SAMURAI ROSE (A JAPANESE-INDIAN FICTION SCI-FI THRILLER STORY) Written by : Aaron Malsawmdawngzuala Chapter - 3

 SAMURAI ROSE

(A JAPANESE-INDIAN FICTION SCI-FI THRILLER STORY)

Written by : Aaron Malsawmdawngzuala

Chapter - 3

**************************************************

Aiko-i chu khumah chuan phuar beh reng a la ni a, zing dar 3 a pel tawh. Nurse chuan a kut a syringe, kurogane elixir serum awmna chu a hum ran a. Aiko-i chu ava pan ta, Aiko-i chuan en pawh a lo en lo. A mu ngil at a, chunglam chu a en reng ringawt a. A mittui a tla zawih zawih a, a hmangaih ber Arjun-a'n a lo bum mai mai tih leh experiment atan bak a duh lo a ni tih chu awih har a ti takzet a ni.

A beidawng ngawih ngawih a, duhthlan tur dang a nei lo. A tawpna tur a ni tih ringin a inpawm tawp hi a ni ber mai, nurse chuan a banah chuan a rawn chiu ta. Aiko-i chu a che deuh hrut a, a hriau a lian bawk nen na a ti takzet. Chutah nurse chuan serum chu Aiko-i taksa chhungah chuan a hmet lut ta, Aiko-i pawhin serum a taksa chhunga rawn lut, vawt thla raih raih mai te chu a feel thei nghal a.

A tir chuan thip satliah ringawt a ni, mahse second reilote ah chuan a taksa chu a rawn na vak mai a. A rum leh deuh hak thin a, Arjun-a chuan monitor lam chu va panin, Aiko-i taksa chhunga elixir lut mek chu screen atang chuan a lo hmu thei vek a. Aiko-i taksa chu a na tial tial a, serum chu a ruh thleng chuan a lut zel a.

Arjun-a chu a khi suk a, "A tha dawn e, a thawk tak tak ania." tiin monitor screen chu a en reng a. Mashe nurse erawh chuan nuam a ti chiah lo, Aiko-i na ti hmel chu hmuh hrehawm a ti takzet. Aiko-i taksa chhung chu mei alh sa tak ang mai hian a rawn sa ta vak mai a, a awmzia chu elixir khan a ruh chu a ti kang a, mihring ruh pangngai ni lovin black steel-ah a chantir mek a ni.

Aiko-i na ti chu a t(r)e ta chiam chiam mai a, lab chhung chu a khawk rum rum mai. Arjun-a lah chu a phur tulh tulh a, black steel chuan Aiko-i ruh zawng zawng chu a tuam chhuak tep tawh. Aiko-i na ti lutuk chu a a mit a vai ruai tawh a, engmah chu a hmu fiah thei tawh lo. Nurse chu a ngaih a tha lo, Aiko-i tal nasa lutuk leh na ti lutuk chu hmuh hrehawm a ti takzet.

Arjun-a ava en leh a, a ni lah chu a lo nui ang vur vur a. Aiko-i pawh a na chu a tuar thei ngang tawh lo, a taksa chu a zawi tial tial a. A thidang deuh titih hial tawh, mahse mak tak maiin a mitthla ah chuan Kenji chu a hmu leh ta tlat mai. A hma a, a mumanga a awmna huan ah bawk chuan Kenji chu a lo awm a.

Aiko-i chu chiang tak hian a lo en reng a, mahse engmah a sawi lo. Aiko-i pawh chu huanah chuan a lo awm ve reng a, biak a tum a. Mahse a tawng thei hauh lo, Kenji chu ava pan phei zel a. Va khawih a tum chiah chu a ral riai riai a, Kenji chu meivap ah changin a khu ral ta daih mai.

Chuveleh Aiko pawh chu a lu a hai mup mup a, a mumang pawh chu a tawp chhunzawm nghal. A zawi tial tial a, "A zo ta, a tuam chhuak ta vek e." tiin Arjun-a chu a au nasa mai. Aiko-i chu a zawi hnawk a, nikhawhrelovin a awm ta der mai. Nurse chuan inthlahrung tak hian, "Doctor, a thi in ka hria." a han ti tham tiak a.

Arjun-a chu a rawn phei a, Aiko-i mar chu a han check a. A khi suk a, "A la dam alawm, serum khan a sawp chau em a, nikhawhrelovin a awm mai mai a nih hi." a ti sam et a. Tichuan dawhkan bulah chuan va kalin a chip siam, neurolink processor chu Aiko-i thluaka phum turin a han buatsaih tan a.

Nurse chuan Aiko-i chu a lo la thlek nasa mai, "Nurse, surgery ti turin lo inbuatsaih rawh." Arjun-a chuan a han ti vin thak a. Nurse pawh chu a phu zuk a, "Awle, doctor." tiin surgical knife te chu a han la khawm a. Chutia an inhruahman lai tak chuan Aiko-i chu a rawn harh thei tlat mai, a rawn meng kawk mai a.

A kut hlina chain chu awlsam tak chuan a tal chat a, chutiang bawkin a ke hlinna pawh. A taksa chhungah chuan elixir kah luh a ni tawh a, a awmzia chu a ruh zawng zawng chu black steel vek a ni tawh tihna a nih chu. Arjun-a chuan mak a ti kher mai, nurse pawh chu a va hawi let ve a.

Aiko-i rawn ding ta ur ur mai chu a hlau takzet, machine pakhat phenah chuan a biru nghal a. Aiko chu khum ah chuan a ding a, Arjun-a chu a melh ta run mai. Arjun-a chuan mak ti tak hian a en hu ringawt a, "Engtin nge a nih theih? Thil theih a ni lo." a ti nuah nuah ringawt a. Chutah khum atang chuan Aiko-i chu a rawn zuang thla a, Arjun-a chu a rawn pan ta.

A thinrim hmel em em a, a rum nghut nghut mai. Arjun-a chu a tawlh hnung a, "Aiko, nilo... min ngaithla teh, tha takin a sawifel theih ania." a ti khur dar dar mai a, a hlauthawng ve ta hle mai. Aiko-i chuan a pan hnai zel a, a kut chu a hum ruh a. Na thek thawkin vawi khat han hnek se chu Arjun-a chu a thi nghal thei hial ang, mahse Aiko-i chuan thinrim hle mahse kut a thlak thei tlat lo.

A mittui a tla zawih zawih a, Arjun-a chu a nihna engkim hre vek tawh mahse ala hmangaih miau a ni. A insehruh tung mai a, mahse engmah a sawi lo. Aiko-i chu a maimitchhing vang vang a, tichuan lehlam a hawi a. Lab tukverh lam chu a pan a, na em em hian a han hnek thuai mai a.

Tukverh chu a keh chuai mai a, a bul hnai a bang te pawh chu a khi nghal thawt thawt mai. Tichuan tukverh atang chuan Aiko-i chu a zuang chhuak ta daih mai a. Nurse pawh chu a bihrukna atang chuan a rawn chhuak a, Arjun-a chuan Aiko-i chu a en zui vawng vawng ringawt.

Thinrim hmel tak hian a insehruh tung a, "Zawng nghal rawh, vatin." a ti thum chher chher mai. Nurse hlau lutuk chu a la che mai lo, chutah vin zet hian, "Goons ho ko vat rawh, nung damin ka duh." a han ti leh vak a. Nurse pawh chu a phu zuk mai, "Awle, awle doctor." a ti khur dar dar a.

***********************************************************

Aiko-i chu mumbai khawpui lun em em mai ah chuan a tlan zel a, mipui chuan an thlir thup mai. Mumbai khawpui hi reh lai nei mang lo a ni a, zing dar 3 velah pawh pub a kalte, party na-a kalte leh street food dawr la inhawng te a tam thin a. Chutiang bawk chuan hemi zan pawh hian mipui an lo la vei nuai nuai a, Aiko-i mangang taka tlan chhe mek chu an en sup sup a.

Japanese nula a lo ni bawk nen, a lo hmeltha reuh phian bawk si nen. An en deuh thup mai a, a then lahin phone phawrhin thla te an lo laksak thul. Aiko-i pawh awmngaihna reng a hre lo, a hawi kual hru hru ringawt mai a. Chutah Arjun-a'n a koh, goons ho chu an rawn thleng a.

An zinga pakhat chuan ava hmu fuh ta, "Saw ta saw, saw ta saw a awm e. Man rawh u, lo kal vat ru." tiin a au ta lauh lauh mai a. An thawm chu hria in Aiko-i pawh chu a va hawi let vat a, goons ho rawn tlan phei a hmuh chuan rang takin a inher thut a. A tlanchhe leh ta, goons ho chuan an rawn um ve zel bawk a.

Chak thei ang ber chuan a tlan a, a hma ai daihin a tlan chak tawh lehgnghal. Mahse a khawpui hriat ngai loh a lo ni bawk nen, khawi berah nge tlan chhiat tur a hre lo. A hma zawnah chuan a tlan zel a, kawng kawi lo awm apiang ah chuan a khat tawkin a tlan phei leh zuk zuk thin a.

Rei fe a tlan hnuah chuan Dharavi, slum area chu ava thleng der mai. A thawm ah chuan slum area a cheng ho te pawh chu an rawn harh a, Aiko-i tlan chu an en sup sup a. Mahse Aiko-i chuan tlanna tur reng a nei tawh lo, kawng chu a chepin tlan a har tawh takzet. A ding ta tawp a, a hnungah chuan goons ho pawh chu an rawn thleng chawpchilh ve nghal.

An boss ber chuan, "Khawiah mah tlanna tur i nei tawh lo, nula.." tiin a han nuih vel huah huah a. Aiko-i chuan engtin mah a chhang lo, a thaw halh halh mai a. Chutah a ruh chu a rawn na leh vak mai a, a thingthi dawt a. A lu a dawm vawng vawng mai, remchangah la in goons zinga pakhat chuan a samah a rawn tham ve ngawt a.

Aiko-i chu a rawn meng thut mai, thinrim hmel tak hian chupa chu a melh hraw a. A kutah chuan lo man sakin a elh ta vak mai a, a ri thawk mai. A kut ruh chu awlsam takin a herh tliak ta mai a, chupa na ti lutuk chu a vial ngawng ngawng mai a. Pakhat dang a lo kal leh a, a tiang ken lai chuan Aiko-i lu ah tak mai chuan a rawn hlap pawp mai.

Tiang pawh chu a bung hmawk a, mahse Aiko-i chu na ti awm ang pawhin a lang lo. A rawn tho chhuak a, chupa chu a awmah a hnek pawp mai a. A leng lawp mai, midang ho pawh chuan an rawn beih chhunzawm leh nghal a. Mahse Aiko-i chuan awlsam tak tak hian a lo thal pawp pawp mai a, a sawp hneh ngang hlawm mai.

An hneh ngang lo, reilote hnuah chuan a thal fai ta vek mai a. Mahse slum area a cheng, mipuite chuan ngawi reng hian Aiko-i chu an lo thlir thup mai chu niin. Aiko-i pawh chu a ding ngawi reng a, mipui ho lah chuan ngawi reng hian an thlir thup ringawt a. Aiko-i chu a hawi kual hru hru a, chutah a tlan leh ta vak ringawt a.

**************************************

Zing dar ruk a ri tawh a, khua pawh a eng vek tawh. Arjun-a chu lab chhungah chuan a la awm reng a, tukverh kaw huah mai chu a en reng ringawt. A la mu eih lo, a rilru chu a hah tawh takzet. Nurse lo awm ve, Priya-i pawh kha a bulah chuan a la ding ve reng bawk a. Khang a mi leh sate, goons ho khan Aiko-i chu an man thei ta lo a ni tih a hriat avang chuan a thinrim zual hle bawk a.

A thutna atang chuan a tho thurh a, "Hrep tak a, mihring pangngai a ni tawh miah lo ania." tiin Priya-i chu a va en a. Priya-i chu a lo kun ngal mai, "Kurogane Elixir kha ka duh ang takin a thawk, a taksa kha a fan hneh lutuk. Mahse, a thluakah chip kha ka thun hman si lova, min rawn bei leh ngei ngei ang." Arjun-a bawk chuan a han ti leh a.

Priya-i chuan inthlahrung tak hian, "Doctr, engtin nge kan tih tak ang? Kan la mamawh si a, amah kha? Mahse a chak tawh awm ropui sia, tunge bei ta ang?" a lo ti ve nuah nuah a. Arjun-a chu a han ngawi vang vang a, "Tih theih pakhat chu kan la nei, mahse a risky dawn lutuk." tiin a chhang a.

Priya-i chuan phawk hru hian a en a, "Eng nge chu chu?" a lo ti vat a. Arjun-a chu a han thaw hak a, "Japan-a research ka beih lai khan Kurogane Elixir kha ka zirchiang a, a tlukpui tur serum siam chhuah ka tum a. Thla 2 vel ngawt ka bei a, siam chu ka siam chhuak. Mahse a thawk tha ang em tih ka chiang lo a ni, serum chidang chi ania. Ka siam dan tak phei chuan, Kurogane Elixir aia chak tura ka duan ania." tiin a chhang a.

Priya-i chuan a han en deuh hu a, "Eng nge a hming?" tiin a lo zawt nghal. Arjun-a chu a vei kual ang thuak thuak a, "Voltress serum ania, mihring-a a damdawi kan kap lut a nih chuan thahrui chakna chuah ni lo, healing factor leh felxibility te nen a keng tel vek a ni." tiin a lo chhang leh a.

Priya-i chu a han ngawi vang vang a, "Mahse doctor, kurogane elixir aia chak serum chu tu mihringin nge tuar chhuak zo teh lul ang ni? Aiko-i pawh khan a thihpui tep kha ania, tu mihring nge kan hman tawh chuan ang nga?" a lo ti hu mai a. Arjun-a chuan a lu a han bu nghauh nghauh va, "Aiko-i kha mihring pangngai, mihring satliah chu nise kha elixir zunzam khan nikhawhrelovin a awm tir ngei ang, rei tak chhung. Mahse ka lo ngaihtuah chiang lo a ni, professional samurai a ni a. A tette atanga strict taka train a ni bawk a, na a tuar thei lutuk. Chuvangin a rawn harh chhuak mai mai a nih kha, chuvang ania amah kher kha ka thlan ni." tiin a lo chhang a.

Hriatthiam loh hmel tak hian Priya-i chuan, "Anih chuan eng tin nge kan tih dawn tak?" tiin a lo zawt leh a. Arjun-a chu a han thaw leh deuh hak a, "Chu chu buaina ber chu a ni, Priya. Hun kan nei tawh lo, kan chhe vek tawh a ni ber mai." tiin a lo chhang leh a. Priya chu a mangan hmel kher mai, "Keipawh ka him dawn hauh lo, Aiko-i khan ka hmel a hmu chiang lutuk tlat." tiin a hlauhthawn hmel kher mai.

Arjun-a chuan Priya-i hawi sawn zeuh hlan chuan chloroform bur chu a la zeuh va, a rawmawl ah chuan a han tat deuh thuak thuak a. Priya-i chu a va pan a, "Lungngai suh Priya, tihdan ka hria alawm." a han ti a. Priya-i chu a rawn leh hawi a, "Eng nge i plan chu ni a?" tiin a lo zawt a.

Arjun-a chu a khi suk a, "Ka sawi ang khan hun kan nei tawh lova, chuvang chuan a hnaivai a mi hi hman mai tur. Entir nan, nangmah ang te.." a ti ta mai a. Priya-i chuan a hrethiam nghal vat a, tlan chhiat a tum nghal a. Mahse rang lutukin Arjun-a chuan a lo man a, mipa tha nge nge chu a hneh lo kher mai.

A rawmawl ken lai chuan Priya-i hmui chu a hup sak a, Priya-i pawh chuan chloroform chu a lo hip hrawk mai. Chawp leh chilhin nikhawhrelo chuan a awm nghal a, a taksa chu a zawi riai riai mai. Arjun-a chuan a pawm nawlh a, Aiko-i a mutna hnu, khumah chuan a mut tir ve ta a.

A samah chuan a han chul vel hliau hliau va, "Tihpalh, Priya. Mahse duhthlan tur dang ka nei lo a ni, min ngaidam rawh. Aiko-i hi nungdam ngeia lak let leh ka duh, nangmah chiahin chu chu i ti thei dawn." tih pah chuan a tho thut a. A serum siam chhuah ve liau liau, Voltress serum chu a scret wardrobe atang chuan a la chhuak a.

A pawl deuh vat mai, a rawng chu a tak em em bawk. Syringe ah chuan a han hip lut hrawk a, tichuan Priya-i mutna lam chu ava pan leh ta. Priya-i chu a han phuar nghet leh te te phawt a, tichuan a vein chu a han zawng tan ta a. Voltress serum chuan a chiu ve ta, Priya-i erawh nikhawhrelovin ala awm reng thung.

Tichuan serum pawh chuan a hna chu a thawk nghal thuai a, Priya-i chu a rawn rum ta nghut nghut mai. Monitor ah chuan Arjun-a chuan Priya i taksa chhunga serum lut chu a en ve leh a, rin ai tak chuan a thawk tha phian mai. Chutia serum-in hna a thawh lai chuan Arjun-a chuan a hma a Aiko-i thluaka thuna  tum, chip te tak te mai kha ava la a.

Tichuan surgical knife nen Priya-i lam chu ava pan leh ta. A sam chu a ziah kawlh sak vek a, tichuan surgery chu a bei tan ta. A thluakah chuan chip chu a dah sak a, a bei rei vak lo hle bawk. Scientist a nih mai bakah surgical lam chu thiam tak a ni, tichuan a hlaim te chu a thui leh vek a.

Chutah Pryia-i lu a thuina hnuhma leh hliam te chu amahin a rawn dam leh ta vek mai a nih chu, Arjun-a chu a meng kawk mai. A nui huk a, "Yes, a thawk...a thawk e. Healing factor, a theih tak tak." tiin a lawm chu a au vak vak mai. Priya-i mar chu a han dek a, a lo la dam bawk.

Arjun-a chu a lawm kher mai, "Dam chhuak ngei ang che, Priya. I lo harh meuh chuan chip kha a activate ang nga, ka thu thu in i awm tawh ang. Priya-i i ni tawh lo ang nga, mihring i nihna zawng zawng pawh a hre vek tawh ang. Tun atang chuan ka robot i ni tawh ang nga, i hming pawh VOLTRESS a ni tawh ang." tiin a han nui var var a.

******************************************

Aiko-i chu a tlan zel a, slum area pawh a pel thui tawh khawp mai. A thaw hlawi hlawi a, a mangang bawk si chu a tap pur tawh mai. Engtin nge a awm zel ang a hre lo, chenna tur pawh a nei tawh der mai si lo. A hawi kual vak vak ringawt a, chutah Budhhist temple pakhat chu a awmna atanga hla vak lovah chuan a va hmu thei a.

A va tlan leh vang vang a, hah pawh a sawi thei lo. Chutah a thlen dawn tep ah chuan a ruh chu a rawn na leh vak mai a, a lu a rawn hai leh ta muai muai mai. A thingthi hnawk a, a then chawk chawk mai. Mahse a inthing harh vat a, a va tlan leh ta vang vang a. Rei fe hnuah chuan temple chu a thleng ta, step ah chuan a tlan chho nghal a.

A thingthi hnawk a, Shakyamuni Buddha lim(statue) hmaah chuan a bawk thlawp mai, "Min pui rawh, khawngaihin... khawngaih takin min pui rawh." tiin a thaw tawk tawk a, a aw pawh a chhuak hleithei lo. A kalna temple hi Mumbai-a budhhist temple pakhat, Dharmachakra Buddhist Vihara Temple a ni.

A harsatna te chu Buddha lim hnenah chuan a thlen vek a, minute 10 hnuah chuan a taksa na leh sil them thum te chu a rawn dam vek mai. A tho kang a, a mittui chu a hru hul a. Temple chu a lo reh diak mai, kalna tur dang a hre bawk si lo. Temple-a awm reng lah thil dik a ni bawk si lo, beidawng tak chuan kal sawn leh mai chu a tum a.

Mahse temple gate a thlen hma chuan a hnung atang chuan Japanese tawng ngei mai hian, "Tanaka chhungkaw zinga mi i ni em?" rawn ti ri hi a hria a. A ding chat mai, hnunglam ava hawi a. Indian monk pakhat chu step bulah chuan a lo thu a, a lu a kawlh vek a. Aiko-i chu en pawh a lo la en chuang lo, maimitchhing chungin a lo bia tihna a nih chu.

Aiko-i chuan a en vung vung a, "Tunge i nih?" tiin a zawt a, Japanese tawng a hmang ve tho a ni. Monk chu a rawn meng a, a rawn ding chhuak a. Aiko-i chu ava pan a, "I ni em? Aiko Tanaka, Takashi Tanaka fanu neichhun kha i ni em?" tiin a zawt leh a. Aiko-i chuan apa rawn tirh a nih ringin a hlauthawng deuh va, "AW ni e, tunge i nih ka tih chu?" tiin a tawlh hnung deuh hreut a.

Chiang takin Monk chuan Aiko-i mitah tak chuan a en a, "Kum tamtak chhung i pa hnuaiah hian ka lo thawk ve thin tawh alawm, mahse i naupan lai bak kha ka hmu leh tawh miah lo che a ni." tiin a chhang a. Aiko-i chu a han ngawi deuh vang vang a, "Eng nge ka lakah i duh? Eng nge hetah i tih?" tiin a zawt leh a.

Monk chu a han thaw hak a, "India ah i rawn kal tih hi ka hriatna a rei tawh alawm, Mumbai khawpui chhunga budhhist temple hrang hrang ah hian ka awm kual thin a. Ka hmu zeuh zeuh thin che a ni, tichuan a rukin ka ngaihven reng thin che alawm. Puih i ngai tih ka rhia, i chungah thil tha lo tak a thleng a ni tiraw?" tiin a lo zawt let daih mai.

Aiko-i chu a hnuk a ulh a, a mittui a rawn tla leh nghal zawih zawih mai. Tichuan a chanchin chu a sawi ta a, Arjun-a nen Tokyo University atanga an inchhar dan te, Japan atanga India rama an tlanchhiat dan te. A naupan laia apa Takashi-a'n a tihduhdah thin ziate leh Arjun-a'n excperiment atana hman a tum thute, a tlanchhuah dante leh Arjun-a'n a phatsanna zawng zawng te chu engkim a hrilh ta vek a.

Ngun taka Monk-i'n a lo ngaihthlak hnu chuan a lu a han bu nghauh nghauh va, "Min zui rawh, Aiko. Min mamawh takzet a ni tih hi pawm tawp la, ka puihna tel lo chuan Mumbai khawpui hi damin i chhuak lovang. Tunah hian min ring lovin, min kalsan pawh ni la relote hnuah min rawn pan leh dawn tho." tiin a hrilh a.

Aiko-i chu a ngawi vang vang a, "Engtin nge ka rin theih ang che?" tiin a zawt a. Monk chu a thaw hak a, "Min ring daih tawh, i chanchin zawng zawng min hrilh zawh chiah kha. Aiko, i hmahun hi a thimin a hlauhawm takzet tih hria la, hmelma i nei dawn chauh tih hre bawk ang che." tiin a lo chhang leh a.

Aiko-i chu a inngaihtuah leh vang vang a, "A tha e, ka zui ang che." a ti ta nge nge a. Monk chu a kal sawn a, Aiko chuan a zui zel a. Chutah temple sir a gate pakhat chu a hawng a, a lut ta daih mai. Aiko-i pawh chuan a zui ve zel a, chutah huan zau tak mai ah chuan an lut nawlh mai.

Aiko-i chu a hawi kual a, a mumanga huan a hmuh thin nen chuan in ang a ti takzet. Mahse engmah a sawi lo, thingkung lian tak hnuaiah chuan a ding a. Aiko-i pawh chu a ding ve chat bawk a, "I hun tawn hi a harsa takzet a ni, Aiko. Mahse hei hi hre erng rawh, kawng harsa tak kan hmachhawn lai pawh hian rinna nena kan beih chuan kan tuar chhuak thei ania. Chutianga i awm theih nan chuan ka pui ang che, i tana Pathian tirh ka ni." tiin Monk chuan a hrilh leh a.

Aiko-i chuan a chhang let lo, beiseina pawh a neih phah ve deuh va. Mahse chutin Indian Monk chu a ring ngam chiah chuang lo, duhthlan tur lah a nei bawk si lo. A taksa chhungah Elixir a awm tawh a, mihring pangngai a ni tawh lo tih pawh a inhre ve reng. A hma hun lo awm tur atan chuan puitu a neih a ngai bawk si, Monk chu a innghahna a ni ber tawh.

****************************************

Zing dar 6:30 a ni a, Agent Alex leh Ravi-a te pawh chu Box tlakna hmunah chuan an lo awm leh der tawh mai. Box pawh chu lak chhuah mai theih a ni tep tawh a, an la bei mek a ni/ Agent Alex chu motor atang chuan a rawn chhuak a, "Box pawh tun atanga rei lo te ah lakchhuah a nih tawh hmel a, mahse kan fimkhur hle angai a ni" a han ti a.

Ravi-ah pawh chuan, "Ni e, eng thil tak nge a chhungah hian awm kan hre der mai si lova, office lamah an phawrh chhuah veleh phur phei vat ila a tha ang." a lo ti ve bawk a. Chutih lai chuan site manager pakhat chu a rawn kal a, "Awle, min lo ngaithla lawk teh u. Kan protocol tar chhuahte hi zawm hram hram ila. Kan lai chhuak dawn hnai a, duty te i fimkhur leh zual ang u." a rawn ti lauh lauh mai a.

Operator pakhat chu rawn au ve leh in, "Barrier ho hi kan thiat ang nga, chu veleh fimkhur takin box hi Vortex Legion main lab-a phurh phei turin kan dah bawk ang." a lo ti ve lauh lauh bawk a. Hydrolic lift hmang chuan box chu an la chhuak thei ta a, midang ho chuan barrier an hung ho chu an lo thiat ve mek bawk.

Khawl chu ari vut vut hlawm mai a, zing dar 8 vel a ni. Alex-a chuan a naute che vel chu a han thlir dauh dauh va, "Ravi, engkim hi lo document vek ang che.Box hi transport a nih dan kimchang nen report lo peih sa vek bawk la. Engmah bang awm lovin, lo note thlap ang che." tiin RAvi-a chu a hrilh a.

"Tehreng mai, Sir. Process engkim ka lo chhinchhiah ang nge, theih tawp ka lo chhuah ang."tiin a lo chhang a. Box pawh chu an la chhuak thei ta, a phurhna tur bik otor ah chuan fimkhur tak hian an hlang kai a. Chu veleh Operator chuan, "Box pawh platform ah kan dah tawh e, kan phurh pheina tur a hla deuh dawn a. Secure taka ven ni se, kawng lakah buaina awm lo turin i inpeihsa thlapm ang u." tiin a rawn au leh lauh lauh va.

SUV car lian tak maiah chuan box chu an hung ta ran mai, chu motor chu Agent Alex-a'n zan khat chhung leka a design a nih mai bakah, zan khat chhung lekin an company advance technology sang tak hmangin a siam zo nghal vek a ni. Alex-a chuan SUV khalh tu tur driver chu a va pan a, "He SUV hi special taka siam niin bullet proof a ni bawk a, box hi a him ngei tur a ni." tiin a han hrilh a.

Driver chuan a lu a lo bu nghut a, "Awle, Sir. Him dam takin kan thlen ngei ang, transfer a nih hma in vawikhat kan lo exam nawn leh bawk ang." tiin a lo chhang a. Tichuan box pawh chu an dah fel ta, khawl changkang tak tak hmang chuan a bo mai loh nan tiin an hung thluah a. TIchuan driver chu SUV chhungah chuan a lut a, an tlan liam ta.

Ravi-a chuan a en zui vawng vawng a, "Engkim plan angin a kal phawt chu ania, kan che sual em lovang chu." a han ti nuah nuah a. Alex-a chu a lo nui huk a, "Ka hrilh chiang vek tawh alawm, Ravi. A him ang, kan thil hmuhchhuah tawh ah chuan ka venhim nasat ber pawl a la ni ngei ang." tiin a lo chhang a.

Site Operator pakhat chu a lo kal leh a, "Sir, SUV kha security panga vel kan zui tir bawk e, a him ngei kan beisei." a rawn ti ve leh a. Ravi-a chuan a lu a lo bu nghat nghat a, "Kan operation hi a hlawhtlin phawt chuan khitah kan awm tawh ang, he box hi a hlu takzet dawnin ka hria." a han ti nuah nuah a.

Agent Alex-a chu a han thaw hak a, "Tun atan chuan a him phawt a, mahse kan hmelma te hian, tu emaw ber chuan he box chungchang hi a rawn hriat vaih chuan kan buai dawn ania. Chuvang chuan security pawh a tight hle tur a ni, a chhunga awm kan hriat hma chu tuman min chuhpui tur a ni lo." a han ti chang deuh fak a.

***************************************************************

Zing dar 8 a pel duai tawh a, Dharmachakra Buddhist Vihara temple chu Kenji leh a naute chuan an thleng ve ta. Temple kawtah chuan an ding khawm a, "Zing dar 5 atangin kan awng tawh, buddhist temple hnuhnung ber chu hei hi a ni tawh ngei ang." Hiro chuan a han ti nuah nuah a.

"Beidawn loh tur, hei hi kan check leh phawt ang nga. Chuta kan la hmu lo cheu a nih chuan a aia uluk zawkin kan zawng leh ang, Aiko-i hi kan hruai haw ngei tur a ni." Kenji-a chuan a han ti chang fak a. Tichuan a mal te te chuan an inthen hrang a, tichuan an kal darh ta a. Eng eng emaw chhma phun bul bul, tawngtai mek ho pawh an thawm a ring kher mai.

Rei fe hnuah chuan KEnji chuan putar pakhat, temple sir a ngawi renga lo thu chu ava pan a. A aw a han thian kharh kharh a, "Min lo hrethiam lawk, ka pu? Henu hi i lo hmu ngai em?" tiin Aiko-i thlalak chu a entir a. Kenji hi Aiko-i aia lehkha thiam leh zir sang zawk a ni a, Takashi-a'n amah kher a thlanna chhan pawh tawng hrang hrang a thiam vang a ni.

Hindi thiam em em a ni bawk a, chuvanga India rama Aiko-i zawng tura tir pawh a ni reng bawk a. Chu putar chuan thlalak chu a han en vang vang a, "Ehe, ka hria. He asian nu hi, tukin zing dar 7 vel ni ta in ka hria, ka chiang tawh lo. A lo kal ngei alawm, ka hmu chiang lutuk." a lo ti ta hlauh mai.

Kenji chu a meng nghal hrawk a, "A ni maw? Khawnge tunah a awm? Tu nen nge an awm?" tiin a zawt leh nghal vat a. Putar chu a han inngaihtuah vang vang a, "Monk pakhat nen an inbia a, mahse ral khat atangin ka hmu a. Eng nge an sawi erawh ka hre thei lo, chuan an inzui a, kan kal bo ta daih a nih kha." tiin a lo chhang leh a.

Kenji chuan a lu a han bu nghauh nghauh va, "Anih leh khawi lamah nge an kal?" tiin a lo zawt leh a. Putar chu a han ngawi vang vang a, "Temple hnung lamah sawn an kal a, mahse an lo let tawh lo. Chuan maw, henu hi a hma pawn hetah hian ka hmu tawh. Mipa pakhat nen an lo kal thin, chupa chu Indian mi a nia." a han ti leh a.

Chu veleh Kenji chuan Arjun-a thlalak chu phawrhin, "Hepa hi a ni em?" tiin a zawt nghal vat a. Putar chuan thlalak chu a han en leh vang vang a, "Aw, hepa hi ni e. Amah pawh hi ka hria, doctor lar ve tak a nia. Arjun Malhotra a nia a hming chu, Mumbai doctor ah chuan hriat hlawh ve tak a ni nghe nghe a sin." tiin a lo chhang leh a.

Kenji chu a phur tawh khawp mai, "A address i hria em?" tiin a zawt leh nghal a. Putara lah chuan a lo hre leh zel a, "Hria e, Shanti HEights, Sri Nagar Road ah, apartment ah a awm." tiin a lo chhang leh a. Kenji chu a khi deuh sak mai, "Ka lawm e, ka pu." tiin a kalsan ta a. Temple atang chuan a chhuak a, a naute chu a ko khawm a.

"Aiko-i hi tukin zingah he temple ah hian a kal a ni awm a, putar pakhatin min hrilh a ni. Monk pakhat nen an inbia a ti a, mahse chu aia pawimawh chu Arjun Malhotra nen helai hmunah hian an lo kal fo thin a ni awm e. An address pawh ka hre nghal a, Shanti Heights, Sri NAgar Road a ni. Tunah kan kal nghal bawk ang, a rang thei ang berin." Kenji chuan a han ti lauh lauh va.

A thiante pawh chuan a lu an lo bu nghat nghat hlawm mai, "Aiko-i hi engti kawng zawng pawn kan la let tur a ni, chu chu Sensei Takashi order a ni a. Kan zawm ngei bawk tur a ni, Tanaka chhungkaw mualphona su kiang tur hian kan pawimawh hle a ni tih hi hre thar leh ang u." Kenji bawk chuan a han ti leh a, tichuan Arjun-a apartment lam pan chuan an kal leh ta a.

****************************************************

TO BE CONTINUE