THE LAST PICNIC (MIZO FICTION HORROR STORY) Written by : Aaron Malsawmdawngzuala CHAPTER - 2

 THE LAST PICNIC

(MIZO FICTION HORROR STORY)

Written by : Aaron Malsawmdawngzuala

CHAPTER - 2

***************************************

Thlam kawngka atang chuan pa pakhat, kum 50 bawr vel awm hi a rawn chhuak a. A hmel chu a nelawm loh hran lem lo, mahse a meng dur khuih mai. Zodini te thian ho chuan an en thap mai a, chupa chu a rawn pen hnai a. A mal te te chuan a han en kual dan dan hlawm a, "Tute nge in nih a? Helai hmunah daih daih, enge in rawn tih a?" tiin a zawt hlawm a.

Ruatfela chuan inthlahrung tak hian, "Ka pu, englo ania. Kan picnic a, kan haw lam mek ania. Kan motor petrol a zo hlauh mai a, kawngpui atang khan hemi thlam pawna light hi kan rawn hmu a. Min tanpui theih takin kan tia, kan rawn kal ve tawp a nih hi...phone emaw, ahh...engtin emaw talin min pui thei angem?" tiin a han dil a.

Chupa chu a han ngawi vang vang phawt a, "Lo lut rawh u, pawn hi chu a him lo ania. Ramsa eng eng emaw te hi an la awm thin a, lo lut phawt teh u." tiin a lo chhang a. MAhse an lut mai lo, a bikin hmeichhe pathumte chuan an hlau ru ang reng khawp mai. Mahse chupa chu a han nui deuh sang a, "Hlau suh u, misual ka ni hleinem. Thingpuite kan lum anga, meilum ai tur pawh a awm ania." zaidam tak chuan a han ti leh a.

An thianho chuan an han inmelh deuh sap sap hlawm a, tichuan Ruatfela chuan a hma a hruai a. A mal te te chuan an lut ta diat diat a, kawngka chu a neitupa chuan a khar ri tuah tuah a. Inchhung an lut meuh chu a lum huk mai a, boruak pawh a zia ta khawp mai. Rin ai daihin a nuam lehnghal a, mahse engemaw tak chuan a rapawm riau hian Zodini chuan a hre tlat thung.

A thim khuih a, bang te chu a ung deuh rup lehnghal a. Putara chuan a zau deuh laiah chuan a ko khawm a, meilum bulah chuan thutnate chu a kawhhmuh hlawm a. Bang kila dawhkanah chuan mihring luruh ang tak mai, tam tak chu a inhung teuh a. Ruatfela chuan a en vang vang a, "Hei hi mihring luruh tak tak a mi?" a han ti deuh hu a.

Putara chu a nui huk a, "Ni love, a lem a nih kha. Thlam hi a cheimawi ve deuh va ka tia, chubakah a nalh ka tih zawk tak ania tiang hi. Ka lei vek a nih hi, nalh inti ve lo a mi?" tiin nui deuh var var chung chuan mipa ho chu a han melh kual hlawm a. Nui lui tih hriat tak hian Chhana chu a khi suk a, "Nia... a nalh alawm." a lo ti zawi sap mai.

Chhuatah chuan an thian ho chuan an thu khawm thap a, meilum chu an ai a, Putara erawh chu thingpui a lo lum mek thung, "In tam angreng sia, ka lo lum mek a. Ka'n lum belh ange, hahdam tak khan lo awm phawt rawh u." tih pah chuan a che sawk sawk a. An la ngawi thiap mai, "Zanin chu duhleh tah hian in riak ve mai ang nga, naktuk zingah ka unaupa a lo kal dawn a, mechanic a nia. Petrol a rawn la dawn hrim hrim a, chu chu in hmang mai dawnnia." Putara bawk chuan a han ti leh a.

Mei tuah, ri puak leh pep pep te, pawn lama thli thaw vuk vuk leh ketli a tui inchhung ri so bawrh bawrh bak chu thawm dang a awm meuh lo. An ngawi leh ta thap mai a, chutah Chhana chuan a aw a han thian kharh kharh a, "Ka pu, phone hman tur emaw...engemaw tal a awm angem? Kan chhungten kan awmna an hre awm si lova, signal kan nei bawk si lo nen?" tiin a han zawt a.

Putara chu a han ding ngil deuh at a, "Signal ka nei bik lo, ti hian youtube-a ka download sa thawnthu hi ka ngaithla mai zel a. HElai hi chu a reh in a fal em a, signal a awm ngai lo hrim hrim. Chuan current pawh ka nei chuang lo, in hmuh ang hian bati leh lartin leh in meilum ai lai kha a ni mai ka eng neih ve chhun pawh." tiin a lo chhang a.

Nunui chuan mangan hmel tak hian, "Signal awm bawk si lo, awii ka rilru hah eee." a lo ti vawng vawng mai. Zodini chuan Putara chu a han en vang vang a, "Ka pu, a thuhrimin helai ramhnuai pilril lutuk ah enge nangmah chauhva i tih reng reng a?" tiin a han zawt a. Nelawm tak hian Putara chu a han nui ang vur vur a, "Khai aww, ni dawn tak. Ka hming pawh ka lo la sawi lo a nimaw, Lalfamkima ka nia. Helai hmun hi kan huan ve ania, thlakhatah vawi khat vel chu ka kal ziah thin. Chawhhmeh te ka zawng kual ve thin a, ram riah hi nuam ka ti hrim hrim a. Chubakah, he kan thlam hi a nuam hi ka ti em a ni." tiin a han nui vel huah huah a.

Ruatfela chu rawn tawng chhuak veleh in, "Ihmaw ka pu, helai daih daih kan rawn thlenna chhan ber chu...ihh, sign board pakhat kan hmu a. SHORTCUT TO AIZAWL tih a lo inziak a, tumah chuan kan hre ngai lo. A chhan chu kan picnic na spot ah sawn a hma pawn kan kal fo va, mahse sign board kan hmu ngai miah lo. Hemi kawng rawn penna bulah khan a nia, i hre ngai em?" tiin a rawn zawt ve leh a.

MAk tih hmel tak hian Famkima chuan a khabe a han dawm vang vang a, "SHORTCUT TO AIZAWL a? Ava mak awm ve, helai kawng te chu ramhnuai deuh vek alawm. Aizawl a pawh lo hrim hrim, chubakah mi an kal vak ngai lo helaiah hian...sign board a awm ngai pawh ka hre lo. An dahthar ani mahna, mahse Aizawl a pawh chuang bawk si lo a...ava mak awm ve?" a ti nuah nuah mai.

Midang tawng leh hma chuan ketli chu a rawn so liam tep mai a, "E hei, a so ta e. Thingpui chu ka han siam hlawm ang che u, tikhan lo thu ru." tiin a tho thut a, a han che nghal sawk sawk a. No te chu a la ngah phian zui a, Zodini te thian ho an rawn kal dawn tih hre lawk ni awm tak hian a indaih thap leh nghal.

*********************************************************

Thingpui chu an in a, a ngai te ang bawk chuan an ngawi leh ta thap mai. Famkima chuan a thingpui sa ver vawr, a ken lai mek chu a han lem khalh a. A aw thian kharh kharh in, "Chuan...picnic chungchang te kha in sawi a. Eng ber maw in tih a, vawiin chu? In hmel enin ka fate pawh in rual pha lovang tih theih tur khawpin inla naupang si a, eng buaina chiah maw in tawh han sawi teh u." zaidam tak chuan a han ti a.

Ruatfela chu a han thu tha sauh sauh va, "Nia, hei...a zia lo khawp mai. Picnic turin kan kal a, a tir chuan engkim a pangngai vek mawle. Mahse kan haw lam kha kawng chanve pawh kan thlen hma in petrol meter ka han en a, a lo hniam ta lutuk a. A tirah, kan kal dawn khan kan thun full tep kha ania. A hnuah a lo leak tihte kan han hmuchhuak leh a, tichuan hei..hetah kan rawn thleng ta mai chu a nih hi." tiin a thiam ang tawk chuan an thil tawn te chu a han sawi fiah a.

Chhana chu lo tawng chhuak ve in, "Ramhnuaia kan rawn kal a, kan rawn tihbuai che a ngai ta mai chu ania. A zia lo khawp mai, thlahrang film a mite pawh kan ang zawk e a." tiin a rawn tuihnih ve bawk a. Famkima chuan a lu a han bu nghat nghat a, "Anih chu mawle awww, a zia lo tak hle mai. Engpawh chu nise, zaninah hetah lo riak ta ula... naktuk velah engtia awm zel nge in tum?" tiin a han zawt leh a.

An thian ho chuan an ngawi deuh thap mai, "Ihh..engmah thuthlukna pawh kan la siam chuang lo. Tihian khua var se, abak chu kan inngaihtuah chawp leh mai ang." tiin Nunui chuan a lo chhang a. Famkima chu chair ah a thu a, midang zawng chu chhuatah, meilum bulah an thu thung a ni.

Famkima chuan thutthleng chu a han ngheng deuh ar ar a, "Tunah dar 9 leh tlem chauh ala ni a, zan ala rei awm si a. Tumah kan mut a la chhuak dawn bik si lo nen, enge kan tih tak ang aww... khawhar in hnem phian lehnghal a. Ti hian ti teh ang u, thlahrang thawnthu kan hriat apiang sawi khawm ila. A hmunin a zir bawk nen, a mal te te in...a tha inti em?" tiin chawh phur chu a han tum ve ngial a.

Chu veleh Chhana chuan, "Thlahrang thawnthu sawi maw? Ka thiam alawm, ka lo sawi hmasa ber ang." tiin a rawn phur nghal khawp mai. Rinmawia chu lo ner sakin, "I phuah belh hnem thei si, i tawn tak tak pawh ni ngai hlei lo... a awihawm loh leh dawn emai." a lo ti hman pek a.

Chhana chuan rum tak hian a lo melh hraw a, "Animawww? Awle, a tha e. Anih chuan thil thleng tak tak ka sawi ang, chhuichhuah loh thil mak deuh ka sawi ang." a han ti ve ngat a. A thian dangte pawh chu an phur hmel kher mai, a aia chip zawk chuan an han thu khawm leh deuh va, tichuan Chhana chuan a sawi tan ta a.

****************************************

"Hei hi thil thleng tak tak, internet atanga ka chhiar a nia. Ka tiril a fan raih raih khawp mai, tun thlengin eng tak nge thil thlen dan an la finfiah thei lo bawk. China rama thil thleng a ni a, Beijing khawpuiah a ni. Kum 1995 a ni a, November thla niin khua pawh a vawt khawp mai. Yuanminyuan Garden atanga Xiangshan pan tur bus hnuhnung ber chu a rawn chhuak ve ta a. Chu bus number chu 375 niin passenger pawh an tlem tawh hle a, pitar pakhat, tlangval pakhat leh nupa tuak thar te chauh niin conductor lah chu hmeichhia a la ni zui bawk." tiin a thutna chu a han siam rem te te phawt a.

Thawk a han la deuh hak a, "Tichuan bus chu a tlan tan ta a, a tlan zel a. Rei fe an thlen hnu chuan passenger dang, kawng lakah lo phartu an hmu ta tlat mai. Bus driver chuan bus stand pawh nilo, chutia khaw kar kawnga an lo phar ding tawp chu a ngaihdan a ni vak lova. Phur loh tawp mai chu a duh hial hman a, mahse conductor chuan zan a rei tawh bawk nen, khawngaih hram turin a tih tlat avang chuan a phur ve ta hlawm a. Mahse chung mi pathumte chu an mak angreng viau mai, hmanlai chinese inchei dan,  Qing Dynsaty hunlai a an inthuam dan chuan an inthuam vek a. An hmel lah chu a dang var pup mai, bus chu a ding a. Tichuan chung mi pathumte chu an rawn chuang lut a." tiin a han ngawi leh dat phawt a.

Hriat chhunzawm chak tak chuan a thiante chuan an lo ngaithla tui tawh ngang mai, "Chung mi pathumte chu an chezia pawh mak tak a ni, a sir ve ve ami pahnihte chuan alaia mi chu an kuah a, a ke ah hliam a nei niawm tak hian a rawn bai chho auh auh mai a. Seat hnung lamah chuan an va thu a, passenger dang lo awm ve te pawh chuan mak an tih hmel kher mai."

"Tichuan bus chu a tlan leh ta a, mahse passenger zinga mi, pitar lo chuang ve chuan chung mi pathumte chu ava leh hawi leh zauh zauh thin a. A thla a muang hlawl lo, an inchei dan te leh an vun rawn dang var pup mai te chuan a ti hlau em em a. Conductor chu kovin a ngaih a that loh thute chu a sawi hial a, mahse conductor chuan film chang zo hlim an ni ngei ang tiin a lo thlamuan a." a sawi lai mek chuan Nunui chu a rawn inrawlh a.

"Zanlaiah, tlai tawh lutuk ah... mi pathum, Qing Dynasty hunlaia an inthuam dan anga inthuam... ava mak awm ve." a lo ti nuah nuah a. Chhana chu a lo nui suk a, "Chu tak reng chu alawm a hlauhawmna, an tawng miah lo lehnghal." tiin a inla sawi fu vel lutuk chu a han hawi kual vel a. "Sawi zawm zel rawh." Famkima chuan a lo ti a.

Tichuan Chhana chuan a sawi zawm leh ta a, "Tichuan bus chu a tlan zel a, reilote hnuah chuan khaw pakhat an thleng a. Chutah chuan nupa tuak thar te chu an chhuk a, pitar erawh a chhukna hmun tur la thleng ve lo mahse chhuk ve mai chu a duh rum rum a. A chhan chu khamite pathum kha a hlau riau a ni, ava hawi let leh thin a."

"Mahse a chhukna tur la ni ve hek lo, ngawi reng chuan a thu a. Tichuan bus chu a tlan leh ta a, thui fe an tlan hnu chuan pitar chu a awm a nuam lo tulh tulh mai. Chutah a ding thut a, bus ti ding nghal tur chuan driver chu a hrilh a. Midang pawh chuan an hrethiam lo kher mai, a chhan an zawh chuan chu pitar chuan passenger chuang ve pakhat, tlangval la naupan hmel tak mai chu kawkin a pawisa ru ah a puh ta mai a nih chu."

Mak tih hmel tak hian a thiante chuan an en thup mai a, "Tinge? Ngati nge chutiang chuan a tih rikngawt a?" tiin Zodini chuan a lo zawt vat a. Chhana chu a han thaw hak a, "Ka sawi dawn alawm, tlangval pawh chuan a hrethiam lo takzet. Conductor chuan pitar chu insum turin ti eng ang mahse pitar chu a thinrim hmel takzet, a ruk a nih thu chu a sawi zawm char char a."

"Tlangval hrilhhai lutuk chuan sawi mai tur pawh a hre lo, mahse pitar chu a ang nasa tial tial mai si. Chutah tlangval pawh chu a ngaihdan a ni ta bik lo, pitar chu dawt sawiah a chhuah chhal ve ta siah siah mai a. Boruak pawh a rit ngang mai, an inhnial ta bawrh bawrh mai a. Driver chuan a ning deuh ta khawp mai, chutia pawisa ruk chungchanga bus chhunga an inhnial reng dawn ai chuan chhuk mai tur chuan a hrilh dun ta a."

"Mahse tlangval chuan dawta puh a ni ngawt mai chu a thinrim em em a, a thiam loh a awm loh thu leh a chhuk ngawt nachhan tur a awmloh thu chuan a chhang let a. Mahse pitar chuan police station, an tlanna lai vela awm a hriat thu chu a sawi a. Tah chuan tlangval nen chuan chhuk dun a, sawifel a duh thu chu driver hnenah chuan a hrilh a."

"Driver pawh chuan bus chu a tiding a, tlangval chu a thinrim takzet. A bungruate chu la khawmin lungawilo tak chuan a chhuk ta a, pitar pawh chuan a zui ve bawk. Mahse an awmna lai hmun chu khawi police station mah a ni lo, bus stop pakhat bul mai chauh a lo ni a."

"Tlangval thinrim chu a ang chhunzawm bawrh bawrh a, rukru a pitarin a puh ta mai leh amah vanga an khua a haw theih loh tur thu te chu sawiin a ang nasa ngei mai. MAhse pitar chuan tlangval chu a mitah tak enin a nunna a chhanhim zawh chiah thu a hrilh ta mai a, tlangval pawh chuan a hrethiam lo takzet."

"A thil sawi awmzia a zawh hnu chuan pitar chuan tiang hian a chhang a, 'Khang mi pathum lo lutte kha, mihring an ni lo. Ka va en zeuh zeuh thin a, an pathum khan. Ke(feet) an nei lo hrim hrim, boruakah an thlawk ang mai a ni. Ke an nei lo, chuan anmahni kha an hmel kha a dik lo hrim hrim.' tiin mihring nilova thlahrang an nih thu chu a hrilh ta mai a."

"Tlangval chuan mak a ti kher mai, a hlau hnuhnawh kher bawk. Tichuan an pahnih chuan a rang thei ang berin police station hnai ber chu an pan a, an thil tawnte chu an report ta a ni." tiin Chhana chuan a sawi zawm zel a. Chuveleh Thantea chuan, "Engtin nge an awm zel? Enge thleng zel?" tiin a lo zawt leh vat a.

Chhana chu a han ngawi deuh vang vang phawt a, "A tukah chuan news ah bus number 375 chu mak tak mai a a bo thut thu chu puanzar nghal a ni a, a chin hriat lohvin a bo tawp ang hi a ni ber mai. Police te chuan rei fe an zawn hnuah, Police station atanga hla tak, dil pakhat bulah bus number 375 ngei mai chu chhar a ni a."

"Bus chu a lo kang chhe hneh hle a, mahse a chhungah chuan mihring tumah hmuh a ni lo. A lo ruak vek a, ruang takngial pawh hmuh a ni hauh lo mai a nih chu. Khang mi pathumte pawh kha hmuh tur an awm lo, a ruak hian a ruak vek a. A bul vel chu han zawng kual mahse, engmah an hmu chuang lo."

"Chuan, thil mak deuh pakhat chu.... fuel an han check chiah chu, petrol engmah a lo awm miah lo. Mahse thisen hlir a lo awm thung, chu chuan police te pawh chu a ti hrilhhai kher mai. Tichuan he thil thleng hi, tun thleng hian chhuichhuah a la ni lova, conductor leh driver pawh chu an bo hlen tihna a ni der mai." tiin Chhana chuan a thawnthu sawi chu a zo thei ta.

************************************************

Boruak chu a reh diak mai a, Chhana thil sawi zawh chiah chu ngaihnawm an tih hmel hlawm kher mai. Ruatfela chu a rawn tawng chhuak hmasa ber a, "A ngaihnawm kher mai, mahni chana han dah phei chuan. Ka mitthla zawng ringawt pawh hian ka rap, ke an nei lo tih lai vel tak kha a rapawm riau." tiin a han khi suk a.

Nunui chu a khur deuh dar dar a, "A mak hle mai, thil thleng tak tak a nih phei chuan. Bus hrim hrim hi ka ngaina tawh miah lovang ka ring, zana bus chuan phei chu ka ngam tawh dawn mawni le.." tiin a khi deuh suk suk a. Thantea pawh chu lo tawng chhuak ve in, "Keichu phuahchawp vel mai mai, China thawnthu pakhat ve mai chauh a nih ka ring. China ho phei hi chu rin an har, an product siam atang hrim hrim hian an lem tlat." a lo ti daih thung.

Puipuii chu a han ngawi vang vang a, "Thudik a lo ni ve tho maithei asin, khawvelah hian thil mak tak tak, sawi fiah theih si loh hi a thleng nasa ve thin ropui si a. A hrim hrimin, engber nge niang le? Khang mi pathumte kha, thlahrang nge, thlarau vakvai nge ramhuai zawk ni ang?" a lo ti ve nuah nuah bawk.

Chhana chuan a thingpui in lai chu a han tlak pup a, "A tak ngei chu an ti miau sia lawm, ka chhiarna pawh a rei ve leh tawh. Khawvel ram zauvah hian thil mak tak tak hi a thleng nasa ve tawh bawk a, keichu a sawitu ka nih vang pawh ni lovin.. ka awih lo hran lem lo." tiin a han khi leh deuh suk a.

Zodini chuan a aw a han thian kharh kharh a, "Anih leh conductor leh driver chungah khan enge thleng ta ang, enge in rin? Engtin nge an bo ngawt theih, an ruang takngial pawh an hmu lo chu a ni awm sia?" tiin a rawn tawng chhuak ve leh a. Famkima chu a rawn nui chhuak hak hak a, "Tiang thawnthu mak deuh deuh hi chu a tam alawm, a dik emaw dik lo emaw. A awmzia berah chuan he kan chenna khawvelah hian sawi fiah theih loh, hriatthiam loh tam tak a awm tihna a nih ber zawk chu." puitling tak chuan a han ti dam dap a.

Famkima chu an thianho chuan an en thap a, "Thil thleng tak tak pawh a ni thei a, pitar khan a hmu sual mai mai pawh a ni thei tho. Entirnan, accident satliah a ni thei a. Eng thil emaw vangin bus kha a kang pawh a ni thei, petrol aia thisen hlir lo awm an tih kha chu a thawnthu tih hlauhawm zual nana phuahbelh pawh a ni thei tho bawk." Famkima bawk chuan a han tih zawm leh zat a.

Rinmawia chu rawn tawng chhuak ve lehin, "I sawi dik chiah, Pu Famkim. Kan chhehvel ah hian thil mak chu kan hriat lohvin a thleng mek zel em tuman kan hre lo, han awih loh ngawt chi pawh a ni chuang lo." a rawn ti ve nuah nuah mai. Chhana chu a rawn nui chhuak a, "Aa. a ho emai, thawnthu pakhat, a taka thil thleng ti a an sawi ka hriat ka rawn sawi ve mai chauh ania. A nuam ve hrim hrim, hetia hlau rilru deuhva awmkhawm hi..hehe." tiin a han khi ang vur vur a.

Famkima chu a han thaw hak a, "Awle, duhtawk teh ang kha kha chu. Thawnthu pakhat a zo tawh a, tunge thlahrang thawnthu dang sawi tur nei le? Tunge a dawt ni dawn?" a han ti deuh lauh lauh va. An ngawi thap mai, "Keiman ka lo sawi ve thung ange." Ruatfela chuan a rawn ti chhuak hlawl mai.

****************************************************************

An zavai chuan Ruatfela chu an en thap a, Ruatfela chuan a sawi tan ta. An han thu bial leh thup a, "Chhana ang em em kha chuan a ngaihawm viau loh maithei, thlanghrang thawnthu ai mah chuan tawn hriat a ni zawk mah ang chu. Kan veng a awm ania, kan in nen pawhin a inhlat lutuk lo." a han ti te te phawt a.

Zodini hre chak tawh lutuk chuan, "Enge a? Engthil nge thleng?" a lo ti thawt thawt a. Ruatfela chuan thawk a han la te te phawt a, "Kum tam tak liam ta khan Pu Zoramliana hian in lian ve tak mai hi a nei a, a boral hnu khan chu in chu a ruak ta char char a. Mi thenkhat chuan a hrang angin an sawi thin a, mahse veng chhung chuan engah vak an ngai lem lo." a tih lai chuan Nunui chuan, "A hrang a? Pu Zoramliana thlarau chu a hrang tihna mi?" a lo ti ve leh hman pek a.

"Chu tak reng chu alawm, thlahrang leh thil mak dang engmah hmuh tak tak a awm bawk si lova. Hman atangin a hrang tawh tih thu a awm lo bawk, mahse a in hrim hrim kha a nelawm loh ve thlawt a ni. Ka haw kawng a ni zui bawk nen, tun thleng hian ala awm alawm chu in chu." tiin Ruatfela chuan a chhang a.

Thantea chu a lo nui huk a, "Truth or dare tih vel nan in hmang lo nia, a nuam phian ang chu.." tiin a lo fiamthu a. Ruatfela chuan a melh rum kher mai, "Kan hmang alawm, mahse truth or dare chu a ni chiah lo. Kha zan khan, khami zan kha ka la hre reng. Nikum lawk kha ala ni zui, kan venga ka thiante nen kan rui phur a. Va fiah kan tum a..." tiin a chawl dat a.

"A chhungah in lut maw?" Nunui chuan a lo ti hu mai. Ruatfela chu a khi suk a, "Lut ang chu mawle, zanrei kha kan han nghak ve ngei a. Dar 12 chu a pel tawh ang, khawlai pawh a reh diak tawh. Kan rui ve lutuk a, kan phone flashlight theuh kan on a. Kan luh hma kha chuan kan intihthaih vel a, kan uang nasa. Mahse kan lut chiah kha, boruak kha a dang riau khan ka hria." tiin Ruatfela chuan a chhang a.

Famkima chuan a lu a lo bu nghat nghat mai, "Tiang in luah loh rei tawh lutuk hi chu en ringawt pawh hian a hran duh hmel hrim hrim alawm, chuan... a chhungah chuan eng chiah nge in hmuh han sawi zel teh." a rawn ti chhuak ve bawk a. Ruatfela chu a han ngawi vang vang phawt a, "A chhung chu bal tak a ni, maimawm ril pawh a inzam nuai mai. Pu Zoramliana boral atang khan tihfai a ni ta miah lo tih pawh a hriat em em a, a rimchhe hle bawk. Kan kal kual a, inchhung chu kan fang kual zel a. Chutah thawm kan hre ta tlat mai a, pen thawm a ni. Mahse ui emaw, zawhte emaw thawm vel a nih kan ring mai a. Chutah kawngka chu amah in a rawn inkhar bur mai a, kan phu nasa kher mai." tiin a sawi chhunzawm zel a.

Zodini hlau deuh chuan Nunui ban chu ava vuan nghal a, "Eng... enge in hmuh?" a lo ti khur dar dar mai. Ruatfela chu a khi suk a, "Engmah, engmah chu kan hmu lo. Mahse a boruak kha a nuam tawh thlawt lo, kan ruih pawh a reh vek. Kan hlau ve ta deuh va, tichuan chhuahsan mai chu kan rilruk a. Mahse kawngka lam kan pan mek lai chuan aw(voice) kan hria a, KAL BO RAWH U tiin a rawn au vak mai a nih chu." tiin a chhang a.

An ngawi leh ta thiap mai a, "A hnu ah engthil nge in finfiah ta em?" tiin Chhana chuan a rawn zawt deuh thut a. Ruatfela chuan a lu a thing a, "Aih, tumah kan kal leh tawh lo. Chuan kumin kumtir khan in chu a tla bal a, tunah phei chuan a kaw huau tawh mai. Mahse zan ka len a, ka haw lam hian ka tlan pelh a ngai thin si a. Ka la hlau ve deuh thin, ka haw kawng a ni bawk si nen." tiin a chhang a.

*********************************************

Famkima chu a han thu tha sauh sauh va, "A chang chuan khawi hmun pawh hian hriatrengna a keng tel thin a. A bikin eng thil emaw a thlen phei chuan, chu ina awm chu thlahrang pawh a ni thei a, mihring, mi tihthaih ching mai mai pawh a ni thei tho." a rawn ti ban deuh charh charh a.

Ruatfela chu a han khi suk a, "Nia, a ni mahna. Mahse vawikhat mah ka kal tawh lovang, kha in kher kha chu ka rap emai." tiin a han nui huah huah a. Chutah Famkima bawk chuan, "He khawvel ah hian thil mak tak tak chu a awm a ni tih a ti chiang zualin ka hria, tuifinriat chhunga ramsa awm zawng zawng te pawh khu scientist te hian hmun za a then a hmun thum bak an la hmu chhuak hleinem." a han ti leh a.

Puipuii lah chuan, "A ni maw? Sangha species hrang hrang an hmu tam tawh sia, 3 percent chauh maw an lo la hmuh chhuah a? A van mak em em, ka awih lo eee.." a lo ti nuah nuah mai. Inla hre tawk hian Chhana chuan, "Ni ang chu mawle, i news lo thei lutuk." a lo ti deuh zek a.

Famkima chuan a kut a han beng ri thak a, "Khai le... hei zan pawh a rei ta. Sawi zawm leh ang u, tunge sawi ve leh dawn?" a han ti a. An in enkual hrak hrak a, "Zodin, nang sawi ve tawh ta che." Famkima chuan a han ti a. Zodini chu a ngawi vang vang a, "Aaaa... keichu sawi tur ka hre lo." a ti ta daih mai.

Thantea chuan nui chung hian, "Aww... phuah chawp tal la, kan sawi vek ang chu. Keipawn ka la sawi dawn, midang ka khek rih. Ka sawi tur hi chu a hlauhawm dawn ropui mai si a, a hlauhawm vak loh ho hian han sawi hmasa phawt teh se." a han ti vel deuh duah a. Mahse Zodini chuan, "Aaa.. ka hre lo tak tak, nangmahni khan han sawi leh mai teh u. A ngaihthlak lam hi ka duhtawk, sawi tur ka hre ve lo." tiin a lo chhang leh tlat mai.

Famkima chu a han thaw leh hak a, "Awle, a tha alawm. A nih chuan Zodini chu i kal kan phawt mai teh ang u, tunge a dawt leh ni dawn? Han sawi leh teh ang u, thingpui te pawh kan lum belh leh dawn nia. Khawvar hunah bak in haw thei dawn chuang si lova, tunge ni dawn le?" a han ti leh lauh lauh va.

Rinmawia chuan a aw a rawn thian kharh kharh a, "Ka rawn sawi ve ang aw, mahse in hlau dawn sia, ka sawi leh lo mai dawn mawni..." a rawn ti fiamthu a. Chhana lah chuan a nghawk sawk a, "Sawi tur i hre lo, nang khan. Movie vel ami bak sawi tur i hre lovang, phuah chawp ve dawn pawh ni la i phuah lem awm ropui si." a lo ti zek mai.

Rinmawia chuan rum fe hian a melh a, "Anih ka sawi ang aw, thil thleng tak tak sawi tur ka hre teuh alawm." tiin a lo chhang let ve nghal a. Nunui chuan ring deuh tak hian, "Khatin inhnial reng su, keiman ka sawi ang." a rawn ti ta reuh va. Midang pawh chuan an en thap mai, "Ehe, sawi tur i hre ve ami?" Famkima ber chuan a lo ti hu a.

Nunui chu a ngawi vang vang a, "Hre ve e, pakhat chu ka hre ve alawm. Mahse Chhana sawi ang kha chuan ka sawi ve thiam kher lo maithei a, a hlauhawm lem loh maithei bawk." tiin a chhang a. An thian ho chuan in enin an nui deuh tut tut hlawm a, "A nih chuan han sawi ta che." nui chung hian Ruatfela chuan a han ti a.

****************************************************

TO BE CONTINUE