WILD ZONE : SEASON 1 (Episode - 12) Written by : Aaron Malsawmdawngzuala THE UNKNOWN KILLER - 6

 WILD ZONE : SEASON 1

(Episode - 12)

Written by : Aaron Malsawmdawngzuala

THE UNKNOWN KILLER - 6

******************

"Sir, an pahnih sawn an that a ni mai lo maw?" ka'n lo ti ve ngawt a. "Ka hre lo, Dama kha chuan ava thlah mai kha a ni a, a motor bawk hian office lamah a let leh ngei awm si a. Mahse tunah a motor hetah, Zohminga'n ala khalh lehnghal." Nathana chuan a ti nuah nuah a. "Chu reng, an that a ni hrim hrim." ka lo ti ve leh a.

Zohminga chuan meizial a phawrh a, motor chu nghengin a zu hlat hlat mai. A bulah chuan Hmingtei chu a rawn phei a, eng emaw chu an sawi, mahse kan hre pha tlat lo. "Sir, khawnge SI pakhat...Zohminga te ina kal tura Danny-a'n a rawn tih ve kha?" tiin ka zawt a. Min en hu a, "Tu SI maw?" a ti hu mai.

"A hming ka hre leh tawh lo, Danny-a khan a sawi a. In inhmu miah lo maw?" tiin ka zawt leh a. Nathana chuan a lu a thing a, "Keimahin alawm ka kal, Zohminga te inah chuan a lo va kal a ni ngei ang. Keichu ka sawi ang khan an in ka thlen hma daihin alawm Dama te motor saw ka hmuh, Office lam pana a kalloh avang khan ka zui thla alawm." tiin min chhang a.

"Mahse Zohminga nu te kan biak khan tumah an lo kal miah lo an ti bawk sia, eng awmzia?" ka ti leh a, Nathana chuan mak a tih hmel kher mai. A han ngawi leh deuh vang vang a, "Anih chuan chu SI pawh chu khawnge a awm ang le?" a han ti leh nuah nuah a. Zohminga leh Hmingtei te chu kan en pah reng bawk, Zohminga chu a lungngawi vak lovin ka hria.

Hmingtei chuan thlem ni awm tak hian a kuah a, mahse Zohminga chuan a lo nam sawn zel a. "Engtin nge kan tih dawn, Sir? Ti sawn kan en reng dawn nge, kan va man dawn?" tiin ka zawt leh a. "Aih..en zel phawt ang, i phone camera khan la teh." tiin min chhang a. Hmingtei leh Zohminga awmdun chu video in ka la char char a, an la inthlem nasa mai.

Chutah motor ah chuan an chuang leh a, minute 1 vel an din leh vang vang hnu chuan an tlan ta daih mai. "Sir, an tlan daih...kan umzui dawn em?" ka ti nghal vat a. "Aih um lo phawt ang, DAma te office-ah kan kal angai." tih pah chuan a phone a phawrh a. Dany-a chu a call a, "Danny, Dama te motor number kha i hria em?" tiin a zawt a.

Phone atang chuan Danny-a chuan, "Aw hria e, Sir." tiin a rawn chhang a. "Anih chuan ngun takin lo ngaithla rawh, Gosen tlaklam huan kalkawngah Zohminga leh Hmingtei te kan hmu a, a lan dan chuan Hmingtei hian Dama hi a rukin a uire san a ni. Tun lawk khan an rawn tlan chhuak chiah a, a rang thei ang berin chhoh chhuah lamah lo chang rawh u." tiin a hrilh a.

"Awle Sir, ruang pawh kan buaipui zo tawh a. Khawtlang mipuiin an hre darh lehnghal a, mihring an tam khawp mai Dama te inah hian...nangmahni khawnge in awm?

"Keini chu min lo ngaihtuah suh, kan motor awmna a hlat deuh avangin kan um pha hman dawn chuang lova. Chuvang chuan i naute thenkhat kha Dama te inah khan awm tir la, pahnih vel hruaiin Zohminga te chu in lo chang dawnnia."

"Awle Sir, tunah kan kal nghal e...chanchin ka rawn hrilh zel ang che."

Nathana chuan phone chu a dah a, "Keini pawh hmanhmawh ang." tiin kan motor awmna lam pan chuan kan kal phei a. Kan kal pah chuan Nathana chuan, "An pahnih khan lo man phawt se, keinin tunah Dama te office kan va pan nghal thung ang." a han ti a. "Kan han chhoh chhuah pahin kan tawk maithei asin." ka lo ti a.

"TAwk hman lo pawh ni ila a pawi lo, Danny-a ten an lo man mai dawn alawm. Tichuan Dama te chu kan va ngaihtuah phawt anga, tunah office ah a awm em pawh a hriat miah loh ania." tiin a han ding leh thut a. "Tinge?" ka lo ti hu mai. Min melh deuh hru a, "I sawi ang khan anni hi tualthattu chu lo ni ta se, Dama hi an that anga, ramhnuaiah hian a ruang an thukru te hi a ni mai lo maw?" a han ti leh a.

Keipawh chuan chu chu ka ring deuh tho mai, "Ni e, kan kal ve leh nghal ringawt a. Car bul velah emaw, hmundangah te pawh an lo dahtha reng thei tho mai." ka lo ti ve a. Nathana chu a ngawi vang vang a, "Khawilai ah nge bike chu i dah?" tiin min zawt a. "Saw lai lawk saw a ni tawh." tiin ka chhang a.

"Anih chuan ka va let leh lawk anga, nang erawh Dama te office ah lo va kal la, lo va en chiang ang che." a han ti a, "Awle Sir, ka va kal nghal ang e." tiin ka chhang a. "Chanchin ka lo ngaichang ang." tiin min kalsan a. Keipawh chu ka kal zel a, ka bike awmna chu ka thleng a. Ala nung thei lawk lo zui, reife ka try leh hnu chuan kan tlan thei ta hram a.

****************************

Ka han chhuak chho chiah chu DAny-a te chu ka hmu ta ngei a, mahse Hmingtei leh Zohminga te chu ka hmu ve ta hauh lo, chu mai nilovin Dama car takngial pawh hmuh tur a awm lo. Danny-a chuan mak tih hmel deuh hian min en hu a, "Ehe Bella, nangmah zawk i rawn lang daih a, enge awmzia?" tiin min lo zawt daih mai.

"An lo la thleng lo em ni? Hmingtei te chu?" tiin ka lo zawt let a. "Aw...minute 10 vel liam ta khan kan thleng chiah a, tumah an lo la tlan chho lo." tiin min chhang leh a. "Anih chuan khawnge an kal ang, an la rawn chhuak chho thleng lo tihna aniang maw?" tiin ka phun sap a. A bul vel lah chu a reh em em mai a, kawng kal lai mihring emaw, in emaw dawr emaw pawh engmah a awm si lo.

"Kan nang hman lo te pawh a ni thei tho mai, a hrim hrimin khawnge Sir Nathana hi?" tiin min zawt leh a. "Khutah ala awm...Danny, an lo la thleng lo pawh a ni thei a, kan nang hman lo pawh a ni thei. Chuvang chuan i thianpa nen hian zu chhuk ve leh ula, kei Dama te office ah ka lo va kal ang. Chuan i naute hrilh la, Dama te motor chu lo zawng rawh se." ka han ti zung zung a.

"Dama te office ah a? Enge i tih dawn? Chuan..Sir Nathana chua enge ala tih khutah chuan?" tiin min han zawt leh hram a. "DAnny, zawhna inzawh hun a ni lo. Sir NAthana amah chauhvin ala awm ania, zu chhuk ula, keipawh ka lo phone lawk ang. Dama car Zohminga leh Hmingtei'n an hmang bawk si a, chuvang chuan Dama hi khawnge a awm kan hre hrih lo." tiin ka chhang a.

"Anih chu...awle, ka naute chu kan lo phone thla nghal dawnnia. Sir Nathana kha a location on turin lo hrilh nghal la, kan zu chhui thla mai ang." tiin motor ah chuan an lut a, a thianpa nen chuan an chhukthla ta nghal a. Keipawh chuan Nathana chu ka phone a, "Aw Bella, enge chanchin?" a rawn ti nghal a.

Thil awmzia te chu ka hrilh a, "Awle, ka location chu ka lo on ang. Anih chuan nangpawh  Dama te car chu i tlan pahin lo melh kual tho la, chanchin kan inhrilh leh zel dawnnia." tiin min chhang a, phone chu kan dah ta a. Dama te office lam pan chuan a chak thei ang ber chuan ka han tlan char char a, reiloteah chuan ka thleng ve mai.

**************************

Office chhungah chuan ka lut a, "Lo leng rawh, ka pi..enge i duh?" tiin reception te chuan min lo zawt a. Ka batch hmuh pah chuan, "Detective Bella Lalmuankimi ka nia, Pu Lalchhandama hi a awm em?" tiin ka zawt a. "Aih...vawiin chhun khan police ten an rawn hruai a, a lo la let miah lo." tiin min chhang ta mai a.

Mak ka ti em em lo, a nupui leh Zohminthanga te khan an that a, a ruang an dahtha a nih ka ring hmak tawh. "Ka pi, engthil nge Dama chungah chuan thleng a?" tiin receptionist bawk chuan min lo zawt leh a. MAhse ka chhang lo, pawnah chuan ka chhuak leh nghal daih a. Nathana chu ka phone a, "Sir, Dama chu a office ah a awm lo. A thawhpuite ka zawt a, police ten an rawn hruai hnu khan a lo la let leh lo an ti a nih chu." tiin ka hrilh a.

"Awle..anih chuan Station lamah let leh la, Dama call log zawng zawng lo hriat tum la..chutiang bawkin Zohminga leh Hmingtei pawh...chuan a darzat nen lam thlapin aw..chanchin ka lo ngaichang leh ang." NAthana chuan a rawn ti a. "Anih leh Sir, nangni enge in ang? Danny-a te nen chuan in inhmu em? tiin ka han zawt veleh a.

"Aih la hmu lo, chuan keipawh ramhnuai chhungah ka la awm mek." tiin min chhang a. "Ehe...darkar chanve dawn aliam tawh a, inla inhmu miah lo maw? I location chu an rawn chhui lo amawni le..buaina an lo tawk ve te hi a ni lo maw?" tiin ka rilru chu a mangang nghal hle mai. "KA location te chu ka on reng alawm, min lo hmu ve mai ang." tih leh a phone chu a dah daih mai.

Station lam pan chuan ka tlan leh ta a, reiloteah chuan ka thleng ve leh mai. A bike ka hmansak mek, constable chu a lo kal a. "Ka pi, hei ka ban a hun tawh a...i duh chuan hmang tlang mai la, taxi in ka haw hrih mai ang." inthlahrung tak chuan a lo ti a. "Aww anih tak chu...lawk aw, taxi fare ka pe ang che." tiin ka wallet chu ka phawrh a.

Wallet ka ak hi mak lo ti vak suh u, detective tan chuan purse han ah deuh t(r)alh hi a theih ve tlat loh, ka nu lem lo ka tih tawh kha. PAwisa chu a la duh lawk lo va, mahse ka pe lui tho. Tichuan ASI pakhat chu DAma, Hmingtei leh Zohminga te call log chhui tur chuan ka hrilh a. Darkar chanve dawn chu ka nghak a, a bei rei khawp mai.

Nathana lah chu ka call a, a la thei thak tawh lo lehnghal. DAnny-a ka call leh a, a la thei bik lo. Ka rilru chu a mangang tawh khawp mai, police dang ho lah chuan Dama te car ang an la hmuh miah loh thu hlir min hrilh bawk si. Dama te in lamah lah ngaihtuah tur ala tam bawk nen, tun tum case zet zawng, rin ai takin a hahthlak phian mai.

*******************************

A tawp a tawpah chuan ASI pawh chu a rawn chhuak ta a, "Ka peih fel e." a rawn ti a. Danny-a dawhkan lamah chuan kan inzui phei a, paper chu dawhkanah chuan a rawn dah a. "An phone hi tunah hian OUT OF SERVICE char char a nih avangin an sim card an tichhe lui niin a lang." a han ti te te a.

"Anih leh call log chu i hre thei lo tihna ami?" tiin ka zawt a. "Hre thei e, heivang hian ania a rei deuh chhan. Vawiin ami chian ka search chhuak thei a, Dama atang hian tan phawt ila. Tukin zing lamah call engmah a dawng lova, tumah a call chhuak lo bawk. Chuan tlai dar 2 leh a chanve ah call a dawng a, chu chu Hmingtei call a ni." a han ti a.

Ka han ngaihtuah vang vang a, "Heta tanga an vaia kan haw tir kha dar 12 leh 45 vel a ni a, dar 2 leh a chanve velah kha chuan Maxie te nen kan haw mek. Maxie khan Dama te motor a hmuh khan dar dar 2 leh 15 ang velah lo ngai ta ila, in kan thlen a, police ho ruang kan hmuh khan dar 2 leh a chanve vel chu a ri tawh angah chhut ta ila.." ka han ti deuh nuah nuah a.

Chuveleh ASI chuan, "Dar 2 leh a chanve velah in in thleng a, ruang in hmu a. Chutih lai chuan Hmingtei'n Dama a call mek, a awmzia ni thei a lang chu Dama hian ruang kha a hmu velo nge...an nu kha a thlah tlang lo hrim hrim zawk?" a lo ti ve nuah nuah bawk a. "Ka hrethiam mai lo...call dang a dawng leh em?" tiin ka han zawt leh a.

"Aih..a bak chu dawng tawh lo...a hnu lawk dar 3 rik hma hretah khan aman an nu hi a call leh a, second 45 bak an in call lo. A hmasa zawkah kha chuan minute 2 vel an incall, an incall rei lo thei khawp mai." tiin min chhang a. "A bak call dang a awm em?" ka han ti leh a. "Aih..abak chu engmah a awm lo, kan phone tlang thei ta miah lo kha a nia." tiin min chhang leh a.

"Anih leh midang?" ka lo ti leh a. "Hmingtei hi Zohminga nen an incall bawk. Dar 1 khan minute 5 chhung an incall a, dar 2:20 khan minute 12 vel an incall leh. Hmingtei hian vawiinah mi pahnih a call a, Dama call bak call dang a dawng miah lo thung. A mi call te hi a pasal  leh Zohminga an ni a, Zohminga vawi hnih, a pasal bawi khat." tiin min chhang leh a.

"Anih leh Zohminga'n?" tiin ka zawt leh vat a. "Tumah a call lo, Hmingtei call vawi hnih a dawn hi a ni mai." tiin min chhang a. "Anih chuan sava veh ni a Ramliana nena an va haw pawh khan Zohminga khan Hmingtei hi ava hmu a ni chiang mai, tenawm lutuk." tiin ka vin deuh hlur mai, ka ten em a ni.

"Mahse Zohminga hian tinge a thiante hi a thah kher le?" ASI chuan a lo ti ve leh a. "An hria a niang, an hriat vangin an ka hup nan a that pawh a ni thei." tiin ka lo chhang a. Paper chu ASI chuan a han en leh vang vang a, "A va thlah thleng ta lo a nih ka ring mah zawk...nge ni a, Dama hi an that ve dauh tawh zawk..ka hrethiam lo ea." a han ti deuh nuah nuah a.

Chutih lai tak chuan ka phone a rawn ri a, Nathana a lo ni hlauh mai. Rang takin ka la a, "Aw Sir, enge chanchin?" tiin ka zawt nghal vat. "Bad news a awm, Bella.." a rawn ti zawi sap mai. "Eng bad news maw?" tiin ka lo zawt vat a. "SI i sawi kha...a hming chu Thanga a nia. A ruang kan chhar a, DAnny-a te nen." a rawn ti ta mai a.

"Enga..a thi maw?" ka ti deuh vak mai. "Aw...a lu ah vuak niin a lang. Engpawh nise, ruang nen hian kan lo haw phawt ange. Call log chu i lo hre tawh em?" tiin min rawn zawt veleh a. "Aw hre tawh e.." tiin ka chhang a, Zohmiga, Dama leh Hmingtei te call log chu ka han hrilh zung zung a. "A tha e, ka lo haw phei anga, kan sawi ho dawnnia." tiin phone chu a dah a.

**********************

Tlai dar 5 leh a chanve a ri tawh a, Stationah chuan ka la awm char char a. NAthana te chu an reh hmak mai bawk si, phone lahin an la thei leh tawh bawk si lo. Khua lah chu a thim chu a ni deuh tawh mai a, rilru ava han hah duh tak em. Ka ril  lah chu a tam em em tawh mai lehnghal a, Station bula canteen ah chuan thil eiin ka chawl ta tawp a.

Chutia thil ka ei zo pawisa ka pe fel chiah chu kawng pui lam ka va melh a, ka phu zuk mai. Dama car hring ngei mai lo tlan lai chu ka hmu fuh ta hlauh mai a, rang takin ka va tlan chhuak nghal. Theih tawpa chak chuan Station lamah ka tlan phei a, bike chu ka start nghal a. Ka tlan chhuak ve nghal, mahse ka hmu hman mai lo tlat.

Chak thei ang ber chuan ka han tlan zel a, ka hmu leh ta hram e. An mahni umzui chuan ka tlan zel a, Gosen lam kawng bawk chu an pan leh ta tlat mai. Ka zui thla ve zel a, ka umzui tih an hre deuh nge mawni, an tlan chak tulh tulh hian ka hria. A hmaa kan kalna, ramhnuaiah bawk chuan car chu a tlan thla a.

Ka zui zel a, a thim tha tawh kher mai. RAmhnuai kan luh dawn meuh chuan ka umzui zel ngam tawh lo, a chhan chu ka bike head light an hmuh vaih chuan ka zui a ni tih an hre dawn tlat. Bike chu ka ti ding a, ka side tha a. Motor chu ke in ramhnuai chhungah chuan ka umzui ta zawk a, a tlan thui lutuk lo hlauh mai.

Motor chu a hma a Nathana nena Zohminga leh Hmingtei kan hmuhna, hmun zawl ve tak maiah chuan a ding leh a. Motor atang chuan Hmingtei bawk chu a rawn chhuak leh ta a, mahse Zohminga erawh hmuh tur a awm ve tawh hauh lo. Hmingtei chuan a phone chu phawrh in a khawih mual mual a, ka en thla reng a.

Motor dinna zawn takah hian thla a eng hle a, motor light a in on reng bawk avang chuan a bul vel pawh eng pangngai ve tak a ni. Hmingtei chuan tu emaw tak chu a call a ni ngei ang, a be mawlh mawlh a. A vei kual thuak thuak a, a tawpah chuan ramhnuai thim laiah chuan a kal bo ta daih mai.

Ka han nghak leh deuh phawt a, mahse ala reh vang vang tak si ah chuan ka pistol ka phawrh a, motor lam chu ka torch light nen chuan ka va pan ta a. Motor chhung vel chu ka torch light chuan ka han en kual a, mahse a chhungah chuan tumah an awm lo. Hmingtei chu a rawn let leh em tih enin a bul vel chu ka en kual reng bawk a, chutih lai chuan a savawm bawm chu a rawn ri ruk ruk mai.

Ka phu nasa em em mai lehnghal, ka va pan hnai vat a. Ka han ngai thla leh a, a rawn ri leh dup mai. A chhungah chuan mihring an awm tih ka chiang, hawn ka tum a, mahse chahbi a ngai tlat. Motor chhunglam chu ka zu bih nawn leh a, chahbi a lo invuah hlauh mai. Chutah tukverh a lo la inhawng zui, chahbi chu ka ban vat a.

Motor hnung lam chu ka hawng a, mak ka ti lutuk chu ka tawlh deuh dawrh mai. Zohminga chu a hmui tuam niin a kut leh ke phuar beh a lo ni bawk a, min hmu chiah chu a meng phawk ngei mai. "Zohming, nang maw?" ka ti hu a, a tal vak vak a. Rang takin a hmui tuamna chu ka phelh a, a khuh vak vak mai.

"Zohming, enge awmzia?" tiin ka zawt a. Min rawn melh a, "I hnung kha.." a ti vak a. Rang takin lehlam ka hawi a, Hmingtei chu ka hnungah a lo awm reng mai. Thing tum lian zet hi a lo keng a, min rawn vai thuak a. Min vuak thleh hlauh, Zohminga ke zawk chu a hlap ri chawrh mai a, Zohminga pawh a t(r)e ring kher mai.

Ka pistol ka la thlauh zui, rang takin Hmingtei lah chuan ka pistol chu a la chhar zui a. Min tin ta ran mai, "Che tawh suh, Detective BElla, a nih loh chuan ka kap hreh miah lo che ania." tiin min vau nghal khur khur a. "Hmingte, silai kha dah thla vat rawh...engthil nge i tih hi i hria em?" tiin ka ban ka phar a.

Vin zet hian, "Hria e, ka thil tih hi ka hre chiang khawp mai. Nangni zawk hian engmah in hre lo, engmah in hre lo a ni." tiin min an khum hrep a. "Bum hmangnu, mi tenawm nu...i chak lo khawp ang, hre rawh." tiin Zohminga chuan a lo vin nasa mai. Hmingtei chuan Zohminga chu a tin leh a, "Nangkha lo ngawi rawh, nang tluka tenawm an awm lo," tiin a vin let ve a.

Min rawn tin leh a, "DEtective BElla, khawngaihin kal bo rawh. Tihnat che ka duh lo, tun bak ka sawi dawn lo a nia." tiin min vau leh khur khur mai. "Nilove Hmingte, i silai kha dah thla la, tha deuhvin i titi dun zawk teh ang." ka han ti leh a. Mahse tap deuh tuau chung chuan Hmingtei chuan, "Ka dah thla lovang, he mihring tenawm Zohmingthanga hi ka that dawn..chu chu a nimai." a han ti leh hlur a.

Chutih lai chuan ka hnung atang chuan mipa aw hian, "Hmingtei, silai kha dahthla rawh...keimah, Dama ka nih hi.." a rawn ti a. Hnunglam ka hawi a, Dama, Nathana, DAnny-a leh constable Fela te chu an lo kal a. Nathana leh Danny-a chuan pistol an rawn hum ve bawk, "Nangni pawh kha lo kal suh u, a nih loh chuan hepa hi a thi ang." tiin Hmingtei chuan Zohminga chu a tin leh a.

Zaidam tak hian Dama chuan, "Duhtak...khatiang tur a ni lo. Hahdam rawh, engkim a tha leh vek mai dawn alawm" tiin zawimuang chuan a va pan a. Hmingtei chu a tap nasa khre mai, Zohminga chu ala tin reng tho va. Dama bawk chuan, "Silai kha min lo pe rawh, engtin mah an ti dawn lo che." tiin silai chu zawi muang chuan a laksak a.

Nathana chu ava kal hnai a, Dama chuan pistol chu a lo pe vat a. Hmingtei nen chuan an inkuah a, mahse ka rin loh tak maiin Nathana chuan an nupa chuan a tin leh ta daih mai a, keipawh chuan a ngaihna ka hre lo kher mai. Dama chuan NAthana chu a en hu a, "Pu Nathan, enge awmzia?" a ti vak vak a.

Nathana chu a nui suk a, "I trick kha ka hre vek alawm, i nupui kha chhanhim tum duh suh..Nathan MAlsawmkima ka nih hi, Bawiha...min bum lovang." a ti hrep mai. Ka hrethiam lo tulh tulh, "Sir, enge awmzia?" ka lo ti hu mai a. "Bella, tualthattu chu mi pakhat nilovin mi pahnih an ni...chu chu hemite nupa hi an ni." a ti ta mai a.

"Enga..Dama te nupa hi maw?" ka lo ti leh hu mai a. "Aw ni e, an nupa thil tih vek a ni." tiin Nathana chuan min chhang a. "Anih enge proof-na i neih?" tiin Dama chu a lo pawr ngei mai. Nathana chu a nui deuh huk a, "Hei..proof-na chu tunah hian a thleng mek a nih hi...i nupui atang pawh khan a hriat mai alawm." tiin a chhang a.

"Sir, ka la hrethiam chuang lo." ka lo ti leh a. Nathana chuan min en a, I hre mai ang...anmahni hian an sawi dawn alawm." tiin min chhang a. Dama chuan lungawiloh hmel tak hian, "He case chhui tur hian keimah ngeiin ka ruai che a, engvangin nge kei hi tulathattu ka nih theih ang? Ka thil tih sual chhui turin ka ruai ang che anga maw? Chupawh pawisa chawi lehnghal in?" a han ti pang pang a.

"Dama, Zira thih zan kha ila hria anga...Zira kan um lai khan kan kalhkhum che u. Mahse maw, CCTV a Zira lo lan hma zawng khan in nu hian pyjama var(white) a ha a, mahse a thih hnu a, in room a kan lo luh leh khan a senno a ha leh daih tawh. Nangpawh khan a hma khan t-shirt var i ha a, mahse Zira thih hnua kan rawn luh leh kha chuan a pawl dal i lo ha leh daih tawh bawk. Mahse ka ringhleh nghal mai lo che u, in lo inthlak zuai pawh a ni thei a, ka la ngawi mai mai a. MAhse thil pakhat ka hriat belh leh a ni, vawiin tlai khan he ramhnuaiah hian DAnny-a te nen hian i nupui Hmingtei leh Zohminga khan kan zawng char char a. SI Thanga ruang kan hmu a, kan thawn phei pah khan engemaw hriatchhuah zawk ka nei a, BElla-i min lo call pawh ka chhang hman ta lo kha a nia." tiin min rawn melh zeuh va.

Chutah sawi zawm zelin, "Zira thih zana tualthattu in Zira ruang a rawn put phei khan hoodie dum a ha a, a ban bulah khat dot pahnih var chiang takin a lang tih ka hrechhuak a. Khatiang chiah hoodie dum kha vawiin chhuna police duty ho ruang awm lai khan in nupa room ka check lai khan ka hmu a ni. Mahse ka la ringhlel chuang lo che a, ka chhuk san leh mai a. Ka phone ah kha CCTV footage kha ka kawl tih ka hrechhuak leh a, tichuan cyber cafe ah tumah hrilh lovin ka tlang ta a ni. CCTV footage chu ka en nawn leh a, tualthattu pheikhawk pawh kha Nike var a ni a, chutiang pheikhawk ang chiah chiah chu in room ah khan ka hmu bawk a. Rang takin in inlamah let lehin in room ka check nawn leh a, pheikhawk hruiah khan thisen tlem a lo la kai nghe nghe asin." a ti leh a.

Dama te nupa chu an ngawi ta reng mai, Nathana chuan min en a, "Zohminga leh Hmingtei awmdun ka hmuh khan anmahni kha ka ringhlel ve tho va, mahse Zohminga hi tualthattu ni ta se, engvangin nge Zira kha DAma te inah a kal kher? Engvangin nge a thiante hian ringhlel ang pawhin an awm loh tih thlengin ka ngaihtuah a. Station lama ka lo let leh tur khan DAma hi kawngsirah ka hmu hlawl a, chhuanlam eng eng emaw kha chu a siam nasa. Mahse ringhlel lo angin ka awm lui a, chutih lai tak chuan NAng leh Hmingtei rawn in um kha kan hmu a. Kan rawn umzui ve ta che u a ni, Bella." tiin min hrilh fiah a.

"Mahse..Dama te nen in lo kal ho leh bawk sia." ka han ti leh hu a. Danny-a chu lo inrawlh vatin, "Sir Nathana nen hian Station lamah kan rawn inphur phei a, Dama hi kawngsirah kan hmu a. Kan va pan a, enge awmzia, chuti khati tia kan han zawt kha chhuanlam a siam kual nuai a, dawt hrang hrang a sawi kual a. Mahse Sir Nathana hian min signal zauh va, chuvang chuan a thusawi chu awih angin kan awm zel a. Chutih lai tak chuan in rawn in um ta a, kan rawn zui ve zel ta che u a. Kan rawn kal pah pawhin ka nupui hi a a tawh, chuti khati tiin a han tap kual vel a, min bum theih a inring reng reng emawni, tiraw Sir NAthan." tiin a han khi deuh suk a.

Nathana chuan lo sawi zawm veleh in, "Kan nu in car a hmang duh a, taxi in office ah khan ka let leh ta mai te kha a ti vel a, mahse a car ber khatia i lo um lai kan vaia kan hmuh tawh si ah kha chuan chhuanlam siam tur a hre tawh lo aniang nge, kan rawn thleng ve ta hlawl a nih hi." tiin a khi ve suk a.

Dama te nupa erawh hnuailam melhin inkuah chungin an la ngawi reng thung, "Tunah chuan Dama, engvanga tualthat nge in nih tih te, engtin nge CCTV kha in khawih danglam theih tih te, engtin nge kan kalh khum chung pawh a in hawn theih tih te, in thil tih rapthlak tak in tihna chhan te han sawi ve thung tawh teh u." Nathana bawk chuan a han ti leh a.

Chutah rum fe hian Hmingtei chuan Zohminga chu a melh a, "Ka sawi dawn em? Thudik engkim ka sawi dawn em?" a ti khur khur mai. Hlauhtawh hmel tak hian Zohminga chu a hawi hru hru a, "Nilo...an sawi hi dawt vek a ni, engpawh sawi se, dawt vek an sawi tih hre tawp ru...ka pu..dawt vek a ni." a ti chiam chiam mai.

DAnny-a chu a va phei a, Zohminga chu ava hnuk chhuak nghal. A hmui chu a tuam that sak leh a, "Lo ngawi mai mai rawh." tiin a man bet tlat a. Hmingtei chu a mittui a tla zawih zawih a, "Pu NAthan, ni e..kan nupa thil tih vek a ni. Mahse he kan thil tih hian chhan a nei a ni, chhan tha tak a nei a ni." a han ti dam dap a.

"Enge a chhan chu ni a?" tiin ka lo zawt vat. Dama chuan, "Ni e, kan nu sawi ang khan kan thil tih hian chhan a nei a, tulathah ching kan ni bik lo. Mahse nangni chuan kan tual thah chauh in hria a, enge a chhan tih te, kan thiam loh a ni vek bik em tih te hi min ngaihtuah sak leh iah lo. Hei hi thil thlen dan diktak chu a ni.." tiin a sawi ta a.

***************************

DAMA TE NUPA CHUNGA THIL THLENG : DAMA SAWI

He khua kan rawn awm tirh khan kan nu nen hian nuam kan ti hle a, a chhan chu Aizawl lamah chuan kan awm ngam lo a ni. Hmingtei chhungte hian min duh lo em em a, a chhan chu kei aia nei nung leh hausa zawk an lo hual sak tawh vang a ni. Mahse kan inru ta tho va, a nu ten an tuithlar nghal a.

Tichuan ka sum neih zawng zawngin helai hmunah hian kan rawn awm a, ka hlawh tam lo mahse kan nghei lova, kan hlim em em tho. Kum khat lai kan awm hnuah chuan ka hlawh te pawh a lo pung ve deuh ta a, in zauh chungchang kan sawi dun a. Tichuan kan office bul thingpui dawrah hian Zohminga nen hian kan inhmelhriat ta a, kan inkawm zui zel a.

In sak chungchang te chu ka hrilh ve a, tichuan mistiri a nih thu leh a hnathawh lai mek a zawh veleh tlawm tea min thawh sak a huam thu te chu a sawi a. Tichuan kan inah leng turin ka sawm a, kan nu nen te chuan ka inhmelhriat tir a. Tichuan an rawn thawk ta ngei a, an vaiin panga an ni. Mahse ni hnih lek an rawn thawh hnuah chuan an rawn tlang nel em em a, kan nu pawh hi a phun phah fo mai.

MAhse min ngam ve a nih kha tiin ka sawi mawi zel a, ngaih that lohna em em pawh ka la nei chuang lo. Vawikhat chu sava veh turin min sawm a, a tir chuan ka peih lo khawp mai. Mahse min sawm nasat em avang chuan ka kal ve ta a, khami ni a thil thleng kha chu in hriat vek kha. Ka haw khan kan nu hi a lo tap zawih zawih mai a, ka biak pawhin min chhang tha duh lo.

Tichuan zan thleng chuan min be tha duh lova, keilah in office ka kalsan daih zel bawk si. A tawp a tawpah chuan min hrilh ta a, khatia sava kan veh khan Ramliana nena silaimu la tur anga an haw khan kan inah an lo va kal a, ka nupui Hmingtei hi tih luihna hmangin an lo pawngsual rawn a ni.

*********************

A sawi zawm hleithei lo, a mittui a tla zawih zawih mai a. Nathana chuan rum takin Zohminga chu a melh a, "Thudik a ni em?" a han ti vin hlak a. Mahse Zohminga chu a ngawi reng a, hnuailam a melh tlat mai. Danny-a chuan ri fak khawpin a tukhumah chuan a beng chawrh a, "Sir NAthana'n a biak che chu..chhang ta che." tiin a han vin hrep a.

Zawite hian Zohminga chuan, "Aw dik e.." a ti zawi sap mai. Mahse keichuan, "Chupawh lo nise, Hmingte...engvangin nge sex i hmanpui leh kher a. Phuba lo la pawh ni ula, nangmah pawngsualtu hi engvangin nge sex i hmanpui leh kher, a tenawm thlak i ti ve lo em ni? Sir Nathana nen hian kan hmu vek che u ania, pha duh suh." ka lo ti ve leh ngat a.

Hmingtei chu a khi suk a, "Kan hmang lai min hmu em ni? Kha tah khan sex kan hmang lo, hmang tur angin ka thlem chhuak a ni. A thiante an thih tak zel avang khan Zohminga hian min ringhleh deuh va, min zawt fo mai. Mahse amah duh angin ka awm lui a, a chhan chu thah ve kan tum vang a ni. Min lo en thla ru reng a nih chuan Zohminga lungawi lo leh a tih tauh lai kha in lo hmu anga, kha kha sex ka hmanpui leh duh loh vang a ni." tiin a sawifiah ve ta a.

***********************

DAMA NUPUI HMINGTEI SAWI VE THUNG

Kan pa hi office ah a kal daih zel avangin keimah hian hnathawk ho hi ka vil chawt a, ani chuan enge thleng engmah a hre ve ngai lo. Tlai tin exer la thin ka ni a, exer ka lak hian tawnzau leh kekawr bul ka ha thin. Hna an rawn thawh ni hmasa ber tlai khan kan pa lo haw hma hian exer ka la a, hnathawk ho pawh an la awm bawk.

KA haw leh lam kha an Ramliana leh Zohminga hian an hnathawh lai chawl meuhvin min lo thlir ngawih ngawih a, ka va melhrum pawhin an zam eih lo. Tichuan inchhungah ka lut a, Jonas-a a rawn lut a. Thingpui a rawn insiam ringawt a, a tlangnel mah mah chu ngai thei lovin ka hau nghe nghe a.

Mahse engah mah min ngai lo, kan pa a lo haw a, ka hrilh nghal a. Mahse engtin mah a ti duh chuang lova, tichuan office min kalsan leh daih zel bawk si. Ka room tukverh atangin Zohminga hian min rawn bih a ching em em bawk a, hauh lah engah mah a ngai si lo. Tichuan sava an veh ni khan Ramliana leh Zohminga hi an rawn lut hlawl a, tichuan min vau tan ta a.

Kawngka leh tukverh zawng zawng kalhin an pahnih chuan min pawngsual rawn ta vak a, video pawhin an la nghe nghe bawk. Tichuan chu video chu min blackmail nan hmangin kan pa awm loh hlan chuan Ramliana leh Zohminga mai nilo, an vai mai chuan an duh duh hunah min mutpui hlawm ta thin a ni.

Ka tuar a, ka tuar zel a. Video theh darh ah min vau reng avang chuan engmah ka sawi ngam ngai lo, an duh tawka min sawngbawl theih avang chuan an hnathawh pawh chu an muang lui thin tih pawh ka hre vek. Mahse ka tuar thei ta ngang lova, zan khat chu kan pa chu engkim ka hrilh ta a.

Ani pawhin police hnena sawi nghal a duh a, mahse ka mualpho ka la hlauh avangin ka la dang hram hram zawk. Chumi zan chuan rin loh tak maiin Valpuia kha a rawn leng hlawl mai a, a tir chuan kan pa chu a ngawi reng. Pangngai tak chuan kan kawm lui hram hram a, kan pa thinrim insum zo lo khan a haw tur kha hnunglamah thirtiang in a hlap ta a ni.

A thi ta mai si a, kan hlauthawng ve lutuk. A tawpah chuan ruang chu hnah thel leh hnima khuh in zingkara buaipui zawm turin kan in hnung lamah khan kan kalsan ta a, mahse zingkarah khan thenawmte uiin min lo hmuh khalh ta hlauh va. KA va thawh khan tih ngaihna ka hre tawh bik lo, thenawmte lah an rawn tho ve nghal bawk si.

Tichuan lem kan chan chhoh angai ta a, thuthlukna siamin tual kan that ta sa sa tiin phuba lak zawh ngei chu kan tum ta a ni. Kan thenawmnu lah khan nangmah kha hnu chhui turin mi hriat laiin min lo sawi hmuh khanglang bawk nen, duhthlan tur kan nei ta lo a ni. Khami zan, Zira thih zan pawh khan CCTV kha keimahni siam danglam a ni a, kan pa hi computer thiam tak a nih mai bakah kawngka kalhna te pawh kha kan duh chuan kan hawng chawp thei vek a, kan ruahman lawk vek a ni.

******************

Nathana chu a ngawi vang vang a, "Anih leh tinge Zira khan thah a tum che u...nangmahni thil tih a ni tih hi a hria em ni?" tiin a zawt leh a. Hmingtei bawk chuan, "Min ringhlel a nih kha...min khawih ve tho va, mahse a rilru a nuam lo lutuk. Sex min hmanpui lui tur khan Zohminga te hian an vau thin a, a hlauthawng a nih kha." tiin a chhang a.

"Anih leh police duty te kha engvanga that nge in nih? Ramliana leh Jonas-a kha engtin nge in thah?" tiin ka lo zawt veleh a. Dama chuan, "Police duty te kha kan thah a nilo, Ramliana leh Jonas-a thah an nih kha." a ti ta mai a. "Enga? Engtin?" Danny-a chuan a lo ti hu mai. "Station atanga kan haw khan Ramliana leh Jonas-a kha thah ve nghal an rem em a, kan phur haw ve nghal a ni." tiin min chhang leh a.

"Kan rin loh lutukin thil a thleng a, ramhnuaia kalpui kan tum a...kan hmanrua mamawh tur ang chu kan car hnungah hian kan dah sa vek a ni. Mahse an pahnih khan kan in lama leng tur angin an insawi a, tichuan min pawngsual leh an tum tih ka hrethiam nghal a. Kan pa hian remti phawt turin min signal a, tichuan ka lenluh tir ta a ni. An mawl ve hrim hrim, police duty te awm reng laia a ruka min khawih an tum kha a nia. Remchangah la in ka au ta vak a, police te kha an lo lut a. MAhse rinloh tak maiin choka a chemte chu Ramliana khan a chuh hman a, an insual buai ta nuai nuai a." a tih lai chuan Dama chu a lo inrawl ve leh a.

"Khatih lai khan in bulah ka la awm reng a, thawm ka hria a ka lut nghal vat a. Police pahnih kha chu an lo thi tawh a, hnunglam atangin police pakhat an beih rawn lai kha an pahnih khan ka va vit hlum ve leh ta nghal a ni. Mahse kan tum angin thil a thleng si lova, kan thawmhnaw a thisen kai te chu tifai in in kha kan chhuahsan ta tawp a nih kha, a chhan chu in rawn let leh vat dawn si a, chhuanlam siam tur kan hre tawh bik lo a ni." a lo ti ve bawk a.

Hmingtei chuan lo sawi zawm veleh in, "Kan tlan lai khan Zohminga kawnglaia a lo thu chu kan hmu a, idea kan nei leh chiah a. Tichuan kan pa hian Zohminga chu thlem a, kan arbai huan kalkawng lama hruai turin min ti a. Tichuan kan pa chu motor atang chuan a chhuk a, tichuan Zohminga chu ka va bum ta a ni. A tir phei chuan a hamhaih lutuk ringawt, mahse a hur herh em avangin ka thlemna chu do zo lovin min zui ta a. Gosen lam kan pan phawt a, mahse zu a duh avangin kan let leh a, zu kan la a. Tichuan kan chhuk leh a, min khawih a tum nghal a, mahse ka indan tlat avangin a lungawi ta lova, tui lo zetin ka thlem der ta vel mai mai a ni." a lo ti ve leh a.

"Anih leh engtin nge Zohminga hi i man leh daih theih? Chuan SI THanga kha engvanga that nge in nih?" tiin Danny-a chuan a lo zawt veleh a. "Ka thah a ni lo, kha SI khan min lo zui ru char char a. Zohminga nena kan haw leh lam kha min man a, ka uire angah ngaiin min man dun a tum ta mai a. Zohminga khan a vaw thlu ta ringawt a, chutih lai chu remchangah la in a hnunglam atangin Zohminga hi ka vaw ve leh a, SI ruang kha chu ka kalsan ta tawp a ni." tiin Hmingtei chuan min chhang leh a.

"In phone call kan dawng sek tawh bawk si a, chanchin inhrilh turin phone kan on ngam tawh bawk si lo. Pu NAthana te lahin min lo hmu lak lawh tawh bawk si nen, engkim a buai zo ta vek a ni." Dama chuan a lo ti ve leh bawk a. Nathana chuan a lu a dawm vawng vawng a, "Ka dem lo che u, mahse in phuba lak duh dan erawh ka dem khawp mai. In nupa hian jail in tang dawn...polcie hnenah report mai ula chuan hetiang thil hi a thleng lo tur." a han ti vawng vawng a.

Dama chu a nui suk a, "A pawi lo, ka pu. Kan thil tih man chu kan hmu ngei tur alawm, heng mi tenawm te avang hian kan thluak a buai ve ta a nih hi...jail pawh tang ila, kan phutawk ania, engkim tuar kan inhuam e." a ti zawi sap a. Hmingtei chuan rum zet hian Zohminga chu a en a, "Nang mihring kha, ka that ve hman lo che chu i vannei khawp mai." ala ti khur khur a.

Police dang ho pawh an lo thleng fel deuh chiah a, "Danny, an vai hian hruai bo vek rawh. Chuan..DAma..Hmingte, hetianga in inpuan ang chiah hian court ah thudik engkim sawi ang che u." a ti a, Police ho chuan an hruai ta a. Nathana nen chauh chuan kan bang leh ta, "Sir, chuan..engtin nge kan awm zel dawn." ka han ti a.

Min en a, "Aizawl lamah kan haw anga, hahdam takin kan mu thlurh thlurh ang." tiin a nui vur vur mai. "I va ho tak, tun anga lo la fiamthu te chu a.." ka han ti deuh hlur a. A nui leh suk a, "Hetiang case lampang hi hmanah Rinawma nen kan khawih tawh...aa..ka sawi peih leh lo, haw ang." tiin a kal nul nul a, ka zui ve nghal a, chu ramhnuai thim em em mai chu kan chhuahsan ta a ni.

*******************

THE END