WILD ZONE : SEASON 1 (Episode - 17) Written by : Aaron Malsawmdawngzuala EXPECT THE UNEXPECTED - 1

 WILD ZONE : SEASON 1

(Episode - 17)

Written by : Aaron Malsawmdawngzuala

EXPECT THE UNEXPECTED - 1

**************************

Zan dar 9 a pel tawh a, ka nu nen chuan TV kan en mek a. Ka pa erawh hna vangin a zin mek thung, fanu mal ni lo mah ila  unaupa neihchhun phai ah lehkha a zir avang chuan tun dinhmunah chuan fanu mal ka ni. Hmeichhe detective rorum leh former CID pawh ni mah ila, nute malchung nge nge mut a nuam bik teh e.

Kawngka a rawn inkik a, "Bawihi va hawng lawk teh...ka thu nuam hrih emai." tiin ka nu chuan min tir nghal a. "Keipawh ka la mu nuam ve tho asin." tia phun nuah nuah pah chuan peihlo takin ka tho chhuak a, kawngka lam chu ka va pan a. Ka han hawng chiah chu Nathana a lo ni reng mai, "Ehe, Sir chu...ve teh mial che chuan.." ka han ti a.

Inthlahrung der tih hriat tak hian, "Min luh tir phal em, ka pi?" a han ti deuh kher a. "Aw lo lut rawh...lo leng rawh." tiin ka chhang a. Inchhungah chuan a rawn lut a, "Ehe ka pi, i lo dam maw?" tiin ka nu chu a han chibai a. "Aw dam alawm, enge i lo tih dawn a, ve teh miah che chuan.." tiin ka nu chuan a lo zawt let a.

"Englo ania, i fanu hian hna thar a nei leh dawn a ang tlat mai." Nathana'n a han ti chiah chu case thar chhui tur a awm tih ka hrethiam nghal. "Sir, eng thil nge a?" tiin ka lo zawt nghal vat a. "Veng thenawmah sawn tualthahna a thleng a, darkar 1 vel liam ta kha a ni awm e, call ka dawng tlat mai." tiin min chhang a.

"Ehe...kan va hre ve lo ve..veng thenawm lawk si?" ka nu chuan a lo ti nuah nuah a. "Nia..keipawh min rawn phone a, ka hre chauh alawm." tiin Nathana chuan a chhang a. "Tu berin nge rawn phone che a, mitthi chhungten em ni?" tiin ka lo zawt veleh a. "Ni love, Police DSP in min rawn phone a, kan va kal ve nghal mai dawn em ni?" tiin min han sawm nawn leh a.

"Va kal rawh u...nangni pahnih hi zawng, awl lai hi in nei hleithei dawn lo a nih hi." tiin ka nu chu a lo khi suk a. "Awle, ka'n insiam ange." tiin roomah ka lut a, ka insiam nghal a. Ka insiam chhung chuan ka nu leh Nathana chu an titi nasa ngei mai, ka insiam zawh hnu chuan ka chhuak leh a, crime scene lam pan chuan a car hmang chuan kan phei dun ta a.

*************************

SAwi tak ang khan veng thenawm lawk a ni bawk a, kan thleng har lo kher mai. Do not cross te pawh an lo tar thlap tawh a, police tlem azawng leh mipui an lo awm nual a. Kan va kal hnai a, DSP chuan min rawn pan vat a. "Detective Nathan maw?" a rawn ti a. "Aw ni e, hei hi ka partner Detective BElla-i a nih hi." tiin Nathana chuan a lo chhang a.

"Kan inzui lut nghal mai dawn mi?" DSP chuan a han ti leh a, tichuan inchhung lam pan chuan kan inzui lut ta hlawm a. Ruang chu hmeichhia a ni a, ala hmeltha phian lehnghal. A dulah vihna hnuhma thuk tak a awm a, khumah chuan thisen a khat vek bawk. Mattress lah chu a var a la ni zui a, thisen chu lang chiang bik tak a ni.

Nathana chuan golve a bun a, ruang chu a han bel chiang a. A lu chu a kuai her a, a thukhumah chuan hliam a lo awm a. "A tukhum a hliam a awm chuan...a vuakna hmanrua a awm hnai ngei ang." tiin room chhung chu a han enchiang leh deuh va. Chhuata thisen far te chu ngun tak chuan a en kual a, a en uluk kher mai.

"Sir Nathan, an ina lut hnuhnung ber chu hemi veng tho ami, Johnny Lalrinpuia a ni. A chhuak lai hmutu an awm a, an thenawmte hian an lo hmu a." DSP chuan a han ti leh a. Nathana chu a rawn ding chhuak a, "Anih chupa chu khawnge?" tiin DSP chu a zawt a. "Choka lamah sawn a awm mek, kan hruai phei nghal alawm." tiin a lo chhang a.

Inchhung chu keipawh chuan ka han enkual a, an room bangah chuan nupa thlalak ka hmu tlat mai. A mipa chu ka hriat ngai mi a ni lova, a hmeichhia erawh tuna kan mitthi buaipui mek hi a ni. "Sir khi enteh." tiin thlalak chu ka kawk a. Nathana chuan ngun tak hian a han en a, "Tunge an hming?" tiin DSP chu a zawt leh a.

"Mitthi hi Cathy Zonunsangi a ni a, chuan a pasal hi Lalawmpuia, Opa a ni." tiin a chhang a. "Anih leh khawnge a pasal hi a awm a?" tiin Nathana chuan a zawt leh a. "Vawiin tlai khan hna vangin a zin chhuak a, mahse tunah a rawn let leh mek a ni awm e." tiin a chhang a. "Motor a khalh laiin in va hrilh tihna em ni?" Nathana chuan a ti nang nang mai.

"Keini chuan hrilh love, a panic anga a rawn accident mai ang tih pawh kan hlau lutuk. Mahse an thenawmte zing ami hian an lo hrilh leh hmanhmawh a, a zialo khawp mai." tiin a chhang leh a. Nathana chu a ngawi vang vang a, "Hawh teh Bella, Johnny-a chu i va kawm teh ang." tii choka lamah chuan a phei a, ka zui ve nghal bawk.

Chokaah chuan dawhkan bawh hian Johnny-a chu rilru hah hmel tak hian a lo thu a, police pathumin an lo dinchilh a. A bulah chuan Nathana chu ava thu a, "Johnny, zawhna zawh che kan duh a ni." a han ti dam diai a. Mit bui vek hian Johnny-a chu a rawn hawi chhuak a, "Ka pu, ka thah a ni lo..ka thah a ni lo tak tak." tiin a tap tuau mai.

"Anih leh tu thah nge ni ang?"

"Ka hre lo ka pu, ka thah a ni lo."

"He in atanga chhuak hnuhnung bera an hmuh chu nangmah i ni sia, midang tumah an lut chhuak lai hmuh a ni tawh lova. Chuvang chuan nangmah bak chu rinhlelh tur dang an awm lo, Johnny...engemaw tal chu hriat i nei ngei ang."

"Ni e, kal chu ka kal ngei alawm. Mahse ka kalna chhan chu thildang daih a ni, ka pu."

"Eng thil dang maw?"

"Hmanzanah ka len laiin ka jacket ka hawn theihnghilh a, chumi lam tur chuan ka kal a ni. Hei..tuna ka hak mek lai hi a ni nge nge asin, ka pu." Johnny-a chuan a han ti leh hluam hluam a. Nathana chuan a aw a han thian leh deuh kharh kharh a, "Cathy nen hian enge in inlaichinna?" tiin a han zawt leh a.

"Ka thianpa, ka best friend nupui a nia. KAn inkawm ho fova, ka thiannu leh ka unaunu ang chiah a ka en a ni." tiin Jonny-a chuan a chhang leh a. "A awmzia chu..Opa..Cathy pasal hi i thianpa maw?" tiin a han zawt leh a. "Aw ni e, tette atanga inthian tha chho char char kan nia, Cathy pawh hi college kan kal laia ka tih pui a ni nghe nghe asin. Engti kawng mahin ka thianpa nupui hi ka that lovang, ka pawi pawh a sawi ngai hek lo." tiin a tap zawih zawih mai.

DSP chuan zawi sap hian, "Cathy nu leh pate'n FIR an rawn theh lut nghal a, chuvang chuan thu thar awm hma chu Johnny-a hi main suspect a ni." a rawn ti a. "Anih chuan, case chinfel a nih hma chu jail ah a awm hrih dawn tihna em ni?" tiin ka lo zawt ve vat a. "Johnny-a hian lawyer a nei a nih chuan court ah rel fel tur ala ni ang, mahse chumi hma zawng chu police custody ah a awm angai." tiin DSP chuan min chhang a.

Johnny-a chu rilru nat hmel tak hian a lu a dawm a, "Nilo, ka thah a ni lo. Ka thah a ni lo tak tak, tumah ka that lo." tiin a indawm kun tlawk tlawk a. NAthana chu a rawn tho chhuak a, "Khawnge CAthy nu leh pate chu an awm?" tiin a zawt leh a. "Anni pawh khawdang mi an nia, naktuk zing dar 4 velah an rawn thlen hman kan beisei." tiin DSP chuan a chhang a.

*****************************

Minute 10 vel a ral leh a, chu tualthahna case buaipui chuan kan la titi nasa mai. Chutah pawn lamah chuan thawm a rawn awm ta nak nak a, mipa au vak vak ri kan hre bawk. Kan va tlanchhuak ve nghal a, Cathy pasal Opa a lo ni. "Nilo...duhtak, min luh tir ru, khawngaihin min luh tir ru." tiin a lo au vak vak a, a tap nasa hle bawk.

Constable ho chuan an lo dang a, "Lo luh tir rawh u." DSP chuan a han ti a, constable ho chuan an thlah ta a. Chuveleh rang lutuk in Opa chu a rawn tlan lut a, "Nilo..bawihte..nilo." tiin room lamah a tlan lut nghal. Mahse room erawh a ruak vek tawh, a chhan chu post mortem turin a nupui ruang chu phurh liam a ni daih tawh a ni.

"Khawnge..khawnge? Khawnge ka nupui?" tiin a au vak vak a, Nathana nen chuan kan va lut a. "Insum rawh...hah dam phawt teh." tiin Nathana chuan Opa darah chuan ava vuan a. Opa chuan a lo vvai kiang a, "Hahdam turin min ti amaw? Khawnge ka nupui a awm? Mawhh?" tiin a lo vin hrep mai.

"Post mortem tura phurh liam a ni tawh." tih ringawt chuan NAthana chuan a chhang a. Opa chu a meng phawk nasa mai, "Maw..ka nupui...post mortem maw? Nilo, a ni thei lo..." tih leh tlan chhuah a rual lehnghal a. Kan umzui ve nghal a, mahse choka lam a va hawi phei zeuh chu a thianpa Johnny-a chu ava hmu a, a ding chat mai.

Chokaah chuan Opa chu ava phei a, "Johnny...Johnny, khawnge ka nupui? Khawnge Cathy a awm? Enge thil awmzia hi?" tiin a sawi vak vak a. Johnny-a chuan zawi sap hian, "Thianpa, ka that lo. Ka thah a ni lo, min ring hram rawh." a lo ti tham tiak mai. Mit khap miah lo hian Opa chuan Johnny-a chu a en a, a chil a lem dawk a.

"Jo...Johnny, enge i sawi awmzia? Ka nupui...a thi amaw?" a ti bah nuai a, a tawng tha hleithei lo. "Johnny-a hi Cathy thih hma a in in atanga chhuak hnuhnung ber a ni a, amah hi kan main suspect chu a ni." DSP chuan a han ti leh a. Opa chu mittui tla zawih zawih chung chuan a lu a thing a, "Nilo..Johnny-a'n chutiang thil a ti lovang. Johnny, i tih a ni lo tih min hrilh rawh..khawngaihin." a han ti leh lawm lawm a.

Johny-a pawh chuan tap chung hian, "Aw nilo, ka thian...ka tih a ni lo." tiin a chhang a. Chutah vin zet hian Opa chuan, "Anih chuan tu tih nge? Sawi rawh...i chhuak hnuhnung ber a, chuvang chuan i hre ngei tur a ni. Min hrilh rawh, Johnny?" a ti ta khur khur mai. Hlauh hmel tak hian Johnny-a chuan, "Ka hrelo, thianpa..ka hre lo tak tak." tiin a chhang a.

Chutah le, Opa chuan Johnny-a kawr awm chu a tham a, "I hria..sawi rawh. Anih chuan engvangin nge kan inah hian i kal, ka zin dawn tih i hriat vang a ni tiraw? Chu chu ramchangah la in nang hian i that tihna em ni?" a ti leh hrep a, constable ho chuan Opa chu an man bet nghal vat a. "Ka jacket hi ka theihnghilh a, ka va lam ringawt alawm, thianpa." inthiam loh hmel tak chuan Johnny-a chuan a ti lawm lawm a.

"Station ah va hruai hrih mai rawh u, tunah chuan a la in control thei dawn chuang lo." tiin DSP chuan a naute chu a hrilh a, Opa chu Station lama phur phei a ni ta a. "DSP Sir, Johnny-a rawn chhuak lai lo hmutu chu tunge, helai hnai velah hian ala awm ve em?" tiin Nathana chuan a han zawt leh a.

"Nichin kha chuan a awm kha, lo kal sawn hrih suh ka tih kha...pawn velah sawn a awm maithei." tiin DSP chuan a chhang a. NAthana chu a chhuak nghal a, DSP nen chuan kan zui ve nghal bawk. Pawnah chuan kan chhuak a, DSP chu a han hawi kual a. Police motor bula putar pakhat lo ding chu a kawk a, "Saw pa saw  ani e, Sir." a han ti a.

Chu putar chu kan va pan a, "Ka pu, nangmah hi maw Johnnny-a rawn chhuak lai hmutu kha?" tiin NAthana chuan a han zawt a. "Aw ni e." tiin a lo chhang a. "Detective Nathana ka ni a, zawhna tlem zawh che ka duh a ni." tiin Nathana bawk chuan a badge leh ID te chu a han hmuh a, "Aw le, min zawt rawh, ka pu." tiin chu putar chuan a lo chhang leh a.

"Tunge i hming?"

"Khuma ka nia, ka pu."

"Awle, Pu Khum ka ti mai ang che aw...enteh Pu Khum, Cathy te nupa hi i hrechiang hrim hrim em?"

"Hrechiang han tih ah, an in bul lawkah khuan kan awm a. Kan innel em em lo nain inthenmawn ta na na na chu kan inbe ve fo mai, vawi hnih thum vel chu ka leng ve tawh nghe nghe."

"Anih engtia rei nge an inneih tawh?"

"Kum chanve a tling tawh angem aw..tiang vel lek chu ala ni."

"Anih chuan hetah hian an awmsa nge, an indang nge?"

"Indang han tih ah..hei hi Opa in bik a nia. A nu leh pate hi an boral tawh tih chu ka hria a, mahse ka hre thui lutuk lo. HEtah hian nikum atang khan a rawn awm a, chuan nupui neiin tihian a rawn awm ta a ni."

"Anih leh dar engzat velah nge Johnny-a chu i hmuh?"

"Dar 7 leh a chanve velah khan."

"A lut lai i hmu em?"

"Aih, a lut lai chu ka hmu lo, ka pu."

"Anih a jacket hak lai saw a rawn ha chhuak ngei em?"

"Ha chhuak e, ka pu...saw jacket ngei saw a rawn ha chhuak."

"Anih chuan an inthlah lai velin rinhlelhawm ang deuh ten an awm em? Ka sawi awmzia chu an inthlah satliah nge, inngaizawng ang deuh ten an awm em?"

"Aih ka pu, CAthy phei chu ka hmu lo hrim hrim zawk. Johnny-a saw a rawn chhuak a, tichuan a car lam a pan leh a, chuzawng chu a nimai."

"A tha e, i kal thei e."

Pu Khuma chu a kal sawn a, "Cathy-i'n pawn thleng a thlah lo a nih chuan Johnny-a hian a that zo chiah anga, a intihfai zawh velah a chhuak leh pawh a ni thei tho mai." DSP chuan a lo ti nuah nuah a. "Johnny-a awmdan en hi chuan a pha nasa bawk si a, a mitmeng ka en pawh khan dawt a sawi chu a ang lo khawp mai." NAthana chuan a han ti ve bawk a.

"Mahse Sir, tualthattute tluka actor tha he khawvelah hian an awm hleinem, Johnny-a pawh chung lemchanthiamte zinga pakhat chu a lo ni ve reng thei tho asin." DSP chuan a han ti leh a. "Ni ve thei tho mai, Johnny-a hi tual thattu a nih chuan chhan tha tak a nei ngei bawk ang." ka lo ti ve a.

"Psycho killer, serial killer emaw phuba lakna...engemaw ber hi a ni thei." Nathana chuan a han ti leh a. "Sir, Johnny-a leh Cathy hi a ruka inngaizawng reng te hi an lo ni reng lo maw? An inhnial buai anga, engemaw vangin..tichuan tum loh deuh hian Johnny-a hian a that palh anga, a tlanchhia pawh a ni thei tho." DSP chuan a han ti a.

"DSP Sir, Johnny-a hian nupui a nei tawh em?" tiin NAthana chuan a han zawt a. "Nei tawh chu a tih kha.." tiin a lo chhang a. "Anih leh khawnge a nupui chu?" Nathana'n a tih lai chuan hmeichhe rawn au vak vak ri hi kan hria a. Kan va hawi phei chu inchhunga luh tum, hmeichhe pakhat, constable ten an lo dan mek chu kan hmu a.

"Johnny, Johnny, Duhtak..nilo..ka pasal ka hmu duh." tiin chunu chu a au vak vak mai a. Nathana chu za lo tak chuan a khi suk a, "Rin aiin a chhanna kan va hmu rang ve." a han ti zawi sap a. "Sir, zawhna i zawt duh em?" DSP chuan a han ti leh a. NAthana chu a ner sak a, "NGawiteh, lo en ve teh i tih vang mai mai ania ka lo kal, ka case a ni hrih hleinem." tiin a chhang a.

"Ka hrilh che chuan i puihna ka mamawh tihna a ni mai alawm, ka mi rin ber i nia." tiin DSP chuan a han fak vei luam a. Nathana chu a ngawi vang vang a, "Helai hmun hi chu lo ching fel la, Bella-i nen stationah va kalin CAthy pasal kan va be zawk ange, a biak tlak tawh em ang chu." a han ti nuah nuah a.

"A tha e, ka lo buaipui vek ang. I mamawh chu rawn sawi leh mai rawh, ka lo ngaichang ang che." tiin DSP chu a kal a, "Keini pawh kan kal ve nghal dawn mi?" tiin Nathana chuan min han zawt a. "Hna thar kan nei angin ka nu bulah i sawi vel a, en ve hrim hrim tura a rawn sawm vang che a ni reng sia, nge mi tih derh kher a?" tiin NAthana chu ka han melh deuh khur a.

A nui var var a, "Aww..min kalpui ve la ka ti..chubakah partner kan nia, kan kal dun zel tur a ni dawn lawm ni?" a han ti vel deuh duah a. "Nia, ni teh se. Anih chuan enge Opa chu i va zawh dawn?" tiin ka han zawt leh a. "Kal phawt ang, hei zan a rei." tiin motor lam a pan hmak mai, ka va zui ve a.

***********************

Station chu kan thleng a, SI pakhat hian min rawn pan nghal a. "Sir, DEtective NAthan MAlsawmkima i ni em? REtired Senior Superintendent of Police?" a rawn ti nghal zung zung a. "Ni e." tih ringawt chuan Nathana chuan a chhang a. Chuveleh salute a pe nghal a, "Ka hmu che chu ka lawm e, Sir. Ka ngaisang lutuk che, Sub-Inspector Zorimawia ka ni e." polite tak chuan a han ti deuh thlap a.

Nathana chuan han chhan vak ngaihna pawh a hre lo, "E...aw, ni e. DSP in a rawn phone che u em?" a han ti bah deuh nuai a. "Aw phone e, in lo kal dawn tih hi min hrilh lawk alawm." tiin SI Mawia chuan a chhang a. "Anih chuan tunah khawnge Opa chu a awm?" tiin a han zawt leh a. "Inchhung lamah sawn a awm, min lo zui ru." tiin SI chuan a chhang leh a.

Nathana nen chuan Station chhungah chuan kan lut a, Opa chu a lo thu ngui bar mai. Kan va kal hnai a, "I tha em, Op?" tiin Nathana chuan a han zawt a. Opa chu a mittui a tla zawih zawih a, "Aih ka pu, ka awih thei lo...ka awih thei hlawl lo a ni." a ti tham tiak a. "Anih leh Johnny-a tih a nih i ring tak tak em?" tiin a han zawt leh a.

A lu a thing a, "Ka ring phal lo, a ti duh lovang. Tual that duh tur khawpa huaisen a ni lo, ze zawi tak leh dawih ve tak a ni a, ka thianpa hian ka nupui hi min thah sak lul lovang." tiin Opa chuan a chhang a. "Finger print zawng zawng pawh thup vek a ni a, mi fing tak a ni he tualthattu hi. Johnny-a a nih i rin loh chuan rinhlelh dang i nei em?" tiin Nathana chuan a han zawt leh a.

"Finger print thup nachang a hriat phei chuan Johnny-a chu a ni lo tawp ang..ka pu, rinhlelh tur awm ang ka hre lo a ni." tiin a chhang leh a, a mittui chu a hru zeuh zeuh bawk. Nathana chu a thaw hak a, "Detective Nathan Malsawmkima ka ni a, hei hi ka thiannu Bella-i, ka partner a nia. Kan pahnih hian he case hi kan kutah a la awm hauh lova, a chhan chu private Detective kan nih vang a ni." a han ti deuh duah a.

Opa chuan a en a, "Chuan..engtin zel?" a lo ti deuh hu mai. "Op, i nupui thattu hi chhui turin keini hi min duh em?" tiin a han zawt leh a. OPa chu a ngawi vang vang a, "Engzat nge pawisa ngai?" tiin a zawt let daih mai. Nathana chu a khi suk a, "Chu chu nakinah kan sawi dawn nia, i duh nge duh lo..sawi phawt rawh." a han ti leh a.

Opa chuan a lu a bu nghat a, "Aw duh e, ka pu. Pawisa chu engzat pawh ni rawh se, ka nupui thattu hi a nung chung ngeiin min man sak ang che u." tiin a insehruh nasa kher mai. Nathana chuan a lu a bu nghauh ngauh a, "Anih chuan he case hi kan kutah a awm ang a, kan kutah i hlan tih police te hnenah hriat tir bawk ang che." a han ti leh a.

"Awle, ka pu." tiin Opa chuan a chhang a, an in chibai ta a. Tichuan Nathana nen chuan case thar kan nei leh ta reng mai, tun tum chu kiddanping ni tawh lovin tualthah case bawk kan chhui leh dawn a nih chu. "Engpawh nise, ka pu. Ka nupui hmel chu ka hmu duh a ni, khawngaihin.." tiin tap chung chuan Opa chuan a ngen lawm lawm a.

Nathana chuan zaidam tak hian, "Lungngai suh...i hmu em em ang. Min lo nghak lawk dawnnia.." tih pah chuan min signal zeuh va, pawnah chuan kan inzui chhuak a. SI Mawia pawh chu kan ko phei ve a, "Post mortem a zo tawh em?" tiin NAthana chuan a zawt a. "La zo lo deuh, result pawh khawvar hunah chauh aniang." tiin SI Mawia chuan a lo chhang a.

"A tha e, Opa kha lo va hrilh la...a nupui ruang a hmuh duh chuan ala nghah deuh angai dawn a, in lamah a va phei duh a nih chuan tunah pawh kan phei pui thei a, chu chu eng zawk nge a duh va zawt teh." tiin Nathana chuan SI a tir a, a kal ve nghal mai bawk. "Sir, he case hi a harsa hmel i ti em?" tiin ka han zawt deuh tawp a.

A zi mar deuh ar ar a, "Diktak chuan crime scene ah hian a thleng hma pawl hi ni thei ila chuan a awlsam thin tur mawle, police ho hian an lo khawih danglam hman ziah hi a buaithlak thin ka ti." a han ti deuh nuah nuah a. SI Mawia chu a rawn let leh a, "Sir, a nupui ruang chu nghah a duh zawk a nih chu." a rawn ti a.

****************************

Minute 20 vel hnuah chuan ruang chu a rawn thleng ta nge nge a, ruang dahnaah dah phei nghal a ni a. SI MAwia chuan Opa chu ava ko va, tichuan ruang dahnaah chuan kan hruai phei ta a. A nupui ruang chu Opa chuan a hmu ve ta, a kuah a, a tap zawih zawih mai. A be mawlh mawlh bawk a, lo awm ve reng pawh a nuam lo hial zawk.

A duh tawka a mangtha hnuah chuan pawnah chuan kan chhuak leh a, "Tikhan a ruang kha kan hawn phei nghal thei tihna em ni?" tiin Opa chuan Nathana chu a zawt a. "Doctor khan darkar khat hnuah a theih ang a tia, la nghah deuh hret chu a ngaih hmel." tiin NAthana chuan a lo chhang a.

"Inhnit feih feih pah chuan Opa chuan, "Tu pawi nge maw kan sawi le? Kum khat em pawh kan la innei lo asin mawle, enge maw ka tihsual ni?" a ti vawng vawng mai. "I hnathawhna velah nangmah itsiktu emaw te i nei em? I thiante ah pawh nise, hmelma i nei hrim hrim em?" tiin Nathana chuan a han zawt a.

Opa chuan a lu a thing a, "Hmelma ka neih ka hre lo, ka hnathawh puite lah nise..chutia min thik turin engmah ka ni bik bawk silo, tu tih nge ni thei ang tih hi ka ngaihtuah thiam lo a ni, ka pu." tiin a chhang a. "Anih chuan in in lamah kan phei angai ang, DSP te an la awm mek a. Chuan i thianpa Johnny-a kha, i nupui CAthy nu leh paten FIR an rawn theh lut a, Aizawl lam an rawn pan mek bawk." Nathana chuan a han ti ve leh a.

Opa chu a hlauhthawn hmel kher mai, "Nilo...CAthy nu leh pate maw? Ka van hmu hreh tak...chuan,  Johnny-a lakah FIR an theh luh chuan Johnny-a hi jail a tang dawn tihna em ni?" tiin a mangan hmel em em a. "Johnny-a hian lawyer a hmuh angai, anih loh chuan court ah amah dinsak tu tur an awm ve dawn lo." tiin Nathana chuan a chhang a.

Opa chu a ngawi vung vung a, "Ka pu, khawngaihin lawyer min zawn sak rawh. Pawisa chu ka tum vek ang, Johnny-a hi kan chhan angai a ni." a han ti leh chul a. Mahse mak ka lo ti tlat, tinge Opa hian a thianpa, rinhlelhawm ber hi a t(r)an tlat ni? Ka lo inrawlh vat a, "Op, tinge Johnny-a pawh chu i ven em em a? Rinhlelh ber ania, mahse nangin.." ka sawi zo hman lo.

"A ni lul lovang, nichin kha chuan ka rilru buai lutuk ka insum zo hman lo mai mai a nih kha. Sawi tak ang khan ka thianpa mai nilo, ka unaupa ang chiah a ka en, tette atanga inkawm chho char char kan ni a. Chuvang chuan amah a ni thei lo hrim hrim, kan chhanhim a ngai a ni." tiin min chhang a.

"Engpawh nise, a thah a ni emaw, ni lo emaw...Johnny-a pawh kan kawm chian angai dawn a, a ni nge nilo chu kan chhui reng bawk dawn. I duh anih chuan lawyer chu ka zawn sak em em ang che, mahse thiamthu sawi tur a neih nan chuan inkawm ho phawt angai dawn ania." NAthana chuan a han ti ve leh a.

"Khalam kha chu a lungngaih thlak loh, lawyer hmuh vat chu a pawimawh ber a nih chu." Opa chuan a han ti leh a. Nathana chuan SI MAwia chu ava pan a, minute 2 vel an inbiak hnu chuan a lo let leh a. "SI kha lawyer be turin ka tir a, naktuk lamah post mortem result te han chhuak phawt se. In lo inbe hlawm dawnnia, in inlamah chuan phei phawt ang." a ti a.

Kan kal tur chiah chu police ho chuan Johnny-a chu an rawn hruai lut a, Opa nen an inhmu chiah chu Johnny-a chu a tal vak vak a. "Nilo..Op, thiana..min chhan rawh, ka thah a nilo..an hresual a ni, engtin mah ka ti lo." a ti lawm lawm a. Opa chuan en pawh a en thei lo, a mittui a tla zawih zawih mai.

Johnny-a chu an hruai tlang a, keini pawh chu kan chhuak a. "Ka motorah hian lo chuang ve la, kan pathumin kan phei ho vek dawnnia." Nathana chuan a han ti leh a. MAhse Opa chuan Station lam chu a melh let leh thin a, "Ka pu, Johnny-a kha kut an thlak angem?" tiin mangan hmel tak chuan a zawt a.

"Thlak lovang, SI bulah kut thlak lo turin ka lo hrilh dawnnia, ngaihtuah duh suh." tiin a chhang a. Opa chu a ngawi vang vang a, a thaw leh hak thin. Tichuan motor ah chuan a lut ve ta a, an in lam pan chuan kan tlan ta a. Kalkawng tluan chuan a mittui a tla char char a, a khat tawk chuan a in hnit leh faih faih thin bawk.

************************************

In chu kan thleng a, veng chhung tlangval tlawmngai ho chuan inchhung chu an lo sing sa mek a. Crime scene ah hian engmah evidence emaw, clue emaw hmuh a nih loh avang chuan inchhung chu sik sawi danglam theih in DSP chuan a lo remti hi a ni awm a. Nathana ngaihdan chu a ni chiang lo ni ngei tur a ni, constable'i'n chanchin a hrilh chuan, "A va tul lo e awww.." a ti vawng vawng mai.

Johnny-a nupui, Kimtei chu thenawmnu ho chuan an lo hnem mawlh mawlh a. Ka sana ka han bih a, zan dar 11 a ri tawh. Kimtei chuan Opa a rawn hmuh veleh chuan a rawn tlan phei a, "Op..Op..ka pasal tih a ni lovang. Nang pawhin i ring lo tiraw, i ringlo tiraw Op?" tiin a rawn tap vak vak mai.

Mahse Opa chuan a chhang lo, "Op..a tette atangin i hrechiang a, i thianpa a ni a, a tih a ni dawn lo tih i hria tiraw? Min hrilh teh, khawngaihin?" tiin a tap zawih zawih a, nu ho chuan an lo pawt hrang vat a. Choka lamah chuan kan phei ta daih a, Opa chu a hmel en reng reng pawhin a beidawngin a chau tih a hriat takzet.

"Khawiah nge i zin dawn reng reng a?" tiin NAthana chuan a han zawt a. "Kan office thilah ania, Champhaiah zin angai a...Aizawl atang khan a thih thu min rawn hrilh khan ka thleng hla hman viau tawh a, theih tawpa chakin ka rawn tlan leh leh nghal a ni." tiin Opa chuan a lo chhang a. "Anih Jonny-a te sawn fa an nei tawh em?" tiin a han zawt leh a.

"Kimtei sawn fa a nei thei lova, keini aiin kum 2 velin an innei rei tawh zawk, keini chu hmanni deuh lawk a ni." tiin a chhang leh a. "Anih leh tunhnai velah i nupui hi mize danglam thut emaw, i laka zep nei anga a awm i hria em?" tiin a zawt leh a. Opa chuan a lu thingin, "Kan hlim dun lutuk, ka zin hlanin a thiante nena lo riah ho an tum nghe nghe asin." tiin a chhang leh a.

Nathana chuan a lu  ahan bu nghauh nghauh va, "Anih leh ngaihthlak dan lo thiam la...kum engzah i nih in nge i nu leh pa ten an boral san che?" a han ti leh a. Chutah mak ti hmel deuh hian Nathana chu a en a, "Engtin nge ka nu leh pa ten min boral san tawh tih i hriat a?" a ti deuh hu mai.

"In thenawmpa, Pu Khuma'n min hrilh alawm."

"Anih tak chu..kum 20 ka nih in."

"Unau pianpui dang i nei em?"

"Aw nei e, mahse kan khuaah an awm vek."

"Kan khuaah a? Aizawl mi i ni lo maw?"

"Ni love, Thingdawl khua daih ka nia. Ka nu leh pa ten min thihsan hnu khan ka patea ten min awmpui a, mahse hna avangin mahniin Aizawlah in ka rawn luah a, he inah hian ka rawn awm ta a ni."

"Anih leh i u te nen chuan inhmuh thiamlohna in nei em? I patea te nupa chungah pawh?"

"Aih neih awm pawh ka hre lo, an rawn zin ve zeuh zeuh fo alawm."

Chutih lai chuan Nathana phone chu a rawn ri a, minute 2 vel a biak hnuah chuan phone chu a dah a. "OP, court hi naktuk tuk lehah trial neih chauh tur a ni a. Tunah khan lawyer chu ka be zo chiah a, Johnny-a erawh tualthattu suspect a nih avangin bail theih lohvin an siam a. Court-a thiamthu sawi theih nan naktukah in inah a rawn kal dawn a, keini pawh kan lo kal ang." Nathana chuan a han ti a.

"Awle ka pu, dar engzat velah nge?" tiin Opa chuan a lo zawt a. "Dar 8 ah a ti a nih chu...chuan Station lamah kan phei leh anga, Johnny-a te nen pawh kan titi ho bawk ang. Tunah chuan hei, police tlem azawng an la awm bawk a. Keini chu kan haw phawt anga, naktuk lamah chuan kan inhmu leh dawn nia." tiin a chhang a.

Chutih lai chuan ruang chu a rawn thleng ta a, tlangval te chuan an zawn thla a. An tah nghal liam liam bawk, "Anih chuan ka va phei ve ange, in chungah ka lawm takzet a nia." Opa chuan a han ti a. "Lungngai lola, tualthattu chu kan chhui chhuak em em ang." tiin Nathana chuan a han fuih leh a, tichuan kan hawsan ta a.

*****************************

TO BE CONTINUE