WILD ZONE : SEASON 1 (Episode - 3) Written by : Aaron Malsawmdawngzuala BAD GIRLS - 3

 WILD ZONE : SEASON 1

(Episode - 3)

Written by : Aaron Malsawmdawngzuala

BAD GIRLS - 3

********************

Kan in zawnah chuan NAthana chuan motor chu a ti ding a, "Motor ah hian ka lo nghak mai ang che, va insiam rawh." a ti a. Mahse keichuan, "Angai lo, kal vat zawk ang. Tihian nimai rawh se, a ho lutuk." tiin ka chhang a. "I ti tak tak maw? A hmun kan thleng anga, i zak leh si ange." a han ti leh kher a.

Nui chung hian, "Zah ka hre tawh lo, ka senior tawh lutuk." tiin ka fiamthu ve a. A thaw deuh halh a, "Anih chuan i thu vek alawm, kal dawn ila." tiin motor a star a, Falkland lam pan chuan kan kal ta a. Kan tlan pah chuan kan ngawi dun reng a, "A hrim hrin, Model Agency ve si an nawi hlawm ka ti." a rawn ti chhuak hlawl mai.

"Engchu nge an nawina?" tiin ka zawt a. "Model ber te pawhin Director pawh hrilh lovin rehearsal niah pawh an duh duhnaah an chhuak pawp pawp a, a mumal lo angreng ka ti." tiin min chhang a. "Nia ni ve tho mai, mahse Director kha a nem leh lutuk pawh a ni ve thei a. Chubakah an hmeltha vak hlawm lo bawk a, an lar vak pawhin ka ring lo." ka han ti ve deuh luam a.

"Tualthattu hi a chet leh ka ring tlat a ni, Bella. Zu tam tak in tur a awm ngei anga, model ho ven that an ngaiin ka hria." Nathana chuan a han ti leh a. "Nia, keipawhin ka ring a lawm. Engpawh nise, thawh pui i nuam ka ti, Sir." ka han ti vel a. Nui suk chung hian min melh a, "KAn la thawk tan dawn chauh alawm, kan thawk rei dun telh telh anga hrehawm i ti tulh tulh ang tih chu ka hlau khawp mai." tiin a han nui huah huah a.

************************

REi fe kan tlan hnu chuan kan thleng ta a, motor park-na mai tur a vang khawp mai. Picnic spot kawtah chuan motor chu a tlar hian a intlar phei dul mai a, minute 10 vel dawn lai chu prak-na tur zawngin kan han tlan kual leh phawt a. A tawp a tawpah chuan kan hmu ta hram a, police kan ni tih chu hria se min han kian nasa dawn asin mawle.

Motor atang chuan kan chhuak a, Nathana sawi ang ngei ngeiin an lo nalh hlawm khawp mai. Hmeichhe ho phei chu a vul hian an vul chuk hlawm mai a, an dress pawh a nalhin hmuh an nuam hlawm kher mai. Nathana'n hun min pek laia ka lo inchei ve deuh law law lo kha chu ka inchhir tep mai, leather jacket nen hmeichhia lehnghal, min enduh bik deuh te khan ka hria.

NAthana lah chuan min nuih a, "Ka hrilh lawk che kha, inchei ve deuh rawh ka tih kha." ala ti zui. "Hmm..ka zak lem lo. Detective alawm ka nih..keite chu.." ka han ti ve deuh ngat a. Sana ka han en a, dar 5 chu a lo pel der tawh. GAte bulah chuan kan va kal a, "NAngni khawnge in invitation?" tiin duty chuan min lo ti ding a.

KAn chhan hma hma chuan IGP chu a lo kal a, "Kan naute an nih kha, police an nih kha." tiin a rawn tlan phei a. Duty chuan zah hmel tak hian, "Ka tihpalh lutuk, Sir..lo lut rawh u." tiin thupha a chawi nghal mawlh mawlh a. Kan lut ta a, "In lo thleng thei maw?" tiin IGP chuan min lo chibai dun a.

"Nia..kan rawn thleng deuh chiah..kan tlai lo maw?" NAthana chuan a han ti a. "Tlai love..khi an tan deuh chiah." tiin IGP chuan a chhang a. Stage lam chu kan han en a, Pu Zonuna chuan thu a lo sawi mek a. "Security a tight tha em, Sir?" tiin Nathana chuan a han zawt leh a. "Aw...hmun tin deuh thaw ah kan dah e...a tha thawkhat viau chuan ka hria." tiin a chhang leh a.

Chutih lai tak chuan press mite zinga mi pakhat, kum 35 bawr vel ni awm tak, tarmit vuah hi a rawn phei a. Nathana bulah chuan rawn dingin, "Ka pu, Detective NAthan-a i ni tiraw?" tiin a rawn zawt a. Nathana chuan a en hu a, "Aw ni e, tunge i nih a?" tiin a lo zawt let a. Chupa chuan a ID chu hmuhin, "Reporter ka nia, ka hming chu Hlua ania, Lalbiakhlua." tiin a chhang a.

"A nih chu...min biak duhna i nei em ni?"

"Helai hmuna in rawn kal chhan hi Model MAzuali thihna chungchangah a ni tiraw?"

NAthana nen chuan kan in en a, "Eheu, chutiang min zawhna chang hretu awmchhun i ni." tiin a nui suk a. "A ni tiraw? Pu Nathan, i fans ruhkawl lutuk ka nia." a han ti leh a. "Nilove..keini chu thil dang vang ania." tiin a chhang a. "Eng vang nge ni ka hre ve thei angem?" tiin a han zawt leh hram a.

"Nakinah i la hre mai ang...engpawh nise min lo hrethiam lawk rawh aw..." tiin Nathana chuan a chhang a, chupa pawh chu a kal ve leh mai bawk. "Press mite lah hi...engkim hriat ve hi an tum a." tiin Kevin-a chu a lo phun nuah nuah mai. Nathana chu a nui suk a, "An hna a ni ve miau bawk si alawm le." a han ti dam diai a.

Stage atang chuan Pu Zonuna chu a rawn chhuk a, min ran hmu nghal a. Min rawn pan vat in, "In lo thleng thei maw? Ka pu, Irene-i chu nichin deuh khan a rawn thleng chiah a...mahse show zawh law law ah inhmu mai dawnnia. Tunah hian kan tan mai tawh dawn a, dressing room ah an awm mek a..." a ti nghal zung zung a.

"Ka hrethiam alawm, ni e..show zawhah kan hmu dawnnia." tiin Nathana chuan a chhang vat a. Inspector KEvin-a pawh chu a rawn phei ve a, "Good Evening, Sir." tiin IGP chu salute a rawn pe deuh thlap a, "Good Evening, rinhlelhawm deuh te an awm em..mipui zingah?" tiin IGP chuan a lo zawt a.

"Tunah hrih chuan chutiang an awm ka hmu hrih lo, ka nauten an thlithlai mek e." tiin Kevina chuan a chhang a. Item hrang hrang an neih zawh chuan Fashion Show chu an tan dawn ta, "Min lo hrethiam ula..dressing room lamah ka va buaipui ve angai dawn a. KA kal phawt ange, show zawhah kan inhmu dawnnia." tiin Director Pu Zonuna chu a kal sawn a.

"Sir, ka va zung lawk ange." tiin zun ram thiar tur chuan bathroom lamah chuan ka phei a. Kawngka zawn ka thleng chiah chu toilet pakhat atang chuan hmeichhe pakhat hi a rawn chhuak hlawl mai a, "AWi ka tlai tawh lutuk." a rawn ti chhuak bul bul mai. A hmel ka han en chiang chu show stopper tur..Nunui kha a lo ni.

Min hmu chu a ding deuh thut a, keipawh chuan ka en reng ringawt. "Min lo hrethiam dawnnia." tiin a chhuak leh ta nghal a. "Show stopper tur si ava tlai ve mawle." tiin ka hriat tham lek chuan ka phun sap a. Tichuan zun ram chu ka thiar a, reiloteah chuan ka va phei leh a. Ka thut fel veleh chuan NAthana chuan, "I van zung rei em em." a lo la ti zui.

****************

Minute 10 vel a ral leh hnu chuan Fashion SHow chu an tan ta a, a hmasa berah chuan model naupang ber, Jenny chu a rawn kal hmasa ber a. Tichuan model dang chuan an zui nghal bawk a, mizo pawh kan lo nalh tawh hle mai. Swimming pool bul lawkah chuan an han inpose kual a, mipui pawh an au dur dur mai.

Nathana chu ka va en a, mahse a ngaihsak loh hmel khawp mai. IGP nen chuan an titi dun char char a, keimah tak zawk chuan hmuhnawm ka ti angreng phian. Chutah Nunui chu ka hmu ta thut mai a, show stopper tur ni si chu a laihawla a rawn chhuak ve hlawl mai chu mak ka ti angreng kher mai.

Chutih lai chuan Pu Zonuna chu a rawn phei a, ka bulah chuan a rawn thu a. "Enge show hi i ngaih ve dan hrim hrim, ka pi?" tiin min han zawt a. "A tha khawp chuan ka hria, i model te pawh an hmeltha e." tiin ka chhang a, a lawm hmel kher mai. "Pu Zonun, a hrim hrimin Nunui khi show stopper tura intih kha amaw ka tia. NGati nge a lai hawlah a rawn chhuah ve daih a, inthlak em ni?" tiin ka han zawt ve a.

Lungawiloh hmel tak chuan Nunui chu a han melh chhova, "Zingkar atangin rehearsal pawh ti hman lovin ka thu lovin a lo chhuak daih a, show tan hma lawkah a rawn thleng ve chauh va. A rawn thlen lai phei chuan ka awm lo, thu ka sawi daih tawh. Amah aiah Irene-i ni rawh se ka ti ta anih kha, show stopper ni duh hle si a tlai lutuk kha ka lungawi ta lo alawm." tiin min chhang a.

Bathroom a ka hmuh lai chu ka han mitthla let a, ka khi deuh suk ringawt. A tawp a tawpah chuan model hnuhnung ber, show stopper chu a rawn chhuak ta. Irene-i chu a takah kan hmu ve ta a, thlalak ai mahin a hmeltha zawk. A rawn kal vel pawh a hnehsawh hle mai, mizo model ka hmuh tawh ah chuan ala chhelo ber awm e.

Tichuan swimming pool sirah chuan model ho chu an ding tlar ta thap hlawm a, hmuh an nuam hle mai. Irene-i chu Nathana nen chuan kan en deuh bik reng a, thla an la nasa chuai chuai hlawm khawp mai. Chutah a hmasa bera kal chuan hma hruaiin back stage lamah chuan an inzui leh diah diah hlawm a.

An kal zo tep tihah chuan a hnuhnung bera mi Irene-i chuan kan lam chu a rawn melh zuk a, a meng deuh kawk mai. Hlauh hmel tak hian a petek khut a, swimming pool ah chuan a tla ta burh mai. RAng lutukin SArah-i chuan a kai chhuak nghal a. A zah hmel kher mai, hnuai lam melh reng chung chuang back stage-ah chuan a lut ve bawk a.

Mipui chuan kut an beng dar dar hlawm a, a then lah an lo nui nasa. Staff pakhat bulah chuan Pu Zonuna chu ava phei a, "BAck stage ah tumah kha inthlak lovin lo kal nghal vek rawh se, tunah hrilh rawh. Meeting ka ko tih hrilh nghal rawh, vatin.." tiin Pu Zonuna chuan a tir nghal a. "Min lo hrethiam dawnnia." tiin zah hmel takin min kalsan ve nghal bawk.

Nathana chu ka bulah a rawn kal a, "Irene-i mitmeng kha i lo hmu em?" tiin min rawn zawt nghal chat bawk. "Aw hmu ve e." tiin ka lo chhang a. Nathana chuan a lu a han bu nghauh nghauh va, "A awmzia chu min hria tihna a ni...keimahni hi min lo hre daih tawh tihna a ni." a han ti leh a. "Mahse engtin nge min hriat ang? Kan vawikhat hmuhna a ni bawk sia, Pu Zonuna lahin engmah ka la hrilh lo a ti bawk sia." ka lo ti a.

"Meeting nei phawt se, chumi zawhah chuan Irene-i chu kan hmu dawnnia. Chuan SArah-i pawh hmuh angai, dawt min hrilhna chhan te kha kan zawh angai." a han ti leh a. IGP chu rawn kalin, "Ava zia lo ve mawle..kha, a han chesual khut a." tiin a rawn khi suk a. "Sir, helamah lo phei lawk teh." tiin Kevin-a chuan a rawn ko va, IGP chu a phei ta a.

************************

Minute 10 vel kan nghah char char hnuah chuan hmanhmawh tak hian Pu Zonuna chu a rawn phei a, "Pu Nathan..khawngaihin dressing room ah lo phei lawk teh u." tiin a rawn thaw hlawp hlawp mai. Rang takin Dressing room lam pan chuan kan phei ve ta nghal a, Model ho chu an lo tap pur hlawm mai, kan thil va hmuh chuan min barakhaih hle bawk.

Nunui ruang chu chhuatah chuan a lo let reng mai a, mahse engmah hliam erawh a nei lo. Nathana chuan a mar chu a han dek a, min rawn melh lehin a lu a thing a. "Pu Zonun, enge awmzia? Engtia thi ngawt nge a nih a?" tiin ka zawt nghal a. "Meeting kha in nei si a, enge awmzia?" tiin Nathana pawh chuan a zawt ve bawk.

Pu Zonuna chuan lungngaih hmel tak hian, "Meeting ka ko kha Irene-i leh Nunui hi an rawn lang ve mai lova, kan nghak char char a. Mahse an rawn lan tak silovah chuan tiin ko turin Jenny hi ka tir a, a rawn au vak a. Tichuan kan vaiin dressing room lam chu kan pan nghal a, Nunui ruang hi kan hmu ta a ni." tiin a chhang a.

"Anih leh khawnge Irene-i chu?" tiin a zawt leh a. Zawi sap hian Pu Zonuna chuan, "Khawiah nge a awm kan hre lo." tiin a chhang a. Nathana chu a han vei kual a, chutah kil khata jeans kekawr bul, huh hnuang mai chu ava chhar a. "Kha kha...Irene-i ta a nih kha." Jenny chuan a lo ti vat.

Nathana chuan kekawr chu dawhkanah a dah a, room chhung chu a han enkual a. "Khawi ber hi nge Irene-i bag..han en teh u." a ti leh a. An zawng kual sap sap hlawm a, chutah Sarah-i chuan, "A awm lo...Irene-i bag a awm ve lo. Mahse show tan hma kha chuan kan dahna ah hian a awm reng sia, a awm tawh miah lo." a rawn ti ve leh a.

Nathana chuan min rawn en a, "A tlan bo..Irene-i a tlan bo." a ti chang fak mai. Pu Zonuna chuan a lu a dawm vawng vawng a, "A ni thei lo, ka awih thei lo. Irene-i ber kher, a ni thei lo." tiin a tap lek lek mai. Chutah Nathana chuan zunin panna lam chu a kawk a, "Chhuat saw...ke lawnga kalna thla a awm." tiin ava phei a.

Kan zui nghal a, a sawi ang ngei chuan bathroom panna lamah chuan ke lawnga kalna thla a lo awm phei duah mai. Hniak chu kan chhui zel a, hmeichhe bathroom awmna ah chuan a tawp chat mai. Mahse bathroom kawngka erawh a lo inhawng sa a, Nathana chuan a han hawng zau va, tumah chu an awm lo.

VEntilation lam a han en leh a, "Khi ta khi puan them." tiin a han innam kang chhova. VEntilation bula perek ah chuan puanvar them hi a lo awm a, a la a, a rawn zuang thla leh a. Pu Zonuna chu a pe a, "Umm..hei hi zanina Irene-i kawr hak ngei a ni, huh pawh ala huh alawm." a ti ta a. Model ho chu an phun sap sap hlawm mai, "Ka pu, Irene-i thil tih chu a ni thei lovang." Sarah-i chuan tap chung hian a rawn ti nghal a.

Mahse Nathana chuan chhang lovin Pu Zonuna bulah bawk chuan, "Sarah-i hi a hranga biak lawk kan duh a ni, Pu Zonun." a han ti a. Pu Zonuna pawh chuan a lo remti nghal, chutih lai chuan Kevin-a leh IGP te pawh chu an rawn thleng ve a. "Ehe..enge thil awmzia?" Kevin-a chuan a rawn ti hu mai.

Midang ho chuan thil thleng vel chu an han hrilh a, "A tlan chhuak hauh lovang, tunah pawh compound hi ala chhuahsan teuh lo, hmun tinah duty kan dah alawm." tiin Kevin-a chu a pawr nghal kher mai. MAhse NAthana chuan, "Ka rawn kal lam khan hemi zunin hnungah hian security an awm ka hre lo, helai hmunah hian ka kal fo tawh a, hnunglam bang atang hian inthazo deuh tan chuan a lawn liam mai theih a ni." tiin a lo chhang a.

Chuveleh Kevin-a chu bathroom hnunglam pan chuan pawnah a tlan chhuak nghal a, midang chuan an zui ve bawk. Kal ve ka tum chu Nathana chuan min lo dang a, "Kal duh suh....Irene-i chu a awm dawn chuang lo, a tlan bo daih tawh ang." a ti tlat a, ka zui ve ta lo. Ahnuah chuan an rawn let leh a, Nathana sawi ang ngei chuan Kevin-a chuan, "A awmlo, a tlan bo hman." a rawn ti ta ngei a.

"SArah, biak duhna che kan nei a, khawngaihin back stage ah kan va inkawm lawk dawn em ni?" Nathana chuan a han ti leh a, huphurh hmel tak hian Sarah-i chuan, "Awle." a ti thawp sat a. Chutih lai chuan Kevin-a bawk chuan a naute bulah chuan, "Ruang hi post moretem turin phur phei ula, mipui ho kha veng tha bawk ang che u." a han ti lauh lauh va.

**********************

BAck stage ah chuan Sarah-i chu kan hruai phei a, "Engmah inhnamhnawihna ka nei velo ania, engmah ka ti sual lo ka pu.." a ti nghal chiam chiam a. "I ti sual kan ti lo, SArah. Engvanga dawt min hrilh nge i nih?" tiin NAthana chuan a zawt a. Phawk hru hian a rawn meng a, "Eng dawt maw?" a ti hu mai.

"Hre lo der suh, engvangin nge Irene-i khan nau a nei i tih?" tiin ka lo zawt ve bawk a. "A inluahna neitute kan zawt vek, inluahman ba pawh a pe lo an ti bawk. SArah, thudik engkim han sawi teh." tiin Nathana chuan a han zawt leh a. "Nia..nau a neilo. Ihh...bar atanga inhria ka tih kha dawt a ni, kan pahnih hian KS kan ni thin a, chuta tanga inhria chu kan ni." a ti ta mai a.

"KS a?" NAthana nen chuan kan ti rual thawt mai, "Aw ni e, keichu miin min bum vanga KS ni ta hi ka nia. Kum 17 ka nih lai khan kan retheih em avangin ka pa hna a dil kual nasa thin a, phai ah, hotel thawk turin hna min hmuhsak thu a rawn sawi a. Mahse phaiah chuan ka kal ta cheng a, mahse bumna vek lo niin kei hi min zuar ta a. Tichuan Kolkata ah kumin kumtir thleng kha ka awm a, chutah chuan Irene-i hi ka hre ta a ni." tiin SArah-i chuan min chhang a.

"Irene-i chu engtia KS rawn ni ve nge a nih?"

"Ka bialpa hlui hi drug dealer a ni a, hnamdang a nia. KS ka nih lai khan drug dealer pakhat hian min rawn dawr thin a, chuta tang chuan kan inhmelhriat ta a ni. A customer kumhlun ber chu Irene-i hi a ni a, Irene-i pawh chu ka bialpa chuan min inhmelhriat tir veleh a. Drugs tih nan Irene-i hian pawisa a duh reng thin si a, chuvang chuan kan inkawm nel deuh hnu khan KS ni ve turin ka sawm thlu ta a ni."

"Anih a hming diktak hi Irene-i a ni em?"

"Aw ni e, ka hriatdan chuan a nia lawm."

"Anih leh engati nge dawt min hrilh?"

"A chhan chu Irene-i hi tun thleng hiana rukin drugs ala ti reng a, nangni detective in lo ni bawk nen...a nihna diktak chu thupin ka hlauthawng bawk nen, dawt ka phuah chawp kual ta ringawt a nih kha."

"I bialpa hlui nen chuan inla inhmu ngai em?"

"Aih hmu ngai tawh lo, ka pu."

"Enge a hming?"

"GAnesh-a."

"Tunah a awmna i hria em?"

"Aih hre lo, ka pu."

NAthana chuan Sangtei thlalak chu a phawrh a, "Henu hi i hre ngai em?" tiin a entir a. Chutah Sarah-i chu a meng phawk deuh hru mai, "Hei chu...Irene-i avan ang em em." a ti ta mai a. NAthana nen pawh mak kan ti dun ngang aniang, kan in en hu mai. "Irene-i a? Henu hi maw?" ka lo ti vat a.

"Aw...kan inhmelhriat tirh kha chuan tiang em em hian a pian a la nalh lova, a thau deuh hmuk thin. Hemi thlalak nen hian danglamna an awm lo, Irene-i ni ngeiin ka hria." tiin min chhang a. NAthana chuan hriatthiamloh hmel tak hian, "Mahse Irene-i pawh chu lo ni se...tunah hian ava cher ta si ve...a va danglam chak awm ve. Pu Zonuna sawi hmang kha chuan thla 2 leh a chanve vel kha model a ni tawh sia, enge awmzia?" tiin Nathana chuan a zawt leh a.

"Kumin kumtir khan KS chu bansanin ka sum neih zawng zawngin Mizoramah ka rawn tlan bova, tichuan Pu Zonuna hian min hmelhriat a, tichuan a company ah hian min la lut ta a ni."

"Mahse duh hun hunah a ban theih em ni?"

"Ka awm rei tawh a, ka kaisang ve zel alawm. Keichu call girl high class ka ni pha tawh a, ka hlawh pawh a tam ve lutuk. Mahse Irene-i kha chu ala tih tirh avang leh a pian pawh a nlah lemloh avang khan an dawr to ngam lo thin a, kar hnih vel bak a inzuar ve lo."

"Anih Mizoramah chuan i rawn haw pui leh tihna em ni?"

"Aw ka pu, a tir chuan a duh lova...mahse ka bialpa nena kan intih thiam loh avangin ka hlauthanwg a, a duh lo chung ka haw pui ta a ni."

"Engvanga duh lo nge a nih a sawi em?"

"Ka zawh hian a sawi duh ngai lova, mahse zan khat kha chu Mizoram atanga Kolkata a rawn tlan bo niin a sawi kha chu ka hre thawi thuak a ni."

"Anih leh engtiang khawpin nge hetia a cher theih a?"

"Modelling ka luh hnu khan ni 6 vel lai mai chu kan inhmu lova, tichuan kan inhmuh leh hmasak ber khan modelling lam chu ka sawi pui ve ta a ni. Amah hrim hrim kha kar hnih chhung lek a inzawrh pawh khan a damdawi ti nasa nen, a taksa chau nen, chaw ei mumal silo kha a cher ve dawk dawk alawm. Tichuan audition kha chu a pal tlang ve mai a, tichuan theih tawpin a indiet a, tuna  a pian rawn nalh em em na pawh hi ala rei lutuk lo, kan zingah chuan a thawkrim ber ang."

"Anih leh Kolkata khawiah nge KS in nih lai chuan in awm?" tiin Nathana chuan a han zawt leh a. "Sonagachi ah." tiin a chhang a. NAthana chuan SArah-i chu a han melh vang vang a, "Kan lakah zep then ila nei em?" tiin a han zawt leh a. Sarah-i chuan a lu a thing a, "Irene-i thil tih a nih i ring em..Nunui thihna chungchangah hian..." Nathana bawk chuan a han ti leh a.

"Drugs addict a ni tih ka hria a, pawisa a neih nan chuan engkim a huam thin. Mahse tual that duh tur khawp chuan a sual lo, chubakah mi fel tak a ni a, chuvanga kei pawhin KS kan nih lai pawh khan ka mizo pui a nih vang chu thuhran nise, mi pawi a sawi ngai lo lutuk leh a fel lutuyk vanga duhsak pawh ka ni." tiin a chhang a.

"Anih chuan Irene-i thil tih a nih chu i ring lo tihna em ni?"

"Aw ka pu, ka ring lo bur."

Nathana chuan min rawn en a, "ZAwh duh i neih chuan lo zawh belh rawh, Pu Zonuna ka va hmu leh lawk ange." tiin min kalsan a. Sarah-i chu a la ding reng a, a mittui a hru a hru a. A hmai chu ka han enchiang a, a mittui a hrukna lamah a make-up chu a reh then a. A mit ko duk chur mai chu ka va hmu ta, "Ngati nge i mit kha?" tiin ka zawt a.

Rang lutukin a hup nghal a, "Engmah..ka..ka tlu sual palh a." a ti bah nuai mai. A kut chu ka va lak sawn sak a, ka han enchiang a. A nat hmel kher mai, "Tluk sualna a ni lo, kutthlakna a nih kha. Sawi rawh, tunge kutthlak che?" tiin ka zawt a, mahse a ngawi reng. "In Director em ni?" ka han ti leh a.

"Aih nilo, ka pi. Kan Director hi mifel tak leh puitling tak a ni a, a model te mutpui tumna ang chi pawh engmah a nei lo." tiin min chhang a. "I tluk sualna a ni tak tak maw?" tiin ka han zawt leh hram a, a lu a lo bu nghut ringawt. "A tha e, kan la hmu leh fo duh dawn che a, khawiah mah lo zin bo suh ang che." tiin ka hrilh a.

Kal ka tum chiah chu tah aw tuau hian, "Ka pi...lo ding lawk." a rawn ti a, ka ding a. Mit bui luk hian min rawn en a, "Ka bialpa GAnesh-a kha hnamdang mah nise, drug dealer ni 70 mahse ka hmangaih em em a. Mahse na takin min siam a, engahmah min lo ngai lova. A tisa chakna hrikthlak nan chauh min lo ngaizawng a, chupawh man nei lova min mutpui ziah a duh vang a ni. Tuna ka hmai duk pawh hi ama kut min thlakna a ni, Mizoramah hian a awm." a ti ta mai a.

"Khawiah nge a awm?" tiin ka zawt vat. "Aizawlah ngei hian a awm alawm, i duh chuan a address ka pe ang che." tih pah chuan a address chu min pe a. "In duh duh danin ti ula, in duh leh man rawh u." tiin a phun sap a, min kalsan ta a. Address chu ka han en a, kan veng thenawm lawk a lo la ni zui.

***********************

PAwna ka va chhuak chu Nathana a motor bulah chuan min lo nghak a, "I duh ang i zawt thei maw?" a han ti a. "Umm...engvak mah ka zawh belh lo. Chuan enge chanchin ni zel, rinhlelh deuh te an nei em?" tiin ka han zawt let ve a. "Checking an nei vek a, mahse tumah rinhlelh awm pawh an awm lo. Naktukah post mortem result atangin a hriat mai ang, khua te lo var phawt se." tiin min chhang a.

"Irene-i chu an zawng zui em?" tiin ka zawt leh a. "Aw...Inspector KEvin-a leh a nauten an zawng zui nghal, tunah chuan kan hna a in ang ta tlat mai. Irenre-i kan zawng mek a, anni pawhin an zawng bawk." tiin min chhang leh a. "A taksa ah khan engmah pem a awm bawk si lova, enge awmzia le?" ka han ti nuah nuah a.

"Tualthattu hi a ngai tho a ni tih ka chiang, tura hrai tho a ni ang. Naktuk post mortem result ah pawh a kawchhungah tur an hmu leh ngei ang, chuan MAzuali kawnchhunga poison an hmuh nen khan a in ang ngei ngei bawk ang." Nathana chuan confi tak chuan a han ti a. "Keini pawhin Irene-i chu kan zawn chhunzawm ve zel angai ang, Sir." ka han ti leh a.

"Ni e, mahse zanin atan chuan tawk rawh se." a ti ta daih mai. Sana ka en a, "Sir, dar 10 a ri ve dawn chauha lawm. Ka la chau hleinem, zawng ve nghal law law ila." thahnem ngai tak chuan ka han ti vel luam a, haw ka chak tawh zia hria se chu min men tlaivar tir nghek duh hial ang. "Kevin-a case kal mek zel tho ala ni a, zanin chu anmahni che ve rawh se." a ti deuh tlat mai.

Chutih lai chuan Pu Zonuna chu a rawn kal a, "Pu Nathan, IGP Sir kha a haw tawh em ni?" a rawn ti a. "Aw haw deuh chiah, Irene-i pawh Kevin-a ten an zawng mek e." tiin Nathana chuan a lo chhang a. "A pawi ka ti khawp mai, tiang thil a thleng hi." tiin Pu Zonuna chuan a lu a dawm vawng vawng mai.

"Nunui chhungte hi tute nge ni reng reng? In hrilh tawh em?" tiin Nathana chuan a zawt leh a. "Nunui hian chhungte a neih ka hre lo, kum 6 kal ta atanga ka hnuaia thawk tawh a ni a, kei leh ka naute ho hi a chhungte chu kan ni mai." tiin a chhang a. Jenny lo kal phei chu Nathana chuan, "Jenny, lo kal lawk teh." tiin a lo ko ding a.

Jenny chu a rawn phei a, "Enge ni ta?" a rawn ti a. "Show tan hma khan Nunui kha a rawn kal tlai tiraw?" tiin a zawt a. "Aw...Irene-i kha chu tlai thim hma deuh hret khan a rawn thleng a, mahse tan hnu fe ah Nunui chu a lo thleng." tiin a chhang a. "Show stopper inthlak ta kha enge awmzia? Ka lo hriat dan chuan Nunui tur zawk kha inti sia, mahse Irene-i a ni leh ta daih sia?" tiin a zawt leh a.

"Kha kha chu keima thlak a nih kha, Nunui khan ka thin a ti rim em a ni. Show stpper nih a duh avang khan a thiante nen pawh an inhnial vak phah a, mahse a lo thleng har si khan Irene-i kha ka ti ta a nih kha. Mahse Nunui kha a lo thlen lai ka hre lo, thu ka sawi lai khan a ni maithei." tiin Pu Zonuna chu a lo inrawlh vat a.

"Aw ni e, i thusawi lai khan alawm. A rawn thleng a, engmah sawi hma hma in bathroom ah a lut leh daih a. Chumi hnu feah chuan a rawn chhuak leh a, mahse show stopper tur chu amah nilovin Irene-i zawk a nih thu kan lo hrilh a. A thinrim kha Irene-i nen pawh khan an inhnial hrep a, kan thleh hial alawm." tiin Jenny chuan a lo chhang a.

"An inhaw sa hrim hrim em?" tiin NAthana chuan a han zawt leh a. "Haw em em hran lo, mahse Nunui hian a thik thei lutuk a." tiin Jenny chuan a chhang leh a. "Security a tight tha hle niin IGP khan a sawi sia, dressing room bul velah duty an awm lo em ni? Nunui thah a nih lai khan duty pakhat tal pawhin an hmu lo tihna ania, ka hrethiam lo." ka lo ti ve a.

"Model ho chiah kha dressing room ah awm phal a ni a, mahse Sir Zonuna'n backstage a min koh vek avang khan kan kal ta vek sia, chuvang chuan duty ho pawh kha an rawn chhuak ve vek a ni ngei ang." tiin Jenny chuan min chhang a. Toilet hi hmun 3 laiah a awm a, guest ho hman tur, staff ho hman tur leh dressing room ah a awm bawk a ni.

"Tu emaw talin show zawh khan Irene-i kha inhmu zui miah lo a mi?" tiin NAthana chuan a han zawt leh a, "Aw hmu zui lo....a hnuhnung bera kal kha a ni bawk sia. Nunui pawh kha ka hmu zui ta lo, an pahnih khan ka hmu zui lo hrim hrim..midang pawh ka zawt vek tawh, tuman an hmuh thu an sawi lo." tiin a chhang leh a.

Nathana chu a thaw hak a, "Engpawh chu nise, kan phei phawt ange...kan inbe tha leh dawnnia." tiin motor chhungah chuan a lut a, keipawh chuan ka zui lut ve bawk. "Haw phawt ang, naktukah kan inhmu dawnnia." a ti a. Tichuan kan tlan ta a, kan inthleng chuan min thlah leh thlap bawk.

********************

TO BE CONTINUE