SAMURAI ROSE (A JAPANESE-INDIAN FICTION SCI-FI THRILLER STORY) Written by : Aaron Malsawmdawngzuala Chapter - 2

 SAMURAI ROSE

(A JAPANESE-INDIAN FICTION SCI-FI THRILLER STORY)

Written by : Aaron Malsawmdawngzuala

Chapter - 2

***************************************************

Zan a ni a, Dharavi slum area piah, van atanga box lo tlakna ah chuan Agent Alex leh a assistant leh driver ni bawk, Ravi-a chu lei khuar laiah chuan an lo ding leh ran tawh a. Zan a rei deuh tawh avang chuan slum area-a cheng, vai tam tak te pawh chu an reh deuh thiap tawh mai.

Technician thenkhat leh scientist thenkhat te chuan box chu an lo exam vel mek a, an khawl changkang tak tak te chu a inchhawp deuh rup bawk a. Box chu lak chhuah ngei an tum a ni, zan boruak chu a thiang nuam angreng hle a. Alex-a chuan box en reng pah chuan, "Van atanga mei alh hlawm anga a rawn tla tawp mai chu a mak hle mai, slum area a chengte sawn an hre miah lo tihna ania." a han ti nuah nuah a.

Ravi-a pawh chuan a lu lo bu nghauh nghauhvin, "Nia, tiang thil ang phei hi chu a en duh ber ber, a hawk dak ber ber an nih hmel sia. Mahse a tlakna hmun en hi chuan main slum atang chuan a hla ve deuh bawk em a, an hre pha lo pawh a awm ve tho." a lo ti ve bawk a. Alex-a chu a han thaw deuh hak a, "Nia, a lawmawm lam zawkah ngai ang. Area hnaih lamah tla vaih se chu hmu lo tur pui puiin an hmu ang nga, hetia fal nalh a kan buaipui thei hi a tha zawk." a han ti leh a.

Ravi-a chuan box chu a han enchiang leh deuh va, "Chhun lamah khan laih chhuah ngial kan tum pawh khan a nghet em em mai si a, a chanve hmawk hi lei chhungah a la awm tihna ania. A tla na ve hle dawn tihna chu ania, thil dangdai tak chu a ni. Han en lahin box a nid aih bawk sia, ancient lam thil hlui chu ang bawk sia, a design lah hi a mak em em bawk mai sia." a han ti nuah nuah a. 

Alex-a chuan a lu a lo bu ve nghat a, "Design satliah a ni lo, a zia rang te hi a advance lutuk. Mahse a hmanlai em em mai bawk si a, artifact satliah chu a ni lo tawp mai. He box chhunga thil awm hi enga pawh chu nise, mihringte'n kan la hmuh ngai loh emaw kan hriatthiam hauh loh tur thil a nih ngei ka ring.

Operator pahnih an lo kal a, scanning equipment changkang tak tak chu an rawn keng tel bawk. Technician pakhat chuan a scan pah chuan, "Sir, scanner hian thuziak niawm tak, hawrawp mak tak mai a scan hmasa ber. A material hi inpawlh nasa tak a ni, mahse eng atanga siam nge pakhat mah a hriat theih chuang lo." a rawn ti a.

Scientist Operative lo awm ve chuan, "Pattern hi a hnawk nuai bawk, a kual kawi nasa lutuk. Khawl la hriat ngai loh leh advance tak mai atanga siam a ni ngei ang, energy system eng emaw chu a tel ngei bawk ka ring. A chhunga awm scan turin bawm hi a kawm a chhah mai bakah, scanner hian a man pha lo hrim hrim." a lo ti ve bawk a.

Alex-a chu a han ngawi vang vang a, "Kan rindan chu a dik dawn a ang hle mai, eng thil pawh chu lo nise a chhunga awm hi mihring ten a kan la hmelhriat loh a nih ngei ka ring. Analysis turin kan facility lamah phurh phei ngei chu a ngai ang, hetiang thil van atanga lo tla a nih phei chuan khawvel pawn lam thil te pawh a lo ni thei tlat." a han ti a.

Ravi-a chuan a awih thei chiah lo, a han hawi kual deuh zawk zawk a. Alex-a chu va pan hnai deuhvin, "Mahse hei hi thuruk tawp khawk tur a ni, a chhan chu heta kan awm reng chuan min man chhuak tu an awm vat ang. Mipui chu lo dahtha ta ila, Indian sawrkar hian min man chhuak ang tih ka hlau ber." a han ti zawi deuh sap a.

"Ka hria alawm, Indian authority beng a thleng tur a ni lo. He kan operation hi thuruk tawp, confidential tak a ni tur a ni. Global politics leh technology ah chuan India ram hi major player a ni a, sawrkar hian min man chhuak a nih chuan indona a thleng a ni mai." tiin Alex-a chuan a lo chhang a.

Ravi-a chu a khi suk a, "Keini Vortex Legion te hi chu thim zingah hlir alawm operation kan neih thin, min man chhuak a nih chuan min shut down sak ngei ngei dawn." a lo ti ve leh a. Alex-a chuan a meizial chu phawrhin a han tan a, "India ram ka thlan kher nachhan hi i hria a ni law ni, Ravi? Khawvel ram hausa ber ber te zinga mi a ni a, social leh political landscape mumal loh lutuk vangin keini tan hetiang operation a ruka tihna hmun hi remchang a tam bik em alawm. Kan inpuang chhuak a nih hma chu min man lovang, sawrkar hi ama buai buai hian a buai tawh lutuk, mi retheite pawh an ngaihsak loh laiin engtin nge keini awmna thukru lutuk hi min rawn zawn peih teh lul ang ni.." tiin a han pak khu hluah hluah a.

Chutih lai chuan Tech specialist pakhat chu a rawn kal leh a, "Sir, lak chhuah hun chhung a rei deuh maithei a. Lei hi laih khuar vak a, chet rum rum chuan thawm kan siam nasa dawn lutuk. Chuvang chuan kan mi leh sa nilo chu helai ah hian rawn kal hnai lo hrim hrim se a tha ang." a rawn ti a.

"A tha alawm, kan khawl thar pawh kha hmang mah ula a pawi tawh lovang." tiin Alex-a chuan a lo chhang a. "Kan state of art equipment hmang khan a tlangpui hi chu kan analyze tawh a, a tobul pawh kan hriat vat beisei phawt ang." Operator pakhat chuan a rawn ti ve bawk a.

Alex-a chuan a kut a han beng thak a, "A tha e, hemi site hi kan lakchhuah hma chu 24/7 in duty char char ni rawh se. Zaninah kan zo hman lo a nih pawhin tlaivar hial mai tur, mi in min hmu lo se a tawk a nimai. HElai area bik hi a tul chuan duty na tur han ti darh leh zual deuh ula, tuman min hre chhuak tur a ni lo ania." a han ti lauh lauh va.

"Camera pawh ka vuah belh a, monitor hi chu tech ho bulah hian awm law law se a pawi lovang." Ravi-a chuan a lo ti ve leh a. "A tha e, anih chuan base lamah phei leh phawt ang. Buaipui tur kan la ngah si, naktuk zing lamah news dang a awm thut a nih loh chuan kan phei leh zawk dawnnia." tiin Alex-a chuan a lo chhang a, an pahnih chuan an kal ta a.

******************************************************

Aiko-i chu Arjun-a apartment-a balcony ah chuan seiza posture chuan a lo thu leh vang tawh a, a maimitchhing vang vang a. Arjun-a chu thingpui no hnih nen a rawn chhuak ve a, Aiko-a thutna bul dawhkan tereuhte ah chuan thingpui chu a dah a. Aiko-i pawh a lo meng a, Arjun-a chu a lo nuih sen sen a.

Arjun-a chuan thingpui chu a han lem sak a, "I va bei tlai ve, tlai chaw eikham chuan i muhil nghal bawrh bawrh zel kha a ni sia?" tiin a han fiam zeuh va. Aiko-i chuan thawk a han la deuh hak phawt a, "Ka muhil thei thlawt lo, keimah hi ka kim lo riauvin ka hria." a lo ti nuah nuah mai.

Arjun-a chu ava thu hnai a, "Eng thil nge i ngaihtuah a?" tiin a han zawt a. Aiko-i chu za lo tak chuan a nui sak a, "Ka... ka chhungte ka ngai a ni, Arjun. Ka thiante, ka zirlai puite kha ka ngai a ni. A bik takin Kenji kha, ka pianpui unaupa ang maiin min ngaihtuah em em a. Tette atanga inkawm kan ni bawk si nen, ka kim lo ang hian ka inhre tlat." a lo ti zawi leh sap a.

Arjun-a chu a han ngawi vang vang a, "A nih leh i pa i ngai ve em?" a rawn ti deuh thut mai. Aiko-i chu a ner sak a, "Aih, ngai lo. Ka nu in min thihsan hma si a, ka pa lahin ka lakah hmangaihna a lan tir ngai ve der mai si lo. Hmangaihna ka dawng ngai lo, ka tawn hma che kha chuan." tiin a chhang a.

Arjun-a chuan a kutah a vuan a, "Ka venghim dawn che alawm, Aiko. Chuan inneih chungchang pawh kha, Budhhist i nia, kei Hindu ka nia. Chuvang ania ka nu leh pate khan an hnial tlat ni, foreigner i lo ni bawk nen." a han ti muang ban deuh charh a. Aiko-i chuan nghet taka lo vuan letin, "Arjun, budhhist ka ni tih ka hria. Mahse sakhuana hian kan inhmangaihna hi a pawt then tur a ni lo, i nu leh pate duh dan a nih phawt chuan Hindu tradition-in kan innei mai ang, a pawi ka ti lo, sakhuana hi eng atan mah ka ngai lo." a lo ti vat a.

Arjun-a chu lawm hmel tak hian a khi suk a, "A nih chuan Hindu tradition pawi i tih loh chuan, kan innei em em ang." tiin a chhang a. Aiko-i chu a nui sen sen a, "Ka lawm e, Arjun. 

Ka tawng lovang che tih ka hlau ngawih ngawih, tianga min hmangaih theitu tur hi alawm hman atanga ka lo ngah tawh." tiin a kuah vawng vawng a.

Arjun-a pawh chuan lo kuah letin, "Ka nu leh pate chu ka lo be dawn ania, kan inneih an phal ngei ka beisei." tiin a han nuih sak a. Aiko-i chu a ham deuh bai bai a, "I bulah hi chuan ka him ngawih ngawih, chhan ngai ziah mah la." tiin a han fiam deuh kher a. Arjun-a chu a han tum deuh hmuk a, "Nang angin samurai kan ni ve lova, chubakah tharum thawhna hi ka haw hrim hrim alawm...ka naupan lai.." a ngawi deuh thut a.

Aiko-i chu a lo muhil der tawh a, a lo hnar suk suk mai. Arjun-a pawh chu a khi suk ringawt, "Muttui le, Duhtak." tiin a hmuiah chuan a fawp zeuh va. A pawm nawlh a, tichuan inchhung lamah chuan a luhpui ta a. Arjun Malhotra hi Mechanical Engineering zirlai a ni a, Tokyo University-ah Aiko-i nen hian inhmelhriat in chuta tang chuan an inngaizawng chho ta a ni.

*********************************************

Aiko-i chu a meng kawk a, a awmna hmun chu mak a ti hle mai. a han hawi kual a, huan zau tak mai ah hian a lo aw m a. A bul velah chuan pangpar a tam hle mai, kimino dress-a inthuamin a sam pawh a lo sei hniang mai a. Boruak chu a vawt ruih a, khua a thim khuih bawk.

Mak a ti em em a, a hlauthawng bawk si chu a thin a phu dup dup mai. Chutah a hnungah chuan pen thawm a hria a, rang takin a hawi let vat a. A thil hmuh chuan a ti hrilhhai takzet, a naupan lai, kum 10 lek a nih lai ngei mai, amah tho chu a lo ding a. A hmel chu a hlim loh hmel em em a, Aiko-i chuan mak a ti takzet.

Khur dar dar hian Aiko naupang zawk chuan, "Hetah hian i awm tur a ni lo, a dik em?" tiin a zawt ta mai a. Aiko-i chuan a hrethiam lo kher mai, "Eng nge awmzia? Khawiah nge ka awmna tur chu?" tiin a zawt hu mai a. Aiko naupang zawk chuan a pan hnai a, "A tlai hma hian, let leh vat rawh." tiin a chhang leh a.

Aiko-i mak ti lutuk chu han chhanlet dan tur pawh a hre tawh lo, a thlan a tla zawih zawih a. Muang chang chuan a va pan hnai a, Aiko naupang zawk chu va khawih a tum a. Chu veleh a ral rial rial a, mei vapah a chang ta daih mai. Aiko-i chu a tawlh hnung dawr a, "Eng thil nge, eng nge awmzia?" a ti chul mai a.

A hawi kual a, chu huan zau tak maiah chuan amah chauh chuan a awm si. Boruak chua  reh ruih mai a, chutah a hnunglam atang chuan thawm a hre leh ta. A hawi let leh vat a, Arjun-a a lo ding reng mai. A hmel chu a dur deuh khuih a, a lawm vak hmel loh hle bawk. Aiko-i chuan a va pan a, "Arjun, naupang kha i lo hmu ve em?" tiin a zawt a.

Mahse Arjun-a chuan a chhang lo, a kut chu a rawn lek kang a. Chutah chemte a lo hum reng mai, Aiko-i chu a ding chat a. Mak tih hmel tak hian, "Ar... Arjun, eng thil nge tih i tum a?" a ti bah nuai mai a. Arjun-a chuan rum tak hian a melh a, mahse a chhang miah lo. Arjun-a chuan muang chang chuan a pan a, Aiko-i chu a tawlh hnung ve hret hret bawk.

A rawn pan hnai telh telh a, "Arjun, eng thil nge maw i tih le? Duhtawk rawh, Aiko ka nih hi?" tiin a au vak vak a, a hlau takzet. Chutah Arjun-a chu a tlan thut a, Aiko-i pawh inher vatin a tlanchhe ve nghal a. An inum ta chiam chiam mai le, chutah mak tak mai hian lei atang chuan thing zung ni awm tak, hrawl tak tak mai hi a rawn chhuak tuam tuam a.

Kut ang mai hian Aiko-i chu an rawn ban zuai zuai ta mai, Aiko-i tlan lai pawh chu a buai phah teuh hle a. Hnunglam ava hawi zeuh zeuh va, Arjun-a lah chu a rawn hnai tulh tulh mai si. Chak taka tlan a tum pawhin a thei tlat lo, a che chu a muang em em mai a. Tap pur hian, "Arjun, eng thil nge i tih hi?" tiin a au chiam chiam tawh mai a.

Tanpuina ngen in au a han tum a, mahse a au thei tlat lo mai. Chhum chu a rawn chhah telh telh a, huan zau tak mai pawh chu a thim mup thei hial tawh a. Chutah a tlan mek lai chuan lei chu a rawn khi tuar tuar a, a rawn inthen hrang phawk mai. Aiko-i chu a inveng hman ta lo, lei khi kar zau tak mai, thim em em mai ah chuan a tla thla ta vawng vawng mai a.

A tlak pah chuan chunglam chu a han hawi chho va, Arjun-a chuan a lo la en reng a. Aiko-i chu a tla thuk zel a, a thaw a rawn chham ta hial a. A thil hmuh pawh a fiah lo tial tial a, a tlakna lah chu a thim thla tulh tulh bawk. A bengah chuan a naupan laia mi ngei ina, "A tlai hma hian let leh vat rawh." tia a hrilh lai chu a ri nawn sek bawk a.

******************************************

Aiko-i chu a harh a, a mumang vek chu lo niin. A meng diar diar a, a awmna chu an room niin a hre ta tlat lo. Light chu a eng var pup a, damdawiin ni mai hian a hria. Mahse a lu a na em em a, a che ngam rih lo. Tu emawni chuan a bul hnaiah eng emaw tak chu a ti a ni tih hriat tak hian thawm a ri reng bawk a, mahse Aiko chu a lu a hai lutuk tlat.

A han meng ta kawk a, a mit nuai tuma a kut han tih chet a tum chu a thei ta hauh lo. A kut chu a en a, thir atanga siam khumah lo mu in a kut chu hancuff, khum nena inthlun zawm ah hlin tlat a lo ni a. Chutiang bawkin a ke pahnih pawh, mak a ti kher mai. A mumang bawk a nih a ring hial a, mahse a harh chiang telh telh a.

A awmna chu a en kual a, high tech laboratory changkang tak chhungah a lo awm reng chu niin. A bul velah chuan monitor leh machine hrang hrang tam tak a lo awm thuah mai a. a khum bul lawkah chuan equipment advance tak tak mai chu a inhung fur bawk. A inthing har vat a, a han thu chhuak deuh va.

A hma zawnah chuan nurse pakhat hian bur pakhat a thil tuihnang dum tak mai chu syringe lian tak mai hian a lo hip mek a, Aiko-i chuan ava hmu ta. Ring tak hian, "Tunge i nih? Eng thil nge ka chungah i tih?" tiin a vin ta hrep mai a. Chunu chu a rawn hawi a, nurse ni awm tak a ni.

Indian mi ve tho a nih hmel a, lab coat a ha bawk. Aiko-i harh a hmu chu a haluthawng em em a, a khur titih nghal der mai. A va pan hnai a, "thiannu, thiannu..khawngaihin, tihnat che ka tum lo." tiin han beng daih a tum a. Mahse Aiko-i chu a tal ta vak vak mai, "Min chhuah rawh, tu phiangsen nge i nih a?" tiin a vin vak vak a.

Nurse mangang chuan ring tak hian, "Doctor, doctor lo kal vat teh." tiin a t(r)e ta chiam chiam ringawt mai. Chutah lab kawngka pui atang chuan mi pakhat, lab coat ha ve tho hi a rawn kal a. Aiko-i'n a han hmu chiah chu a tal vak vak pawh chu a tawp nghal chat a, a en ta hu mai.

Chupa chu Arjun-a a lo ni reng mai, Aiko-i bulah chuan ava kal hnai a. Aiko-i chuan hrethiam lo tak hian, "Arjun, eng nge awmzia? Helai hi khawilai hmun nge? Eng thil nge thleng ta hi?" tiin a zawt nghal chiam a. Arjun-a chuan khawngaih hmel tak leh inthiam lo hmel tak hian a en ngawih ngawih a, mahse a chhang hauh lo.

Aiko-i chu a bo takzet, "Eng thil nge ka chungah hian tih i tum a? Hei hi eng ang faimthu nge?" tiin a zawt leh a. Arjun-a chu a kun vang vang a, mahse a rawn hawi chhuak leh erawh a hmel chu a dang ta tlat mai. A nui ta var var mai a, "Aiko, tunge ka nih hi ila hre kim lo. Japan ah khan Mechanical Engineer chauh ka zir hleinen, Robotic Engineer pawh ka zir tel asin." tih ringawt chuan a chhang a.

Aiko-i chuan ala hrethiam lo, "Eng nge i sawi tum chu? Tinge khumah hian min phuar beh nachhan?" tiin a lo zawt leh hu mai. Arjun-a chu a han khi suk a, "Ka hrilh hma che in, hei hi ka hrilh hmasa lawk ang che. I thingpui in turah khan mutduhna ka telh a, chuvang a nih kha i mut nghal bawrh bawrh ni." a han ti te te phawt a.

Aiko-i chu a meng kawk mai, "Eng a? Nang hian damdawi hmangin min hrai tihna maw?" a ti khur dar dar mai. Chiang takin Arjun-a chuan Aiko-i chu a en a, "Aiko, ka first experiment tur i ni dawn. Human AI Hybrid, khawvela a hmasa ber turin. Serum pakhatin ka chiu dawn che a, he serum hi a hming chu Kurogane Elixir a ni. Sap tawng chuan Black Steel tihna a ni a, Tokyo University a scientist te siamchhuah a ni." a ti ta mai a.

Aiko-i chu a meng bial leh ta kawk kawk mai, "Kurogane Elixir a? Chu chu eng nge?" tiin a zawt leh hu mai a. Arjun-a chu a ngawi vang vang a, "He serum hian i ruh zawng zawng te kha black steel ah a chantir dawn a, Elixir khan i taksa a fan chhuak ang nga, a na in a hrehawm khawp ang. Burning sensation hial a thlen ang nga, mahse i damchhuak ang." tiin a chhang leh a.

Aiko-i chuan chutia Arjun-a'n a phatsan ta mai chu na a ti em em a, a mittui a tla zawih zawih mai. Rum tak hian a en a, "Engvang nge? Arjun, ka hmangaih che tih i rhia a ni lawm ni? Ka chhungte zawng zawng ka kalsan a, engtin nge hetiang hian ka chungah i tih theih?" a ti khur dar dar mai.

Arjun-a chu a han thaw deuh hluai a, "Ka tihpalh, duhtak. Mahse nangmah lam chauh inngaihtuah lo la, ka career a tana ti zawk ka nih hi. Nang kher ka thlan nachhan pawh japanesde nula chak tak leh samurai tha tak i ni a. I taksa hi ka mamawh bik alawm, ka hman tangkai theih nan che tiin ka inhmangaih tir che a. KEichuan ka hmangaih ve hleinem che, Aiko. Mahse min ring rawh, mi chak tak leh special takah ka chhuah dawn che alawm." a la ti ta deuh deuh va.

Aiko-i chu a thaw hlawp hlawp a, a tap hleithei lo. Rei deuh fe hnuah chuan a thaw halh halh a, "Engtin nge serum chu i neih theih?" tiin a zawt a. Arjun-a chu a khi sak a, "Kunal Roy, mafia boss. Ani nen hian deal kan siam dun a, sum tam tak min pek a tiam a. Japan-a ka awm lai a lo ni bawk nen, Tokyo university ami tho, top japanese scientist te tangrual ina an siam, Space Gun pakhat, Glowbracer chu a mamawh thu min hrilh a. Ru chhuak turin min ti a ni, tichuan ka ruk chhuah theih chuan he ka experiment tihna tur hian pawisa tam tak min pek a tiam bawk a, min pe ta reng bawk a ni." tiin a chhang a.

Aiko-i chuan a hrethiam leh ta tlat lo, "Eng a? Glowbracer a? Chu chu eng nge?" tiin a lo zawt leh a. Arjun-a chu a han vei kual thauh thauh va, "Glowbracer leh Kurogane Elixir hi thil man to lutuk ve ve a ni a, Kunal-a chuan thil dangah hman a tum pawh a ni mahna. Mahse keiin Elixir ka lo duh ve tho nen, plan kan siam ta a. Tichuan a mi leh sa te zinga mi, Japanese putar pakhat nen kan inthu rual a, amah Kunal-a erawh chu India ah a awm thung. Chu putar nen chuan kan ru chhuak a, tichuan tun dinhmun hi kan thleng ta a nih hi." tiin a lo chhang leh a.

Aiko-i chu mittui tla zawih zawih chung chuan a inpet fan fan a, "Glowbracer leh Elixir ru chhuak turin maw kei hi min lo ngaihzawn der a? Japan atangin, a dik em?" tiin a han vin khur khur a. Arjun-a chuan a lu a lo bu nghat a, "Ni e, ka thil siam chhuah hmasa ber i ni dawn. Scientist ropui ber ka ni ang nga, tu pawhin min ngaisang tawh ang." a han ti vel a.

Aiko-i chu a rilru ana takzet, "Experiment atan chauh maw min lo mamawh a? Robot anga siam min tum amaw?" tiin a han vin leh thak a. Arjun-a chu a nui huah huah a, "Ni e mawle, ka siam zawh hunah che chuan maw... khawvel mit hmuh ah ka pho chhuak che ang nga, mihring i an em avangin an mit ila ang nga, robot mihring ang ber i ni dawn, mihring i nih thu hi ka sawi lo ang nga, tichuan min awih vek mai ang." intithei tak chuan a lo ti leh a.

Chutah syringe chu ava la a, "E chuan maw, Aiko. Ka sawi ang khan, serum hi i taksa chhungah a kang nasa dawn a, ana khawp ang. Nikhaw hrelovin i awm hial ang nga, chutih lai chuan brain surgery kan ti leh nghal ang. A awmzia chu i thluakah khan chip ka thun dawn tihna a nih chu, a hming pawh Neurolink Processor tiin ka phuah nghe nghe alawm. He chip hian i memory zawng zawng a nawt reh vek ang nga, i hun kal tawh te, i hriatrengna te a la bo vek dawn. Tichuan Aiko Tanaka hi he khawvelah a awm tawh ngai dawn lo, i mihring mihrinna zawng zawng lak kian vek a ni tawh ang nga. Ka robot i ni tawh ang, Human AI hybrid hmasa ber i nih mai bakah tun atang chuan ka thu chauh i zawm tawh ang." tih pah chuan a va pan hnai zel a, Aiko-i chu a hlauhthawng takzet.

*****************************************************

Kenji chu a harh zawk mai a, mahse a awmna hmun chu hotel room a lo ni tawh hauh lo. Aiko-i mumang ang chiah khan ani pawh chu huan zau tak, thim ruih maiah chuan a lo awm ve reng a. Boruak chu a vawt ruih mai a, chhum a zing chuai chuai bawk. A hawi kual vak vak a, "Khawnge ka awm?" a ti hu mai.

Chutah a kal zel a, thingkung lian tak, buk tha tak mai hnuaia thutthleng lo awm ah chuan tu emawni thu ava hmu a. Mahse a thim em avang chuan tu nge a nih a hre thei lo, mahse naupang ni ngei chuan a hria. A va pan hnai zel a, "Tunge i nih? Helai hi khawi hmun nge?" tiin ava be tawp a.

Chutah naupang chu a rawn ding a, a eng lai a rawn thleng a. Kenji chuan mak a ti ngang mai, "Aiko?" a ti hu mai a. Chu naupang chu Aiko-i, kum 10 a nih lai bawk kha a lo ni leh a. Kenji chu a rawn pan a, "Kenji, i lo thleng ta maw? Aiko-i'n buaina a tawk, i puih a ngai." a ti ta mai a.

Kenji chuan a hrethiam lo kher mai, "Eng nge awmzia? Aiko-i chu nangmah i ni lawm ni?" a ti leh hu mai a. Aiko naupang zawk chuan a en kar a, "Kenji, Aiko-i dinhmun hlauhawmah a awm. I hruai haw ngei a ngai a ni, thlak danglam a ni thuai dawn. A tlai hma hian, zawng hmu vat ang che." tiin a lo chhang leh a.

Chutah khua a rawn dur khup mai a, chhum pawh a rawn chhah tan ta ngei mai. Huan zau tak mai chu a thim tial tial a, Kenji chuan thawm mak tak a hre leh ta tlat mai. Ramsa kawlh tak hram hum hum ri ang mai hi a hria a, mak a ti kher mai. Chutah thim zing atang chuan tu emawni hi a rawn pen chhuak a, Aiko-i pa, Takashi a lo ni reng mai.

Mahse a hmel chu a rapthlakin mihring pawh a ang lo, a dang var pup a. A mit te chu a sen rum a, ramhuai hi a ang zawk mah ang. Kenji chuan mak ti tak hian a en hu a, "Sen... Sensei, nang maw?" a ti hu mai a. Chutah Takashi chuan ring tak hian, "Kenji, hmanhmawh rawh ka ti a ni lawm ni? Aiko-i chu rawn hruai let rawh, a thil tih sual avang hian na takin ka hrem duh a ni." a ti khur khur mai a.

A aw ri te chu a khawk rum rum mai, "Eng nge thil awmzia?" tiin Kenji chu a bo takzet. Aiko-i naupan lai chu ava en leh a, Aiko-i chuan a lu a lo thing a. Hlauhthawn hmel tak hian, "A thusawi kha ngaithla suh, Kenji." a lo ti tham tiak mai. Takashi lah chuan a aia rapthlak leh ring hian, "I hun khawh ral suh, anih loh chuan nangpawh khan hremna i tawk ang." a ti khawk leh ta rum rum mai.

Kenji chuan chhan ngaihna reng a hre lo, Aiko-i naupan lai chu ava en leh ringawt a. Chutah Aiko-i chu zawih muang hian a lo ral riai riai a, a tawpah chuan meivap ah a chang leh ta daih mai. Kenji chuan a hrethiam ngang lo, chutah lei chu a rawn khi tuah tuah a. A kar atang chuan thinzung chu rul ang mai hian a rawn tleng chhuak a, Kenji chu a rawn phuar ta mai.

****************************************

Kenji chu a mumang ram atang chuan a harh zawk a, a thu chhuak hlawl mai. A lo thlan huh dup leh nghal a, a thin a phu dup dup bawk. A awm a dawm vawng vawng a, a thaw halh halh a. Zawi te te hian, "Mangchhia, mangchhia mai mai a ni." a ti sap a. Second 10 vel hnuah chuan a lungphu pawh a pangngai leh ta, mahse a mumang chu eng tak nge a awmzia hriat har a ti ngei mai.

Khum atang chuan a tho chhuak a, chutah a room kawngka chu a rawn inkik karh karh a. A va hawng a, a naute zinga pakhat a lo ni. A hming chu Hiro a ni a, "Kenji, i harh thei maw? I rum nghut nghut a, ka ngaih a tha lo deuh alawm." a rawn ti a. Kenji chuan sana a han en a, zing dar 3 a lo ni a, khua pawh a la thim vek.

Kenji chuan a mit a han tuai nauh nauh va, "Mumang tha lo deuh ka nei a, chuvang mawle." tiin a lo chhang a. Hiro chu chhuah leh mai a tum a, mahse a ding chat a. Rawn hawi let lehin, "Kenji, laklawh viau mahse khawvar huna hma kan lak dan tur sawi pui zuai che ka duh a ni." a ti deuh thut mai.

Kenji pawh chu a thaw hak a, "Eng nge, sawi la?" a lo ti a. Hiro chuan a chil a han lem dawk a, "Kan plan awm sa ang khan, mumbai khaw chhunga Budhhist temple awm zawng zawng kan tlawh chhuak vek ang nga, kan chet ran a ngai bawk ang, budhhist temple sawm chuang vel a awm an ti bawk sia." a han ti a.

Kenji pawh chuan a lu a lo bu nghauh nghauh va, "A tha e, mahse ttlai dar 4 ah chuan an khar tawh thin ania. Dar 4 hma in kan tlawh chhuah vek angai dawn ania, nikhat lek pawh hi uiawm tak a ni." tiin a lo chhang a. "Ka hrethiam alawm, khua a var veleh midang pawh ka lo hrilh fiah lawk ang e." Hiro chuan a lo ti ve leh a.

Kenji chu a han ham bai bai a, "Mu leh phawt ang, ka tha ania, ngaihtuah ka ngai lo." tiin a khi suk a. Hiro pawh chuan chhuah pah chuan, "Awle, khawvar hunah kan inhmu dawn ania." tiin a chhuahsan ta a. Kenji chu a khumah chuan a thu ngawi vung vung a, a mumang chuan a ngaih a la ti tha thei thlawt lo a ni.

*************************************************

TO BE CONTINUE