WILD ZONE : SEASON 1 (Episode - 16) Written by : Aaron Malsawmdawngzuala THE MISSING CHILD - 4

 WILD ZONE : SEASON 1

(Episode - 16)

Written by : Aaron Malsawmdawngzuala

THE MISSING CHILD - 4

****************

Dar 2 a ri a, canteen ah chuan DAvid-a chu Nathana nen chuan kan va hmu ta a, "Enga tan nge maw min han tih ve le? Eng thil nge min sawi pui duh ve teh mial a?" tiin David-a chuan min han zawt a. "Aaa..englo ania, kan case kal lai mek chungchang hi mawle." tiin Nathana chuan a chhang.

Mak tih hmel tak hian David-a chuan Nathana chu a en hu a, "Eng case maw? Chhandami case kha maw?" tiin a zawt leh a. Nathana chuan a lu a lo bu nghut a, "Kha te chu call off a ni daih tawh a ni lawm ni?" tiin DAvid-a chu a hrilhhai hmel hle mai. "Aa..englo ania, kha case kha chu call off chu a ni ngei a, mahse kan la chhui zui mek a ni." tiin a chhang a.

"Anih leh tinge min biak duhna chhan ber?"

"Enteh DAvid, Inspector Richard-a nen hian in inkawm ngei viauin kan hria a, a dik ngei pawh ka ring."

"Aw a dik alawm, tinge Richard-a chungchang i sawi leh daih a?"

"Chu chu kan koh chhan che a ni, DAvid. Richard-a chungchang hi i hriat ang ang min han hrilh teh, criminal case te hi a lo nei tawh mial em?"

David-a chuan a lu a thing a, "Police Inspector rinawm tak chu a ni ve alawm, Chhandami bo thu ah khan a inrawlh ve i ring tihna em ni?" tiin a zawt leh a. "Ring hran love, mahse dawt min hrilh a, a chhan ka zawh lah in a sawi duh silova. David, nang hian engemaw tal a chungchang hriat i nei em?" tiin Nathana chuan a zawt let ve a.

DAvid-a chuan mak a tih hmel tulh tulh mai, "Engtia a chanchin maw?" a ti leh hu mai a. "Mi ina an la hriat vak lem loh...thuruk emaw, a la sawi chhuah ngailoh emaw...hriat i nei em?" tiin Nathana chuan a zawt leh a. David-a chu a ngawi vang vang a, "Thil pakhat chiah ka chhan hma che u in ka zawt leh thei che u a ngem?" a han ti leh a.

"Thei e, min zawt ta che."

"Eng thilah nge dawt a hrilh che u."

Nathana chu a han thaw hak a, "Englo ania, Chhandami....thi anga an puan tak, a ruang takngial pawh an hmuh takloh kha..khami nu Teremi khan bialpa  anei a, chu chu nang pawh hian i rhiat ka ring. Lawmtea kha a ni a, Richard-a hian Lawmtea chu a hre ngai lo angin a tirah kan bulah a sawi a. MAhse nizan khan a ruih laiin Lawmtea hminga Police informant a thehluh tawh thu a sawi a, ka zawh lahin engmah a sawi leh duh tawh silo a ni." tiin Nathana chuan a chhang a.

DAvid-a chu a han ngawi vang vang a, "Ni e, ka hrilh ang che u. Richard-a hian Suresh-a kha a pawisa ruksak a ni tih amah Suresh-a'n a hriat hma kar khat liam ta daih tawh khan a hre hmasa zawk a, chuzawng chu ka hriat a ni." tiin a chhang ta a. Nathana nen chuan kan inmelh hu mai, "Engtin nge chu chu i hriat?" tiin ka lo zawt vat a.

"Amah Richard-a'n min hrilh." tiin David-a chuan min chhang a. "Anih leh engtin nge Richard-a chuan a hriat a?" tiin Nathana chuan a lo zawt veleh a. Mahse David-a chuan a lu a thing a, "Engtin nge ka hriat bik ang? Chubak engmah a chanchin emaw, a hun kal tawh ka hre bik lo." a ti tlat mai.

Nathana chu a ngawi vang vang a, "Umm..kan kal phawt ange, i eiman zawng zawng chu kan lo tum ange." tiin a tho va, ka zui ve nghal bawk. Cashier hnenah chuan Nathana chuan pawisa a pe a, tichuan restaurant chu kan chhuahsan ta. Pawna kan awm hnu chuan, "Sir, tinge thildang i zawh belh loh va?" ka lo ti vat a.

"Eng dang nge zawt vak se min tih a?" tiin min zawt let daih mai. "A zep aniang, khatiang lek te kha chu information pawh a tling hleinem." ka lo ti leh a. A lu a thing a, "Engmah a sawi belh duh dawn chuang lo, chu ai chuan thil dang daih a ni ka rilru ah awm ni." a han ti nuah nuah a. "Enge ni?" tiin ka lo zawt leh a.

Thutak zet hian Nathana chuan, "Enteh BElla, he kan thil khel lai mekah hian thil kal kual vel dan hi ka hrethiam tan in ka hria." tiin min chhang ta mai a. "Enge awmzia?" tiin ka lo zawt leh vat a. A han inngaihtuah leh deuh vang vang a, "Pu Lura." a ti ringawt a. "Pu Lura a? Tu Pu Lura maw? Chhandami pu kha maw?" tiin ka zawt leh a.

"Aw ni e...thil thleng ka chhut ka chhut hian maw, kha putar ah khan a tawp chat zel." tiin min chhang leh a. Ka hrethiam lo kher mai, "Sir, eng tak nge sawi i tum a?" tiin ka zawt leh a. "Bella, Chhandami ru bo tu ber a ni e chu ka ti miah lo, ka ring kher lo bawk. Mahse Chhandami bo hma a...Chhandami bul hnai ber a awm chu a pu kha a ni, Pu Lura kha." tiin min chhang a.

"Anih chuan Pu Lura chuan a tunu chu a ru i tihna em ni?"

"Aih nilove."

"Anih enge?"

"Inhnamhnawihna a nei ve pawh a ni maithei, a chhan chu Pi RAmi khan a tunu Chhandami kha a kalsan lawk hlan khan pawn lam atangin a vih kalh a, a kalhnan kha a nia. Tu phiangsenin nge maw naupang ru tur mai mai a, khatianga ngampa a, chhun pachangah lehnghal, an ina direct-a va lut pawp duh ang, an lo awm a nih chuan a professional lo hle tihna aniang." a han ti nuah nuah a.

"Mahse awlsam takin a ruk chhuah kha...professional kidnapper sulhnu ang thlap a nih kha." ka lo ti ve leh a. "Ni reng e, chutiang khawpa kidnapper fimkhur lo lutukin sulhnu fel tak leh evidence awm tur zawng zawng a thup thei anih chuan Chhandami pawh khan a lo duh ve mai tihna a ni." tiin min chhang leh a.

"Sir, a awmzia ka la hrethiam chuang lo."

"Kha kidnapper khan Chhandami kha a ru dawn a nih chuan a manbet ngei anga, Chhandami chu a au emaw, a tal vak vak ngei ang. Bungrua emaw, thil engemaw tak chu kha inchhung zimteah khan an inchai chhung khan an ti tla rem rum dawn hrim hrim. Mahse thil zawng zawng kha engmah a danglam lova, ala fel fai vek tho."

"Anih chuan Pu Lura chu i suspect tihna a ni mai lawm ni?"

"La ni chiah chuang lo...mahse a thlang lawk huanah a awm si chuan tinge thawm engmah a hriat loh...chuvang chuan kha putar kha kan kawm chian leh deuh angai a ni."

Ka lu ka lo bu nghat a, "Anih chuan kan va kal dawn em ni?" tiin ka lo zawt nghal a. "Umm...chutiang chuan ni rawh se...kan rik deuh thah a ngai ang, tun tum chu.." tiin min chhang a. Tichuan motor-ah kan lut a, Pu Lura te in lam pan chuan kan tlan leh ta vang vang a. NAthana'n a ahn sawi takah chuan, keipawh chuan Pu Lura chu ka ringhlel deuh rum rum mai.

************************

Pu Lura te in chu kan thleng a, kawngka chu kan han kik a. Second 5 vel hnuah chuan Pu Lura chuan a rawn hawng a, "Ehe Detective, nangni in in maw? Lo lut rawh u, lo lut rawh u." zaidam leh polite tak hian a lo ti nghal zung zung a, Nathana nen chuan inchhung lamah chuan kan inzui lut a.

"Enge in rawn tih dawn a? Thingpui te in in duh em?" Pu Lura bawk chuan a han tih chhunzawm a. "Kan in lo mai ange, Pu Lur. Khawnge in nu hi a awm a, a chhuak em ni?" tiin Nathana chu a han hawi kual a. "Aw a chhuak lawk a, bazar a kal a..enge in rawn tih ve mial a?" tiin Pu Lura chuan a lo zawt let leh a.

Nathana chu a ding deuh hluai a, kawngka lam chu va panin a chhunglamah chuan a kalh ta hmak mai. Pu Lura hmel chu ka han en a, a hrilhhai hle a ni tih chu ka hre thei nghal. A hma zawn takah chuan NAthana chu a thu a, "Pu Lur, engkim kan hre vek tawh." a han ti chang ta fak mai.

Pu Lura chuan mak tih hmel tak hian, "Enga? Eng chungchang maw?" a ti hu mai. "I tunu Chhandami bo chungchang kha...engkim kan hre tawh a ni..chuvang chuan.." a tih lai chuan Pu Lura chuan, "Enmaw? Ka tunu..ka tunu chu in hmu leh si em ni? Khawnge a awm?" a lo ti nghal chung chung mai.

Vin deuh thak hian Nathana chuan, "Ngawi rawh...thudik engkim sawi rawh. I tunu kidnapping chungchangah hian inrawlhna i nei tiraw...sawi rawh." a ti deuh hlur a. Pu Lura ngaihdan chu a nih loh hmel kher mai, "Engmaw i sawi a? Ka tunu chu kei hian ka kidnap anga maw?" tiin Nathana chu a melh rum kher mai.

"Chungte chu nangman i hria ang chu..keini ai chuan i hre zawk daih ang chu." tiin Nathana chuan a chhang let a. "Enge ka hriat anga...nangni hi pawisa chawiin ka tunu bo zawng turin ka ruai che u a, chutah a ruang takngial pawh hmu lovin thi angin in puang a. Tunah hetah in rawn kal a, keimah min rawn puh leh daih amaw? Eng ang detective nge in nih a?" a ti deuh hrep mai.

Nathana chu a khi suka , "Tuin nge i kidnap ti a, inrawlhna i nei kan ti mai alawm. Le..sawi rawh le, tunge i inthurual pui, engmah zep lo khan sawi vek ang che." a han ti leh a. Pu Lura chu a thinrim tawh kher mai, "Keimah ngeiin pawisa chawiin ka ruai che u a, ka thiltih sual chhui turin engvangin nge pawisa senga ka rawih ang che u?" tiin a ding hluai a.

Nathana chu a ding ve a, "Anih chuan min han hrilh teh...hei hi min han hrilhfiah teh." tiin a phone  a phawrh a, thlalak pakhat hi a hmet chhuak a. Pu Lura hmuh tur chuan a lek kang a, Pu Lura chu a meng pawng nasa nghal zawrh zawrh kher mai. Mahse keipawh chuan chu thlalak chu enge a nih ka hre bik lo, ka va en ve a.

Thlalak ka hmu chiah chu kei pawh chuan mak ka ti kher mai, Pu Lura leh Inspector Richard-a, kawngsir motor phena suitcase an inpe lai hi a lo ni. Keipawn ka la hmu ngai hauh lo, Nathana hian engvangin nge engmah min hrilh ve loh le tiin ka inzawt nghal mawlh mawlh a. Mahse zawhna lo inzawh chu a ni hrih lo, hre lawk sa ang chuan ka awm chhunzawm ve nghal miah miah tawp a.

Pu Lura chuan sawi tur a hre ta lo, "Pu Lur..Richard-a nena in thil inpek hi enge? Min chhan hmain...dawt min hrilh suh ang che, inspector in eng ti kawng mahin a rukin thil ho mai mai a pe dawn lo che. Pawisa emaw, drugs emaw a nih loh pawhin engemaw thil pawimawh tak chu a ni dawn tih hriatsa a ni. Le...sawi rawh le." tiin Nathana chuan a vau ta khur khur mai.

Pu Lura chu zawi muang chuan a thu a, "Ni e...ka sawi ang." a ti zawi sap mai. Nathana pawh chu a thu ve a, Pu Lura chuan a sawi zawm zel a. "Pu Richard-a nen khan kan inthurual a, Chhandami chu kidnap anga sawi dunin pawisa chu insem turin deal kan siam a. He thil ka tihchhan chu Teremi zirtirna pek hlak ka duh vang chauh a ni, Pu Nathan. Mahse...khami zan khan, Chhandami kha tuiah a tla palh a, kha chu accident liau liau a ni." a ti ta mai a.

Nathana nen chuan kan in en tawp, "Anih khawnge Chhandami chu a awm?" tiin ka lo zawt ve vat a. "Ka hre lo...tuiah khan a tla hlum ta aniang." tiin a mittui a tla zawih zawih mai. "Engtiang chiah in nge thil a thlen han sawi chiang deuh teh. Thudik takin min chhang rawh, a nih loh chuan ka khawih hreh miah lo che ania." tiin Nathana chuan a han vau leh khur khur a.

"Khami ni khan..kan nu in a chhuahsan veleh khan huan atang khan ka chho nghal a. Tichuan dawt hrilhin Chhandami chu Richard-a bulah ka dah ta a, Richard-a nen hian a hma atang daih tawhin kan lo inthurual tawh a ni. Suresh-a'n Chhandami a kidnap anga in hriat pawh Richard-a phuahchawp vek a ni, khami zan...pawisa pek tuma luia in kal zan khan Chhandami kha in bula hlan che u kan tum a, mahse tuiah khan a tla palh ta a nih kha." tiin a chhang leh a.

Chutih lai tak chuan kawngka chu a rawh in chhui hawng thuai a, a tla bal rem rum mai. Ka phu nasa lutuk chu ka zuang dawrh a, mipakhat hmaituam hi a rawn lut a. Pistol a la rawn hum zui, rang takin Nathana chuan min kai a, dawhkan chu indanna atan a chhui thlu a, a phenah chuan kan awm a.

Pu Lura chu a rawn kap ta mai a, mahse Pu Lura pawh fridge phenah a biru hman hlauh mai. Chupa chuan ring tak hian, "Lura..Lura...lo chhuak rawh, anih loh chuan ka that ang che." tiin a au vak vak a. A aw chu kan hria, Inspctor Richard-a aw ngei a ni. Fridge phena biru reng chung chuan, "Chhandami kha luiah khan a tla palh a ni....ka namthlak a nilo. Richard, ka bum lo che." tiin a rawn chhang let ve lauh lauh bawk a.

Chutah Richard-a chu a ngawi ta vang vang mai, chu chu remchangah la in Nathana chuan Richard-a chu a va kap ta thut mai a. A awmah tak a kap a, mahse a tlan chhuak leh nghal. Nathana nen chuan kan va umzui a, thisen a lo thlauh phei zel a. Thisen far chu kan chhui zel a, Pu Lura te kawmthlang huan bula theihai kung hnuaiah chuan a lo let reng mai.

A lo meng tawk tawk a, a awma hliam chu a dawm a. NAthana chuan ava pan a, Richard-a chu thei leh thei lo hian a rawn meng a. Nathana chu va kunhniamin, "Richard, engvang nge? Engvangin nge i tih?" tiin a zawt a. MAhse Richard-a chuan a chhang hleithei lo, a thaw vak vak a, reiloteah chuan a thi ta der mai.

***********************

NAthana nen chuan interrogation room ah chuan min thut dun tir a, ACP Nelson-a chuan zawhna min zawt dun a. A chhan chu engdang a nilo, inspector Richard-a thattu chu Nathana a ni tlat. Nathana pawhin phat buai a tum lo, mahse thil thlen dan te, a kah chhan te chu a sawi fiah a, keipawh chuan ka lo sawipui ve nasa bawk.

Mahse ACP chuan a awih tlat lo, "Enteh...Richard-a leh Pu Lura te hian inthurualin Suresh-a kha an that a, tichuan pawisa kha an insem a ni." tiin NAthana chu a vin nasa tawh mai. ACP chu a han ngawi vang vang a, "Enge proof-na i neih?" a han ti deuh kher a. "IG in transcript pawh min pe a, kha pawh kha Richard-a phuahchawp vek a ni." tiin a chhang a.

ACP chuan mak tih hmel tak hian, "Eng transcript maw?" a ti hu mai. "Richard-a'n amah leh Suresh-a inibiakna ang a siamchawp kha...in duh chuan IG pawh zawt ula." tiin Nathana chuan a chhang leh a. "Pu Lura pawh a inpuang vek tawh, in duh chuan in dawp thei ang." ka lo ti ve bawk a.

"Pu Lura chu kan chhuah tawh, engmah inhnamhnawihna a nei lo." tiin ACP chuan min la chhang zui. "Enga? In chhuah amaw...nangni hi a bum che u a ni. Enteh u, Richard-a khan Pu Lura te in lam kan pan kha a hmu a ni ngei ang, a nih loh pawhin Chhandami tuia a tlak hlum avang khan Lura thiltih angah ngaiin, a bum angah ngaiin rawn thah a tum a ni ngei ang." Nathana chuan  a han ti leh a.

ACP chuan a bula constable chu a han hrilh ru a, constable chu a chhuak a. ACP bawk chuan, "Richard-a ber lah zawh tur a awm tawh silova, awih ava har dawn ve." a han ti nuah nuah a. Mahse kan chhang tawh lo, Nathana nen chuan kan ngawi dun reng a. A hnu deuhah chuan constable chu a rawn let leh a, "Sir, chutiang transcript engmah a awm lo." a rawn ti ta mai a.

NAthana nen chuan mak kan ti dun ngei mai, "Enga? Nilo...a awm ang, amah ngeiin min chhiartir alawm, kha transcript kha.." Nathana chuan a han ti leh a. Constable chuan, "Trascript file zawng zawng ka hai vek a, engmah chutiang Inspector Richard-a leh Suresh-a inbiakna transcript a awm lo." a lo ti leh tlat mai.

ACP chu a han thaw deuh huai a, "Engpawh nise, Pu Nathan...kal phawt mai teh u. Abak chu kan lo buaipiui mai ang, detective ah chuan ka respect ber pawl i ni a, chuvang chuan lungngai suh." tiin min kal tir ta a. Pawnah chuan kan chhuak a, "Bella, Pu Rinliana...IG Sir hi...fik lo a awm." NAthana chuan a ti nuah nuah mai.

Keipawh chuan, "Ni e, tinge ani pawn dawt a sawi. Sir, engemaw tak chu a awm a ni." ka lo ti ve bawk a. Nathana chu a ngawi vang vang a, "Motor-ah lut rawh, IG inah kan kal a ngai." tih leh luh chu a rual nghal a, ka zui lut a. Tichuan IG te in lam pan chuan kan inphur phei leh ta a, Nathana chu a tlan chak ngei mai.

*********************

Kan phit rang bawk a, reiloteah chuan kan thleng vat a. An inkawtah chuan Pu Rinliana chu suitcase leh air bag vel chu a motor ah a lo dah mek a, zin chhuah tum a ang khawp mai. Nathana nen chuan motor atang chuan kan chhuak a, IG chu kan va pan hnai a. Pu Rinliana chuan min lo hmuh veleh chuan a in-pack lai chu a tawp san nghal a, mak tih hmel tak hian min en dun a.

Min rawn pan hnai a, "Enge in rawn tih dawn?" tiin Pu Rinliana chuan min lo zawt nghal a. Nathana chuan inthlahrung tak hian, "Sir, englo ania...Chhandami.." a sawi zawh hma hma chuan in kawngka chu a rawn ri rak a, hmeichhe naupang pakhat hi a rawn tlan chhuak a. Nathana nen chuan chu naupang kan hmu chu mak kan ti kher mai, mit khap miah lo chuan kan en tlawk tlawk ringawt mai.

A chhan pawh chu hmeichhe naupang chu tudang nilovin, Teremi fanu bo ta, thi anga an puan tawh, IG Pu Rinliana retire phahna, Lalchhandami, kum 6 mi ngei chu a ni. A rawn tlan a, "Apuuu..." tiin nui har har chung chuan Pu Rinliana chu a rawn pan ta mai a. Pu Rinliana pawh chuan a lo pawm kang a, mak kan ti tulh tulh mai.

Rum tak hian NAthana chuan Pu Rinliana chu a melh a, "Sir, nang hian Chhandami chu i lo kawl reng amaw?" a han ti deuh khur khur a. Mahse IG chuan a chhang lo, a ngaihsak loh hmel hle bawk. Nathana bawk chuan, "Enge awmzia? Engvanga he naupang hi kawl nge i nih?" tiin a zawt leh a.

Mahse IG chuan ala chhang chuang lo, "Bawihte, ka hman tep aw...motor chhungah lo va awm rawh le." tiin Chhandami zawk chu a be daih mai. NAthana chu a thinrim tawh kher mai, "Police hnenah ka report dawn che, Sir...hei hi thil dik a nilo." a han ti leh a. Pu Rinliana chu a thaw hak a, "Min report ang maw, Nathan?" tiin zaidam tak chuan a lo zawt let a.

"Aw...ka report ngam loh che i ring em ni?"

"Ring lah love...mi huaisen tak i ni tih ka hria alawm."

"Sir, engvanga ti nge i nih?"

"Engvanga ti nge ka nih i rin?"

Nathana chuan vin zet hian, "Thla tam tak...thla tam tak a liam tawh. Chhandami kan zawng a, thihna kotlangah kan din phah bawk asin. Engvangin nge hetiang thil hi i tih, police i ni lawm ni? IG i ni lawm ni? Engvang nge? Sawi rawh.." a ti hrep mai. IG chu za lo tak chuan a nui suk a, "Chhan a awm a ni." a ti ringawt a.

"Enge a chhan chu...min hrilh ta che." Nathana chuan a ti vin leh vak mai. "Nathan, he naupang pawisawi lo leh rilru thianghlim tak hi saw anu zurui leh bialpa dang kawp kual reng, mahni fate mit hmuh lai ngei pawha mipa nena khawsa hreh lo bulah sawn ka awm tir reng i phal em ni?" tiin IG chuan a zawt let daih mai.

"Chuvang chuan lem i chang a, i kidnap a maw? Thil sual lian tak i ti a ni, Sir."

"Thil sual maw? Enge thil sual a nihna? Naupang than lenna atana duhawm lo lutuk inchhung khurah sawn he naupang hi ka awm reng tir thei lo a ni, NAthan."

"Police i ni lawm ni? Police chuan kidnapper te an man thin a, khawtlang an venghim thin. Mahse nang chuan i police puite i bum a, enge i thil tih hi thil tha a nihna?"

"Police ka nihna ang ngeiin thil tha chu ka ti mek a nih hi, he naupang nun kahwlo taka rawn hmangchho tur hi kei hian ka ti tawp vat a, chu chu thil tha a nilo em ni? Anu sawn engah mah a chhuah dawn lo, reiloteah phei chuan a hralh duh mai ang."

NAthana thinrim lutuk chu a mittui a tling teuh mai, "Anu a ni a, a ta a ni. A fanu a ni a, a ta a ni. Nang hian engmah inrawlhna tur i nei lo, Sir. He i thil tih phiangsen avang hian mi engemaw zatin nunna an chan phah a, keini pawh kan thi thelh asin." a ti vin leh khur khur mai. IG chu za lo tih hriat tak hian a nui suk mai, "Umm, ni e. Anih Nathan, zawhna ka zawt ang che aw?" a han ti a.

Mahse Nathana chuan chhan pawh a chhang lo, "Chhandami hi kha anu zu ngawlvei, drugs addict leh mahni taksa zuar reng thin bulah khan va dah let leh ta ila, a nun tichhe vekin anu ang chiaha mi khaw lo taka a rawn seilen ve nge i huh a..keiman a ruka enkawl a, tha taka a than len i duh zawk?" tiin IG bawk chuan a han zawt leh a.

Mahse Nathana chuan a chhang tawh lo, ka bulah chuan a lo phei a. "Bella, enge i ngaihdan?" tiin min rawn zawt a. "Ka hrethiam lo, Sir. Mahse IG Sir bula a awm chu ka duh pui zawk tho mai, anu kha chuan mi tha ah a chhuah dawn hian ka hre bik lo a ni." tiin ka lo chhang a. NAthana chu a ngawi vang vang a, "A theih loh." a ti ta tlat mai.

"Engmaw theih loh?" ka lo ti vat a. "A dik lo...hetiang tur a ni lo." tiin min chhang a. "Mahse Sir.." ka tih lai chuan IG chu a rawn kal a. Zaidam tak hian, "Nathan, min man chhuak tawh tho bawk a. Thuthlukna chu i kut ni rawh se, i duh chuan min report rawh. Ka tlanchhe lovang, hetah hian police ho chu ka lo nghak ang." a rawn ti ta a.

Nathana chu ala ngawi vang vang mai, "Mahse lo ngaithla rawh. Police hna avang hian ka fanu kha ka enkawl tha thei lova, hna ah ka buai reng a. Kum 12..kum 12 mi lek a nih khan ka fanu kha misualin min thah sak a, pawngsual a ni bawk. Tun thleng hian khavang khan ka inthian thei lo, a chhan chu amah venghim tur khan kei police hian hun ka nei lo a ni. Chuvang chuan Teremi te ang bula Chhandami a seilian a nih chuan kum a tling hma hauhvin pawngsual emaw, inzawrh luih tir a tawk dawn. Chuvang chuan ka fanu tawn ang kha a tawn ve ka duh lo a ni, NAthan." a han ti leh a, a mittui a tla zawih zawih mai.

Nathana chu a ngawi reng a, chutah a phone a phawrh a. Pu Rinliana chu police hnenah chuan a report ta nge nge a. Kei erawh ka hul thak, sawi tur reng ka nei lo. IG chu a nui suk a, "A tha e, lungngai suh u. Ka tlanchhe lovang, hetah hian ka lo nghak ang." tiin motor atang chuan Chhandami chu a pawm chhuak a.

In kawtah chuan a thut pui a, tichuan police lo kal hun tur chu huaisen takin a nghak ta ran mai. Nathana nen pawh chuan kan inbe lo, ngawi rengin police te chu kan lo nghak ve bawk. Reilote hnuah chuan police te chu an rawn thleng a, Pu Rinliana chu an rawn man ta a. NAthana chuan an man lai pawh chu a en thei lo, lehlam a hawi reng a.

Chhandami lah chuan ngenin a tap nasa em em lehnghal, ka khawngaih takzet. Ni e, Pu Rinliana pawh a ngaihdan atanga thlir chuan a dik tho mai, mahse NAthana pawh ka dem em em chuang lo. Sawi tak ang khan kei chu ka hul thak hi a ni tawp, engmah thuthlukna dik zawk ka hre lo, Pu Rinliana chu phurh liam a ni ta a.

**************************

Chhandami chu anu Teremi hnenah pek let leh a ni a, apu Pu Lura pawh a tawp a tawpah chuan a inpuang a, man a ni ve ta bawk a ni. Tichuan a pi, Pi Rami pawh a tunu chu an ina hruai thei tawh lo tura banned a ni bawk. A hnua ka hriat leh dan chuan Teremi chu ala rui reng thin tho a ni awm a, a mizia a lo la thlak chuang miah lo a ni awm e.

Zan khat chu a vawikhatna atan Nathana chu kan inah a rawn leng lut ve teh mial a, chhun lama Teremi te ina ava kal thu min hrilh a. "Enge i va tih a?" tiin ka zawt a. "A la sim lo, ala rui reng tho. Mahse chhe te chuan lawm rukna riau ka nei a ni, Bella." tiin min chhang a. "Enge chu chu?" tiin ka lo zawt vat a.

"Inchhung kha ka en kual a, a hma aiin a fai daih a ni. Ka len lai lai khan mipa nen an indate tur thu a la sawi zui a, Chhandami chu a chhuahsan leh ta tho a ni. Chhandami chu anu lo haw hma thleng ka awmpui char char a, Pu Rinliana a ngaih thu hlir a sawi a." tiin a han ngawi deuh vang vang a.

A han thaw leh hak thin a, "Ka thu thlukna kha  adik lo pawh a ni thei e, mahse chhete chuan Teremi khan hmasawnna a nei ve a, ka lawm tho ve. Engpawh nise, anu ania...keini tan sawi tur a awm ve tawh hleinem tiraw?" a han ti zawi deuh sap a. "Sir, i thuthlukna anih phawt chuan a tha leh vek mai ang, inthiamlo duh suh." tiin ka lo hnem a.

Nathana chu a ding hluai a, "Umm..engpawh nise ka haw phawt ange. Case dangah kan inhmu leh dawnnia, lo in enkawl tha la." tiin min haw san ta a. Tun tum kan case zet chu, kan hlawhtling nge hlawhtling lo pawh ka hre lo. In ngaihdan dan ni tawh mai teh se, case dangah kan inhmu leh vek dawn u nia.

***************************

THE END