TIRA MEI KAIAH (MIZO FICTION CULT HORROR STORY) Written by : Aaron Malsawmdawngzuala Chapter - 5 (LAST)

 TIRA MEI KAIAH

(MIZO FICTION CULT HORROR STORY)

Written by : Aaron Malsawmdawngzuala

Chapter - 5

(LAST)

**********************

DAmdawiin lah kan kalna park atangin a hla phian bawk si a, Annie lah chu a tal a tal tawh mai. "Ana lutuk, apa...ka thi dawn...ka thi takngial dawn." tiin a vial ngawng ngawng mai a. A va han hrehawm tak em, "Bawihte, kan thleng tep...tuar fan fan rawh, kan thleng tep ania." tiin ka hnem hram hram a.

A seat hnung lamah chuan ka mut tir a, a rum a rum mai. Chutih lai karin ka motor petrol lah chu ka lo check lawk miah lo chu niin, a petrol meter ka en chu a lo awm tawh mang lo hi a lo ni a. Km 2 vel lai tlan ala ngai bawk si, min daih dawnin ka hre lo. Short cut pakhat ka hriat ah chuan ka tlan ta tawp a, mahse kawng erawh a chhe kher mai.

Kan in sawh dawt dawt a, Annie lah chuan na a ti tawh bawk si. "Bawihte, tuar hram hram rawh, kan thleng har tawh lovang." ka han ti leh ringawt a, mahse kan la thleng mai dawn lo tih hre chiangtu ber ka ni. Ka va hawi phei leh zeuh zeuh thin a, a hmai zawng zawng pawh a lo duk chhuak vek tawh.

Ka mangang tawh tak zet, chutah ka hlauh ang ngei ngeiin petrol chu a zo ta. Motor chu a thi ta hmak mai, kan awmna lai chu pumpelh lam a nih avangin a reh em em mai a. Tih ngaihna ka hre tawh lo, "Apa...ana...ka thi dawn." tiin Annie chu a tap nasa tawh mai si. Ka phone ka phawrh nghal a, mahse signal a lo bo vek mai.

"Hrep taka.." tiin ka motor steering chu ka beng vak vak ringawt a, tah a chhuak takzet. Seat hnung lamah chuan ka va phei a, "Bawihte, ka tawng i hre thei em?" tiin Annie biangah chuan ka chul a. Mahse tawng pawh a tawng tha hleithei tawh lo, a vun chu a dang vek tawh. Ka be mawlh mawlh a, mahse a chau tawh takzet.

A thi tawh mai dawnin ka hria, "Bawihte, min chhang teh, i harh em?" tiin ka zawt leh a, ka mittui a tla zawih zawih tawh. A rum nghut nghut ringawt tawh a, a tawng pawh ka hre mumal hleithei tawh lo. Amah lah chu a khur ngat ngat mai a, a taksa pawh a vawt vek tawh. Chutia mangang taka ka awm lai chuan kan car hma zawnah tak chuan naupang pali an lo ding tlar thap mai a, ka phu nasa kher mai.

Rang takin motor atang chuan ka chhuak a, chung naupang pali te bulah chuan ka va kal a. An hmel ka han enchiang a, tute nge an nih chu ka hre chiang kher mai. Khang naupang, ka hmuh fo thin te ngei kha an ni a, Muanpuii pawh a lo tel ve ngei e. Muanpuii chu hmeichhe awmchhun a ni a, midang zawng chu mipa an ni.

"Nangni hi...nangni hi tute nge in nih?" tiin ka vin hlawm vak mai a. Mahse tumah chuan min chhang lo, an pali chuan an kut hnung suihin rum zet hian min melh thap ringawt mai. "Engvangin nge kan chhungkua in rawn tih buai, tute nge in nih..mawh, sawi rawh u." tiin ka vin leh thak a, mahse tumah chuan min la chhang chuang lo.

"Enteh u, ka fanu sawn na a tuar mek a. A chungah sawn engthil nge in tih? Nangmahni vanga sawtianga awm saw a ni tih ka hria, khawngaihin duhtawk rawh u. Min kalsan rawh u, ka fanu saw khawngaihin ti dam leh rawh u." tiin a ngenin ka ngen ta tawl mai a, an zinga mipa naupang pakhat, a upat hmel deuh ber chu a lu a bu nghat mai.

Chutah an kut hnung suih chu phelhin an kut an rawn ti lang a, sa hel ni awm tak, thisen kai hnuang mai hi an hum far hlawm mai a nih chu. Thisen a far tluk tluk a, mak ka ti kher mai. Chutih lai chuan hnung lam atang chuan, "Apa...ka ril a tam." ti ri hi ka hria a, ka va hawi phei nghal vat.

Annie chu car atang chuan a rawn chhuak chu niin, thei leh thei lo hian a rawn kal tawk tawk a, a hmel mawlh mai kha, hmuh a hrehawm takzet. "Annie, BAwihte..nilo." tiin ka va tlan phei a, a bul ka va thlen veleh chuan a zawi hnawk mai. A tlu tur chu ka va dang a, "Bawihte, min en teh. Lungngai suh, i tha leh mai ang." tiin ka be mawlh mawlh a.

Chutih lai chuan naupang pali te chu an sahel ken lai nen chuan min rawn pan mek hlawm a, "Eng...engthil nge tih in tum?" tiin ka lo zawt a. Muanpuii ber chu a lo kal hmasa ber a, "Hei hi ei tir rawh, a zia mai ang." tiin a sa hel ken chu min pek a rawn tum a. "Eng a? He sa hel hi maw?" ka ti hu mai.

Muanpuii chuan  alu a bu nghut ringawt a, ka hma zawn takah chuan chu sa hel chu a lek vang mai. KA pe dawn tak tak nge, enge ka tih dawn ka hre lo. "Apa..ka..ka ril..ka ril a tam lutuk." tiin Annie chu a rawn phun leh sap a, ka rilru a insual buai nasa kher mai. A tawp a tawpah chuan sa hel chu ka la a, Annie chu ka ei tir ta.

A sa them a seh thla chiah chu a rawn meng kawk mai a, ka sa ken lai chu min chhuhsak nghal. Chutah le, Annie chuan chu sa hel tlang lian zet mai chu a hap hian a hap ta buan buan mai a, a pet fan dawr dawr mai. Reiloteah chuan ka ei zo nghal a, "Ka duh leh..ka duh leh.." tiin a rak vak vak a, a aw te kha a rapthlak takzet.

A hma zana hospital-a a awm laia, "I fanu ka nilo." tia min tawngkhum tuma, a aw ang chiah kha a ni. Naupang dangte chuan an sa hel ken lai chu an pe ve leh a, a lo ban rang kher mai. Tichuan mi a ang maiin chu sahel chu a ei ta buan buan mai a, a hmuiah leh a kawrah te chuan thisen a kai hnuang tawh mai.

Mak ka ti bawk si, ka rap bawk si chuan ka en reng ringawt a. KA thin a phu dup dup mai, awmdan tur pawh ka hre lo. Chutah a ei zo va, ka lam rawn hawiin a nui sang mai a. A vun duk thluah te pawh chu a reh leh vek tawh a, mahse a hmuiah chuan thisen a kai berh hneh hle. "Apa..ka puar tawh e." tiin a la nui zui.

Chhan dan tur pawh ka hre lo, a bul hnaia va kal pawh ka ngam chiah tawh lo hial zawk. Chutah zawi sap hian, "Apu a lo kal." a ti leh a, ka hrethiam lo kher mai. "Enga? Apu a?" ka ti hu mai a. A lu bu nghatin, "Aw..apu a lo kal, i hnunga kha.." a ti leh a. Rang takin hnunglam ka hawi a, putar pakhat, palian tak mai, khabe hmul buk chhur mai hi ka hnungah chuan a lo ding khur mai a, suahdur a lo la keng run zui.

Chet ka la hman eih lo, a suah dur ken lai chuan ka luah chuan min hlap pawp mai. Ka mit sulh a, ka tlu bawk nghal thlawp. Nikhawhrelo chuan ka awm kher lo, mahse ka lu a hai lutuk chu ka che sawn thei lova, ka beng a kiu vawng vawng bawk. Ka khaw hmuh fiah lo hle mahse Annie tap ri chu ka hre ruai ruai thei a, reiloteah chuan nikhawhrelovin ka awm ta.

***********************

"Thianpa, thianpa..ka tawng i hre thei em?" tia min sawi vak vak tu aw ka hriat chuan ka harh chhuak deuh hlawl mai. Ka mit ka han meng chu ka awmna chu a thin ngei mai, ka kut chu chain hmanga thlun niin kudam niawm tak ah hian ka lo awm a. Min thlunna chain chu steel pipe hrawl tak mai nen a lo in thlun zawm bawk.

Min kai tho tupa hmel chu ka han en a, a la naupan hmel em em a, kum 25 ala pel lovang tih tur hmel a pu. Ani pawh chu ka bul lawkah chuan chain bawka thlun a lo ni ve bawk a, "Khawnge ka awm? Tunge i nih?" tiin ka zawt nghal. "Tunge i nih zawk? Engtin nge he chhungkua hi i hriat?" tiin min lo zawt let daih mai.

"Tute chhungkua maw?"

"Min man tute hi....Pu Simon Vanlalpeka te chhungkua hi engtia hria nge i nih?"

Ka bo tulh tulh mai, "Chu chu tunge? Simon Vanlalpeka chu tunge a nih?" tiin ka zawt let veleh a. "I hre lo amaw? Mahse, engtin nge hetah i awm theih si? Engvangin nge an man che?" tiin min zawt let veleh a. Ka hrethiam hlawl lo, "Tunge i nih zawk?" ka han ti ve leh a. "Mapuia ka nia, ka pu..ngaithla teh, enge i hriat hnuhnun ber min han hrilh teh." tiin min chhang a.

"Ihh..ka fanu, ka fanu Annie..a natna a chhuak a, chuan damdawiin ka hruaina lamah putar pakhatin suahdurin min vua a, ka lu ah..chu zawng chu ka hria." ka tih chuan mak tih hmel deuh hian min en a. Phawk hru hian, "Annie? Annie i fanu maw? A..a awmzia chu.." tiin a aia phawk chuan min han en leh hru a.

"Aw ni e, i hria em ni ka fanu chu?" tiin ka zawt leh veleh a. A mittui a rawn luang nghal zawih zawih mai, "Nang hi SArah-i pasal i ni tihna animaw?" tiin a tap ta hawm hawm mai. Ka hrilhhai takzet, "Enge awmzia? Ka nupui Sarah-i pawh i hria maw?" ka ti hu mai. "Avan pawi tak em, ka hlauh ang ngei ngei in thil a thleng ta a nih hi." tiin a lu a dawm vawng vawng mai.

"Mapui, tu chiah nge i nih? Chuan khawnge ka fanu a awm?" tiin ka zawt leh a. "Ka pu, he chhungkua ami tho hi ka ni." a ti leh ta daih mai. "Enge awmzia? Hetah man i ni ve tho va, mahse an chhungkaw zinga mi i nih thu i sawi leh bawk sia...tute nge an nih reng reng? Chuan engvangin nge kei hi min man?" tiin ka zawt leh a.

"Ka pu, i nupui Sarah-i khan pasal hmasa a nei a. A hming chu Samuela a ni a, kei hi Samuela nau Mapuia ka ni." a ti ta mai a, ka hrethiam tan dawnin ka hria. "SAmuela...Samuela nau maw i nih a? Anih chu Simon Vanlalpeka hi i pa tihna aniang maw?" tiin ka zawt leh a. "Aw ni e, Setanic cult chhungkua atanga seilian kan ni a. SArah-i kha kan PAthian nupui tur atan ka u khan a tlang a, mahse ka u chuan a nunna a hlan ngei ngei a ngai thung si a ni. Kan PAthian khan a mutpui hma in ka u, Lalfapa upa ber Samuela khan nupuiah a nei phawt tur a ni a, chu chu kan rindan a ni." tiin min chhang a.

"Anih leh tinge an chhungkaw fapa ni ve si an man ve che a, engtia rei nge hetah hian i awm tawh?"

"SArah-i tlanchhuah atang khan.."

"Kum 10 chuang zet i awm tawh tihna maw?"

"Aw ni e, a chhan chu Sarah-i tlanchhuah theih nan khan kei hian Sarah-i kha ka pui a ni. Kan chhungkua hi chuan dan khirh tak mai kan nei a, nunna hlan ngai an awm a nih pawhin an hlan mai tur a ni. Ka patea pawh ka naupan lai khan kan chhungkaw dan bawh chhia in khaw dangah nupui a rukin a nei a, mahse ka pa ten an man chhuak a, an hal hlum a ni."

A va mak ngai em, eng ang chhungkua nge ni ngai? Chutiang khawpa chhungkaw rapthlak chuan tunah hian min man mek chu a ni si a, Annie lah khawnge a awm ka hre bawk si lo. "Han sawi zel teh.." ka ti leh a. "Keipawh khan ka pui tih an hriat chhuah khan min man a, mahse Sarah-i him dam taka a tlan chhuak kha kei chu ka lawm zawk. Anihna takah chuan kei pawh hi hal hlum tur ka ni a, kan chhungkua ka phatsan avangin. Mahse ka pa khan a thei thlawt lova, kan PAthian hnenah hriatthiamna dilin hetah hian ka damchhunga awm tawh turin min khung ta a ni." tiin min chhang leh a.

"Anih leh engvangin nge Sarah-i chu i puih a?"

"A chhan chu ka u a thi tawh a, hmeichhe dang zawn leh kha keima hna a ni ve tawh thung a. Nupui ka ru anga, tichuan kan Pathian chuan a mutpui leh anga, tichuan keiman an inneih lawmpui nan ka nunna ka lak ve angai dawn a ni. Chu chu ka duh lova, Sarah-i chu tlanchhuah puiah ka sawm ta a ni. Sarah-i pawh kha a hlim ngai lova, hlau leh thlabar reng rengin a khawsa thin a ni."

Ka ngawi vang vang a, "Mapui, kan tlanchhuah angai." ka han ti a. Mahse beidawn hmel tak hian, "Kan thei lo, tlanchhuahna a awm lo." tiin min chhang a. "Kan dap chawp mai ang, a awm em em ang." tiin beiseina ka la nei fan. "Lo tlanchhuak thei ta pawh ni ila min man leh hma dawn lutuk, thiltihtheihna sang tak nei an nih hi. Mihring pangngai ang mai mai an ni lo, kei leh Sarah-i tih loh chuan ramhuai hnenah an thlarau an hralh tawh a ni." tiin min chhang a.

"Kei nin Pathian kan nei thung alawm, ramhuai leh Setana meuh pawhin a hneh theih loh Pathian, lei leh van siamtu, engkim ti thei kan nei ve thung alawm. Kan tlawm mai tur a ni lo, kan pahnih a kan tan rual chuan kan hneh thei em em ang." tiin ka fuih hram hram a. Hnuailam melhin a tap a, "Kum tamtak ka awm tawh, tlanchhuah ka tum lo bik emaw i ti em ni? Tlanchhuahna a awm lo, nitin ka tawngtai, mahse chhanna ka dawng chuang lo." tiin a indawm kun tlawk tlawk mai.

A kutah chuan ka va vuan a, "Mapui, ngaithla teh. Ka nupui ni tura SArah-i, he hmun tihbaiawm taka i rawn hruai chhuah avang hian ka lawm takzet ania. Lawmthu hrilh nan che helai hmun atang hian ka la chhuak ve thung ang che, chu chu ka tiam a che." tiin ka han fuih leh sauh sauh va, mahse keimah tak pawh chuan engtin nge kan tlanchhuah ang ka hre bik hauh lo.

A ngawi vang vang a, "Awle...anih chuan kan tum dawnnia." tiin min chhang ta nge nge a. "A tha lutuk, ruahmanna kan siam dun vat angai. Mahse kan tlanchhuah hma in ka fanu Annie kan hmuh hmasak angai, a tello chuan kan chhuak tur a ni lo." ka han ti leh a. "Annie chu naupang ho bulah khan an awm ang." tiin min lo chhang a.

"Naupang a? Khang naupang pali te kha em ni? Muanpuii..Muanpuii tih ka chu ka hria." ka lo ti nghal vat. "AW..Muanpuii, Mafela, Lawma leh Chhana te an nih kha. Ka unaute tho an ni, ka pa khan a nupui hnuhnung ber nen khan pali lai a nei leh a, anni ho pawh an thlarau an hralh sak nghal vek. A chhan chu keimah vang a ni, kan chhungkaw danah chuan ka pa fate thlah kal zel atang hi chuan kum 18 kan tlin hunah chauh kan thlarau hi hralh chauh tur a ni a, mahse kum 18 ka tlin dawn kum khan Sarah-i kha ka tlan chhuah pui ta si a, khavang khan ka pa chuan dan thlakin kum 5 an tlin hunah an thlarau hralh nghal zel tawh turin a ti a ni."

"Ka la hriatthiam loh chu....Annie hi tinge kan inneih hnu ah chauh a pai tan si a?"

"Sarah-i kha mi bik a ni a, kan PAthian nupui a ni.Vawi khat bak a pawl a ngai lo, mahse a pawl tawh a nih chuan kum 6 danah a rai zel tawh dawn thung a ni. Tin, mipa dang lakah fa a nei ve thei tawh lo bawk ang, chu chu kan Pathian malsawmna a ni." tiin min chhang ta mai a, a awmzia chu Sarah-i nen hian lo innei zel pawh ni ila, ka fa an piang ve thei dawn miah lo tihna a nia, an PAthian malsawmna chu ka tan chuan anchhia diktak a ni.  

Mapuia chuan zawizawm zelin, "A tlan bo atanga kum 6 naah chiah nang a nei che a, tichuan Annie hi a lo piang ta a ani. A tlan bo hnu khan ka pa te hian an zawng reng a, a tawp a tawpah chuan an hmu ta a. Mahse pasal a nei tawh tih an hre leh ta si a, chuvang chuan SArah-i chu dahthat a, Annie chu laksak an tum ta a ni. Tichuan naupang ho hmang hian Annie chu rawn hruai an tum ta thin a, mahse nangmah vangin an thei leh ta thin lo a ni." a ti leh a.

"Keimah vang maw? Tinge keimah vang a nihna? An duh te chuan an hruai bo thei reng tawh ang chu, he inah ngei pawh naupang ho khan an hruai theih si kha...tinge an rawn let tir leh si?"

"A chhan chu khami ni khan Annie kha kawl reng thei tawh an ni a, mahse Annie khan i chanchin a sawi reng a. A pa diktak chu nang nilovin an Pathian a nih zawk thute hrilhin a thluak suk sak an tum ngial pawhin nangmah zawk kha a pa angin a sawi tlat a, chuvang chuan ka pa tlawmngai khan a rilru a thlak a. NAngma phalna ngeiin Annie hi laksak che a tum a, a awmzia chu loh theih lohvin i phal ngei nan hreawm tawrh tir che a tum a ni. Mahse i taksa ah bei lovin, Annie taksa ah zawk a tuan ta a ni. Tichuan eng tin tin emaw a tihthaih ta che a, Annie na a tawrh tir ta bawk a ni. Chuvang chuan khami ni khan Annie kha an pe let leh che a nih kha, ka pa hian a cho che tihna a nih chu."

"Anih Annie chungah hian engthil nge thleng hi? Engtin nge Annie hi an tih zel dawn? Anih keipawh chuan phal ta pawh ni ila, engtin nge min tih zel dawn?"

"He chhungkaw dan zawm tur leh kan SAkhua zawm turin an sawm che anga, i duh lo a nih chuan thah i ni ang." tiin min chhang leh a. Sawi tur pawh ka hre lo, zawh leh chuan tur pawh ka hre tawh lo. Mapuia bawk chuan, "Annie pawh kha a infiamna ngainat ber hmang khan an thlem thin a ni, naupang te khan..TIRA MEI KAIAH..khami hmang khan..kha naupang ponto hla kha school-ah infiam nan an hmang fova, chumi chu remchangah la in tikhan an bum chhuak thin a ni. Khami ni, Annie an hruai bo ni khan ka pa chuan Annie kha sahel a ei tir a, chaw pangngai leh thildang engmah ei thei tawh lo turin anchia a lawh ta bawk a ni." a han ti leh a.

Chutih lai chuan kan awmna room kawngka chu a rawn ri rawk mai a, min vawthlutu, Pu Simon Vanlalpeka ni ngei tur chu a rawn lut a. A hnungah chuan mipa hlir pathum hian an rawn zui lut bawk a, "Sarah-i pasal i ni ang maw?" tiin min zawt a. Mahse a chhan pawh ka chhang lo, rum zet chuan ka melh ringawt.

A nui suk a, "A ngeng chi i ni tlat mai, ka tunu Annie hi i fa a ni lo...kan Pathian Lucifer-a fa zawk a ni." a han ti leh a. Hlauh chu ka hlau, mahse Mapuia sawi kha ka hre chhuak zawk mai. Annie khan apa angin min sawi lui tlat a, chuvang chuan Pu Simon-a hian min cho kha a ni a. Ka luhlul chhuahin hlauh angin ka lang duh bik lo, ka nui lui ta vak vak a.

Chutia ka han nui ta mai chu Pu Sinom-a leh midang pathum chuan mak an ti hmel kher mai, chutiang bawkin Mapuia pawhin. Vin zet hian Simon-a chuan, "Enge i nuih a? Fiamthu ka thawh em ni?" tiin min melh rum kher mai. "Ni love, kan Pathian Lucifer i tih lai tak kha mawle..Lucifer-a chu tunge a nih reng reng a?" tiin ka ngeiawm chu ka chhuah lui ve tlat a.

Chutah min rawn rek a, "Ngaithla rawh Rina, i phalna thlapin Annie hi ka chhuhsak dawn che a ni. I phalna thlapin, i hria em? Kan PAthian hi ngainep suh, keini pawh hi min ngainep hek suh." tiin min vau khar khar a. "Annie chu ka rila rah, ka fanu chu a ni lo maithei e...mahse ka enkawl a ni, nangni nilovin. Chuvang chuan tunah chuan ka fanu a ni tawh, chu chu hria ang che." tiin ka chhang let ve ngat.

Min rehna chu a thlah a, hmuhsit hmel tak hian min nuih tiah tiah mai. "A tha e, i hre dawn alawm. Annie hi i phal ngei ang, vawiin hian chumi pual chuan ceremony kan nei dawn a, nang hi i pawimawh ber tih hria ang che. Chumi hun nei tur chuan tunah hian kan rawn hruai dawn che a nih hi, vawiin atangin Annie hi kan ta a ni tawh ang." tiin a ipte atang chuan chahbi a rawn phawrh chhuak a.

Chuveleh chung tlangval pathum te chuan min man bet a, Simon-a chuan min thlunna chu a rawn phelh a. Mapuia chu en in, "NAng chu tikhan lo awm rawh, nakinah chaw ka rawn pe dawn che nia." a ti a. An in lamah chuan min hruai phei a, a zau em em mai lehnghal. Mahse in dangdfai tak a ni, thing veka sak a ni bawk.

Hall zau tak maiah chuan an chhungkua chu an lo ding tlar thap mai a, nutling 2, patling 2, hmeichhe la naupan hmel tak pakhat, pitar pakhat leh tlangval pathum, min man bet mek tute, Pu Simon-a nen an vai chuan 10 chiah chiah an ni. Hall lai takah chuan min thingthit tir a, chung min mantute chuan min din hual a.

KA hma zawnah chuan Pu Simon-a chu rawn dingin, "Kei ni hi Sakhaw din mek tute kan ni a, Lucifer-a hi kan Pathian a ni. Kan Lalnu Sarah-i, kan Lalpa phatsan a, midang, SAkhaw dang betu a neih avang hian zanin hian a fanu neihchhun, Annie Lalnuntluangi hi amah lo enkawltu, a hringtu pa nia lo inngai, Sarah-i pasal Rina hian kan hnena lak min phal sak dawn a ni." a han ti lauh lauh mai a.

Midang ho lah chuan an lu an lo bu sap sap hlawm a, chutah Pu Simon-a chuan min melh a. Rawn kunhniam in, "I phal hma chu sawi sak i ni ang." ala ti zui. Chutah ngil tak hian a ding a, "Le, sawi rawh le." a han ti a. Mahse ka lu ka thing tlat, pakhat chuan min hnek siah mai a. Ka hai nghal chhawk thei, "Engtikah mah ka sawi lovang..ka phal lo." tiin ka la tang lui talh a.

An chhungkua chuan eng engemawni chu an chham nghal mual mual hlawm a, an kut an inkai vek a, an ding bial thup mai. Chung tlangval pathum te chuan min sawisak chhunzawm char char a, mahse ka thih thleng pawhin ka sawi dawn chuang lo tiin ka rilru chu ka ti khauh lui ve tlat thung, rei ka daih ange maw.

MAhse chutih lai tak chuan Annie aw hian, "Apa...apa..nilo, apa kha hnek tawh suh u." a rawn ti ta maia . KA va hawi chhuak nghal, Annie chu tap chungin ka lam pan chuan a rawn tlan mek a, a hnungah chuan khang naupang pali te kha an lo ding thap bawk. "Annie..BAwihte." tiin thei leh thei lo chuan va pan ka tum a, mahse min sawisa leh hrep mai.

Annie chu a tap vak vak a, rawn kal a tum chu hmeichhe ho chuan an lo dang a. "Nilo..apu..api, apa saw va chhan rawh u. A thi mai ang, tina tawh suh u." tiin a ngen lawm lawm mai. Kei lah chuan tih theih ka nei der mai si lo, chet lak ve dawn pawn ka kut lah handcuff a thlun a la ni bawk si.

Chutah Simon-a chuan thinrim hmel tak hian Annie chu ava pawm a, vin zet hian, "En rawh..khu mihring khu i pa a ni lo. I hria em? I pa chu midang a ni." tiin a hrawk ta hrep mai a. Ka thin a sa phat mai, "ZAwnga, ka fanu kha vin reng reng suh aw.." tiin ka tha neih zawng zawng nen chuan ka tho a, ka va pan nghal a.

Mahse Pu Simon-a chuan min lo rek a, "Ka fanu i la ti cheu ngam amaw?" tih pah chuan min theh dawr a, a nupui niawm tak, pitar chu ka va bawh deuh thuak mai a, a tlu thelh nghe nghe. Pitar chuan thinrim hmel tak hian, "I mawl em ni? Kan tih tur chu ti vat zawk ang u, nangmah zawk khatia i in control theih loh tak mai le?" tiin a hau hrep mai.

Chutah chhuatah chuan hair pin ka hmu ta hlauh mai, tuma hriat loh hlan chuan ka chhar zeuh va, ka hum bo nghal vat. Simon-a chuan a lu a bu nghauh nghauh va, "Aih..a phal hma chuan ka tlawm dawn lo. Ka intiam tawh angin a phal ngei tur a ni tawp, ka thuthlukna ka sawh sawn dawn lo." a la ti fan mai.

Tichuan pawhdawh ava hawng a, pistol a rawn la chhuak ta mai a nih chu. Kei erawh chhuatah chuan ka la tlu reng a, ka la tho chhuak duh lo lui a ni. Pistol chuan min rawn tin a, "Ka Lalpa hnenah thu ka tiam tawh a, i phal ngei tur a ni. Sawi rawh, anih loh chuan ka kap ang che." tiin min vau ta khur khur mai.

Pistol-a min tin meuh chuan ka zam chhe ve kher mai, mahse ka la sawi duh bik hauh lo. Chutih lai chuan kawngka a rawh ri bur a, a rawn inhawng mai pawh nilovin a kawng khar chawp chuan a rawn tlu ri rum rum mai. Ka beisei loh lutukin Police 3 hi silai nen an rawn lut a, "Che tawh suh u, anih loh chuan kan kap hlum vek ang che u." an rawn ti a.

Chu aia ka beisei loh bawk chu, SArah-i a rawn lut ve kha a ni. "Sarah..nang?" tiin ka en hu a. Midang pawh chuan mak tih hmel tak hian Sarah-i chu an thlir thup mai, "SA..SArah...nang..nang hi." tiin Pitar chu a mittui a tla nghal zawih zawih mai. Thinrim hmel tak hian Simon-a chuan, "Phatsantu...i thil tih pawi zia hi i hmu em?" tiin a lo vin hrep mai a.

SArah-i chuan, "Kap suh u...kap hrih suh u." tiin police te chu a dang a. Tichuan Simon-a chu en lehin, "Ka hria...phatsantu ka ni. Keimah vang vek a ni tih ka pawm, mahse ka pasal khan thiamlohna a nei lo. Khawngaihin kal tir rawh u, keimah hi in duh chu ka ni tih ka hria. Keimah hi min la ula, ka pasal chu chhuah rawh u." tiin a ngen a.

Mahse an zinga nula, niawm tak, la naupan hmel tak chuan a lu a lo thing a. "I plan lawk vek a nih hi, tuman kan ring lo che. Heng police ho hi chhuah tir rawh, anih loh chuan i pasal saw a thi ang." a lo ti ve pang pang mai. Simon-a pawh chuan, "A dik, pen khat pawh a in rawn tawlh hnai leh a nih chuan.." tih pah chuan tlanval ho chu ava melh zauh va.

Chu veleh tlangval zinga pakhat chuan Annie chu a man bet nghal a, "A ring ruh ka herh tliak nghal ang." a rawn ti ve bawk a. Chutih lai chu remchangah la in ka handcuff chu pin hmang chuan a hriat loh theih ang berin phelh ka tum ta a, mahse a har khawp mai. "I pasal leh i fanu te hi an thi nghal ang, an thi chiang khawp ang hre rawh." tiin Simon-a pawh chuan a vau chhunzawm leh a.

"Ni lo ka pa..khawngaihin, Annie nen chuan in bulah kan awm ang. Police ho pawh hian engmah an ti dawn lo, ka tiam a che." Sarah-i chuan a ti leh a. Za lo tih hriat tak hian Simon-a chu a nui suk a, "Ka pa a? Nang phatsantu khan keini hi mimawl emaw min ti em ni? Mawhh...keini hian thiltihtheihna thuk tak kan nei asin, min bum lovang, Sarah..min bum lovang." tiin a vin hrep mai.

Pitar pawh chuan, "Kan Lalnu tura Pathian thlan i ni a, mahse nang chuan min tlan bo san a. I thiam loh vek a nih hi, SArah..nangmah vang vek." a lo ti ve bawk. "Nilo ka nu, tunah ka lo let leh tawh alawm. Keimah hi min duh a ni tiraw, anih chuan ka pasal kha chhuah ula, in bulah Annie nen kan awm ang, ka tiam a che u." tap chung chuan Sarah-i chuan a han ngen leh a.

Chutah vanneihthlak tak maiin ka handcuff chu ka phelh thei ta, mahse ka la che chhuak ngam rih lo. Simon-a chuan, "Hepa hian a phal hma chu engmah ka ti dawn lo, a phal ngei angai." a han ti leh a. Chutih lai chuan ka ding thut a, Simon-a pistol chu ka va chuh nghal. Mahse a lo man nghet kher mai, a hmet puak palh ta.

A nupui chal darah tak mai chuan a kap ta a, a thal tawp mai. Chuveleh police ho chuan silai chu an kap puak ta nghal sup sup a, Simon-a chuan silai chu a thlauh ta a, mahse min tham a, bangah min nam bet a. Chung tlangval pathum zinga Annie vuan tu ber tih loh chu Police chuan an kap hlum vek a, chupa erawh chu a biru hman.

Simon-a chuan min rek bet a, a hma zawnah chuan min awm tir ta tlat mai. "ZAwng ho...mai mai chuan.." tiin a chhungte ruang ho chu a en kual a, "Nilo...a ni thei lo." tiin a rak vak vak mai. "Min han kap ve ula, in ngam chuan...min kap ta che u." tiin a inhrosa tun tun a. "Thlah rawh,,,thlah nghal rawh." tu emawni chuan a rawn ti a.

Kawngka bul ka va en phei chu MApuia chuan chempui keng hian naupang zinga mi, Muanpuii chu a lo tin ran mai. "Nilo...Mapui, ka tunu kha khawih hlek suh." tiin Simon-a chu a hlauthawng ngei mai. "Anih i fapa ve hi...i fapa hi kum 10 chuangzet kudam rimchhe takah min khung a, i tunu chu i va ngaihtuah si ve....i thlah loh chuan ka sat ang." tiin a chem chu a lek kang a.

Chu veleh min hnaih ber tu police hmaah chuan min nam phei a, ka va bawhthlu zui. Mahse Mapuia chuan Muanpuii zawk nilovin, lo tlan phei mek a pa, Simon-a lu ah tak chuan a chek siah mai a. Simon-a chu chhuatah chuan a thal tawp mai, "Zawnga thi rawh..thi nghal rawh." tiin a awmah chuan a chek nawn siah siah mai.

Chu veleh kha tlangval damchhuak awmchhun kha bang phen atanga lo kalin, "Che tawh suh u...anih loh chuan Annie hi a thi a ni mai." tiin Simon-a pistol thlauh a lo chhar chuan Annie chu a lo tin vang mai a. "Zawnga, thlah nghal rawh." ka ti vin nghal thak a. "A teuh lo, ka thlah lovanng, in zavai hian.." a zawi zo hman lo.

Ring mangkheng hian a au vak a, Annie chuan a ban chu vun thler hlawk khawpin a lo seh chu niin. Chu veleh police te chuan an kap nghal a, a ni pawh chu a thi ta. Sarah-i chuan tap chung hian min rawn kuah nghal a, "Duhtak...ka tihpalh, ka tihpalh aw.." tiin a tap nghal hawm hawm mai.

Annie pawh chu lo kalin min rawn kuah ve bawk a, keipawh chuan ka lo kuah let ve nghal. "Annie, BAwihte...i tha em?" tiin ka zawt nghal a. A lu a bu nghut ringawt, "Duhtak, thudik i laka ka zep avangin min ngaidam dawnnia aw...ih, heng chhungkua ah hian.." a tih lai chuan a ka chu ka hup sak a, "Sawi tawh suh..ka hre vek tawh. Ka ngaidam che, ka nupui i ni a, Annie pawh ka fanu a ni. Ka hmangaih che, sawi tawh suh." tiin a hmuiah chuan duat takin ka fawp a.

"Engtin nge hetah ka awm tih i hriat theih a?" tiin ka zawt a. "Ka nu leh pate khan engkim min hrilh a, tichuan Annie a damlo leh tih min hrilh khan hospital lam i pan pui ngei a nih ka ring a. Mahse doctor chuan in lo kal loh thu a sawi bawk si a, ka phone che lahin a tlang thei bawk si lo. Thil engkim i hre tawh si a, he inah hian i kal anih ka ring ta a. Ka hlauthawng lutuk kha police hruaiin ka rawn kal ta tawp a nih hi, chuan Mapuia saw kan chhanchhuak hmasa a." tiin min hrilhfiah ta a.

"He in awmna hi i hre tho si a, tinge a hma khan police hnenah i sawi mai loh va?"

"A chhan chu mihring pangngai an nilo miau alawm, Annie chunga thil thleng pawh hi ka hrethiam nghal vek a, ka sawi duh lo mai mai a nih kha. Chan che ka hlau em a, chuvang chauh chu a ni. Annie dam leh thut nachhan pawh kha keimah doctor te hriat loh hlanin sa hel ka pe a, chuvang chauh chu a ni." tiin min chhang a.

Mapuia chu a lo phei a, "Pu Rin, i sawi dik chiah a ni. Kan hneh e, hnehna chu kan chang ta e." a rawn ti a. "Nilove, nangmah vang zawk a ni e. Ka lawm e, Mapui." tiin ka chhang a. "Mahse Sarah, Annie hi engtin nge a awm zel dawn?" tiin ka han zawt leh a. "A tawp tawh...an PAthian hnena thlarau hralh ho zawng an thi tawh a, engkim a tawp tawh." tiin Mapuia zawk chuan min lo chhang leh a.

"Anih chuan ka fanu Annie hi mihring pangngai a ni tawh tihna maw?" tiin ka zawt leh a. "Lucifer tia an sawi, an Pathian khan min mutpui tak tak lo. Amah, Samuela pa, Pu Simon-a tho khan a ni min mutpui chu. Chuvang chuan mihring fa ve tho a ni a, anchhia a keng tel mai chauh a ni." tiin min chhang a,

Police te nen pawh chuan in be remin engkim chu ka ti fel thei ta a, chu in chu kan chhuahsan ta. Annie pawh vawikhat mah a buai leh tawh ngai lova, Mapuia pawh kan bulah a khawsa chhunzawm ve leh ta a ni. Mahse tun thleng hian kha naupang ponto hla, TIRA MEI KAIAH tih kah chu Annie hian a chham leh tawh ngai lo.

*******************

THE END