THE LAST PICNIC (MIZO FICTION HORROR STORY) Written by : Aaron Malsawmdawngzuala CHAPTER - 1

 THE LAST PICNIC

(MIZO FICTION HORROR STORY)

Written by : Aaron Malsawmdawngzuala

CHAPTER - 1

***********************************************

Chhun dar 12 a pel tawh a, kawng reh tak mai leh fal em em maiah chuan Van pakhat chu a tlan mek a, a chhunga chuangte chu an nui leh dar dar thin a. Chungte chu thianho pasarih, picnic tura kal mek te niin an hming chu Ruatfela, Thantea, Rinmawia, Chhana, Puipuii, Zodini leh Nunui te an ni.

An vai hian tleirawl naupang tak tak vek an la ni a, tette atanga inkawm ngeih em em an ni a. Exam zo hlim an lo ni bawk nen, intih thawven nan an pasarih chuan picnic an tum a ni. Inngaizawng an awm hran lem lova, mipa leh hmeichhia inkawm ho mah nise chutia awm khaw lo tura leng chhuak an ni lem lo bawk.

Motor khalh mektu chu Ruatfela a ni a, kum 20 mi lek niin a pa motor chu a dil chhuak thei hram a nih hmel. Aizawl atangin km engemaw zat an kal tawh a, Rinmawia chuan thil mak leh hlauhawm a lo tawn tawh hote leh a hriat hote chu inti thawnthu sawi thiam tak hian a han sawi dap dap vel a.

Ruatfela chuan fiamthu ti tak deuh hian, "Rinmawi, sawi tawh lo teh. Ka hlau tan riau ania, anih loh chuan motor atang hian ak zuangthla daih a nimai." tiin a han nui hak hak a. Rinmawia chu a lo ner sak a, "Ve lutuk a, hlau lo der vel suh. Tikhan zanin i mut naah i hlau leh si anga, min ngei ru viau ang mawle." tiin a lo fiam let ve bawk.

Puipuii chu rawn tawngchhuak ve in, "Kalkawng ala thui angreng si a, a dang han sawi leh zel teh." a lo ti a. Chutah an zinga ei leh in duh ber, Chhana chuan a Lays ei mek chu a dap ruk ruk a, "Naa, a zo leh ta. Dawr lo awm leh hmasa berah kan din ngei ngei a ngai tawh ania, kan tlan pel zel a. Hei chips vel pawh kan nei tawh miah lo ania, ka ril lah chu a tam reng mai lehnghal." a lo ti nuah nuah a.

Thantea chuan rum fe hian a lo melh a, "Ka eitur pai zawng zawng pawh i ei zo vek tawh, tiffin chiah a bang tawh. I ril lah hi a tam bik reng mai a, i pumpui a lian bik awm ka ti." tiin a han nghawk sawk a. Zodini, an zinga naupang ber, kum 16 mi lek chu a han thu ta sauh sauh va.

"Saw, sawlaia saw dawr chu a awm. A bak chu a awm tawh miah lovang, khaw kar kawng vek a ni tawh. Tah sawn ding ang u, ka zun a chhuak hrim hrim." a rawn ti ve a. Nunui pawh chu a rawn thu chhuak ve a, "Nia, keipawh thil thlum lam ka ei angai. Awii, chocolate ka ei chak zia hi." a rawn ti ve nuah nuah bawk.

Dawr chu an va thleng a, "Tunge va lei dawn, pawisa te kha rawn phawrh khawm ula?" Ruatfela chuan a han ti a. Thantea chu a han thu awn ruai ruai a, "Ka kal peih miah lo ania, va kal ru. Motor hi ka lo veng ang, rei lo ula." a han ti nghal zuah zuah a. Chhana chu a lo nui huk a, "Eng lakah maw i lo ven ang? Ramhuai hovin an lo ruk daih i ring em ni? Thatchhiat thlak lutuk, nangmah kha va kal nghe nghe teh." a han ti deuh zek a.

Rinmawia pawh chuan, "Pawisa i ui vang nih kha...hawh u, kan vaiin kal vek ang u. Mahni pawisa vek kan hmang dawn tho va, kan duh zawng apiang kan lei theuh anga nimai lawm." a rawn ti a. Thantea chu a zi mar talh talh a, "Ka va che peih lo tak e awww." tih vawng vawng pah chuan motor atang chuan a chhuak a, a thiante chuan an rawn zui ve bawk a.

*****************************************

Dawr chu an va pan hnai zel a, kawngka chu a lo inhawng huau mai. A chhungah chuan an lut a, mahse mak tak maiin dawr nghaktu a lo awm miah lo. An hawi kual hru hru hlawm a, "Khawnge maw dawr nghaktu ber pawh chu a awm le?" Ruatfela chuan a han ti nuah nuah a. "Kan lei duh chu thlang phawt ang u, a lo lut mai ang, a zung lawk aniang." tiin Chhana chu a kal kual nghal a.

Midang pawh chuan an duh chu an thlang ve nghal sap sap bawk a, cold drinks te leh chips eng eng emaw te chu an la khawm zel a. Thantea chu a rawn au deuh vak a, "Nunu, heiii..chocolate chu helam ah hian a awm." a rawn ti thut mai. Chhana bawk chuan a melh rum leh ngei mai, "Khatia au vak kher kha a ngai lo." tiin a lo hau leh hman hram a.

Zodini zun chhuak pawh chu dawr bula zunin ah chuan a zung a, a zung zo rawn let leh, dawr chhung a lut ve tur chiah chu an motor dahna phena tu emawni phei zuk chu a hmu hman a. A ding chat mai, a en vang vang a. Mahse a reh leh hmak mai bawk si, chutih lai tak chuan dawr chhung atang chuan, "Zodin, lo lut ve ta che.." tiin Puipuii chuan a rawn au va.

Zodini pawh chu a phu zawk mai, engmah sawi lem lo chuan dawrah chuan a lut ve mai bawk a. A thil lei tur chu a thlang ve mawlh mawlh a, chutah dawr nghaktu thutna bula mihring luruh lem niawm tak, mawi hnai taka chei chu a en vang vang a. A la kang a, "Enteh u, he thil hi a sial reuh tawp." tiin a thiante chu a hmuh tir ve a.

Chutah patling aw thum tak mai hian kawngka bul atang chuan, "Kha kha khawih suh." a rawn ti thut mai. An thianho chuan an phu rual dul hi a ni ber mai, an va hawi phei chu kum 40-50 vel ni awm tak, hmeltha vak lem lo, khabehmul buk chhur mai hi dawr chhungah chuan a rawn lut a.

Zodini pawh chuan a dah nghal vat a, "Enge in duh le?" tiin nelawm hmel tak, mahse amah en reng reng pawh a nelawm loh tak si chuan Zodini te thianho chu a han melh kual dan dan hlawm a. Chhana chuan ava pan pheiin, "Englo ania, ka pu. Picnic turin kan kal mek a, hei bak chu dawr a awm tawh hmel si lova. Chuvang chuan kan rawn lut a, mahse tumah an lo awm si lova...kan lo la lawk mai mai mawle, engmah kan ru lo ania." tiin a insawifiah nghal zung zung a.

DAwr nghaktu chuan Chhana chu a en vang vang a, a la khi suk zui. Chutah muang ban cherh chawrh hian, "Helai kawngah hi chuan tuvak mah an rawn kal ngai lo asin, a reh thin si a. Chubakah ramhnuai a hnaih bawk si nen, ramhnuai chhunga awmte hian mipui a hnawt darh ve thin a. Mahse lungngai suh u, kawngpui hnaiah awm reng ula in him a nimai." a ti deuh duah mai a.

An hraitthiam loh hmel hlawm kher mai, an inen hu hu hlawm ringawt a. Zodini phei chuan chupa chu a rap ru riau lehnghal a, "Kan rei dawn lo, zanah kan haw lehnghal ang." a lo ti khur deuh dar dar a. Dawr nghaktu chuan a lu a han bu nghat nghat a, "Ummm, ava tha ve. A tha a nih chu, a chhan chu maw...ramhnuai chhung pilril tak mai saw, anmahni rawn pantute hi a chhuah leh tawh ngai mai mai lo a nia." a han ti leh a.

Ruatfela te thianho chu an hrilhhai takzet, "Mahse in hmel ka en a, inla naupan hmel hlawm viau nangin mahni invenghim thei vek in nih ka ring tlat." dawr nghaktu bawk chuan a han ti leh a. An thianho chu an ngawi thap a, sawi tur reng an hre lo. Chutah Chhana chu rawn pen chhuakin, "Khale, hei zawng hi ka lei aw.." tiin pawisa a pe a, midang pawh chuan an pe diat diat hlawm a.

An chhuak ta a, Zodini ngaih tha lo chu a hawi let leh a. Dawr kawngka bulah chuan a nghaktupa chuan a lo la en run mai, a hmel te chu a rap riau va. Tichuan motor ah chuan ngawi reng chuan an lut hlawm a, an tlan liam ta a. An tlan liam lai chu dawr nghaktu chuan a en zui vawng vawng a, a khi suk mai.

*****************************************

An thianho chuan picnic spot lam pan chuan an tlan leh zel a, a hma a an hlim dar dar tehreng nen, an ngawi ta thap mai. Zodini chu rawn tawng chhuakin, "Enteh u, kha dawr nghak putar kha....ka sawi thiam lo, a engemaw raprawm riau in ti ve em?" a han ti nuah nuah a.

Nunui chuan a lu lo bu nghatin, "Umm, amah hrim hrim kha a nelawm loh si. Chuan... ramhnuai chungchang a sawi te kha, keichu engmah awmzia ka hre lo." a lo ti ve bawk a. Puipuii chuan a thiante chu rawn zawm ve in, "Nia, ramhnuai chungchang a sawi kha a mak tawp. Ramhnuai chhunga thil awm ten anmahni pantute chu an let leh tir mai mai lo tia a sawi kha...eng tak chu nimaw?" a rawn ti ve bawk a.

Zodini chu a ngawi vang vang a, "Keipawn ka hrethiam bik lo, eng emaw thil lakah min warning lawk tihna te hi a ni mai lo maw?" a rawn ti ve leh a. Chhana chuan a chip thial nuau nuau pah chuan, "Hmeichhe ho tak hi chu aww... in dawih lutuk. Patling pakhat ve mai a nih kha, a inla hlauhawm kual vel mai mai a nih kha." a lo ti sam et mai.

Rinmawia pawh chuan a thianpa thusawi chu a lo pawm hmel khawp mai, "Keipawh chu chu ka rindan chiah a ni, a inla hlauhawm vel mai mai a nih kha. Chubakah thiang puitling inla upa deuh deuh ho hian keini ang rual hi han tihthaih a, han sawi thaih hi nuam an ti ve hrim hrim alawm." tiin a lo tuihnih ve bawk.

Thantea chu a lo khi suk a, "A thusawi kha chu eng pawh lo nise, enge kan chungah thleng vak ang nga? Accident te chu tu pawhin an tawk thei a, vanduai vangin. Chu mi nilo thildang thlahrang tih vel hi chu e, ka awih hlawl lo. Ti hian kan picnic anga, zanah kan haw leh mai anga, a zo der a nimai." tiin hmeichhe ho chu a rawn tawng thlamuan ve bawk a.

Mahse Puipuii ngaih chu a tha chiah lo ni ngei tur a ni, "Mahse min en dan te kha, a thusawi dan te kha. KAn hriat ve loh thil hriat a nei a ang ka ti, min hrilh lawk ni ang mai hian ka hria." a han ti leh nuah nuah a. Ruatfela chu a khi suk a, "In ninawm, patling pakhat rawn inla engemaw vel lutuk vang mai maiin kan boruak hi ti chhe lovang u. Hei spot kan thleng tep, a hla tawh lo ania." tiin a thiante chu a rawn chawk phur a.

Zodini chuan tukverh lam a hawi vang vang a, "Amah kha a rapawm ka ti keichu, ka tiril a fan tlat." tiin a han nui deuh suk a. Tichuan mipa ho chuan fiamthu an han thawh leh tan a, an boruak pawh a ziaawm leh deuh tan ta. Hmeichhiate chuan han sawi chhuah leh zeuh nei thin mahse, mipa ho chuan thildang an lo sawi leh vat zel a.

********************************************

Rei vak lo hnuah chuan picnic spot pawh chu an thleng ta a, a hla vet vet khawp mai. Ramhnuai ruih maiah hian a lo awm a, tichuan an thian ho chuan an bungruate chu an han la thla sap sap hlawm a. Tlai dar 3 leh a chanve a pel der tawh mai, khua pawh a dul deuh tan ta.

Mahse khaw lum lai a ni bawk a, tui chen pawh chakawm tawh tak chu a ni ngei ang. Ruatfela chuan swimming pool bulah chuan puan a phah a, zu leh beer te chu a chhawp a. Beer pakhat hawn pah chuan, "Ka lem chakna a rei tawh lutuk." tih pah chuan a in nghal khawlh khawlh a.

Rinmawia leh Thantea te pawh chuan woofer chu fit tha mawlh mawlhin hla an play nghal a, a ri dup dup mai. Zodini chu a inphelh nghal sawk sawk a, tuiah chuan a cheng nghal a. Puipuii leh Nunui erawh an ke chauh chiahin beer chu an in ve a, pool kilah chuan an thu a. Zodini chuan va panin tui chuan ava theh a, "In mak e, hun rei kan nei lo ania. Lo cheng ve vat ru, a dai nuam lutuk." tiin ava sawm a.

An han infiam bawk bawk hnuah chuan pool ah chuan an inpawt thla hlawm a, tuia intheh in an nui uar uar mai. Mipa ho pawh chuan an va zawm ve a, thian ho inthlim an ni bawk a, nuam an ti tlang kher mai. AN rui ve deuh bawk nen, an titi a, a chang leh an zai a, thla te an la a, chutiang chuan hun hmangin darkar engemaw zat hnuah chuan khua a rawn thim dawn tan ta a, haw a lo hun ta.

Haw tur chuan an in-pack tan ta a, a hnuhnung berah Zodini chu inti fai turin bathroom lamah chuan ava phei a.  Midang chu an lo insiam zung zung bawk, reilote hnuah chuan Zodini inbual fai zo pawh chu bathroom atang chuan a rawn chhuak a. A thiante lam ava pan tur chiah chu a sir, pal kara thing phena mi pakhat phei zuk chu a hmu hman hlauh mai.

A ding nghal chat a, a thin a phu nghal dup dup mai. Va en chian deuh tuma a va kal hnai chu thawm a hria a, a au vak mai. A thiante chu a rang a rangin an rawn tlan phei nghal a, "Eng thil nge ni ta?" tiin Ruatfela chu a rawn thleng hmasa ber a. Zodini chuan ramhnuai lam chu ava kawk a, "Ka hmu, mihring ang deuh mai." tiin a khur dar dar a.

Chhana chuan beer la dawm reng chung chuan, "Aa.. i hmu sual mai mai aniang, kha putar thil sawi kha i bengah ala cham mai mai a nih kha." a lo ti sam et mai. Rinmawia chuan nui deuh sang hian, "A tlai dawn, kan haw tlai lutuk ang. I kal vat zawk ang u, khua a thim tawh a, thil hmuh sual te hi a awl ania." a rawn ti ve a.

Zodini chuan a hmu tih a chiang si, "Ka hmu chiang alawm, mihring pian chu a ni ngei alawm. Thingkung phenah hian a phei zuk a, dawt ka sawi lo." a la ti talh mai. Chutah Thantea chu a nui deuh huah huah a, "Ramsa eng emaw ber aniang, ramhnuaiah kan awm hi...thlahrang lam a ni teuh lo mai." a rawn ti ve leh a.

Zodini pawh chuan ramhnuai lam chu a han en leh vang vang a, "Nia, a ni mahna." tiin a phun sap a. An in pack zo ta a, tichuan a spot neitu, putar nupa te chu an hman man te an pe a. Tichuan haw tur chuan an motor lam chu an pan ta a, an haw pah chuan an thil tawn te leh nuam an tih zia te chu an sawi a, an hlim dar dar hle mai.

**************************************************

Darkar khat vel an tlan hnu chuan a then chu an muhil a, an chau deuh bawk nen an reh thiap mai. Ruatfela chuan a petrol meter chu a han en a, a lo tlem kher mai. Mak a ti em em a, "Ehe..avan mak ve." a ti hu mai a. A bula thu Chhana chu a rawn harh a, "Eng nge a?" tiin a ham bai bai a.

Ruatfela chuan meter chu a kawk a, "A tlem lutuk, petrol hi.." tiin a lo chhang a. Chuveleh midang pawh chu an rawn harh a, "Eng maw? Kan kal hma khan kan thun reng sia, enge awmzia?" tiin Chhana pawh chu a ka hau mai. Rinmawia pawh chu a rawn harh a, "Kan thun alawm, tiang em em a tlem tur kha a la ni lo hrim hrim." a rawn ti ve bawk a.

Thantea chu a ngawi vang vang a, "Aizawl a la hla em, heta tang hian?" tiin Ruatfela chu a han zawt a. Ruatfela chu a thaw deuh hak a, "A la hla ve lutuk, tiang lek petrol nen hi chuan kan thlen zawh ka ring lo." a ti ta mai a. Chutia mangang taka an awm lai chuan sign board pakhat a, SHORTCUT TO AIZAWL tih lo inziak chu an hmu a.

Ruatfela chuan ala hmuh ngai loh avang chuan mak a ti lutuk chu a ding hial a, "Ehe, en teh u." tiin sign board chu a kawk a. An ngawi ta thiap mai, "In hmu tawh ngai em? Keichu a hma a kan picnic pawh khan ka hmu ngai lo reng reng, engtik atangin nge an dah le?" Zodini chuan a ti deuh hu mai a.

Nunui chuan a lu thingin, "Hre ngai lo, kan kal ve fo va, tiang sign board a awm hi ka hre ngai lo hrim hrim." tiin a lo chhang a. Puipuii pawh chuan a han en vang vang a, "A thuhrimin, engtin nge kan lo hmuh loh theih thin le?" a lo ti ve nuah nuah bawk a. Chhana chu a ngaih a tha chiah lo, "Shortcut a awm maw? Kan la hmu ngai bawk si lova, a ni tak tak dawn em mawni le?" tiin a inngaihtuah vang vang a.

Mahse Rinmawia chu lo inrawlh vatin, "Duhthlan tur kan nei chuang em ni? Tunah hei petrol kan nei tlem tawh em em a, shortcut a kan kal a nih chuan Aizawl chu kan thleng hman em em ang? Pump hnai berah emaw, a black a zuar te pawh an awm mahna...kan ti fuh zawk ang." a han ti a.

"Kawng thar an siam te pawh a ni mahna, kan thleng hma thei zawk anga, a tha alawm." Thantea pawh chuan a rawn ti ve bawk a, midang pawh chuan an pawm tlang ta a. Ruatfela chuan motor chu a start a, tichuan shortcut lam inziahna kawng chu an pan ta zawk a. Mahse Chhana leh Zodini ngaih chu a tha chiah lo, kawng lah chu a tha lem lo em em mai lehnghal a.

***************************************************

An tlan zel a, chu kawng chu a chhe tulh tulh mai a. An hriat ngai miah loh kawng a ni bawk nen, kawng awmdan te chu a mak tulh tulh mai a. A ramhnuai deuh tulh tulh bawk, Zodini chuan a phone phawrhin a chhungte chu an chanchin hrilh a, call a tum a. MAhse a phone a han hmet eng chiah chu signal a lo bo vek mai, "Signal in nei ve em?" tiin a thiante chu a zawt kual hlawm a.

Midang pawh chuan an lo nei ve bik hauh lo mai, an ngaih chu a tha tawh mawlh lo. An tlan zel a, a rei telh telh a, kawng chu a thui telh telh a, khawchhung emaw, dawr emaw pawh engmah hmuh tur a awm ta thak lo mai. Darkar engemaw zah an tlan hnu pawh chuan dawr te emaw, in pakhat lek pawh hmuh tur ala awm ta lo cheu mai chu mak an ti tawh takzet.

Puipuii chuan a sana chu a han bih a, "Shortcut a intih si chuan Aizawl kan hnaih tawh hle tur ania, mahse kan awmna hi a hla tulh tulh zawk emaw tih mai tur a ni." tiin a han phun nuah nuah a. Chhana chu tukverh ah chuan a dak chhuak a, "Nia, a dik lo reng reng. Darkar 2 kan tlan tling tep tawh, a ngaiah kan let kual leh vel mai mai ang tluk a ni." a han ti ve bawk a.

Zodini chu a thu ngui bar a, "Main road ah khan lo kal mai mai zawk ila tha tur, heti hi chuan khawiah mah Aizawl kan lut lovang." a lo ti zawi ve sap a. Chutah motor chu a rawn ri tawk tawk a, a tlan maung tial tial a. An ding ta der mai, "Ni lo....a pawi ta, a pawi ta." tiin Ruatfela chuan a lu a dawm vawng vawng a.

An mangang tlang hle mai, an phone ah lah signal a awm der mai si lo. An awmna lai chu khawi lai nge an hre der mai bawk si lo, lamlian awm ve thlap mahse khaw kar kawng pawh a ang meuh lo hial a ni. Thantea chu a thaw hak a, "Huiham, engtin nge kan tih tak ang?" a ti zawi sup a.

Ruatfela chu motor atang chuan a chhuak a, car te chu a han check vel a. A khalh chiah a thiam a, ala naupang bawk a, a bak hi chu tih ngaihna vak a hre bik lo. Midang lah tumah motor khalh thiam an awm bawk si lo, ahnuah chuan petrol chu a lo leak reng chu niin. A hma in check nachang tinge i hriat loh tih vel chuan an inhnial buai hrep phah lehnghal a, an mangang tlang kher mai.

Minute 10 vel hnuah chuan an reh thap hlawm a, "Motor lo tlan an awm mai lo maw le, kan lo phar anga min pui thei mial maithei asin." Ruatfela chuan a rawn ti chhuak hlawl a. Chhana chu za lo tak hian a khi suk a, "Hetah hian keimahni bak kan tlan lo, darkar chuang fe kan tlan a, motor min peltu emaw, tawh pawh kan nei chuang lo." a rawn ti zawi sap mai.

Chutia mangang taka an awm lai chuan Zodini chuan mau hmun lam chu a va en a, engemaw eng de ve ve a hmu ta tlat mai. Ring tak hian, "Enteh u, saw.." tiin mau hmun lam chu a kawk a. Midang pawh chu an va hawi ve thap a, mau leh thing kara, hla vak lova eng de ve ve chu an va hmu ve ta.

Rinmawia chuan a han en vang vang a, "Thlam emaw, in emaw a ni lo maw?" a ti nuah nuah a. Chhana pawh chuan a lu lo bu nghatin, "Ram riak vel an awm ani mahna, tute emaw huan aniang. Min pui thei maithei asin, kan va kal dawn em ni?" a han ti nghal zung zung a. Ruatfela erawh chuan a ring chiah lo, "Eng emaw eng vel mai mai hi a lo ni ange aw, kan kal hah thlawn mai mai ange..ramhnuai ala ni zui." a lo ti daih mai a.

Mahse midangin pan an duh vek avang chuan a kal ve ta mai a, motor atang chuan an chhuak diat diat a. Nunui chu a phur lem lo khawp mai, "Ramhnuai kar vela kal chu a, zanah lehnghal." tiin a phun nuah nuah a. Za lo takin Chhana chu a khi suk a, "Kan hun tawn hian a zir si lo a nih hi." a lo ti dam dap a.

**********************************************

Ramhnuaiah chuan an lut ta, a nelawm lem loh khawp mai. Boruak lah chu a vawt deuh sur lehnghal a, sava hram ri leh rannung hram ri chu a khat tawk chuan a ri reng bawk a. Hnah ro leh thing tang ro a tam em em a, an rap ri leh rawp rawp thin. Chhana chuan an mood chu tih danglam tumin, "Kan va kalna tur hi, dawithiam pitar in nge in hrang a nih in rin?" nui deuh hak hak chuan chuan a rawn ti fiamthu a.

Nui deuh suk chung hian Rinmawia chuan, "Tuna kan dinhmun nena en chuan, a ni ve ve ang ka ring." tiin a lo chhang a. Zodini erawh a nuih a za ve hauh lo, "Min pui theitu tur, mifel tak a lo nih ngei ka beisei." a ti deuh hmuk mai. Nunui pawh chuan, "Nia, signal awm lo mahse eng tin tin emaw min puih theih ka ring." a lo ti ve bawk a.

Thantea chuan Zodini chu a en deuh vang vang a, "Tinge a, Zodin? I mood a va off hmel ve a? I hlau deuh em ni?" tiin a zawt a. Zodini chu za lo tak chuan a lo nui lui a, "Ka tha alawm, zanin zet chu plan a fuh hlawl lo a ni e." tiin a chhang a. Puipuii pawh chuan thaw hluam hluam hian, "Nangmah chauh i ni bik lo, Zo. Hlau pawh nila ka dem lo che, keipawh diktak chuan ka ngaih hi a tha chiah lo alawm. Kal lamah lah kha dawr nghaktu khan min sawi thaih a, Shortcut kan la hmuh ngai miah loh sign board a lo awm bawk a. Chuan tunah kan motor petrol a zo va, ramhnuaiah puihna zawngin ke in kan kal leh mek chu a nia, thlahrang film te pawh a ang hial ka ti kan awmdan hi." a han ti deuh duah a.

Ruatfela chuan a aw a han thian kharh kharh a, "Engpawh nise, light saw i zui zel phawt mai teh ang u. Kan thlen veleh awmdan tur chu kan ngaihtuah leh dawn nia, a hla tawh lovang." tiin a thiante chu a han fuih phur thar leh a. An kal thui telh telh a, light pawh chu a eng chiang tial tial bawk.

Chhana chu kal pah chuan a khur deuh dar dar a, "In ni ve em? A vawt riau ka ti, a hma ang kha a ni tawh miah lo." tiin a thiante chu a melh kual a. Rinmawia pawh chuan a kut chu lo tuai vut vutin, "Um, a vawt deuh chu a nih hi. Helai hmun hi ka nel hlawl lo, kan lo kal ta mai pawh a.." a han ti hnuhnawh leh vel a.

An kal hnai zel a, eng pawh chu a lang chiang tawh ngei mai. An rin ang ngeiin thlam, assam type a sak, lian lo tak mai leh chenna atana iai awm ve tak tur hi a lo ni a. Ruatfela chu a kal chak deuh va, "Saw le, kan rin ang ngeiin thlam chu a ni ngei e. Tu emaw chu an awm turah ngai ila, tlem chuan hope a awm e." a han ti deuh lauh lauh va.

An thleng ta a, thlam bul lawkah chuan an ding thap mai. Thlam lah chu a chul rup mai a, a ung khup bawk a. Nelawm loh tak a ni, en reng reng pawhin a hran duh hmel em em a. Thlam chu an thian zaho chuan an en thap a, "Kan kik mai dawn mi?" Nunui chuan a han ti zawi sap a.

"Kan kik mai loh chuan...luh tlang tawp te chu a chi nang." tiin Zodini chuan a lo chhang deuh hmuk mai. Ruatfela chu an zinga upa ber a ni bawk a, hreh tak chung chuan a pen chhuak a. Thlam kawngka hmaah chuan a ding ran a, "In awm em?" tih pah chuan a han kik karh karh a.

Mahse a reh vung vung mai, an inen hu hu hlawm a. A han kik nawn leh a, "Khawngaihin min pui thei angem aw?" a han ti leh a. Mahse ala reh vung vung mai, a hlauh ve deuh avang chuan tawlh hnungin a thiante bulah chuan ava ding ve leh a. Boruak chu a reh vung vung a, sava chiar thawm leh rannung hram ri bak hriat tur a awm lo.

Tumah chu an inbe lo, an ngawi thiap ringawt a. Chutah Ruatfela bawk chu rawn tawng chhuakin, "Engtin nge ni dawn? Kan lut tawp mai dawn mi?" tiin a thiante chu a han zawt a. Zodini chuan hlauh hmel tak hian a hmui a pet fan fan a, a hnunglam chu a vaw hawi a. A thim em em mai bawk si, "Ka hre lo, motor ah khan kan va kir leh zawk mai dawn nge...helai hmun hi ka nel hlawl lo." a ti tham tiak a.

Mahse Chhana chuan let leh chu a hreh tawh ngang mai, "Mi lo awm ta se, let leh ringawt ta ila. Thlam chhungah hian min pui theitu tur a lo awm maithei asin, a muhil pawh a ni thei a. Chubakah petrol kawl te pawh a lo nei khiah maithei asin, thlama riak ve tho ania, lir thei khawi emaw laiah chuan a dah ve tho awm emai." a lo ti nghal chiam chiam a.

Thantea chu a kut kuankuah in a han thaw deuh hak a, "Anih leh tumah lo awm lo ta si se, tihian khawvar kan nghak tawp dawn nge, ke in main road lam kan pan leh hnak hnak zawk dawn?" a lo ti ve bawk a. Nunui chu a han ngawi vang vang a, "He thlamah hian mi an awm hlauh a nih chuan riah pawh a nuam zawk ang, pawn khawvawt a awm reng ai chuan." a rawn ti ve a.

Rinmawia pawh chuan a lu lo bu nghatin, "Nia, motor chhunga tawt deuhva riah ai chuan kei chu ka hlau lem lo heta riah hi.." a lo ti sam deuh et mai. "Mahse a chhungah tu nge, eng thil nge awm kan hre si lova. Ramsa hlauhawm deuh te lo awm thut ta se, anih loh pawn mi hlauhawm deuh lo ni ta se." a rawn ti ve leh thung a.

Chhana chu a khi suk mai, "I ngaihtuah mak thei emai a, a thuhrimin kan chhungte ber hi ania. Naktuk khawvar hunah ngaihtuahna chu kan seng leh mai thei tho va, motor emaw hemi thlam pawh chu nise, kan chanchin an hre dawn lo tawp hi a buaithlak ka ti." tiin a rawn chhang a.

Zodini pawh chuan zawi sap hian, "Nia... kan bo emaw, tawh sual kan tawk emaw an tih a hlauhawm." a lo ti ve bawk. Ruatfela chu a han thaw leh hak a, "Umm.. engpawh nise, kan kik leh anga, tuman min la chhang chuang lo a nih chuan kan lut mai ang..a hlauhawm in tih leh motor lamah kan let leh mai anga..en ve chhin hrim hrim kha..." a sawi zawh hma chuan inchhunglam atang chuan thawm a rawn ri rak a, chutah muang chang chuan kawngka chu a rawn inhawng ri tuah tuah a.

*************************************************

TO BE CONTINUE