THE LAST PICNIC (MIZO FICTION HORROR STORY) Written by : Aaron Malsawmdawngzuala CHAPTER - 3

 THE LAST PICNIC

(MIZO FICTION HORROR STORY)

Written by : Aaron Malsawmdawngzuala

CHAPTER - 3

********************************************

Nunui chuan a sawi ve tan ta a, "Kum 7 vel ka nih lai khan ka pi hian min hrilh thin a, kan khua hi Lungdelh khua a nia. Kan khua a thil thlng, hman a mi tawh ania. Thanchhingi a nia a hming chu, tun thleng pawh hian kan khuaah chuan an la sawi thin." tiin bul a han tan phawt a, midang chuan an lo ngaithla uluk nghal kher mai.

Tichuan Nunui chuan a sawi chhunzawm zel a, "Kan khua ah pawh, a mawng tawp lama awm a ni a. Amah chauhva khawsa a nia, mi tidam thei a ni e an tia. Damlo tam tak te pawhin an pan a, an dampui thin. Mahse hun a lo kal zel a, upa ho chuan an hlau tan ta riau va. Dawithiam niin an ring ta hial a, a chet dan mak sawt zia te pawh an sawi an sawi thin." a tih lai chuan Thantea chuan, "Aww... khatiang pawl kha chu an lo awm hman ngei ngei." tiin a lo khi suk a.

Nunui chuan a sawi zel a, "A ni mahna, mahse thil mak tak tak a thleng tan ta reng alawm. An vulh lai te an bo an bo va, an thlai chin te chu chhan awm lovin a rawn chhe vek zel ringawt bawk a. Thanchhingi thil tih vek a nih chu an ring ta hlawm a, a chhan chu dawithiam anga an sawi chu a duh loh avangin khaw mipui te chu anchhia a lawh a ni tiin an sawi ta sup sup mai a." tiin a han chawl deuh dat a.

Chhana chu rawn tawng chhuakin, "Anih leh an be hrim hrim em amah chu, zawhna te an zawt lo em ni?" a lo ti thawt thawt a. Nunui chuan a lu a lo bu nghat a, "Aw, zankhat chu patling rualin a inah chuan kal chilh an tum a. Khawchhung atanga hnawhchhuah an tum a ni ber, meichher nen a in lam pan chuan an kal ta a."

"Mahse Thanchhingi chuan anni chu a lo hmuh chuan engah vak a lo ngai lo, hlau hmel pawh a pu eih lo." Zodini chuan khur dar dar hian, "Thlahrang film vel a ang tawp." a lo ti zawi sap a. Nunui chu a khi suk a, "Nia, a dik alawm. MAhse hei chu ka pi khan a tak tak a ni a ti ve tlat, khami hunlai khan naupang mai chauh an la nia."

"Patling ho chuan a thil tih lai ti tawp tur leh khua atanga chhuak tur chuan an hrilh a, a vin pawh an vin hrep a ni awm e. Mahse Thanchhingi chuan ngawi reng hian chung patling ho chu a mal te te hian a melh den den a, a nuih vel a nih chu. Khua atanga an hnawtchhuak a nih vaih chuan an inchhir tur thu in a lo chhang let a, 'He khua hi anchhia ka lawh lo, ka veng him zawk a ni.' tiin a chhang a."

"Mahse an awih sak duh hauh lo, tichuan Thanchhingi chu a in atang chuan an tham chhuak a. Khua atanga hla takah, ramhnuai pilril tak maiah chuan an hruai a. Chutah chuan an dah tawp a, an kalsan leh ta daih a ni." a tih lai chuan Rinmawia chuan, "Anih khaw mipuite chu an hlim phah em?" tiin a lo zawt a.

Nunui chuan a lu thingin, "Aih, a teuh lo mai. A tuk atang chuan khaw mipui thenkhatte chu chhan awm miah lo leh nat lawkna awm miah lovin an damlo ta sup sup a. A then an khua te a sik a, a thenin hri mak tak tak an vei bawk a. An ran vulhte lahin chaw an ei tha duh lova, reilote hnuah phei chuan mihring te chu an thi ta pheuh pheuh bawk a ni." tiin a chhang a.

Ruatfela chu a han thu rem deuhva, "Anih an ko let leh em?" tiin a lo zawt ve leh a. "Tum chu an tum, ramhnuaia an kalsanna hmunah khan an va let leh a. MAhse amah Thanchhingi erawh chu hmuh tur a lo awm tawh hauh lo, a puan bah thin chu leiah chuan a lo awm a, chuzawng chu a nimai an hmuh." tiin Nunui chuan a chhang ve leh a.

Famkima ber pawh chuan ngaihnawm a tih hmel kher mai, "A nih enge a hnuah thleng zel?" tiin a lo zawt ve a. Nunui chu a han ngawi vang vang phawt a, "Khua a damdawi lam thiam awm chhun chuan tihian a sawi a, 'Pi Thanchhingi khan min hrilh lawk a, mahse keini mipuite hian kan ngaih thah a ni. Min venhim a tum a, mahse keini chuan amah chu kan um bo ta si.' tiin. Tichuan hun a kal zel a, kum khat a liam meuh chuan khaw mipui zatve lai chu an thi tawh a. An mangang chuan khua chu an chhuahsan ta vek a, kum 20 chuang a ral hnuah tihian khaw pangngai anga din a nih leh chauh an tia lawm. An sawi dan chuan Thanchhingi in awmna lam venga kal chuan zanlaiah dawi a chham ri bul bul thawm a la hriat theih e te an tia, mahse chutiang erawh engmah ka hre ve ngai lo kan khuaa ka awm lai pawn." tiin a chhang a.

An reh deuh thap a, "A va den ve." Chhana chuan a rawn ti chhuak hlawl mai. Chhana bawk chuan, "I awih hrim hrim em?" tiin a han zawt leh a. Nunui chu a nui suk a, "KA hrethiam lo, ka pi kha chuan a tak tak a ni a ti bawk sia. Ka pi hian dawt a sawi ka ring bawk si lova, a tak tak te pawh chu a lo ni mahna." tiin a chhang a.

Famkima chuan a lu chu a han bu leh nghauh nghauh va, "Tiang thawnthu hi chu a tak tak hi a ni thin fo ania, hmanlai kha chuan thil mak tak tak hi a thleng ve fo thin lawm Mizoramah hian...han ngaihtuah deuh va thil ni theia ngaih si loh, mahse ngaihtuah chian deuhva thil ni thei ni si hi a tam ania." zaidam tak chuan a han ti ban deuh charh charh a.

Puipuii chu a han zi mar talh talh a, "Anih chutiang lam deuh chu tun hunah hian a thleng theiin in ring em?" tiin a han hawi kual a. Rinmawia chuan bung deuh hian, "Thleng pawh nise, ka chhuichhuak peih lo ea." a lo ti deuh hmuk mai. Tichuan boruak chu a reh leh ta diak a, "Tunge a dawttu, tunge sawi ve leh ang?" tiin Famkima chuan a han zawt leh ta hlawm a.

*******************************************

Zodini chu an han en leh thap a, "Zodin, tlem tal chu sawi ve la..mawh?" tiin Nunui chuan a han nghawk zeuh va. MAhse Zodini chuan a lo duh lo nasa mai, "Ka duh lo ka tih tawh kha, chubakah engmah sawi tur ka hre ve hleinem." tiin a lo chhang hmak mai. Chhana chu a lo chek hlur a, "Amak e aw, kan sawi vek dawn. A bang bik an awm tur a ni lo, i sawi ve ngei ngei a ngai." a rawn ti ve bawk a.

Thantea pawh chuan nui chung hian, "I duh leh phuahchawp mai la, hlauhawm em em pawh a ngai hran lo. Eng emaw tal chu i hria ang, i sawi ve loh ten a fair awm lo emai." a lo ti ve bawk. Mahse Zodini chuan a lu a thing a, "Aih, sawi tur ka hre ve lo. In sawi ho pawh kha a hlauhawm tawk viau tawh, kha kha ka duhtawk e." tiin a kuankuah ta hmak mai.

Rinmawia chuan Famkima chu a en a, "Pu Famkim, nangin sawi ve tawh la? I upa ber bawk a, hlauhawm deuh i hria ang chu?" tiin a han sawm a. Famkima chu a han nui deuh huah huah a, "Ka sawi dawn alawm, mahse tunah ni lo. Keichu a tawp berah ka lo sawi ang, han sawi kim vek phawt teh u." tiin a lo chhang daih mai.

Chutah a la sawi ve lo ho, Puipuii, Thantea leh Rinmawia te chu an en leh ta thap mai, "Keiman ka'n sawi ve tawh ange.." tiin Rinmawia chu a han thu tha sauh sauh va. Mahse Ruatfela chuan lo pawt chatin, "Ngawi lawk teh u, thil ka ngaihtuah chhuak thut mai." a rawn ti a.

Rinmawia chuan rum fe hian a melh a, "Amak e aw, sawi ve dawn lai lai a...i sawi tawh kha nangchu.." a lo ti deuh hlur a. Ruatfela chuan thutak hmel zet hian, "Vawiin kan kal lama kan hmuh pa kha, dawr nghaktu mak deuh kha...ka rilru ah a rawn lang thut mai." a han ti leh nuah nuah a.

Thantea pawh chu a rawn thu tha ve sauh sauh va, "Ni tak, khapa kha... a tawng dan te kha a mak ka ti, amah kha a nelawm loh fahran.." a rawn ti ve nghal bawk a. "Dik chiah, a thil sawi zawng zawng te nen khan, a awmzia ka hre lo em em lehnghal a thil sawi kha.." Puipuii chuan a rawn ti ve bawk.

Chhana chuan ho tih hmel tak hian, "A ho emai, engemaw in rawn sawi chhuah kher le? Min tih hlauh a tum vel mai mai a nih kha, kan hmel a en a, kan la naupang sia, mi tih thaih hi an hrat ve hrim hrim tiang ho kha chuan.." a lo ti bul bul a. Zodini chu thutak zet hian a rawn hawi chhuak a, "Kan hriat ve loh hriat chu a nei a ni, kha pa khan...a mitmeng zawng zawngte nen khan engemaw chu a hria a ni." a rawn ti ve leh a.

An ngawi ta thiap mai, Famkima pawh chuan hriatthiam loh hmel tak hian Zodini chu a en vung vung a. Chutah Chhana chuan, "Pu Famkim, nang i hria em? Helai hmun atanga dawr awmchhun kha...i hria ang tiraw? Khata dawr nghaktu kha ania kan sawi, nang ai chuan a upa deuh maithei...khabe hmul buk deuh mai?" tiin a han zawt a.

Famkima chu a han ngawi vang vang a, "Ka ve hre lo ve, dawr kha chu ka hria a... mahse ka kal ngai lo. In sawi dan hmang chuan a rui vel mai mai a ni ngei ang, ngatan mah ngai suh u." a lo ti sam et mai. Boruak chu a han reh leh deuh thiap a, "Le...ka han sawi ve tawh ange." Rinmawia chuan a rawn ti leh a.

********************************************

An vai chuan Rinmawia chu an en thap mai, a aw a han thian kharh khar a. Meilum hnaih deuhvah chuan a tawlh phei a, "Hei hi chu, Aizawl ngei a thil thleng a nia. Hman kum ami, ka u te thianho an riah khawmnaa an sawi ka hriat ania. Lalhmingthanga hi a awm a, mite hmuh ah chuan mi pangngai ve tak a ni. Kum 30 mi vel niin sawrkar hna thawk a ni a, apartment luahin amahin a khawsa a, thiante pawh a nei ve nual." tiin a han chawl deuh dat a.

Thawk a han la hrawk a, "Mahse ze mak tak a nei thung a, chu chu thil hlui hi a atchilh bur a ni. Entirnan, eng eng emaw thil hlui tak tak, ho deuh deuh te hi a la khawm teuh zel a. Thlalak hlui, tute thlalak nge pawh tih hriat loh te chu a zawng khawm a, a thente phei chu a leiin a lei hial thin." tiin a sawi chhunzawm zel a.

"An sawi dan chuan heng thil hlui te hian a mal te te in thawnthu an nei vek a, chu chuan amahah inzawmna thuk tak neiin a inhria e an tia. Ni khat chu dawr pakhatah a kal a, mizo bungraw thil hlui zawrh khawmna ni awm tak a ni. Thing atanga siam bawm pakhat hi a hmu a, a mit a lak em avang chuan a han khawih chhin a."

"Dawr nghaktu, pitar chuan a lo en reng a. Hmingthanga chuan bawm chu a la kang a, chuveleh pitar chuan zawrh lai a nih ve loh thu chu a lo hrilh vat a. MAhse Hmingthanga chuan a duh em avang chuan pawisa tam tak offer in lei talh chu a tum a, mahse pitar chuan a phal tlat lo."

"Rei deuh fang an indawn hnuah chuan pitar pawh chuan pawisa chu a thlang ta zawk a, hralh mai chu a phal ta a. Mahse a kal hma chuan pitar chuan bawm chu engvang pawhin, engtikah mah, zan a lo thlen tawh chuan, hawng miah lo turin a hrilh a. Hmingthanga chuan engah vak a ngai lo, mahse pitar chu a thutak kher mai."

"A haw pah chuan a thiante inah te lengin a thil lei thar te chu a hmuh hlawm a, a thiante lah chuan chutiagn thil hlui atchilh em em tawh lo turin an lo hrilh hlawm thung. Tichuan a haw a, zan a lo thleng ta. Bawm chu hun mawi atan tiin bang kilah chuan a dah mai a, mahse pitar thusawi chu a bengah chuan a rawn ri nawn leh thin."

"Kha pitar khan hawng lo tura a tih avang chuan hawn a chak ta tlat mai a, eng tak nge lo thleng dawn tih chu hriat a chak takzet a ni. Zanlai dar 12 a pel a, Hmingthanga chu a muhil thei ngang lo. Bawm chu a rilru ah a awm reng a, hawn chu a chak zek zek mai. A insum zo thlawt lo chu a tho chhuak a, bawm awmna lam pan chuan ava kal ta a."

"BAwm chu la kangin a hawng ta nge nge a, mahse a rin loh tak maiin lehkha them tereuhte bak engmah dang a lo awm lo. Lehkha them chu la in a han hawng a, a chhunga chuan I HNUNG LAM EN RAWH tih hi a lo inziak a. Chuveleh Hmingthanga chu a thin a phu dup dup a, a hnungah chuan tu emaw awm ang tlat chuan a hre nghal bawk."

"A ding khawng reng a, a hawi let ngam thak lo. Tu emaw chu a hnungah chuan an awm ngei chuan a hria, room lah chu a thim deuh ruih bawk si nen. A thin phu chu a rang tial tial a, a thlan a tla nghal bawrh bawrh bawk. Mahse chutia din ngawih reng chu ni ngangin a hre si lova, a huaisenna zawng zawng sawm khawm chuan minute 10 dawn lai a din khawng reng hnuah chuan a hawi let ta a."

A han ngawi leh dat a, a thiante chuan hlauh hmel tak hian a sawi zawm leh hun tur chu an lo chang thap a. Hmeichhe ho phei chu an inthut hnaih hlawm kher mai, an invuan thap bawk a. Rinmawia chuan a sawi zawm leh a, "Mahse engmah a lo awm lo, a reh thuap ringawt. Tumah hmuh tur an awm lo, amah pawh chu a thaw huai mai." a ti ta daih mai a.

Thantea chu a lo chek hlur a, "Ava ho e aww...tichuan, chuzawng  chu em ni?" tiin a lo zawt nghal vat a. Rinmawia chuan a lu a thing a, "Ni mai love, ka la sawi dawn chauh. Hmingthanga chuan atthlak a tiin a nui huah huah a, dawih a inti kher mai. Bawm chu a dah let leh a, tichuan a mu ta a."

"Mahse a muhil thei lo, a room chhungah chuan amah chauhvin a awm lo angin a inhre tlat a. A hma a, a hnunga midang awm ve anga a inhriat ang khan a room chhungah chuan midang awm ve angin a hre tlat a, amah chu a en reng angin a hre bawk. Tichuan a tuk a ni a, a thiante chuan Hmingthanga chu an be tlang thei ta hauh lo mai a."

"An ngaih tha lo chu a inluah ah chuan an va kal a, mahse vawi tam tak kawngka an kik hnuah pawh chuan a rawn chhang thei ta reng reng lo mai. Chhunglam atangin a inkalh bawk si a, tukverh te an ben vak vak hnuah pawh chhanna a awm tak si lovah chuan an mangang ta der mai a."

"Kawngka chu tichhia in an lut ta thuai a, an thil hmuh chuan a thawng takzet. Hmingthanga chu bang kilah chuan a lo thu kawm ngul a, a mit a khap miah lo. A melh ngai a melh reng a, a meng phawk em em mai lehnghal. Bawm chu a mal chungah chuan a lo pawm bawk a, a inhawng huau bawk."

"A kutah chuan kha paper kha a lo la hum reng bawk a, a thiante chuan mak an ti takzet. Chuan...mak deuh mai bawk chu, a thuttna hnunga darthlalangah chuan thil mak tak an hmu bawk a ni. An thianpa Hmingthanga thla a ni lo, midang daih a ni. Dum vek, mihring pian zia pu si, mahse mihring ni silo, hlauhawm tak hi a ni tawp mai."

"A thiante chu an hlau va, an tlanchhe ta vek a. Police an pun nghal a, police te nen an va let leh meuh chuan kha thla mak tak kha hmuh tur a lo awm tawh hauh lo. Box leh paper pawh chu hmuh tur a lo awm tawh lo, Lalhmingthanga erawh nikhaw hrelovin chhuatah chuan a lo let reng thung a."

"Khami ni atang khan Hmingthanga chu a pangngai tawh lo, mi a ang mai hian a awm ta a. Engtik lai mai pawh chuan a hlau em em a, min zui tu an awm, min enthlatu an awm tiin a phun leh sup sup thin a. Tichuan hun a kal zel a, nikhat chu hmuh tur awm lovin a bo ta hmak mai a."

"Tun thleng hian hmuh a ni leh tawh lo, chuan a inluah lai pawh chu a hrang chhunzawm a bi awm e." tiin a thawnthu sawi chu a zo ve ta. A thiante chuan an hlauh hmel em em a, an ngawi thap mai. Inla sawi fuh tak hian Rinmawia chu a han hawi kual a, "Ka zo ta e, tunge a dawt leh ni ve ang?" a han ti vel ham ham a.

********************************************** 

Rinmawia thil sawi chu an hlauh hmel hlawm kher mai, an reh leh ta thiap mai a. Zodini phei chu a meng kual zek zek mai, Rinmawia lah chu a lo intithei vel nasa. Famkima chuan a lu a han bu nghat nghat a, "A hlauhawm khawp mai, Rinmawi. Mahse thil dik lo chu a awm tlat, i thil sawi ah khan. Lalhmingthanga khan paper ah khan I HNUNGLAM EN RAWH tih inziak a hmu a, mahse engtin nge chumi thu ber kher chu a inziak tih an hriat theih? A chhan chu police leh a thiante an va let leh khan box leh paper kha a lo awm tawh miah lo i ti bawk sia, engtin nge paper a awm tih chu an hriat theih a?" tiin a zawt ta khauh mai.

Ruatfela pawh chuan rawn tuihnih ve in, "Nia, chuan box kha...a chhung a hawng tihte pawh chu engtin nge an hriat? Lalhmingthanga khan a sawi ti dawn ila khami hnu atang khan mi a ang maiin a awm i ti leh bawk sia? Zana hnunglama mi awm ve anga a inhriat thute chu khawi atanga i hriat nge?" tiin a rawn zawt ve bawk.

"Keipawh a mak ka ti, chubakah Aizawla awm kan ni ve bawk a... chutiang engmah ka la hre ngai lo reng reng." Zodini chuan a rawn ti ve khauh bawk. Chutah Rinmawia chu a nui ta huah huah mai a, "In van han mawl tak, bum in nuam tawp. Ka phuah chawp mai mai a nih kha, a tak tak amaw in tih kha ka ring reng ah?" a rawn ti ta daih mai a.

Chhana chuan rum fe hian a melh a, "Va thing tak e aw, a tak tak amaw ka lo ti ve em em a." a ti nuah nuah mai. Ruatfela chu za lo tak chuan a khi suk a, "I hrat ve hrim hrim, ti hian awm ang deuh deuh hian thil hi i sawi a nidangah pawh, thil dangah pawh ni se. Daw heh emai, khavang kha a nih kha bialnu pawh i hmuh zawh loh." a han ti deuh zek a.

Rinmawia chuan ngeiawm tak hian, "In lo dawih hle mai, ka phuah chawp vek a nih kha. Story writer tha tak ka nih ka ring, ka thiam emai. Kha... in hlau hle ania, chawp leh chilh a phuahchawp mai mai ah pawh." tiin a han hawi kual vel a. Famkima chu a han tho deuh thut a, "Khawnge, thingpui in leh ang u aw...hei, zan rei deuh tawh mahse a nuam rih tlat, zanin zet zawng ka khawhar in hnem hle mai." tih pah chuan ketli ruak chu tui dahna lamah chuan a khai phei a.

A chet mawlh mawlh pah chuan, "Phuahchawp sawi takah chuan keipawh ka ni ve thin alawm, kan naupan ve lai kha chuan dawt kha kan phuah chawp ve nasa thin alawm. Tum khat phei kha chu pawisa ka ru a, ka nu leh paten an hriat ka hlau si, a bo tih an hre bawk si kha min rinhlelh loh nan tiin dawt ka han phuah chawp tak tak mai a nih kha." tiin a nui huah huah a.

Thantea lah chuan fiamthu hian, "Chhana nen in in ang chiah a nih chu, a ni pawh hi pawisa ruk a hrai sia. Mahse a chhungten an ringhlel ngai miah lo, a chhan chu dawt a phuahchawp thiam lutuk a. Hei tihian Rinmawia nen an inkawm a, Rina pawh hian a chhun zo vek tawh chu a nih hi." a han ti deuh kher a.

Chhana chuan a melh rum ngang mai, "Ve lutuk a che, pawisa thawh khawm tih apianga thawh kep ngai ziah i nih kha." tiin a lo chhang let ve sak bawk a. Famkima chu a rawn let leh a, thingpui chu a rawn sem diat diat a. Tichuan a thutna chu a han rem tha leh deuh va, "Khai le, tunge la sawi ve lo?" a han ti leh a.

*****************************************************

Thantea chuan a aw a han thian kharh kharh a, "Khawnge, ka han sawi ve tak tak ange awww.." tiin a kut te chu a han beng deuh tharh tharh a. A thiante leh Famkima te pawh chuan an ngaichang thap mai, mahse a sawi dawn chiah tih ah chuan pawn lam atang chuan thawm a rawn awm ta tlat mai a.

Zodini phu nasa lutuk chuan Nunui kut chu ava vuan nghal a, "Awi, i hre ve em?" tiin a hawi kual nghal zeuh zeuh va. Midang ho pawh chuan an hre chiang lutuk tlat, "Mi lo kal an awm amawni le?" Chhana chuan a lo ti ve bawk a. Famkima chuan a thinpui in lai chu chhuatah chuan a dah a, "Ka va en ang, tikhan lo awm ru." tiin a tho chhuak a.

Ruatfela chu a rawn ding ve nghal, "Kan lo kal ve ang, hmeichhia chu tah hian lo awm se.." a rawn ti ve nghal bawk a. MAhse Pu Famkima chuan a lu a thing a, "Ni lul love, ramsa an nih kha ring. Sanghar emaw, sazuk emaw pawh an ni mahna. Hliam lo tuar ta ula, ka mawhphurhna vek a ni dawn asin." a lo ti daih mai.

Ruatfela pawh chu a thu ve leh mai a, Famkima chuan thuk hnunglam chu a han ban a. Silai sei zet zawt hi a rawn la chhuak a, "Helai hi chu a fal em a, him taka ka thlam in rawn thleng thei ringawt pawh kha vannei tak in ni. Ramsa eng eng emaw, min bei mai duh tur leh min tina thei thil hi a la tam ve a. Saphai te pawh kan hmu leh nawlh nawlh zel, chuvang chuan tikhan lo awm phawt rawh u." tih pah chuan silai ah chuan a mu a thun mial mial a.

A han load ri thak a, "Hlauthawng suh u, a upa ber ka ni bawk a zanin chu ka venghim dawn che u alawm. Ka rei lovang, tikhan thingpui kha lo in ru." tiin a chhuahsan a, pawn lam atang chuan a kalh khum ta hmak mai. Ruatfela te thian ho chu an thu ngawi thap mai a, "Eng thil nge a nih in rin?" tiin Zodini chu a han phun sup a.

"A sawi ang khan ramsa vel te pawh chu an lo ni mahna." tiin Nunui chuan a lo chhang a. Chhana chuan zawi te hian, "Enteh u, chawhmeh vel zawng tura helai hmuna awm hi a nih in ring tak tak em? A chhan chu, hetiang hmun fal leh hlauhawm lutuk ah engtin nge nuam a tih theih zawk ka ti mai mai." a han ti nuah nuah a.

Thantea chu rawn tawng chhuak ve in, "Enga pawh chu nise, kan fimkhur angai. Kan in kan hlat ropui si a, khawvar veleh chhuak vat ang u." a rawn ti ve bawk a. Zodini chu a ngaih a tha vak lo, "Keichu ka ngaihtuah nasa lutuk nge pawh ka hre lo, Pu Famkima kha vawiina kan tawn, dawr nghaktu nen khan inzawmna an neih ka ring tlat a nih chu. Motor ah khan lo riak khawm ta mai mai ila, kan thla a muang deuh zawk tur." a rawn ti leh ta sup mai.

Chhana chu a nui huk a, "Aw i ngaihtuah nasa mai mai a nih kha, a fel em kha. Misual deuh chu nise tunah hian tihian thingpuite inin kan titi mai mai thei nang, min that vek tawh ang chu." a rawn ti ve leh a. Rinmawia pawh chuan, "Nia, mahse han rin bur tur chu a ni chuang lo ania. Hetah kan riak phawt anga, khaw var veleh kan haw vang vang dawn lawm." a rawn ti ve bawk.

Minute 10 vel a liam a, Famkima chu a la rawn thleng thei chuang hauh lo mai. An ngaih chu a tha vak tawh lo, "Kan va en ve chhin mai dawn mi? Tawh sual a lo tawk palh te hi a nia nge?" tiin Ruatfela chu a mangang deuh tan a. Chuveleh Puipuii chuan, "I mawl a mi, ka chhuak ngam teuh lo mai." a lo ti hlur a.

"Nia, chhuak lovang u. Keipawh ka ngam lo, a chhunga awm pawh him ka ti vak tawh lo ania." Zodini chuan a lo ti ve leh bawk a. Chhana pawh chu che deuh hrut a, "Aww, hmeichhe ho lo awm ula, mipa in kan va enfiah mai dawn alawm." inla pa deuh tak chuan a han ti ve leh a.

Vin lek lek hian Nunui chuan, "I mawl ami? Hmeichhe hlang hetah min kalsan in tum amaw?" tiin a meng rum nasa kher mai. Thantea chuan rang zet hian, "Ka lo awmpui ang, hmeichhia chu... duh leh in pahnih khan va kal ru." a lo la ti zui. Mahse Zodini chuan a phal lo nasa, "A ngai lo, tumah chhuak lovang u." a ti tlat a.

Ruatfela chuan Zodini awmdan chu a mak a ti angreng kher mai, "Zodin, tinge i van hlauh hmel bik em em?" tiin a zawt hial a. Nunui lah chuan, "Kan hlau ve tho keini pawn, Zodini chauh a ni lo." a lo ti vin hlur a. "Aih, kha chu ka hria a. Mahse Zodini hian a hlauh fal hmel bik alawm." tiin Ruatfela chuan a chhang a.

Zodini chu a han thaw deuh halh halh a, "Ka ngaih hi a tha thei lo reng reng, kan kal lama dawr nghaktu putar kan tawn atang khan ka ngaih hi a tha thei tawh lo. Picnic spot atanga kan haw dawn pawh khan mihring ang tak kha chu ramhnuai lamah khan, pal kar atang khan ka hmu ngei alawm." a han ti khur dar dar a.

AN ngawi leh deuh thiap a, "A thuhrimin, kan chhungte an mangang tawh ngawt ang, Keini lah hetah thlahrang thawnthu kan lo insawi chhawk vel mai mai chu ania, police te hial an lo pun tawh lo maw?" Nunui chuan a han ti nuah nuah a. Rinmawia chu a han chek hlur a, "Amak, sawi tawh lo teh. Naktuk zinga kan haw hunah min hau nasa dawn lutuk, ka pa in min vaw ngei ngei ang." a lo ti hlur mai.

Ruatfela chu a ner sak a, "I ti duh e a, keiphei chu ka pa motor a la ni zui. Petrol leak bawk nen, ka chan a chau fe zawk." a lo ti ve bawk a. Zodini bawk chuan a melh ngai melh ngur ngur chung hian, "Naktuk zingah hian dam takin kan haw leh angem tih zawk a ni, kan chungah hian thil tha lo tak a thleng dawn ang hian ka hre tlat, a hrehawm ka ti." a rawn ti leh a.

Chhana chuan a han melh deuh hraw a, "I tawng malsawm lo thei emai, Pathian zarah kan dam anga, kan haw thei em em ang. Khatin tawng tawh suh, engmah kan chungah hian a thleng lovang." tiin a zilh deuh zek a. Chutia an inhnial buai lai chuan kawngka chu a rawn ri rak a, an phu nasa kher mai. An ngawi nghal thiap mai a, muang chang hian kawngka chu a rawn inhawng a.

Mahse Famkima lek chu lo niin, silai keng chung bawk chuan a rawn lut a. Kawngka chu chhunglam atang chuan a kalh sawk sawk a, "Eng nge lo ni ta?" tiin Ruatfela chuan a lo zawt nghal vat a. Famkima chu a khi suk a, "Engmah ni love, engmah ka hmu lo." tiin a lo chhang daih mai.

Zodini chuan mak a ti angreng kher mai, "Mahse thawm kha ka hre chiang sia, eng emaw tak chu a awm ngei ang. Pen thawm niawm tak a ni, che deuh hrut ri kha ania." a han ti a. Famkima chuan a silai chu a ngaiah chuan a dah tha leh a, "Thli in thingkung a chhem ri vel mai mai aniang, ka enkual nasa alawm. Ramsa te lampang pawh a ni mahna, hlauthawng suh u." a lo ti sam leh et a.

An thianho chuan an han inen deuh hu hlawm a, boruak chu a zang khai vak tawh lo kher mai. A thut hmunah chuan Famkima pawh chu a rawn thu ve leh a, "Chuan... kan sawi zawm leh dawn nge, mut in duh tawh zawk?" tiin a han zawt leh hlawm a. Thantea chu a lo ner sung a, "Naa, tuna kan mut daih ten, ka sawi ve dawn chiah a.." a ti nuah nuah a.

Famkima chu a khi suk a, "A nih chuan sawi ve la, i sawi zawhah Puipuii'n sawi veleh se. Chuan a tawp ber nan, inla ngaihthlak peih chuan ka sawi ve leh anga, chuan kan mu dawn ania." a han ti a. Tichuan an thukhawm tha leh a, Thantea sawi hun chang chuan an en thap mai.

*************************************************

TO BE CONTINUE