SAMURAI ROSE (A JAPANESE-INDIAN FICTION SCI-FI THRILLER STORY) Written by : Aaron Malsawmdawngzuala Chapter - 1

 SAMURAI ROSE

(A JAPANESE-INDIAN FICTION SCI-FI THRILLER STORY)

Written by : Aaron Malsawmdawngzuala

Chapter - 1

****************************************************

Japanese hmeichhe naupang hmeltha tak, kum 10 leka upa chu dojo room pakhat ah chuan seiza posture, ngil taka thingthi chunga, ka artui thutbeh leh kawng ngil at a, dak vah chunga thut ang position chuan a lo thu mek a. A hahthlak a tih hmelin a thlan a tla zawih zawih mai, chutiang chuan darar khat chuang a awm tawh a ni.

A mittui a tla zawih zawih mai a, a taksa chu a sil thum tawh mai. A bul lawkah chuan a apa, Takashi Tanaka chu a ding reng a. Tiang sin tak, sei tak si hi a hum ran bawk a. A fanu thu lai chu a vil reng a, "Aiko, mi dawihzep ni suh ka tih kha. Samurai dik tak chu a chak lo tur a ni lo, mi dawihzep leh mi chak lo te chiahin an lan tir thin." tiin a lo vin thak thak bawk a.

A fanu hming chu Aiko Tanaka niin Kyoto, Japan a cheng mek a ni. A chau tawh lutuk leh a kawng kham tawh lutuk chu a thu kun ta hnap mai a, chuveleh a hnungzang chu a rawn thip nghal zawk mai. A pa chuan a hnungzangah chuan a tiang ken lai chuan a rawn hlap nghal zawt zawt mai, tap chung chuan Aiko chu a thu nghil leh nghal at a.

Hlap leh pah chuan apa chuan, "Fanu nep neih ka duh lo, tap suh. I mittui kha hru hul rawh, ka hmu duh lo." tiin a hau hrep hrep mai a. Aiko chu a tap ri ngam si lo, chutiang reng reng chuan nitin a hun a hmang thin a ni. Takashi hi samurai thiam hmingthang tak mai a ni a, a fanu neih chhun Aiko pawh hi samurai tha tak nih tir ngei tumin training hahthlak tak tak a pe thin a ni.

Aiko chu kum 10 leka upa a ni a, hmeichhia ala nu zui bawk nen. A nun chu hrehmun ang mai a ni a, apa hian strict takin a enkawl a. A chang phei chuan chaw a ei tir ngai lo, a diet te nen lam a control sak vek a. Naupang mai tan chuan hrehawm tur tak a ni, mahse apa erawh chuan thil dik tak a ti angin a ngai tlat thung a.

************************************************

Ramhnuai pil ril tak maiah chuan Japanese nula pakhat leh Indian tlangval, Arjun Malhotra te chu an tlanchhe mek a. An hnungah chuan samurai tamtak te chuan an umzui a, an ngunhnam an keng theuh bawk. Chu JApanese nula chu Aiko-i kha niin kum 10 a lo liam leh daih tawh a, chung Samurai hote chu Aiko-i pa, Takashi samurai zirlaite an ni.

Arjun-a chu a hlauthawng em em a, "Aiko, min rawn umpha mai dawn ania." tiin tlan pah chuan a thaw hlawp hlawp a. Tlan pah a hnunglam hawi zeuh zeuh pah chuan, "Ka hria alawm mahse tlan zel phawt ang, tawp thei kan ni lo." tiin Aiko-i chuan a chhang a. Mahse samurai ho chu an pung chak lutuk tlat, an thawm chu a ring tial tial a.

Chutah an hma lamah pawh chuan an rawn lang ta nawlh nawlh hlawm mai le, Arjuna leh Aiko-i tan tlan ngaihna a awm ta lo. Samurai ho chuan an hual bet vek tawh, an ding ve ta tawp a. Arjun-a chu a phenah chuan Aiko-i chuan a awm tir a, samurai ho chu rum tak chuan a han melh kual a.

An zinga upa ber, Samurai LEader chu a rawn pen hnai deuh va, "Aiko, i chhungte hi min kalsan thei lovang. Thuawih takin min rawn zui haw la, tichuan khapa kha nungdamin kan chhuah ang." a han ti thum chhur chhur a. MAhse Aiko-i chuan a lu thingin, "Saw inah sawn ka let leh tawh ngai lovang, in thei anih chuan min dang ta che u." tiin a lo chhanglet sak mai.

Samurai Leader chu a khi suk a, a naute chu a han signal zeuh va. Chutah samurai zinga pakhat chu a rawn tlan phei a, a ngunhnam hmang chuan Aiko-i chu rawn sah a tum a. Mahse rang lutukin a lo awm sawn zeuh va, chupa banah chuan man betin a herh ri thawt mai.

A ngunhnam chu a thlauh nghal a, Aiko chuan a dulah tlawh pawpin a leng lawp a. Thingkung ah chuan a hnungzang a ri dawt mai, leiah chuan a tla bawk nghal thlawp bawk. Chutah pahnih dang an rawn kal leh a, a rual chuan an rawn bei ta. Pakhat chuan a rawn vai leh pawp a, mahse Aiko chu a eu vak a.

Thing tang leia lo awm chu la in pakhatin a rawn vai leh chiah chu a kutah chuan a lo vuak sak a. PAkhat zawk chu a rawn chet ve hma chuan Aiko-i chuan a kiu hmang chuan a hnarah a nghawk pawp a, a thal chiang ngei mai. Pakhat leh zawk chuan a ngunhnam chu a chhar a, mahse a rawn hawi chhuah leh hma chuan Aiko chuan a bekah a lo tlawh sak leh chawrh a.

Tichuan a dang an rawn kal belh zel a, a tette atanga apa in strict taka a lo zirtirna chu Aiko-i chuan a hmang tangkai hle mai. Rang lutukin a lo thal pawp pawp hlawm mai a, hneh lo tak an ni. A tawpah chuan an leader chauh chu a bang ta, an inmelh ta ran mai. Aiko-i chuan samurai pakhat chu a hum ve ran tawh a, LEader chuan a rawn pan ta.

An han inbei ve leh ta a, mahse leader nge nge Aiko-i chuan a hneh tha ngang lo. Arjun-a lah chuan lo puih chu duh ve viau mahse thiam thil engmah a nei ve der si lova, mangang takin thingkung phenah chuan a lo biru char char ringawt mai a. Rei deuh fang an inbeih hnu chuan Aiko-i chuan LEader chawnah chuan a samurai hmang chuan a zai kak thei hlauh mai, a thingthi hnawk a.

Chuveleh a khup chuan LEader khabe ah tak mai chuan a han do chho pawp a, nikhawhrelovin a let ve ta der mai. Aiko-i chu a thaw hlawi hlawi a, Arjun-a chuan a rawn pan a. "I tha em?" tiin a zawt a. Aiko-i hah lutuk chuan chhan pawh a lo chhang hleithei lo, "Kal leh nghal ang." Arjun-a bawk chuan a ti leh a, an tlan leh ta a.

******************************************

Aiko-i chu a han meng kawk a, a awmna chu a lo dang leh daih tawh. Mumbai khawpuia apartment pakhat bacony-ah chuan seiza position-a thu chuan a lo awm reng a, a hun kal tawhte chu meditaion tih pahin a lo ngaihtuah let vel a lo ni. A han tawh deuh huai a, tichuan a ding a.

A han zi mar vel talh talh a, chutih lai chuan Arjun-a chu thingpui no hnih nen balcony ah chuan a rawn kal ve a. Thingpui chu Aiko-i pek pah chuan, "I van awm rei tawh ve, thawh hlim atang khan darkar khat vel i awm tawh ania." Arjun-a chuan a han ti a. Aiko-i chu za lo tak chuan a khi suk a, "Englo, ka mitthla ah..ka ngaihtuah let a.." a tih lai chuan, "Hun kal tawh bawk kha em ni? Theihnghilh a harsa a ni tiraw?" Arjun-a chuan a lo ti vat a.

Aiko-i chuan thingpui chu a han lem sak a, "A chang chuan ka zalen tak tak tawh em, nge ka la zalen hauh lo tiin ka inngaihtuah thin." a han ti leh nuah nuah a. Arjun-a chu a han thaw hak a, "Khawvel dangah kan awm tawh, nun bul kan tan tha dawn alawm. Ni e, hun kal tawh kha chuan min kian san mai lovang, mahse hma lam kan pan a ngai ania." tiin a darah chuan a vuan a.

Aiko-i chuan Mumbai khawpui, motor tam tak leh mihring tam tak inpel tawn suau suau mai chu a han en a, a ngawi vang vang a. Tichuan Arjun-a mitah tak chuan a en a, "Ka let tawh lovang, min rawn hruai tum pawh nise ka let tawh dawn lo." a han ti chang fak a. Arjun-a chuan a biangah chuan a vuan a, "I bulah ka awm dawn alawm, kan awmdun reng tawh ang." tiin a lo chhang ve bawk a.

An inkuah vawng vawng a, "E taka, kan thenawmte hian mak an ti thei ngawt ang che. Japanese nula, balcony-a meditate nei ziah mai chu.." Arjun-a bawk chuan tiin a han nui hak hak a. Aiko-i pawh chu lo nui huk in, "a ho mai mai, lo buai suh se." tiin a han fiamthu chhunzawm ve nghal a.

********************************************************

Aiko-i pa. TAkashi Tanaka chu dojo room ah chuan amah chauh chuan a thu a, a thim rui bawk a. A melh ngai chu a melh run run a, a thinrim hmel kher mai. A mitthlaah chuan thla nga liam ta a, a fanu Aiko-i tlan bo hma chiah ni a a thil tawn te chu a ngaituah let a, a thin a rim thar takzet.

Chumi ni chuan Takashi chu dawrah thil lei turin a kal a, dawr lehlama nu pahnih lo titi chu a hre pah a. PAkhat zawk chuan, "Sensei Tanaka fanu Aiko kha i hria em? Apa in lehkha zir tura University a kal tir hnu khan Tokyo-ah foreingner nen an inngaizawng an tih kha..miin an sawi duh lutuk." tiin a phun sur sur a.

Takashi chu a sa zak mai, mahse a ngaithla zel a. "Ka hre daih tawh alawm, Pu Tanaka chuan a hriat hun chu a chung a pik ve khawp ang." tiin a thiannu chuan a lo sawi ve bawk a. Dawr nghaktupa chuan ring leng lawng hian, "A va zahpuiawm ve, a thuhrimin Tanaka Chhungkaw hming a ti chhe vek dawn anih chu.." a lo ti ve bawk a.

Chumi zan chuan Takashi chuan Aiko-i chu a hrem ta ngei bawk a, "A dik em? Kan chhungkaw hming i ti chhe vek tih i hria em? Foreigner lakah maw i chhungte hi phatsan i tum a?" tiin a tiang ken lai chuan a hlap hrep hrep mai a. Mahse Aiko-i chu a tap duh hauh lo, "Ka pa, ka hmangaih a ni." tiin a chhang lui zel a.

Huaisen zirtirtu, luhlul zirtirtu leh tawrchhel zirtirtu apa ngei mai chuan a fanu chu dim lo tak chuan a hlap nghek nghek a, "Min ti mualpho kher mai, Aiko. Lehkha i zir tawh lovang, kan gate saw i pel tawh lo bawk ang." tiin a vin leh hrep hrep mai a. Aiko-i chu a mittui a tla zawih zawih a, mahse tah erawh a tum eih lo thung.

Takashi chu a han meng kawk a, a fanu chu a ngaihtuah viau mai. MAhse a thinrimna chuan a thunun tlat bawk si, zawn chhuah ngei a, hrem hlak chu a duh dan ber a ni. A bialpa pawh chu tunge a nih tiin a tlan bo hnu khan a chhui zui nghal a, Indian mi a nih avang chuan India ram lamah a hruai ngei a ring bawk.

***************************************************

ZAn a lo ni a, Arjun-a leh Aiko-i te chu Arjun-a apartment ah chuan zanriah an kil dun mek a. Arjun-a chu a titi tui ngang mai, theatre-a movie a en tum a, boruak dangdai tak a thlen zan chu sawiin a nui vak vak a. A chaw thial nuau nuau pah chuan, "A film kha a tawp tep tawh a, changtupa pawh khan misualpa a hneh vek tawh. A tawpna atan tiin changtupa khan eng emaw thuril deuh a sawi dawn chiah a, current a han thim hmak mai a nih kha. Mipui lungawi lo khan an popcorn te khan an vawm darh nasa a sin aww...a chi loh tak tak." tiin a nui huah huah a.

Aiko-i pawh chu a lo khi suk a, "Japan-ah chuan tiang power supply thi tawp ang kha a awm ve ngai lo asin, an va fimkhur awm lo ve, a buaipuitu te pawh chu?" a lo ti ve a. Arjun-a chu a han thaw deuh hluai a, "Keini ram te ve zawng, Japan nen intehkhin chi a ni hleinem. chubakah khami theatre ka kalna kha street theatre mai mai ania." tiin a chhang a.

Aiko-i chuan tui a hahn in khawlh khawlh a, "A va chi ndawn loh ve aww, anih current chu a awm leh nghal em?" tiin a han zawt leh a. Arjun-a chu a nui huk a, "Darkar chanve vel hnu khan a rawn eng ve leh hlauh va, mahse tumah khan an en tha peih tawh lo. An haw deuh nual tawh a, a then phei chuan ticket refun an dil nasa. A tha ve hrim hrim, India hi chu beginner tan chuan rawn awm vena chi a ni lo ania." tiin a han nui leh hak hak a.

Aiko-i pawh chu a lo nui ve hak hak a, "Kei phei chu awm ve ila chuan, a film tawp tawh dawnah lehnghal, ka ngaihdan a ni lo ve tho vang." a han ti ve luam a. Arjun-a chuan a lu a bu nghat nghat a, "A dik chiah alawm, kan thil duh neih emaw hmuh tuma kan beih chang te hian kan beisei loh deuh zawk te hi kan tawh chang a awm chawk ania. Entirnan, kha ila hria em? Beach awmna lai kan zawn tum kha, puk mak deuh kan hmuh daih kha?" tiin a han khi vur vur a.

Aiko-i pawh chuan a lo hrechhuak ve ni ngei tur a ni, "E..aww.. khami tum kha. Mahse khami hmuna an coffee zawrh kha, keichu tui ka ti rapthlak mawle. Kawng kha bo ta lo ila, khami cafe kha kan hmu chhuak dawn miah lo tihna ania, a lawmawm tho tho ka ti." a lo ti ve bawk a. 

ARjun-a chuan a hmaa rice inchhawp chu a han hawp leh deuh puk puk a, "Ti daih ila, ka rin aiin i lo dawih daih. Ka sawi awmzia chu Bollywood film ka enpui nual tawh che a, thlahrang lam te pawh India hian movie kan siam ve thin. Japan nena tehkhin chuan in horror moive te chu a hlauhawm daih zawk, a let sang tam takin. Mahse BBollywood horro fil  mai mai pawh i hlau em em ania, i la hria em? Thla hmasa a kan en kha, i dawih zia kha. Jumpscare a rawn thlen apiangin min kuah chung chung a, a mak ka ti thlawt." tiin a han fiam leh a.

Aiko-i chu a han ner deuh sak a, "Thlahrang film hrim hrim hi ka ngaina lo ve em a ni, nangpawh engvak i nih bik loh kha. A tawp scene ah khan i phut ve zuk kha, ka kut i rawn vawn nghal kha." tiin a lo fiam let ve bawk a. Arjun-a chu a han nui deuh suk a, "Nia, khami film kha chu a hlauhawm ve bawk em a ni." a han ti nuah nuah a.

"Keichu ka hrethiam lo, tinge mi hian hetiang hlauhawm lam hrim hrim film hi an ngainat tlat le? Keichu a dawih chi ka nia, mihring chu ka hlau lo. Mahse thlahrang hi chu hlau tak ka ni, an awm tak tak nge tak tak lo chu ka hre lo na in.... tinge min ti hlau theitu hi en kan chak tlat le?"

"Tiang lam moive hi ka ngaina lutuk asin keichu, a hlauhawm pauh leh a hmuhnawm a ni mai. Roller coaster-a chuan ang deuh hi ania, a hlauhawm pauh leh a nuam..tiang deuh chu ani mai."

"A ni mahna, mahse keichu Romantic movie lam hi ka duh zawk daih. Thinphu a ti rang lova, en pawh a hahdam zawk."

Arjun-a chu a han khi suk a, "Ka hrethiam e, chuvang ami hmanah khan nunna thap hial a min tlanchhiat pui chiam ni? Marathon race -ah min tel tir a ni ringawt alawm, insual lo thiam lo phei la chu ka thi chiang ngawt ang." tiin a han fiamthu zeuh va. Aiko-i lah chuan, "I dam chhuak kha lawm ringawt rawh." a lo ti let zek mai.

Arjun-a chu a han nui leh huah huah a, "Nia nia nia, ka bialnu hi chu a bon em asin." tiin a lo fiamthu zui ve bawk a. An ngawih deuh vang vang hnu ah chuan, "Arjun, engtik ah nge i nu leh pate nen chuan kan inhmuh theih ang?" a rawn ti chhuak deuh hlawl mai. Arjun-a nui hmel chu a tawp chiang kher mai, hnuailam melhin a kun nghal a.

Inthlahrun hmel tak hian, "Englo ania, Aiko. Ihhh, an la inpeih lo ti ila kan sawi sual lo ber ang. " tiin a lo chhang ta daih mai. Aiko-i hmel chu a lungawi hmel vak lo, "Thla 5 chuang a ni tawh, Arjun. Tinge, eng nge i hlauh?" tiin a zawt let hial a. Arjun-a chu a inthlahrun hmel tak zet, "Nangmah i ni lo, Aiko. Keimah zawk hi buaina chu ka ni, engtin nge ka sawi fiah ang ka hrethiam lo. Indian tradition hi an thupui ber ania, ka Indian pui ngei hi nupui atan nei ila, chu chu an duh dan ber pawh ania." tiin a chhang ta mai a.

 Aiko-i hmel pawh a danglam ta kher mai, "Anih chuan min duh lo tihna em ni?" tiin a han zawt a. Chuveleh Arjun-a chuan, "Ni love, Aiko. Chutiang zawng chuan ngai suh, tunge i nih an hriat loh vang mai chauh a ni. Ka kutah dah rawh, a rei tawh lovang.” a lo ti nghal thuai thuai a.

Aiko-i chuan a hmui a han pet fan fan a, a rilru a hah hmel kher mai. Arjun-a chu a han en vang vang a, “Lungngai suh, Aiko. Ka theih tawp ka chhuah dawn alawm. Engtia rei nge i la nghah ngai dawn ka hre lo, mahse ka theih tawp ka chhuah ang. Ka lo be leh ang, eng tiang taka ka tana hmeichhe tha leh duhthusam nge i nih hi an la hre dawn alawm.” tiin a han hnem a.

Aiko-i chu a han thaw deuh hak a, Arjun-a kutah chuan a vuan a. Nghet tak chuan chuan Arjun-a kut chu chelhin, “Ka dinhmun i hria a, ka engkim kalsanin i bulah ka lo kal a. Ka ring tawk che, mahse Arjun... kumkhua chuan ka nghak thei dawn lo ania.” tiin a chhang a. Arjun-a chuan a kut chu lo vuan ve in, “Ka hria alawm, rei tak innghah tir che ka duh bik lo.” tiin a lo chhang a.

*********************************************

Dojo room ah chuan Takashi chu inngaihtuah muk tak hian a lo thu leh reng tawh a, a mitthla ah chuan Aiko-i tlanchhuak lai te leh Arjun-a nena an tlanchhe lai te chu a rawn lang leh ta chuai chuai mai a. A thinrim hmel takzet, engti kawng zawng pawh a a fanu hruai let leh chu a thil duh ber a ni.

A ding thut a, dojo room atang chuan a chhuak a. A kawtah chuan a student te zinga talent nei ber leh chak bera a ngaih, Kenji chu a lo ding ngawi reng a. A va pan hnai a, zah hmel tak hian Kenji chuan chibai a lo buk a. Chiang fek fawk hian Takashi chuan, "Kenji, hna pakhat ka pe dawn che. I hlawhchham thiang tur a ni lo, chhungkaw thil a nia, a pawimawh ania." a han ti a.

Kenji chu a han ding ngil at a, "Eng hna nge, master? Ka ti hlawhtling em em ang, ka tiam a che." a lo ti nghal a. Kut hnung suihin Takashi chu ava kal hnai leh deuh va, "In unaunu, ka fanu Aiko-i kha.... tunah hian India ah a bialpa nen khan an awm mek a, a tir chuan theihnghilh a tuithlar hmak mai kha ka duh a. Mahse khaw mipuite min ngaihdan leh a ruka min sawi dan hi ka hre hne hlei hlui tawh. Ka tuar thei tawh lo, hetia ka chhungkua a ti hmingchhe chhunzawm reng hi hremna pek a ngai a ni. India ah in kal angai, tichuan rawn hruai haw ngei bawk ang che u." a ti ta hem mai a.

Kenji chu a han ngawi vang vang a, "Sensei, nih leh lo let fuh lo ta ang se? Ram dang daih a ni bawk si a, min rawn zui haw duh lo ta se?" tiin inthlahrung tak chuan a lo zawt a.Takashi chuan Kenji-a mitah tak chuan a en a, "A thil tih sual hi a hriat fiah a ngai a ni, Kenji. A duty a hre lo, chu chu i hriatfiah tir a ngai. Ka hming a ti chhe tawh lutuk, a ti mualpho tawk tawh. A lo kal duh lo a nih chuan tih tur i hriat kha, hrehna nei hauh lova i tih ngei a ngai bawk ang." tiin a chhang a.

Kenji chuan a chil a han lem dawk a, "Awle, naktuk atangin India a kal dan chu ka ngaihtuah nghal ang, Sensei. Aiko-i chu ka rawn hruai let leh ang, a nih loh chuan kumkhua atan a lo let tawh lo zawk ang." a han ti a. Takashi chuan a darah a beng thak thak a, "Ka fapa i nih kha, nang anga rinawm leh taima hi zirlai ka la nei ngai lo. Kenji, min ti hlawhchham suh ang che." a han ti chang leh fak a.

Kenji chuan chibai a buk leh a, "Awle, Sensei." tiin a han tawlh hnung leh deuh va. Lehlam a hawi a, tichuan thim zingah chuan a phei a, a bo daih mai. Takashi chuan a han en vang vang a, "Ka khawvelah hi chuan engmah, khawngaihna leh lainatna a awm ve ngai lo." tiin a phun sup a, dojo room ah chuan a let leh a.

*************************************

Chhun a ni a, ni pawh a sa tha ngang mai. Mumbai a slum area lian ber leh zau ber, Dharavi slum area bul a, mihring awm tlemna ber leh main slum atanga hla ve tak ah chuan SUV(motor) nalh em em mai, dum hlarh mai hi a rawn tlan phei a. Motor chu muangchang chuan a ding a, a chhung atang chuan American mipa, hmelchhe lem lo tak, kum 35-40 vel bawr hi a rawn chhuk a.

Driver seat lam atang chuan vaipa pakhat, Ravi-a chu a rawn chhuk ve bawk. Chu American pa chu Alex Mercer a ni a, Mumbai-a secret weapon company, sorkar hriat lohva a ruka nei mektu, Agent rorum leh skills ngah tak a ni. Coat suit nen a ri zaih mai a, en reng reng pawhin a hausa tih a hriat ngawih ngawih.

A driver Ravi-a chuan lei lo khuar deuh lai chu a kawk a, "He tah hian ania, Sir. Kan nauten an sawi dan kha chuan meialh hlawm ang tak a ni an tia, mahse hria an la tlem khawp ang." tiin a hrilh a. Alex-a chuan a lu a bu nghat nghat a, "Scan phawt ila, arsi tla te pawh a ni mahna." tiin a lo chhang a.

Chumi lei khuar lai chu an han scan zel a, chutah metal detector chu a ri ta vat vat mai. Rang takin motor atang chuan suahdur sial tak mai, suahdur satliah ang ni ve hauh lo chu Ravi chuan ava la a. Tichuan a bul vel chu a han lai khuar a, rei pawh a ngai lo. Minute khat pawh tling lovah chuan suahdur chuan thil sak tak mai hi a chhun fuh a, a bul vel chu Ravi-a chuan a han hui fai thuak thuak a.

Chutah box mak tak mai, lian angreng tak mai chu an lai chhuak ta. MAhse box chu a chanve zawng chu a hmuh theih a, a chanve dang erawh leiah chuan a inphum tlat thung. Ravi-a chu a han thaw halh halh a, "Hei le.. Sir." tiin Alex-a chu a kawh hmuh a. Alex-a pawh chuan a han en vang vang a, "Hei hi van atangin mei alh hlawm angin a lo tla tihna chu ania, ava mak awm ve." a ti nuah nuah a.

Ravi-a pawh chuan a han thlek vang vang a, "Engthil nge ni a i rin, Sir?" tiin a han zawt a. A aia chiang chuan Alex-a chuan a han bih hnai deuh va, "Weapon dangdai tak pawh a ni thei, anih loh pawn advance technology hmanga siam pawh a ni mahna." tiin a chhang a. Ravi-a chuan a han lai thuk leh deuh va, mahse a inphum nghet lutuk tlat.

Thaw hluam hluam chung hian, "Sir, a nghet lutuk. A lei hi a chang tulh tulh bawk sia, tih ngaihna a awm rih lo." tiin a thlan chu a han hru thuak thuak a. Alex-a chu a ngawi vang vang a, "High-tect thil satliah a ni lo, mihring siam pawh a ang ka ti lo." a ti nuah nuah mai. Suahdur chu a la a, a han lai zau leh deuh va.

Mahse a nghet lutuk tlat, an phawi thei lo. Alex-a chu a thaw hak a, "Hmanraw dang hmanga lak chhuah mai chi a nih hi, tunah chuan tih ngaihna a awm rih lo." a han ti a. Ravi-a chuan Alex-a chu a en deuh hu a, "Mahse Sir, hetia kalsan tawp chu a chi lovang. Bomb te pawh a lo ni thei a, miin an lo hmu ange... slum area bul lawk a ni bawk si." a lo ti vat a.

"Chuvang tak reng chuan alawm, ven him a ngai takzet a nih hi."

"Engtin nge niang?"

"Perimetre siam angai a nih hi, helai site bik hi hung kual ila. Motion sensor leh camera install ni bawk se, kan thu lo leh kan hriatpuina tel lo chuan helai hmun hi kal phal a ni tur a ni lo."

"Awle, Sir. Motion sensor chu ka han buaipui nghal ang, camera vel chu motor ami kan hmang mai dawn nia."

"24/7 monitored a ni tur a ni, no slip-ups."

Ravi-a chuan motion sensor chu a han dah nghal a, angle tinah chuan a set tha nghal thlap a. Alex-a chuan a bul velah chuan hidden camera a dah nual bawk. "Sensor chu ka zo fel e, mi an kal hnai anih chuan min rawn alert vat mai ang." Ravi-a chuan a han ti a. Alex-a chuan a lu lo bu nghatin, "A tha lutuk e, camera pawh ka set tawh a. Zan lamah kan kal leh anga, security te nen kan ri deuh thlap dawn ania. REcord zawng zawng leh transmit data hi kan secure network ah a rawn lut vek thei dawn a, he thil hi kan la chhuak thei em em ang." a lo ti ve bawk a.

An kal hma chuan chumi secluded area bikah chuan an advance technology hmang chuan invisible barrier pawh awlsam takin an hung kual bawk a, darkar khat vel lai chu hun an hmang dun a. An zawh hnu chuan an bungruate chu an khung khawm a, tichuan box chu an kalsan ta a ni.

***********************************************

DArkar 12 zet thlawhna a an chuan hnu chuan Kenji leh a naute pahnih chuan Mumbai chu an rawn thleng ve ta, Airport ah chuan an awm a. Japanese tourist anga lang tur chuan an incheina pawh an thlak vek a, mipui zi nuai nuai karah chuan an kal ve zel a. Kenji chuan a naute pahnih chu a en a, "Kan fimkhur angai ania, tourist visa kan hmang tih kha hre reng ula." tiin fimkhur tur chuan a han chah nawn leh a.

Arjun-a kha Takashi chuan a chanchin lo chhui zelin Mumbai a cheng a nih thu leh a hmingpum pawh Arjun Malhotra a ni tihte thleng chuan a lo chhuichhuak vek tawh hi a lo ni. A thlalak hial te pawh a lo nei tawh a, tin, Takashi hi mi hausa leh technology lama sang tak a ni ve tho a ni.

Kenji-a nau pakhat zawk chuan, "Eng nge kan plan hmasa ber chu ni dawn ta?" tiin a han zawt a. "Hotel pakhat ah room ka book sa thlap tawh a, thleng phawt ila, chuta tang chuan hma kan la dawn nia." tiin Kenji chuan a chhang a. Samurai leh thildang chu pai vek mahse Takashi-a advance technology an hman avang chuan custom & baggage checking pawh an pal tlang thei vek a.

Airport chhung chu an chhuahsan a, India ram tih takah vai an lo tam kher mai. A bengchheng em em bawk a, khawpui lah chu a zau em em khawp a. Kenji chuan chaing fek fawk hian, "Foreigner kan ni a, mipui pawh hian min en bik dawn. Chuvang chuan rinhlelhawm deuhvin awm lo ila, hotel lam chu i pan phawt ang u." tiin a naute chu a han hrilh leh a.

A nau pakhat zawk chuan, "Taxi ka ko fel tawh a, pawn lamah sawn min nghak mek ang." a lo ti vat a. Tichuan taxi chhungah chuan an lut a, an tlan ta a. An tlan pah chuan Mumbai khawpui lian tak mai leh zau em em mai, mipui zi nuai nuai mai chu Kenji leh a naute pahnih chuan hmuhnawm an ti angreng kher mai.

Pakhat zawk chuan, "Engtin nge hetiang khawpui lian lutuk ah Aiko chu kan hmuh theih ang, foreigner dang tamtak an awm teuh bawk si nen?" a han ti nuah nuah a. Kenji chu a khi suk a, "Chu tak chu kan tan a challenging dawn em asin, tihdan ka hria alawm. Sensei Takashi hi budhhist a ni a, chutiang chiah chuan a fanu leh keini thlengin, budhhist kan ni. Sakhaw hrang hrang an awm a, Mumbai ah hian... chumi zingah chuan Budhhist an tel ve nual bawk." a lo ti a.

A nau pakhat leh zawk chuan, "Anih chuan engtin zel?" tiin a lo zawt ve leh a. Kenji chu a han thaw deuh hak a, "Budhhist temple tam tak a awm dawn a, chu chu kan focus tur chu a ni. Local Budhhist community ho te pawh kan be pawp mai anga, Aiko hi tawngtai turin temple ah a kal thin ngei dawn a. Japanese nula chutia an hmuh daih chuan an lo focus bik dawn chiang a, chumi atang chuan kan tan Aiko-i hmuh chu a awlsam khawp ang." tiin a chhang leh a.

***********************************************

Hotel chu an thleng a, receptionist chuan nui sang hian a lo chhawn a. "Good Evening, pui theihna che u ka nei em?" polite tak hian a lo ti nghal a. Kenji chuan a aw a han thian kharh kharh a, "Aaa.. ihh, Nakamura tiin room ka book tawh a, keimah hi ka nia." tiin a chhang a. Receptionist chuan register chu a en a, "E awle, ka hmu e. Kenji Nakamura, tourist maw in nih?" tiin a lo zawt leh a.

Nui suk chung hian, "Aw ni e, local information tlem azawng te pawh hriat kan duh bawk a." tiin Kenji chuan a chhang leh a. "A nih tak chu, assistance emaw localk information in mamawh anih chuan tunah pawh hian in duh chuan min zawt thei reng ania." tiin receptionist chuan a lo chhang let ve leh a.

Kenji-a nau pakhat zawk chuan, "Japanese hmeichhe pakhat kan zawng a, a hming chu Aiko Tanaka a nia. Hemi area vel ah hian a awm niin ka hria a, i hre ngai mial em?" tiin a rawn zawt ve a. Receptionist chu a han inngaihtuah vang vang a, "Aiko Tanaka, ka hre ngai miah lo. Mahse helai atanga hla vak lovah hian Budhhist temple a awm a, chutah chuan asian mi tam tak an kal thin a. A tel ve thin maithei, ka lo zawh sak thei che u ania." tiin a lo chhang leh a.

Kenji chu a lawm kher mai, "A lawmawm dawn hle mai, ka pi. Keini pawh budhhist ve tho kan nia, han inhmuhkhawm te pawh kan duh ve a. Min zawn sak theih chuan kan lawm ngawt ang, a thlawn lo bawk ang." a han ti vel deuh luam a. Tichuan staff pakhat a lo kal a, an room turah chuan a hruai chho ta a.

*******************************************

TO BE CONTINUE