SAMURAI ROSE (A JAPANESE-INDIAN FICTION SCI-FI THRILLER STORY) Written by : Aaron Malsawmdawngzuala Chapter - 4

 SAMURAI ROSE

(A JAPANESE-INDIAN FICTION SCI-FI THRILLER STORY)

Written by : Aaron Malsawmdawngzuala

Chapter - 4

*****************************************

Arjun-a chu lab chhungah chuan a la awm reng a, Priya-i pawh khumah chuan nikhaw hrelovin a la mu ve reng bawk. Arjun-a chu chhin khat pawh a la chhing lo, Priya-i Voltress a rawn nih hun tur chu a nghakhlel hle ringawt mai a ni. Tukverh chhia, Aiko-i tih chhiat tak chu a han siam tha mawlh mawlh a.

Lab chhung chu a reh kher mai, machine ri vu vu leh Arjun-a thil chhu ri leh kauh kauh thin tih bak chu thawm dang a awm lo. Arjun-a chu a tho hluai a, a han zi mar talh talh a. Monitor lam chu a va pan a, eng eng emaw chu a hmet deuh zuk zuk a. Tichuan Priya-i mutna lam chu ava pan leh a, a la thaw nge thaw lo tih te chu a han check chiang a.

Aiko-i kha chu tette atanga samurai tha tak ni tura train a ni a, na tawrh te chu a naupan lai atanga a tawn than tawh a nih avangin kha elixir pawh kha tuar chhuak thei a nni a. Priya-i erawh mihring hrisel pangngai ve mai a ni a, a tuar zo ve ngang lo a ni mahna le. Monitor lam chu ava en leh a, Voltress serum chu Priya-i taksa ah chuan 90% a lo lut tawh a.

A khi suk mai, "Priya-i rawn harh ve leh hian Voltress a ni tawh ang nga, Aiko-i zawng turin a chhuak nghal ang. Aiko-i nen an intawn hunah Voltress hian a hneh ngei bawk ang nga, ka hnenah a rawn hruai ang. Tichuan a thluakah chip hi ka thun ve leh ang nga, Human-hybrid AI pahnih ka nei tihna a ni mai." tiin ama hriat tham lek chuan a phun mawlh mawlh a.

Chutah Priya-i chuan a kutzung tang a rawn ti che ta hrut mai, Aiko-i anga a rawn beih ve mai a hlauh avang chuan Arjun-a chu a tawlh hnung nghal a. RAng takin control panel lamah chuan a tlan phei nghal a. Chip chu a activate nghal a, Priya-i mu mek lai pawh chu a rawn che leh ta hrut mai.

A lu chu a rawn ti che nasa deuh va, Arjun-a pawh a lo inring nasa tawh kher mai. Priya-i chu a rum nghut nghut a, khawl chu a rawn ri leh vu vu thin a. Mahse Priya-i chu a zawi tial tial a, chutah a che ta miah lo mai. Arjun-a chu a va tlan vat a, a mar te chu a han dek a. A lo la thi lova, monitor lam chu ava en leh a.

A lungphu pawh a lo pangngai a, nikhawhrelovin a la awm mek a ni tih a hrethiam a. A thaw huai mai, chutah door bell a rawn ri ta ral ral mai le. Arjun-a chu a phu zawk a, rang takin control panel lamah chuan a va let leh a. CCTV camera chu a han en a, kawngka bulah chuan mipa pakhat, samsei hnuang mai hi a lo ding a.

Camera chu chung lama awm a nih avang chuan a hmel erawh a lang thei lo, "Tu chu nge mawni le, police te an ni hial lo maw?" a ti nuah nuah a. Tichuan a han thaw halh halh a, Priya-i chu ava en leh a. A lo la mutui nasa mai, a chil a lem dawk a. Tichuan lab chu a chhuahsan a, a reh leh ta diak mai.

******************************************

Inchung lamah chuan Arjun-a chu a chho va, tichuan kawngka chu a va hawng ta. Japanese tlangval ni ngei tur a ni, kum 25-30 bawr vel tur hi a ni a. A sam a lo sei hniang a, chiang tak hian Arjun-a chu a lo melh ngar a. Arjun-a chu a thin a phu nghal dup dup mai, "Tunge i nih?" a han ti tham tiak a.

Chutah chu Japanese pa chuan engmah sawi lo hian Arjun-a dulah chuan a tlawh nghal pawp mai a, Arjun-a pawh chhuatah chuan a thal nghal tual mai. Chu Japanese pa chu tudang ni lovin Kenji-a kha a lo ni a, inchhungah chuan a rawn lut a. A hnungah chuan a naute pahnih, Hiro leh Kaito te chuan an rawn zui lut ve nghal bawk a.

Thinrim hmel tak hian Kenji chuan, "Khawnge Aiko?" a ti vin thak mai. Arjun-a chu a khuh vak vak a, "Ka...ka hre lo." a ti tawk tawk a. A dul chu a dawm vawng vawng a, thawh chu tum hle mahse a tho hleithei lo. Chutah Kenji chuan a tham tho va, a hmaiah chuan vawi nga vel a hnek siah siah mai.

A hnek pah chuan, "Dawt sawi suh, khawiah nge a awm sawi mai rawh." tiin a vin leh vak vak a. Arjun-a chu a thi phung a, chhuatah chuan a tlu bawk leh ta thlawp mai a. A lu a hai muai muai tawh mai, "A... a tlanchhuak, min kalsan tawh. Dawt ka sawi lo, hetah a awm lo." a ti tawk tawk a.

Kenji-a chu a insum thei tawh ngang lo, Arjun-a chu a kawrah chuan thamin rum tak hian a en a. Chiang fek fawk hian, "Tun chiah ka zawt ang che, khawiah nge Aiko a awm?" tiin a zawt leh a. Arjun-a chuan thisen a han chhak pharh pharh a, chutah a rawn khi ta vur vur mai.

Kenji-a pawh chuan mak a ti kher mai, "Eng nge nuihzatthlak awm a? Sawi rawh, eng nge nuihzatthlak awm?" tiin a vin leh hrep a. Arjun-a chuan ngeiawm tak hian, "Aiko-i, a awm tawh lo. In hmu tawh ngai lovang, a thi tawh." a ti ta mai a. Kenji-a thinrim lutuk chua  au vak a, Arjun-a chu a vawrh leng lawp mai.

Arjun-a chu bang deng dawt khawp chuan a ri pawp a, a tlak pah chuan dawhkan chhe vek khawp chuan a delh leh ta nghal a. A thi nasa tawh ngei mai, a mit te pawh chu a vung bur tawh a. Kenji-a chuan a katana chu a phawrh chhuak a, "Min fiam kual mai mai ngam a ni maw? I ke hi tan ila, i la fiamthu a ngem kan en ang chu." tiin a rawn pan phei ta chher chher mai.

Arjun-a pawh chuan a hlau ve ngang mai, mahse eng emaw a ngaihtuah chhuak zawk mai. Chip kha a activate tawh tih chu a hre chhuak thut a, Kenji-a chu a rawn thleng hnai tawh em em bawk si. Chutah ring tak hian, "Voltress Activate.." tiin a au vak a. Kenji-a hrethiam lo lutuk pawh chu a ding a, Arjun-a chu a en hu ringawt.

Chutah inhnuai atang chuan thawm an hre ta, chain chat hmawk hmawk ri hi a ang ber. Tichuan tlan ri hlawk hlawk thawm hian a rawn chhunzawm thuai a, Hiro leh Kaito te pawh chu an in en hu ringawt mai a. Chutah thawk leh khatah bang chu a rawn darh chhuai mai a, Priya-i chu a rawn lang ta heu mai.

Chutia hmeichhia lehnghal, lab coat ha bawk si, bang rawn su chhe vek mai chu Kenji leh a nau te pawh chuan mak an ti hle a. Arjun-a chu a nui sak mai, "Voltress, that vek rawh." a han ti leh lauh lauh va. Priya-i chuan a lu a bu nghauh va, "Yes Master." tiin Kenji lamah chuan a va tlan phei thut a.

A chet ran em avang chuan KEnji pawh chu a lo inring hman lo, a awmah tak chuan Priya-i chuan a tlawh pawp mai. Kenji chu a thlawh hian a thlawk leng lawp a ni ber mai, pangpar khawina pot zawng zawng a la delh chhe vek zui. Chu veleh Hiro leh Kaito chuan an lo bei ve nghal a, mahse Priya-i chuan a lo thal rang kher mai.

Hiro chuan katana chu a phawrh ve a, Priya-i chu va sah a tum a. A lo bum nalh kher mai, na tak tak chuan Kaito nen chuan a khawih dun hrep mai a. Chhuatah chuan na tiin an tlu vial ngawl ngawl mai a, Kenji chu a rawn tho ve leh a. A katana chu a chhar a, ava pan ve leh ta. A ngunhnam chu a va vei pawp a, Priya-i chu a kutin a lo indang a, mahse engtin mah a awm lo.

A kut chu thir ang mai hian a rawn sat chiah chu a ri teng mai a, Kenji-a pawh chuan mak a ti kher mai. Mahse theih tawp chuan a han bei leh a, a khawih fu nual bawk. Mahse Priya-i chu na ti awm ang pawhin a lang lo, a sah fuh hnem tawh tehreng nen pem eih pawh a la nei chuang lo.

Kenji chuan han bei viau mahse a hneh ta ngang lo va, Priya-i chuan chhuatah chuan a keuh thal leh tawp mai a. Chuveleh Hiro leh Kaito te chuan an rawn kai tho va, "Kenji, kal phawt ang." tiin pawn lamah chuan an hruai chhuak a. Thinrim tak hian Kenji chuan, "Kan inhmu leh khawp ang, nangnu kha.." a la ti tawk tawk a.

An chhuak ta a, Priya-i chuan um zui a tum a. Mahse Arjun-a chuan, "Voltress, a ngai lo." a lo ti vat a. Priya-i pawh chu a ding a, Arjun-a chuan ava pan a. A han en vang vang a, a lawm lutuk chu a khi suk mai. Chiang tak hian Priya-i chu a en a, "Priya-i i ni tawh lo, mihring pangngai i ni tawh lo. Eng thil mah ina a tehkhin theih loh tur khawpa chak thiltihtheihna i nei tawh a, ka tan i thawk char char tawh ang. Aiko-i hi zawng la, ka hnenah rawh hruai ang che." a han ti chang fak a.

Priya-i chu a lo khi ve suk a, "Yes, master." tiin a chhang a. Tichuan Priya-i chu mihring ni tawh lovin, Human AI Hybrid hmasa ber, VOLTRESS serum hmanga siam danglam niin a hmingah Voltress tiin amah siam chhuaktu ARjun-a chuan a phuah ta a ni. Arjun-a chuan kawngka a khar a, tichuan lab lamah Voltress chu a hruai thla leh ta a.

*************************************************************

Chhun a ni a, Aiko leh Indian Monk chu in tereuhte chhunga dojo room lian lo ve tak chhungah chuan inhma tawn hian an thu a. Indian Monk chenna in niin Aiko-i chu a hruai lut tihna a ni, amah chauh va cheng a ni bawk. Aiko-i chuan room chu a en kual a, samrumai equipment hrang hrang hi a inkhai thluah mai a.

Monk chuan thingpui chu a han lem sak a, "Hei hi ka dojo ve a nih hi, lian lem lo mahse engkim a kim ve thlap tho a nia. Helai hmunah hian ka enkawl ang che, i harsatnate ka sut kian pui ang che." a han ti dam dap a. Aiko-i chuan thingpui chu a han lem ve sak a, "Ka lawm lutuk, mahse tinge min puih a?" tiin a han zawt a.

Monk chu a han thaw hak a, "I pa hi ka hre chiang a, Japan-ah chuan pa zah kai pawl tak a ni ve a. Kan chhungte ve ve hi thian tha tak an ni a, chuta tang chuan kan inhria a, a hnuaiah ka thawh ve theih phah nghe nghe a ni. Mi hausa tak a ni a, technology changkang tak a nei bawk. Mahse in mithmuhah chuan a pho lang kher lo maithei, thawkrim thin tak a ni bawk a. A thil tih engkimah hian a extreme thei em em a, mi chaklo nih a duh ngai lo." tiin a lo chhang a.

Aiko-i chu a kun ngal a, "Ka pa khan pa hmangaihna min tem tir ve ngai lo, ka chungah khan a sual em em a. Chuzawng chu a nimai, thian a neih phei chu ka hre lo lehzual." a lo ti zawi sap a. Monk chuan a lu a bu nghat nghat a, "Takashi hi mi engemaw tak chu a ni ve chiang alawm, a strict hle ang tih pawh ka ring. Mahse a mi rin tawhte chungah chuan a tha lutuk thung a, samurai tradition a ngaih pawimawh em avangin nang pawh strict takin a enkawl chho che a nih kha." tiin a lo chhang leh a.

Aiko-i chu a ngawi vang vang a, "Mahse tunah engtin nge ni tawh ang? Hetah India ramah daih ka awm a, ka taksa chhungah elixir a awm bawk a. KA ruh lah thir hmanga thlak a ni bawk, a effect lah hi a na em em mai bawk si nen. Tiang renga ka awm a nih chuan ka thi vat ang, elixir hian ka taksa a fan hneh lutuk." a han ti leh a.

Monk chu a han thaw hak a, "Zirtur tam tak ila nei, i hliam tihdamna tur pawhin hun tam tak ila mamawh bawk. Kha elixir thawh dan te, i ruh thir a chang ta te kha, a effect dan zawng zawng te i zir chian zel ala ngai dawn chauh a ni. I chakna te i hman thiam hma, i dam hma leh i hrisel hma chu ka bulah hian i cheng thei ang. Keipawn ka pui zel che ang nga, a ngaih chhung chu hetah hian i awm thei ang." tiin a lo chhang leh a.

Aiko-i chuan a chhang lo, a mittui chu a hru zeuh va. Monk bawk chuan, "Ka train tha leh dawn che a ni, Aiko. I la naupang a, training pawh i la zo fel lo. Mahse lungngai suh, taksa thar, tha thar i nei tawh a. Samurai hi technique leh combat skills chauh a ni lo, a philosophy hi hriat tel a pawimawh takzet a ni. Fighting ringawt ni lovin, discipline, mahni zahawmna leh mahni inthunun theihna hi kan ngai pawimawh zawk tur a ni." a han ti leh a.

Aiko-i chuan monk chu a mitah tak chuan a en a, "Tunge i hming ka hre thei a ngem? Min train tu tur leh min enkawl tu tur hi a hming hriat ve ka phu in ka hria." tiin a han zawt a. Monk chu a nui sak a, "Tehreng mai, ka hming chu Shantanu a ni e." tiin Monk chuan a lo chhang a.

Aiko-i chuan zah takin chibai a buk a, "Ka lawm e, Master Shantanu. Ka kawng zawh thar tur chu engpawh nise, i kaihhruaina hnuai a kal zel turin ka inpeih e." a han ti thlap a. Shantanu pawh chu a nui suk a, "A tha e, i mamawh engkim chu hetah hian a awm vek tih hria ang che. I kawng zawh tur hi a bul tanna chauh a ni tih hria la, inrintawkna nei reng thin ang che." tiin a lo chhang ve a.

Chutah a ding hluai a, "Min lo zui rawh." tiin dojo room atang chuan a chhuak a. Aiko-i pawh chuan a zui ve mai bawk a, room pakhat ah chuan a hruai lut leh a. A lo zau angreng khawp mai, "Hun reilote hnuah i rilru i thunun thei vat ang nga, tun ai hian i chak telh telh bawk ang. Aiko, hei hi training room tur a nih hi." a han ti dam leh dap mai a.

Aiko-i chuan a training room tur chu a han enkual vel a, a lawm kher mai. Shantanu lamah chuan a va kal leh a, "Ka lawm lutuk, Master." tiin a hrilh mawlh mawlh a. Shantanu chuan a kutah a vuan a, "Mihring pangngai aia chak i ni tawh a, chuvang chuan i power te, i thiltihtheihnate hi fimkhur tak leh thiam taka i hman a ngai dawn a ni." tiin a hrilh ve leh a, Aiko-i pawh chuan a lu a lo bu nghat mai.

******************************************************

Vortex Legion Secret Laboratory chhungah chuan Alex-a leh RAvi-a leh staff thenkhatte chuan dawhkana box chu an kil bial thap a, "Awle guys, box chu kan ktuah a awm ta phawt a. A chhungah eng chiah nge a awm tih hre tura kan hawn phawt angai dawn a ni, mahse fimkhur tak leh inring rengin awm ula." Alex-a chuan a han ti lauh lauh va.

Security thenkhatte pawh chu ralthuam nen an inring sa thlap a, tichuan operator ho chuan box chu hawn an tum ta a. Hmanraw hrang hrang a hawn an tum pawh chuan an hawng tehi hauh lo, hawnna lai ber tur pawh hriat har tak a ni. An equipment changkang tak tak te chu an han hmang chhin leh a, mahse box chu a in-seal nghet lutuk tlat.

Operator pakhat chuan beidawn hmel tak hian, "He box hi hawn mai chu a harsa khawp ang, technology changkang tak hmang a seal a nih ngei ka ring." a han ti nuah nuah a. Ravi-a chuan a lu a han hiat nauh nauh va, "A mak hle mai, box mak tak a nih dawn hi. Eng material nge maw an hman bik le, eng atanga siam tak chu ni maw?" a ti nuah nuah a.

"Reinforced steel tha tak emaw, electronic lock an hmang pawh a ni thei tho mai. Layer tam tak a inthauh teuh a ni, a chhah lutuk." Operator pakhat zawk chuan a lo ti ve bawk a. Alex-a chu a ngawi vang vang a, "Kan hawn ngei chu a ngai si alawm, eng nge thil dang tih theih kan neih?" tiin a nau te chu a han zawt a.

Operator pakhat chuan lo chhang ve leh in, "A tir lock thenkhat hi chu hmanraw hmangin kan phelh thei mai a, mahse layer dang a la tam lutuk. Eng thil nge a thlen dawn hriat a ni si lova, pawngpaw tih bawrh bawrh chu a ni bawk si lo." a rawn ti ve leh a. "Eng emaw tih hmaih kan nei em ni aw?" Ravi-a chuan a han ti leh nuah nuah a.

Alex-a chu a han thaw hak a, "Tihian i ti mai teh ang, a box hi zir chiang leh deuh phawt ila. Rush lutuk a chet chi pawh a ni lo a nih hi, a schematics hi hrechiang deuh turin han inrawn khawm leh ula, tihdan kawng dang a awm ngei tur a ni." a han ti a. TEam ho pawh chu an che nghal zung zung a, screen ah chuan schematic digital leh blue pront te chu projector hmangin an tilang a.

Box scurity chaklona lai zawng hmu tur chuan Ravi-a leh Alex-a te pawh chuan chiang tak chuan an han en a, "Electronic lock ho hi bypass angai dawn a, hacking tool kan hman chuan tihdan kawng chu a awm maithei. A nih loh pawh in a system hi short-circuit hmangin temporary breach kan siamchawp thei bawk...mahse a risky lutuk." Operator pakhat chuan a rawn ti leh a.

"A chhunga awm chu engpawh lo nise, kan tichhiat palh chuan awmzia a awm dawn lo teh ania." Ravi-a chuan a lo ti ve leh a. Alex-a chu a ngawi leh vang vang a, "Break i nei lawk mai teh ang u, kan re-asses leh vek angai dawn tlat mai. Hemi box hawn chungchang hi chu ngaihtuah thui deuh a ngai dawn tlat, rest lawk ang u." a ti ta daih mai.

Rei deuh fe hnuah chuan tech expert thenkhat chu Ravi-a leh Alex-a bulah chuan an rawn kal a, high tech haking device leh thermal scanner an rawn keng bawk. Specialist pakhat zawk chuan, "He scanner hmang hian box hi a weak point kan scan theih kan inbeisei a, hidden mechanisim awm ang ang te pawh a scan thei bawk ang." tiin Alex-a chu a rawn hrilh a.

"Chuan hacking device hian electronic lock la bang ho hi a override vek theih beisei a ni bawk, hmanni-a kan siam thar kha a nia, latest edit." pakhat zawk chuan a lo tih zawm ve nghal zat bawk a. Tichuan equipment thar te chu an han set up zung zung a, "Awle, han try leh ila. Tihsual kan nei thiang lo ania, fimkhur takin i che ang u." a han ti leh lauh lauh va.

Tichuan specialist ho chuan khawl thar nen chuan an bei leh ta ngar ngar a, an hlawhtling angreng phian mai. Layer zawng zawng chu an thiat zo titih ta mai a, electornic lock ho pawh chu an phelh thui telh telh a. "A tha zel e, a thawk tak tak ania. Scanner hian a weakpoint a rawn thai lang zel a, hacking device pawh a in progress zel e." specialist pakhat chuan a rawn ti chhuak a.

Ravi-a chuan nghahhlelh hmel tak hian, "Khawngaihin, a chhunga awm kan hriat ngei ngei a ngai ania... khawngaihin theih hram rawh." tiin a phun mawlh mawlh a. Rei fe hnuah chuan a ri khep khep a, final lock an thleng ta. Alex-a pawh a phur tawh ngei mai, "Final lock kan thleng ta, a theih dawn e.." tiin a awm tha hleithei tawh lo.

Mahse mak tak maiin box chu a rawn t(r)ek zawk a, chutah layer an thiah tawh ho zawng zawng chu amahin a rawn insiam thar leh ta vek mai a. Electronic lock an phelh tawh ho pawh chu amahin a rawn inlock leh vek mai, a tira an hmuh ang thlap khan box chu a phui leh ta vek mai a.

Operator mak ti lutuk chuan, "Eng thil nge thleng hi?" a ti hu mai a. Alex-a pawh a meng phawk nasa ngei mai, "Eng nge awmzia? Lock zawng zawng kan phelh tawh sia, a rawn in-lock tha leh vek mawle?" a ti hu mai a. Midang ho pawh chu an in en hu hlawm ringawt mai, "Tihsual kan nei aniang, self-repairing system an hmang a nih dawn hi." Ravi-a chuan a lo ti ve bawk a.

Alex-a chu a beidawng takzet, a thaw hluai a. A vei kual zuk zuk a, "Umm, duhtawk teh ang. Ti hian hmun himah dah phawt ula, tha takin in veng dawnnia. Next plan chu ka lo sawi leh mai ang, ruk tum an awm a, kan lab thleng a rawn ruk tum an awm palh pawh a, an lak theih lohna turin hmun him takah dah ang che u." tih pah chuan lab atang chuan a chhuak daih a, RAvi-a chuan a zui ve nghal bawk.

********************************************

Hotel room ah chuan Kenji, Hiro leh Kaito te chu an thu ngui bar hlawm mai. A hliam a damdawi hnawih a, then sawk sawk pah hian Hiro chuan, "Eng ang hmeichhia nge maw ni le, kha Indian nu mai mai chuh. Nurse inthuamin ala inthuam zui bawk sia, Arjun-a khan Voltress tiin a ko va...a thu sawi apiang ala zawm zui." a ti nuah nuah a.

A ban a bandage tuam pah hian Kaito pawh chuan, "Nia, a chak satliah a ni hauh lo. Mihring pawh a ang lo, ka khawih fuh ve nual ania. Mahse engtin mah a awm lo reng reng, eng ang ramhuai nge ni ngai." a lo ti ve bawk a. Hiro pawh chuan a lu lo bu nghauh nghauh vin, "Damdawi eng emaw tak a hmang pawh a ni mahna, hriatthiam a har khawp mai." a lo ti ve leh a.

Chutia an titi mawlh mawlh lai chuan a melh ngai melh vung vung chung hian Kenji chu a lo thu ngawi run a, a inngaihtuah nasat hmel hle mai. Thawk a han la hluai a, "Arjun-a human experiment neih zinga mi a ni ngei ang." a rawn ti chhuak hlawl mai a. Hiro leh Kaito chuan an en hu mai a, "Eng a? Human experiment i ti em ni?" tiin Kaito chuan a lo zawt nghal vat a.

Kenji chuan a lu lo bu nghatin, "Aw ni e, ka rin dik ngei pawh ka beisei. Sensei Takashi khan min hrilh a, Arjun-a chungchang hi a chhui nasa alawm, Aiko nen an tlan bo hnu khan. Japan a awm lai khan Robotic Engineering leh Artificial Intelligence lam khan kum eng emaw zah a rawn zir a, kha hmeichhia kha mihring nilovin robot a ni ngei ang. A thil siam chhuah a nih ka ring, a kut ah khan ka sat nual a, mahse thir ang mai a ni, pem pawh a nei eih lo." tiin a chhang a.

Room chhung chu a reh thiap mai, "Anih chuan, engtin nge kan tih tak ang? VA beih ngawt chi a ni lo tih kan hre tawh bawk a, Aiko-i awmna hre tur chu Arjun-a bak midang an awm awm si lo?" Kaito bawk chuan a lo ti leh nuah nuah a. Kenji chu a han ngawi leh vang vang a, "Kan fimkhur zual a ngai hle dawn a ni, Takashi hnenah pawh kan hrilh mai a ngai ang a tul a nih chuan." tiin a lo chhang ve leh a.

****************************************

Tlai lam a ni a, Aiko-i pawh a training room thar ah chuan a awm mek a. Aiko-i chuan thawmhnaw var, a training form chu ha in katana chu a hum ran a. Ni tla tur chuan trainign room pawh a rawn chhun eng pup mai a, boruak chu a nuam pangngai hle bawk. Inbin zak zak chung chuan a katana chu a han vei ri thuak thuak a, a rang takzet.

A bul lawkah chuan Shantanu chu dingin Aiko-i chet dan vel chu uluk tak hian a lo en reng a, hmuhnawm a ti khawp mai. Japan-a Takashi-a'n a tiduhdah em em, mi nunnem tak Aiko-i kha chu a ni tawh hauh lo, mihrign ruh pangngai a nei tawh lova. Black steel ruh nei tawh a nih avang leh a chakna pun nasat em avang chuan a fit zak zak tawh kher mai, rei fe a han chet kual zak zak hnu chuan a thaw ta huai mai.

Shantanu lamah chuan va kalin chibai a buk a, "Hma i sawn takzet ania, Aiko. I pa in hmu che sela chu a chhuang ngawt ang che, mahse hei hi hre reng rawh. Samurai zinkawng reng reng chuan tawp chin a nei lo, a thih thlengin a bei thin. Zir zawh a awm thei lova, zir tur chu a awm belh zel a ni." Shantanu chuan a han ti a.

Aiko-i chuan a lu a lo bu nghat a, "Ka lawm e, Master. Ka tawng che hi ka lawm takzet, tunah chuan sensei diktak Pathianin min pe ve ta a nih hi. Mahse hetah awm reng thei ka ni lo, Japan lamah, ka awmna tur diktak ah ka let leh a ngai in ka hria. Ka chhungte, ka unaute leh ka thiante venhim hi ka hna a ni." tiin a lo chhang a.

Shantanu chu a han ngawi vang vang a, "Ni e, Japan chu i awmna, i pian leh murna a nia lawm. Mahse i danglam tawh tih hria la, i taksa pawh mihring taksa aiin a chak tawh a ni. Japan atanga tlanchhia, Aiko Tanaka kha i ni tawh lo. Tunah chuan i power i control thiam a ngai takzet, i danglam tawh." a han ti leh a.

Aiko-i chu a han inngaihtuah vang vang a, "Japan-a ka let leh hma in, helai hmunah hian tih tur dang pakhat ka la nei. Arjun Malhotra, min phatsan a. A experiment atan hman min tum a, robot ah min siam a tum a ni. Ka hmangaih avangin ka chhungte leh thiante pawh ka phatsan vek a, mahse hmanrua atan mai mai min lo hman a tum a. Phuba ka lak angai, a nih loh chuan Japan-ah let leh pawh ni ila rilru nuam takin ka let thei lovang." tiin a thinrim hmel em em a.

Zaidam tak hian Shantanu chuan, "Aiko, phuba lak chu a awm ka tih pui lutuk che. La suh ka ti miah lo, mahse hei hi hre reng rawh. I fimkhur loh chuan i phuba lakna khan nangmah a ti chhe tel ve thei che ania, Arjun-a i hmachhawn hunah pawh i inthunun a ngai dawn ania." tiin a lo chhang a.

Aiko-i chuan a lu a han bu leh nghauh nghauh va, "Ka lawm e, Master. Phuba lam ngawr ngawr ai chuan, ka thil tihsual hi ka siam that a ngai. Ka bul tan a nia, a tawp pawh ka khar ngei ang. Shantanu pawh chu a nui suk mai, "A tha e, Aiko. Ka support reng ang che, i duh chu ti rawh. Theihnghilh ngai suh, Aiko Tanaka, samurai tha tak, venghimtu leh tanpui ngaite tanpui thintu ni ang che." tiin a han hrilh leh a.

Aiko-i pawh chuan beiseina a neih tam phah khawp mai, "Ka lawm e, Master. I mi zirtirna hi ka theihnghilh ngai lovang, ka thil tih tur ka tih zawh hunah Japan ah chuan ka let leh ang nga, engkim a pangngai angin a awm leh vek ang." tiin a khi suk a. Chibai a buk leh a, tichuan training room chu a chhuahsan ta a.

***********************************

Lab chhungah chuan Arjun-a chuan Voltress, a robot-human siam chhuah thar chu a power a off a. Machine pakhat ah chuan awm tirin a aia changkang leh theihna nei tam zawk tur chuan a update mek a ni. Wire leh circuit tam tak chu Voltress taksa ah chuan a vuah nuai mai bawk a, control panel lamah chuan eng eng emaw chu hmetin a control pah reng bawk a.

Tichuan machine dang pakhat lam chu ava pan leh a, chu chu Voltress inthuamna tur, suit siamna a ni. Voltress serum kha a rawng pawl a nih vang nge, Arjun-a chuan suit pawh chu a pawl lam rawng kai in a design a. Suit a design zawh chuan a print nghal a, tichuan Voltress-i lam chu ava pan leh a.

Control panel ah chuan thil a han hmet leh nauh nauh va, chutah robot kut ang tak mai, khawl changkang tak mai chuan suit chu a rawn la a. Mak tak maiin Voltress mu mek ah chuan a rawn rem khawm a, tichuan a zawh meuh chuan Voltress pawh a thuam famkim nen a awm ta der mai.

Chip chu a activate nawn leh a, tichuan Voltress chu a rawn harh ta. A rawn ding a, Arjun-a hma takah chuan a ding chat a. Arjun-a chuan intihtheih hmel tak hian a lo thlir vang vang a, "Voltress, ka update che a. A hma aia letin i chak tawh, Aiko tan chuan hneh ngaihna i awm dawn lo hrim hrim. Hre reng rawh, i hna hmasa ber tur chu Aiko-i zawn chhuah a ni." tiin a han hrilh a.

Voltress chuan a lu lo bu nghatin, "Yes Master." a ti zawi leh sap a. Arjun-a chu a han vei kual thuak thuak a, "A tul a nih chuan thah mai tur, man lohva hetia a awm reng chuan nang hi engtin nge mipui hmaah, ka robot siam chhuah i nih thu ka sawi ngam tawh ang? Nung damin duh viau mah ila, a power thar, ka pek ngei kha a lo hmang ve khanglang a nih chuan that la, a ruang rawn hawn ang che." a han ti leh a.

Voltress chuan a lu lo bu leh nghutin, "Yes, Master." tih ringawt chuan a lo chhang leh a. Voltress chu chak tawh tak a ni a, Kurogane Elixir aia let tamin Voltress serum hi a chak zawk a ni. A tirah chuan Aiko-i tan tho va a siam a ni a, Black steel a kah luh hnu ah, a update zel ang nga, tichuan Voltress serum nena mix a tum a ni.

Mahse Aiko-i chu a tlan chhuak ta daih kha a ni a, chuvang chuan duhthlan tur nei tawh hek lo. A assistant rinawm tak, Priya-i taksa chu tih luihna hmangin a ui em em, hman tawp atan a risky em em ni si, Voltress serum chu a hmang ta tawp mai a ni. Rum taka mengin tukverh lam chu a hawi chhuak a, "Aiko, i unaupate hi ka dahtha hmasa phawt ang." tiin a khi leh suk a.

********************************************

TO BE CONTINUE