THIRTY AND FLIRTY Written by : Aaron Malsawmdawngzuala (ROMANCE - THRILLER - COMEDY) Chapter - 2

 THIRTY AND FLIRTY

Written by : Aaron Malsawmdawngzuala

(ROMANCE - THRILLER - COMEDY)

Chapter - 2

****************************

A tuk ka school kal tur pawh ka phur turh turh khawp mai, nidangah peih lo chung chung a insiam thin kha, Puipuii hmuh leh chakin ka pheikhawk te chu ka brush tle hlarh hlarh khawp mai. Dar 9:30 kan tan a ni a, ka han insiam zawh meuh chuan dar 8:30 bak a la ni lo. Chutia ka insiam mek lai chuan ka pa chu a rawn lut a, ka bag ah chuan ka lehkhabute chu ka khung mawlh mawlh a.

Ka pa chuan DAvid-a chu pawisa pek pah hian, "Kha aw, chhunah i ril a tam chuan i duh duh i lo lei mai dawnnia." tiin cheng 100 tlang chu a dah a, ka awm lai kher lehnghal. Chutah rum fe hian min rawn melh a, "Bus in kal tawh ang che, ke-a i kal chuan eng eng emaw thil tha lo in ti kawi a, in tlai ziah." a ti khur khur mai.

"Mahse pa, Ruata'n min nghak.." ka sawi zawh hma hma chuan vin deuh tak hian, "Ruata Ruata tih a ngai lo, bus fare kan chawi vek tho, niminah pawh i nu nen kan sawi tawh kha. Bus-in i kal ang, Bus-a i luh a in tlan liam hma loh chu ka kal lovang keipawh." a ti ta hmak hmak mai, ka nau nena min biak dan chu a in ang lo teh e.

Hnial ngam tawh hek lo, tum bur chung chuan ka chhuak a. Bus chu ka chang ta a, ke a kal ka chak zawk asin le. Kum 6 chuang kan school ah hian ka lut ve tawh a, kan school bus ah hian haw leh a ni emaw, kal lam a ni emaw, ka la chuang ve ngai eih lo reng reng. Sport-na velah chuan ka chuang ve tawh maithei, a bak chu ka chuan awm ka la hre lo.

Dar 8:50 velah chuan bus chu a rawn thleng ta a, kan bus driver Pa Thana pawh chuan chutia bus ka lo chang ve khiah chu mak a ti deuh nge ni, min en vung vung mai. Min tlan pel deuh thuak lehnghal a, "Kal rawh..va kal rawh." tiin ka pa chuan min lo tur chiam bawk a. Bus chhunga ka luh thleng chuan ka pa chuan kawngka bulah min lo la en run mai, a strict chang hi chuan a over thei ania.

*************************

Bus chhungah chuan ka lut a, ka vawi khat chuan ve khiahna a nih vang nge ni, min lo en duh hlawm hle mai. Thutna awl ka zawng kual nghal a, hnung lam thutna ruak pahnih lo awm chu ka va chuh tharh a, ka bag pawmin hahdam tak chuan ka han thu a. Kan tlan zel a, rei pawh kan la tlan lo tih ah chuan kan ding lehnghal a.

Kan veng thenawm chiah a la ni ang, kan la tlan thui lo emai. Ka rilru ah Puipuii hlir a awm vang nge, tutu nge lo lut thar pawh ka lo ngaihtuah lo hrim hrim. Chutah ka han hawi chhuak a, ka suangtuahna tho amaw ka la ti hman hial dawn alawm mawle. Amah Puipuii ngei chu a lo lut hlawl mai a, ka lam panin a lo la phei mek zui.

Min hmu chu a phu deuh zuk a, rang lutuk in ka lo tawlh phei nghal. Inla gentleman tak chuan, "Lo thu rawh..hei ka bul hi ala awl." ka lo ti deuh hnap a. A lai lek lek, a lai hmel mawlh mai kha, a duhawm khat tlat. Rawn thut ve mai chu a tum a, mahse chutih lai tak chuan kan hmelma nu, Tluangi, ka mi huat em em kha a rawn lang leh ta tlat mai.

Puipuii hnuglam atang chuan, "Pui, helai hi a awl, thu rawh." a rawn ti a, hmundangah chuan a thuttir ta daih mai. Ka va ngei thin tak em, ka thinrim lutuk chu ka sa deuh pup pup hial in ka hria. Chutah amah Tluangi chuan min rawn melh a, min la rawn pan zui. Zak hauh lo chuan ka bulah a rawn thu a, a melh pawh ka lo melh peih lo.

Tichuan kan tlan leh a, kan ngawi dun reng. "Min biak loh chuan ka va han be awm bik lo e aw.." tia inngaihtuah nuah nuah pah chuan Puipuii chu ka va melh leh zeuh zeuh thin a. School kan thleng hnai ve deuh tawh tih ah chuan, "Brandon-a tiraw i nih khah?" a rawn ti thut mai a, ka phu tep nghe nghe.

"Aw..ihh, ni e." ka ti bah deuh nuai a. Ani lah chuan confi zet hian, "Anih chuan U Brandon ka ti mai ang che aw.." a han ti leh a, a chhan pawh ka chhang peih lo. Za lo tih hriat tak chuan ka khi lui deuh suk a, tukverh lam ka hawi san lehnghal daih. Second 10 vel kan ngawih leh vang vang hnu ah chuan, "Ka hming chu Lalnuntluangi a nia." a rawn ti leh a.

"Ka hria lawm." ka lo ti deuh hmuk. Min melh deuh khur a, "Engtin nge i hriat?" a han ti deuh hlur a. "Niminah i thiannu Puipuii sawn a koh che kha, ka hre ve alawm...beng ka nei ve a.." ka han ti ve deuh kher a. A nui lui ve sak a, "E ni tak, nimina fimkhur lo deuh kha i ni tak." a han ti deuh kher a.

"Enge ka fimkhur lohna, a awm tih ka hre hleinem."

"I fimkhur loh vang a nih kha...engmah pawh ngaihtuah chiang lovin i hawng pawp a.."

"Ka tihpalh ka tih tawh kha...ilo la la na viau ami?"

"Kawngka biangah khan perek zum te lo lawr se, Puipuii chalah te khan tlum lut palh ta se, chu chu i duh ami?"

"Em em ache, i ngaihtuah thui emai a. Saw a that reng saw, ka tih fuh palh lai pawh i hmuh ve tawp loh kha."

"A ri pawp kha ka hria alawm, chuvang alawm rang taka ka rawn chhuah nghal vat ni."

Ka nui huk, "Umm anih chuan tihpalh, a thleng leh tawh ngai lovang." tiin ngaihdam ka dil nawn leh a, kan ngawi dun leh vang vang mai. School kan thleng tep tawh a, gate pawh a lo lang thei tawh. A khat tawk chuan Puipuii chu ka va melh leh zeuh zeuh thin a, chu chu Tluangi chuan a lo hmuh hmaih hauh lo.

"I huh i khawhral mai mai ang, U Brandon..try duh suh?" a rawn ti chhuak leh thut mai. "Engmaw? Enge i sawi awmzia?" ka lo ti deuh hu a. Puipuii chu ava melh ve a, "Puipuii saw, Lalrempuii saw, i duh tih ka hria." a han ti leh a, sawi mai tur pawh ka hre lo. Mahse a hmingpum ka hriat phah leh ta, a lawmawm tho ve.

Ka chhan hma hma chuan Tluangi bawk chuan, "Ihmaw, anu leh pate saw an strict lutuk, chubakah amah a lerh lo sia, i try thlawn mai mai ang." a han ti leh zuah zuah a, bus chu a ding a. An chhuk sap sap a, Tluangi chu a ding a. A kal hma chuan min rawn melh leh a, "Mahse i duh viau anih chuan ka lo tihpui ang che." tiin a nui suk a, a chhuak ta a.

***************************

Class room ah chuan ka lut tlang nghal a, ngaihtuahna a kal thui deuh reuh khawp mai. Ka ngei em em Tluangi berin ka tihpui ang che a ti bawk si, mahse a rintlak loh hmel bawk si. TEacher Dawhkanah chuan ka home-work chu ka submit a, ka thiante pawh tumah ka kawm hman lo. Keimah chuan ka thu a, Tluangi thil sawi chu ka bengah a ri nawn sek mai.

Dar a ri tep tawh tih ah chuan thlan hluam hluam hian Ruata chu a rawn thleng ve a, "Zaw..Zawnga, nge..nge min kalsan?" tiin a rawn thaw hlawp hlawp mai. Ka nuih aza angreng, "Khai...kha, i lo tlan ami, i huh vek alawm." ka lo ti a. Ka bulah chuan a rawn thu a, "Engin nge i kal a?" tiin min zawt leh a.

"Bus-in."

"Bus-in a? Ehe, ngati teh thut nge?"

"FAthera'n a ti tlat a, ka insiam hma tehreng nen...ka hnial ngam silo alawm."

"Tinge..i mark a chhe viau ani maw?"

"Chhia ang chu, Sir MAWitea khan a lo sawi leh tawh a."

"Huiham..keipawh ka pa bulah a lo sawi alawm, hmeichhia ang mai tawngthei lutuk."

Chutia kan titi bawrh bawrh lai chuan dar a ri a, assembly nei turin kan chhuak khawm ta a. Assembly lai pawh chuan a kha tawk chuan class 8 ho chu ka va thlir leh thin a, Puipuii hmel chu ka dinna atang chuan lang chiang tak a ni. Min rawn melh ve tho angem le tih mai mai te chu ka ngaihtuah a, ka vei ngawih ngawih hi a ni ber mai.

VAwikhat ka va melh leh chu chiang em em hian min rawn melh ve chiah a, kan mit a intawng fu ta. Kan lai dun tih ka hai lo, hmundang kan melh dun nghal vat. Ka mit sir chuan ka va melh leh hram a, a biang a lo sen tai hlar mai, a zak hle ni tur a ni. Min melh dan atang chuan kan boruak chu a fuh tan chho dawn riau hian ka'n hre nghal ngawt a, Tluangi hian a ti tak tak anih chuan Puipuii chu ka bialnu a ni hnai tihna a ni mai a.

******************************

Short Break a nih veleh chuan rang lutukin zun in lam ka pan phei nghal a, class 8 room ka kal pelh pah chuan ka va hawi zeuh va. Puipuii chu ka hmu chiang hman lutuk tlat, mahse en zui vung vung duh lovin zunin bulah chuan ka va ding a. A chhuah hun chan ruk pah chuan ka bula mite, ka kawm ngai lem loh te chu ka han be vel chiam a.

Minute 1 hnu velah chuan a rawn chhuak ve ta, Tluangi nen bawk chuan an rawn inkai chhuak leh a. Min rawn hmu chu a nui deuh put put mai, chutih rualin Tluangi pawh chuan min rawn hmu ve bawk. Hmun dang ka hawi sawn phal lo, kan mit chu a intawng fu leh ta chat mai. Nimin ai khan ka hmu tha hial in ka hria, lo biak ngei chu ka tum a.

Mahse a rawn thleng hnai telh telh a, ka lai tulh tulh zawk mai. Tluangi lah chuan min rawn nuih put put leh ta nghal a, ka hik chhuak vekin ka hria. A tawp a tawpah chuan ka be lo leh ta nge nge e, min rawn kal pel a. Ka din ngai chuan ka la ding reng a, "Zung hmasa rawh, ka lo nghak ang che." tiin Tluangi chuan Puipuii chu a luh hmasak tir a.

Tichuan ka lamah a lo phei a, "I be dawn amaw ka tia, tinge i ngawih reng si a?" tiin nui chung hian min rawn zawt a. "Aa..ka be leh peih lo a nih kha." tiin ka han chhang ringawt a. A ner sak mai, "Enge awmzia? I duh leh lo tihna ami?" tiin min zawt leh a. Inla pa vel tak hian, "Ka duh ka ti ngawt ngawt ami...ngawt ngawt a che." ka han ti ve deuh hmak a.

Kal ka tum chiah chu min ko let leh a, "I duh chuan lunch break ah, pipu bulah lo kal rawh." tiin a let leh daih a, chutih lai chuan Puipuii pawh toilet atang chuan a rawn chhuak ve chiah bawk. A pawnfen siam that sawk sawk pah chuan min rawn melh leh zeuh zeuh zel a, ngawi reng chuan kan class room lam panin ka let phei leh a.

Class room bulah chuan ka thiante pathum chu an lo ding a, "Ehe..khawnge i kal daih a, i chhuah nghal vut a?" tiin Ruata chuan min lo vin deuh nghal khur khur mai. "Ka zun a chhuak tawh lutuk a, chuvang mawle.." tiin dawt ka sawi ringawt a, zun pawh ka zung tawp si lo kha ania. Puia chuan zun in lam chu ava thlek a, a nui suk mai.

Chutah min nghawk zeuh pah hian, "Eu  eu eu, ka hrethiam mai. Class 8 ami thian dun te kha, a lo va bihthla lehpek a nih hi." tiin min nuih vak vak a. Midang ho pawh chuan an va thlek ve a, ka lu a kuk lawh pah hian Ruata chuan, "Nang hi...inla hmeichhe ngaihsak lo vel ropui si..hemite thiandun hi chu i star chiang alawm." tiin min han nam bu leh lawp a.

"In ho mai mai e a...ka star lo ve ve..next period a peih awm loh si, khua in ti lum, ka lut dawn." tih pah chuan ka lut daih a, ka va thu a. Next period hi maths a nih vang ania ka peih loh em em, maths siam chhuaktu hi chu hmu ila ka vaw hlum chiang ngawt ang. Mahse chu chu ka rilru kap tu ber erawh a ni lo, TLuangi thil sawi bawk kha a ni ka rilru kaptu chu.

**************************

Period hnih chu rilru pe miah lo chuan ka awm tluan ve leh thei ta hram e, tiffin ei a lo hun leh ta der mai. Tiffin kan ei zawh veleh chuan meizial zukrukna lamah mipa ho chu kan liam thla leh suau suau hlawm a, kan zu khu leh ta luih luih hlawm mai. MAhse ka zu tui lem lo, a tuina kan la pawh phak loh vang chu thuhran nise, pipu bul ringawt chu ka rilru ah a awm tawh.

"Kha ka zu peih tawh lo, ka han e teuh teh ang." tiin chhuanlam ka siam leh ta a, ka ek a chhuak hauh lo. "Ava han t(r)awp thei bik tak, hun lo thei e." tiin Amosa chu a lo phun nuah nuah a. "Thildang te hi a ni lo maw?" tiin Ruata chuan min lo melh leh run tawh, ani hi chu ka best friend a ni bawk a, thil hi a man chak ania.

"Aih, ka ek a chhuak tak tak alawm, ka kal phawt mai aw." tih pah chuan ka tlan chho nghal a, pipu lam awmna chu ka pan phei nghal. Mahse ka thleng tep tawh tihah chuan ka zam leh angreng kher mai, pipu bul ka va en chuan Tluangi leh Puipuii chu an lo la awm tak tak zui a. Ka ding deuh chat a, "Ka let leh mai dawn em mawni le?" tiin ka han inngaihtuah tha leh a.

Bialnu ka la neih ngai loh vang pawh a ni mahna, va inhmu pawh ni ila engmah sawi tur ka hre leh awm si lo. Ka zam chhe ta lutuk chu let leh mai ka tum a, ka inher tur chiah chu Tluangi zawk chuan min rawn hmu hman. Let leh daih chuan dawih min tih ka hlau bawk si, min hmu tawh laklawh bawk nen.

A nui a, min rawn la hui zui. Ka posi lai lutuk chu ka khawngkhaw bai phei lo chauh, Puipuii pawh chuan min rawn hmu ve bawk a, ka lai lutuk chu ka sa chhuak vek nge ka hik chhuak vek zawk pawh ka hre lo. An bul chu ka va thleng a, min lo la be mai lo ve ve leh ta nghal a. Ka aw ka han thian kharh a, "Enge in tih a?" ka han ti ringawt a.

Tluangi chu a han thawk deuh hak a, "Taka..Pui, hei Brandon-a hian thil hrilh duh che a nei a.." a ti ta mai a, "Eng..engmaw?" ka lo ti hu mai. Mahse min chhang chuang lo, "Ka va phei lawk ange, nakinah ka lo let leh ang, lo inkawm ru." tiin a kal ta daih mai. Engmah pawh ka sawi hman tawh lo, Puipuii pawh chuan a thlir zui vung vung ringawt.

Pipu ah chuan ani chu a thu a, kei ka ding reng a. Ka huaisenna zawng zawng sawm khawmin a bulah chuan ka va thu ve a, mahse ka khur in ka hria. Sawi tur engmah ka hre leh chuang lo, kan thu ngawi dun vung vung ringawt ta mai. Chutia kan ngawih dun reng lai chuan, "Enge min hrilh duh i neih a?" a rawn ti chhuak hlawl mai.

"Ihh..aa..engtin maw i tih?" te ka han ti tha leh vel a, sawi mai tur ka hre lo a ni. "Min hrilh duh i nei em ni?" tiin min zawt leh a. Sawi tur a vang khawp mai, "Aaa...ihh...ihh..enge, enge a sawi a?" te ka han ti leh daih a. Hriatthiam loh hmel tak hian min en hu a, "Tu in maw?" tiin min zawt let ve leh a.

"Aww..ih, i thiannu Tluangi khan mawle..enge i bulah a sawi?"

"Engmah, i rawn kal a..tikhan a sawi a, abak engmah a sawi lo."

"Chumi hmain mawle, ka chungchang sawi a nei em?"

"Aih nei lo."

"E, a that chu."

Kan ngawi dun leh vang vang a, "Chuan..sawi duh chu i nei ami?" a rawn ti leh a. Kei lah chu ka lai laklawh tawh bawk si nen, "Maw?" ka lo ti leh hu mai. A thaw deuh hak a, "Aww..thil min hrilh tur chu i nei ami ka ti." a han ti leh a. "Ihh..aw." ka ti ringawt a nih chu, eng tak sawi ang maw?

"Anih chuan sawi la, enge?" tiin min zawt leh nghal vat a, ka aw te ka han thian vel phawt a. "Ihh..englo ania, nangmah hi ka...ka...ka hmelhriat i ang em a..chu...chuvang mawle." ka ti ta ringawt a, a bak sawi tur ka hre hlawl lo a ni. A nui suk a, "Enga? Tu i hmelhriat maw?" tiin min zawt leh nghal a.

"Hehe, i hre lovang..a ho lutuk, theihnghilh daih rawh." ka han ti leh a, ani pawh chu a nui khi suk ringawt. Sawi tur hre lo chuan kan ngawi dun leh char char a, a mipa zawk ka nia, titi ka tan hmasak angai tih pawh ka hria. Ka han thu tha leh sauh sauh va, "Kum engzat nge i nih?" tiin ka han zawt ngawt a, a fuh ber angem erawh ka hre lo.

Nui var var chung chuan, "Kum 14 ka pum chiah, tinge min zawh a?" a lo ti vat a. "Aa..ngati mah, ka zawt mai mai che." tiin ka chhang a. "Anih leh nang ve?" tiin min han zawt let ve leh a. "Keichu kum 16 ka nia, ka rin aiin i naupang lo hle mai, kei aiin kum hnih chiahin i naupang ania." ka han ti vel luam a.

"Hmm..tinge, ka naupan hmel i ti viau ami?"

"Ti love, chutiang engmah ka sawi loh kha."

"I inla upa a nih mai chu."

"Ka inla upa hleinem, nang ai chuan ka upa tho tho alawm."

Kan nui dun bawrh bawrh thei ve ta, a fuh chho dawn tan e. Boruak pawh ka ngam sawt ta khawp mai, "Enteh Puipui, nimin kha...tihpalh lutuk aw..ana viau em?" inla polite fahran chuan ka han ti vel a. Nui chung hian, "I ho emai a, engmah ana lo." tiin min lo chhang a. "I thiannu lah khan min ngei hmel sia, min la vin zui a, ka inthlahrung asin aw.." ka han ti leh vel a.

A nui sen sen a, "NGatan mah ngai suh, ani hi chu a thinchhe ve lutuk a. A sual chuang miah lo ania, a fel lutuk." tiin a lo chhan vat a, a thiannu chu a t(r)an ve khawp mai. Ka nui suk a, "Nia a fela lawm, tukin pawh khan bus a kan chuan dun khan kan inbe ve nual a lawm." ka han ti vel deuh luam a.

"I hmingpum min lo hrilh..Brandon-a tih ringawtin ka hria a."

"Brandon Remruatpuia ka nia, ka hming hi ka duh lo thei tawp."

"Hmm..ngati maw a nalh em chu.."

"A nalh pawh ka ti lo ve a..i hming a nalh zawk."

"Hmm..ka hming pum i hria ami?"

"Hria e, Lalrempui."

Min melh deuh hru a, "Ehe..engtin nge ka hming pum i hriat theih a?" a ti hu mai. Ka lo nui sak a, "I thiannu sawn tukinah min hrilh vek alawm." tiin ka lo chhang a. "Ummm a nih chu..mahse hmingpum kher inkoh hi ka haw teh mai nia." nui deuh vur vur chung chuan a han ti a. "Ngati maw?" tiin ka lo zawt leh vat a.

"Englo alawm, hei..ka sawi thiam lo, ana bik fawk fawk e." tiin a nui huahhuah a, ava han hmuhnawm tak. Chutia kan titi tui tan dawn lai tak chuan Tluangi chu a lo let leh a, "Dar a ri tep, hawh..va zung ang, nakinah in inkawm leh mai dawnnia." a rawn ti daih mai, ka va han ngei tak. Puipuii lah chuan, "Nia..kan kal phawt ange." tiin a zui ve nghal daih bawk.

Lalnuntluangi kher kher chu aw, ava han hun lovin ava tul lo tak em. Min nuih suk pah hian, "A nuam i ti maw..i sawi duh chu i sawi thei em? Biahthi di te in lo inhlan fel hman maw, ka hnawk i ti awm e..." tiin min la rawn chhaih hram a. "Kal ang, kher kher a che.." tiin Puipuii chuan a nghawk deuh sawk a, min kalsan ta a.

***************************

Dar a rik chhunzawm deuh nghal mai a, class lamah ka let leh a. Ka thiante pathum chu an lo awm der tawh, "Ehe, khawnge i awm char char a?" tiin Amosa chuan min lo zawt a. Puia pawh chuan, "Nia, i van e rei awm em em. Lunch break chhung zawng khan i bo vang vang chu ania, tunge i kawm?" tiin min lo zawt ve bawk.

Ka chhan hma hma chuan inla hre tak hian Ruata chuan, "Aww...a star te pahnih ava hmu." a lo ti nalh mai. "Tu ka star te maw?" tiin ka lo zawt let nghal vat a. Min ner khum sak a, "Zep kual vel lo mai teh, ka hmu reng che u alawm." tiin min lo vin deuh hrep mai. Chuveleh Amosa chuan, "Tunge...class 8 ami te pahnih bawk kha ami?" a lo ti ve nghal a.

Confi tak hian Ruata chuan, "Niang chu...dar rik hma khan ka hmu reng alawm." a lo ti leh zuah zuah mai. "Ehe....tunge? Tuzawk nge...a samsei zawk nge a kir zawk?" Puia chuan a lo ti leh nghal vat a. "An pahnihin, pipu bulah...lerh thak reuh lutuk he mihring hi." tiin Ruata chuan min ei loh hmel kher mai.

Keilah chu ka lo intithei, "Nia...kha, min be duh a, ka han bia anih kha. Engvak a ni lo, kan inkawm mai mai." tiin ka han nui deuh put put a, min eiloh hlawm hmel kher mai. "A samsei zawk kha chu min chuhpui lo teh." Puia chuan a rawn ti leh a. "Kha ber kha alawm ka duh, Hmela." ka lo ti deuh hrep.

Class chu kan han la leh ta ngat ngat a, reiloteah chuan ban hun a ni der mai. LAst period a zo va, teacher a chhuak chiah chu ka bang ka ak nghal vat a. Chuveleh Ruata chuan, "Khai khai khai, a bialnute pahnih a hmu leh chak tawh ani maw...tenawm reuh mange." a lo ti leh nghal zuah zuah mai.

"Hey, i mak em em lutuk." tiin Amosa chuan min lo hau ve bawk. Nui chung hian, "Enge mawni le? In luck loh bik vang mai a hetia min tih, min lo va itsik hlawm ve a.." fiamthu ti tak deuh chuan ka han ti a. Puia chu a nui tiah tiah a, "Thian tha ah bak i chhuah leh chuang lovang." a han ti deuh kher a.

"Kan la hria ang chu...anih phawt u, min hrethiam teh u." tih pah chuan ka chhuak a. Puipuii chu ka zawng kual nghal a, bus bul ka va en chuan nimina an thutna ngaiah tho chuan an thiandun chuan an lo thu leh a. Rang takin ka va pan nghal a, Puipuii pawh chuan min lo hmu a, min lo nuih sen sen mai.

A va han hmeltha chiang kuang tak em, an thutna bul chu ka va thleng a. Va thut ve pah chuan, "Bus in em ni in haw dawn a?" tiin inla polite tak chuan ka han zawt dun a. Ngei hmel tak hian Tluangi chuan min lo melh deuh hraw mai, "Tu zawk nge i zawh?" a han ti deuh kher a. "Aww in pahnihin..ni lo, Puipuii zawk." tiin ka han nui a.

Ani pawh chuan min lo nuih let a, a zah hmel reuh lutuk. "Hmm...ni ru ni ru." tiin Tluangi chu lehlam a lo hawi hmak a, henu hi a tangkai dawn riauvin ka hria. "Ke in ami i haw dawn a?" tiin Puipuii chuan min zawt a. "AW ni mai, bus in ka haw ngai lo." tiin ka lo chhang a. "Tukin khan bus khan i rawn kal bawk sia..." a han ti leh a.

Ka chhan hma hma chuan Tluangi chu rawn inrawlh vatin, "A hmuh chak vang che anih kha...a star che a, a sawi vek alawm." a rawn ti ta mai. Ka zak lutuk chu ka nui tawi tak tak nasa, Puipuii pawh chuan sawi tur a hre lo. A ngawi reng a, a lai takzet a ni tih a hmai sen tai vek atang chuan ka hre thei mai.

Mahse keipawh ka bang bik lo, ka zak lutuk chu rum tawk hian Tluangi chu ka melh hrawk ringawt. Tluangi bawk chuan min nuih chung hian, "Ka sawi dik alo ami?" a rawn ti leh a. "Engtik lai mahin ka sawi lo e a, rawn phuah chawp suh." ka han ti ringawt a, "Hmm..ni rawh se." a lo la ti hmuk zui.

Kan ngawih deuh vang vang hnuah chuan Puipuii chuan, "Ke a haw kher angai hleinem, fee ah pawh bus fare kan pe tel vek a, a hahthlak mai mai alawm." a han ti leh a. "Nia ni tho mai." tih ringawtin ka chhang. Chutih lai chuan ka thiante chu an rawn kal a, "Ke in nge i haw dawn bus in?" an rawn ti lauh lauh mai.

Tluangi lah chuan, "Sawi vat rawh..saw i thianten an nghah che saw..." a lo ti ve chhen a, a va han tawng hnem tak. Puipuii bula chuan daih chu thiante phatsan angin ka inngai bawk si, "LAwks aw.." tiin ka han au ve vak a. "Eee..hmanhmawh suh, kan lo nghak reng ang che." Ruata chuan a la rawn ti hram.

"Naktuk ah zawk aw...vawiin chu ke in kan haw leh phawt ange." tiin Puipuii chu ka hrilh a. Puipui chuan min melh a, "Tak tak aw? Ke a i haw leh vaih.." a lo ti a, mak ka ti khawp mai. Ka thin a phu nghal dup dup, ka nui deuh vur vur in ka hria. "Aw le..awle, ihh, promise..naktuk chu busin ka haw ang." ka ti deuh chiam chiam a.

Tluangi chuan min lo ei loh hmel rap, tichuan ka thiante bulah chuan ka va kal ta a. Ka han hawi let leh a, Puipuii chuan min lo bye bye a. A va han nuam chiang, ka bye bye let ve a, ka thiante chuan min chhaih vak vak lehnghal. Mahse ka zak peih vel lo, a nuam hi ka ti lutuk ringawt. Haw kawng tluan chuan min chhaih char char a, min chhaihna ah chuan ka la huat loh ber a ni ngei ang.

*****************************

Inah chuan ka haw a, ka rilru ah chuan Puipuii hlir a awm leh ta. A va han nuam chiang, min duh ve ka rinna chu a pung tial tial mai. Ka vawi hnih hmuhna chauh, a ni hnihna chauh a ni. A ni hnihna lekah pawh ti khawp khan kan inpawh thei nghal ania, a ruk tak chuan min ngaina ve a ni tih hi zep rual a ni lo.

Tiang em em a hmeichhe vei leh duh hi ka la nei ngai lo hrim hrim, star te chu ka nei ve fo. Mahse tu a te mah hi bem chu sawi loh, va nel a, va biak hmasak hi ka duh ngai lo mai pawh a ni lo, ka tum ngai lo. A chhan pawh ka induhtawkna vang a ni hauh lo, ka thisen hian a ngam ve hlawl lo a ni.

Mi inngaizawng ka hmuh te hian bialnu han neih hi chu ka chak ve reng thin mawle, mahse ka thiante sawi ang deuh khan thiantha ah bak ka chhuah tak tak ngai chuang lo. Mahse tun tum erawh, Puipuii, Lalrempuii erawh hi chu a dang bik em a ni. Ka vawi kaht hmuhna atanga ti khawp a min dek zar kha amak ka ti, ka mit a la nghal chat.

Puia leh Amosa'n an sawi lai pawh khan engah vak ka lo ngai lova, mahse ka han hmu chiah kha chu engtin emaw tih danglam hian ka awm ni mai hian ka inhria. An thiandun khan an hmeltha ve ve a, an duhawm ve ve a, an pian pawh naupang te siin a dik thlap. Midang mitah chuan Tluangi zawk kha a chhelo zawk maithei, mit hi a in ang miau lova.

Kan mit te hi in ang vek nise, kan insual buai nasa dawn lutuk. Ka mitah erawh chuan Puipuii kha a let tam takin a tha fe zawk, Tluangi pawh kha chutia chhia a ni hauh lo. Vai hmel a ang lek lek a, a sam kir te kha a inhmeh ka ti tawp. MAhse vai hmel han tih khan, vai hmeltha chi, thlah pawlh hmeltha deuh ang chi kha ania ka sawi.

School kal a ti nuam dawn hle mai, ka ring sual maithei a, mahse kan inngaihzawn ve ngei chu ka ring. Han ti ve ngawt ila, thian atan bak hian min lo duh miah lo mai ang tih erawh a hlauhawm ve tho mai. Mahse a thian nih ringawt pawh ka tan chuan a hlu dawn emai, bialpa a nei lo tih chu ka chiang phawt a.

Engpawh chu nise, Tluangi zarah ka ti lo thei lo. Ka ngei hman viau a, mahse ani kha awmlo se chu keima thu hian Puipuii kha ka va be ngam dawn lo chiang lutuk. A rintlak vak pawh kha ka ring lova, min ngei hle ni mai hian ka hria. Ka lo ring sual aniang nge, mahse duh ai chuan a over mah mah chu ka ti tho mai.

Huiham, vawiin chu ka hlim lutuk a, keimah leh keimahin ka titi tui dawn tlat. Home-work by-heart tur min pe hi ka haw lutuk bawk, Sir MAwitea, kan sir zinga ka huat ber subject ala ni zui. Puipuii ka vei lutuk hi keipawh insum angai, zanin lehkha zir phei chu ka rilru ah a lut dawn hlawl lo tih hi ka chiang sak.

*****************************

TO BE CONTINUE