WILD ZONE : SEASON 1 (Episode - 15) Written by : Aaron Malsawmdawngzuala THE MISSING CHILD - 3

 WILD ZONE : SEASON 1

(Episode - 15)

Written by : Aaron Malsawmdawngzuala

THE MISSING CHILD - 3

*************************

Ka harh leh meuh chuan damdawiin ah ka lo mu reng mai, ka bulah chuan Dika a lo awm a. "I lo harh tawh maw, duat?" tiin ka biang a lo chul heuh heuh a. "Enge awmzia? Engtin nge ka awm? Khawnge Sir NAthana?" tiin ka zawt nghal a. "PAwnah a awm, min ti hlauthawng lutuk alawm...enge i an, na i nei em?" tiin min zawt let a.

"Aih..ka tha alawm...engtin nge hetah ka awm theih?" tiin ka zawt leh a. "Pu Nathana'n min rawn phone a, ka rawn kal nghal alawm. Luia i zuan thlak khan naute lem i hum reng a, tui i hak a, i zawi nghal vek a. Chuan Pu Nathana'n a rawn chhanchhuak che alawm, tinge i zuan thlak reng reng a?" a han ti leh a.

Ka chhang lem lo, ka sil lutuk chu ka na vek a ni ber mai. Chutih lai chuan Nathana a rawn lut a, "I lo harh tawh maw, Bella?" tiin min rawn zawt ve a. "Umm..ka tha tawh e, enge chanchin, Sir?" tiin ka lo zawt let a. Nathana chu a ngawi vang vang a, "Dika, khawngaihin pawnah min lo nghak ta che." a ti daih mai.

Dika chuan ka hmuiah a rawn fawp zeuh va, "Ka haw phawt mai ang, nakinah kan inhmu leh dawnnia....ka hmangaih che." a han ti a. Sir Nathana a awm avang chuan ka chhang let ngam mai lo, Nathana chuan a hrethiam deuh a ni ngei ang. Lehlam a hawi a, "Keipawn ka hmangaih che." tiin zawi sap chuan Dika chu ka chhang a.

Dika chu a chhuak ta a, "I tha tawh takzet maw, Bella?" tiin Nathana chuan min zawt leh a. "Umm ka tha alawm, Sir." tiin ka chhang a. Nathana chu a thaw deuh hak a, "Chhandami chu an zawng nghal a, tui thiam te pawh kan kova, mahse hmuh tur a awm lo hrim hrim." tiin min chhang a, ka hnual nghal rawih mai.

"Chuan engtin zel?" ka han ti leh a. Nathana chuan beidawn hmel tak hian, "Lui kha a zauvin a lian ve angreng si a, Chhandami chu lo tla hlum pawh nise, a ruang pawh hmuh a har viau ang tiin an sawi a, a pawi ka ti khawp mai." a ti chuai raih mai a. "Anih chuan engtia hmalak zel tur nge?" tiin ka han zawt leh hram a.

Za lo tih hriat tak hian a nui suk a, "Pu Lura te hnen atangin hlawh kan la dun anga, a bak chu IG Rinliana'n a buaipui chhunzawm tawh dawn a nih chu...keini chu kan case a tawp tawh." a ti ta mai a. Ka lungawi lo kher mai, "Mahse Sir, tuna beidawn mai chi pawh a nih loh hi..kan la zawng leh anga, kan hmu em em ang." tiin ka la tang fan a.

Mahse NAthana chuan a lu a thing a, "Nilove Bella, kan hun a tawp tawh. Ni thumna a ni tawh a, hei..tunah zingkar a ni leh der tawh. Chhandami chu a thi nge a dam pawh kan la hre silova, chuvang chuan kan case chu khar sak kan ni tawh. Keipawn beidawn ka la duh bik lo, mahse police kut a ni tawh, tih theih kan nei tawh lo a ni." tiin min chhang leh a.

Ka mittui a tla thei hial mai, a chhan pawh Chhandami chu ka rilru ah a awm reng a, ka khawngaih takzet a ni. Nep ka inti hle bawk, mahse tih theih kan nei tawh der mai si lo. Nathana chuan min chhuahsan a, reilote hnuah keipawh chu ka haw veleh ta a. Tichuan kan case chu a tawp hrih ta der mai, khawnge Chhandami chu a awm tih tuman kan hre ta lo.

***********************

Ni 5 a liam a, Chhandami chu hmuh a la ni chuang hauh lo. Nathana nen pawh kan inhmu ngai lova, biak pawh kan inbe ngai hek lo. Nikhat chu news ka en lai chuan Chhandami bo chungchang an rawn update tlat mai, mahse news lawmawm tak chu ava ni lo chiang em. Police te pawh chuan Chhandami zawn hna chu an ti tawp a, thi a puan niin a ruang chu a bo hlen angin an rawn puang ta rup mai le.

Chumai ala ni lo, IG Pu Rinliana pawh chu case avang chuan a retired phah a ni tih ka hre leh bawk. Chu chauh chu ala ni chuang lo, Suresh-a hide-out a kan va kal tum a, Suresh-a thianpa, min lo check-tu kha, khapa pawh kha thi a chhar a ni bawk a, tualthattu hriat a ni lova, chhui mek a ni bawk.

Ka mood a off em em a, ka hnual vek thei. Nileng mai chuan ka ngui em em a, mahni inthiamlohna hlir chuan ka khat hi a ni ber mai. Ni e, Detective ka nihna angin ka hna ka tlin lo a ni. Nathana dem ka han tum a, mahse a thiam loh a ni bik si lo. Naupang bo case pakhat lek pawh kan chhui chhuak thei lo chu ania, chuta chhapah IG ber chu a retired luih phah thak lehnghal.

Hun a liam zel a, Nathana nen chuan kan in cotact ngai chuang lo. Nitin mai chuan Chhandami ka ngaihtuahna chu a nasa tial tial mai a, ka stress phah nasa khawp mai. Dika chuan zantin min awmpui thin a, min hnem char char thin bawk. Bialpa fel tak chu ava ni em, hepa hi chu kei aia naupang mah nise ka hmangaih takzet a ni.

***********************

Thla khat dawn a lian leh hnu chuan news duhawm loh zet mai kan dawng leh ta a, chu chu ITI veng a mi tho mipa naupang pakhat kum 10 mi, Lalremsanga bo thu a ni. News-a an tarlan dan chuan an hmuh hnuhnun ber chuan cross sign thi(necklace) a awrh a, kar dum a ha a, kekawr dum leh chapal var a bun thu an sawi bawk.

Police te chuan an chhui leh mek a, mahse engvak an chhui chhuah ka ring lo bur. A chhan pawh kan police te ve hian engmah an ti thei tak tak lo, thamna an ngam thei tlat lo hian min ti thinrim ber. Tunah phei chuan Pu Rinliana a retire tawh leh nghal a, Inspector Nicky-a leh Richard-a lah engmah ni silova inla fing satliah kha an ni bawk nen.

Chu naupang bo chuan ka stress a ti zual ngei mai, Nathana lah a reh hmak mai bawk si nen. Chubakah ITI VEng a mi tho a nih ve avang chuan Chhandami kidnap-tu tho thil tih a nih te chu ka ring rum rum a, inzawmna engemaw tak an neih ka ring tlat a ni. Mahse rin thu mai mai ania, enge thudik erawh ka hre bik hauh lo.

******************************

Nikhat chu stress relieve nan leh chhuah harh pahin tiin bar ah keimah in ka kal a, a chhan chu Dika hmuh laiin ruihtheihthil engmah, beer takngial pawh ka tih duh loh vang a ni. Bar ka lut chiah chu Nathana ka hmu hlawh mai, mood off hmel tak hian amahin a lo thu ngui bar mai a, ka va pan nghal a.

Min hmu chiah chu mak tih hmel tak hian, "Ehe Bella, nangmaw?" a lo ti hu mai. "Enge i tih a..Sir? I va mal ve..khawnge Maxie?" tiin ka zawt a. "A zin daih a, a thiante nen...enge i rawn tih dawn a?" tiin min lo zawt let a. Za lo tak chuan ka nui a, "Bar ah ka rawn kal a, eng vak nge ti se min tih a...zu ka in dawn." tiin ka khi suk a.

"Umm..i rilru a hah ve a ni tiraw?" tiin min zawt a. "Tinge a hah ngawt anga, hahna chhan tur a awm a mi?" tiin ka zawt let a. A nui leh suk a, "Chhandami vang khan i rilru a la hah a ni tiraw...chuvang ani lawm ni hetah i rilru tih thawven nan i lo kal?" tiin min zawt leh a. KA lu ka bu nghut a, "Umm..ni e, naupang dang bo leh hian min ti mangang zual." tiin ka chhang a.

"Kan in ang a nih chu...kan case chu ni tawh lo mahse, rilru a kap reng a, awm a nuam duh lo khawp mai." a han ti leh a. Chutia kan titi lai chuan kan hnung lam atang chuan tu emaw ni hian, "Nathan." a rawn ti thut mai a. Nathana nen chuan hnung lam chu kan hawi rual a, a thianpa Bobby-a, drug dealer kha a lo ni.

"Ehe Bobby, i lo awm ve reng elaw?" Nathana chuan a han ti a. "Enteh u..ka hmu hlauh che u chu ka va lawm em...khawiah emaw kan kal angai." Bobby-a chuan a han ti leh a. "Khawiah maw?" ka lo ti hu mai. "Hetah chuan sawi chi a ni lo, min lo zui ula...in hre mai ang." tiin min chhang a.

NAthana nen chuan kan inmelh hu ringawt, "Eng chungchang nge ni reng reng a, Bobby?" tiin Nathana chuan a zawt leh a. Bobby-a chu a han hawi kual zeuh zeuh va, "Kalna tur kan nei, lo chhuak ula  animai." tiin pawn lam chu a pan daih mai. "Zui phawt mai ang." tiin Nathana chu a chhuak ve nghal a, ka zui chhuak ve nghal bawk.

Pawnah chuan kan chhuak a, "Ka motor-in kal ang." Bobby-a chuan a ti leh a. NAthana chuan hrilhhai hmel tak hian, "Bobby, min ti hlauthawng ania, enge ni reng reng a?" tiin a zawt leh a. Bobby-a chu a ngawi vang vang a, "Chhandami chungchang a ni." a ti ta mai a, ka beng a verh nghal kher mai.

"Enga? Chhandami a?" ka lo ti nghal vat a. "Aw ni e, chuvang chuan in lirthei hi chu hetah dah phawt rawh u. Kan kal phawt angai, ka motor hian kal ila...car chhungah kan sawi pah dawnnia." tih leh motor-a luh chu a rual nghal a. Keini pahnih pawh chu kan lut ve mai bawk a, ala tlan chak em em lehnghal.

***********************

Kan tlan pah chuan NAthana chuan, "Engthil nge? Chhandami chu a awmna i hria em ni?" tiin a zawt leh a. "Hre lo..mahse a inkungkaih tho ka ring." tih ringawt chuan Bobby-a chuan a chhang a. "Engtia inkungkaihin maw?" ka lo ti hu mai. "Lawk..kan thleng tep." tiin Bobby-a chu a han tlan chak zual sauh va, in pakhat bulah chuan kan ding a.

In chu kawkin, "Khi khi a hma a insawi, in suspect pathum, Chama, REbecca-i leh Zolianzuala te chenna in a ni." Bobby-a chuan a han ti a. "Tinge hetah hian kan kal?" tiin Nathana chuan a zawt a. "Drug lei min rawn dil a, pe turin kan kal a nih hi. Ka hruai ve nachhan che u chu maw, hmanni lawka bo, mipa naupang kum 10 mi, Lalremsanga an hmuh hnuhnun berna kha helai veng hi a ni." a ti ta mai a.

Nathana chuan a lu a bu nghat nghat a, "Anih chuan hemite hi i ringhlel tihna em ni?" tiin a han zawt leh a. "Ni e, Lalthanchama hi naupang kumtling lo pawngsual vangin vawihnih ngawt man a ni tawh a, chuvang chuan anni hian Lalremsanga hi an kidnap a nih ka ring tlat a ni." tiin Bobby-a chuan a chhang a.

"Anih chuan lut ila...kan enfiah nghal anga a ni mai alawm." tiin NAthana chu a nui suk a, chutah min rawn en leh a, "I inpeih em?" tiin min han zawt a. Chhang lem lo chuan ka lu ka lo bu nghut ringawt, kan pathum chuan motor atang chuan kan chhuak a, in lam chu kan va pan ta a. Kawngka chu Bobby-a chuan a kik karh karh a, reiloteah chuan an rawn hawng a.

Kawngka rawn hawngtu hmel chu ka en a, suspect kan neih te zinga mi, Zolianzuala a ni. "Tute nge in nih??" a lo ti deuh nghal hlur a. "In rawn phone kha..keimah ka nia." tiin Bobby-a chuan a chhang a. "I lo keng em?" a han ti leh hmuk a. "Aw lo keng e, kan lo lut thei angem?" tiin Bobby-a chuan a han zawt leh a.

Lianzuala chuan min luh tir a, dawhkan chu kan kil hova. Chutih lai chuan room atang chuan Rebecca-i chu a rawn chhuak a, "Khawnge thil chu?" a rawn ti vin nghal hlur mai. Bobby-a chuan drugs chu a phawrh a, Lianzuala chuan a han enchiang a, a han hnim chhin vel a. Rebecca-i chuan Lianzuala drugs ken lai chu a phih lawp a, "Khawi maw..ka chiri dawn." tih pah chuan a hnarah chuan a hip lut hrawk mai.

Bobby-a chu a tho va, "In tui ka lo in lawk." tiin choka lamah chuan a phei a. Inchhung chu a han enkual vak vak a, room lo inhawng sa ah te chuan a dak ang thuak thuak a. CHu chu Rebecca-i chuan a ngai thei ta tlat lo, a melhrum kher mai. "In in chu a nuam hle mai, inchung lam khi ka han fang kual lawk teh ang." tiin inchung lamah chuan Bobby-a chu chhoh a tum a.

Chutah rin loh tak maiin Rebecca-i chuan pistol a rawn phawrh ta mai a, "I va tlangnel mah mah ve, tlangval?" tiin Bobby-a chu a tin ta mai. Ka thin a phu nghal dup dup a, kan vai mai chuan kan reh nghal thap mai. "Hei hi i inchhung emaw i ti em ni? I duh duhna hmunah i kalin i check kual thei turah i inngai em ni?" Rebecca-i bawk chuan a han ti leh khur khur a.

Chutih lai chuan inchung lam room kawngka chu a rawn ri rak a, tu emawni hi a rawn chhuak a. Inhnuai lam chu a rawn melh thla a, chu chu tudang nilovin kan suspect zinga mi tho, naupang khuaikhem vanga an man tawh, Lalthanchama ngei chu a ni. Nathana chuan min rawn signal zeuh va, Chama chu ka han en ngun deuh va.

A thi(necklace) awrh chu hmanni lawka naupang bo, Lalremsanga thi, cross sign nen chuan a in ang chiah chiah mai. Mahse chet engmah la rih lo turin min mitmei vat a, "Insum rawh ka pi, pawisa min pe ula, kan chhuak nghal ang." zaidam tak chuan Nathana chuan a han ti a, pawisa chu Bobby-a an pe a, in chu kan chhuah san ta a.

************************

PAwnah chuan kan chhuak a, "Tinge khatia i kal kual a, in enkual vak vak kher a?" tiin NAthana chuan Bobby-a chu a hau va. Bobby-a lah chuan, "Awww..naupang kha ka zawng, an kidnap a nih ka rin vangin alawm hetah ka hruai che u." a la ti bul bul zui. "Awww ka hria alawm, mahse khatia rinhlelh hmel deuh va enkual vak vak loh tur alawm, kan kutah dah ta che." NAthana chuan a han ti leh a.

"In che ve vat mai dawn maw ka tia, ngaihdam ila dil zakw zui a, tinge kan chhuah leh daih." Bobby-a chuan ala ti zui. "Amak thin....pistol an neih kha, engmah pawh kan keng ve hleinem, a chan chhe zawk kan nih kha." tiin ka lo hau ve a. Nathana chu a thaw hak a, "Umm...engpawh nise i ti lawmawm e, Bobby...a bak chu kan lo buaipui tawh ang." a han ti a.

BAr-ah chuan min va dah let leh a, ani erawh chu a haw tlang nghal a. Nathana nen chuan bar-ah chuan kan la awm a, "Sir, pistol leh vest pai ila, tunah kan va kal leh nghal mai dawn em ni? Kha..a chiang vek alawm, Remsanga an kidnap tih te chu.." ka han ti a. "Nilove, tunah chet tut tut chu kan tisual palh ang." tiin min chhang daih mai.

"Anih engtin nge hma kan lak dawn?"

"Peih awm loh viau mahse, Inspector Richard-a te kan hrilh angai."

"Enga? Khami te bawk kha maw? Engvangin?'

"Remsanga case khawihtute tho an ni leh a, tunah pawh hian. Kan case a ni lova, chuvang chuan kan hrilh hriat angai alawm."

Ka phur tawh lo kher mai, kha mimawl pahnihte kha chu e, sawp hre ania ka chak ni. Phur fahran lo chuan, "Anih leh Station lamah kan va phei dawn tihna em ni?" ka han ti chuai raih a. "Umm...Stationah kan phei anga...kan buaipui nghal ang." tiin min chhang a. "Awle." tiin ka chhang a, kan kal nghal a.

*********************

Station chu kan va thleng a, Richard-a chu thil awmzia te kan va hrilh a. REbecca-i te address chu kan hrilh ve nghal bawk, "Anih chuan kan va raid mai dawn em ni?" Richard-a chuan a lo ti nghal tut tut mai. "Nia, raid chu a tha a..mahse full armed-a kan kal a ngai ang. Pistol an kawl ve a, a aia hmanraw tha pawh an nai maithei." tiin Nathana chuan a chhang a.

"Umm..kan pali bawkin kan kal leh ang." Richard-a chuan a han ti ve leh a. Tichuan pistol kan pai a, kan mamawh ang te chu kengin kei, Nathana, Richard-a leh Nicky-a te chu Rebecca-i te in lam pan chuan kan kal leh ta a. A hmun chu kan thleng a, "Nathan..Bella-i nen pawnah hian lo awm ula, in lo chang dawnnia." Richard-a chuan a han ti a.

"Anih nangni engtin nge in awm dawn?" tiin ka lo zawt nghal vat a. "Nicky-a hi front door ah a awm anga, kei kawngka hnung lamah ka va awm ve thung ang." tiin inla fing zet chuan min chhang a. Tichuan kei leh Nathana chu motor phenah chuan kan biru a, hetih lai hian khua a thim vek tawh a ni.

Nicky-a chu kawngka lam ava pan a, a thleng tep tih ah chuan silai a puak dur mai a, ka va han phu chiang tak em. Nicky-a chu a thal thuai mai, rang takin NAthana nen chuan kan va pan nghal a. A ngawngah kah fuh a lo ni a, mahse khawi atanga silai chu rawn puak nge kan hre hauh lo thung.

Thisen chu a rawn chik chhuah zawr zawr a, Nathana chuan a hup bet vat. "Nicky..Nicky, che tawh suh..engtin mah i awm lovang." a ti nghal mawlh mawlh a. Nicky-a chu a ang hlawi hlawi a, rei a daih dawn lo tih ka hrethiam nghal. KA pistol ka phawrh a, kan bul vel chu ka en kual nghal a.

Chutah kan bul hnai ah chuan silai mu a rawn per ta fua fua mai a, Nathana pawh chuan a silai   a phawrh ve nghal. "BElla, inchhung lamah lut ang." tih leh kawngka chu a tlawh chhe nghal vek a, inchhungah chuan kan lut ta a. Kan lut chiah chu chhuatah chuan ruang pakhat a lo let reng a, kawr ruakin a lo awm bawk.

Ruang chu NAthana chuan a han kuai let a, REbecca-i pasal Lianzuala a lo ni reng mai. "Ehe..hei chu...REbecca-i pasal a nih hi." NAthana chuan a ti nuah nuah mai. Chutah choka lamah chuan thawm kan hria a, REbecca-i chu silao keng chungin a rawn phei ta mai a. Nathana chu a rawn kap ta mai, mahse a kap fuh lo hlauh.

Ka lo kap ve nghal a, mahse bang phenah a biru hman hlauh, ka kap fuh teuh asin aw. "Inchung lamah." tiin Nathana chuan min kai a, inchung lamah chuan kan tlan chho nghal a. Room chhungah chuan kan lut a, Rebecca-i chuan silai a rawn hmet puak chho vak vak a, room kawngka chu kan kalh nghal a.

A la rawn chum bur bur zui, hnunglam ka hawi chu ka phu zuk mai. Chama chu bang kilah hlauh hmel tak hian a lo thu khur zawih zawih mai a, "Sir..saw enteh." tiin Nathana chu ka nghawk vak a. Nathana pawh chuan a hmu ve ta a, silai chuan Chama chu kan tin dun nghal vat a. TAp tuau chung chuan Chama chuan, "Ka tihpalh a ni, thil thleng palh liau liau a ni." a ti khur dar dar mai.

A thutna bul lawk chu bathroom a ni a, thisen a kawi nuai bawk. "Bella, lo veng rawh." tiin Nathana chuan bathroom chu ava pan a, Chama chu ka pistol chuan ka la tin reng a. Chama chuan mit sen vek hian min en a, "Ka tihpalh a ni." tiin a tap hawm hawm mai. Nathana chu a rawn chhuak a, a thinrim hmel kher mai.

"Zawngsen leh." tih pah chuan Chama chal darah tak chuan a kap ta thuai mai a, ka va phu nasa tak em. Chama chu a let tawp a, a thi chiang ngei mai. Chutah kawnga chu a rawn inhawng thuai a, REbecca-i chu a rawn bawk thlawp mai. A hnungah chuan Inspector Richard-a chu a pistol hmawr khu vung vung hian a lo ding a, room chhungah chuan a rawn lut ve a.

Chama ruang chu a rawn en a, "Enge awmzia?" a ti hu mai. Nathana chu ka han en a, a mittui a lo tla zawih zawih mai. Rang takin bathroomah chuan ka lut a, Richard-a chuan min rawn zui ve bawk. Bathtub-ah chuan ruang pakhat hi a lo awm a, chu ruang chu tudang nilovin naupang bo, Lalremsanga ruang ngei kha a ni.

Nathana chu a la ngawi reng a, "Sir.." ka ti dek dek chu room atang chuan a chhuak daih mai. "Bella, ka lo buaipui ang, police dang ho pawh ka call tawh a, an lo kal mek e." a ti a, chhang lem lo chuan ka chhuah san ve leh a. Pawn ka va thleng chu Nathana chuan Nicky-a chu a lo pua a, "BElla, ala dam...Hospital pan pui vat angai." a lo ti nghal chul a, hospital lamah chuan kan phur phei nghal vat a.

*********************

2 HOURS LATER

Nicky-a dinhmun chu a tha lo kher mai, Emergency roomah chuan a la awm reng a. NAthana chu tukverh lam hawiin a melh ngai a melh reng a, ka va pan phei a. "Sir, i tha maw?" ka va ti a. A thawu deuh huai a, "Tual ka that...he ka hnuchhui hna avang hian tual ka va han that hnem tawh tak em. Tinge Chama kha ka kah hlum kher, man thei ka nih reng laiin.." tiin a lo inthiam loh hmel kher mai.

A darah chuan ka vuan a, "Sir, keichuan ka chhuang zawk che asin. I hnathawh dan te, misual chungah khawngaihna i lan tir ngai loh thute ka hria a, chuvang chuan inthiamlo duh suh. Thil diktak i ti a ni, Sir. Chama kha naupang pawisawilo thattu a ni a, chuvang chuan a phutawk hremna i pe a, i that ve tihna animai, inthiamlo duh suh." tiin ka thiam ang tawk chuan ka han hnem ve a.

"PAwnah chhuak teh ang...ka thaw a ipik lutuk." tiin pawnah chuan a chhuak daih mai a, ka zui chhuak ve nghal bawk. Hospital pawnah chuan Richard-a chuan meizial a lo zu a, beer a lo la in zui. Nathana nen chuan kan va pan a, "Enge Nicky-a chu a chanchin?" a lo ti a. "Ala ngai reng." tiin ka lo chhang vat a.

Richard-a chu a han thaw deuh hak a, "Ka thian tha ber a ni a, hetia thi leh dam kara a awm tak meuh chuan..ka mang a ti ang kher mai. A fate an la te si, a nupui lah cancer natna nei a ni bawk si..ka va han ngaihtuah tak em." a ti nuah nuah mai a, a ruih hmel em em mai lehnghal. Mahse ka chhang lem lova, Nathana pawh ala ngawi reng.

Richard-a bawk chuan Nathana chu a han melh vang vang a, "Chama i that kha i inthiamlo a ni tiraw, Nathan?" tiin a han zawt a. Nathana chuan a lu a bu nghut ringawt, "Inthiam lo duh suh..i thil tih tur diktak zawk alawm, a phu tawk chiah a ni kha." tiin Richard-a chuan a han hnem ve bawk a.

Nathana chu a ngawi vang vang a, "Ka rilru tibuaitu dang leh bawk chu...Nicky-a kap tu kha tunge tih hi a ni. Rebecca-i inchhungah a awm reng a, mahse pawna Nicky-a a awm lai khan a sir atang khan silaimu kha a rawn thlawk fua kha ania, tu emaw hi chuan min zui ru reng a ni." a han ti nuah nuah a.

Richard-a chu a khi suk a, "Hman deuh khan maw...evidence hi ka siamchawp a, tichuan Police informant ka thehlut a, Lawmtea hmingin." tiin a kal pai deuh chhuih chhuih a, a kai hmel angreng kher mai. Nathana nen chuan Richard-a'n LAwmtea hming a sawi thut mai chu mak kan ti dun bawk aniang, kan inen hu mai.

"Enga, LAwmtea a? Tu Lawmtea maw?" tiin Nathana chuan a zawt nghal vat a. MAhse Richard-a chu engemaw hrechhuak zuk niawm tak hian a rawn meng bial deuh kawk a, "Aaa..eng..engmah mawle, sawi tur a vang em a, ka han nawi vel mai mai a nih kha, ka haw phawt ange." tiin a kal daih mai.

"Sir, Lawmtea...Teremi bialpa hming kha Lawmtea a ni lawm ni?" ka lo ti vat a. "Ni e, mahse a hma kha chuan LAwmtea a hriat ngailoh thu kha a sawi bawk sia, OMEGA restaurant ah khan,." Nathana chuan a ti nuah nuah mai. "Ni reng e, anih chuan enge a sawi awmzia kha ni ta ang?" ka lo ti hu a.

Nathana chuan a lu a bu nghat nghat a, "Dawt a sawi a ni..Lawmtea kha a hre ngai lo angin a insawi a, mahse a hre reng tihna a ni. A ruih avangin a tawng sual zauh a nih kha...thil dik lo chu  a awm ngei a ni." a han ti chang fak fak a. "Anih chuan engtin nge..." ka tih lai chuan min lo pawt chat vat a.

"Aih...engmah sawi angai hrih lo..haw phawt ila, naktukah kan ngaihtuah chhunzawm dawnnia. Ka va thlah ang che...a tlai tawh emai." tiin min chhang a. "Awle, min lo call leh mai dawnnia." ka ti a, tichuan kan in thleng chuan min thlah a. Richard-a chu ka ringhlel ta hle mai, kidnapper hi a lo ni reng mai lo maw tiin ka inngaihtuah tlaivar deuh thaw hial.

**************************

A tuk zingah chuan Nathana chuan chaw ei kham hnu velah min rawn call a, "Bella, Inspector Nicky-a chu tukin dar 7 leh a chanve vel khan a chatthla chiah a ni awm e. A vuinaah kan va kal ve dawn em ni?" a rawn ti a. "Aw anih chu..a zia lo hle mai. Nia va kal ve chu a tha alawm, ka'n insiam nghal ange." tiin ka chhang a.

Phone chu kan dah a, tichuan rang takin ka insiam nghal a. Nathana nen chuan Nicky-a vuinaah chuan kan va kal ve ta a, mahse Richard-a erawh hmuh tur a awm hauh lo thung. Chu ringawt pawh chuan ka rinhlelhna a tizual kher mai. Nathana pawh chu a hawi kual leh deuh hru zel a, a zawng ru ve deuh tho tih chu ka hrethiam nghal.

Hmanni lawka retired ta, IG Pu Rinliana pawh chu a lo kal ve a, thu a sawi nghe nghe bawk. Vuina programme a zo va, ruang chu thlan lam an pan pui ta a. Thlanah pawh chuan kan kal ve zel a, a chhan chu Richard-a kan hmuh thut kan beisei vang a ni mah zawk. Mipui kal pawh kan tam phian mai, an phum zo va, kan haw leh a.

Thlan atanga ke a kan chhuah chhoh lai chuan NAthana chuan min nghawk zauh va, "Khi enteh...khi khi Richard-a a ni em?" tiin kan hma zawn chu a kawk a. Ka han en vang vang a, a rawn hawi a. Richard-a ngei a ni, "A nih chiah khi." tiin ka chhang a. Min hmuh veleh chuan a kal chak sauh lehnghal, kan kal chak lui ve ngat a.

"Richard, khawnge i awm daih a? Vuina programe-ah khan i tel ve lo mi?" tiin Nathana chuan a han zawt a. "Tel ve e, min hmu lo mai mai a nih kha." a ti deuh hmuk mai. Zawi te hian, "Tinge Lawmtea kha i hre reng si a, hre lo anga i insawi a?" tiin Nathana chuan a zawt nghal deuh tawl mai.

Rum fe hian Richard-a chuan Nathana chu a melh a, "Nizana ka thusawi kha theihnghilh rawh, anih loh chuan ka nin chin a thleng hlauh dah ange." a ti khur khur a, a motor lam chu pan in a tlan ta daih mai. Nathana nen chuan kan in en hu ringawt a, "Engemaw chu a awm a ni." tiin Nathana chu a phun sup mai.

"Sir, kan zawh luih deuh chu angai a ni...chubakah a hlauthawng hmel te kha i hmu ve em?" ka han ti a. "Hmu e, thil dik lo chu a awm chiang alawm." tih pah chuan motor bula phone lo khawih mek, SI David-a chu a en vang vang a. "David-a saw Richard-a nen an inbe lai leh an inkawm lai ka hmu fova, an inkawmngeih viauin ka hria..kan va kawm lawk dawn em ni?" Nathana bawk chuan a han ti leh a.

"A pawi hleinem, va kal ila." tiin ka lo chhang vat a. David-a chu kan va pan a, "David, i buai em?" Nathana chuan a han ti te te a. David-a chu a lo nui sang a, "Buai love..enge ni ta?" a lo ti a. "Tihtur pawimawh i neih loh chuan chhun thingpui kan inho lawk dawn em ni?" tiin Nathana chuan a han sawm a.

Hrilhhai hmel zet hian, "Engati teh thut nge? Enge ni a?" a lo ti hu mai. "Aaa..engvak nilove, kan case chhui lai mekah hian han titi pui ve hrim hrim che kan duh mawle." tiin Nathana chuan a chhang leh a. A ngawi vang vang a, "Ka tel ve silova, chubakah case dang buaipui lai ka nei bawk sia, ka va hman awm lo ve." a han ti nuah nuah a. 

Ka chet ve a hun tlat mai, "Aww amak thin, kan kawm ve chak che alawm. I induh emai, thingpui chauh lo te pawh kan dawm ho mathei asin." fiamthu titih pah deuh chuan ka han nuih seih a, ka va zei tak a ni. Chutah zet zawng, David-a chuan min melh TOKA angreng viau mai, "Nia, dar 2 ah Station bula canteen ah khan kan inhmu dawnnia." a ti ta nge nge a.

David-a chu kan kalsan leh a, min enzui vawng vawng tih chu hawi let kher ngai lovin ka tukhum mit hian ka hmu sa reng. Nathana chu a nui put put a, "I va zei reuh ve, ka star tep che alawm." a han ti deuh kher a. "Ka senior tawh..zah vak hi ka nei lo." tiin ka lo fiamthu a, tichuan in lam panin kan haw leh ta phawt a.

***********************

TO BE CONTINUE