WILD ZONE : SEASON 1 (Episode - 2) Written by : Aaron Malsawmdawngzuala BAD GIRLS - 2

 WILD ZONE : SEASON 1

(Episode - 2)

Written by : Aaron Malsawmdawngzuala

BAD GIRLS - 2

*****************

Ka thawhna thin, tunah pawh ka la thawh mekna ni tho, kan Police Station ah chuan kei leh MAxie leh NAthana te chu kan kal nghal a, IGP pawhin min lo hmu chu mak a ti kher mai. "Ehe..Nathan, lo kal rawh u, enge ni ta a?" alo ti nghal vat a. "Sir, zawh duh che ka nei a.." tiin Nathana chuan a chhang a. "I sawi tum ka hria, hmeichhia a nih vang tiraw? Enteh Nathan, Bella hi i rin ang a nilovang, chuvang chuan alawm amah kher hi ka thlan sak che." a lo ti nghal zung zung mai.

NAthana chuan min rawn en a, kan innuih suk ringawt. "Nilove Sir, thildangah ania. Bella-i nen hian tunah hian hna kan nei nghal der tawh a, chumi chungchangah chuan rawn biak che ka duh a." tiin a hrilhfiah a. "Hna in nei nghal maw? Eng case nge ni a?" a lo ti hu mai. "Sir, Pu Zonunsanga a lo kal em? ZAHAU FASHIONS neitu kha?" tiin a zawt a.

"Aw lo kal e, in lo hre ve em ni?" a lo ti let daih mai a. Mak tih hmel tak hian kan in enhu hlawm a, "Enge hriat tur awm a?" tiin a zawt leh a. "Aww...a model te zinga mi ruang an chhar kha.." a ti ta mai a. "Ruang chhar a? A model te zinga mi maw?" ka lo ti hu mai. "Aw ni e, chumi case chu kan buapui mek a. Tun lawk khan a kal chiah, engthil nge ni a, Nathan?" tiin IGP pawh chuan a hrethiam lo kher mai.

"Mitthi chu phum a ni tawh em?"

"Aih la nilo, ruang dahna ah kan la dah."

"Anih chuan kan lo en ve thei angem? Tunge model chu a hming ni reng reng?"

"A hming chu Mazuali a nia, kum 21...Zarkawt ami...lo en rawh u...ka va hruai ang che u."

Ruang dahna lam pan chuan kan kal ta a, ruang chu puan hian a lo inkhuh a. A bulah chuan doctor a lo awm bawk, "Doctor, post mortem a ni tawh em?" tiin Nathana chuan a han zawt a. "Aw ni tawh e, tukin zing khan kan zo chiah." tiin a lo chhang a. Nathana chuan puan chu a han hlim a, mahse Sangtei ang deuh model kha chu a ni lo tih ka chiang.

Min rawn en a, "A ni lo tiraw?" tiin min zawt a. "Umm a nilo." tiin ka lo chhang nghal a. "Tumaw nilo..min han hrilh ve teh u." IGP chuan a lo ti leh a. "Englo ania, Sir. Mibo kan zawng mek a, tlan bo a ni a, thla thum lai chu a bo tawh a ni awm e...hei hi a thlalak a nia." tiin Sangtei thalak chu a hmuh tir a.

"Chuan chu chu he ruang hi a nih in ring tihna nge?"

"Ni love, a model zingah hian henu ang deuh hi a awm e an tia. Chuan lawk aw.." tih pah chuan Nathana chuan a phone a phawrh a, Sammy-a hnen atanga a lak, Pu Zonuna model ho thlalak chu a han hmuh kual den den a. Sangtei ang ber hmel chu tilangin, "Henu nen hian Sangtei hi a inang e an tia, Pu Zonuna biak pawh kan han tum kha Stationah a kal thu a sawi a, chuvang chuan kan lo kal a nih hi." tiin a hrilh fiah a.

Chu model leh Sangtei thlalak chu a han endun a, "An in ang lo e...en thuak khan tlemin an in ang deuh mai chauh a nih hi...a nih ka va ring lo em." a lo ti a. Nathana chuan model pakhat thlalak chu hmet chhuak lehin a en vang vang a, ruang chu a en leh a. "Hei hi Mazuali chu a nih ngei dawn hi." tiin min rawn en tir ve hlawm a.

Chutih lai chuan Inspetor pakhat hi a rawn lut a, "Sir..ka be lawk thei che angem?" a rawn ti a. IGP chuan, "Lo lut rawh, Kevin." a ti a, a rawn lut a. IGP bawk chuan, "NAthan, hei hi Inspector Kevin-a a nih hi. HE case, Mazuali thihna case chhui mektu hi ania." a han ti a. Kevin-a chuan rawn chibaiin, "Good Afternoon, Sir. Kevin-a ka nia, nice to meet you." polite tak chuan a han ti a.

"Nangpawh le...Kevin, enge a thih chhan min han hrilh ve teh." tiin Nathana chuan a zawt a. "Post Mortem report-a a lan dan chuan a kawchhung a tawih vek a, poison hmuhchhuah a ni. A awmzia chu tura hrai tihna a nih chu.." tiin a lo chhang a. "Zu leh poison hmuh a ni a, a zu in turah tur an pawlh a ni, Sir." Doctor chuan a lo ti ve bawk a.

IGP chuan, "Lawk aw Nathan, nichina in mibo zawn nena in ang intih, model thlalak kha min lo hmuh leh lawk teh." a rawn ti hlawl mai. Nathana chuan a entir leh a, "Henu hi alo kal, tukin zing khan a lo kal." a ti ta mai a. "Eng a? A lo kal maw?" tiin ka lo zawt vat. "Aw lo kal e, a hming pawh kha Irene-i a niin ka hria. A tap nasa alawm, model dang pathum an tel bawk." tiin min chhang leh a.

Nathana chu a ngawi vang vang a, "MAzuali hian chhungte a nei em?" tiin a zawt teh daih a. "Nei e, mahse Manipur ah daih an awm a. MAnipur Mizo a nia, MAzuali hi...tukin zing khan a chhungte chu Aizawl lam pan turin an rawn thang mek e." tiin Kevin-a chuan a lo chhang a. "Pu Zonuna khan naktuk zanah hian Falkland Picnic Spot ah show an neih tur thu a sawi a, Mazuali hi show stopper tur a nih thu a sawi bawk." IGP chuan a rawn ti leh a.

"Sir, kan kal ve angaiin ka hria. A awmzia ah chuan MAzuali hian hmelma chu a nei tih a chiang a, plan lawk sa veka hrai hlum a ni." Nathana chuan a han ti a. Mazuali hmel chu ka han en thin a, ka hmuh tawh hnu ni tlat hian ka hria. A aia chiang deuh va ka han en leh chuan ka hrechhuak ta, kha nula ngei kha a ni.

Nizan Dika te in atanga ka haw khan, kawngsir footpath-a hmeichhe rui zet, kal pawh kal hleithei lo kha a ni chiang lutuk. "Sir Nathan, henu hi ka hmu tawh." ka han ti chu an vai chuan an rawn hawi rual thap mai. "Khawiah maw? Engtikah?" tiin min zawt nghal. "Nizanah..ka leng haw lam khan ka hmu a ni. Dar 11 vel ani maithei ka chiang tawh lo, ruih hmel deuhvin phone a lo hmang a." tiin ka chhang a.

"Ka ring dik...tualthahna a ni." Nathana'n a tih chuan rang zet hian Kevin-a chuan, "Ni e, a phone pawh hmuh a ni lo. Tualthahna leh rukrukna ni ngei tur a ni, mahse kutthlakna hnuhma erawh a awm lo." a lo ti zuah zuah mai. "Bella, khawi laiah tak nge i hmuh?" tiin Nathana chuan min zawt leh a.

"OMEGA RESTAURANT bul velah khan...foothpath thlang zawkah khan." tiin ka chhang a. "A thawmhnaw hak atang te leh a kawchhunga zu hmuh chhuah atang te hian party-naa a kal haw tih a chiang a, a thiante erawh kha chuan an awm ho loh thu an sawi a, nizanah khawnge a kal tih tuman an hre lo." Kevin-a chuan a lo ti leh a.

"Engpawh nise...Sir, kan case hi a in an deuh tho avangin kan thawh ho angaiin ka hria. Tunah chuan Bella-i nen hian Pu Zonuna chu kan hmu ve phawt anga, tichuan naktuk zan show ah pawh chuan kal vek ila, tualthattu hi a che leh maithei ania." NAthana chuan a han ti leh a. "Nia, kan inhmu dawnnia." tiin IGP chuan a chhang a, Station chu kan chhuahsan ta a.

****************************

Pu Zonuna te in kan kal hma chuan Maxie chu apartment ah chuan in lo nghak turin kan dah phawt a, chumi hnuah chuan Pu Zonuna office chu kan va thleng ta. A office awmna chu reception te chuan mi hrilh a, NAthana nen chuan kan va inzui phei a. Mahse kan thlen dawn tep ah chuan office chhungah chuan amah cauh chu a lo awm lo tih kan hria a, kan ding deuh phawt a.

"Enge sawi dik loh ka nei em ni? Mazuali ber a awm tawh lova, show stopper chu ka lo ni mai ang ka ti a, enge chu chu in helh viau." tiin hmeichhe pakhat hi a lo ang bawrh bawrh mai. Hmeichhe dang leh chuan, "Enge nang kher a ngaih bikna, nang ai chuan Irene-i a fuh zawk ang. KAn zavai pawhin kan pawm tlang, Sir Zonun, nang pawhin a hma pawhin i sawi kha." a lo ti ve thung bawk a.

"Irene-i chu a hlu bik viau em ni? Kan zingah pawh kei aia thawk rim hi chu an vang viau ang, ka senior ber a, hei hi chu ka phu ve in ka hria." tiin a lo hnial let leh a. Chutah Pu Zonuna chuan, "A tawk e, inhnial tawh suh u. Nunu, tun tum chu Irene-i ni phawt se. A lehpekah nangmah i ni dawnnia, tun tum chu Irene-i chance pek ve a tha in ka hria." a han ti dam dup mai a.

Mahse lungawiloh hmel tak hian Nunui chuan, "Tuna kan meeting naah pawh a awm miah lo chu ania, hei....a awm lo ber chu enge duhsak a tulna?" a la ti pung pung mai. Model pakhat leh chuan, "Mimal inhuatna hi pu lut bik ziah suh, Nunu. Hei hi business a nih hi, kan vai tan vek a nih hi." a lo ti ve bawk a.

Vin zet hian Nunui chuan, "Lo ngawi rawh Jenny, kan zingah i nau ber tih hre rawh. Show stopper ka ni ziah a, vawikhat mah ka la ti sual lo. Irene-i chu tun ang show pawimawh lutuk chu a la handle zo lo, chubakah a ngai pawimawh tak tak lo." a ti leh pang pang mai. "A tawk e, Nunu...show stopper chu i ni ngei ang, i lo inbuatsaih dawnnia." a ti ta nge nge a.

Nathana chuan kawngka chu a kik karh karh a, "Lo lut rawh." tiin Pu Zonuna chuan a lo chhawn vat a. NAthana nen chuan kan lut a, model pathum an lo awm ve bawk. "Tute nge in nih le?" tiin amah bawk chuan min zawt a. "Nathan Malsawmkima ka ni a, hei hi ka assistant Bella i a ni. Detective kan ni a, kan case chhui mekah biak che kan duh a ni." tiin Nathana chuan a chhang a.

Model ho chu Pu Zonuna chuan a han melh kual a, "Lo va practice rawh u, ka lo kal vat ang." tiin a hrilh a, an chhuak ta hlawm a. A dawhkan hmaah chuan kan thu a, "Enge ni ta? Mazuali chungchang bawk a mi?" tiin min zawt leh a. "Ni deuh tho, ni chiah lo." tih pah chuan Nathana chuan Sangtei thlalak chu a la chhuak a.

"Henu hi i hre ngai em?" tiin a entir a. Pu Zonuna chuan a han en vang vang a, "Aih, ka hre ngai hauh lo." tiin a lo chhang a. "Anih leh i model te zingah hian Irene-i an awm em?" tiin a zawt leh a. "Aw awm e, kan chhuanvawr ber te zinga mi alawm. Ngati nge? Tihsual a nei em ni?" tiin min zawt leh a.

"Anih a hmingpum kan hre thei angem?"

"Irene Zothankimi ania..eng atan nge in duh a?"

"Kan hmu duh a ni."

"Tunah chuan a inluah lamah a awm aniang, tukin atang khan kan la inhmu leh miah lo."

"Engtik kum atangin nge a rawn telh..hetah hian. Ka sawi awmzia chu engtia lalut nge i nih?"

""Ka model nisa mek SArah-i hian a lo sawihmuh a, a thiannu a nia. Audition te a rawn nei a, tichuan ka lalut ta a ni. Kumin khan a rawn tel, ala rei lo."

"Thla engzat vel nge a rawn tel atangin liam tawh min hrilh thei angem?"

"Thla 2 vel ani maithei."

NAthana nen chuan kan inmelh a, Sangtei kha thla thum lai a bo tawh a. Thla hnih leh a chanve vel a nih chuan Irene-i hi Sangtei a nih theihna chu a awm tho mai, mahse ka la ring chuang lo. "Anih leh SArah-i chu kan hmu thei angem?" tiin a zawt leh a. "Ka pu, tunah chuan rehearsal an nei mek a, naktuk zanah mai hian show kan nei dawn sia." a han ti a.

NAthana chu a ngawi leh deuh vang vang a, "Naktuk zanah chuan kan lo kal ve dawn a, a chhan chu Irene-i hi biak kan duh a ni. Tunah rih chuan kan tibuai lo phawt ang che u, chuan khawngaihin Irene-i number chu min pe thei angem?" tiin a zawt leh a. "Min hrehtiam la, kan model te hi chhan tha tak a nih loh chuan police te pawh an number kan pe mai mai ngai lova. Ka pu, enge kan nau chuan tihsua a nei em ni?" inthlahrung tak chuan a lo ti a.

Mahse Nathana chuan, "A tha e..anih chuan naktuk zanah chuan kan rawn hmu mai dawnnia. Kan kal phawt ange, invitation min lo siamsak ve ngei dawnnia." tiin a chhang ta daih mai. Tichuan office chu kan chhuahsan a, ama partment lam pan chuan kan let leh ta a. "Sir, tinge a number kha i dil luih lova?" tiin ka zawt a.

"Anihna takah chuan keipawh hian Sangtei a nih ka ring vak bik lova...kan case hi a sawt viau lovin ka hria. MAhse Irene-i an tih chu hmuh hrim hrim kan ngai, a ni emaw ni lo emaw, kan hna  ani miau va." tiin min chhang a. "Anih chuan enge kan buaipui ber hi?" ka han ti deuh hu a. "Mazuali kha ka rilru ah a awm lian ber, tura hrai kha...tualthattu hi naktuk zan shoew neih hunah pawh a chet ka ring tlat a ni." tiin min chhang leh a.

"Mahse Sir, kha chu kan case pawh a ni hleinem. Inspector Kevin-a khan a buaipui thei mai ang chu, keini chu kan tel ve hleinem."

"Mazuali kha i hmuh lai khan a bulah tu emaw an awm em?"

"Aih awm lo, zanrei kha  ani tawh a. Ka ding tep a, mahse phone a hmang bawk nen..khalai ah khan in tam tak a awm bawk a. Chuvang chuan ka han tlan pel ta mai kha a nia, a bialpa emaw a phone turah ka ngai a."

"A nih chu mawle...chumi hnua thil thleng zel chu hriat a chakawm hle mai. Engpawh nise zanin chu awl phawt la, naktuk zing dar 9 ah kan inah lo kal rawh aw...Pi Kimi bulah Irene-i thlalak hi kan hmuh ve hrim hrim dawnnia."

"Zaninah va hmuh tir law law ila, a tha mai lo mi?"

"Zaninah chuan hah chawl ang...naktukah a tih theih alawm." a ti tlat mai. I thu thu le, Sir." ka ti ve mai bawk. Kan ngawih dun vang vang hnuah chuan, "Ehe..khua a lo thim dawn tawh a nih hi. Bella, ka va thlah tlang law law ang che aw.." a han ti leh a. Ka lu ka bu nghut a, tichuan kan in thleng chuan min va thlah ta a.

*******************

A tuk ah chuan dar 9 rik hma chuan an inah chuan ka va thleng a, kawngka chu ka han kik karh karh a. "Lo lut rawh.." tiin min rawn chhawn a, mahse MAxie aw zawk a ni tlat. Ka lut a, chaw a lo ei mek a. "Ehe..i lo va thleng hma ve. Chaw te i ei tawh em?" tiin min lo zawt a. "Aw ei tawh e, khawnge Sir NAthana hi?" tiin ka han zawt let ve leh a.

"A inbual mek a, lo thu rawh. Chaw pawh a eikham tawh, a rei lovang." tiin min chhang a. Ka thu a, phone chu ka khawih mai mai a. "Lo ei ve leh la." tiin min rawn sawm a. "Ka puar tawh lutuk, ka lawm e...nidangah ka lo la ei dawnnia." tiin ka chhang a. "Nimin chuan enge in an zel?" tiin min zawt leh a.

Ka chhan hma chuan NAthana chu room atang chuan a rawn chhuak a, "I lo thleng tawh maw? Kan kal nghal mai dawn mi?" a rawn ti a. "Nia, ka hman reng." tiin ka lo chhang a. Maxie chu ava en a, "Kan kal dawn aw..in lo chhuahsan suh ang che." a han ti a, MAxie chu a tum nasa mai.

"Ka pum ana i tih ziah kha....pum damdawi kha pai ang che." tih rigawt chuan a chhang a. "Awle, kan kal ania." tiin kan chhuahsan ta a. Motor-a kan tlan pah chuan, "Sir, MAxie hian a duh che tih i hria tiraw?" ka han ti deuh thut a. A phu zukin ka hria, "Aaa..a awihawm loh ea." tiin min chhang a, mahse ka zawt zui lem lo.

*****************

Pi Kimi te inah chuan kan thleng a, engkim hrilhfiahin Irene-i thlalak chu kan hmuh tir a. Chutah a en vang vang a, a mittui a tla ta mai. "Aw..hei hi ka fanu chu a ni. Hei hi ka fanu ngei chu ania lawm, ka hai lo." a ti ta mai a. "Ka pi, i chiang maw? Sangtei chu Irene-i hi a ni tak tak maw?" tiin Nathana chuan a zawt a.

"Anu ka nia, ka hrechiang. Eng ang pawhin a pian te, a landan engkim pawh thlak mahse. Ka vawikhat enna ah hian ka hre nghal a n, ka fanu a ni." a ti leh a. Nathana nen chuan kan in en hu ringawt, "Khawiah nge a awm? Tunah a awmna in hria tiraw?" a ti nghal chul mai. "Ka pi, chutiang ngawt a ni thei lo. Irene Zothankimi daih alawm a hming chu...i fanu chu Lalsangkimi a nih kha.." tiin Nathana chuan a chhang a.

"Nilo, a inchei danglam mai mai a ni. A pian a siam danglam mai mai a ni, ka pu. Tunah ka hmu duh, engpawh a lo ti se ka ngaidam vek. KA hmu leh duh a ni, ka pu.." tiin a tap der mai. "Ka pi, zaninah kan hmu dawn a. Lo nghak hram hram rawh, engkim kan buapui fel vek dawn alawm." tiin a hnem a, Pi Kimi te in chu kan chhuahsan leh ta.

LA kal mai lo chuan pawnah chuan car bulah kan ding dun a, "Sangtei chu a lo ni tak tak em mawni le?" a ti nuah nuah mai. "A sawi takah chuan anu a ni a, keini ai daihin a hrechiang anga. A hming leh pianzia te thlakin midang angin a insiam te a ni mai lo maw?" ka han ti ve deuh duah a. "A fanu hmu chak lutuk a hmu ang zo vek tawh te pawh a ni ve thei tho mai, engpawh nise Pu Zonuna kan va hmuh leh a ngai." tiin min chhang a.

**********************

Pu Zonuna office ah chuan kan va kal leh a, an lo buai nuai nuai khawp mai. Designer te, make up artist te leh staff te chu an hna theuh thawkin an lo buai hle a, an inkal pel suau suau mai. Pu Zonuna ber pawh a naute chu tirin a lo vin kual nasa hlawm kher mai, min hmuh veleh chuan kan lam pan chuan a lo kal vat a.

"Detective, in lo kal animaw? Hawh lo lut ru...thingpui te rawn in rawh u." tiin polite tak chuan min sawm a. Mahse NAthana chuan, "Pu Zonun, Irene-i hmuh kan duh, tunah a awm tawh em?" tiin a zawt a. "Tukin kha chuan a awm kha maw...anmahni room lamah a awm pawh a ni maithei." a tih lai chuan model zinga mi pakhat chu a lo kal a.

"Jenny, lo ding lawk teh." tiin Pu Zonuna chuan a lo ko ding vat a. "Aw enge, Sir?" a lo ti ve vat bawk. "Roomah Irene-i a awm em?" tiin a zawt leh a. "Kan inah ka haw lawk dawn, show neih dawnah ka rawn kal hman chauh ang a tia." tiin a chhang a. Lungawiloh hmel tak hian Pu Zonuna chuan, "Enga? A rawn tlai ange aw,,,,a pathumna a kal tur a nih kha. Anih leh khawnge kan show stopper a awm, Nunui?" tiin a zawt leh a.

"Ani pawh ka thianpa ka hmu lawk dawn atia, tlaiah ka lo thleng hman ang a ti." tiin a chhang leh a. Thinrim tak hian, "Tinge an thu thu a an awm tawp zel a, mi hi an namnul mah mah. Director tal chu hrilh ve tur alawm, nangni pawhin tinge min hrilh vat thin loh?" tiin a vin hrep mai. "Sir, nangma bulah an sawi hmasa turah ka ngai a.." tiin Jenny chuan a chhang a.

"Pawi ka ti khawp mai, Detective. Engpawh nise kan buai viau nangin, office lamah lo lut ula, kan sawi ho dawn em ni?" inthlahrung tak chuan a han ti leh a. "Irene-i thiannu Sarah-i chu a awm em?" tiin Nathana chuan a zawt leh a. "Aw awm e, roomah a awm." tiin Jenny chuan a lo chhang a.

"Kan va hmu duh ve.."

"Jenny, va hruai rawh..ka pu, room chhungah khan in lut ve tawp mai dawnnia."

"Keichu i office ah kan inkawm dawnnia." tiin Nathana chuan min en a, "Sarah-i chu lo va hmu la, pawnah kan innghak leh mai dawnnia." tiin min hrilh a. "Awle, Sir." tiin ka chhang a. Tichuan Nathana leh Pu Zonuna te chu office lam pan chuan an inzui phei a, kei leh Jenny erawh room lam pan chuan kan phei ta a.

*****************

Dressing room ah chuan ka lut a, hmeichhe pakhat hi a dress vel enin a lo buai hmel kher mai. "Ka pi, hei hi ania SArah-i chu.." a han ti a. Sarah-i pawh chu lo hawiin, "Enge ni a?" a rawn ti ve bawk a. Sarah, thu ila...inkawm lawk teh ang hmiang." ka han ti a. Min en deuh hu a, "Nang hi..nimina lo kal.." a ti lai chuan, "Aw..detective Bella-i ka nia." ka lo ti vat a.

A thu ve mai bawk, "Jenny, khawngaihin lo va chhuak ta che." ka han ti leh a, Jenny pawh chu a chhuak ve mai bawk a. "Ka pi, enge ni ta? Tihsual ka nei em ni?" a ti nghal zung zung a. "Ni love, zawhna tlem zawh che ka duh a." tiin ka chhang a. "Engthil nge ni, Mazuali bawk kha mi?" a han ti leh a.

"Nilove...SArah, Irene-i nen hian engtin nge in inhriat?"

"BAr atanga inhria kan nia, kan inkawmngeihp phian a. Tinge? Thil tihsual a nei em ni?"

"A nu leh pate i hria em?"

"An thi tawh a tia, a chhungte lam engmah ka zawt ngai lo."

"In Director sawi dan chuan modelling lam hi nangma sawi luh pui a ti a, thudik a ni em?"

"Aw ni e, keima sawipui alawm. Mi in a luah a, a nau neihchhun chawm nan tiin hna a zawng a. An rethei em em a, chuvang chuan ka khawngaih a...modelling lam hi ka sawipui ta a ni."

An room bang vel chu ka han en kual a, thlalak pakhatah chuan Irene-i, boral ta MAzuali, Jenny leh amah Sarah-i thlalak hona chu ka va hmu fuh a. Mahse hmeichhe pakhat ka hriat ve loh a awm tlat, "I bul chiah ami khi tunge?" tiin ka kawk a. Sarah-i chuan a han en ve a, "Nunui  anih khi..zanina kan show stopper tur." tiin min chhang a.

"Anih amah chu khawnge a awm a?" tiin ka han zawt ve hrim hrim a. "Ka thianpa ka hmu dawn atia, chawhma lam khan a chhuak daih tawh. Irene-i pawh tukin kha chuan a awm reng a, tihtur ka nei lawk a tia a chhuak veleh daih a." tiin min chhang leh a. Chutih lai chuan ka phone a rawn ri a, Nathana a lo ni.

"Hello Sir."

"Lo chhuak tawh rawh."

"Mahse Sir, ka la zawt tan chauh alawm."

"A pawi lo, hei a address ka nei a...kan va kal nghal mai dawnnia."

"Awle Sir."

Phone chu ka dah a, "Khati zawng kha a nimai." tiin chhuahsan ka tum a. Mahse Sarah-i chuan min ko dingin, "Lawk aw ka pi, Irene-i chungah chuan thil tha lo a thleng em ni?" tiin min zawt a. "Engmah thil tha lo chu awm love...engemaw thilah hmuh kan duh mai chauh mawle." tiin ka chhang a, ka chhuahsan ta a.

*************************

Pawnah chuan ka va chhuak a, motor bulah chuan lo dingin meizial a lo zu hlat hlat a, ava inhmeh lo tak. Ka va kal hnai a, "Tunah kan kal nghal dawn mi?" tiin ka han zawt a. "Umm..eng vel nge i zawh a?" tiin min han zawt a. "Ka zawt tam hman lo, min rawn phone leh thut sia. Engtia inhria nge an nih vel ka zawt a, bar atangin a ti." tiin ka chhang a.

"Bar atangin a? Teh daih chuan....a chhungte, a nu leh pate i zawt em?"

"Zawt e, an thi tawh a ti a. Tunah a inluah ah a nau nen an khawsa mek a, a nau chawm nan a inhlawh thin a. Modelling lam sawipuiin hetah hian a tel ve ta a ni awm e, chubkah chu engvak mah a sawi lo."

"REthei viau si bar ah te a kal tho sia, ka va awih chiah lo e. Umm..engpawh nise, Irene-i ngei kan va hmu dawn lawm, kal phawt ang." a han ti deuh hluai a. "A number a pe che em? Phone hmasa ila, a lo awmlo thut thei a." ka han ti a. "Pu Zonuna nen khan phone kan tum char char tawh alawm, a tlang theilova..chuvang chuan a inluah ah chuan va kal mai ang." tiin min chhang a, kan kal ta a.

************************

REiloteah chuan kan thleng a, model in atan chuan awmna lai a kilkhawrin a tawp angreng kher mai. Inhnuai chep takah chuan kan chhukthla a, mahse tala in a lo inkalh hmak mai. "Inchung hi a in neitute an ni angem aw?" NAthana chuan a han ti nuah nuah a. "Han zawt chhin ila nimai lawm." ka tih lai chuan inchung zawk kawngka chu a ri rak a.

Kan han tlan chho nghal a, patling pakhat hi a lo ni a. "Irene-i thiante ami in nih?" a lo ti nghal a. "Nilove...amah hmuh kan duh a, Detective kan nia." tiin Nathana chuan a chhang a. "Detective a?" a ti hu mai. "Aw ni e, tunah a awmna i hre mial em?" tiin a zawt leh a. "Kan inhnuaiah hi chuan a awm thin ngei a, mahse a riak ngai mang lo. Inluah man a ba hnem tawh bawk sia, a thiante in nih takin ka ti mawle..engthil nge ni a, ka pu?" tiin a lo zawt leh ve leh a.

"Ka pu, Irene-i hian a nau a chenpui em ni?" tiin a zawt leh a. Chutah mak tih hmel deuh hian chupa chuan NAthana chu a en hu a, "Nau a? Nau a neih awm kan hre ngai lo reng reng. Mipa chu a rawn hruai zeuh zeuh tih ka hria, mahse amahin a cheng alawm." tiin min chhang ta daih mai.

Nathana chuan min en a, "A awmzia chu SArah-i khan dawt a sawi tihna a ni." a ti zawi sap a. "Engthil nge ni ta, ka pu? Buaina a chawk chhuak em ni? Kan tel ve hauh lo ania aw...thisen inzawmna pawh engmah kan nei lo." a han ti leh chiam chiam a. "Lungngai suh, ka pu..kan kal phawt ange." tiin kan kalsan leh ta a.

**********************

Motor ah chuan lutin kan tlan leh a, "Sir, tunah khawnge kan kal dawn?" tiin ka zawt a. "Dar engzat nge show kha an tan dawn khah?" tiin min zawt let daih mai. "Tlai dar 5 ah ania, Falkland park, picnic spot ah khan." tiin ka chhang a. A sana a en a, "Tunah dar 3 a ri tawh a, inset fel chhung nen tunah chuan Pu ZOnuna te chu an office an chhuahsan tawh ngei awm bawk si." a ti nuah nuah a.

"Sarah-i khan engvangin nge dawt a sawi le?"

"Chutak chu keipawn ka hre duh, engvanga dawt sawi nge a nih?"

"Sir, keichu Irene-i hi SAngtei a nih ka ring ta tulh tulh mai."

"Tunah a awmna chin hriat a ni lova, Sarah-i dawt sawi zawng zawng nen, Pi Kimi thusawi kha  adik pawh a ni mahna."

"Anih tunah khawnge kan kal dawn?"

A khi deuh suk a, "Police ka nih laia kan hmanraw hman uar em em ka hman leh angai dawn tlat mai." a ti daih a. "Enge chu chu?" ka lo ti hu mai. "Tracking device." tih ringawtin min chhang a. "Irene-i phone kan trace dawn tihna maw?" tiin ka zawt leh a. "Ni ang chu...kan biak ngei angai sia lawm." tiin min chhang a.

*****************

A apartment chu kan thleng a, inchhungah chuan kan lut tlang nghal. Maxie chu sitting roomah a lo muhil bawrh bawrh a, "A mutui thei mai sia maw.." tiin Nathana chuan enin a khi suk a. NAthana apartment kawngkhar hi pawnlam atang chuan herh hawn ngai ang chi a ni a, mahse chhunglamah an lock erawh chuan chahbi a ngai thung.

Nathana hian chahbi a kawl a, pawn lam atangin MAxie chu kan chhuahdawn pawh khan a kalh hnan a ni. A awmzia chu Maxie hi chhuak duh pawh nise inchhunglam atangin herh hawngin a chhuak ve thei mai a, chahbi spare a kawl ve bawk. Tracking device chu a room atang chuan a rawn phawrh chhuak a, chaw ei dawhkanah chuan thu dunin Irene-i phone chu kan trace a.

World Bank road lamah a ni tlat mai, "A kal ve mek tihna a nih hi...show neihna hmun turah." tiin NAthana chuan min en a. "Kan kal ve nghal mai dawn em ni?" tiin ka lo zawt a. Midang an nalh awm hlawm sia, inchei ve deuh ila." ala ti zui. KA nui suk ringawt, "Keichu tihian ka inpeih sa a nimai." ka han ti chu a nui nasa ngei mai.

"Ka'n insiam anga, min lo nghak la. Chuan in inlamah kan kal leh anga, i insiam veleh anga. Ala hma alawm, dar 5 tan ania, kan thleng hman em em ang." a han ti leh a. "Ummm..anih chuan insiam rawh ka lo nghak ang che." ka ti ta nge nge a. "Ka rei lovang." tiin roomah chuan min luhsan a.

Reiloteah chuan a rawn chhuak leh a, a incheina chu a inhmeh tak zet. Nupui neih tawh pawh a ang lo, tlangval la thalai ve tak, chhelo tak leh smart tak hi a ang ber. "Ka nalh ve tho em?" a han ti a. "Umm..nalh e." tih ringawtin ka chhang, han chhan dan tur pawh ka hre lo. "Kan ila." a han ti leh a, tichuan in chu ka chhuahsan leh ta a.

**********************

TO BE CONTINUE