WILD ZONE : SEASON 1 (Episode - 11) Written by : Aaron Malsawmdawngzuala THE UNKNOWN KILLER - 5

 WILD ZONE : SEASON 1

(Episode - 11)

Written by : Aaron Malsawmdawngzuala

THE UNKNOWN KILLER - 5

*****************

NAthana nen chuan kan inzui chhuak ve leh a, Dama te nupa leh Zohminga te thian pathum pawh an lo la awm thap hlawm mai. "Dama, i duh chuan office lamah i let leh thei ang, i nupui hi chu Bella-i'n a lo hruai haw mai ang." Nathana chuan a han ti a. "Nilove Sir, in thleng keiman ka va thlah thlap zawk ange, chumi hnuah chuan office ah chuan ka let leh mai ang." tiin Dama chuan a lo chhang a.

"A tha alawm, i tih dan dan le." NAthana chuan a han ti leh a. Dama te nupa chu an kal ta a, "Engtin nge keini hi nive dawn?" Zohminga chuan a lo ti vat a. NAthana chuan Zohminga leh Ramliana chu a han melh dun vang vang a, "In pahnih hian sava in veh ni khan eng ti tura haw zawk nge in nih?" tiin a zawt a.

Ramliana leh Zohminga chu an phu dun deuh zuk lehnghal a, an in melh dun nghal bawk. An mitmeng leh hmel atang chuan an rinhlelhawm duh khawp mai, "Ihh..silaimu kan lak belh." tiin Zohminga chuan a lo chhang a. Nathana chu a khi suk a, "Sava veh tur a chhuak ve meuh si..engvak mah pawh in kah hmaa silaimu a han zo nghal ringawt chu ava mak duh awm ve." a han ti deuh kher a.

"A zo a ni hleinem, kan lo keng tlem deuh zawk alawm." Ramliana chuan a lo ti ve vat. "Animaw..tlangval rual thah sava veh tur kalkhawmin silaimu pai awm tawk pawh in hre lo chu ania, sava veh fo thin in ni anilawm ni?" tiin Nathana chuan a han zawt leh a. Chuveleh Jonas-a chuan, "Keima thiam loh ania, silaimu kha keima kutah an dah a." tiin a rawn inrawlh vat a.

Nathana chuan Jonas-a chu a han melh leh a, "Anih chuan nangmah pawh chu lo nise, silaimu pai awm tawk pawh i hrelo tihna em ni?" tiin a zawt leh a. Hnuailam melh reng chung chuan Jonas-a chuan, "Ka lo thun tlem deuh a, bawm ah khan ka thun thuak thuak a..khachu keimah vang a ni e." tiin a chhang leh a.

Nathana chu a thaw deuh hak a, "A tha e, in kal thei e. Khawiah mah peng kawi reng reng suh ang che u, anih loh chuan Thana ah in riak ang." tiin a han vin deuh hlak hlawm a, tichuan an haw darh ta hlawm a. An kal hnu chuan danny-a chuan, "Thil dik lo deuh a awm em ni, Sir?" tiin a lo zawt nghal a.

"Ka awih lem lo khawp mai, an thil sawi kha." tiin Nathana chuan a chhang a. "Eng kha maw...silaimu lak belh chungchang kha maw?" tiin Danny-a chuan a zawt leh a. "Aw ni e, chhuanlam mai mai a ni.Ka zawh chiah khan an hmel awmdan kha a dik lo, an mitmeng a dawih tlat." tiin a chhang leh a.

"Mahse i dawp leh chuang bawk silova, i kal tir leh daih tho sia.." Danny-a chuan a han ti nuah nuah a. Za lo tak hian Nathana chu a nui suk a, "An mahni hi thli thlai ru reng phawt ila, dawt an sawi leh sawi loh chu proof-na nen thlap a lang mai dawn alawm." tiin a chhang a. Chutih lai chuan a phone a rawn ri a, "Hello..aw enge ni ta?" tiin min kalsan daih mai.

"Detective...Sir NAthana awm loh laiin han inzawt ta tawp mai ila. Thawhpui a nuam ve tho em? A strict em?" Danny-a chuan zawi te hian a rawn ti su su mai. Ka nui deuh huk a, "Aaa..aw nuam ve tho ve. A fel a, a zaidam bawk a." tiin ka lo chhang a. "An inah i kal tawh em? An hausa turu viau lo maw?" a rawn ti leh a.

Ka insum zo lo chu ka nui chhuak hial a, "Enge chutiang min zawh...i ho emai.." ka han ti a, "Ka hre chak alawm, an hausa em?" tiin min la zawt lui talh a. "Umm..a apartment ah ka kal ve thin alawm, a hausa khawp mai." tiin ka chhang a. Chutih lai chuan Nathana chu a rawn let leh a, "Bella, Pu Dama te inah lo va let leh mai ta che..ka haw lawk a ngai dawn." a rawn ti a.

"Ngati nge, Sir?" tiin ka lo zawt nghal vat a. Rilru hah hmel tak hian a han thaw hak a, "Hemi khuaah hian MAxie a lo kal a ni awm a, scooty in a rawn kal a. Kawng lakah a accident a ni awm e, damdawiinah ka kal vat angai." a ti ta mai a, ka thin a phu nghal dup dup mai. "A ngaihtuah awm viau em? Khawi hospital ah nge?" tiin ka lo zawt nghal a.

"Aih ngaihtuah awm chuang love, amah thovin alawm tunah khan min rawn phone. Hemi khua a damdawiinah tho a ti..mahse a ke a ti ulh deuh aniang, nakinah ka rawn phone leh dawn che nia." tiin min chhang a. "Aih Sir, ka lo kal ve duh. Maxie chu ka thiannu ve tho alawm, ka lo kal ve dawn." ka ti ve deuh tlat a. A ngawi vung vung a, "Anih chuan tunah kal nghal ang." tiin min chhang a, motorah chuan lutin kan tlan nghal a.

*******************

Nathana chuan a khalh chak ngei mai, "Enge min hrilh miah lova a rawn kal ve thawt thawt aw....amak thin...a fimkhur lo si.." tiin a phun nuah nuah mai. A thlan a tla zawih zawih a, Maxie chu a ngaihtuah hle a ni tih pawh a hriat takzet. Biak pawh ka be ngam lo, tichuan reiloteah chuan hospital chu kan thleng ta a.

Hospital luhna lam panin kan tlan chho nghal a, mahse casualty kawtah chuan Maxie chu a lo thu kur mai. Nathana a hmu chiah chu a nui sang a, lassi a lo la in zui. Mak kan ti dun bawk aniang, kan ding dun det a. Chuveleh Nathana chu ava tlan phei a, ka zui ve nghal bawk. "I tha em? I ke i ulh amaw ka tia..enge awmzia?" tiin a zawt nghal a.

Maxie chu a tum deuh bur a, "Hei ka kut hi a na, tlem a vung deuh." tiin a kut bandage-a tuam chu a rawn ti lang a. Nathana chu a thaw deuh huai mai, "Min va ti hlauthawng hman tak...tinge i ke i tih si?" tiin a vin lek lek mai. "Ka kut a vung ka tih ringawt chuan min ngaihsak dawn silova, ka ke ka ti ta mai a nih kha." tiin a la nui var var zui.

Nathana chuan a lu chu a dawm a, "Huiham Lallawmzual, enge hetah i rawn tih reng reng a?" tiin a han zawt leh a. MAxie chuan a purse chu a hai mual mual a, "Hei hi i theihnghilh a, i tan a pawimawh ka tih mawlh mawlh kha." tih pah chuan damdawi pakhat hi a rawn phawrh chhuak a. Amah bawk chuan, "Apartment ah ka rawn kal a, ka hmu a. I pum a chhiat tehreng nen..ka pum ana i ti leh anga, ei that tur ka tih kha." tiin a zilh chhunzawm mawlh mawlh mai.

NAthana chu a maimitchhing vang vang a, "MAxie..case khawih lai mek kan nei ania...tinge hetiang vang mai mai a.." a sawi hleithei lo, a thaw leh hak thin. Lo awm ve rengna chi niin ka hre ta lova, motor lam pan chuan ka let ta daih a. Motor chhungah chuan ka lo nghak a, ka va hawi phei leh zeuh zeuh thin a.

***********************

Minute 10 vel zet an inbiak hnu chuan casualty chhungah chuan an inzui lut a, ka nghak leh vang vang a. DArkar chanve dawn an thang hnu chuan an rawn phei a, NAthana chuan damdawi a rawn khai teuh mai lehnghal. Motor seat hnunglamah ka insawn vat a, Maxie chu a hma ah chuan a rawn chuang nalh mai.

"Khawiah nge scooty chu a awm reng reng a?" tiin Nathana chuan a han vin leh hlur a. "Workshop ah." tiin a lo chhang hmuk mai. "Khawi work shop ah?" tiin a zawt leh a. "Hemi khaw workshop-ah hian..amak, ninawm i thinchhe si." tiin a vin let hrep mai. An nuihzatthlak dun viau nangin, a nuam lo duh angreng khawp mai.

"Engtin nge helai khaw kalkawng te hi i hriat ve reng reng a?"

"Aww..Aizawl atangin a hnai em alawm, ka hre ve lutuk."

"Workshop ah chuan kal nghal ang."

Chutih lai chuan Maxie phone chu a rawn ri a, "Ngawi rawh lawks, hei workshop ami ten min rawn phone.." tiin a pick up a. "Hello, Maxie a ni em aw?" phone a mi chuan a rawn ti a. "Aw ni e." tiin Maxie chuan a lo chhang a. "I scooty kha kan siam tha tawh a, nangmah enge i an aw? Engtin nge kan tih ang? Hetah kan workshop ah hian kan dah hrih dawn nge..i rawn lam leh mai thei angem?" tiin a rawn zawt leh a.

"Kan lo lam zawk ange..hei kan pa in.." a ti hman zeuh va, Nathana chuan a melh rum kher mai. Maxie chu a nui suk a, "Oh..ka sawi sual, ka u zawk mawle..ka u in min rawn lam a, hei kan lo chhuk nghal ang." a han ti leh a. Phone chu a dah a, "Haw thla leh nghal phawt teh...mi ina thleng kan ni bawk si." NAthana chuan a han ti leh a.

"Haw thla em em ang..lungngai suh, damdawi rawn pe tur che a lo kal mai chauh ka nih hi. KA ngaih vang em em che pawh a ni lo, haw thlak leh te chu ka tum sa reng alawm." tiin a phun deuh nuah nuah mai. "Dama te inah kal phawt ang." Nathana chuan a han ti leh a. "Tunge Dama chu?" Maxie chuan a lo ti hu mai,

"Kan thlenna in...lo hriat ve zel tum suh." Nathana chuan a han ti leh hlur a. "Enge kan tih anga...i damdawi hi ei ngei ngei tawh ang che." MAxie chuan a han ti leh nghal zuah zuah a, an naupangchhia dun sia, ka nuih chu a za ve khawp mai. "Ka ei dawn, ka ei dawn...min tih hlauhthawn zia hi." Nathana chuan a han ti leh nung nung a.

"Mawwwhhh, in thlenna inah chuan tinge min hruai ve dawn?" tiin a zawt leh a. NAthana chuan bung tak hian, "Ka pheikhawh pakhat zawk khi suk turin hawn rawh, lo su ngei ngei ang che." a la ti zui. "Thawmhnaw i pai vak ka hre silova, a thar i lei leh tawp a nimaw?" tiin MAxie chuan a han zawt leh a.

"Aw lei tawp mai e..Bella-i pawh leichawp vek alawm. Engmah kan pai hman tawh silova, a chawpchilh em alawm." tiin a chhang a. "Amak thei, pawisa i ti uiawm thei lutuk." tiin Maxie chuan a hau leh nghal char char a. Hospital atanga Dama te in kan pan chhung zawng khan zu inhnial tluan chhuak thak a mawle..an rapthlak dun hi ka ti a ni.

***************************

Dama te in chu kan thleng a, police duty te chu hmuh tur tumah an lo awm hauh lo mai. Motor atang chuan kan chhuaka , "Ehe..khawnge police duty ho hi an awm vek a?" NAthana chuan a ti hu mai. Kan han hawi kual takngial pawh chuan kan hmu hauh lo, "Inchhung lamah thingpui an in mek te pawh a ni thei asin." ka lo ti a.

"Nia, a ni maithei. Mahse pakhat tal chu pawnah hian awm reng tur alawm, an va han fimkhur lo thei tak." tih nuah nuah pah chuan inchhunglamah chuan a lut a, Maxie nen chuan kan zui lut ve nghal a. Inchhung kan lut chiah chu kan ding rual that mai, Maxie chu au tuarin Nathana a kuah nghal a, keipawh ka thil hmuh chuan min thawng lutuk chu ka bing mup thei.

Police duty zinga mi pakhat chu thisen nena inchiah piah nuai hian chhuat laiah chuan a lo let reng mai a, a hrawk chu zaina tih hriat tak hian a thler phei tuar bawk. "Bella, MAxie hi lo awmpui rawh." tiin NAthana chuan pistol a phawrh nghal a. Keipawh chuan ka phawrh ve a, kawngka pui chu chhunglam atang chuan ka kalh nghal a.

Maxie chu ka kuah a, inchhung chu ka tin kual nghal bawk. Bang sirah chuan ka hruai phei a, "Maimitchhing tlat rawh aw, MAxie...kan awm reng ania, hlau reng reng suh." tiin ka hnem mawlh mawlh a, mahse min chhang lo chuan nghet tak hian min vuan bet tlat a. Thisen chu inchhungah chuan a kawi darh nasa ngei mai, bathroom lam panna ah chuan thisen chu a pherh kawi nuai a.

NAthana chuan thisen chu a chhui zel a, bathroom thleng chu ava chhui phei ta. "Lo che sawn suh ang che u." zawite chuan a han ti sap a. Tichuan bathroom chhungah chuan ava lut a, a reh vang vang mai. A rawn chhuak leh a, "Lo kal teh u." a rawn ti zawp sap a. MAxie nen chuan bathroom lam chu kan va pan ve a, "Va en teh..MAxie nang chuan en ve suh." tiin Maxie chu a kuah bet daih a.

Bathroom chhung chu ka va en a, police dang pahnih ruang chu thisen nena kawi nuai chuan an lo let leh reng mai. "Tu tih nge ni ang?" tiin ka lu chu ka dawm vawng vawng a. Nathana chuan min en deuh hru a, "Hmingtei..khawnge Hmingtei?" a ti nghal a. Silai keng reng chung chuan, "Hmingte...Hmingte?" tiin Nathana chuan a au vak vak a.

Mahse inchhung chu a reh diak mai si, "Room lam ka va check leh ange." tiin room lamah chuan Nathana chu a phei leh a. "Bella..BElla..lo tlan vat teh u." a rawn ti nghal vak vak mai. Kan va tlan lut ve nghal a, ruang dang kan hmuh belh tlat mai. Ramliana leh Jonas-a ruang an ni, Jonas-a phei chu a dul a thler a, a ril a uai hnuang lehnghal.

Maxie chu a uak nghal vak vak a, lehlam a hawi nghal. Room atang chuan ka chhuah pui nghal a, a thaw hlawi hlawi mai. "Hmingtei phone teh, tunah vat.." tiin Nathana chu room atang chuan a rawn chhuak ve nghal a. Hmingtei number chu ka dial ngal a, mahse a tlang thei ta hauh lo mai. "Sir, a tlang thei lo." ka han ti a.

"Anih leh DAma..Dama phone teh." a han ti leh a, Dama chu ka call leh a. Mahse ani pawh chu a tlang thei hauh lo mai, "Sir, ani pawh a tlang thei lo." ka ti leh a. Nathana chuan a lu a dawm vawng vawng mai, "Tualthattu hian a ru bo tel ve nge..enge awmzia ni ang?" tiin a tei kual vak vak a.

A ding leh thut a, "Ramliana leh Jonas-a...Ramliana leh Jonas-a a that leh a..tunah chuan Zohmingthanga chiah a bang tawh." a han ti leh a. A phone a phawrh a, a hmet mual mual mai. "Enge i tih dawn..tunge i call dawn?" tiin Maixe chuan tap pur chung hian a lo zawt a. "Zohminga...amah chiah a bang tawh." tiin a call nghal a.

Mahse a ring quit thak mai, a han dial nawn leh a. Mahse a hma ang bawk chuan a ring quit leh thak tho va, "Tualthattu hian tunah hian Zohminga thah a tum mek ang...a pan mek ang." a ti leh a. "Anih chuan Sir, engtin nge ni dawn?" tiin ka lo zawt vat a. "Danny-a call rawh...kei Zohminga te inah ka va tlan nghal ang." tiin min chhang a.

"Mahse...engtin nge kei? Hetah hian ka lo awm ve dawn tihna em ni? Tualthattu hi lo let leh ta se, ka hlau ania, NAthan.." Maxie chuan a lo ti khur dar dar mai. Nathana chuan MAxie hmaiah chuan a chul heuh heuh va, "Ka lo let leh dawn alawm...Hei, Bella-i a awm hi..chuan police dang pawh an lo thleng vat dawn. Hlau reng reng suh, Bella-i hian a venghim ang che." zaidam tak chuan a han ti a.

"Aih..min kalsan suh...khawngaihin, ka hlau ania, NAthan." tiin Maxie chu a tap nasa tawh mai. "Nilove...engtin mah i awm dawn lo, kan venghim dawn che alawm." tiin Nathana chuan a hnem leh a. Chutih lai chuan keipawh chuan DAnny-a chu ka lo phone a, chanchinte chu ka hrilh a, an rawn phei ve nghal tur thu in min chhang a.

"Sir, Danny-a te pawh an rawn tlan mek e." ka han ti a. "A tha e, inchung lam khi ka han check leh lawk, lo la kal sawn rih su." tiin inchung lamah chuan a tlan chho leh a, reilote hnuah chuan a rawn chhuk leh a. "Tumah an awm lo, mahse computer erawh vuak chhiat vek a ni. Inchhung hrim hrim hi ka han enkual leh lawk ange." tiin a han enkual leh a.

Pawnah te chhuakin a check kual vek a, reilote hnuah chuan rawn lut leh in, "Tualthattu chu a awm tawh hrih lo a nih dawh hi...mahse a fing khawp mai hei.." tiin CCTV vuak chhiat hi a rawn lek kang a, "Engkim evidence tur zawng zawng a nuai bo vek a ni." Nathana bawk chuan a han tih zawm leh a.

"Sir, tunah kal vat rawh. Maxie chu ngaihtuah reng reng suh, ka lo venghim ang. Ka tiam a che, tunah chuan Zohminga nunna a derthawng mek, kan tlai hlauh ange." ka lo ti a. "BElla, ka ring che ania." tiin min lo chhang a. "Ka lo venghim ang, Sir." ka han ti leh a. "A tha e, inchung room lamah han chhoh pui rawh. Danny-a te lo thlen hma chu lo chhuak suh ang che u, ka kal ania." tih leh tlanchhuah a rual nghal a.

*********************

Room ah chuan Maxie chu ka awm pui a, khumah chuan rizai a intuam chungin a thu khur dar dar mai. Kan inbe lem lo, Danny-a te lah chu an la rawn thleng har em em mai lehnghal. Minute 5 vel a liam leh hnu chuan inhnuai lam kawngka chu a rawn inkik ri ta rak rak a, "Detective BElla..keimahni kan ni e. Inspector Danny-a, inchhungah in awm em?" a rawn ti lauh lauh va.

"HAwh le...chhuk ang le?" tiin Maixe chu ka kai a, inhnuai lam pan chuan kan chhuk dun ta a. Kawngka chu ka hawng a, Danny-a leh police panga hi an rawn lut a. Maxie chu Danny-a chuan a en vung vung a, "Hei hi tunge?" a ti hu mai. "Sir NAthana nau a nih hi." tiin ka lo chhang vat a.

"Ehe..hetah enge a rawn tih a?" tiin min zawt leh a. "Danny, chutiang a pawimawh lo..hei ruang a leh reng hi...buaipui vat rawh u, MAxie hi i ti hlauthawng mai mai." ka han ti deuh zek a, Danny-a chuan min chhang lo chuan ruang te chu an han enfiah a. "Bathroom-ah sawn pahnih an awm bawk a, room ah Ramliana leh Jonas-a ruang a awm bawk...saw lai room ruakah sawn." tiin ka lo hrilh zel a.

MAxie chu sitting room ah chuan ka thut pui a, Danny-a te chuan ruang an buaipui mek thung. "Min kalsan suh aw, ka bulah awm reng rawh." tiin MAxie chuan ka kut a vuan tlat a, a lo kal fuh loh ve khawp mai. Ka khawngaih reuh lutuk, "Lungngai suh, i bulah ka awm reng dawn lawm." tiin ka chhang a.

Danny-a chu a rawn kal phei a, "Detective BElla, Sir NAthana hi ka call tlang thei miah lo mai." a rawn ti a. "Lawk aw, MAxie.." tiin MAxie kut chu ka thlah a, ka ding a. Ka phone chu phawrhin phone ve ka han tum a, a tlang thei bik hauh lo. "A walkey-talkey a keng lo ami? Engmah min rawn response thei chuang bawk silo." Danny-a bawk chuan a han ti leh a.

"Motor chhungah kha chuan a awm a, motor chhungah a awm hrih lo a nih hmel." tiin ka chhang a. Chutah MAxie chuan, "U Bella, hetah lo kal lawk teh." a rawn ti a. Maxie lam ka va hawi chu banga Dama te nupa thlalak, an car nena an thlalak chu a lo en vung vung mai. KA va phei a, "Enge ni?" tiin ka va zawt a.

Maxie chuan thlalak a motor chu a kawk a, "He car hi ka hmu tawh." a ti ta mai a. "Khawiah? Khawiah nge i hmuh?" tiin ka zawt nghal vat a. "Ihh...Hospital atanga kan haw lam khan....GOSEN VENG tih inziahna lam kawng chhukah khan an tlan thla lai ka hmu." a ti leh a. DAnny-a pawh chu lo pheiin, "He car hi a ni tih i chiang amaw?" a rawn ti ve bawk a.

"Aw chiang e...ka lo en bik kher nachhan pawh a rawn hi a hring ania, ka rawng ngainat ber a nih vang khan ka thlir zui deuh vung vung alawm." tiin a chhang a. Danny-a nen chuan kan in enhu mai, "Gosen veng lam maw? Gosen veng te chu tlak lam huan kalkawng daih asin." Danny-a chuan a ti nuah nuah mai.

"Huan kalkawng a?" ka lo ti hu mai a. "AW ni e, Dama te Office kalkawng a ni lo hrim hrim." tiin min chhang a. MAxie chu ka en leh a, "MAxie, i chiang maw? He car hi a ni tak tak amaw? A number te i chhhinchhiah em? Hemi car ang chiah chiah lo nei ve te an awm zawk hi a ni lo maw?" tiin ka han zawt leh a.

"Aih a nilo...a in ang chiah chiah. Sticker an belna lai zawng zawng nen, a in ang chiah chiah alawm." tiin min chhang leh a. "Anih leh a khalhtu hmel i hmu em?" tiin Danny-a chuan a lo zawt veleh a. "Aih..glass kha a dum chi a nia, a in up full vek sia, ka hmu thei lo." tiin Maxie chuan a chhang leh a.

Danny-a chuan, "Sir NAthana hi tinge a phone a lak theih loh tlat le?" tiin a mangang hmel kher mai. "Amah chauh khan a kal a, kal pui turin mi a rawn tir lo a mi?" tiin ka zawt a. "SI Thanga ka tirh phei ve nghal kha...Sir Nathana va pui turin ka tia..mahse hei Thanga pawh ka phone tlang thei chuang lo chu a nih hi." tiin Danny-a chuan min chhang leh a.

Chutih lai chuan constable pakhat hi a rawn kal a, "Sir, Zohmingthanga nu chu kan phone tlang zo chiah a, Zohminga a lo la haw loh thu a rawn sawi a." a rawn ti a. "Khawimaw, phone nawn leh teh." Danny-a chuan a lo ti nghal. Constable chuan a phone nawn leh a, "Hello, Zohminga nu maw?" tiin Danny-a chuan a han zawt a.

"Aw ni e, enge ni ta?"

"HEtah, Inspector Danny-a ka nia. Zohminga chu a lo la haw lo maw?"

"AW..Police Station-a kal tura a chhuak kha, a la rawn let leh lo hrim hrim."

"Anih leh tunah khan kan pute an lo kal em? Nichin deuh khan an rawn phei a?"

"Aih tumah chutiang an rawh kal lo."

DAnny-a nen chuan kan in en a, mak kan tidun kher mai. "Eng thil nge thleng a? Zohminga chungah chuan thil tha lo thleng a awm em ni?" tiin Zohminga nu chu a rawn mangang nghal kher mai. "Aih awm love...ka pi, kan lo kal anga, engkim kan rawn hrilhfiah dawn che nia." tiin phone chu a dah a.

Amah bawk chuan, "Detective BElla, Zohminga te inah chuan ka va kal ange. Chuan ka naute ho hian ruang hi lo buaipui chhunzawm se, chuan nangin Sir Nathana nau hi lo buaipui chhunzawm mai rawh." a han ti a. Chuveleh Maxie chuan, "U Bella, haw mai ka duh. Min thlah thei angem?" tiin min zawt a.

"Scooty kha chu khalh thla tawh lo mai rawh...thlahtu tur che kan ko anga, him dam tak leh thlamuang takin i haw thei zawk ang." tiin ka chhang a. "Anih leh scooty kha.." a han ti leh a. "Ngaihtuah duh suh...kan lo buaipui mai ang." tiin ka chhang leh a. Danny-a naute chuan ruang chu an buaipui chhunzawm a, kei leh DAnny-a leh Maxie te chu Danny-a motor ah chuan kan inphur hlawm a.

Danny-a chuan Station thleng min thlah a, Zohminga te inlam pan chuan a tlan tlang ta thung a. MAxie pawh chu constable hmeichhia ho chuan Aizawl lam panin an thlah ve leh thung a, Staiton ah kei ka lo awm thung. A khat tawk chuan Nathana chu ka call reng a, mahse ala la thei chuang hauh lo.

********************

Minute 15 vel a liam leh hnu chuan phone call ka dawng a, NAthana a ni. Rang takin ka la nghal a, "Sir, khawiah nge i awm?" ka ti nghal a. "Khawiah nge MAxie?" tiin min rawn zawt let daih mai. "Aizawl lamah police ten an thlah haw mek, a him e." tiin ka chhang a. "A tha e, tunah nangmah khawnge i awm?" tiin min rawn zawt leh a.

"Stationah ka awm. Khawnge i awm a? Zohminga te inah i awm loh thu anu in a rawn sawi bawk si."

"Tumah hrilh lo la, tu motor emaw ber kha hmang la, ka location rawn chhui rawh. Mahse a ruk thei ang berin angai a nia, midangin an hre tur a ni lo."

"NGati nge, Sir? Kan zawng sup sup che ania, Inspector Danny-a pawh kha Zohminga te in lam pan khan a kal daih ania."

"Zawhna min zawt hrih suh, Bella. Ka thusawi chu zawm mai rawh, ka location chhui la, lo kal zel rawh."

"AWle Sir."

Phone chu ka dah a, mak ka ti angreng khawp mai. Engvanga a ruk kher a ngaih nachhan tiin ka rilru chuan ka inzawt mawlh mawlh a, constable pakhat bike chu ka hmansak a. Hman man a phut hmel em a, cheng 500 chu ka han pek ve mai mai kha, hausa ni lo mah ila. Nula senior bike khalh thiam kha ka ni miau va, NAthana location chu chhuiin ka tlan ta nghal a.

**********************

Ka tlan zel a, ka kal mawng sawt khawp mai. A tawpah chuan kawng chhuk tak mai, cement phawkphaw hraw deuh mai leh tlan harsat hmel zet mai hi kawng peng chhuk a lo awm a. A bulah chuan GOSEN VENG tih hi a lo awm bawk a, Maxie thil sawi ka hre chhuak zawk mai. "Ehe..GOSEN VENG maw?" ka ti chhuak hlawl a.

A la chhuk em em mai lehnghal, "A nih chuan DAma te nupa leh NAthana te hi an awm ho tihna em ni ang? Tu ber hi nge maw tualthattu chu ni ang le?" tiin ka phun leh nuah nuah a. Tichuan kawng chhuk tak mai lam chu panin ka tlan thla ta a, khalh fimkhur a ngai takzet. Lehlam lah kham sang taka  ni bawk si, a kawng chu a zim em em mai lehnghal.

Ka tlan thla zel a, a tawpah phei chuan kawng chu lei vek a ni tawh a, a chhe rapthlak eltiang lutuk ringawt. KA thleng thui telh telh a, thingkung a tam tulh tulh mai. Kawng mumal pawh a awm tawh loh avang chuan bike chu ka tiding a, ke in ka kal tan ta. Mau leh hnim a tam em em a, ramhnuai chiah chiah a ni.

NAthana chuan min rawn text a, "Khawilai nge ilo thlen tawh?" tih hi min rawn thawn a. "Ramhnuai chhungah hian em ni i awm? Kan inhnaih viau chuan a lang." tiin ka reply a. "THawm kha dim deuh la....min rawn pan zel rawh. I phone kha silent la, thawm dim thei ang ber khan lo kal ang che." tih min rawn thawm leh a.

Ka reply tawh lem lo, ka pistol phawrh chung chuan thawm dim thei ang ber chuan NAthana location chu ka chhui zui zel a, inhnaih tawh tak kan ni. Ramhnuai chhung lah chu a thim hian a thim deuh ruih mai lehnghal a, dawih deuh tan phei chuan kal zen zen na chu pawh va ni suh. Thawm engmah hriat tur chu a awm chuang lo, keima thawm ringawt pawh chu ring tak a ni.

Chutia ka kal zel lai chuan ka hnung atang chuan tu emawni hian ka hmu a rawn hup thut a, ka pistol kenlai pawh chu a rawn manbet nghal. Ka beng bulah chuan zawite hian, "Chiai suh..keimah Nathana.." a rawn ti a, ka thaw huai mai. "Iva mawl tak, tinge khatia min rawn man thut a, ka hlauh hman zia kha.." tiin ka han vin deuh hlur a.

"Shh..bengchheng suh, min lo zui teh." tiin min kai phei a, hmun zawl deuh tak mai hi kan va thleng a. Mahse va kal phei lo chuan, "Hetah hian ding rawh." tiin min ti ding a. "Enteh saw.." tiin hma lam chu a kawk a, hetah hian thingkung phenah kan biru a ni. Hmalam chu ka va melh phei a, Dama te nupa car a lo awm reng mai.

"Ehe saw saw..Dama te car a ni lawm ni?" ka ti hu a. "AW ni e...ka zui ru alawm." tiin min chhang a. "Khawi atangin nge i hmuh tan reng reng a?" tiin ka zawt a. "Zohminga te in ka thlen hma khan ka hmu a, kal ta lovin an motor hi a rukin ka zui ta zawk a ni." tiin min chhang a. "Ava mak awm ve..hospital kan haw lam khan Gosen lama a chhukthla lai ka hmu a ti daih tawh sia, MAxie khan.." ka lo ti nuah nuah a.

"MAxie in a hmu amaw?" tiin min melh hru mai. "Aw..chungte pawh chu hrilh che ka tum a. Mahse i phone tlang theih silova, tinge phone tlang i van har em em?" tiin ka han zawt leh a. "Ka phone hi hmanzan atang khan a chiang tawh lo, Zira kan um hrep zan atang khan..siam tir a ngai dawn." tiin min chhang a.

"Anih chuan engtin nge Dama te motor saw i hmuh leh theih...Maxie-in a hmuhna kha a rei tawh sia."

"Ka hre tawh bik nang...kha te chu."

"Anih Dama te nupa chu i hmu em? Motor chhungah sawn an awm em?"

Min chhan hma chuan motor kawngka chu a rawn inhawng a, ka rin loh lutuk maiin Zohmingthanga chu a rawn chhuak daih mai. "Ehe..Zohminga maw?" ka ti hu mai a, NAthana chuan a lu a bu nghat. Chutah Zohminga lah chuan kawr a rawn ha tha sawk sawk lehnghal a, driver seat lam chu a rawn inhawng leh a.

Mak ka ti lutuk chu ka meng kawk mai, Dama nupui, Hmingtei chu sam thur bum hian a rawn chhuak a, a intuai tha mawlh mawlh a . An thil tih chu sawi ngai lovin a chiang reng, "Ehe...an pahnih thil tih vek maw lo ni a?" tiin ka thinrim leh Hmingtei ka ten lutuk chu ka chek tlawk tlawk hial a.

"Hei vang hi alawm tumah hrilh lo phawt rawh ka tih nachhan." tiin Nathana chuan min lo chhang a. "Tualthattu chu an chiang ta e...an pahnih bak an ni thei lo hrim hrim." tiin ka insehruh tung a. Mahse NAthana chuan, "Tualthattu an ni kher em tih fiahna a la awm lo, chuvang chuan kan man ngawt thei lo." tiin min chhang daih mai.

"Enge an nih lohna? A chian tawh em saw?"

"Enge a chianna? Mi an that lai kan hmu pawh a nih loh hi? Hmingtei sawn a pasal a bum a, a rukin Zohminga nen an inngaizawng satliah pawh a ni thei."

"Chupawh nise..an pahnih bak rin tur an awm lo."

"Bella, ngaihtuah chiang phawt teh. Zira thih zan khan CCTV footage kan check leh vek a, mahse engmah kan hmu lo. Tin khatih lai khan Hmingtei leh Dama kha roomah kan kalh hnan tlat a, an rawn chhuak lo hrim hrim."

"Aww...Zohminga thil tih a ni tihna a ni mai alawm, Hmingtei'n a tih tir a ni mai alawm."

"Zohminga thil tih pawh chu lo nise, engvangin nge a thiante a thah kher ang?"

"Sir, a chhan chu engpawh a ni thei. A thiante hian an hre ru anga, an sawi loh nan a mal te te in a dahtha a ni thei."

"Kan ngaihdan chauh ala ni...chu chu nise midang khan Zohminga hi an puan vek tawh ang."

"Engtin nge hetah hian an tlan luh theih reng reng le, bike pawh khan ka kal tlang thei lo ania."

"Lehlamah khan helna a awm reng alawm...an hrechiang dun hle tihna a nimai, helai kawng hi." tiin Nathana chuan min chhang a. "An ti fo tawh tihna a ni mai alawm." tiin ka lo tuihnih ve bawk a. "Car saw Dama'n a khalh siloh chuan, Dama hi khawnge a awm tak ang?" tiin NAthana chuan a khabe a han dawm vang vang a.

************************

TO BE CONTINUE