SAMURAI ROSE (A JAPANESE-INDIAN FICTION SCI-FI THRILLER STORY) Written by : Aaron Malsawmdawngzuala Chapter - 6 (LAST)

 SAMURAI ROSE

(A JAPANESE-INDIAN FICTION SCI-FI THRILLER STORY)

Written by : Aaron Malsawmdawngzuala

Chapter - 6

(LAST)

***************************************

Tlai dar 3 a ri a, Alex-a leh Ravi-a te chu SUV car nalh tak mai chuan ramhnuai lam an pan mek zel a, a hnungah chuan box kha an phur bawk. Vortex Legion facility dang, ramhnuai kara awm tho chu pan puiin chumi hmunah chuan a box hawn theihna tur khawl an siam chhuah hma chu dah that rih an tum a ni.

An tlan mek lai chuan an ngawi dun reng a, "Kha Lightning girl kha engtin nge kan bawh zuia ng? Kan inrawlh ve law law dawn nge,mumbai police ho kutah kan dah dawn?" tiin Ravi-a chuan a han zawt a. ALex-a chu a lo chek hlur a, "Misual awm tha duh lo mai mai pawh an man thei lo ania, an kuta dah chi ngawt pawh a ni lo. Footage-a a lan dan phei kha chuan, super hero ang mai, power a nei tih a chian zia kha, mipui him nan kan ngaihven vat chu a tha khawp ang." tiin a lo chhang a.

An tlan zel a, an ngawi dun leh vang vang a. Ravi-a chu a han thaw deuh hak a, "A nih leh box hi kan hawn theih hunah engtin nge kan tih zui ang?" nui deuh put put chung chuan a han ti leh a. Alex-a chuan motor tukverh lam hawi chhuah vauh vauh pah hian, "A chhunga awm pawh kan la hriat loh hi, hmun him thei ang bera kan dah phawt a ngai a ni." tiin a lo chhang leh a.

An tlan zel a, chutah an tlan lak lawh lai chuan samurai thuam famkim nena inthuam, mi pathum chu a bul thingkung atang chuan an rawn t(r)um rual chat mai le. Chumite chu tudang ni lovin, Kenji, Hiro leh Kaito te kha an ni. Alex-a leh Ravi-a te pawh chu an phu zuk a, Ravi-a chu a han tlan muang deuh nghal a.

Mak tih hmel tak hian, "Ehe, tute nge maw an nih le?" a ti hu mai a. MAhse Alex-a chuan a laia mi, Kenji chu tunge a nih a hrechiang takzet. Za lo tak chuan a khi suk a, "A lai ami saw, kha samurai, chawhma lama ka insual pui kha, sawpa ngei saw a nih saw. Thian dang a rawn hruai lehnghal, eng tak chu nimaw?" a lo ti nuah nuah mai.

Ravi-a chuan motor chu ti dingin a pistol chu a phawrh a, "Keiman ka han chingfel ang nge." tiin motor atang chuan chhuah a tum ta mai a. Mahse Alex-a chuan a lo dang vat a, "Ngawi lawk teh, chutia beih mai chi an ni lo. Eng thil nge sawi duh an neih tih te pawh kan hre phawt ang chu, min lo zui rawh." tih pah chuan motor atang chuan a chhuak a, Ravi-a chuan a zui chhuak ve nghal bawk.

An lam muang changa pan pah chuan, "Ekhai, thianpa. Kan inhmu leh ta maw? Tun tum chu thian dang i rawn hruai animaw? Eng thilah nge kan puih theih ang che? Kan kawng lo dal meuh chu a pawimawh hle a ni ang maw?" Alex-a chuan a han ti deuh duah a. Kenji-a chuan a va pan hnai a, "Kan hna kan thawk mai chauh a ni, Mumbai ah hian kan unaunu rawn hruai haw tura lo kal mai chauh kan ni." tiin a lo chhang a.

Alex-a chu a han hawi deuh hru a, "Eng a? Kan unaunu a? Tunge chu chu?" a ti hu mai. Kenji-a chuan a han melh vang vang phawt a, "Aiko Tanaka, kan sensei fanu a ni. Sensei'n Japan lama hruai haw leh turin hna min pe a ni.” tiin a chhang leh a. Alex-a chuan hriatthiam loh hmel tak hian, “Aiko Tanaka? Tunge chu chu?” a lo ti leh hu mai.

Kenji-a chuan thawk a han la te te a, “Kan sensei, kan master, Takashi fanu neih chhun a ni a. Kyoto khua a cheng an ni, chutiang chiahin keini pawh. Takashi Tanaka hi mi zah kai, Kyoto khaw parawn leh samurai huaisen tak a ni a. A zirlaite kan ni, ama thupek vanga helai hmunah lo kal kan ni.” tiin a chhang leh a.

Alex-a chu a ngawi vung vung a, “A nih chuan a hma kha, awmze nei miah lovin kan lo insual nghek mai tihna a ni maw?” a ti leh deuh hu a. Kenji-a chu a ner suk a, “Ni reng e, ka hrilh tawh che kha. Misual ka ni lo, tuna heta kan lo kalna chhan pawh kan zui ruk vang che a ni.” tiin a lo chhang leh a.

Ravi-a chuan a pistol chu phawrh a inring khawp mai, “Eng vanga min zui nge in nih? In buaina chu in buaina a ni a, eng vanga kan kawng lo dal nge in nih?” a han ti vin khur khur a. Kaito chu rawn tawng chhuak ve in, “IUn puihna kan mamawh a ni, Kenji-a hian nangmahni hi misual in ni bik lo tih a hria a, thil hriat sual palh vang mai mai a buaina nei kan ni tih a sawi fiah vek bawk. In puihna dil turin kan lo pan che u a ni, Voltress hi kan tih tawp a ngai.” a han ti ve a.

Kenji-a chuan lo sawi chhunzawmin, “Ni e, Voltress kha kan hmelma ber chu a ni. Amah zawk kha buaina thlen tu ber chu a ni, keini nilovin.” a raw tih zawm nghal zat a. Alex-a chu a meng phawk hru a, “Voltress a? Tunge ni ve leh a, Voltress chu?” tiin a lo zawt ve leh nghal a. Hiro chu rawn pen chhuak ve in, “Lightning girl ti a media in an sawi kha, tukina political conference hmuna buaina rawn thlentu, van atanga rawn t(r)um thla kha..kha kha voltress chu a ni.” a rawn ti ve leh a.

RAvi-a pawh chu a han inthlah dul deuh va, “Engtin nge a hming chu Voltress a ni tih in hriat theih?” tiin a lo zawt veleh a. Kenji chu a han thaw hak a, “Arjun Malhotra, mumbai scientist lar tak. A human-experiment zinga mi a ni a, Aiko-i tlanbo puitu a ni. Helai kan rawn thlen khan a apartment kan zawng chhuak a, tichuan kan va luhchilh a. Chutah chuan Voltress hi a ko chhuak a, a chak em avangin kan chhuak leh tawp a ni.” tiin a chhang a.

Hiro chu rawn tawng chhuak ve leh in, “Tukina political conference ah khan, amah kha ania buaina rawn chawk chhuak tu chu. Tunah hian Aiko-i a zawng mek a ni, amah ngei pawhin tukin khan a au vak vak alawm. Kan unaunu Aiko-i chungah pawh hian Arjun-a hian experiment a lo neih daih tawh maithei, engmah hriat chian a ni lo.” a rawn ti ve leh a.

Alex-a chu a han thaw hak a, “Khai a, anih chuan tukin khan nang nen hian chhan awm miah lovin kan lo inbei hreop tihna a nimaw?” tiin a ner sak mai. Kenji-a chuan a lu lo bu nghatin, “Ni reng e, hrilh che ka tum a, mahse min bei zui ta zel sia. Engpawh chu nise kan tan ho a ngai a ni, Voltress hi kan tih tawp a ngai takzet, a power a chak si a, mipui tan a hlauhawm dawn emai.” tiin a lo chhang a.

Alex-a chu a han inngaihtuah vang vang a, “Anih chuan engtia hmalak tur nge ni ang? Arjun Malhotra awmna chu in hria tihna a nia, man turin min duh em ni?” tiin a han zawt leh a. Kenji chuan ava pan hnai a, “A hriat chu kan hria a, kan kal tawh kan tih kha. Mahse a insawn leh daih tawh maithei, a chhan chu kei nin a location kan hria tih a hre vek tawh dawn a, a fimkhur ngawt ang.” tiin a chhang a.

Alex-a chuan a lu a bu nghut a, “Anih chuan kan tang ho tihna a ni mai alawm arjun-a chu kan kutah dah rawh. A apartment adress chu min hrilh tho la, biakpawh theihna tur che u kan mamawh dawn bawk ania. Mahse Voltress ber chu nang nin in lo buaipui a ngai thung ang, chumi zawn kawngah pawh chuan kan pui ang che u.” tiin a chhang ta a.

Kenji-a pawh chu a lo khi suk a, “A tha e, Voltress leh Arjun-a te hi kan hneh ngei ang.” tiin a kut chu Alex-a lamah chuan a va pharh a. Alex-a pawh chuan a lo chibai a, tichuan an number te chu an inpe a. “Chanchin kan rawn hrilh zel ang che u, mumbai khawpui lunlai takah hian zanin hian a rawn chet kan ring deuh va, kan inhrilh zel dawnnia.” Kenji bawk chuan a han ti leh a.

Tichuan Kenji leh a naute pahnih chu an tlan thut a, thingkung ah chuan an pakai phei zeuh zeuh va. Zawngte ang mai hian an che rang kher mai, Ravi-a leh Alex-a te pawh chuan an en vauh vauh ringawt a. Tichuan an kal liam hnu chuan anni pawh chu SUV lamah chuan an let leh a, an tlan ve leh ta a.

**********************************************************

Zan a ni a, Voltress ina zing lama political conference a buaina a chawh chhuah leh, camera-a an lo lak fuh, a power a hman lai video te chu a lar em em a. Mumbai mai ni lo, India ram pumah chuan a lar leh der tawh. Inhnialna lah a tam, thenkhat state dang ami te chuan video siamchawp mai mai ni a an rin thu an rawn sawi chiam chiam a.

Mizoram lamin hre ve phei se chu an awih loh viau hian a rinawm, FB lamah pawh an deuhsawh leh nasa khawp ang le. Kenji-a plan ang ngeiin, Mumbai khawpui lunlai takah chuan Hiro leh Kaito chuan Voltress lo lan thut takin tiin an vak kual reng a. Amah Kenji erawhin hmun dangah a zawng thung a,  Alex-a leh Ravi te pawhin Arjun-a chu man ngei tumin hma an la mek bawk.

Hiro leh Kaito chu thawmhnaw pangngai tak inbelin kawngpuiah chuan muang chang chuan an kal dun a, pangngai taka an inchei nachhan pawh mipuiin mak an tih loh nan a ni ber. An titi dun a, “Ka ngaihtuah mai mai thin amaw, Kaito. Kan naupan laia Sensei in training dan hahthlak zia kha, mahse khang hunlai kha ka ngai thei ngawt mai.” Hiro chuan a han ti deuh vawng vawng a.

Kaito pawh chu a lo khi suk a, “Keipawn ka ngai thin ala lawm, ka la hre reng thin. Dojo room ah khan darkar chuang chuang, samurai kan practise thin kha a nia. Sensei min train dan kha chu hahthlak viau mahse tuna kan chhawr tangkai zia hi, a lo ropui ngawt mai.” a lo ti ve nuah nuah bawk a.

Hiro chuan a lu a han bu nghat nghat a, “Kan taksa in a tawrh theih loh thleng khan min han hrual tak tak kha chu a hahthlak ve thin ngawt mai, ruah sur hnuaia darkar 3 che miah lova min din tir kha chu a hrehawm teh e, i la hria em?” tiin nui chung hian a han zawt a. Kaito pawh chu lo khi sukin, “Engtin nge maw ka theihnghilh theih ang le? KA khua a sik char char khami zan khan, mahse khami vanga kan tawrhchhel zia hi tunah hian...keichu koh kir leh theih se ka ti hial asin.” tiin a lo chhang a.

“Nia, kan thatna tur vek ania...thil kha a lo dawn thui em a ni. Min hmangaih a, a strict viau nangin, kan tana hmasawnna zel kha ania. Hei bak bak a Sensei tha hi chu an awm tawh lovang, lo awm pawh nise ka pawm ve hauh lovang.”

“Ni e, sipai ropui tak in ni tur a ni tiin a sawi fo thin a. A fanu Aiko-i pawh kha chutiagn tur chuan a train nasa, mahse hetia thil a kalsual ta mai hi a pawi ngawt mai.”

“Engpawh chu nise chumi siam tha tura helai hmun thleng kan ni bawk a, Aiko-i hi kan unaunu a ni a. Kan hruai let leh ngei tur a ni, kan hlawhchham thiang lo.”

Chutia an titi mawlh mawlh lai chuan electric ban, high mast an awmna atanga hla vak lo ami chu Hiro chuan a han en vang vang a. A chhip chu a t(r)ek deuh chhek chhek hian a hria a, a han en chiang leh deuh va. A rin ang ngeiin current kal ni awm tak hian a rawn t(r)ek leh ta chhawk chhawk mai, a t(r)ek pawh chu a hmuh chian theih tial tial a.

“Kaito, high mast khi en teh. A normal miah lo, a t(r)ek chhawk chhawk ania...current a sawt em mawni le?” tiin high mast chu Hiro chuan a kawk a. Kaito pawh chuan a han en ve a, chu thil t(r)ek chhawk chhawk chu a rawng a rawn pawl thut a, a rawn nasa deuh tual tual mai. “Eng emaw current dang a man a ang khawp mai, thil dik lo chu a awm chiang a ni.” Kaito chuan a lo ti ve bawk a.

Chuta Hiro chu a meng phawk nghal hru a, “Ngawi lawk teh, Voltress a rawn kal dawn tihna...warning a rawn pe hmasa a ni.” a ti ta mai a. A sawi zawh rual rual chuan chu high mast chu a vaiin a rawn t(r)ek ta chuai chuai mai a, a rawng pawh a pawl(blue) ngei a ni. Kawng puiah te chuan a rawn t(r)ek phei nawk nawk a, bulding tam tak, eng phei pup mai te chu a thim ta zuk zuk mai.

Mipui chu hlauvin an tlanchhia a, an au nuai nuai bawk a. Kaito leh Hiro te pahnih chuan Voltress chu a rawn kal ngei tih an hrethiam ta, “A lo kal tak tak anih chuan kan inrin nghal a ngai ang, tun tum chu kan hlawhchham thiang lo.” Kaito chuan a han ti a. Hiro pawh chu a lu lo bu nghatin, “Awle, ka inring e.” tiin a lo chhang a.

Chu t(r)ek pawl vut mai chu a nasa telh telh a, in tin deuh thaw verandah light te chu a rawn puak pup pup hlawm mai. Thli a rawn thaw vuk vuk bawk a, khawpui lah chu a ri dum dum bawk. Hiro chuan thawk a han la hak a, “Inring rawh, Kaito. Hei ngei hi a nih hi kan training chhan chu, mahse hei chu a hautak dawn hle mai.” tiin za lo tak chuan a han khi suk a.

Kaito pawh chu insehruh teuh chung hian, “Ka inring e, lo kal mawlh teh se.” tiin a han thaw hak a. Mipui ho chu dawr chhungah te, a rem rem ah chuan an sa him nan tiin an tlan lut a, thenkhat motor ah an lut a, an buai nak nak khawp mai. Thawm pawh ring tha tak a ni, t(r)ek pawl pawh chu a rawn nasa zual zel bawk.

Khawpui pawh a aia ring chuan a rawn thum leh dur dur a, kawl a phe zuai zuai a. High mast pawh pakhat chauh ni lo, tam tak chu a t(r)ek tel ta chuai chuai mai. Hiro leh Kaito chuan an thawmhnaw hak lai chu awlsam tak hian a phelh a, an samurai thuamhnaw nen, an katana nen an in ready nghal der mai.

Chutah an hma takah chuan van chung sang tak atangin Voltress chu a rawn t(r)um thum ta dawt mai, electric t(r)ek chhawk chhawk mai chuan amah chu a hual vel bawk a, a ri pawh a hriat theih hial. Hiro leh Kaito chuan an ngunhnam chu phawrhin an hum ran a, Voltress chuan ava pan phei a.

Nui chung hian, “Nangni pahnih chu, a vawi thumna atan kan inhmu leh ta. Khawnge in thianpa pakhat kha? In ning ve lo em ni? Ka that duh tak tak tawh mai dawn che u ania..” tham lo tak chuan a han ti vel a. Hiro chuan rum takin a melh a, “He khawpui i tihchhiat kher hi a tul lo, Voltress. Duhtawk rawh, experiment vangin dawi at in i awm mai mai a nih kha.” tiin a vin khur khur a.

Voltress chu a nui huah huah a, “He khawpui Mumbai hi maw? Nangni Japanese Samurai ho hian he Mumbai khawpui venhim hi in hna a ni lo, Aiko-i zawng tura lo kal in nih kha. Enteh u, Aiko-i in zawng a, chutiang chiahin keipawn...chuvang chuan inremsiam ang u. Aiko-i hi zawng ho ila, chuan ka hnenah min hlan ula. In na lo a nimai, lawmman pawh ka master Arjun-a’n tam tham tak a pe ang che u.” tiin a han thlem vel a.

Mahse Hiro leh Kaito chuan an lo duh lo nasa mai, “Engtikah mah i lam kan tang ngai lovang, tunah hian i thil tih lai ti tawp tur che a lo kal kan ni.” Hiro chuan a lo ti hmak mai a. Voltress chu a thaw hak a, “Anih te chuan, in thi ang nga a ni mai alawm.” tiin a kut chu a han dah ngil at a, a rawn t(r)ek leh ta chuai chuai mai.

Kaito chu ava tlan phei a, Voltress chuan a t(r)ek hmang chuan hruai ni awm tak, current kal t(r)ek chuai chuai mai chu a siam chhuak a. Lamlian chu a vaw pawp a, a t(r)ek phei zel a. Kaito awmna zawn a thlen chuan a phuak chuai mai a, mahse Kaito chu sang takah in vawrh in a lo bum a.

A ngunhnam hmang chuan va sah a tum a, mahse Voltress chuan a kut a lo phar a. A kut atang chuan t(r)ek chu rawn chhuak lehin Kaito chu a man fuh ta hlauh mai, current flow na tak mai chuan Kaito chu a shock ta hrep mai a, a khur cher cher mai. Ring tak hian, “Kaito, nilo.” tiin Hiro chu ava tlan phei ve leh a.

Chuveleh Voltress chuan current hmang bawk chuan Kaito nikhawhrelo khawpa a shock tawh chu boruakah chuan a ti kang a, Hiro va vawm nan a hmang a. Hiro chuan a thianpa chu a lo pawm chat a, lamlianah chuan dim takin a mut tir a. Tichuan shiruken (throwing stars) chu Voltress lamah chuan a vaw vawm phei pawp pawp a, mahse Voltress chuan na ti awm ang pawhin a lang lo.

Chu shiruken te chu a sawr chhe nghal vek a, Hiro pawh chuan mak a ti takzet. Mahse tlawm ala tum lo, a ngunhnam chu hum nghet sauh sauhvin ava tlan phei leh a. Voltress chuan t(r)ek hmang chuan a lo kap ve pawp pawp bawk a, Hiro chuan a bum zat zat mai. Mahse ava thlen dawn tep ah chuan Voltress chuan a t(r)ek power chu hrui ang chuan a siam leh a, a han phih pawp a.

Hiro chu a phuar bet ta der mai le, Hiro pawh chu current chuan a man a. A khur char char a, Voltress chu a nui huah huah mai. Chutah rum tak hian Hiro chu a en a, “Upgrated version ka ni daih tawh, he khawvelah hian tuman min hneh thei tawh lovang.” tiin a vin khur khur mai.

Tichuan a electric hrui hmanga la phuar bet reng chung chuan a vawm hian a han vawm leh pawp a, lamlianah chuan Hiro chu a lum phei tup tup mai. A thuamhnaw te chu a kang nual a, chutiang bawkin Kaito pawh. Voltress chuan ava pan a, “In huaisen viau, mahse in chak lo a ni.” tiin a zuang vak a, van lamah chuan a thlawh chhoh san ta daih mai.

*********************************************

Arjun-a lab chhungah chuan Arjun-a chu a thu ngui bar mai a, hand cuff bun tir a ni bawk. A hma zawnah chuan Alex-a leh Ravi-a an thu ve bawk a, a awmzia chu Alex-a leh Ravi hian awlsam lutukin Arjun-a chu an chhui chhuak a, an lo man der tawh tihna a ni. A lab chhunga khawl te chu an en fiah hlawm a, tiang lama experience lo nei teuh tawh Alex-a chuan a hrethiam nghal uar uar mai.

Arjun-a chuan lungawi lo tak hian, “Eng nge min man ringawt nachhan, warrant pawh in nei em ni?” a han ti vin hlur a. Alex-a chuan zaidam tak hian, “Kan manna chhan che maw? Ti hian sawi teh ang, i thil lo tih tawh ho te hi sawi zui pui i ngai tlat mai.” tiin a chhang sam et a.

Arjun-a chuan thinrim tak hian, “Eng ka thil tih maw? Scientist pakhat ve mai chauh ka ni a, hetiang khawl te hi chu ka nei ve bawk ang chu. Tute nge in nih reng reng a? Police in ni pawhin ka hre lo, a dik em?” hlauh loh hmel tak chuan a han ti vei pang pang a. Chutia a an bawrh bawrh lai chuan a rukin a sana bun laia button pakhat chu a hmet zeuh va, chu chuan Voltress a alert a, a awmna hmuna lo kal vat turin ko nghal tihna a ni.

Ravi-a chuan dawhkan chu a han chum ri thuai a, “Game khelh vel tum reng reng suh, Arjun Malhotra. Voltress hi i siam chhuah a ni tih kan hria, i experiment vanga thil thleng a ni tih pawh kan hria.” tiin a han vin deuh thak a. Arjun-a chu a thin a phu nghal dup dup mai, “In hrethiam lo hle mai, Vol..Voltress chu, ihh, project pawimawh lutuk khawihlai ka nei a...” tiin a sawi bah nuai mai a.

Alex-a chuan lo pawt chatin, “Ngawi hmak rawh, engmah chhuanlam siam suh. Voltress hi nangma siam chhuah a ni a, khawpuia buaina thlen tur khan thu i pe bawk tih kan hria.” a lo ti leh hmak hmak mai a. Ravi-a chu a tho thut a, “Zawhna tam tak kan nei, kan bulah i rawn kal phawt a ngai ang.” a han ti vin leh thak a.

Arjun-a chu a mangang tan hle mai, “In hrethiam lo a ni, tuna min man a nih chuan ka project hi ka chan vek dawn asin. Voltress hi maw...tunah hian...ihh..” a dang a awk leh ta tlat mai. Ngeiawm tak hian Alex-a chuan, Ihh..ihh...eng nge, sawi zel ta che..” a lo ti khur khur a.

ARjun-a chu a han ngawi vang vang a, “Thil ka hmuh tir ang che u, in hrethiam mai ang.” a han ti chuai raih a. Alex-a chu a khi suk a, “Min bum i tum em ni? Tlanchhuahna chance i zawng ve deuh tihna ami? Tum buai duh suh, hun kan nei tlem ania.” a lo ti daih mai. Mahse Ravi-a chuan, “Sir, a lo pawimawh maithei asin.” tiin Arjun-a chu a melh leh hraw a, “Ti vat ang che.” a han ti leh a.

Arjun-a chuan file pakhat ava la a, dawhkanah chuan a dah a. “Hei hi Voltress chungchang file a nih kha, AI robot siam bak engmah thildang tih ka tum lo. Tikhan in hrethiam mai ang, ka duhdan angin thil hi a thleng vek bik hleinem.” tiin Arjun-a chuan Robot siamchhuah enchhina hmuna file a hmuh tir tur, a lo buatsaih lawk sa chu Alex-a leh RAvi-a hnenah chuan a han hmuh tir dun a.

Alex-a leh RAvi-a te pawh chuan an han en thuak thuak a, a diagram nen lam a lo awm ve thlap mai. Alex-a chu a han ner suk a, “Um, a pawimawh hlawm tak hle mai. Mahse hei hian a chhanhim dawn chuang lo che, i thil siam chhuah Voltress hian khawpui chhungah buaina a siam a, hliam tam tak mipui pawi sawi lovin an tawrh phah bawk.” a la ti fan a.

Arjun-a chuan mangan hmel tak hian, “Ka duhdan angin thil a kal bik lo ka tih tawh kha, energy manipulation breakthrough atana siam ka nia, mahse a khawl a kal dik lo ta a nih hi. Ka che buai a, ka control theih phak bakin a che ta a nih kha.” tiin dawt a han phuah chawp leh zung zung a.

AWih loh hmel tak hian RAvi-a chu a lo khi suk a, “Ka che buai e a? Chu... pawi sawi lo, engmah tisual lo angah i inngai tihna em ni?” tiin a lo zawt vat a. Arjun-a chuan Ravi-a chu a han en ang ren rawn a, “Ni love, ka thil tih sual siam that ka tum mek a nih hi. Voltress hi tunah hian a hlauhawm lutuk, dan ka tum, control ka tum lo.” tiin a lo chhang ve sak mai.

Chutah Alex-a chu a khi suk a, chiang tak hian Arjun-a chu enin, “Anih leh Aiko-i kha, eng thil nge a chungah i tih?” tiin a zawt ta thut mai. Arjun-a chu a phu zuk a, sawi tur mai a hre lo. A chil a lem dawk a, “Aiko-i kha...ni e, engtin nge in lo hriat chu ka hre lova. Mahse Aiko-i kha, ka hmangaih asin. Inrawlh lo turin ka ti a, mahse a inrawlh a...tunah chuan a bo ta a nih hi.” tiin a chhang bah leh nuai mai.

Ravi-a chuan a ning ta deuh va, “Engpawh nise kan rual a i lo kal a ngai, i dik emaw dik lo emaw. Kan sawi chiang ho ang nga, mahse tunah chuan man i ni.” a rawn ti vin leh deuh khur khur a. Arjun-a chu a han thaw hluai a, “A tha e, ka zui ang che u. Mahse hei hi hre rawh u, puih che u ka duh, misual ka ni lo.” a la ti talh mai, Voltress lah chu a lo awm hla deuh nge ni, a rawn thleng har tawh a ti em em a.

RAvi-a chuan a kai tho lawk a, “KAn custody ah i awm phawt a ngai, tichuan i chungchang chu kan ngaihtuah tha leh ang.” tiin a kai phei dawr dawr a, Arjun-a chuan Voltress chu a lo kal beisei hle mahse a lo thleng thei der mai si lo, a hawi a hawi ringawt mai a. Tichuan Alex-a nau te chuan lab chu an enfiah a, Ravi-a leh Alex-a chuan Arjun-a chu an phur chhuak ta thung a.

****************************************************

Voltress pawh chu Arjun-a’n a rawn alert avang chuan lab lam panin a thlawk phei mek a, a thlawk chiah pawh nilovin a zuang sang thei hrim hrim a, bang ah a lawn kai zeuh zeuh thin bawk a. Chubakah amah hi current hlira khat a lo ni bawk nen, electric ban high mast ah te chuan a lawn kai zung zung thei bawk a ni.

Chutia lab lam a pan mek lai chuan tibuaitu a tawng ta tlat mai, boruak a a zuan kai lai tak chuan inchung sang tak, a bul lawk ami, a chung zawl atang chuan tu emawni hi a rawn zuang thla thut a, Voltress boruaka a awm mek lai chu chiang em em mai hian a rawn tlawh pawp mai a.

Voltress pawh chu a tla thla vang vang a, lamlianah chuan a ri thum dup mai. MAhse rang takin a tho leh a, “Tu phiangsen nge i nih?” tih pah chuan a hma lam chu ava en a. Chutah Aiko-i chu a lo ding reng mai a, a katana chu a lo pai ran bawk. Voltress chu a khi suk a, “Ka duh chu ka hmu ta e, ava lawmawm em..” tiin kut te chu a han beng vel a.

Aiko-i chuan Voltress chu a en vang vang a, “Priya, khawngaihin duhtawk rawh. I thluak chhungah khan Arjun-a’n chip a dah a, khami vang khan thunun in i  awm mai mai a nih kha.” tiin hrilhfiah a han tum a. Voltress chu a lo ner sak a, “Priya-i chu a thi tawh, ka hming chu Voltress a ni. Chuan Aiko, nang hi i duh emaw duh lo emaw, ka rualin lo kal rawh. Arjun-a’n a mamawh che, i thi a nih pawhin i ruang tal chu ka hruai thleng tho vang.” a lo ti khur khur mai.

Aiko-i chuan ava pan hnai a, “Priya, min ngaithla teh. Hei hi nangmah i ni lo, mihring i nihna kha a la awm, nangmah ah khan a la awm tih ka hria ania. Inhneh tir suh, khawngaihin harh chhuak teh.” tiin a han thlem leh a, mahse awmzia a neih loh hmel khawp mai. A lo khi suk a, “Priya-i he khawvelah hian a awm tawh lo, Aiko. Tunah chuan Voltress, khawvela robot chak ber ka ni tawh. Tuman min dang thei lovang, a bikin nang phei chuan....a teuh lo mai.” tiin a lo chhang leh a.

A sawi zawh rual rual chuan a va tlan thut a, Aiko-i lam hawi chuan a electric chakna chu a han kap chhuak leh a. Mahse Aiko-i chuan a lo bum hman hlauh mai, va tlan phei ve in a ngunhnman hmang chuan a va vai ve deuh thuai a. Mahse a ngunhnam chu thir atanga siam a lo ni bawk nen, Voltress chuan current hrui siam chhuak leh in Aiko-i ngunhnam ah tak chuan a lo vua a.

Current chu a kal ta, Aiko-i chu a taksa pum chuan current chuan a mah ta mai a. A khur cher cher mai, na a ti bawk si chu a au vak vak a. Chutah Voltress chuan boruakah chuan a la ti kang zui a, “Engtik ah mah min hneh dawn chuang lo, Aiko.” tiin a vin vak vak a. Aik-i chuan a katana chu a thlauh hial a, Voltress lah chuan current chu a aia force na chuan a han tipung leh a.

Aiko-i pawh chu a na telh telh a, Voltress chu hneh lo tak a ni. A ha a thial ri bap bap a, a then chawk chawk a. Chutah Voltress chuan bang deng khi thawt khawp chuan Aiko-i chu a vawm phei leh a, Aiko-i chu leiah chuan a bawk thlawp mai. A chau em em a, a che hleithei lo nghal der mai.

Voltress chuan a rawn pan leh nghal a, “Tlawm mai rawh, Aiko. Min hneh chuang lovang, Voltress ka nih hi.” tiin a rawn chapo phei vel nasa mai a. Aiko-i chuan a chhang lo, current in a shock-na avang chuan a la zawi em em a. Voltress chuan current hrui chu a siam chhuak leh ta, Aiko-i vuak tum chuan a kut chu a lek kang leh ta ur ur mai a.

Mahse chutih lai tak chuan shiruken tam tak chu thim zing atang chuan a rawn thlawk phei fua fua mai, Voltress chu a rawn fuh nual bawk a. A hawi ve sawk sawk mai, mahse a hliam chu chawp leh chilhin a dam leh nghal vek a. Chutah thim zing atang chuan Kenji chu a rawn zuang chhuak a, Aiko-i’n Kenji a han hmu thut mai chu mak a ti ngei mai. Chutah Voltress chu a va kick leh pawp a, Voltress pawh lamlianah chuan a lum phei tawp tawp mai.

Leia la tlu sawp reng chung chuan, “Kenji? Eng... eng nge hetah i tih?” a ti hu mai a. Kenji chuan a va pan a, “Ka zawng char char che alawm, Aiko. I tha em?” tiin a lo zawt let ve nghal. Mahse Aiko-i’n a chhanlet hma chuan, “Aww.. samurai dang leh maw? A nuam dawn e, i thainte pahnih pawh ka sawisa hlum lo chauh anih kha. Tunah nang i lo lang ve leh a, i hun a thleng ve ta.” tiin Voltress chu a rawn nui huah huah mai.

Kenji chuan a katana chu a phawrh a, “Samurai diktak chu a tlawm ngai lo, thihna ko tlangah pawh ding se, a thawk tawp thlengin a bei thin.” tiin a lo chhang let a. Ngaihnep hmel tak hian Voltress chu a khi suk mai, “Tu nge i nih ve a? Aiko-i tan hian engtiang chiah a pawimawh nge i nih a?” tiin a han zawt a.

Kenji chuan rum tak hian a melh a, “A chhungkua, a unaupa...a thiantha ber ka ni.” tiin a chhang a, Aiko-i pawh chu a lo nui sak mai. Voltress chu a nui huk a, “Nangni inlaichinna khan a chhan dawn chuang lo che u, samurai pahnih ka tuk zal tawh a. Tunah pahnih dang in rawn kal leh a, in hun tawp a thleng ve ta.” tiin a rawn pan phei a.

Chutah hnung lam atang chuan aw thum zet mai hian, “PAthum... pathum zawk kan ni e.” a rawn ti thut mai. Rang takin Voltress chu a hawi let a, Aiko-i pa, Takashi Tanaka ngei mai chu thim zing atang chuan a rawn chhuak ve ta a, a sam a lo tawi tawh bawk. Aiko-i chuan mak a ti takzet, “Pa?” a lo ti hu mai a.

Voltress chuan a han en vung vung a, “Nang tunge i nih ve le?” tiin a han zawt ve leh a. Takashi chu a khi deuh sak a, “An pa, an master, an sensei ka ni. Ka fate i lo khawih amaw? I chak dawn lo khawp mai.” tiin a insehruh nasa mai a. Aiko-i chuan a pa chu a en reng a, “Pa, engtin nge hetah i lo awm ve theih?” tiin a zawt a.

Takashi chuan a fanu chu en in, “Aiko, ka tihpalh a ni. I chungah ka strict viau thin a, ka duat ngai lo che tih pawh ka hria. Mahse mi chak tak, samurai chak tak ni la ka duh vang a ni. Min tlan bo san ka phal lo, chutiang bawkin tuman an tihnat che ka phal lo bawk.” tiin zaidam tak chuan a chhang a.

Aiko-i lawm lutuk chu a hnuk a ulh hial, “Awle awle, a tawk e. Khatiang family drama kha ka en hman lo, ka that vek law law dawn che u. Aiko, nang kha ka that hmasa ber ang che.” Voltress chuan a rawn ti leh khur khur mai a. Chutah Kenji leh Takashi chu an va tlan phei a, an inbei leh tan ta.

An skills hmang chuan Voltress current power chu an bum dun zak zak mai a, mashe rei erawh a daih lo. Voltress chuan current hrui hmang chuan a lo sawp let dun zek mai. Rei fe an inbeih hnuah pawh chuan an hneh ta ngang lova, Aiko-i ber lah chu na tuarin lamlianah chuan a la tlu bawk reng a.

A current hrui hmang chuan Kenji chu Voltress chuan a han hlap leng lawp a, Kenji pawh lamlianah chuan a lum phei tawp tawp a. Takashi chu a rawn tho veleh a, mahse Voltress chuan a lo vaw thlu ve leh nghal. Chutah current hlawm lian tak mai chu a siam chhuak a, “I fanu hi mangtha rawh le.” tih pah chuan chu current hlawm liam tak mai chu a va vawm phei ta mai a.

Mahse Takashi zawn a thlen hma chuan Shantanu a rawn lang thut mai, Takashi hma takah chuan ava zuang phei a. Current chu a dawng ta zawk a, a khur cher cher a. Lamlianah chuan a tlu bawk thlawp mai, a taksa te chu a kang nghal nual bawk a. Aiko-i chu a tho va, “Nilo, master.” tiin ava tlan phei nghal.

Kenji thinrim chu a rawn tho va, Voltress chu ava bei leh ta. Mahse a hneh chuang lo, a thal leh tawp tawp thin a. Takashi chuan Shantanu chu va bawihsawm nghalin, “Unaupa, thianpa..eng thil nge maw i tih le?” tiin a va pan a. Aiko-i pawh chuan mittui tla teuh chung hian, “Master, nilo...khawngaihin, khawngaihin min kalsan suh.” a ti lawm lawm a.

Shantanu chuan thei leh thei lo hian, “Sen...sensei, i student ka ni kha ka lawm takzet, i fanu ka enkawl thei pawh ka lawm...i katana min hlan ngei kha, ka hlan chhawng asin.” tiin Takashi chu a en tawk tawk a. Takashi chuan sawi tur reng pawh a hre lo, “Shantanu, nilo..” a ti vawng vawng ringawt mai.

Tichuan Shantanu chuan Aiko-i lam chu a en leh a, “Aiko, hre reng rawh. Voltress hi a chak a, hneh mai mai theih a ni lo. Kha Kurogane Elixir ai khan Voltress serum chu a chak zawk pawh a ni thei e. Mah..mahse, i taksa, i ruh kha black steel a ni tawh. Ka hrilh fo che kha, i hneh thei, i hneh thei ania.” tiin a thaw muang telh telh a.

Shantanu chu a thi ta der mai, “MAster.. a ni thei lo.” tiin Shantanu kutah chuan Aiko-i chuan a vuan a, a tap zawih zawih mai. Chutih lai chuan Voltress chuan Kenji chu a lo sawp hrep hman a, Takashi thinrim chu a au vak vak a. A ding thut a, Voltress lam chu ava pan ve leh ta. Mahse awlsam lutukin Voltress chuan current hrui hmang chuan a lo hlap leng lawp mai.

Aiko-i chauh chu a bang ta, “Tuman min hneh dawn chuang lo, tlawm mai rawh u. Aiko, Arjun-a bulah chuan ka hruai ang che. Kan pahnihin kan tang dun anga, khawvel hi chu kan ta a ni mai.” Voltress chuan a han ti vel ham ham a. Chutah Aiko-i chua  tap bang hmak a, rum tak hian Voltress chu a en a.

A rawn ding chhuak a, a katana chu a chhar a. Voltress lam pan pah chuan, “I hrethiam lo a ni, Voltress. Ka hming chu Aiko Tanaka a ni tawh lo, SAMURAI ROSE zawk a ni.” tiin a tlan thut a, a katana hum chung chuan ava pan ta. Chuveleh Voltress chuan eletric a rawn kap chhuak a, a t(r)ek leh ta chuai chuai mai.

Aiko chu a katana hmang chuan a lo indang a, a tawlh hnung nghal dawr mai. MAhse a tlawm duh lo, a va phei lui zel a. Voltress chuan a han kap na leh deuh va, mahse Aiko-i chu a hnungtawlh ta hauh lo mai. A ke chu hmalamah a va pen ta zel mai a, VOltress chuan mak a ti takzet.

A full force chuan a kal ta chiam chiam mai a, current chuan Aiko-i chu man nasa tawh tak a ni. Mahse a ruh, black steel ni tawh chuan a chakna a ti pung ve zel thung a. Na tuar chung, hrehawm tak chung chuan a pan hnai thei zel mai. Current chu a t(r)ek chuai chuai tawh mai a, mahse Aiko-i chu a tawlh hnung duh tawh bik hauh lo.

A au vak vak a, chutah a va tlan phei thut a. Voltress chuan a power chak ber a hmang tawh a, mahse Aiko-i rawn la tlan phei thei chu mak a ti em em a. Chutah le, a katana hmang ngei mai chuan Voltress thin hnunah tak mai chuan a vit tlang ta hrawk mai. Voltress pawh a ding ngil at a, current t(r)ek chuai chuai te pawh chu a rawn reh nghal vek a.

Dim lo tak hian Aiko chuan a phawi leh hrawk a, “Samurai ka nih hi, min hneh ngai lovang.” tiin a tawng khum ve nghat mai. Voltress chu a tlu tawp a, a thi chiang kher mai. Aiko-i chau lutuk chu a zawi hnawk a, a tlu tur chu a pa leh Kenji chuan an rawn dang a. Chhuan hmel tak hian apa chuan, “Aiko, i ti tha e. Ka chhuang che, Samurai diktak i ni.” tiin a nuih sak a.

**************************************

Darkar 2 hnuah chuan Alex-a leh Ravi-a te chu an rawn thleng a, SUV dum nalh tak mai atang chuan an rawn chhuak a. Boruak lo khu rum rum mai an hmuh chuan an ner dun nang mai, “Khai, indopui a thleng ang mai alawm le...kan khawlai mai mai chuh.” tiin Ravi-a chua  chek tlawk tlawk mai.

Alex-a pawh chu a khi suk a, “Movie ang mai, kan thelgn tlai a nih hmel.” a lo ti fiamthu ve bawk a. Ravi-a chuan ral khata Kenji, Aiko leh Takashi te lo awm chu ava hmu a, “Sir, enteh saw..” tiin Alex-a chu a hrilh vat a. An va tlan phei a, Aiko-i chu Kenji-a malchungah chuan a lo mu hle hle a.

Takashi erawh Shantanu ruang chu a lo la thut chilh reng a, a lo chul hliau hliau mai. Alex-a chuan thil awmzia a han zawt a, Kenji chuan engkim a lo hrilh vek a. Voltress ruang pawh chu a lo awm bawk a, reiloteah police pawh an rawn thleng nghal vat a. Alex-a te pawh chuan Arjun-a chu police ho kutah an pek tawh thute an sawi a, evidence dang lak khawm mek a nih thute nen chuan an hrilh ta vek a.

Alex-a chuan Takashi lam chu ava pan a, “I thianpa chunga thil thleng chu pawi ka ti khawp mai, a thuhrimin engtin nge Mumbai ah i rawn kal a?” tiin a han zawt a. Takashi chu za lo tak hian a nui suk a, “Shantanu hian Aiko-i a hmuh thu min hrilh a, min biak pawh dan a lo zawng char char a. Tichuan ka rawn pan vang vang a ni, min venhim nan, a nunna a chan a ni.” a lo ti zawi sap a.

Alex-a chuan Hiro leh Kaito pawh an zawn hmuh tawh thu leh an la dam thu te, hospital a an awm mek thute chu a hrilh hlawm a. Aiko pawh lo harh in engmah sawi lo chuan Kenji leh Takashi te nen chuan an kal ta daih a, Alex-a pawh chuan a ko zui lem lo. Voltress ruang leh Shatanu ruang chu police te chuan an phur phei a, Alex-a leh Ravi-a te pawh box buaipui chhunzawm tur chuan an SUV dum nalh tak hmang chuan an tlan liam ve leh ta a ni.

******************************************

BONUS :

Trial a la neih dawn avang leh evidence ala kim chiah loh avang chun Arjun-a chu lock up ah dah rih ala ni a, chhui mek leh case kal lai ala nih si avang chuan han tih ngaihna vak a awm hrih lo. Arjun-a chu thinrim tak leh lungawi lo tak chuan a thu tum bur mai a, “Hmu duh tu che an awm ania.” tiin police pakhat chuan a rawn hrilh a.

Arjun-a chu a phawk deuh hru mai, a ding a. Chutah mipa pakhat, kum 30-35 awm vel hi a rawn kal a. A incheina en reng reng pawhin a rethei zawk zawk dawn lo tih chu a hriat reng, hang lampang a ni a. North East lam ni a nih hmel hle bawk, Arjun-a zawnah tak chuan a ding a.

Arjun-a chuan mak tih hmel taka lo en in, “Tunge i nih a? Engtin nge min hriat a?” tiin a zawt a. Chupa chuan a chhang mai lo, a han nui sak a. Chutah chiang fek fawk hian, “Arjun Malhotra, ka mamawh dawn khawp mai che. Mizoram atangin ka lo kal a, ka hming chu Dustin Malsawmzuala a ni.” tiin a chhang a.

*******************************************

THE END

**************************************************

COMING SOON