TIRA MEI KAIAH (MIZO FICTION CULT HORROR STORY) Written by : Aaron Malsawmdawngzuala Chapter -3

 TIRA MEI KAIAH

(MIZO FICTION CULT HORROR STORY)

Written by : Aaron Malsawmdawngzuala

Chapter -3

****************

Ka fanu Annie awmna ward ka va thleng chu an lo buai hmel hlawm kher mai, doctor leh nurse te chu an lo tei kual vut vut a. Sarah-i pawh a lo mangan hmel kher mai, min hmu veleh chuan rum zet hian min en a. Vin zet hian, "Khawnge i lo kal hman daih a? I fanu hi i ngaihtuah ve lo em ni?" tiin min hau hrep mai.

Ka hrethiam lo takzet, "Enge thleng a?" tia Annie ka va en chu nurse leh doctor te chuan an lo man bet a, kawchhunga ramhuai lut buaipui an ang ber. Ka fanu chu a tal nasa mai a, a eu vak vak bawk. "Ngati nge? Ngatinge tiang sawn a awm?" tiin ka zawt a. "Ka hre biklo, a rawn khuh vak vak a, tisawn a rawn awm ringawt." tiin Sarah-i chuan min chhang a.

A nasa telh telh mai, an vuan nghet zo tha thum lo a ni ber. Luh ve ka tum a, mahse nurse pakhat chuan a phal tlat lo, "Pawnah lo awm rawh u...lo luh kan phal hrih lo." a ti tlat mai. SArah-i chu a tap nasa tawh mai a, "Nilo Lalpa, tinge ka fanu hi hetia a awm?" tiin a hmai a hup a, a tap hawm hawm mai.

Tih ngaihna ka hre lo, en pawh ka en thei tawh lo. Lehlam ka hawi ringawt a, ka hlauthawng takzet a ni. Chutah nichin lawka kha tlangval thusawi kha ka hre chhuak zawk mai, "Annie hi i fanu a ni lo, ramhuai fanu a ni." tia hmuhsit hmel taka min nuih sawh kha, kha khan engemaw awmzia a neih ka ring tlat.

Chubakah ka hmelhriat pawh ni lo, vawikhat mah ka la hmuh ngai lohvin ka fanu hming a hre chat thei kha a mak ka ti takzet. Sarah-i tap lai mek chu ka va kuah a, "Bawihtei nu, insum hram hram rawh." tiin ka hnem a, han hnem dan vak pawh ka hre bik chuang lo. Annie na tuar tal vel leh kawchhunga ramhuai lut ang maia a eu ngawng nawng te chu Sarah-i hmuh ka phal tawh lo, a mit ka hup sak a.

"En tawh suh, duhtak..en tawh suh." tiin ka kuah bet tlat a, a tap hawm hawm mai. Annie chu ka va en leh a, a kawr te chu a lo pawtthler hial a, mahni fanu mah nise ka rap lek lek hial mai. A dul te, a ban te leh a nghawng te chu a duk thluah a, thisen zam niawm tak hi a rang ruai bawk. "I fanu a nilo, ramhuai fa a nih kha." tia kha tlangval sawi kha ka bengah a rawn ri nawn leh a, zep lo chuan ka thauvah min man.

Chutah Annie chuan ka lam a rawn hawi a, zau tak leh chiang em em mai hian min rawn melh kur mai. Ka phu deuh zuk nghe nghe, a mit te chu a en hian a eng(yellow) vek mai a. Rum zet hian min melh a, a nui deuh hialin ka hria. Chutah chiang fek fawk hian, "I fanu ka nilo, nang hi ka pa i ni lo." a rawn ti ta mai a nih chu.

Mak ka ti lutuk chu tawng chhuah ngaihna pawh ka hre lo, mit khap miah lo chuan ka en a, ka ding ngawi reng ringawt. Chu mai ala nilo, a bulah khan doctor leh nurse te an awm vek a, mahse a tawng ri kha hre ve awm ang pawhin an lang lo, an buai buai chuan an buai em em ringawt.

Ka thlan fim a tla nghal zawih zawih a, dik taka sawi chuan ka hlau a ni. Pa huaisen tak ka nih loh chu thuhran nise, khatia keima fanu ngei ina i fanu ka nilo tia mitmeng eng sen rum a min melh a, min tawngkhum kha chu midang pawhin an rap ve thovin ka ring. A hmel te chu a dang vek tawhin ka hria, ka fanu Annie kha niin ka hre tawh mawlh lo.

A tawng ri lah kha a ring em em mai bawk a, Annie aw(voice) chu a ni lo tih ka chiang. Nutling 10 vel a ruala tawng ang mai khan ka hria, rapthlak tak a ni. MAhse ka nupui, ka kuah mek Sarah-i pawh chuan a hre ve lo a ni ngei ang. Min la kuah reng a, hre ve chu nise a rawn hawi chhuak rang viau in ka ring.

Doctor chuan ring tak hian, "Parda saw va zar rawh, anu leh pate sawn an hmuh ve reng chuan a tha lovang." tiin nurse pakhat chu a tir a, nurse chu lo kalin parda chu a rawn zar a. A zar phui hma chiah, Annie lu chiah a lan thleng khan ka en a, Annie khan hmuhsit hmel tak hian min rawn nuih tih ka hmu chiang lutuk tlat.

Parda chu an zar phui a, engmah kan hmu ve thei tawh lo. Thuthleng ah chuan Sarah-i chu ka thut pui a, a la tap nasa mai. Kei erawh tah chu sawi loh, mak tihna hlira ka khah vang nge ni, ka a zo vek tawh in ka hria. Ka mumang ni tal se ka va han ti tak, mahse thil thleng mek hi a tak ngei a ni bawk si.

SArah-i chu a rawn hawi chhuak a, "Duhtak, tinge kan fanu hi hetia a awm? Keichu ka hlauthawng emai, kan fanu neihchhun hi kan chan mai ang tih ka hlau a ni." tiin a inhnit feih feih a. "Beidawng suh, Pathian kan lamah a tang dawn alawm. Min chhanhim sak em em ang, lungngai suh." tiin beidawng rilru tak si chuan ka hnem hram hram a.

*****************

Minute 20 vel a liam leh hnu chuan doctor chu a rawn chhuak a, "Doctor, kan fanu chu enge a an?" tiin SArah-i chuan a lo zawt vat. "Tunah chuan a zia tawh e, engpawh chu nise....Pu Rin, ka office ah min lo zui lawk teh, biak duhna che ka nei." tiin doctor chuan a chhang a. "Tinge kan pa chauh? Tinge keimah? Ka hre ve duh alawm, thil tha lo a awm em ni?" tiin Sarah-i chuan a lo zawt vat a.

"Chutiang lam a nilo, in pa hi biak lawk duhna ka nei a ni." tiin doctor chuan a chhang a. "Aih, ka hre ve duh. Ka fanu a ni a, engkim ka hre ve vek duh a ni." tiin a tang tlat mai. "Duhtak, hetah lo awm rawh. Engkim ka hrilh leh vek dawn che alawm, lungngai suh." tiin ka thiam ang tawk chuan ka han hrilh fiah a.

Doctor hian engemaw, kan nu hriat ve loh tur thil min hrilh a tum a ni tih ka chiang. Harsa hle mahse, engkim tawk turi9n inpeih hauh lo mah ila ka inpeih luih a ngai. Boruak chu rit tak a ni, ka thinphu pawh a rang khawp mai. "Aih, ka duh bik lo. Engkim ka hre ve duh, khawngaihin docto?" tiin kan nu chuan a ngen lawm lawm a.

Mahse eng tin tin emaw ka hnem hram hram a, a tawp a tawpah chuan, "Awle, ka lo nghak ang che. Mahse, engkim min hrilh ve tur a ni." tiin thutthlengah chuan a thu a, kei leh doctor chu office lam pan chuan kan inzui phei ta a. A zamawm duh kher mai, doctor chuan eng tak min hrilh ang maw tiin ka rilru chu a buai ngei mai.

Ka fanu neih chhun, Annie thih thu sawi ta thut se, engtin nge ka awm ang? Sarah-i ai mah hian ka tuar na dawn tih pawh ka chiang. Ka thlanfim a tla zawih zawih a, mahse doctor chuan engpawh sawi se, thu lawawm emaw, lawmawm loh emaw, chhungkaw pa ber ka nihna angin ka hmachhawn ngei a ngai bawk si.

Hreh tak chung chuan a office dawhkan hma takah chuan ka thu a, ka tha a khur hial theiin ka hria. "Enge chanchin, doctor?" tiin ka zawt a. Doctor chu a thaw deuh huai a, "Tunah chuan a muhil mek e, bp leh thildang pawh kan check vek a, a tha hrih e." a ti ta hlauh mai. Ka thaw huai a, ka lawm takzet.

Mahse ka mak tihna erawh ala reh lo, "Mahse, ka hmuh hnuhnun ber kha chuan a dinhmun kha a tha lo viau khan ka hria, a chetdan leh a awmdan zawng zawng nen. Enge awmzia ni ta ang?" tiin ka zawt a. "Nia, keini pawn mak kan ti. Ti khawp khan a buai a, mahse zawi zawi khan a pangngai telh telh a, tui takin a muhil leh mai sia." tiin doctor chuan min chhang a.

"Ava mak awm ve...a chetdan khan min ti hlau hial asin. Doctor, eng natna nge ni ngai?"

"Ahma lawk pawh khan ka sawi tawh a, Pu Rin...i fanu chunga thil thleng hi eng chiah nge a nih kan hrethiam biklo."

"Enge i sawi awmzia?"

"Kan sawi tak ang khan skin disease ni ngeiin kan hria a, test hrang hrang kan neih hnu pawhin eng natna mah a neih kan hre lo."

"Anih leh na tih hmel tak khan a awm si a, a vun te kha a duk chhuak vek kha a nia. Enge kha kha awmzia ni ta ang?"

"Chupawh chu kan zawhna ve tho a ni, Pu Rin. I fanu chunga thil thleng hi enge awmzia kan hrelo, natna a neih kan hre lo a ni."

Mak ka ti kher mai, thil pangngai lo tak chu a ni. "Anih leh tinge kan nu hriat ve hlau niawm fahrana min koh bik na chhan?" tiin ka han zawt leh a. Doctor chu a ngawi deuh vang vang a, "Englo ania, in nu zawk hian ka ngaih a ti tha chiah lo a ni." a ti ta mai a. Ka beng a verh nghal zar mai, "Enge i sawi awmzia?" tiin ka zawt a.

"Englo ania maw...in nu khan nichin deuhva, in fanu bula a awm lai kha. Ihh..cabin pawn atanga i rawn thlir lai khan in fanu Annie kuta vuan chung khan engemaw a sawi mual mual a. A tir kha chuan ka ngaithla chiang lova, mahse a hnu khan a thil sawi khan ka ngaih a ti tha lo riau va." a ti ta mai a.

Ka hrethiam lo kher mai, "Enge awmzia? Engthil nge a sawi a?" tiin ka zawt nghal vat. "Khatia pawna i awm lai khan a be mawlh mawlh a, khatih lai kha chuan Annie hi tui takin a muhil a. Mahse i nupui SArah-i khan Annie bulah khan MIN NGAIDAM RAWH AW, BAWIHTE... KEIMA THIAMLOH VEK A NI." tiin a sawi tlat a ni." tiin min chhang a.

KA bo tulh tulh mai, Sarah-i thiam loh vek a ni thei dawn em ni? Enge thil awmzia hi ka hrethiam nei nuai tawh lo. "Doctor, enge i sawi awmzia? Ka nupui vangin hetiang hian ka fanu hi a awm phah ta tihna em ni? I sawi tum ber ka man pha lo, min han hrilh chiang deuh teh." tiin ka han zawt leh a.

"Aaa..in nu vang a ni e chu ka ti miah lova, engmah ka hre bik lo. Kan hriat awmchhun chu in fanu Annie hian eng natna ber nge a neih kan hre lova, mahse khatia pawn lama i awm lai khan in nu khan nichina ka sawi ang khan, amah vang vek a nih thu leh a inthiam loh thu kha a sawi mawlh mawlh alawm." a han ti leh a.

Mak ka ti lutuk leh ka hrethiam lo lutuk chu han chhan mai ngaihna pawh ka hre lo, ka ngawi vung vung ringawt. Doctor bawk chuan, "Khatia Annie a biak mawlh mawlh lai khan a drip khai vel buaipuiin an bulah khan ka awm ve reng a, in nu thusawi kha ka ngaithla ve reng alawm. Mak ka tih em vang ania ka koh hran bik che, thil serious tak a ni em erawh ka hre bik lo." a han ti leh a.

"Doctor, kan nu hi hlauthawng hma ve hrim hrim chi a ni a. Rilru no chi leh mahni inthiam lo nghal ngawih ngawih chi a ni bawk a, chuvang chuan a sawi mai mai te hi a ni lo maw?" ka han ti leh hram a. "Nia, kha chu ka hre lo le. I nupui ania, kei ai chuan i hrechiang zawk daih ang. Mahse chu chauh chu a sawi lova, thildang pawh ala sawi a ni." ala ti ta deuh deuh va.

"Doctor, engkim min hrilh rawh. Kan nu chuan enge a sawi?"

A ngawih deuh vang vang hnu chuan, "Khatia ama thiam loh vek a nih thu a sawi hnu khan pawn lamah khan i chhuak ta kha ania, in nu pawh khan a en zui deuh vang vang che a. Khami hnu khan Annie muhil mek lai kha a be chhunzawm leh a, BAWIHTE, KEIMAH VANG VEK A NI. KEIMAH VANGA HETIANG I TAWRH ANGAI TA MAI HI A PAWI KA TI TAKZET tiin ngaihdam a dil mawlh mawlh alawm." tiin min chhang leh a.

Chutah zet zawng, engemaw tak chu ka nupui Sarah-i hian ka hriat veloh thil zep ruk a neih ka ring ta tlat mai. Ka thil tawn tawh te ho kha ka han ngaihtuah let a, "Annie hi i fanu a nilo, ramhuai fanu a ni" tia kha tlangval in min hrilh lai te, Annie-i'n, "I fanu ka ni lo." tia mitmeng sen rum a min melh kur laite chu ka ngaihtuah let a.

Thil pangngai chu a ni lo chiang alawm, ka buai vek tawh. Kha tlangval kha biak chhunzawm ka chak kher mai, pawnah khan ala awm mial lo maw tiin ka ngaihtuah a. Ka tho thut a, pawnah ka tlan chhuak nghal. Kha tlangval kha zawngin ka tlan kual nghal chiam mai a, mahse ka hmu tawh hauh lo.

Security guard te lah chuan ahma a thil thleng vang nge, min lo melh hrek hrek lehnghal. Ka zawn ngial hnu pawh a ka hmuh ngang loh avang chuan inchhung lamah chuan ka let leh a, Sarah-i chu beidawn hmel tak chuan a melh ngai melh reng hian a lo thu ngawi reng a. A bulah chuan ka va thu ve a.

Min hmuh veleh chuan, "Enge doctor khan a sawi?" tiin min lo zawt nghal. "Eng sawi love, a sawi ngai bawk kha a sawi leh a. Eng natna nge an hre bik lo, skin disease a nih an ring a, mahse an test vek pawhin eng natna mah an hmu bawk silova. Chuvang chu mawle, mahse tunah chuan a muhil hrih e." tiin ka chhang a.

Sarah-i chuan a mittui chu hruk pahin, "Ka nu leh pate pawh ka hrilh zo chiah a, Annie te school principal pawh ka hrilh a. An rawn ngaihtuah ve khawp mai, khawvar hunah ka nu leh pate pawh rawn kal an tum." a han ti zawi sap a. "Umm..a that chu. Engpawh nise, in lamah ka va thlah ang che aw....nangchu lo hahchawl rawh, ka lo awm ang." ka han ti chu min leh rum nasa mai.

"Angai lo, ka duh bik lo. Nangmah zawk kha va haw rawh, keimah ka lo awm ang."

"A chi nang, hah chawlh i mamawh alawm. Kha i mit pawh a bui vek alawm, ka va thlah ang che."

"Nilo, naktuk office i ngai awm si a. Keite chu inah ka awm tawp a, i chau zawk ang."

"Engtin nge office lam ka ngaihtuah theih ang? Kan fanu ti hian dinhmun hlauhawm takah a awm mek a, office lam ka ngaihtuah hman lo hrim hrim."

"Keipawhin ka kalsan phal bik hleinem, min ngaihtuah suh. Chubakah in pu ten chutia chawlh ngawt an phal dawn em ni?"

"Ka hrilh mai dawn alawm, ka va thlah ang che."

Duh lovin min hnial nasa hle mahse, eng tin tin emaw chuan haw tur chuan ka thlem thlu thei ta hram a. In thleng chuan ka thlah a, amah chauhva a awm ai chuan tiin ka u te nupa chu zanrei pawh sawi theih lovhin ka ko phei a, chanchin te inhrilhin an awmpui ta a. Keipawh chu hospital lamah ka let leh a, mut a chhuak mawlh lo a ni.

**************************

Doctor thu sawite kha ka han ngaihtuah let a, Sarah-i hian ka lakah hian zep chu anei chiang a ni. Chubakah kha tlangval thu sawi, "I fanu a nilo, ramhuai fanu zawk a ni." tia min hrilh te kha ka ngaihtuah let a. Annie hi ka fanu diktak a ni lo em ni tih thleng te chuan ka ngaihtuah a. Amah Annie ber pawhin, "I fanu ka nilo." tiin huat hmel taka min melh chung khan min tawngkhum kha a ni a.

Khatih lai khan Annie aw kha naupang aw a ni mawlh lo, chubakah midang khan an hre ve awm pawhin a lang lo. Keimah zawk hi ka rilru a buai nge, ka a zo tawh zawk pawh ka hre lo. KA beidawng takzet a ni, ka hlau takzet bawk. Eng anchhia nge kan chhungkaw chungah hian thleng ta mai le, rilru fim phut a har ngei mai.

Chutia ka inngaihtuah nueh neuh lai chuan ka phone a rawn ri a, ka la phu nasa em em zui. Ka han en chuan Annie te school principal, Pu NGhaka a lo ni. "Aw hello, Pu Nghak?" ka han ti chiah chu hlauthawn hmel tak hian, "In nu in chanchin min rawn hrilh a, Annie chu enge a an? Ava zialo ve awww..." a rawn ti nghal chiam chiam mai.

"Tunah chuan an chiu muhil hrih a ni awm e....doctor te pawhin enge a natna ber an hre thei rih lo." tiin ka chhang a. "Hei keipawh damdawiin lam panin ka lo kal mek a, ka lo thleng tep." a rawn ti leh a. "Aww..Pu Nghak, lo kal kher a ngai lo asin." tiin ka inthlahrung angreng khawp mai.

"Ka dah phawt aw...ka lo thleng tep." tiin phone chu a dah a. SAwi tak ang khan thiantha tak ni lo mah ila Annie te school principal, Pu Nghaka hian Annie hi a duhsak bik em em a, amah pawh hi pa fel tak a ni chuan ka hria. Reilote hnu ah chuan a rawn thleng ta nge nge a. "Lo kal kher angai lo asin...i ti awm ang lo emai, zanlai lai ah.." tiin ka inthlahrung kher mai.

"A ho lutuk, Annie te chu ka fanu ang chiah a ka en alawm. A zia lo kher mai, doctor te chuan eng natna nge a nih an hre miah lo amaw?" tiin min han zawt leh a. "Aw an hre bik lo, enge awmzia kan hre bik lo chu a nih hi." tiin ka lo chhang a. "Kan bus Driver REma pawh ka be nghal alawm, khua han var se, kan school office ah ama awm lai ngeiin kan sawi ho dawnnia." a ti a.

***********************

Chhin khat pawh ka chhing lo, Pu Nghaka pawh a haw leh daih tawh. Khua  avar a, dar 6 leh a chanve a ri tawh. Annie chu ala harh lo hrim hrim bawk, ka mut a chhuak eih lo bawk. Ka inngaihtuah nasat poh leh ka rilru chu a buai tulh tulh mai hian ka hria, hospital kawt velah chuan ka tei kual sek ringawt.

Dar 7 a ri a, Sarah-i pawh a rawn thleng leh der tawh. Min hmuh rual rual chuan, "Bawihtei chu enge a an, a harh tawh em?" tiin min rawn zawt nghal a. "Aih la harh lo, ala muhil char char." tiin ka lo chhang a. "A nih leh in pute i hrilh tawh em?" tiin min zawt leh a. "Aw hrilh tawh e, vawiin chu chawlh min pe e." tiin ka chhang leh a.

"Umm...engpawh nise, chaw ei ka siam sa vek a. Va haw la, ka lo awm ve tawh thung ange. E taka, Pu Nghaka kha a lo kal em?"

"Aw kal e, kha...eitur tlem azawng a rawn ken sak lenghal a, a inthlahrun awm tak tak a ni."

"A nih chu mawle, i u te nupa pawh zingkarah khan an haw lehnghal a. Va haw tawh rawh, chhunah i lo kal leh zawk dawnnia."

"Umm..anih chuan ka haw phawt ange."

Hospital chu ka chhuah san a, in lam pan chuan ka inkhalh haw nghal a. Ka rilru chu a tawt kher mai, ka taksa a chau viau nangin ka rilru erawh chau ve hman pawh a ni lo. Sarah-i erawh engmah ka la zawt duh lova, mahse doctor thusawi kha thudik a nih chuan eng thil tak ka nupui hian ka lakah hian zep nei maw?

********************************

In chu ka thleng a, garage ah chuan ka motor chu ka park tha te te a. Mut pawh a chhuak ve deuh ta, rilru hah nen, beidawng nen, mangang bawk nen, zep lo chuan ka chau takzet. In lam pan chuan ka chho leh a, in la lut tur chiah chu kan kawngka bulah chuan chhimtir mei kai ka hmu leh ta tlat mai.

Tunah zet zawng, 10 ai tam zet an inzui duah duah mai. Tinge heng chhimtir ho bawk hi ka hmuh leh? Enge awmzia ni ta ang? Ka thinrim thut a, ka um darh nghal vek. KAn in bul kawrah chuan chak mangkheng hian an inzui thla diah diah hlawm a, ka thinrim bawk si, rilru hah bawk si chu patling pui e tilo chuan ka tap pur thei hial.

Inchhungah chuan ka lut a, tui lum sa ver vawr chuan ka han inbual a. Chutia ka han inbual fai meuh chuan chhe te chuan ka harh ve deuh kawk chuan ka hria, chaw te eiin ka taksa te chu ka han zi mar kual vel a. Mahse rilru erawh ala buai kher mai, ka rilru ah chuan ka fanu Annie bak a awm thei mawlh lo.

Ka chauh deuh avang chuan sitting room thutthleng ah chuan ka han mu zal a, ka lo chhing sek ni tur a ni. Kan door bell ri chuan min ti harh zawk mai, rang tak chuan ka tho vat a. Kawngka ka va hawng chu Annie te school form ha, kum 6-8 mi vel niawm tak, hmeichhe naupang hi a lo ding a.

"Ehe....Mami, enge i duh a?" tiin ka zawt a. "Annie a awm em? School kal turin ka rawn sawm dawn a?" tiin min rawn zawt a. Mak ka ti angreng khawp mai, pawnah chuan chhuakin ka han hawi kual a, school bus awm ang engmah ka hmu bawk si lo. "Annie chu a dam lova, vawiin chu school a rawn kal dawn lo." tiin ka chhang a.

Mahse engmah a sawi zui lem lo, a ding ngawi reng ringawt. "Engin nge kal in tum reng reng a, school bus ka hmu bawk si lova?" tiin ka zawt leh ngat a. "Ka rawn sawm hma mai mai, kan in bul atangin bus kan chang dawnnia a tia, a sawi lawk vek a. Min rawn sawm rawh atia, chuvang ania ka lo kal." tiin min chhang leh a.

Annie te class mate a nih ringin mak tihna em em pawh ka nei chuang lo, "Aw anih chu, ava zia lo ve aw....Annie chu a dam lova, vawiin chu a lo kal thei dawn lova. Mahse ilo sawm laklawh tawh bawk si a, bus chu ka lo chan pui dawn che nia. Hawh, inchhungah lo lut rawh." tiin ka sawm lut a.

Ngawi reng chuan a lo lut ve mai bawk, ka chaw ei thleng engmah pawh ka la si lo. "Mami, Annie te nen in pawl a inang em ni?" tiin ka zawt leh a, kawngka bulah chuan a ding reng a. ZAwi sap hian, "Aw..in ang e." tih ringawt chuan min chhang a. "Ala hma bawk a, school bus pawh a lo la thleng mai lovang. Thleng te hi ka han sil lawk anga, min lo nghak rawh aw..." ka han ti leh a, a lu a bu nghut ringawt.

Kawngka bulah chuan ala ding reng a, "Tinge khatah khan i din reng a, i ke a kham ange..lo thu rawh." ka han ti leh a. Mahse ala ding reng tho, naupang mai ala nih avang chuan a zak a nih ringin ngaih that lohna em em pawh ka nei lo. Amah en lem lo chuan ka thleng sil pah chuan, "Tunge i hming?" tiin ka zawt a.

"Muanpuii." tih ringawt chuan min chhang. "Anih tunge i nu leh pate hming? Kan vengah tho em ni in awm?" tiin ka zawt leh a, mahse min chhang tawh miah lo. Chutah le, thil hriat chhuah ka nei leh ta zawk mai. A hma tlai lawk a, Sarah-i'n Annie kalna a zawh a, "Muanpuii te inah." tia a chhan kha ka hre chhuak zawk mai.

Rang lutuk takin ka va hawi phei a, kha naupang kha a lo awm tawh hauh loo. Ka thleng sil lai chu kalsan in ka zawng kual nghal a, mahse inchhung chu a reh diak mai. Pawnah ka tlan chhuak a, mahse ka hmu chuang lo. A hmel kha ka han mitthla let leh a, khang naupang pali ka hmuh thinte zinga mi ni tlat khan ka hre lehnghal.

Maimitchhing meuhvin ka han ngaihtuah let leh a, khang naupang pali te zinga mi ni ngeiin ka hre ta. Ka thin a phu nghal dup dup mai, "Muanpui...Muanpui khawnge i awm?" tiin ka han au chiam chiam ringawt a. Mahse chhanna ka dawng lo, inchhung chu ka enkual vek a, room zawng zawng nena ka zawn hnu pawh chuan ka hmu ta hauh lo mai.

Engtik laiin nge a pit bo hman ang, kum 6 vel leka upa a nih hmel a, birukna hman a awm lo hrim hrim. A ruk tak chuan ka hlau angreng viau bawk, ka thlan a tla leh zawih zawih tawh. Chutih lai tak chuan ka phone a rawn ri thut a, ka va phu nasa kher em. KA han en chu Annie te school principal, Pu Nghaka a lo ni.

"Aw hello, Pu Nghak?"

"Eee..i tho thei maw?"

"Aw..ihh..nia, tho thei e."

"I lo kal tawh dawn em? Hei, kan driver Rema pawh a lo thleng dawn tawh a, nimin chungchang vel chu sawi ho ila ka tia."

"AWle..ihh,nia, ka lo kal dawn e."

Ka tawng bah deuh nuai mai, phone chu ka dah a. Kha naupang kha khawnge maw a kal hman ang le? Ka hmuh fo thin, naupang pali te zinga mi kha a ni tih ka chiang. Ngati nge maw ka lo hriat nghal loh le aw tiin ka han indem leh thul, ka buai tulh tulh mai chu a nih hi maw. Rilru hah tak chung chuan ka insiam a, Annie te school lam pan chuan ka inkhalh phei ta a.

********************

School chu ka thleng a, Principal office ah chuan ka lut tlang nghal a. Driver Rema pawh chu a lo thleng der tawh. "E, ilo thleng thei maw? Annie chu enge a an a, a zia tawh em?" tiin Pu Nghaka chuan min lo zawt a. "Ala ngai reng, ala muhil a." tiin ka chhang a. "Tunge tunah awmpui?" tiin min zawt leh a.

"Anu in a awmpui a, chanchin engmah a la rawn sawi lo." tiin ka chhang leh a. "anih tak chu...Rema, nimin khan KG 2 ho i phurh khan bus ah khan Annie kha a chuang ve ngei tiraw?" tiin Pu Nghaka chuan Rema chu melh pah chuan a han zawt a. "Aw chuang ngei e, an in kawt thleng khan ka thlah alawm." tiin Rema chuan a lo chhang a.

"Anih leh an in a luh thlengin i en em?"

"Aih en lem lo, mahse inkawtah khan naupang pali an lo infiam a, a thiante anih ka ring a."

"I enzui miah lo maw?"

"Aw...nidangah pawh ka enzui ngai lem lo, puitling emaw, tleirawl emaw pawh midang tumah ka hmu lo."

Ka beng a verh zawk mai, "Naupang pali a? Kan inkawtah maw?" ka ti deuh nghal vak a. Mak tih hmel taka min en pah chuan driver Rema chuan, "Aw ni e, inveng naupang emaw, Annie thiante an nih ka ring deuh teh ngawt a, ngaih that lohna pawh ka lo nei lem lo asin." tiin min chhang a.

Principal  Pu Nghaka pawh chuan mak tih hmel tak hian min en a, "Tinge Rina, thil dik lo a awm em ni?" tiin min lo zawt ve nghal bawk. Mashe Pu Ngahka chu chhang lovin Rema bulah bawk chuan, "Anih leh chung naupang te chu an lo infiam i ti tiraw?" tiin ka han zawt leh a. "Aw...infiam e." tiin min chhang a.

"Anih leh engtin nge an infiam? TIRA MEI KAIAH an ti em?" tiin ka han zawt a, chutah Rema chuan mak tih hmel taka min en chung chuan, "Aw...ni tak, Tira mei kaiah tiin an infiam alawm, mahse..engtin nge i hriat?" a ti hu mai. Ka hlauh ang ngei ngeiin, khang naupang pali te bawk kha an ni tih a chiang vek.

Pu Nghaka chu ka en leh a, "Pu Nghak, KG 2 ah hian..ka sawi awmzia chu, ka fanu Annie te class ah hian Muanpuii tih hmingpu an awm em?" tiin ka zawt a. "Ka va hre mai lo ve, an awm pawh ka hre lo." tiin min chhang a. Zah pawh dawn lo chuan, "Pu Nghak, khawngaih takin han enfiah lawk teh, a rem chuan...ka lawm viau ang." ka ti ta ringawt a.

KG 2 register la tur chuan teacher pakhat chu a tir a, ka chiai lutuk leh hmanhmawh lutuk chu ka phi sek tawh. "Enge thil awmzia ni reng reng a, Rina?" tiin min zawt leh a, "Ka sawi thei rih lo, thawnthu thui tak a ni." tiin ka chhang tawp. Teacher chu a rawn let leh a, KG 2 register chu a rawn keng a.

Ka lo ban nghal vat, mahse Muapuii tih hmingpu reng reng an awm hauh lo. "Muanpuii tih hmingpu an awm lo, mahse...enge awmzia ni ta ang?" tiin ka phun sap a. "Rina, enge ni reng reng? Min han hrilh ve la mawle?" tiin Pu Nghaka chuan min lo zawt leh a. "Pu Nghak, KG 2 class teacher ka hmu duh...khawngaihin, chuan engkim ka hrilh ang che." ka han ti leh a.

KG 2 class teacher chu a ko veleh mai a, reiloteah a rawn thleng a. Principal Office a rawn pen luh rual rual chuan, "Ka pi, KG 2 ah Muanpuii thin hmingpu an awm em?" tiin ka lo zawt nghal thawr mai. Teacher chuan, "Aih..chutiang hmingpu tumah an awm lo." tiin min chhang ta mai a nih chu.

*********************

TO BE CONTINUE