk ania aw. In kal a nih pawhin fimkhur ula, pistol an kawl maithei bawk." a han ti a. "Awle, kan fimkhur dawn alawm." tiin Nathana chuan a chhang a. Tichuan address chu min pe a, Nathana nen chuan Suresh-a address lam pan chuan kan inphur phei leh ta a.

****************************

TO BE CONTINUE