WILD ZONE : SEASON 1 (Episode - 1) Written by : Aaron Malsawmdawngzuala BAD GIRLS - 1

 WILD ZONE : SEASON 1

(Episode - 1)

Written by : Aaron Malsawmdawngzuala

BAD GIRLS - 1

******************

"Bella, hlauthawng suh...i thei tih ka hria alawm. Mi zawng zawngin partner atana an duh a nih hi, hreh reng reng suh. Detective tha tak i ni a, a bula i awm tam a, i thawhpui rei hunah phei chuan nang tluk tur hi an piang leh tawh lovang tih ka sawi ngam." tiin kan pu ber chuan min han motivate viau mahse, Police Officer a nih lai atanga ka lo hriat tawh a ni a, ani ang mifing leh lutuk thawh pui chu ka zuam thlawt lo a ni.

Bella Lalmuankimi ka ni a, kum 31-a upa ka ni. Police Detective ka ni a, Delhi CID atangin Mizoram CID zawm tura transfer ka ni. Mahse kan IGP hian Mizorama ka Police Officer hriat tawh zawng zawng a ka ngaihsan ber leh a ruk tak pawh a ka star em em, Private Detective ni ta, Pu Nathan Malsawmkima partner turin min ruat ta tlat mai hi ka zam chhe kher mai.

Mizoramah hian kum 1 pawh ka la awm tling lo, mahse professional detective nena inkawp tura min ti erawh hi chu phu lo tak niin ka inhria. Naktuk lawk hi Nathana nena kan inhmuh hun tur a la ni zui bawk si, ka hmu hrehin ka huphurh takzet. Ani chu engkimah a fimkhur dawn tih hriat sa a ni a, kei lah ka lo pawlawh ve ropui si.

Thil engemaw ti dik lo zeuh ta ila, ka zak dawn lutuk leh min hau nasa dawn lutuk te chu ka peih lo lawk. Chumi zan chuan ka bialpa Dika te inah chuan ka leng a, Nathana thawhpui ka hreh zia leh ka huphurh zia te chu ka hrilh mawlh mawlh a. "I vannei alawm le, ani ang i thawh pui thei chu lawm hle ta che." a lo la ti zui.

A hmeichhia zawk bialpa te ina leng chu mak in ti maithei a, mahse kum 31 ka ni tawh a, ka nu em em hran lo. Detective ka ni bawk a, nula senior zah hre ve lem lo ka ni tih hi lo hre ve mai mai teh u. Amaherawh chu tun tum zet zawng, zam tak ka ni zam tak. "Lalrindik, indate tur kan nilo, hnu chhui dun tur kan nih hi hre rawh." tiin ka vin hrep mai.

"Engtin nge nang ber kherin i thawh pui dawn a, midang an awm lo mi? Hmeichhia ber an thlang che hi a mak ka ti, ka lawmpui viau na che in..a case khawih lai mekah i pui dawn tihna em ni?" tiin min zawt a. "Case khawih lai chu engmah a nei lo, naktukah hian kan inhmelhriat dawn chauh va. Mipa nge hmeichhia ka nih pawh ala hrelo, phone-ah tak ngial pawh kan la inbe lo." tiin ka chhang a.

"A nuam ngawt ang chu, keichu ka ngaisang teh mai ania." a la ti ta deuh deuh va. "Kan IGP hi lawm, keimah kher min thlang a. CAse khawih tur a neih leh veleh partner turin kan department ami hi Nathana hian a duh a, kan IGP hian keimah kher min thlang a nih chu, midang an tam tehreng nen." tiin ka chhang leh a.

"AWww...in department ah a ring tawk ber che tihna a ni mai alawm. A hrim hrimin engtia rei nge in thawh dun dawn a?"

"Aggrement ah kha chuan thla ruk a nia, mahse chu aia rei pawh a ni maithei."

"I theih tawp i chhuah dawnnia, ka duatte.."

REi fe kan inkawm leh hnu chuan keipawh chu ka haw ve ta a, pawn thleng chu min rawn thlah a. KA scooty chu ti nungin ka ngam ang tawka chak chuan ka han tlan ve chiam a, ka rilru ah chuan naktuk ka huphurh lutuk chu thil dang a leng meuh lo. Kan in ka thlen hma deuh chuan kawng sir foot path ah chuan hmeichhe pakhat, pian nalh zet mai leh hmeltha angreng tak mai hi a lo kal pai nasa mai.

En reng reng pawh chuan a rui tih a hriat em em a, amah chauhvin ala ni zui. A pheikhawk sang chu khaiin ke lawngin a kal a, phone a hmang pah bawk. A la naupan hmel bawk nen, "Tunlai tleirawl ho tak hi chu awwww..." tiin ka hriatham lek chuan ka phun nuah nuah a, ka tlan pel ve mai bawk.

********************

A tuk a ni ta, ka thinphu chu a muang thei mawlh lo. Ka hmu hreh lutuk hi kan IGP bulah chuan va phat leh mai ka duh, mahse hetiang khawpa opportunity tha hi ka hmu leh tawh dawn der mai si lo. Dar 10 a ri a, 10 leh a chanve a an in thleng hman tur ka ni. A nalh thei ang ber chuan ka han inchei ve a, an in lam pan chuan ka inkhalh phei ta.

A apartment bul chu ka thleng a, ka tha a khur hial in ka hria. KAwngka chu ka han kik karh karh a, mahse a reh vung vung mai. VAwi thum vel ka kik leh hnuah chuan, "Ka lo kal e." a rawn ti lauh lauh mai. Kawngka chu a rawn hawng a, min hmu chiah chu a meng phawk hru mai. A takah ka vawikhat hmuhna a ni a, chupawh a hnei em em mai lehnghal.

A hmel chu a tha takzet, mahse a mu tho chiah tih erawh a hriat hle thung. Mak tih hmel tak hian, "Nang hi...detective..ka partner tur chu maw?" a ti hu mai. Polite tak hian, "AW ni e, Bella Lalmuankimi ka nia..Good Morning, Sir." ka han ti deuh thlap a. Chuveleh, "Lawks aw..." tiin kawngka chu min khar hnan leh daih mai.

Minute 2 dawn lai chu ka nghak leh a, a rawn hawng leh a. Inthiam loh hmel taka nui suk chung chuan, "Tihpalh aw...lo lut rawh le." tiin min sawm lut ta a. Inchhung chu zau em em ni lo mahse a nuam tawk khawp mai, ka han enkual chuan hmanhmawh taka tihfai thuak thuak tih a hriat takzet, ka nui chhuak teuh hman khawp mai.

"Nizan ka meng rei deuh va, khawngaihin lo thu rawh.." tiin thutna te chu min kawh hmuh a. Ka hma zawnah chuan rawn thu in, "Mipa an ni dawn maw ka tia, chuvang chuan ania i hming pawh IGP kha ka zawh duh loh...mahse rinloh takin nangmah i lo nia." tiin a nui sen sen a, rin aiin a nelawm phian mai.

"Nia, kan Sir khan keimah hi min ti deuh tlat bawk sia."

"Hmeichhia pawh ni mahse a pawi lo ka tih kha ka fiamthu tih a hre lo a mawni le?" a ti nuah nuah a, a nuam lo duh kher mai. Min rawn en a, "Ka ti mai mai a nih kha...Nathan Malsawmkima ka nia, Nice to meet you." tiin a kut a rawn dah chhuak a, min nuih leh sen sen chu kei nula senior hi ka lai lek lek mai.

"Nice to meet you too, Sir." tiin ka chibai let ve a. "Theih tawp kan chhuah dun dawnnia, min zah hlur ringawt reng lo la. I thianpa angin min ngai dawnnia, chuan harsatna i neih chuan sawi hreh lo bawl la aw.." a ti nghal zung zung mai. Tum hmuuk leh strict hlur ang tura ka ngaih ka a ni a, ka va ring sual chiang em.

"Thingpui ka va lum ang che aw...dawhkan vel hi ka'n tifai phawt ange. A zia lo hle mai, ka lo awm t(r)awp lutuk a." tiin dawhkan vel chu a hru ang mawlh mawlh a. Inla polite tak hian, "Thingpui chu keiman ka lo lum ang, Sir." ka han ti vel ngei a. "Angai lo, lo thu rawh...ka lo lum ang." tiin min chhang a.

"Nilove, keiman ka'n lum ange." tiin choka lamah chuan ka phei lui a. "Thingpui fe kha chhuar chung berah khan a awm ang." a rawn ti lauh lauh va. Thingpui chu ka siam lai chuan chaw ei dawhkana a phone dah chu a rawn ri a, "Sir, i phone a ri." ka lo ti vat a. "Tunge min lo en sak lawk mai." a rawn ti daih mai.

Ka va kal hnai a, Maxie tih hi a lo ni. "Maxie tiin a inziak, Sir." ka han ti leh a. "La suh." a lo ti hmak mai. Mak ti deuh chuan ka en hu a, amah pawh chu a nui suk mai. "Ihh..englo ania. A sawi tur ka hre lawk vek tho, la lo mai rawh." a han ti leh a. "I nupui em ni?" tiin ka zawt a, mahse thil ka hre chhuak leh thut.

Ka zawt chu ka inchhir ngei mai, a nupui a thi tawh tih ka hrechhuak tlai mah mah a ni. Inthiam lo tak chuan, "Sir, ka tihpalh lutuk.." tiin thupha ka chawi leh nghal mawlh mawlh. Mahse nui sang hian, "A ho lutuk...lungngai suh. Ihh...kha kah chu ka chhungkaw neih chhun...ka nau ti ila a dik mai ang." a ti leh a.

Kei lah chuan, "Engtia i nau maw? Thisen zawm maw?" tiin ka han zawt leh hram pek a. "Ni love, thisen zawm chu ni lo. Ka bulah a awm a, nia..ka nupui ang deuh chu nimai." tiin a nui huah huah a. Thingpui chu ka siam a, "A hang in aw.." a rawn ti nghal. Thingpui chu tray-in ka va chawi phei a, dawhkan ah chuan ka dah a.

KAn thu dun leh a, "Hei hi ka card ania." tiin a wallet atang chuan a card chu min pe a. "KA number i lo save dawnnia, case khawih tur kan neih hma chu department lamah ila thawk thei ania." a tih lai chuan a phone chu a rawn ri leh a. A thaw hak a, "Min lo hrethiam lawk mai." tiin a tho va.

A phone chu va la in a thutna ngaiah bawk chuan a rawn thu leh a, loud speaker ah dah in dawhkanah chuan a dah mai a. MAxie tho a lo ni, "Tinge phone i lak theih miah lova?" tiin a rawn zawt nghal a. "Ka tho chiah alawm, nizan ka mengrei deuh va.." tiin Nathana chuan a chhang a.

"Tul lovah mengrei suh ka tih kha, i la hritlang em?" tiin a rawn zawt leh a, "Ka zia tawh lutuk, hei inleng ka nei lawk a, nakinah ka rawn call ang che." tiin a chhang a. Chuveleh MAxie chuan, "Tu inleng maw? Hmeichhia nge mipa?" a rawn ti nghal a. Ka phu deuh zuk mai, Nathana chuan lai deuh hian min en a.

Za lo taka khi suk chung chuan, "Aaa..ihh, ka partner thar tur ka sawi kha ania." a ti leh a, "Chupawh chu nise, mipa nge hmeichhia?" a rawn ti leh a. Nathana chuan phone chu a la nghal a, loud speaker chu a off nghal. "Hei kan titi lawk a, nakinah ka rawn phone ang che." tiin a dah a, a inthiamloh hmel kher mai.

Keipawh chu ka nui suk ringawt, "Min lo hrethiam rawh, englo ania..." a tih lai chuan a rawn ri leh a. MAxie bawk a ni, "La rawh, Sir..ka lo nghak ang che." ka ti a. A thutna atanga thawh pah chuan a la a, "Ka sawi tum ber pawh ka la sawi hleinem, tinge i dah daih?" a tih ri chu ka la hre pha hram.

Minute 5 vel hnuah chuan a rawn let leh a, "Hna kan nei nghal dawn a ang khawp mai." tiin min nuih suk a. "Enge awmzia, Sir?" tiin ka lo zawt nghal. "Maxie hmelhriat pakhat hi....a ni(aunty) fanu a bo a ni awm a. Thla thum lai a bo tawh a, mahse tun thlengin an la hmu lova." a rawn ti a, awii..hna ka van nei hma leh si dawn em ka ti rilru vawng vawng mai.

"Mahse Sir, thla thum lai a bo tawh sia, an van buapui har ve..."

"Police te pawhin an hmu zo lo, a bo tih khan...a tlan bo zawk ania."

"Chupawh nise, thla thum lai a bo tawh te chuan a thih a rinawm tawh zawk lo maw?"

"Aih..ala thi lo. A chhan chu hmanni lawkah amah ang tak an hmuh thu an sawi a, chu chu ngaihven zui turin min rawn ngen a ni.....Maxie kal tlangin.."

"Umm..anih tak chu. Engtik atangin nge kan buaipui ang, Sir." tiin ka zawt a. "Haw leh la va insiam phawt la, tichuan Maxie thiannu te inah chuan kan va kal hmasa ber dawnnia." tiin min chhang a. "Awle Sir." tiin ka chhang a, ka chhuahsan ta a. Ka rin a ang lo tlat, a fel leh lutuk khan ngaih a ti tha lo hial zawk.

***********************

Maxie thiannu ni(aunty) Pi Kimi te inah chuan NAthana nen chuan kan va kal ta nghal a, "A naupan lai chuan naupang fel tak a ni thin a, thu pawh a awih thin khawp mai. Mahse a rawn tleirawl chho khan thian a thlang sual ta a, damdawi te tih a chingin zan chhuah ruk te a hrat em em a. Kan enkawl thiam lo pawh a ni mahna, inthah te pawh a tum fo thin. Tichuan a tlan bo ta a, khata tang khan kan hmu leh ta lo a ni." tiin Pi Kimi chuan min hrilh mawlh mawlh a.

"Anih leh Maxie sawi dan kha chuan hmanni deuhah Reiek ah an hmu a ni awm e a tia, tak tak a ni em?" tiin NAthana chuan a han zawt a. "Aw ni e, mahse an hmuh thu an sawi kha chuan beiseina nei thar viau mah ila, an sawi dan kha a awihawmloh lutuk a." tiin a chhang a. "Engtia  awihawm lohvin maw?" tiin a zawt leh a.

"Anthurium Festival ah ania, Reiek ah hmanni khan neih a ni a. Tah khan ZAHAU FASHIONS ten item an nei a, fashion show an nei a, tah chuan model zingah khan amah ang deuh an hmuh thu an sawi a."

"ZAHAU FASHIONS...ka vawikhat hriatna...i hre ngai em?" tiin NAthana chuan min rawn melh zauh va. "Hre ngai miah lo." tiin ka lo chhang a. "Anih leh Pi Kim, i fanu kha tumaw  ahming i tih khah?" tiin a zawt leh a. "Lalsangkimi..Sangtei." tiin a chhang a. "I fanu ang deuh lo hmutu chu tunge?" tiin a zawt leh a.

"Ka hmelhriat a nia, mahse ka awih lo. Khawiah hian ka fanu hi model a ni lovang, a thil duh loh ber alawm. Chubakah model ni tur chuan a pian pawh a nalh hran lo, a hmel lah a chuti lua bik lo bawk nen." a ti deuh nghal zung zung a. "A thlalak kan lo en thei angem?" tiin ka lo zawt ve vat a.

"Thei tehreng e.." tiin a tho va, room lam a pan a. NAthana chuan min rawn melh a, "Ka zawh tum chiah ania, min rawn sawi khalh." tiin a khi suk a. Ka lo nui ringawt, reiloteah chuan Pi Kimi chu rawn chhuak lehin thlalak pakhat hi a rawn keng a. "Hei hi ania.." tiin Nathana chu a rawn pe a.

THlalak chu kan han en a, anu sawi ang ngeiin a pian pawh chuti lua a ni lova, a thau angreng viau bawk. A hmel pawh a tha lem lo, mahse a ngo viau thung. Hmelchhe lutuk tia sawi tur chu a ni lo bawk, a sam a phiar bawk. "Thlalak hi kan kawl angai dawn a, chuan ka pi...i fanu chuan bialpa a nei hrim hrim em?" tiin a zawt leh a.

"AWiii bialpa a nei hnem tawh lutuk, police te pawhin a bo tirh khan a thiante pawh an zawt a, thenkhat phei chu an dawp hial. Mahse tuman a awmna an hre bik lova, a bialpa a tlan bo pui ti dawn ila, a bialpa ka hriat tawh zawng zawng, a bialpa hlui te thlengin police ten an zawt vek tawh a, mahse a chin hriat a la ni chuang lo."

"Anih tunah hian tinge zawng tura min tih?"

"A chhan chu Reiek-a an hmuh an sawi khan beiseina min siam thar leh a ni."

"Mahse i awih bawk silova.."

"A thih ka ring lo bur...beiseina ka nei tawh lo ka tih awmzia chu ka beidawng a ni. Khawiah emaw chuan a awm a, a biru a ni tih ka hria. Zawn hmuh ngei ka duh a, mahse ka beiseina neih awmchhun police ten engmah min tisak thei tawh bawk si lo. Ka vahnu hian i nau Maxie kha a lo hmelhriat hlauh va, tichuan ka rawn pun ta tawp che a ni."

"Anih tak chu, anih chuan case thar kan siam dawnnia. Lungngai reng reng suh, kan lo buaipui chhunzawm ange."

Pi Kimi chuan kan pahnih chuan min melh dun zeuh zeuh va, "Hetiangah hian engzat nge in hlawh thin?" a ti deuh tawl mai. NAthana nen chuan kan in en a, "Aa..ka pi, nakinah hlawh chungchang kha chu kan sawi dawn nia." NAthana chuan a lo ti vat. Tichuan in chu kan chhuahsan ta, a car hmang chuan in lam kan pan leh ta a.

**************************

A apartment ah bawk chuan kan let leh a, mahse kawngka a lo inhawng sa tlat mai. "Ehe..Maxie a lo kal amawni le?" a ti nuah nuah a. A in sira scooty chu ka hmu a, "Hei hi tu scooty nge i hre ngai em?" tiin ka kawk a. A rawn en ve a, "Aww..anih chiah hi...ava mak thawt thawt tak." tiin a nui deuh vur vur a.

Inchhungah chuan kan lut a, hmeichhia la naupan hmel tak, kei ai chuan a naupang zawk tih ka chiang. Hmelchhe lo tak mai leh sap dum hlarh mai hi sitting room ah chuan a lo thu a, min rawn hmuh veleh chuan mak a tih hmel kher mai. NAthana chuan min en a, "Bella, hei hi Maxie chu a nih hi." tin min inhmelhriat tir a.

Nui sang chung chuan, "Bella Lalmuankimi ka nia, i u partner thar tur hi ka nia." tiin ka kut chu ka va dahchhuak a. Muangchanga min chibai pah chuan Nathana chu enin, "I u a? Hei hi maw?" a ti deuh hu mai. Nathana chuan a lu hiat nauh nauh chung chuan, "Hehe..Maxie, hei hi BElla-i a nih hi." tiin a nui lui chiang kher emai.

ZA lo tak chuan Maxie pawh chu a nui suk a, "Nia..ka u alawm." tiin Nathana chu a melhrum kher mai. "Ka va inthlak ange, tikhan lo inkawm ru." tiin room ah a lut daih mai. "Thu rawh..thu rawh." tiin Maxie chuan thutna min kawh hmuh a. "Tinge hmeichhia daih daih an rawn tirh che a, mipa ni turah ka lo ngai ve ngawt a.." tiin min zawt a.

"Nia, kan pu khan keimah hi min select a...thla ruk chhung chauh a ni tho va, professional detective bula thawh chu experience tam tak pawh ka chhar phah ngei ka ring."

"Anih tak chu, anih leh U Bella.." a tih lai chuan ka lo pawt chat nghal. "Aih..min u suh." ka lo ti nghal vat. Phawk hru hian min en a, "Ngati maw?" a ti hu mai. Inthiam lo tak chuan ka nui lui a, "Ihh..englo, chutin ka la upa lo." ka ti ringawt. "Kei ai chuan i upa tho ang chu...chutin keichu mi u hi ka hreh vak lo, kei aiin kum khat lek pawhin upa mahse ka u tho." ala ti zui.

Ni e, ka kum a tam tawh tih chu ka hria. Mahse nula ka la ni a, ka bialpa pawh kum 26 chauh a la ni. Mi inlak young ve em em laia, ka bialpa te ang rual ina min u chu ka duh bik hleinem, "Ihhh...min u chuang suh, Bella min ti la a pawi lo." tiin ka chhang ta ringawt a. Amah pawh chu a nui a, "Anih leh Bella...bialpa i nei em?" a ti leh ta daih mai.

KA hrilhhai lutuk chuan, "Engmaw?" ka ti hu ringawt a. "Aa..ngaihloh lamah lo ngai lo la, bialpa i nei em ka ti mai mai mawle...zawh chi a ni em chu ka hrelova." a han ti leh a. "Aw nei ve e." tiin ka chhang a. A thaw deuh huai in ka hria, "Anih chuan leng tur te pawhin lo sawm ve la, apartment ah nilo..ih..kan in lampangah te pawh. Nakin zelah te pawh inneih inla duh anga, in nupa te pawn inlo leng thin ang chu tiraw?" a han ti leh nghal zung zung a.

Ka hrethiam lo kher mai, NAthana a rawn let leh hlauh chu ka thaw huai thei. Maxie bulah chuan a thu a, "Pi Kimi te in atangin kan rawn haw chiah a, Sangtei thlalak pawh kan rawn hawn a." tiin a hrilh a. "Khawimaw ka lo en ve chhin.." Maxie chuan a lo ti vat a. "Ka la hmu ngai lo." a ti zawi leh sap a.

"MAxie, i thiannu khan engtin chiah nge a hrilh che?"

"Hmanni ah amah ang deuh an hmu tih thleng khan min hrilh a, chutin kan sawi thui lo, ngati nge?"

"REiek ah Anthurium Festival ah khan Fashion Show model zingah amah ang deuh ka hmu tih velin a sawi lo maw?"

"Aw...chutiang REiek lampang a sawi tello hrim hrim, tinge min zawh a?"

"Pi Kimi khan a sawi a, mahse a awih lo lutuk a." tiin Nathana chuan a chhang a. Maxie chuan SAngtei thalak chu a han en leh a, "A awihlo pawh chu a awm e, a hmel leh pian zawng zawng nen hian model ni chi chu a ni lo." a lo ti ve bawk. "Zahau FAshions a tia, fashion show nei ho kha...an Director neitu zawnchhuah angai a ni..i hre ngai em?" tiin Nathana chuan a han zawt leh a.

Maxie chuan a lu thingin, "Ka vawikhat hriatna." tiin a lo chhang a. "Youtube velah hian Fashion Show vel chu en tur a awm lo maw..model ho pawh chu en liam liam ila, kan hre thei maithei asin, a thlalak nen kan lo en kawp anga.." ka han ti ve a. "A la awm lovang, hmanni lawk ania. An live lo lehnghal a, ala awm mai lovang." tiin Maxie chuan min lo chhang a.

Nathana chu a han ngawi vang vang a, "E taka...SAmmy-a.." a rawn ti chhuak hlawl mai. "Tu Sammy-a maw?" tiin Maxie chuan a lo zawt vat a. "Aww..kawmthlang Sammy-a.." tiin a chhang a. "Kawmthlang pa, photgrapher khu maw?" tiin a zawt leh a. "Ni e, khupa khu a kal awm emai, a status ah ka hmu tlat khan ka hria." tiin a chhang leh a.

"Ni tak e, tunah engmah a ti lovang. Zu kal ila, model ho pawh thla a laksan vek ang chu." Maxie pawh chuan a ti a, tichuan kawmthlangah chuan kan zu leng a. Sammy-a pawh chu a lo awm ngei mai, "Eheu...inva zahawm ve, enge ni ta, Nathan." a lo ti a. "I buai em, kan tibuai che em?" NAthana chuan a han ti te te a.

"Tibuai love, lo thu ru." tiin thutna te chu min lo kawh hmuh a. Kan thut fel hnu chuan, "Enge ni ta a? In lo len luh ve teh mial a." Sammy-a chuan a han ti leh a. Nathana chu a han thu tha sauh sauh va, "Englo ania, Anthurium Festival khan i kal ve em, hmanni khan?" tiin a han zawt a. "Kal ve e, tinge?" tiin a lo zawt let a.

"I kal chuan thla i la ngei anga, fashion show an neih khan model ho thla i la kim vek em?"

"La kim vek e, ngatan nge i tih?"

"Khawngaihin kan lo en lawk ang chu, hei kan hnathawh mekah hian a tangkai dawn a."

"E anih chu...computerah sawn ka dah alawm. Lo en ru, lo en ru..min lo zui lut tawp ru." tiin a tho va, room lamah chuan kan zui phei ta a. Thlalak chu a han hmet chhuak a, "Heng ho zawng hi ania." tiin min entir ta a. NAthana chuan uluk tak chuan a han en kual den den a, mahse Sangtei ang tak tur chu an vang kher mai.

"10 chiah chiah hi an ni em? Model ho hi..i la kim vek tak tak maw?" tiin Nathana chuan a han zawt leh a. "Aw la vek e, tumah ka hmaih lo." tiin Sammy-a chuan a lo chhang a. Uluk taka kan en hnu chuan Sangtei ang teuh ber chu kan hmu fuh ta, mahse ang han tih ah, an hmaifang chhete in a in anga, chuzawng chu a ni mai.

A pian zawng zawng nen, a vin nung sar mai leh a dul thep tak mai te nen enkawp chuan SAngtei a ni thei lo hrim hrim. An hmaifang chu in ang hle mahse, an hmel erawh a in ang lo. "Henu hi a ni ngei ang amah ang deuh an tih chu...midang chu an ni thei lo hrim hrim." NAthana chuan a han ti nuah nuah a.

"Nia..khinu khian a ang teuh ber a nih khi." ka lo ti ve bawk a. "Mahse a nilo, an hmaifang tlem a in ang ringawt. A hresual mai mai a ni ang, Sangtei a nih ka ring lo." MAxie chuan a lo ti a. "Sammy, ZAHAU FASHIONS neitupa hi i hria em?" tiin a zawt a. "Hria e, Pu Zonunmawia...Pu Zonuna." a lo ti hlauh mai.

"Khawi khua nge? Khawiah nge an company hi a awm? A number i nei em?"

"Chutia inhmelhriat tha chu kan ni lo...a number pawh ka nei lo. KA hre ve tawp, chuzawng chu.."

"A number lo neih tum rawh aw...engtik nge i neih hman ang?"

"Zaninah neih ka lo tum dawnnia, a har lovang."

"Ka lawm viau ang."

*************************

Sammy-a te in chu kan chhuahsan leh ta a, "Nathan, khanu kha Sangtei a nih i ring em ni?" tiin MAxie chuan a zawt a. "Ring chiah bik love.." tiin a chhang a. "I rin lohte chuan nge an Director number chu i duh kher a?" a ti deuh nung nung a. "Aww...khanu hming kha kan zawt ang chu.." a lo ti sam et mai.

"Hmm..i awih bik chuang lova, enge zawh kher angaih na?" a han la ti hram a. NAthana lah chuan, "Aww..thil har pawh a ni lova, a ho e. KAn zawt anga, a lo nih loh leh a nilo animai alawm." a han ti leh a, ka nuihza chu ka insum hram hram, an cute dun tawp. "I ring bik lo tiraw, Bella." tiin min rawn zawt ve leh a.

"Nia, keipawhin a ang chiah lo ka ti...Pi Kimi thiannu chuan an hmaifang a in an ve deuh avangin amaw a ti mai mai pawh a ni ve thei tho mai." tiin ka chhang a. "Engpawh nise MAxie, hetah apartment ah i lo riak dawn mi?" tiin NAthana chuan a zawt a. "Inah mahni chauhvin ka awm a, a nuamlo alawm..tunlai phei chu youtube ah thlahrang ka ngaithla nasa lutuk a, ka dawih lai tak a ni lehnghal." tiin a phun nuah nuah mai.

"Hlau chung chungin i ngaithla ziah thova, i thiante nen in riak ho amaw tia."

"Ka thiante kha an chhungten an phal tawh bik hleinem..chubakah mipa pakhat tal awmlova riah te chu a thlamuan thlak chuang lo ve emai."

Nathana chuan chhang lo chuan min en a, "Chaw lo ei ve nghal law law la, vawiin tlai chu.." tiin min sawm deuh thut a. "Aa..ihh, angai lo, ei lo..ei lo mai ang." ka ti bah deuh nuai mai. RAng lutukin Maxie chuan, "Nia...a bialpa pawn a ngai ve ang chu, i ti awm ang lo thei lutuk." tiin a lo nui a.

"Anih chuan lo va haw phawt la, ka rawn phone leh dawn che nia." a ti a, "Awle Sir.." tiin in lam pan chuan ka inkhalh haw ta a. Maxie khan min thik tih ka chiang lutuk, chubakah ala naupang chhia bawk sia, ka nuih a ti za angreng. Nathana pawh mi fel tak leh zaidam tak a ni chuan ka hria, la kal thui vak lo mah ila thawhpui a nuam dawnin a lang riau.

**********************

Zan dar 8 velah chuan ka phone chu a rawn ri ral ral a, Nathana a lo ni. "Hello Sir.." tiin ka pick up nghal vat a. "Bella, hei Pu Zonuna, Zahau Fashions Direction number chu kan nei tawh a. I lo phei thei angem? I han call ho law law ang u hmiang ka ti deuh va, lo phei ta che." a rawn ti a. "Awle Sir, ka lo phei nghal ange." tiin ka insiam nghal sawk sawk a.

Nathana apartment chu reilo teah ka thleng vat a, tichuan Pu Zonuna chu kan phone ta a. Vawikhat naah chuan a ring quit thak a, kan call nawn leh a. Rei ve a ring hnu chuan a rawn pick up ve ta hram a, "Hello, Zahau Fashions Director Zonunsanga.." a rawn ti deuh thlap mai. "Aww..Pu Zonuna maw..hetah Police lam atangin ania." NAthana chuan a han ti a.

"Police a? Nichin lawk khan Station-ah ka rawn kal tawh sia, enge ni leh ta?" a rawn ti ta daih mai. Mak kan ti lutuk chu kan in en hu a, "Stationah i kal zo chiah maw?" tiin NAthana chuan a zawt leh a. "Aw...ka rawn kal zawh chiah kha. Ka naute pawh thu in zawt fiah a, tunah lawk khan office ka thleng leh chiah." a rawn ti leh a.

Nathana chu a ngawi vang vang a, "Ka pu, ihh...i model te zingah, ka tih awmzia chu i naute zingah Sangtei tih hmingpu an awm em, LAlsangkimi?" tiin a han zawt leh a. "Awm lo..chutiang hming chu an awm hauh lo." tiin a rawn chhang leh a. Amah bawk chuan, "Engthil nge ni a? Police in ni tak tak maw?" a rawn ti leh a.

"Nakinah kan la rawn be leh ang che."  tiin Nathana chuan a dah daih mai. "Ka tih reng kha...midang an niang, Sangtei a ni lovang ka tih mawlh mawlh kha." MAxie chuan a lo ti bul bul a. Mahse NAthana chuan ngaihthatloh hmel tak hian, "Mahse tinge Police Stationah a kal si? Engemaw thil chu a awm chiang a ni." a ti nauh nauh va.

"Sir, Zahau Fashions chu khawi lai ah nge a awm reng reng a?" tiin ka zawt a. "A office tak chu Aizawlah chuan a awm a, mahse Lungleiah pawh Office an nei tho a ni awm e. Tunah tak hi chuan Aizawlah hian an Director hi a awm a, engpawh nise Stationah chuan i va kal teh ang u." tiin min chhang a.

*********************

TO BE CONTINUE