TIRA MEI KAIAH (MIZO FICTION CULT HORROR STORY) Written by : Aaron Malsawmdawngzuala Chapter - 4

 TIRA MEI KAIAH

(MIZO FICTION CULT HORROR STORY)

Written by : Aaron Malsawmdawngzuala

Chapter - 4

*********************

School atang chuan ka haw leh a, ngaihtuahna ava kal thui duh tak em. Kan in ka thleng tep tih ah chuan ka phone a rawn ri a, kan nu a lo ni. "HEllo, Duhtak...hei, inkan hun a ni tawh a, ilo kal dawn tawh em?" a rawn ti a. "AW...inah ka haw phawt anga, tichuan ka rawn kal ang." tiin ka chhang a.

"Lo tlang zawk rawh, hei thil mak deuh mai a thleng ania." a rawn ti ta mai a, engthil mak dang nge thleng leh chu nimaw. "Eng a? Thil mak a?" ka ti deuh hu mai. "Aw..tukin atang khan Annie taksa duk vel kha a rawn reh tial tial a, tunah phei chuan duk lai a awm mang tawh lo zawk." a rawn ti leh a.

Mak ka ti kher mai, a hma zan lawkin kan chan mai dawn emaw tih tur khawp khan a na kha  ani a. Tun ataka a taksa duk a reh nghal vek chu thil awihawm loh tak a ni hial zawk awm e, "Enge awmzia? Damdawi in a chhawk tihna em ni?" tiin ka zawt leh kher a. "Doctor chuan damdawi an pek vang a nih a ring a, Pathianin kan tawngtaina a chhang ah ka ngai." tiin min chhang a.

"A ring e a? Doctor chuan chutia a dam leh thut nachhan pawh chu a hre miah lo amaw?" tiin ka zawt leh a. "Aww..lo tlang phawt rawh, hei tunah pawh a harh tha reuh lutuk." a la rawn ti ta deuh deuh va, mak ka ti tulh tulh mai. Engmah chu ka zawh chhunzawm duh tawh lo, "Awle, ka lo tlang nghal ang." tiin phone chu ka dah a.

************************

Hospital chu ka thleng a, Annie pawh anu nen chuan khumah an lo nui dun nasa mai. Lut mai lo chuan ward pawn atang chuan ka en reng a, Annie hmel chu a hma ai zawngin ka hmu tha in ka hria, a dam tha takzet. LAwm viau tur ka nih laiin hlauhthawnna ka nei tam zawk tlat, a chhan chu ka hrethiam lo a ni.

Ti khawp khan a taksa kha  a duk chhuak vek a, na  ati em em bawk kha a nia. Mahse darkar reilote chhunga a dam tha leh nghal em em chu a mak ka ti takzet. A rang mah mah, damdawi pek vang a ni nge ni lo pawh doctor ber pawh chuan a hre lo chu ania. Skin disease anih an ring a, mahse an test pawh in an hmu chhuak bawk si lo kha a ni a.

Chubakah a natna kha a damdawi lo awm pwh nise, dam pui theih pawh ni tehreng se, darkar reilite chhunga a dam nghal vek chu thil dik lo chu a awm chiang a ni. Zing lamah pawh khan a taksa duk te kha a la awm vek tho kha a ni a, lawm ai mah chuan ka hlauthawng ru zawk khawp mai.

Chutia mahnia ka inngaihtuah mek lai chuan ka bulah chuan doctor chu a rawn kal a, "E..Pu Rin, i lo thleng amaw?" a rawn ti a. "Doctor, enge awmzia? Tinge a va dam chak em em ve, eng damdawi nge in pek a?" tiin ka zawt nghal deuh tawl mai. Doctor chu a thaw deuh hak a, "Chu chu keipawhin i rawn thlen hunah ka sawipui ang che ka lo tia." tiin min chhang a.

"Engthil nge thleng hi..ka hrethiam lo?"

"Nia...nachhawkna pangngai chiah kan pe. Diclofenac injection kha kan pek chu a ni mai a, nachhawkna chak tak pawh a nilo. Diclofenuc injection te chu pumna satliah pawh a chhawk pangngai thei tawk ania, Annie natna ti dam vek tur chi damdawi a ni lo hrim hrim a, a damdawi hi a chak hran lo. Mahse ti em em a thawk leh khata a rawn dam rang hi keipawhin mak ka ti khawp mai, awmzia ka hre bik lo."

"Anih chuan eng thil nge ni ta ang?"

SAwi hreh hmel tak hian doctor chuan, "Pu Rin, ngaihloh lamah lo ngai lo la. Nizan pawn lama i chhuah laia i nupui thil sawi kha, Annie muhil lai, a biak mawlh mawlh laia a thil sawi khan kei chu ka rilru a la luah reng a ni. KEIMAH VANGA HETIANG I TUAR HI MIN NGAIDAM RAWH tiin Annie kha ngaihdam a dil a. Atthlak pawh i ti maithei a, mahse in nu hi engemaw tal chu i zawh fiah a ngai a ni." tiin min chhang a.

Thinrim chu sawi loh, keipawh doctor ngaihdan chu ka ngaihdan chiah a ni. Mahse engtin nge ka zawh ang, Annie damloh chhan hi amah vanga ka puh angah ngaih phah ta se, a sawi ve mai mai pawh a lo ni thei a, zawt pawh ni ila engtin nge ka zawh tan ang ka hre lo a ni. Doctor chu chhang lo chuan ka ngawi reng a, "In duh chuan vawiinah in chhuak nghal thei ang." a ti leh a, min kalsan ta a.

Ward chhungah chuan ka lut a, "Ehe...rin aiin i va rawn thleng hma leh si ve.." tiin Sarah-i chuan min lo nuih sang a. Annie pawhin min hmuh veleh chuang, "Apa..enge min lo ken?" tiin min rawn kuah nghal. Za lo tak chung chuan ka nui lui sak a, "I va dam tha tawh vel awm ve a?" tiin ka pawm a.

"PAthian hnenah zankhua deuh thaw in ka tawngtai alawm. A chhanna chu kan hmu ta a nih hi, ka lawm takzet." tiin SArah-i chu a han khi leh suk a. Mahse kei erawh hlauthawnna hlirin ka la khat thung, "Bawihte, engmah na i nei tawh lo em ni?" tiin ka zawt a. "Umm..engmah ana lo." tiin min chhang a.

"Chaw i ei tawh em?" tiin ka zawt leh a, a lu a thing a. "Engmah a ei duh lo, ka puar a ti tlat a." SArah-i chuan a lo ti ve leh a. "Tinge engmah i ei duh lohva?" ka han ti leh a. "Ka ril a tam lo." tih ringawt chuan min chhang a. Sarah-i chu ka en a, "Vawiinah kan chhuak thei a nih chu." tiin ka hrilh a.

"A that nasat chu, in lama haw ka chak tawh lutuk..damdawiin rim hi ka hne." tiin a phun nuah nuah a. Darkar 1 vel hnu chuan pawisa te pe felin damdawi in chu kan chhuahsan ta a, haw kawngah pawh chuan Annie chu a hlim takzet, a zai nasa mai. Anu lah chuan zai puiin a hlim pui em em a, kei erawh ka ngawi reng thung.

*********************

In kan thlen chuan tlai dar 3 a la ri lo hret a, inchhung vel chu Sarah-i chuan a ti fel zung zung a. Enge tih tur ber pawh ka hre lo, reiloteah Annie hi engtin emaw tak a rawn awm leh dawn ni hian ka hre tlat a, rilru nuamin ka awm thei lo reng reng. KA tawt up up a, inchhungah chuan ka vei kual deuh sek ringawt.

"Bawihte, chaw ei tawh rawh aw?" tiin anu chuan a han zawt leh a. Mahse Annie chuan, "Ka ei peih lo." tiin a lo chhang a. "NGati nge a, engmah ila ei silova. Tlem tal ei rawh, i dam lo bawk si." ka ti ve bawk a. "Ka ril a tam lo alawm." a ti tlat mai, chung ringawt pawh chuan ngaihthat lohna a ti zual.

"Engemaw tal i ei loh chuan nakin lawkah i dam lo leh mai ang." tiin chaw ei tur chuan ka han thlem leh a, mahse min la hnial tlat mai. "Nakinah a tam mai ang, nawr lui duh suh." Sarah-i chuan a lo ti a, keipawh chuan ka ti zui ta lo. Anu phone chu chuh nghalin youtube a en nghal char char a, a nui deuh vur vur reng mai.

"Sarah, lo kal lawk teh." tiin Sarah-i chu sitting room lam chu ka pan pui a, sofa ah chuan kan thu dun a. "Enge ni?" a han ti a. "Enteh Duhtak, a dam rang lutuk hi mak i ti ve lo em ni?" tiin ka zawt a. NGaih that lohna nei hmel pu hauh lo hian, "A lawmawm lamah ngai rawh, tikhawp khan kan mangang a, Pathianin min chhanhim sak a nih hi." a ti sam et mai.

"Ni e, PAthian vang liau liau a ni tih chu ka hria. Mahse a dam chak leh lutuk a, a mak ka ti alawm."

"Keipawn mak ka ti ve tho, mahse hei, dam takin a rawn tha chhuak leh a, a lawmawm lamah ngai rawh ka tih chu."

"Ka lawm lutuk alawm, mahse reilote hnuah a natna hi a lo chhuah leh vat mai ka ring. Eng natna emaw tak chu ani ngei ang, a dam leh hmak theih danah hian...eng allergy emawni pawh a ni maithei asin."

"Anih enge kan tih vak anga? Tunah a dam tha tawh a, damdawiinah khan kan va dahlut leh dawn tihna em ni? Doctor meuh pawhin a natna a hre lo kha ania, in entir leh vel khan awmzia a nei lo."

Sarah-i chu a vin deuh hlur mai, "Phai lam te pawh kan pan anga, in check-up leh deuh se ka duh a ni. A dam leh nghal hi chu a lawmawm lutuk a, mahse a rang mah mah leh lutuk hian ngaih a ti tha lo alawm." zaidam tak chuan ka han ti leh a. Chutih lai chuan Annie chu lo chhuak in, "Pa...round ila." a rawn ti a.

Ka fanu Annie hi Office ka chawlh chang te leh hun awlah te hian ka round pui fo thin a, kan veng Park-ah te ka kal pui thin. "Lo kal teh, BAwihte." tiin ka ko va, a mal chungah chuan a rawn thu a. "Round i chak amaw?" tiin ka han zawt a. "Um..ka chak lutuk." tiin min chhang a. "Anih chaw tlem tal ei phawt la, tichuan kan round dawnnia aw.." ka han ti leh a.

"Aih ka ei peihlo, ka ril a tam lo alawm." a la ti talh mai. "VA chhuah pui mai mai teh, a ril a tam hunah a sawi mai ang. DAwrah i chawlh pui mai dawn lawm, va round pui rawh." Sarah-i chuan a lo ti a. "Um anih leh kal ila." tiin ka chhuah pui a. "Lo haw har lo ula aw...chubakah damkawr ala nih kha." tiin SArah-i chu a rawn au zui lawm lawm a.

*************************

Kan tlan lai chuan zawi te te hian Annie chuan, "Tira mei kaiah, chhimtira mei kaiah, haha. A hnuhnung hnung phungin seh.." tiin a chham mual mual a. Mahse ka hau tawh lem lo, ngawi reng chuan ka tlan char char a. Minute 5 vel kan ngawih dun vang vang hnuah chuan, "PArk ah kal ila." a rawn ti chhuak hlawl mai.

"Bawihte, kan kal mek alawm..Park ah kan leng kual dawnnia, i ril chu ala tam chuang lo ami?" tiin ka han zawt leh a. "Aw tam lo...engmah ka ei peih lo." tiin min chhang a. "Anih Bawihte, Tira mei kaiah tih kha khawi atanga i hriat nge?" tiin ka zawt a. "Ka thiante nen kan infiam thin....school ah te, hmun dangah te.." a ti ta zauh mai.

KA beng a verh nghal zar mai a, "Hmundangah te a? Khawi hmun dangah maw?" tiin ka zawt nghal a. "Muanpuii te inah, ka thiannu te inah.." tiin min chhang leh ta mai a. "Tunge Muanpuii chu? In school ami a ni em?" tiin ka zawt leh nghal. "Aih, kan school ami chu a ni lo." tiin min chhang leh a.

Motor chu ka ti ding a, "Annie, Muanpuii te inah chuan engtin nge i kal theih? Tu in nge hruai che?" tiin ka zawt leh a. "Ka hre chiang tawh lo, ka awm ve tawpin ka hria." a ti leh a. "Hriat han tum teh...khawngaihin BAWihte, nimini school bang kha kan inbulah naupang dang, nangmah ang rual vel an lo infiam em?" tiin ka zawt leh a.

Inngaihtuah ve niawm tak chuan a han ngawi deuh vang vang a, "Ihh....aw, aw awm e. Kha kha alawm ka thiante chu, an inah min hruai daih alawm." a ti leh ta mai a. Thil thleng zel hriat chakna chuan ka khat nghal, "Anih Muanpuii te in chu khawilaiah nge a awm i hria em? Han ngaihtuah teh, i la hre thei hrim hrim ang." ka han ti leh a.

"Aih, ka hre lo...khawilam nge min panpui ka hre thei tawh lo." a ti ta tlat mai. "Bawihte, ngaihtuah teh..khawilam nge in pan, han ngaihtuah vang vang teh." ka ti leh a, mahse a hre thei tawh tlat lo. KA zawh luih zel chuan a buai phah ang tih ka hlau va, ka zawt zui duh ta lo va. Motor chu ka start a, kan tlan chhunzawm leh ta a.

****************************

Park chu kan thleng a, hlim tak chuan a tlan kual a. Nuam a tih hmel kher mai, amah chauh pawh chuan a nui har har reng a. A bul lawkah chuan dingin ka fanu Annie infiam chu ka en reng a, "Bawihte, i chungah hian eng thil nge thleng ta mai le? Kan chhungkaw chungah hian enge thleng ta mai hi ka hrethiam lo, ka va han beidawng tak em.." tiin ka rilru chuan ka be mawlh mawlh a.

Chutih lai tak chuan putar pakhat hian a nupui niawm tak hi wheel chair chuan a rawn nawr a, min rawn melh a, ka lo nuih suk ringawt. Amah pawh chu a khi suk a, mahse Annie hmel a hmu chiah chu a ding chat mai. Mak tih hmel tak chuan a en vung vung vung a, chutah hlauh hmel tak hian a nupui wheel chair-a thu mek chu a nawr chak zual sauh mai.

Chutah a nupui chuan Annie chu a han en veleh a, "Nilo..Pa-a..ding teh. Saw...saw nau saw..saw nau saw.." a ti ta chel chul mai. Rang takin chu putar chuan a nawr chak zual sauh va, "Bengchheng suh, ngawi rawh." tiin a khap nghal vat bawk. Ka ngaih a tha ta hauh lo, ka va tlan phei a.

An hmaah tak chuan ka va ding a, "Ka pu, ding lawk teh u." ka ti a, an ding ve mai bawk. "Enge awmzia? Ka pi hian tinge ka fanu saw khatia a tih vak vak a? A hria em ni?" tiin ka zawt a. Inthlahrun hmel tak leh zam hmel tak hian a nui lui suk a, "Kan nu hi rilru kim lo ania, a thusawi kha ngaih thutak vak chi a nilo." tiin a insawi fiah nghal mawlh mawlh.

Mahse ka awih hlawl lo, "Nilo ka pu, thil dik lo chu a awm a ni. SAwi rawh, tute nge in nih? Engvangin nge ka fanu kha i nupui hian khati fakau va, hlauh hmel taka a en? Nangpawh khan hlauh hmel takin i en a, engemaw dik lo chu a awma a ni." tiin an kal chu ka phal bik ta thak lo. Chutih lai chuan Annie pawh chu a rawn phei a, ka bulah chuan a rawn ding a.

Chuveleh Pitar chuan Annie chu a en vung vung a, "Ka..ka tunu, aww...avan pawi tak em." a ti ta vawng vawng mai. Mak ka ti takzet, "Enga? Ka tunu a?" ka ti deuh vak a. Chutah putar chu ka en leh a, "Tute nge in nih? Enge i nupui sawi awmzia hi?" tiin ka vin lek lek tawh. Mahse putar chu a ngawi reng a, melh pawh min melh lo chuan a kun tlat a.

Pitar bawk chuan tap lek lek hian, "Bawihte...ka tunu Annie...a pawi ka ti emai. Hetiang khawpa hmeichhe naupang duhawm hi..i pa hi tunge a nih i hre der silo, kan thiam loh vek a ni." a la ti ta deuh deuh va, a tap pur lehnghal. Chutah zet zawng, mak ka ti lutuk chu a hik hian ka hik chuai chuai in ka hria.

"Ka pi, a hming i hria amaw? Ka fanu hi a hming i hria amaw? Engtia hria nge i nih? Chuan nang hian engtin nge min hriat?" tiin ring leng lawng chuan ka zawt a. Chutah pitar chuan min en ang vung vung a, "Nang hi...tunge i nih a?" a ti ta daih mai. "He naupang pa hi ka nih hi, min hria ani lawm ni?" tiin ka vin deuh thak mai.

Chutah pitar chuan a lu a thing a, "Tunge i nih ka hre lo che, chuan he naupang hi ka tunu a ni a, apa i ni lo." a ti leh ta mai a, ka sa zak mai. Chutah putar chuan, "Rina i ni tiraw?" a rawn ti ve ta nge nge a. "Aw ni e, tunge i nih zawk a?" tiin ka zawt let a. "Thu phawt ila, engkim ka hrilh vek dawn che nia." tiin min chhang a.

***********************

"Rina, Sarah-i pasal i ni ang maw?"

"Aw ni e, kan nu pawh i hria amaw?"

"Aw hria e...in chhungkaw thumin ka hre vek che u alawm."

"Mahse...engtin nge min hriat?"

"SArah-i hi...kan fanu a ni."

Ka phu zawk mai, "Engmaw? Sarah-i..ka nupui hi in fanu maw?" ka ti hu mai a. "Aw ni e, ka hming chu Engmawia a ni a, ka nupui hi Liani a ni. SArah-i hi kan fanu neichhun a ni a, Annie ang chiah hian...amah lo chu fa dang kan nei lo hrim hrim." tiin min chhang a. Ka hrethiam lo kher mai, "Mahse, engtin nge a nih theih? Sarah-i nu leh pate chu, Pu Siama leh Pi Kungi te an ni sia. Enge awmzia?" tiin ka zawt leh a.

Chu putar, Pu Engmawia chu a thaw deuh halh a. ZAidam tak leh hnuk ulh teuh chung hian, "Kan fanu hi a him zel zawk nan tiin kum 22 a nih lai khan kan thawn bo va, tichuan tuna a nu leh pate anga i ngaih, Pu Siama leh Pi Kungi te saw kan enkawl chhunzawm tir ta a ni." tiin min chhang leh a.

Ka bo tulh tulh mai, "Pehhel kual lo khan engki min han hrilh vek teh, engmah ka la hrethiam lo. KA fanu Annie chungah hian thil tha lo tak a thleng mek a, ka beidawng takzet a ni." ka han ti leh a. Chutih lai chuan Pu Engmawia nupui, Pi Liani chuan, "I fanu a nilo...apa i ni lo." a rawn ti leh a.

Mahse ka chhan hma chuan Pu Engmawia chuan, "Rina, ngun takin ngaithla rawh. Sarah-i hian a hmangaih em che avang leh i nat a hlauh avang te, i kalsan mai a hlauh avang te in i lakah thudik a zep mai chauh a ni. Ni e, ka nupui Liani sawi kha thudik a ni. Annie hi i fanu diktak a nilo, fa i nei lo hrim hrim." a ti ta mai a.

Ka bing mup mai, "Engmaw i sawi a? Annie hi ka fanu a ni lo amaw? Chuan kei hian fa ka nei lo amaw? Enge awmzia?" tiin ka aw key pawh a sang tha tawh khawp mai. "AW ni e, Annie hi i fa a ni lo. Fa i nei lo hrim hrim, midang fa zawk a ni." tiin min chhang a. KA mittui a tla nghal sawk thei, Annie chu ka en a, ani lah chu a la infiam tui mai si.

Pu Engmawia bawk chuan, "Rina, ngaihthlak a hrehawm maithei a, mahse thudik tak i hriat tho tho angai dawn. Sarah-i hian kum 15 a nih lai khan an school ami bialpa a nei a, chupa chu Samuela a ni. Kan inah pawh a rawn lenglut fo thin a, mahse kan duhpui hlawl lo a ni. A chhan chu Sarah-i ala naupang em vang chu thuhran nise, Samuela kha khatih hun lai khan kum 30 chuang daih tawh a nih vang a ni. Samuela kha Sarah-i te school teacher a ni a, kan fanu SArah-i lah chuan a duh em em mai si." tiin a han inhnit deuh feih feih a.

Tichuan sawi zawm leh in, "SArah-i pawh kan hau nasa, ngaihzawng neih ala hun loh thute, ala naupan thute leh mahni school zirtirtute ngaihzawn a that loh zia te sawiin kan zilh ve nasa, mahse Samuela zunah chuan a uai nghet lutuk tawh tlat. Hun a kal zel a, zana chhuah ruk te a ching tan ta a. A ni telin a mizia a dang telh telh a, Samuela lah chu a then duh hauh si lo. Vawi tam tak kan hau thin a, a vuak te pawh ka vaw hial thin. MAhse awmzia a nei chuang lo, an inhmu ru reng tho va. Eng ang pawhin a roomah kalh khum mah ila, eng tin tin emaw a lo chhuak thei tho zel. Chumai ala nilo, zan khat chu Samuela chuan thinrim takin kan inah min rawn luh chilh a. Kan fanu Sarah-i chu a rawn hruai tur thu a sawi ta mai a. Ka thinrim lutuk chuan police phone ah ka vau nghal a, mahse min hlau eih lo. Kan insual phah hial a, khatih laia thil thleng kha..." tiin a tah a chhuak lutuk chu a sawi zawm hleithei lo.

"Ka pu, engkim min hrilh rawh. A vaiin hriat ka duh, ka hriat a ngai a ni." tiin ka darah chuan ka vuan a. Muang chang chuan a rawn hawi chhuak leh a, "Samuela khan ka lu a thi zawih zawih khawp khan kan pangpar pot khawi lai khan min chhu tlu tawp a, Sarah-i chuan kil khat atang chuan min lo en reng a. Ani pawh chuan chutia Samuela chetdan rapthlak tak a hmuh chuan a hlau ve hle a, a ding khur zawih zawih a. Kan nu chu au a tum a, mahse a au thei tlat lo. Samuela chuan kan nu mitah tak chuan a en a, kan nu chu a hrawka rek ang mai hian a ang hlawi hlawi a. Mahse engtin mah a khawih fuh silo nen, chutia kan nu a awm chu mak ka ti lutuk a, va auh ka tum a, mahse keipawh chu ka aw a chhuak thei hauh lo. Samuela chuan nasa zet hian min nuih sawh a, tichuan SETANIST CULT chhungkaw pakhat zinga seilian a nih thute leh, ramhuai thil tih theihna hmangin kan fanu hi an sakhua a hruai luh a tum thute, an PAthian (ramhuai Lalpa) tana serh hran tura an sakhaw thlan bik a nih thute chu a sawi ta vek mai a. Khatih lai khan SAmuela khan kei leh ka nupui hi min control tlat a, chet pawh ka che thei lo a ni. Tichuan ka nupui chu thah ah min vau ta a, Sarah-i chu ka phalna thlapa hruai a duh kher bawk nen. Kan nu chu a thi mai dawnin ka hria a, chuvang chuan hreh chung chungin ka phal ta a ni." tiin a tap hawm hawm mai.

AWih tur nge awih loh tur pawh ka hre lo, mahse awih lo ta ngawt ila, ka thil tawn zozai te han ngaihtuah let chuan thil ni thei tak chu a ni bawk si. Sawi mai tur pawh ka hre lo, ka a zo vek dawn hialin ka hria. "A nih leh, Annie hi ka fanu nilovin, Samuela fanu zawk chu tihna em ni?" tiin ka zawt leh a.

Mahse rin loh tak maiin Pu Engmawia chuan, "Nilove..Samuela te chu a thi daih tawh alawm." a ti leh lawi bawk si. "Eng a? A nih leh tu fa nge? Enge awmzia?" tiin ka zawt leh a. Chutah a nupui, Pi Liani chuan zawi sap hian, "Ramhuai...ramhuai fanu a ni. Apa chu mihring a nilo, ramhuai a ni." a la rawn ti ta deuh deuh va.

"SAmuela khan Sarah-i chu a hruai haw ta a, police kan ko a nih vaih chuan ka fanu Sarah-i mai nilovin, ka nupui pawh chu thah ah min vau hial a. Chutia min vau mai chu ala duhtawk chuang lo, kan nu hetia rualbanlo leh mi pangngai pha lova siamtu chu amah, SAmuela bawk a ni." a han ti leh a.

"Mahse ka pu, a ni thei dawn em ni? Chutiang khawpa thil ti thei...mihring vet tho si. Setanist pawh lo ni tehreng se, hetiang khawpa thiltihtheihna a nei bik thei dawn em ni?"

"Thei tehreng e, a chhan chu kha Samuela kha tunge a nih kan lo hre chiang lo em a ni. Chumai nilovin, an chhungkua kha ramhuai be thin an ni a, mahse midang hmuh ah chuan Chirstian chhungkaw tha lutuk angin an lang a. MAhse chhungkaw rapthlak tak an ni, khatih hunlaia nausen thlariat mi bo ringawt pawh kha an chhungkua in ramhuai hnena inthawina atan an lo ru chhuak hi a lo ni a, chupawh chu khami zan khan SAmuela khan a sawi vek a ni."

Ka lu ka thing a, "Ka awih thei lo, thudik a ni thei lo. Chutiang a thleng thei lo, ka fanu Annie hi ramhuai fa maw? A ni thei lo, tinge SArah-i'n engmah min hrilh loh?" tiin keipawh chu ka tah a chhuak tawh takzet. "Rina, a hmangaih vang che a ni. A chanchin diktak i hria anga, i kalsan mai a hlau a ni." tiin min hrilh a.

"Mahse..Annie pian zan te pawh khan ka awm ve reng sia. Engtin nge ka fanu a nih loh theih? A rai chhung zawng te, a pai chhung zawngte pawh ka hre vck a. Thil theih a ni lo, ka awih thei lo." tiin ka insehruh teuh tawh mai. Mahse Pu Engmawia chuan chiang fek fawk hian, "SArah-i hi an chhungkaw tan khan mi pawimawh tak mai a ni a, a la thianghlim bawk avang khan a thianghlimna kha Samuela te chhungkua khan an PAthian tan an hlan a ni. SArah-i hi ramhuaiin a mutpui a ni, Rina." a ti leh ta mai a.

Engtia han dawnsawn tur nge ka hre lo, ka nupui chu ramhuaiin a mutpui amaw? Ramhuai fa a pai a, chu chu keiin kum 6 chhung zet ka fanu ang maiin ka lo enkawl tihna maw? Ka awih thei lo, mahse ahma a ka thil tawn zozai te ka ngaihtuah letin han awih loh ngawt chi niin ka hre silo, mahse awih a har ka ti takzet.

"RAm..Ramhuaiin a pawngsual tihna em ni? Ka..ka nupui chu..ramhuaiin a mutpui amaw?" tiin keipawh chu ka tawng tha hleithei tawh lo, ka tah a chhuak takzet. "Rina, hriatthiam a har dawn tih ka hria, mahse tuna i rilru nat aia nasa daih khan ka rilru ana asin. Ka fanu ka chan a, ramhuai be thin sakhaw thu hnuaiah hun rei tak chhung kan awm bawk asin. Kum pawh a tlin hma in SArah-i thianghlimna chu laksak a ni a, chupawh mihring lakah nilovin, ramhuai lakah lehnghal." tiin a mittui chu a hru a hru mai a.

Thawk ka han la te te a, "Anih leh SAmuela kha a thi tawh i tia, engtia thi nge?" tiin ka zawt leh a. "An sakhaw rindanah khan Samuela hi Lalfapa a ni a, an PAthian biak ber, ramhuai ko chhuak thei tu ber a ni. Samuela khan Sarah-i hi nupuiah a nei tak tak duh pawh a ni lo, an PAthian khan Samuela hi hmeichhe tleirawl, la thianghlim ngei chu aman mutpui tura hruai turin a tir angin an ring a, tichuan Samuela chuan kan fanu Sarah-i hi a rawn thlang ta chat a ni. Tichuan Sarah-i chuan fa a nei anga, chu a fa chu a lo pian chhuah nan chuan an Lalfapa in a nunna  ahlan a ngai a. Chuvang chuan SAmuela chuan a nunna a hlan a, a thi ta a ni. Mahse tun thlengin mipuite chuan mibo angin an ngai a, thudik hretu chu kan chhungkua leh Samuela te chhungkua chauh kha an ni." tiin min hrilh fiah leh a.

"Anih..Sarah-i hi engtin nge tihian pangngai takin a la awm theih si? Tunah hian chumite chhungkua chu khawnge an awm? Sarah-i hi engtin nge ka nupui a nih daih theih?"

"Khami hnu khan SArah-i chu chumite chhungkaw zingah chuan a cheng chhunzawm veleh nghal a, mahse rei pawh a awm lo. Kan ngaihtuah thei em em a, mahse kan thil tawn te avang khan kan nu hi chu a pangngai leh thei tawh lo hrim hrim. Keipawhin engmah ka sawi chhuak ngam lo, a chhan chu khamite chhungkua kha ka hlau takzet a ni. Intihhlum mai te ka duh thin a, mahse ka fanu SArah-i ala dam ve reng tih ka hria a, ka nupui, mi pawh ang tawh lo leh rualban lo hi tuman min enkawl sak dawn silova, ka thei ngang lo a ni. Kum 6 lai a liam a, Sarah-i chu a reh vang vang mai a, kan hmu leh ngai tawh lo. Mahse zan khat chu kan kawngka chu a rawn inkik dawt dawt a, ka va hawn chuan ka fanu Sarah-i ngei mai chu ka hmu leh ta a ni. A tir phei chuan a lo thang lian tawh lutuk chu ka hai hial a, mahse a rawn tlanchhuak ru tih te min hrilh a, tichuan chutah tak chuan kan chhungkaw thum chuan kan khua chu kan chhuahsan ta a ni. Tichuan khaw dangah kan awm ta a, mahse keimah hian ka fanu chu ka bula a awm reng chuan ka venghim zo dawnin ka inhre lova, ka hlauhthawnna a la reh hleithei alo a ni. Tichuan Pu Siama, ka hmelhriat tha tak mai chu bia in ka fanu Sarah-i chu a fanu anga enkawl turin pawisa tam tak pe in hemi khuaah hian an rawn insawm ve leh ta a ni. Keini nupa erawh chu a tar a tarin khaw dang dangah kan biru kual a, khami te chhungkua khan min la zawng reng a ni."

"Anih leh Annie hi engtin nge a hmel in hriat chat theih? Chuan pawisa te chu khawi atanga nei nge in nih?"

"Sarah-i a rawn tlan chhuah khan an chhungkaw pawisa tam tak a rawn ru chhuak a, chumi hmang chuan kan insawm kual thei mai chauh a ni. Tin, Pu Siama pawh ka thiantha tak a nih vang chauhvin ka thiltih chu min pawm sak a, anni lah fa nei thei lo an lo ni bawk nen. Mahse thudik engkim chu ka hrilh vek lo, dawt ka phuah kual mai mai a, chu dawt chu tun thleng hian thudik amaw la tiin Sarah-i hi a fanu angin a enkawl chhunzawm ta zel a ni. Mahse SArah-i min hrilh dan chuan ramhuaiin a mutpui hnu khan a rai nghal a, mahse a fa chu a chhiat hlauh mai a. Mahse a mutpui nawn fo thin a ni awm a, a sawi dan chuan ka mumangah hlir min putpui thin a ti a. Kum a ral zel a, in inneih hnu kar hnih velah khan..." a tih lai chuan Annie chu a rawn au vak a.

Ka va hawi phei chuan leiah a lo mu kawm ngawl mai a, "Ana...apa, ana lutuk." tiin a lo rak vak vak mai. Rang takin ka va tlan phei nghal a, a ban vel chu a lo duk leh ta thluah thluah mai. A dul ka hlim a, a lo duk chhuak leh vek tawh. Rang takin ka pawm a, Pu Engmawia pawh chu ka ngaihtuah leh hman tawh lo, carah luh puiin damdawiin lam ka panpui nghal vat a.

*******************

TO BE CONTINUE