WILD ZONE : SEASON 1 (Episode - 7) Written by : Aaron Malsawmdawngzuala THE UNKNOWN KILLER - 1

 WILD ZONE : SEASON 1

(Episode - 7)

Written by : Aaron Malsawmdawngzuala

THE UNKNOWN KILLER - 1

*******************

Nileng deuh thaw a nula than kin tawh, kum pawh tlem zawk zawk tawh lo lehnghal ina brick ka han thiar char char mai kha chu Detective tan pawh a lo hahthlak ve duh kher mai, inla no deuh chi phei chu ni ila ka pilh phung hian ka ring a ni. Kan inchung kan sak zawm ve mek a, hnu chhui tur a awm lo bawka tiin ka han che ve deuh vak a nih kha.

Hmeichhia nih avanga hman reng chunga kan ina hnathawk te puih miah loh kha a dikin ka hre tlat lova, brick thiar lamah tal ka han pui ve kha ania. Tlai dar 5 velah kan duhtawk ve thei hram a, ka kut chu a zawi hian a zawi vek a ni ber mai. Chaw pawh ei lo chuan ka lo mu tlang chu niin, ka harh meuh chuan zan dar 9 a lo pel der tawh.

Ka chhungte lah an mu hma thei khawp a, room atanga ka chhuak chu inchhung pawh a lo thip leh khup tawh mai. Chawhmeh te chu ka han chhuang lum a, ka phone ka han en chu Dika miss call a lo tam ngang mai. In lo theihnghilh tawh takin, Dika hi ka bialpa a ni. Ka call back nghal a, "Enge engmah sawi lova i reh hmak a? Khawnge i awm?" tiin mi rawn vin nghal chiam chiam mai.

"Amak tun tun thin...tlaiah khan chaw pawh ei lovin ka lo muhil tlang daih alawm. Hei tunah ka tho ve chiah a, chaw ka ei ve dawn mek." tiin ka chhang a. "I van chau awm em em ve? I thawk ve vak aniang chu...khatiang te chu mipa hna alawm, mipa amaw hi i inti thin a..." a la rawn ti zui. Nuih suk pah chuan, "Mipa chu ka nilo nangin nang ai chuan ka pa zawk...haha. A hrim hrim in nangpawh hi, tinge i rawn len loh va?" tiin ka han zawt let veleh a.

"Lo leng pawh ni ila kawm tur pawh i awm loh chu... i muthilh daih chu.."

"Aww..min rawn kai tho mai dawn lawm."

"Tak ana, tunlai i boss Nathana nen case in nei hnai em?"

Ka nui deuh huk mai, "Teh ngawt chuan...hnu chhui tura min koh leh koh loh animai, private detective ania, a duh duh a chhui ngawt thei bik hleinem mawle, Mawla." tiin ka han fiam zui a. "Make-up artist nen danglamna in awm dawn lo a nih chu." tiin a nui huah huah mai. "Hmm..engvang ngawtin maw?" tiin ka han zawt leh a.

"Awww..Make-up artist te pawh kotu an awmloh chuan BA hna hmu lo te nen an inang reng alawm."

"I over emai a, naktuk chu min rawn pui ve la a tha ang."

"Ka hman lo alawm, ka nu bazar pui angai a...nidangah ka rawn pui dawn che u nia."

Minute 10 vel kan inbiak leh hnu chuan keipawh chu chaw te ka ei a, chaw eikham ah chuan kan han in call leh a. Hnu chhuiin buai thin hle mah ila, bialpa nei ve ta na na na chu lung te pawh a leng ve duh thin khawp mai. Dar 12 vel thleng kan inbia a, ka chauh ala reh chiah lo nen, hemi zan zet zawng ka mut a tui khawp mai.

*******************

Ka phone vibrate hlarh hlarh chuan min ti harh a, peih lo tak chung chuan ka tho chhuak a. Ka phone chu ka la ban fuh thei lawk lo zui, ka la zawi takzet. Ka han en chuan Nathana a lo ni reng mai, "Hello Sir?" tiin phone chu ka la nghal a. "Bella, i tho tawh maw?" a rawn ti a. "Ka tho deuh chiah a, enge ni ta?" tiin ka lo zawt let a.

"Englo ania, hna thar kan nei leh dawn a ang khawp mai." a rawn ti chu ka phur lo kher mai. "Eng hna nge?" tiin ka zawt leh a. "Tualthahna bawk ania, i va peih loh hmel ve, keimah in ka lo chhui mai dawn em ni?" tiin a rawn nui huah huah a. "Peih lo love, Sir. Ka rawn kal nghal dawn em ni?" ka han ti ve leh a.

"Chaw te ei phawt la, han tho harh phawt teh."

"I apartment ah tho khan em ni ila awm?"

"Aih..tunah chuan kan inah ka awm. Mahse ka apartment ah zawk kan inhmu dawnnia, tunah dar 8 a la ri lo deuh va, dar 10 rik hmain lo thlen tum la."

"Awle, Sir...ka lo kal ang." tiin phone chu ka dah a, ni 2-3 vel tal chu nilenga han mut mai mai chu ka la chak mang e. Phur faharn lo chung chuan ka tho chhuak a, hna thar ka neih thu te pawh chu Dika bulah chuan ka han sawi ve a. Ani lah hi a phur thei phian zawk lehnghal a, mi hi chu a ngaisang ve ania.

********************

Dar 9:30 vel a rik meuh chuan Nathana apartment chu ka va thleng leh ta der mai, mahse a lo inkalh daih mai a. "A lo la thleng lo a nimaw?" tia ka hriat tham leka ka phun nuah nuah lai chuan car sen nalh tak mai hi ka bulah chuan a rawn ding a, NAthana chu a rawn chhuak a. "I lo thleng tawh animaw? I va hma leh si ve.." tiin min nuih sang a.

"Nia...Sir, hei hi thar em ni?" tiin motor chu ka kawk a. "A nih hi....pakhat zawk kha hmanzanah MAxie-in a ti chhe daih a." a la ti zui. "Enga? Engtin nge a tihchhiat theih a?" tiin ka zawt nghal a. "Khalh kan inzirtir mawle....bang a su bur a nih kha." tiin a khi suk mai. A va hausak thlak tak, siam tir ve mai awm ania ka ti rilru nuah nuah mai.

Inchhungah chuan kan inzui lut a, "Tunlai enge i tih thin a? Kar 2 lai kan inhmu tawh lova, mi rawn biak pawh i tum si lo." a han ti a. "In kan sa tha mek a, niminah khan brick thianrin ka han thawk ve chiam a, ka chau khawp mai." nui chung chuan ka chhang a. "I va ti tha ve...han thu phawt la, juice in tur ka va la ange." tiin choka lam chu a pan a.

Sitting room ah chuan ka thu a, "Khawi lam tualthahna nge ni reng reng a? News ka van hre ve si lo ve.." tiin ka han zawt leh a. Juice no 2 rawn keng pheiin ka bulah chuan pakhat chu a rawn dah a, "Aizawl khaw chhungah a ni lo." tiin min chhang daih mai. "Aizawlah a nilo maw? Khawdangah maw?" ka lo ti hu mai.

"Khawdang tih ah..a hla lo. Aizawl atangin km 20 vel bak a nilo."

"Khawi khua nge a?"

"Renglung Khua ania, khaw te tak te mawle. In 200 vel bak a awm lo, nizana thil thleng a ni awm e."

"Eng thil nge thleng reng reng a?"

"Pu Dama te in bulah ruang chhar a ni a, chu ruang chu an hnathawk chhar laite zing a mi a nia."

"Hnathawk chhawr lai a?"

"Aw...an in an zauh mek a. an awmna pawh ala rei lo a ni awm e. Renglung khua ah sawn nikum vela awm ang khan an sawi a, an thenawm ten min lo hria a. Chhui turin keimah hi min lo kawh hmuh a, tukin khan call ka dawng a."

"A hla tham ve si a, Sir..tunah pawh kal nghal mah ila a pawi lo ania."

"Anih kal nghal ila."

*******************

Nathana motor thar chuan kan mamawh kan pai kim hnu chuan kan tlan ta a, a hma ami ai chuan a lian zawk a, mahse a hma a mi ai khan chuan a nuam lo zawk. Renglung khaw lam pan chuan kan tlan nghal vang vang a, rin ai tak chuan a lo hla vak lem lo. A khua pawh Nathana sawi ang ngeiin a te reuh khawp mai, mahse a nuam phian thung.

Pu Dama te inah chuan kan va kal ta a, mipui pawh an lo la awm nual mai. Police Inspector pakhat chuan min hmuh veleh chuan lo kal in, "In lo thleng thei maw, Detective...ruang chu lak sawn a lo ni hman a, a pawi kan ti khawp mai. Aizawl Forensic lama thawn thlak turin kan nauten an phur phei tawh a, mahse crime scene erawh engmah kan la khawih danglam lo, ruang tih loh chu.." a rawn ti nghal zung zung mai.

"A pawi love, forensic lam ho chu nakinah ka hmu mai ang. Khawngaihin crime scene lamah chuan min hruai thei angem?" tiin Nathana chuan a han zawt let a. "Tehreng mai, min lo zui rawh u." tiin Inspector chuan min hruai phei ta a. In hnung lam, tuikhua bula kawt zawl te tak te lo awmah chuan min phei pui a.

"Helaiah hian ania, Sir...hetah hian hnimin a lo inkhuh a." Inspector chuan a han ti a. Hnim velah chuan thisen pawh a la kai nual a, hnah thel tam tak pawh a tel nual mai. Nathana chuan a han en kual vel a, "Hmanrua engemaw tal in hmu tel em?" tiin a zawt a. "Aih, eng hmanrua mah hmuh a ni lo." tiin a lo chhang a.

"Khawnge Pu Dama chu a awm?"

"Inchhungah an nupa in an awm ang."

Nathana nen chuan inchhung lamah chuan kan lut a, Pu Dama leh a nupui Hmingtei te chu kil khatah rilru hah hmel tak hian an lo thu dun a. "Pu Dam, Detective NAthan Malsawmkima ka nia, hei hi ka partner Bella-i a nih hi." tiin a chibai a. "In lo thleng thei maw...Lalchhandama ka nia, ka nupui hi Lalhmingmawii ania." tiin min inhmelhriat tir a.

An nupa chuan an la naupan dun hmel kher mai, annu phei chu kum 24-26 vel bak a nih ka ring lo. Pu Dama pawh kum 40 ala tlin ka ring lo bawk, an hmeltha dun nupa phian mai. "Lo thu ru." tiin thutna chu min kawh hmuh a, kan thu ta a. "Engtik atangin nge he khua ah hian in rawn awm khah?" tiin Nathana chuan a zawt a.

"Nikum kum tir lam khan ania, Aizawl atang ve thova pem kan nia." tiin Dama chuan a chhang a. "Anih tak chu...ka lo hriat dan chuan in in hi sak zawm in tum a ni awm a, chuan ruang an chhar hi in in satute zinga mi a niin kan lo hre bawk a, a dik em?" tiin a han zawt leh a. "Aw dik e, ka pu...a hming pawh kan hria alawm, Valpuia a nia..mi fel tak a ni mawle." tiin Dama chuan a chhang leh a.

"Tunge ruang hi hmu hmasa ber?"

"Kan nu in a hmu hmasa ber a, a au vak a. Tichuan ka zu hmu ve ta chauh a, kan nu phei chu a thidang tep hial alawm."

NAthana chuan Hmingtei chu a han en a, "Anih leh thiannu, dar engzat velah nge ruang chu i hmuh i hre thei em?" tiin a han zawt ve thung a. "Dar 7 a pel hret chauh ang ka ring, kan pa tak phei hi chu ala muhil a. Hnimin a lo inkhuh vek a, ka hmuh tirh phei chuan enge a nih pawh ka hre mai lo. Tuin nge maw lo dahkhawm ni ka ti rilru nauh nauh va, mahse a kutzungtang rawn lawr kha ka hmu a, ka va enchian khan ruang a ni tih ka hre ta a, kan pa hi ka auh harh tawp a." tiin a chhang a.

"A bul hnai velah thil engemaw...object hrim hrim pakhat tal a awm em, in hmuh tirh in?"

"Aih engmah a awm lo chutiang, hnim hnah ho kha a nimai."

"Pu Dam, nizan vela thil thleng a nih hmel a, he tualthahna hi...nizanah engmah thawm in hrelo em ni?" Nathana chuan a han zawt leh a. "Thawm engmah kan hre lova, keini pawhin chu chu mak kan ti. A hliam te ngaihtuah khan thawm awm awm tak chu ania, mahse engmah kan hre lo." tiin Dama chuan a chhang a.

"Hmingte, nangin i hria em?" tiin Nathana chuan a han zawt veleh a. "Aih, keipawn engmah ka hre lo. Chubakah kei phei chu ka mu hma thin hrim hrim a, dar 8 velah kha chuan ka muhil daih tawh ang. Kan pa hi a mu har deuh va, thawm engmah ka hre lo." tiin Hmingtei chuan a han chhang ve leh a.

"Ka mu har lutuk bik chuang lo keipawh, TV ka en a...dar 9 velah ka mu in ka hria. Dar 10 rik hma vel kha chuan ka la meng ngei a, mahse thawm pakhat mah ka hre lo." tiin Dama chuan a lo tuihnih ve leh bawk a. Nathana chu a han ngawih leh deuh vang vang hnuah chuan, "Rinhlelh deuh in nei em?" tiin a han zawt leh a.

"Han rinhlelh tur awm ang kan hre lo, mi pawi a sawi ngai lova, tlangval fel tak a ni."

"A hnathawh pui zinga mi te an ni thei angem?" tiin ka lo zawt ve a, "A teuh lo, chu chu keichu ka ring lo bur." tiin Hmingtei chuan min lo chhang a. "Nia...a hnathawh puite hi chu an ni lovang, an inkawm ngeih hlawm lutuk. An inthurual thiam a, an hnathawk pawh hmuh an nuam." Dama chuan a lo ti ve bawk a.

Nathana chu a tho va, "Min lo hrethiam lawk...Bella min lo zui teh." tiin min ko va. Ka va zui a, pawnah chuan kan inzui chhuak a. Inspector bulah chuan va kalin, "Mitthi hi a chhungte inbe tawh em?" tiin Nathana chuan a han zawt a. "Aw...in lo thlen hma deuh khan a chhungte chu kan hrilh tawh a, mahse kan la kawm tam hman lo." tiin a lo chhang a.

"Kan la kawm tam hman lo a? Enge awmzia?"

"Valpuia nu kha a thawng lutuk a, a thidang a. A biak hleihtheih lova."

"Anih a chhungte dang an awm lo a mi?"

"A pa a thi tawh a, a nau leh a nu nen pathum chauh an nia. A nau lah kum 12 mi lek ala ni bawk si nen, thil han zawh theih pawh a ni hrih lo."

"Tunah a la harh lo em ni?"

"Aw la harh lo, tun lawk khan ka va call leh a."

"Awle, Bella-i nen hian kan va kal leh ang. Chuan Inspector, thil pakhat min tihsak thei angem?"

"Tehreng mai, Sir..enge ni?"

"Pu Dama te ina hnathawk te hi a mal te te in an in lo hre vek la, an hming nen...detail takin ka duh aw...a thlawn hauh lovang." tiin Nathana chuan a mit ko a han san zauh va, Inspector chu a lawm ngei mai. "Tehreng mai, Sir. Ka lo buaipui nghal ange, a rei lovang." tiin a chhang a. "Chuan..Pu Dama te saw a aia chipchiar zawkin lo va kawm nawn leh bawk ang che." tiin kan kalsan ta a.

**************************

Valpuia te in chu kan va thleng a, mipui pawh an lo tam khawp mai. Mahse ruang erawh Aizawl lamah phurh phei mek ala ni chauh thung, vengchhung nuho chuan Valpuia nau, hmeichhe naupang kum 12 mi lek chu khawngaihin an kuah a, an tah pui hlawm a. Pa pakhat chuan min rawn pan a, "Police lam em ni in nih?" tiin min lo zawt a.

"Aw ni e, nang tunge i nih ve le?" tiin Nathana chuan a han zawt let a. "Valpuia te thenawm chiah ami hi ka nia, Valpuia nu lah hei...ala harh thei si lova, an ai ka lo awh hrih a nih hi." tiin a chhang a. "Anih tak chu...i fel hle mai, i hming kan hre thei angem?" tiin Nathana chuan a han zawt leh a. "Ruatfela ka nia...saw lai lawk saw kan in ania." tiin a chhang leh a.

"Kei hi Detective NAthana ka nia, hei hi ka partner Bella-i a nih hi. Pu Ruat, Valpuia mizia hi i hre chiang em?"

"Zep lo chuan zu hi chu a rui haw ve fo thin niin ka hria, anu nen hian an han in vin leh deuh bawrh bawrh ri hi chu ka hre leh zeuh zeuh thin. Mahse biak nuam tak mai hi ania, kan inah pawh hian a rawn leng lut ve fo mai."

"Thiantha zual bik deuh te a nei em? I hre mial em? Han kawm ngeih deuh bik emaw?"

"Aw...saw tunah pawh a thiante chu a thawhpui reng alawm. DAma te in sa mek tute saw, thian ho vek alawm an nih."

"Nihleh bialnu a neih awm i hria em?"

"Bialnu a neih chu ka hre miah lo, a lo nei maithei bawk a...kha chu ka hre lo le."

Nathana chuan min en a, "Naupang saw kan biak ve angai, engemaw tal chu kan hriat belh theih mahna." a han ti a. "Nia, a pawi hleinem." tih ringawt chuan ka chhang a. A ngawi vang vang a, "I thiam zawk ang." a ti daih mai. "Eng chu maw?" ka lo ti deuh hu a. "I thiam zawk ka ring, nangman va zawt zawk rawh." a la ti zui.

"Ka duh bik lo, kei aiin i thiam zawk ang?"

"Enge ka thiam zawkna tur? Hmeichhia i nia...a chhang tha duh zawk ang che. Keichuan Pu Ruata hi ka lo la kawm ang." a ti tlat mai. Naupang chu ka va pan a, "Pi te u, Detective Bella ka nia, Valpuia nau hi ka lo kawm hrang lawk ang chu.." ka va ti a. Pitar pakhat chuan, "Va kal rawh le, BAwihte...a u kha tha deuh deuh va chhan tur aw.." tiin ka bulah chuan an rawn tir phei a.

Choka lamah chuan ka hruai phei a, "Mami tunge i hming le?" tiin ka han zawt a. Inhnit feih feih chung chuan, "Seni." a ti zawi sap mai. "Pawl engzat nge i nih tawh?" tiin ka han zawt leh te te a. "Pawl 5." tih chauh chuan min chhang leh a. "I u hmingpum hi enge?" tiin ka zawt leh a. "Lalrempuia." a ti zawi leh sap mai.

"I u hi a thiante nen an rawn leng thin em?"

"Aw..an rawn leng ziah."

"An rui ngai em?"

"Um..an rui ziah thin a, anu in a hau ziah alawm. Mahse an rawn leng ziah a, an rui ziah tho."

"Anih leh i u hian bialnu a nei nge nei lo i hria em?"

"Aih..a nei lo aniang, ka hre lo."

"Anih leh i u ngei deuhtu awm ang te i hria em, a thiante zingah emaw pawh?"

"Aih neilovang." tih chauh chuan min chhang leh a, a tah a chhuah em avang chuan naupang a ni bawk si chu han zawh zui vak chi niin ka hre ta lova. "Umm..api te bulah sawn va kal leh tawh rawh le." tiin ka tir phei ta ringawt a. Nathana chu rawn kalin, "Pawnah chhuak lawk ang." tiin min rawn hrilh ru zauh va.

Pawnah chuan kan inzui chhuak a, "Eng eng nge i zawh a?" tiin min zawt nghal a. "A u te thian ho hian zantin zu ruiin an inah an inkawm khawm thin a, Valpuia nu pawh hian a hau fova, mahse engatan mah an ngai ngai lo ni awm tak a ni." tiin ka chhang a. "Thalai rual vek an la ni dawn anih chu, Valpuia hi kum 21 chauh ala ni lenghal a...luhlul rual lek an la nih chu." tiin a khi deuh suk a.

"Anu chu ala harh lo em ni?" tiin ka han zawt ve thung a. "A la harh lo a ni awm e, a dinhmun a lo tha lo viau ang tih te pawh a hlauhawm angreng khawp mai.." a tih lai chuan Pu Ruata chu a rawn chhuak a, "Valpuia nu chu a harh tawh e, mahse ala tap nasa rih khawp mai." a rawn ti a. Nathana chu a thaw deuh huai a, "Anih chuan la nghak rih ang, hun ala mamawh rih ang." a ti a.

**********************

Minute 10 vel hnuah chuan Nathana phone chu a rawn ri a, "Hello...aw...awle." tiin a dah leh mai a. "Enge ni a?" tiin ka lo zawt a. "Post mortem result a chhuak der mai." tiin min chhang a. "Anih Valpuia nu hi..." ka lo ti leh a. "Pu Ruata bulah nakinah kan lo kal leh tur thu va hrilh mai rawh, Valpuia nu pawh khan hun ala mamawh tam deuh rih ang." tiin min chhang a.

Pu Ruata bulah chuan ka va sawi a, tichuan NAthana chu a car bulah a lo awm a. "Post mortem result hi rawn thawn chho se, chutih chhung chuan an khaw Police Station lamah va kal teh ang. Inspector khan Valpuia thiante kha a lo hre nual tawh maithei a, Valpuia nu chu nakin deuhvah kan be leh mai dawnnia." a ti a.

Tichuan Police Station lam chu kan va pan leh ta zawk a, Inspector pawh chu a lo awm ngei a. Min hjmuh veleh chuan, "Sir, lo lut rawh u. Kha thu rawh u, thingpui in duh em?" a lo ti deuh nghal chiam chiam mai. "A pawi hleinem, lo in ila." tiin Nathana chuan a chhang a. Thingpui chu min order sak nghal a, a dawhkan chu kan kil hova.

"A thiante chu ka hre vek tawh a, an vai hian Valpuia telin 5 an nia. Hemi venga mite vek hi an nia, Lalramliana kum 28, Zohmingthanga kum 34, Jonas Lalduhzuala kum 24, Lalzirliana kum 30 leh Valpuia kum 21 nen an vai hian panga an ni. VAlpuia hmingpum hi Lalrempuia a ni a, an thian zingah hian a naupang ber." tiin Inspector chuan a lo hre kim thlap tawh mai.

"Anmahni hi i hrechiang ve em, nangin?" tiin Nathana chuan  ahan zawt leh a. Inspector chu a nui suk a, "Kan vaw ve nual tawh, an rui nawi thei khawp mai. Kut hnathawk mi vek an nia, kan vengah chuan a tangkai pawl tak chu an ni hlawm tho mai." tiin a chhang a. "VEngdangah hmelma ve deuh te hi an nei a ni lo maw?" ka lo ti a.

"Nia..a ni thei tho mai. Vengdang ho nen hian insual hi an la hrat ve khawp a, kan khua hi chu zep lo chuan ala thing ve lutuk amaw.." Inspector chuan a han ti vel nuah nuah a. "Chutiang vang a ni lovang, tualthattu hi mi naran vak a nih ka ring lo." NAthana chuan a lo ti daih mai. Thingpui chu Inspector chuan a han lem deuh khawlh a, "Ti daih ila, ka hming pawh ka la sawi ve lova. Inspector DAnny-a ka nia..." polite tak chuan a han ti tha leh hnuhnawh vel a.

"I ti lawmawm e, Inspector Danny. Anih chuan Valpuia thiante ho hi a huhova kawm theih dan tur i lo buaipui leh dawnnia, chuan pawnah min rawn zui chhuak lawk la." NAthana chuan a han ti zawi sap a. Chuveleh Inspector DAnny-a chuan ring tak hian, "Ni e..ka va thlah ang che u." a han ti deuh ngei a.

Thamna chu la ve zeuh zeuh tawh animaw ka ti rilru vawng vawng mai, a zei reuh tlat. Motor phenah chuan Nathana chuan envelop, a chhunga pawisa khat nuk mai chu a han pe zeuh va. "Ka lawm e, Sir." Danny-a chuan a lo ti vat a. "Valpuia te thianho chu lo ko khawm ang che." a ti leh a.

Chutih lai chuan motor pakhat hi a rawn tlan a, kawtah chuan a rawn ding a. Mi pakhat hi a lo chhuak a, "Detective Nathan..Doctor Manuna ka nia, post mortem result kan rawn keng e." a rawn ti a. "Station-ah lut ang u." Danny-a chuan a lo a ti vat a, kan zui lut ta hlawm a. Doctor chuan file chu NAthana a pe a, "Proof-na chu kan nei chiah lo nangin, a hliam en atang kha chuan thir tiang hrawl tak emaw, thil lampang chi hrim hrim hmanga vuak hlum niin a lang." a han ti a.

Thalak chu kan en a, a bek chu a kau huau mai. "Valpuia samah khan thir tuiek them hmuh a ni bawk a, mahse eng hmanrua ber nge ni kan chiang thei lo a ni. Chuan a banah khan hmerna thla a lang kulh a, mahse finger prints pakhat mah a awm lo." Doctor Manuna bawk chuan a han ti leh a.

"A awmzia chu glove a bun tihna...engemawni chu a hre ve a ni." tiin Nathana chu a khi suk a. A taksa ah kutthlakna hnuhma tam tak a awm a, mahse chutah pawh chuan finger prints pakhat mah hmuh a ni chuang lo, hnu a thup vek a ni tualthattu hian.." Manuna chuan a han ti leh a. "CCTV tih vel engmah an vuah lo tiraw..Pu Dama te khan?" tiin Inspector chu ka han zawt ve a.

"Aw engmah an vuah lo, thawm lah pakhat mah an hre bawk si lova." tiin min chhang a. "Chuvang tak chuan tualthattu hi mi engemaw tak chu a ni chiang alawm, mi mawl satliah, tual that ve ringawt chu a ni lo deuh a ang khawp mai. Finger prints zawng zawng thupna chang a hria a, thawm a nei miah lo bawk." Nathana chuan a lo ti a.

"Ni e, mihring DNA takngial pawh hmuh a ni chuang lo. NAsa taka sawisak a ni a, tualthattu hi serial killer a nilo a nih chuan VAlpuia hi he tualthattu hian a haw hle tihna a nimai." Doctor Manuna chuan a han ti leh a. Chutih lai chuan Nathana phone chu a rawn ri a, reilote an inbiak hnu chuan a dah leh mai a.

"Enge ni a?" ka lo ti vat a. "Pu Ruata'n min rawn phone a, Valpuia nu chuan kawm a inpeih tawh thu a rawn sawi a." tiin min chhang a. "In duh chuan va kal rawh u, Sir. A bak chu ka lo buaipui vek mai ang." Danny-a chuan a lo ti nghal a. "Valpuia thiante kha aw...lo ko khawm la, an chhungte theuh bulah pawh khan tha takin hrilh thlap ang che." tiin Nathana chuan a chah nawn leh a.

"AWLE Sir." tiin salute te chu a han pe deuh thlap a, thluak chu a nei riau he Inspector hi. Kan Kevin-a ai chuan a zia deuh turah ngai ang, kan thu pawh a awih deuh zawk. Valpuia te in lam chu kan pan leh ta a, "Tinge pawisa kha i pek kher a? A uiawm mai mai ka lo tia." tiin NAthana chu kan tlan mek lai chuan ka han zawt a.

"Khapa kha ka hria alawm, ka hrelo der mai mai a nih kha. Senior Officer ho ten an sawi thin alawm, Aizawlah khan a thawk ve thin a."

"Engtin nge an sawi a?"

"Phakar ve reuh lutuk, mahse sum a awm chuan tirh a hnial ngai lo an ti. Thamna a la zing bawk sia, constable senior ho ten min hrilh nasa alawm."

"Aww..SP retired i nia, pawisa pe kher lo pawhin i thu te chu a awih em em tur hi a ni ringawt."

"Tunah Police ka ni tawh hleinem, Detective ka ni tawh alawm."

"Ka hre ve tho alawm, mahse a zah tur che hi a ni ringawt." ka la ti hram a. A nui huah huah a, "Police Officer chin ho hian maw, Private Detective te hi an zah bik vak lo, keipawh khan chutin ka ngaisang bik ngai hleinem." a han ti a. ""Inspector a nih kha, Officer pawh ala nih ve loh kha." ka la ti hram a, "Hnial peih tawh lo che." ala ti hmuk zui.

************************

Valpuia te in chu kan thleng leh ta a, room ah chuan kan lut a. Valpuia nu chu a thiante pahnih chuan an lo awmpui a, a lo la inhnit feih feih mai. "Thiante u, min chhuahsan lawk thei angem?" Nathana chuan a han ti a. A thiante pahnih chu an chhuak ta a, "Enge i an, ka pi?" tiin a han zawt te te phawt a.

"Ka tha tawh e." a ti zawi sap mai. A tah nasat avang chuan a mit te chu a bui luk mai a, "I hming min hrilh thei angem?" tiin Nathana chuan a han zawt leh a. "Lalremsiami ka nia." tiin a chhang a. "Pi Siam, a pawi kan ti khawp mai. I rilru ana viau dawn tih chu kan hria a, mahse hun lo takin zawhna kan zawh che angai si a. Min hrethiam hram dawnnia, i fapa hian bialnu a nei em?" tiin a han zawt leh a.

"Nei lo aniang...nei chu nise ka hria ang." tiin Pi Siami chuan a chhang leh a. "Anih leh i fapa hian hmelma a neih awm i hria em? tiin a zawt leh a. "Insual a hrat hle tih chu ka hria...a naupan lai atang tawh khan a hrat ve hrim hrim. A hlauh ve ber apa lah kha zu vangin a boral ta daih si a, mahse apa ang chiah khan zu a heh em em a, vengchhungah buaina a chhuah apiang hian a hming hi a tel ve ziah bawk. Min ti zak thei khawp mai, mahse kei lah ka che hleithei tawh si lo nen, chhungkaw min chawmtu ber chu a ni bawk si a, kan chhuan tlak loh ve lutuk kan chhungkua hi chu." tiin a chhang a.

"Anih chuan hmelma a neih awm chu i hre lo tihna em ni?"

"Ka sawi thian lo....a neih chu ka hre miah lo. Mahse sawi ang khan vengdang tlangval hote nen hian han insual bur bur te hi an hrat khawp a, a hnar te hi a rawn thi haw phung zel."

"A thiante zinga mi an ni thei mai angem?"

"A thiante zinga mi chu an ni lul lovang, chu bakah a hnathawhna te, Dama te in bulah ber kher a ruang an hmu kha a mak ka ti."

"Nizanah engtik nge in inbiak hnuhnun ber? A kalna tur te a sawi em?"

"A chhuah hian a kalna tur a sawi ngai lo hrim hrim, chaw eikham khan pawisa min dil a, chu chu kan inbiak hnuhnun ber chu a ni mai."

"Anih nizanah chuan a lo haw miah lo tih i hre lo tihna em ni?"

"AW..zingah chauh ka hria. Ni e, ka fapa ania, ka ngaihtuah ve thei lutuk. Mahse hman atang tawhin thusawi a awih bawk silova, kan pa in min kalsan hnu ngat phei hi chuan zu a heh zual a. Keilah min hlau lo ve si a, a chhuah apiang hian ka nghak ziah a. Mahse tunhnai kha chuan ngaiah ka nei tawh a, inchhung chet hi ka kut vek a ni lo thei bawk silo nen, ka nghak tawh ngai lo."

"Anih tukin zingah chuan i hmu ta lo tihna a ni ta...phone te i tum reng reng em?"

"Ka phone nasa, mahse a tlang thei silova. A thiante pawh ka phone kual nghal a, mahse tuman a awmna an hre bawk silova. Ka mangang hman lutuk, chutih lai chuan...a thih thu min rawn hrilh ta a ni." tiin a kun a, a tap zawih zawih mai. "Ka pi..i fapa hian room hran bik a nei em?" tiin NAthana chuan a han zawt leh a.

"Aw nei e..in hmu duh em ni?" tap chung chuan Pi Siami chuan a han ti a. "Kan han daklut ve hrim hrim ang chu.." NAthana chuan a han ti a. "Min lo zui ru." tiin a tho va, room atang chuan a chhuak a. Kan zui chhuak ve nghal a, Valpuia room lam chu kan pan a. Room zimte mai hi a ni a, tlangval room tih takah a tawp ve hle mai.

****************************

TO BE CONTINUE