WILD ZONE : SEASON 1 (Episode - 6) Written by : Aaron Malsawmdawngzuala BAD GIRLS - 6

 WILD ZONE : SEASON 1

(Episode - 6)

Written by : Aaron Malsawmdawngzuala

BAD GIRLS - 6

***********************

Rin ai takin Hlua hliam chu ngaihtuah awm lutuk a nilo hlauh, a pem an thui zawh chuan Station lamah Kevina te chuan an phurphei leh a, kei erawh kan inah ka haw tlang thung. Hlua chu thu zawh fiah turin an hruai tih ka hria, mahse ka inrawlh ve peih hlawl lo. Nathana lah chuan min la rawn call miah lo mai a, ka ril a tam em avang chuan chaw te chu ka han ei tha leh a.

Chaw ka eikham hnu reiloteah chuan NAthana chuan min rawn phone ta, "Hello Sir, enge chanchin?" tiin ka zawt nghal a. "Engmah chanchin thar vak a awm lo, khaw mipuite chu ka zawt hlawm a, mahse chutiang mi an hmuh loh thu hlirin min chhang a. Engpawh nise, khawnge i awm?" a rawn ti a.

"Tunah chuan inah ka awm, min rawn phone hun ka nghak che a." tiin ka chhang a. "Khawnge Hlua?" tiin min zawt leh a. "Kevina ten Stationah an hruai phei, thu zawt fiah turin." tiin ka chhang a. "Bella, va kal la, engemaw tal va hriat ve tum teh, Kevina kha ka ring hlawl lo." Nathana chuan a rawn ti leh a.

"Awle, ka va kal nge...anih nang engtin nge i awm zel dawn?" tiin ka zawt veleh a. "Eng eng emaw buaipui tur ka la nei a, ka inhmu vat dawnnia." tiin min chhang a. Phone chu kan dah a, keipawh chu ka insiam nghal a. Ka scooty chu la chhuakin Station lam chu ka pan a, diktak chuan Kevina hmel hmuh ringawt pawh hi ka hne tawh.

*********************

STation chu ka thleng a, interrogation room ah chuan Hlua chu amah chauhvin a lo thu a. Kevina chu ka han melh kual a, ka hmu hauh lo. IGP Sir ber pawh a lo awm lova, assistant chu ka va pan a. "Khawnge Kevina hi?" tiin ka zawt a, "A chhuak lawk a." tiin min lo chhang a. "Anih Hlua hi in a statement in la tawh em?" tiin ka han zawt leh a.

"La la nang, ka rawn let leh hunah atia, Sir Kevina khan." tiin min chhang leh a. Ava hahthlak tak, tun thleng pawhin a statement a lo la la lo chu niin. Vin lek lek chuan, "Enge a tih a? A chhuahna tur a sawi em?" ka han ti leh a. "Amazon atangin ka thil chah a lo thleng a, ka va en lawk a ti a." tiin min chhang leh a.

Fiam thu a ni hial lo mawle tiin ka ngaihtuah hial, Inspector rank ve hial si engmah a ngaihtuah lo lutuk hi awmzia ka hre lo. "Anih leh khawnge IGP Sir hi?" tiin ka zawt leh a. "A thaw hah a chhuak a, damdawiinah a awm." tiin min chhang leh a. Ka han gawi deuh vang vang phawt a, "Hlua saw ka va kawm dawn." ka ti deuh hmuk a. 

Mahse KEvina assistant chuan, "Sir Kevina'n tumah lo luhtir suh a tia, a chi lovang." a lo la ti khanglang zui. Rum takin chupa chu ka melh a, "Tunge ka nih i hria em?" ka han ti chang deuh fak a. Ka mitah pawh chuan melh tha ngam lovin a kun reng a, "Aw hria e, Ma'm." a ti zawi sap mai.

"Anih han sawi teh, tunge ka nih?" ka han ti leh deuh kher a. "Detective BElla Lalmuankimi." tiin min chhang a. "A dik...Kevina hi PI satliah, lehkha thiam lo rank a ni. Kei hi Mumbai leh DElhi CID kum 5 ai tam lo thawk tawh ka nih hi...chuvang chuan ka thu hi min hnial reng reng suh." tiin ka vin ve deuh hlak a.

"Ka tihpalh Ma'm, mahse Sir Kevia khan tumah lo luh tir lo turin min hrilh a, chuvang zawk chu ania." inthlahrun hmel tak chuan a han ti leh a. Ka nui suk ringawt, "A lo thlen hunah i duh leh i lo hrilhd awnnia, ka thu in ka lut tih i lo hrilh dawnnia." ka han ti leh deuh kher a, min chhang zui ngam ta lo.

Interrogation roomah chuan ka va luta, Hlua chu a lo lungnawi loh hmel kher mai. Min hmuh veleh chuan, "Tinge misual ang mai a interrogation room ah kher min dah a, minute 20 dawn lai chu min awm tir tawh. Thu kan rawn zawt fiah vat ang che min ti a, a reh leh vang vang bawk si." a lo ti nghal deuh hlur mai.

A lu chu bandage hian a lo la intuam bur mai a, thisen pawh tlem a lo la awm bawk. "Tu in nge hetah awm tir che a?" tiin ka zawt a. "Inspector Kevina khan.." tiin min chhang a. "Anih chuan lo chhuak rawh....office ah kan inbe dawnnia." tiin ka hruai chhuak a. Office lamah chuan kan thu dun a, "Ka hliam pawh ala dam tha lova, ti chung hian kha room vawt reih ruih lutuk ah khan min awm tir char char a, enge awmzia?" a ti leh nuah nuah mai.

"Kan tihpalh a ni, Hlua. Engemaw zawh duh che ka nei a, khawngaihin i thil hmuh kha han sawi nawn leh ta che."

"Eng ka thilh hmuh maw?"

"Vaw thlutu che kha...a hmel i hmu hman em?"

"Aih hmu lo, jumper dum a ha a, face mask dum a vuah bawk."

"Anih khatia a rawn chhuk kha a rawn vaw tawp che tihna em ni?"

"Ni love, tlak lam vengah khan kuthnathawktute interview ka neih pui a. Ka camera men erawh hmun dangah a kal dawn avangin ke in ka rawn haw chho mek a, khatah khan DING RAWH ti a in au ri kha ka hria a. Chuan khapa kha a rawn tlan thla a, misual a nih ka lo ring ve nghal tawp a. Man ka lo tum ve a, mahse a bul lawkah khan thing bung a awm a. A chhar lawk a, min vaw ta tawp a ni."

"A mit vel chu i hmu hman ang tiraw?"

"Hmu hman tho va, mahse thil thleng kha a rang em a, chet ka la ve hman ta lo a ni."

Chutia kan inbiak lai chuan IGP a lo lut a, "Ehe..BElla, nangmah daih in animaw lo kawm a?" a rawn ti nghal a. "Aw Sir, a statement ka lo la zo deuh chiah." tiin ka chhang a. "I la zo tawh anih chuan nakinah detailin i rawn submit mai dawnnia, i duh chuan hruai chhuak tawh rawh." a rawn ti daih mai.

Mahse zawhna ka zawt peih lem ta lo, "Kan chhuak nghal mai dawn em ni, Hlua?" tiin Hlua chu ka melh a. "Khawiah nge min la hruai dawn?" a lo ti hu mai. "Khawiah hruai dawn love...ka va thlah haw dawn che nia." tiin ka chhang a. Hriatthiam loh hmel tak chuan a chhuak ve mai bawk a, ka zui chhuak ve nghal a.

Taxi chu pharin kan chuang dun a, chutih lai chuan NAthana'n min rawn call a. "Hello Sir, Hlua statement chu ka la zo tawh e." ka han ti nghal a. "Nangmah daihin maw...Kevina a awm lo em ni?" tiin min rawn zawt nghal. "Sawi pawh sawi suh...a thil chah buaipuiin a lo va haw daih alawm." tiin ka nui suk a.

"Ava buaithlak tak..anih Hlua chu tunah khawnge a awm?" tiin min rawn zawt leh a. "Ka bula hi...hei taxi ah kan chuang mek." tiin ka chhang leh a. "A haw dawn tihna em ni?" a rawn ti leh a. "Aw...IGP berin a phal alawm, ka haw tir mai loh chuan tih tur dang ala awm em ni?" tiin ka zawt let a.

"Ka apartment lamah lo tlang ru, Hlua kha rawn hruai rawh." tiin min chhang a. Phone chu ka dah a, NAthana apartment lam chu kan pan ta a. REilo teah chuan kan thleng vat a, inchhungah chuan kan lut tlang nghal a. "In lo thleng maw? Hlua, enge i hliam chu a an?" tiin NAthana chuan a lo zawt a.

"Ka zia tawh e, tlem chuan ala na deuh." tiin a chhang a. Kan thu hova, "Hlua, misualpa hmel kha chu i hmu hman lovang tiraw?" NAthana bawk chuan a han ti leh a. "Aw hmu hman lo, face mask dum a vuah a, a hmel kha a hmuh theih loh hrim hrim." tiin a chhang a. "Anih leh tlemte talin..han chhinchiahna tur awm ang emaw a nei em?" tiin a zawt leh a.

Hlua chu a ngawi vang vang a, “Ka hre mai lo...a kawr kha jumper dum a ni a, lukhum a awm bawk. A hma ah khan ipte pahnih a awm bawk a, chuzawng chu a nimai.” tiin a chhang leh a. NAthana chuan inthiamloh hmel tak hian, “Kan lo tlai deuh hlek a ni, hliam i tawrh phah a, min hrethiam dawnnia.” a han ti dam diai a.

“Keimah zawk hian man ka lo tum ve a, ka lo man hman lova, a pawi ngawt mai.” tiin polite tak chuan Hlua chuan a chhang let a. “Anih chuan Hlua, hna pawimawh tih tur i la nei em?” tiin a zawt leh a. “Aw...interview tur pathum ka la nei a...” tih pah chuan a sana chu a han en a, “Ehe..dar 12 a lo ri dawn der mai.” a han ti chhunzawm nghal a.

“Anih chuan taxi fare tur ka pe che anga, i duh chuan lova haw rawh...ka lo ko tel ve kher che a, va hahdam zawk rawh.” tiin NAthana chuan pawisa pek a tum a. Mahse Hlua chuan a la duh thak lo, “Angai love, Pu NAthan. Taxi fare tur te chu ka nei ve alawm, ka kal phawt ange.” tiin min chhuah san ta a.

A chhuah hnu chuan NAthana chuan min en a, “Tualthattu hian Pu Nunga te vaimin kha a ru fo tih a hriat...ka va kal leh a, an vaimim kha hmun khata mi chu a la kawng deuh vek a ni.” a han ti a. “I va kal leh amaw?” ka lo ti hu mai. “Aw kal leh e...chuan thu thar hriat chhuah belh pawh ka nei.” a la ti ta deuh deuh va.

“Eng thil nge ni?” ka lo ti vat. “Tualthattu hian vaimin ah khan poison a thun vek a, vaimin tamtak kha  a ru a ni. A chhan bulbui ber ni a lang chu tualthattu hian hmeichhia hrim hrim hi  ahaw hle a, mautam sazu ang velah a ngai tihna a ni. Chuvang chuan a mi thah apiang te taksa ah khan pen hmangin kha chaichim sign kha a ziak zel tihna a ni.” tiin min chhang a.

“Ka la hrethiam lo, tinge model ho chauh kha a thah chhan ni ang? Hmeichhia hrim hrim a huat chuan hmeichhia kan tam si a, tinge model ho chiah a bitum?”

“Chu tak chu kan chhui chhuah tur chu a ni reng alawm, heng model te lakah hian engemaw tak tih a tum a ni. A awmzia chu chhan tha tak a nei tihna a ni mai, chu chu kan chhuichhuah angai.”

“Tinge vaimin ah kher a thun ang?”

“Rinhlehloh nan a ti a nimai, GAnesh-a’n Sarah-i a pek phei kha chu a rawh a rawh hmin thlap a ni lehnghal.”

“GAnesh-a thil tih zawk pawh a lo ni maithei asin, kha vaipa thusawi kha i ring tihna em ni?”

“Keichuan ka ring, keimahni hlau va a tlanchhiatna chhan ber chu drugs tawlh ruk vang zawk kha a ni.”

“Anih leh enge i news hriat chu?”

“Jenny khan min hrilh a, Pu Zonuna khan min rawn call a. Jenny’n thu hriat thar a lo nei thut a ni awm a, Nunui kha show neih ni khan chawhma lamah a chhuak an tih kha...a rawn haw khan vaimim tam deuh min rawn hawn sak thu a sawi a ti a ni.”

Ka meng deuh hrawk a, “Nunui..thi ta khan maw?” ka ti hu a. “Aw ni e, a awmzia chu kha tualthattu leh Nunui pawh hi an inhre reng tihna a ni. Tualthattu hian vaimin chu a lo ru fo tawh ka tihna chhan pakhat pawh ania, a chhan chu vaimim a ruk thu kha chu nimin zingah chauh kan hria, chupawh Irene-i kan chhuina lamah a ni. BAr customer hlun ROzami’n Irene-i kha bar atang khan an inah a haw pui a, keinin kan va chhui chhuak a. Mahse kan va thlen chuan Rozami ruang chiah kan hmu, mahse Nunui’n a model puite tana vaimim a rawn hawn teuh erawh chu chumi hma daih chu a ni.” tiin min hrilh fiah a, ka var uar mai.

“Anih chuan vaimin hmun a a hlawm khat tawp a lo bo pawh chu a awm lo hran love.” ka han ti a. “Ni reng e, chu a vaimin ah chuan poison chu a kap lut vek tihna a ni a, model ho zawng zawng hi thah vek a duh tihna a ni.” tiin Nathana chuan a lo tuihnih ve bawk. “Anih Nunui vaimim hawn chu khawnge a awm?” tiin ka zawt leh a.

“Nunui hi model-a a telna a rei tawh a, ama pualin car pawh a nei thlap tawh a ni. Khami ni khan ama car ngeiin Sailo REsort ah khan ava kal a, chutah chuan tualthattu hian vaimim hi a lo pe a ni ngei ang. Vaimim pawh chu a car hnung ah basket in a lo khat hnur a, chupawh chu lab ah ka test tir vek a, a chhungah poison a awm vek bawk.”

“A car checkna chang chu ahma in tinge kan lo hriat miah loh le?” ka han ti nuah nuah a. Nathana chu a khi suk a, “Tuman car a nei tih sawi hek lo, a tu pawh mai hi an mawl chhah vek mai zawng a nih hi.” a ti deuh bul bul mai. Chutih lai chuan door bell a rawn ri a, “Lo lut rawh.” tiin Nathana chuan a lo chhawn vat a.

Kevina a rawn lut deuh hlawl mai, ala thinrim hmel em em zui. Rum zeta min rawn melh chung hian, “Khawiah nge Hlua, reporter kha?” a rawn ti nghal pung pung mai. “Kevin? Tinge ni? I va thinrim hmel ve?” tiin dam diai hian NAthana chuan a lo zawt a. “Pu Nathan Malsawmkim, hei hi ka case a ni tih hi vawi engzat nge ka sawi dawn?” a ti leh pung pung mai.

NAthana chuan zaidam tak hian, “NGawi teh...khati pung pung te chuan tha takin kan sawi thei nang. Hawh teh, ka room ah i sawi ho teh ang u.” tiin ka kutah chuan a rawn vuan thut a, min kai deuh dawr mai. A room lamah chuan min kai phei a, a chhungah chuan kan lut a. Dawhkan lian tak pakhat a lo awm a, thutthleng erawh pahnih chiah a awm thung.

Thuthleng pakhat zawkah chuan min thut tir a, dawhkan hma thutthleng ah chuan kei ka thu thung a. Kevina pawh chu a rawn lut ve a, “Eng thilah nge i lungawi loh va?” tiin NAthana chuan a han zawt leh a. Kevina chu a han thaw vcl deuh hak a, “Pu NAthan, ka thu lovin engvangin nge Hlua kha in lo chhuah tir?” a han ti khur khur a.

“Kevin, i hrethiam lo a ni..” Nathana tawng zawh hma hma chuan vin deuh tak hian, “Ka zawhna chu min chhang mai rawh, Pu NAthan. Engvangin nge Inspector Kevina Station atangin interrogation room ah lo lutin, nangni detective ho hian ka mi kawm tur in lo chhuah tir?” a han ti leh pung pung a.

Ka insum zo ta lo, “Kevin, IGP thu thlap a hruai chhuak kan ni. Nangpawh engati nge engmah i ngaihsak loh...i thil chah mai mai buapuiin inah i lo va haw vel a, khatiang kha police awmdan tur a ni em ni?” ka lo ti ve vat a. MAhse NAthana chuan min rawn signal zeuh va, “Insum rawh Kevin, han thu ve phawt la mawle.” a han ti dam leh diai a.

Kevina chu a hawi kual deuh hru hru a, “Thutna dang pawh a awm tawh loh hi.” a han ti leh deuh hlur a. Chutah le, NAthana mitmeng chu a rawn danglam ta. Thinrim hmel tak hian, “Ni chiah e...thutna dang a awm tawh lo. A awmzia i hria em? Tikhan i dinhmun chu i hria em?” a ti ve ta hrep mai.

Kevina chu a hawi hu a, “Enge i sawi awmzia?” a ti khur deuh dar dar a. Nathana chu a ding hluai a, “Nang hi ka khawih chakna che a rei tawh asin, tu mimawl phiangsen hian nge police ah hian lo thun che ni. Hei hi ka inchhung a ni a, he room hi ka private office a ni. Thutna i nei ve lo, a awmzia chu he inchhungah hian pawimawhna pakhat mah i nei ve lo tihna a ni.” a ti leh hrep mai.

Kevina hmel pawh a khup zul zul mai, “Eng...enge i sawi awmzia?” zam tih hriat tak hian a han ti khur leh dar dar a. A aia vin hian Nathana chuan, “Police ni tlak i ni lo, engkimah thu neihna neih vek i tum a. Police awmzia te hi i hre reng reng em? A lampum tal i hria em? Nge full form a nei lo emaw i ti zawk. Police lampum chu Public Officer for legal investigations a ni. Public Officer hna nih i tlin lova, legal investigation chhui turin i thluakin a pha velo. Chhuak nghal rawh, i duh a nih chuan i Station ah ngei chuan min vin dawnnia, hetah nilo.” tiin a hau leh hrep mai.

Lungawilo tih hriat tak chuan Kevina chuan NAthana chu a melh vung vung a, a chhuah pah chuan kawngka chu a han khar ri deuh vel bur ta nih chu, a cute letling zawk e a. “Ka khawih hrep lo kha a vannei ngawt mai.” tiin NAthana chu a phun chhunzawm bul bul a. “I beng nek lo nia.” ka lo ti ve leh hram a.

“Engpawh nise...hna i nei ania.”

“Eng hna maw?”

“Keichu maw Bella, Sailo resort ah khan eng emaw chu ala awm ka ring tlat a ni.”

“Engtia engemaw awm maw?”

“Nunui khan kalna chhan a nei ang, road block inti eng ang mahse kan va luh luih angai.”

“Nia keipawh chu chu ka rilru ah a lo awm reng a, Kevina naute pawh khan va check ve mai awm..police ve meuh si road block tih vanga han kal tlang loh ka lo tia.”

Nathana chu a khi deuh suk a, “Kevina naute tih awm tawk vel a nih chu, chubakah an boss berin lo let leh mai ru a tihte chuan an tan chuan peihawmloh deuh mai asin.” tiin min chhang a. “Anih chuan enge ka hna tur chu ni ta?” tiin ka han zawt leh a. “Sailo REsort chu va kal angai.” a ti a.

“Anih chuan va kal ila.” ka lo ti nghal vat. “Aih..pistol leh bullet proof vest nen va kal zawk rawh...keichuan thildang buaipui tur ka nei. Mahse police mipa panga vel tal kal pui ang che, anih loh chuan nangmah chauh chu a hlauhawm.” a ti daih mai. “Mahse anih nangmah ve?” tiin ka zawt a.

“Keichuan vaimim zuartu ber chu ka chhuichhuah angai...ka lo buapui ang.” tiin min chhang a. Awle, Sir...anih chuan ka kal nghal mai ang.” tiin ka tho nghal a. “Lawk aw Bella, hei hi keng rawh.” tiin a motor chahbi chu min pe a. “Nang engin nge i kal dawn?” ka lo ti a. “Keichu Bike-in ka kal mai ang.” tiin min chhang a.

***********************

Nathana car keng chuan Sailo REsrot lam chu ka pan a, resort nge nge, a awmna pawh a pil ril reuh khawp mai. KAWng lakah chuan tu emawni hian min lo phar a, ka va thlen phei chuan reporter Hlua bawk a lo ni. “Hlua, enge hetah i tih a?” tiin ka zawt a. “Interview ka nei zo chiah a, Pu Nathana car a ni tih ka hria a, ka lo phar mawle...khawnge a mah hi?” tiin min lo zawt let a.

“Ani chu a buai a, hei Sailo Resort ah investigation nei turin ka kal dawn a.”

“Ehe....nangmah chauhvin maw? Hmeichhia lehnghal, police mipa dang tinge i hruai loh?”

“Mahni ngeia chinfel ka duh zawk a, ka hmanhmawh deuh va ka kal phawt mai ange.”

“Ngawi teh Detective, ka lo kal ve teh ang.”

“Engvangin maw? Buaina te lo tawk palh ila, eng pawh i chungah thleng se mawh ka phurh a ngai dawn asin.”

“A pawi lo, hmeichhia nangmah chauhva i kal tur chu ka ngaih a ngam lo zawk. I chungah engpawh thleng se, mawh ka phur zawk ang. Detective, khawngaihin ka lo zui ve teh ang che.”

Ka han ngawi deuh vang vang phawt a, kan misual um lai pawh lo man ve tum khawpa huaisen a ni ve a, min puih theih mial takin tiin kal chu ka remti ve ta. Tichuan kan inphur a, reiloteah chuan Sailo resort chu kan thleng vat a, mahse road block a lo inti ngei bawk. Motor atang chuan kan chhuk a, an kawng block chu kan thian fai a.

Tichuan kan tlan tlang lui ta a, darkar dawn kan tlan hnu chuan kudam niawm tak, lia vak lo hi kan va hmu a. “Saw saw lodge hlui chu a ni ngei ang.” Hlua chuan a han ti a. “I va kal ang hmiang.” tiin motor atang chuan kan chhuk dun a, lodge hlui lam chu kan va pan ta. A bul velah chuan vaimin eina hnu hi a lo let nuai mai a, kan kalna hi a dik ngei tih ka chiang.

Mahse NAthana kan hrilh ngei ngei angai, phone ka tum nghal a. Mahse signal a awm ta tlat lo mai, engemaw buaina a thlen palh takin police dang chu kan mamawh dawn ngei tih pawh ka chiang. Hlua bulah chuan, “Hlua, car i khalh thiam em?” tiin ka zawt a. “Aw thiam ve e.” tiin min chhang a.

“Anih chuan chahbi hi la la, police Station ah va kal la, helai hmun ah hian unit 2 vel rawn hruai ang che.” ka ti a, “Awle.” tiin a kal ve mai bawk. Lodge pawh chu ka han hlat leh deuh va, thawm engemaw a awm thut takin tiin ka han ngaichang leh deuh phawt a. A khat tawk chuan ka phone chu ka han bih leh thin a, mahse signal pakhat mah ala awm thei chuang lo.

**********************

Minute 20 dawn hnuah pawh chuan thawm engmah ala awm lova, Hlua pawh a la lo let bawk si lo nen. Ka rilru hmanhmawh deuh chuan Lodge hlui lam chu ka va pan a, kawngka a lo inkalh miah lo mai. A chhungah chuan ka pistol hum ran chungin muang chang chuan ka lut a, a la thim em em zui.

Ka phone torch chu ka on nghal a, rin ai takin a zau phian lehnghal. A rimchhe reuh phian lehgnghal bawk a, mahse a reh hian a reh em em thung. “AWm in awm em?” ring deuh leng lawng chuan ka han ti vak a, chutah hmeichhe rum ri tuah tuah hi ka hre ta tlat mai. Thawm lo chhuahna chu ka va pan nghal a, kil khata hmun eng deuh laiah chuan hmeichhe pahnih, saruak deuh thaw a lo mu reng chu ka va hmu ta.

Rang takin ka va tlan phei nghal a, kan mi zawn ngei mai Irene-i chu ka hmu ta, a bulah chuan Sarah-i pawh a lo awm ve bawk. “Irene..Irene...ka thusawi i hre thei em?” tiin ka sawi vak vak a. A rawn meng a, “Sa..SArah-i saw...a thi mai ang, a chau lutuk.” a ti tawk tawk a. Sarah-i chu ka va en a, a lo mu khawng vek tawh.

Ka va pan dawn chiah chuan hnung lam atang chuan mipa aw hian, “I ti tha e, Detetive Bella.” a rawn ti thut mai. Rang takin ka hawi let a, ka pistol pawh ka chuh hman lo. Chu mihring chuan a tiang ken lai chuan min hlap nghal pawp mai a, a na zeuh va, abak engmah ka hre tawh lo. Mahse a hmel chu ka hmu hman, kha reporter, Hlua ngei kha a ni.

***************************

“Thiannu...thiannu, harh teh..ka tawng i hre thei em?” tia min be mawlh mawlhtu aw ri chuan min ti harh a, Irene-i a lo ni. Ka tho vat a, chain hian ka kut chu thlun beh tlat hi a lo ni a, chutiang bawkin Irene-i leh SArah-i pawh. Sarah-i erawh a lo la harh miah lova, kan hma zawnah chuan Hlua chu a faifuk rut rut mai.

Chhuatlaiah chuan vaimim hi a darh nuai mai a, a then chu eihnu a ni a, a then chu la ei miah loh a i thung bawk. “Hlua, nangmah vek maw lo ni a?” tiin ka vin vak a. A rawn hawi a, ala nui sang zui. Muang chang hian min rawn pan hnai a, “Aw ni e, keimah vek alawm. Kei hi tualthattu diktak chu ka ni e, Mazuali, Nunui leh Rozami te kha keima thah an ni a, chuan SArah-i pawh kha ka ruk chhuah a ni.” tiin min chhang a, a nui vak vak mai.

“Engvanga ti nge i nih...enge i pawi an sawi?” tiin ka zawt leh a. Rum zet hian min melh a, “A chhan chu hmeichhiate hi mihring an nilo, chaichim mai an ni. Mi tenawm, bawlhhlawh...mi lepchiah vek an ni.” tiin min chhang leh a. “Hlua, hmeichhe tel lo hian mipa in awm thei lo. Engvanga hmeichhe haw em em nge i nih...hmeichhia zawng zawng hi an in ang vek lo asin.” ka han ti ve leh a.

“Aw ni reng e, hmeichhia zawng zawng ka haw hleinem. Heng model lepchiah ho hi ka haw ber, a chhan chu ka nau, ka farnu neihchhun, ka chhungkua min laksaktute an ni. Min enkawl bertu, ka natna min hriatthiam pui bertu min laksak a ni heng lepchiah ho hian.” tiin min chhang ta mai a. “Anih leh tunge i nau chu?” ka ti hu mai.

Ka mitah tak min en chung chuan, “Nunui...Nunui kha ka nau a ni.” a ti ta mai a. Mak ka ti lutuk chu Irene-i chu ka va melh ringawt, Irene-i chuan a lu a lo bu nghat a. Hlua bawk chuan, “HEng model ho hi a mal te te in ka hrechiang hlawm em em a, ka nau pawhin an chanchin min hrilh thin. Respiratory illness natna ka neih avangin ka thatlai hun pumpui deuh thaw damdawiinah ka hmang a, ka nau khan min chawm char char thin. MAhse modelling lam chauh a ngaihtuah a, heng mi hur ho vang hian ka bulah pawh hun tam a hman theih loh phah a ni. Chuvang chuan hmeichhe ho hi ka hua a, chaichim ang lek bakah ka ngai lo. Chuvang alawm an awm zawnah kha symbol kha ka ziah tel zel ni, anmahni nihna ka tarlang mai chauh a ni.” tiin a nui leh vak vak a.

Ka thinrim kher mai, “Mawla leh...heng model te avang hian tun thlenga la dam i nih kha. I nau Nunui khan i damdawiin awm man te, i in enkawlna man te hi khawlaia a chhar mai mai a nilo, modelling a tih avanga sum thawk chhuak thei chauh i nih hi.” tiin ka vin leh hrep a. A aia vin hian, “Kha thil kha dawt a nih kha...min bum in tumna mai mai a ni. Nunui’n vawi tam min hrilh chhuanlam mai mai a ni.” a ti deuh hlur mai.

“Anih leh Nunui kha show neih dawn ni khan hetah hian a kal tiraw?” tiin ka han zawt leh a. Khi suk chung chuan, “Keima koh a nih kha...damdawiin atang khan ka tlan chhuak a. Tichuan theih tawp chhuahin ka hmel ka siam danglam a, tichuan reporter angin ka inchei a. Nunui pawh ka be tawh ngai lova, a rukin min zawng min zawng thin tih pawh ka hria. Mahse khami ni khan ka thu a awihloh man ka hmuh tir duh a, helai hmunah hian ka ko ta a ni. Poison hi chu damdawiin atanga ka ruk chhuah a ni hlawm thung, tichuan vaimim kha model ho ei atan tiin ka hawn tir ta a nih kha.” tiin min chhang leh a.

“Engtin nge i thah theih zawk...mahni farnu pawh..” ka sawi zawh hma hma chuan Hlua bawk chuan, “A thuawih loh man a nih kha, Detective BElla. Thil nihna tak ka han hrilh ang che, Mazuali kha Nunui thiantha ber a ni a, ani kha ka bitum hmasa ta ber a ni. Party naah khan GAnesh-a bulah khan ka poison hi tlemte ka hralh a, cheng tam takin min leisak a ni. Tichuan kha poison kha drugs angin ka sawi a, GAnesh-a khan Mazuali kha mutpui a duh thu min hrilh bawk a. Tichuan remchangah la in a in turah pawlh turin ka ti a, a pawlh ta ngei bawk. Mahse a pawlh tlem deuh nge ni, a haw hnu thleng pawh khan ala kal thei a. Tichuan ka zui ru zel a, pangngai taka a thih hme thleng kha chu tihthaihin ka umzui a ni.” tiin min hrilh leh a.

“Anih i nau Nunui kha?”

“Nunui kha chu a thawk muang chi ka pe a, show neih zawh hlim khan cameraman pakhat angin dressing room ah khan tumah an awmloh hlan khan ka zui a, tichuan a damdawi a thawk ta a. A thih fel veleh sign kha ka ziak a, ka chhuak leh ta a ni. Mahse khami hnu khan Irene-i hi bathroom atangin a rawn chhuak thut a, ka biru hman hlauh zawk a. Nunui ruang kha hlauh hmel takin a en a, hmanhmawh taka inthlakin bathroom ventilation atangin a tlanchhe ta a nih kha.” tiin min chhang leh a.

Irene-i chu ka va en a, “Nunui ruang ka hmuh khan ka chiai vek a, ka hlauthawng em a ni.” tap chung hian a lo ti a. Hlua chuan sawi zawm zelin, “Irene-i kha ka zawng ru nghal a, vanneihthlak tak maiin Rozami khan a hruai haw ta hlauh va. Rozami lah kha vaimim ka rukna huan neitute in bul lawkah a lo awm bawk nen, Irene-i ka man theih nan Rozami kha ka that veleh ta a ni. ChuanSarah-i pawh hi ka ruk chhuah theih dan i hre duh em, khami zan khan security leh nurse pakhat an inchhai nasa khawp a, chu chu remchangah la in ka ru chhuak ta a nih kha.” a ti leh ham ham mai.

Chutah ka pistol min chhuhsak tak chu rawn phawrh chhuakin min tin a, “Ka sawi zo tawh e...thu hnuhnung sawi duh te i nei em?” a han ti a. “Khawngaihin Anton..that suh.Anton khawngaihin..” tiin Sarah-i chuan a ngen lawm lawm a. Mak ka ti kher mai, “ANTON a? Tunge Anton-a chu?” ka ti hu mai a.

Chutah kawngka bul atang chuan mipakhat aw hian, “Amah Hlua kha Anton-a chu a ni, Misogyny natna nei, mi rilru kim lo Anton Zorinmawia a nih kha.” a rawn ti a, ka thla ava muang tak em. A chhan chu ka aw hriat vang kha a ni, tudang aw mah nilovin ka boss Nathan MAlsawmkima aw a ni tih ka hre chiang lutuk tlat.

RAng takin ka va hawi phei a, Nathana chu pistol nen kawngka bulah chuan a lo ding ran mai. Rum zet hian Hlua chuan a melh a, “Zawnga...engtin nge min chhuichhuah a?” tiin silai chuan a tin ve nghal a. Nathana chuan pistol-a tin chung reng chuan a rawn pan phei a, “Engvangin nge ka hriat lohvang, ka rinhlelhna che a rei tawh lutuk. Misual ber i nih kan rinloh nan che hliam i tuar lui vel a, reporter tak tak i nilo tih pawh ka hre vek.” a rawn ti leh ta siah siah mai.

Hlua chu a nui suk a, “A tha e, nang nge nge..Pu NAthan..an sawi Nathan Malsawmkima chu i lo fing hle mai.” a han ti vel a. Nathana chuan rum zet hian a melh a, “I mit ko duk chur khawpa siam tur chuan ka fing tawk alawm, Mama...silai kha peih rawh...nang aiin silai ka kap thiam fe zawk tih hre rawh.” tiin a lo chhang let a.

Chutah Hlua chuan thinrim tak hian, “Animaw..anih chuan min kap la..min kap ta che...i thiannu hi a thi nghal a nimai.” tih pah chuan min tin leh a. Chiang fek fawk hian NAthana chuan, “Anton..i silai kha peuh rawh. Tun bak ka sawi tawh lovang...peih vat rawh.” tiin a han vau leh a. “Ka peih lovang...i kap thiam takzet anih chuan i thiannu hi han chhan tum teh..ka that..” a sawi zo hman lo.

Nathana chuan a awmah chuan a kap ta pawp mai a, Hlua chu a thal tawp mai. RAng takin a silai chu NAthana chuan a laksak a, “Bella..i tha maw?” tiin min rawn pan nghal. “Ka tha e, Sir...mahse engtin nge?” ka tih lai chuan, “Engmah sawi rih suh..nakinah ka hrilhfiah ang che.” a ti daih mai.

Hlua ipte chu ava dap a, chahbi a rawn phawrh chhuak a. Min thlunna chu a rawn phelh a, mahse Sarah-i chu ala harh chuang lo. Hlua chu ka va en a, maimitchhingin a let reng mai. “A thi em ni?” Irene-i chuan a lo ti a. “Thih puina tham a nilo, a point takah ka kap lo.” tiin NAthana chuan a lo chhang a.

Tichuan min thlunna te chu NAthana chuan a phelh zo ta a, “Sawpa saw engtin nge kan tih dawn?” tiin ka zawt a. Nathana chuan Hlua chu a han en vang vang a, “Motor ah kal phawt ang u...tisawn lo mu mai mai rawh se.” a ti ringawt a. Pawnah chuan kan chhuak a, motor lam chu kan pan a.

A hnuhnung berah chuan ka kal a, ka hnung atang chuan tu emaw hian min rawn man leh thut mai. Hlua tho chu lo niin, chemte hian ka hrawkah min tin a. Na tih vanga rum tuah tuah chung chuan, “Tumah damin in chhuak lovang, ka that vek dawn che u.” a ti ta khur khur mai. Nathana lahin Sarah-i nikhawhrelova awm mek chu a paw laklawh si, Irene-i lah chuan a hlau em em bawk si.

Zawi muang chuan motor lam chu min man bet chung chuan min pan pui a, “Nathan..chahbi min rawn pe vat rawh.” a han ti leh khur khur a. Chutih lai tak chuan silai a puak dur mai a, keimah thleng thleng chuan min nghawr dawt mai. Zawi muang chuan Hlua chuan min thlah riai riai a, a tlu ta tawp mai.

Silai puak ri lo chhuahna lam kan va en chuan rin loh lutukin Kevina a lo ni a, silai keng chung chuan a lo ding khur zawih zawih mai. NAthana nen chuan kan en reng a, khur dar dar chung chuan Kevina chuan, “Ka..ka zui ve reng che u alawm. Eng..engemaw zawng tala puih che u ka duh a ni.” inthlahrun hmel tak chuan a han ti a.

Nathana chu a nui sak a, “Kevin, kan nunna i chhan avangin kan lawm e. Police Inspector huaisen tak i ni...ruang hi i naute thawn phei tir la, a bak chu ka cover vek ang che.” a han ti a. Kevina lawm lutuk chu hnuk ulh teuh hian, “Ka..ka lawm e, Sir...Sir Nathan.” a ti deuh tuau mai, a cute letling zawk.

***********************

Engkim kan buaipui fel hnu chuan Nathana apartment ah chuan kan let dun leh a, Sarah-i erawh hospital lamah dah niin Irene-i erawh police te bulah thu zawh fiah turin kan dah phei thung. “Min hrilh tawh la..engtin nge i hriat theih a?" tiin ka han zawt a. "VAimim zuartu kha Hlua a nih ka rinna a rei tawh a, chuvang chuan Ganesh-a bulah Hlua thlalak kha ka hmuh a, amah ngei a nih thu min hrilh ta a ni. Chuan amah bik chu ka chhui zel a, TRM Hospital ah kum 3 lai respiratory illness vangin a lo awm tawh a,  alo tlan chhuak hi a lo nia." tiin file pakhat hi min pe a.

A thlalak chu ka han en a, Hlua a ni tih a hriat miah loh. Nathana chuan sawi zawm zelin, "A chetdan hrim hrimah hian dik lo a awm hian ka hre tawh hrim hrim a, chuvang ania Ganesh-a pawh ka zawh chhin kher ni. A hming tak tak chu Anton Zorinmawia daih a lo nia, Nunui u a ni tih thlengin ka hre leh bawk a. Chaichim chungchang kha chu a rilru buai laiin Nunui'n ngaihtuah chiang mang hlei lovin khatiang lam ziahna lehkhabu a lo leisak a ni awm e, a rilru ah a kal bing lutuk a. Modelling vangin Nunui'n a ngaihsak tha lo nen, tikhan Misogyny disorder a neih phah ta a nih kha. Hetiang natna hi a common lo khawp a, hmeichhe haw em emin an awm thin an ti a ni." tiin min hrilhfiah a.

"Anih leh engtin nge khatah khan Hlua..oh..Anton-a chu a awm tih i hriat?"

"Sammy-a'n in inphur lai a lo hmu a...Sammy hi a tangkai khawp mai." tiin a nui suk a. "Anih leh Irene-i chu kan kawm veleh kher duh angem?" ka han ti ve leh a. A zi mar deuh vak a, "Peih tawh lo ea...engpawh nise kan case chu a zo chu a ni ta mai a...Sarah-i pawh doctor-i'n a ngaihtuah awm loh a tia, Irene-i pawh Maxie kutah ka dah...a chhungte nen chuan lo va inhmu hlawm teh se." a ti sam et mai.

Rei deuh fe kan titi hnu chuan ka haw ta a, Nathan Malsawmkima nena kan case khawih hmasak ber chu kan zo ve thei ta. Irene-i erawh kawm zui leh chu ka chak viau nangin, boss berin a peih tawh bawk si lo. Engpawh chu nise case dang a awm leh hma chu kei nula senior, kum 30 pel ve zan tawh hi ka han lerh tak tak ange...mangtha phawt u.

**********************

THE END