WILD ZONE : SEASON 1 (Episode - 10) Written by : Aaron Malsawmdawngzuala THE UNKNOWN KILLER - 4

 WILD ZONE : SEASON 1

(Episode - 10)

Written by : Aaron Malsawmdawngzuala

THE UNKNOWN KILLER - 4

************************

Ka harh chuan khua a lo var vek tawh a, sana ka han en chu dar 9 a lo ri der tawh mai. Chhuat lam chu ka zu melh a, Nathana chu a lo tho daih tawh a ni ngei ang, a awm hauh lo. Ka inphih fai a, tichuan inhnuai lamah chuan ka chhuk ve ta nghal a. Hmingtei chuan rawng a lo bawl mawlh mawlh a, "I lo tho thei maw? I mutui em?" tiin min hmuh veleh chuan min lo zawt nghal a.

"Mutui khawp mai, chaw min lo eisan vek em ni?" tiin ka han zawt ve leh a. "Aw...kan lo ei hman tawh a. Mahse Pu Nathana chuan ala ei lo, a lo nghak che a." tiin min chhang a. A hmeichhia zawk leh hliam tuar lo zawk pawh chaw ei tura nghah ka ngai chu a nia, a inthlahrun awm duh khawp mai.

"Tunah khawnge amah a awm a?" ka han ti leh a. "Pawnah sawn police duty te ho nen an awm, chaw i ei nghal duh em ni?" a lo ti vat a. "Aih..ala ngai hrih lo, ka va chhuak phei ve ange." tiin ka chhang a. Pawnah chuan ka va chhuak a, NAthana chu police duty tlaivar te nen chuan thingpui an lo in ho va.

"Good Morning, Sir." tiin inthlahrung tak chuan ka va nuih tlawn vel a. Min hmuh veleh chuan a lo nui sang a, "Good morning...I mu tui maw? Chaw eiah ka lo nghak che a, i ril a tam tawh viau tawh ang a?" a lo ti nghal a. "Aih tam love..min lo nghak duh kher a nih kha...min kaih thawh mai tur alawm." tiin ka lo chhang a.

"A ho lutuk, inthlahrung suh. Chaw kan ei nghal mai dawn em ni?" a han ti leh a. "A pawi chuang hleinem." tiin ka chhang a. Inchhung lamah chuan kan inzui lut a, "Pi Hmingte, chaw chu kan lo ei ang chu.." Nathana chuan a han ti a, Hmingtei chuan chaw ei chu min siam sak dun nghal vat a. Chaw ei pawh a tui khawp mai, a hma zanah ka hah bawk a.

*******************

Chaw ei pah chuan kan titi dun a, "Nizan khan Danny-a nauten an zawng zui leh a, mahse chanchin lawmawm engmah a awm lo a nih chu. Vawiin chu midang ho zawng kha kan biak leh angai dawn bawk a, Zira chhungte kan biak a ngai bawk." tiin vawiin lama kan hnathawh turte chu min hrilh zung zung a.

"Sir, ka ngaihdan chuan na deuh hlekin dawp hlawm ila, engemaw tal chu kan hriat belh theih ka ring."

"Nia..a ngai a ni. I bula Zira thusawi mawlh mai khan ka rilru a luah hneh khawp mai, tinge tualthattu a hre reng si kha a sawi ngam mai loh le?"

"Jail tan ka duh lo tiin a tap deuh tuau bawk a, he tualthattu chungah hian eng thil emaw tak chu an thian ho hian an ti a ni. Tualthattu hi serial killer nilovin phuba lak duh vanga tual that a ang ta riau mai ka ti, i ti ve em?"

"Ti ve tho ve, a ni thei tho mai. A nih loh pawhin an thian zinga mi tho ani anga, tuna mite zing ami nilo, veng danga mi te pawh an ni thei tho asin."

"Vengdang ami an nih kher pawh a ngai lo, an venga mi tho pawh hi a ni thei. Chumi hre tur chuan an thian ho hi a dawpa kan dawp tak tak angai dawn, hriat an nei alawm. Chu chu ka chiang a ni, an thuruk hi puan tir an ngai."

Chaw chu kan ei kham a, tichuan chhuak tur chuan kan insiam leh ta a. Kan mamawh te kan pai fel hnu chuan Hmingtei bulah chuan, "Police te hi an awm reng dawn a, mamawh i nei a nih pawhin an mahni vek hi i lei tir dawnnia." tiin NAthana chuan a hrilh a. Kan chhuak ta a, police duty te ho pawh chu duty tha turin kan chah nawn leh bawk.

**********************

A hmasa berah chuan Station ah chuan kan va kal leh ta phawt a, "Good Morning, boss te u...in mu tha thei maw?" Danny-a chuan a lo ti nghal a. "Kan mu tha thei anih hmel e." tiin Nathana chuan min la nuih suk zui, ka zak reuh kher mai. "Post Mortem result a lo thleng tawh em?" tiin NAthana bawk chuan a han zawt leh a.

"Aw thleng tawh e, saw lamah sawn va phei ila, Dr. Zuala pawh a awm e." tiin Danny-a chuan a lo chhang a. Kan pathum chuan kan inzui phei a, Dr. Zuala chuan file vel chu a lo enfiah mek a. "Doctor, report chu han pe la." Nathana chuan a han ti a. File pek pah chuan Doctor chuan, "REport danglam vak pawh a awm lo, a hnungzangah khan vawi 3 a vit a, a dulah vawi khat." tiin a lo chhang a.

NAthana nen chuan file chhunga thlalak thenkhat te chu kan han en dun a, "Valpuia thattu tho kha a ni tih a chianna chu that satliah a ni lo, na thei ang berin a tuar tir a ni. A dulah khan vawi khat a vit hmasa a, chumi hnu second 10 vel hnuah a hnungah hian vawi 3 a zawnin a vit leh a ni." doctor bawk chuan a han ti leh a.

"Chemte kha a bur vu kha ania, kha kha a vawithum naah a vit tlum nge ni a, vawi thum a vih zawh hnu khan i vit bur leh?" tiin Nathana chuan a han zawt a. "Vawithum naah a vit bur, mahse tlem chu a phawi hman ang, inches chanve vel." tiin doctor chuan a chhang a. "Zawhna ber chu, he tualthattu hi tunge a nih ang le?" Danny-a chuan a lo ti nuah nuah mai.

"CCTV ah khan engmah dang a lang lova, Zira kan um hnuah khan kan hloh kha a ni a. Mahse CCTV-a lo lang leh hmasa ber chu kha tualthattu khan Zira ruang kha a hnunga chemte bur vu chungin a rawn pu phei leh kha a ni a, gate bulah tak a dah bawk." ka lo ti a. "Tualthattu hi Pu Dama te nen hian an inhre ve pawh a ni thei tho mai, an hmelma pawh a ni thei." Nathana chuan a han ti a.

"Pu Dama te ina a dah kher nachhan hi keimah ah bik chuan chhan chi hrang hrang pathum a awm a, pakhatnaah chuan Pu Dama te hi tih mualpho va, tualthattu anga lantir a tum tihna a ni. A pahnihna ah chuan Pu Dama te tana ti a ni thei bawk, Pu Dama te chungah hian thil tha lo engemaw tak an tih avangin a hrem sak te pawh a ni thei tho bawk." Doctor chuan a lo ti ve a.

"Anih a pathumna chu enge?" tiin Danny-a chuan a lo zawt vat. Doctor chu a han ngawi vung vung a, "A pathumna chu Pu Dama te ina hnathawk tho, heng thianho zinga mi hi an ni thei." tiin a chhang a. "Engpawh chu a chhan lo nise, he tualthattu hian Pu Dama te hi a hre chiang hle a ni. He tualthahna leh Pu Dama te nupa hian inzawmna an nei tho, ka sawi awmzia chu in man thiam em?" Nathana chuan a han ti leh a.

"I sawi dik chiah, Sir. Nilo se chu tinge Pu Dama te inah kher ruang kha ava dah zel ang ni?" Danny-a chuan a lo ti vat a. "Zira chhungte in be tawh em?" tiin Nathana chuan DAnny-a chu a han zawt a. "Be tawh e, mahse nangman a aia chianga i kawm duh ka ring a, ka kawm rei lo." tiin a lo chhang a.

"Eng eng nge i zawh?"

"Nizanah a chhuah lai in hria em ka tia, kan mu hma thei lutuk a, a chhuah lai pawh kan lo hre lo tiin min chhang a."

"Umm..engpawh chu nise, Bella-i nen hian kan va kal ve phawt ange. Chuan midang pathumte kha lo ko khawm leh la, kan rawn let leh vat dawnnia." tiin Nathana chuan a hrilh a. "Awle, Sir. Ka lo phone leh vat ang che, theihtawp ka lo chhuah ang." tiin Danny-a chuan a chhang a. Nathana nen chuan station atang chuan kan chhuak a, Zira te in lam chu kan pan ta a.

********************

Kan va thlen chuan ruang chu a lo thleng ve deuh chiah a, an lo zawn thla mek a. Mipui pawh an lo tam tawh khawp mai, tlangval tlawmngaite chuan thutthleng an lo rem sap sap hlawm bawk a. Inchhungah chuan NAthana nen chuan kan inzui lut a, patling pakhat hian min rawn pan nghal a. "Detective te kha in ni ang maw?" tiin min lo zawt a.

"Aw ni e, Nathan Malsawmkima ka nia..hei hi ka thiannu, Bella Lalmuankimi a nih hi." tiin Nathana chuan a chhang a, kan chibai dun a. "Zira pa ka nia, Lura ka ni e." tiin a hming te chu a han sawi thlap a. "Anih chu mawle..khawnge anu hi a awm?" tiin Nathana chuan a zawt leh a. "A tap bang hleithei lova, room ah an buaipui mek." tiin Pu Zira chuan a chhang leh a.

"Ava zialo ve aw...anih chuan hmun fal deuh hlek ah kan inkawm hrang lawk dawn em ni?" Nathana chuan a han ti leh a. "Awle...pawn verandah lamah sawn min lo zui ru." tiin a kal phei a, kan zui dun a. VErandah-ah chuan kan awm a, an nei zau phian lehnghal. An in en chuan chuti lutuk a rethei pawh an ang lo, assam type tho mah nise zau nuam tak a ni.

"Ka pu, i fapa hi nizanah a chhuah lai i hria em?"

"Aih hre miah lo, tukin zing dar 2 vel, khua pawh ala thim vek lai khan phone call ka dawng a, a thih thu min rawn hrilh kha ania, chuzawng chu a nimai."

"Thawm pawh engmah in hre lo maw?"

"Aw hre miah lo, kan mu hma thei hrim hrim a."

"Anih leh nizan khan dar engzatah nge in mut?"

"DAr 8 leh a chanve a rik tawh hi chuan kan mu deuh vek zel."

"Nizan khan Zira kha dar 10 leh a chanve velah a rawn chhuak a, chutih lai chuan ila meng em?"

"Aih meng tawh lovang, ka mu kha ka muhil nghal a ni deuh ber mai."

"Anih leh innu?"

"Ani phei chu kei aiin a muhil hmasa zawk."

Nathana chuan a lu a bu nghauh nghauh va, "Anih tak chu...a nih leh Zira hian pianpui unau a nei em?" tiin a han zawt leh a. "Aw nei ve e, nau hmeichhia a nei a, a chhang chiah a nia. An pahnih chauh hi kan fa neih chhunte chu an nia. MAhse a u zawk hian nikum khan pasal a nei tawh a, kan nau hi a ni leh mai." tiin a chhang a.

"Tu in nau maw?" ka lo ti vat a. "Ka unaupa fanu te ber hi min pui turin kan bulah a rawn awm a, Loisy-i'n pasal a neih atang khan kan buai ve thei lutuk a. Kan nupa lah kan lo tar ve tawh sia, kan nu a hrisello bawk nen. HElamah lo awm mai se tiin ka u fanu te ber hi kan la phei ringawt alawm, heta tangin school a kal thin a." tiin Pu Lura chuan a chhang leh a.

"Loisy i tih chu..Zira u tihna aniang maw?" ka lo ti leh aa, Pu Lura chuan a lu a bu nghat a. "Anih leh in nau chu enge a hming, kum engzat nge?" tiin Nathana chuan a han zawt leh a. "Remremi a nia, kum 15 a pumhlum deuh chiah a, pawl 9 a zir mek." tiin a chhang leh a. "Anih ka pu, Zira hian hmelma a neih awm i hria em, amah lo haw viautu te hi an awm i hria em?" tiin a zawt leh a.

"A neih awm ka hre lo chutiang, tlangval fel tak chu a ni lem lo. Zep lo chuan hmanni lawka thi ta, VAlpuia te inah khan zantin deuh thaw hian an thian zaho hian an lengkhawm a, zu an ina. Ka hre vek, mahse inchhungah a hnawksak lova, buaina a siam ngai lem lova, chutin ka hau vak ngai lo." tiin a chhang leh a.

"Bialnu a nei em?"

"Nei lo..tun hnaiah tak hi chuan a neih awm ka hre lo."

"Nimin khan an thianza ho hian kan kawm hlawm a, in fapa Zira hi a awmdan a danglam bik lutuk a."

"Danglam a? Engtia danglamin?" Pu Lura chu a meng phawk deuh hru mai. "Danglam han tihah..midang kha chuan pangngai takin min chhang mai a. Mahse Zira kha chuan engemaw hriat a nei a ni, ka pu. Nizan pawh khan hei ka thiannu nen hian an lo inchapchar hman a, tualthattu hi a hria niin a lang." tiin Nathana chuan a chhang leh a.

Pu Lura chu a inngaihtuah vung vung a, "Ka fapa in tualthattu a hria amaw?" a ti nuah nuah mai. "Aw..nizan khan kan SI pakhat nen an insual a, pocket knife hmangin a zai hliam a. Mahse a tlanchhe lehnghal a, Sir Nathana leh kan thawhpui Danny-a te khan an um nghal a. Chutih chhung chuan SI chu ka buaipui a, a rawn let leh a. Silaiin min rawn tin a, tah chuan tualthattu a hriat thu a sawi a ni.” ka lo ti ve a.

“Anih chuan a sawi mai lo em ni?”

“SAwi nise chu tualthattu hi kan man daih tawh ang chu, ka pu. I fapa khan tualthattu a hre ngei a, amah pawhin a hriat thu a sawi bawk. Mahse a hming a sawi ngam lo, jail ka tang duh lo, jail tan ka hlau tiin Bella-i hi a chhang a ni.” tiin Nathana chuan a chhang a. Pu Lura chuan a lu a dawm vawng vawng a, “Ka fapa leh...a rukin hlauthawng takin i lo awm a ni tih tinge i pa hi min hrilh loh?” tiin a mittui a tla zawih zawih mai.

“Pu Lur, Zira hi a mizia a danglam thin em?” tiin NAthana chuan a zawt leh a. “Engtia danglam in?” tiin a lo zawt let a. “Ka sawi awmzia chu tunhnai deuh khan amah ah diklohna te a awm em? Han ngaihtuah let vang vang teh, a chhan chu amah kha a dik tlat lo ani tih kan hmu thei a ni keini chuan.” tiin NAthana chuan a han zawt nawn leh a.

Pu Lura chu a han ngawi leh vang vang a, “I sawi takah chuan Pu Dama te ina an thawh atanga ni kar khatna velah khan zu hi a rawn rui haw ziah mai a, mahse a hnathawk hah a in ve mai mai a nih ka ring a, ka hau lutuk lem lo. Mahse a thinchhe em em a, engemaw hlekah khan a vin deuh hlur zel.” tiin a chhang a.

“Anih chuan hlauhthawn rukna engemaw tak chu a nei a nih chiah chu....anih leh in bulah engmah chutiang rilru hahna a neih a sawi ngai miah lo em ni?”

“Aw..engmah a sawi ngai lo. Sawi tak ang khan zu hi a in ve reng zel a, mahse khaw en lai hi chuan a nam ka hre ngai lo. Nichina ka sawi ang khan Pu Dama te ina an thawh hnu khan ni 2-3 vel kha chu zu nam miah lovin, pangngai deuhvin a rawn haw ziah a. Mahse a hnu reiltoeah khan a rawn nam haw ta ziah a, ngaih that lohna em em pawh ka lo nei ngai lova.”

“Anih tak chu...abak thildang engemaw rinhlelh awm deuh tur hriat ila nei em?”

“Aih ka pu, chubak engmah hriat ka nei lo.”

“Anih han chhuah vah te a nei em? Hnathawk an chawlh lai velin?”

“A neih pawh ka hre lo...hna a thawh loh chuan inah a awm deuh chawt reng.”

Chutia kan titi lai chuan nu pakhat hi a rawn kal a, “Kar hmasa inrinni kha an chawlh lai a ni a, kha tah khan an thian za ho khan sava vehin an kal a. Pu Dama pawh an hruai ve tur thu a sawi a, chu chu hnathawh chawlh laia a chhuah chu a ni mai.” a rawn ti a. Chunu chu a mit a bui vek a, a tap zo chiah tih a hriat hle.

Chuveleh Pu Lura chuan, “A ni tak maw khah..ka lo theihnghilh daih alawm. Pu Nathan, hei hi kan nu a nih hi..” tiin min inhmelhriat tir nghal a. “Detective NAthan..” tiin NAthana chuan a chibai a. “DEtective BElla.” tiin keipawh chuan ka lo chibau ve bawk a. “Mawii ka nia, chibai ule.” tiin min lo chhang ve nghal bawk a.

“Pi MAwi, Zira te chu chumi ni chuan an vaiin em ni an kal?” tiin Nathana chuan a zawt leh a. “Aw...a sawi dan kha chuan ania.” tiin a chhang a. “Chuan Pu Dama chu an hruai ve a?” tiin a zawt leh a. “Aw...Pu Dama hovin kan kal dawn a ti a.” tiin a chhang leh a. “Anih leh a lo haw in amah ah danglamna a awm em?” tiin a zawt leh a.

“A lo haw chuan ka awm lo, kan pa nen kan chhuak daih a. Mi inah chaw kan ei a, kan haw chuan a lo leng leh daih tawh.”

“Anih leh chumi hnu vel chuan a danglam em?”

“Aih danglam vak pawh ka hre lo, amah hi kan hmukhat hrim hrim a.”

“Anih leh chumi ni chuan tunge in lo nghak?”

“Kan nau Remremi saw a nimai.”

“Sawi a nei em?”

“Aih engmah sawi a nei lo.”

“Kan hmu lawk thei angem? Va ko lawk ta che..”

“Thei tehreng e, ka va ko ange.” tiin Pi Mawii chu a kal ta a. “Pu Lur, Zira rawn ruih haw ziah i tih kha....a diklo anga i hriat lai vel kha sava veh a an chhuah hnu nge an chhuah hma?” tiin NAthana chuan a zawt leh a. “Chumi hnu daih chu a ni, ka pu. Sava veh-a an chhuah kha chuan Pu Dama te inah khan ni 2 vel bak an la thawk lo.” tiin a chhang a.

Pi MAwii leh Remremi chu an rawn kal a, “Hei hi ania, Remremi chu..” tiin Pi Mawii chuan min rawn inhmelhriat tir a. “Remrem, sava veh a i u Zira te an chhuah ni kha ila hria em?” tiin Nathana chuan a han zawt a. “Hria e.” tih ringawt chuan a chhang a. “Anih leh a lo haw laiin inah i awm em?” tiin a zawt leh a.

“Aw awm e.”

“A hmel ah danglamna eng engmaw a awm em?”

“A awm awm pawh ka hre lo, mahse zu a nam tih erawh ka hria. A rui deuh va, chuvang chuan ka be ngam chiah lova.”

“Anih leh engemaw sawi a nei em?”

“Khawnge ka nu te an awm tiin min zawt a, chaw an eih chhuah thu ka sawi a. Chuzawng chu a nimai, chaw pawh a ei lo chumi tlai chuan. Keimahin ka ei a, roomah a tawm nghal char char.”

“Anih a hnuah a leng chhuak em?”

“Aw..Pa Lura te lo haw hma deuh chiah khan a chhuak lehnghal.”

“Awle kan lawm e, i kal thei e.” Nathana chuan a ti a, Remremi chu ka kal leh ta a. Nathana phone chu a rawn ri a, Inspector Danny-a a lo ni. “Sir, midang pathumte chu Station ah an awm tawh e.” a rawn ti a. “Awle, kan lo kal nghal ange.” tiin Nathana chuan a chhang a, phone chu a dah a.

“Kan lo kal leh dawnnia, chuan khawngaih takin fimkhur ula, pawnah chhuak hnem suh ang che u. Engtik lai pawha biak theih tur khan lo awm ula, in fapa thattu hi kan chhuichhuak ngei ang.” tiin NAthana chuan an nupa chuan a hrilh a. Tichuan Zira te in chu kan chhuahsan a, Station lam pan chuan kan let leh ta a.

************************

Station chu kan thleng a, “In lo thleng maw, Sir? Sawtah interrogation roomah kan dah a, duh chuan tunah pawh an hmuh theih nghal ang.” Danny-a chuan a lo ti leh zung zung mai, he inspector han tangkai reuh zia hi chu, ka star mai dawnin ka hria. Mahse NAthana chuan, "Tikhan lo awm hrih rawh se..nakin deuhah kan kawm dawn nia." tiin a chhang daih mai.

"NGati nge, Sir?" tiin ka lo zawt vat a. Nathana chuan min en a, "Bella, Dama te nupa ko phei teh, stationah hian." a ti daih mai. "Engatan maw?" tiin ka han zawt leh a. "Sava an veh ni atang khan a mizia a dik loh thu a sawi a, Zira pa Pu Lura khan..keichu khami ni khan engemaw a thleng a nih ka ring tlat." tiin Nathana chuan min chhang a.

"Mahse Dama te chu office a kal daih awm sia?" ka lo ti leh a. "A hna ai chuan an nupa nunna a pawimawh zawk, saw mite thian ho saw chu tisawn lo la awm hrih se. Dama te nupa hi hetah lo phei ve se, a huhovin i kawm zawk ang u." tiin min chhang leh a. Chuveleh DAnny-a chuan, "Ka kutah dah rawh, Sir." a rawn ti nghal vat a.

"Umm a nih chuan Danny, nangin Hmingtei lo va lam la, i naute pathum hruai nghal bawk ang che. Tlaivara duty te kha an chau tawh lutuk ang, va thlak nghal rawh se. Tichuan i naute dang ho Dama hnathawhna office ah va kal se, Dama chu rawn hruai ve leh rawh se." tiin NAthana chuan a hrilh a.

"Awle Sir, ka lo buaipui nghal ange." tiin Danny-a chuan a chhang a, a naute chu ko khawmin an chhuak ta a. "A hmawr kan bawk hnaih i ring tawh em, Sir?" tiin Nathana chu ka zawt a. "Ka la sawi thei mai lo, Dama te hi lo thleng phawt mai se, kan la hria ang chu." tiin Nathana chuan min chhang a.

****************************

DArkar khat a liam leh chuan Dama te nupa pawh chu an lo thleng ta a, Danny-a chuan Hmintei leh Dama chu a rawn phei pui a. "Enge ni ta, ka pu? Tualthattu chu in chhuichhuak tawh em ni?" tiin Dama chuan a rawn zawt nghal. "La chhui chhuak chiah love, zawhna tlem zawh ve che u kan duh vangin kan rawn ko che u a ni." tiin Nathana chuan a lo chhang a.

"ZAwhna zawh a? Engthilah maw?" Hmingtei chuan a lo ti hu mai. "Engpawh nise Danny, an nupa hian hetah lo awm tir phawt la, nakin deuhah kan rawn kovang." tiin Nathana chuan Hmingtei chu chhang lovin Danny-a zawk chu a be leh daih mai. Amah bawk chuan, "Bella, min  rawn zui rawh." a ti leh a, ka zui phei a.

Kan kal hran deuh hnu chuan, "Ngati nge a, Sir? A huhovin kawm ang i ti emaw ka tia, enge tunah kan tih dawn a?" tiin ka zawt deuh hu a. "Tlangval ho saw kawm phawt ang, an sawi dan a in ang lo leh daih thei a, chuvang chuan tlangval ho hi kan biak hmasak a ngai." tiin min chhang a. Interrogation room ah chuan kan lut a, Jonas-a, Zohmingthanga leh Ramliana te chu mangan hmel tak hian an lo thu a.

Zohminga chuan lungawiloh hmel tak hian, "Enge awmzia, ka pu? Darkar khat leh a chanve ai tam mah kan awm tawh a, kan thianpa boral vuinaah tak ngial pawh kan kal thei lo chu ania. In reh leh vang vang bawk si a, enge awmzia?" tiin a lo phun nuah nuah mai. Jonas-a pawh chuan, "Ni e, ka pu. A hmasa pawh khan Valpuia te inah kan kal hman ta lo kha a ni a, tunah pawh a ngaite bawkin.." tiin a lo tuihnih ve bawk.

"Keiphei chu hnathawk turin kal tho ru tia nimina min hrilh avang khan ka lo insiam sa thlap a, mahse Zira thih thu kha zing chaw eikhamah ka hre ve chauh lehnghal." Ramliana chuan a lo ti ve leh a. "A pawi ka ti khawp mai, min lo nghak tang tang a, inchungah ka lawm takzet e." tiin NAthana chuan thupha a chawi nghal mawlh mawlh a.

"Engthil nge ni, ka pu? Tualthattu chu in hre tawh em ni?" tiin Jonas-a chuan a lo zawt leh a. "La hre chiah love, enteh u...zawh duh che u ka nei a, thudik takin min chhang vek dawnnia." Nathana chuan a han ti leh a, an lu an bu sap sap hlawm a. "Engtia Dama te ina thawk thei nge in nih reng reng?" tiin a han zawt hlawm a.

"Keimah atangin...Dama nen hian kan veng thingpui dawrah kan inhmu a, ta tang chuan kan inhmelhriat chho tan a. In sak zawm a duh chungchangte leh mistiri a mamawh chungchang te kha a sawi nual a. Keini thian zaho lah mi in sa a kum engemaw zah lo inhlawh thin kan lo ni bawk nen, thawhna tur remchang kan hmuh loh lai tak a nia. Tichuan ka sawi a, kan thawk ho ta a ni." tiin Zohminga chuan a lo chhang a.

"Anih leh sava in veh ho ni kha in thawh hnu atanga ni engzatna nge?" tiin Nathana chuan a zawt leh a. An in en ta hu hu hlawm mai, "Inrinni kha ania, kan chawlh ni kha.." tiin Jonas-a chu a han phun sap a. "Thursday atang khan kan thawk a, anih chuan ni hnih chiah ala ni tihna a nih chu." Ramliana chuan a rawn ti a.

"Kan thawh tan hma pawhin sak dan tur vel te kan thlir hova, ni thum vel lai chu kan thian ho hian an inah kan kal hmasa phawt, kan thawh tan hma in." Zohminga chuan a lo ti ve leh a. "Anih in sava veh ni khan engtin nge in hun hman dan tlangpui han sawi teh u." tiin Nathana chuan a han zawt leh hlawm a.

An ngawi thap hlawm a, "Zohminglian, nang a upa ber i ni bawk a, han sawi tan teh." ka lo ti vat a. Zohminga chu a han thu tha te te a, "Aa..englo, nia...Pu Dama kha kan sawm ve a, mahse a tir chuan annu khan a phal chiah lova. Mahse amah khan a chak ve reuh em avang khan a remti ta a, tichuan kan ka hova. Nileng khan kan veh hova, chaw chhun te kan fak a, a bak engvak mah kan ti lo. Thim thet thet khan kan haw a, zep lo chuan zu chu kan in." tiin min chhang a.

"In kal vek tiraw?" Nathana chuan a han ti leh a. "Aw kal vek e, kan vaiin Dama nen paruk kan ni." tiin Jonas-a chuan a lo chhang ve leh a. "Engthil emaw tak thleng chu a awm ka ring a ni...engmah a thleng lo tak tak maw?" a han ti leh a. "Aw..ka pu, sava erawh kan hawn mang lova, nileng chu kan thang tho." Ramliana chuan a lo ti ve leh a.

An mitmeng zuk zuk atang chuan ka ringhlel deuh riau mai, engemaw dik lo chu a awm tlat in ka hria. "Anih leh Valpuia emaw, Zira hmelah dik lo engemaw a awm em, an chetdan leh an mizia velah emaw...chu mi ni chuan?" tiin a zawt leh a. "Dik lo a awm pawh ka hre lo, a hlim ber ber ah khan an tang zawkin ka hria." Jonas-a chuan a lo ti leh vat.

NAthana chu a ngawi vang vang a, "A tha e, dawt in sawi lo turah ngai phawt ang. Pawnah lo va chhuak ula, mahse tumah lo la haw suh ang che u." a han ti a. An inzui chhuak diah diah hlawm a, "Sir, an mitmengah khan dik lo a awm. SAva veh ni i sawi chiah khan...an inmelh rulh rulh hlawm mai." ka lo ti vat a.

"Dama te nupa kan zawt leh anga, an sawi dan a in an loh chuan tharum nena dawp deuh hlek an ngai dawn niin a lang." tiin NAthana chuan min chhang a. "Tualthattu hi rinhlelh an neih vek i rin thu kha i sawi sia, mahse i zawt leh mang bawk silova?" ka lo ti leh a. "Tihdan thar ka hria alawm, Dama te nupa chu lo lut leh phawt teh se." tiin min chhang leh a.

************************

Dama te nupa chu an rawn lut a, "Khawngaihin thu ru." tiin Nathana chuan thutna chu a kawh hmuh a. "Pu DAm, heng in hnathawk ho hi sava i veh pui hlawm em ni?" tiin a han zawt leh tan ta a. "Aw veh pui e..veh pui han tih ah, anmahniin min hruai ve zawk." tiin a chhang a. "Engtin tak nge an sawm che?" tiin a zawt leh a.

"Zohminga nen hian thingpui dawr atangin kan inhria a, kan office bul lawk saw an in ania. He khua a kanrawn awm atang khan kan office bula thingpui dawrah hlir sawn lunch ka ei thin a. Zohminga pawh hian a rawn ei ve ziah a, a bul lawk in saknaah a lo inhlawh mek hi a lo ni a. Khata tang khan kan in sa turin ka sawm a, tichuan an rawn thawk ta kha ania. Ni 2 vel an thawh hnu khan sava veh an sawi phur a, min sawm char char a. A tir chuan ka hnial a, mahse ka chak ve reuh em avang leh min sawm luih nasat em avangin ka kal ve ta a ni." tiin a chhang a.

Chuveleh Hmingtei chuan, "A tir phei chuan ka phallo lutuk a, tute nge an nih pawh hriatchian an ni si lo nen. Mahse him dam tak chuan a rawn haw veleh mai a, eng sava mah phei chu a rawn hawn chuang lova." a lo ti ve bawk a. "Anih leh chumi ni chuan thil thleng engemaw a awm em?" tiin a zawt leh a.

"Engtia thil thleng maw?" Dama chuan a lo ti hu mai. "Ka hre chuang nang, engemaw thil tha lo emaw, thil mak emaw pawh a ni thei." Nathana chuan a ti vin deuh lek lek mai. "Chutiang eng thil vak mah thleng a awm lo, e taka...Ramliana leh Zohminga kha chu an haw zuai tak e." a ti ta chiah mai.

"An haw zuai a? Eng ti turin?" tiin Nathana chuan a lo zawt vat a. "Silaimu lak belh angai an tia, an haw leh lawk a, darkar 3 hnu velah an rawn let leh." tiin Dama chuan a chhang leh a. "Anih leh silaimu chu an rawn la ngei em?" tiin a zawt leh a. "La aniang, ka lo en lem lo." tiin a chhang leh a.

"Thildang thleng a awm em?"

"AWm tawh hran lo...kawng kha ka bo zuai bawk."

NAthana nen chuan kan in en dun leh hu mai, "Kawng ka bo zuai a? Enge awmzia?" tiin Nathana chuan a zawt leh vat a. "Aww...chaw chhun tur an chhum lai khan thingfak va la khawm lawk turin min ti a, ka va la a. Mahse kawng kha ka bo ta deuh tlat a, a hnu feah ka va hmu leh hlauh a ni." tiin a chhang a.

NAthana chuan a lu a bu nghauh nghauh mai, "Anih leh thil dang thleng a awm tawh miah lo amaw?" tiin a han zawt nawn leh a. "Aw awm tawh lo, ka pu." tiin a chhang a. "Zira hmelah emaw, Valpuia hmelah emaw danglamnate a awm mial em?" a han ti leh a. Dama chuan a lu thingin, "Aih awm lo, an hlim ber zawkin ka hria." tiin a chhang leh a.

"Anih Zohminga leh Ramliana lo let leh chuan an hmelah dik lo a awm em?" tiin a han zawt leh hram a. "Aih awm lo, engmah dik lo a awm awm ka hre lo." tiin a chhang leh a. "Awle, in chhuak thei e, lo la haw suh u. Pawnah khan min lo nghak ula, kan lo chhuak vat ang." NAthana chuan a ti leh a, an nupa chuan an inzui chhuak leh ta a.

******************************

TO BE CONTINUE