WILD ZONE : SEASON 1 (Episode - 18) Written by : Aaron Malsawmdawngzuala EXPECT THE UNEXPECTED - 2

 WILD ZONE : SEASON 1

(Episode - 18)

Written by : Aaron Malsawmdawngzuala

EXPECT THE UNEXPECTED - 2

*************************

A tuk zingah chuan Opa te inah chuan kan va kal lehnghal a, Lawyer pawh a lo thleng tawh a. Min lo hmuh veleh chuan, "Good Morning Sir, Lawyer Benjamin Lalruatkima ka nia, Bena min ti mai dawnnia." a lo ti nghal zung zung a. "Good morning, i thlenna a rei tawh em?" tiin Nathana chuan a han zawt a.

"Rei lutuk lo, minute nga vel liam ta khan.." tiin BEna chuan a chhang a. Tichuan kan thu khawm ta a, "Op, i thianpa chu a nih i ring lo tak tak amaw?" tiin BEna bawk chuan Opa chu a han zawt a. "A ni thei lovang...a haw hnu khan midang tu emaw an lut leh a ni ngei ngei ang." tiin a lo chhang a.

Nathana chu a han thu tha sauh sauh va, "Dar 7 vel a ti in ka hria pu Khuma khan, tualthahna kha a thleng hma viau bawk si a. Chuvang chuan Johnny-a chu tual thattu a ni lo a nih chuan Johnny-a chhuak hnu deuh lawkah tualthattu hi a lut ve nghal tihna a ni mai, Johnny-a haw hun a chang ran pawh a ni thei bawk." a han ti nuah nuah a.

"Court-a thiam kan chan theih nan chuan Johnny-a nena in inlaichinna pawh min hrilh chian deuh angai ang." Lawyer Bena chuan a lo ti ve leh a. Opa chu a ngawi vang vang a, "Veng khata awm kan ni a, kum 5-6 vel kan nih atang daih tawh a inkawm kan ni. Ka hrechiang hle a, amah pawhin min rhechiang hle bawk. Chuvang chuan hetiang thil hi a ti duh dawn lo hrim hrim, a thisenin a ngam lo tih ka chiang." tiin a chhang a.

"Ni e, i thianpa a nia ka hriatthiam pui che alawm. Mahse kan mi hriatchian deuh amaw kan tih te pawh hi rin ang an nilo thei ania, Johnny-a thah lo ni tak tak se.." Bena'n a tih lai chuan Opa chu a lo inrawlh vat a, "Nilove, mi nunnem leh zaidam tak a ni a, a dawihzep bawk. Kei aia hrechiang an awm lo, a nupui ai pawh sawn ka hrechiang ang." a ti deuh khur khur mai.

"Tunah Johnny-a saw kum engzat nge?" tiin Nathana chuan a han zawt ve a. "Kum 34 a ni ve tawh dawn, kei aiin kum khatin a naupang." tiin Opa chuan a chhang a. "I nupui leh Johnny-a hi a rukin an lo inkawp ru reng pawh a ni thei ania, a chhe ber thlenga ngaihtuah chuan.." Bena chuan a lo ti ve leh a.

Opa chuan a lu thingin, "Aih, a theih loh. A ti lul lovang, chubakah lo inngaizawng ta pawh nise engvangin nge a thah kher ang?" tiin a lo zawt let a. "Sum..sum vang te pawh a ni thei." Bena chuan a han ti leh a. "Kan in hi en ula, a lian em em lo. Kei lah sawrkar hnathawk pakhat ve mai chauh ka ni a, enge ka lakah hian thikna tur a neih ka hre lo." tiin Opa chuan a chhang leh a.

"Inhmelmakna engmah in neilo maw? Inhauh hrep te in lo nei tawh em, tun hmain?" tiin Nathana chuan a han zawt veleh a. "Nei lo, han inhmuhthiamloh te chu chhan ho te te ah chuan kan nei ve zeuh zeuh va, mahse tualthahna tur khawp chuan eng buaina mah kan nei dun ngai lo." tiin Opa chuan a chhang leh a.

"Op, han ngaihtuah teh. Thil lian tham anga i ngaih loh kha a lo la serious viau thei a, kum tamtak liam ta a, in intihthiamlohna kha tunah phuba a la chauh te pawh a ni thei asin." Bena chuan a lo ti ve leh a. "Chutiang engmah a awm ka hre lo, kan tleirawl laia kan intihbuai ve zeuh zeuh bak chu ka hre lo." tiin Opa chuan a chhang a.

"Anih Johnny-a hian eng hna nge a thawh?" tiin ka lo zawt ve a. "School zirtirtu a nia, mi taima tak a ni. School-ah pawh naupang ho ngainat rawn a ni a, ani ang mi nunnem hian a thianpa nupui hi min thahsak lul lovang. Chubakah lo that pawh nise, a tlanchhe daih ang chu...mahse inah a lo la awm reng ania." tiin min chhang a.

"Kum 30 dawn in lo inkawm tawh a, keini ai chuan i hrechiang zawk ang tih pawh ka ring. Anih chuan tunge tualthattu hi ni ta ang?" NAthana chuan a han ti nauh nauh va. "Keimah nen inhuatna lo nei pawh ni ila, tinge kei nilova ka nupui zawk a thah kher ang?" Opa chuan a lo ti ve leh bul bul a.

"Tihthaih che a tum a ni thei, i laka phuba lak nan...a tir berah i nupui a that phawt anga..chuan a hnuah midang dang.." Bena chuan a lo ti lehpek a, Opa chu a lungawi tawh lo kher mai. "Mirhing DNA pakhat mah hmuh  ani lova, fingerprint tak ngial pawh a thup. Chutiang thlap thlap a chet nachang a hriat ka ring lo Johnny-a hian..tualthattu a nih chu i ring tlat em ni?" tiin a zawt let ve deuh hlur a.

Bena chu a nui suk a, "Enteh Pu AWmpui, a nihna takah chuan tualthattu hi Johnny-a pawh lo nise, ka sawi bo hmak thei. Ka hriat duh zawng chu thudik a ni, chu thudik pawh chu dawtah ka chan tir thei." a han ti deuh kher a. Opa chu a ngawi vang vang a, "Thudik chu a ni keipawhin ka hriat duh." a ti zawi sap mai.

Chutih lai chuan Nathana phone chu a rawn ri a, loud speaker-a dah pah chuan a pick up a. A phone chu dawhkanah a dah a, DSP a lo ni. "Hello DSP Sir, enge chanchin?" tiin Nathana chuan a han zawt a. "Post mortem result a lo chhuak a, hei tunah Stationah a rawn thleng chiah." tiin DSP chuan a rawn chhang a.

"Anih tak chu...chuan enge result chu?"

"A hrawkah rehna hnuhma a awm a, mahse reh hlum erawh a ni lo. A dulah vawi 2 vih a ni a, a tukhumah hliam a awm bawk. A lan dan chuan tualthattu hian eng hmanrua emaw tak chuan a lu ah hian a chhu emaw, a vua emaw a ang hle a. Chumi zawhah a dulah vih leh a ni a, mahse tah pawh hian ala thi mai lo. Chhuatah a bawh bet a, a rek a. Cathy hian a beilet ve nasa hle tih a hriat bawk, mahse mihring DNA engmah hmuh a ni lo."

"A beilet a, mahse eng DNA mah hmuh a ni lo amaw?"

"Aw Sir, a hmaiah hian vawi hnih hnek a ni bawk. Tichuan Cathy hian eng tin tin emaw lehthalin tlanchhiat a tum a, a hnungzangah a vit leh a ni. Tichuan khumah ava mut ta a, chu chu a lan dan a ni."

"Awle, kan lawm e."

Nathana chuan phone chu a dah a, Opa chu a thinrim hmel kher mai. BEna chu a ngawi vang vang a, "Engpawh chu nise, vawiin chu nileng deuh thaw a kan inkawm angai ang, anih loh chuan hnehna kan chang thei lovang, a tam thei ang ber ka hriat a ngai." a han ti a. "Tikhan lo inkawm ula, kei leh BElla-i erawh chuan investigation kan lo neih chhunzawm ange." NAthana chuan a han ti a.

"Anih engtik nge kan inhmuh leh ang?" tiin Bena chuan a lo zawt a. "ZAninah kan inhmu leh dawnnia, naktuk mai hi court trial a ni nghal dawn si a, kan hmanhmawh angai." tiin NAthana chuan a chhang a. "Awle, kan inhrilh leh dawnnia." Bena chuan a han ti a, tichuan Opa te in chu kan chhuahsan ta a.

*****************

"Tualthattu hi mipa chak tak chu a ni lo tih a chiang...vawi 2 a vit tawh a, a rek bawk a. Mahse Cathy, hmeichhe awmnem zawk pawhin a la lehthal theih chuan mipa nep tak a niang." tiin Nathana chu a han khi deuh suk a. "Ngawi teh Sir, Johnny-a hi mi nunnem leh nep ve tak ang khan Opa khan a sawi a, a nih chuan Johnny-a hi a lo ni tak tak tihna em mawnile?" ka han ti ve nuah nuah a.

"A ni thei tho mai, mahse mak ka tih deuh chu finger print thup thiam, victim phone pawh laksak nghal nachang hria leh hmanrua pawh thukru nghal thiam khawpa fing si chu tinge thlamuang taka inah a lo awm mai mai? Police in an rawn chhui nghal dawn tihte chu a hre ve reng awmsia, a mak ka ti." tiin Nathana chuan min chhang a.

"Aww...Pu Khuma khan a lo hmu reng a ni tih a inhre lova, chuvang chuan a thla a lo muang em em pawh a ni thei asin." tiin ka lo hnial a. "A car kha...a car kha a ding ve reng a, a lut hnuhnung ber a ni tih emaw, nizan khan a leng ngei a ni tih chu thenawmte kha chuan an hre dawn hrim hrim, Pu Khuma lo, midang pawn an hmu dawn tho tho. An in kha fal tak pawh a nilova, kawngpui bul lawk ve tho ania." Nathana chuan a han ti leh a.

Car-ah chuan kan lut a, "Engpawh nise Johnny-a pawh kan la kawm ve lo, interrogation neih pui lawk ang aw.." tih pah chuan a han start a. Chak tak chuan kan tlan a, "Anih Sir, nangin Johnny-a chu i ringhlel em?" tiin ka han zawt leh a. "Ka hrethiam bik lo, a lo ni ru reng te pawh a ni mahna." tiin min chhang a.

******************************

Station chu kan thleng a, DSP Office chu kan pan nghal a. Nathana chuan polite takin kawngka chu a han kik a, "Lo lut rawh." tiin DSP chuan min lo chhawn vat a. Nathana nen chuan kan lut a, DSP chu a ding nghal a. "Ehe Sir, inlo kal animaw..kan inphone zo chiah sia.." a lo ti zung zung a.

"Nia..Englo ania DSP Sir, Johnny-a hi kawm ve kan duh deuh mawle." tiin Nathana chuan a chhang a. "Awle, min lo zui ru." tiin DSP chu a chhuak a, kan zui ve nghal a. Nu pakaht ang bawrh bawrh ri hi kan hria a, kan va en chuan Johnny-a nupui Kimtei a lo ni. "Ka pasal hian a that ngei a ni tih finfiahna pawh in nei lo, tihian in tan tir reng thei lovang." tiin SI Mawia chu a lo vin nasa mai a.

DSP chu va kal hnaiin, "Insum rawh ka pi, hei hi police station a nih hi."  a han ti vin deuh thak a. Rum fe hian Kimtei chuan melhin, "Enge ni vak? Police Station pawh nise, ka pasal hian tual a that lo, engmah finfiahna pawh in nei lo tih ka hre vek." tiin a lo vin let hrep mai. Nathana chu va kal hnai ve in, "I pasal thah a ni lo tih finfiahna i nei bik a mi?" a han ti chu Kimtei chu a ngawi hmak mai.

Nathana bawk chuan, "Enteh ka pi, Cathy pasal Opa ngei pawhin a ring bik lo. Mahse tunah chuan amah bak rinhlelh tur an awm hrih lo a ni, chuvang chuan naktukah court ah finfiah a ni dawn a, i nghah hram hram angai." zaidam tak chuan a han ti a. "Ni e, ka pi. Lawyer pawh kan hmuhsak tawh che a, zaninah kan inhmukhawm dawnnia." ka lo ti ve bawk a.

Lungngaih hmel tak hian Kimtei chuan, "Khawngaihin min chhuichhuah sak hram rawh u, ka pasal hian tual a that lul lovang." tiin a tap hawm hawm mai. "Kimte, tunah chuan i haw phawt a ngai, nakin deuh ah kan lo kal anga, kan inkawm ho dawnnia. Tunah chuan kan chhui mek a, inah min lo va nghak ta che." Nathana chuan a han ti leh a.

"Khawngaihin, vawikhat chiah...vawikhat chian ka pasal hmuh ka duh a ni." tiin Kimtei chuan  a han ngen leh a. "Naktukah in inhmu dawnnia, tunah chuan haw phawt rawh." tiin DSP chuan a lo chhang a. Lung ni lo tak leh rilru nat hmel tak chuan Kimtei chu a chhuak a, a khawngaihthlak khawp mai.

*******************************

Interrogation room ah chuan Johnny-a chu an rawn hruai a, kan hma takah chuan a thu a. A tah nasat em avangin a mit a bui luk mai a, a zawi em em bawk. "Johnny, i tha maw?" tiin Nathana chuan a han zawt a. Mahse Johnny-a chuan a lu a thing ringawt, "Zawhna tlem kan zawt dawn che a, tha takin min chhang ang che." Nathana bawk chuan a han ti leh a.

Johnny-a chuan a lu a bu leh nghut ringawt, "Le..nizan khan engthil chiah nge thleng han sawi teh le." tiin a zawt tan ta a. Muang chang hian Johnny-a chu a rawn hawi chhuak a, "Ka thah a nilo, vawi tam ka sawi tawh, ka pu. Ka thah a ni lo, kal chu ka kal ngei a, mahse ka that lo." tiin a chhang a.

"Anih eng chiah nge i va tih?"

"Ka jacket ka va lam."

"Engtika i theihnghilh nge?"

"A rei tawh, engtik nge ka hre tawh lo."

"I hre tawh lo maw? I theihnghilh ngei tih chu i hre sia?"

"Aw ka lam ang ka ti thin a, mahse ka lo mangnghilh leh thin a."

"Dar engzatah nge in atangin i chhuah? Nizan chuan...Cathy i va hmuh hma in?"

"Ihh..dar 6..dar 6 vel a niang."

"Anih dar engzat ah nge i haw?"

"DAr sarih leh a chanve vel ni ta in ka hria."

Nathana chu a han ngawi vang vang a, "Jacket lam tur ringawtin i va kal a, mahse darkar khat chuang daih i awm a, enge awmzia?" tiin a han zawt a. "Ka..kan titi a, ka rei phah alawm." Johnny-a chuan a han ti bah deuh nuai a. Nathana chuan chiang tak hian Johnny-a mitah tak chuan a en a, "Zep engemaw i nei, min hrilh rawh Johnny." a han ti chang deuh fak a.

Mahse Johnny-a chuan tap tuau hian, "Engmah ka zep lo, ni e...ka leng rei ve deuh alawm. Mahse ka thah a ni lo, tinge tumah hian min rin loh a?" tiin a mittui a tla phung tawh mai. "Kan ring lo che a nilo, thu kan zawt fiah mai che a ni. I thianpa a zin dawn tih i rhia a, a zin a chhuak ta maw tih veleh u va leng a, a rukin in inngaizawng lo chiah amaw?" Nathana chuan a han ti leh deuh kher a.

Lung awih loh hmel tak hian Johnny-a chuan, "A teuh lo mai, chutiang mi ka ni reng reng lo. Ka thianpa nupui a ni a, duhna chhete mah ka nei lo. Ka unaunu, ka farnu, ka thiannu a ni a, engtikah mah a rukin ka tawmpui lovang." a ti deuh pung pung mai. NAthana chu a thaw hak a, "Anih leh iva thlenin motor dang emaw an kawtah a lo awm em?" tiin a han zawt leh a.

"Aih awm lo, chutiang engmah ka hmu lo."

"Anih leh ina in awm laiin midang rawn lut an awm em?"

"AWm lo, ka pu..tumah an awm lo, kan pahnih chauhvin kan awm."

"I thah a nih siloh chuan...rinhlelh deuh te i nei em?"

"Rinhlelh tur ka hre lo, tun thleng hian keipawhin mak ka la ti."

"DAr engzat velah nge Police te chuan an rawn lam che?"

"Chaw eikham veleh khan kan nupa in kan chhuak a, kan nu hi hla zir turin ka thlah phawt a, tichuan Cathy te inah kei ka tlang nghal a. DAr sarih leh a chanve ah ka haw a, kan nu chu a lo la haw lova. Tichuan inah ka awm a, TV ka en laiin min rawn hruai ringawt a ni." tiin Johnny-a chuan a chhang leh a.

"Police te lo thlen hma khan Cathy thih thu chu i hre miah lo maw?" tiin Nathana chuan a han zawt leh a. "Aw hre lo, TV ka en a, ka phone ka charge daih bawk sia." tiin a chhang leh a. "Anih leh Johnny, Opa nen hian han inhmuh thiamloh te in nei thin em?" tiin a han zawt leh a. "Nei ngai lo, ka unaupa, ka thiantha ber a ni a, a eng pawi mah ka sawi ngai lo." tiin Johnny-a chuan a chhang a.

"An nupa karah buaina te a awm awm i hria em?" tiin ka lo zawt ve a. "Kan pali hian kan chhuak ho fova, ka nupui leh CAthy pawh thian tha tak an ni a, kan inhrechiang hlawm thawkhat viau chuan ka hria. Keichuan an nupa karah buaina a awm awm ka hre hauh lo, awm chu nise Opa hian engkim min share thin a, min hrilh ve em em ang." tiin min chhang a.

"Cathy lo ngaizawngtu tu emaw an awm pawh a ni thei a, a chang silovin a that ta mai pawh a ni thei tho. Chuvang chuan Opa lo haw deuhtu emaw, Cathy lo ngaizawng rutu emaw an awm nge awm lo kan hriat a ngai a ni. Han ngaihtuah la, i thianpa Opa hian haw tu emaw, hmelma a lo nei reng lo maw?" tiin Nathana chuan a han zawt leh a.

Johnny-a chu a ngawi vang vang a, "Ka hre lo, ka pu...tumah hmelma a neih ka hre lo." tiin a chhang leh a. "Anih leh tunhnaiah an nupa mizia han danglam riau te a awm awm i hria em?" tiin Nathana chuan a han zawt leh a. "Ka hre lo, an pangngai lutuk." tiin a chhang leh a. Nathana chu a ding a, "Duhtawk phawt teh ang." tiin a chhuak daih mai.

***********************

Ka va zui chhuak ve nghal a, "Opa te office lam pawh biak tho an va ngaih hmel ve, chipchiar taka kan chhui a ngai a ni." a han ti nuah nuah a. DSP chu lo kal hnaiin, "A tawng tha duh maw?" a rawn ti a. "Aw tha deuh deuhin min chhang alawm." tiin ka lo chhang vat a. "DSP Sir, Johnny-a phone in check tawh ang tiraw?" tiin Nathana chuan a han zawt a.

"Aw check vek tawh e, chutia rinhlelhawm pakhat mah a awm lo. A message te, a call log te pawh kan en a, mahse engmah a awm lo." tiin a lo chhang a. "Tualthattu hian CAthy phone a la hmak a, a awmzia chu CAthy phone ah hian engemaw tak chu a awm ngei tih a chiang. Johnny-a hi tualthattu anga chhuah a tum tih a chiang bawk, a enthla ru reng ang." ka'n lo ti ve leh a.

"A dik lutuk, Bella. I sawi dik chiah, tualthahna thlen hun ka chhut khan Johnny-a haw hun nen, a inkar kha a rei lo lutuk. Chuvang chuan tualthattu hian Johnny-a haw hun kha a chang ru reng tihna a ni mai, Johnny-a hian thudik a sawi a nih chuan.." tiin Nathana chuan min lo support vat a, ka intithei ru veng veng mai.

"Mahse Sir, Johnny-a hian a call log te, a message te hi a delete leh vek pawh a ni thei tho mai." DSP chuan a lo ti a. "A hrim hrimin a call log ah chuan tutu nge recent ah a biak?" tiin Nathana chuan a han zawt a. "Opa a tam ber a, abak chu mipa hming hlir a ni a, a hnathawh puite an nih hmel." tiin a chhang a.

"Cathy a call-na a awm hrim hrim em?"

"Aw, pahnih thum vel chu a awm a. Mahse kar 2 liam ta te, thla hnih-thum liamta ami te an ni hlawm."

"Anih leh a car kha in dap tawh bawk ang tiraw?"

"Aw, a chhung zawng zawng nen kan dap chhuak vek a, engmah hmuh tur a awm lo, thisen far khat pawh a awm lo."

"Khawimaw, Johnny-a phone transcript ka lo en teh ang."

"AWle, Sir..ka va la ang."

DSP chuan transcript chu ava la a, rawn let lehin Nathana chu a rawn pe a. Nathana chuan a han en a, "A ruka inngaizawng chu nise call log ah hian an inbiakna a awm deuh thluah ngei anga, mahse a tlem emai, Johnny-a hian a sawi dik ve thei tho mai." a han ti nuah nuah a. "Mahse Sir, sawi tak ang khan..call log list pawh a delete then theih tho va, Johnny-a hian a delete then te a ni mai lo maw?" DSP chuan a lo ti ve leh a.

"Ni thei tho, mahse tinge a dah lan tho si...delete vek zawk awm tak ania." ka lo ti ve nuah nuah a. DSP bawk chuan, "Rinhlelh a nih loh nan...a thup te pawh a ni thei." tiin DSP chuan min lo chhang leh vat a. Nathana chuan a lu a han bu nghauh nghauh va, "Hmmm...a phone hi hack chuan a lang thei vek thovang." a lo ti a.

"Anih chuan hack ila nimai lawm, hacker tha tak tak i hmelhriat teuh kha.." ka lo ti vat a. Nathana chuan min nuih suk a, "Nia, kan ngaihtuah dawnnia. Tunah chuan Kimtei te inah kal ila, eng engemaw kan va zawh fiah ve angai. Naktuk mai hi court day-1 a ni tawh a, vawiinah a tam thei ang ber tih fel angai." tiin min chhang a.

"Anih chuan va kal ru, Sir. Helam chu lungngai suh u, ka lo buaipui vek mai ang." DSP chuan a lo ti ve leh a. "A tha e, Opa te office lam pawh kan va biak a ngai bawk a, tihtur kan la ngah emai, kan kal phawt ange." tiin Nathana nen chuan kan chhuak a, Kimtei te in lam pan chuan kan tlan leh ta a.

***********************

Kimtei te in chu kan va thleng a, kawngka kan han kik chu rang takin min lo hawn vat a. "Ka pu, lo lut ru..lo thu ru." inthlahrung tak chuan a han ti a. NAthana nen chuan kan thu a, "Kimte, i pasal tih a ni lo tih engtin nge i chian em em theih a?" tiin Nathana chuan a han zawt a. "In duh chuan a thawmhnaw te pawh va check ula, kan inchhung zawng zawng hi dap vek rawh u. Ka pasal ang tluka mipa nunnem hi ka la hre lo, a tih a ni hauh lovang." a ti nghal zung zung mai.

"I pasal leh Cathy hi a ruka inngaizawng, inhmu ru angin miin an ring ber a, enge i ngaih dan?" tiin Nathana chuan a han zawt leh a. Kimtei chuan a lu a thing a, "Aih, a teuh lo. Ka ring lo bur, an inngaizawng lul lovang." tiin a chhang a. "Cathy nen khan in inkawm ngeih viau em?" tiin a han zawt leh a.

"Aw...kan pa nena kan inneih hma deuh hian Opa hian min hmelhriat tir a, chuta tang chuan kan inkawm tan a ni."

"Anih chuan Opa hi i hre hmasa zawk tihna a nimaw?"

"Ni e, Opa chu kan pa hian a hmel ka hmuh hma hauh atang tawhin a sawi reng zel a. Cathy a tawn hma atang daih tawhin ka hre tawh, kan inkawmngeih hle bawk."

"Anih chuan amah thiktu tur awm ang hmelma a neih i hria em?"

"Aih..an nupa hian hmelma an lo nei reng a nih chuan an hmelma chu misual tak a ni ngei ang. A chhan chu nupa fel tak leh inhmangaih tak an ni a, tu pawi mah an sawi ka hre ngai lo."

"An lo nei reng anga, an hrilh lo che u a ni zawk lo maw?

"Kha chu thuhran ania, an lo nei ru reng thei bawk. Mahse kan mithmuh ah chuan an inngeih lutuk, an intihbuai hi ka la hre ngai lo hrim hrim."

"NAngmahni nupa hian hawtu emaw, hmelma in nei hrim hrim em?"

"Hmelma kan neih awm ka hre hauh lo, ka pu."

"Anih in nupa room chu kan lo en kual thei angem?"

"THei tehreng mai, min lo zui ru."

Kimtei chuan an roomah chuan Nathana nen chuan min hruai lut a, kan han enkual a. An nupa thlalak leh an thian pali, CAthy te nupa nena an lak hona te chu a lo intar a. An sawi ang ngei chuan an pali hian thian inkawmngeih tak chu an ni ngei tih a hriat takzet, a tu a te mah hian dawt an sawi ka ring chiah lo.

Rei fe kan han dap kual hnu pawh chuan engmah kan case chhui mek a min pui theitu tur awm ang kan hmu tlat lo, kan chhuahsan leh ta a. Sitting room lamah chuan kan thukhawm leh a, "Lawyer leh Opa an inbe mek a, Opa hian i pasal tan lawyer a ruai a, chuvang chuan Opa pawh hian i pasal thil tih a nih chu a ring bik lo tihna a ni." Nathana chuan a han ti leh a.

"A thianpa a ni a, kei ai pawhin a hrechiang ang. Keichuan ka pasal a nihna avangin ka hrechiang amaw ka lo ti pawh a ni maithei a, mahse Opa hian a hrechiang daih zawk ang." Kimtei chuan a lo ti ve leh a. "Anih leh an nupa hi i lo chik chiang gnai em? Intihthiamloh emaw, an mizia han danglam thut emaw te hriat i nei mial em?" tiin a han zawt leh a.

"Nei lo..chutiang a awm awm ka hre lo."

"Anih leh engtin nge Cathy thih thu hi i hriat ve?"

"Kan hla zir zo kha kan pa min rawn lam turin ka phone dawn a, mahse ka thiante misscall hrang hrang a lo tam lutuk a. Ka call back a, tichuan thil awmzia min rawn hrilh ta a ni."

"Inah i haw leh phawt em?"

"Aw...ka tlan haw nghal a, tichuan ka pasal chu police ten Opa te in lamah an hruai thu thenawmten min lo hrilh a, ka va kal ve nghal a ni."

"Anih leh i pasal mizia hi tunhnaiah a danglam angin i hre thin em? A thil tih ngai miah loh leh a mizia lo deuh a chet te a nei thin em?"

"Aih neilo...a pangngai reng."

"Awle, lungngai lo la, thudik chu kan zawng chhuak em em ang. ZAninah Opa te inah Lawyer te nen kan inhmu khawm dawnnia." tiin zaidam tak chuan Nathana chuan a hrilh a. Kimtei chuan a pasal chhuah tur chuan min tur nasa kher mai, mahse keini chhuah zalen theih ngawt ni hek suh. Tualthattu chu a lo ni tak tak em pawh kan la hre der mai si lo, tichuan in chu kan chhuahsan leh ta a.

**************************

NAthana nena kan tlan lai chuan, "Bella, kal dun zel lovin inthen hrang ve teh ang." a rawn ti deuh hlawl mai. "Eng..engtia inthenhrang maw?" ka lo ti hu mai a. "Hmun pakhata kal dun zel lovin, insem ve ila...a hnuah chanchin kan inhrilh leh zel mai dawn lawm. Kan kaldun zel a, hun a hek riau...nangpawh hi sawi nachang te hriat ve tur ania, Rinawma ang mai." min la ti zek zui.

"Hmmph, min puh nghal daih suh...engtin nge kan inthenhran dawn?" tiin ka han vin ve deuh hlur a. "Tunah chuan in in thleng ka thlah che anga, i scooty in Opa te office lam i lo va be ve thung ang." tiin min chhang a. "Anih nang khawnge i kal dawn?" tiin ka han zawt leh a. "Opa te inah, lawyer te nen chuan kan lo titi anga, vawiina kan thu hriat ang ang te hi ka lo hrilh veleh bawk ang. Chuan..zanina meeting dan tur te nen." tiin min chhang leh a.

"A tha alawm, eng eng nge ka zawh ang?"

"Aww ava mak, detective i ni a ni lawm ni? Enge ka zawh ang te i tih mai mai, ava hahthlak thin tak."

"Aww..ka boss inia, min hrilh ang ang ka zawm zel angai sia lawm."

"Huiham, detective i nih anga i zawh tur chin chiah i zawt dawnnia."

KA nui huk a, "I va han thinchhe ve tak." tiin ka han chhaih leh deuh kher a. "Ka vin tak tak che chuan i tap pur mai ang." min la ti zui. Kan han ngawi leh deuh vang vang phawt a, "Enteh Bella, Johnny-a hi a nih i ring nge ring lo?" tiin min zawt deuh thut mai. "Ka hre bik lo...hei kan chhui mek chu ania." tiin ka chhang a.

"Crime scene en khan thisen a tam em em a, Johnny-a fai vunga a lo chhuah chuan Johnny-a thah a nih chu a rinawmloh ve bawk em a ni."

"Mahse Sir, a intifai pawh a ni thei a."

"Intifai chu nise a hnuhma pawh kan hmu em em ang, chubakah a that rang phian bawk sia, a duration en lah khan a reilo sia."

"Nia, ka hrethiam bik lo."

"Nang hi chuan Johnny-a hi i ringhlel deuh berin ka hria."

"Rinhlelh chuang love."

"Aaa i ringhlel a nih kha.."

"Hmm..ngawt ngawt a, finfiahna tha engmah ala awm silova, main suspect ber a ni miau sia."

"Chu i ring tihna.." tiin a la nui huah huah zui. Hepa hi chu a mak ve hrim hrim, thutak deuha kan inbiak lai te hian a fiamthu leh thut zel a, case chungchang nilo, thildang sawipui lahin Rinawma hlir a sawi bawk a, MAxie a sawi zeuh zeuh bawk. Mahse mak ka tih deuh chu a nupui thi ta, Sanvi chungchang a sawi ve ngai miah lo hi a ni.

"Johnny-a thah ni ta se, thawmhnaw thlakna tur a keng ngei ang. Mahse Pu Khuma kha chuan a thuamhnaw ah engmah thisen kai awm ang a hmu lova, Opa te inchhungah lah thisen kai thawmhnaw chu CAthy thawmhnaw leh bedsheet chiah a ni mai a, engmah a ken chhuah a hmu bawk silo, Pu Khuma khan.." NAthana chuan a han ti leh nuah nuah a.

Reiloteah chuan kan in chu kan thleng ta der mai, "Han inthlak la, i zawh veleh min lo hrilh leh dawnnia." tiin min thlah a, kan inah chuan ka lut a, NAthana erawh Opa te in lamah chuan a let leh a. Keipawh chu ka inbual a, tichuan thawmhnaw thar ha in sawrkar hnathawk paho te ka hmu dawn si a, rimrui vul chuk chung chuan ka scooty chuan Opa te office lam chu ka pan ve leh ta a.

***************************

TO BE CONTINUE