THE LAST PICNIC (MIZO FICTION HORROR STORY) Written by : Aaron Malsawmdawngzuala CHAPTER - 4

 THE LAST PICNIC

(MIZO FICTION HORROR STORY)

Written by : Aaron Malsawmdawngzuala

CHAPTER - 4

*************************************************

Thantea chuan a sawi ve dawn ta, thingpui chu a han in zo va. Tichuan thaw a han la leh te te phawt a, "Ka naupan laia ka hriat ania, ka hre kim tawh chiah lo maithei. Ka patea'n min hrilh thin a, a tlangval laia a thil tawn ania. Kawmzawl Road (phuahchawp) lam a ni nghe nghe in ka hria, mi hian a hrang an ti an ti thin a."

"Chubakah a nelawm lohvin sawmi kawng vel saw chu khua hi a dur deuh khuih reng mai a, khua a nawm loh chang phei chuan chhum a zing chuai zel a, kawng hmuh a harsa an ti fo thin reng a ni. Tawn hriat sawi tur tam tak a awm a, khualzin mite pawhin sawi tur neuh neuh chu an nei nual thin."

"Local Transport company ah hian ka patea hi driver angin a thawk thin a, saw mi kawngah sawn a tlan fo bawk. Engmah a hmu ve ngai lem lova, harsatna pawh a nei ngai lem lo bawk. Chubakah a huai ve hrim hrim a, thlahrang tih vel hi a awih lo bur a ni. Mahse zankhat chu, a theihnghilh rawh ngai loh tur thil a tawng ve ta a."

A chawl det a, "KA patea chuan bus chu a khalh leh a, chumi kawngah chuan... mahse passenger pali chiah an awm a, bus chu a ruak tluk a ni. Ruah a sur nasa em em a, kawl a phe nasa in boruak chu vawt tak a ni. Passenger te chu pitar pakhat, nula leh tlangval inngaizawng, patling pakhat te an ni." tiin a sawi chhunzawm leh a.

"Pitar chu a hma lamah a thu a, a hnungah inngaizawngte chu an thu thung a. PAtling erawh chu tukverh lam a hawi deuh reng zel a, bus chhung chu a reh hian a reh diak a ni ber mai. KA patea chuan an khua a him dam taka thlen hram chu a duh a, chhum a zing nasa in kawng a chhe angreng bawk nen, tawh sual an tawk palh mai ang tih pawh a hlau ve hle."

"Khawkar kawng, fal em em mai a an tlan lai chuan kawng sir atang chuan engemawni, mak tak mai hi a rawn kal phei thut a. Bus hma takah chuan a rawn lang thut mai, ka patea chu a phu nasa hle a. Rang takin a break a rap vat a, bus chu a ding nghal. A thim lai deuh va awm a nih avang chuan an hma a ding chu eng chiah nge a nih an la hre thei lo, mahse mihring ruang am a ang takzet."

"PAssenger te chuan mak an ti hle a, a hnunglama mi, nula phei chu hlauvin a bialpa banah chuan a vuan nghal a. Ka patea chuan hnunglam chu ava en a, pasenger te ngaih chu a tha lo tih a hmu thiam nghal a. Pitar chu a han dak deuh hram a, chu thil chu eng tak nge a nih en chian a tum ve hle."

"Chutah a meng deuh kawk a, eng eng emaw sawiin a phun ri deuh sur sur mai. Mihring ni ngeiin a hria a, ka patea chuan pui ngai a nih takin tiin a tho va, bus atang chuan chhuk a tum ta a. Passenger te bulah chuan a lo let leh vat tur thu chu hrilhin bus atang chuan a chhuak ta a, kawng lah chu a lo diak nasa em em mai lehnghal."

"Ruah chu a la sur cherh cherh a, ka patea chuan a va pan phei zel a. Chu thil chu a rawn lang chiang deuh va, bus light in a chhun phak chiah chiah na velah chuan a rawn ding hnai a. A lan dan chuan hmeichhia niin kawr var vek a inthuam a nih hmel a, ka patea chuan, 'Ka pi, puih i ngai em ni? Eng nge hetah i din a?' tiin ava bia a."

"Mahse chunu chuan a chhang lo, hnunglam a hawi tlat bawk. Ka patea chuan ava pan zel a, chutah hmeichhia chuan a ban a phar chhuak a. A hma zawn kawng thim ruih mai chu a kawk ringawt a, a chetdan chu a rapawm reuh em avang chuan ka patea chuan a hlau ve deuh ta a."

"Mahse a huaisenna zawng zawng sawm khawmin a va pan hnai lui zel a, puih a ngaih leh ngaih loh chu a han zawt nawn leh a. Mahse hmeichhia chu a la ngawi reng, a che eih lo bawk. Ka patea chuan a pan hnai zel a, chutah hmeichhia chu a che ta hrut mai. KA patea pawh a ding ve nghal, tichuan muang chang chuan chu hmeichhe mak tak mai chu a rawn hawi let ta a."

"Ka patea chuan mak a ti takzet, a hmel chu a dan hian a dang var pup mai a. A sam lah chu a dum hnang hlup bawk a, a mitmeng pawh a dum vek bawk. KA patea chuan a hlau takzet, patlinga pumpa chu hlauvin a t(r)e vak a. Rang takin bus lam pan chuan a tlan let nghal a, a thlen hma chuan a han hawi let leh zeuh va."

"Mahse hmeichhia chu a lo awm tawh lo, a lo bo daih tawh. A rang thei ang berin Bus ah chuan a lawn chho va, kawngka pawh a khar nghal vat a. Passenger te chuan mak an tiin an lo en thup mai, zawhna pawh an zawt nghal mai lo. Ka patea chu a thin a phu dup dup a, a hah bawk si chu a thaw hlawi hlawi mai."

"Tichuan thil mak tak mai a thleng leh ta, ka patea chu bus driver thutna ah chuan a la thu hauh lo. Mahse mak tak maiin bus chu a rawn in-start ringawt mai a nih chu, tuma khawih ni si lo chuan a engine chu a rawn nung ta a, a ri ta vut vut mai. Chutah a mah in bus chu a kal tan ta mai a, a la tlan deuh phut zui."

"Ka patea chu ding lai mek a nih avang chuan chutia bus, amah a rawn tlan thu mai chu a tluk pah chiang hle. Passenger te chu hlauvin an au va, ka patea chu tho kang vatin driver thutna lam chu ava pan nghal a. MAhse a control thei lo, bus chu amah in a inkhalh a ni ber mai."

"A la chak em em zui leh ta nghal a, hnung lama thu nula chuan a bialpa khuah chung chuan a au vak vak a. Chutah le, a hma lama chuang mek pitar chu ring em em mai hian a rawn nui a. A ring telh telh a, reilote hnuah phei chuan a nui ri ta huah huah mai a. Ka patea chuan a rap in a hlau takzet, mahse bus chu tih din tum chuan a bei lui ngar ngar tho va."

"Bus chu a tlan zel a, ka patea chuan a la control thei chuang lo. A steering pawh chu eng ang pawhin han kuai vak vak mahse amah hlirin a inkuai kual a, kawng dang mak tak maiah chuan bus chuan a hruai ta daih mai a. A tlan chak telh telh a, ka patea hlau bawk si, rilru fim pu thei tawh lo chu a tap pur tawh mai."

"Chuta karah a hma lam, a bul deuh lawka chuang pitar lah chu a nui uar telh telh a, a rapawm takzet. Ka patea chuan accident chiah an hmabak tawh ringin a maimitchhing tawp a, mahse mak tak maiin bus chu amah chuan a rawn ding thut mai. Boruak chu a reh nghal diak a, hnunglama nula pawh chu a reh ve nghal hmak bawk."

"KA patea chu a han hawi kual a, pitar kha a lo awm tawh reng reng lo mai a nih chu. Hnunglam ava en a, passenger pathumte chu hlauh hmel tak hian an lo thu khur dar dar a, patling pakhat lo awm ve pawh chu a hmel enin a hlau takzet tih a hriat kher mai. Darkar eng emaw zah hnuah chuan bus chu a han ti nung leh a, a pangngai ve ta."

"Rilru nuam lo deuh chung chuan bus chu a khalh leh a, passenger pathumte pawh an rilru chu a nuam tawh bik hauh lovang. KAwng pangngai lamah an kal leh thei hram a, tichuan police station hnai berah kalin an thil tawn te chu an report ta a. Inngaizawngte leh patling lo awm ve chuan an statement te chu an han pe ve tak na a, pitar erawh tunge anih tuman an hre si lo."

"Police te phei chuan an awih sak lo nasa em em mai a, ka patea pawh chuan engtiang chiah in nge thudik a ni tih a prove theih ang a hre bik si lo. Bus chhung an check lahin pitar hnuhma tur awm ang a lang thei ngawt bawk si lova, ti chuan an repot pawh chu bawh zui a ni ta lo a ni."

"Kha mi zan atang khan ka patea chuan a hna chu a bansan nghal a, khami kawngah phei kha chuan tun thleng hian a kal leh tawh ngai lo hrim hrim. A thian driver dangte a han hrilh a, amah chauh chu thil mak tawngtu a lo ni bik hauh lo mai. Driver dang thenkhatte pawh chuan thil mak tak tak, chumi road ah chuan an lo tawng ve nual tawh hi a ni awm a."

"A kawng sawina laiah tak chuan chutiang deuh hmeichhia chu an lo hmu ve tawh a ni awm a, boruak mak deuh a rawn awm thut ang hian an inhriat thin thu an sawi bawk. Kum a lo ral zel a, chumi kawng lai velah chuan accident a tam chho ta riau mai a. Chuvang chuan an block ta nghe nghe a, kawng dang atanga kal ngaiin an siam ta hial a ni."

*****************************************

Thantea chuan a thawnthu chu a sawi zo ve ta, an ngaithla tui ngang mai. Nunui chu a han chek hlak hlak a, "Ka rap lutuk ringawt, i patea chu a huaisen zawk ngawt mai." a han ti deuh nuah nuah a. Zodini hlauh hmel lutuk chu a khur deuh dar dar thei hial a, "Kawmzawl road saw chu ka hria a, mahse a hrang tih ka hre ngai lo reng reng. AWii, ka kal loh dan tur zia hi.." a lo ti ve vawng vawng bawk.

Rinmawia chu a han khi deuh suk a, "Saw lai kawng saw chu sawi neuh neuh a tam alawm, mahse i patea chuan a phuah belh mai mai a ni lo maw? Chubakah, i naupan lai a nih phei chuan a sawi hlauhawm kual vel mai mai a ni ve thei tho asin." a rawn ti fiamthu a. Thantea chuan thutak zet hian, "Aih, ka phuahchawp ve lo. Ka patea kha ka ring, a sawi zawng pawh khan a mitthla uai uai thei hial ang. Ka chhungte pawhin an sawi alawm, Kawmzawl road ah a kal leh tawh ngai lo hrim hrim an tia lawm." tiin a lo chhang let a.

Ruatfela chu a han zi mar tial tial a, "A mak ve ngawt mai, tiang lam hi a tam. Kawng hrang tih vel, Kawnpui Dai phei hi chu an sawi hrang nasa bik." tiin a han ham deuh bai bai a. FAmkima chuan a thingpui no chu a han dawm kang a, "Tiang thil hi chu a awm chawk ania, thlarau chawl lo hi an awm ve tak tak a nih hmel. Kan naupan lai pawn sawi tur a tam mai, mahse a then hi chu phuah chawp te hi a ni ve thin bawk a." tiin thingpui chu a han lem leh sak a.

Puipuii chuan Famkima chu a han melh vang vang a, "Eng thil hlauhawm nge i tawn ve tawh reng reng, ka pu?" tiin a han zawt deuh thut a. Famkima chu a han nui deuh sen sen a, "Tawn ka la nei ve vak lo, thawm eng eng emaw hi chu ka hre ve thin. Mahse chutia hlauhawm ah pawh ka ngai lo, ramhnuai hi ka ngaina a, ram riah te hi nuam ka ti a. Mahni a awm chi ka nia, engmah ka tawng ngai lo. Mahse tam tak hi chuan an thil tawn hi chu min hrilh ve nual thin, ka awh lo hran lo bawk." tiin a lo chhang a.

Ruatfela chuan Thantea darah chuan a han beng thak thak a, "I la sawi hlauhawm berin ka hria, Rinmawia ang a i phuahchawp mai mai a nih loh chuan." a han ti deuh kher a. Rinmawia lah chu a lo ner sak a, "Ve lutuk a, in hlauh em kha aw....kha lo pawh ka la hria a nia." a lo ti nghal khur khur a.

Nui chung hian Nunui chuan, "Nang chu sawi ve tawh lovang, i phuahchawp leh thovang. Thil thleng tak tak vek kan la sawi, nangmah chiahin i la phuah chawp." tiin a rawn fiam ve bawk a. Ngeiawm tak hian Rinmawia chuan, "Hahh... Thantea pawh a patea chuan dawt a sawi te pawh a lo ni ve maithei a, tu hriat mah va ni suh." a han ti ve deuh kher a.

Famkima chuan a mal chu a han beng ri thak a, "Khai le, pakhat ala bang a. I sawi ve dawn em, Puipui?" tiin Puipuii chu a zawt a. Midang pawh chuan an en thap a, Puipuii chu a han inngaihtuah vang vang a. Chutah a lu chu bu nghat nghat in, "Um, pakhat chu ka hre ve alawm." a rawn ti ve ta nge nge a.

***********************************************

An vai chuan Puipuii chu an en ve leh ta thap a, Puipuii chuan thingpui chu a han in zo ve a. A aw thian kharh kharhin a sawi ve tan ta a, "Lungleia ka nutei thil tawn a nia, zan khat current a awm loh tumin kan chhungkua in kan ti ti a, chutah chuan a sawi a. Ka la hre chiang angreng, amah hi nurse a ni thin a. Kum 1990 hun lai vel daih tawh a mi a nia, damdawiinah night duty in a awm thin a." tiin a han chawl deuh det phawt a.

"Damdawiin chu a lian vak lova, a awmna pawh tlang lam niin a fal angreng hle bawk. Mahse a hlui ve tawh angreng hle a, sawi tak ang khan 90 kum ve daih tawh kha aniahmanrua pawh a la changkang lo hle bawk. A hran thu an sawi nasa thin a, mahse ka nutei erawh chuan a awih ve ngai hauh lo thung."

"Mahse zan khat a duty chu thil hlauhawm tak a tawng ve a, a ngai te ang bawkin zanrei lam deuh tawh a nih avang chuan damdawiin chu a reh ruih mai a. General ward a ni a, damlo pawh an tam lutuk lem lo. Supervisor chuan ka nutei chu a rawn call a, Emergency room a lo kal vat tur leh Room number 213 a damlo chu check vat tur chuan a rawn hrilh ta thut mai a."

"Ka nutei pawh chu rang takin a kal nghal a, chu damlo chu unconcious a awm niin a chang leh a rawn harh a, a chang leh unconcious in a awm leh a. Chumi zan ngat phei chuan a boral ngei an ring tawh hial a, chutiang khawp chuan a serious a ni. Nurse duty na atanga hla takah, hall tawp lamah room no 213 chu a la awm zui lehnghal a."

"Chumi laia light an dah lah chu a dim em em mai bawk a, a nelawm loh takzet. Ka nutei chuan a pan thla zel a, a reh em em mai lehnghal a. A dawih chi hrim hrim a lo ni bawk nen, engemaw tak chuan a thauvah hian a man tlat niin a hria a. A pan thui zel a, a bengchhe ri nge pawh a hrethiam tawh lo, bang sir lehlam lehlam atang chuan phun ri sur sur ni awm tak hi a hre tlatin a hria a."

"Mahse Room no 213 chu a thleng ve ta mai bawk a, khawnga chu a hawng a. Damlo chu khumah chuan che miah lo hian a lo mu a, a mar te chu a han khawih a. A chak tawh lo hle tih pawh a hria, a thawk dan pawh chu a dik tawh mawlh lo. Monitor a check zawh hnu chuan chart ah chuan note chhete chu ziakin chhuah leh mai a tum a, mahse thawm a hre ta tlat mai."

"A hawi let a, bangah chuan mihring thla ni awm tak phei zuk chu a hmu hman a. MAhse a bo leh rang kher mai, a thin chu a phu dup dup a. Mahse eng atan mah ngai lo luiin a ward chu a chhuahsan a, a duty na lamah chuan a let leh a. Hall-a a kal phei lai chuan light bulb, dim leh eng chau rau tawh tak mai chu a rawn phe ta zawk zawk mai a."

"Mahse a ding duh lova, a kal phei zel a. A pen ri te chu zan a rei tawh bawk nen, a ri khawk tlawk tlawk mai. Chutah a kal phei zel a, a hnunglam atang chuan na em em a kawngka in khar ri bur thawm chu a hria a. A phu nasa kher mai, a ding nghal chat a. A hawi let a, mahse tumah hmuh tur an awm  chuang lo."

"Tichuan a hlauh ruk tawh em avang chuan chak takin a kal a, duty-na hmun chu ava thleng thei ta. A thu fel chiah tih ah chuan hmeichhe pakhat mipa naupang hruai hi a rawn lang hlawl mai a, a fapa a nih thu leh accident vanga hliam tuar a nih thu a rawn sawi a. Ka nutei leh nurse duty ve dang pakhat chuan an buaipui nghal char char a, a lo na lutuk lem lo hlauh va."

"Mahse anu chuan ngaihtuah hmel awm pawhin a lang lo, 'In zo tep em?' a la ti deuh chhen zui a. Tichuan a fapa hliam te an tuam zawh hnuah chuan chunu chuan room number 213-a kal a duh thu chu a sawi ta mai a. An chhungte a nih thu a sawi hnuah chuan ka nutei pawh chuan a hruai ve ta mai a, tichuan room no 213 chu an va thleng a."

"Chunu chuan damlo chu a en vang vang a, hnara hlit phawi an tih ang mai hian a la thaw deuh huai zui. Ka nutei pawh chuan mak a ti hle a, mahse engmah a sawi lo. Chunu chuan a fapa chu kaiin room chu a chhuahsan leh daih a, mahse ka nutei chu a chhuak ve mai lo. A chhan chu a hma a, ava kal lai pawh a, a hmuh miah loh thil a hmuh tlat vang a ni."

"Damlo khum bulah chuan thlalak hlui tak mai hi a lo awm a, ka nutei chuan ava la vat a. A han en chu nichin lawka kha hmeichhia leh mipa naupang thlalak kha a lo ni a, ka nutei chuan a hrethiam lo kher mai. Room atang chuan a chhuak vat a, mahse khami te nufa erawh hmuh tur an lo awm tawh hauh lo."

"Eng ang pawhin kal chak pawh nise, hall chu a thui ve em avang chuan hmuh hman loh ngaihna a awm lo. Ka nutei chu a ngaih a tha ngang tawh lova, duty na lamah chuan va let leh in a thiannu chu khamite nufa kha a lo hmuh leh hmuh loh a zawt nghal a. Mahse a hmuh hauh loh thu chuan a lo chhang a, chumi hnu lawkah chuan room no 213 a damlo chu a thi ta nge nge bawk a ni."

"A hnu a ka nutei'n a hriat leh tak chu kha damlo leh hmeichhia kha nupa lo ni rengin, an fapa pawh kha naupang ngei kha a lo ni. Kum 1 kal ta khan kha hmeichhia khan a fapa damloh vangin hospitalah a rawn kal a, an pa in a rawn hruai bawk hi a lo ni. Tichuan an haw lamah an accident a, an pa chauh chu dam chhuakin an nu leh naupang chu an thi ta a ni awm e."

"Mahse ka nutei'n mak a tih deuh chu kha naupang kha thlarau lo ni pawh nise, a hliam ah te khan damdawi an hnawih tak tak si a, a thiannu ngei pawh kha a awm ve kha a nia. Mahse mi thi tawh an lo buaipui a ni tih an hre leh hnuhnawh chu ania, an hlau thar leh khawp ang le."

"Ka nuteiin a rin dan chuan a tawpna atan tiin a pasal chu a fapa nen an rawn tlawh leh angah a ngai a, mahse tun thleng hian a la hlau reng thung. Mahse rapawm takin an lang lova, an tihthaih lo bawk a. Vannei a inti angreng hle bawk, chuan thlarau fel tak an ni e a ti bawk."

****************************************************

Nunui chuan a thawnthu chu a sawi zo ve ta, an reh leh ta thiap mai a. NGaihnawm an ti tlang bawk aniang, "A ngaihnawm kher mai, an inhmangaihna pawh a ropui e. A tawpna atan tiin, a thih hma ngeiin nung dama a  awm lai hmuh a duh a ni ngei ang chunu chuan.." Ruatfela chuan a han ti hmasa ber a.

Chhana pawh chuan a lu a lo bu nghauh nghauh va, "Nia, thlalak lo awm ringawt pawh chu a mak kher mai. Chu aia mak ka tih zawk chu, i nuteiin khamite nufa room an chhuahsan hnua a hmu hman lo kha a ni. An bo tawp tihna ania, a mak hle mai." a lo ti ve nuah nuah bawk a. Zodini chu rawn tawng chhuak ve in, "Ka hrethiam chiah lo kei chu thlarau te hi hremhmunah emaw vanramah emaw an kal nghal ngai lo tihna em mawnile? Tiang hi ka hre fova, an dam laia an thil tih zawh loh hi tih zawh a nih hma chu khawvel an chhuahsan duh bik lo tihna zawk nge ni?" tiin a inngaihtuah vung vung a.

"Hmeichhe thlarau pawh chuan rawn kal hun a hre hle mai, a pasal thih hma chiah chiah in a rawn thleng a. Tiang lam hi keichu min hran khum chiam lo mahse, ka tawng duh lo hrim hrim. Chubakah damdawiin ka nel loh nachhan ania, damdawiin hrim hrim hi ka rap riau." Nunui chuan a lo ti ve bawk.

Thantea chu a rawn thu chhuak deuh va, "Puipui, i nutei chuan thlalak chu police hnenah te kengin thil awmzia a hrilh lo em ni? Mithi chhungte hnenah emaw, hei...han chhui chian deuh ang hi?" a rawn ti daih mai. Puipuii chu a han ner sak a, "Chutiang sise a ngaihtuah tawh bik nang, chubakah dawih chung chung khan a kal kha ania. Ka hre tawh bik lo, ka zawh chhunzawm leh tawh lo hrim hrim a." tiin a lo chhang a.

Famkima chuan a aw a han thian kharh kharh a, "Nia, zawhna chu tam tak a awm thei alawm. Engtin nge chu hmeichhe thlarau chuan room number 213 chu a hrait chat theih, emaw... thlarau nisi engtin nge chu naupang chu a hliamah damdawi te an hnawih theih? Engpawh chu nise, miin ka tawng e, an tih miau chuan awihloh ngawt kha a dik ber si lova." tiin a han nui deuh hak hak a.

Ruatfela chuan a kut chu a han beng ri thak a, "I sawi dik chiah, Pu Famkim. Keipawh chu chu ka ngaihdan chiah chiah a ni, thlahrang hi chu a awm ngei alawm. Kan awih a nih pawhin keichu a mak ka ti hran lo, sawi tur hi a tam ve emai. MAhse thil inhmu chiah lo hi a awm thin a, a thuhrimin Puipuii, i nutei chuan engmah a sawi chhunzawm tawh lo maw?" a rawn ti ve leh a.

Puipuii chuan a lu lo bu nghatin, "Aw, sawi chhunzawm tawh lo. Midang pawhin an zawt tawh lem lo aniang, chubakah Lungleiah a awm daih a. Chumi damdawiin pawh chu tunah chuan a awm tawh lo, hmanah a rawn zin chhoh laiin a sawi a, chuzawng chu a nimai." tiin a lo chhang a.

Chhana chu rawn inrawlhin, "Anih leh damdawiin chu tih tawp anih hma chuan, ihh.. room number 213 ami damlo a thih hnuah khan, chanchin dang a awm em? Khami hnu deuh ah, hrang chhunzawm tih vel emaw?" tiin a rawn zawt ve leh khauh mai. Puipuii chu a ngawi vang vang a, "Ihh, khami room kha chu engvang mah chanchin a nei zui chuang lo a ni awm e. Damlo pawh an dah leh fo va, a hrang chhunzawm lo a niang." tiin a chhang ve leh a.

Famkima chu a tho chhuak a, a han zi mar talh talh a. Choka lamah phei pah chuan, "Zan a tlai tawh bawk si a, mahse ka la sawi ve si lova. Thingpui hi vawikhat chiah in leh ila, tichuan ka sawi ve tawh ang." tih pah chuan thingpui chu a han thli leh a. Zodini te thian ho chu a han sem leh diat diat hlawm a, an mut chu a la chhuak lo tlang hlawm khawp mai.

********************************************

Thingpui chu an han in leh a, "Le, ka han sawi ve tawh ang aw..a tawp berna atan.." a tih lai chuan Ruatfela chuan lo pawt chatin, "Lawk aw, Pu Famkim. Inzawh chi a ni em phei chu ka hre hauh lova, nupui fanaute i nei ve tawh reng reng em?" tiin a rawn zawt deuh thut mai a, a thiante pawh chuan an en hu hlawm a.

Famkima chu a khi suk a, a thingpui chu a han lem zeuh va. A ngawih deuh vang vang hnuah chuan, "ZAwhna tha tak a ni, min zawt har hlawm ka ti reng a. Nia, ka nei ve alawm. Ka nupui hming chu Laltlanpuii ania, fa pahnih kan nei a. Pakhat chu mipa ania, pakhat chu hmeichhia a nia." tiin a chhang a.

"Enge an hming?" tiin Chhana chuan a lo zawt ve nghal a. "A mipa hming chu Lalhmangaiha a nia, hmeichhia zawk chu Rammuanpuii a nia. School kal lai an la ni ve a, Hmangaiha hi a upa zawk a, class 5 a nia. Muani hi class 3 a ni bawk a, an thiamthei ve khawp asin." tiin a han nui deuh sen sen a.

Chhana chuan a hriat belh chak emaw tih mai tur hian, "A nih leh innu in enge a tih thin, hna a  nei nge inah a awm tawp?" a lo ti pek a. Nunui chuan a nghawk sawk mai, "Chutiang inzawh chi ami?" tiin a beng bulah chuan a va phun sap a. Famkima chu a nui hak hak a, "A ho lutuk, in duh duh min zawt thei alawm. Kan nu hi zirtirtu ania, an khuaah a awm tunah chuan. Primary school zirtirtu ania, a zirlaite pawn an nel lutuk." tiin a chhang leh a.

Zodini chuan a aw a han thian ri kharh a, "In awmdun tlem awm anih chuan, a hrehawm thei ngawt ang. In nupa inkar te a hlat phah em? I ngai thin awm sia?" a rawn ti ve sap a. Nui chung hian Famkima chuan, "Aa.. chawlh hmang ten a rawn haw ve a. Helamah hna a zawng mek hrim hrim bawk a, a thawk rei vak tawh lovang. Chawlh hmang te hian a rawn haw ve thin a, inchhung chet te chu a hnehsawh lutuk, hehe. A awm bo chang pawn kan in video call a, tikhan kan fate nen pawn an inbia a. A rawn haw chhunah pawh chhungkua a chhuah ho te kan nei a, helai thlamah pawh hian kan chhungkua in kan riak tawh alawm." tiin a lo chhang leh a.

Thantea chuan a lu a lo bu nghat nghat mai, "In inzawmna a nghet tha ve tawk tihna a nih chu, in fate chuan an ngai ve thei khawp ang." a han ti ve deuh luam a. "I sawi dik lutuk, Thante. Chhungkua ah chuan in-support tawn hi a pawimawh ber. Ka hna ah min hrethiam a, keipawn a hna ka zah sak a. Keini ang ramvak ngaina leh thawh em em nei lo te, ani angin min han duh ve mai hi vannei ka inti hliah hliah zawk asin." Pu Famkima chuan a han ti dam dap a.

"Chhungkaw hlim deuh nih hi a nuam ngawt ang, keini chu kan chhungkua hi kan inhau reng mai a. Chhungkaw picnic chu sawi loh, chaw kan ei ho khat ania aw.. Ei rual a awm thei lo, heivang hian kan inpawh lo hlawm lutuk a, a nawm loh phah thin." Nunui chuan a lo ti ve nuah nuah mai.

Pu Famkima chu a nui suk a, "Inhauhte chu a awm tur alawm, chhungkaw tinah a awm vek alawm. Keini pawh thu inhmuh loh changte a awm a, kan inhau ve nasa thin. Mahse kha khan rei daih lo se, inngaihdam zel hi a tha a. KAn chakna leh chaklohna a ni ve ve thei ania, chhungkua hi..chu chu hre reng ang che u." tiin a thiam ang tawk chuan a han hrilh ve hlawm a.

Rinmawia chuan Famkima chu a han en vang vang a, "I fate hi tihian i riah bo san zeuh zeuh awm sia, tuten nge lo buaipui thin a?" tiin a rawn zawt ve leh khauh mai a. "KA nu hi ala dam a, ka pa erawh chu a thi tawh a. Amah leh ka u te nupa hian an enkawl hneh khawp mai, ka kal dawn te pawh hian min ngen ngai lem lo. An fel ve a, chubakah naute an ni tawh lova, min ngen ang chu vel kha chu an ti lo khawp mai." tiin Famkima chuan a chhang a.

An ngawi deuh thiap a, "Awle, a tawk tawh e. Tunah chuan kan thawnthu lamah khan kal leh tawh ang u, ka sawi a hun ve ta. Nge ni a, Zodini chiah hi in thian zinga la sawi ve lo ania." Famkima bawk chuan a han ti leh a. Zodini chu ava melh a, "Sawi tur chu i hre lo tak tak em ni?" tiin a han zawt leh a.

Zodini chuan thingpui chu a han lem zeuh va, "Aa.. ka hre lo ni mai rawh se. Ka ngaihtuah ngial pawhin sawi tur ka hre lo, ka bo tawp." tiin a lo chhang a. Chhana chu a nui huk a, "Englo sawi mai la.... ihh, hmana ka sawi hnu ho i hriat ang ang sawi ve tawp rawh." tiin a rawn fiam a.

Thantea chuan rang tak hian, "Aih aih aih, Chhana thawnthu sawi ho hi e, nin tawh hlawm mah nak alaia. SAwi lo zawk rawh, Zodin." a lo ti nghal khur khur a, an nui deuh dar dar a. Rinmawia chu lo tawng ve in, "Sawi kim vek kha a nuam ve alawm, ti hian kan awm ta sa sa. Sawi kim law law ang u, i sawi loh bik ten a fair lo." a rawn ti ve bawk a.

Zodini chu za lo tak hian a nui a, "In thawnthu sawi ho kha ka duhtawk e, a ngaihthlak lam hi a nuam daih zawk." tiin a lo chhang sam et mai. Ruatfela chu a han thaw deuh hak a, "Aaa.. i duh loh chuan sawi lo mai rawh, a ho lutuk." tiin a rawn chhan ve deuh va. Famkima chuan a aw chu a han thian kharh kharh a, "Umm, anih chuan keiman ka sawi mai ang aw.." a rawn ti ta nge nge a.

**********************************************

TO BE CONTINUE