WILD ZONE : SEASON 1 (Episode - 4) Written by : Aaron Malsawmdawngzuala BAD GIRLS - 4

 WILD ZONE : SEASON 1

(Episode - 4)

Written by : Aaron Malsawmdawngzuala

BAD GIRLS - 4

*********************

A tuk zing chaw ei kham thleng pawh chuan Nathana chu a la reh vang vang mai a, keipawh chuan ka call lem lo. Dar 11 rik dawnah chuan min rawn call ve ta nge nge a, "Hello Sir, min van rawn be har ve?" tiin ka lo zawt nghal ringawt a. "Nia, Irene-i chu tuman an la hmu chuang lo a nih chu." tiin min rawn chhang a.

"Anih leh engtin nge ni dawn? VAwiin lam te hi?"

"Ka rawn lam phei dawn che nia...lo insiam sa vek la, ka lo kal nghal ang."

Phone chu ka dah a, rang takin ka insiam nghal a. Ka insiam zo pawn ka chhuak chiah chu Nathana chu a lo thleng deuh chiah chiah a, "Eheu, ka va rawn thleng timing awm ve.." tiin min nuih suk a. "Khawnge kan kal dawn?" tiin ka lo zawt a. "Lo chuang phawt rawh." tiin min chhang a, ngawi reng chuan ka chuang a.

A la tlan chak em em zui, "Sir, khawiah chuan maw kan kal dawn a?" tiin ka zawt leh a. "Nizanah Irene-i kha tuten emaw an lo hmu a, show zawh hnu khan...bar pakhatah a kal a ni awm e, chumi bar lam pan chuan kan kal dawn mek a nih hi." tiin min chhang a. "Tuin maw hmu a?" tiin ka zawt nghal.

"Sammy-a..kan thenawmpa kha, khami hmelhriat te khan an hmu a. Sammy-a an hrilh leh a, Sammy-a'n min hrilh veleh thung a."

"Khawi bar ah nge?"

"Kan kal mek chu a nih hi..kan thleng har lovang."

*******************

Minute 10 vel hnuah chuan kan thleng ta a, bar zim tak a ni. Customer pawh zinglam a nih vang nge, tuvak mah an lo awm lo. Bartender chuan no a lo hru fai mawlh mawlh a, Nathana nen chuan kan va pan hnai a. "Min lo hrethiam lawk, thianpa?" tiin Nathana chuan a han bia a, inla engemaw tak hian melh pawh a lo melh tha duh lo.

"Enge ni?" a lo ti deuh hmuk a. Irene-i thlalak chu hmuh in, "Henu hi nizanah hetah a lo kal mial em?" tiin a han zawt leh a. Second khat vel bak Irene-i thlalak chu a melh lo, hmundang melhin a nui suk a. Thawk deuh halh pah chuan, "Lo kal lo." a ti hmuk mai. Kan batch chu phawrh ka tum a, mahse Nathana chuan min lo dang vat.

ZAidam tak hian, "Amah ang deuh tal hi lo kal an awm miah lo maw?" a han ti leh a. Chupa chuan chhan pawh chhang lo chuan a lu a thing ringawt, NAthana chuan min rawn en a, a nui sak a. A wallet la chhuakin cheng 2000 tlang chu a phawrh a, "Tikhan min hrilh thei tawh angem?" tiin a zawt leh a.

Chupa chuan pawisa chu a en vang vang a, a no hruk lai chu a dah ve ta. PAwisa chu hawi kual zuk zuk chung a hum zauh pah chuan, "Nizanah kha chuan a lo kal ngei alawm, zanrei lam tawh ah a nia." tiin min chhang ta a. Chuveleh Nathana chuan, "Tu emaw nen an inhmu em? Eng ti turin nge a lo kal?" a han ti leh a.

Mahse a ngawi leh ta tlat mai, Nathana chuan cheg 2000 tlang chu a phawrh leh a. Pek pah chuan, "Min hrilh rawh...kan hriat ngei ngei a ngai ania." a han ti leh a. Pawisa chu ah that pah chuan, "Saw lai dawhkanah sawn ania, kan client pakhat..regular deuh mai nen an thudun a. Darkar chanve pawh tling lovah khan an chhuak dun ta daih a, abak engmah ka hre lo." tiin a chhang a.

"In client chu tunge a hming? A address nen lam kan hre duh." Nathana chuan a han ti leh a. Mahse chupa chu a induh leh ta tlat mai, NAthana chu a thaw hak a. Chupa kut chu tham thutin, a kutzung tang chu a elh sak ta vak mai a. Ana ti lutuk chu a t(r)e tuar a, customer dang ho pawh an rawn ding deuh hluai hlawm a.

Mahse rang takin ka batch ka phawrh a, police kan ni tih an hriat takah chuan an thu leh zal zal hlawm a. "Ka nin chin a thleng tlat mai, ka dawh thei vak lo tih hi ila hre lo aniang nge. Tunge Irene-i hruai haw tu chu sawi rawh, mipa nge hmeichhia?" tiin Nathana chuan a zawt leh a. Na tih hmel tak chung chuan, "Hmei...hmeichhia ania, ka pu. A hming chu Rozami ania, Veng..Venghlui a mi.." tiin a then chawk chawk mai.

NAthana chuan a thlah a, "Khati mai tur kha alawm..kan lawm e, chuan kha..i pawisa hi la rawh." tiin pawisa chu a pe leh ta thova, chupa chuan melh pawh min melh ngam tawh lo. Rozami address chu a ziak thla a, tichuan Nathana chu a pe ta a. Bar atang chuan kan chhuak a, Venghlui lam pan chuan kan phei leh ta a.

**************************

Rozami te in awmna chu a la pil ril phian lehnghal a, a la fal reuh em em lehnghal. In chu kan thleng a, mahse kawngka a lo inhawng sa tlat mai. Nathana chuan min en a, "Awm chu a awm ngei anih saw, kawngka pawh a inhawng sa alawm." a han ti zawi sap a. Kan va kal hnai leh deuh va, "In awm em?" a han ti deuh vak a.

Mahse chhanna kan dawn glo, "Rozami te in a ni em aw?" a han ti leh a. Kawnga inhawng sa chu kan kik karh karh a, mahse thawm chu a reh hian a reh diak mai. "Kan lut tawp mai dawn mi?" tiin ka han zawt a. "Umm..lut mai ang." tiin inchhungah chuan a lut a, ka zui ve nghal bawk. "In awm em?" Nathana chuan a han ti leh a.

Mahse inchhung pawh chu a ruak em em a, kan han hawi kual takngial pawh chuan tumah hmuh tur an awm lo. Nathana chuan, "Room lam lo va en la, pawn verandah lam saw ka va en ange." tiin verandah lamah chuan min chhuahsan a. Room chu pathum vel a awm a, in lian leh nuam ve tak chu a ni.

Mahse room zawng zawng ka check hnu pawh chuan tumah ka hmu chuang lo, zu bur ruak pahnih vel chu ka hmu. Chutia ka enkual vel lai chuan ring zet hian NAthana chuan, "BElla, verandah lamah lo kal vat teh." a rawn ti thut mai a. Rang tak chuan verandah lamah chuan ka va chhuak nghal a, ka thil hmuh chuan min ti phu nasa kher mai.

Hmeichhe pakhat ruang hi thisen nena kawi nuaiin a lo let reng mai a, saruak vekin ala awm zui. A va kun hniam a, "Tunge henu hi?" ka ti deuh hu mai. NAthana chuan a han en vang vang a, "Irene-i chu a ni lo phawt a, hemi in neitu Rozami pawh chu a ni maithei asin." tiin min chhang a. Chhuata thisen kawi nuai mai chu Nathana chuan a han en leh a, "A hnuh a hnuh phei a nih dawn hi." a han ti leh a.

Chutih lai chuan kawngka a rawn ri rak mai a, rang lutukin inchhung lamah kan lut nghal. Nathana nen chuan kan pistol chu kan phawrh ve ve a, bang phenah chuan kan biru nghal a. Inchhungah chuan mipa khat hi a rawn lut a, bang phen atang chuan ka va en a. Min hnung chhawn avang chuan a hmel ka hmu thei lo, chuveleh NAthana chu a rawn chhuak thut mai a.

Chupa chu bangah a nam bet a, a hnek thal siah mai. Chuveleh kawngka chu a rawn ri leh rak a, "Che tawh suh." tia au vak ri ka hria a, rang lutukin ka bihrukna atang chuan ka chhuak ve nghal. Ka pistol chuan ka va tin ve nghal a, "I silai kha dahthla..." ka sawi zo hman lo. Ka rinloh lutukin Inspector Kevin-a a lo ni reng mai, "Kevin.nang maw?" ka ti hu a.

KEvin-a chuan a silai a dahthla a, "A va buaithlak tak...Pu Nathan..Detective BElla..enge hetah in tih a?" a ti vin deuh thak a. NAthana chuan a hnek thluk pa chu a zu en a, "Hei hi tunge?" a han ti a. Kevina chuan vin deuh lek lek hian, "Ka assistant a nih kha...enge hetah hian in tih?" tiin min zawt leh a.

Nathana chuan zawi sap hian, "Irene-i kan zawnna lamah he inchhungah hian min hruaithleng a nih hi...verandah-ah sawn ruang a awm bawk." a han ti leh a. Phawk hru hian KEvina chuan, "Ruang a?" tih pah chuan a va chhuak ve a. Kan va zui ve nghal bawk, "Hei hi Rozami chu a nih dawn hi," tiin a lu a bu deuh nghat nghat mai.

"Inspector Kevin, enge nangni hetah in tih?" tiin ka han zawt ve a. Rum fe hian min melh a, "Tualthattu Irene-i kan zawng ve tho, chuvang chuan hetah kan lo kal a ni." tiin min chhang a. Chuveleh NAthana chuan, "Tualthattu a? Irene-i chu tualthattu maw? Enge proof-na i neih?" a lo ti vat a.

"Proof vak a ngai em ni? Nizanah a model pui Nunui a that a, chumi hnuah bathroom ventilation atangin a tlan chhuak leh a. Amah bak tualthattu midang an awm dawn em ni?" tiin Kevina chuan a zawt let a. "Anih Rozami pawh hi Irene-i thah thovah i ngai tihna em ni?" tiin NAthana chuan a han zawt veleh a.

"Henu hi chu ka sawi lo...Nunui kha chu a thah a ni ti a chiang vek."

"Anih chuan engtia heta lo kal nge in nih? Irene-i vang i ti bawk sia?"

"Report kan dawn vang a ni, helai hmunah hian saw lai deuhva putar mitdel sawn zingah thawm a hriat thu a sawi a...mahse a mit a del avangin a hmel a hmu thei lova...chuvang chuan zawtfiah turin hemi in neitu hi rawn biak kan tum a ni."

"Anih leh in neitu hming hi engtin nge Rozami a ni tih i hriat theih?"

"Aww..putar chuan min hrilh alawm mawle."

Kevina chu a vin tawh kher mai, ka thin a lo khai zak. "Inspector KEvin, i biak mek hi Police Officer, Senior Superintendent lai ni tawh a nih kha. I aw key kha hniam deuh la, zahna lan tir ve deuh ta che." tiin ka lo hau vat a. Mahse Kevina chuan rum fe hian min melh a, "Retired Police Officer...retired...police a ni tawh lo. Kei hi police chu ka ni a, ani chu Private Detective mai chauh a ni." a ti pang pang mai.

NAthana chu a nui suk ringawt, "A dik alawm, retired police ka ni. Engpawh chu nise inhnial buai a hun lo, hnuchhui thin rual hmaah ruang a let reng a, enge hetah police rank vang mai mai a kan inhnial? Kevin, khawnge putar chu a awm? Kan be ve duh ania, hei hi kan case ve tho a nih hi.." zaidam tak chuan a han ti a.

Kevina pawh chu a inbeng dai ta deuh va, "Sawlai lawkah sawn vaimim hmun zau vak lo a awm a, chumi bulah chuan chu putar chu a khawsa a ni. A sawidan chuan zingtin a ui nen an walk dun thin a, tukin zing khan mipakhat a tawk a ni awm a. Mahse chupa chuan a be miah si lova, a biak pawhin a chhang duh bawk si lova. Rukru anih ringin a chhungte a ko nghal a, mahse a chhungte chuan tumah an hmuh veloh thu an sawi thung." a han ti a.

A assistant pawh chuan a hnar thi hruk mawlh mawlh pah chuan, "Saw putar saw a chhungten an sawi dan chuan a mit del mahse a hnar leh a beng a fing em em a, ahma zawna din chuan eng anga sang nge, taksa lian nge te lam kan nih a hre thei vek e an tia. A dik ngei bawkin ka ring, a chhan chu ka pian leh ka san zawng a sawi dik thei thlap a ni." tiin a rawn tuihnih ve bawk a.

Kevina chuan lo sawizawm veleh in, "An vaimim pawh chu ruk a lo ni nual bawk a, chu chu police min rawn phone a. Kan va kal ta a, tichuan putar kan be zo chiah kha hetah hian kan rawn kal a ni." a han ti leh a. Nathana chuan a lu a bu nghat nghat a, "A pawi kan ti khawp mai, i assistant kut ka thlak phah ringawt a...min hrethiam dawnnia." tiin ngaihdam a dil a.

Kevina assistant pawh chu nui sukin, "A pawi love, Pu NAthan...a na lo ve." a lo ti a. NAthana chuan ruang chu a han en leh vang vang a, "Hei chuh.." tiin Rozami awm zawna thil inziak chu a en vang vang a. "Hei hi Nunui awm zawna inziak nen khan ava in ang ve...a tir kha chuan tattoo emaw ka tia.." a ti nuah nuah a.

Kevina pawh chuan a rawn enchiang ve a, cheichim(mouse) lem niawm tak hi a ni. Engemaw sign hi a ang mah zawk a, a nalh phian lehnghal. Glove bunin Rozami awma sign chu ka han nuai a, tlem a pherh deuh va. NAthana chu enin, "Ziah chawp a ni...tattoo a ni lo." ka han ti a. Kevina pawh chuan, "MAzuali awm zawnah pawh khan a awm...a awmzia chu tualthattu hi a ngai tho a ni. Mazuali, Nunui leh tun ami, Rozami thattu hi mi pakhat thil tih vek a ni." a lo ti ve bawk a.

"Nunui post mortem result ah enge inziak?" tiin Nathana chuan a han zawt leh a. "MAzuali ang tho...damdawi hmuhchhuah a ni." tiin Kevina chuan a chhang a. "Sir, Mazuali leh Nunui kha kutthlak miah lovin, damdawi hmangin a that a. Mahse tinge Rozami hi...hliam a tawrh tir bik na chhan hi ni ang le?" tiin ka lo zawt ve a.

"Ka hre biklo..model a nih ve loh vang te pawh a ni mahna." tiin Nathana chuan min chhang a. Chutih lai chuan Kevina phone chu a rawn ri a, "IG Sir a nih hi.." tih pah chuan a pick up a. "Aw Sir....aw ni e, aw..ruang kan chhar a, hmaichhanah ngei kan sawi dawnnia..awle." tiin phone chu  a dah leh mai a.

Nathana chu enin, "Pu Nathan, a pawi ka ti khawp mai. Mahse hei chu ka case a ni a, keimahin ka ti thei ang. In puihna ka mamawh lo, khawngaihin ka kutah dah zawk rawh u." a han tih zawm zat a. NAthana chuan min melh zeuh va, "Anih kan kal dawn em ni?" a ti ta daih mai. Mak ti viau mah ila, "Awle.." tih bakin ka chhang lo.

Pawnah chuan kan chhuak a, "Tinge Sir, khatia i awm a? Vin hrep ta che, inspector a kai thar ve dek dek a, SP retired pawh engatan mah a ngai lo che ania." tiin ka vui nasa kher mai. A nui huah huah a, "A ho teih teih emai, a inla police ve a nih kha. Hei..dar 12 a ri mai dawn, thingpui in lawk ang aw.." a ti sam et ringawt.

*******************

REstaurant changkang deuhvah min hruai dawn maw ka tih laiin thingpui dawr te tak teah hian min luh pui daih mai, "Hetah enge kan tih dawn?" ka ti hu a. Thingpui dawr chhung vel chu enin, "Chow satui leih ka ei thin a, hetah hian...hman atang tawhin, Rinawma nen.." tiin min chhang a. KA hrethiam lo kher mai, "Tunge Rinawma chu?" ka han ti leh hu a.

"Ka thianpa mawle...ka partner hlui ania, Lalrinawma..val senior-a" tiin a la khi suk zui. Ka hre chhuak leh thut, "E...ASP Rinawma kha maw...chhelo ve deuh kha, ka hre leh si." ka han tih chuan a nui huk mai. "Chelo i ti a..khatiang...haha, tak tak ana..ACP a ni tawh." tiin min chhang leh a, ava sual thiam tak.

Chutia kan inbiak lai chuan dawr nghaktu chu a lo kal a, "Ehe..Nathan, nangmah i ni em? a rawn ti a. "Pi Zik...i dam maw?" tiin Nathana chuan a han chibai a. "Ka hming te ila hre ve a..khawnge i thianpa thin kha a awm tak a...chuan kha kha tunge, innu em ni?" a ti leh nghal chiam chiam mai.

Nathana chu a nui a, "Nilove, ka partner a nih hi." tiin a chhang a. Pi Ziki chuan min en vang vang a, "In inhmeh riauva ka hriat ni..haha, Police Officer meuh si, i tlangval rei tawh emai, innei daih rawh u." ala ti zui. "Engpawh nise, khawi...chow satui leih plate hnih aw.." tiin Nathana chuan min nuih suk a.

"Awle..ka va siam nghal ang." tiin Pi Ziki chu a kal ta a. Nathana nen chuan kan thu dun a, "I kal khat viau a nimaw?" tiin ka han zawt a. "Nia...kum 10 dawn chu ka kal tawh lo." tiin min chhang a. Pi Ziki pawh chu lo thu pheiin Nathana nen chuan an titi nasa dun kher mai, Rinawma chanchin deuh hlir an la sawi dun zui.

************************

Kan ei zawh chuan kan chhuak lehnghal a, motor lam kan pan mek lai chuan kan hnung atang chuan, "Detective NAthan...khawngaihin inkawm lawk ang hmiang." rawn ti ri chu kan hria a. Kan ding a, kan han hawilet chu kha reporter, show neih zana NAthana rawn biak tumtu tho, Hlua kha a lo ni.

Nathana chuan a han en vang vang a, "NAng hi...Hlua kha tiraw, nizan a mi kha?" a han tih chuan rang zet hian Hlua chuan, "Aw ni e...inbe lawk ang hmiang." a han ti leh a. "Eng thilah nge min biak duh a?" tiin Nathana chuan a han zawt leh a. "Venghlui kawng hnuai ami Rozami, tukina tu tih hriat loh kut tuar a thi kha..khami chungchangah khan biak che ka duh a ni." a ti ta mai a.

"Engtin nge i hriat?" tiin Nathana chuan a zawt nghal. Hlua chu a khi suk a, "Pu Nathan, media mi leh sa ka nih hi. Reporter ka ni a, news te chu a hre hmasa pawl ka ni ang chu mawle." intih thei hmel tak hian a han ti a. Nathana chu a khi suk a, "Anih tak chu...case khawih lai kan nei a, min lo hrethiam dawnnia. Kan hman lo tlat, nidangah le." tiin kalsan kan tum a.

Mahse ring tak hian, "Mazuali, Nunui leh Rozami te awma thil inziak kha...a awmzia ka hria a ni." a rawn ti ta mai a. NAthana nen chuan kan ding nghal, "Engmaw i sawi a?" tiin Nathana chuan a zawt a. "A awmzia ka hria a ni...cheichim lem a ni. Eng sign emawni tak chu a ni bawk, mithiamte rawn ila a awmzia an hriat mai ka ring." a rawn ti leh a.

Nathana nen chuan kan va pan hnai a, "Engtin nge sign chu i lo hmuh ve theih?" tiin ka han zawt ve a. "A chhan chu a thlalak ka hmu a ni." tiin min chhang leh a. Zawi te hian, "A lo leak out leh hman tawh a nimaw?" ka han ti deuh sup a. "A leak out chu thuhran nise...cheichim lem chuan enge awmzia a neih ang? Chubakah a awmzia ka hria i tia, mithiam rawn chungchang i sawi leh daih bawk sia." tiin NAthana chuan a han zawt leh a.

"A vai chuan hre love..mahse khawi web page emaw ni ah chuan ka chhiar fuh tawh a ni. Kha cheichim lem kha mihring taksa ah chhutsak an ni thin a, chu chu Celtic te khan medieval period lai khan an Lalpa thupekin an sal te kha khatiang sign kha an chhutsak thin a, chu chu mi tangkai lo, mi tenawm leh misual an ni tih chhinchhiahna a ni." tiin a chhang leh a.

Ka lo hrethiam lo kher mai, "Anih chuan tinge tualthattu hian chutiang symbol kher chu a hman le?" ka lo ti nuah nuah a. "Hmeichhia a hua a ni..hmeichhia a haw hle a ni." tiin NAthana chuan min lo chhang a. "Pu Nathan, mithiam chu han rawn ula, engemaw takin in case ah hian ka thil sawi hian a puih theih che u ka ring tlat a ni." Hlua chuan a rawn ti leh a.

Nathana chuan zaidam tak hian, "Kan lawm e, kan inbe leh dawnnia. Kan buai hrih emai, kan kal phawt ange." a ti a, Hlua chu kan kalsan ta a. Motor-a luh pah chuan, "Mithiam rawn tur chu ka hria, ka thianpa thin ania, history lam zir mi a nia." tiin Nathana min hrilh nghal mawlh mawlh a. "Mahse Sir, Hlua thusawi kha i ring em ni?" tiin ka lo zawt a.

"A dik nge dik lo kan fiah dawn lawm, chubakah kha sign khan awmzia a neih ka ring sa hrim hrim a. Engemaw symbol tak chu a ni ngei ang ka lo ti rilru daih tawh a, tualthattu hian hmeichhe lepchiah ah a ngai a ni ngei ang, tuna mitthi a thah tak ho hi." tiin min chhang a. "Anih chuan Irene-i thil tih a nih i ring bik lo tihna animaw?" tiin ka han zawt veleh a.

"Aw ring lo...Irene-i hi tunah hian a that ve angem tih zawk a ni ka ngaihtuah ni...anih loh pawhin a man ve mek pawh a ni thei bawk." tiin min chhang a. "Anih tunah enge kan tih ang?" tiin ka zawt leh a. A ngawi vang vang a, "Ka thianpa te inah chuan kal phawt ang." tih pah chuan motor a ti nung a, kan tlan ta a.

**************************

Reiloteah chuan in pakhat lian tak mai leh changkang ve tak mai hi kan thleng a, "Hetah hian em ni?" tiin Nathana chu ka zawt a. A lu a bu nghauh ringawt a, tichuan motor atang chuan kan chhuak a. "History gold medalist ania, kum 35 bak ala ni lo. College ka kal ve lai khan kan inhmelhriat a, police ka nih hnu khan a takah chuan kan inhmu ta ngai lova, mahe social media kal tlangin kan inbe reng thova." tiin min hrilh fiah a.

"Anih chu mawle, nih chuan kal ila." ka lo ti a. Kawngka chu Nathana chuan a han kik karh karh a, "Lo lut rawh." tia min lo chhawntu aw ri kan hriat veleh chuan kan lut ta a. Mipa pakhat, khabehmul buk chhur mai hi a lo thu a. Min hmuh veleh chuan, "Ehe...NAthan, nangmah i ni em?" a lo ti nghal a.

"Aw ni e, i dam thin maw?"

"Dam thin e, ve teh mial che chuan..hei, i thiannu hi tunge?"

"Ka partner a nih hi...engemaw zawh che kan duh a."

"Englam nge ni ta?"

NAthana chuan Nunui ruang thlalak chu a la chhuak a, "Helai a symbol hi enge a nih i hre mial em?" tiin a zawt a. Chupa chuan a han en vang vang a, "KA room ah en zawk ang, min lo zui ru." tiin a room lamah chuan min hruai phei a. Lehkhabu dang dang chu a han la khawm a, "Ka hmu tawh alawm, khawiah khan nge aw.." tiin a zawng kual a.

Reife hnuah chuan lehkhabu pakhat hi a rawn la chhuak a, "HEi hi niin ka hria." tih pah chuan a keu nghal bawk a. Minute 2 vel hnuah chuan, "Ka hmu e, heta hi..." tih pah chuan lehkhabu chu a rawn ti lang a. "Celtic ho hunlai khan, chaichim an tam thei hle a. Tam a tlak khan chaichim vangin mi tam tak an thi bawk, tam tlak zawh khan an Lal chuan dan bawhchhe tute, lung ina tang turte leh an salte chu he chaichim symbol hi an taksa ah chhut tirin a awmzia chu midang tana hnawk, misual leh thi tlak ho tihna a ni." tiin min hrilh fiah ta a.

NAthana chuan min en a, "Mipa a ni, tualthattu hi mipa ngei a ni." a han ti a. Hriatthiamloh hmel tak chuan a thianpa chuan, "Engthil nge ni reng reng a, NAthan?" tiin a lo zawt a. "Englo ania, Martin. Kan case mawle...kan hmanhmawh deuh va, nakinah ka la hrilfiah dawn che ania." tiin a chhang a. "Tunah in kal leh nghal dawn maw? Thingpui te in in dawn lovem ni?" tiin MArtin-a chuan a zawt leh a.

"Kan in lo mai ange..kan kal leh phawt mai ang." tiin NAthana chuan a chhang a. "Min mamawhna chu ava tlem leh phian si ve..awle, kan inhmu leh dawn nia." tiin MArtin-a chu a nui suk a, pawn thleng chuan min thlah a. Motor ah chuan lutin kan tlan leh ta a, "Bella, nizan show neih lai khan...Irene-i tuia a tlak hma khan a mitmeng kha a diklo i ti ve tho tiraw?" Nathana chuan a rawn ti chhuak deuh hlawl mai.

"Aw...kha kha...keimahni min hmuh vang turah ka lo ngai a." tiin ka lo chhang a. "Ani lovang..ka ngaihtuah a, keini min hriatna chhan tur a awm lo." a ti daih mai. "Mahse Sir, Irene-i hi tu chiah nge a nih kan hre lova, keini pahnih hi min lo hre sa daih tawh a ni lo maw? Kei chu min hre lo mahse a awm deuh va, mahse nangmah zawk hi a hria che anga, a hlau che a ni mai lo maw?" ka han ti leh a.

Mahse NAthana chuan a lu thingin, "Aih...min lo hria pawh nise, engvangin nge min hlauh ngawt ang ni? Kan bulah khan tutu nge awm ve ka hre ta chiah lova, Pu Zonuna, IGP leh Kevina te kha an ni mai a. Midang pawh kha an awm nual a, khang mite zingah khan tu emaw hi Irene-i hian a hmelhriat anga, a hlau a nih ka ring." tiin min chhang leh a.

"Tu chu nge ni ang? Chubakah Kevina te khan police form an ha sia, kha kha a hlau pawh a ni thei."

"Anih ka ring lo, MAzuali thattu hi Irene-i hian a hre chiang a ni. Ka sawi awmzia chu tualthattu hi Irene-i hian a hria, kan mamawh ber chu amah Irene-i ber hi a ni."

"Anih chuan Irene-i chuan nizan show neih laia kan bula lo awm ve te zinga mi zawk a hlau ang chuan lo ngai ta ila, tuber nge ni ang tih chu a chhuichhuah theih mai ang chu...thlalak a tam ang chu, Pu Zonuna pawn a kawl teuh ang chu." ka han ti leh a. "Umm..a dik lutuk. Ti hian ti teh, in in thleng ka thlah phawt che anga. I scooty la chhuak la, putar mitdel chu a statement lova la ta che." a han ti a.

"Awle Sir, mahse nang khawnge i lo awm dawn?" tiin ka zawt a. "Kei chu Pu Zonuna office ah ka lo va kal ang, kan inhmu leh vat dawnnia." tiin min chhang a. Tichuan kan in thleng chuan min thlah a, a tlan tlang ta a. Keipawh chu eng engemaw eiin ka inhnawh puar a, tichuan putar mitdel hmu tur chuan ka chhuak ve leh ta a.

********************

REiloteah chuan ka thleng ve leh mai a, Inspector Kevina chuan min hmu se a sa leh mai mai ang chu. Kawngka chu ka han kik a, nu pakhat hian a rawn hawng a. Min en hu chung chuan, "Enge ni ta? Enge i duh?" tiin min lo zawt nghal a. KA batch chu phawrhin, "Ka pi, Detective ka nia...Bella Lalmuankimi...Pu Chungnunga biak ka va duh ve aw.." ka han ti a.

"Eng thilah nge? Tukin kan vaimim ruk chungchangah khan em ni?" tiin min lo zawt let a. "Aw ni e, biak lawk ka duh a ni." tiin ka chhang a. "Lo lut rawh..choka lamah sawn ilo nghak dawnnia." tiin min luh tir a. Choka lamah chuan ka kal phei nghal a, minute 5 vel hnuah chuan putar pakhat hi chunu chuan a rawn kai phei a.

Chu putar chu Pu Nunga ngei chu a ni, a mit a del a, tiang a rawn hawl bawk. Ka bulah chuan a rawn thu a, "Tukin khan min kawm tawh bawk sia, thu thar a awm em ni?" tiin min han zawt nghal a. "Awm chiah love, englo ania. Ka pu, khawngaihin kha i mi tawh kha, in vaimim rutu ngei a ni tih engtin nge i hriat theih?" tiin ka han zawt ve a.

A nui deuh suk a, "Ka mit hi a del tih chu ka hria, mahse ka hnar a fing a, ka beng a var hle bawk. Khapa kha kan vaimim rutu ngei a ni tih ka chiang, a thaw ri atang khan engemawni a ti zo chiah tih ka hre thei bawk." a han ti a. "Engtin nge a thaw ri atangin i hriat theih?" tiin ka zawt leh a.

"A chhan chu hah hmel takin a thaw hluam hluam a, mahse min hmuh veleh khan a thaw ri kha a zawi deuh tial tial a. A awmzia chu ka mit a del tih a hria a, thawm siam loh hram a tum tihna a ni. Ka bia a, min chhang lo. Mahse engemaw put lai emaw, ken lai a nei a ni ngei ang. Thil rit tak a nih bawk ka ring, a chhan chu a hah tih ka hrethei a ni. Tin, a thlan rim pawh a nam rum rum bawk."

"Anih tak chu...engthil nge a put chu ni thei ang?"

"KAn vaimim a ruk pawh chu a ni thei, i awm tih ka rhia..tunge i nih tiin ka be lui zel a. A tawpah chuan a zep peih ta lo nge ni....a nui suk ri ka hre bawk. Khata tang khan mipa ngei a nih ka ring nghal bawk a, tin min kap leh pah khan kan engemawni a kaih ri hmawk a, kan vaimim bawk a nih ka han ring ngawt a."

Chutia kan inbiak lai chuan ka phone a rawn ri a, NAthana a lo ni. "Hello Sir, hei kan inbe mek." ka han ti a. "Tunah ila awm maw? Anih chuan ka rawn kal ang, hei ka rawn let dawn chiah." a rawn ti a. "Awle, ka lo nghak ang che." tiin phone chu ka dah a. "Thingpui in lawk rawh u." tiin Pu Nunga rawn hruaitu nu chuan thingpui chu dawhkanah chuan a rawn chhawp a.

"Ka pi, a nupui em ni i nih?" tiin chunu chu ka han zawt a. "Aw ni e, Maseni ka nia." tiin min chhang a. "Anih tak chu... fate in nei em?" tiin ka han zawt leh a. "Nei ve e, mahse hnathawkin an chhuak vek a." tiin min chhang leh a. Pu Nunga chu ka han en a, "KA pu, inzawh chi a ni em chu ka hre lova, i mit hi engtia del nge?" tiin ka han zawt deuh tawl mai a.

A khi suk a, "Thing zai thin ka nia, vawi khat chu ka thingzai pahin zu ka in khanglang a. Tichuan ka fimkhur tawk lo khan ka thingzaina khawl kha ka han en hnai lutuk kha, thin themin ka mit velam zawkah hian min per a, ka tal buaina lamah min per belh zel a, ka fimkhur loh man a nih hi." tiin a nui huah huah a, a nuam lo duh angreng kher mai.

****************************

TO BE CONTINUE