WILD ZONE : SEASON 1 (Episode - 5) Written by : Aaron Malsawmdawngzuala BAD GIRLS - 5

 WILD ZONE : SEASON 1

(Episode - 5)

Written by : Aaron Malsawmdawngzuala

BAD GIRLS - 5

****************

Minute 10 vel a ral leh hnu chuan Nathana pawh a lo thleng ve ta a, "Sir, i lo thleng thei maw? Hei hi ania Pu Nunga chu..." tiin ka lo hmelhriat tir nghal a. Nathana chuan chibai pahin, "Chibai le, ka pu. Detective Nathan Malsawmkima ka nia, khawngaihin kha rukru i hmuhna ah chuan kan va kal dawn em ni?" tiin a zawt a.

"Tukin ami te kha in ni lo em ni? Tukinah ka hrilhfiah vek hlawm tawh kha, a ngai tho a mi ka sawi dawn?" Pu Nunga chuan a ti hu mai a. "Keini chu midang zawk kan nia, khawngaihin i thawm hriat ang ang te kha i sawi nawn leh thei angem?" tiin Nathana chuan a zawt leh a. "Awle..thei tehreng e...va kal ang hmiang." tiin a chhang a.

A nupui chuan a kai a, "Saw lai, vaimim hmun tawp lam ah sawn ania." tiin min lo hrilh ve bawk a. Kan kal zel a, "Helai ah hian a tia...helai thleng hi a kal thin hrim hrim a. A mit del mahse a bel tawh lutuk, zingtin a kal ziahna a nia." a nupui bawk chuan a han tih chhunzawm leh a.

Nathana chuan Pu Nunga chu a han en vang vang a, "Engtin nge helai takah hian a ni tih i hriat theih?" tiin a zawt leh a. In hma zawnah khan lawn chhohna tur step pakhat a awm em?" a han ti a, a awm ngei bawk. "Awm e." tiin Nathana chuan a chhang a. "Kha lai kha ka tiang hawl hian a tawh fuh veleh ka let leh thin, chu chu thudang nise step lehlam zawng saw chu kan ram a ni tawh lo bawk." tiin a chhang a.

"Tukinah pawh chuan i tiang hmawr chuan a tawk tihna em ni?"

"Aih tawk hman lo."

"Tawk hman lo a? Engtin nge helai a ni tih i hriat si?"

"A chhan chu a ran zuang thla thak ri ka ka hria a, chuvang ania ka biak nghal chiam chiam ni."

Nathana chuan a bul vel chu a han enkual a, a han let leh deuh va. Pen 10 vel a let phei hnuah chuana glove a bun sawk sawk a, engemawni hi a chhar a, kan bulah chuan a rawn tlan phei leh a. A thil ken chu a rawn lek kang a, vaimin hel eizawh loh hi a lo ni. "Pu Nung, engemawni a kaih ri hruap hruap i ti tiraw?" tiin Nathana chuan a han zawt leh a.

"Aw ni e, engemawni kha chu min kal pelh pah khan a keih ri hmawk alawm." tiin a lo chhang a. Nathana chu a nui suk a, "I sawi dik e, hei..vaimim eina hnu ka chhar a." a han tih chuan Pu Nunga chuan a lu  abu nghat nghat mai. NAthana chuan vaimin hmun opposite lam chu a en a, "HEta tang hian sawlai in bak saw chu in inhnaih tak a awm lova, saw in saw Rozami te in a nih chuan...Rozami a that zo chiah a, vaimin huan atang hian a let a ni." a han ti deuh charh charh a.

Pu Nunga chuan, "Mamawhna dang min la nei dawn em? Midang an lo kal leh dawn em?" tiin Nathana chu a han zawt a. "Ka hre lo ka pu..keini chu kan rawn kal leh maithei..chutih rual chuan police dang pawh an lo kal leh maithei bawk. Kan kal phawt ange aw...i chungah kan lawm lutuk ania." tiin a chhang a, Pu Nunga te chu kan chhuahsan leh ta a.

**************************

Motor-a kan tlan lai chuan, "Sir, enge nang i chanchin...thu lawmawm te a awm em?" tiin ka han zawt a. "Thu lawmawm tih ah...ka hre lo. Thlalak ho kha ka han en kual a, Irene-i hmel kha chiang deuh khan ka en a. Darkar chanve vel dawn lai kha ka han thlek kual a, kan bula ding te ah khan tuvak mah han hlauh em em tur pawh an lang chuang lo." tiin min chhang a.

"Kan bula awmte chu Pu Zonuna hmelhriat te an lo ni mial lo maw? I zawt em?"

"Zawt ve bawk e, a hmelhriatte chu an ni ngei bawk. Mahse a thian satliah te an nia, pakhat kha chu vai ala ni zui."

"I duh ang thalin i en zo hman lo tihna mi?"

"Aw..en zo chiah lo..endun ila a chiang deuh ang kha tia."

"Awle, khawnge kan en dawn?"

"Ka apartment ah let phawt mai ang."

Nathana apartment lamah chuan kan let leh ta a, tlai lam a ni der tawh mai. Inchhung chu kan lut a, "Maxie..Maxie?" tiin Nathana chuan a han au nghal vak vak a. Mahse MAxie chu hmuh tur a awm miah lo, room ah chuan Nathana chu a lut kual a. Choka lamah tui in turin ka phei a, fridge ah chuan lehkha hi a lo intar a.

Ka kal hnai a, thuziak a lo ni. "NATHAN MALSAWMKIM, RAWNG KA BAWL SA VEK A, CHAW HAN EI LO VAIH TEH, I CHAK LOVANG. FROM I NUPUI NI MAI TUR, MAXIE.." tih hi a lo inziak a, ka nui chhuak teuh kher mai. "Sir, helamah lo kal teh." tiin ka ko vak a. A rawn phei a, "Hei love letter." tiin ka nuih suk a.

A pawt thla rang kher mai, "Ava tul lo tak." tiin a khi ve deuh suk mai. "Dawhkanah hian a ni mai." tiin dawhkanah chuan laptop chu a dah a. Pendrive chu a han vit lut a, show neih zana thlalak ho chu kan enkual ta a. Nathana sawi ang ngei chuan kan bulah chuan mipa pahnih an lo ding ve a, pakhat chu vai ani a, pakhat erawh mizo a ang hle thung.

"Engtia in hmelhriat nge an nih i zawt tel em?" ka han ti leh a. "Pakhat hi mizo a nia, Ngaihawma a nia, vaipa hi chu Ganesh-a a niin ka hria.." tiin min chhang a. Chutah engemaw hriat chhuah ka nei zawk mai, "Sir..Ganesh-a...GAnesh.." ka han ti thut a. Nathana pawh chuan min rawn en a, "Ganesh...SArah-i bialpa hlui...drug dealer..GAnesh?" a rawn ti ve leh.

Kan ngaihtuah a in ang chiah, "Aww...kha Ganesh-a kha a ni lo maw?" ka ha ti leh a. Nathana chu a ding thut a, "Sarah-i'n dawt min hrilh leh tawh." tiin a thinrim hmel kher mai. Amah bawk chuan, "Ka bialpa hlui a ti a, a awmna pawh ka hre tawh lo a ti bawk a. MAhse dawt a sawi a ni, an la inbe reng tihna a ni." a han ti leh a.

"Anih Ganesh-a hi i ringhlel tihna ami?" tiin ka han zawt a. "Ka hre lo..mahse engemaw tak chu a awm. Engvangin nge Sarah-i hian dawt min hrilh zel nachhan hi ka hrethiam lo, inrawlhna a nei ve a nih ka ring tlat." a han ti leh a. "A la hmangaih reng anga, a hum a ni lo maw?" ka lo ti ve a.

"Engpawh nise, Pu Zonuna Office ah kan let leh angai." a ti deuh thut mai. "Sarah-i chu kan va be dawn em ni?" tiin ka lo zawt vat a. "Aw...chumai nilovin Ganesh-a pawh chu kan hmuh angai. Thil a ti sual emaw ti sual lo emaw, drug dealer a ni hrim hrim a, man a ngai hrim hrim." tiin a la nui huk zui.

************************

Pu Zonuna Office chu kan thleng a, Sarah-i kan hmuh duh thu chu kan sawi a. "Sarah-i chu hetah a awm hrih lo, show engmah kan neih dawn rih loh avangin kan model ho hi an awm awl rih a." tiin Pu Zonuna chuan min lo chhang a. "Anih leh Sarah-i address min pe thei angem?" tiin Nathana chuan a han zawt leh a.

"Pe thei lutuk e.." tiin paper ah chuan address chu a ziak thla mawlh mawlh a. Chutih lai chuan Jenny a rawn lut a, "Va kal duh suh u, a awm lovang." a rawn ti thut mai. Jenny chu kan en thup a, "Enge awmzia? Anih khawiah nge a awm ang?" tiin Nathana chuan a zawt nghal a. "GAnesh-a inluah ah a awm daih tawh, a awmna a rei tawh." a ti leh a.

Nathana nen chuan kan in enhu mai, "Jenny, Ganesh-a in awmna chu i hria em?" tiin ka lo zawt ve a. "Aw hria e...Zemabawk lamah ania...mi inhnuai luah ve tho ania." tiin min chhang leh a. "Anih kut a thlak thin tih hi a dik em?" tiin ka zawt leh a. Jenny chu a thaw deuh hak a, "Dik e, vawi tam then turin kan hrilh tawh a, mahse a thei hlawl lo chu a nih hi." tiin min chhang leh a.

Nathana chu Jenny bulah chuan ava kal hnai a, "Anih drug dealer a ni em?" tiin a zawt a. Mahse Jenny chuan, "Drug dealer a nih leh nih loh chu ka hre miah lo, mahse misual tak leh mizo nula kawp kual ching a ni tih chu ka hria. Sarah-i pawh hi a kawp nasa thin, mahse dealer a nih leh nih loh chu ka hre miah lo." tiin a lo chhang a.

"Anih leh Ganesh-a nen chuan in inhre ve em?"

"Hria e, min ngei thei lutuk. Show zanah pawh khan Sarah-i hmai kha a duk chur a, Ganesh-a kutthlakna a nih thu a sawi a. Make-up pawh a thup nan kan hman hnem phah lutuk, Director hriat hi a hlau ber a."

"Anih chuan Ganesh-a address chu min han hrilh teh."

Paper ah chuan Ganesh-a address chu Jenny chuan a ziak thla nghal a, Pu Zonuna chu a rilru a hah hmel kher mai. A lu dawm vawng vawng pah chuan, "Ka sumdawnna ah hian enge maw ka tih sual le..tinge tiang hi ka chungah a thlen bik?" tiin a lo phun nuah nuah mai a, a khawngaihthlak reuh kher mai.

*********************

GAnesh-a in kan va thlen meuh chuan khua a thim vek tawh a, zep lo chuan ril a tam ru angreng khawp mai. Kawngka chu Nathana chuan a han kik karh karh a, mahse a reh hmak mai. Vawi thum vel kan kik hnu pawh a an lo la hawn loh avang chuan kan lut ta ringawt a, khum bul kan va en chu Sarah-i chu a lo let reng mai a.

Rang takin kan va tlan phei a, "Sarah..Sarah..ka tawng i hre thei em?" tiin ka be mawlh mawlh a. Nathana chuan a mar a han dek a, "Ala dam...Hospitalah kal pui vat angai." tiin a pawm tho lawp a, rang takin in chu kan chhuah san nghal bawk. Motor ah chuan kan dah lut a, hospital lam chu kan pan pui nghal.

Reiloteah chuan kan thleng a, emergency roomah nawr luh nghal niin pawmah chuan Nathana nen chuan kan nghak a. Nathana chu a tei kual reng a, "Bella, ti hian ti teh. In Station lab ah va kal la, vaimin eihnu kha...finger print lo va check tir ta che." a ti a. "Awle Sir." tiin ka chhuak nghal a. 

Nathana car chu khalhin Lab ah chuan ka tlang nghal a, Dr. Zuala pawh a lo awm hlauh mai. Thil awmzia te hrilhin vaimin chu ka pe a, "Pawnah min lo nghak lawk dawnnia." a tih avang chuan pawnah chuan ka nghak a. Minute 10 vel hnuah chuan a rawn chhuak leh a, "Enge chanchin?" ka lo ti vat.

Zuala chu a ner deuh nung a, "Glove a vuah a ni ngei ang, rukru hian...finger print themte pawh a awm lo." tiin min chhang ta mai a. "Awle..a pawi loh chu." ka ti zawi sap mai, rilru ava hah duh tak em. Hospital lam pan chuan let leh ka tum a, ka tlan lai tak chuan kawngsira mi pahnih lo ding te chuan ka mit an la tlat mai.

Ka va tlan pel dawn chuan a aia chiang deuh chuan ka va en a, ka rin ang ngeiin kha vaipa Ganesh-a leh a thianpa, Ngaihawma te kha an lo ni. An bulah chuan bike a awm bawk a, rang takin ka phone ka phawrh nghal. Nathana chu ka call a, mahse a la theih hauh lo lehnghal. Chutah chak em em hian min rawn tlan pel fua a, phone chu dah in ka zui tawp.

An tlan chak em avang chuan ka han tlan chak ve leh deuh va, mahse min ringhlel ang tih ka hlau bawk si. An mahni hmu phak deuh chiah chiah zel chuan ka tlan a, Nathana lah chuan phone a la thei der lo mai. Sana ka en a, zan dar 7 a ri mai dawn. Ril a tam tawh nen, ka mihring hmuhte hi chhuah mai chi an ni bawk si lo.

Tichuan ka zui zel ta ringawt a, kawng kawi lai takah chuan an kawi thut mai. Kawi ve ta mai lo chuan a bulah chuan motor chu ka tiding a, ka chhuak nghal a. Ka pistol chu phawrhin kawng kawi lam chu ka pan ve a, building hlui chhe ve tawh tak, thim ruih mai bulah chuan an bike chu ka hmu ta.

Fimkhur tak chuan ka pan hnai a, mahse bike ah chuan tumah chuang an awm lo tih a chiang reng. Building chhungah chuan ka lut leh a, mahse a thim lutuk chu engmah ka hmu thei lo. Torch on tumin ka phone chu ka dap a, chutih lai tak chuan ka hnunglam atang chuan tu emaw hian min rawn rek thut mai.

Chuveleh ka hma zawn atang chuan light a rawn eng a, torch light keng chungin GAnesh-a chuan min rawn pan a. Rum zeta min melh pah chuan, "Tunge i nih? Engvangin nge min zui ruk?" tiin min rawn zawt a. Min rek bettu chu a chak ngang a niang, ka che thei der lo. "Tu..tute nge in nih zawk?" ka ti tawk tawk a.

Thinrim hmel tak hian GAnesh-a chuan, "Detective kha i ni tiraw? NGaithla rawh....tumah kan that lo, i hria maw? Min lo ringhlel tel ve tawh suh ang che u....tumah kan that lo." tih pah chuan ka dulah chuan min hnek siah mai a, hmeichhia chu a dim lo ve khawp mai. Ka thingthi hnawk a, ka pistol chu min laksakin motor ah lutin min tlansak daih mai.

Ka thaw deuh tawk tawk hial, ana lutuk ringawt. Ka phone a rawn ri a, NAthana a lo ni. "Helo..Sir.." ka ti thei tawk. "Bella, i miss call ka lo hmu a..enge chanchin?" a rawn ti a. "Glove....Glove...glove a bun, misual khan..fingerprint a awm lo." ka ti tawk tawk a, ka tawng tha hleithei lo.

"Bella, tinge khatia i awm a? Buaina i tawk em ni?" mangan hmel tak chuan min rawn zawt a. "Aw..Sir, nakinah ka rawn phone ang che." tiin ka dah tawp. Thawk ka han la te te a, ka pum chu ana takzet. Minute 1 vel ka han mu zal ta law law a, tichuan a na a reh ve deuh hnu chuan ka tho vat a, hospital lam chu ka pan ve leh ta a.

***********************

Ka va thlen chuan NAthana leh doctor chu an lo inbe mek a, ka va kal hnai vat a. Ka va thlen chiah chuan doctor chu a lo kal sawn hman chiah a. Min hmuh veleh chuan, "I van rei em em ve...buaina i tawk a mi?" tiin min lo zawt nghal. "Aw..Sir, Ganesh-a leh Ngaihawma ka hmu." tiin ka chhang a.

A meng kawk mai, "Enga? Ganesh-a te i hmu maw? Khawiah nge an awm?" tiin min zawt nghal a. "Ka man hman lo, ka pistol an la daih. Min khawih nual a, chuvang ania ka rawn rei chhan. Ka zui ru a, bike-ah an inphur a." tiin ka chhang leh a. "Khawi lam nge an pan pawh i hmu hman lo tihna em ni?" tiin min zawt leh a.

"Aih hmu hman lo, min hnek na lutuk a."

"I na viau em?"

"Tunah chuan ka zia tawh."

"Ngati nge min rawn call mai lohva?"

"I la thei lo alawm, Sir."

A lu a dawm vawng vawng a, "Ka tihpalh lutuk, Bella." tiin ngaihdam min dil a. "A pawilo, ka man hman lova, ka tihpalh zawk." ka lo ti vat a. "Anih leh i bulah sawi an nei em?" tiin min zawt leh a. "Aw nei e...tual kan that lo, tumah kan that lo tiin min hrilh a, an kal leh daih." tiin ka chhang leh a.

"Kan hmu em em ang, kan man leh em em ang, i tha tak tak maw?" tiin min han zawt nawn leh a. "Aw ka tha alawm, Sir. Taka..Sarah-i chu enge a an?" tiin ka zawt let ve a. "Poison tho kha a lo ei ve a, Kevina ten Ganesh-a inchhung kha an check nghal a. Number 4 drugs an lo ti dun a ni ngei ang, an man teuh mai. Mahse poison tak chu vaimim atang zawkin ania, vaimim chhungah khan poison kha kah luh a ni tihna a nih chu." tiin min chhang a.

Mak ka ti angreng kher mai, "Vaimim ah daih maw?" ka ti hu a. "Aw ni e, drugs kha chu an ti ngei a. MAhse vaimim eiban, ei zawh loh a lo awm a. Sarah-i ei lai ngei niin kan hre bawk, mahse tuna mi chu a hel nilovin rawh hmin thlap a ni thung." tiin min chhang leh a. "Anih chuan Nunui te, MAzuali te thattu chu Ganesh-a hi a ni tih a chiang tawh mai alawm." ka lo ti a.

Mahse Nathana chuan a lu a thing a, "A nilo thei bawk." a ti ta daih mai. "Enge a nih lohna? A chiang vek tawh alawm, Ngaihawma leh GAnesh-a thil tih a ni chiang lutuk...midang tumah an ni thei lo." ka han ti deuh hlur a. "Nilove Bella, i thil sawi chu a ni thei tho va, mahse Ganesh-a hian engvangin nge a bialnu SArah-i kher hi a hrai ve ang? Chubakah tumah tual kan that lo a tih ngawt nachhan tur a awm lo, i bulah leh nghal." tiin min chhang a.

"A thil tihsual thup nan te pawh a ni thei asin."

"Engemaw thil dang ala awm tlat a ni, Bella...Irene-i ber hi kan hmuh angai a ni. Kan case hi a in pakai chho nasa tawh lutuk, Irene-i ber pawh kan theihnghilh mai dawn lawm mawle." a ti nuah nuah a, chutih lai chuan KEvin-a leh a assistant chu an lo kal a. "Pu Nathan, show neih ni khan, zing dar 11 velah Nunui kha SAilo REsort lam a pan lai an hmuh thu an sawi a, Station atanga kilometre 11 vel tlan a ni." a rawn ti a.

Nathana chuan min en a, "Anih chuan chulai hmunah chuan engemaw chu a awm ngei ang, Sailo REsort chu hman kum khan an ti tawp tawh in ka hre sia." a ti leh nuah nuah a. "Khar tawh e, Sir...an tih tawpna a rei tawh. Lodge hlui vel erawh a awm maithei, ka hre lo le." tiin ka chhang a.

"A hmunah chuan ka naute ka tir mek a, an kal mek e." Kevina chuan a lo ti veleh a. Chutah doctor chu a lo kal a, NAthana tawng hma hma chuan Kevina bawk chuan, "Pu NAthan, heta tang hi chuan ka lo buaipui tawh ang." a ti leh zuah zuah mai. Nathana chu a thaw hak a, "A tha alawm, security tight thei ang berin siam ula. Sarah-i hi venhim a ngai ania, tualthattu hian ala dam tih a hriat chuan a rawn ru chhuak duh maithei a ni." a han ti a.

Sarah-i ward atang chuan nurse pakhat hi a lo chhuak a, "Sarah-i a biak theih tawh e." a rawn ti a. Kevina chu tawng a tum hman uk a, ka lo tawng khalh vat a. "Kevin, engmah i sawi hmain..SArah-i hi minute 5 chiah kan hmu lawk ang, chumi hnuah kan haw ang." ka han ti a. Nathana pawn min nuih suk ringawt, kan lut ta a.

SArah-i chu a mit a lo bui luk mai a, abulah chuan kan va thu a. "Sarah, i tha maw?" tiin Nathana chuan a han zawt a. Sarah-i chu a hawi kual a, "Damdawiinah em ni ka awm?" a ti hu mai. "Aw...Ganesh-a in atangin kan la chhuak che." tiin Nathana chuan a chhang leh a. "SArah, tinge dawt min hrilh?" tiin ka han zawt ve a.

"Eng dawt maw?" a la ti ta deuh deuh va. Nathana chu lo inrawlh vatin, "GAnesh-a nen kan inthen tawh i ti a, mahse in la inthen lo. Chuan i la hmu fo, kan lak atanga humhim i tum a ni tiraw?" tiin a han zawt a. "KA hmangaih a, eng ang pawhin kut min thlak nasa mahse, min ti thinrim viau thin mahse ngaihdam min dil hi chuan ka nem leh vek thin a ni." a ti zawi sap a.

"GAnesh-a hian a hmangaih ve lo che....turin a hrai che a ni." Nathana'n a han ti chiah chu Sarah-i chu a meng phawk hru mai. "Enga..Ganesh-a'n min thah a tum maw?" a ti hu mai a. "Aw...i vaimim eiturah khan poison a telh a ni." tiin a hrilh leh a. Sarah-i chu a tap zawih zawih mai, "Bazara ka rawn lei..ka rawn hawn che a tia...engtin nge a tih theih zawk?" tiin a mittui a tla teuh mai a.

"SArah, khawnge Ganesh-a a awm?" tiin NAthana chuan a zawt leh a. "Ka hrelo." a ti daih mai. "SArah, i nunna pawh ngatan mah a ti lova, hrai hlum che a tum ania. Tinge ila tan tlat a? Sawi rawh...khawnge a awm?" tiin ka vin deuh hlur a. "Ka hre lo tak tak, ka tan lam a nilo. Amah khan min chhuahsan daih alawm, a bak engmah ka hre lo." tiin min chhang a.

"Anih leh a kalna tur a sawi em?" Nathana chuan a han zawt veleh a. "Aih sawi lo, ka zawh pawhin min chhang duh lo. Kan mudun a, drug kan ti dun a, nuam kan ti dun lutuk. Mahse a hnu khan min rek deuh thut a, a fiamthu amaw tiin ka la nui mai mai a. Chutah thinrim deuh hian nangmahni, detective te bulah hian min hek tiraw tih velin min vau thut a. Ka insawifiah fe hnuah min thlah chauh va, tichuan vaimim hi ka rawn lei che atia, ka lo haw hma chu lo chhuak suh tiin min kalsan a ni." tiin a chhang leh a.

"Anih leh khawiah nge a awm i rin?"

"Ka hre mai lo....e taka, damdawi an tawlh leh tawh a ni maithei."

"An tawlh thinna hmun i hria em?"

"Aw hria e..vawikhat chu min hruai ve tawh alawm. Kolkata atang khan Mizoramah a insawn a, a dik tak chuan kei leh Irene-i kha ama pawisa hmang vekin alawm Mizoramah kan rawn haw..kan pathumin kan rawn haw rual."

"Ngati nge dawt min hrilh kher nachhan? A tir khan thudik sawi vek la chu tiang em em hi kan thleng lo tur." tiin Nathana chuan a hau hrep mai. "Ka tihpalh, ka hmangaih em vang a ni." tiin Sarah-i chu a inthiamloh hmel kher mai. "Anih leh drugs an tawlhna hmun chu sawi la, i chungah engmah a thleng lovang." tiin Nathana chuan a hrilh leh a.

Address chu min hrilh a, tichuan ward atang chuan kan chhuak a. Kevin-a bulah chuan NAthana chuan Ganesh-a te drugs tawlh chungchang vel chu a hrilh a, "Anih chuan unit 2 vel chuan kan raid a ngai dawn nih chu." a han ti a. Chutih lai chuan a phone a rawn ri a, "Hello..tumah an awm lo maw? Awle...awle." tiin a phone chu a dah leh a.

"Engthil nge?" tiin NAthana chuan a lo zawt vat a. "Ka naute an nia, road block a inti a, abak a luh phei theih tawh loh an ti a nih chu." tiin Kevina chuan a chhang a. "Anih chu mawle...engpawh nise...GAnesh-a chu kan man phawt angai. Tunah i che chhuak ang u...vatin..." tiin NAthana chu a chhuak a, ka zui chhuak ve nghal bawk.

****************************

GAnesh-a te drugs tawlh rukna factory chu kan va thleng a, a la pilril em em zui. KAwngka bulah chuan guard pahnih hi an lo awm a, an kawnghrenah chuan pistol an pai bawk. Kevina chuan inla pro tawk hian, "Ka va kal hmasa ber ang, silaia kan kap a nih chuan midangin an hre dawn. Pu Nathan, ka signal lo chang ang che." a han ti vel su su a.

NAthana chuan a eiloh hmel kher mai, Kevina chu inla zei fahran chuan a sir atang chuan a han bawkvak kual vel a. Nathana chuan a pistol chu a phawrh a, silencer a vuah te te a. A awmna hla ve angreng tak atang chuan huard ho chu a tin vang vang a, an pahnih chuan awlsam zet hian a kap hlum der mai.

Silencer a vuah bawk a, silai puak ri pawh zawi tak a ni. Kevina chu a hawi hu ringawt a, ka nuih aza kher mai, ka insum hman lo teuh lutuk ringawt. Nathana chuan va lehpelh pah hian, "Tikhan a awlsam zawk ang." a ti deuh kher a, Kevina chuan a melhrum nasa. Factory chhungah chuan fimkhur tak chuan kan lut a, an lo bengchheng kher mai.

An drugs tawlh ruk chu an lo pack sap sap hlawm a, chutah chuan Ganesh-a chu a thu neitu ber tih hriat tak hian midang ho chu a lo tir kual zat zat hlawm a. Kevina bawk chu va kal a tum leh a, NAthana chuan a lo dang vat. "La kal suh, hmanrua an keng vek dawn tih a hriat reng." tiin a hau va.

Mahse Kevina chu a kal lui a, pipe bung pakhat a chhuih ri palh ta. Ka lu ka dawm tawp, "Sawi mawlh mawlh pawn." tih pah chuan ka pistol chu ka load nghal. Ganesh-a leh a naute pawh an rawn hawi a, Nathana sawi ang ngeiin pistol an lo pai vek bawk. "Police..police...kap ru...kap hlum vek ru." tiin Ganesh-a chu a au ta tuar tuar mai a.

Inkahna a thleng ta chiam mai le, silaimu chu a thlawk fua fuah hlawm a. Kan zinga mi pawh pathum lai chu an kap hlum hman, mahse kan lamah Nathan Malsawmkima a tel miau va, reilote chhungin Nathana zarah Ganesh-a tih loh chu kan kap hlum ta vek a. Ganesh-a erawh Kevin-an a ke ah a han kah hram kha, chupawh NAthana'n a man tawh hnuah lehnghal.

******************************

GAnesh-a chu Stationah chuan kan hruai a, mahse rin ang ngeiin a dawp erawh kan dawp ve thei lo, Kevina a inla thu lutuk tlat. Darkar fe a dawp hnu chuan a rawn chhuak a, "Enge a sawi?" tiin NAthana chuan a lo zawt vat. "Vaimim chungchang engmah ka hre lo...bazar a mi ka lei tak tak a ti." tih ringawt chuan a chhang a.

"Chumi nilo...drugs chungchang kha...hmun dangah tawlh rukna te an nei em..agency lamte?" tiin Nathana chuan a zawt leh a. "Kan main ber chu Kolkata atangin a tia, hetah...Mizoramah agency pakhat din an tum leh mek thu a sawi." tiin a chhang leh a. "Anih leh vaimim a leina hmun a sawi em?" tiin Nathana chuan a zawt leh a.

"Aw..bazarah a ti ringawt a." Kevina chuan a ti bung leh nghut ringawt a. "A hmun tak i zawt lovem ni?" tiin Nathana chu a vin hlur tawh. Kevina chu a nui suk a, "Chutiang a pawimawh rih lo, poison hi khawi atangin nge a lo chhuah hriat phawt angai." a lo ti leh daih mai. "Poison lo chhuahna chu kan hriat nan chuan vaimim zuartu kha kan hriat angai...mawla." tih pah chuan Nathana chu a chhuak daih a, ka va zui ve nghal.

Pawnah chuan kan chhuak a, NAthana chu a thinrim hmel kher mai. "Khawia mi nge saw police saw? Ava mawl ve...lak tlak loh lutuk." a ti bul bul a. "Ka hre lo, an lakna ala rei lovang." tiin ka chhang a. Nathana chu a ngawi vang vang a, "Umm...va haw la, lo va hahchawl rawh...naktuk zingah kan inhmu dawnnia, i ril te pawh a tam tawh ang." a han ti a.

"Umm..nangpawh chaw ei ngei ngei ang che aw."

"Awle..ka va thlah ang che."

"A ngai lo, Sir. Taxi in ka kal mai ang."

"Anih leh le.." tiin a nui sak a. TAxi chu ka chang a, reiloteah chuan a rawn thleng a. Ka luh hma chuan, "I nupui turin chaw ei ngei ngei rawh a tih kha aw.." tiin ka han nuih a. Ani pawh chu a lo khi suk mai, tichuan inah chuan haw in ka inbual fai a, chaw te chu ka ei ve ta a. Zanah pawh chuan miut a har duh ngei mai, rilruah kan case bak a leng mawlh lo.

****************************

Ka taksa a chau ngang aniang, ka phone ri pawh chu ka manghriat ruai mai. Ka han en chu zing dar 9 a lo pel tawh a, min rawn call tu chu Nathana a lo ni. "Hello, Sir." ka han ti a. "Good Morning, i va chau awm ve...i tho ve chiah animaw?" a rawn ti a. A inthlahrunawm duh kher mai, "Nia..ka lo hre miah lova." tiin ka chhang a.

"Englo ania, bad news a awm a." a rawn ti chu ka thin a phu nghal dup dup mai. "Eng bad news nge ni, Sir?" tiin ka zawt nghal vat a. "Ka partment ah lo phei la, ka hrilh dawn che nia." tiin min chhang leh a. "AWle, Sir." tiin phone chu ka dah a. Ka inphih harh vat a, chaw pawh ka ei thuak thuak ringawt.

Puar zan lo chung chuan ka inkhalh chhuak a, Nathana apartment lam chu ka pan nghal a. REiloteah chuan ka thleng a, "I lo va thleng hma leh si ve, chaw te i ei hman meuh maw?" tiin min lo zawt a. "Ei hman e, enge bad news chu ni a?" tiin ka zawt let nghal. "Ka hlauh ang ngei ngeiin thil a thleng." tiin min chhang leh a.

"Eng thil nge ni a?"

"Hospital atangin SArah-i a bo."

Mak ka ti lutuk chuan, "Enga?" ka ti deuh vak mai. "Aw ni e, nizan kan haw hnu khan ruk bo a ni." tiin min chhang leh a. "Security a tight tha viau sia?" ka han ti leh a. "Chutak chu alawm, Kevina lah chuan security guard a puh char char lehnghal." tiin min chhang leh a. "Avan buaithlak tak." tiin ka phun nuah nuah a, ka down vek thei.

NAthana chuan kawngka lam chu ava en a, "Saw saw...mihring a ni em?" tiin a kawk a, ka va hawi phei ve a. Mihring niawm tak hian kawngka chhete inhawng sa atang chuan min lo bih reng a. "Anih saw.." tih pah chuan ka tho vat a, NAthana pawh chu a tho ve nghal. Mihring chu a ni ngei e, kan thawh veleh chuan a kal zuk mai.

RAng takin kan tlan chhuak ve nghal a, "Hey..tunge i nih ding rawh." tiin Nathana chuan a vin vak a. A tlan chhe ta mai a, a rawn hawi zeuh zeuh va. A hmai a tuam a, hoodie dum a ha bawk. Face mask dum a vuah avangin a hmel erawh kan hmu thei lo, stepah chuan a tlan thla a, kan umzui zel a.

Pawn thleng chuan kan umchhuak a, ala tlan chak em em lehnghal. Nathana lah tlan chak bawk, ka umpha dun meuh lo chu a ni e. Thui ve chu kan inum kual a, chutah tuikhur panna lam step ah chuan a chhuk daih mai, NAthana nen chuan step lam chu kan pan ve nghal a. Kan zu thleng thla a, kawng peng kan va thleng leh chiah chu kan ding chat mai.

Tu emawni hi lu thi phung hian a lo let reng mai a, leiah chuan thisen a kai nuai bawk. "Ehe..thianpa..thianpa." tiin NAthana chuan a pan phei nghal a, a hmel kan han en chu kha reporter Hlua kha a lo ni reng mai. A tarmit pawh a lo keh vek a, "Hlua..nangmaw?" Nathana chuan a ti hu mai.

Hlua chu a rawn harh a, "Ana lutuk..khawnge..khawnge a awm? Khapa kha..min vawthlu ringawt." a ti nuah nuah a. "Khawi lamah nge a tlan?" ka lo ti nghal. Hlua chu a hawi kual a, khawilam berah nge a tlan pawh ka hmu hman lo, hmanhmawh deuh khan a rawn tlan thla a, min rawn vaw ringawt alawm." tiin min chhang a.

"Tlak lamah a tlan thla daih tawh ang, kan pahnih chauh chuan umzui chi a ni lo, Bella." Nathana chuan a lo ti a. "A hrim hrimin tunge ni ang le?" ka han ti ve leh a. "Tualthattu tho kha a niang, he tualthattu hian min hrechiang hle a ni." tiin Nathana chuan min chhang a. "Khawge i kal reng reng a, Hlua?" tiin Nathana bawk chuan a zawt leh a.

"Tlak lamah khuan uan nei thar an awm a, chu chu report kan pe a...ka rawn haw chho mek mawle." tiin Hlua chuan a chhang a. Nathana chu a han ngawi vang vang a, "Bella, Hlua hi hospitalah hruai la, khulam veng ho ka zu zawt ange...chuan ka apartment kha lo kalh la, chahbi pawh lo kawl mai rawh..nakinah Maxie ka va dil mai ang." a ti a.

Tichuan Hlua chu ka hruai chho va, NAthana erawh veng mawng ho zawhna zawt fiah tur leh kha misual hnu chhui tur chuan a chhuk ta thung a. Damdawiinah chuan Hlua chu ka hruai a, Kevina te pawh an lo awm leh ngei bawk. Mahse a biak pawh ka be peih lo, Hlua lu pawp an thui lai chuan pawnah ka lo awm a, Nathana min rawn call hun chu ka nghak leh ngat ngat a.

****************************

TO BE CONTINUE