WILD ZONE : SEASON 1 (Episode - 19) Written by : Aaron Malsawmdawngzuala EXPECT THE UNEXPECTED - 3

 WILD ZONE : SEASON 1

(Episode - 19)

Written by : Aaron Malsawmdawngzuala

EXPECT THE UNEXPECTED - 3

*********************

Opa te Office chu ka thleng a, ka kal chhan leh ka nihna te, case chhui lai mek ka nih thu te chu ka hrilh a, an manager nen chuan office ah chuan kan inkawm a. "Opa hi chu a taima a, a fel bawk a. Kei ngei pawh hian ka duhsak bik, project lian tham tak pawh nise a tlaivar pui thak thak a, tiang khawpa fel leh taima chuan hmelma a neih ka ring lo." tiin Opa chanchin chu a sawi a.

"I duhsak bik a, chuvang chuan a thawhpuite zingah hian thiktu an awm te hi a ni ve thei tho ania." tiin ka han hnial deuh va. "Ka staff  te zingah hian chutiang ti duhtu tur awm ang ka hrelo, ka fakna nilo se, mi taima tak tak vek an ni. Opa hi an nel em em a, hawtu an awm ka hrelo. Mahse i duh chuan a mal te te in i kawm thei ang." tiin Manager chuan min chhang a.

Staff  ho chu a mal te te chuan ka han kawm a, mahse hmasawnna pakhat mah hmuh tur a awm chuang lo. Engmah hriat belh em em nei ta lo chuan office chu ka chhuah san a, ka phone a rawn ri a. Ka han en chuan Nathana a lo ni, "Hello Sir?" tiin ka la vat a. Mangan hmel tak hian, "Lo phei vat teh...problem a awm." a rawn ti ta mai a.

"Eng problem maw? Sir?"

"Phone-a sawi chu a ni lo, rawn hmanhmawh rawh."

"Khawiah nge ka rawn phei dawn?"

"Aww..Opa te inah, hmanhmawh rawh."

"Awle, ka lo kal nghal e." tiin phone chu ka dah vat a, min ti hlauthawng kher mai. KA scooty ah chuan ka lawn kai nghal a, chak tak chuan ka tlan a. Ka rilru a ti phili buai vek, mi rawn vin titih lehnghal kha ania. Ka tlan chak fer fer bawk a, ka thleng rang angreng kher mai. Tlai lam a ni der tawh a, khua pawh a duai tan tawh.

************************

Inchhungah chuan kik pawh kik lovin ka lut tlang nghal a, choka lamah chuan Nathana, Lawyer Bena leh Opa te chu an lo thukhawm a. Ka va phei nghal a, "Engthil nge thleng a, Sir?" tiin Nathana chu ka va zawt nghal a. Nathana chuan zawi te hian, "Cathy nu ten lawyer an lo ruai ve a, evidence tha tak an nei a ni." a ti zawi sap a.

"Eng evidence maw?" ka ti deuh hu mai. "Cathy rawmawl ah laiah fingerprint thar hmuh a ni a, Johnny-a finger print nen a inmil a ni." tiin min chhang ta mai a. Mak ka ti kher mai, "Eng rawmawl maw? Enge awmzia..Cathy thawmhnaw kha a tirah an check miah lo tihna em ni?" tiin ka zawt leh a.

"Keini pawhin chu chu mak kan ti reng alawm, tu emaw thil tih chawp pawh a ni maithei a ni." tiin NAthana bawk chuan min chhang leh a. "Police hote zingah hian phatsantu an awm a nih ka ring tlat, Pu Nathan...tualthattu hian thamna a pe a ni ngei ngei ang." Opa chuan a lo ti ve bawk a. "Johnny-a chu a nih i la ring chuang lo em ni?" tiin Bena chu a lo vin deuh hlur mai.

"Nilo..ka la ring chuang lo." tiin Opa chuan a chhang a. "Thamna pe theitu tur chu tualthattu chauh a nilo, Cathy nu leh pate pawh an ni thei." Nathana chuan a han ti a. Opa chuan a en hu a, "Ca..Cathy nu leh paten maw? Chutiang ti duh...tur an ni pawn ka hre lo." a ti bah deuh nuai a. "Anih chuan chu evidence chu tinge an lawyer sawn a neih chat theih?" tiin Nathana chuan a han zawt a.

Opa pawh chu a ngawi vang vang mai, "Lawyer thil tih vek a nih dawn chu." Bena chuan a lo ti ve leh a. "Lawyer chu an tih tir pawh a ni thei tho." ka lo ti ve bawk a. Chutih lai chuan kawngka a rawn ri bur a, nupa upa ve tawh lam hi an rawn lut a, an thinrim hmel em em mai lehnghal. Putar zawk chuan, "Tenawmpa, ka fanu thattu chu hum him i la tum talh amaw?" tiin rawn khawih a tum ta mai.

Cathy nu leh pate ngei an ni tih a chiang ta, mahse NAthana leh Bena te chuan an lo dang vat a. Cathy nu pawh chuan lo thelh ve in, "Mami pa, insum rawh." a lo ti ve bawk a. "Enge awmzia? Khatia i rawn rik chiam mai le?" tiin Nathana chu a han vin deuh thak a. Cathy pa chuan rum zet hian NAthana chu a melh a, "Nang..nang hi em ni kan fanu thihna case chhuitu chu...evidence kan hmu, kha en rawh." tiin an nu bag chu a zen rawk rawk a, file hi a rawn phawrh chhuak a.

Nathana chu a pe a, kan han en chuan Cathy iptea rawmawl ah finger print pahnih hmuh a nih thu leh, chu finger print te chu Cathy leh Johnny-a finger print a nih thu te chu a lo inziak a. Chutah coat suit ha, patling lam hi a lo lut a. Cathy pa chuan, "Hei hi kan lawyer chu a nih hi....ani hian evidence tha tak a nei a ni." a han ti leh pang pang a.

Lawyer chuan Nathana chu a en a, "Hello Detective NAthan, Lawyer Francis-a ka nia. Nice to meet you.." a rawn ti deuh thlap a. "I sawi tum chu sawi mai rawh." Nathana chuan a lo ti hmak mai. Francis-a chu a khi suk a, "Cathy rawmawl kha cotton atanga siam a ni a, cotton ah hian puan dang aiin fingerprint a lang rei zawk tih chu kei aia i hriat ka ring." a han ti deuh kher a.

Cathy nu chu rawn tawng chhuak ve in, "I lo mak hle mai, Op...i thianpa, i thianpa a nih avangin i nupui rawng taka thattu chu i humhim amaw? Cathy hi Johnny-a hian a hel reng thin tih te hi i hrethiam ve miah lo em ni? Ka fanu in a nunna a chan phah hi i hria em?" tiin Opa chu a vin hrep mai a.

"Mami nu, chhuak ang...naktukah Johnny-a chuan a chantawk chu hmu rawh se." tiin lawyer Francis-a te nen chuan an pathum chuan an chhuak a, kawngka an la khar ri bur zui. Opa chu a thu hnawk a, a lu dawmin a tap zawih zawih mai. Bena chuan a darah a vuan a, "Lungngai suh Pu OP, an evidence neih te kha chu kan sawi bo vek dawnnia." tiin a hnem a.

"Chutia darkar 12 vel liam tawh hnu a Cathy thawmhnaw a rawmawl hmuh leh thut te chu..amak duh awm hle mai. Keini lam pawhin zaninah kan lo chhui chiang ange, thil diklo a awm tlat." NAthana chuan a han ti nuah nuah a. Bena chu a han ding deuh hluai a, "Keipawh ka haw phawt ange, zanah chuan kan inhmu dawnnia." tiin a chhuak ta a.

"Ka ring chuang lo, Johnny-a tih a nih hi ka ring chuang lo." tiin Opa chuan a mittui chu a hru a. "Tih chawp pawh a ni thei, sawi tak ang khan lungngai lo la, kan theih tawp kan chhuah dawnnia." tiin Nathana chuan a hnem a. "Zanin chu dar engzah nge niang?" tiin Opa chuan a han zawt a.

"Dar 7 ah kan ti dawnnia, keini pawh kan han haw phawt ange." tiin a chhang a. "Awle, ka lo inpeih fel ang keipawh." tiin Opa chuan a chhang a. Nathana nen chuan kan chhuahsan a, lirthei hrang ve ve chuan kan haw ta a. Keipawh chu inah ka haw tlang a, ka inbual fai a, chaw te ka in ei puar ve a.

***********************

Dar 6 leh minute 15 vel a rik chuan ka insiam mawlh mawlh a, ka nu chu a rawn lut a. "Saw i boss Nathana a lo thleng leh der tawh ania, i va inpeih har bik thin ve.." a rawn ti deuh hlur a. "Enge maw a hman hma viau zel le..thawt thawt mai." ka ti rilru nauh nauh va, ka insiam zo chu ka va chhuak a.

Kan sitting room ah chuan thuin a phone a lo khawih mual mual a, "I va rawn hma ve a...chaw te i ei hman meuh maw?" tiin ka han zawt a. "Bella, lo thu lawk teh." a lo ti daih mai. A bulah chuan ka va thu a, "Enge ni ta?" tiin ka zawt a. "Engemaw sawi lawk ka duh vangin ania ka lo kal hma ni...vawiin tlai khan DSP nen kan inbia a." a han ti te te a.

"Chuan engtin zel?"

"Evidence thar hmuchhuaktu kha amah a nih leh nih loh ka zawt a, amah pawhin a lo hre deuh chauh hi alo nia."

"Enge DSP chuan a sawi a?"

"A hmuchhuaktu chu SI Mawia a ni."

"MAwia...ehe, teh daih chuan.."

"Keipawhin mak ka tia, chuvang ania sawi lawk ang ka tih nachhan."

"Mawia chu DSP chuan a be mai lo em ni?"

"Ka hrilh theihnghilh daih che a, DSP kha an khuaah a zin angai a, chhungkaw thilah."

"Ava buaithlak lehzel...Mawia chu incharge ah a dah tihna ni maw?"

"Anih hmel..MAwia lah chuan chhualam tha lutuk a nei a, DSP zin mek lai a nih avangin DSP khan a phone a la thei lova, chu chu a hrilh mailohna chhan chhuanlamah a siam a ni chiang alawm."

"Anih chuan engtin nge kan tih dawn?" tiin ka zawt a. Nathana chu a ngawi vang vang a, "In then hrang leh mai ang....SI Mawia hi a night dawn a, chumi pah chuan Johnny-a pawh lo kawm tel tho la. SI Mawia pawh engtin emaw tak i dawp deuh dawnnia, kei erawh LAwyer te nen kan lo inhmu thung ang, chanchin chu kan inhrilh leh zel mai dawn nia." tiin min chhang a.

"Awle...i tih dan dan le." tiin ka chhang a. "Anih chuan ka kal lehnghal mai ang, ka lo va kal hma ange." tih leh a tho vut a. Ka nu chu room atangin a rawn chhuak a, "Aww..in chhuak dun dawn maw tia?" a rawn ti hu mai. "Ka kal phawt ange..hei kal hma ka ngai bik a." tiin Nathana chuan a chhang a.

Tichuan a chhuak ta a, keipawh chu ka mamawh ang te ka inpai fel hnu chuan ka chhuak ve ta a. Cathy nu leh pate zawk hi ka ringhlel rum rum mai, evidence an siam chawp anga, eng tin tin emaw Johnny-a hi thiamloh chan tir talh an tum ni ten ka hre mah zawk. Mahse mahni fanu te meuh chu tunge maw that duh ang le...anmahni an nih chuan chhan engemaw tak chu a awm ngei ang tia mahnia inbe mual mual chung chuan ka tlan zel a.

***********************

Station chu ka thleng a, inchhungah chuan ka lut tlang nghal a. SI MAwia pawh a lo awm ngei a, "Ehe DEtective? I lo thleng tawh maw?" a lo ti a. Ka ding deuh chat a, "Engtin nge ka rawn kal dawn tih i hriat a?" tiin ka han zawt a. "Sir NAthana'n min hrilh a." tiin min chhang a. "Umm a nih chu...khawnge Johnny-a chu a awm?" tiin ka zawt leh a.

"Chaw a ei kham ve deuh chiah a, interrogation roomah kan lo dah lawk a." tiin min chhang leh a. Interrogation room lam pan chuan ka va phei a, Johnny-a chu a lo thu ngui bur tawh mai. A hmaah chuan ka va thu a, "Chaw i ei puar tha maw?" tiin ka han zawt a. "Engmah ka ei thei lo, jail tan hi ka duh lo a ni, detective." beidawn hmel tak chuan a ti zawi sap a.

"Anih chuan finger print chungchang kha..enge awmzia?" tiin ka han zawt leh a. A lu a thing a, "An siam chawp bak a ni lovang, nizan khan eng rawmawl mah ka khawih lo...ka khawih lo tak tak." tiin min chhang a. "Mahse i finger print hmuh a ni a, i finger print an neih ngei a ngai dawn a, chu chu han sawi fiah teh." ka han ti leh a.

"Police zinga mi hian min frame talh a tum a ni, detective. Eng object emaw ber atangin ka finger print a la anga, tichuan rawmawl dang nen eng tin tin emaw an siam chawp a ni chiang lutuk." tiin a lungawiloh hmel kher mai, lungawina chi pawh va ni suh. "Anih leh police ho thil tih lo nita se, tu ber nge i rin?" tiin ka han zawt leh a.

"Mi hrang hrangin chaw min rawn pe a, eng eng emaw min sign tir bawk a, tu ber nge rin tur ka hre lo."

"Anih eng eng nge an khawih tir che?"

"Pen ka khawih hnem ber, paper nen."

"A dang engemaw, i fingerprint lakna tur awlsam deuh te an khawih ti che i hria em?"

"Ka chaw thleng a ni leh mai."

"Anih chuan...tu emaw talin glove a rawn bun em?"

Johnny-a chuan a lu a thing a, "Ka hre lo..an bun.." a tih lai chuan a ngawi thut a. Phawk hru hian min rawn en a, "SI..SI sawn vawiin khan engemaw min rawn sign tir a, tah khan glove a bun." a ti ta mai a. "DAr engzat velah?" tiin ka zawt leh nghal vat a. "Dar 1..dar 1 bawr velah khan ni ta in ka hria." tiin min chhang a.

Ka rin ang chiah a ni, SI Mawia hi an tham a nih ka ring ta chiah mai. "Anih leh Johnny, paper i vawnna lai vel chu fimkhur deuhin a keng em, i finger print awmna lai tur khawih fuh hlau deuhvin a keng em?" tiin ka han zawt leh a. "Chutiang erawh ka hre tawh mai lo, mahse glove var kha chu a bun chiang a ni." tiin min chhang leh a.

******************

Minute 5 vel kan inbiak leh hnu chuan Interrogation room chu ka chhuah san a, SI Mawia dawhkan lam pan chuan ka va phei a. Min lo hmuh veleh chuan, "A chhang tha duh che em?" tiin min lo nuih vel suk a. "Chhang tha duh e." tih ringawt chuan ka chhang a. "Lo thu rawh..thingpui te i duh em?" a han ti leh a.

A hma zawnah thut pah chuan, "Lo in ila..a pawi hleinem." tiin ka han chhang a. Thingpui la tur chuan constable pakhat chu a tir a, "Pi Bella, pasal i nei tawh anga tiraw.." a han ti mai chuh, chhemthei chu awm hnai se chuan ka hem nghal siah ang mawle. Mi inlak young ve mah nak alaia, "Hehe..nei love." tiin za lo deuh chuan ka khi suk a.

"Eee...animaw, min lo hrethiam dawnnia." tiin a inthlahrun hmel kher mai, mahse a inthlahrun tak tak pawh ka ring lo, a tilui ve hrim hrim a nih ka ring tho tho. "A pawi lo, midang pawh an ti fo alawm." tiin ka han nui lui leh a, tumah chuan an ti ngai tak tak chuang lo, a titu awmchhun ala ni hial ang.

"Khawnge Sir Nathana a awm a? In va rawn kal dun love?"

"Nia..Opa te in lamah a awm thung a, nakin deuhah ka va phei ve ang."

"A nih tak chu...saw thingpui pawh a lo thleng alawm, in ve phawt la, kan la titi ang chu."

Thingpui chu kan indun a, "Taka Mawia, engtin nge fingerprint chu inhmuh leh theih a?" tiin ka han zawt a. Thingpui chu a han lem deuh sak a, "Case kal lai ala nih avang khan Cathy thawmhnaw hak kha kan la dahkhawm a, tak khan rawmawl a lo ak reng a." tiin min chhang a. "Ava mak awm ve...a tir khan DSP khan Cathy thawmhnaw kha kan check vek a ti bawk sia." ka han ti deuh kher a.

"Check te chu check vek e, mahse a kekawr chhunglam zawka ipte ah ania...kan lo hmuh hmaih a." tiin min chhang leh a, ka awih chiah lo kher mai. Amah bawk chuan min en vung vung a, "Min ringhlel deuh em ni, detective?" tiin a han nui huk a. Ka han thaw deuh hak a, "Ringhlel chuang love, tinge min zawh a, rinhlelhawmin i awm em ni?" ka han ti ve leh deuh kher a.

A khi suk mai, "Hmeichhe detective hi ka ngaisang thei lutuk asin, nangpawh hi hmeichhe huaisen tak i nih ka ring." a han ti vel deuh duah a. "Ka zawhna chu min chhang chiah lo mah la, ka lawm e...ka kal phawt ange, thingpui chu a tui hle mai." tiin ka tho va, ka chhuah san ta a. Min flirt pui a tum ve khanglang emaw ni, zak thei lo lutuk mai.

*************************

Pawn ka chhuak chiah chu phone call ka dawng nghal a, NAthana a lo ni. "BElla, in veng park ah ka awm, lo phei lawk teh, i zo tawh em?" a rawn ti daih mai. "Enga? Kan veng park ah a? Enge i tih a?" ka ti hu mai a. "Umm...a pawimawh ania." a la rawn ti zui. "Opa te inah i awm amaw ka tia, rawn phei ka tum chiah asin." ka han ti leh a.

"Kha chu a pawimawh lo, thil pawimawh dang a awm." a rawn ti leh a, "AWle ka lo kal e." tiin phone chu ka dah a. KA hrethiam lo kher mai, engemaw kan veng park lamah a va tih daih daih ni. Case serious tak kan chhui mek emaw tia, thil lah hi inhmuh phawt loh hi chuan a sawi mai duh thin lo lehnghal, he mihring tak hi chu.

Park chu ka va thleng a, a view nuam lai berah chuan a lo thu a. Ka va phei a, "Enge hetah i tih a?" tiin ka zawt a. "Lo thu ve rawh...a view nawm zia hi." ala ti zui. A bulah chuan ka thu ve a, "Keite chu ka kal ngun tawh mai, i hre tlai emai." tiin ka han fiam a. "SI Mawia chu i bia em?" tiin min zawt a.

"Aw bia e, ala inla engemaw khanglang leh nghal." ka han ti nghal hlur a. A nuih a zat hmel kher mai, "Tinge? In lo va inhau vak em ni?" tiin min han zawt leh a. "Rawmawl kha Cathy kekawr chhunglam ipteah zawk a awm e a tia, ka awih lo lutuk hmel kha min lo hmu aniang, min ringhlel ami te a han ti khanglang a, zak lo lutuk." tiin ka han phun nghal vak vak a, ka period hnai deuh pawh a ni maithei, ka thinchhe emai.

NAthana chu a nui huah huah a, "Chutiang mai mai...thinrimna tur a awm ami?" tiin min han zawt leh a. "Ahnuah khan hmeichhe detective ka ngaisang, i huai ngawt ang...te min han ti kual leh vel a, ka ten lutuk." ka han ti vin leh hlur a, a nuih a za tulh tulh mai. "Tinge Sir? Hetah te i kal a, Opa te inah i awm emaw tia?" tiin ka han zawt leh a.

"A nuam em a, chuvang mawle...anih leh Johnny-a nen in inbia em?" tiin min zawn leh daih mai. "Ihh..aww...inbia e." ka ti bah deuh nuai mai. "Enge insawi?" tiin min zawt leh a, finger print chungchang vel chu ka sawi a. Mahse NAthana chuan a lu a thing a, "SI Mawia chuan glove chu a bun ve hrim hrim aniang, Johnny-a finger print duh chu nise an la thei reng alawm, chutia a ruk khera tih a ngai lo." tiin min chhang a.

"Mahse ngatinge glove chu a bun kher le..engemaw tak inthup chu a awm ngei ka ring." ka la ti hram a. "Nia, a ni ve thei tho." tih ringawt chuan min chhang a. "Ngatimaw hetah i awm daih..min hrilh tawh la..." tiin ka han zawt leh a. A hma lam view nuam tak, Aizawl khawchhung lang ruah mai chu a han thlir vang vang a, "Han hmu ve se chu..mawi a tiin nuam a ti ve ngawt ang." a ti zawi sap mai.

Ka nui suk a, "Tuin maw? MAxie in maw?" tiin ka zawt nghal vat a. MAhse a lu a thing tlat mai, "Nilo." a ti zawi leh sap a. "Anih tumaw?" tiin ka han zawt leh hram a. Nui lui tih hriat tak hian, "Sanvi." tiin a nui suk a. Ka hrethiam deuh ta, a nupui thi ta, Sanvi a ngai thar riau a ni ngei ang, zanin chu.

A darah ka vuan a, "Ngatinge Sir? Sanvi chu i hrechhuak thut em ni?" tiin ka zawt a. "Nilove Bella, hrechhuak thut chuang love. Ani te chu engtik laipawhin ka rilru ah a la awm reng alawm, tun thleng hian...ka thinlungah hian ala thi ve lo." tiin min en a, zu rim a nam chiang lutuk, engtik lai khan nge maw a lo in hman ni, min sawm ve lo lehnghal.

"Sir, zu rim i nam." ka han ti deuh tawp a, ka inthlahrung leh hnuhnawh kher mai. "Aa..a awihawm loh." tiin a pha nasa mai. "I rilru tinatu an awm ani chiang, zanin hian..Sanvi i ngaihtuah chhuah thut danah hian.." ka han ti leh a. A lu a han bu deuh nghauh nghauh va, "Ni e, englo ania...kan thu kha a inhmu chiah lova.." a han ti deuh nuah nuah a.

"Tu nen maw?"

"Opa nen mawle..kan titi naah."

"Chuan, enge thleng a?"

"I nupui i hmangaih em em i chan ve tawh em, chupawh tual thi leh nghal, a hrehawmzia i hrethiam ve em...min ti deuh hrep a, a awm ve tho, a mangang em a, a insum zo hman lo a ni ngei ang. Mahse a hriat loh chu, keichuan ka nupui mai nilovin, ka fate zawng zawng, ka nu leh pa anga ka en thin, min enkawltute ber, ka patea te nupa pawh min thah sak vek a. Ka hrechhuak lo thei lova, chuvang chuan hetah hian ka kal ta daih a ni...nang ini bawka, ka hrilh ve che a nih chu." tiin min chhang a.

Ka khawngaih hle mai, Nathana past live hi chu tu tan mah hian a duhawm loh thlawt a ni. "Theihnghilh hrih rawh, Sir. I bulah ka awm a, MAxie i nei bawk a...i mal miah lo ania, tunah chuan case hi kan buaipui hrih angai." ka han ti ve deuh luam a. Min nuih var var a, "Awle...mahse ka van let peih tawh lo, ka lu ana lutuk a." a ti deuh nang nang a.

A fiamthu amaw ka ti hial zawk, "Enga? Enge i sawi awmzia?" ka ti hu mai. "Ihh..englo, tun lawk khan a wholesale-in a rawn thleng." a han ti leh a, a la ding thut zui. Ka hrilh hai kher mai, "Engmaw? Engmaw rawn thleng?" ka han ti leh hu a. "Zu kha...whiskey half kha tui pawlh miah lovin a hlangin ka in zo nhgla vek a, ngawiteh.." a sawi zo hman lo, thingkung bulah va pheiin ava luak teuh mai.

A va han hahthlak tak, kan detective ropui Nathan Malsawmkima a nawi tlat, a rui nawi tlat, hnuchhui lai lai a. Mahse ka dem chuang lo, a dinhmunah hian ding ve ta ila chuan e, detective chu sawi loh, naupang theihai lo ru takngial pawh ka chhui peih tawh lovang, mahse ani erawh tun thlengin police atanga kum naupangtea a retire hnuah pawh private detective ala ni thei ania, tluk lo tak ka ni.

Engtin tin emaw chuan park atang chuan kan inkuah phei a, motor ah chuan ka chuan tir a. Mahse a chatthla titih nghal der mai, Sanvi hming a lam deuh reng bawk. Khalh chi zia zang a ni bawk silo, keilah ka scooty hnutchhiah tawp chi ni hek lo. Ka tih ngaihna hrelo chuan Dika ka phone ta ringawt a, ani pawh chuan a rawn phei tur thu min hrilh ve mai bawk.

Minute 10 vel hnuah chuan DIka chu a rawn thleng a, "Tuma bulah hrilh reng reng suh ang che.." tiin ka han vau nghe nghe kha, mahni bialpa te pawh hi detective nih chuan vau zeuh zeuh angaih chang hi a awm thin ania. Tichuan Nathana chu a apartment lamah ka phur phei a, Dika chuan ka scooty khalhin min rawn zui bawk.

Dika hi taxi in a rawn kal a, ka scooty khlah a ngaih vang a ni. Nathana apartment ah chuan MAxie a lo awm hlauh mai a, a hruai lut nghal a. Dika chu ka han thlah chhawng ve leh a, kan va kal kual nasa tak a ni. Tichuan keipawh chu Opa te inah chuan ka let ve leh a, dar 11 velah ka haw ve thei hram.

**********************

A tuk chu court day-1 trial neih hun a ni ta a, Johnny-a tan chuan ava huphurhawm dawn em. NAthana lah chu a rawn thleng tlai em em mai lehnghal a, a la pentawng deuh pawh a ni maithei a ni. Tichuan court chu tan a ni ta a, Johnny-a nupui Kimtei, Cathy nu leh pa, Opa leh CAthy thiante tlem an lo kal ve bawk.

Lawyer Francis-a zawk chu a rawn ding hmasa a, evidence tha tak a awm thu leh a rukin Johnny-a hian Cathy chu chetsual puiah a sawm ru reng thin angte chuan a rawn sawi a, finger print chungchang zawng zawng nen, a la dak thei em em lehnghal, lawyer chimawm leh tawrhhlehawm tak chu a ni tih a chiang.

Judge chuan SI Mawia chu a ko chhuak a, zawhna te chu an han zawt ve a. SI Mawia pawh chuan a thiam ang tawk chuan evidence dang a hai chhuah leh dan te chu a han sawi a, "Cotton atanga siam a ni a, kha rawmawl kha. Chiang takin fingerprint a lang thei a, chutah chuan Johnny-a fingerprint hi a tel chiang a ni." a han ti deuh pang pang a.

"Ka hnia e, Your Honour...rawmawl ah khan finger print chu a awm ngei a, mahse thisen far khat pawh hmuh a ni lo. Tin, siam chawp a nih hmel hle bawk." tiin Bena chuan a rawn hnial ve a. "Thisen a awm loh avang khan a thattu a nilo tihna a nilo." tiin pakhatin a lo hnia let ve leh a, an han inchhang tak tak chu pui tak a ni.

Mahse evidence an neih that em vang zawk nge, Bena hi a insawi ang a ni leh lo zawk, BEna chu a dang ta zeuh zeuh mai a. A tawpah phei chuan sawi tur a hre mang tawh tlat lo, Kimtei a rawn tawng chhuak hial mai. "A thianpa, Cathy pasal Opa ngei pawhin ka pasal tan hian lawyer a ruai hial asin, chuti khawp chuan keini chuan kan chiang." ring tak chuan a rawn ti a.

"Kan kohchhuah a, thusawi tura phalna kan pek loh chu tumah mipui zing atangin thu rawn sawi phal a ni lo, evidence tha tak in nei a nih loh chuan.." tiin Judge chuan a rawn khap vat a. Mahse Francis-a chuan, "Min lo hrethiam la, Your Honour...zawhna ka zawt lawk thei angem, Pi Kimtei hi?" tiin a han dil a.

Judge chuan a lo phal sak mai bawk a, "Anih leh Pi Kimte, chutiang khawpa Cathy pasal ngei pawhin a nupui thattu chu a tan a, nangin i tan bawk a nih chuan inpathum hian in irawlh vek ava ang ve.." a han ti chiah chu Opa a rawn ding chhuak thut mai. Francis-a lam chu va panin khawih ava tum ta mai a, police ho chuan an lo dang vat.

Nathana ka va en a, a lu a dawm ringawt. Francis-a lah chuan chu chu remchangah la in, "I lo hmu em, Your Honour...i lo hmu em? Kha kha Opa chet duhdan chu ania, he tualthahnaah hian lo in hnamhnawi ve pawh nise kei chuan amak ka ti miah lovang." a han ti leh zuah zuah a. Opa chuan vin zet hian, "Awww..animaw, i ringruh kha ka herh tliah hunah chuan mak i la ti nge ti lo chu kan hria ang." tiin a tal vak vak a.

"Order Order...court chhungah buaina siam suh u." tiin a tuboh te chu a han chhu ri karh karh a. Cathy pa lah insum zo bik lo, a rawn ding chhuak ve a. "Mi tenawmpa, i nupui thattu pawh i humhim duh chu ania, i zak chei nange.." tiin a rawn vin ve bawk, boruak chu rit tak hi a ni. Police te chuan kan khap dai thei hram a, Bena lah chu a ngawi kur tawh mai si.

Tap teuh hian Opa chuan, "Judge zahawm, ka nupui hi ka hmangaih a, engtikah mah ka that lul lovang. Rinhlelh ka nei lova, mahse Johnny-a hi chu a nilo tih ka chiang." a han ti a. "Finfiahna i nei lo, mahse keini chuan kan nei." Francis-a chuan a lo ti leh zawt zawt mai. "Minute 10 kan chawl anga, thuthlukna kan siam ang." tiin Judge chuan break a puang ta a.

*************************

Break chu a zo nghal thuai a, judge chuan decision a peih fel ta. "Johnny-a te lamin tualthattu a ni lo tih finfiahna tha tak an neih loh avang leh, CAthy te lamin evidence submit tur an neih zawk avangin Johnny-a chu.." a tih lai chuan Nathana chuan, "Evidence chu kan nei ang..kan nei ngei ang." a rawn ti a.

Nathana chu kan en thup mai, "Engtikah nge i rawn submit theih ang, khawnge i evidence chu?" tiin judge chuan a zawt a. "Ni khat chiah hun min pe rawh..nikaht chiah..chutah chuan evidence mai nilo, thudik tak ka hre thei ang." tiin a chhang leh a. "A fair lo, court hian thudik tunah a mamawh." Francis-a chuan a lo ti nasa mai.

"Overruled...Detective Nathan, sawizawm zel rawh." Judge chuan a lo ti a, Francis-a chu a thinrim hmel kher mai. "Johnny-a hi tualthattu diktak a ni nge nilo tih leh, kha evidence kha siam chawp a ni ngei em tih thlengin..a vaiin ka chhuichhuak vek ang. Ni khat chiah ka mamawh, nikhat chiah." tiin Nathana chuan a han dil leh a.

Judge chu a ngawi vang vang a, "Court 2nd trial hi ni 2 hnuah neih leh a ni anga, chumi hma zawng chu Johnny-a hi bail theih ala ni chuang lo anga, police custody ah kawl hrih ala ni ang. The court is adjourned." tiin court chu a ti tawp ta a, Cathy nu leh pate leh Francis-a te chuan NAthana chu an melh rum kher mai.

Pawnah chuan kan chhuak a, Johnny-a chu police te chuan an rawn hruai a. Kimtei chuan va panin, "Duhtak..Duhtak..lungngai suh aw...i tih a nilo tih kan hria alaw, i chhuak em em ang." tiin a kutah a va vuan a. Police ho chuan an lo dang a, "Duhtak...lo in enkawl tha rawh aw..lo hlauthawng suh, ka tha ania." Johnny-a chuan a ti ve lawm lawm bawk a.

"I thinrim a nih pawhin khatiang khan che tawh suh aw....insum hram hram rawh. Anih loh chuan khatiang lawyer tenawm leh fing lutuk, Francis-a te ang kha chuan remchangah an la zel dawn ania." tiin Nathana chuan Opa chu a hau va, mahse a chhanglet lem lo. Chutih lai chuan Lawyer Francis-a chu a rawn kal a, rum zet hian Nathana chu a rawn melh a.

"Eng evidence nge i neih a?" tiin a rawn zawt a. Nathana chuan nui chung hian, "I hre mai ang, chuan nangmahni thuruk pawh puan chhuah a ni bawk ang." tiin a chhang let a. Chutah CAthy pa chu lo pheiin, "Thuruk a, eng thuruk nge chhui chhuah tur awm a? Detective..tualthattu pawh pui duhtu, tiang khawpa sum duh i ni hi zak rawh." a rawn ti deuh hrep mai.

NAthana chu a nui lui leh sak a, "Tinge? I va pha nasa ve, thuruk chu i lo nei reng em ni?" tiin a zawt let a, Cathy pa chu a ngawi hmak mai. Nathana bawk chuan, "Sum duh chungchangah kha chuan ti khan min ti lo mai teh, i neih let ka nei, ka mamawh lo." a han ti leh hrep a. Lawyer Francis-a chuan, "Ka pu, lungngai suh..hnehna an chang nge chang lo chu ni 2 hnuah kan hre dawn alawm." a han ti deuh pang pang a, min kalsan ta a.

************************

TO BE CONTINUE