SAMURAI ROSE (A JAPANESE-INDIAN FICTION SCI-FI THRILLER STORY) Written by : Aaron Malsawmdawngzuala Chapter - 5

 SAMURAI ROSE

(A JAPANESE-INDIAN FICTION SCI-FI THRILLER STORY)

Written by : Aaron Malsawmdawngzuala

Chapter - 5

***********************************************

Zan a ni a, Aiko-i chu a room, chhuatah chuan mu in a hnar bawrh bawrh mai. A room kawngka slide theih chu a rawn inhawng riai riai a. Shantanu a lo ni, light chu a on nghal bawk a. Dimte chuan Aiko-i chu a han sawi deuh dat dat a, "Aiko, tho teh. Thil hmuh tir che ka duh ania, harh teh." tiin a kai tho va.

Aiko-i pawh chu lo harh nghal in a ham bai bai a, "Tun ang hunah eng nge ni ta, Master?" tiin a lo zawt hu mai. Shantanu chu a ding a, "Ka room ah min lo zui rawh." tiin a chhuak leh daih mai. Aiko-i pawh chu a tho va, Shantanu chu a zui a. Room ah chuan a hruai lut a, tichuan bang lam chu panin hidden panel a lo awm a. A hawng a, chutah chuan katana nalh em em mai, tle sar mai hi a lo inhung ran mai a.

Aiko-i chuan mawi a ti ngang mai, "A va mawi tehreng em." tiin a phun sap a. Shantanu chuan ngunhnam chu en vang vang pah chuan, "He katana hi i pa, Takashi-a min pek a ni a. Kum 20 kal ta khan, i pa he legendary samurai a ni a. He katana hi a zirlaite zinga tha ber pek a tiam a, chu chu keimah ah hian a hmu a. Tichuan he ngunhnam hi min hlan ta a ni, khami hnu khan samurai zirtirtu ah min hlang kai bawk a ni." tiin a hrilh a.

Aiko-i chuan uluk tak hian a lo ngaithla a, "I pa khan he ngunhnam hi a ngai hlu em em a, a roh em em bawk a ni. Thian tha tak kan ni chung khan ka zah em em a, a chhan chu ka master a ni tlat a ni. Tichuan kei aia phu an awm loh thu min hrilhin min hlan a, mahse khami hnu, India a ka let leh hnu hian i pa nen khan kan inbe ta miah lo a ni." Shantanu bawk chuan a han ti leh a.

Aiko-i chuan a bul dawhkana apa, Takashi leh Shantanu, an tlangval deuh laia an thlalak dunna frame chu a va hmu a. A va en chiang a, "Ka hre thiam lo, MAster?" a ti chuai raih mai. Shantanu chuan ava pan a, "I pawm a ngai, Aiko. Samurai satliah i ni tawh lo, tunah chuan nangmah leh i rilru zawng zawng thunun bak zir i ngai tawh lo. Kha black steel avang khan mi danglam i ni tawh a, skills leh experience ah chuan engmah buaina i nei tawh lo. Chuvang chuan he ngunhnam hi i phu a ni, i ta a ni tawh e." tiin a hrilh leh a.

Aiko-i chuan katana chu a han en leh vang vang a, "Ka inpeih em ka hre lo, kan tan chauh kha a ni sia." a han ti leh nuah nuah a. Shantanu chu a khi suk a, "Samurai diktak chuan skills chauh ni lovin, a taksa chhunga a thlarau nen zawng zawng tang kawpin thil a ti thin. Ka upa tawh a, hrisellohna avangin keichu ka retire tawh. Keimah anga ka rintawk tur awmchhun chu, ka hmuh chhun chu nangmah hi a ni." tiin a lo chhang leh a.

Tichuan a pa, Takashi nena an thlalak chu ava la a. A en vang vang a, "Takashi khan min hrilh thin a, samurai chakna diktak lan chhuahna chu tharum lamah emaw, insual a thiamna lamah a inghat lo. An thinlung leh an rilru ah a innghat zawk, chu chu thang thar samurai lo la ni turte hnenah pawh inhlan chhawn a, infuih chhoh zel hi nise, a duhdan ber a ni." a han ti leh a.

Thlalak chu dawhkanah chuan dah lehin Aiko-i chu a han en leh a, "He katana i hi ta a ni e, Aiko. I phu takzet a ni, i pa pawh khan na tak leh hahthlak takin a enkawl che a, i chak loh a duh lo a ni. A chhan chu keimaha a hmuh ang chiah khan, nang hi a tha ber, samurai tha ber i nih a duh vang chauh a ni. I pa chuan chu chu nangmah ah a hmu lo a ni mahna, mahse keiman ka hmu a ni." tiin a hrilh leh a.

Aiko-i chu a pen hnai a, katana chu muang chang chuan a han la kang a. Shantanu bawk chuan, "Rose par mawi tak par chhuak ang mai hian sipai chak tak i nihna hi par chhuak se la, a mawina leh midangte hlimna a thlen ang hian nangpawhin i thiamna te leh i chakna te hi midang tan hlimna ni ve bawk rawh se. Aiko Tanaka, tun atang chuan SAMURAI ROSE i ni tawh ang." tiin a hrilh leh a.

Aiko chu a nui var var a, a mittui chu a hru zeuh va. Tichuan chu katana, apa Takashi-a siam ngei mai chu a han hum ran a. Dim te te chuan a han vai kual vel a, a hlim kher mai. Shantanu bawk chuan, "Hre reng tawh, samurai diktak chu a taksa chauh i lovin, a thinlung, a rilru leh a thlarau thlengin a chak tur a ni." a han ti leh a, "Ka lawm e, Master." tiin Aiko-i chuan chibai a buk a.

*********************************************

Zing a lo ni a, dar 8 vel chauh ala ni. Mahalaxmi Racecourse hmunah chuan open-air conference neih a ni a, politician ho inhmu khawmin mipui pawh an tam hle. Inthlan a hnai a ni chek ang chu, an ri mar mar hlawm a. Ral lehlam zawn chiah, kawngpuiah chuan SUV dum nalh tak mai hian Alex-a leh Ravi-a te pawh chu an lo tlan ve mek bawk a.

Alex-a chuan ava thlek deuh hu a, "India hi chu a mak ve ngawt mai, ti khawp hian a tawt a nia. Mahse area zau deuh deuh hi tiang politician ho hian an rawn awh pawp pawp zel a, traffic zam lo chi hi a ni lo reng reng." a han ti nuah nuah a. Ravi-a chu a lo khi suk a, "America nen tehkhin chi a ni lo, Sir." tiin a lo fiam zauh va.

Alex-a pawh chu a lo nui ve huah huah a, "Engpawh chu nise he box hi kan la venhim rih phawt chu a ngai a ni, kan hawng thei der mai si lovah." a han ti leh nuah nuah a. Chutah t(r)ek tla ri niawm tak, ri dup mai chu an hria a. An phu nasa kher mai, an bul hnai lawk a ni tih a chiang bawk.

An rin ang ngeiin ral lehlama, conference lo nei te lamah chuan khu vut vut chu an hmu a. Chutah stage ah tak chuan t(r)ek ang tak mai, pawl phut mai chu a rawn phe thla leh zawk zawk mai a. A t(r)ek leh chuai chuai a, stage pawh chu a chim ta rum rum mai a. Alex-a pawh chuan chunglam atanga t(r)ek ni awm tak, conference neihna lama tla chu a lo hmu pha ve bawk.

"Ravi, motor ti ding rawh." tiin Alex-a chu a au vak a. Ravi-a pawh chuan a tiding a, rang lutukin Alex-a chu a chhuk nghal a. Traffic jam nghalin horn a ri nghal chuah chuah a, Alex-a chuan eng chiah nge thleng a hre mai thei bik lo, kalkawng chu a tawt em em a. Mipui tlanchhia nen, an lo innek buai chhen bawk si nen.

Conference na hmun chu a thleng hleithei lo, mipui karah chuan a kal zel a. An tam em em mai lehnghal a, a then hlauvin an au tuar tuar a. Chutih lai chuan conference-na hmunah chuan tu emaw hi chunglam atang chuan a rawn tum tha ri dup mai. Voltress a lo ni a, a suit chikim nen lo langin amah lah chu a pawl phut mai bawk a.

Security guard an rawn kal a, mahse Voltress chuan awlsam tak hian khawih pawh khawih lo hian a kut a lo phar a. Chutah a kut atang chuan electric spark na tak mai chu a rawn kap chhuak a, security ho zawng zawng chu a rualin electric chuan a shock hrep a, an thal nghal der mai.

Chutah a hawi kual hru hru a, "AIKO, khawnge i awm?" tiin a au vak vak mai a. Chu veleh a dulah chuan ngunhnam a rawn inkhawh tlum pawp mai, a phu zawk a. Mahse na ti awm ang pawhin a lang lo, a hma zawn chu ava en a. Kenji chu a lam panin thinrim hmel tak hian a rawn tlan phei a, a sir atang chuan Hiro leh Kaito pawh an katana keng chungin an rawn tlan ve bawk.

Voltress chu a khi suk a, "Nangni bawk maw?" tiin a phun sap a. Hiro leh Kaito chu a kut pahnih hmang chuan electric spark hmang chuan a kap leh a, anni pawh chu an khur cher cher a, an tlu ve tawp mai. Kenji chu a rawn thleng tep tawh a, Voltress chuan a kap ve ta. Mahse a invawrh vak a, a kah thleh hlauh mai.

Voltress chuan a dula katana chu a phawi pawp a, Kenji chu ava vawm ve ta. Mahse Kenji chuan a lo dawng chat a, "Eng maw i sawi kha? Khawiah nge Aiko i ti em ni? Aiko-i chuchang hriat i nei em ni? Tunge i nih?" tiin a han vin thak thak a. Voltress chu a khi vur vur a, a tlan thut mai.

Hiro leh Kaito te chu an rawn tho va, "Um vat ru...inthen hrang ula." Kenji chuan a han ti vin thak a, tichuan an um ta. Chutih lai chuan Alex-a chu a rawn thleng ve chiah a, Voltress erawh a hmu ve hman hauh lo. Kenji-a, katana nena a tlan liam lai chu a hmuhman a. Mak ti tak hian, "Tu phiangsen nge mawni le?" tiin a phun sup a.

**************************************************

Rang takin Alex-a chu car lamah chuan ava tlan let leh a, Ravi-a chu a chhungah a lo la awm reng a. Mak ti tak hian, "Eng thil nge thleng a, Sir?" tiin a lo zawt vat a. Motor chhunga rawn luh pah chuan, "RAvi, back up ka mamawh. Tunah call la, keiin motor hian ka va umzui ang, ka hmu hman alawm, a tlanna lam pawh ka hmu hman." tiin a lo chhang a.

Ravi-a pawh chuan, "Awle, Sir." tiin a chhuk nghal a, a call ta nghal a. Alex-a chu chak tak chuan a tlan nghal a, motor te chu a su phei ang thuak thuak a. Chutih lai chuan Kenji, Hiro leh Kaito te chu inthen hrangin Voltress chu an umzui ve zel bawk a. Mahse Voltress chu um phak har tak a ni, maimawm ang mai hian bangah te chuan a vak lawn zawt zawt a.

Alex-a lah chuan Kenji chu ral khat atang chuan a lo hmu leh hman a, a va pan zel a. Kenji chuan Voltress chu a zawn hrep hnu ah chuan bawlhhlawh paihna hmun, Dara(place) bula a tlan phei lai chu ava hmu hman a. A va zui leh zel a, mahse Votress chu bangah chuan a lawn kai leh zawt zawt mai.

Kenji a chet ve hma chuan a hnungah chuan Alex-a chu a SUV dum hmang chuan a rawn thleng chawpchilh ve nghal a, Kenji pawh chu a hawi let vat a. Alex-a chu motor atanga rawn chhuakin pistol a rawn phawrh a, "Che tawh suh, ding rawh." tiin a tin nghal a. Kenji chuan rum taka lo melhin, "Lo inrawlh suh." a lo ti vin thak a.

Alex-a chu ava kal phei a, "Tunge i nih? Eng vanga buaina siam nge i nih?" tiin pistol chuan ala tin reng a. Kenji chuan a katana chu a phawrh chhuak a, "Tihnat che ka duh lo, khawngaihin kal bo zawk mai teh." a lo ti leh khur khur mai. Alex-a chu a nui ta huah huah a, "Aww.. ka hrethiam e." tih pah chuan Kenji-a inthuamna vel chu a han en vang vang a.

A khi leh suk a, "ACtion movie flop deuh deuh-a chang ve tura in audition te zinga mi kha i ni tiraw? Huh... hei chu movie a ni lo, real-life a nih hi, Bawiha." hmusit tak chuan a han ti vel a, hetah hian english-in an inbia a ni. Kenji chua  thinrim hmel kher mai, "A tha e." tih pah chuan a katana chu hum nghet sauh sauh vin Alex-a chu a va pan ta a.

Alex-a chuan a pistol chu a han hmet puak dur a, mahse awlsam lutuk tak mai hian Kenji chuan a lo bum zeuh mai, Kenji hi professional samurai a ni tih kan hriat kha. Alex-a chuan mak a ti takzet, a han kap nawn leh a. Mit khap aia rang hian Kenji chuan a katana chu a lo vai zeuh va, silai mu rawn thlawk tak mai chu a lo sat bung hmawk thei a nih chu.

Alex-a chuan a sunglass chu a phelh a, "Wow, ava bawn ve. Pu Chem vei thiampa, The Matrix movie reboot-a changtupa thar tur hi bawlhhlawh bawm a an chhar mai mai a ni ang tih ka lo ring ngai miah lova.." tiin a la deuh sawh hram a. Chutah KEnji chu a rawn tlan thut a, Alex-a chu rawn sah a tum ta mai a.

Alex-a chu a lo awm sawn hman hlauh mai, Kenji chuan a SUV motor chu a sah ran sak phah a. Thinrim hmel tak hian, "Mawla, a thar ka lak zawh chiah a nih hi. Ka va ui e, i chawi vek ang." tiin a lo vin hrep mai. Chutah a ipte atang chuan lipstick ang tak mai hi a rawn phawrh chhuak a, hmehna tur sen hi a lo awm a.

Alex-a chuan a han hmet zeuh va, chutah a rawn sei thut a. Tiang sei tak, thir chang tak atanga siam ang mai ah chuan a rawn chang ta. Alex-a chuan a han lek kang a, "Khai le, tunge hmanraw nei tha zawk kan hria ang chu." tiin a tin ve ta ran mai. Kenji chu a khi suk a, "Ka dim deuh dawn che nia, lo kal ta che." tiin a lo chhang let ve sak a.

Tichuan an inbei ta a, an hmanrua ve ve hmang chuan an che rang dun kher mai. Alex-a pawh hi martial artist thiam tak a ni a, skill turu tak a nei ve bawk a ni. Mahse samurai nge nge, chutah pawh japanese professional ngat lehnghal chu speed ah a pha lo ngei mai. A hmanrua chuan lo indang ve nasa thin mahse Kenji kut thlak a nat em a vang chuan a pai leh khut khut thin a.

Chutah vawi hnih thum vel chu han khawih fu zeuh zeuh thin mahse, Kenji chuan a katana chauh ni lo, a ke pawh a hmang thiam nang mai. Alex-a chu a tlawh thal leh tual tual thin a, rei fe chu an insual tawh. Chutah na em em mai hian Kenji chuan a ngunhnam hmang chuan a rawn vai leh pawp a, theih tawp a na hian a tiang hmang chuan Alex-a chuan a lo vai ve bawk a.

A force a nat em avang chuan an hmanrua ve ve chu leiah an thlauh va, Alex-a chuan tiang chu chhar tumin a tlan thut a. Mahse a kawr hnungah chuan Kenji chuan lo man hmanin a theh thal tawp mai, tichuan a katana chu va chhar ve a tum a. Mahse Alex- chuan va bawh thutin a katana chhuata tla mek chu a chhir sawn daih a, Kenji chuan a lo keuh thal tawp mai.

Tichuan hmanrua an nei lo ta ve ve bawk a, hand to hand combat hmanga an inbeih angai ta. An han insual leh ta tak tak a, mahse Alex-a chuan a hneh ta ngang lo. Kenji chuan a la dim deuh zawk mah a, a tawpah phei chuan Alex-a chu a tho thei tawh lo. Chhuatah chuan a bawk reng a, Kenji chuan khawih zawm a tum bik lem lo.

A katana chu a chhar a, Alex-a lamah chuan a va phei leh a. A ngunhnam chu a paiah a thun a, "Misual ka ni lo, chu chu i hriatthiam a ngai." tih pah chuan a kalsan ta daih a. Alex-a chu a rum tuah tuah a, "Awle, nakinah chuan ngunhnam nilovin hmunphiah rawn keng tawh la a tha ang. Bawlhhlawh ho zawng zawng i sat darh vek alawm le, hnawk sa tawh nen." a ti nuah nuah a.

A tho tual tual a, call a dawng nghal. A phone chu a phawrh a, Ravi-a a lo ni. "Hello Sir, khawiah nge i awm?" tiin a rawn zawt a. Alex-a chu a thaw hluai a, "Khawi atanga lo chhuak nge pawh ka hre lo, asian pa pakhatin min lo inkhualtelem pui hrep alawm mawle...ka lo kal." tiin phone chu a dah a, motor ah chuan a lut a.

********************************************

Chawhma dar 9:30 vel a ni a, Aiko-i chu Shantanu in bula kawtzawl, nuam leh hring dup maiah chuan a katana thar nen chuan a lo practise mek a. In atang chuan Shantanu chu a rawn chhuak a, a kutah hian pakage pakhat hi a keng bawk a. Aiko-i practice lai vel chu nui chung hian a en reng a, a chhuan hmel takzet.

A va pan a, "Good Morning, Aiko...kha, i va bei rei tawh ve.." tiin ava bia a. Aiko-i pawh chuan a thil tih lai chu tawp san nghalin chibai a buk a, "Good Morning le, Master." tiin a lo chhang vat a. Shantanu chu a khi suk a, "Ka rualin chaw pawh i ei bawk si lova, zinga ka chhuah dawn khan i lo practice tawh a. Tun thlengin i lo la practise a, chaw te i ei tawh em?" tiin a zawt leh a.

Aiko-i chuan a lu lo bu nghatin, "Ei tawh e, i chhuah hlan khan ka lo ei tawh a." tiin a chhang a, chutah Shantanu pakage ken lai chu a en vang vang a. "Kha kha eng thil nge a, Master?" tiin a han zawh zawm leh nghal zat a. Shantanu chu a han khi leh suk a, "Han ring chhin teh." a lo ti daih mai.

Aiko-i chu a han inngaihtuah vang vang a, "Rin ngaihna vak pawh ka hre lo." tiin a chhang a. Shantanu chu a han thaw hak a, tichuan pakage chu a hawng a. Kimino sen lar tak mai, nalh em em mai leh a puan khawng tha tak hi a lo ni a. Kimino chu samurai te ho hak ang chi, kawr fual ang chi kha a ni.

Aiko chuan mawi a ti takzet, "A va mawi em em ve, a nalh lutuk tlat." a han ti zawi sap a. A han khawih chhin a, a khawng tha em em a. A rit deuh nalh bawk, "Ka nupui thui a nia, a ta hlui a nih hi. Ama tawkah warrior huaisen tak leh rinawm tak chu a ni ve in ka hria, a kut ngeia a thui a nih hi. A thih hma khan he kimino hi a phu ngei hnenah pe ang che tiin min chah a, chu chu nangmah hi i ni, Aiko." tih pah chuan Shantanu chuan a pe a.

Aiko-i lawm lutuk chu a hnuk a ulh hial a, "Ka lawm e, Master." tiin a tap deuh tuau mai. Shantanu chuan Aiko-i darah chuan a vuan a, "I theihna chu i phochhuak tawh, hei hi thilpek satliah a ni lo a nia. I samurai zinkawng atana symbol pawimawh tak angah ngai la, i hlawh chhuah ngei a ni tih pawm ang che." a han ti dam leh dap a.

Aiko-i chuan a lu a bu nghat a, "Tehreng mai, Master." tiin a chhang a. Shantanu chu a han thaw deuh hluai a, "Khawimaw, han ha chhin reng reng teh. Ka hmu chak tlat, i ha tawk em tihte en ve hrim hrim ila." a han ti leh a. Aiko-i pawh chu phur takin a room lamah chuan a kal a, reilote hnuah chuan a rawn chhuak leh a.

Kimino sen chu a inhmeh takzet, amah lah a lo hmeltha em em bawk nen. A ha tawk chiah chiah a, Shantanu chuan a nupui a hre chhuak zawk zawk thei hial a. Hmuhnawm ti tak chuan a en a, "I mawi lutuk, Aiko." a han ti zawi sap a. Aiko-i pawh chu a han in en vel a, "Ka lawm kher mai, Master. Ka awmdan hi...ka inpeih thlap in ka inhria." tiin a han nui sen sen a.

Chutah Shantanu chu a rawn serious deuh thut mai, "E taka, ka va chhuahna lamah news duhawm loh deuh mai ka hria a. I meditate lai khan khawpui lamah buaina chawk chhuak an awm a ni awm a, political conference neih naah ni awm tak a ni." a ti ta daih mai a. Phawk hru hian Aiko-i chuan, "Eng thil chiah nge thleng a?" tiin a lo zawt vat a.

Shantanu chuan a tablet chu a phawrh chhuak a, conference an neihna hmuna Voltress thlalak fiah lo zet mai, press miten an lo lak ruk chu a hmuh tir a. Electric spark pawl vat mai teh pawh chu a lang tel vek a, "Tunge a nih chu an la hre lova, van atangin a rawn zuang thla thut e an tia. Stage a ti chhim vek a, chuan mihring eng emaw zahin hliam an tuar bawk..nunna chan erawh an awm lo hlauh a ni awm e." tiin a hrilh a.

Aiko-i chuan Voltress thlalak chu a han en vang vang a, "Ka hria, henu hi... Priya-i a nih hi, Arjun-a assistant, nurse kha.. Arjun-a khan Priya ti a a koh kha ka hria a ni." a ti ta mai a. Shantanu pawh chuan a en hu a, "I chiang amaw?" a lo ti vat a. Aiko-i chuan a lu a bu nghat a, "Aw, hria e. Arjun-a'n experiment atana min hman lai khan a awm ve a lawm, Arjun-a hian engtin emaw tak a chungah experiment a nei ve a ni ngei ang." tiin a chhang leh a.

Shantanu chu a ngawi vang vang a, "Umm, a lan dan chuan hmelma thar i nei nghal a ang hle mai. Aiko, i inpeih tawh bawk a. Tin, he i nihna thar, SAmurai ROse hi hming satliah a ni lo ania. Mawhphurhna, i mawhphurhna i hriat chian theih nana phuah sak che ka nih hi." tiin a hrilh leh a.

Aiko-i chuan a katana thar chu a han en vang vang a, a inrin hmel kher mai. Chutah Shantanu bawk chuan, "Va zawng hmu la, mipuite a tihnat loh nan venghimtu va ni ang che. Mahse hei hi hre reng rawh, Aiko Tanaka chu i hming mai chauh a ni. I nihna diktak chu Samurai Rose, samurai zawng zawng a tha ber i ni tih hi theihnghilh ngai suh ang che." tiin a hrilh leh a.

Aiko-i chuan chibai a buk a, tichuan a room lamah chuan a phei leh a. A katana chu a kawm ah a thun a, tichuan a hnunglamah chuan a dah a. A chhuah hma chuan darthlalang ah a in en a, thawk a han la deuh hak a. Tichuan chiang taka in en in, "SAMURAI ROSE chu a inring tawh e." tiin a phun sap a.

*****************************************************

Modern architect leh material changkang tak hmanga sak tih hriat tak mai, building lian tak, a bang pawh bulletproof glass hmanga siam vek chu ramhnuai fal tak maiah chuan a ding luah mai a. En reng reng pawhin a sak nan chuan cheng maktaduai fe chu an hmang ngei ang tih a hriat hle a, Mumbai forest area a awm a ni.

Thingkung sang tak tak leh hnim buk em em mai chuan chu building chu a hual chhuak vek a, mahse motor tlan theihna tur kalkawng erawh zim te a awm phei ve duah tho va. Mahse hmun thukru taka awm a ni, hla deuh atanga en pawhin chu building chu building pangngai a ni tih hriat a har hle a.

Chu building chu Alex-a ta, Vortex Legion Office a ni a. Chumi chhugah chuan laboratory, basement, kitchen, private weapon room leh computer room te, experiment room te leh thildang hrang hrang  a awm vek a. Chu Office ngei chu a hma a box hawn an tumna hmun ngei kha a ni a, a ruka siam niin Indian Sawrkar hian a hriat pui miah lo a ni.

A kawtah chuan SUV dum chu a rawn ding a, a chhung atang chuan Alex-a leh Rav-a te chu an rawn chhuak a. Gate bula khawl pakhat lo awm chu a ri tet tet a, tichuan gate kawngkhar, glass atanga siam tho chu amah chuan a inhawng a. Alex leh Ravo-a te chu an lut nghal a, office ah an tlang chho nghal bawk a.

Office chhung pawh chu pui rem rem tak a ni, a bang te chu glass vek a ni a. Pawn lam pawh a hmuh tlang theih vek, pawn lam atang erawh chuan engmah a chhung a hmuh ve theih hauh loh thung a ni. Main control room ah chuan holographic map lian tak mai hi a hmuh theih bawk a, hnathawk dangte pawh chu an buai buai chuan an lo buai a.

TV screen lian pui mai, patling hlam sarih tiah vel zet tur chu Alex-a dawhkan hma zawnah chuan a inchhawp ruah bawk a. Alex-a chuan a sana chu a hmet zeuh va, tichuan TV chu a rawn in on a. Zing lama conference a buaina chu news ah chuan an rawn puang a, Alex-a chu a thutthleng ah chuan a han thu a.

A hma lawka Kenji-a nena an insualna avanga a hliam te chu na a la ti angreng hle a, a hmai pawh a khem nual mai. TV ah chuan Voltress thlalak leh video tlem, press hovin an lo lak hman chu an rawn play a. News reporter chuan THE LIGHTNING GIRL tiin a rawn sawi a, a pianzia leh a suit te pawh chu chiang takin a lang a.

Alex-a chu a khi suk a, "Khinu khi a nih khi, buaina rawn siamtu ber chu." tiin a biang chu a dawm vauh vauh a. Ravi-a chuan a en hu a, "Nichin khan asian mi, samurai i ti bawk sia, eng nge awmzia?" tiin a lo zawt vat a. Alex-a chuan thutthleng chu a han ngheng ar ar a, "Aw...a titu hriat tum khan motor khan ka tlan zel a, ka hmuh hnun ber chu kha asian pa, samurai inthuam dana inthuam kha ania. A la chak em em lehnghal, a rang bawk si. Buaina ah khan a inrawlh ve ringin man ka tum a, vawihnih lai ka kap. Mahse silaimu kha a ngunhnam hmangin a lo sat bung vel a nih chu, mi pakhat ve tak chu a ni, khatiang em em a mihring che rang kha ka la hmu ngai lo reng reng." tih pah chuan a hliam avang chuan a han then leh deuh chawk chawk a.

Mak tih hmel tak hian RAvi-a chuan, "Katana, Mumbai ah maw? Tu phiangsen nge maw a nih le?" a lo ti nuah nuah mai. Alex-a chu a ner sak a, "Ka hre bik lo, hrechiang tur pawn kan inkawm rei hman ta lo em a nih kha. Zawhna ka ngah khawp mai, kha Lightning girl kha chu thuhran nise, asian samurai niawm tak, Mumbai khawpuia ngun hnam nena a tlan chiam mai kha chu a mak em a ni. Mahse kha Lightning Girl an tih pawh kha, kan chhui zui deuh chu a ngai ang." a han ti leh a.

Ravi-a chu a han ngawi vang vang a, "Thil thlenna hmun a dawr zawng zawng CCTV footage kan en a ngai dawn nih chu, samurai i sawi pa pawh chu kan bawh zui ngei angai bawk ang." a han ti chang deuh fak a. Alex-a chu a han thaw hak a, "Ni e, mi hlauhawm tak an ni ve ve dawn tlat." tiin a lo chhang ve bawk a.

*****************************************

Hotel room ah chuan Kenji, Hiro leh Kaito te chu an awm leh thap tawh a, an mission chu hlawhtlin a hnekin a harsa tulh tulh mai chu an mangang kher mai. Hiro leh Kaito chu an titi leh mawlh mawlh tawh a, Kenji erawh tukverh lam hawiin pawn lam chu a thlir vauh vauh a. Kaito chuan va en in, "Kenji, eng nge i ngaihtuah a?" tiin a han zawt a.

Kenji chuan pawn lam en reng chung chuan, "Voltress kan um lai khan mi pakhatin min ranw bei ringawt a, kan insual hrep alawm." tiin a lo chhang a. Hiro chuan phawk hru hian a en a, "Tunge chu chu? Tinge engmah i sawi loh?" a lo ti nghal vat a. Kenji chu a rawn leh hawi a, "Ka hre bik lo, police lam a nih ka ring." tiin a chhang a.

Kaito pawh chuan, "A va mak leh zel ve, buai tawh nen... engtin nge hetiang chuan kan hlawhtlin ang?" tiin a mangang hmel khawp mai a. Kenji chu rawn kal pheiin, "Indian mi a ni lova, english in min bia a. A hmel leh a accent atang khan American a nih hmel, mi pangngai satliah zawng a ni lo tawp mai." a han ti leh a.

Kaito bawk chuan, "Tinge, eng nge mi pangngai a nih lohna?" tiin a lo zawt leh hu mai a. Kenji chu a thu a, "Pistol a nei a, mahse a hmanraw pakhat zawk kha..ka la hmu ngai miah lo, a mak lutuk." a han ti leh a. Kaito bawk chuan, "Eng tia mak maw? Eng ang hmanrua nge a hman a?" tiin a lo zawt leh a.

Kenji chuan a han ngaihtuah let a, "Lipstick emaw pen emaw ang deuh mai hi ania, hmeh tur a awm a. A hmet chiah kha tiang sei tak, thir hlang vekah a rawn chang a, a rawn sei thut a ni ber mai. A chang em em lehnghal a, thir satliah a ni lo tih a hriat bawk." tiin a chhang leh a.

Hiro chu rawn tawng chhuak vein, "Thil tih theih special deuh a nei em ni, chu tiang chuan?" tiin a rawn zawt ve leh a. Kenji chuan a lu a lo bu nghut a, "Nei e, mi thiam takina siam chhuah a nih ngei pawh ka ring. A chang leh a tawi leh deuh thut a, a chang leh a rawn sei leh deuh va...a hmangtu khan a control a ni ber mai, mahse skills thiam tak chauh leh expert chauh hman thiam chi a ni ngei ang." tiin a chhang leh a.

Hiro chuan mak a ti kher mai, "A hmel i hmu chiang em? Hmuh tawhna te kan lo nei mial maithei asin.." tiin a zawt leh a. Mahse Kenji chuan a lu thingin, "A hming pawh ka zawt hman lo, kan inkawm rei hman ta lo anih kha." tiin a khi suk a. "Ka rindan chuan mi tu emaw a venhimna lamah kei hi min bei emaw, mihring ni lo thil venhim a nei pawh a ni mahna." Kenji bawk chuan a han tih zawm leh nghal zat a.

Kaito chu a han ding hluai a, "Anih chuan chupa chu VOltress tana thawk emaw, Voltress nena inthurual a ni thei mai angem?" a rawn ti ve leh a. Kenji chu a ngawi vang vang a, "KA hrethiam lo, a ni thei a, a ni thei lo bawk. Kan hriatchian sa chu Voltress kha Arjun-a experiment a ni a, a hma a ka sawi tawh ang khan tunah hian AIko-i pawh a la kawl ru reng ang nga, experiment atan a lo hmang ve daih tawh pawh a ni thei. Kha american pa kha chu engpawh nise, insual thiam tak a ni. A hmanrua pawh kha, ka katana tak ngial pawh khan a sat chhe zo lova, mi hlauhawm tak chu a ni ngei ang. Min rawn bei leh maithei bawk a, kan fimkhur hle a ngai a ni." tiin a chhang a.

Hiro chuan a lu a lo bu nghut a, "Voltress hian eng thil nge a tih leh dawn hriat a ni si lova, mahse Aiko-i kha khawiah nge i awm tiin a au vak kha ania. Kenji, a awmzia chu Aiko-i hi Arjun-a lak atang hian a tlan chhuak tak tak tihna em mawni le?" a ti ta hu mai. Kenji pawh chuan a mitthla ah chuan Voltress-i'n ring taka, "AIKO, KHAWIAH NGE I AWM?" ti a a au vak vak chu a hmu nghal zawk zawk mai.

A ding hluai a, "A tlan chhuak a nih chuan Voltress chuan a bei ngei ang, a zawng ngei ang. Voltress hian a hmuh hma in Aiko hi kan hmuh ngei ngei a ngai, Arjun-a hian Aiko-i zawn nan hian Voltress hi a siam chhuak pawh a ni thei." tiin a vei kual thauh thauh va. Room chu a reh diak a, chung samurai pathumte chu an inngaihtuah nasa hlawm khawp mai.

********************************************

TO BE CONTINUE