WILD ZONE : SEASON 1 (Episode - 14) Written by : Aaron Malsawmdawngzuala THE MISSING CHILD - 2

 WILD ZONE : SEASON 1

(Episode - 14)

Written by : Aaron Malsawmdawngzuala

THE MISSING CHILD - 2

*********************

Dar 1 a ri a, Teremi te in lam pan chuan Nathana nen chuan kan inphur phei leh ta a. Kan va thlen chuan Inspector Richard-a leh Nicky-a te thian dun chu an lo thleng der tawh mai a, min thlen khalh tlat mai. Min hmuh veleh chuan, "In lo thleng thei maw?" Nicky-a zawk chuan a lo ti a. "Thleng ve thei hram e, in thlenna a rei tawh em?" tiin Nathana chuan a lo zawt let a.

"Rei love..keini pawh kan thleng deuh chiah." tiin Richard-a chuan a lo chhang ve leh thung a. "Pu te u, hriat belh kan nei tlat mai." Nathana chuan a han ti a. "Eng thil nge?" an lo ti rual nghal. "Drug Lord pakhat, hnamdang mi..a hming chu Suresh-a a nia. TEremi bialpa Lawmtea hi chupa hnuaiah chuan a thawk thin a ni awm e." tiin a chhang a.

"Drug Lord a? A address in hria em?" tiin Richard-a chuan a lo zawt lehnghal a. "Hriat chu hre thove, mahse professional an nia, tawng pawng raid ngawt chi chu an ni lovang." tiin Nathana chuan a chhang leh a. Richard-a chu a ngawi vang vang a, "Umm engpawh nise, i lut phawt ang u." tiin kawngka chu a han kik karh karh a.

"Lo lut rawh." vin deuh tak chuan inchhung atang chuan Teremi chuan a rawn chhawn a. Kawngka chu hawngin kan lut ta a, Teremi chu amah chauhvin mit bui vek leh sam pheng tak hian a lo thu a. Min han hmuh chuan a meng deuh hru a, "Enge ni leh ta? In hmu tawh em ni ka fanu chu?" a lo ti hlur mai.

Nathana chu ava kal hnai a, "Drug Lord Suresh-a i hre ngai em?" tiin a zawt a. Mak tih hmel tak hian Teremi chu a rawn hawi hru a, "Tumaw? Suresh-a a?" a ti deuh hru mai a. Nathana chuan a lu a bu nghut ringawt a, Teremi chu a ngawi vang vang mai. "Terem, zawhna chu chhang rawh..Suresh-a chu i hre ngai em?" tiin Richard-a chuan a lo zawt veleh a.

A lu a thing a, "Ka hre ngai lo chutiang.." tiin a chhang a. Nicky-a chu a han nui deuh suk a, "Enteh Terem, i fanu kan zawng mek a, kan hmuh theih nan chuan engkim tha taka min chhan angai a nia." tiin a han hrilh fiah a. Nathana pawh chuan zaidam tak hian, "Terem, drugs i ti thin a, i lei thin. Mahse khavang khan kan man phah dawn lo che, kan case a ni lo. Kan case chu i fanu bo mek zawk hi a ni, sawi tawp rawh, hlau suh." a han ti ve leh a.

Teremi chu a thaw deuh hak a, "Ni e, ka hria alawm. Lawmtea nen hian Suresh-a drugs hlir kan ti thin a, a hnuaiah kan thawk thin bawk. Ihh...cheng nuai 10 lai kan ruk sak a, khata tang khan Suresh-a chu kan la be leh tawh lo hrim hrim." tiin a chhang ta a. Chuveleh Richard-a chuan, "Pawisa chu khawnge a awm, ala kim em?" tiin a lo zawt nghal vat a.

"Ala kim em tih erawh ka hre lo, pawisa chu tunah LAwmtea'n a kawl vek, a vaiin." tiin Teremi chuan a chhang leh a. "Lawmtea chu tunah khawnge a awm?" tiin Nathana chuan a lo zawt ve bawk a. "Tunah chuan Lawmtea chu Durtlang lamah a awm, kawnghnuai lamah." tiin a chhang leh a.

Richard-a chu a ding hluai a, "Pu Nathan, tunah Durtlang lam chu kan pan nghal angai." a han ti a. Nicky-a pawh chuan, "Ni e, Teremi hi kan hruai ve bawk ang." a lo ti ve bawk a. Nathana chuan a lu a han bu nghut nghut a, "A tha e, anih chuan Teremi hi kan phur anga, nangni a hranin in lo kal dawnnia. Mahse scooty-in kan lo kal a, ka apartment thleng min zui phawt angai ang, car va lak a ngai dawn." tiin Nathana chuan a chhang a.

Tichuan Teremi chu a in atang chuan kan hruai chhuak a, Nathana apartment thleng chu Inspector te chuan Teremi chu an rawn phur phei a, tichuan ka scooty chu Nathana apartment bulah chuan kan dah a. Durtlang lam pan chuan Nathana, kei leh Teremi chu kan inphur a, Inspector te pahnih erawh a hrangin an rawn kal thung.

**********************

Kan tlan pah chuan NAthana chuan Teremi chu a titi pui sek a, ka lo ning ru khawp mai. Teremi chu a insawi thei em em a, tak tak a nih chuan mizo celeb mipa ho chu a lo nihpui vek tawh a ni awm e. "Terem, anih leh i fanu bo danah hian sawi duh te i nei em?" tiin a titi tui lai chuan Nathana chuan a zawt thut mai.

Teremi chu a ngawi vang vang a, "A pi leh pute vang alawm, keima tih bo pawh a ni hleinem." a ti hmuk mai. Ka ngaihdan a ni vak lo, "Tinge nangpawh i ruih reng ni? I fanu neihchhun a ni a, kut i thlak nasa thei bawk si...enkawl tha ve deuh ta che." ka lo ti ve hlur a. A pawr kher mai, "Fa i nei ve tawh em? Enkawl hahthlak zia i hre ve em?" min ti hrep mai.

"A tawk e, a tawk e...Terem, insum rawh.." tiin NAthana chuan a lo khap vat a, min mitmei zeuh bawk. Diktak chuan zaidam zawk zawk ka ni bik lova, ka han ri ve deuh hlak a nih kha. NAthana bawk chuan, "Anih leh Terem, Lawmtea chuan pawisa chu a la hmang zo lovang tih i chiang maw?" tiin a han zawt leh a.

Teremi chu a khi suk a, "Ka han inpuang law law ange, pawisa kha keima thuhruk alawm." a ti ta mai a, Nathana nen chuan kan in en hu mai. "Nangmah maw?" tiin Nathana chuan a zawt leh a. "Aw ni e, Lawmtea te chuan a awmna pawh a hre lo hrim hrim. Keima thuhruk zawk alawm, veng dangah thukru ila, a him zawk ang ka tia." tiin a chhang leh a.

Zawhna chu kan zawt zui tawh lem lo, rei vak lo kan tlan leh hnu chuan Durtlang chu kan thleng ta. Kawng hnuai lamah chuan kan tlan thla zel a, LAwmtea te in chu kan thleng ta. Kan thlen hnu second 30 velah chuan Inspector te pawh chu an rawn thleng ve nghal a, kawngka chu Nathana chuan a han kik karh karh a.

Mahse chhangtu an awm hauh lo, a reh vung vung mai. "In awm em?" tiin Nathana chuan a han kik nawn leh a, mahse ala reh vang vang mai. Teremi chu rawn kal hnaiin, "LAwmte..Lawmte lo hawng teh, keimah Teremi...i awm em?" a han ti vak vak a. Mahse chhanna kan la dawng chuang lo, a la reh hmak mai.

Nathana chuan zawite in kawngka chu a han nam chhin a, a lo inkalh hauh lo mai. Rang takin pistol chu kan phawrh nghal vek a, Nathana chuan hma a hruai a. Inchhungah chuan kan inzui lut ta hlawm a, inchhung pawh chu a reh diak mai. Choka lam ka va hawi chu ka phu nasa kher mai, "Sir..saw enteh." ka ti vak a.

Nathana chu a rawn hawi a, "Ekhai aw..." a ti vawng vawng mai. Mipa pakhat hi thi hnuang hian thutthlengah phuar beh a lo ni a, a che eih lo bawk. Chutah Teremi chuan a hmui a hup a, "Nilo...LAwmte...a ni thei lo." tiin pawnah a tlan chhuak nghal a, a va luak bawrh bawrh mai. "Nicky, va buaipui rawh." Richard-a chuan a lo ti vat a, Nicky-a chuan Teremi chu a zui chhuak ve nghal.

NAthana chuan LAwmtea ruang chu a han enchiang a, "Silaia kah a ni." tih pah chuan a awmzawn kaw huau mai chu a kawk a. "Tu thah nge ni ang?" Richard-a chuan a ti vawng vawng mai. Nathana chu a khi suk a, "A chiang reng alawm, Suresh-a a nih loh pawhin Suresh-a mi leh sate zinga mi tihna an ni mai. Pawisa vang kha a ni ngei bawk ang, tudang mah an ni thei lo hrim hrim." tiin pawnah chuan a chhuak a.

Ka zui chhuak ve nghal bawk a, Teremi chu a lo la uak tuar tuar mai. NAthana chuan ava pan hnai a, "I tha em?" tiin a va zawt a. Teremi chu mittui tla phung hian a rawn hawi chhuak a, "Keimah vang a ni..keimah vang vek, avan pawi tak." tiin a tap hawm hawm a. Nathana chuan zaidam tak hian, "Enteh Terem, buaina dang a chhuah leh hmain pawisa chu khawiah nge a awm sawi vat mai rawh." a han ti a.

Teremi chu a hawi kual a, in sira kudam tereuhte chu a kawk a. "Saw mi bul ah sawn, ka phum." tiin a chhang ta a. Tichuan kudam bul chu Richard-a leh Nicky-a chuan suahdur leh bawngtuthlawh hmang chuan an lai dun ta ngat ngat a, rei pawh an laih hma chuan bang pakhat an lai chhuak nghal der mai.

BAg chu Richard-a chuan a la chhuak a, a han hawng a. PAwisa tam tak hi a lo awm a, "Kha ngei kha pawisa chu a nih kha." Teremi chuan a lo ti a. "Sir, pawisa hi Police hnenah kan hlan phawt mai dawn mi?" tiin Nathana chu ka han zawt a. Mahse Nathana'n min chhan hma hma chuan Richard-a chuan, "Ni hrih love." a lo ti daih mai.

"NGati maw?" tiin ka zawt leh nghal a. "Kidnap a ni em tih pawh kan la chiang lova, chuvang chuan engmah thuchiang sawi theih ala awm hrih lo." tiin min chhang a. "Anih leh enge i plan ni reng reng?" tiin Nathana chuan a lo zawt veleh a. Richard-a chu a ngawi vang vang a, "Suresh-a hian Teremi fanu Chhandami hi a kidnap tak tak anih chuan...pawisa nen hian thleng va dil ila, chu chu a fuh ber ang." tiin a chhang a.

Nathana chu a ngawi vang vang a, "A tha e, mahse Suresh-a chu nangni nilovin, kei leh Bella-i'n kan va hmu ang." a han ti a. "A tha alawm, Station lamah kan let ve thung anga, in kal pahin Teremi hi in thlah haw nghal dawnnia." tiin Richard-a te chuan pawisa chu min hnutchhiah a, min kalsan ta a.

Teremi chu a tap nasa kher mai, "Insum hram hram rawh, Terem." tiin Nathana chuan a hnem a. Teremi chuan tap chung hian, "Ka fanu...ka fanu ka duh. Nung dama ka hmu let leh a nih phawt chuan ka ruihtheihthil tih zawng zawng hi ka sim vek ang, ka ti tak tak." tiin a mittui chu a hru a hru mai a.

"Umm kan theihtawp kan chhuah dawn alawm, kan va thlah haw phawt ang che." tiin NAthana chuan a hnem hram hram a. Tichuan ruang chu kan buaipui fel zova, Teremi chu kan thlah haw leh ta phawt a. "Bella, kan inah chaw rawn ei mai rawh, zanah kan chhuah lehnghal angai." tiin NAthana chuan min hrilh a, kan inzui haw leh ta a.

***********************

Chaw te kan eikham a, kan mamawh ang te kan pai fel hnu chuan NAthana car chuan kan chhuak dun leh ta. Suresh-a hideout kan thleng tep tih ah chuan mi pahnih hian min lo phar ding a, kan va tlan hnaih deuh chuan Inspector Richard-a leh Nicky-a te thiandun an lo ni reng mai.

Motor atang chuan kan chhuak a, "Nangni maw? Tinge min lo phar din a?" tiin Nathana chuan a han zawt a. Richard-a chu a han zi mar vel a, "Keimahni zawk kan kal ang, hei chu police hna a ni, detective hna nilovin." a ti ta daih mai. Nathana hmel chu ka va en a, a lungawi lo hle tih a hriat takzet.

Rum fe hian Richard-a chu a melh a, "Enge awmzia, Inspector? VAwiin tlaiah pawh i thu ang zelin kan awm a, engkim i sawi apiang kan pawm thlap tawh. ZAninah pawh Suresh-a chu keimahnin kan dawr ang kan ti a, in remtih thlap tawh kha. Tinge hetia in awm leh si a? Tiang reng te chuan hmasawn ava har dawn ve?" tiin a vin lek lek mai.

"Nangni ai chuan kan dawr fuh thei zawk ang, a hrim hrimin hei hi a tir atanga kan case a ni a, nangmahni case a ni lo." tiin Nicky-a chuan a lo chhang a. Keipawh chu ka thinrim kher mai, "Nangni va kal avang khan Chhandami hi kan hmuh phah dawn tihna a nilo." ka lo ti ve a. Rum fe hian Richard-a chuan min melh a, "Anih nangni va kal ta ula, Chhandami chu a lo pe dawn che u tihna em ni?" tiin min zawt a.

Ka chhan hma hma chuan Nicky-a chuan, "Chubakah Chhandami kidnap tu hi Suresh-a chu a ni tih in chiang ngam a mi?" a lo ti ve chhen a. NAthana chuan vin zet hian, "Engtik laiin nge Bella-i nen hian Suresh-a'n Chhandami a kawl kan tih in hria em? Richard, nangma sawi chhuah a nih kha." a ti hrep mai.

Kan ngawi deuh vang vang hlawm a, NAthana chu a maimitchhing vang vang mai. Chutah a rawn meng a, "Enteh Inspector, police in ni a, Suresh-a erawh Drug Lord a ni. Police Inspector pahnih in va kal a nih chuan ani drugs zuar, mizo pawh nilo lehnghal chu a lo hlauhthawng hlauh palh ange. Chuvang chuan kei leh Bella-i kan va kal zawk ang, chu chu a fuh zawk." zaidam tak chuan a han ti a.

Richard-a te thiandun chu an han ngawi dun vang vang a, "Umm a tha e, va kal ta che u." tiin hmuhsit hmel tak chuan Richard-a chu a nui suk a. Motor ah chuan an lut a, an tlan ta daih mai. Nathana chuan a lu a dawm vawng vawng a, "Hahthlak lutuk mai." tia phun nuah nuah chung chuan motor ah chuan a lut a, keipawh chuan zui lutin Suresh-a address lam chu kan pan leh ta a.

**************************

In lian lem lo tak, mahse changkang ru phian si hi a lo ni. Kawngka kan han kik karh karh a, tlangval pakhat, hmel fai veng vawng tak leh tattoo ngah tak mai hian a rawn hawng a. "Tute nge in nih?" a rawn ti a. "Customer kan ni e." tiin Nathana chuan a lo chhang a. "Lo lut rawh u." tiin chupa chuan a chhang a, Nathana nen chuan kan lut ta a.

Suresh-a chu choka lamah a lo thu a, vai dum chi tih takah a dum hian a dum vek mai, hmelchhe tak a ni. A hmaah chuan thutthleng pahnih hi chu tlangval tattoo ngah tak mai chuan a rem a, "Tah hian thu rawh u." a han ti a. Nathana nen chuan kan thu a, Suresh-a chuan min en nasa kher mai, hmeltha min ti tih chu ka hai lo.

Suresh-a chuan NAthana chu a en leh a, "Detective Nathan...ka hriat loh che i ring reng reng em ni?" tiin a han khi suk a. Nathana chuan ngaihnep hmel zet hian, "Min hria tih ka hriat vang alawm ka lo kal, Suresh...Teremi'n pawisa a ruk sak che kha...tunah kan kutah a awm." tiin a chhang a.

Suresh-a chu a meng phawk nasa mai, "Teremi a? Engtin nge i hriat a?" a ti hu mai. "Hrelo der suh...khawiah nge a fanu Chhandami kha i dah..i pawisa chu kan lo keng, khawnge naupang chu a awm?" Nathana chuan a han ti vin deuh thak a. Suresh-a chu a lungawihloh hmel kher mai, "Ka hre lo, chutiang naupang tumah ka kawl lo." a ti hmak mai.

"Sawi mai rawh...engmah ralthuam kan rawn keng lo, hlau duh suh. Pawisa chiah hi kan rawn keng, mahse i sawi duh lo a nih erawh chuan a pawi viau ang." tiin NAthana chuan a han vau leh a. Thinrim hmel tak hian Suresh-a chuan Nathana chu a melh run a, "Nang hian min vau ve khanglang em ni?" tih pah chuan pistol a phawrh a.

Kan pahnih chuan min tin a, "Recorder in pai tiraw? Kan titi hi in record vek tiraw..mi a emaw min ti reng reng suh u." a han ti leh khur khur a. "Eng recorder mah kan pai lo, i duh chuan min check thei ang." tiin Nathana chuan a chhang a. Suresh-a chuan a thianpa bulah chuan, "Check dun teh." a han ti hram a.

Chupa chuan NAthana nen chuan min dap a, "Boss, engmah an pai lo." tiin min chcek zawh hnu chuan a hrilh a. Chutah Suresh-a chu a han thu tha te te a, "Enteh u, Lawmtea kha chu ka thah ngei a ni, ka zep lo. Mahse Teremi fanu chu ka kawl lo, ka kidnap lo bawk." tiin min chhang ta a. NAthana chu a ngawi vang vang a, "Bella, chhuak ang." a ti daih mai.

Zawhna zawt lem lo chuan NAthana chu ka zui chhuak ve mai a, motor ah chuan kan lut nghal a. "Tinge Sir?" ka han ti a. "A kawl tak tak lo a nih hmel...pawisa kha ka hnutchhiah a, tikhan tawk hrih rawh se." tiin min chhang a. "Anih leh khawnge kan kal dawn, tunah?" tiin ka zawt leh a. "Inspector mawl zet pahnih te kha iva hmu leh phawt teh ang." tiin min chhang a, kan let leh ta a.

***************************

Station ah chuan kan va let leh a, kawtah chuan Richard-a te thiandun chu an lo awm a. "Enge in an? Naupang chu ka va hmu si lo ve." Nicky-a chuan hmuhist hmel tak chuan a lo ti vel a. ZAwi sap hian NAthana chuan, "Suresh-a'n a kawl lo, thudik a sawi ngei pawh ka ring." tiin a chhang a. Richard-a chu a nui huk mai, "Ka sawi reng kha maw...engvak in va nih bik hi ka ringlo reng a ni." a ti nuah nuah mai.

"VA kal ve ta ula chu dama in rawn let leh ka ring lo." ka lo ti ve deuh kher a, min melhrum dun nasa mai. "Detective Bella, nang hi eng vak nge i nih bik a? Hmeichhia lehnghal, khatia i tawng ve zat zat le?" tiin Richard-a chuan min vin hrep mai. Kei lah lo tlawm duh bik lo, "NAngni pawn in duh duh danin min tawngkhum ve tho alawm, enge ka dikloh bikna?" ka ti let ve ngat a.

Nathana chuan ka darah a rawn vuan a, "A tawk a tawk." a rawn ti zawi sap a, min dang lo se chu ka khawih dun hrep duh hial ang mawle. Richard-a bawk chuan, "AWmze neilovah in chhuah der chu ania, va kal man a awm lo khawp mai. Engpawh nise zanin atan chuan keini chu kan haw thei, kan peih tawh rih lo." tiin motor ah chuan an lut dun a, an tlan ta daih mai.

Ka thinrim lutuk chu ka sa pup pup thei, "Hau ve hrep ta che, sir..an zaklo dun si, mawl dun si..inla police em em ringawt mai." tiin ka phun vak vak a. Nathana chu a khi suk a, "Tiangte chu an la awm dawn chauh, ka tawng hnem tawh lutuk." tiin zaidam tak chuan min chhang a. "Keini ve hi..enge kan la tih dawn?" tiin ka zawt leh a.

"Keini pawh haw phawt mai ang, tihtur pawh ka hre tawh bik hrih lo..ka chau lutuk." a ti chuai raih mai a. "Umm..boss berin i tih tlat te chuan." ka han ti deuh kher a. A nui sen sen mai, "Nia..nangpawh i chau ang. Ka apartment ah let leh phawt ila, i scooty in i haw mai dawnnia." tiin min chhang a, a apartment lam pan chuan kan inphur phei leh ta a.

Apartment chu kan thleng a, "Anih...muttui phawt mai aw...naktuk zingah kan inhmu dawnnia." ka han ti a, scooty chu ka ti nung a. Chutih lai chuan a apartment kawngka chu a rawn inhawng a, "NAthan, in va rawn haw tlai ve...ehe, U Bella-i pawh." tiin MAxie chu a rawn chhuak hlawl mai.

"Ehe MAxie, engtik laiin nge i lo kal a?" tiin NAthana chuan a zawt hu mai a. "Ka thiannu kha...naktuk a zin dawn a, riahpui tur neihloh chu a hrehawm em a, chuvang chuan ka lo phei daih alawm. U BElla, riak ve nghal law law la?" tiin Maxie chuan min han sawm zawm nghal zat a. "Aa ngawiteh..lo riak lo mai ang." tiin ka chhang a.

Mahse Nathana chuan, "Lo riak law law rawh...naktuk zingah chhuah hma a ngaih takin...kan che rang thei zawk ang." a lo ti ve bawk a. "Awle, in tih tlat te chuan.." tiin scooty atang chuan ka chhuk leh a, inah chuan kan inzui lut ta hlawm a. MAxie bulah ka mu a, Nathana erawh room dangah a mu thung.

**********************

ZAnlaiah chuan kan mutna room kawngka inkik dat dat ri chuan min ti harh a, "MAxie...Bella, lo hawng lawk teh u." Nathana aw ngei a ni. Maxie chu ka va en a, a lo harh eih lo. Light ka on a, kawngka lam chu ka va pan phei a. Kawngka ka han hawng a, Nathana chu a lo ni ngei e. "Enge ni ta, Sir?" tiin ka lo zawt vat a.

"Richard-a'n min rawn phone a, Suresh-a hnen atangin call an dawng a ni awm e."

"Enge a rawn sawi a?"

"Chhandami chu a kawl thu a rawn sawi leh si a ni awm e, deal siam dun puiah a sawm a. Chupawh zanin ngei hian a ti tlat a, chu chu ka rawn hrilh che."

"Zaninah hian maw?"

"AW ni e, chuan buaina a awm bawk?"

"Eng buaina maw?"

"Station atanga call a nih avangin call a in record vek a, chumi call chu IG Pu Rinliana'n a lo hre ve vek a. Chu chu Ricard-a te tan chuan problem lian tak a ni, a chhan chu Pu Rinliana'n engmah information a hre ve si lova." tiin NAthana chuan min chhang a. "Ava buaithlak tak, min va han tibuai hneh tak em, hemi te thiandun hi chu.." tiin ka phun nuah nuah mai.

"Suresh-a chuan engemaw a thawm bawk a ni awm e, box a nia."

"Khawiah?"

"Ele..police Stationah chuan.."

"Anih a chhungah enge awm?"

"Chu chu an la hre biklo, an la hawng lova. Kan va kal nghal mai loh chuan...hun a uiawm ropui sia..kan va kal mai dawn em ni?" tiin min zawt a. MAxie chu ka va en a, a lo la mutui nasa mai. "Anih MAxie saw?" ka ti a. Heta amah chauh a a awm chu ka duh lo, Suresh-a hian ka address a lo hriat ruk reng phei chuan a rawn kal duh maithei bawk." tiin min chhang leh a.

"Anih chuan engtin nge kan tih ang?" tiin ka zawt leh a. A ngawi vang vang a, "Kan hruai ve mai dawn nia." tiin min chhang a, Maxie chu kan kai tho nghal a. Thil awmzia te kan hrilh a, thuawih tak chuan a insiam ve mai bawk. Tichuan kan pathum chuan Nathana motorah chuan kan iphur a, Station lam chu kan pan ta a.

********************

STation chu kan thleng a, a kawtah chuan police thenkhat an awm tho avang chuan MAxie chu car chhungah chuan kan awm tir a. Tichuan Nathana nen chuan Station chhungah chuan kan inzui lut a, "In lo thleng maw? Hei hi ania box chu...kan la hawng lo." Richard-a chuan a lo ti nghal vat a.

Box chu dawhkanah chuan a dah a, kan va pan hnai a. Nathana chuan a han hawng a, note book pakhat leh puan senno hi a lo awm a. "Ehe...hei hi, Chhandami kawr them te a ni thei mai angem?" ka han ti nuah nuah a. Mahse Nathana chuan a lu thingin, "Nilo, a bo hma khan kawr eng a ha a, slipper senno zawk a bun a ni." a lo ti a.

Chutih lai chuan IG a rawn lut thut mai a, Richard-a leh Nicky-a te chuan an hlauh hmel kher mai. "In pali khan ka office-ah rawn lut teh u." a han ti vin deuh thak a, tichuan kan zui lut ta hlawm a. Pu Rinliana chu a han thu a, "Chhandami pu, Pu Lura khan thu thar min rawn hrilh a, a naute lem an hmu zo lo bawk a ni awm e. A awmzia chu a naute lem chu Chhandami khan a keng tel tihna a ni, a naute lem pawh a bo tihna a ni." a han ti te te phawt a.

Mahse tumah chuan kan chhang lova, kan la ngawi reng. Chutah Nicky-a te thiandun chu a han en vang vang a, "Drugs zuar lehnghal, ka hriat lohvin deal in lo siam pui a. Hei hi a thlen ka ring ngai lo asin," tiin a han hau va. Inthlahrung tak hian Richard-a chuan, "Kan tihpalh a ni, Sir. Chhandami chu kan hmu leh ngei ang, a chungah engmah a thleng lovang." tiin thupha a chawi nghal mawlh mawlh a.

File pakhat chu Pu Rinliana chuan NAthana chu a pe a, "Hei hi Inspector Richard-a leh Suresh-a inbiakna transcript a ni a, han en teh." a ti a. Nathana chuan a en a, "Pu Zachhinga te huan bula lui kawrah khan pawisa kan inpe dawnnia a ti a nih hi Suresh-a chuan.." Nathana chuan a han ti a. Pu Rinliana chu a thaw deuh huai a, "In kutah ka dah e." tiin a chhuak daih mai.

IG Office chu kan chhuah san ve nghal a, "I plan han sawi hrim hrim teh." tiin Pu Rinliana chuan Richard-a chu a zawt a. Richard-a chuan Nathana nen chuan min han en a, "Cheng nuai 20 a phut a, a cash-in a ti bawk a ni. PAwisa chu ka ngaihtuah fel vek tawh a, kei leh Nicky-a'n ral lehlam atangin lui kha kan cross anga, kan va pe ang a, nangni pahnih erawhin Chhandami in lo buaipui ang, chu chu Suresh-a duhdan pawh a ni." a han ti a.

"Sir, public in em ni hethil hi kan kalpui dawn?" tiin IG chu ka han zawt ve a. IG chu a han ngawi vang vang a, "Ka fanu kha kum 12 a nih lai khan ruk bo a ni a, thah a ni bawk. Chuvang chuan public leh lic lo ka ngaipawimawh ve lo, he naupang kum 6 mi Chhandami hi khawih chhiat anih hmain emaw, thah a nih hma in chhanchhuak vat rawh u." tih ringawt chuan min chhang a, a chhuak daih mai.

"Umm..engpawh nise ka plan chu enge in ngaihdan?" Richard-a chuan a han ti leh a. Nathana chu a khi suk a,"A tha alawm, i plan ang chuan kal ang u." tiin a chhang a. Tichuan kan pali chuan kan chhuak ta a, Maxie pawh loh theih lohvin kan in lamah kan riah tir ta ringawt a, ka khawngaih reuh thin ngawt mai, he nau hi chu.

***************************

Lui chu kan thleng ta a, rin ai takin a hla lo. Mahse a mawng ve phian tho va, a kalkawng erawh a hrehawm lutung lo thung. Richard-a te nen chuan kan inthen hrang ta a, ral leh lamah chuan Nathana nen chuan kan phei a. "A plan angin a han sawi vel a, Suresh-a demand a ni reng sia." tiin ka han phun sup a.

Nathana chuan nui chung hian, "A tha ve alawm, keini aiin an lo fing em a ni." tiin a rawn fiamthu zui ve bawk. Ral lehlamah chuan Richard-a te chu an awm a, keini quarry lamah kan chho thung a, lung lian tak tak te chuan kal a ti harsa takzet. A chung kan han thleng chho va, "Engemaw dik lo a awm tlat in ka hria." Nathana chuan a ti nuah nuah mai.

"Eng dik lo maw?" tiin ka lo zawt vat. Min chhan hma hma chuan ral lehlam, Richard-a te awmna lam atang chuan silai a puak ta dur mai le. Kan v ahawi phei nghal a, mahse a thim em avang leh a hlat em avang chuan engvak mah kan hmu thei lo. Chutah walkie-talkie atang chuan Richard-a chuan, "Nathan..Nathan.." a rawn ti vak vak mai.

"Bella, chhuk vat ang." tih leh Nathana chu kan lawnna atang chuan a zuang thal a, a chhuk leh nghal a. Kan hmanhmaw bawk nen, lung khawk rawk karah chuan a tleng hian kan tleng thla hi a ni ber mai. A mawng chu kan thleng thla a, ral lehlam pan chuan kan tlan phei nghal a, Nathana chu a tlan chak ngei mai.

Kan va thleng phei a, Suresh-a'n pawisa inpekna hmun tur a sawi lam pan chuan kan tlan chho leh a, kan han thleng chho chiah chu tuia engemawni tla ri burh hi kan hre ta a. Kan zu hawithla a, mahse engmah tuiah chuan kan hmu lo. NAthana chuan, "Enteh saw, Bella." tiin hnunglam chu a kawk a.

Ka va hawi phei chu Suresh-a chu a lo let reng mai, kan va pan phei nghal a. NAthana chuan a mar a han dek a, "A thi tawh." a ti ta mai a. Chutih lai chuan Richard-a te thiandun pawh chu an rawn thleng ve nghal a, "Enge awmzia? Ehe...Suresh-a a ni em hepa hi? A thi a mi?" Richard-a zawk chuan a rawn ti nghal chung chung mai.

"AW...a thi." tih ringawtin Nathana chuan a lo chhang a. "Anih tunge that? Enge awmzia, Nathan?" tiin a zawt leh a. "Ka hre bik nang, kan lo thleng phei ve chauh alawm." tiin Nathana chuan a vin let hrep mai. Chutih lai chuan lui lam chu ka zu hawi thla a, hmeichhe naupang kut niawm tak lo lang chu ka zu en fuh tlat mai.

Engmah ka sawi hman tawh lo, Chhandami a nih ka ring nghal tawp.Thildang ka ngaihtuah hman tawh lo, tuiah chuan ka zu zuang thla ta ringawt mai a. Karei leh, ka rin aiin a vawt daih, chumai a nilo, vur tui ang mai a ni. Ka hleuh thei mai lo, a tir chuan, a vawt lutuk tlat. Theih tawp chhuah chuan ka hleuh a, kut lo lang chu ka va ban a.

Mahse ka rinloh lutuk in naute lem zawk a lo ni reng mai, NAthana a rawn zuang thla ve nghal bawk. Mahse a thuk em avang leh a vawh em avang chuan ka che hleithei tlat lo, Chhandami chu hmuh tur a awm thak lo bawk. Tui chu ka hak leh deuh bawrh bawrh a, ka hnarah a la lut zui a, nikhawhrelovin ka awm ta a ni ngei ang, engmah ka hre zui lo.

********************

TO BE CONTINUE