THE LAST PICNIC (MIZO FICTION HORROR STORY) Written by : Aaron Malsawmdawngzuala CHAPTER - 5

 THE LAST PICNIC

(MIZO FICTION HORROR STORY)

Written by : Aaron Malsawmdawngzuala

CHAPTER - 5

(LAST)

**********************************************

Famkima chu a han thu awn deuh riai riah a, "Ka sawi ve hun ka nghak rei tawh bawk a, a chhan chu he ka thawnthu hi chu a special em vang a nia a hnuhnung bera sawi kher ka duh ni." a han ti te te phawt a. Tleirawl ho chuan an en thap mai, "HE ka thawnthu sawi tur hian hming a nei nghe nghe a, PICNIC HNUHNUNGBER tiin a hming ka vuah a ni." a han ti leh a.

Chuveleh Zodini chuan ngaihthat lohna riau a nei a, a lu chu a rawn hai deuh thut leh nghal. Famkima chuan thawk a han la hrawk a, "Tuna mi hi chu in thawnthu sawi nen kha chuan danglam tak hi a ni ringawt, ka lo khek tang tang alawm. In sawi zawh hun kha ka nghakthlel thin teh asin, tunah chuan a nihna tur ang thalin ka sawi thei tawh dawn e." a han ti leh a.

A aw te chu a dang deuh tan riau mai a, a che zia pawh a mak tan ta khawp mai. Ruatfela chuan thil dik lo a awm ni ngei hian a hria a, mahse a han che deuh hrut chu a lu a rawn hai ta muai muai mai. Midang chu a en a, an ni pawh chu an awmdan a dik lo tih a man thiam ve nghal bawk.

Zodini chu a hlauthawng nghal der a, mahse a taksa a ti che sawn tha thei hauh si lo. A thiante pawh an mitmeng a dik lo tih chu a hmu ve bawk, han inthin harh mai a tum a. Mahse a lu chu a rit em em mai a, chutiang bawkin a thiante pawh chu an mitmeng a zim tial tial emaw tih mai tur hian an meng tha hlei thei lo.

Famkima chu a han ding deuh thut a, "Hei hi ka thawnthu chu a ni, nangmah ni ang chiah hian tleirawl la naupang tak tak pasarih hi intihlim turin an chhuak a. Hmun hla tak, Aizawl pawn daih a picnic an tum a ni. A tir chuan engmah buaina an nei lo, an hlim a, tui te an cheng a, nuam an ti takzet." tiin a vei kual thuak thuak a.

Thil dik lo a awm tih chu an hre thiam tan ta, mahse an taksa erawh an thunun thei tawh lo. An zawi tial tial a, an tawng chhuak thei lo bawk. Chhana chu thawh a tum a, mahse a chet rual rual chuan thawh chu sawi lo, amahin chhuatah chuan a thal tual mai. Famkima chu a khi deuh suk a, "Mahse an haw lam chu, mak tak maiin thui pawh an la tlan lo tih ah chuan an petrol chu a tlem ta em em mai a." tiin a sawi chhunzawm zel a.

An mahni thil tawn ngei a ni tih chu an hrethiam tawh, mahse tumah chuan chakna reng an nei lo. An lu a na em em a, Famkima aw te chu a khawk deuh rum rum hian an hria a. Boruak chu a lum pum pum ang hian an hre bawk a, an hlauthawng takzet. Mahse an che hrim hrim chu a muan hian a muang ruih mai a, an thu ngil hleithei tawh lo.

Famkima chuan ala sawi chhunzawm zel a, "Tichuan Shortcut To Aizawl tih signboard inziak chu an hmu fuh hlauh mai, an la hmuh ngai miah loh ni mahse an petrol a tlem tawh em avang chuan an rilru a hmanhmawh tawh a, chumi kawngah chuan an kal risk ve ta tawp mai a." tiin a han chawl deuh dat a.

An thil tawn ang zel a sawi mai chu an hlauthawng tawh takzet, mahse Famkima erawh chuan a thawnthu sawi lai chu a la sawi tan dawn chauh si. Thei leh thei lo hian Thantea chuan rum tak hian a melh a, "Tu...tu phiangsen.." a sawi zawm thei lo, a ka chu a chih vek mai.

Famkima lah chuan zaizir-a bengchheng lo tura hrilh pah chuan, "Lo tawng suh u, ngun tak leh rilru pe taka ngaihthlak a ngai ania." ngeiawm tak hian a lo ti a. Zodini, Nunui leh Puipuii te phei chu an mittui a tla phung tawh. Chutah Famkima chuan sawi zawm zelin, "An thian ho chuan an tlan zel a, mahse an kalna chuan Aizawl a pawh thei reng reng lo mai." tiin a han chawl leh phawt a, a hmanhmawh loh hmel takzet.

Engtin emaw tak him dama an tlan chhuah theih hlauh takin tiin luhai chung chung chuan Zodini chu a hawi kual a, mahse anmahni pui thei tu tur thil tangkai engmah reng a hmu lo. Silai lah kha Famkima'n a dahtha daih tawh bawk si, "Rei fe an tlan zel hnu chuan an petrol chu a zo ta nge nge a, khaw kar kawng khawi lai nge pawh hriat lohvah chuan an thian ho chuan an tang ta reng mai." tiin Famkima chuan a lo sawi chhunzawm zel a.

Boruak chu a rit tial tial a, meilum chuan boruak lum em em mai chu rawn ti zualin an vai mai chuan an thlan a tla bawrh bawrh tawh mai. Famkima chuan thaw a han la leh te te a, "Tichuan mangang takin motor dang lo kal hmasa ber chu tanpuina dil mai an tum a, mahse eng motor mah a rawn kal der mai si lo." tiin a han nui leh rih vel a.

Tu a te mah chu an tawng thei tawh lo, an taksa chu a chau hnuk ang mai hian an zawi ngawih ngawih hi a ni ber mai. Famkima chu thutthlengah chuan muang changin a thu a, "Tichuan chutia mangang taka an awm lai chuan an zinga pakhat chuan ramhnuai lam chu a han thlek vang vang a, tichuan light de ve ve hi a hmu ta a." tiin thutthleng chu a han ngheng leh ar ar a.

Zodini te thian ho pawh chu an lu a hai tial tial a, Famkima pawh chu an hmu phe ruai tawh mai. Famkima chuan a sawi zela , "Thlam ni awm tak a ni, tanpuitu tur an hmuh ringin ramhnuai lam chu an thian za ho chuan an pan ta ringawt a. An kal thui zel a, eng chu an zui zel a. Reilote hnuah chuan an thleng ta a, an rin ang ngeiin thlam chu a lo ni ngei e." tiin zawi te chuan a han nui ri hak hak a.

Chutah a hmel chu lungawi loh hmel tak hian hian a rawn inthlak danglam thut a, "Chu thlam neitu chuan polite takin a lo mikhual a, fel pawh a fel hmel takzet. Chung tleirawl ho pawh chu thlam chhungah chuan an lut ve mai bawk a, mahse an hriat miah loh chu, chu thlam neitu chu tual thah hmang a ni tih hi." a ti ta mai a.

An meng phawk nasa kher mai, Puipuii phei chu a rawn tap chhuak ti tih hial a. An hlauthawn takzet, Famkima mit meng lah chu a thinrim hmel em em bawk a. A han thaw halh halh a, "Hun rei tak chhung, hun rei tak chhung chu hetiang hun hi a lo nghak tawh thin. MAhse chung tleirawl ho chuan pa fel tak angah ngaiin a thlama riah ve mai chu an tum a, chumi hma chuan thlam neitupa chuan a mal te te in thlahrang chanchin sawi tur chuan a ti a." tiin a sawi zawm leh a.

"Tleirawl te pawh chuan a mal te te in an sawi ta vek a, an zinga hmeichhe pakhat tih loh chuan.." tiin Zodini chu ava melh kher a. Zodini chuan hlauh hmel tak hian a lo en let a, "Naupang mawl tak an ni, an mawl man chu an hmu dawn ta a nih hi." Famkima chuan a la ti ta deuh deuh va.

A tho leh thut a, a tei kual a. Thei leh thei lo hian Zodini te thian ho chuan an en tawk tawk tawh a, an rilru chu fim mahse an taksa erawh an thunun zo tawh si lo. "Chu zan chu an tan chuan an zan hnuhnung ber a ni tawh dawn si a, an picnic hnuhnun berna tur a ni tawh dawn tih reng an hre si lo." tiin FAmkima chuan a chhunzawm zel a.

Tichuan an bul hnaiah chuan va kalin an thingpui inna no ruak pakhat chu a la a, "Chu tualthat thintu chuan thingpui no thum theuh a khilai bawk a, mahse a no thumna ah chuan an hriat miah loh chuan damdawi, mut duhna damdawi chu a telh ta a. Minute 20 hnu velah chuan a rawn thawk tan ta a, tichuan tun hun hi kan lo thleng ta a ni." tiin a nui ta var var mai.

Chutah Rinmawia chua tlu thlep hnawk a, a hnar zui nghal bawrh bawrh mai. Chutiang chiah chuan Puipuii pawh chuan a rawn chhunzawm ve nghal a, Ruatfela erawh chet ala tum nasa. Mahse hrai ruih a ni a, chutin a che lui thei bik si lo. Ani pawh chu a muhil ve a, tichuan an vai chuan an muhil ta vek mai le.

*************************************************

Zodini chu a rawn harh a, a lu chu a rit em em a. A la hai deuh bur thei, mahse a hma ang kha chu a ni tawh lo. A taksa chu a han ti che a, mahse phuarh beh a lo ni reng mai. A meng deuh kawk a, a bulah chuan amah ang chiah chuan thutthleng thing atanga siamah hian a mal te te in phuarh beh vek an lo ni a.

Au a tum a, mahse a thei lo. A hmui chu tape hmanga tuam tlat a ni a, chutiang bawkin a thiante pawh chu an hmui tuam sak vek an lo ni. A tal vel ri ah chuan midangte pawh chu an rawn harh a, tal chhuah an tum nasa hlawm khawp mai. An awmna lai chu an han enkual a, hmun thim ruih mai, kudam ang tak hi a lo ni a.

Chu an awmhna hmun chu thlam hnuai chiah, Famkima'm mi a thah dawna a hruai thinna hmun a lo ni. Chutah an hma zawnah chuan Famkima chu a lo thu run mai a, zawhna tamtak an zawt duh ngei ang le. Mahse an ka chu tuam tlat a ni bawk si, Famkima chu a han zi mar taih taih a.

A nui khi suk a, "In lo harh tawh maw, mut in va duh tlang ve a?" tiin fiamthu te chu a la thawh ta deuh deuh va. Ruatfela chuan thinrim hmel tak hian a en rum ngang mai, Famkima lah chuan a lo la nuih vel mai mai zui. A thu tha sauh sauh va, "Lungngai suh u, in lo harh tawh bawk a.... ka thawnthu kha ka han sawi chhunzawm leh ange aw.." a la ti ta cheu mai.

A aw a han thian kharh kharh a, "Tichuan chu tualthattu chuan mi a thah pawh in tihdan bik te a nei a, a thil tih tur ah chuan plan mumal tak a nei thin. Chung tleirawl ho ang thova khawi emaw a zin thawveng te, ram kal dangte leh helai hmuna mihring lo kal apiangte chu a thlamah chuan lo mikhualin, thingpui hmanga a hrai ruih hnuah helai hmunah ngei hian a that thin a ni...tuna in awm ang chiah hian." a ti leh ta mai a.

An hlau tawh takzet, Nunui hlau lutuk chuan zun a cheh hial a. Mahse Famkima chuan hmuhsit hmel tak hian a lo nuihzat thung, "Ka sawi ngaihnawm aniang maw, zun hial i cheh tak mai ni, Nunu." tiin a nuih tiah tiah mai a. A han thaw huai a, "A that dawn, chu tleirawl ho chu kha thlam neitu khan a that ngei dawn." a han ti vin deuh thak thak a.

Zodini chuan a zungbun hmang chuan a rukin amah phuarna hrui chu tih chah a lo tum ve mek bawk a, "A thah zawh ah, an vun a lip vek ang nga. Tichuan an luruh chu hunmawi atan a hmang dawn a ni, a hma a thah tawh ho luruh a hunmawi ang chiah khan.... chu chu a thil tih thin dan a ni." tiin a sawi chhunzawm zel a.

A tho thut a, a vei kual a. Anni pawh chuan a hma a, thlama an luh tirh a luruh tam tak dawhkana lo inhung furte kha mihring luruh tak tak, Famkima thah tawh ho luruh a ni tih an hrethiam ta a. Famkima chu a han nui leh var var a, "Inring dik e, sawi chhuak lo mah ula ka hre thei vek. Ni e, khang luruh in hmuh te kha, mihring luruh tak tak, kei Lalfamkima thah takte luruh a nih kha. Tin, rei lo teah, in luruh in a zawm ve ang." a ti leh ta mai a.

An tap pur tawh hlawm mai, an thin chu a phu dup dup tawh a. FAmkima chu thutthlengah chuan a thu leh a, "MAhse misual ka ni lo ania, mi khawngaihna ngah tak ka nih hi. Chuvang chuan na in tawrh ka phal lo, na lo te in ka ti hlum ang che u. Ka hrai rui leh che u ang nga, tun tum chu engmah in hre lo tawp tawh thung ang." tiin a bawp chu a han khawkherh a.

A mal te te chuan a han en vang vang hlawm a, "Ka khawngaih che u angah ngai rawh u, in nunna ka tih tawp nan minute tlemte bak in nei tawh lo. Thingpui hmang ni lovin, syringe hmangin ka chiu zawk dawn che u a ni." a ti leh a. An hlauthawng takzet, a meng phawk hraw hraw tawh hlawm mai.

Zodini chuan hrui chu tih chah a lo la tum ngat ngat a, a hlawhtling tep tawh bawk. Famkima chu a han ding leh uai a, "Tunah damdawi chu ka han buaipui dawn a, ka lo let leh hunah chuan in tawpna tur a ni tawh ang." tiin khawngaih leh inchhir hmel tak chuan a han melh hlawm vel a, tichuan inchung lamah chuan a chhohsan ta a.

*******************************************

Famkima chhuah hnu reiloteah chuan Zodini chuan hrui chu a zai chat thei ta hlauh mai, rang takin a ke phuarna chu phelh leh a tum a. Mahse a lo tight phian mai, a thiante lah chuan an lo en reng a. An rilru a hmanhmawh bawk si, an tal vak vak ringawt mai a. Zodini chuan rei deuh fe hnuah chuan a ke phuarna chu a phelh thei ve ta a.

A hmui tuamna tape chu a phelh a, a bul chiah ami Nunui chu phelh ve a tum nghal a. Nunui chu a mittui a lo tlan phung mai a, "Nunui, ka chhuah dawn che. Bengchheng suh aw, chuan lo tal vak vak suh aw.. zawite chuan Zodini chuan a han ti a. Nunui chu tap pur chung hian a lo a lo bu nghat nghat a, Zodini chuan phelh a han tum a.

Mahse a nghet lutuk tlat, rilru hmanhmawh tawh bawk si nen. Hrui lah a hrawl reuh si, zungbun hmanga tih chah tum leh rikngawt dawn lahin hun a duh rei dawn ropui bawk si a. Engtikah nge Famkima chu a lo let leh ang hriat a ni si lo, Zodini chuan thlan tla bawrh bawrh chuan phelh chu a han tum leh ngat ngat a.

Mahse a thei tlat lo, hmanhraw hriam a han zawng kawi leh thul. Engmah chutiang a hmu bawk si lo, let lehin a kut hmang chuan phelh a han tum leh ngar ngar a. Midang pawh chu chhuah ve hun nghakin an rilru a lo hmanhmawh tawh nasa mai, Zodini chuan a beirei tawh takzet.

Rei deuh fe hnuah chuan a phelh thei ta nge nge a, Nunui pawh chu a tho rang kher mai. Ruatfela chu phelh an han tum ve leh a, Nunui chuan Rinmawia phelh a lo tum ve bawk. Mahse Ruatfela an phuarna chu Nunui ai mah chuan a lo nghet zawk a, Zodini chuan a phelh hleithei leh ta tlat lo mai.

Nunui phei chuan phelh thei lo leh zual tak a ni, a hlauthawng tawh bawk si nen chuan a kut te chu a khur vel hial a. Zodini lah a t(r)ang tawh ropui si, midang lah phuar hlawm vek an lo la ni bawk si nen. Ruatfela mangang, hmanhmawh tawh bawk si chuan, Min lo phelh hmasa lo a nih kha awww.. a ti rilru vawng vawng mai.

Zodini chuan Nunui chu ava en a, engti kawng mahin Rinmawia an phuarna chu a phelh dawn lo tih a hre thei nghal a. Zawite hian, Nunu, min lo pui zawk mai teh. a va ti tawp a. Nunui lah a phili buai nasa, a tap pur tawh mai bawk si. An pahnih chuan Ruatfela phuarna chu phelh an tum leh ngar ngar a, Ava han nghet phiangsen tak.. tiin Zodini chu a phun nasa tawh mai.

Nunui pawh chuan theihtawp chu a han chhuah ve a, Nunu, hmanhmawh teh.. tiin Zodini chuan a hau sek bawk. Tawng rin hlau si, tah chhuak bawk si. Hmahmawh bawk si nen, Ka hria a lawm, ka tum mek a nih hi. tiin Nunui chu a tap tuau mai a. A tawp a tawpah chuan Ruatfela chu a chhuak ve thei ta, Hun kan nei tlem ania, midang kha phelh nghal zung zung ru. tiin a che nghal vat a.

Ruatfela chuan Rinmawia an phuarna chu phelh a tum ve leh nghal a, Nunui leh Zodini chuan Puipuii chu phelh an tum veleh mek bawk. Chutih lai chuan inchung lamah chuan Famkima chuan anmahni chiu na tur syringe ah chuan damdawi chu a lo hip mek a, a hmel ah chuan nuam tih lohna, inchhirna emaw, engmah a awm hauh lo.

Hna pangngai tak thawk ang mai hian rilru hahdam hmel tak hian a thil tih lai chu a ti mial mial a, chutah inhnuai lam, Zodini leh a thiante a dahna atang chuan thawm a hre ta tlat mai. A thil tih lai chu a tawp chat a, a ding thut a. Tichuan a silai chu ava phawrh a, a mu chu a thun mial mial a.

********************************************************

Ruatfela chuan Rinmawia chu a phelh thei ta mai a, Rinmawia pawh a tho rang kher mai. Tichuan la chhuah ve loh awmchhun, Thantea leh Puipuii te chauh chu an bang ta. Nunui leh Zodini te pahnih lah chuan phelh an lo la tum ngat ngat a, a lan dan chuan an phelh vat chu a rinawm loh.

Rinmawia chuan Thantea chu phelh ve a han tum nghal bawk a, chutih lai chuan Ruatfela chuan chhuahna tur awm ang a lo dap mek a. Mahse inchung lam atang chuan thawm an hre ta, an thawm chu an dim rang kher mai. Famkima chu a rawn chhuk leh mek a ni tih hria in hmanhmawh thei ang ber chuan an che leh nghal zung zung a, mahse Thantea leh Puipuii te chu an phelh hman dawn lo niin a lang tlat mai.

Famkima chu a rawn chhuk hnai zel a, silai hum chung chuan a rawn thleng ta. Chutah a ding chat a, a thinrim hmel kher mai. Thantea leh Puipuii te chauh chu phuarin an lo awm tawh tih leh, midang zawng chu tal chhuakin hrui leh thutna ruak chiah a lo awm tawh tih a hmu chu a lungawi lo kher mai.

A va kal hnai a, a hawi kual a. A thim ruih mai bawk si a, an inrinloh laia an lo beih thut takin tiin chutin a che vut vut ngam bik lo. Chutah Thantea chu a en vang vang a, a hmui tuamna chu a phelhsak a. Chiang fek fawk hian, Khawiah nge an awm? a han ti chang fak a. Thantea chuan rum fe hian a lo melh a, a chhang eih lo.

Famkima chu a han thaw hak a, Khawiah nge an awm ka tih chu? tiin a aia vin chuan a han zawt leh a. Thantea chuan a hmaih tak chil a lo chhak khum a, Ka sawin lovang, i duh chuan min kap hlum rawh. tiin a lo vin let hrep mai a. Famkima chu a lungawi loh hmel kher mai, a han ding ngil a.

Kudam zau tak chhung kil tin mai chu a thim deuh vek avang leh, an awmna zawn bulb chiah a en theih avang chuan duh duh han kah risk ngawt chi a ni si lo. Khawi lai berah emaw an biru thei tlat tih chu a hre ve a, a chet sual phah ve thei tho tih pawh a hre bawk. MAhse a thinrimna chu a sosang lutuk tlat, a thaw halh halh mai a.

Chutah ring leng lawng hian, Zodin, Ruatfel, Rinmawi, chuan...Nunu...in awmna sawi rawh u. Anih loh chuan in thiante pahnih hi an thi nghal ang, ka fiamthu lo ania. a ti ta lung lung mai a. Mahse an rawn chhuak hauh lo, kudam chhung chu a reh hian a reh diak mai. Famkima chu a thinrim hmel takzet, Ka kap hlum ve ve ang, ka ti tak tak ania. a han ti leh a.

Mahse a ngai te bawkin a reh leh thiap mai a, Puipuii inhnit ri feih feih chu a langsar hle. Famkima chu za lo tak chuan a han nui lui a, Kudam kil tin hi ka kap vak vak animai, na tuarin in thih phah zawk thei ania. Ka khawngaih che u a, na l thei ang bera thih tir che u ka tum a nih hi. Mawl viau suh u, tha tak khan lo chhuak ula nung damin in haw thei maithei ania. a han ti leh a.

Chutah a aia ring leh vin hian Thantea chuan, Lo chhuak reng reng suh u, min that vek dawn tho. Amah hi zanin hian thi zawk tur chu a ni, lo chhuak duh reng reng suh u. a rawn ti ve ta siah siah mai a. Famkima chuan a melh no lo kher mai, a silai sei tak mai chuan a tin a. Chutah a hmet puak ta dur mai le, a ring takzet.

Thantea hmai chanve deuh thaw chu a hek huai mai a, a thluak pawh a per chhawk mai. Thisena  baw nghal zawih zawih a, Thantea chu thi chiang tak a ni. Puipuii, a bul lawka thu, la phuar mek chu hlauvin a tap nasa mai a. A tal vak vak a, chuveleh thim zing atang chuan Rinmawia chu a rawn lang thut a.

Hnunglam atang chuan Famkima chu a rawn zuan a, Famkima pawh chuan a silai chu thlauhvin a tal buai nasa ngei mai. Zodini, Nunui leh Ruatfela te pawh chu thim zing atang chuan an rawn chhuak ve bawk a. AWm hmun hrang theuh va biru an nih avang chuan an awmna erawh a inhlat hlawm hle thung a, Zodini chuan Puipuii chu phelh ava tum nghal vat a.

Silai chu Ruatfela chuan chhar va tumin a va tlan phei a, mahse Famkima chuan awlsam tak hian Rinmawia chu chhuatah chuan a paih thal tawp a. Ruatfelan silai a chhar hma chiah chuan a va tibuai a, an inchai ta chiam mai a. Famkima chuan silai chu a chhir phei dawr a, Nunui hma takah chuan a tawp chat mai.

Nunui chuan silai chu a la a, Famkima chu a tin ta. Mahse kah mai a ngam lo, a chhan chu Ruatfela nen an insual mek avang chuan a kah thleh a hlauh mai bakah Ruatfela zawk chu a kah fuh palh a hlau te pawh a ni mahna. Silai chu a keng khur tlawk tlawk a, Kap rawh, Nunu...kap vat rawh. tiin Ruatfela chu a au nasa mai a.

Nunui lah a che buai tulh tulh a, a tap tuau ringawt mai. Famkima chuan Ruatfela chu a rek thut a, bang deng dawt khawp chuan a paih phei a. Nunui lam chu ava pan a, Nunui chuan a silai ken lai chuan a lo tin a. Famkima pawh chu a hlau ve deuh va, a ding a. Nunui chuan hlau chung chung hian, Rawn kal hnai tawh suh, a nih loh chuan ka kap ang che. tap chung hian a ti khur dar dar a.

Famkima chu a han nui vel a, Nunu, lo la rawh. Silai kha lo la rawh, hmeichhe khawih chi a ni ve lo ania. tiin zawi muang chuan ava pan hnai a. Nunui hlau bawk si, mangang bawk si chuan tap chung hian, Tawlh hnung rawh, ka kap ang che. tiin a vin vak vak a. ZAidam tak hian FAmkima chuan, Enteh, nang chu ka chhuah zalen dawn che nia. Ka ti tak tak, min ring rawh. tiin a han thlem kual leh vel a.

Puipuii phuarna bula lo awm mek, Zodini chuan ring tak hian, Nunu, kap vat rawh. a lo ti ve bawk. Chutah Famkima chuan ava pan zel a, Nunui chuan maimitchhing chung hian silai chu a han hmet ve ta thuai a. MAhse a puak hauh lo, a lo load miah lo chu niin. Load dawn pawh nise, tihdan a thiam hauh lo bawk.

Chuveleh Famkima chu a nui huah huah a, Mai mai chuan leh...khawnge, ka han that ve law law teh ang che. tih pah chuan ava tlan thut a. Mahse Rinmawia chu rawn tho leh in a rawn bawhthlu leh hman hlauh mai a. Chuveleh Ruatfela pawh chu rawn thovin Nunui silai ken lai chu ava laksak nghal a.

Rinmawia lah chu Famkima chuan a lo leh thal rang kher mai, chutah chemte a lo pai reng bawk a. Rinmawia chu a thut bet a, a hrawkah chuan a zai ta hrawk mai. Thisen a chik tuar tuar a, Rinmawia chu a khur nghal cher cher mai le. Zodini rap lutuk chu a au vak a, chutiang bawkin Nunui pawh.

Ruatfela chuan silai chu a load hman, mahse a kap hman lo mai pawh ni lovin tin takngial pawh a tin hman lo. Famkima chu rawn tlan phei leh vatin silai chu a rawn chuhpui ta a, an thawm pawh a ring kher mai. Zodini chuan Puipuii chu a phelh thei thlawt lo, Ruatfela chu va puih mai a duh zawk a.

Tichuan hnunglam atang chuan a va zuan ve a, an buai nak nak kher mai. Silai an inchuhna lamah chuan an hmet puak ta palh hlauh mai, vanduai thlak takin Nunui awmah tak chuan a fuh a, a leng lawp mai. Ka pawh chhawn lovin Nunui chu a thi nghal a, Puipuii lah phuarh beh reng a la ni bik bawk si chu a mangang tawh takzet.

Ruatfela chu a awmah tak Famkima chuan a tlawh pawp a, a thal tawp mai. Zodini pawh chu a silai hmang chuan a khawng tlu nghal a, na a ti takzet. Chutah Famkima chuan silai chu a han check a, a mu a lo awm tawh lo chu niin, mu hnih chiah a lo thun hi a lo ni. Ruatfela chu a rawn tho leh a, tichuan an insual leh ta.

Chuveleh Zodini chuan Puipuii chu phelh a tum leh a, an bei leh ngat ngat mai. Upa viau tawh mahse, patling tha na na na chu Ruatfela chuan a hneh lo kher mai. Famkima chuan a hnek thi phung tawh mai a, vanneihthlak takin Zodini chuan Puipuii chu a phelh thei ta. Famkima chuan Ruatfela chu bangah chuan a rek bet a, reh hlim law law a tum a ang khawp mai.

Thei leh thei lo hian Ruatfela chuan Zodini te lam chu enin, Tlan chhe ru, tlan chhuak vat ru. a ti tawk tawk a. Zodini chuan chutia Ruatfela kalsan mai chu hreh hle mahse Puipuii chu kaiin inchung lam a pan pui ta a. Famkima chu ava lehhawi vat a, Ruatfela chu a thlah ta nge nge a.

Ruatfela chu chhuatah chuan a thingthi hnawk a, a thaw hrawk hrawk mai. Famkima chuan ava um zui a, mahse a umpha hman tawh dawn lo tlat. Zodini chuan inchung lam a thleng tawh, mahse Puipuii erawhin ala thleng ve lo. Famkima chuan chhuata a chemte chu chhar in ava vawma pawp a, Puipuii malah tak mai chuan a bur chat mai.

Puipuii na ti lutuk chu a thlep hnawk a, inchung lam panna step atang chuan a rawn lum thla ta tup tup mai a. Famkima chu a khi sak mai, ava pan nghal a. Zodini mangang chuan, Nilo, Puipui... Puipui. tiin a au vak vak ringawt a. Beisei bo tak hian Puipuii chuan mittui tla phung hian Zodini chu a han melh chho va, Tlanchhe rawh, nang tal chu nungdamin awm ang che. a ti tham tiak a.

HReh tak chung chuan Zodini chuan a kalsan angai ta, Famkima chuan Puipuii lam chu a rawn pan mek zel bawk. Chutah a rawn thleng a, dimna tel hauh lo chuan a mal a chemte bur va mai chu a phawi ri hrawk a, Puipuii pawh a rak that mai. Ruatfela lah na tuarin chhuatah chuan a la let reng mai a, Puipuii chu a rawn chhan thei bik lo.

*****************************************

Zodini chuan chhuahna tur chu a zawng a, mahse mak tak maiin thlam chu pawn lamah a lo inkalh daih mai a. A nam vak vak a, a tlawh vak vak bawk a. MAhse a inhawng thei hauh lo, kawngka lah chu a hma kha chuan a ri tuah tuah kha ania, mahse rin ai tak chuan a lo khawng tha a.

A mangang kher mai, thing fak lo awm chu chhar kangin a han vaw vel vak vak a, mahse kawngka chu a vaw hawng zo tlat lo. Chutih lai chuan Famkima chuan Puipuii chu a lo thut bet ran a, chemte chuan a tin a vung mai. Chiang taka Puipuii mitah tak chuan en in, Tumah in tlan chhuak dawn lo, ka that vek dawn che u. Zodini pawh khi a tlan chhuak lul lovang, pawn lamah ka unaupa in tala in a kalh daih tawh. tiin a nui sak a.

Puipuii chuan a chhang lo, huat hmel tak hian mittui tling teuh chungin a melh reng ringawt Chutah le, chemte chu a lek kang ta vu vu mai a. Dimna tel hauh lo chuan Puipuii awm zawnah tak chuan a vit tlum ta thawih mai. Puipuii pawh a meng kawk a, a thaw hrawk hrawk mai a.

Famkima chuan a duhtawk mai lo, a ngaiah chuan vawi sarih vel lai mai chu a vit nawn siah siah mai a nih chu. Thisen a per chuai chuai a, Puipuii awm chu a thler vek tawh a. A thih hnu thleng pawh chuan a vit siah siah mai, vawi 20 dawn a vih hnuah chuan a tawp ve thei ta hram a.

Chutah hnunglam ava hawi a, mahse Ruatfela chu a lo awm tawh hauh lo. A tho nghal vat a, kudam chhung chu a melh kual a. MAhse a hmu zo hauh lo, HRep tak chuan le.. tiin a thinrim nasa mai a. A thaw halh halh a, Ruatfel, ka hmu tho tho vang che. Lo chhuak mai rawh tunah hian, i biru hlen thei chuang lovang. tiin a au vak vak a.

Chutah a tukhum chu a rawn ri chawrh a, a hai chhawk mai. Chhuatah chuan a tlu bawk thlawp a, a han hawi let chu Ruatfela chuan silai chu a lo keng a. A mu awm tawh lo mahse a kawm chu hmang tangkaiin Famkima chu a hlap ta chawrh chawrh mai a. Famkima pawh a che tha thei ta bik lo, a lu ah chuan Ruatfela chuan a chhu leh siah siah thin a.

Famkima pawh a thal ve ta tual tual mai le, mahse an vanduaina a kal tluang kan ti dawn nge, Ruatfela pawh a che tha zui ta tlat bik lo mai. Famkima mit kovah tak chuan a han chhu leh pawp mai a, mahse Famkima tlukna bulah chuan chhemthei hlui zet mai hi a lo awm a. Ruatfelan a rawn vuak leh hma chuan chhemthei chu Famkima chuan a chhar zeuh va, rang lutukin Ruatfela ngalah chuan a hlap pawp mai.

Ruatfela chu a thingthi hnawk a, a au tuar mai. Chuveleh chhemthei hmang tho chuan a lu a ah a han hlap leh pawp a, Ruatfela pawh chu a thal ve ta tual mai le. Silai chu a thlauh bawk, Famkima chu thinrim hmel tak hian a tho va, silai chu a chhuh sak a. Chutah a dawt lam pang chuan Ruatfela mit dinglamah tak mai chuan a chhun tlum pawk mai a nih chu.

Chutiang bawkin a veilamah chuan a chhun tlum leh pawk a, ala duhtawk lo. A ka chhungah chuan vawi nga vel a chhun leh pawp pawp a, Ruatfela pawn a thisen chu a hak bawrh bawrh a. Rei a daih lo, mitmu sawm vek leh kaw deuh huau chung chuan a thi ve ta a. Famkima chu a thaw hlawi hlawi a, Pakhat chiah a ngai ta. tiin inchung lam chu a pan chho va.

***************************************************

Inchung a han thleng chiah chu a beisei loh lutuk thil a hmu tlat, bang lo keh huau mai chu a hmu a. Zodini chu a lo tlan chhuak hram a ni tih a hrethiam nghal a, a thinrim kher mai. Tichuan silaimu chu a silai ah chuan a thun belh sauh sauh va, bang keh atang chuan a chhuak ve nghal a.

Zodini chu bang keh kara a chhuahna lamah a lo inhliam nual a ni awm a, zing khua pawh a var tan tep tawh. Mahse ramhnuai pilril taka tlan mek a nih avang chuan kawng a hmu tha thei chuang lo, a la thim em em thung a. A kalna lam ber pawh a hre lo, a hma zawnah chuan a tlan phei tawp tawp hi a ni ber mai.

A hah em em a, mahse damchhuah ngei a duh bawk si. Tap chungin a tlan zel a, a rilru chuan a tawngtai mawlh mawlh bawk. Hnunglam atang lah chuan Famkima chuan silai a rawn kap ri deuh dur dur zel bawk a, mahse an awmna chu silai ri atang chuan a inhlat angreng hle tih a hriat thung.

A tlan zel a, tha hrui pawh a nei tlem tawh takzet. Tichuan eng tin tin emaw chuan kawngpui lam chu a thleng phei thei ta hlauh mai, khua a lo var tan lek lek tawh a, tlem chuan a lo eng ve tan deuh tawh. Mahse a awmna lai a hre lo, kawngpui chu a ni ngei bawk si. An motor pawh hmuh tur a lo awm tawh lo, kawngpuiah chuan a hawi ruai ringawt mai a.

Chutah mak tak maiin motor ri a hre hlauh mai, hla tak atanga car pakhat rawn tlan hi a hmu a. A thaw huai mai a, a lawm kher mai. A ban chu pharin a zuang vak vak a, car pawh chu a rawn hnai ve zel a. Ban vai lauh lauh chung chuan, Min pui rawh, ding hram teh. Khawngaihin min pui rawh. tiin a au vak vak a.

Car chu a rawn thleng hnai zel a, mahse mak tak maiin a rawn tlan chak tulh tulh amaw tih mai tur hi a ni. A lo hnai zel a, a tlan chak telh telh a. Zodini pawh chuan a hrethiam deuh va, mak a ti angreng hle. Mahse a mangang tawh em a, rilru fim put a har tawh takzet. Chutah car chu a hma ai chak hian a speed a rawn sang leh thut a, Zodini tan lo awm sawn hman ngaihna a awm lo.

Chiang fahran mai hian Zodini chu, chu car chuan a su leng lawp mai le. Zodini chu lamlianah chuan a lum phei tawp tawp a, a ruh chu a tliak nasa khawp ang le. Chet pawh che hleithei lo chuan thisen nena inchiah piah nuaiin kawng laiah tak chuan a mu der mai a, a thaw thei tawk tawk tawh.

A che thei tawh lo, a lu te chu a pawp thleh thluah a, a hmei vun pawh a thler hial a ni. Car chu a ding a, a chhung atang chuan putar lam deuh tawh, khabe hmul buk chhur mai hi a rawn chhuk a. Zodini lam chu muang chang hian ava pan phei a, Zodini chuan a lo en tawk tawk a.

Chupa chu tudang nilovin dawr nghaktu, putar maksak deuh kha a lo ni reng mai. Chuveleh Famkima pawh chu a rawn thleng chawp chilh ve nghal bawk a, hah hmel tak hian a thaw hlawi hlawi mai. Dawr nghaktupa chuan a lo en deuh hraw a, I va hlawhchham teuh ve. tiin a khi suk a.

Famkima chuan nui chung hian, I rawn thleng timing khawp alawm hei.. tiin a lo chhang let ve a. Tichuan Zodini, nunna nei tawk tawk chu thuhniam meuh chuan a han thlek vang vang a. A khi leh suk a, Tichuan, thawnthu chu a tawp ta. tiin a silai chuan a tin a, thlauk per sawk khawp chuan a kap a, Zodini pawh chu a thi ve ta.

A awmzia chu dawr nghaktu leh Famkima hi unau niin mi an that thin a lo ni a, an thlam kalkawnga an kal theih nan SHORTCUT TO AIZAWL tih sign board siam chawpin mi an lo bum thin reng hi a lo ni. Zodini te petrol a zawh mai theih nachhan pawh muang changa leak turin dawra, a ngahktu awm loh laia motor an chhuahsan vek hlan khan dawr nghaktu chuan a lo khawih chingpen hi a lo ni a.

Famkima thlama an luh hnu, thinpui no 2 an in tawh hnu a pawn lama thawm an hriat, Famkiman ava check pawh kha hepa, dawr nghaktu lek hi a lo ni a. Famkima nen an chetdan tur an lo sawi dun lek chu lo niin, khatah khan dawr nghaktu, Famkima u hian mutduhna chu rawn pe in a hnuah, thingpui no 3 naah khan damdawi chu an in turah a telh ta reng bawk a lo ni.

Engkim an lo plan lawk sa vek a, an thangah chuan Zodini te thian ho chu an awk ngei ta bawk a, an hlawhtling lehpek khawp mai. Famkima chuan Zodini ruang chu a pu nawlh a, motor hnunglamah chuan a mut a. Tichuan an unau chuan motor chhungah chuan an inzui lut ve leh a, ramhnuai lam pan chuan an tlan ta a.

******************************************************

THE END