TIRA MEI KAIAH (MIZO FICTION CULT HORROR STORY) Written by : Aaron Malsawmdawngzuala Chapter -1

 TIRA MEI KAIAH

(MIZO FICTION CULT HORROR STORY)

Written by : Aaron Malsawmdawngzuala

Chapter -1

************

Mahni veng thenawm  lawk mah nise in dang han luah meuh chuan chhungte ngaih pawh a na angreng duh hle mai, vawikhat mah ka la awm hrang ngai lo bawk nen. Fanu pakhat kum nga mi ka nei ve a, mahse pakhat lek pawh enkawl a lo hautak khawp mai. Fa neih hi a lo hahthlak a nih hi tia an sawi fo thin chu ka hrethiam ve tan ta niin a lang, chuta karah kan in hrang luahin kan indang ve der ta chu ania.

Kum 30-na ka hmang mek a, kum 25 ka nih khan nupui hmeltha tak, ka lungdumtu ngei mai, Sarah-i nen kum 3 zet kan inzui hnuah kan innei ve a. Fa pakhat chiah kan la nei a, fapa awt ru viau thin mah ila Pathian min pek hlu tak ka fanu Annie Lalnuntluangi ka duat hlum lo chauh chu a ni ber e.

Sawrkar hna thawk ka ni a, hlawh tam lulai em em lo mahse chhungkaw chawm ve thei tawh niin ka inhria a, unau zinga a mi lai ta na na na chu ka indan pui ve ta kha ania. Kar 2 chiah kan la awm a, ka fanu leh ka nupui chu sawiloh, keimah ber hian ka chhungte, ka nu leh pa leh ka unaute hi ka ngai thei khawp mai.

Kan unau hi pathum kan ni a, mipa hlang vek kan ni. Kan unau zinga upa ber hi Lalmuanawma a ni a, kei hi a milai niin ka hming chu Lalrinkima a ni. Kan naupang ber Lalnunpuia hi chu ala naupang fal deuh a, kum 20 chiah a upa a ni. Kei leh ka u hian nupui kan nei tawh a, ka u nupui nen hian kan inmil chiah loh avang hian indan vat vat ka chak ber thin.

Assam type ni mahse he kan inluah thar hi a zau tha a, a kawt zawl vel te pawh a nuam viau chuan ka hria. Fanu pakhat chauh kan neih nachhan chu Annie, ka fanu pian hnu hian kan nu hian fa dang neih leh nghal a duh lova, kum 5 vel liam leh phawt se tiin unau inchhang zing lutuk a duhloh thu min hrilh a, keipawhin pawi ka ti lem lo.

Thian siam thiam lem lo tih takah thenawmte nen pawh kan intlawh pawh lo hle a, an rawn leng emaw, khawlaiah min hmuh a min bia te a nih lem loh chuan a tu amah hi va biak lumlam ka tum bik lem lo. Amaherawh chu kan in bul lawk ah hian dawrkai pakhat a awm a, a hming chu Pu Lala niin ani nen erawh hi chuan kan innel angreng khawp mai.

Ka fanu pawh a hnaih zawk avang leh a rem zawk avangin school dangah kan luhtir a, nuam a ti bawk aniang, thian thar a siam thu a sawi a sawi mai. Kan hlim tlang viau chuan ka hria a, chhungte ngaih avanga lunglen tih lohvah chuan kan chhungkaw thum bik chu kan khawsak a harsa in a hrehawm lem lo khawp mai.

Ka nupui SArah-i erawh hi chuan hna a nei lova, house wife pangngai tiin sawi ila a mawilo hran awm love. Pangngai taka innei erawh kan ni bik hauh lo, inru ve tho kan ni. Ka hmangaih em vang leh ka duh em avang hian tlangval khamloh tih vel hi chu rilru ah chuan a awmlo ve chiang khawp mai, ka duh ber leh ka hmangaih ber kha nupui atan ka nei miau va.

****************

Kar 3 vel zen zawn chu kan awm ve ta, harsatna em em kan tawk lova, kan hlim viau chuan ka hria. Tlai khat ka office bang ka haw chu kan inhnuai garage ah ka car chu ka hung fel a, naupang infiam nui ri her her ri hi ka hre tlat mai a. Kan in kawtzawl hnuaiah hian luhthlakna a awm a, chu chu kan garage chu a ni.

"Annie hian thiante a rawn hruai ka hre ngai silova, tu fate tak chu rawn leng nimaw?" tiin keima hriat tham lek chuan ka phun deuh nuah nuah a. Naupang ho infiam leh hlim nui ri lah chu a ring telh telh mai lehnghal, ka car ka hun fel hnu chuan garage chu ka kalh tha leh thlap a. Tichuan kan in lam pan chuan ka chho leh a, naupang ho infiam ri pawh chu ka hre chiang tawh khawp mai.

Step ah chuan ka chho zel a, mak tak maiin naupang ho thawm chu a zawi tial tial mai. Ka hnaih telh telh a, ring tulh tulh zawk tur ni awm tak chu chutia an thawm a zawi ta telh telh mai chu mak ka ti angreng viau, inchhung lamah an lut a nih ringin chutia ngaihthat lohna em em pawh ka nei chuang lo.

Step ah chuan ka chhuak chhova, naupang thawm reng reng ka hre tawh lo. Kan inkawt chu a reh hian a reh thap mai a, mihring tumah hmuh tur an awm lo. Ka sana ka en a, tlai dar 5 a pel chiah chiah vel a ni. Inchhungah chuan ka lut a, sitting room thutthleng seiah chuan ka nupui chu  alo muhil bawrh bawrh mai.

A mutna bulah chuan va thu in, "Nu-i, i nuam lo em ni?" tiin a bianga chul heuh heuh pah chuan ka kai tho va. Peih lo hmel tak hian a rawn meng tawk tawk a, "Ehe..ilo haw tawh animaw? Dar engzat nge a, ka van mu rei awm em em?" a ti deuh nuah nuah a. "KA lo thleng deuh chiah a, khawnge Annie?" tiin ka zawt nghal a.

"Kan roomah, ka phone ka khawih tir a...ka chau deuh aniang, ka lo muhil daih alawm mawle."

"I damsam lo em ni?"

"Chutiang engmah a awm lo...i chau em?"

"Chau love...ka va inthlak ange."

Roomah chuan ka luhsan a, Annie pawh khumah bawk chungin anu phone chu a lo khel mek a. Min hmuh veleh chuan nui sakin, "Pa, enge min lo hawn?" tiin min lo zawt nghal. KA chocolate hawnsak chu phawrhin, "Kha..hei hi ka lo hawn che a." tiin ka pe a. A lawm ngang mai, a kheh a, a ei nghal bawrh bawrh mai.

Ka inthlak mek lai chuan ka car ka dah fel laia kan inkawta naupang infiam ri ka hriat chu ka hrechhuak leh deuh zawk a, "Bawihte, nichinah i thiante an lo leng em ni?" tiin ka han zawt deuh tawl ringawt a. "Tu ka thiante maw?" a lo ti hu mai. "I thiante an ni em ka hrelo, nichin khan naupang infiam ri ka hria a...kan inkawtah sawn." ka han ti leh a.

"Ka hre lo reng reng." tiin min chhang leh a, ka zawt zui ta lem lo. "Home work te in nei em?" tiin ka zawt leh a. Nui sang hian, "Umm..mahse ilo haw hma khan ka ti vek tawh...zaninah lehkha zir a ngai lo tihna.." tiin a intithei kher mai. "Umm..i fel lutuk e. Hei chaw ei a hun dawn tawh a, i nu i pui dawnnia aw.." tiin ka inbual san ta a.

***********************

Chaw ei lai chuan Sarah-i nen chuan kan titi mawlh mawlh a, "Annie pawh kum 6 a ni ve dawn tawh a, nau a neih ve chu a hun i ti tawh lo maw?" tiin ka han zawt a. Sarah-i chu a ngawi deuh vang vang a, "Ni e..mahse Annie hi ala awm thova, chubakah fa pahnih han buaipui chu ka la huphurh deuh a ni. Annie hi tirh tlak ni ve phawt se, chumi hnuah chuan ni zawk se ka lo tia." tiin min chhang a.

"Chhang zing lutuk i duh lo tih chu ka hria, mahse Annie pawh ka sawi ang khan kum 6 a ni dawn tawh a, a tawk vel viau lo em ni?"

"Inah keimah vek ka che bawk si a, nang office i kal daih zel bawk sia. Naute dang buaipui lehnghal chu ka thei rih lo, Duhtak. Chubakah Annie pawh a school kal tur la siam vek angai a, kum tlemte chu nghak leh phawt zawk ang."

"Aww...i chhungten a nausen lai chuan an kawl rih mai anga, thil harsa pawh a ni hleinem. Chubakah awmpui pawh kan la thei reng a, sum hekna tur pakhat mah a awm lo. Kan nei ve tawk alawm, buaina tur a awm hleinem."

Sarah-i chu a ngawi vang vang a, "Ni e, kan ngaihtuah dawnnia." tiin a phun sup ringawt. Inhnialna ka chawh chhuah ka hlauh avang chuan ka sawipui chhunzawm duh ta bik lo. Annie chaw ei lai chu ka en a, "Bawihte...vawiin i school kal chu a nuam em? Enge in zir?" tiin chhuanlam deuh reuh pah chuan ka han zawt a.

"Nuam rap...ka thiante nen TIRA MEI KAIAH kan tia, mahse dar a ri hma thei lutuk a, kan kham lo tawp." tiin min chhang a. "Anih leh enge in zir?" tiin ka zawt leh a. "Ka hre tawh lo." a la ti zui, ka nui deuh huk ringawt. Chaw kan eikham hnu pawh chuan ka nupui chu  amood a fuh loh hmel kher mai, a tum deuh hmuk reng a.

Sawi sual ka nei emaw ni chu aw tiin ka inzawt hial a, boruak chu a nuam lo duh angreng khawp mai. Office project khawih tur tam tham ve tak ka neih avang chuan chaw ei kham atanga reiloteah chuan computer hmaah thu in hna ka thawk nghal a, Sarah-i chuan min la be chuang lo reng reng.

Dar 8:30 velah chuan room atang chuan a rawn chhuak a, kei erawh chaw ei dawhkanah laptop khawihin ka la buai hle a. Ngawi rengin choka lam chu a rawn pan a, thingpui min rawn siam mawlh mawlh a. Dawhkanah chuan a rawn dah a, "Kha...i chau lutuk ange, indim ve deuh la." a rawn ti zawi sap a.

Luh leh mai a tum chu a banah chuan ka lo pawt a, "Bawihtei nu, lo thu lawk teh." tiin ka bulah chuan ka pawt thu a. "Enge ni a?" tiin min lo zawt a. "I lungawilo em ni?" tiin ka han zawt leh a. Hriatthiam loh hmel tak hian, "Enga? Enge lungawilohna tur awm?" tiin min zawt deuh hu mai. "Sawi tawp rawh...zanriah kan ei laia kan thil sawi vang kha em ni?" ka han ti leh a.

A thaw deuh hak a, "I hrethiam lo a ni, Rina...ka tan hian a harsa alawm." a han ti thawp sat a. "Eng chu nge harsa? Tlang deuhvin min hrilh mai la, i pasal ka nih hi." tiin a kutah chuan ak vuan a. "Chulam pawh a nilo, ka..ka sawi thiam lo, khawngaihin min hrethiam rawh." a han ti leh a. "Tehreng mai, i duh loh chuan kan nei lovang...a enkawltu ber tur i ni a, i thuthlukna chu ka zahsak ang che..mahse min be duhlo kher lola, umm?" tiin ka han nuih tlawn vel a.

Ani pawh chu nui lui deuh sakin, "Umm...ka thinrim lo hrim hrim." tih pah chuan min sik vak a. "Bawihtei a muhil tawh ami?" tiin ka zawt leh a. "Aw...zanin chu a mu hma khawp mai, ngati nge mawni.." tiin min chhang a. "Umm..anih keipawh kan thawh chhunzawm leh ange." tiin ka hna chu ka chhunzawm leh a. "Mengrei lutuk lola, keipawh ka mu ania." tiin Sarah-i pawh chuan room lamah chuan min let san leh ta a.

****************************

Dar 11 a rik meuh chuan ka zo ve ta hram e, kawng a kham duh ngei mai. Ka mut pawh a chhuak ve ta, rang tak chuan ka indah fel zung zung a. Silhmun ah chuan hmai te phihin ka ha te ka han nawt leh te te a, ka kam ka thuah mek lai chuan engemaw ri bur hi ka hria a, ka phu nasa lutuk chu ka tui hmuam lai pawh ka hak thelh hial.

Thawm lo chhuahna lam ka va hawi phei a, kan sitting room tukverh chu chhe te hian a lo keh thet mai. "A tu phiangsen chu nimaw?" tih pah chuan ka va tlan phei nghal a. Tukverh chu ka han enchiang a, lung lian ve tak hmanga vawm a ni tih pawh a chiang narawh e. Rang takin tukverh chu hawngin, "Tunge?" ka han ti vin vak ringawt a.

Mahse pawnah chuan tu mihring mah an awm lo, a reh thuap mai. Kan room kawngka chu a rawn ri rak rak a, ka va hawi phei chuan Sarah-i a lo ni. Hlauhthawn hmel tak hian, "Enge ni vak vak a, tinge i au vak a?" a rawn ti deuh hu mai. "Lungin an rawn vawm a, kan tukverh hi...tu fa lubawk zurui nge mawni.." tih pah a pawn lam ka va en leh chu ka thusawi lai pawh ka tawp chat mai.

Kan in sir a theihai kung hnuaiah chuan naupang niawm tak pali hi an lo ding tlar thap mai, Sarah-i pawh ka lama rawn phei pahin min rawn be mawlh mawlh a, mahse ka thil hmuh avang chuan enge a sawi pawh ka hre mumal lo. Rang takin pawnah tlan chhuah ka rual a, "AWii..khawnge i kal dawn?" tih pah chuan min rawn zui chhuak ve nghal.

Mahse mak tak maiin theihai kung bul ka va thleng chu tu naupang mah ka hmuhloh mai bakah kei leh ka nupui tih loh chu mihring dang tumah ka hmu lo. "Enge ni a? Min ti hlau ania." tiin Sarah-i chuan min zawt leh a. "Naupang..naupang pali ka hmu..theihai kung bulah hian." tiin ka hrilh a.

Mak tih hmel tak hian, "Naupang a? Eng naupang maw?" a ti leh hu mai. "Khawia naupang nge an nih ka hre lo, mahse ka hmu chiang alawm." tiin ka chhang leh a. "I mit vai aniang...tumah an awm loh hi.." tih pah chuan a han enkual vel a. "Ka mit vai chu a nilo chiang alawm, ka hmu chiang emai." tiin ka la tang fan, ka hmu chiang ve bawk em a ni.

"I chau bawk nen, thil i hmu sual mai mai a niang."

"Chutin thil hmu sual khawp tur chuan ka chau lem lo, ka hmu chiang alawm."

"Anih leh an hmel i hmu em?"

"Aih..an thla chiah..a thim em hi, engtin nge ka hmuh bik ang?" tiin ka vin deuh hlur tawh. "Annie kan chhuahsan ringawt a, hawh teh..i lut teh ang. I hmusual mai mai a nih kha, chubakah tunah zanreiah khawia naupang nge maw lo kal se i tih le, pali lai lehnghal." tia phun nuah nuah chung chuan min luhsan ta daih a.

Ngaih tha lem lo tak chung chuan keipawh chu ka lut ve mai a, "Ka hmusual tak tak em mawni le aw.." tiin ka inngaihtuah ve hial mai. Zep lo chuan kan nu sawi kha a dik reng, office lamah hna a tam si, inlamah haw ila chawlh hahdam hun a awm leh chuang bawk silo nen. Chauh thu ah chuan ka chau takzet, mahse khang naupang pali te kha chu ka hmuhsual a ni hian ka hre tlat lo a ni.

***********************

A tukah pawh chuan nileng deuh thaw in ka ngaih a tha thei lo, ka mitthla ah chuan khang naupang pali, theihai kung bula lo ding te kha an awm reng mai. Vanneihthlak tak maiin kan bang hma dawn hlauh mai, chawhnu lamah GM ho meeting a nih avang chuan chhun dar 2 ah kan bang thei hlauh va.

Ka ngaihtuahna a luah khat hneh bawk aniang nge, ina haw tlang ta mai lo chuan ka car chu ka dah fel te te a, thenawmte inah chuan ka han leng lut a. Nidanga leng lut ngai mang silo, chutia ka han leng lut deuh thut mai chu kan thenawmpa, Pu Hlua pawh chuan min lo en deuh hu mai. "Ehe, Rina tiraw?" a ti deuh hu mai a.

"Aw ni e, in damtlang maw?" tiin ka han nui lui vel a. "Ve teh mial che chuan, ilo leng lut ngai silova, mahni thenawmpate ngei pawh kan hre dawn hleinem che." tiin a nui huah huah a. "Nia tiraw, hei vawiin chu kan bang hma ve a, ina haw hmain tiin ka rawn lut kawi ve zawk a nih hi." ka han ti kual leh vel a, tawngkam thiam lemloh nen sawi tur avang angreng kher mai.

Eng eng emaw sawiin kan titi dun a, "Anih leh enge i rawn len luh ve teh mial a?" tiin min zawt ta nge nge a, ka nui deuh suk ringawt. "Ihh..aaa..thenawmte hriat loh tawp mai chu tiin ka rawn leng lut ve mawle." tiin ka chhang ta ringawt a. Han zawh tawp chu ka hreh deuh a ni, chubakah an mut vek lai a ni awm sia tiin ka leng lut ta kher kher chu ka inchhir leh hnuhnawh reuh khawp mai.

"Thingpui in rawh aw....ka fate hi kan lum tir ang e. Leng ve reng rih rawh, kan nu pawh a lo haw tep ang." tiin a fate chu thingpui a lum tir a, han sawi em em tur ka hre tawh silo nen, ka zawh tum ber lah ka zawt hreh leh tawh bawk si nen, a boring ka ti tan nghal der mai. Pu Hlua lah hi tawng duh em em mai a lo ni bawk nen, a thusawi apiang chu ka um..e ta vel mai mai a.

Rei fe kan titi hnu chuan awmze nei lova len luh tawp aiin tiin ka zawt ta nge nge a, "Ti daih ila Pu Hlu, nizan chu ka hmusual nge mawni, a mak khawp mai.." ka han ti dek dek chu a thu tha sauh sauh va, "Engmaw? Engthil nge i hmuh a?" tiin a hriat chak hmel kher mai. "Englo ania, nizan khan project pakhat khawihin ka mengrei deuh va, kan tukverh saw tu emawniin a rawn vawm a." ka han ti leh phawt a.

"Ehe..tuin nge rawn vawm a?"

"Ka hre bik lo, rang thei angber kha chuan ka va tlan phei nghal a. Mahse tumah ka hmu lova, kan nu pawh a lo tho chhuak ve a. Kan nu ka biak lawk hlan, reilote chiah ka hawisawn lawk hlan khan pawn lam ka va en leh chu naupang niawm tak, pali lai mai hi an lo ding tlar thap a, saw..sawlai kan inkawta theihai kung bulah sawn."

"Naupang a?" mak tih hmel tak hian min en a, "I hmusual a nilo maw?" a han ti ve leh a. "Nia, chu chu keipawhin nise ka tia lawm, mahse ka mitvai emaw, ka hmuhsual niin ka hre lo a ni." tiin ka chhang a. "Anih chuan chung naupangte chu lo awm tak tak tase, anmahni vawm a nih chu i ring deuh tihna em ni?" tiin min zawt leh a.

"Ka hmuh sual nilovin, an lo awm tak tak a nih chuan anni bak puh tur dang an awm chuang hleinem."

"Ava mak awm ve, dar engzat velah nge?"

"DAr 12 a la ri lo deuh ang, ka mut hma deuh hretin a nia."

Awih lemloh hmel tak hian Pu Hlua chu a han thaw deuh halh a, "Dar 12 dawn dawnah chuan naupang an chhuak lo tawp ang, a chhungte pawhin an remti nang." a han ti nuah nuah a. "Ni e, chuvang reng chuan alawm mak ka tih em em, enge awmzia ni ang le?" ka tih lai tak chuan ka phone a rawn ri a.

Sarah-i a lo ni, "Garage-ah i car ka hmu bawk sia, khawnge i kal kawi leh a?" tiin min rawn zawt a. "Pu Hlua te inah ka leng kawi zawk a, ka rawn haw dawn e." tiin ka chhang a. Nuih deuh huk pah chuan, "Thenawmpa Pu Hlua maw, ve teh mial che chuan. Enge i tih ve a, i inhmeh lo emai." tiin a nui deuh kur kur mai.

"Ka lenglut ve zuai mawle, ka lo haw vat ang." tiin phone chu ka dah a. "Pu Hlu, ka haw phawt ange..nidangah ka rawn leng leh dawnnia." tiin ka ding a, "Ni e, lo leng lut ve ziah rawh. Nakinah chaw te kan la eikhawm dawnnia, hawh teh..ka lo thlah ang che." tiin ani pawh chu a ding a, pawn thleng chuan min zui a.

"I thil sawi chu a mak ka ti khawp mai, i hmu sual lo a nih chuan ngaihven deuh angaiin ka hria." a han ti leh a. "Ni e, keipawh ka ngaih a tha lo khawp mai." tiin ka chhang a. "In tukverh vawmtu chu midang daih pawh an ni thei tho mai, nidangah kan sawi tha leh dawnnia." tiin min thlah a, keipawh chu ka haw ta a.

**************************

 Zanah pawh chuan a ngai te bawkin ka hna chu ka buaipui leh tan ta a, SArah-i erawh TV enin sitting roomah chuan a thu ngawi reng thung. Annie infiam ri chu a hriat theih bawk a, amah chauh pawh chuan a hlim hmel kher mai. "Tira mei kaiah, chhimtira mei kaiah, haha." tiin amah chuan room ah chuan a nui vak vak a, a hlim hmel lutuk chu ka nui khi suk ringawt.

Kan nu chuan min lo hmu aniang chu, "Enge i ngaihtuah a, mahni a i khik vur vur a?" tiin min rawn zawt a. "Annie infiam thawm chu mawle, mahniin a hlim tawk em em chu ania." tiin ka chhang a. "I lo haw hma atang tawh khan mawle, school a rawn ban veleh khan ti sawn amahin a infiam a, a tlei tawk khawp mai." tiin ani pawh chu a khi suk a.

Minute 5 vel chu inbe chhunzawm lovin kan han ngawi leh dun vang vang a, "Vawiin khan enge Pu Hlua te inah khan iva tih ve reng reng a?" tiin min rawn zawt deuh hlawl mai. "Aaa..englo, thenawmte hriat loh leh lutuk chu ka tia. Nidangah te pawh mamawhna hun te kan nei thei a, anni pawhin min mamawh ve thut thei bawk a. Inhriat loh leh lutuk chuan tanpuina indil te a hrehawm dawn sia, chuvang chuan ka lenglut ve mai mai mawle." tiin ka chhang a.

Awih vak loh hmel tak hian, "Anih chu...nizan i thil hmuh, naupang pali lo ding tlar i tih kha..khami kha i va hrilh te hi a nilo maw?" a han ti chu ka phu deuh zuk mai. Hrawk za miah silo chu ka aw ka han thian vel vak vak ringawt a, "Ni love...sawi love. Va mu tawh rawh, min lo nghak duh suh." ka ti bah deuh nuai.

Min chhang lem lo chuan a tho tual tual a, room ah chuan min luhsan ta a. Ka rilru ah chuan a hma zana naupang ka hmuhte bawk kha an awm leh reng tawh, a hrehawm hial tawh zawk. Engpawh chu nise, khang naupang te kha lo hmusual pawh ni ta ila, tu phiangsen chuan nge maw kan tukverh kha rawn vawm reng reng ni?

Hetianga mi in tukverh rawn vawm duh tu chu, helai hnaia an awm a nih chuan ava ngaihthat thlak dawn loh ve aw tiin ka inngaihtuah neuh neuh va, mahse chutiang ti duhtu tur awm ang, tlangval hawk lak leh sual em em an awm ka hre silova, nge ni a ka lo hre tlem viau zawk pawh ka hre love.

Ka chhungte erawh chu engmah ka hrilh hrih lo, an awih loh phei chuan ka fiamthu amaw an ti ang tih ka hlau hial zawk. Tin, Pu Hlua ka lo hrilh ve kher kher te kha ka inchhir leh ta rum rum mai, dawih min tih phah viau angem le, a awih angem le tih te thleng chuan ka inzawt deuh chhen mai. Chutia ka inngaihtuah neuh neuh chhung chuan ka hna khawih lai pawh chu ka zo ve der mai a, mutzai ka rel ve thei ta hram e.

************************

KA muhil lai chu engemaw ni thawm hian min ti harh a, a tir phei chuan ka mumang amaw ka la ti hial zawk. Meng mang hlei lo chuan ka inbeng tho va, thawm chu ka han ngaithla chiang a. Naupang au rual thawm ni tlat hian ka hria a, mahse ka bengchhe ri anih ka la ring fan thung. Mahse ka harh chiang tawlh tawlh a, naupang infiam thawm bawk a ni tih ka hriat fiah meuh chuan ka meng kawk mai.

Rang lutukin ka thu chhuak a, kan room tukverh zawnah chuan naupang inzui kual diah diah thla niawm tak chu ka hmu a, mak ka ti kher mai. Chu aia mak ka tih chu kan room light on ka tum, eng thei miah lo, mahse pawn light eng reng bawk si kha a ni. Current a awm lo ti dawn ila pawn light a eng bawk si, sana en lo mah ila khatih hunlai kha zinglam dar 2 vel a nih ka ring.

Chung naupang te chuan engemaw sawi rual an nei bawk, mak ka tih em avang chuan han chet chhuah mai nachang pawh ka hre lo hial zawk. Ring tak leh hlim hmel tak si hian, "Tira mei kaiah, chhimtira mei kaiah, haha. A hnuhnung kha seh rawh, tira mei kaiah, haha." tiin an chham rual thup thup mai.

"SArah..SArah...chu i hre ve em?" tiin kan nu chu ka be mawlh mawlh a, mahse min chhang thei thak lo. ZAwimuang chuan ka tho chhuak a, tukverh parda chu muang chang chuan ka hlim a. Ka thil hmuh chuan min ti hrilhhaiin ava han mak ngai em, ka hlau lo, mahse a mak ka ti ngawih ngawih a ni.

Kan kawt zawlah chuan naupang panga hi an kawr hnung theuhah lo inpawtin an lo inzui duah duah a, "Tira mei kaiah.." tiin an hlim hlawm hmel kher mai. Mak ka ti lutuk chu ka mumang anih ka ring hial zawk, ka han insik a, mahse ka mumang a ni der mai si lo. Naupang ho hmel chu ka han en diat diat a, mihring hmel pangngai vek chu an ni tho si.

Tukverh chu ka hawng a, "Hey..tute nge in nih? Enge hetah tun ang zanah in tih a?" tiin ka han vin hrep a, chutah an infiam lai chu an tawp chat mai. An vai chuan ka lam an rawn hawi a, min rawn melh thap mai. An zinga naupang pali te chu tute nge an nih a, tufa te nge an nih tih leh khawia naupang nge an nih tih ka hre hauh lova, ka la hmu ngai hlawm hek lo.

Mahse an zinga hmeichhe naupang pakhat erawh chu ka hre chiang ngang mai, ka fanu neihchhun, ka duat leh ka hmangaih em em Annie a ni tlat. Ka thinphu chu a rang nghal em em a, hlauhthawnna hlirin ka khat nghal. "Ann..Annie, enge i tih? Enge khatah khan i tih?" tiin ka au vak vak a.

Annie lah chuan min rawn nuih sen sen a, "Thainte u, khi khi apa a nih khi." tiin min la rawn kawk zui. "Annie, enge khatah khan i tih?" tia ka zawh lai chuan kan room light chu a rawn eng pup mai a, ka phu nasa kher mai. Kan khum awmna lam ka va hawi chu phawk hru leh hriatthiam loh hmel tak hian ka nupui chuan min lo en hu mai a, "Rina, ngati vak vak nge?" tiin min zawt a.

"Sarah..Annie.." ka sawi zawh hma hma chuan khuma lo mu mek, ka fanu Annie chu ka hmu thut mai a, ka tawng lai pawh ka tawp chat mai. "Annie chu tinge? Hei...a mut mek hi. Tinge i au chiam chiam a? Min ti harh vek alawm, tunge i hauh vak vak a?" tiin min zawt leh a. Pawn lam chu ka han en leh a, mahse khang naupangte kha hmuh tur an awm leh tawh hauh lo.

"Sarah...Sarah min ring rawh, pawnah sawn nichin lawk khan naupang pali leh Annie te an lo infiam a ni...ka ti tak tak." tiin tawng pawh ka tawng tha hleithei tawh lo. SArah-i chuan min en vung vung a, "Rina, i awmdan hian ka ngaih a ti tha hauh lo ania. Enge i sawi awmzia? Tu naupang maw i hmuh a?" tiin min zawt leh a.

Chhan mai dan tur pawh ka hre lo, "Kei hi...kei hi ka tho a tihna em ni?" tiin ka phun sap ringawt. "Awii, i tho a anih kha...zanlaia patling au vak vak te chu a, thenawmte pawh i ti hlauthawng anga sin. Enge i hmuh reng reng a? Naupang pali bawk kha em ni?" tiin min zawt leh a, ka lu ka bu nghat ringawt.

"I vei zui hle a nih dawn kha...tukverh kha khar rawh. Mu ang, i taksa chaklovin thil i hmusual reng mai, i mumang i mangphan a niang." tiin a mu leh daih mai. Ka rilru a nuam thei thlawt lo, Annie chu ka han en a, tui takin a mu hnar suk suk mai bawk si. MAhse ka fanu kha ka hmu chiang bawk si, khang naupangte zingah khan a tel ve ngei bawk.

Ka ngaihtuah let leh a, laptop-a hna ka thawh lai khan Annie kha amahin roomah a infiam kha  a ni a. Ka hrechhuak thut mai, khatah pawh khan 'Tira mei kaiah.' tiin a nui vak vak a, kha naupang ponto hla chiah chiah kha a ni nichin lawka ka hriat pawh kha. Enge awmzia ni ta ang? Ngaih chu a tha tawh lo takzet.

Ka muhil lawk thei tawh lo hrim hrim, ka rilruah chuan zawhna hlir hi a khat a. Tukverh ah chuan dakin pawn lam chu uluk leh zualin ka han thlek kual leh a, mahse mihring hmuh tur an awm lo. Annie chu zawh chian chak hle mah ila tun ang huna kaih thawh chi zia zang a ni tawh si lo. Mahse ka mumang ni ta se, engtin nge tukverh bulah ka din theih?

Engtin nge muhil siin ding chung leh meng reng chunga ka au vak vak theih? Tho a ti dawn ila, ka thawh at ngai ka hre bawk si lo. DArkar fe chu mu miah lo chuan khumah chuan ka thu reng a, ngaihtuahna a kal thui duh khawp mai. AWm nuam lo tak chung chuan ka mu ve leh a, zinglam dar 4 rik hma hret chuan ka muhil ve thei ta hram a.

*******************************

TO BE CONTINUE