TIRA MEI KAIAH (MIZO FICTION CULT HORROR STORY) Written by : Aaron Malsawmdawngzuala Chapter -2

 TIRA MEI KAIAH

(MIZO FICTION CULT HORROR STORY)

Written by : Aaron Malsawmdawngzuala

Chapter -2

**********************

A tuk office ka kal pawh chu ka presentation pek pawh ka ti fuh hleithei lo, ka bengah chuan naupang hovina, "Tira mei kaiah.." tia an au ri mawlh mai chu a ri nawn sek mai. KA vei ngang bawk aniang, ka sawi tur pawh ka theihnghilh zeuh zeuh hial a. Ka pek zawh hnu chuan ka staff puite chuan kut han beng deuh dar dar mahse an hmel atang chuan ka pe tha an ti lem lo tih ka hria, ka confi lo ve em bawk a ni.

Lunch ei a hun a, canteen ah chuan thil ka ei a. Tuma bulah pawh ka thu peih lo, dawhkan ruak ah chuan mahni chuan tui ti lo zet chung chuan ka chow satui leih chu ka ei mial mial a. Ka darah chuan tu emaw hian min rawn vuan thut a, ka thil ngaihtuah muk lai a ni bawk nen ka phu nasa kher mai.

KA han hawi let chu kan Manager, Pu Nghaka a lo ni. "Ehe..iva phu nasa ve." tih pah chuan ka bulah chuan a rawn thu a, za lo zet hian ka lo nui suk ringawt. "Tinge Rina, vawiin i presentation pek kha i va confi lo ve, i nuam sam lo em ni?" tiin min zawt ta nge nge a. "Nilove Sir, vawiin kha chu ka ti fuh lo ve hrim hrim a nih kha." tiin ka chhang a.

"Nidangah i pek that theih tehreng nen, vawiin kha chu i dang kha a awk tlat mai a, harsatna i nei te a ni lo maw?"

"Eng harsatna mah a awm lo, ka tha alawm, Sir."

"I mu tlem a nimaw, kha i dark circle pawh a lang chiang lutuk ringawt."

"Nia, nizan kha chu ka muhil thei meuh lo alawm mawle."

"Anih tak chu, a zia lo hle mai...ti daih ila, kan project neih mek ah hian eng eng emaw hrilh che ka duh a..." Pu Nghaka chu a titi tui kher mai, mahse ka ngaithla lo hrim hrim. Eng eng nge a sawi pawh ka hre mumal lo, ka rilru ka pe thei thlawt lo a ni. Chutia a titi mawlh mawlh lai chuan hla deuh tak atanga ka thawm hriat chuan ka beng a verh zawk mai, rang takin ka ding thut a.

Pu Nghaka chuan mak tih hmel taka min melh hru pah hian, "Ehe..enga ti teh thut nge, Rina?" tiin min zawt nghal a. Mahse ka chhang thei lo, thawm ka hriat chuan ka rilru a luah hneh zawk tlat. Chu ka thawm hriat chu engdang nilovin, naupang rualin hlim hmel taka, "Tira mei kaiah.." tia an au rual ri a ni.

Ka mitthlaah chuan zan hmasa lama ka thil hmuh te chu a rawn lang nghal chuai chuai mai, ka thinphu pawh a rang nghal kher mai. Canteen pawn lamah chuan ka tlan chhuak nghal a, "Rina..Rina.." tia kan manager-i'n min au zui lawm lawm kha chu ka hria. Mahse ka ngaihsak hman lo, ka buai nghal vek ni berin ka hria.

Naupang ho thawm chu ka ngaithla chiang zel a, ka zawng kual nasa mai. A tawp a tawpah chuan kan office bul deuh lawka in pakhat, tute in nge pawh ka hriat loh bul atang chuan thawm chu a rawn chhuak a ni tih ka hrechiang ta. Hmanhmawh tak chuan ka va tlan phei a, ka thlan a tla nghal bawrh bawrh mai.

Ka va thleng chiah chu ka ding chat mai, ka zak angreng hle bawk. Thawm ka lo nei ring deuh aniang nge, kawtzawla naupang lo infiam mek leh an bula nupa niawm tak lo ding te chuan min lo melh thap mai a. A awmzia chu khang naupangte kha infiam satliah, 'Tira mei kaiah' tia lo infiam pangngai mai mai an lo ni tihna a nih chu.

Nupa lo ding te chuan mak min tih hmel kher mai, "Thianpa, enge ni ta?" tiin an pa zawk chuan min lo zawt a. "Mamawh i nei em ni?" tiin an nu zawk chuan min lo zawt veleh bawk. Sawi mai tur pawh ka hre lo, ka zak bawk si, ka lai vek a ni ber mai. Ka thlan lah chu a lo luang zawih zawih mai a, second 5 vel chu ka ding ngawi reng ringawt.

Kan manager leh staff thenkhatte pawh ka chet dan avang chuan an ngaih a tha lo a ni ngei ang, min rawn umzui hlawm hi a lo ni. "Rina, enge awmzia? Ngati nge i tlan thut a? Buaina a awm em ni?" tiin Pu Nghaka chuan min zawt a. Sawi tur a vang duh kher mai, "Aaa..englo, tu...tu emawin min ko tlat khan ka hria a." tiin dawt ka sawi ta ringawt a.

"Chupawh nise khatiang em em a hmanhmawh a tlan thut te chu...min ti mangang hman alawm."

"Nia...ihhh, ka bengchhe ri a niang."

Za lo tak chung chuan ka khi suk a, tumah pawh ka melh tha ngam lo. Hnuai lam melh chung chuan canteen lam chu ka pan phei leh daih a, hmu miah lo mah ila min enzui vawng vawng dawn tih chu ka chiang reng. Ka thawhpuite pawh chuan a khat tawkin enge awmzia tiin zawhna min zawt reng hlawm a, mahse tumah ka chhang tha thei lo.

************************

Office kan bang a, rang takin ka inkhalh haw nghal. In ka thlen hma hret chuan ka phone a rawn ri a, ka han en chuan kan nu a lo ni. "Hello, enge ni ta?" tiin ka han zawt a. Hlauhthawn hmel tak hian kan nu chuan, "I lo haw dawn tawh em? In bang tawh em?" a rawn ti chiam chiam mai. "Ka rawn inkhalh haw mek, ka lo la thleng lo deuh. Enge ni a, buaina a awm em ni?" tiin ka zawt a.

"Annie hi a lo la haw miah lo, tunah dar 5 a ri dawn tawh a. Chhun dar 1 ah an bang thin kha ania, hei tun thlengin a la rawn haw miah lo ania." a rawn ti ta mai a, ka mangang nghal kher mai. "Enga? A lo la haw lo a?" ka ti deuh vak a. "Aw la haw lo...an principal ka phone lahin kan banna a rei tawh a ti bawk sia." a rawn la ti ta deuh deuh va.

"Anih chuan khawnge a awm ang?"

"Aww...ka hre bik lo chu a nih hi..."

"Zirtirtu dang ho i be kual em?"

"Anni biak kualin awmzia a nei lo, engtin nge kan tih dawn?"

Hlauhthawn sa nen, rilru hah nen, ka chiai titih nghal der mai. Ka car chu kawngsirah ka ti ding a, thawk ka han la te te a. "Sarah, tikhan lo awm la, an school ah chuan ka va kal ang. Hlauthawng suh, a lo haw leh mai ang." tiin ka hnem hram hram a, a nihna takah chuan kan nu ai pawhin ka hlauthawng zawk hial ang.

Phone chu ka dah a, ka motor chu turn-in Annie te school lam chu ka pan phei ta a. An school zawn ka thlen chuan school gate pawh a lo inkhar vek tawh. Security duty bulah chuan va pheiin, "An haw vek tawh em ni?" tiin ka va zawt a. "Aw ka pu, dar 3 khan an bang vek tawh." tiin min lo chhang a.

"Ih..KG 2 ho pawh an bang tawh maw?" ka han ti leh a. "Ka pu, KG 2 te chu dar 1 khan an bang daih tawh alawm. Ngati nge a? Puih theihna che ka nei em?" tiin min lo zawt let a. Ka han hawi kual a, school bus pawh pathum lai chu ka hmu. "Bus saw..bus driver saw tunge?" tiin ka zawt leh a.

"Bus driver chu panga lai kan nei a, tu ber nge i hmuh duh a?"

"Ka hrelo..KG 2 naupang ho phur thintu ber kha a nimai."

Security pawh chuan mak tih hmel taka min en chung chuan, "Aa..chutia phur thin bik an awm lo. Bus hi pathum kan nei a, driver panga kan nei bawk a. An inkhalh chhawk thin a, ngatinge ka pu?" tiin min zawt let leh a. "Ka fanu a lo la haw lova, Annie ania, Annie Lalnuntluangi, KG 2...i hria em?" tiin ka zawt ringawt.

"Ka pu, chutin tumah ka hre hrang lo. Kan principal number hi ka pe che anga, i zawt zawk mai dawn em ni?"

Rilru a hah duh ngei mai, chhang mai lo chuan ka han ngawi leh deuh vang vang phawt a. "Anih leh vawiinah tuberin nge KG 2 naupang ho phur i hria em?" tiin ka zawt leh a. "Aw..U Rema'n a phur hlawm a." tiin min chhang a. "Chupa number chu i nei em?" tiin ka zawt leh a. "Nei miah lo, ka pu." tiin min chhang leh bawk si.

Annie te school principal hi ka hmelhriat a ni a, mahse chutia thian tha chu kan ni lem lo. Annie hi a school kal lam chu keiman ka hruai thin a, mahse office kan ban tlai thin em avangin haw lam erawh an school bus in a rawn haw thin thung. Ka car ah chuan let lehin principal te in lam pan chuan ka inkhalh phei leh ta ringawt a, ka thinphu pawh a rang tawh ngei mai.

***********************

Principal te in ka thlen hma chuan kawngsirah chuan naupang pali lo inzui duah duah hi ka hmu a, mahse school form an hak loh avang leh Annie hmel awm ang ka hmuh mai loh avang chuan naupang leng ho satliah a nih ringin ka tlan pel mai a, mahse thui pawh ka tlan lo. Engemaw hriat chhuah thut ka nei a, ka car pawh chu ka ti ding nghal.

Khang naupang pali, ka tlan pelh takte kha hmuh tawhna ka nei a ni An hmel kha a mal te te in chiang takin hmu vek lo mah ila, ka en thuak khan ka hre thei tlat. Zan hmasa lama kan inkawta ka fanu Annie te nena lo infiam, 'Tira mei kaiah.' tia hlim hmel taka lo aurual te kha an ni chiang lutuk tlat.

Chubakah an inzui dante reng reng kha, an kawrhnung theuh kha an invawn sak vek bawk. Motor atang chuan ka chhuak nghal a, mahse mah tak maiin ka hnunglam ka va hawilet chu khang naupangte kha hmuh tur an lo awm leh tawh miah lo. Kawngpui chu a reh hian a reh em em a, motor tlan takngial pawh an awm lo.

Ka han hawi kual ngial a, mahse tumah ka hmu der mai silo. "Khawnge...khawnge khang naupangte kha an kal hman?" tiin keimah leh keimah chu ka inbe mawlh mawlh ringawt. A khat tawkin motor chu an rawn tlan zeuh zeuh ringawt a, ka awmna lai chu kawng reh ve tak anih avang chuan boruak pawh a reh thuap mai.

Ka fanu Annie ber ngaihtuah ala ngai bawk nen, car lama ka let leh tur chiah chu ka ka ke bul, kawngsira ka thil hmuh chuan min ti ding chat mai. Kawngsirah chuan chhimtir 10 vel lai mai hi an lo inzui duah duah mai a, chhimtir meikai diktak chu ka hmu ta. Nidangah pawh ka hmu zeuh zeuh va, ka hriatna pawh a rei tawh a, ka tan thil mak vak a ni lo. Mahse ka hun tawn mek nen a ngaihtuah chuan chutia chhimtir meikai ka hmu chu ka ngaih a tha tlat lo.

Chutia ka en reng lai chuan ka hnung lam atang chuan ka fanu aw ngei hian, "Apa.." a rawn ti a, ka phu zuk mai. Rang takin ka hawi let vat a, ka fanu Annie ngei chu a school form nen bal zet hian a lo ding reng mai a nih chu. "Bawihte..Annie." tih pah chuan ka va kuah nghal a, a hnuk a ulh hial mai.

Mittui tla phung chuan a biangah ka fawp a, "Annie, khawnge i kal daih a?" tiin ka zawt a. Chauh hmel tak hian, "Ka ril a tam lutuk, eitur ka duh." tiin min chhang daih mai. "Annie, helai hmunah hian tinge i awm a? Tuin nge hruai bo che?" tiin ka zawt leh mawlh mawlh a, a thawmhnawah te chuan vaivut leh chirh a kai nuai mai.

"Ka hre lo, engmah ka hre tawh lo." tap lek lek chuan a han ti a, ka ngaih a tha lo kher mai. "Annie, engtin nge hetah hian i awm theih?" tiin ka zawt leh a, mahse a tap ta feih feih mai. "Ka ril a tam, chaw ka ei duh..ka ril a tam lutuk." tiin a mittui chu a sur nghal zung zung a. "Awle..hawh, motor ah sawn chuang ila, kan haw anga, eitur tui deuh i nu kan siam tir dawnnia aw." tiin motor lam pan chuan ka phei pui ta a.

*************************

Ka tlan lai chuan Annie chu biak zawm theih pawh a nilo, a muhil nghal bawrh bawrh mai. Ka phone a rawn ri a, Srah-i a lo ni. "Hello Rina, tinge engmah i rawn sawi leh si lohva? Bawihtei chu i hmu em?" tiin min rawn vin nasa mai. "Sarah, ka hmu e...hei kan rawn haw mek, kan lo thleng har lovang." tiin ka chhang a.

"Awii..animaw? Khawnge a lo awm a?" tiin min rawn zawt leh nghal chiam chiam a. "Phone atang chuan ka sawi mai thei lo, kan lo thlen hunah ka hrilh dawn che nia." tiin phone chu ka dah ta a. Annie chu ka en a, a mit zawnah chuan kutthlakna hnuhma niawm tak, lian vak lova duk deuh churh mai hi ka hmu ta tlat mai.

Ngaih ava tha lo duh kher em, enge maw ka fanu chungah hian thleng ta mai le tiin ka rilru a buai kher mai. Ka fanu hi a tlu sual emaw a nih loh chuan tu emaw chuan kidnap a tum emaw, kut a thlak ngei a ni tih a mit duk chur atang chuan a chiang reng. Ka thinrim lutuk chu ka so bulh bulh hian ka hria, motor pawh chu ka khalh chak narawh e.

Kei hi ka chiang lo nge, ka thil tawn te leh ka thil hmuh te hi amak zozai ta khawp mai. Naupang pali lo inzui duah duahte ka tlan pelh khan ka ding leh nghal a, ka han ngaihtuah a, ka dinna atanga an awmna kha pen 20 pawh a tling dawn em ni tih tur khawp khan kan inhnaih kha a nia. Mahse ka va chhuah khan tumah ka hmu leh tawh bawk si lo, eng anga che rang pawh lo ni hlawm ta se, mihring pangngai, chutah pawh naupang lehnghal, bihrukna hman a awm lo hrim hrim.

******************************

In chu kan thleng a, garage lamah pawh tlan thla ta lo chuan kan kawtzawl ah chuan ka ding a. Kan in bulah chuan Sarah-i pawh a lo ding vang tawh, rang takin a rawn phei nghal a. Bawihtei chu a pawm chhuak a, "Ehe..avan bal em em ve. Tinge a Rina, awiii..amit hi a duk chur lehnghal. Bawihte..Bawihte...harh teh..Rina, tinge hetia a awm a?" tiin a ri nghal chel chul mai.

"A muhil a nih kha...kai tho suh." tiin ka lo chhang a. "Engthil nge ka fanu chungah hian thleng a? Min hrilh teh...mawhh?" a ti leh nghal chung chung mai. "Inchhungah rawn pawm lut phawt la, kan sawi dawnnia." tiin inchhungah chuan kan lut ta a. Sitting room thutthlengah chuan a mut a, kei erawh choka lamah pheiin ka hmai ka phih a.

Sarah-i chuan min rawn pan a, "Khawnge a lo awm a? An principal lah ka phone nasa, ani pawh a rawn mangang khawp mai. Bus driver a zawt nghal a, mahse driver lah chuan inkawt thleng kha chu ka rawn thlah ve thlap kha a ti bawk sia, ka lo buai zia chu a ni mai." tiin a ri bawrh bawrh a.

"Anih leh bus rawn tlan ri emaw, thawm engmah i hre lo em ni? Nilengin inah i awm awm sia, thawm engmah i hrelo tihna em ni?" tiin ka zawt a. "Engmah ka hre lo, dar 1 vel kha chuan ka inbual a, chutiang bus ri engmah ka hre lo alawm." tiin min chhang a. Sitting room lamah chuan phei lehin Annie mutna thutthleng sei ah chuan ka va thu a, Sarah-i pawh chuan min rawn zui veleh nghal.

"Han sawi teh, khawiah nge Bawihtei chu i hmuh?" tiin min zawt leh a, ka thil tawn zawng zawngte leh Annie ka hmuh dan vel chu hrilh ka tum zet nangin, ahma zan lawk pawhin ka thil hmuh ka sawi kha a awihlo kha ania, chuvang chuan thudik ka hrilh a nih chuan a awihlo emaw, a hlauthawng emaw, keimah zawk hi ka a ta amaw a ti ang tih ka hlauh avang chuan thudik sawi loh mai chu ka thlang zawk ta a.

"Aaa...a thiante inah a lo leng alawm mawle...ka va hruai ta a nih kha." tiin dawt ka sawi ta ringawt a. MAhse Sarah-i chuan ka thusawi chu a awihloh hmel kher mai. "A thiante inah a? School bang thiante ina leng tlang tur chuan ala naupang lutuk, enge i sawi awmzia? Tute inah maw a lo awm a? Tu a thiante?" tiin min zawt nghal chiam chiam a.

"SAw...sawlai ka nute veng piah chiah, kawnghnuai lamah sawn mawle...chutia hlauhthawn tur engmah a awm lo."

"Tute in maw? Tute nge chu chu?"

"An hming pawh ka lo zawt lem lova, a classmate te zinga mi mawle...leng turin a lo sawm a ni awm a..engah mah ngai suh."

"Nihleh tinge a balh em em a?"

"An infiam te pawh aniang chu mawle...i mangang hma thei lutuk."

"Anih leh tinge a mit te saw a duk chur a, kutthlakna a ang ka ti."

"Tennis ball in an vawm duh palh e an tia, naupang annia, chutia lak thutak vak angai lo, i ho emai."

"Ka ho lo, ka fanu neichhun ania, ka ngaihtuah animai. Nangpawh hi engemaw i hriat le...engemaw diklo chu a awm a ni." tiin min melh deuh run mai. "Enge diklo awm? Engmah diklo a awm lo." tiin ka chhang a. Sarah-i chu a ngawi vang vang a, "Anih chuan ka rawn phone lai che khan tha deuhvin sawi mai ta che. Phone-ah chuan ka sawi thei lo chuti khati te i ti vel a, engemaw i hriat ni.." a ti deuh nung nung mai.

Ka intawng awk takngial dawna ka hriat avang chuan ka ding deuh hluai a, "Ka inthlak dawn..Bawihtei kha i bual fai dawnnia." tiin room lam pan chuan phei ka tum a. Chutih lai chuan Annie chu a rawn harh a, "Ka ril a tam." a rawn ti chhuak tawk tawk mai. "Bawihte..i lo harh tawh elaw.." tiin anu chuan a be nghal mawlh mawlh a.

"Ka ril a tam lutuk...chaw ka ei duh." a rawn ti tham leh tiak mai. "Chhang i ei duh angem?" tiin a zawt leh a. "Aih..chaw ka ei duh...chaw...sa ka ei chak." a rawn ti leh a, mak ka ti angreng khawp mai. A chhan chu Annie hian sa hi a ngaina hlawl lova, vegetarian tia sawi tur chu nilo mahse sa a ei chak ngawih ngawih ka la hre lo.

Kan nu nen chuan kan inmelh deuh hu ringawt, "Umm..i ei dawnnia. Anih bawihte, tute inah nge i len kawi a..." tiin a zawt leh a, ka lo ip nasa kher mai. Mahse mak tak maiin ka fanu chuan, "Muanpuii te inah.." tiin a chhang ta mai a nih chu. "Tunge Muanpuii chu?" tiin keimah zawk zawk chuan ka han zawt pek a.

"Awww...a lenna te chu nimai lawm, iva hruaina kha...an fanu hming tihna anih chu." tiin Sarah-i chuan min lo vin hlur mai. Chhang tawh lem lo chuan roomah chuan ka lut a, ka inthlak nghal a. Rilru a buai ta hle mai, "Engmah ka hre tawh lo." tiin min chhang kha a ni a, tunah Muanpuii te inah a ti leh bawk si a, tunge Muanpuii chu ni ta ang?

*************************

Zan chaw eikhamah chuan a ngaite ang bawk chuan chaw ei dawhkanah thu in ka laptop chu ka khawih leh a, rilru pek a har takzet. Annie erawh zanriah ei hma deuh lawka chaw a ei avang chuan kan rual chuan chaw a ei ve ta lova, roomah chuan amahin anu phone khelin a hlim tawk hle in ka hria, a reh vang vang mai.

Sarah-i chuan TV a en a, chhungkaw member pathum lek mah ni ila kan reh thap mai. Chutia kan ngawih thap lai chuan Annie chuan ring mang kheng hian, "Tira mei kaiah, chhimtira mei kaiah." a rawn ti leh ta vak vak mai a, ka phu nasa kher mai. Ka hnathawh lai pawh chu ngaihtuah tawh lovin ka ding hluai a, roomah chuan ka va phei nghal.

Room kawngka chu ka hawng a, Annie chu amahin midang te nena inkawm niawm tak hian a lo nui nasa mai. "Annie...sawi tawh suh, kha kha sawi tawh suh." tiin ka va vin vak ringawt a. Ani pawh chuan mak tih hmel tak hian min lo en a, mahse reiloteah a nui leh nghal vur vur mai. Room atanga tlan chhuah pah chuan, "A hnuhnung hnung phungin seh." tiin a tlan chhuak daih mai.

Room atang chuan keipawh chu ka chhuak ve nghal a, "annie, enge ka sawi? Kha thil kha sawi tawh suh ka ti ani lawm ni?" tiin ka han vin leh deuh thak a. Chutah rum em em hian min rawn melh a, naupang kum 6 mi lek e tilo chuan a mitmeng ka en khan min huat hmel takzet. Sarah-i chu rawn tho chhuakin, "Enge ni vak vak a? Tinge i va vin ve?" a rawn ti ve bawk a.

Mahse ka chhang lo, chutia ka fanu in huat hmel taka rum zeta min melh khur mai chu ka ngaihdan a ni ta hauh lo mai. Rum zet chuan ka melh let ve a, "Annie, khati khan min melh reng reng suh." ka han ti leh a, Sarah-i chu a rawn phei a. Mak tih hmel tak hian, "Enge a? Tinge khatia i hauh vak vak ringawt a?" tiin min rawn zawt leh a.

Chutah Annie mit atang chuan mittui a rawn hnam tial tial a, a inhnit ta feih feih mai. SArah-i chu a thinrim takzet, "Rina, nang hian engemaw i hriat le? Tinge naupang infiam mai mai pawh chu i huat viau a? I hnathawh lai a tibuai che em ni? A bengchheng i ti a nih chuan tha tak leh zaidam takin a zilh theih..thinchhe lutuk mai." tiin min hau hrep mai.

Chutia ka fanu, ka hmangaih leh duat em em, vin pawh ka vin phal ngai loh, Annie a han tap ta hawm hawm mai chu ka inthiam lo kher mai. "Bawihte..ka..ka tihpalh, tap suh." tia thlem ka tum, ka va pan hnai chu a duh lo nasa mai. Anu bulah chuan a kal a, a tap vak vak mai. Sarah-i chuan rum zet hian min melh a, "Thinchhe leh lutuk mai, mahni fanu te infiam mai mai pawh ngai thei lo." tih pah chuan a pawm a, room ah min luhsan ta daih mai.

Ka inthiamlo hnuhnawh kher mai, hrehawm pawh ka ti. Mahse kha naupang ponto hla, TIRA MEI KAIAH tih kha ka hre hne tawh, kha thil ka hriat apiang khan keimah ah hian engemaw dik lo a awm tlat tawh a ni. Ngawi reng chuan pawnah ka chhuak a, meizial zu in ka tei kual ka tei kual ringawt mai.

***********************

Zanlaiah chuan Annie tap inhnit feih feih ri chuan min ti harh a, light ka on nghal vat. Ka han en chuan na nei niawm tak hian a lo vial deuh ngawng ngawng mai a, "Bawihte..ngati nge? Na i nei em ni?" tiin ka zawt a. Sarah-i pawh a lo harh ve nghal a, "Ngatinge a?" tiin min zawt a. "Ka hre bik lo, hei a tap ri hian min ti harh a, na nei a ang khawp mai." tiin ka chhang a.

"Bawihte, i enge na? I enge na a?" tiin a han zawt ve a. Annie chuan thei leh thei lo hian, "Ka pum ana, ka pum ana lutuk." a rawn ti chhuak tawk tawk a. "Tlaiah khan sa kha i ei hnem ka ti reng a ni, ulgel in rawh aw..." tiin SArah-i chuan kan khum bul dawhkana Ulgel chu a la a. Annie chu a in tir a, "Tikhan muthilh tum leh la, a dam mai ang." tiin a biangah chuan a chul heuh heuh va.

Mahse Annie chuan na a ti telh telh mai, "Anu...ana...ana lutuk. Ka taksa a na vek, ka ke..ka ban te..ana lutuk..a thip sup sup mai." a rawn ti leh a, ka ngaih a tha ta hauh lo mai. A ban chu ka han en a, puitling ban tha chak takin na taka a hmehna niawm tak hian a duk thluah thluah mai a.

"Ehe..SArah, en teh." tiin ka kawhhmuh a. Sarah-i pawh chuan mak ti tak hian, "Awi ka duh thei lo, enge awmzia?" tiin a mangang nghal kher mai. A dul chu ka hlim a, a dul pawh chu a lo duk chhuak vek mai, "Nu-i, Bawihtei awmdan hi a dik lo. Insiam vat rawh, damdawiin pan pui angai." tih leh thawh ka rual a.

Sarah-i pawh chu a zuang tho nghal, "Motor ka zu star ang, lo buaipui rawh aw..." tiin chahbi ka la a. Chutah Annie chu a rawn eu vak vak a, a t(r)e ta vak vak mai. Ka ding nghal chat a, "BAwihte..ngati nge..ngati nge khatia i awm?" tiin a nu chuan a vuan bet nghal a. "Anu ana....ka thi dawn." tiin a rak nghek nghek tawh.

Mak ka ti lutuk chu tih tur ber pawh ka hre lo, ka en reng ringawt. Chutah vin zet hian Sarah-i chuan, "Enge i din ngawih reng? Motor chu zuk la chhuak vat rawh, kal nghal rawh." min ti hrep mai. Rang lutukin garage lamah chuan ka chhuk a, motor chu ka la chhuak nghal a. Sarah-i chuan Annie chu a rawn pawm chhuak a, damdawiin lam pan chuan kan tlan ta nghal a.

********************

DArkar chanve vel zet doctor ten an enfiah hnuah chuan doctor chu a rawn chhuak a, "Doctor, enge kan fanu chu a an?" tiin Sarah-i chuan a lo zawt nghal a. "Khawngaihin ka office ah min rawn zui lut lawk ta che u.." a lo ti daih mai. "Enge awmzia, thil tha lo a thleng em ni?" tiin ka lo zawt vat a.

"Tunah chuan kan chiu muhil hrih a, thil sawi pui duh che u ka nei a ni." tiin min chhang leh a. Tichuan doctor chu a office lam pan chuan kan zui phei ta a, rilru chu a nuam duh lo khawp mai. A dawhkan hma takah chuan kan nupa chuan kan thu dun a, "Enge thil awmzia?" tiin ka han zawt leh a.

Doctor chu a han thaw deuh halh a, "A taksa zawng zawng deuh thaw a duk chhuak vek a, skin disease niin kan hria. Mahse..kan test a, negative a ni vek bawk si a." tiin a han chawl leh deuh vang vang phawt a. "Chuan...engtin zel?" tiin kan nu chuan a lo zawt leh a. Beidawn hmel tak chuan doctor chuan ka nupui chu enin, "Enge a nih kan hre bik lo a ni. Engmah natna dang a neih kan hre lo, engthil nge a nih kan hre lo." a ti ta mai a.

SArah-i chuan min rawn melh a, engmah chu a sawi chuang lo. A mitmeng atang chuan a hlauthawng hle tih ka hrethiam nghal, chutiang bawkin keipawh ka hlauthawng. "Anih leh doctor, enge ti tura min duh?" tiin ka zawt a. Hreh hmel tak hian doctor chuan, "Engpawh a thleng thei a ni, ka pu. A dinhmun lah hi a hlauhawm telh telh mai si a, lo inpuahchah lawk ula a that ka ring." tiin min hrilh a.

Chutah thinrim zet hian SArah-i chuan, "Eng atan maw? Eng atan maw kan inpuah chah ang? Kan in kan lo singsa lawk dawn tihna em ni? KA fanu hi a thi dawn tihna maw? Natna engmah a neih kan hre lo, tinge chutia i sawi theih zawk? Doctor, engemaw tal ti teh u." tiin a tap titih nghal ta mai a.

"A pawi ka ti khawp mai, kan theih tawp kan chhuah hnu pawhin engthil chiah nge a nih tih kan hmu chhuak thei lo a ni." tiin doctor chuan a chhang a. Sarah-i chuan a chil a lem dawk a, "Engemaw..natna dang, la hmuh chhuah loh pawh a ni thei asin. Chutia enge anih hriat loh tawp chu, a damdawi engemaw tal a awm ang." ala ti fan a, a mittui chu a hru a hru tawh mai.

Mahse doctor chuan zaidam tak hian, "Min hrethiam la, tunah chuan engmah kan sawi thei rih lo a ni." tiin a chhang leh a. Sarah-i chu a ding hluai a, office atang chuan a chhuak ta daih mai. "Khawngaihin min hrethiam dawnnia." tiin doctor bulah chuan thupha ka chawi mawlh mawlh a, Sarah-i chu ka zui chhuak ve ta nghal a.

********************

Sarah-i chu Annie mutna bulah chuan thu in a kutah a vawn sak a, eng eng emaw sawiin a be mawlh mawlh mai. Pawn darthlalang atang chuan ka en reng a, a bulah chuan doctor a awm bawk. Ka beidawng takzet, enge tih tur ber pawh ka hre lo. Ka tah a chhuak em em a, mahse ka mittui far khat pawh a tla lo.

Ka tap chhuak thei lo a ni ber mai, ka thaw a hah dawn hialin ka hria. Ka ipik lutuk leh tih tur ber pawh hrelo chu pawnah chuan ka chhuak ta ringawt a, Smoking Zone lamah pheiin meizial ka va zu a. Ka rilru chuan ka tawngtai mawlh mawlh a, ka fanu chungah hian khang naupang ka hmuh fo thinte khan engemaw tak chu an ti a ni tih ka chiang.

Mahse khang naupangte kha engtin nge ka hmuh leh ang tih lah ka hre der mai silova, mihring an nih pawh ka ring lo hial zawk. KA thil tawn tak te kha ka han ngaihtuah let a, khatia ka hnung lawka ka fanu Annie lo ding thut te kha thil mak tak chu a ni chiang alawm. Tin, sa ei ngai mang lovina khati taka sa a eihnem te ringawt pawh khan ka ngaih a ti tha lo zual takzet.

Chutia rilru hah leh beidawng taka ka inngaihtuah lai chuan ka bulah chuan tlangval pahnih hi an rawn ding ve a, an titi dun mawlh mawlh mai. Pakhat zawk chu ka bulah chuan rawn kalin, "Thianpa, khawngaihin i lighter kan lo hmang ve lawk mai teh ang." tiin lighter hman chu min rawn dil a.

Chhang lem lo chuan ka hman tir a, a tan zo chu a phei leh mai a. MAhse thui pawh a kal lo, a ding thut a, ka lam chu muang chang hian a rawn hawi a. A mitmeng chu a sen deuh rum hian ka hria, lighter hman min rawn dil lai khan a mitmeng a sen awm pawh ka hre lo. Chutah min nuih vur vur a, mak ka ti lutuk chu ka en vung vung ringawt.

Chutah chiang fek fawk hian, "Annie hi i fanu a nilo, i fanu a nilo." a rawn ti thum chhur chhur mai. Ka sa deuh zak mai a, "Engmaw i sawi a?" tiin ka thinrim kher mai. "I fanu amaw tiin i duat ve em em a, mahse nang hian fa ila nei lo hrim hrim." a rawn ti leh ta mai a nih chu. "Tunge i nih? Engtin nge min hriat?" tiin ka zawt leh a.

Hmuhsit hmel tak hian min nuih a, "Annie hi i fanu nilovin ramhuai fa zawk a ni, i hria em?" a ti leh ta mai a, ka thinin a tuar ta lo. "Zawnga, ngawi rawh." tih pah chuan ka va hnek siah mai a, a thal tawp mai. Chuveleh a thianpa chu a rawn tlan phei a, "Enge maw i tih le? Tinge i hnek rikngawt a?" tiin min rawn vin hrep mai.

Keilah ka la thinrim, "Han sawi leh teh....mawhh, han sawi leh teh." tiin ka tham tho va, mahse security guard pahnih rawn pheiin min rawn pawt hrang nghal a. "Enge ni a? Tinge Hospital compound ah buaina in siam a?" tiin min rawn hau va. "Ka fanu chungchang a rawn sawi ve khanglang anih kha..tunge a nih pawh ka hre lo." tiin ka chhang a.

Mak tih hmel tak hian chu tlangval chuan min en a, "Engmaw i sawi a? Lighter hman ka dil mai che anih kha, min hnek ringawt anih kha.." tiin min melhrum kher mai. A hmel chu ka han en chiang leh a, a mitmeng te chu a lo pangngai leh vek tawh. Mak ka ti lutuk chu engmah sawi lo chuan hospital chhungah chuan ka lut leh a, ka a zo takngial dawnin ka hria.

*************************

TO BE CONTINUE