THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 1

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 1

*********************

"Hmanhmawh ang aw, hei..kan tlai dawnnia. Assembly an lo neih hman tawh phei chuan kan nam rum rum dawnnia, engmah min man sak lo mahse kan rim atangin an hre dawn tho tho." tiin ka thianpa, kum 5 vel kan nih atanga ka partner in crime, Ruata chu ka tur deuh sek tawh mai. Ruata chuan a bag atanga Charminar (meizial) phawrh pah chuan, "Min lo tur sek lo teh, ka zuk loh chuan ka dik dawn lo." tiin min lo vin hlur mai.

Lighter nen chuan a la chhuak a, meizial chu a han tan khu hluah hluah a. Tlawn khat chu a bawm atanga la chhuakin, "Kha..mahniin lo lak ve mai tur alawm." tih pah chuan min pek a tum a. Mahse ka lo thun luh sak leh nghal vat a, "Tlawn khat kha inzuk tawm mai ang, hei tan hun a ni der tawh." tiin ka lo chhang a.

Meizial chu a han si vawng vawng a, "I ninawm emai, kan rim an hriat a min man ai chuan kan tlai law law mai dawn alawm. I dawih thei lutuk, zu ve duh tho si." tiin Ruata chuan min vin leh hrep mai. "Awww...min vaw dawn asin. A tlai ho chu teacher te ho bulah min din tir a, min vuak hrep hnuah beng min suk tir ziah bawk kha.." ka lo ti ve leh a.

"Beng min suk tir anga, min vua ang. Mahse meizial rim nam rum rum a kan va kal a nih chuan, kan nu leh pate an ko anga, khawnge i duh zawk?"

"Huiham, hnial lah hi i hrat zuah zuah bawk sia. Ti vat mai teh ang, ka chhungte beng a thleng ang tih hi ka hlau ber."

"Enge maw a thlen ngawt ang ni? Tunah min man pawh ni hlei lo, thianpa rilru huai ve deuh hlek hi neih ve a chakawm thin..haha."

"Zawnga, ve lutuk a che aw...keimah vanga inla pawr ngam mai mai i nih kha."

"Keima thu a inla pawr zawk alawm ka nih, hei a dawih zawk chu tunah pawh a hriat mai alawm."

"I ninawm, hnial hrat si. Taka...U Sanga te inhnuaiah hian kan zu ru leh tawp zel mai chu ania. An sawi deuh ka hria a nia aw...an ngawi mai mai zawk chu ania."

"Kha maw..i va han dawih thei tak, a ho teih teih lutuk."

"A ni ngawt lo a nia, an in a nia. Tunah an inhnuaiah kan zu mek a, ngaihtuah chiang ve ta che."

Ka thianpa Ruata hi a hmingpum chu Lalruatsanga a ni a, kan inrual chiah chiah a ni. Class 10 zirlai ve ve kan ni a, kum 16-na kan hmang ve ve bawk. Ka tette, han ti ve khanglang ila. Kum 5-6 vel lek kan nih atanga inkawm tawh kan ni a, kan chhungte thleng pawhin kan innel tlang vek tawh.

Kei hi Brandon Remruatpuia ka ni a, ka thiante leh kan venga min hrechiangtute chuan Brandon tiin min ko tlangpui. Tuna kan chanchin ka sawi hunlai a rei tawh a, internet khawvel in min la chenchilh ve lo. Mobile phone hrim hrim phei hi chu sap film ah bak kan la hmu lo, smart phone chu sawi loh, whatsapp te, instagram leh facebook te chu kan la hmelhriat lo hrim hrim.

 ***********************

School thlen hma hret chuan nidanga kan tih dan ang bawkin kan meizial pai te chu lung karah chuan kan dah thukru a, kan hriat chian theih nan a bulah chuan pangpar kan dah keuh bawk. "Chu..Sir tawng ri ka hria, assembly an nei tawh chiang mai." Ruata chuan a han ti su su a, rang takin kan tlan chho nghal a.

School chu kan va thleng ve ta a, rin ang ngei ngeiin assembly an lo nei hmak tak tak. Kan Sir strict zet mai, Sir MAwia chu assembly conduct-tu a lo la ni zui. Kan class ho dinna zawna va intlar ve kan han tum ve ngawt mai chu ring zet hian, "Lalruatsanga leh Remruatpuia...hetah lo chho nghal rawh u." a rawn ti vin thak mai.

Kan han ding chhuak leh ta nge nge a, "Tikhan ngawi reng khan lo ding ang che u." a han ti leh khur khur a, kan zirlai pui dangte chu nitina a sawi thin bawk chu hrilh lehin a han zilh leh hlak hlawm a, assembly a zo chu midang ho zawng an kal tawh a, kei leh Ruata leh Sir Mawia erawh kan la awm thung.

Kan pahnih chuan rum fe hian min han melh dun vang vang a, "Engvangin nge in tlai ziah a?" a han ti vin deuh hlur a. "Sir..ih..ka pheikhawk ka hmu zo lo va, kan lo tlai phah alawm." tiin Ruata chuan dawt a han sawi nghal zat a. Sir MAwia chuan min han en deuh hru a, "Anih nang? Ruata'n a pheikhawk a hmuh zawh loh avang chuan i lo tlai ve ringawt tihna em ni?" tiin min han zat ve leh a.

Ka chhan hma hma chuan, "Min rawn sawm a, kan rawn tlai dun phah a.." tiin Ruata chuan min rawn sawisak leh zung zung mai. Sir MAwia chu a han thaw deuh hak a, "Chungte chu nizan atang te pawhin in zawn lawk tawh tur alawm, khawimaw in ipte ka lo check teh ang." tih pah chuan min han dap dun a.

Kan bag te pawh chu a check deuh thlap, he zirtirtu lubawk hi chuan kan pahnih hi chuan min ngei deuh bik hrim hrim ni mai hian ka hre thin. Na vak lo hian kan kut phah ah min vaw ve ve a, tichuan class ah min luh tir ve ta hram a. Ruata hi chu a thiam thei lo ve pangngai a, kei erawh thiam thei lo chu ka ni lo nangin ka thatchhe thung a ni.

*****************************

Class ah chuan kan lut a, a hunlaia back benchers kha kan ni ve bawk a, a hnuhnung berah chuan kan va thu leh nalh a. Kan hma chiah a thu, thian inkawm ngeih zet mai, Puia leh Amos-a te chuan chhelo bawk an lo sawi leh tawh. An lo sawi tui em em khawp a, "Enge insawi a, kan mi lerh pahnih chuan?" tiin Ruata chuan a han zawt a.

"Vawiinah, new comer an rawn lut...class 8 ah, hmeichhe pahnih...an hmeltha dun reuh ania aww.." Puia chuan a ti vawng vawng mai. Ngaihzawng vawi khat pawh la nei lo leh neih loh chhan pawh luck loh vang nilovin, dawihzep vang leh bem ngam loh vanga single mek ta chu, "A ho emai." tih bakin ka lo chhang leh pek lo.

"Eee..i hre lo anih kha, pakhat phei chu tlema a sam tawi deuh hi ania..boys cut lek lek..a tawih zia aw.." tiin Amosa pawh chu a lo pawr pang pang hle mai. Diktak chuan hmeltha hi chu ka lawm ve a, hmuh ve pawh ka chak reng. Mahse a tawpah thiantha ah bak ka chhuah ngai tak tak lo, chuvang chuan midang kian leh phawt mai ang.

"Hmu ve la chu maw....i star ve tho vang." tiin Puia chuan a rawn tuihnih ve leh bawk. Ka khi suk ringawt, "Tunah kum bul kan tan dawn chauh ania, hmuhna hun tur ala tam emai." tiin ka lo chhang deuh hmuk a. Ruata lah chuan min rawn nghawk zeuh va, "Short Break ah en ve chhin ila, tiraw?" ala rawn ti su su zui.

Sir Mama a lo lut a, ani hi kan English teacher a ni. Ani pawh chuan class tan hma hma chuan Ruata nen bawk chuan min din tir leh a, assembly nan hman loh vang leh kan tlai avang chuan min han zilh tha ve leh phawt a, kan va han sual dun hmel thei bik tak. Tichuan class chu kan tan a, a explain mawlh mawlh a.

Class lak lai pawh chuan Puia leh Amosa chuan class 8-a new commer te pahnih chungchang bawk chu an lo sawi leh a, chhelo an ti ngang aniang. Sir Mama pawhin an titi lai chu a hmu fuh ta nge nge a, dawhkan chungah ala din dun tir zui. Eng ang taka hmeltha nge maw an nih fakau le tiin keipawh chuan ka hmu ve chak angreng ta kher mai, dawhkan chunga din ngai hial khawpa an sawi hmeichhiate chu tutak nimaw?

****************************

Short Break a ni a, teacher chhuah rual rual chuan Puia chuan ka hnungah a rawn beng ri awk a. "Kal ang, ka hmuh tir ang che." a ti nghal chung chung mai. Ruata nen chuan kan in en a, kan nui ringawt. Pawnah chuan kan chhuak a, class 8 room lam chu kan pan nghal a. Va dah deuh duk duk kha chu a lo zahthlak ve bawk nen, pawn atang chuan kan han thlek kual vel a.

Mahse chuti teh fakauva hmeltha tia sawi tur ka hmu lem lo, "A tu a te saw maw?" tiin ka han zawt a. "An chhuak tawh aniang, hawh u...sawlai velah sawn an awm ang." tiin Amos-a chuan min hruai phei leh a. Hmeichhe hmu tura something hmul pawh buk ve chhup tawh, chutia kan han vak kual reng mai chu a lerh thlak mange ka ti rilru vawng vawng mai.

Kan school compund hi a zau ve hle a, a hmun pawh a nuam khawp mai. Minute 5 dawn lai kan zawn hnuah chuan ka peih tawh ngang lo, "Hawh teh u...zun pawh kan zung hman dawn hleinem. Hei tunah minute 10 chiah kan nei leh tawh a, short break a rei lo si. Nakinah kan la hmu dawn tho, va zung teh ang u." ka han ti a.

Ruata pawh chuan a ning deuh tawh aniang, "Nia a ho emai, hmeichhe chhelo zawng mai mai a hun khawhral chu a uiawm." a lo ti ve bawk a. Amosa leh Puia te pahnih pawh chuan an lu an lo bu ve mai a, kan kal tur chiah chu ring tak hian Puia chuan, "Brandon, saw...saw mite pahnih saw alawm." a ti deuh vak a.

Pipu lam ka va en chu a sirah hian hmeichhe pahnih hi an lo ding dun a, ka thiante sawi ang ngeiin an hmeltha dun khawp mai. "A tute ber saw nge?" tia zawh a ngai lo reng reng, ka vawikhat hmuhnaah khan ka hre thei nghal. An pahnih khan an tha fal nalh, an intiat dun mai sia, an ngo dun bawk.

Pakhat zawk chu sam sei, ngo ve tak leh hmaifang tha tak a ni a. A mitmeng a fiah tha a, ka mit ala tak zet. Pakhat zawk erawh chu tha ve tho mahse samsei zawk chuan min hneh riau mai. A sam a tawi deuh bik a, a kir bawk. An pahnih chuan vai an ang lek lek hial a, a samsei zawk chu ka en ngun bik kher mai.

Ka lo en tui deuh aniang, "Hey..i chil lem rawh." tiin Ruata chuan min nghawk pawp a, ka harh deuh zuk hian ka hria. Nui chung hian Puia chuan, "Ka sawi reng kha...chhelo in ti dawn lutuk." a han ti vel ham ham a. Amosa chuan min rawn nek deuh talh talh a, "Tuzawk saw nge tha i tih?" tiin min rawn zawt su su a.

Keilah chuan inla pa tak hian, "An that vakna pawh ka hre lo, chubakah kan chang ve awm chuang lo emai." tiin ka lo fiamthu a. Ka lu a rawn kuk fawk pah chuan, "Khatia inlak pa vel kha angai lo, chilthli tla lo chauhvin i en vung vung kha mawle, kan hmu vek che alawm." tiin Ruata chuan min vin deuh zek mai.

"Kei chu sam kir zawk saw ka duh." Amosa chuan a han ti leh a. "Keichu sam sei zawk saw.." Puia chuan a lo ti ve leh a. Ka lo nui tawi deuh hmuk mai, "Eheu..min thik ami?" tiin Puia bawk chuan min han nuih vel a. "A duh awm lo che emai a.." ka lo ti deuh hmuk a. Tichuan kan chick pahnih te chu an kal a, dar a rik chhunzawm nghal.

**************************

Class lak leh lai pawh chuan kha hmeichhia, sam sei zawk kha ka mitthla ah a awm reng mai. A hming hriat ka chak takzet, sam tawi zawk kha chu hmeltha ve tho mahse min hneh lo bik tlat. Chubakah a hmel kha a thinchhiat bik hmel hrim hrim bawk, ka duh chi a ni lo ve tlat, amah pawn min lo duh bik miah lo maithei bawk a.

Ka rilru ah chuan a khat liam a ni ber mai, thildang ka ngaihtuah thei lo. School kal ti nuamtu tur chu ka tawng ve ta phawt mai ahh, mahse bialpa a lo nei reng angem tih erawh ka hlauthawng ru angreng phian tho bawk. Ka mitthla ah phei chuan kan inngaizawng der tawh a, kan inkiss leh der tawh bawk.

Kan class room atanga zun in pan phei naah hian class 8 room a awm a, chumi chhuanlam chuan kan Miss chu zun ka dil a. Ruata chuan a hrethiam a ni chek ang chu, min ner khum nasa kher mai. Tichuan kan class room chu ka chhuahsan a, zun in lam chu ka va pan ta a. Class 8 room chu ka thleng a, a ruk thei ang ber chuan ka han thlek kual a.

Mahse ka hmu mai lo tlat, a hnung lam tlar ho a hmuh theih miau silova, a hnung lamah an thu pawh a ni mahna. "Zun dil man ava awm lo e, ka zun lah chu a chhuak der mai silova." tia phun phei nuah nuah chung chuan zun in lam chu kan pan zel a. Kan school zun in hi inhnai takin pahnih a awm a, mipa zun in leh hmeichhe zun in a ni.

A chhungah chuan ka lut ve mai a, mak takin ka zung ve thei mai bawk. Ka chhuak leh tur chiah chu dim lem lo tak hian kawngka chu ka han hawng thuai a, a ri fawk mai. "Ana lutuk." tia hmeichhe au thawt ri chu ka hre chhunzawm nghal bawk. Inthiamlo tak chuan ka chhuak nghal vat a, "Ka tihpalh..." tih chiah ka sawi thei.

Zun in kawngka ka hawnna lamah chuan ka star thar, ka suangtuahna rama ka bialnu, kha samsei nu ngei mai kha na ka lo tawrh tir a nih chu. A chal a lo dawm vawng vawng a, a hmel ka hmu chiang lutuk kha tawng mai ngaihna pawh ka hre lo. Ka en deuh vung vung ringawt, tum deuh bur chung chuan min rawn en chho va.

A thiannu, samtawi zawk kha hmeichhe zun in lam atang chuan a rawn chhuak ve a. Kan lam rawn pan pah chuan, "Tinge a, Puipui?" tiin a rawn zawt a. A hming chu ka hre ta, Puipuii. Mahse a hmingpum erawh ka la hre lo, "Tluang, khawimaw i rawmawl ka lo hmang lawk." tiin a mit dawm chung chuan Puipuii chuan a dil a.

A thiannu hming pawh ka hre leh ta, Tluangi..mahse a tangkai vak lem pawn ka hre lo, ani kher chu. Tluangi chuan min han melh hrawk a, "I tauh ami?" a ti nghal deuh hlur mai. Ka rin ang chiah, thinchhe chi, a mitmeng atang reng reng pawhin a hriat vek. Zawi sap hian Puipuii chuan, "Aih..ana lo, keipawh kha ka lo enchiang lova." a han ti dam diai a.

Min va han hneh nghal vawng vawng em, a aw mawi zia kha. Chutah Tluangi chuan rum zet hian min en a, "Fimkhur ve tur che alawm..hawh Puipui, kal ang." tiin a hruai phei daih mai, teh zek chuan, kha mihringnu mai mai chuh. Ka ngei nghal kher mai, hmeichhia te te si. Puipuii kawm atan chuan ka duh pui lo kher mai, han ti ve nghal ngawt ila.

***************************

Lunch Break a ni a, kan meizial thuhrukna lam pan chuan liam thla leh ta dial hlawm a. Kan lak fel hnu chuan building hlui hnuaiah chuan kan zu ru sap sap hlawm a, kan titi a. An hming ka hre ve ve tawh tih erawh ka la hrilh duh hauh lo, ka la zep tlat dawn. Ka thiante chuan an pahnih chungchang bawk chu an sawi leh a, mahse kei erawh ka ngawi reng thung.

Ruata chuan min rawn nek sawk a, "Nge i ngawih reng a? Short Break lai kha chuan mit tla lo chauhvin i en kha ania, enge engmah i sawi veleh silohva tunah?" tiin min vin deuh hlur a. Nui chung hian Puia chuan, "Sam sei zawk kha a star a, keiin ka lo star ve sia, min thik deuh a nih kha." tiin a lo fiamthu a.

"A dream leh mek aniang chu..." tiin Amosa chuan min rawn fiam ve bawk. Intithei deuh tak chung chuan, "In thianpa hi maw, mi ti mai mai suh u. Ka che rang ania, an hming ka hre ve ve tawh aw.." ka han ti deuh ham ham a. "A awihawm loh emai, daw heh lutuk." Ruata bawk chuan a lo ti nghal hlur mai.

"Ania lawm mawle...in duh leh awih lo ula.." ka lo ti ve ngat a. Puia chuan min rawn pan hnai a, "Anih leh a samsei zawk, ka star....oh...kan intawm kha, tunge a hming?" tiin min rawn zawt su su a. Confi tawk hian, "Puipuii.." tiin ka lo chhang a. "Anih sam kir zawk kha?" tiin Amosa chuan min rawn zawt veleh a.

"Khanu kha chu Tluangi, a thinchhe si." ka lo ti deuh hmuk a. Ruata chu a khi suk a, "Engtin nge a thinchhia tih i hriat?" tiin min rawn zawt nghal vat a. "Aww..a mitmeng atangin a chiang reng alawm." tiin ka lo chhang leh a. Nui chung hian Puia chuan, "A fing thei bik sia maw?" tiin min lo fiam a, kan han nui leh dar dar a.

Kan zuk zawh hnu chuan school compound ah chuan kan kal kual a, kan titi a. Class hniam zawk te chu an infiam a, an tlan nasa. Mahse keini thian ho erawh inla tlangval ve deuh reuh tawh si, infiam pawh infiam peih ve tawh lo ang deuh reuh kha kan ni a, kan kal kual reng ringawt thin.

A ruk chuan ka zawng ru reng tho va, mahse Puipuii hmel reng reng ka hmu lo. Break a zo va, class-a kan luh hma chuan kan han zung leh phawt a. Hmeichhe zunna lam chu ka va thlek leh deuh vak vak zel a, a chhan pawh engdang a ni lo, Puipuii kha ka hmu leh chak a ni. Ka thiante zun zawh vek hnu chuan ka han awm khaw tlai leh deuh va, zuninah chuan ka lut a.

Lunch Break zawh veleh a ka ei tur liau liau va ka stock, ka kawnghren a ka hren hnan, TIRANGA bawm khat chu ka han phawrh chhuak zal zal a, thiante nena ei chuan kham loh ana bawk em a ni. Ka ei zawh hnu chuan ka chhuak leh a, hmeichhe pakhat nen kan insu chawrh mai.

A tlu tep a, ka dawm hman hlauh. Mahse chu ka hmeichhe sut ber kher chu kha mihringnu, ka star thar Puipuii thiannu Tluangi bawk kha a lo ni. Rum zet hian min melh leh a, mahse min be miah lo. "Ka tihpalh lutuk." tiin thupha ka chawi nghal a, enge a sawi erawh ka hre lo nangin sawi chu a nei chiang a ni.

Min ngei hmel deuh chuan min kal pel a, a phun phei nuah nuah mai. Ka ngeina a zual, ka va han beng chak reuh tak. Class ah chuan ka lut a, Puipuii chauh nilovin a thiannu Tluangi pawh ka ngaihtuahnaah chuan a awm reng mai. A chhan chu ka ngei em vang a ni ber, ka haw so bawrh bawrh, ve khanglang chuan a.

**********************************

School kan bang a, a ruk chuan Puipuii chu ka zawng leh ngat ngat mai. Mahse ka hmu mai lo, bus bul velah te chuan ka kal kual vak a. Ka thiante pawh ka ngaihsak thei lo, he mihringnu Puipuii hian ka suangtuahna ram hi a thunun tlat a ni. "Hey..tinge i vei kual sek a, haw ang u." tiin Ruata chuan min rawn vin leh zek mai.

Kan school leh kan in hi km 1 vela hla a ni a, ka thiante nen pawh inhnaih tak tak ah kan awm a, veng khat vek kan ni. Kan school hian bus 2 lai chu a nei ve a, mahse kan thian pali erawh hi chuan kan chuang ve ngai lem lo, ke in kan haw mai zel. Kan kal dawn tep ah chuan Puipuii chu ka hmu leh hlauh mai, bus sirah chuan Tluangi nen chuan an lo awm a.

Kal mai lo chuan ka han en leh vang vang a, ka thiante chuan min kalsan tawh. Chutah a rawn hawi let ve ta, kan mit a intawng fu chiang lutuk. Kan in en deuh char char a, zak chung chung chuan inla Salman Khan tawkin ka han nui khi deuh sak a. A zah hmel kher mai, hmundang a hawi sawn nghal.

Tluangi chu a titi mawlh mawlh a, eng chungchang nge a sawi phei chu ka hre pha hauh lo. Chutia a thusawi lai a ngaithla lo nia a hriat hnu chuan kan mi thinchhia Tluangi chuan min rawn melh ve leh ta khur mai, hmeltha mahse ka haw ngawih ngawih. Ka nui hmel pawh chu a dang ve nghal, enge maw ni tak chu a sawi ngei alawm Puipuii bulah khan.

Eng tak nge a sawi chu hre lo mah ila, ka chungchang chu a sawi chiang lawm. KA hrethiam vek, hre pha lo mah ila. Ka lung ni vak bik lo, Puipuii nena kan inkar ah hian a hnawk dawn riau hian ka han hre nghal ringawt a. Ka en zui peih tawh bik lo, Puipuii chu a la vin titih deuh lehnghal emawni.

Lehlam ka hawi ve hmak a, ka thiante chu ka va um zui nghal a. Ka kal pah chuan hawi let chu ka chak ngei mai, mahse kha sihal Tluangi kha a awm ve tlat bawk si. Hmeltha lo ni ta se, hmelchhe ve tak ni phei se chu ka bin nghal duh ang. Mahse a chhelo ve tho va, a pian pawh a nalh angreng hle bawk.

Ka kal zel a, "Aww...ava muang thei bik tak...lo tlan rawh." tiin Ruata chuan min rawn la vin vak zui. Ka kal zel a, "Umm..engpawh nise han hawi let leh hrim hrim teh ang." ti rilru chung chuan ka han hawi let leh hram a. Amak lutuk, min lo la en reng nia mawle. Mahse ka hawi let tih a hriat veleh chuan lehlam a hawi leh nghal vat a, Tluangi erawh rum zetin min la rawn en hram nia mawle.

*****************************

Inah chuan ka haw a, ka nu chuan chhuat a lo nawt mek a. KAn chhungkua hi han sawi ve leh lawk ila, ka nu leh ka pa leh ka nau mipa, kum 14 mi nen kan cheng ho a ni. Ka nau lah hi pneumonia avangin school a chawl mek a, an duat bik lutuk hi damdawiin a awm duh loh chuan in lamah ka nu hian a enkawl chawt a ni ber mai.

Insawitheihna nilo se, ka pa hi private company pakhat, RALTE INN tih neitu ber hi a ni a, GEneral Manager a ni bawk. Pathian zarah kan khawsa ve thei a, ka nu hi house wife pangngai ni mahse ka pa hlawh hi kan ei seng lo a ni ber zawk ti ta ila kan sawi sual awm love. Zep lo chuan kan rethei lem lo, khawsa ve thei tak kan ni.

Ka nu hming hi Lalhmingmawii a ni a, Nu Mawi tiin ka thiante leh kan venga mite chuan an ko mai thin. Ka pa hi Zoramliana a ni a, Pu Ramliana tiin kan vengah chuan hausa lar a lar ve pawl tak a ni. Ka nau hi a hming chu David Lalchhanchhuaha a ni a, David tiin ka ko mai a, ka nu leh pate erawh chuan bawihte an ti bik, kei erawh chu a chang phei chuan ka hmingpum ten min ko thin.

Ka nau hi class 8 zirlai a ni a, a thiam thei lo ve hle. Class 8 zirlai a ni a, kan school luhna erawh a in ang lo thung. Unau inngeih tak chu kan nilo ve chiang alawm, kan insual zing ve thei lutuk. Mahse ka chhan ve viau thin chuan ka hria, amah hi u te zahna chang hre lo hi a ni ve hrim hrim a, a nghal ve thei reuh lutuk.

"Ke bawkin em ni i lo haw?" tiin ka nu chuan min lo zawt a. "Aw ni e, ke bawkin.." tiin ka lo chhang a. Ka nu chuan a chhuat nawh lai dah meuh chuan min han en a, a kawng dawmin, "Bus te hian lo haw ve mai thin la, bus fare kan chawi tel vek tho sia, a ho thin ngawt mai." tiin min han vin deuh hlur a.

Mahse ka chhang lo, ka nu'n min hauh hian ka chhang ngai lem lo. Ka room ah chuan ka lut tlang a, ka inthlak nghal a. Ka nau Davida nen hian kan unauvin room hran min siam sak a, a chang chuan kan ti hnawk ve thin khawp mai. Ka inthlak pah te pawh chuan ka rilru ah chuan Puipuii hlir a lang a, ka vei ngawih ngawih.

Mahse loh theih lovin Tluangi pawh a lo lang tel ve zel, a chhan chu ka hmelma lian ber ni mai hian ka hria. Puipuii kha a veng ni ber hian ka hria, ka ngei tlat. Ami chhan dan te, min melh dan zawng zawngte khan ka pawi a sawi tlat. Mahse Puipuii hmel ringawt chu ka mitthla ah a lang zel a, tiang em em a hmeichhe duh ka neih ngai pawh ka hre lo.

Star te chu ka lo nei ve nual tawh thin, mahse zun chhuak miah lo zun chhuak anga insawi a, teacher te dil a, an class va dah duk duk hi midangah ka la nei ngai lo. Ni e, Puipuii khan min hneh thlawt, naupang viau e tilo chuan thil hi ka hre hnemin ka tawng hnem ve tawh a, ka lerh viau anga min lo ngai a nih pawhin ka dem lo che u.

************************************

ZAn a lo thleng a, kan home-work neih ang ang chu ka han ti ve zung zung a. Mahse ka mitthla ah chuan a khat tawk mai pawh nilo, minute 1 danah zel chuan Puipuii hmel hlir a lo lang zel mai. Ka vei takzet a ni, zep theih pawh a ni lo. Mahse ka ngaihtuah ruala a thiannu Tluangi hmel lo lang ve zel erawh chu a hnawksak khawp mai, tum lo eng ang mah ila a lo lang vel zel.

Puipuii nen hian lo inngaizawng ta pawh ni ila, a hnawk dawn lutuk. A ven hian a veng bur nimai hian ka hria, nikhat chiah la inhmu mah ila Tluangi mizia tur awm ang kha chu ka hre thei nghal vek. Inngaihzawn mai nilo, ka hming pawh  ahriat ve hma ham chuan kei misual hian ka vei nghal ngawih ngawih mai chu ania, ka duhzawng tak kha a ni ve miau a.

By-heart tur engmah home work min pe lo zawk a, ziah chi a ni hlauh va ka ti thei mai mai. By-heart chi chu nise ka rilru ah a lut dawn lo chiang lutuk, Puipuii bak ka ngaihtuah lo. Hla thu thiam tak chu ni ila a hehsen mawi tak leh a chhingmit meng mawi chuti khati tia han tlak duah ka chak ngei mai, ka thiam ve der silo.

Chutia ka home work ka ziah mawlh mawlh lai chuan ka pa a rawn lut thut mai, min la melh no lo em em mai lehnghal. "Remruatpui, vawiin i tlai leh animaw? I chhuah hma hma nen, in Sir Mawitea'n min rawn phone zo chiah." a rawn ti deuh khur khur a, huiham..Sir MAwitea tak hi chu ava han tul lo thei tak.

Heta min rawn phone a tih hi mobile phone atang nilovin, landline telephone atangin a tihna a ni, sawi tawh ang khan mobile phone Mizoram ah a la awm ve lo. Ka lu thak lo pui chu hiah nauh nauh pah chuan, "Nia..ihh..kan..kan kal muang deuh alawm mawle." ka han ti ringawt a, fathera bulah hi chuan dawt sawi pawh a zam awm bik thin teh asin.

"Thil sual in ti te hi a ni lo maw?"

"Hmm..engthil sual maw..ngawt ngawt a.."

"Ngawt ngawt a ni lo, ahma pawn a sawi fo in Sir Mawitea hian, school ah pawh a luhlul pawl a ti che."

"Awihawm loh emai, teacher dangte pawn fel min ti ve emai, chubakah Sir Mawitea hi chu a strict over thei ve hrim hrim alawm."

"Bus fare thlengin fee ah kan chawi tel vek a, ke hlirin i kal tho va, ke bawkin i lo haw leh a..chutah complain ka dawng reng bawk..a hahthlak khawp mai i awmdan hi.." tih pah chuan min chhuahsan leh daih mai, Sir MAWitea mai mai chu awww....ka tlangval ve deuh hunah ka sawisa dawn chiang alawm.

"Au Brandon, an man che ami vawiinah?" tiin ka nau, ka nu leh pate'n an duat sual, DAvida chuan min la rawn zawt zui. Rum fe hian ka melh a, "Man lo man lo..lo ngawi mai mai rawh." ka ti vin hlur mai. Mood fuh loh nen, lo tawng ve sek mai. KA home-work chu ka ti zova, sana ka en chuan dar 8 a pel der tawh mai.

Ka room atang chuan chhuakin, "Dawrah ka kal lawk dawn ania, ka rei lovang." tih pah chuan kawngka lam chu ka pan phei nghal a. A hma zawng pawha kalna hun awm reng, ka kal veleh a min tir ziah thin, ka chunnu duhtak mai chuan, "Lawk aw...kha Kuhva cheng 10 man min lo lei teh." a rawn ti leh ta nge nge a.

DAwrah chuan ka kal a, ka chance neih ve theih chhun chu bawhpelh ka tum lo. Meizial chu a loose in ka lei a, Pa Thanga te in bul zunin phenah chuan ka va zu ru hlat hlat mai. Tichuan inah ka haw leh a, ka nau Davida chu a lo muhil der tawh. A tuka hak tur ka form te chu ka nawt lawk thlap a, Puipuii hmuh leh hun nghakhlel tak chung chuan ka muhil ve ta hram a. 

************************

TO BE CONTINUE