SAYANG

 SAYANG

Written by : Aaron Malsawmdawngzuala

************

(YEAR - 2035)

Pathian zarah thing delh loh lung delh loh ta na na na chu ka lo thang lian chho ve zel a, kum 16 lai ka lo ni ve ta. Class 12 zirlai mek ka ni a, insawitheihna pawh nilovin a thiamthei pawh chu ka ni chho ve char char thin. Ka nu leh pate thu ka hnial ngai lova, hmeichhe lerh tak ka ni heklo. Nu leh pate thu ka hnial ngailo ka han ti ngawt nanga, nu ka nei ve tawhlo.

Ka nu hi a thi tawh a, ka piantirh a thi a ni. Ka nu hi thlalak ah tihloh chuan a hmel ka hmu ve hman lova, nu tellovin ka pa leh ka pi hian min enkawl seilian a ni. Ka pu hi ka pian hma, ka pa pawhin nupui a neih hma daih hian a thi tawh a. Ka pi hian min duat hle a, ka nu ang maiin ka en thin.

Ka nu leh pate kha kum naupang tein an innei a, ka pa hi ala upa lemlo. Tleirawl kum 16 mi ka ni ve tawh a, mahse ka pa hi kum 41 chiah ala ni thung a, ka nu kha la dam se chuan kum 39 a ni ve tawh dawn bawk a ni. Ka nu a thih khan kum 24 chiah ala ni a, nu tia koh tur nei miah lovin kum 16 lai mai chu he khawvelah hian ka awm ve tawh chu ania.

Kan in exam chawlh lai a ni a, birthday nuam tak a ni. Ka pian ahnu lamah hetiang em em a birthday nuam hi ka la tawng lo. Kum dangah chuan in exam laite, exam dawn hnaih te leh class kal laklawh laite a ni thin a, tunkum erawh exam an sawn hma ta hlauh a, kan zirtirtute han fel em em zia hi chu.

Thil pek pawh ka dawng nual a, thian hovin kan zai nghek bawk. Kan thian ho hian mipa kan kawm ve ngai lemlo a, hemi tum pawh hian ka thiantha zual hmeichhe hlang pasarih kan ni. Dar 9 velah chuan ka thiante chu an haw ta a, keipawh chu room lamah ka chho a, muchungin kan thianho Whatsapp group ah chuan a nawi berah ka va tang leh nghal.

Kum 14 ka nih atangin ka ngen tlat avangin room hran ka nei nghal a, ka pa hian min duat bawka, tlawn dan chu ka thiam ngang mai. KAn chhungkua hi han sawi leh lawk ila, chapo vang nilose kan khawsa thei ve angreng hle a, mi hausa chhungkua kan ni e tihna ni hauh lovin kan duh leh mamawh ang zawng hi chu kan nei thei ve mai zel.

Ka pa hming hi Marcus Hmingthanzuala a ni a, ka nu kha Lalawmkimi a ni. Nu nei ve talo chu thianten an nu chungchangte, an nu an huat thin zia te, an nuten an vuakte, an hauh te, an strict zia te leh an hne zia te an sawi chang hian kei erawh chuan nu neih ve ka lo chak thin khawp mai.

Ka pa hian min duat em em a, mahse min duat sual kherlo ania. Ka ngen apiang min leisak a, ka duh apiang min tihsak thin bawk. Sawrkar hna a thawk a, ka pi penson nen phei chuan tlachham lo ve tak kan ni. Nu neih chu chak ve thin viau mah ila ka nu kha ka hmuh hman loh vang te pawh ani ang, amah tak hi chu ka ngai em em ngail, nu neih ve hrim hrim kha ka chak a ni.

Dar 11 a pel deuh hret ang, ka room ah chuan ka pi a rawn lut hlawl mai. Ka pi hming hi han sawi ve leh ila, Lalduhzuali a ni. "I la mulo maw?" a rawn ti lut nghal a. "Enge?" ka lo ti deuh hu ringawt. Ka bulah chuan a rawn thu a, present bawm hi ka khum bul dawhkanah chuan a rawn dah a.

"Hei hi i birthday present tur a nih hi....a hlu teh ania." nui suk chung chuan chhuah lehnghal mai a tum a. "Pi...enge anih reng reng a?" tiin ka han zawt hram a. Ka pi chuan en pawh min en lo hian, "I lawm kher lo maithei a, i ngainat zawng a ni lo maithei bawk. Mahse kan tan a hlu em a, chuvang chuan i birthday present ka pek tawh ah che chuan ka ngai hlu ber." tiin zawhna dang ka zawh leh hlau niawm tak chuan a chhuak nghal daih.

Present bawm chu ka han en a, a lian tha bawk a aman pawh a to khawp ang le. "Ka hawng ang nge...naktuk zingah law law.." tia ka inzawh mawlh mawlh pah chuan ka lo kheh hawng der tawh. A chhunga awm chu ka rinloh lam daih a ni tlat mai, lehkhabu a ni. "I ngainat zawng a nilo maithei bawk." tia ka piin min hrilh chu ka hrechhuak nghal a, ni e..ka ngaina lemlo.

Lehkhabu chhiar, thawnthu chhiar tihvel hi ka ngaina lo, kan zirlai pawh hne tawh mah nak alaia. Lungawilohna em em pawh ka nei chuanglo, thilpek dang ka dawng hnem tho a, a pawi love. Ka khum bulah chuan chu lehkhabu chu phawrh chhuak chuanglo chuan ka dah mai a, phone ka khawi chhunzawm lehnghal.

Zing alo ni a, ka alarm a rawn ri ta ral ral mai. Men pawh meng tha hleithei manglo hian ka phone chu ka han bih a, dar 4:30 a lo ni. Tuk danga ka tihdan pangngaiin ka tho a, ka inphih harh a. Tichuan zing walk tur chuan ka insiam ta a, tui bottle khat kengin ka chhuak ta a. Ka thiante pawh kan innghah khawmna thinah chuan an lo awm nual tawh a, kan kim hnu chuan pian nalh phah chuang hlawm ngai miah silovin kan han tlan leh ta ngat ngat hlawm a nih kha.

DAr 8 pelh hnu velah ka tho a, ka pa chuan rawng alo bawl a. Ka pa hian eisiam a thiam zek mai a, ka pi ai hian a thiam zawk mahin ka hria. Rawng ka bawl ve hi a phallo nilovin, min tir ngai lemlova, amah hian ngawi rengin a bawl malh malh mai thin. KA pa hi chu ka neihchhun tak meuh meuh a ni a, ka hero a ni tawp mai.

Kan chhungkua hi pathum chiah hi kan ni a, ka pa pawh hi fapa mal a ni a, keipawh fanu mal ka ni. Kei leh ka pa leh ka pi, kan pathum zawng hi kan chhungkua chu a nimai. KA pa nen hian innel viau mah ila kan inbe zing lemlo a, chubakah ka chhunlo ve chiang. Ka tawng duh em em a, mahse ka pa erawh hi chu a ngawi ngul reng a, mahni pate an nih vanga fak ni miahlovin a pa hliah hliah mai a ni.

Ka inbual fai a, tichuan chawte kan ei a. Exam chawlh lai ani bawk nen, enge ka tih ang aw tiin khumah chuan ka let ka let ringawt. Ka khum bul dawhkana nizana ka pi lehkhabu min pek chu ka va hmu fuh leh thut a, englam lehkhabu nge a nih reng reng tiin ka han la chhuak a. Ka rinloh tak maiin diary a ni tlat mai, a chhah em em mai lenghal.

A kawm chu savun atanga siam a ni a, a hlui ve angreng tawh tih pawh a hriat khawp mai. A kawmah chuan nalh tak mai hian SAYANG tih a lo inziak a, ka han keu a. Phek hmasa berah chuan hmeichhe hmeltha zet, duhawm em em mai leh ngo lutuk lemlo thlalak hi a lo awm a. A thalak hnuaiah chuan Lily Zothanpuii tih a lo inziak a, a diary neitu ber a ni ngei ang.

Mahse chu aia thil mak ka hmu leh tlat, phek lehlamah chuan thlalak hrang hrang a lo intar nual bawk a, chuta a diary neitu Lily bulah chuan ka pa Hmingthanzuala hi a tel ve tlat. Ka nu chu a ni silo, ka nu thlalak te chu ka hmu ve fo tawh. Mahse henu hi tunge? Engvangin nge ka pi hian henu diary kher hi min pek? Chuan tinge ka pa hi thlalak ah  hian a lan ve?

Mak ka ti kher mai, tunge henu hi ka hre ngai bawk silo. Ka pa thlalak a awm ve avang hian thinrim tur nge thinrim loh tur pawh ka hrelo, chubakah min petu ber kher kha ka pi a ni a, chutah a ngaihhlut em em thu min la hrilh zui bawk si. Diary lah chu a han chhah tha em em khawpa, ka history zirlaibu ai maha lian leh chhah a ni.

Diary chu keng chhuakin ka pi room ah chuan ka va lut a, "Pi..hei hi enge awmzia?" ka va ti nghal thawr mai. Ka pi chuan minlo en a, "Bawihte, engmah ka hrilh dawn rihlo che. Mak i ti ang tih pawh ka hria, mahse han chhiar phawt mai la, i zawhna zawng zawng chu chhanin a awm ngei ka beisei." a lo ti a.

"Tunge Lily hi? Chuan tinge ka pa thlalak hi a awm ve?" tiin ka zawt leh a, mahse ka pi chuan, "Chhiar phawt rawh." a lo ti leh ringawt. Mak ti tak chuan ka room lam ka pan leh a, ka han keu thuak thuak hlawm a. Kutziak vek a ni a, a hawrawp lah chu a nalh em em lehnghal. A khat tawkin thlalak a lo intar leh zeuh zeuh zel a, chutah pawh ka pa chu a lang zel tho mai.

A single thalak te, hmun nawm hmel tak taka an thlalak dunte a ni a, a then phei chu Mizoram pawh a ang lo. Thil awmzia zawng zawng hre tur chuan chhiar a ngai si a, keilah hre chak viau mah ila lehkhabu chhiar chi ka ni ve silo nen, ka peih vak bawk silo. Ka pa zawh lah ka ngam der silo, chhiar ve phawt mai chu a tha ber dawn a nih hi.

Mahse ka la chhiar peih mai nghal chuanglo, message ka dawng a, "Bazar ang." ka thiannu Hannah-i a ni tlat. Hnial chi a nilo, diary chu ka wardrobe ah ka dah a, tichuan ka insiam nghal. Nileng chuan kan bazar a, engvak chu kan lei chuang lo. Mahse tinge maw ka rilruah kha Diary hlir kha a awm le tiin nileng mai chuan ka inzawt reng a, chhiar chakna in ka khat a ni ber tawh.

Lily hi tunge a nih a, engvanga a diary kha ka pi khan min pe nge a nih? Lily hi ka nuhrawn aniang a, ka hre hmanlo zawk nge? Aaa..a nilovang, ka pa bialnu hlui ani ang...nge ni a ka nu tak tak a lo ni reng zawk tihte chu rilruah a awm a, thildang ka ngaihtuah thei mawlh hrih lo. Thlalak ka en atang kha chuan ka pa kha a hmel ala tlangval em em a, kum tamtak a liam tawh ngei ang.

Tlai a lo nih chuan ka haw a, ka pa pawh office a lo bang der tawh. "Khawnge i chhuah bo daih a?" tiin minlo zawt a. Room lam pan nghal pah chuan, "Hannah-i nen kan bazar a." tih ringawt chuan ka chhang a. Roomah chuan ka lut a, ka inthlak mek lai chuan ka pi a rawn lut thut mai. "Ka la chhiar lo.." ka lo ti nghal ngawt a, a nui ringawt.

"I hman hunah i chhiar dawnnia, englo ania bawihte...diary chungchang kha i pa hrilh suh aw?" a ti ta mai a. Phawk hru hian ka pi chu ka en a, "Timaw?" ka ti hu ringawt. Ka pi chuan zaidam tak hian, "KA pe che tih pawh ka la hrilh lo, chuan engmah zawt lo la, tunge Lily chu a nih a, khawi ami nge tihvel pawh engmah zawt hrih suh." a ti leh a.

"Nangman min hrilh mai la.." ka vin deuh hlur a. Mahse dam diai hian, "Keiman ka hrilh kher che ngailovin tikhan ziakin ka rawn pe che alawm...chhiar ngei ngei ang che." a ti a, min chhuahsan leh nghal daih. Umm..misual chu a nilo turah ngai phawt ila, a hmel a tha a, a thlalak tinah hian a nui sen sen reng bawk.

Ka nu ai chuan a hmel chu a tha lo deuh a, mahse ka nu ai chuan duhawm tak a ni. Chubakah a hmel ang hi tunah hian pu ta ila, ka put mek ka hmel sawr bawk ve tak ai hi chuan ka duh zawk tho tho. Nilo, ka duh mai nilovin, a hmel leh pian ka en vang vang hian amah hi an ka chak mah zawk hial a ni.

Zanin ah mut pahin ka chhiar ang...tiin ka rilru ka siam fel ta a, lehkhabu chhiar peih lo hle mah ila he diary hi chu kan chhungkaw thil a ni tlat, ka pi hian tawngkama min hrilh ngam loh, min hrilh duh si a nei anga, chuvang chuan he diary hi min pe te pawh a ni mahna. Engpawh chu nise, chaw ei phawt mai teh ang.

Zan a lo ni a, kawmthlangah ka han leng leh te te phawt a. Rilruah chuan diary ringawt chu a awm tho mai. Dar 10 rik hma hret chuan ka haw a, ka pa chuan sitting roomah phone a lo hmel mual mual a, ka pi erawh a mu tawh thung a ni ngei ang. KA pa chu ka en vang vang a, zawhna zawh chak ka nei nghah kher mai.

Min rawn en a, "Kawngka kha kalh nghal rawh aw.." a ti a, a room lam chu a pan nghal a. Kawngka chu ka kalh a, ka room lam ka pan ve nghal a. Wardrobe-a diary chu ka han la a, tichuan khum ah lawnin diary chu ka han thlek vang vang a. Engpawh chu nise ka hming ka la sawi lo tak e, kei hi Marcus Hmingthanzuala fanu mal neih chhun Lalnunpuii, Puitei ka ni tih ka lo sawi lang ve leh lawk.

Diary kawma nalh tak maia SAYANG tih inziak chu ka han en leh a, chhiar tak tak hmain a thupui SAYANG tih hi enge a awmzia ka hre chak tlat pek a. Tichuan Pu Google-a ka han zawt a, a chhanna pawh ka dawng rang kher mai. Indonesian lam tawng daih niin MY LOVE emaw, DARLING tihna alo la nizui.

Leh ta nghala, henu Lily leh ka pa hi an inngaizawng tawh chiang mai, sawi buai angai lo, a thupui awmzia hian a ti chiang thawkhat teh e. Ka han keu tan a, Lily thlalak chu ahmain en tawh tho mah ila, ka hmeichhiat pui ka hmuh tawh zawng zawng a duhawm ber leh cute ber a nih vang pawh aniang, ka han en leh vang vang phawt a.

Tichuan ka kei zel a, a hawrawp mawi tak mai chuan min ti zak lek lek zawk. Sawi tawh ang khan phek khat naah a thlalak a awm a, a hnuaiah a hming a inziak bawk. Phek hnih naah ka pa nena an thlalak a lo lang leh a, a hnuaiah ME & SAYANG tih a inziak leh bawk. A phek thumna ka keu leh a, chiang kekkawk hian AKU SAYANG KAMU, MARCUS tih a lo inziak leh a, a awmzia hriat leh phawt ka duh.

Pu Google-a chuan a awmzia chu, "Ka hmangaih che, Marcus.." tihna anih thu min hrilh a, ekhai...a tir atangin a ril nghal kher mai. A phek li-na ka keu chiah a, umm...chhiar tan ang aw...

*****************

(YEAR-2018)

Ka hming chu Lily Zothanpuii a ni a, he diary ka ziah lai hian kum 23 mi ka ni. Bachelor ka graduate hnu khan ka thiannu Rosy zarah hna tha tak ka hmu thei dawn a, mahse Mizoramah nilovin Bangalore lamah zawk a ni hlauh mai. A hna hming chu sawi kher lo ta ila, mahse hna tenawm leh in ngaih ang kha a ni kherlo ania.

Hlawh pawh a tha a, a hna pawh a hahthlak lemloh khawp mai. Rosy hi kei aiin a upa a, ka best friend a ni. A lo thawk tawh sa a ni a, ka thawh ve a duh em avang chuan ka pa pawh a sawipui nasa. A tir chuan ka pa hian phal vaklo mahse Rosy-i'n a nawrluih tlat avang chuan a phal ta hram a, min ngaihtuah thin khawp mai.

Ka nu hian kum 2 ka nihin min boral san tawh a, unau pahnih chauh kan ni a, ka u hi mipa a ni. Ka u hi kum 18 anih khan accident vangin a boral a, khatih hunlai khan kum 12 chauh ka la ni. Ka pi leh pute an thi ve ve tawh bawk si a, kan chhungkua chu kei leh ka pa chauh hi kan nimai. Mahse Pathian zarah kan harsa lem lova, ka pa hi sawrkar hna thawk a ni a, kan mamawh tawk chu kan nei ve thei zel.

"Mami, tha deuh khan thawk la, i nun tichhe vek thei thil kha ti ve reng reng suh ang che." tiin ka pa chuan Airport thleng chu min thlah a, tichuan a vawikhatna atan ka hmangaih em em, ka neihchhun ka pa chu hmun danga awmsan turin mittui nen ka vai liam ta a, ka lung a leng lawk ngei mai.

Hmeichhe awmtha duhlo, ruihtheihthil ti thin leh khawlo tak chu ka ni kher lo nangin, ka fel lutuk lemlova, ka piangthar lemlo bawk. Engemaw occasion-a han drinks ve leh zeuh hi chu ka ching angreng a, mahse ka tih chhunzawm ngai lemlo. Mahni tawkah tha chu ka inti ve hle thin a, duhthu chu samlo mahse nula ft 5'7, pian zahpuiawmloh leh hmelchhe lutuk lemlo ka ni hi chu ka lawm ve thin khawp mai.

Kan thlen tirh chuan Rosy bulah ka awm rih a, engkim chu min tihpui a. Tichuan hna te pawh chu ka han thawk ve tan a, rilru sen ngai a ni bawk nen rin ai daihin a hahthlak phian mai. Kar khat vel ka thawh hnu chuan keipawh loh theih lohna avangin mahnia inluahna tur ka zawn ve mai angai ta.

Rosy bula awm ve reng theih anilo, an landlord lah chu a han strict em em khawp a. Rosy awmna flat hi a full tawh avangin inluah tur dang emaw ka zawn ve ngei angai ta a, mahnia awm hrang ngailo ta chu ka huphurh angreng khawp mai. Rosy pawhin, "Kan landlord hi kan dil anga, inluah man te chu kan in tum sem thei tho alawm." a tih pawh chuan ka inthlahrun mai bakah a hmun kha nuam ka ti chiah lova, ka hnial ta tho a ni.

Kan day-off a in ang hlauh mai a, tichuan Rosy nen chuan nileng deuhthaw chuan inluah tur kan zawng ta a. Flat ruak pakhat kan hmu hlauh mai a, room pakhat chiah a lo awl tawh lehnghal. A neitute nen chuan kan inbe rem a, tichuan ka in thar chu ka luah ve ta. A lian lemlo nangin a felfai thlerh mai a, a thianghlim em em bawk.

A tukah chuan ka office kal tur ka room ka chhuahsan chiah chu ka room bul chiah a mi, tlangval ft 5'11 vel laia sang, ngo lutuk lo, hang em em chuang silo, hmelchhe lemlo tak mai chu a rawn chhuak ve a. Min rawn en a, "Good Morning." a ti ringawt a, ka chhan ve hma hma chuan a kal daih. Engemaw awmzia ni? "Morning." tiin ka han au zui ve hram a.

Nilenga hna kan thawh hnu chuan tlai lam a lo ni leh ta a, ban a lo hun leh ta der mai. Haw ta mai lo chuan Rosy inlam ah ka phei a, mahni chauha awm ai chuan tiin ka leng kawi ta a. Kan inkawm fe hnuah chuan keipawh haw zai ka rel ta a, gate bul thleng chu min thlah a. Ka inluah ka thlen dawn tepah chuan kawngsira waiting shed-ah chuan vai pali an lo thu a.

An zawn ka thlen chuan an mahni tawng chuan min rawn chhaih vak vak a, a awmzia ka hriat ve avang chuan ka sa kher mai. Chhanlet em chu ka ngamlo nangin pakhat chu ka han melh hrawk a, a ngaihdan alo nilo kher mai. Min rawn vin deuh tuar a, tichuan an pali chuan min rawn zui ta mai a, awm ava nuam duhlo kher em.

An rawn kal chak tulh tulh a, ka tlan lo chauh tawh. Chutah an pali chuan min rawn lehpel a, ka hma takah chuan an rawn ding ta. Zawimuang chuan ka kal reng tho a, mahse min kalsan an la tum mai chuanglo. Chutah ka hnung atang chuan tuemaw hian min rawn kuah thut mai a, ka phu chiang kher mai.

Min kuahtu chu rang takin ka han en a, karei...ka room bul chiah ami, tukina ka Good Morning ve hman tak loh kha alo ni reng mai. "Min lo nghak reitawh em?" a rawn ti ringawt a, ka mizo pui ngei a lo ni hlauh mai. "Ihh..aw..aih.." te ka lo ti bah nuai ringawt. Min kuah chung reng chuan kan inluahna lam chu min pan phei puia, kha vai pali te pawh khan min tibuai zui ngam talo a, aww..ka va han lawm tehreng em.

Kan room awmna thleng chu inbe miahlo chuan kan inzui chho a, a room lam a pan nghal daih. A luh tur chiah chu, "Thianpa.." ka han tih chuan a rawn hawi phei a. Inthlahrung tak chuan, "Ka lawm e." ka ti zawi sap a. A nui suk a, "Umm..keipawh le." a ti a, luh nghal mai chu a tum leh a. Ka ko ding leh hram, "Ihh...i hming?" ka han ti leh tawp a.

Min chhang dawn talo amaw ka tih hnuah, "Marcus.." a ti ringawt a, keipawh chuan nui chungin "Lily ka nia, ka lawm e aw.." ka ti a, min chhang tawh lemlo chuan room ah  alut ta daih a. Zanin chu ka thenawmpa hi ka tan chuan Superman a ni ringawt, min va chhanhim chiang tak em. Lawmthu sawi a han biak luam pawh duh viau mah ila amah zawk khan min biak peih vak hmelloh em a, ka inthla hrung lek lek zawk."

****************

Awiii...naktuk zing ka tho hman dawnlo tlat. Diary chu chhiar zawm ka chak viau naa, ka thiante ka lo promise tawh si a, mu phawt mai teh ang. Ka pa leh Lily intawn dan chu ka hre ta phawt a, ka chhiar chhunzawm chak kher mai, mahse insum rih mai teh ang. Lily hi Zothanpuii a inti si a, mahse ka nu kha Lallawmzuali a ni bawk si.

Lily hi kan chhungkaw tan hian engemaw tak chu a ni ve tih chu ka ring nghet ta bur a, zawhna hlir chuan ka la khat tho mai. Thil awmzia zawng zawng hi hriat nghal vek duh mah ila, ka chhiar zawh thak angai dawn si. Chubakah tinge ka pi khan ka pa hnena sawi lo tura min hrilh? Rilru-ah zawhna hlir a khat a, ka hriatloh hlanin ka lo muhil der aniang, mumang nen a inchhunzawm nghal daih.

*****************

Ka nu thlalak ka en nawn deuh ngat ngat a, Lily hi chu ka nu a ni thei lo hrim hrim. Hmel ah pawh in anna chhe te mah kan nei lo, ka nu nen hian nufa kan ni ngei tih chu ka chiang. Ka nu ai chuan hmeltha lemlo mah ila, in anna lai tam tak kan nei chuan ka hre ve. Ka pa nen hi chuan kan in anna vak pawh ka hrelo, nge ni a ka pa fa hi ka lo ni miahlo zawk?

Thlan tla phung chuan ka haw a, ka pi chuan chaw ei a lo siam mek a. "Eheu....i va rawn haw tlai ve.." ka pi chuan nui chungin min lo melh deuh hru mai a, ka pa erawh ka hmulo. Thutthlenga mut zuar pah chuan, "Pi, khawnge apa?" tiin ka han zawt a. Chaw ei siam mawlh mawlh pah chuan, "A kal hma a, vawiin chu." a lo ti leh mai a.

Chuveleh ka tho a, ka pi bulah chuan ka va kal nghal. "Pi...ka pa hian nupui pahnih a nei ami?". A nui huk ringawt, "I mawl ea? Eng atan nge pahnih hnih a tih anga?" alo la ti zui. Za lo tak chuan ka han nui hui ringawt a, "Phek tlemte chauh ka la chhiar a, mahse ka hre chak bawk sia." ka han ti leh ringawt a.

"Chaw ei phawt ila, vawiin nileng chhiarna hun i nei alawm." a kut sil pah chuan min rawn nuih suk a. Room lam panin, "Ka inbual phawt dawn." tiin ka luhsan ta daih a. Ka khum bul dawhkan chunga Liliy diary chu ka han en vang vang a, "Vawiin hian tu chiah nge i nih tih hi a tam thei ang ber ka hre hman ngei tur a ni." ti rilru nauh nauh chung chuan ka thawmhnaw te chu ka hlip a.

Chawhma dar 10 a pel ta, engmah tihtur ka nei chuanglo. Ka khumah chuan ka han lawn kai a, diary chu ka han ban leh ta nge nge a. Chhiar chhunzawm leh ang aw...

*************

Atuk zingah chuan dar 6 leh a chanve velah ka tho a, ka in phih harh a, rawng ka bawl ta a. Kan flat awmna hi room chu ni mah se, in ang tho hi a ni a. Sitting room, choka leh thildang a hrang hrangin a awm velo a ni mai. TV pawh a awm hran lova, inchhung luh chiah hian choka a lo lang nghal uar a, bedroom pakhat a ni leh mai.

Verandah zimte hi pahnih a awm a, ka bedroom ah leh choka bulah a ni. Chaw te ka ei a, tichuan ka inbual fai a. Office kal turin ka insiam a, darthlalanga ka han in en chu ka rin ai daihin ka lo chhelo. Nizana vaipa pali ten min lo hmu tai deuh pawh kha a awmlo hran love, ka lo zia ve phian reuh a nih hi.

Room ka chhuak chiah chu ka thenawmpa Superman Marcus-a nen kan intawk leh ta chiah mai, han biak mai ka tum a, mahse sawi mai tur ka hrelo. Ka tawng hma bawk chuan, "Good Morning." a rawn ti leh a. Tun tum chu ka chhanlet ve hun min lo nghak ta, "Morning." tiin a chute thei ang ber chuan ka lo nuih vel a.

"Hna i kal dawn mi?" tiin ka han zawh chhunzawm zat a, a lu a bu nghauh ringawt. Second 5 vel chu ngawi rengin kan ding a, "Nih phawt le." tiin min kalsan leh daih, tawngkam chu a thiamlo ve hrim hrim anih ka ring. Pawnah chuan ka chhuak a, taxi chang niawm tak hian taxi stand bulah chuan a lo ding a.

Ka va pan hnai a, "Eng hna nge i thawh a?" tiin ka va zawt leh ngat a, a lo nui suk a. "Ahh..hna thawk tura lo kal pawh ka nilo." a ti zawi sap a. "E..anih chu..nichin a ka zawh che khan aw i ti sia." ka han ti leh hram a. Ani lah chuan, "Aw ka tihloh kha.." a lo ti hmuk mai. "I tih reng kha..." tiin ka han hnial leh a, "Ka tihlo kha...ka lu ka bu ringawt anih kha." nui deuhreuh chuan a ti leh a.

Mi hnial hrat ve hrim hrim ta chuan, "Aw tihna animai lawm, khatia i lu i buk te chuan..." ka han ti ve leh hram a, kan inhnial ta vak vak ringawt mai. Mahse he Superman hi ala dang duh biklo, "Chutiang ringawt, ka lu ka bu satliah pawh a ni thei a.." tiin min hnial let ve zel tho. Ka chhan let leh hma chuan, "Nih aw.." atia, a kal daih mai.

Ka en zui vawng vawng a, ka nui ringawt. Ni e, thiante zingah pawh hnial hrat ber leh dang duh ngailo kha ka nia, min hnial ve vak duh suh se. Mahse maw, amak lutuk. A ding a, a rawn let leh ngat. Min rawn hnial leh dawn maw ka ti hman hial a, mahse inthlahrun hmel tak hian ka hmaah chuan a rawn ding a.

Nui lui tih hriat tak hian a khi suk a, "Tak tak ana, vacation hmang turin ka rawn zin mai mai, nangzawk?" tiin min rawn zawt daih mai. Keipawh chuan pangngai tak chuan, "E anih chu...kei chu hna vang ania.." tiin ka hna chungchang te chu ka hrilh a. Minute 10 dawn lai chu kan titi a, taxi min han phar sak ngei bawk a.

Ka office pawh ka tlai phah thelh alawm le, titi pui lah kha a nuam phian lehnghal. Ka hna pawh ka ngaihtuah tha thei ta hauh lo mai, Marcus-a han titi pui leh kha ka chak tlat pek nia mawle. Rosy lah chuan a thianpa Tluanga, a ruka min lo star em emtu, kan thawhpui tho chu nileng mai chuan min sawipui chhen lehnghal.

Tluanga pawh hi mipa hmelchhia chu a ni lemlo, mahse a thawveng hem huam lutuk leh min be peih lutuk hi ka ei thlawt lo a ni ber. Ka mizia hi han sawi ve lawk ila, min hrechiang apiangin kawm nuam min ti. Ka polite ve viau chuan ka hria a, ka thinrim hma viau nangin ka tilang ve tut tut ngai lo.

Ka thiante chuan I HMEL HI A INNOCENT E..min ti thin a, dawt a nih leh nihloh chu min hmutu a zir ani tawh mai. Nui sen sen hi ka peih ve hrim hrim a, nuih ka heh hle bawk. Mi ka biak reng rengin ka nui deuh sang thin a, inlak engemaw vang nilovin ka tihdan ve hrim hrim a ni. Sawi tawh ang khan enge maw kan lawm changte hian, birthday party emaw, urlawk zan emaw, kumhlui thlah zan velah te hi chuan ka han khiat ve deuh sak zel.

Zu hi ka in ngailo a nilova, mahse ka in khat hle thung. Tui tihna pawh ka neilo, keimah tak phei hi chuan hunpui a nih manah han kai ve deuh sak hi ka duh thin vang hian ka lem veleh mai zel. Chutiang chiah chuan ka thiannu Rosy pawh hi a ni ve tho, kan inkawm ngeih bawk a, kan mizia pawh a in ang hle.

Kan in anlohna ber chu ngaihzawng ah a ni a, ani hi chuan ka kum zat aia tam fe hi chhas a nei tawh. Kei erawh High School kal laiin pakhat, Higher ah pahnih leh BA ka kal laiin pakhat a ni leh mai. Ka lerh lemlo chuan ka hria, hmeichhia ta na na na chu betu pawh ka nei tam thin narawh e, mahse ka chhanglet peih vek lemlo.

Tlai a lo ni a, kan bang ve thei ta hram e. Ka duh aiin ka haw tlai leh ta, Rosy inluah na lam chu ka pan tawh lo chiang teh asin. Motor ka chang a, a lo full deuh zel bawk nen, ka ril a tam tawh bawk nen ke chuan ka haw leh ta ringawt a. Ka inluahna atanga kan office hi km 1 leh a chanve vel a nih ka ring, mahni ram  anilo bawk nen khaw thim hnua kea haw chu a nuam lemlo.

Ka thlen dawn tep ah chuan ka hma zawnah chuan mipa pakhat chu muang chang chuan a kal a, a palian reuh phian lenghal. A hlauh deuh avang chuan ka kal muang deuh a, mahse a kal muang ve zel bawk si. Ka en vang vang hnu chuan ka thenawmpa a ang ka ti tlat mai, hnuai lam enin muang chang chuan a kal zel a.

Reife kan kal hnu chuan ka chiang ta, Marcus-a ngei a ni. Ka va pan hnai a, "Marcus..." ka va ti ve ringawt. Alo hawi a, "Ehe...i haw chiah em ni?" tiin minlo zawt a. Ka thaw huai mai, "Umm...vawiin chu kan bang tlai deuh a." tiin ka chhang a. Mak tih hmel tak hian, "ehe..in van bang tlai thei awm em em. Nizanah lah khan i haw tlai sia, in hna ava hautak awm ve?" a ti leh a.

Ka nui deuh huk a, "Nilove, nizan kha chu ka haw tlai lui ve hrim hrim a nih kha. Ihh..ka thiannu Rosy te inah ka leng kawi a, chuvang chu mawle." tiin ka chhang. "E, anih chu mawle.." a ti ringawt. Eng vak sawi lem lo chuan ahma zan ang bawk chuan ngawi rengin kan inzui leh a, sawi tur a vang thin khawp mai.

Minute 3 dawn lai kan ngawih hnuah chuan, "I chau em?" a rawn ti leh deuh thut a. "Chau love...khawnge i kal a?" tiin ka zawt a. A ngawi vang vang a, "Nunhlui ka chhui kir a.." a ti daih mai. Ka hrethiamlo tlat, "Enga?" ka ti hu ringawt. A nui leh a, "Ka fiamthu anih kha..ka thianpa te inah ka kal a." a ti leh daih mai.

"E..anih chu..i va awm awl awm ve..vacation hmang mai mai tura Bangalore thleng thleng ilo kal?" ka han fiam ve zauh a. A lo khi suk mai, "Nia, hnathawh chawlh lai tak ania.." a ti leh mai a. Han biak vak dawn pawh hian a rul tawk chauh hian min chhang zel a, a biak tui tak tak theihloh.

Mahse biak ka chak reng bawk si, hepa hi chu ka thian tha tak ni tur ang tlatin ka hria. Kan thleng ta a, a room lam pan pah chuan, "G'nyte." a rawn ti zawi sap a. Rosy ngawr ngawr kawm chu ka kham ta deuh nge ni, titi pui har hle mahse ka la be kham lo takzet. Mahse a hmeichhia zawkina ka room a han sawm luh chu ka duh bik hauh lo, "Nyte.." tiin ka lo chhang let a.

Room ah chuan min luhsan ta a, keipawh chu ka lut ve a. Ka chau kher mai, zan zawnin kein ka haw a. Nilengin rilru kan seng a, taksa a chau thin khawp mai. Hlawh hi tha viau lo phei se chu ka ban nghal daih ka ring, ka pa ka ngai ngawih ngawih. AWm hrang ngailo ka ni a, mahnia inluah phei chu ka vawikhatna a ni.

Mahse kum tamtak ka pa nen chauh kan khawsa tawh a, eirawng bawl, insuk, hmun phiah, hmeichhe tih tur nia an sawi thin hi chu engkim ka ti thei ve vek a, ka thiam ve vek bawk. Lunch ka lo ei peihlo vel khanglang nen, ril a tam duh ngei mai. Hmanhmawh tak chuan rawng ka bawl sawk sawk a, tichuan inbual pawh inbual hmasa lovin, inthlak takngial pawh peihlovin chaw chu ka ei nghal mawlh mawlh a.

Engkim ka tihfel hnu, thleng sil, room chhung tihfai leh inbual zawng zawng nena ka zawh fel vek hnu chuan dar 12 a lo ri tep tawh hial a. Khumah chuan ka mu zal a, ka sil vek ani ber mai. Ka phone ka han en chu ka nuih aza tlat, ka bialpa neih hnuhnun ber Francis-a message a ni tlat mai.

A rui lehpek ani ngei ang, renew turin min rawn sawm vel. Reply pawh ka reply peihlo, a block nghal hmak. Mipa ruihtheih thil heh deuh hi ka duh hlawl lo, chuvang chu ania Francis-a pawh kha ka then hmak ni. Sex kan hmandun teuh zia kha, ngawiteh ka sawi peih tawhlo, ka hne ngawih ngawih hepa hi chu, ka luak dawn.

Ka mutthilh dawn tepah chuan zai ri ret ret hi ka hria a, verandah atanga rawn ri a ni tlat. A zaithiam em em mai lenghal a, tunge anih tih chu inzawh hranpa a ngailo. Ka thenawmpa Superman-a a ni tih ka hria, thawm dim tak si chuan a zai ri rat rat mai. A nalh ka tih em avang leh a zaithiam ka tih em avang chuan muhil ta mai lo chuan ka ngaithla char char a, a hla sak chu ka vawikhat hriatna a ni.

Verandah ah chuan ka va chhuak tawp, a aia chianga ngaihthlak ka duh tlat. Verandah atanga va thlir hian ama verandah hi a lang thei a, amah pawh chu a lo awm ngei a. Thla eng tak hnuaiah chuan a lo thu a, guitar a lo kuah bawk a. A thutna bula stool ah chuan beer cane khat leh sikret bawm khat hi a lo awm bawk a, chhuatah chuan beer bur ruak tih hriat tak mai 3 vel a lo let rum bawk.

A zai ri chu ngaihthlak nuam ti viau mah ila, midang tihbuai a hlau ve deuh a ni ngei ang, a zawi thei ang ber chuan a zai a. MAhse he Superman-a hi a zai satliah lo, rilru natna thuk tak nei chunga zai ni tlatin ka hria. A hla sak chu  a nalh em em a, a zai pah chuan a tap lek lek zel bawk.

"Hmangaihna biahthu D min hlan lai khan lunglawm a kim ngei e, mahse a der mai maw minlo hlan? Hrilh a hai ngei e, lungrun. I tello chuan ka tlei thei mawlh silo, aw lungrun." tiin a zai hlarh hlarh mai a, a thluk lah chu a nalh phian lenghal. A thunawn ni ngei tur a ni, thawm dim tak siin a aw a tham tiak a, "Mahse ka hmangaih che, ka thinlung hliam mahla, ka thlang ber zel ang che. Duhlai, lengdang tang min belh san hi ka tuar thiam theilo, hrilh a hai ngei e. Hmangaih luat van hian e, bawihte ka dem lo che. Ka hmangaih zel ang che, ka thinlung hliam nen hian ka hmangaih zel ang che..mahse lendun a rem tawh silo."

A zai zo a, beer chu a in khawlh khawlh a. Tunge a sak chhan ka hrelo, a zai mai mai pawh  ani thei. Mahse keimah hi ka lo na tawp a nih chu, ka mittui a lo tla vel. Achhan chu maw, ka hmuh dan chuan Marcus-a hian rilru leh tih takzetin a sa a, a rilru pawh a na takzet a ni tih hi ka ring bur. Tichuan a beer inruahna te chu a la khawm a, a room lam a pan leh ta a.

***************

Ngawiteh, he hla hi ka hre tawh a ni. Ka pa hian ka tet deuh hlek lai khan he hla hi a sa tawh tlat a ni. Nilo, hman kum deuh lawk pawh khan a room ah a sa, ka hria a ni. A thluk pawh ka la hre ve, ka pa hla phuah maw lo ni a? A tir kha chuan ka lo ngaithla liam mai thin a, mahse tunah zet zawng nalh ka ti thar ta riau mai.

Ka phone a rawn ri a, Lal Hannah-i bawk a ni. Chhiar tui lai lai a, a ninawm thin mange. Hannah-i message chu ka han chhiar a, "Bawihte, Andrew-a kha nizanah Mamawii te inah a leng an ti, awi engtin nge ka tih ang?" tih leh tap lai emoji 10 chuang a lo ni. Huiham, mipa lerh zia hi chu.

Ka thiam ang tawk chuan ka hnem a, ka hau bawk. Vawi tam Andrew-a hi then turin ka hrilh a, a lerh ziate leh kei ngei pawh min bem nasat thin zia te pawh ka hrilh fo a, a then thei chuang silo. A han ti ve deuh pung pung thin tak nanga, Andrew-a'n a thiam ang tawka a han thlem kual leh hi chuan a hmin hma leh thei em em bawk si.

"Lo phei teh..ka mamawh che." ala rawn ti zui. Ka va han peihlo tak, chhuanlam ka siam mai dawn mawni ka ti hman hial. "Lehkhabu ka chhiar laklawh lutuk a." han ti dawn ringawt mah ila a chi bawk silo. Umm...chhiarna hun ala tam dawn chauh alawm, va inhnem tap leh pur phawt mai teh ang.

***************

Tlai lamah chuan ka haw leh ta a, Diary erawh ka chhiar tawh ta lem lo. Chaw kan ei fel hnu chuan dawr ah ka kal a, ka dawr kalna ah tak mai chuan vawiin lama kan rel hrep Andrew-a ngei chu a lo awm a. Rum deuh hian minlo melh a, melh pawh ka melh tha ve peih lo. Ka lei zo chu ka chhuak a, a rawn chhuak ve nghal.

Min zui reng a, mahse ka hmulo der tlat. A tawpah chuan min rawn ko ta, "Puite..lo ding teh." a rawn ti vak a. Keipawh chu ka ding a, min rawn pan hnai a. Ngaina lo tih hriat tak hian ka lo melh hraw mai, "Enge?" ka ti hmuk ringawt. "I va tawngthei ve a.." a ti ringawt a, ka va han ngei tak. "Enge i sawi awmzia?" ka lo ti ve hlur mai.

Rum zet hian min melh a, "Engtik laiin nge hmeichhe dang ka phurh a, hmuh pawh min hmu em ni?" a han ti leh khur khur a. A hmel pawh ka entha peihlo, ka ten ngawih ngawih a ni mai. Ka chhan mai loh avang chuan, "Mizo tawng i thiam lo mi?"  min han ti leh kher a, ka insum thei ta biklo.

"Enge i sawi awmzia? Tinge i thinrim ringawt a?" ka ti let ve sak a, zep lo chuan mipa a ni a, ka hlau ve deuh. "Zep kual angai lo, Hannah-i bulah dawt phuahchawpin min lo hek thin tihpawh ka hre vek, a thiannu mah nila kan inkarah hian rawn inrawlh tum suh." min tih khum anih kha. Ka sa zak mai, "I zak em? I lerhkual san char char tih pawh ka hre vek, ka thiannu ania, ka khawngaih ve a ni mai." ka ti ve ta sak mai.

A thinrim hmel kher mai, "Hmeichhia te te si.." tih pah chuan min hnek anih chu, ka hawi sawk mai. Ka mittui a rawn tla nghal, tu mipa mah hian kut min la thlak lo asin. Miin min hmulo aniang, tumah an lo kal lo. Min kalsan pah chuan, "A lehpekah chuan i chak lo viau ang." tiin min vau zui hram a.

Min hnek lai khan ka au lemlo a, chuvang pawh chuan tuman min hmulo aniang, zan a lo ni bawk nen. Ka rilru na lutuk chu inah ka tlan lut a, room ah ka lut nghal. Khumah ka bawk a, ka tap zawih zawih mai. Ka mitah tak a ni lehnghal a, a va han na teh reng em. Darthlalangah chuan ka in en a, awii..a duk kulh lehnghal.

Ka va han haw tak em, ka bialpa pawh ni tawp silo, ka thiannu bialpa daihin kei kut min thlak hi ka hrethiam theilo. Ka pa a rawn lut a, ka mit duk chu a hmuh ka hlau si, ka kun nghal vat a. Ka khumah chuan a rawn thu a, "I hmel tilang rawh.." a rawn ti ringawt a. Hreh chung chung chuan zawimuangin ka hawi chhuak a, ka mit a rawn hmu chu a thinrim tih ka hrethei nghal.

A lu a bu nghauh nghauh a, "Tunge?" a ti leh ringawt. Tap insum tak chung hian, "Engmah anilo, Pa.." ka ti dek dek chu vin lek lek hian, "Tunge...tufa nge..tunge a pa?" a ti ta khur khur mai. Sawi lo chi a ni tawh lo, "An..Andrew." ka ti thei tawk a, ka tap nghal. Ka pa bul anih vang nge, ka tah a chhuak ngawih ngawih.

Min kuah let a, "Natuk zingah ngaihdam dil tur chein a lo kal ang, abak chu i thu thu a nimai." a ti a, a tho thut a. Kawngka lam a pan nghal a, alo hawilet leh a, "Pu Tluanga fapa naupang ber saw tiraw?" a rawn ti leh hram. "Umm." ka lo ti leh a, a chhuak ta a. In ka luh lai khan sitting room ah ka pa kha a lo awm reng a, mit hup leh tap chunga ka room lama ka chho kha minlo hmu a ni ngei ang.

Engpawh chu nise ka hlauthawng angreng kher mai, ka pa hian Andrew-a kha lo va khawih hrep ta se, phuba a rawn la mai angem? Min pawngsual duh hial ang tihte thleng chuan ka ngaihtuah hman a, ka hlau rilru angreng khawp mai. Hannah-i'n a hria anga, min kawm duhloh phah mai ang tihte pawh ka hlau, mahse a ngam chuan min han kawmlo na teh se!

Chutia ka inngaihtuah chhung chuan dar 8 a lo pel leh daih tawh, ka tah pawh a chhuak tawh lemlo. Anih chuan mahni pate tlangval lai thawnthu chhiar leh mai loh chu tihtur a awm chuanglo, bialpa lah ka nei ve der mai silo. Luck loh vang pawh a nilo, ka duh khirh ve em a ni. Engpawh nise, diary chhiar chu tan leh phawt ang.

****************

Zing alo ni a, ka duh aiin tukin chu ka tho tlai tlat. Dar 7 a pel duai tawh mai, rang tak chuan ka intifai nghal a. Rawng ka bawl dawn chiah a, chi(salt) ka lo nei tawh miahlo. Ava han haihawt theih thin ve, thawh tlai nen. Kan flat bulah hian dawr hi pathum chiah a awm a, dawr dang awm leh chu kea kal phei chuan hla tawh tak a ni.

Chuta karah tumah an lo la inhawng lo zui, ava hit lo tak. Ka inngaihtuah vang vang hnu chuan thenawmpa chi va dil mai angai ta, zak deuh reuh tak chung chuan a room ka va pan a. Kawngka chu kikin, "Marcus, i tho tawh em?" ka han ti vel phawt a. Second 10 vel hnuah chuan a rawn hawng a, a bungrua a lo pack mek.

"Enge ni ta?" tiin lo zawt vat a, mahse ka thil dil ber pawh chu ka dil mai lo. "Tinge?" ka ti ringawt, a chhan chu haw mai tur insiam a ang tlat. "Eng chu maw?" a lo ti leh hu mai a, a air bag leh suitcase te chu ka va en a. A hrethiam ta, "E..nia, hei haw ka tum a." a ti a, ka down vek theiin ka hria.

"Engtikah?" tiin ka zawt leh a, "Vawiinah." tih ringawtin min lo chhang a. Ka nui tawi tak mai, "E, anih chu...kan inkawm tan dawn chauh amaw tia, haw hma iva tum ve?" ka ti leh a, anipawh chu zalo tak chuan a nui ve suk mai. "Nia, ihh..ka awm rei tawh alawm, ka nu leh paten lo haw tawh turin min ti a." a ti leh a.

Ka awm a nuamlo vek thei hial a, him tawh dawnlo ang tlat te hian ka inhria. Tawng leh tur pawh ka hre mai lo, ka ding ngawi reng a. Amah bawk chuan, "Enge ni reng reng?" a ti leh takah chuan ka harh zawk mai. "Ihh..englo, chi ka nei tawhlo a. Dawr a inkhar vek sia, ka lo dil tawp che." inthlahrung tak chuan ka ti a.

"E..anih chu..ka nei teuh alawm." tih pah chuan bowl a la a, chi chu tam tak a chhunglut a. Min rawn pek pah chuan, "Kha le, bowl kha chu duhleh i nei nghal mai dawnnia." a ti a, chhanlet dan tur pawh ka thiamlo. Ngawi reng chuan ka room lam ka pan leh a, rawng ka bawl chhunzawm ta a.

Chawi ei pawh a tuilo ruih mai, ka mizo thian kawmngeih awmchhun a ni ve rih asin le. Chaw te ka ei kham a, ka inbual fai a. Ka insiam a, tichuan room chu ka chhuahsan ta a. Pawnah chuan Uber-ah a bungrua te chu a lo thun malh malh a, driver chuan a lo pui ve bawk a. Ka va pan hnai a, "Ka ngai dawn hle mai che." ka va ti ringawt, ka inring hman hlawl lo a ni.

Ka sawi tawh si a, ka zak lek lek mai. Min nuih a, "I number minlo pe la, kan inbe thin dawnnia." a rawn ti thut mai, ka zia huai theiin ka hria. Hnial chi anilo, ka number chu ka pe nghal a. "I hnathawh zelna turah duhsakna ka hlan che aw...mangtha phawt le." a ti deuh thlap a, a vawikhatna atan kan inchibai ta.

"Mangtha le, tluang takin i thleng dawnnia." tiin ka vai liam ta a, ka enzui vawng vawng mai. Ka ngaizawng anilova, ka duh heklo. Mahse vai tlangval pali te laka min chhanhimtu, ka Superman, ka thenawmpa hi hei aia rei deuh chu han inkawm leh ka chak a ni. Amah hi ka ngaina nghal riau a, mipa dang hi ka be hmasa zen zen ngai lo.

Mood fuhlo tak chuan office lam chu ka pan a, ka phurlo hle mai. A ngaite ang bawkin Rosy lah chuan TLuanga chu min sawipui deuh sek lehnghal a, ka khua a sik hial dawnin ka hria. Ka rilru ah chuan Marcus-a bak tumah dang an lenglo, ka ngai nghal ngawih ngawih mai a ni. Nileng mai chuan ka zawi nguai reng mai a, ka hnathawh chu ka tui hlawl lo.

Kan bang ve leh ta hram e, taxi ka phar vat a, ka haw nghal nal nal. Ka room zawn ka thleng chiah, lehlam ka va en zeuh a. Thenawmpa room hlui chu ka han melh a,  kawngka chu tala nen a lo in kalh hmak. Ka hnuk a ulh hial dawnin ka hria, ka thian kawm ve ber a ni asin le. Inchhungah chuan ka lut a, ka lung a leng nghal kher mai.

Chaw pawh eilo chuan khumah chuan ka mu tawp a, ka muhil nghal bawrh bawrh. Musrcus-a room hlui ri rak thawm chuan min ti harh a, mithar an lo awm dawn a ni ngei ang. Khumah chuan ka la mu reng a, chaw pawh ka ei peih tawh chuanglo. Ka muhil leh hman tep tawh, mahse guitar ri chuan min ti harh leh zawk mai.

Verandah atang chuan zai ri ka hre leh ta, ka harh tulh tulh mai. Ka tho vut a, verandah ah chuan ka chhuak nghal. Ka va hawi phei chu e..kha Superman thla neilo bawk kha a ni. Mahse a haw tawh sia, ka mumang a ni silo. Bruno Mars hla When I Was Your Man tih hla chu a sa a, a va han nalh tehkher em.

Enge ka hriat ni..room atang chuan ka han tlan chhuak nghal ngawt a. A room kawngkhar chu ka va kik a, a zai lai pawh a tawp chat. Pen ri ka hre zawm zat a, kawngka chu a rawn hawng ta. Marcus-a ngei a ni, min lo en hu mai. "Ka bengchheng mah mah em ni?" tiin inthiamloh hmel tak chuan a nui a. "Ihh...mahse, tukin khan.." ka ti bah nuai mai a, "Lo lut rawh." tiin ka banah chuan a pawt a.

Verandah lama min kaih phei pah chuan, "Ka haw leh peih thlawt lova, landlord pawn min vin hrep mai." tiin a nui sen sen a. Thutthleng pakhat chu Verandah lamah chuan a la chhuak a, min thuttir a. Beer a rawn phawrh a, "I duh ve em?" a tih chuan ka han ban ve nghal mai a, ka zak leh angreng tawp.

"I lo kal ta sa sa, zanin chu inkawm mai mai ang." a ti a, guitar chu a han perh lehnghal a. Beer chu ka la ta sa sa, ka han khek phuan suah mai a. Sip zeuh zeuh pah chuan, "Enge kan sawi ang?" tiin bul ka han tan a. A ngawi vang vang a, "Zai ila..zawi te te in.." a ti a, ka zaithiamloh zia hi ka hriat tir dawn teuh lo. Nui suk chung hian, "Aaa..ka zai ngailo, nangmah zai rawh..ka lo ngaithla ang." ka ti a.

"Ka zak deuh.." tiin a khi suk a, a lawmawm reuh tawp. "I zaithiam em kha, nizanah pawh i zai ri kha ka hria." ka han ti vel a. Mahse mak ti hmel leh zak hmel pawh a pu lo, "Ka hria alawm..verandah atangin min rawn en tih pawh ka hria." a ti ta mai. "Ehe..engtin?" ka ti hu ringawt a. Ani lah chuan, "Tukhum mit ka nei alawm." tin a nui huah huah a.

Zai tura ka ngen nasat em avang chuan min zai sak ta, "Ka lawm e, duhtak. I nihna diktak min hmuh tir avangin..i duhthlanna a ni a, sawi theih ka neilo. Duhtak, ka demlo che. Ka thinlung kawltu chu nang chauh i ni, min venhim sak ang che.". A satu in thiam viau mahse, a hla pawh nalh hle mahse, a thluk pawh lung kuai viau mahse ka thinrim tawp.

Engdang vang anilo, a hla thu kha a tlawm mah mah a ni. Mahse a sak lai khan a mitah ka en reng a, lungngaihna thuk tak a nei tih ka hmu thei tlat. Ka zawt duh lemlo, "A nalh lutuk, tu hla nge a?" tiin ka zawt a. A nui suk a, "I awihlo maithei, ka phuah a nia.." a tih chuan ka rin lawk reng a ni.

"Sa zo law law la.." a duh tlat lo, thildang a sawi zel. "Sak zawh duhloh chhan a awm te a nilo maw?" tiin ka han fiam zeuh a, guitar chu a bulah chuan a tung a. Beer chu a in khawlh khawlh a, a inzo thak mai. Meizial a tan a, "Lily...hmangaih i nei ve tawh em?" a rawn ti deuh hlawl mai. Ka lo ner deuh suk a, "Hmm..tinge min zawh a?" ka lo ti a.

"I phakar, ka zawt hmasa che, min chhang phawt rawh." tiin a nui a. Ka ngawi deuh vang vang a, "Ihhh..neilo niang. Ka pa hi ka hmangaih em a, ka nu leh ka u in min boral san tawh a...mahse bialpa angah hi chuan...ka neilo aniang." ka ti nuah nuah a. "Avan pawi ve...a zialo kher mai." a ti a, "A pawi hleinem." ka lo ti vat a.

Mahse a ngawi leh daih, "Anih nang?" tiin ka zawt ve ta a. Chung lam a melh vang vang a, "Nei thin." a ti ringawt a. "Ka hriat ve chi te a ni em?" tiin ka han fiam zeuh a, min rawn en a, a nui suk mai. Meizial chu a han pak khu leh luih a, "Thil hlui an sawi an sawi ngailo.." a ti leh daih. Zan a rei deuh tawh bawk nen, mut zai ka rel ve ta. Kawngka bul thleng chuan min thlah a, "Muttui le, thenawmnu." a han ti kher a, kan in mangtha ta.

**************

Nizanah khan ti chin chiah khi ka chhiar, ka muthilh san daih a nih chu. Ka la tho tlai em em zui, ka tlan ve hman talo. Ka phone ka han en chu missed call a lo tam em em lehnghal a, ka lo silent daih vang anih hi. Diary pawh ka khum ah a lo la awm a, ka chhiar chin chu ka chhinchhiah a, ka dahtha leh ta a.

Chaw eidawn tepah chuan kawngka a rawn inkik a, "Lo lut rawh." tia ka pain a han chhawn chu ka rinloh tak a ni. Andrew-a hi a lo lut a, "Puitei a awm em?" a rawn ti ta mai. Ka phu zuk mai, ka hlau lek lek bawk. Ka pa chuan, "Awm e, heta hi a awm." a lo la tizui, min rawn hmu fuh ta. Ka hlau hman kher mai, min rawn pan hnai a.

Ka pi chuan, "Enge ni ta?" a lo ti hu mai a, ka pi phei chuan Andrew-a hi a hre kher lovang, apa Pa Tluanga chauh a hria ang. Inthlahrung tak hian, "Englo ania ka pi, ngaihdam rawn dil che u ka duh a." a ti ta daih mai. Nizanah khan ka pa hian enge maw a lo tih le, a thu sawi a dik tak tak. Ngaihdama  arawn dil ang che atia, min rawn dil tak tak nia.

"Eng thilah maw?" a lo ti hu mai, ka pa melh zeuh zeuh pah chuan, "Ihh..nizanah ka bialnu chungchangah Puitei nen hian kan inhnial a. Kut ka thlak palh a, ngaihdam ka rawn dil a nih hi." a ti khur dar dar a. Ka pi chu a thaw hak a, rum zet hian ka pa chu a melh nghal khur a. "Bawihte, engtin nge i chhan dawn?" tiin ka pa pawh chu a lo tawngchhuak ve a.

"Um...a pawilo...a ho lutuk." ka lo ti zawi sap a. "Ka lawm e, ka ti leh tawh ngai lovang." naupang chhiah ang mai chuan a han ti leh deuh thlap a, a haw ta a. A chhuak chiah chu ka pi chuan thinrim tak hian, "Mama, naupang mai anla nih saw.." a ti a, ka pa lah chuan, "A ninawm..min hau hlek suh." a lo ti hlur mai.

Ka pi chuan, "Patling pui si, tha taka sawi theih reng ani. Hetia thil tih pung pung hi sim teh, i fanu ania ka hrethiam che, mahse tlangval ang maia khatia.." a tih lai chuan ka pa chu a tho thut a, ka pi pawh a ngawi hmak. "Ka fanu neihchhun ania, tuman a mittui an tihtlak ka phallo. Keimah anga hrehawm leh rilru na anih ve ka phallo, ani tal hi chu ka venghim ang." a ti ta khur khur mai.

Khati em em a ka pa thinrim kha ka hre ngailo, chutah ka pi a vin lehnghal. Room ah  alut hmak a, ka pi pawh chuan a zuilut ve nghal a. Ka pa thinrim kha hlau hle mah ila, min hmangaih zia leh min duat zia ka hriat chian lehzual phah a, a nuam phian mai. Mahse keimah anga hrehawma a awm ve ka duh lo a tih kha enge awmzia ka bo ta thung ani, a chhanna erawh ka nei reng thung, diary mawlh mai kha, ka chhiar zel a ngai dawn chu a nih hi maw, ka SAYANG em em te u, ka han chhiar lehnghal ange aw...

***************

Ka alarm a rawn ri ral ral a, nizan lam thenawmpa nen kan inkawm rei deuh bawk nen mut ka kham lo ngei mai. Ka lu a na bur a, Office kalloh mai te chu ka duh rum rum. Peihlo zet chuan ka tho a, ka inphih harh a. Beer cane khat lai ka lo in zo ve thak bawk si a, lu ala hai muai muai mai, ka dose hi a hniam ve hrim hrim a.

Mahse Marcus-a la haw mailo tur leh, ala cham rih tur chuan engemaw tak chuan min ti hlim riau mai. Chaw ka ei kham a, ka insiam lai chuan kawngka kik ri ka hria a. "Tu tak chu ni maw?" tiin ka han hawng chu Marcus-a  alo ni reng mai, "Good Morning." tiin min rawn nuih seih a. Keipawh chuan lo nuih let ve in, "Morning, enge ni ta?" ka lo ti a.

Inthlahrun hmel tak hian, "Aaa..vawiin ilo haw hma dawn em?" tiin min zawt deuh thut. "Haw hma pawh ka ringlo, ban hma tum hi kan nei ngai meuh lo." tiin ka lo chhang a. "Umm..dar engzat velah nge i lo haw ang?" a ti leh hram a, engtak chu sawi tum nimaw.."Tali dar 6:30 atanga dar 7 velah ka lo thleng ang." tiin ka chhang leh a.

A thaw hak a, "Englo ania..ihh..zanin ah ka room ah chaw eidun ila ka tia..ka sawi awmzia chu..hei..ih..ka sawm ve che a nih chu." a tih chuan ka lo en deuh hu mai a, mak ka ti em a ni. Chutia ka han en ta chu a inthiamloh hmel hle mai, "I duhloh pawn apawilo, chutia..englo lampang nilovin, hei..thenawm lawk ah i awm a, ka eisiam te pawh..i ei ve anga." a ti bah leh nuai mai a.

A lai ve deuh tih ka hria a, ka nuih aza angreng hle. A tawng mawlh mawlh lai chuan, "A hma thei ang bera lo haw ka tum ange." ka lo ti vat a, a thaw huai mai. "Ummm..ka lo nghak ang che." a ti a, a room lamah a phei ta a. A va han nuam chiang, ni e..mahni chauh a chaw ei hi chu a nuam lo em a ni.

Lunch Break a ni a, Rosy nen chuan inkawmin thil ei pah chuan kan titi dun mawlh mawlh a. KA phone message a rawn ri a, ka han en chu ka rinloh lutuk a ni. Marcus-a message a lo ni a, "Zanin kha ka ring vek tawh che a nia." a la rawn ti hram. Chuti khawpa chawi ei puia sawm ansa chu ka hnial hran lemlo mai pawh a nilo, a nuam ka ti ngawih ngawih zawk.

"Umm...ka lo kal chiang ang." tiin ka thawn let a. "Dar engzat velah nge ilo thlen ang?" tiin min rawn thawn leh a. Ka nuih aza zawk, hepa hian engemaw a hriat ni ti rilru nauh nauh chung chuan, "Dar 6 velah lo thlen ka tum ang." tiin ka reply a. Chutia kan titi lai tawp san hmak a phone ka khawih chu Rosy chuan mak a ti deuh a ni ngei ang, "Tunge i text a?" tih pah chuan ka phone chu a rawn en a.

"Eheu..Marcus maw? Khawilam tlangval nge a?" tiin min rawn nek deuh kher a. Nui chung hian, "Ka thianpa thar a nih hi, ka room bul chiah ami." ka ti a. Rosy chuan min han melh deuh hraw a, "Fimkhur rawh aw...mipa hi nel nghal vak suh, kan mizo puite ngei pawh nise." a han ti ve khanglang a, ka nui huk mai.

"Nui suh...ka fiamthu lo." a han tih chhunzawm zat a. Ka nui lui leh sak, "Tluanga saw min sawipui tawhlo la animai, chubakah bialpa ang pawhin ka belo hrim hrim." ka ti ve deuh ngat a. Tlai alo ni a, kan hna lam chu kan buai leh ta tulh tulh mai. Khua a thim meuh chuan ban a lo hun ve leh ta, ka va han chau thin tak em.

Haw ka chak zek zek tawh, motor ka chang a, ala vang em em mai lehnghal. Rosy hi chu midangte nen inkawmin an awm hnufual thin a, kei erawh ka peih ve ngailo. Inbual leh chaw ei hi chu ka thawhpui tam zawkte hi chuan Office-ah an ti nghal vek a, inthlakna room pawh a awm ngei a. Mahse kei erawh haw kher ka duh thin thung, thlan tla hluam hluam pawhin ka haw tho zel.

Ka thleng ta, ka room lam ka pan chho nghal a. Ka thawm a lo hria a ni chek ang chu, ka room ka thlen dawn tep ah chuan a room atang chuan Vanlalsuperman-a chu a rawn chhuak a. Min han hmuh chuan a lawm hmel kher mai, "Iva lo haw hma ve." tiin a sana a melh zeuh a. Ka lo nuih a, "Nia...ka han intifai phawt ange aw.." ka ti a, room ah ka luhsan ta a.

Fai takin ka inbual a, ka civil dress ah pawh a nalh ka tih ber te chu ka thlang chhuak a. Ka han inhnawih rimtui leh kher a, a tullo viau em tih erawh ka hrelo. Tichuan a room kawngka chu ka va kik karh karh a, minlo hawnsak vat a. A room chhung ka han lut chiah chu e, ka ril a tam nghal rawih rawih thei hialin ka hria.

Arsa fry rimtui zet mai hi a nam chum chum a, mipa flat ni ve si, a fai hian a fai em em mai lenghal. Ahma zan kha chuan ka hmu tho a, mahse light a off then vang nge, ti em em hian a fai tih ka hrelo reng reng. "Lo thu rawh...fridge ah khan beer a awm ang, i duh leh lo in la..min lo lak kep ve law law dawnnia." a han ti zung zung a.

Rei tak inhre tawh leh inkawm tawh ang maiin min be bawrh bawrh a, a tira a induh tehreng nen, a mize danglam ta lutuk chu a nuam phian mai. Choka lamah chuan a che deuh char char a, minute 10 hnu velah chuan a rawn phei a. Ka bulah chuan a rawn thu a, "VAwiin lamte hun i hmang nuam em, i chau em?" tiin min rawn zawt a.

Ka lai lek lek zawk, "Chau love, chawi eiah te min sawm duh a, ka lawm takzet." inla polite fahran chuan ka han ti vel a. A nui leh sen sen mai, "A ei theih reng tawh a, i ril a tam viau em? Kan ei nghal mai dawn em ni?" a ti a. "Aih, tam love. Beer hi inzo ila, kan ei dawnnia." ka lo ti ve mai a, beer indun pah chuan kan titi dun a.

A pa Officer a nih thute, a nu pawh Sawrkar hnathawk a nih thute leh amah pawh English Lecturer anih thute chu a sawi a, chhungkaw khawsa ve thei tak chu an ni ngei ang. Keipawh chuan kan chhungkaw chungchang te, ka nu leh ka unaupa thihdan chungchangte chu ka sawi a, kan titi tui dun kher mai.

Chaw chu kan ei ta a, aww..chawhmeh han rimtui hlawm zia chu e..ka lei ka lem mai dawn. A rimtui hlawm kher mai, mahse ka duh ai chuan a changkang mah mah thung. Spoon leh fork hmang chuan chaw chu kan ei a, han eiteuh chi pawh a nilo, ka zak ve deuh. Mahse a chawhmeh siamte chu a tui em em a, kei Lily Zothanpuii, thingtlang pa fanu hian duhtawka kut ngeia bar teuh ka va chak tak em.

Ka duh anga tam pawh ka ei ngamlo vel, puar chuang miah silovin, "Ka puar e, a tui hle mai." ka han ti vel luam a. Ani pawh chu a ei kham a, "Thleng ka lo sil ang." ka tih chuan a phallo nasa mai. "Angailo, keiman ka sil ang." a ti tlat a, kan inhnial deuh nak nak a, inhnial lah hi a thiam phian lehnghal.

A tawpah chuan ka chau deuh bawk nen, kan inhnialna ah chuan a tlawm zawkah ka tang ta a. Thleng chu a sil a, kei erawh Verandah ah thilfim ka lo dawng thung a. REilo teah chuan a lo chhuak ve a, "I puar tak tak maw?" a rawn ti a. Keichuan, "Puar e, i ti mak thei emai. Chaw eiah min sawm a, ka tan chawhmeh tui tak tak i siam a, thleng tal te chu min siltir ve tur ania." ka lo ti nuah nuah a.

"Nilove, ka tihtur alawm...la leng ve hrih rawh aw.." a han ti a, a nuam veng veng mai. Inla zei tak hian, "Chaw eikham veleh a ka phei leh nghal daih ten, a mawi lo awm emai." ka lo ti vel ngei a. Kan thu dun a, meizial chu a tan a, a zu khu leh ta tual tual mai. Kan ngawih dun vang vang hnu chuan, "Zu ka heh hmel i ti em?" a rawn ti leh thut mai.

Ka nui vak vak a, "Teh thut zel che hian, zu pangngai i in thin ami?" tiin ka zawt a. Min rawn melh a, "Enge zu pangngai chu?" a rawn ti hu mai a. "Awww...zu pangngai, hei..whiskey te, rum te hi..beer vel nilo.." ka han ti chu a nui a, "Beer pawh zu tho alawm." a lo ti a. "Hmm...ani bawk lo." ka ti ringawt.

"Anih leh enge a nih?"...ka ngawi vang vang a, "Beer.." ka ti leh ringawt a. A nui huah huah a, "Nia..umm..ni mai rawh se.." a ti a. Zanin atang ngei hian a ni he Superman thla neilo, Marcus Hmingthanzuala nen thian kan nih tan tak ni. A fel em em a, kawm a nuam a, a bula awm a nuam a, mahse a tawng duh em em lo.

Hun a kal zel a, kan inkawm ngeih telh telh a, ka rin ai takin a tawng duh a, fiamthu a duh phian bawk. Kei ngei pawh chuan chaw eiah ka sawm ve ta fo a, mahniin kan ei ngai ta meuh lo. Rosy phei chuan kan inngaizawng amaw a ti hial tawh, mahse kan inngaizawng lova, thian chauh kan ni. A ruka ka duh pawh ka hrelo, mahse ka bul hnaih ah hian awm reng se ka ti a, a lo haw har deuh phei chuan ka ngaihtuah thin khawp mai.

Ngaihzawng chungchang erawh kan sawidun ngai hauh lova, mahse keimah zawk hian hmeichhia ta na na na chu, ka rilru a hah deuh leh kan Manager ten min tawngkhum nat deuh chuan abulah ka vui thin a, ka tap lek lek zel. A thiam ang tawkin min hnem thin a, fiamthu hmanga min tih hlim hram hram a tum thin.

Min zai sak tur hian ka ngen fo thin a, a tirah chuan han hnial viau thin mahse a tawp a tawpah chuan a zai leh nge nge zel. Hla lar leh nalh tak tak a sak rualin ama hla phuahte chu a sa tel zeuh zeuh thin a, ava han zaithiam uchuak bik tak em. ZAithiam lar a nilo hi amak ka ti zawk hial, a aw hi a special lutuk ringawt.

Nikhat chu ka day-off a, nilengin kan bazar dun vel. Sana ka leisak a, ani erawhin thi(necklace) nalhzet leh to zet mai min leisak thung. "A to lutuk angailo, i bialnu pe zawk rawh." awt rilru tak chung si a ka han hnial der vel chuan, "Tunah chuan ka bialnu ni hrih mai rawh." tiin min leisak lui ta tho a nih kha.

He mihringpa fel na em em chu...tikhawp hian kan inkawm ngeih tawh a, mahse a kutthawh zawng emaw, a tenawm zawng leh zahmawh zawngin vawikhat pawh minla awmpui lova, a kuthlei zawngin min la khawih hlek lo bawk. Vacation hmang mai mai ni si, a haw peih tlat lo kha a chhan ka zawt fo thin a, zan khat chu, "I bula ka awm chak vang.." tiin min chhang mauh mai.

Kan riak dun em lova, mahse chaw chu kan eidun ziah tawh thung. Rawng hi minlo bawl sak ziah a, a siam tui thei em em mai lenghal. Best friend tih tur khawpa inkawm ngeih chu kan la nilo maithei, mahse thian tha tak chu kan ni ve chiang a ni. Hun a kal zel a, thla 2 lai chu a ral leh tawh. Achhungten lo haw tawh tura an hrilh thu leh an ngaih tawh ziate chu min hrilh thin a, la haw lo se ka ti kher mai.

Mahse awm reng thei a ni silova, kei erawh December ni 16 hma chu ka awm reng a ngai thung si. October thla tawp lam a ni tawh a, kum tawp lam kan hnaih ve ta hret hret a. Zan khat chu a hlimlo kher mai, a chhan ka zawh lahin min chhang tha duh miah lo. Tichuan atawpah chuan min hrilh ta, "Kar khat chiah ka awm tawh ang, ka haw ngei ngei angai tawh." a ti ta mai a.

Ka down leh ta vek mai, ka tum nghal bur a, ka hnuk a ulh bawk. Ka insum zo lo, ka mittui a tla hial. Ka mittui chu a kut chuan min hruk fai sak a, "Hey, naupang chhia ang maiin tinge khatia i tah a?" a ti a. Kei lah chuan tah aw tuau hian, "Ka tap lo bawk." ka lo la ti hmuk zui. "Nakinah chawlh i rawn hmang anga, Mizoram lamah pawh Pathian zara kan dam chuan kan inkawm zel dawn alawm." tiin min hnem a.

Hemi zan hian kan intawn atanga a vawikhatna atan kan inkuah ve ta a, ka la thlah mai phallo zui. A palian bawk a, kuah a nuam thur thur khawp mai. Ka ngai lawk nghal em em a, a ruala haw ve daih mai te chu ka chak rum rum hial a ni. A haw hnai tawh bawk si a, kan manager te bulah chhuanlam siamin ka damlo der a, office chu ka kallo hmak hmak zel.

Nilengin a bulah ka awm a, a hmel ka hmu tawh lo tur chu ka ngai ngamlo a ni. Vawikhat mah mipa hmangaih hi ka la nei ngailova, thian ang leh bialpa ang pawhin ka la nei ngailo hrim hrim. MAhse Marcus-a hi chu ka thiantha tak ani a, ka unaupa ang maia min venghimtu a nih avang hian ka hmangaih ka tilo theilo, mahse ngaihzawng ang nilovin ka tih tawh kha.

******************

Ka phone a rawn ri leh ta, chhiar tui lai lai a. Ka phone chu ka en a, awii..ka va han chhang peihlo tak. Lal Hannah-i bawk a ni, min rawn ankhum dawn niang. Ka pa khan a bialpa lerh zet Andrew-a kha a lo khuai nuai deuh a, engtin chiah nge a tih ka hrelo. Chu chu thinrimin min rawn ankhum a tum ani ngei ang, ho emai...ka hlau lo.

Phone chu pick up in, "Enge?" ka han ti nghal hlur a, inhnial kha ka inring sa ve hrim hrim.  Mahse ka rin loh tak maiin zaidam tak hian, "Pui...ka then.." a rawn ti ringawt. Ka lawm zia chu sawi hian a siak lo, "Tak tak ami?" tiin ka zawt nawn leh ngat a. "Aw, bialpa ka nei duh rihlo.." a rawn ti leh a.

Diary chu ka en vang vang a, "Hannah, ka rawn leng dawn." tiin phone chu ka dah a. Diary chu ka wardrobe ah ka dahtha leh a, Lal Lily leh Father-a te hi an lerh tan ta riau mai. Zanah ka chhiar zawm leh mai ang, Father-a pawh hi a zei tan dawn riauvin ka hria. Ka insiam sawk sawk a, Hannah-i te in lam pan chuan ka kal ta a.

**************

Nileng mai chuan Andrew-a chu kan rel hrep, ngaihdam min rawn dil vel te kha a chawh hi ka han ti hnuhnawh leh khawp a. Tlai dar 3 velah ka haw chauh, in ka thleng chiah chu ka inbual nghal a. Fai veng vawnga diary chhiar leh ka chak et et tawh, ka diary chhiar lai hi thawnthu ngaihnawm tak chu ava han ni chiang em.

Mahse ka inbual zo chu ka piin thil leiturin min tir chhuak lehnghal a, ava han ninawm thin tak. Thil lei tum dawra intlar kha kan thahnem bawk a, ka haw meuh chuan khua a thim tan leh der tawh. Chaw ei a hun nghal dawn mai si a, chaw eikhamah law law chhiar leh mai ang. Ka chhiar chak tawh lutuk chu chaw ei pawh a tuilo, khawrh 2 chu ka han ei leh hram tho a.

Tih tur zawng zawng ka tihfel hnu chuan ka phone chu ka charge hmak a, ka silent daih bawk. Rilru pe taka chhiar ka duh, tuman min tibuai lo se. Lily Diary chu ka la chhuak leh ta a, chhiar tak tak hmain thlalak vel chu ka han en leh phawt a. Mahni pa mah nise, a tlangval lai hian ka pa hi a lo van hmeltha chiang tak em.

Ka chhun lo em em mai lehnghal, a chhe lai lai ka chhun amaw tih mai tur a ni. Ka pa tlangval lai thlalak leh tuna ka pa hmel hi ka enkawp hian danglamna em em pawh a awm hranlo, chhe te chuan a hmel a tar ve deuh chauh  a ni. Tunthleng pawh hian bemtu a la nei tih ka hria, ka thian thenkhatte phei chuan an star hial a, an hmu chak hi chhuanlamah keimah min kawmtur angin an lo leng fo zel. Um..chhiar leh tawh ang...

************

"Kawng laka in chawlh apiangin min rawn phone ziah ang che, i thlen veleh min hrilh bawk la..". Naktuk zing maiah a haw tawh dawn a, a ban chu ka thlah thei mawlh lo. A kutah chuan ka vuan a, a awmah ka bei a, duat takin min chul heuh heuh a. "Christmas chawlh veleh i lo haw ve dawn tho alawm, a rei tawh nang...Pathian zarah kan dam anga, kan inkawm chhunzawm zel thei dawn lawm." tiin min hnem a.

Kan pahnih hi chuan inngaizawng ang mai kan ni, kan inkalsan hlei thei lo a ni ta ber mai. Amah pawh chuan min hawsan mai chu a hreh ve hle tih ka hre thei, hlim hmel reng a pu lo. Chutiang bawkin keipawh ka mittui ka hru reng mai, "Marcus, a nuam pawh ka tilo." ka ti deuh chhen a, ka ngai dawn em a ni.

"Bialpa i nei em?" a rawn ti deuh thut, ka thinrim lek lek zawk. "Enge chu chu tunah i rawn sawi daih a?" ka ti deuh hlur a. Zaidam tak hian, "Bialpa min neihsan anga, min theihnghilh daih ang tih ka hlau alawm." a ti a, ka van ngei tak. A awmah chuan ka chum deuh taih a, "Bialpa lam ka ngaihtuah lo hrim hrim, nei chu ni ila tunah tak hian a thik ngawt ang che." tiin zalo tak chuan ka nui suk a.

Ani pawh chu rawn nui vein, "Thiktu che an awm ve maithei asin." a han ti zauh a, inla luck vel lutuk. "Ummm..nia, duhleh bialnu 70 chuang pawh lo nei mahla, ka ngai che alawm. Minlo thik vel mai mai hlawm teh se, tuman min tluk chuanglo ang." ka han ti ve deuh kher a, min chhang lemlo, a nui var var ringawt.

Hetia abula ka awm a, ka kuah a, a bana ka vawnte hian engmah feeling kan nei ngailo. Ni e, feelings engemaw tak chu a awmlo theilo, mahse kan inthianthatna thuk zia chiah ka feel thei.Ka bianga han piai zeuh te, min dek vak te leh SAYANG tia min koh hi chu a ching reuh phian a, Sayang awmzia pawh ka zawt fo.

Min hrilh duh mai lo, mahse ahnuah DUHTAK tihna anih thu min hrilh leh tho a. Keipawh chuan chutiang tho chuan ka ko thin a, kan hming pangngai hian kan inko zeuh zeuh chauh. La cham rih se ka tih tehlul nen, ka thu a ni der silo. Zing dar 2 thleng chuan a flat ah chuan kan dawm dun a, a tawpah chuan kan inthlah ve thei ta hram a.

Zingah pawh chuan hma takah ka tho a, a thawmhnaw vel leh bungrua vel te chu ka buaipui sak vek a. Zing dar 6 leh a chanve vel ah chuan Uber pawh a lo thleng ta, ka tha a zawi vek thei hialin ka hria. Ka mood a fuhlo ngei mai, ka hnual ruih mai. Driver chuan suitcase te chu a dah lut a, Marcus-a pawh a kal a hun ta.

Ka kutah a vuan a, "Tha takin hna thawk rawh aw...ka thlen veleh ka lo bia ang che." a ti dam diai a. Sawi tur pawh ka hrelo, ka kuah ringawt. Amah pawh chu a  hnuk a ulh ve tepin ka hria, "Tluang takin le." tiin kan inthlah liam ta. Ka hmuh theih chhung zawng chu ka en char char a, an tlan liam ta.

Aw..ka va han ngai tak em, ti em em a mipa ngaih hi ka la neilo. Nileng mai chuan ka ni nguai reng a, ka tha a tho lo takzet. Rosy pawhin zawhna tam tak min zawt a, dawt ka sawi char char hnuah chuan, "Rose..Marcus-a'n min haw san." tiin ka tap tawp. Min kuah a, "Bawihte, chuvang chauh chuan maw hetia i awm?" mak tih hmel tak chuan min zawt a.

"Um..ka ngai lutuk a, a chhan pawh ka hrelo." ka ti leh ringawt a, ka la tap tawp theilo zui. Rosy chuan ka mittui chu min hruk sak a, "Bawihte, i hmangaih em ni?" a ti ta hlawl mai. Ka lu ka thing a, "Aih..hmangaih lo..ka thian chauh a ni. Ka thian a nihna ang chuan ka hmangaih alawm, ka hmagaih lutuk." tiin ka chhang a.

Mahse Rosy chuan a ring hauh lo, "Nilo, i hmangaih alawm. I thian ang nilovin, mipa a nihna angin i hmangaih a ni." min ti a, mahse ka pawm lo. Kan inthianthatna hi kan pahnih chauh lo chuan tuman an hrethiam velo, "Anilo, Rose...i hrethiam lovang." tiin ka hnial a. "Kum hei leh chen kan inkawm tawh, tiang em em a mipa i ngaih hi ka la hrelo, i hmangaih hmasa ber a ni tih hi pawm tawp mai rawh." ala ti zui.

Tlai kan ban hnu pawhin ka flat lam chu pan mai lo chuan Rosy te inah ka leng a, kan titi leh hrep. Marcus-a room kawngkhar lo inkalh hmak tur chu ka hmu duhlo a ni, mahse ka hmu lo thei silo. Dar 8 velah chuan ka haw ta a, engtik laiin nge ka thlen pawh ka hrelo. Ka room lam ka han chho chu Marcus-a flat kawngka chu a lo inhawng huau mai, amah a ni dawnlo tih chu hre tho mah ila ka han kik hram a.

Vainu dum zet hi a lo dak a, "Kya?" a rawn ti heu mai. Inthiamlo tak chuan, "Aa...engmah nilove..lehlamah hian ka awm a, ka rawn dak mai mai." ka Hindi thiam ang tawk chuan ka chhang a, "OK." tih ringawtin min la chhang zui. Chung te lek pawh chuan ka hnuk a ti ulh thei hial, ka over mah mah em tih erawh ka hrelo.

Ka phone chu khawihin a message ka nghak char char a, mahse engmah a awm lo. Dar 12 rik hma hret chuan ka ngai lutuk chuan ka call ta tawp a, ala tlang theilo zui. Verandah atang hian a zai ri han hre leh thut ila, ka va zuang phei duh hial ang. Hmeichhe naupangin a pa  angai em em ang mai hi ka ni ta berin ka hria, ka bialpa ni miah silo ngaih vanga ka tap ta hawm hawm mai hi ka inhrethiam lo.

Ni 3 lai a liam ta, Marcus-a message reng reng ka la hmu chuanglo. Ka thin a rim hlur tawh, min rawn biak hun chu ka va vin nasa dawn tak em. A chak lovang, a chak dawnlo hi a ni tawp. Amah ka ngaihtuah lutukna lamah ka project pakhat ka tisual palh a, Manager Suraj-a'n min hau hrep lehnghal.

Kar khat a liam ta, Marcus-a chanchin engmah ka la hre chuanglo. A thi nge a dam pawh ka hrelo, ka call lahin out of service a inti zel bawk si. Accident a tawk ta mai em ni? Nge ni a misualin an ru bo zawk? Ka mangang a, nui sen sen thin kha ka nui khat ta khawp mai. An veng chu ka hria, Mizoramah awm ni ngat ila chu ka va kal tawp ang.

Zan khat chu phone call ka dawng a, number ringawt a ni. "Hello?" ka han ti chiah chu aw nalh tak mai hian, "Lily.." a rawn ti thut mai. Ka phu nasa lutuk, Marcus-a aw ngei a ni. Ka lawm rual rualin thinrimna hlirin ka khat nghal, "Engvangin nge.." ka sawi zo hman lo. "Lili, Lily..please...ka insawifiah thei, thinrim suh." a rawn ti nghal zuah zuah mai.

Ka ngawi tawp, "Hello..Lily, tinge i ngawih daih?" a rawn ti leh rauh bawk sia. "Um..sawi rawh." ka lo ti hlur a, lawmna leh tihtauhna hlirin ka khat. Inthlahrung tak hian, "Lily, ka phone min ruksak a...ka haw lam khan.." a ti ta mai a. Ka lo uipui lutuk, "Iphone kha maw?" ka ti vak ringawt, kei tak hi chu aw!

"Aw ni e...a thar ka lei lehnghal tho a. Mahse i number kha ka hriatpawlh ta aniang, ka risk vak vak a, mi 10 chuang chu ka call sual tawh." tiin a rawn nui vel a nih chu. "Anuih pawh nui suh, ka ngaih zia che hi i hria em?" ka tap titih leh nghal der mai. Zaidam tak chuan, "Ka tihpalh lutuk, i thinrim dawn tih pawh ka hria alawm..tluang takin ka thleng e." a han ti a.

"Anih leh i phone chu in hmulet ta miahlo em ni? Tunge a rutu chu?" tiin ka han zawt leh a, "Hmu let nang, a thar ka lei reng hi..ka ui ania awww...phone ai mah chuan i number kha ka ui ber." a han ti vel a, dawheh lutuk. "Hmmh, ka number ui si tinge i by-heart mai loh?" ka lo ti vin hlur a.

"Ka by-heart alawm, ka rilru i a chaklo em a ni. A tir kha chu ka hria a, mahse a tawp lam number kha ka hriatpawlh deuh a.." chhuanlam siam thiam lo ve tak chu a ni. Tlaivar thakin kan inbia a, ani pawhin min lo ngai tawh hle mai. Han kuah leh vawng vawng mai kha ka chak a ni, mahse kan awmna a inhlat tawh ropui si a.

ZIng thawh hma ka ngai si a, ka la be tui bawk si. Khamlo tak chuan, "Kan dah tawh mai dawn em ni? Naktuk zingah ka tho tlai palh ang.." ka ti a. Ani chuan, "Ni e, mu tawh ang. Mut hmain thil ka lo zawt lawk che.." a han ti leh a. "Enge ni?" ka lo ti vat a. A ngawi vang vang a, "Lily, mipa leh hmeichhiate hi thiantha tak an ni kumkhua thei angem? Ka sawi awmzia chu mipa leh hmeichhiate hi best friend an ni thei em?" a rawn ti daih mai.

Han chhan vak ngaihna ka hrelo, "Ihh..ni thei awm tak..hei keini pawh.." ka ti bah nuai ringawt. A ngawi vang vang a, "Tinge min zawh?" ka ti leh a, "Ka zawt mai mai che...muttui aw." a ti leh daih bawk si. "Umm..naktukah kan inbe leh dawnnia." tiin phone chu kan dah ve thei ta hram a.

Thla a muang leh sawt mai, mut pawh a tui miah miah teh e. Zingkar kan thawh veleh atangin kan inbe lehnghal a, bialpa ka mamawh hlawl lo. Chubakah bialpa nei ka tum hrihlo, Marcus-a hi a thik dawn lutuk. Ka tan pawh bialpa thlan fimkhur a ngai dawn hle mai, Marcus-a nena kan inthianthatna thukzia hrethiam chin tan lo chuan ngaihzawn mai mai theih ka ni lo.

La ngai viau tho mah ila, phone hmangin kan inbe reng thei tho a, ahma ai chuan a zia deuh. Ka hna lamah pawh rilru ka pe leh thei ta, min fuih nasa a, a fanu ang maiin thutha tamtak min hrilh thin. Rosy lah hian, "I bialpa Marcus-a" a la ti ziah zui, a pawi ka ti lem lo. Buaina ka neih changte, ka hna lama harsatna ka tawh changte pawhin engkim ka share a, a thiam ang tawkin min hnem fo thin.

Bialnu pakhat chiah ala nei tih min hrilh a, a hming chu Marina-i a ni. Mahse an inngaihzawn dante, Marina-i nena an chanchin hrim hrim hi a sawi duh ngailo. Ka zawt lui peih lemlo bawk, keipawhin ka bialpa chhe ve te te ho kha ka sawi ngai bik lemlo. Vawikhat pawh kan thawhpuipa Tluanga bawk khan hmaichhanah min bem ta nge nge a nih kha, bialpa ka neih thu ka lo sawi hmak.

Bialpa chu nei chuanglo mah ila, ka duhlo ve thlawt a ni. Tunge a nih min zawt hial a, "Marcus Hmingthanzuala.." ka han ti chang fak mai a nih kha, a hmel awmdan mawlh mai kha, ka khawngaih zawk. Chu pawh chu Marcus-a ka hrilh a, zanrei lamah kan nui dun chiam, kan sual thiam dun ve a nia.

***************

Zanin atan chuan duhtawk leh rih phawt teh ang, mut a chhuak emai. A ngaihnawm ka ti tulh tulh, Lily hi tunah khawnge a awm ka hre chak ngawih ngawih. "A fanu ang maiin min zilh thin.." a tih lai tak kha chu ka lo thik tep, a fanu neihchhun chu keimah ngei zawk hi ka ni. Ka over deuh pawh a ni maithei, mahse ani pawh kha a over ve tho emai.

Lily Diary chu ka thil neihte zinga hlu ber a ni ta hial mai, a tira ka chhiar peihloh tehreng nen. A chang chuan ka chhiar laite hian ka roomah hian ka pi hi a lo lut thin a, min rawn nuih leh suk zel. Lily hi tunge a nih a, enge ka pa nen an inlaichinna tih pawh chu ka zawt tawh ngai lemlo, chhiar chhuah ngei ka tum tlat.

Mahse a chanve em pawh ka la chhiar thleng lo chu ania, engtak thleng zel ang maw? An inthianthatna kha a awhawm ka ti ngawt mai, ka pa ang mipa hi awm leh se, keichuan thian atan mai nilovin bialpa atan ngat ka duh ang. Bialpa pawh ala nimai lo, pasal atan ngat le. Ka nu nena an intawn dan tal hi chu ka zawt khawp ang, min la hrilh ngai miah lo.

Keipawh hian ka zawt ngai lemlo a, sawi tak ang khan a hmel pawh ka hmu chiang ve hman miau lova, ka nu mah nise chuti lutukin ka ngaihsak lemlo. Mahse Lily diary ka chhiar atang hian ka nu hi tunge a nih ka hrechiang chak tlat anih chu, Lily leh ka pa inkarah a lo tlazep reng tihna em ni ang?

Nge ni a, Lily leh ka pa kha an inhmangaih anga, mahse ka pa hian ka nu kha a lo chetsual pui palh zawk? Kei hi sawn ka lo ni reng em ni? Mahse ka pi kha chuan dan khatna in an innei a ti bawk si a, ka hrethiam tawh biklo. Tin, Marina-i hming ka hmu zeuh bawk a, ka pa bialnu hlui kha. Henu hi tunge a nih ve tak? A chanchin erawh a sawilang tel ve silo, nge nia ka la chhiar thleng lo zawk?

Tuna ka duh ber chu Lily hi atak ngeia hmuh a, engkim zawh chian ka chak ta ber a ni. Zawhna hlirin ka khat a, ka piin he diary hi min pek nachhan leh chhiar ngei tura min tihna chhan pawh hi ka la hre chuanglo. "Engkim i hriat a hun ve tawh a ni.." a ti ringawt a, zawt eng ang mah ila, "Chhiar zo phawt rawh." tih bakin min chhang leh dawn chuanglo.

Engpawh chu nise, ka mit a thip tawh lutuk. Mu phawt ila, sawi tak ang khan exam chawlh lai a ni bawk a, engmah ka ti ngai chuang hleinem. Zing atangin chhiar leh ila, ka nileng hna a ni leh mai. Mu phawt ila, khua te lo var se, Pathian zara kan dam chuan chhiar zawm leh nghal char char ani mai.

****************

Zing thawh veleh a phone en hmasa ber thin kha tukin chu a harh veleh a ka ban hmasak ber chu Lily diary a ni tlat, ka mumangah thleng ka hmu nia mawle. Ka thu tha a, tichuan la mal chungah chuan diary chu dahin ka keu leh tan ta. Ka rilru an khawih dun tan riau lehnghal a, a ngaihnawm tulh tulh bawk si.

************

Hun alo kal zel a, December thla kan lo chuang kai leh ta reng mai. Ka haw hun a hnai tial tial a, ka phur tawh takzet. Ka haw huna kan inhmuhna hmun tur te thleng chuan kan sawi lawk a, kan nghakhlel em a ni. Kan intext reng a, zanah kan inbe ziah bawk. Nikhat tawp inbiakloh kan nei ngai lo, nikhata vawi hnih chiah kan inbe hman anih chuan chu chu kan inbiak tlem ber a ni hial ang.

A tawp atawpah chuan kan chawl ve thei ta, ka va han haw chak tawh tak em. A tuka haw nghal mai chu ka duh a, mahse Rosy chuan a peih tlat bawk silo. Kan chawlh atanga ni 3-na velah chuan kan haw ve ta hram a, tluang takin Mizoram pawh kan thleng e. Mahse ka thianpa duhtak Marcus-a nen hian kan veng a inhlat angreng a, ka thlen niah kan inhmu thei ta lo.

A tukah chuan zing kar atangin ka za zek zek tawh, ka pa nen pawh kan la titi tha hman meuh lo. Marcus-a hmu tur chuan ka insiam ta a, bialpa hmu tur ang maiin a nalh thei angber chuan ka inchei a. Ka pa a hna ah a kal chiah a, Marcus-a pawh a car nen a rawn thleng veleh chiah mai. A car han fai em em zia kha, lirthei lawm ve lemlo tak hian ka en vung vung mai.

Motor atang chuan a rawn chhuk a, a lu a lo met tawh lehnghal. A hma ai daihin a fai a, a hmeltha bawk. Tumah kan zah tawh lemlo, kan inkuah chawt mai. Kei phei chu ka hnuk a ulh nghal der, "Ka ngai tawh lutuk che.." tiin nghet takin ka kuah a. Ani pawh chuan min kuah let a, "Tlemin i cher deuh." a ti daih a nih chu.

"Ka ngai lutuk che a, chaw pawh ka ei tha thei hleinem." tahnuih deuh reuh hian ka lo ti a. Ka hnara piai pahin, "I tahbelh emai.." minla ti zui. Motor kawngkhar chu min hawn sak a, "Sayang...lut rawh le." a han ti deuh thlap kher a. Keipawh chu ka lut ta a, "Khawnge kan kal ang?" tih pah chuan a rawn thu lut a.

"Ka hrelo, khawnge niang?" ka lo ti a, kan han ngawi dun vang vang phawt a. "E..ka hria, tlan pahwt ang." tih pah chuan motor chu a ti nung a, kan tlan ta a. "Khawiah nge min hruai dawn?" tiin ka zawt char char a, "Hmun nuam deuh ah.." tih ringawt chuan min chhang zel a. A tawpah chuan school tlang niawm tak bulah chuan a ding a, ka vawikhat kalna a ni.

"Hei hi khawilai nge?" ka ti hu mai a, mahse min chhang duh miah lo. Motor atang chuan a chhuk a, ka thutna lam kawngkhar chu min rawn hawn sak leh thlap a. "Minlo zui rawh.." tiin ka banah a vuan a, step ah chuan kan chho ta a. Thui vaklo kan chhoh hnu chuan thingkung luan deuh mai hi a lo awm a, a hnuaiah chuan thutthleng sei a lo awm bawk.

Chutah chuan kan thudun ta a, "I hmalam hi han en teh.." tiin hmalam chu a kawk a. Ka han en chiah chu ahma khan hmureng tho mah ila, a mawizia ka hre chiah. A thengthaw nuam em em a, in tam tam tak tak te chu kan awmna atang chuan te hlawm tak an ni. "Anuam lutuk.." tiin ka nui a, "Ka favorite spot a nih hi." a lo ti a.

Tichuan kan inngaih zia thute, ka hna chungchangte leh amah pawhin hna a join leh tep tawh thu te chu kan sawidun a. Nileng mai chuan kan leng kual a, restaurant ah te kan chawl dun a, tam tak kha chuan min lo notice dun deuh bik a nih chuan inngaizawng amaw min ti chiang ngawt ang. Aizawl khawpui hmuhlohna pawh a rei ve tawh bawk a, thla tlemte mah nise lung te pawh a ti leng deuhreuh tlat.

Tlai lam deuh hret ah chuan haw ve kan tum ta a, motor lam chu kan pan a. Kan thleng tep tih ah chuan hnunglam atang hian mipa aw hian, "Hmingthanzual." a rawn ti a. Kan hawi rual dun a, mipa pathum an lo ni. Pakhat chu lo kal hnaiin, "Khawnge i kal a?" a rawn ti a. Marcus-a chuan nui chung hian, "Ehe Chhana, i dam maw?" tiin a chibai a. Midang chu en leh in, "Khawnge in kal zawk a, kan va inhmu khat ve." a ti leh a.

Chumite chuan Marcus-a tawnglai chu mak tih hmel deuh hian an lo en a, ka hrethiamlo kher mai. Pakhat leh zawk chuan min rawn kawk a, "Hei hi innu thar ami?" ala ti zui. Nui huah huah chung chuan ka darah rawn vuanin, "Nilove, ka thiannu a nih hi..Lily, hei hi ka thiante annih hi, childhood friends. Hei hi Chhandama, chuan hei hi Puia ania, hei hi Amosa." tiin min inhmehriat tir a.

Keipawh chuan nui chungin ka lo chibai hlawm bawk a, Puia chuan awihloh hmel tak hian, "Ka ring chiah lo, i bialnu thar ani chiang mai." a ti tlat a, ka lai lek lek mai. Marcus-a chuan min han en a, "Hetiang khawpa hmeltha leh piannalh engtin nge ka bialnu a nih theih ang?" tiin a nui vel a, midang ho pawh chu nui mahse mak tih ruk deuh an nei tlatin ka hria.

An hmel awmdan atang chuan ngaih an ti thalo hial zawk, a thiante ni si Marcus-a khati taka, vawikhat hmuhna ni awm fahrana an en hu kha diklo chu a awm a ni. Eng enge maw sawiin an nui leh dar dar a, "Zanah lo leng ru aw..." tih pah hian min rawn melh zeuh a. A thiante chu melh lehin zawi te hian, "Ka show vek ang." a ti su su mai.

Amosa chuan, "Yesss..chi dawn lutuk. Ti daih ila, Marcus-a chu thiannu i nei chhelo hle mai." tiin min rawn melh deuh run a, han ngeina em em neilo mah ila a hmel kha ka ten chi. "I van ti lawmawm.." tiin ka thiam thil awmchhun chu lantirin ka han nui leh sen sen a, nuih mawi hi chu ka thiam ve tawk.

A thiante chu an kal ta a, "Kal ve nghal ila." a ti a, motor ah chuan a lut nghal a. Keipawh chu lut vein, "Tinge mak an va tih hmel ve a?" ka han ti ringawt a. "Tute maw?" a lo ti hu mai. "I thiante kha mawle, vawikhat hmuhna che ang maiin an en hu che a, childhood friends kan ni i ti amaw ka tia?" tiin ka zawt a.

Chian deuh hian min rawn en a, "Ka hmelah hian diklo a awm em ni?" hnai takah chuan a rawn ti a. A biangah chuan ka lo piai vak a, "Chutiang lam nilovin, duhawm viau thin suh.." tiin kan han infiam leh phawt a. "I mizia kha mak an tih hmel em a, ka sawithiam lo...mak an ti che a ang ka ti." tiin ka sawi chhunzawm leh a.

A lu a han bu nghat a, "E..chutiang zawk chu maw..an tihdan ve hrim hrim alawm, an mawl khawp anih kha.." a ti sam leh et mai. Kan haw ta a, kan inthleng chuan min thlah leh thlap bawk. Marcus-a chungchang hi ka pa bulah ka la sawi miah lova, inngaizawng kan ni lemlo bawk nen ka sawi vel ta peihlo law law mai.

Zanah chuan an thianho chuan zu an lo in ngei e, ka message a reply lo hrim hrim. Zan dar 12 rik hma hret chuan min rawn call a, a han ruih mai mai zia chu ka thin a rim lek lek zawk. A thil sawite chu a mumal lo, a kawkalh nuai mai. "Ka hmangaih zia che hi e, Non-Stop hi a ni tawp mai....expiry date a awm lo reng reng..i hria em, bawihte.." te a rawn ti vel.

A tawpah phei chuan ka nui char char tawh zawk, "Bangalore-ah khan ka duh chuan a fight thei reng che, mahse mifel ka nia, ka duhlo mai mai anih kha." te a ti tawh vel, pumna vekin ka nui a, ka pa pawh a rawn lut tawp. "Nangmah a mi nui vak vak kha?" a rawn ti lut nghal a, "Aw ni e, ka thiannu nen kan inbia a.." ka lo ti daih a.

"Ava ho mai mai e aw.." tiin a chhuak leh nghal mai a, chutah Lal MArcus-a bawk chuan, "I thiannu maw ka nih a? Thiannu chu mi ti miah suh aw.." te a la rawn ti ta deuh deuh a, awi ka chau vek tawh. A rui tawlh tawlh amaw tih mai tur a ni, a tawng pawh ka hre tha thei tawh lo. "Zu i inin vawikhat mah min rawn be tawh suh...muah ka mu dawn.." tiin phone chu ka dah ta ringawt a.

*****************

Ka pa mai mai chuh, a lo va heh ve awm karh karh hi ka tia..keipawh chu ka nui chhuak hial. Chutah ka roomah chuan amah ngei mai chu a lo la lut thut zui, "Ehee...i la mu amaw tia..kha, lehkhabu te i chhiar ve em ni?" a rawn ti a. Lehkhabu chu khupin ka lukham hnuaiah chuan ka dah nghal a, "Chhiar love, kan zirlaibu ania." ka ti daih.

"In in exam zawh tawh hi, engatan nge i chhiar a?" a ti leh a, ka va buai hman teuh tak. "Aaa...Final Term velah kan zir tur ka en mai mai mawle." ka han ti leh vel a, a awih em ang chu maw. A nui suk a, "Exer i la bawk silo, thawh i hai ni turah ka ngai a.." a ti leh a. "Nia, tukin chu ka peihlo." tiin ka lo chhang a.

"Mahni a nui kur kur lo khan chaw lo ei rawh, nula ve si pate rawngbawl sa ei reng mai." tiin min han kap kher a, ka lo ner khum vak. A chhuak tur chiah chu ka ko ding a, "Pa, lo kal lawk teh." ka ti a, ka bulah chuan a lo thu a. "Enge ni, bawihte?" zaidam tak chuan a han ti a, "Ihmaw pa, anu nen hian engtin nge in intawn?" tiin ka zawt thut mai.

Min en vung vung a, "Tinge min zawh thut a?"...."Ka hre chak alawm...min hrilh ngai bawk silova." ka lo ti a. Ka bulah chuan a rawn thu hnai a, lukham chu a rawn ngheng ve a. Ka kutah vuanin, "Bawihi, i nu kha maw...khawvela hmeichhe nunnem ber leh fel ber a ni. A hmel atha a, a nui hmel a mawi bawk si. A zaidam a, a nun a nem em em a, a rilru a no em em bawk. Amah kha ka nei lovang tih mawlh kha ka hlau, la dam se chuan a duat ve ngawt ang che." a ti a.

Lily chungchang sawi ka tum zet na a ka pi in a phal tlat siloh avang chuan ka zawt ta lo mai, "Anih leh pa, i hmangaih em?" tiin ka zawt a, a ngawi daih. Mahse ahnuah ka lu ah a rawn kuk fawk a, "I mawl em ni? Hmangaih lo ila i rawn piang chhuak nang, betelulian.." min ti hrep mai. Ka lu tuai vut vut pah chuan, "Thil pakhat chiah ka lo zawt leh che.." ka han ti leh hram a.

"Amak e aw...chaw ei hun a nih hi, engemaw mi zawh deuh teh thut le?" tih pah chuan a tho a. "Pa, i tlangval lai khan....anu nen in intawn hma khan bialnu i nei thin em?" tiin ka han zawt leh a. A nui vak vak mai, "Chutiangin mahni pate a zawt vak vak ngailo...neih te chu nei ve e, ka kawp teuh zel.." a la ti zui. Ka tawng leh hma chuan min pawt tho lawp a, "KA rawngbawl sa ei tur pawhin pawm thawh kher ila ngai ania, hahthlak lutuk mai." tiin min pawm chhuak a.

Ka pi chuan minlo hmu a, "Awiii..a hahthlak thin.." tiin a lo nui ve bawk a. Chaw kan ei kham hnu chuan ka pa chu hna kal tur chuan  a insiam nghal mawlh mawlh a, thleng ka sil lai chuan min rawn ko a. A room a ka va lut chu darthlalang hmaah mipa tleirawl lerh tak ang mai hian a sam a lo siam mawlh mawlh mai, "Enge?" ka va ti hlur a.

A neck-tie suih mawlh mawlh pah chuan, "Zanah ka lo haw hunah kan sawi dawnnia, chutia i hriat chak viau chuan. Tlaiah thingpui tui tawk minlo lum ang che, i hria em?" tiin min rawn melh rum vel a. Ka nui var var mai, "Yesss.." tiin ka lo chhang nghal, saptawng te hi hman ve zeuh zeuh tur, changkanna zel ania.

Ka pa chu a chhuak ta a, ka pi pawh tar len hrat tak a lo ni bawk nen, a leng veleh ta. Inah chuan keimah chiahin ka awm leh ta, ka nileng hna tur chu Lily diary chhiar a ni leh mai. VAwiin chu ka va hre hnem dawn tak em, nilenga ka chhiar zawh hnuah zanah ka pa in ka nu nena an intawn dan min hrilh dawn bawk. Engpawh chu nise, chhiar leh tan ang aw...

*****************

A tukah erawh kan inhmu theilo, a pa nen hna an thawk dun dawn tlat. Keipawh chu inah awmin ka pa nen chuan kan titi a, ka hna chungchangte hrilhin kan inbe khat tawh bawk nen kan titi tui dun pafa ngei mai. "Thian tharte i han tawng em?" a han ti chiah chu rilru ah Marcus-a a lo lang nghal zawk mai.

"Ummm...ka thenawm chiah ah hian mizo ve tho a lo awm a, kan inkawm ngeih khawp mai. Nimin pawh khan amah va hmu turin ka chhuak a, a hming chu Marcus-a ania." ka han ti nghal zung zung a. "Mipa maw?" phawk zet chuan a han ti a, "Aw ni e..tinge?" ka lo ti hu mai. "Aaa..eng nilove, mipa annih hi chuan ngaih hi a thalo deuh nghal zel a. Mizoram a ni bawk silo nen, fimkhur a ngai sia.." a han ti deuh luam a.

Nui chung hian, "Awwiii pa, a ho lutuk. A fel lutuk, nakinah leng turin ka la sawm ang. Fel i ti ngawt ang, a polite sia, tlangval fel tak a ni." ka han ti leh chu ka pa chuan min melh run mai. "I bialpa min hmehriat tir dawn amaw ka ti hman alawm, i thian a ni meuh maw?" a ti daih mai, "Hmmh...enge awmzia?" ka lo ti hmuk a.

"A chanchin i sawi danah khan i bialpa  a nih duh hmel zawk em a, engpawh nise i pa Biaka te inlamah ka va phei teh ang. Ka lo haw tlai deuh maithei ania, rawngbawl chu i kutah ka dah aw, Mami.." tiin a chhuak daih, mahni chauh chuan inah ka awm leh ta. Mahnia awm hi chu ka hne tawh a ni, kan thenawmah tho hian Lal Marcus-a te hi rawn insawn thut mai se, a nuam dawn emai.

Chhun thil ei tur ka va lei chu dawr lehlama thingpui dawrah chuan nimin lama Marcus-a thiante ka hmuh zinga mi, Chhandama chu a lo chawl a. Ka han ngaihtuah let a, mak ti hmel taka Marcus-a an en kha ka mitthlaah a lo lang zawk mai. Inhmelhriat chian lehzual nan tiin a chhan zawh ka duh hrim hrim bawk nen, ka va pan ta tawp a.

Ka va biak hma hma chuan min lo hmu chu min lo nuih nghal sung mai, "Ehe..Lily tiraw i nih khah?" a lo ti nghal vat a. Abula va thut pah chuan, "Aw ni e, niminah kan inhmuh kha.." ka ti a. "Khawnge i kal a?Khawi lai nge in veng?" tiin min zawt a, "Helai hi kan veng chu ania, hehe..nangzawk?" tiin ka han zawt veleh a.

An vengte chu min hrilh a, bank-a kal angaih avanga kan venga lo kal a nih thute chu min hrilh a. Inthlahrung tak si chuan, "E taka U Chhandam, nizan khan zu in inho ami?" ka han ti deuh phawng mai a, ka inthiamlo leh hnuhnawh khawp mai. Mahse a lo nelawm phian mai, nui huah huah chung hian, "Aa...amah khan ka show ang che u a ti miau sia.." a han ti a.

Amah bawk chuan, "In inngaizawng amaw kan lo tia, in inngaih hmel sia.." a han tih chhunzawm leh a. Ka nui huk, "Nilove, ngaih chu kan inngai khawp mai. Mahse thian chauh alawm kan nih, thian tha tak kan ni." ka ti a. "Engtia inhria nge innih reng reng a?" tiin min han zawt leh a. Ka thiam ve chhun, nuih sen sen pah chuan, "Bangalore ah, kan flat luahna floor a in ang a, ka thenawm chiah ah a awm a." tiin ka lo chhang a.

Chutah Chhandama hmel chu a serious ta riau mai, "Enteh, induhna chhete mah innei lo em ni?" a han ti chu ka meng deuh hru ringawt. "Engvangin maw?" ka lo ti leh hu mai a. "Aa..englo ania, in inhmeh dawn em a.." a ti leh daih a. Ka zawh duh ber chu ka zawt ta, "Nimin khan Marcus-a in hmuh khan mak in van tih hmel em em..in vawikhat hmuhna ang nimai khan in en deuh hru in ka hria.." ka han ti hlawl mai a.

Chhandama chu a nui suk a, "Ni e, zeplo chuan kan thianpa hlui Marcus-a kha hun rei tak chhung kan hmuh tawhloh hnuah kan hmu leh ta chu ania, mak kan tilo theilo a ni." a ti a, ka bo hu mai. "Enge awmzia, childhood friends inni amaw ka tia?" ka ti leh a. "Ni e, ka sawi awmzia chu maw...ka hrilh tlang tawp mai ang che. Marcus-a hi a bialnu hlui nen an inthen atang khan a mizia a dang vek a, tumah min kawm tawh ngailo. A zia a zawi em em a, inah a inkhung chawt a ni ber mai." a ti a.

"Marina-i a ni em?" ka lo ti nghal, "I hria em ni?" a lo ti nghal vat. "Hrelove, aman min hrilh a..mahse an inngaihzawn dan chanchin erawh a sawi duh ngailo." ka lo ti a. Chhandama chuan, "Ni e, a sawi duh ngai lovang. A na ve em a ni, Bangalore-a a rawn kal chhan pawh kha a rilru tih thawven nan mai mai a ni." a ti leh a.

"Anih leh Marcus-a hi ahmain eng ang mizia nge a put?" tiin ka han zawt leh a, "Mihlim tak, fiamthu duh tak a ni. A fel em em a, thian siam pawh a thiam. Kan mood a fuhloh chang deuh phei chuan an inah kan leng tawp zel, thiante tana inpe tak a ni. Bialnu a neih tir pawh khan mak kan ti a, hmeichhe ngaihsak lo tak ani a, mahse Marina-i kha chu a hmangaih thlawt a ni. Kum 3 zet an inzui hnuah Marina-i chuan a then a, midang a neihsan ta a ni." a ti ta mai a.

Aww...ka Superman-a chu Love-Line lamah a lo vanduai ve hle a nih dawn chu, ka va han khawngaih reuh tak. "Anih leh Marina-i nen chuan an inhmu leh ta miahlo em ni?" tiin ka zawt leh a. "Inhmu ele...Marcus-a ber hian a kalsan thei hlawl lova, an inhmu leh zeuh zeuh. Mahse Marina-i chuan a bialpa thar chu a then chuang silova, Marcus-a pawhin a hmu duh ta bik lemlo. Chaw a ei tha ngai lova, a cher tulh tulh a. Hnem kan tum pawhin min hmu duh ngailo, room ah a tawm tlat zel. Chutiang khawp chuan a la na, kan khawngaih thei asin aww.." a ti vawng vawng mai.

Keipawh chuan ka lo khawngaih ve leh hnuhnawh hle mai, "Bangalore-a a chhuk hma velin an inhmu leh ngai em?" ka han ti leh hram a. "Hmu tawh nang, Bangalore-a a zin te chuan an inbe tawh lo hrim hrim. Khami hma vel khan an inkarah buaina a tam khawp mai, Marina-i hre hru pawh hian a kalsan phal bik chiah silova, kan ngei hlawm ania. An buai hrep tawh hnu khan a rilru na  areh thei lova, intih hlum a tum hial alawm. Hmeichhe pahnih thum vel kha chu a han chhuahpui ve zuai zuai a, mahse tumah a duh thei tak tak lo. Kan thiannu tho pakhat nen khan an inzui leh deuh a, mahse an inngaizawng ta chuanglo." a han ti chu ka beng a verh zawk mai.

Thiannu dang a neih ka phallo te pawh a ni mahna, "Tunge chu nu chu?" ka lo ti vat a. "Kimkimi mawle, Lallawmkimi. Kimkimi hi chuan a duh reng, tun thleng pawhin ala duh in ka hria. Mahse Marcus-a hian thian ang bakin a en ngailo, mahse Kimkimi hian Marcus-a a khawngaih lutuk chu Marina-i runluih nan a lenchhuah pui lui fo thin." a ti leh a, ka hriat belh chak tulh tulh mai.

"Anih leh Lawmkimi te nen chuan inla inkawm ngai em?" ka ti leh a, "Kawm ngai e, nizanah pawh a lo tel ve alawm." ala ti zui, Lal Marcus-a mai mai chuh...min sawm velo amaw...ka va han hau dawn chiang tak. "Tinge engmah min hrilh duh miahloh le.." ka ti nuah nuah a. "A sawichhuak peih vel tawhlo aniang." a lo ti mai a. Chhandama bawk chuan, "Enteh Lily, ka thu hrilh che hi ama bulah sawi suh aw, hria ang pawhin awm suh. I hria tih  a hriat chuan keimah bak min ringhlel dawn chuanglo, min hau nasa lutuk ang." a han ti su su a.

"Anih chuan tinge min hrilh si?" ka lo ti ve deuh kher a, kei lah hi a... "Kan thianpa Marcus-a, Marina-i vanga min kawm tawh ngailotu, tawng tlem tak leh biak hrehawm tak kha nang hian thlak danglamin, Marcus-a diktak, kawmnuam leh fiamthu duh em em..kan thianpa Marcus-a ngei kha nang hian min pe let nimai hian ka hria, chuvang chuan hriat i phu a ni." a ti a.

******************

Ka nu hming ka hmu ta tlat mai, ka nu a lo tel ve reng amaw? Lily leh ka nu chu an inhre dawn tihna em ni? Ka thin a phu dep dep mai, ka nu hi Lily hmelma nge a nih a, a thian zawk? Lily diary a nih vang nge Lily hi ka t(r)an bur tawh mai si a, enge thleng zel dawn? Hmm..ka ril a tam, chhunthil ei phawt ang.

*****************

Ka pa thiante pathum zinga mi Chhandama hi ka hria, Pa Chhandama kha a ni ngei ang. Tun thleng pawh hian an la inkawm a, a lo leng zing thei ropui lehnghal. Mahse Amosa leh Puia erawh hi chu tute nge ni thei awm ang ka hre ta hauh lo, an inawk tawh ngailo pawh a ni mahna. Engpawh nise, chhun chaw ka ei hnem bawk a, chhiar leh tan ang..

*************

Zan a lo thleng a, chawlh lai a lo ni bawk nen, Marcus-a te thianho nen chuan kan leng ho a. Chhandama sawi Kimkimi ngei chu a lo tel ve ta, kan pahnih chiah chuan hmeichhia kan ni. Mahse a fel reuh phian, a rukin Marcus-a a la duh thu te chu min hrilh a, kan innel ta phian a. Thalai chhuak ho ta na na na chu, han sual ve zeuh loh theih loh. Kimkimi nen beer kan in a, mipa hovin zu an in thung.

"Lily, Marcus-a hi duhna chhe te mah i nei miah lo maw?" tiin Kimkimi chuan min zawt a, ka nuih suk ringawt. Ka beer chu ka han lem leh khawlh a, "Duhna te chu nei ve e, ka bulah awm reng se ka duh." tiin ka lo chhang a. "I hmangaih em?" tiin min zawt leh a. Ka lu ka bu nghat a, "Hmangaih e, hmangaih tehreng mai." tiin ka lo chhang leh a.

"In awmdan hi ka hrethiam lo, in ni nge nilo pawh ka hrethiam love. Inngaizawng ang maiin in awm a, mahse thian chauh kan ni inti leh bawk sia. I duh thu leh i hmangaih thu min hrilh leh bawk sia, enge awmzia?"  a han ti chu ka lo hlim ru veng veng mai. A chhan pawh kan inthianthatna thuk zia an man phalo kha keichu ka lawm zawk hial, ni e...tuman an hrethiam thei lovang.

"Kim, ka ngaizawng a ni hleinem. Ka thianpa leh ka unaupa a nih angin ka hmangaih em em a, a tellovin ka awm theilo. Nupui pawh nei dawn se a nupui tur chu keiman chiang takin a mizia ka zir chiang phawt ang, ka duhpui lo a nih chuan ka hau ang. Ka bulah awm reng se ka duh a, ka hmuh phak lohva a awm ka phallo a ni." tiin ka chhang a.

A ngawi vang vang a, "Anih leh min tihpui la.." a han ti mai chu a thil inlai ka phuh thawt mai. "Keiman maw?" ka ti hu mai. A nui ta vak vak a, "Ngati nge? I duhzawng ka nilo em ni? Marcus-a tan hian min phallo em ni?" a han ti vel a. Sawi tur a va vang leh si ve aw, "Nia..kan la ngaihtuah dawnnia." tiin ka lo nui ve ta rinagawt a.

Hetia kan inkawm lai hian pawnah mipa hovin zu an in a, keini pahnih erawh motor chhungah kan titi thung. "Zep lo chuan in inngaihzawng amaw ka lo ti char char a, Lal Marcus-a chu a va lo che rang reuh ve ka lo tia." tiin a han nui leh har har a. Keichuan, "Nia, midang pawhin an ti vek alawm..anih leh Kim, Marcus-a te nen hian engtik atanga in inkawm tan?" tiin ka han zawt a.

"A rei ve leh deuh tawh, Class 11 kan nih lai khan ni ta in ka hria. School khatah chuan kan lut ho chiah lo nangin, Chhandama vang hian khatih hunlai khan kan inzui nasa hlawm khawp mai. Chhandama hi kan veng ami ania, kan inkawm char char thin a." a han ti a. "Anih leh Marcus-a hian i duh tih a inhria em?" ka han ti leh a.

A lai lek lek mai, "Aa..a hrelo der nimai hian ka hria. Ka la hrilh ngailova, mahse ka chezia atang hi chuan a hrethiam em em ang. Chubakah Chhandama te hian an hrilh thin a, mahse a awihlo zel a. Thian anga min kawm duh vangte pawh aniang, chubakah Marina-i nena an nih lai pawh khan ka star daih tawh." a ti leh a.

Marina-i hming bawk chu, henu hi ka hmu chak a ni. Ka naute duat lo tinatu hi ka hre chak khawp mai, ka kek hrep chak ania. Kimkimi bawk chuan, "Anihleh i duhzawng a ni reng reng em, Marcus-a hi?" tiin min han zawt leh a. Ka nui ringawt, "teuhlo, sual ve viau mah ila keichu bialpa nghet leh pasal tur atan chuan ruihtheih thil tilo hi ka duh ber a, han kawp kual vel te, reilote nihpui ang mai mai te hi chu ka peih velo." tiin ka lo chhang a.

"Mi zawng zawngin in inngaizawng amaw anla ti vek ang, kei ai daih pawhin in inkawmngeih in ka hria." a han ti nuah nuah a. Dik chiah e mawle, ke ai chuan an inkawmna a lo rei tawh maithei. Mahse keini kha chu kan intawn dan kha a sial ve thlawt a, vai laka min chhantu ka Superman-a kha  ani bik hliah hliah tlat.

Mipa ho chu lo lutin Amosa chuan, "Inlo chhuak ve duh lova...in fairlo bik emai." a ti nuah nuah a. "Kan lo sawi ril dawn chauh asin le." Kimkimi chuan a lo ti fiamthu a. Marcus-a chu rawn lutin min rawn nui suk a, "Kan haw tawh mai dawn mi?" a rawn ti a. A tlai tawh tho bawk a, haw ka pawi ti tawh lemlo.

"Ni e, haw ang u...i khalh thei ang maw?" ka han ti chu a ner sung mai, "Chutin ka dose a hniam lo...ka buai ngai lo hrim hrim." a han ti vel a. "Nia...i buai ngai hleinem..nizanah pawh.." ka han ti chu min melhrum ngei mai, "Ka sawi tawhlo mai ang." ka ti a, min rawn pen fawk mai. "Ni daih rawh u.." Kimkimi chuan a rawn ti a, kan han nui leh rih a.

Khua a vawt bawk nen, kan haw ta nge nge a. Hemi tum hian Marcus-a thianpa Puia chu a lo kal ve lova, kei leh Marcus-a, Chhandama, Amosa leh Kimkimi te kan ni. Marcus-a nen kan pahnihin a hmaah kan thu a, midang zawng a hnungah an thu thung. A mal te te chuan kan inthlah a, a hnuhnung berah keichu min thlah ta a.

"Lo leng lut la, ka pa pawh ila hmu velo." tia ka han sawm chuan min hnial tlat mai. "A tlai tawh emai, in inah te chuan ka la rawn leng dawn chauh alawm." a ti a, ka sawmlui bik ta lem lo. Kawngka bul thleng chuan min thlah a, "Muttui aw..Sayang." tiin min kuah vawng vawng a, nghet tak chuan ka lo kuah let a. "Nangpawh le, fimkhur rawh aw.." tiin kan inthlah liam thei ta hram a.

Hemi zan atang phei hi chuan Kimkimi nen hian kan inkawmngeih ta phian a, an inah te ka leng vel. Amah pawh a lo leng zeuh zeuh thin a, kan inmil phian lehnghal. Zep lo chuan Kimkimi hi ka hmeichhiat pui mah nise kei aiin a tha ka ti thlawt, a ngo bawk si. Ft 5'5 vel laia sang aniang, mahse kei aiin a tawi ve tlat.

In awihlo maithei, mizo ah hian kei aia sang hi hmeichhia bikah chuan an vang ve ngawi ang. Ft 5'8 lai ka ni ve, mahse ka ngo ve em em lo. Marcus-a hi a height ka zawh khan ft 5'10 a nih thu a sawi a, pheikhawk sang ka bun phei chuan kan inchen chiah chiah zel. Min fiamna ber pawh ka sang lutuk hi a ni, mahse ka pian erawh nalh a tihzia min hrilh fo.

Kimkimi nen chuan kar 2 vel bak la inkawm lo mah ila ka ngaina takzet, he hmeichhe hmeltha leh piannalh, vun no chek mai leh chhelo zet hian ka thianpa Marcus-a hi a duh a, a hmangaih tak tak anih chuan engvangin nge ka tihpui loh tehlul ang. Kimkimi chu ka duhpui ve ta a, Marcus-a bialnu ni ngei se ka ti.

A aia kimchang zawkin Kimkimi hian Marcus-a leh Marina-i te chungchang chu min hrilh thin a, Marcus-a dawhtheih ziate, a khawngaihthlak ziate leh a tawlm thin ziate chu min hrilh a, ka khawngaih takzet. Kimkimi hian a duh thu hi a hrilh ngam ngailova, achhan chu an inthianthatna hi a chhiat phah a hlau a ni.

Marcus-a hian an inah min hruai lut ta fo mai a, fapa mal a ni. A nu leh apa nen chauh an awm a, an inngeih hlawm em em mai lenghal. Apa pawh pa zaidam hmel tak a ni, mahse Marcus-a hian  a hlauh zia leh a zah min hrilh fo thin. A nu lah chuti bawk, an nupa chuan an fanu ang mai hian min duat thiam em em a. Marcus-a erawh vawikhat chiah alo la leng a, chutah pawh ka pa  ala awm lo zui.

Vawikhat chu Marcus-a nen kan inhmu leh a, chutah chuan Kimkimi chungchang chu ka sawipui ta a. "Sayang, Kimkimi hi i nupui tur ni tase, i duhzawng a ni em?" tiin ka han zawt tawp a. "Ni e le..amah ka duh tihna nilovin a fel a, a in enkawl fai thei sia, a che peih bawk si..tiang hmeichhia hi alawm ka duh thin chu.." a ti ta hlauh mai, ka va phur tak em.

"Anih te chuan ni daih ula.." ka han ti chu min melh hru mai. "Lallawkimi hi maw? Ka nihpui ah maw?" a ti vak vak ta mai a, ka ngawi reng ringawt. Chutah a rawn nui chhuak a, "Engtin nge maw ka unaunute chu ka ngaihzawn lul ang le? Mawli.." min ti hrep mai. "Enge i unaunu a nihna? In inchhung em ni?" ka lo ti a.

"Inchhung kher love, mahse ka thiannu a ni a, ka unaunu...nangmah ang thova ka thiannu a ni. Chuvang chuan a theihloh, bialnu min zawnsak te i tum ve khanglang a mi?" tiin min han piai sawk a. "Anaaa...chutiang lam anilo. Amah pawh hian a lo duh ve maithei che asin...amah hi hmeltha i ti hrim hrim em?" ka han ti leh a.

A thaw hak a, "Huiham, nangpawh chu...Chhandamate pawh hian nihpui turin min ti nasa alawm, mahse kan inthianthatna hi a chhe mai ang tih ka hlau alawm." a han ti leh a. "Enge a chhiat ngawt na tur? A nghet sawt zawk ang chu.." ka lo ti sam et a. "Nilove, thian kan nih lai chuan kan infiam a, kan inngam em em bawk. Mahse thian leh thian kan inngaihzawn tawh chuan inkawm ho naah pawh duhangin a awm theih tawh loh, inhauh nikhua phei chuan a nuamlo ngawt ang." a ti a.

"Hmm...a nawmlohna tur ka hrelo." ka lo ti deuh hmuk a. Min han en leh vang vang a, "Ngaithla rawh, lo ingngaizawng ta ila, mahse inthen leh si ta ila. Hmana inkawm thin, inngam em em thin kha thian takngial pawh kan ni thei tawh dawnlo asin. Inthianthatna a tawp hmak anga, chu chu ka duhlo a ni." a ti leh a.

Kei mi hnial hrat ta reng reng chuan, "Inthen hnuah pawh thiantha tak angin a inkawm zel theih tho alawm." ka han ti chu a hmel a serious ta hle mai. Min en miahlo chuan, "Ni e...a theih pawh a ni mahna. Mahse hmangaihna a tel tawh chuan a theihloh, thian a nih leh theih tawh ngai lovang." a ti chang fak fak mai.

A mood a off tan riau dawna ka hriat avang chuan ka sawipui duh tawh hrih lo, a nikhatna atan chuan a tha thawkhat thove. A tum deuh hmuk tawh bawk si a, tlawn lungawi a ngai tlat. A awmah ka bei a, "Umm..anih chu, min nei mai la.." ka han ti vel a. "Ka nei sa reng che alawm." a lo ti a. Nghet takin min kuah a, "Nang hi chu nupui ka neih hunah pawh mopa thianah ka hmang ang che." ala ti zui.

****************

"Puite...ipa alo haw tep ania. Thingpui lo lum rawh, hei arsa ka va en lawk teh ang." ka pi chuan min rawn au lauh lauh a, ka la chhiar tui asin mawle. Umm, dah phawt ila, zanah chhiar zawm law law ang. Thingpui chu ka han lum a, reiloteah chuan ka pa pawh chu a lo haw ve ta a. Thingpui a inzo a, a inthlak a, ka pi pawh a lo haw ve chiah a.

Ka pa bawk chuan rawng a bawl leh ta a, a rimtui leh ta chum chum kher mai. Zana ka pa thil min hrilh tur chu ka nghakhlel em em a, ka ngaihtuah ngut ngut mai. Hriat belh tam tak ka nei leh ta a, engtiang chiahin nge ka nu leh ka pa hi an lo inngaihzawn...rindan ka nei nual mai. Lily chuan a tihpui anga, an ni ta em ni?

Mahse ka pi hian engvanga Lily diary kher hi min pe nge a nih? Ka hrethiam chiah chuanglo, Lily hi ka ngai changtunu ber laklawh ve tawh bawk si. Ka nu hi a changtunu ber chu a ni chho ta dawn em ni..mahse a phek hmasa berah hian "KA HMANGAIH CHE, MARCUS." tih chu Indonesian tawng ngatin a inziak kuau bawk si.

Roomah chuan lutin Lily diary chu han dah that ka tum a, ka la tur chiah chu ka room tukverh atang chuan thli a rawn thaw vak mai. Diary chu a rawn chhem a, a in keu nghal phawk phawk a. Chutah chuan phek pawimawh lutuk a rawn inkeu fuh ta, chu chu ka pa leh Lily an inkiss lai thlalak a ni.

Thlalak 5 vel lai a ni a, an inkiss lai vek ani bawk. A sirah chuan hawrawp mawi em em mai hian, "Ka hmangaih che, duhlai. Ka thinlung zawng zawngin ka hmangaih che, ka thlang ber che." tih a lo inziak a, ka lo ring diklo chiang kher mai. Lily leh ka pa chu an lo inngaizawng ngei e, zep rual a ni ta lo.

Mahse an inngaihzawn lai ka la chhiar thleng silo, ka nu hi a khawngaihthlak viau angem le tih mawh mai chu ka rilru ah a awm a. Ka nu chan hi a lo chhiat viau phei chuan a fanu hi ka rilru a lo na dawn lutuk, chu aia ka hlauh zawk chu ka nu leh Lily hi an inngei ang tih mawlh mai hi ka hlau. Diary chu dahin ka wardrobe ah chuan ka kalh hnan leh thlap a, ka pa chu rawng ka va bawl pui ta a. 

Chaw kan ei kham a, hmun ka tihfel hnu chuan ka roomah ka lut lehnghal. Reiloteah chuan ka pa chu a rawn lut ve a, ka bulah chuan a rawn thu a. "Engmaw i hriat duh chu?" a rawn ti nghal a. Phur zet hian, "Aww...anu nena in chanchin.." ka lo ti vat a. "Eng ber maw? Chanchin te chu kan nghah alawm." a han ti kual leh vel a.

"In intawn dan mawle." ka ti vin hlur tawh mai. A nui huah huah a, "I nu chu maw, nu zaidam lutuk leh inngaitlawm tak ania, i chhunlo khawp mai." a han ti kher a, ka lo ner nung mai. "Engtia innei nge in nih? Hmangaihna avang nge....arrange marriage?" tiin ka han zawt leh a. A ngawi vang vang a, "Kan tlangval lai pawh khan chutin arrange marriage hi kan uar vak bik hleinem, kan changkang ve tawh lutuk. Hmangaih vanga nei ka ni, ka hmangaih lutuk alawm." tiin min chhang a.

"Anih khawiah nge in inhmuh hmasak ber?" ka han ti leh a, "I pa Chhandama saw i hria tiraw? Sawpa sawn min inhmelhriat tir a, ka hmuh hmasak ber ni atang khan hmeltha ka ti lutuk. Mahse chutin kan inngaizawng mai lo, a hnu feah chauh a ni. I nu nen hian kan inngaizawng reilo lutuk, kan inhmangaih em a, kan innei ta vat a nih kha." a ti leh a.

Hreh tak chung chuan, "Pa, anu hi engtianga nasa in nge i hmangaih?" tiin ka han zawt ta tawp a. A rilru ka tina thar leh mai mai tih chu ka hria, mahse a chhanna ka hre duh miau a ni. KA rin ang ngeiin a mittui chu a rawn tling ta teuh mai, "Bawihte, nangmah ka hmangaih ang chiah che hian i nu kha ka hmangaih a ni. Ka hmangaih lutuk, ka thinlung zawng zawngin ka hmangaih a ni." a ti a.

Keipawh chu ka insum thei ta biklo, ka hnuk a ulh ve nghal der mai. "Pa, anu khan min duat ve thin em?" naupang chhia ang mai chuan tap deuh nghal pur mai. Ka kutah a rawn vuan a, "Duat thin e, keimah ai daihin a duat thin che. Mahse a pai lai che khan a damlo vak a, tichuan a vei zui nghal bawk si che a. A neih zawh hnu che khan ni thum lai chu a pawm ve hman che a, mahse a natna kha  a zual zel si a, min kalsan ta a ni." a ti a, a mittui a rawn tla ta hial a.

Keipawh chu ka mittui a tla a, "Anih chuan keimah vang em ni a thih?" tiin ka tap ta ringawt mai. Ka pa chuan min kuah vat a, "I mawl em ni? Chutiang sawi mah ta che...Pathianin hun a ti a, min laksak a nimai. I thiamloh anilo, tuma thiamloh a nilo." tiin min hnem a. Ka inchhir kher mai, "Pa, ka sawichhuak a, min ngaidam rawh aw..mahse anu chanchin hi ka hre chak em a ni. tiin ka tap nasa tulh tulh mai lenghal.

Ka hriat chak rual rualin ka zawt chu ka inchhir leh angreng kher mai, ka pa ka vel tap ringawt a, keilah a aia uarin ka la tap zui. Ka mittui chu a hru hul a, "A pawi love..pa ber zawk hi ka tahbelh lutuk a. Hna thawh tur ka nei a, ka va thawk tan tawh ange aw...muttui aw, ka naute." tiin ka chalah min fawp a, min chhuahsan ta a.

Zanrei tak thleng ka men phah a, ka nu chu ka ngai thar thut mai. Reilote tal chu han hmu ve hman ila chuan a zia deuh tur ania, mahse nu hmangaihna hi ka la tawng der silo. Chutia mahni leh mahni inkhawngaih taka ka inngaihtuah lai chuan ka pa room atang chuan tap ri niawm tak hi ka hria a, ka pa aw ngei a ni.

Pindan atang chuan ka chhuak a, ka pa roomah chuan fimkhur tak hian ka va dak a. Computer screen ah chuan lian tak hian ka nu nena an thlalak chu a lo lang a, ka pa chu a lo tap char char mai. "Kim, ka ngai lutuk che...i fanu hi rawn hmu vela ka van ti tak em. Kum 16 lai a tling ve tawh asin, Duhtak...ka ngai che." tiin thawm dim tak si, chhuak em em hian  a lo tap hawm hawm mai.

Ka va han mawl tak, tinge khatia a hriatchhuah tur leh a lung kuai zawng khera ka lo zawh vel le, ka pa rilru ka tina thar leh ringawt chu ania. Ka van mawl tak, ka room lam chu ka pan leh ta a. Ka pa chuan ka nu hi a hmangaih hle si anih chuan Lily hi tunah khawnge a awm ang? Kan chhungkaw tana pawimawh viau ni si, ka la buai tulh tulh tho mai.

*****************

Zing khua a lo var leh ta, exer lak chu sawiloh, a tum hian ka tum tawh lo hrim hrim. Awmzia a awmlo thei emai, pian a nalh phah ve tak tak chuang silo. Lily ka tluk loh chu sawiloh, ka nu ngei pawh ka tluklo ania. Marina-i erawh hi chu ka tluk ve tep turah ngai ila, mahse khati khawpa ka pa tinatu leh ti taptu kha chu a chhiat vak ka ring lo.

Chaw te kan eikham hnu chuan tihtur pawipawh tak ka nei leh ta, chu chu engdang nilovin angai bawk, Lily diary chhiar bawk a ni. Ka wardrobe atang chuan ka han la chhuak leh ta zal zal a, i han chhiar leh tak tak dawn teh ang. A mood ah cheng leh veng veng ila, ava nuam leh dawn ham ham ve aw..

************

Millenium Centre ah MArcus-a nen chuan kan kaldun leh a, kan inhmeh an ti deuh nge, min en sup sup bik hian ka hria. Teddy Bear lian tawk min leisak a, avan nuam tak. Nileng mai chuan MC ah chuan kan tei kual a, leitur ber pawh kan hre chuanglo. "Hmun dangah kal tawh ila, helai chu a boring emai." ka tih avang chuan chhuahsan kan tum ta a.

Ground floor kan thleng tur chiah chu Amosa kan hmu thut mai, kan pathum chuan kan han titi leh rih a. Chutia kan titi lai chuan hmelchhe chhelo ve pangngai tak, sang tha zeih zawih, sam kir lek lek, a dar chen vel. Hmelchhe lemlo leh pian thiam tak mai hi a bialpa niawm tak nen chuan an rawn nui phei dun var var a, ka hmeichhiat pui mah nise a chhiatloh reuh em avang chuan ka lo en char char a.

Chutah keimahni lam a rawn hawi chu a ding chat mai, mak tih hmel tak hian kan pathum chuan min en ta char char mai a. Ni e, hai rual lohvin a en bik chu Marcus-a a ni. Mitkhap lek lo hian a en char char a, Marcus-a chu ka han en veleh a. Ani pawh chuti bawk, chu nula chu a hriat tawh hnu a ni tih chiang takin a chezia atang chuan alang reng.

Amos-a pawh chu a hrilhhai hmel kher mai, chunu lam chu va hawiin, "Ehe..Marina, khawnge in kal dawn a?" nui lui tih hriat tak chuan ava be ta a. Awle, a chiang ta e. He mihringnu ngei mai hi maw Marina-i chu lo ni a? Ka Marcus-a, ka thianpa, ka naute, ka hmangaih em em Marcus-a lo tinatu chu henu ngei hi maw lo ni a?

Thinrimna hlirin ka khat nghal, mahse ka tilang chuang lo. Marina-i lah chuan Amos-a chu a chhang mai lo, keima lam a rawn hawi ta. Ka teddy bear ken lai chu a en a, ka hmel a rawn en leh a. Marcus-a hmel a en leh a, Marcus-a nena kan kut inkai mek chu a rawn en leh bawk. Za lo deuh hian a nui sak a, "Aa..hei, kan bazar vel mai mai mawle.." a han ti vel a.

Marcus-a erawh hmundang a hawi daih, a aia nghet hian Marcus-a ban chu a han chelh a, ka lo nui lui vel. "Keichu ka kal teh ang, anih u aw Marcus, Lily...anih phawt u aw, Marina..ka kal ange." tiin a kal ta daih mai. Marina-i kalpui pa erawh chuan engkim a man nghal vek tih achiang, a thinrim hmel em em mai lehnghal.

Rum zet hian Marcus-a chu a han melh khur a, Marcus-a erawh chuan hmundang ala melh char char thung. Marina-i chu a lo kal hnai a, "Innu em ni, Marcus?" a rawn ti vel anih chu, ka va han beng chak tak. Mahse Marcus-a chuan a chhang lo, "Sayang, kan kal dawn em ni?" a han ti a, ka lo nuih var var mai.

Kan kal tur chiah chu kei lah ka nghal chak tlat pek a, "Anih ule.." tiin Marina-i chu ka theih pa tawpa rumin ka han melh deuh kher a, a nuam ve hrim hrim. Mahse Marcus-a chu a tawng tha duh ta miahlo, vawi hnih thum vel sawi nawn loh chuan, "Engtin maw i tih?" a rawn ti hu zel mai. A awm ve thove, an inhmangaih thin zia..oh nilo..Marcus-a'n a hmangaih thin ziate kha ka hre ve a, a rilru ah a rawn thar ve leh zawk te pawh a ni mahna.

Ka dem hran love, hmangaih ka la nei velo miau a, engmah sawi theih ka neilo. Motor ah chuan kan thu dun a, kan ngawi dun char char. A kutah ka vuan a, "Kha kha maw MArina-i chu?" ka han ti a. A nui suk a, a lu a bu nghauh ringawt. "A hmelthat kha.." ka han ti leh a. Minla chhang chuanglo, a nui leh suk mai.

"Tinge khatia i awm kher a?" tiin ka han zawt leh hram a. "Aa..ka hmu thut kha mak ka ti em a.." a ti leh mai a. Ala rehlo tih ka hre ta, Marcus-a hian Marina-i hi a la theihnghilh lo, ala hmangaih reng a ni. "Marcus, hawh...kan spot ah khan va kal ang." ka ti a, min chhang lo chuan chak takin a tlan nghal a.

Thingkung hnuaiah bawk chuan kan thu leh ta, mahse kan ngawi dun leh char char tawh. Ka aw ka han thian a, a banah kuah pah chuan, "Tinge....iva tawng duhlo ve..Marina-i i hmuh vang kha animaw?" ka han ti chu min melhrum kher mai. "Teuh lo mai, engmah a nilo." a ti vin hlur mai. Ka kuah nghet leh sauh a, "Ila hmangaih a ni tiraw?" tiin ka han zawt lui leh a, min chhang ta lo.

Tap chhuak chuang miah silo hian a chhungrilah nasa takin a tap hawm hawm a ni tih ka hria, min rawn kuah tawp. Ka lo kuah let a, "Aww..ka naute hi chu...a vanduai mange." tiin a samah ka lo chul sak a. Nui lui tih hriat tak hian a khi suk a, "I naute hi ka puitling ve tak tak dawnlo a nih hi tiraw?" a rawn ti tham tiak a.

"Haw phawt ila, zanah lo leng la." ka han ti a. Mahse a aia nghetin min kuah leh a, "Aih, la haw lovang. Ka la ngai che alawm, ka la haw peihlo." a ti tlat mai a. Reife kan inkuah reng hnuah chuan min thlah ve ta, "Anih chuan haw ila.." a ti a. Kawngtluanin kan inbe miah lo, a inngaihtuah nasat hmel lutuk ringawt.

Kan in kan thleng a, "Anih aw..zanah chuan lo leng rawh aw..." ka han ti a. Chhuah mai ka tum chu ka banah chuan a pawt a, "Lily..lawks." a han ti a. Ka rinloh tak maiin ka chalah chuan a rawn kiss a, "Ka tan hian engtik lai pawhin i awm reng thin a, ka lawm e aw...ka hman chuan ka lo leng ang, chaw eitui le." a han ti chuai raih mai chu ka ngaizawng thei hial dawn alawm le.

Ka lo nui sen sen a, "Umm..nangpawh le." tiin ka chhuak a, kan inthlah liam ta a. Chaw eikham hnu pawhin min rawn be miah lova, a message pakhat te mah ka hmu lo. A last seen a hide daih bawk si, ka mangang tan der mai. Ka call a, ala thei bawk silo. A chauh anga, a muhil aniang tiin ka ngaih ka ti tha lui a.

Mahse dar 10 a rik hnu pawh chuan min la rawn be chuang lo, a reh hmak mai. Ka mangang chuan Kimkimi ka phone ta tawp a, "Kim, Marcus-a i bulah a awm mial em?" tia ka han zawh chuan, "Aw awm e...kan inah a lo leng a..hei ka bula hi a awm. I be duh em ni?" a rawn ti ta hlauh mai.

Ka thaw huai mai, Lal Marcus-a mai mai chuh min va ti mangang hman ve mawle. "Aa..ngailo mai..ka ngaihtuah deuh a." ka ti ta ringawt a, Kimkimi nena an lo awmdun hlauh chu a tha e, chance an lo nei ve te pawh a ni mahna. Mahse a kalna tur min hrilh miahlo kha amak ka ti, a inbual dawn pawhin min hrilh thlap thlap zel kha  ania.

Nge ni kei hian ka lo phut sang mah mah zawk? Engpawh chu nise, Kimkimi bulah him takin a awm a, a tha tho tho e. Ka thla a muang ta sawt mai, hla ka ngaithla a, ka muhil ve thei ta. MAhse ka muhil reilo, ka phone ri chuan min ti harh a. Ka han en chu Marcus-a a lo ni reng mai, "Hello..enge ni Marcus?" tiin ka zawt nghal vat a.

"Lo chhuak teh." a ti ringawt a, a dah daih. Tawng pawh ka tawng ve hman lo, ava han ti buaithlak tak. Ka bialpa pawh nilovin zanlaiah min ko chhuak dawn chu ania, mahse min kotu hi KA SUPERMAN kha a ni miau sia, chhuah loh ngam loh. Hmeichhe tamtak pawh an hmangaih te tan zanah chhungte hriat lohvin inhmu turin an chhuak ru daw daw alawm le, engvangin nge kei thingtlang pa fanu hi ka thiantha berin min mamawh anih chuan ka chhuah ngam loh bik ang?

Ka pa lah chu a hnar ring em em mai lenghal, ka room atang pawhin a hriat theih. Hmeichhia zanlaia chhuahruk hrat ang mai chuan ka han chhuak ru ta zal zal a, a zei pawh ka lo zei phian mai. Kan garage bulah chuan Marcus-a chu a lo ding vang mai a, ka va pan nghal vat a. Min hmu chiah chu ka banah a pawt vak a, min kuah ta vak mai.

"Lily...ka ngai lutuk che." a han ti vawng vawng a, ka thaw theilo tep. "Awihawm loh emai, vawiinah pawh nilengin kan awmdun reng kha.." ka lo ti deuh hmuk a. Min la thlah chuang lo, "Ka khamlo alawm.." a ti leh ringawt a. "Hmmh..zanin pawh khan i reh hmak a, ka lo leng ang i ti ve a, Kimkimi te inah i leng daih anih kha." ka han titau der vel a.

A nui huk a, "I thik animaw?" tiin min han melh vang vang a, "Awii teuhlo mai..ka lawm zawk. Kimkimi nen hian in inhmeh dawn emai, ni ngei ngei ru." ka lo ti a, a ner nung mai. Ka chalah min pen fawk a, "A teuhlo mai, sawi ziah suh." a lo ti deuh hmuk a. "Anih chuan tinge kan ina lo leng lova, an inah zawk i len si?" ka ti ve deuh ngat a.

"Nahh..ipa ka hlau alawm." a han ti daih a, phakar lutuk mai. Ka han titau kual leh vel a, ka bialpa nilo mahse bialpa te bula tihtauh a khat tawh bawk a, a nuam reuh phian. "Kimkimi hi kei aiin i ngaipawimawh zawk.." ka han ti vel a, lehlam ka han hawi vel ngei a. Ka hnug atang chuan min rawn kuah a, "Titau lola, ka teddy bear leisak che kha lawmthu pawh min la hrilh lo." a ti a.

"Engtia lawmthu sawi nge i phut a?" ka lo ti leh hmuk a, "Ihh...naktuk zanah dinner eidun ila, min treat la.." ala ti zui. Pawisa neihloh mah nak alaia, "I hausa fe zawk." ka lo ti hlur mai. Kan inngai ve thlawt a ni, inngaizawn ni miah silo chuan zanreiah kan garage ah kan han inkuah hlu hlu mai chu ania.

Reife kan titi dun hnu chuan a haw ve ta a, kei pawh chu spy tawkin ka room lamah chuan ka han tleng lut leh ta anih kha. Ka pa lah chu a lo la hnar ring em em lenghal a, bialpa neih hunah pawh ka thiam ve tawh dawn khawp kha. In a thleng chiah a, min rawn call leh nghal. Darkhar fe kan inbiak hnu chuan kan mu ve thei ta hram a, mahse ka la ngai tho.

A tuk zingah chuan Kimkimi chuan min rawn phone a, "Awii mate, ka lawm zia chu. Awm ngaihna pawh ka hrelo, ka hlim veng veng mai." a rawn ti chiam chiam mai. "Enge ni? Marcus-a'n a bem che em ni?" ka'n lo ti ringawt a. A nui vak vak a, "Nilove, chu aia lawmawm chu a ni. Marcus-a pa leh ka pa hi an inkawm thin a, tukin khan apa a lo leng a. Inneih chungchang an sawi..Marcus-a leh keimah." a ti ta mai a.

Ka phu zawk mai, ka lawmpui dawn nge dawnlo ka hrelo. Sawi tur ka hrelo a ni ber mai, "E..a..ani maw? A nih chu.." ka ti bah deuh nuai ringawt. "Niang chu...a rukin minlo duh reng aniang, a sawilo mai mai aniang." a han ti leh a, a hlim ngei mai. "Kim, Marcus-a pa chuan a rawn sawi tak tak amaw? Engtin nge a rawn sawi?" tiin ka han zawt a.

"Awii..ka hre mumal tawh lo. A nuam hi a ni tawp mai, inneih chunchang an saiw kha ka hre hlur a animai. Chuan ka pa pawhin min hrilh a, Marcus-a ka duh zia leh ka hmangaih zia te ka hrilh tlang nghal vek." a ti leh a, a rak chel chul maiin ka hria. Chhan dan tur ka hriat mai loh avang chuan ka ngawi reng a, "Lal Lily, nang hian i zep chiang. Marcus-a hian min duh ve anga, a hrilh che anga, min hrilh duhlo hi a nilo maw?" a la rawn ti zui.

Ka nui lui ve ta vak vak a, "Nilove, ka hrelo tak tak. Ka van lawmpui tak che, i vannei e." ka ti a, mahse a ruk tak chuan nuam ka tilo. Marcus-a'n nupui min neihsan chuan kan inhmu zen zen thei tawh lo anga, mi pasal lungchim taka lo kuah vawng vawng te kha a rem tawh dawn silo. Kimkimi hi ahma khan lo duhpui viau mah ila, an inneih em chu ka lo ring ngailo asin.

Tinge Marcus-a pawh chuan engmah min hrilh loh le? Nizana Kimkimi te ina a len chhan te kha ka ngaihtuah let a, a duh ve tawh a ni ngei ang. Mahse Marina-i a hmuh khan a mizia kha a dang leh em em bawk si, engmah awmzia ka hre lo. Innei lo se ka ti ngawih ngawih pawh a nilo, mahse ka thiantha ber ka chan dawn ang tlatin ka hria.

**********

Ngawi teh, chhiar zawm zel hmain...enge awmzia? Marina-i a rawn lang ve dawn chauh a, ka pa chu ka nu nen an innei nghal mai ang maw? Engthil emaw tak chu la thleng chhunzawm zel turah ka lo ngai a, mahse an va innei hma dawn ve? Nge ni kei hian ngaihdan ka lo siam hma lutuk zawk?

Diary ka en hian a chanve dawn lai chu ala awm a, chhiar tur ala tam angreng. Ngaihdan ka lo siam hma lutuk deuh aniang nge, mahse ka nu leh ka pa innei tur chu ka lo hlim veng veng mai. Ka nu kha a ni miau a, Lily pawh khawngaih viau mah ila ka pa hi a bialpa ni miau hek lo. Lily leh ka pa han inkiss lai vel chu ka chhiar chak tawh emai, ka zun achhuak, ka'n zung lawks.

***********

Tuk thuan pawh ka ei mumal thei lo, ka rilruah chuan Marcus-a leh Kimkimi ringawt an awm. An innei dawn amaw? Engvanga Marcus-a hian engmah min hrilh lo nge a nih? Ka thin te a rim dawn hialin ka hria, ka lungawi hlawl lo a ni. Tukinah pawh khan min rawn wish miahlo, tuktin Good Morning rawn ti ziah thin ka ania.

Chaw eikham hnu chuan ka phone ta a, mahse a pick up thei miah lo. Ahma zan ang bawkin ka message pawh a seen miahlo, ka ngaihtuah takzet. An ina va kal mai chu ka tum deuh tut tut hman a, mahse ka ti mah mah dawnin ka hre bawk si. Kimkimi ka phone a, ani pawh chuan a la thei biklo.

An awmdun a ni ngei ang, mahse tinge ka lo buai ve em em le? Engpawh chu nise min rawn reply hun lo nghak tawp mai teh ang, abak tih theih ka nei chuang hleinem. Nileng mai chuan ka nghak char char a, mahse a reh hmak mai. Awm ngaihna pawh ka hre tawh lo, min kalsan hmak dawn ni mai te hian ka hria.

Tlai dar 4 rik hma deuh hret chuan an in lamah ka va kal ta tawp a, ka ngaihtuah em a ni. Kawngka chu a lo inhawng a, ngawi rengin ka lut ve tawp. Sitting room lama Marcus-a pa, Pa Sangtea'n Marcus-a a lo hau mawlh mawlh ri chu ka hre ta a. Enge ka hriat pawh ka hre lo, mi chhungkaw thil a ni a, ka inrawlh ve nachhan tur a awm lo.

Mahse chhuah ka tum bik chuanglo, kawngka bulah chuan dingin ka ngaithla ve ta reng mai a. Thinrim tih hriat tak hian, "Tun thlenga Marina-i Marina-i ti reng mai, mipa i nilo ami?" tiin a lo vin hrep hrep mai a. A aia vin hian Marcus-a chuan, "Marina-i chu thu hran ni rawh se, nupui neih ka la duh lo." a lo ti let ve hlur mai a.

"Hmingthanzual, ka thusawi chu awih mai rawh. Hetia i awm reng chuan engah mah i chhuak lovang, nimin lawkah Marina-i  abialpa Victor-a nen i han hmu dun ve dek dek a, zu ka in e...ka rilru a thar e..i ti leh a..i zak miah lo em ni?" tiin a pa chuan a han vin leh khur khur a. Marcus-a nu, Nu Duhzuali chuan, "Mama pa, a tawk.." tiin a lo khap ve bawk a.

"Lo inrawlh ziah suh, hetia i lo tan ziah vang anih hi a puitlin theih loh.." tiin Pa Sangtea chuan Nu Duhzuali chu a han hau ve nghal bawrh bawrh a. Marcus-a chuan chiang fek fawk hian, "Pa, ka puitling lo em ni? Pawisa ka thawkchhuak a, inchhung mamawh te pawh ka lei ve nual tawh. Min enkawlna azarah theih tawp chhuahin ka bei ve a, ka lo inchhuang ve viau thin asin? Mahse nang berin ka la puitling chuang lo i ti amaw?" lungawilo tak chuan a han ti a.

Chutah apa chuan, "Ni e, khati zawngah chuan i fakawm khawp mai. Mahse i pa ka ni a, ka thu i zawm tur a ni. Kimkimi nen hian in innei ang, tichuan Marina-i pawh i kalsan ve thei tawh ang." a lo ti lah hmak mai a. Marcus-a chu a thinrim tawh hle mai, "Ka hmangaih ber ka theihnghilh nan nupui ka nei anga maw? Hun tlemte bak ka mamawh tawh hleinem ka pa, enge maw i hriat le?" a ti chel chul mai a, a mangang tawh takzet ani tih ka hria.

"Hun tlemte a? Hun mai nilovin a kum akum a liam tawh...pawisa tamtak sengin i theihnghilh theih nan tiin i duh ang ngeiin phaiah pawh chawlh i hman ka phalsak che a, bialnu thar i rawn nei ve amaw tiin ka lo lawm em em a. Mahse Lily chu ka thiannu...ti leh tho si. Enteh, ka fapa i ni a, hmeichhe pakhat lek vang mai mai a hetia i thianten an hmuhsit che hi ka phallo a ni."

"Min hmusit lo...ka thiante hian min hmusit hlawl lo." a ti vin tuar mai. "An hmusit che alawm, an tilang lo mai mai a ni. Keipawh hi i thiante zinga mi ni ngat ila chu ka nuihzat ru ngawt ang che, hetiang reng reng chuan i puitling dawnlo. I hna kalsan thak khawpin Bangalore ah vacation ka hmang duh e..i ti a, rei fe i awm hnuah a ngaite bawkin Marina-i i rawn ti leh per pur a, ka kham tawh lutuk." alo ti leh hrep mai.

"Anih leh ka hmangaih miah loh chu nupuia ka neih i duh amaw? Pa, i fapa hi min rawn miah lovin ka nupui tur i lo thlang hmak mai amaw? Eng ang pa nge i nih a? Amak hle mai, min hmangaih tak tak lo a nih hi." a ti ve tak sak mai. Chutah thil engemaw ri pawp hi ka hria a, Nu Duhzuali chuan ringzet hian, "Awii Mama pa, ava han tullo tak." a lo ti tuar mai a.

Engthil nge thleng hrilh ka ngailo, Pa Sangtea chuan MArcus-a chu a beng a ni tih a chiang reng. "Kei hian ka hamngaih lo che amaw? Hmangaihna sawi tur hian eng chena thuk nge i hriat ve a? Hmangaih lo che ila tunah hian kan bulah i awm lovang, hmangaih ila i nausen lai khan Fahrah Run ah kan dah ang che. Hmangaih lo che ila tunah hian heti zat sum i nei lovang, hna pawh i nei lovang. I puitlin theihna kawng awmchhuna ka hriat chu ka ti ta mai ani, min hnial dawn anih chuan he in atanga i chhuah a ngai ang." a ti ta mai a.

Pa Sangtea rawn kal phei chuan min hmu teuh ngei mai, mahse bang phenah ka lo biru hman hlauh. Pa Sangtea chu a chhuak a, Marcus-a leh anu erawh an la awm thung. Chutah ka va bik dek dek a, Marcus-a hmel chu hmuh a van hrehawm chiang. Apa in a hmaia a benna kha chu na a ti pawh a lo ni thei e, mahse a chhungril zawk chu a na ngawih ngawih  ani tih ka hmu thei.

Anu chuan Marcus-a chu a kuah a, "Ana em, bawiha?" tiin a hmai chu a dawm sak a. Marcus-a chuan khur dar dar hian, "Nu..tun..tunah khan..tunah khan ka pa khan min beng em ni? tunah khan ka pa khan min beng tiraw?" a ti a, a mittui a tla zawih zawih mai. Va kal a, va kuah ka van chak tak em.

Ka khawngaih takzet, a hrehawm ka ti ngawih ngawih. Anu chuan, "A thinrim vang mai mai anih kha, engahmah ngai suh bawiha.." tiin a lo hnem a. Mahse Marcus-a chuan apa in kut a thlak ta mai chu a hrethiam hlawl lo a ni ngei ang, "Nilo..engtin nge engahmah ka ngaihloh theih tehlul ang. Zu ka ruih pawhin kut min thlak ngailo, a hrelo der ziah. PAwisa ka dil pawhin ka tleirawl lai atang tawhin ka dil zah zah min pe thin..mahse, mahse tinge..tinge nupui neih ka duhloh vangin khatia min ben tak mai le? Nu, tinge ka pa khan min ben..mawh??" tiin anu chu a sawi vak vak a, Nu Duhzuali tan chuan sawitur ava vang dawn tak em.

An inkuah a, an tap dun a, keipawh ka lo tap ve ringawt. Marcus-a chuan a mittui a hru hul a, anu chu a thuttir a. A hmaah chuan thingthi in anu kut chu a vuan a, "Nu..ka pa nen khan ka naupan lai khan min duat thei em em a, I DUH BER I NEI ANG..tiin min hrilh thin kha. Mahse tunah tinge ka duh ber ni miahlo chu ka neih luih a ngaih tak maile? Hmangaih ngailoh, hmangaih chawp tur chu engtin nge ka neih theih ang? Ka hria alawm, ka inzep lo. MArina-i tluka hmangaih ka neilo, ka la hmangaih reng. Mahse Kimkimi ka neih duhloh chhan hi amah vang anilo, nupui neih ka la duhlo a ni." tiin a nu chu a kuah a.

"Nu, khawngaih takin...mawhh..ka pa chu lo hrilh leh rawh. Ka duhlo, nupui neih ka duhlo. In pahnih hian ka duh ber che u, nangmahni pahnih ka nei a, ka duhtawk lutuk. Ka chawm zel ang che u, engpawh sawi ula, ka leisak zel ang che u. Hna pawh tha takin ka thawh chhunzawm leh ang, mahse ka hmangaih loh hmeichhia chu min neih tir lul suh u..Kimkimi hi ka thian a ni a, engtikah mah nupui atan ka nei lovang. Khawngaihin, ka nu...min neihtir lul suh u." tiin a tap hawm hawm mai a.

Anu pawh chuan a khawngaih ve ngang aniang, a samah chuan chulin, "I nei lovang, bawiha..i nei lul lovang." tiin a chalah chuan a fawp a. Keipawh chu ka mittui a lo tla ve nasa tawp, ka tap chhuak lek lek a ni. Mahse mi chhungkaw titi lo ngaihthlak ruk reng chu a tha dawn lovin ka hria a, ka chhuak ve ta a.

Marcus-a pa hian Marcus-a hi a hmangaih loh vang a ni biklo, a sawi ang chiah khan a fapa neihchhun hmeichhe pakhat vang maia a indawm kun reng chu a hmu thei thlawt lo a ni. Marina-i a theihnghilh theih dan awmchhun chu Kimkimi, a thiannu ngawih ngawih, nupuia neih tir chu a ni mai si.

Marcus-a hian duhlo eng ang mahse Pa Sangtea hian a thuthlukna a sawhsawn duh dawn chuanglo tih ka hria, chuvang chuan engemaw tak ka tih ve a ngai a ni. Kan ina haw ta lo chuan Kimkimi te inah chuan ka leng ta a. Hreh viau mah ila, ka thianpa Marcus-a tana ka tih angai miau si a ni.

Kimkimi bulah chuan engkim ka hrilh ta vek a, ani pawh chu a hrilhhai kher mai. A insum thei bik lo, min kuah a, chhuak em em hian a tap a. Mahse Kimkimi hi mi rilru tha leh fel tak a ni miau a, harsa ti hle mah se a pawm thiam angai tih chu a inhria. Apa bulah chuan MArcus-a chu a duhloh thu sawi turin leh pasal neih a duh loh thu sawi ve turin ka ti ta a, hreh chung chung chuan a remti ve ta.

Zan alo thleng a, Marcus-a message chu a rualin panga a rawn thleng thawt mai. "Inhmu ang."...."Ka pa a chhuak a, ka room ah kan inkawm dawnnia."...."Engkim ka hrilh vek ang che, Kimkimi pawh a lo kal dawn."...."Ka pain Kimkimi nen innei turin min ti a, lo phei la, engkim ka hrilh ang che."...."Kimkimi pawhin a lo duh bik lova, an cancel dawn niin alang."..."Lo kal vat teh, phone atang chuan ka sawi peih lo." ..tihte chu a zawnin a rawn intlar thla tuar tuar mai.

Ka va phei ta nge nge a, a room ah chuan min chhoh pui nghal. A room pawn verandah ah chuan Kimkimi pawh chu a lo thu a, kan va pan hnai a. Tichuan Marcus-a chuan thil awmzia zawng zawng te chu a han sawi a, ka hre vek tawh tih a hre hauh lo. Mahse Kimkimi chuan Marcus-a bulah a duh tak tak thu te, an inneih tur thu a hriat a a hlimzia thute chu a lo hrilh vek chu niin.

Rei fe kan titi hnu chuan, "In pahnihin ka thlah fal phawt ang che u." tiin haw ka tum a, Marcus-a chuan min thlah a tum ciau nanga ka hial tlat avang chuan min thlah ta lo.  Engemaw ka hriat leh tak ni...an titi chu ka ngaithla leh chak tlat mai. Room atanga chhuak mai lo chuan tukverh bulah chuan ka ding leh ta ran mai a, anni erawh chuan ka haw tawh amaw an ti ngei ang.

"Kan innei dawn amaw ka lo ti hman tawh a....azia lo e tiraw?" tiin za lo tak chuan Kimkimi chu a nui sak a. Marcus-a chuan zawite hian, "Nia.." alo ti ringawt a. Kimkimi bawk chuan tah aw tuau hian, "Marina-i vang tho kha em ni?" a han ti leh a. Marcus-a chuan inthlahrun hmel tak hian, "Amah bak tunge ni chuang ang?" a lo ti tham tiak a.

Kimkimi chu a insum zo talo, a hmai hupin a tap ta hawm hawm mai a, "Kim, ka mitah hian chiang takin min han en teh..." tiin Marcus-a chuan a kuai dak a. Kimkimi chuan mittui nen a lo en a, "Ka kuah thei che angem?" tiin Marcusa chuan a ngen a. Mahse Kimkimi chuan tap chung hian, "Aih...ka duh lo." tiin a lu a lo thing a.

"Khawngaihin.." Marcus-a pawh chu a hnuk a ulh teuh mai. Kimkimi chuan a kuah a, awww..an va han khawngaihthlak dun tak. Marcus-a tan chuan a thiannu, keimah ang chiaha a kawmngeih em em nena nupa anga an han awmdun tur chu a ngai ngam mawlh lo, Marica-i a hmangaihna a la dai chuang silo nen. Chutiang bawkin Kimkimi tan pawh a ruka  alo duh em em, Marcus-a chu a neih a rem leh silo...hreh chung chunga apa hnena dawt a sawi a ngai ta si chu a nia.

Ka inthiar fihlim a ngai a ni, engmah inrawlh vena tur ka neilo. Kei chu an thian thar, hmanni lawka an zinga tel ve mai chauh ka ni. MAhse Marcus-a tan thil tha tak ka ti tho chuan ka hria, ka lawm tho e. Room chu ka chhuahsan a, inlam pan chuan ka haw ve ta a. Zankhuain ka lo mu theilo ve ringawt, Marcus-a hi ka khawngaih ngawih ngawih a ni.

***************

Ka nu anih vang ni hauh lovin, ka khawngaih tawp. Ka nu tan hian a na dawn emai, tikhawp khan a lo hlim ve tawh a, awii..ka lainat emai. Hreh chung chungin ka pu bulah dawt a sawi phah chu ania, kei ni ila ka tuar zo ve dawn mawni? Engpawh nise, eirawngbawl a hun dawn tawh tlat.

Ka pa a lo haw tlai dawn a, chuvang chuan keiman eirawngbawl a ngai. Zan lo thleng se, ka chhiar tan leh hmain ka pi bulah engthil emaw tak chu ka zawt phawt ang. An awmzel dan tur ka hre chak tawh viau nanga, ka hman reng bik silo. Engpawh chu nise, chaw te han eikham ila kan chhiar chhunzawm leh dawn nia...AKU SAYANG KAMU..

***************

Zan a lo thleng a, chaw eikham veleh chuan ka pa chu a lengchhuak nghal daih a. Ka pi nen chauh chuan inah kan awm a, roomah ka awm a, ani erawh chuan TV a en thung. Diary pawh chu ka chhiar rih lo, ka pi bulah chuan ka va kal a. Abulah chuan va thuin, "Pi, Marina-i hi ala dam em?" ka va ti deuh tawp.

Ka pi lah chuan a TV enlai chu a entui vang nge, minlo ngaihsak vak lemlo zawk pawh hriat va ni suh. Min en miahlo chuan, "Tu Marina-i maw?" a lo ti ringawt a. Ring leng lawng hian, "Apa bialnu hlui...Marina-i.." ka han ti vak a. Chutah a rawn hawi a, "E..i chhiar thleng tawh a nimaw?" tiin min nui vur vur a.

"Chhiar thleng tawh e...ka ngei teh mai ania." ka han tih zawm nghal zat a. A TV en lai chu a sound a han ti zawi a, "Dam ang, ka hre biklo. I pa nen pawh an inbe leh ta ngai miah lova, keipawhin ka hmu tawh ngai hek lo." tiin min lo chhang a. "Anih leh engtik nge in inhmuh hnuhnun ber?" tiin ka han zawt leh a.

"Ka hmuh hnuhnun ber ni kha ka hre ve ta hauh lo mai, a rei tawh lutuk. I pa erawh chuan ala hria ang, i nu nen an inneih hma khan a tawp nan tiin an inhmu leh a, an in mangtha ta a nih kha." a ti a. Keilah chuan, "Hmmh..a tawp nana inhmuh leh kher pawh a ngailo, tullo lutuk." ka lo ti hlur mai.

Ka pi chuan min nuih a, "Khaih khaih...insum teh." tiin a darah chuan a rawn beng thak thak a. "I pa khan Marina-i kha a hmangaih em em a, a kalsan hleithei lo a ni. I nu pawh khan a thik thei asin, Marina-i pawh khan a kalsan thei mai bik lova...an buai nak nak alawm." a han ti leh a, Marina-i mai mai chuh...

"Nihleh ka nu leh ka pa hi loh theih loh vanga innei tihna em ni? Sawn te hi ka lo ni reng lo maw?" ka han ti chu ka lu ah a kuk fawk mai. "Anaaaa.." tiin ka lu chu ka tuai vut vut a. "I nu leh i pa hi Biak In hawng ngata innei an nih hi aw...ve mai mai thin che hian." ala ti zui. Ka pi chu ka han nuih tlawn leh vel a, "Nihleh maw Pi, apa in ka nu neih a duhloh thu vel a hrilh lai che khan apa kha i khawngaih ve tho em?" ka han ti a.

A nui nasa kher mai, "I sawi takah chuan khatih lai khan Lily khan minlo enthla ru reng tih hria ila chu ka vel nasa ngawt ang, ka tap lai hmel hi a tha lemlo ve sia..sawww...sawlai ah sawn ka thu a, ka hmaah thingthi in ka malchungah a bawk a, ipa han tahbelh zia hi chu." tih pah chuan sitting room chu a kawk a, a nui vak vak a.

"A chanve chu ka chhiar zo tawh, a tawp ka hre chak tawh tawp." ka han tih chuan ka pi chuan, "Anih te chuan va chhiar leh vat la, i chhiar zo vat mai dawn lawm." a ti a. "Zan khata chhiar zawh mai mai chi a nilo, a tam em alawm." ka lo ti leh deuh hlur mai a, ka tawng hi a vin ve hrim hrim, kei Marina-i bialpa hlui, Lily best friend leh ka nu Lallawmkimi pasal Marcus-a fanu hi chu....hehe.

Room lamah chuan ka luhsan leh ta a, Lily diary vang hian phone battery 100% pawh chawl miah lova khawih hlum thak thin khan phone ka khawih ngai ta meuh lo. Diary bawk chu ka la chhuak leh ta a, ka khumah chuan ka dah a. Chhiar laia zun a chhuah sek ka hlauh avang chuan ka han zung lawk te te phawt a, tichuan khum lam panin mu ar ar chungin Diary chu ka chhiar leh ta a.

**************

Marcus-a nen chuan kan inbe khat ta hle mai, kan intext pawhin a rul tawk bak in min chhang tawh ngai lo. A mizia chu a dang riau hian ka hria a, hrehawm ka ti takzet. Ka call lak miahlo chang te pawh a nei tam ta, ani hian min kawm duh talo em ni ang tiin ka ngaihtuah hman hial. Kimkimi lah chuti bawk, a rilru a nat em avang chuan chhuahpuia ka sawm pawhin chhuanlam a siam reng zel.

Engdang vang a nilo, kha ramhuai pitar Marina-i vang vek kha a ni. Ni e, Marcus-a pawh a nep inlo ti maithei, mahse Marina-i pawh kha MC-a kan intawh khan han kal tlang ve mai se. Ka teddy bear ken lai a rawn en a, min en leh a, Marcus-a a en leh vel pawh kha a tullo. Chuta karah Pa Sangtea lahin Kimkimi nena innei turin thuthlukna a lo siam ve leh ringawt bawk nen, Kimkimi lah a lo lawm nasa mai sia.

Huiham, a buaithlak a ni e. Kan thian ho chuan kan inkawm khawm thei ta meuh lo, vawikhat Chhandama nen kan intawk hlauh a. Ani pawh chuan, "Marcus-a chu...a ze ngai bawk a pu leh tawh. A inkhung tlat a, chhuah pawh a chhuak duh lo." tiin min hrilh a, ka va han khawngaih tak. A lak nat ber chu apa'n a beng kha ni berin ka hria, mahse Kimkimi nen chuan an innei leh ta dawnlo chu ania.

Engemaw ka hriat a, Kimkimi nena an innei leh lo tur hi ka lo thaw huai ve ringawt. Mahse ka indem em em lo, nupui min neihsan daih te chuan kawm tur ka nei tawh nang. Thla khat dawn lai chu a liam leh ta a, Marcus-a pawh ka hmu khat telh telh a, an inbe khat tulh tulh bawk.

Kimkimi lah chuan anu te khawlama awm rih a tum thu min hrilh ta mai a, ani lehzelin min awmbo san chuan ka khua a va har dawn tak. "Kim, kallo mai la..Christmas dawn hnaih ah lehnghal, kumthar nghak law law la.." tia ka ngen lawm lawm pawhin, "Lily, a bul hnaih a awm reng chung hian ka nei thei dawn silova, chuvang chuan ka hlatah hian awm se, ka zia deuh mahna. Mipa dang hmangaih te ka nei ve a nih chuan Marcus-a hi ka rawn hmachhawn ve ngam tawh maithei asin, tunah rih chuan ahmel pawh ka en ngam hrih lo." a ti tlat mai si.

Vanneihthlak takin Kimkimi zin hnu deuh lawk chuan Rosy a lo haw ve chiah a, kan inkawp leh nghal chawt. Rosy hi Bangalore atanga lo haw a nilo ania, ani pawh Kimkimi ang deuh khan anu te khuaah phai atanga kan haw hnu lawk khan min zin san lehnghal daih a ni. Rosy bulah chuan engkim chu ka hrilh ta a, ani lah chuan, "Marcus-a hi i duh alawm..i duh chiang a ni." a la ti fan nia mawle.

Thian thar ka nei ve dawn chauh a, vawi hnih khat bak kan chhuak ho hman ta lo. Kimkimi chu ka ngai thin em em a, ka khawngaih hle bawk. Marcus-a pawh ngai hle mah ila kan la inhnaih deuh tal a, mahse an inah chuan ka va leng duh ngai lemlo. Amah pawhin min sawm ngai lem lo bawk a, a induh talh talh khawp mai.

Nikhat chu Amos-a'n thil duhawmloh tak min hrilh tlat mai, "Marcus-a leh Marina-i an inphur lai ka hmu." tiin min hrilh a, ka sa zak mai. MC ah khan Marina-i khan mipa a rawn kal pui a, khapa kha  abialpa a ni tih chu an awmdan atang khan tuman an hai lovang. An rawn nui dun har har a, an inkai bawk kha a nia.

Tunah Marcus-a nen an inphur leh si amaw? An in renew tihna em ni? Aww..Marcus, ka va han duhpui tawh lo tak che em...midang an tam teh lul nen. Ka hlauh ang ngeiin thil a thleng ta, Pa Sangtea chuan hria se Marcus-a chu a vaw hlum duh hial a. Vawi tamtak Pa Sangtea pawh hian Marcus-a hi hau tur leh Marina-i ringawt ngaihtuah lo tura hrilh turin min chah fo thin a, keipawhin ka theihtawp chhuahin ka fuih ve thin bawk.

Mahse keia thusawi mai mai chuan Marina-i  a hmangaihna a tidai zo dawn chuang lo a nih hi maw, ka mood a off vek thei hial. Ka kawm theih awmchhun Rosy bulah chuan ka sawi ve leh ta a, "I thik anih kha.....Marcus-a hi i duh tih hi pawm mai rawh." a lo ti ve chhen bawk si, hrilh tlak loh lutuk mai.

Zan a lo thleng a, Marcus-a chu ka han call chhin a. "Aw..Lily..enge ni ta?" zaidam tak hian a rawn ti a. "I buai em?" ka han ti a, ani chuan, "Buai love..ka mu mai mai." tiin min lo chhang a. "Ka lo leng dawn...i phal em?" inthlahrung ru tak si, fiamthu titih deuh chuan ka han ti chu a nui huk mai.

"I phal em tih tih angai ami? Lo phei vat rawh...ka ngai tawh che."..hmm, leh lawi si chuan. "Ka lo kal e." tiin ka insiam a, scooty chu la chhuakin ka inkhalh phei ta nghal a. An in ka luh chuan Pa Sangtea chuan, "E..lo leng rawh Lily, i va vang ve a.." a lo ti deuh luam a. Nu Duhzuali pawh chuan puan thui mial mial pah chuan, "Lily hi i induh riau mai, ilo leng tha duhlo tlat." tiin min lo fiam ve zauh bawk a.

Ka han nui leh ta sang mai a, ka thiam thil neih ve awmchhun a ni ka tih tawh kha. "Nia, ka pa hi ka chhuahsan hreh deuh thin mawle, Marcus-a a awm em?" ka han ti a. Pa Sangtea chuan inchung lam kawh pah chuan, "Han chho rawh...a awm ang." a lo ti mai a. Ka tlangnel tawh ka tih kha, zaktheilo min lo ti reng reng suh u.

Room kawngka chu ka han kik a, "Lo lut vat mai teh." a lo ti hlur mai. Ka luh rual rual a minlo kuah nghal chung chung thin khan min lo nui suk duh chauh, mak tihna em em ka neilo, a hmangaih ber nen vawiin lamah an in chhailaidi nasa em atin ni. Keite chu min theihnghlh hmak ang chu, "Marcus Mimawlpa.." tia hauh hrep mai ka duh.

Khumah chuan thuin a lo guiter a lo kuah a, a bulah chuan ka va thu a. "Enge ni ta?" a han ti leh a, ka lo tum hmuk a. Titau deuh reuh chung chuan, "Hmm...ka lo leng ve animai lawm, min ngai lo si..." ka han ti a. A rawn tawlh hnai a, "Tihpalh, anih chuan leng reng rawh aw..riak ve nghal la.." a han ti leh vel a.

"I induh emai, biak pawh min be duh ngailo." ka han ti leh deuh hmuk a, "Nangpawn min biak i tum bik chuang hleinem." a lo ti sam leh et mai, ka va han ngei tak. Hnial dan tur ka hre tawh bawk silo chu, "Zai rawh..ka lo ngaithla ang." ka ti ta tawp a. "Min zaipui la.." a la ti zui, zai lamah chuan Aaron Malsawmdawngzuala tak ngial pawh ka tluk lovang.

"Zai mai mai rawh, i zai ka ngaithla khat tawh." ka ti ta daih a, min sawm zui ta bik lemlo. Tichuan zawi te te chuan min han zai sak leh a, "Ka hmangaih che, duhlai. Ka thinlung zawng zawngin ka hmangaih che, bawihte. Ka thlang ber che, kumtluang atan." tiin ama hla phuah ngei mai chu a sa leh ta hlarh hlarh mai.

A va han zaithiam uchuak bik tak em, a zai pah chuan min en a, a hmelthat zia kha. Min sak chhan ang mai hian ka hre tlat pek a, a nuam ka lo ti veng veng mai. "Famchan hma loh chuan inthen tawh lawng aw.." a han ti chiah phei chu a bialnu, a hmangaih tak angah ka lo inngai hman hial thei.

Mahse ka rilru ah Marina-i chu a lo lang thut a, "Vawiin chu in hmang nuam maw?" ka han ti thut a. A zai lai chu a tawp chat mai, a ngawi ta vang vang a. Khuma guiter dah pah chuan, "Engtin nge i hriat? Amosa'n a hrilh che em ni?" a han ti nghal ngawt a. "Engvangin nge Amos-a ber kher chu i rinhlelh a?" tiin ka lo zawt let a.

"Achhan chu min hmu tih ka hria a ni, ka hmulo der mai mai a nih kha." a lo ti hmuk mai a, a thinrim hmel kher mai. Lehlam ka hawi a, "Ka lo buai vena tur a awm hleinem tiraw?" ka han ti ve deuh hmak a. Chutah ka biangah chuan a rawn vuan a, ka mitah chiang takin min en a, "Sayang Bawihte, ka tan hian i pawimawh asin. Ka thian tha ber i ni a, ka hmangaih lutuk che." a han tham raih a.

Enge ka hriat pawh ka hrelo, Marina-i chu ka thik ta tlat nia mawle. Tah aw tuau hian, "Kei aiin Marina-i i hmangaih zawk?" ka han ti khut pek a. Nui suk chung chuan a lu a thing a, "Lily, i hrethiam lo a ni. Ka thiantha ber pawh ni mahla nang meuh pawh hian Marina-i ka hmangaih zia kha i hrethiam ve chuang lovang, awlsam taka kalsan hi a har em a ni." a han ti leh a.

Ka kuah a, "Bawihte, duhtawk tawh rawh. A bum mai mai che a ni, i bialnu amaw min tih vangin midang tan a phal silo che a, a rawn be leh mai mai che  a ni. Rei a daih chuang lovang, a phatsan leh tho ang che." ka han ti ta bawrh bawrh mai a, ka insum zo hman ngang lo a ni.

Ka biangah chuan min han piai a, "Umm..ka hria alawm. Kan inhmu thut a, reilote kan inbia a. A remchang bawk nen, ka thlah nghal ta mai a nih kha." a han ti leh daih a. "KA awihlo.." ka lo ti hlur mai. A nui a, "I thik chiang mai.." a tih chuan ka lai lek lek, "Ka thik peih lo...ka duh thlawt lo che." tiin ka han nam sawk a.

"Min duh reng kha.." tiin min dek vak vak a, khumah chuan min la nam thlu zui a. Ka tal vak vak a, "Duhtawk rawh.." tiin a chhungte hriat hlau tak si chuan zawite hian ka han t(r)e deuh that that a. "Ka duh che ti phawt rawh.." tiin min man bet tlat. "Ka sawi awmlo emai.." tiin ka tang ve tlat a.

Chutah ka tal leh thut a, alo inring hman biklo nen...kan inkiss ta thut mai. Min manna chu thlah chuan miah lo chuan a hawisawn vat a, mahse zep rual lohvin kan inkiss chiang a ni. Kan inmelh a, kan han ngawi dun vang vang phawt a. Hnai takah kan inmelh a, ka tha a khur nghal zawih zawih mai.

"I sawi dawn nge dawn lo?" tiin min man nghet leh sauh a. A mitah tak chuan enin, "Marcus, ka duh che..ka duh lutuk che." ka ti ta, ka sawi tawp nachhan kha ka hre lo. Mahse Marcus-a erawh chuan a ngaih thutak vak hmelloh khawp mai, min thlah a. A ding a, "Kha kha nimai lawm.." tiin a nui huah huah mai.

Za lo tak chuan ka lo nui ve a, "Ka'n haw teh ang." ka sawi tur hrelo lutuk chuan ka han ti ngawt a. A tum hmuk mai, "I lo leng ve dawn chauh amaw tia...a awm alawm. Min ngai tak tak lo, i sawi ve mai mai a ni." a lo ti hmuk mai. "Ka pa khan lo haw har suh a ti bawk sia, ka haw tawh mai ang." tiin dawt ka sawi ta ringawt a.

"Nia..hmeichhiate in ni bawk sia, a awm ve tho ve. Lo kal rawh, pawn thleng ka lo thlah ang che." tiin kan chhuak ta a. Inhnuaia kan chhuk chu PA Sangtea chuan min rawn en a, "Ehe, i haw dawn der elaw?" a han ti a. "Nia..ka haw mai ange." tiin nui chung chuan ka lo chhang a.

Nu Duhzuali pawh chuan, "Anih phawt le..lo leng leh rawh aw.." a lo ti ve bawk a. Marcus-a nu leh pate nena kan inmangtha zawh hnu chuan ka scooty bul thleng chu Marcus-a chuan min thlah a, "Fimkhur rawh aw, muttui le." tiin ka chalah a rawn fawp leh zauh a. "Nangpawh le." tiin ka lo nuih a, tichuan ka haw ta a.

*********************

Wow, an inkiss tak tak, an inkiss tak tak. Avan nuihzatthlak reuh, mahse a cute bawk si. Chutih rual chuan Marina-i ka huatna a zual tulh tulh thung, tullo lutuk. Ka haw so bawrh bawrh, vuak hrep tlak a ni. Tenawm lutuk, lerh bawk si, si hlir hi animai. Ka huatzia hi ka sawi senglo, mu phawt mai teh ang.

****************

Ka alarm ri chuan min ti harh a, tun tum chu zing walk ka tum ve leh tlat. Phur teh chiam lo chuan ka tho a, patling ang mai, zing thaw veleh hian ka inthiar ta ziah mai hi a zahthlak nge a tawp thlak zawk pawh ka hrelo. Thiante nen chuan kan inghak khawm leh ta a, ka induh an tih thu leh ka reh thu min lo hrilh nak nak hlawm mai.

Dar 8 pelh deuh hretah chuan in ka thleng a, ka pa leh ka pi te pahnih chuan chaw ei an lo siam mek a. "Kan nula neih ve chhun lah hi rawngbawl ve tum reng reng lo mai, hahthlak lutuk." tiin ka pa chuan min lo nuih var var a, chhiatsa tawh nakalaia ka'n lo chhiah khum hrep kha. Chaw ei kham veleh chuan ka pa chu a insiam sawk sawk a, a kal ta a.

Tihtur engkim ka tihfel hnu chuan ka hna awmchhun, diary chhiar chu ka tan leh dawn ta. Ka mit a nat phah deuh amawni...ka mit a thip reng mai. Mi fate mahin mit ek thi thawt thawt khawpin lehkha an zir alawm le, engvangin nge kei Marcus Hmingthanzuala fanu hian ka theihloh bik ang. Lehkha zir vang nilo mahse, ka diary duh ber vangte chuan ka mit te hi chu lo thip ve mai mai teh se.

**************

Kha zan kha ka tan chuan zan pawimawh tak a ni, Marcus Hmingthanzuala nena kan inkiss vawikhatna a ni si a. Ka zak angreng hle a, mahse a ruk tak chuan anuam ka ti. Marcus-a nen chuan kan inkawm hnem leh deuh tan ta a, mahse nidang ka ang tawh lo. Ka lai deuh tut zel a, a chang chuan a mitah pawh ka en ngam lo fo.

Ani erawh a la ngai reng a, ka bula a awm thin dang ang tho khan a awm leh a, chhete chuan a tawng tlem deuh. Chhuah dun puia min sawmna pawh vawi 2 lai mai chu dawt hrilhin chhuanlam ka siam tawh, a chhan chu a hmel ka hmu zak tlat tawh. Kan inkiss palh vang kha chu a ni tih ka hria a, mahse heti em em a ka lai thin ta mai hi ka hrethiam lo.

Urlawk zan a lo thleng dawn ta, Rosy in kan thian hlui hova hman a duh si, Marcus-a lahin, "Ka bula zankhua in i awm ang." a ti tlat bawk si, avan hrehawm tak. Marcus-a te nena hman ho chu duh viau mah ila keimah chiah hmeichhia ka awm leh dawn si a, miin min ngai khawlo ang tih ka hlau ve deuh bawk si.

A thiante lah hian bialnu neih ve tum reng reng lo mai, an vaiin zu single a mawle. Kimkimi, ka hmeichhe kawm ve ber lahin Marcus Luliana vangin anu te khuaah a hmang daih dawn bawk si. Rosy-te bulah awm ta ila, Marcus-a a lungawi loh ka hlau bawk si a. Chutih lai karin Rosy lah chuan nitin mai hian min rawn vau khur khur reng bawk si a, ka rin aiin ka luck daih mai.

A tawpah chuan Marcus-a chu ka thlang leh zawk ta nge nge a, Rosy bula chhuanlam ka'n siam chu a sa teh a sin. "Ka kawm tawh dawnlo che.." a lo ti deuh hmak, min kawmlo rei dawn silova, ngaipawimawh teh chiam lo mai teh ang. Chubakah Rosy te nena kan thian ho hi chu kan darh tawh hlawm lutuk a, mi rel an peih em avang hian ka hmanpui chak vak lo hrim hrim.

Ni 24 a lo ni ta, Wine-Shop pawh an khar hmak tawh. Marcus-a erawh chuan beer a stock teuh, zu pawh um 2 chu a thingrema a dah tha lai ka'n phawk a nih kha. Chawhma dar 11 vel a ni a, phone call ka dawng a, number ringawt a ni. "Hello.." ka han ti chu min rawn chhanglettu aw chuan min ti phu zuk mai.

"Lily a ni em aw?" a rawn ti a, khanu aw ngei kha a ni. Marina-i, tun thlenga Marcus-a lo la chhaih buaitu, kan ramhuai pitar-i ngei kha. MC a kan hmuh khan, a tawng ri kha ka hre chiang a, a aw kha ka chhinchhiah nghal miau alawm. Phone atang pawhin ni mahse, ka hre nghal chat thei. Engtin nge maw ka number a neih le? Tunge maw lo pe ni?

"Aw ni e...tunge aw?" tiin ka zawt leh ta tho a, a ngawi vang vang mai. A dah mai dawn amaw tih tawh hnuah, "Marina-i ka nia, min hria em?" a rawn ti ta a. "Hria.." ka lo ti deuh hmuk. "I hman chuan inhmu lawk ang hmiang.." ala rawn ti zui, ka hmuh peihloh berte zinga mi a ni tih hi inhria se chuan a inthlahrung ve deuh tur.

"Eng chungchangah nge min hmuh i duh a, phone atang hian sawi mai la?" ka'n lo ti ve leh deuh sak a, mahse a inthlahrun hmel hle mai. Zaidam tak hian, "I hmanloh pawhin a pawi lo, phone atang chuan a buaithlak deuh a. Keimah pawh hian ka rawn pan mai ang che, a pawimawh lutuk a. Khawngaihin hun i insiam thei angem, khawi hmun pawh nise ka lo pan mai ang che." a han ti deuh thlap a.

Chutia min hmu duh na na na chu, a pawi nek hleinem. Ka aw ka han thian kharh kharh a, "A tha lawm, kan inah ilo kal dawnnia. Ka pa a chhuak nileng dawn a, keimah chiahin ka awm dawn." ka ti ve ta a, a lawm thiam kher mai. "Ka insiam anga, ka lo kal ang." a han ti teh ngawt a. "Kan in i hria em ni?" ka lo ti hu mai.

"Hria e, Marcus-a'n min hrilh alawm." tiin min chhang a. Animaw? Umm..a tha e, lo kal mawlh teh se. Chhan pawh chhang tawh lo chuan phone chu ka dah hmak a, chhelo tawkin lo awm nghe nghe teh ang. Kei aia hniam lehnghal, chemte ka inchhawp nghe nghe dawn mawni, ka ngei tlat he mihring nu hi chu.

Darkar 1 vel hnuah chuan kan door bell chu a rawn ri ta ral ral mai, "Lo lut rawh.." ka lo ti vat a. A rawn lut ta lawm le, kei ai chuan a let hian a nalh fe zawk tho mai. A kawr mawlh kha, ka awt lutuk. A hmaia khuavang chhinchhiah chuan a hmelthatna a tizual, ngei hle mah ila  achhelo em a, ka fak lo thei lo a ni.

Kan chawei dawhkan te tak te ah chuan inhma tawnin kan thudun a, hnuailam a melh reng a. Kan ngawi dun char char a, tawng mai chu a tum hrih lo a ang hle mai. "Eng chungchangah nge min biak duh a?" tiin ka zawt ta a, inthlahrun hmel tak hian a rawn hawichhuak a. Zawite hian, "Mar...Marcus-a nen hian in ingaizawng tiraw?" a ti ringawt.

Ka lo nui suk a, "Tuin nge ti a?" tiin ka lo chhang a, ka melhrum deuh khur bawk a. Ani pawh chu za lo tak chuan a han khi ve suk a, "Tuma sawi angai hleinem, in induh tihte chu a chiang reng alawm." ala ti ta deuh deuh a. Chiang tak hian ka en a, "Enteh, Marcus-a chungchang a min be duh anih chuan thian kan ni a, kan ingaizawng lo. Abak chu sawi tur ka neilo, in inkarah tlak zeh ka tum lo bawk." ka ti ta hmak hmak mai a.

Mahse a zam hauh lo, "I inhrelo zawk a ni, i inpawm duhlo zawk a ni. Marcus-a pawh hian a hmangaih che a, a duh che a ni. Keimah vang hian a na hnem tawh tih pawh ka hria, nangpawhin i hriatpui vek. Min haw viau maithei a, mahse thudik chu hei hi a ni, Marcus-a nen hian in inhmangaih hle tih ka hria a ni." a ti leh a.

Ka thinrim deuh tan ta, zaktheilo lutuk. Khatia min rawn hrilh tur khan ka enge a nih ve vak a, ve mai mai chuan.."Thiannu, kan ingaizawng emaw, ingaizawng lo emaw..i lo buaina tur  a awm lo. Lo ngaizawng pawh ni ila, a single miau alawm. Nangte chuan ngaihzawng dang i neih san a, ani pawhin a duh duh a ngaizawng ve ang che. Mahse ka sawi nawn leh ang, kan inngaizawng lo." ka han ti ve leh deuh sak a.

A aw key ala san ve chuang mialo, kan in anih vangin a pawr ve vak ngam lo nge ni. "Nia..ka buaina tur a awmlo, ka hria alawm. Mahse thil hrilh tur che ka nei a, chuber zawk chu ania ka lo kal chhan." a han ti leh vel a. Vin lek lek hian, "Aww..chutiang anih te chuan sawi vat ta che." ka lo ti hlur mai.

Thawk a han la te te a, "Marcus-a nen hian kum 3 chhung kan inzui tawh a, nang chu hmanni lawk atanga a kawm ve chauh i ni. Inlo inkawmngeih viau pawh a ni thei, mahse kei aia Marcus-a hrechiangtu hi hmeichhe dang an awm lovang. Anu ai meuh pawh sawn ka hrechiang asin, a rawng duh ber, a thawmhnaw duhzawng, a ngainat zawngte leh a mizia thlengin.." a han ti zuah zuah mai chu ben thal tawp mai ania ka duh ni.

Ka nui huk mai, "Animaw? Han sawi zel teh, ilo hrechiang awm hle mai. Mahse ka hrilh ang che...chu thil min hrilh tur ringawt a ilo kal a nih chuan ka hre duhtawk tawh e, kei aiin i hria e..i duh chuan i haw thei tawh ang..nge chaw ilo ei ve nghe nghe dawn?" tiin ka han tawng ve zat zat a, ka thiam ve tho alawm..ani aiin ka ngeiawm thiam ang.

"Lily, ka sawi tum ber ka la sawilo, khawngaihin min han ngaithla zo ve phawt la mawle.." a la ti zui, ka ngawi tawp. Chutah a sawi chhunzawm leh a, "Ka lerhsan a, ka phatsan pawh a ni maithei. Mahse ka thinlung hian ala theihnghilh bik lo asin, ka tan hian ala pawimawh takzet a ni. Keimah ah hian a bet tlat tawh, chuvang chuan MArcus-a hi..ka kalsan theilo a ni." a ti ta mai a.

Ka sa zak mai, ka tha a khur thei hial. Ka thinrim takzet, "I kalsan theihloh thu min hrilh tur chauh in em ni ilo kal?" ka han ti deuh khur khur a. Ani lah chuan ka mitah tak min rawn en a, "Nilo..i lo ngaizawng a nih chuan, kalsan turin ka ngen che a ni." min han tih khum sak  anih kha. Awii, ka puak keh mai dawn hian ka hria, ka haw lutuk.

Ka tho a, ka room a luh pah chuan, "Ilo riak dawn a nih loh chuan ngawi rengin haw ang che." tiin ring tawkin ka room kawngka chu ka khar ri bur mai. Mahse chhuak ta mai lo chuan inchhung lama atang chuan, "Marcus-a bulah i hrilh dawn a ni tiraw...hrlh rawh. Apawi ka tilo, ka la hmangaih zia leh ka inchhir zia a hriat phah anga, min pawm leh thei em em ang." a la rawn ti ngam nia.

Chhan pawh ka chhang tawh lo, ka khumah chuan thu in blanket ka tham vak vak ringawt. Ka tleirawl kawlh lai tak tak chu nise a sam kha ka pawt kawlh vek ang, mahse ka insum theih hlauh kha a vannei takzet. Awmdan tur pawh ka hrelo, ka hmai hi a sen vek hialin ka ring. Marcus-a chu ka hrilh hauh lovang,engmah thlenglo ang hmakin ka awm ang.

Zaninah pawh abulah ka awm anga, ka vuan char char bawk ang. Min hmu nghe nghe se ka ti, a thik turin ka awm char char dawn, chu chu nimai. Eng ang mihring nge ni ngai, a zak miah lo tihna chu ania, awii ka haw lutuk. Hmeltha nunrawng diktak chu a lo nih ngei kha, a bialpa nen an lo inthen bawk a ni awm e.

Zan a lo thleng ta a, dar 9 velah chuan ka va thleng ve ta a. Marcus-a room bul verandah nuam takah chuan meichhemin kan zai hova, nuam kan ti tlang a ni. Christmas hlate kan sa a, t(r)ial ruai ruaiin ka han khuang ve vak vak a nih kha. 12 rik hma deuh hret chuan kan chhuak a, motor chuan kan leng kual ta a.

Amos-a leh Puia lah chuan, "Kan thianho chu kan vanduai e, mo lawm tur kan nei hman teuh asin le.." tiin Marcus-a chu an chhaih sek lehnghal. Mahse a haw lemlo, a nuih liam vel mai mai a. Marina-i chungchang pawh chu engmah ka sawi duh lo, engmah thlenglo ang hmakin ka awm a. Ka sawi ang ngeiin a bul hnaiah ka awm reng a, a khat tawkin ka kuah reng bawk.

Veng chei hrang hrang kan en a, thla kan la nasa ngei mai. Hmeichhia keimah chauh ka awm dawn emaw ka ti hman a, Amos-a'n a bialnu a rawn hruai ve ta hlauh mai. A hming chu Zualtei a ni a, a chhelo reuh phian lehnghal. Arsa hem hmin kawngsira an lo zawrh te chu kan lei a, tichuan kan spot lam kan pan nghal a.

Kan vai chuan kan thukhawm a, mipa ho chuan zu an in a, kei erawh chuan beer ka in thung. Zualtei hian zu a in ve a, a la thei pap pap ropui lehnghal. Marcus-a kutah chuan ka vuan reng a, ka thla  amuang hliah hliah hian ka hria. Kan titi hrep hnu chuan Zualtei chuan, "Marcus...engtik atangin nge Lily nen hian in nih a?" a rawn ti mauh mai.

Kan nui ta vak vak hlawm a, "Tun Chistmas leh kumthar vuakvet chhunga ka bialnu ni tura ka hual a nih hi...tak tak chuan, ka thiannu  anih hi.." tiin Marcus-a chu a nui hak hak a. Zualtei chuan mak a tih hmel kher mai, "In inngaizawng lo maw..awi in ni amaw ka ti char char a. Ni daih ru, in inhmeh tawp. I height te, in size te...ni daih ru." a han ti deuh chiam chiam a.

Chhandama pawh chuan, "Ka sawi mawlh mawlh alawm, an inhmeh si a, an rilru a inmil si a, han inngaizawng se chu...an innei har lovang." a lo ti ve bawk a. Marcus-a nen chuan kan in en a, kan nui ringawt. KAn intur ken te chu kan inzo ta a, Marcus-a te in lam kan pan leh ta.

Tiang lamah hi chuan Pa Sangtea te nupa hi an fel phian a, kum dangah pawh an thianho hian an hmang ziah a ni awm e. Verandah-ah chuan kan awmkhawm leh a, woofer-ah hla ringtawkin kan play a. Thlasik rim nam chek mai chuan boruak a ti nuam zual ngei mai, ka pa pawhin min rawn call eih lo.

Ka sawi lawk vek tawh hrim hrim a, mahse Rosy te bula hmang tur angin ka insawi ve zaih. Mipa rual bulah ka awm dawn tih hria se chu a fanu neihchhun ka ni bawk a, a phal teuh lo mai. Dawt sawi ve zeuh zeuh te hi angai, a hunlai hi a awm ve a. 

Second 10 chiah angai ta, kan han countdown ve ngei hlawm a. Dar 12 a ri chiah a, kan han au rual vak vak hlawm a, a naupan chhiat thlak mange. Arsa te kan ei zawh hnu chuan Amos-a leh Zualtei te chu an haw a, Chhandama leh Puia erawh an rui lutuk a, an harh tawhlo hrim hrim.

Amos-a te haw hnu deuh lawk chuan keipawh chu Marcus-a chuan min thlah ve ta a, ani pawh chu a rui ve kher mai. Kan in kan thleng a, "Merry Chirstmas Sayang." tiin min nuih a. Keipawh chuan ka lo nuih sen sen a, "Nangpawh Merry Christmas, Sayang." ka lo ti ve a.

Ka kutah chuan a rawn vuan a, "Lily, min kalsan miah lovang tiraw?" a han ti a, a serious hmel kher mai. "Umm..kalsan miah lovang." ka lo ti a. "A han khi neuh sung a, "Keipawn ka kalsan miah lovang che." meng mang hlei lo chuan a han ti a, ka nuih a za ngei mai.

"Ka awihlo, Marina-in a rawn bia che anga, i pan leh duai duai thovang." tiin lemlam ka hawi deuh hmak a. "Aih..ateuhlo mai, nangmah ka ngaipawimawh fe zawk che..sawtiang..mi bialnu mai mai." a han ti vel a, ve lutuk hian a. Nui chungin, "Engtin nge ka rin ang che?" ka han ti a.

"I duh duh sawi la..ka tihsak angche. Promise.." a han ti leh a. Fiamthu titak deuh hian, "Anih leh ka hmuiah hian kiss rawh." ka han ti zauh a, a ngawi hmak mai. Ka nui vak vak a, "Ka tihreng kha...inla pawr ve vak suh, ka...." ka sawi zo hman lo.

Ka hmuiah chuan a rawn fawp thut mai, ka ngawi chiang teh asin. Ka lo dawn tawp a, muangchang chuan ka biangah a rawn dawm a. Chiang tak hian min en a, keimah zawk chuan ka fawp ve leh ta thung a. Inkiss pangngai tak a ni, mahse ka mumang ni tlat hian ka hria.

Minute 1 dawn chu kan inkiss ang, ka lai kher mai. Ka nui suk a, "Muttui aw.." tiin ka chhuak nghal daih. Ka zak lutuk, awmngaihna ka hrelo. Vawi hnih kan inkiss na a ni ta, tinge maw kan inkiss leh kher ni? Marcus-a hi Rosy leh Marina-i min hrilh ang khan kei hian ka lo duh ru reng em ni?

Aih, a thiehloh. Urlawk zan te ania, inkawmngeih hle mah ila, kan lo rui ve deuh bawk nen, thiantha inkiss a ni ve mai lawm. Mahse tinge ka la thutak angreng phian mai, beiseina ka nei deuh hialin ka hria. A ruih em vangin min kiss a ni mai angem? Nge min lo duh ru ve reng zawk?

****************

An inkiss leh tawh, yess avan nuam tak em. Ka nu zawk chu nilo mahse, Lily hi ka tan riau mai. Ka sawi leh ngat ang, Marina-i mai mai chu ka va haw lehpek em. Ka ten hluah hluah, zaktheilo lutuk mai. Eng ang mihring nge ni ngai? Hetih hunlai hian lo piang ve tawh ni ngat ila chu ka kek nasa ngawt ang.

Mahse chhiar zawm leh ka tum a, diary min petu ber ka pi hian min au peih em a ni. "Insu rawh, a tlai hma hian. Hei ni a sat that lai hian...mu reng suh." tiin kawngka a rawn chum vak vak mai. Huiham, ka han insu leh phawt ange aw....kan chhiar zawm leh vat dawnnia.

***************

Ka tihtur ka tifel zo tawh e, chhiar leh nghal ang...

*********

Inkhawm hmanlo khawpin ka han mu a nih kha, zan hmasa lam ka lo lem hnem ve deuh bawk nen. Urlawk zan kha a ni miau a, a awm ve tho ve. Marcus-a hnen atangin eng message mah  ka dawng lo, ala mu a ni ngei ang. Lu na bur chuan ka tho a, inah chuan tumah an lo awm lo.

Sawi tawh ang khan ka pa nen chauh a khawsa kan ni a, ka pa a chhuah hi chuan keimah chiah a ni nghal mai. Ka pa chu a inkhawm a ni ngei ang, a fanu zawkin thawh ka han hai mai chu ania, a zahthlak thin ngei mai. Mahse ka vawikhatna erawh a ni hauh chuang lo, ka vawi 4-na vel a ni, ka zak ve reng.

Tui ka lum a, fai takin ka inbual a. Nizan khan rui viau mah ila a pawimawh lai kha chu ka la hre vek, Marcus-a nen kan in-kiss. Amak ka la ti tawp thei lo, ka han mitthla let a, ka nui leh vur vur thin. Tu emawni in min rawn hmu ta se chu ka a ta emaw a ti hial ta ve ang, ni e..ka a deuh chu a ni.

Keipawh khan tinge maw, "Min fawp la.." ka han tih reng reng ni, ka ruih ve em vang pawh kha a ni mahna. Ka phone chu ka han en leh a, Marcus-a te nena kan thianho group chu ala reh thiap mai. Sana ka en a, dar 12 a lo ri tep tawh. Ka pa pawh chuan amahin eirawng a lo bawl a ni ngei ang, min kaihthawh ve mai thin tur hi ania.

Chaw ka ei kham hnu chuan call ka dawng ta nge nge a, ka rin ang ngeiin Marcus-a a ni. "Hello.." ka han ti chu rang em em hian, "Inah i pa a awm em?" a rawn ti nghal. Mak ka ti angreng hle mai, "Aih awmlo..enge a? Deuh thut che chuan.." ka lo ti a. "Ka lo kal dawn." tiin ka tawng leh hma chuan a dah nghal daih.

A ngaihna ka hre lo kher mai, umm..lo kal phawt teh se. Darkar chanve vel hnuah chuan alo thleng a, "Lo kal rawh.." tiin room lamah chuan ka luhpui nghal a. "Enge ni ta a?" tiin ka han zawt a. Khumah chuan a thu a, a rilru a nawmloh hmel hle mai. Min chhan mai loh avang chuan, "Enge ni, Marcus?" tiin ka han zawt nawn leh a.

Min rawn en a, "Nimin tlaiah Marina-i in inah a lo kal a mi?" a ti ta mai a, engtin nge maw a hriat ve ni.."Tunge ti?" ka lo ti ringawt. "Alo kal nge kallo?" a han ti chang leh deuh fak a. Thawk huai pah chuan, "Umm..kal e." tiin ka chhang ta tawp a. A lu a dawm nghal vawng vawng mai, "Enge a sawi?" a han ti leh a.

Lo thinrim tur a ni em chu ka hrelo, mahse ka lung a awi hauh lo. Ka tum hmuk a, "Chumi chungchang sawi tur chuan em ni i lo kal?" ka lo lo ti ve deuh kher a, min rawn en hraw mai. "Lily, min chhang phawt rawh..enge a sawi?" a ti leh a. Lungawi lo deuh tak chuan, "Ala hmangaih thu che a sawi.." ka ti ta a.

A ngawi vang vang a, "I awih leh nghal mai ang tiraw nang chuan...i bialnu ka ni emaw a ti a, min thik a ni...tinge engmah i hriatthiam theih miah loh le?" ka han tih chhunzawm nghal bawrh bawrh a. "Nilove..ka awih hleinem. A pawi ka ti khawp mai, i lung a ti awilo a nih phei chuan, ka tihpalh takzet." a han ti a, ka eilo kher mai.

Ka hnuk a ulh nghal lek lek a, "Amah vangin nang hian ngaihdam min dil amaw? Atan maw? I va la ngaihtuah awm ve a? Enge nang hian ani vang khan ngaihdam min dil ngawt a? Ila hmangaih hle mai maw?" vin lek lek chuan ka han ti a. Inthiamloh hmel tak hian, "Chutiang lam a nilo, bawihte...keimah zawk min huat phah ang tih ka hlau alawm." tiin ka kutah a rawn vuan a.

Ka lungawi lo takzet reng bawk a ni, "Engtin nge i hriat a?" tiin ka han zawt leh a. Zawi te hian, "Aman min hrilh." a ti sup a. Ka haw hlum lo chauh, saw Marina-i saw..."Engmaw? Aman a hrilh che amaw?" ka ti vak vak mai a.Ka hmuiah rawn hupin, "Shh....bengchheng suh..umm, tukin khan min rawn call a, a sawi a." a ti leh a.

Ka tap tep tawh, an in chu hre ve ni ngat ila chu ka va kek duh hial ang. Aman ka hrilh a ring a, ka hrilh silova. Marcus-a hi neih let leh dan a la ngaihtuah char char a ni, ka haw so bawrh bawrh. "Inlo la inbe reng tihna em ni?" tiin ka zawt leh hram a. Nuamlo tih hmel tak hian, "Inbe lo..ka number a hre chiang em ani..keichuan a number pawh ka nei tawh lo." a han ti leh zung zung a.

Sawi tur pawh ka hre tawh lo, mood a ti fuhlo zo vek. Luna bawk, pum nuamlo bawk, thawhna la reilo nen, ka puakkeh mai dawn hian ka hria. Ka bulah chuan rawn tawlh pheiin min rawn kuah a, "Tihpalh...theihnghilh vek ang. Thinrim tawh suh aw...tlaiah chhuak dun ila." tiin min rawn tlawn vel a.

Ka lungawilo laklawh chuan, "I duh leh Marina-i chu chhuahpui la ti nia." ka lo ti hmuk mai. A nui sen sen a, "Mi bialnu alawm..nang chu tuma bialnu i ni ve chuang hleinem." a han ti leh vel a. Mahse ka lo hnial zel a, atawpah chuan min dek leh ta vak vak mai. Khumah chuan min bawh leh a, "Tho rawh..min kiss leh ringawt ange." ka han ti chu a tho rang teh asin.

Engemaw hrechhuak zawk niawm tak hian a meng hru mai a, "Ehee..nizan khan...ka kiss che em?" a ti hu mai. Ka nuih aza tlat, "Aihh kiss lo..ka hmuiah hian i hmui kha i rawn nawr ringawt alawm." tiin ka han fiam vel a. A zah hmel kher mai, "Hey..nangpawn min lo dan ve mai tur ania..ka ruih hian ka mawl si." a ti nuah nuah mai.

Kei lah chuan, "Ka rui ve tho sia, ka lo dang phal bik talo a nih kha.." tiin ka nui vak vak a, ka luah min kuk fawk. A tho a, "Tlaiah chuan aw...ka lo nghak dawn che ania." tiin min chhuahsan daih. Thlah pawh ka thlah ta lo, atawpah hi chuan han thinrim viau thin mah ila Hmingthanzuala bulah hian ka thinrim rei thei tak tak lo chu a nih hi.

Tlai a lo ni a, a sawi ang ngei chuan kan inhmu leh ta nge nge a. Mahse ka rilru tak chuan ka la thinrim reng, ka ti lang vel peih tawh lo. Ka theihnghilh lui a, hlim tak chuan kan inkawm leh bawrh bawrh a. Kan titi a, inngaizawng ang maiin inkuah rial chuan kan spot ah bawk chuan kan thudun leh a.

Ka lerh viau em chu ka hrelo, mahse min kiss leh thut se ka ti ngawih ngawih. Marcus-a hi ka duh tan riau ani tih chu ka pha tawh lemlo, Rosy leh Marina-i sawi ang ngei khan hepa hi a ni telin ka vei tulh tulh mai. Mahse anni thusawi vang mai mai khan ka ngaizawng dawnlo, ka thianpa a ni tho tho tiin ka rilru chuan ka inhrilh mawlh mawlh a.

"Thil pakhat ka zawt che anga, thinrim miah suh aw?"

"Umm thinrim miah lovang, min zawt rawh."

"Tinge Kimkimi kha i duh miah loh a?"

"Hmmh..ka duhlo a ni hleinem..ka thiannu ania, a remlo alawm."

"Enge a remlohna? I thiannu a nih phei chuan a tha daih zawk alawm."

"Nilove..thian kan ni a, kan inkawm ngeih em em a. Chuvang chuan a remlo alawm, inthen thut te awm ta se, thian kan ni thei tawh nang."

"Anih chuan i lo duh ve reng tihna em ni?"

"Duh lutuk chuanglo, mahse a hmeltha ka ti a. Ka duhzawng tak chu a ni, a pian a nalh a, a hmeltha a, a vun a no nalh si a, ka thian chu nilo se ka bem maithei a ni." tih pah chuan a han khi vur vur a.

Eiloh hmel tak chuan, "Alo nih tak chu.." ka ti hmuk a. "Anih leh nangve hi...bialpa neilova min zui reng i tum em ni?" tiin min han zawt ve a, ka lo ner nung mai. "Bialpa ka neihsan phallo che...ka bialpa awmchhun chu nangmah hi a nimai." ka lo ti a, a nui vak vak mai.

"Anih leh min kiss leh duh angem? I bialpa anga min ngai a nih te chuan, inkiss leh ila.." tiin min kiss tum niawm tak chuan min pawt hnai a, ka lo indang nasa. Mahse ka indang der mai mai a ni, ka tang na lemlo khawp mai. A tum chhunzawm chuang miahlo, a tawp daih nia mawle, ava han zeilo tak.

"A awm alawm...nakinah i mutthilh hunah ka kiss tho ang che." ala ti zui. A mitah tak chuan ka en a, "Kan in kiss leh a nih ngai chuan...nang hi ka bialpa diktak i ni tur a ni. Anihloh chuan..thian kan nih chhung chu eng ang pawhin inthiantha mah ila, inkiss ka duh tawhlo a nia." ka ti a, a ngawi vung vung mai.

A lu a bu nghat nghat a, "Umm..anih chuan kan inkiss tawh ngai dawnlo a nih chu...kumkhuain." a han ti a, ka lo na zawk mai. Mahse han laknat vak chi pawh va ni suh, keimah zawkin inla engemaw takin ka han sawi vel zawk kha ania, kan inkiss tawh miahlo anga a nimai lawm.

A phone a en a, "Ehe..ka nu chu..missed call 20 lai a awm. Chhandama pawhin min rawn call a nih hi..engemaw awmzia le?" a ti nuah nuah a. "Thil pawimawh a niang..call let vat rawh." tih pah chuan ka phone chu ka han en ve a, keipawh chu Amosa leh Puia missed call ka hmu teuh mai.

Kan phone kan lo silent ve ve chu niin, ava hahthlak thei tak. Marcus-a chuan anu chu a han call let a, "Hello..nu enge ni ta?" a han ti a. A ngawi vang vang a, "Awle ka lo kal.." tiin a tho nghal vut a. "Enge a?" ka lo ti a, "Ka hre biklo...damdawiinah lo kal vat rawh a ti ringawt a." a ti leh a.

"Thil awmzia te pawh zawt phawt la mawle..." ka lo ti leh a, mahse min kai thut a, motor lam pan pah chuan, "Tuna ka biak kha ka nu anilo, Chhandama zawk a ni. Ka nu BP a sang leh tawh aniang, kal vat ang..ilo kal ve dawn em?" a han tih zawm zat a. "Ka lo kal ve ang." tiin ka lo chhang a.

Damdawiin chu kan thleng a, damdawiin pawnah chuan Puia a lo awm a. Min hmuh veleh chuan rang takin min rawn pan a, "MArcus...ihh englo.." a ti bah nuai mai. Marcus-a chuan hlauthawng tih hriat tak hian, "Enge Puia? Engthil nge thleng?" tiin a han zawt a. Puia chu a dang a awk ta tlat mai, "Ihh..englo..Marcus...ihh..".

Ngaih a tha ta hauh lo, "Puia..enge sawi rawh..khawnge ka nu...khawnge ka nu a awm?" tiin a vin ta lek lek mai. Zawi muanga hian, "Ih...ICU ah..." a ti ta mai. Rang takin kan tlan lut nghal a, thin ava phu rang duh tak em. ICU kawtah chuan lungngaih hmel tak hian Chhandama leh Amosa leh midang 5 vel chu an lo awm a, Marcus-a nu leh pate erawh an awm ve hauh lo.

Patling lo awm ve pakhat chuan a mittui a lo hru mawlh mawlh a, Marcus-a a rawn hmu chu a phu zuk mai. Rawn pan hnaiin, "Bawiha..iva rawn thleng tlai ve?" a ti dek dek chu Marcus-a chuan cin tak hian, "Enge thleng? Enge thleng? Sawi rawh..Pa Rintluang..enge thil awmzia?" a ti nghal chiam chiam a.

"Bawiha..inbengdai rawh..i thu phawt teh ang." a han ti dam diai a, mahse Marcus-a chuan a nam pawp mai. Amos-a kawrah chuan a han tham nawk nawk a, "Thiana, enge awmzia? Min hrilh rawh..khawnge ka nu? Tinge ICU bulah hian in din thup a? Mawhhh?" tiin a tap lek lek tawh mai.

Mahse Amos-a chuan a chhang theilo, hnuailam a melh reng mai. Chhandama chu va pan lehin, "Chhandam, nang tal chuan min han hrilh teh...enge awmzia? Khawnge ka nu?" tiin a vin vak vak tawh mai a, midang lo awm ve pawh chu an lo hawi thup tawh mai. Chhandama pawh chuan a chhang lo, a ngawi reng.

Chutah ICU atang chuan Marcus-a nu, Pi Duhzuali ngei mai chu a rawn chhuak a, ka phu zawk mai. A mittui a hru a, "Bawiha..." tih chauh a sawi thei. "Nu...tinge? Enge awmzia.." a tih lai chuan nurse te chuan ruang pakhat, a taksa pum puan vara khuh chu khum ah chuan an rawn nawr phei ta.

Marcus-a chuan ava pan hnai a, a hmai khuhna a han hlim chu a tha a zawi nghal vek. "Nilo..ani theilo.." tiin a tawlh hnung a, a tlu tep lehnghal. Midang chuan anlo dawm vat a, chu mitthi chu tudang nilovin apa Pa Sangtea ngei a ni. Marcus-a chuan muangchang chuan ava pan hnai leh a, a mittui pawh a tla eih lo.

A tap lo hrim hrim, mak tih hmel tak hian a en ngawih ngawih ringawt mai. A pa chu a han sawi a, "Pa..pa..tinge a? Enge thleng a? Hey..harh teh..harh teh ka tih chu." a ti vak vak a. Mahse apa chuan nunna a nei tawh miau silo, chet pawh a che eih silo. A hmaiah te chuan a han beng a, "Paaa..pa harh teh.." tih pah chuan anu chu a en a. "Nu..tinge ka pa hi a harh theih miah lohva?" tiin a zawt a.

Anu chu a thu hnawk a, "Awii..mama pa.." tiin a tap hawm hawm a. Chutah Marcus-a chuan vin zet hian, "Enge i tah ringawt a? Ka pa hi rawn kai tho ta che.." tiin Amosa te chu a va tham nawk nawk a. "Amos..Chhandam..ka pa hi tinge hetia a awm? Hrilh teh u..tinge min chhan duhloh?" tiin a au chel chul mai a.

Keipawh chu ka insum thei tawh biklo, ka hmui ka hup a, ka mittui a tla zawih zawih mai. Chutah min rawn en a, "Lily..Sayang..ka pa hi kai tho rawh...khawngaihin..khawngaihin." tiin ani pawh chuan a mittui a dang zo ta bik lo. Apa ruang chu a kuah a, "Nilo..nilo...tho rawh..Pa...enge awmzia..tho rawh." tiin a tap ta hawm hawm mai.

A lu a thing a, "Ani theilo..Pa..tho rawh..enteh..enteh pa, Kimkimi chu ka nei ang, nupuiah ka nei ang..mawhh...tho teh, i duh ang angin ka awm ang." tiin a kuah ngawih ngawih mai. Midang chuan an buaipui hial a ngai ta a, Marcus-a tap hmel kha ka hmu theilo, ka chhungrilah hian ka lo na vawng vawng mai.

Chhandama chu a lo kal hnai a, "Lily, pawnah inbe lawk ang hmaing." a ti a, Marcus-a chu kalsan ka va hreh tak em. Thil awmzia hriat ka duh si a, ka zui chhuak ta a. "Lily, darkar 2 liamta vel khan Pa Sangtea hi a rawn chau thut a, tichuan damdawiinah kan kalpui nghal a. Marcus-a phone kan tum a, a la thei bawk silova, i bulah a awm takin tiin kan phone che a, ila thei bik chuang silova..a pawi khawp mai." a ti a.

"Engtin nge chutia a chauh thut theih zawk a?" tiin ka zawt a. "Hmanah Stroke vangin a boral tep tawh a, mahse a reh vang vang a. A dam tawh angah kan ngai vek, a rawn zual leh deuh thut a ni. Keipawhin mak ka ti, Marcus-a chu ka khawngaih hle mai. Lily, a theih anga tam a bulah awm ang che aw...ka ngen ngawih ngawih che a ni." a ti lawm lawm a.

****************

Ka pu (Marcus-a pa) thih nachhan hi chu ka pa hian min hrilh tawh ngei a , BP sang, stroke vang a ni a ti ngei bawk a. Mahse heti em em hian a lo la na ang tih ka ring pha ngai lo, ka pu chu hmu ve hman lo mah ila ka ui thar leh hnuhnawh kher mai. Mittui a tla pur reng mai, he diary zet zawng, chhiar a man hla e.

Heti khawpa ka pa lo hmangaihtu leh a khawhar hlauva lo kawm thintu Lily hi ka hmu chak takzet tawh a ni, ka hmuh hunah chuan ka pa nena an chungchang chu engpawh lo ni se, lawmthu ka hrilh ngei ngei ang. Room atang chuan ka chhuak a, ka pi puan lo thui mual mual mai chu ka hmu a.

Ka khawngaih thar thut, a hmangaih berin a thihsan a, mahse nui hmel a pu reng thei zel tho chu a ni a. Ka lo va han vannei tak em, ka pa leh ka pi hi ka tan chuan Pathian an ni ringawt alawm le. Ka nu chan tawh mah ila, ka hmu hman lo tal a. Ka pa leh ka pi erawh chuan an hmangaih ber an chan ve ve a, ka va han chhuang dun tak em.

*************

Marcus-a pa thih zanah khan Marina-i chu ala rawn kal ve ang hlawh hlawh lehnghal a, a mittui te chu a la tla ve khanglang amawni...a tap der vel bak a ni lovang. Marcus-a chuan apa ruang chu a thawhsan hleithei lo, a biangah chuan a chul a chul a. Kei takngial pawh min ngaihsak lo chu a ni e, a tuar na em a ni.

Pa Sangtea thih hnu atang phei chuan Marcus-a hi ka bulah a awm tawp animai, kumhlui thlahzanah pawh ka bulah zankhuain a awm. Kan inbe lutuk chuang lo, ka bula a awm khan a thla a muang a ni ber mai. Inbe miahlo pawhin nilengin kan awmdun a, "I ril a tam em? Chhuah vah lawk i duh em?" tih vel bak chu keipawhin zawhna ka zawt ngai lo.

Urlawk zan erawh kha chu nuam takin kan hmang a, kan inkiss nghe nghe a nih kha. Mahse kumhlui thlah zan erawh kan phurlo takzet, a thiante pawh tumah a kawm peih lo. Ka zep tawh lo mai ange, Marcus Hmingthanzuala, ka thiantha tak hi kei hian ka duh in ka hmangaih ngawih ngawih tawh a ni.

Ni e, ka thian a nih vang chauh a hmangaih ka ni tawh lo, mipa a nih angin kei hian ka hmangaih tak zet zet tawh a ni. Engtik lai atang khan nge ka hrelo, ka duh in ka hmangaih hle a ni tih chauh ka hria. A bula awm nuam ka ti a, min be miahlo pawh nise ka bula a awm chhung chu ka awm a nuam veng veng mai a ni.

Apa vanga a khawharna te chu kei teh lul hi chuan ka hnem zo lovang, mahse ka bula a awm duh tlat erawh ka tan chuan lawmna a ni thung si. Ka hmangaih a, ka duh a, pasal atan pawh ka duh a ni. A tir kha chuan zu in mi nilo, ruihtheihthil laka fihlim, Kohhran leh khawtlanga inhmang tak chauh ka duh ka han ti ve tak nang a, kan duh tak erawh hmangaihna hian min thlan tir bik silo chu a nih hi.

A bulah erawh ka sawi duh hauh lo, hmeichhia zawk ka nih vang te pawh a ni mahna. Min kuah chang pawhin hmana min kuah a ka awmdan ang khan ka awm tawh lo, ka thianpa Marcus-a nilovin ka duh ber leh hmangaih berin min kuah tawh miau si a. Beiseina tlem tak nen min duh thu min hrilh ve hun chu ka lo nghak ve tawp, min duh ve tak ang maw?

Kimkimi lakah ka inthlahrung em em a, ka duh ve tih hi hre tase, min huat phah maithei a ni. Apa bula dawt sawi tur khan hreh chung chungin ka ti lui a, ka ruahmanna vek angah a ngai mai ang tih pawh ka hlau. Mahse ka hmangaih miau si a, ka kalsan phal bik silo. Pawilo, ka sawichhuah loh chuan a hre dawn chuang hleinem.

Mahse ka thiantha ber anga ka lo chhal, han duh tak thut mai chu a zialo viau angem aw tiin ka inzawt fo thin. Min lo duh vein lo inngaizawng ta pawh ni ila, mi hian min dem viau angem? Ka thinlung zawng zawngin ka duh bur tawh mai si a, min lo duh ve miah lovang tih chu ka thil hlauh ber a ni.

2019 kan lo thleng ta der mai, January ni 5 a ni a, khua a vawt kher mai. Veng chei kan endun a, tlem chuan a harh ve deuh tawh. Nuih pawh a nui hnem ve ta malh malh khawp mai, ka tan pawh a nuam takzet. Nghet takin min vuan a, ka thla a muang hliah hliah. Coffee indun in kawng sira thutthleng lo awm ah chuan kan thudun a, ka hmuh chakloh lutuk mai ka hmu leh ta.

Marina-i leh hmeichhe pathum vel hi an rawn nui phei har har a, Marcus-a an rawn hmu chu an ding rual thap mai. Marcus-a pawh chuan a lo en reng a, khua vawt hle mahse ka sa nghal pup pup thei hialin ka hria. Ahma ang bawk chuan an in en leh ta ngawih ngawih mai a, tunah zet zawng ka thik ta hle mai.

Ka sual ka chhuah ve ta ngat a, nghet lutuk tak maiin Marcus-a chu ka kuah a, a darah chuan ka lu ka han nghat vel a. A thiannu pakhat chuan, "Kal ang.." tiin Marina-i chu a han kai a, mahse a duh hauh lo. A han zahtheihloh zia chu e, a rawn kal hnai a, kan hma zawn takah chuan a rawn ding ngam nia mawle.

Hmeichhe tamtak chu nise an biru ngei ang, anih loh pawhin min kalpel ngei ang. Mahse ani erawh hi chu ramhuai pitar-i kha a ni tlat a, a awm lo lem love ti tawh mai ang. A rui deuh lehnghal amawni, a ding ngil tha thei chiah lo lehnghal. Chutah rum zet hian min han melh a, "Marcus-a hi biak lawk ka duh a ni." a rawn ti vel anih chu.

Ka insum hman lo, "Ka phallo...ka bulah a awm mek hi i hmulo em ni?" ka lo ti vin hlur mai, ka sawi lai pawh chuan mak ka inti hial zawk. A han nui vel a, "Anihleh thiannu..i bula thu i thianpa Marcus-a kha ka lo be lawk ang chu.." a han ti leh vel a, awii..ka sa chhuak vek tawh.

Marcus-a ka va en a, zalo tak chuan a lo nui suk a. Ka ngawi reng a, "Marcus, inbe lawk ang." a han ti leh a. Marcus-a chuan en pawh a en lo, "I sawi duh chu sawi mai la, ka tho peihlo." a lo ti hmuk mai, ka lo t(r)an tawp. Thinrim tak chuan, "Hmingthanzual, ka fiamthu lo...inbe lawk ang ka tih chu.." a han ti vin leh deuh hlur a.

"Ka hmanlo, chhuahpui ka nei hi..i hmulo em ni?" a lo ti leh hmuk a, keilah chu ka lo nui vel. A thinrim hmel tawh khawp mai, athiante lah chuan, "Na-i...kal ang, i ho thei emai." tiin an lo pawt sek tawh mai. "Kan inbiak hma chu ka kalsan lovang." a la ti deuh tlat mai bawk si, luhlul ve tak a ni.

Marcus-a chu a han thaw hak a, "Lily, kan kal dawn mi niang?" tiin min han melh zeuh a. Ka lo nui sak mai, "Ummm..kal daih ang." ka han ti deuh kher a. Chutah vin zet hian, "Henu hi i enge a nih a? I thiannu chauh anilawm ni? I bialnu pawh a ni em ni?" a ti ta vak vak mai a, an lo hawi deuh thup mai.

Marcus-a pawh chu a han ding ve ta a, chiang takin Marina-i chu a melh a. "Ni e, ka bialnu a nih hi. Heti khawp hian kan inzui nasa a, kan inngaihzawn loh i ring reng reng em ni? A hrim hrimin tunge i nih a? Ka bialnu nena kan lengdun lai min rawn tibuai tur hian tunge i nih a?" a ti ve ta siah siah mai a.

A mittui a tla nghal phung mai, "Hmingthanzual, i ngaizawng amaw? Henu hi...Bangalore atanga i hmelhriat satliah mai mai hi i ngaizawng amaw? Kei hi min theihnghilh ta em ni? Ka la dam ve reng a ni tih hi i theihnghilh ta em ni?" a han ti leh vel a, ka ei thlawt lo.

Marcus-a chu ka lo en ngawih ngawih mai, a bialnu ka nih thu a sawi phei kha chuan ka hnuk a lo ulh vel. "Marina, min tizak khawp mai...ni e, min hmangaih a, keipawhin ka hmangaih a ni. Kan innei tep tawh zawk...tiraw Lily?" tiin min rawn kheuh zeuh a. Ka lawm lutuk chu ka zuang lo chauh, ka nui chhuak hialin ka hria.

Ka thiam thil neih ve chhun chu show leh in ka han nui leh ta sen sen a, "Umm..ka pa leh Nu Duhzuali pawh an inbe fel tawh, thlaleh velah chuan kan innei mai ang ka ring." tiin Marina-i chu a han melh ve kawk mai a. Kan kalsan daih, awi a chawh zia kha. Mahse mipui kha an tam si a, min rawn en deuh sup sup bawk nen, ka zak ve det.

Motor ah chuan kan lut a, kan khi dun vur vur mai. Marcus-a chuan minlo duh ve reng em mawnile..nge a sawi mai mai zawk ti a ka inngaihtuah lai tak chuan, "Tihpalh aw.." a rawn ti thut mai. Ka phu deuh zawk lehnghal, "Hmmh..engvang ngawt chuan maw...Marina-i vang bawkin ngaihdam min dil leh ta elaw?" ka lo ti deuh hlur a.

Nui chung hian, "Nilove..ka bialnu anga ka sawi che kha...han tih thinrim ve hrim hrim kha ka duh a..midang pawn an sawi a, damdawi a rui thin e an tia...a zahthlak thin khawp mai." a ti ta mai a. Ka na zawk mai, Marina-i tih thinrim nan chauh maw a bialnu anga min lo sawi a? Ka tlawm ngawih ngawih, ka mood a fuhlo nghal vek.

Ka lo intithei ve hman asin le, "Umm..apawilo." tih ringawt chuan ka chhang a. "Ka thiantha tak i ni, engkimah min pui a, min fuih a, ka lawm takzet ani. Lily, pasal i neih hunah pawh min theihnghilh miah suh aw.." ala ti ta deuh deuh a, ka tah a chhuak ngawih ngawih. Chhan pawh ka chhang theilo, ka mittui a tla tep hial a ni.

Ka nui lui a, ka lu ka lo bu nghauh ringawt. "Ka khalh laklawh si a, sikret minlo tan sak mai.." a han ti leh a, ngawi reng chuan ka tan sak a. Ka va pe a, meizial zuk pah chuan, "Huiham...ka nun ve hi chu fiamthu hi a ni ringawt. I bialnu hlui kha hmanniah ka hmu a, a inha chhing rap...mipa dang dangin an phur, damdawi a rui thin an ti...tih vel hi ka hre hnem thin khawp mai." a han ti nuah nuah a.

Ka tawng maithei lo, ka tawngchhuak anih chuan ka tap dawn zel. Amah bawk chuan, "Mi zawng zawngin kan inneih an ring vek tawh a, mahse...anmahni chauh nilovin keipawhin ka lo ring sual a ni." a han ti leh a. Theihtawp chuan ka insum a, "Ila hmangaih takzet a ni tiraw?" ka ti a.

"Ka hrelo Lily, zanin khan ka na takzet a ni. Khatiang mihring kha a ni ang tih ka ring pha ngailo, min ti zak khawp mai." a ti zawi sap a. Ani chauh nilovin, keipawh ka na a, ka zak takzet. Mahse ka demlo, a tan chuan a thiannu chauh kha ka ni miau a, engmah sawitheih ka nei love.

Kan in kan thlen lai pawh ka lo hre miahlo, "Umm...kan thleng ta e, ka van ngai leh dawn che ve awww.." a han ti a, ka harh zawk mai. "Muttui aw.." tiin chhuah mai ka tum a. "Lily, naktukah lo phei hma rawh aw...i tello chuan ka lung a leng nghal zel ania." a han ti a, ka lu ka lo bu nghauh ringawt.

Ka chhuak a, a tlan liam lai chu ka thlir vawng vawng mai. Keima hriattham lek hian, "Marcus, ka hmangaih thu che hi hrilh ta che ila, min huat phah angem? Ka hmangaih takzet che asin, ani ai khan ka tha zawk lo em ni? Marcus, ka hmangaih che asin." tiin ka mittui chu a tla a.

Ka pa arawn chhuak thut, "Ehe..ilo haw tawh a nimaw?" a rawn ti a. Ka insum zo ngang lo, ka pa chu kuahin ka tap ta hawm hawm mai. A hrethiam lo kher mai, "Bawihi, tinge...tinge i tah a?" a ti vak vak a. Ka chhang mai theilo, a chhuak em a ni. Duat takin ka samah a chul a, "Bang rawh...tuinge hau che a? Miin an tibuai che em ni?" a han ti leh a.

Ka lu ka thing a, "Nilo..chutiang a nilo." ka lo ti a. "Anih chuan han sawi teh, tinge i tah?" a ti leh a. Ka inhnit hlawp hlawp a, "Pa...Marcus-a ka khawngaih lutuk a, apa angai lutuk a, ka lo tap ve tawp a nih hi." ka ti ta ringawt a. "Awww....avan ho thin tak, min ti mangang hman alawm, hawh teh..lut teh ang." a ti a, min kuah lut a.

Min thut tir a, "Min lenbo san daih zel a, ka khua a har thin tehmai ania." tiin a han nui a, mahse ka la tap zo hleithei lo. Min en vang vang a, "Bawihi, Marcus-a i tih ve ziah saw.....i hmangaih a ni tiraw?" a rawn ti thut mai. Ka mittui hruk pah chuan, "Aih...hmangaih bawklo..ka thianpa alawm." ka lo ti vat a.

"Bawihi, i pa ka nih hi...keilo tunge i hrilh chuang anga? Thudik tak han sawi teh, i hmangaih em?" a ti leh a, ka tap leh ta. "Aw pa...ka hmangaih alawm, ka hmangaih takzet a ni." tiin ka kuah a, naupang ang mai chuan ka tap leh ta vak vak mai. "Ni e, ka rin ang chiah a ni. I hmangaihna arei tawh alawm, i inhrelo mai mai a ni." a han ti a.

"Ka hre biklo, engtik atang khan nge ka hmangaih ka hrelo." ka lo ti hluam hluam a. Ka pa chuan zaidam tak hian, "Engtik lai pawhin i sawi a, an inah pawh i leng ziah tih ka hria. Anihna takah chuan i hmuh tirh atang khan i hmangaih a, i pawm thiamlo mai zawk a ni." a ti leh a, mak ka ti angreng hle mai.

"Engtin nge nangmah zawkin ilo hriat daih a?" ka ti hu mai. Ka pa chu a nui var var a, "Bawihi, ipa ka nih hi. He khawvelah hian nangmah hrechiangtu ber chu kei hi ka ni, i inhriat chian ai mah khan ka hrechiang zawk che asin." a han ti leh phei chu ka tah a chhuak tulh tulh mai.

A theih tawp chuan min hnem a, keipawh chuan Marina-i min tihdan te, ka thikzia te chu engkim ka hrilh ta vek a. "Bawihte, tuar hram hram rawh. Ani pawhin a hmangaih ve em em ang che, a hmangaih lo che a nih chuan i tana ruat anilo tihna animai. Mu tawh rawh aw...zan a rei tawh si." a ti a, keipawh chu ka room ah chuan ka lut ve ta a.

Mutthilh ava har si em, ka bengah chuan Marcus-a aw ngei mai ina, "Lily hi ka bialnu a ni.." a tih lai te chu a ri nawn mawlh mawlh a, mahse dawt vek a lo ni si. Ka hlim chhung kha ava reilo si em, ka hmangaih thu hi ka hrilh tawp mai dawn em mawni ka ti hial. Ka rilru ah a awm reng a, thildang ka ngaihtuah thei mawlh lo.

Ka pa khan a sawi dik chiah, ka vawikhat hmuhnaah khan ka lo duh reng tawh a ni tih chu ka pawm thlap. Mipa ka nel ngailova, mipa thian pawh ka nei ngai heklo. Mahse Marcus-a kha chu a danglam a ni, a haw hnu pawha khati em em a ka ngaih nachhan kha ka lo hmangaih vang a ni tih tunah ka hre chauh.

Ka pa mai nilovin, Rosy leh Marina-i te pawh khan an sawi dik ngei e, Marcus Hmingthanzuala hi ka hmangaih takzet a ni. "I mu tawh em?" tih hi min rawn thawn a, mahse ka reply duhlo, ka seen duhlo bawk. Min rawn call mai ang tih ka hlau a, ka phone chu ka off hmak.

Zan a rei duh ngei mai, min hmangaih velotu leh min duh velotu bula awm reng chu a nuam tawh hauh lovang, mahse min mamawh em em bawk si. Engtin nge ka tih ang ka hre tawh biklo, min hnemtu tur ka mamawh ve takzet tawh a ni. Amah theihnghilh nan ngaihzawng ka nei ve mai dawn mawni ka ti hman hial a, mahse mi rilru ka ti na mai mai dawnin ka hria, achhan chu engtikah mah Marcus-a hi ka theihnghilh thei dawn chuang silo.

**************

Ka chhiar tui lai tak chuan ka pa a rawn haw a, sana ka han en chu tlai dar 5 a lo pel duai tawh mai. Khai aww..kei tluka laktlak loh hi chu an vang ngawt ang. Ka pi chuan amahin eirawng a lo bawl leh tawh a ni ngei ang, ava han nikhualoh thlak thin tak em. Ka roomah chuan ka pa chu a rawn lut a, "Lo mu leh ta thlur thlurh e, thatchhe nu." a la rawn tizui.

"Nangpawh kha...Marina-i ti tuah hum reng ringawt mai, nep lutuk." ti a lo chhanlet hrep mai ka duh, mahse tih chi zia zang a ni silo. Diary chu ka lukham hnuaiah chuan ka dah vat a, ka bulah chuan a rawn bawk thlawp mai. "Huiham...ka van chau tak em.." tiin a han thaw huai mai a.

"Pa...diary te hi i ziak ve thin mial lo maw?" tiin ka han zawt chhin a, "Mial lo, mial lo." a lo ti hmuk mai, a va han ngeiawm tak. Min rawn en a, "Ka luck asin aw...niminah i thiannu Nunui te unau zinga upa ber..Mamuani ami khah?" a han ti a, "Aw..U Mamuani.." ka lo ti vat a.

A nui huah huah a, "Min rawn bem vel mawle, engtin nge maw ka number a neih ni. Tunlai nula ho hi chu a, fate rual hian min bem min bem mai ah.." a han ti vel a, inla luck bawk sia maw.."Hmmh...a lerh ve hrim hrim alawm." ka lo ti deuh hmuk a. Intithei tak hian, "Pathlawi ah chuan ka luck ber ang." tiin a han nui vel a, ka biangah a rawn seh vak a, a tlan chhuak nghal daih.

Mak ka ti hranlo, sawi tawh ang khan ka pa hi a upa tulh tulh a, a hmeltha tulh tulh mai. U Mamuani hi kum 24 vel a ni a, ka pa ngaizawng tute zingah chuan a upa pawl a ni hial zawk ang. Ka pa rualpui nula senior ve tak tak te ho kha chu thuhranah dah ta ila, tleirawl leh nula ah hian a tla na bik.

Ka insawithei anilo ania, a luck ve em a ni. Kei erawh ka nu leh pate hi ka chhunlo ve thlawt, a chhe lai lai ka chhun hi nimai hian ka hria. Ka nu pawh mizo hmeichhia ah chuan a sang pawl a ni ve a, kei ve ft 5 ka pel ve tawk ania. Ka ngo vak lo bawk a, an fanu ka nilo amaw tih hial tur a ni.

Engpawh chu nise chaw te ka han ei ve leh phawt anga, zan lamah kan chhiar chhunzawm leh dawnnia. Marina-i ka huat zia ka la sawilo tlat, he mihringnu han lepler zia hi chu...a virgin tawh miah lovang, te lo ti ve ngawt ila. Mahse ka ngei em a ni, Lily leh ka nu hian ka pa hi an lo intawm mai lo ani..hehe..

************

Zan a lo ni a, ka pa pawh computer hmaah thuin hna a thawk leh char char tawh. Ka pi lah chaw eikham veleh a room ah a lut nghal a, a mu nghal hmak. Keipawh tih tur dang ka nei ta biklo, Diary chhiar a ni leh mai. Khumah chuan ka han lawn kai leh a, Lily hringnun diary chu ka chhiar tan leh ta a...

**************

Khua a lo var a, ka tho peihlo takzet. Khua lah chu a vawh hian a vawt vin tuk mai a, khum thawhsan chu peihawmloh tak a ni. Ka phone chu ka han on ta a, messege a rawn thleng nawn mawlh mawlh mai. Miss call tam tak a lo awm bawk a, Marcus-a vek a ni. "Tinge min reply loh?"..."I mu tawh em ni?"..."Ka ngai lehnghal che.".."Chaw eikham veleh lo phei nghal rawh aw.." tih te chu a lo awm thla nuk mai.

Min ngai tak tak a ni tih chu ka hria, mahse ngaihzawng ang nilovin, a thiannu ka nihna anga min ngai zawk a ni. Tinge thian kan nih le? Tinge i bialnu ka lo nih zawk loh le..tia hrilh mai ka duh rum rum, mahse ka ngam der mai silo. A bulah awm hnem viau mah ila, ka ngai zual tulh tulh tho mai si.

Ka ta a ni ve thei dawn silo, midang tan chuan ka phal mawlh lo a ni. A thinlungah chuan kei aiin Marina-i chuan hmun ala chang hnem zawk miau si a, tihtheih ka va nei tlem si em. "Ka phone a thi daih a, tihpalh lutuk.." tiin ka reply ta a. Ala tho lo a ni ngei ang, a hmu har emai. Rawng ka bawl a, ka pa ka va kai tho a.

Chaw kan eikham hnu chuan ka phone chu ka han en leh a, "Lo leng vat teh...nge ka lo leng zawk dawn?" tiin message min lo thawn a. "Ka lo phei vat ang, ka inbual dawn chiah." tiin ka chhanglet a. Ka inbual zova, ka insiam nghal mawlh mawlh a. A ruka hmangaih em em chung siin thian anga ka va kawm leh angai dawn chu ania, ava phurawm loh tak em.

Mahse engtin nge ka tih chuan ang? Keipawhin a bula awm chu ka chak miau si alawm le. Chutia ka insiam mawlh mawlh lai chuan ka pa alo lut a, "I phei leh dawn tho em ni?" a rawn ti a. Ka lu ka lo bu zauh ringawt a, "Bawihte, i nat reng hi ka phallo asin." tiin ka pa chuan min lainat hmel kher mai.

"Pa, ka tha alawm...ka theihnghilh thei mai ang." ka lo ti a, mahse dawt ka sawi tih chu kan pahnihin kan hria. "Awle...anih chuan keipawh ka chhuak dawn a, in hi ilo kalh mai dawnnia." tiin min chhuahsan ta a. Keipawh chu ka insiam zova, scooty la chhuakin ka hmangaih Marcus-a te inlam chu ka pan leh ta a.

Inchhung ka han lut chu a lo reh thiap mai a, inchung atanga zai ri rat rat thawm chu ka hria a. Ka chho a, Marcus-a room lam pan chuan ka kal nghal a. Kawngka chu a lo inhawng a, kawngka bulah chuan ka ding a. Marcus-a chu guitar kuahin a lo zai tui ngei mai, lut mai lo chuan ka han ngaithla leh phawt a.

"Aw..Duhlai, ka nghilh lawng che.

Hlimte a kan lenlai ni,

Koh kir theih chang se aww..

Mahse a rem tawh silo." (Joseph Zaihmingthanga hla) 

tiin a lo zai hlarh hlarh a, ka hnuk a lo ulh leh nghal der mai. Ni e, Marina-i chu ka la tluk ve chuang lo a ni. Ka theihnghilh tir thei lova, a thinlung atangin ka paih bo sak theilo bawk. Chhete talin ngaihzawng anga min duhna hi a nei ve angem le tihte thleng chuan ka han ngaihtuah a, ka duh hlum lo chauh chu a nih hi maw..

Ka muttui chu ka hru hul a, ka nui lui a. "Ava han ril raih raih thin tak." tiin ka lut a. A zai lai chu a tawp hmak a, min rawn en a. "Yess...ka duati a lo thleng e." tiin min rawn kuah nghal. KA DUATI tih talin min ko ve a, a lawmawm tho ve. "I lung ava leng awm ve a.." ka han ti leh a. Khuma thut pah chuan, "Leng love, hla hlui ho ka lo sa kual vel mai mai mawle." a han ti a.

"Anih leh vawiin chu enge kan tih ang?" tiin ka han zawt a, a han ngawi vang vang a. "Ihh..ka hrelo le. Chhuak ila, ka treat ang che." tiin min han nuih seih a. A nui hmel te chuan min khawih t(r)ek chhawk hian ka hria, "Mahse i nu hi...inah amah chauhvin a awm dawn sia. Kan chhuahsan zing tawh e, ka inthlahrung." ka han ti a.

"Lungngai suh, a chhuak daih alawm. Ka Pa Rintluanga te inah a leng a, nilengin a leng leh mai ang." a ti a. "Anih chuan chhuak ila, thil tam deuh min leisak ang che." tiin ka han nuih tlawn vel a, "Tehreng e...i duh duh ka leisak dawn che nia." a ti a, a insiam nghal mawlh mawlh a.

Kan chhuak dun leh ta a, tun tum chu ka scooty in kan kal thung. Bengbeh to tawk mai min han leisak anih kha, alawma ka lawm zia chu. Nileng chuan kan inzui leh ta a, a kut chu ka thlah phal mawlh lo. Ka hlauh ber erawh Marina-i kan hmu leh thut ang tih mawlh mai chu a ni, ani lah hi a vak tam ropui si.

Chhunah chuan restaurant ah kan chawl dun a, a titi tui ngei mai. A thiante nena an inkawm chhoh dan te, High School a kal laia ngaihzawng a neih ve thin thute chu sawiin kan nui dun a. "Anih leh nang? Hmangaih i nei ve tawh em?" a han ti thut mai chu chhan dan tur avang teh asin.

Ka ngawi vang vang a, "Umm..ka nei mek." ka han ti zawi sap a. A phur hmel kher mai, "Animaw..enge min hrilh ve miah lova? A fairlo khawp mai, kan lo inthiantha ve viau amaw ka tia.." tiin a han titau leh vel a. Nuih aza lo kher mai, "Nia...ka ta a ni ve thei dawn chuang silova, ka sawi peih vel lo alawm." ka han ti leh a.

"Hmmh..anih chuan min han hrilh teh. A hmeltha em, kei aiin a hmeltha em?" tiin min han nuih a, amah a ni tih reng a inhre silo. A mitah chuan chiang takin ka en a, "Aw..hmeltha e. Mi zawng zawngin tha an ti kher lo maithei, mahse ka tan chuan ani tluka tha kha an awmlo. A nelawm em em a, abula awm a nuam bawk si." ka han ti leh a.

"Hman hmanah khan chungte chu min hrilh ve tur alawm, i van inzep thei ve.." tiin min nuih a, mahse kei erawh ka nuih aza ve hauh lo. "Ni e, sawi tak ang khan ka ta a ni ve thei dawn silova." ka ti leh a. A thu tha sauh sauh a, "Enge maw a nih theih lohvang le, han in en la, i hmeltha a, i pian a nalh a, i sang tha bawk si. A duhlohna chhan tur che ka hrelo, tinge i ta a nih theih lovang?" tiin min han zawt leh a.

"Achhan chu kei aia hmangaih a nei miau a ni, ani te chuan ka hmangaih a ni tih pawh a inhre lo hrim hrim." ka lo ti a, min khawngaih hmel hle mai. Ka kutah chuan avuan a, "Khawi aw..a van pawi ve. Anih leh tunge a nih reng reng a, inla inhmu ngai em?" tiin min zawt leh a. Han sawi mai tur ka hrelo, "Ihh..Tluangpuia ania.." tiin Bagalore-a kan hnathawhpui, ka ten em em leh ka hnawl hnu hming chu ka han sawi ta tawp a.

A ngawi vang vang a, "Hrilh mai ta che...i hmangaih takzet anih chuan hrilh tawp mai tur alawm." a han ti leh a. "Ka duh teuhlo, a hmeichhia zawkina lo hrilh te chu a." ka lo ti deuh hlur a. "I mawl emai, i hrilh loh te chuan engtin nge i hmangaih ani tih a inhriat ang? A hrilh hun che i nghak dawn tihna mi?" vin lek lek chuan a han ti a.

"Anih leh hrilh turin min duh tihna ami?" tiin ka han zawt ve a. Rang zet hian, "Aw...hrilh rawh..kawng engkim ah ka pui ang che. Atheih phei chuan a number min pe la, ka lo titi pui dawn em ni?" ala tizui, ka tana a inhuam dan hian ka lung a va ti chhe ngawih ngawih tak em.

"Aih angailo, a hunah ka hrilh mai ang." ka ti ta tawp a. Tui a han in khawlh khawlh a, "Anihleh lem kan chang lawk ang...kei hi Tluangpuia anga min ngai la, thudik chu han sawi dawn chhin teh." a ti ta mai a. "Tah hian maw.." ka lo ti hu mai. "Aw ni e, tah hian...tuman kan tawng an rawn hre pha dawn hleinem." tiin min chhang a.

Ka hnial char char a, mahse ka hnial hneh ngang lo. A tawpah chuan ka pawm ve ta a, a phur lutuk khan min tina ngawih ngawih a ni. "Le..sawi rawh le." tiin chiang takin min han en a. A kutah chuan ka vuan a, "Engtin nge min ngaih ang chu ka hrelo, mahse ka hmuh hmasak ber ni che khan, ka thinlung i luah nghal a. Ka hmangaih takzet che ani, ka thinlung zawng zawngin ka hmangaih che, Marcus." ka han ti khut pek a.

A ner sawk mai, "Naa..Marcus i ti daih a, Tlaungpuia a nilawmni?" a lo ti hu mai a, ka rilru zawng zawngin ka sawi miau a, Tluangpuia chu tunge a nih tih pawh ka lo hre leh tawh reng reng hleinem mawle. "Ahh..sorry, Tluangpui ka tihna." tiin ka han nui lui leh vel a, mahse ka thinlung erawh a tap thung si.

"I zeilo emai, a aia tha ka la zawnpui ang che." ala ti ta deuh deuh a, min duh ve ngai dawnlo a ni tih chu a chiang tulh tulh mai zawng a nih hi. Ka mood a off vek tawh, haw vat vat a, ka pa kuah a tah hawm hawm ka va chak tak em. "Anih leh nang, engtia awm zel nge i tum?" tiin ka han zawt ve tawp mai a.

Hriatthiam loh hmel tak hian, "Engtia awmzelin maw? Enge i sawi awmzia?" a lo ti leh hu mai a. Mahse ka insum zo tawh lo, MArina-i thikna in ka khat leh ta. Ka sa pup pup a, mipa dang min zawnpui tur thu a sawi leh kher bawk nen, ka thinrim ta hlur mai. Vin lek lek hian, "Marina-i chu i la beisei reng dawn tihna em ni? Engtikah nge i harh chhuah dawn?" ka ti ta hrep mai.

Mak a ti tih chu ka hai lo, "Lily, i thinrim em ni?" tiin min han zawt a. Ka thin a rim tulh tulh mai, "Thinrim lo, ka zawhna chu chhang rawh." ka ti vin ta tuar mai a, midangte pawh chu an lo hawi ta thup mai. Mahse ka zak tawh lo, ka puakkeh mai dawn hian ka hria. Ani erawh a zah hmel em em a, "Insum teh, miin min en thup ania." zawite chuan a han ti leh a.

Mahse ka thinrim laklawh tlat, "Marina-i ti reng mai, ka hne lutuk." ka ti vin leh hlur a, a zak lutuk chu a hmai a sen vek tawh. "Lily, ngati teh thut nge? Marina-i chungchang engmah ka sawi loh kha.." zaidam tak chuan a han ti leh a, mahse Marina-i hming a lam ringawt pawh chu ka tan chuan thinrim hluah hluah na tham a tling a ni.

"A tha anih chu.." tiin ka chhuahsan ta daih a, pawnah chuan dingin ka ipik lutuk chu ka han thaw vak vak a. Reilote hnuah chuan a rawn chhuak ve a, "Lily..ka tihpalh." a rawn ti ringawt a. Keilah chuan, "Tihpalh a? Tinge tihpalh i tih reng a? Marina-i vang hian vawi engzat nge ngaihdam min dil dawn a? Mawwhhh?" ka lo ti leh hrep mai.

Muangchang chuan min rawn pan hnai a, "Nilove, ka tih thinrim vang che in...i lung ka ti awilova, ka tihpalh a ni." tiin inthiamloh hmel tak chuan min melh a. Ka tah a chhuak ngawih ngawih, "Marcus..mimawlpa." tiin ka kuah ta ngawih ngawih mai a. Ani pawh chuan minlo kuah let a, "Khawngaihin thinrim tawh suh, min ngaidam rawh.." a han ti leh a.

Keimah zawk chu ka inchhir ngei mai, ka ti hrilhhai dawn lutuk kha ka ngaihtuah let a, zahna thlentu zawk chu keimah ka ni. Ka inthiamlo ngawih ngawih, "Mawla, tinge ngaihdam min dil? Keimah zawk alawm thiamlo..ka thinrim ringawt a." tiin ka tap hawm hawm mai a, ka insum thei ngang lo a ni e.

"Lo kal rawh...kan spot ah khan va kal leh ang hmiang." tiin min nui var var a, hepa han danglam bik zia hi chu. Mipa dang chu nise min haw ngawt ang, min haw san nal nal bawk ang. Mahse ka Marcus-a hi chu  ani ve hauh silo, amah zawkin ngaihdam min dil a, ka hmangaihna leh ka duhna chu a zual telh telh mai.

Scooty ah chuan inphur lehin kan spot lam chu kan pan leh ta a, inkuah rial chuan kan thudun leh ta a. "Lily, min kalsan miah suh aw.." a han ti zawi sap a. "Umm...ka kalsan phal hleinem che." tiin ka lo chhang a. "Min ngaidam rawh aw...ka ti thinrim che a, pawi ka ti lutuk." a han ti leh a.

"Sawi tawh suh, keimah zawk alawm. Min ngaidam zawk rawh, ka tizak ropui che si." tiin a aia nghet hian ka kuah leh a. "Ka bula i awmloh hlek chuan ka ngai lehnghal zel che a, a hrehawm ka ti emai." a han ti a, "Kan in ang chiah a nih chu." tiin ka lo chhang leh a. 

Reife kan thutdun hnu chuan kan haw ta a, an inthleng chuan ka thlah a, "I thlen veleh minlo be rawh aw.." a ti a, ka lu ka lo bu nghat a, tichuan ka haw ve ta a. Ka pa chu alo la haw lo a ni ngei ang, inchhung chu a reh thuap mai. Bathroom ah chuan lutin bualkuangah chuan ka thawmhna engmah hlip lo chuan ka lut a, ka tap zawih zawih mai.

Tinge Marcus-a hian engmah a hriatthiam chuan loh le, ka duh takzet a ni tih hi hre ve tal se ka van ti tak em. Mahse min duh ve dawn chuang silo, enge ka tih ang ka hrelo  a ni. Ka rilru a nat chang te, ka lungawiloh changte leh ka mangan changte a ka inhrikthlakna ber Marcus-a chu ka hmangaih tlat mai si a.

Tunah chuan amah vangin ka na ngawih ngawih chu ania, tu hnenah nge ka natna te hi ka hrilh tak ang? A fair lo, a far lo ngawih ngawih. Tun ang hunah te chuan mi zawng zawng an hlim a ni thin a, mahse kei erawh ka na em em thung si anih hi. Ka ta ni ngai miah lo tur chu ka vei bur mai si a, a ni telin ka duhna a zual telh telh reng mai bawk si.

Ka chau a ni, ka chau ngawih ngawih a ni. Ka phone chu a rawn ri leh a, "Thleng har ve.." tih hi min rawn thawn a. "Ka thleng chiah, tihtur ka nei lawk a, ka buai rih dawn. Nakinah kan inbe leh dawnnia aw.." tiin phone chu ka switch off leh nghal hmak. Ka room ah ka lut a, khumah chuan ka bawk thlawp mai.

Ka lo muhil daih mai, ka pa chuan min rawn kai tho a. Khua pawh a lo thim der tawh mai, "Chaw ei ang le." a rawn ti a. Peihlo tak chuan ka tho chhuak a, ka pa chuan rawng a lo bawl vek chu niin, anuamlo duh ngei mai. Chaw eilai pawh chuan ka ngawi reng a, ka pa pawh chuan min hrethiam a ni chek ang chu, min be buai bik lemlo.

Ka phone pawh chu ka la on chuanglo, ka ngui bur reng mai. Dar 8 a pelh hnu chuan kawngka a rawn inkik dat dat a, "Bawihi, hei i thianpa a lo leng ania." ka pa chuan a rawn ti lauh lauh a. "Tu ka thianpa maw?" tiin ka lo zawt a. Ka rinloh tak maiin, "Marcus-a.." a ti ta thut mai.

Rang takin ka va chhuak nghal a, Marcus-a a lo ni tak tak. Ka pa awmlaia a vawikhat lo lenna a ni, ka thin a phu dup dup thei nia mawle. "Tikhan lo inkawm ru, ka lengchhuak dawn. Marcus, lo leng reng rawh aw.." tiin ka pa chuan min chhuahsan ta a, chance min pek a tum amawni, khawiah tak leng ang maw?

Rum zet hian min melh a, "Min ning tawh a ni tiraw?" a ti ringawt a. "Hmmh..awihawmloh thei...enge ka nin ngawt ang che?" ka lo ti deuh hmuk a. "I reh nghal hmak a, ka phone che a, switch off a inti zel bawk si. Min be peihlo anih kha, min hne tawh a nih kha." tiin a han titau vel a, awii..ka beng chak lutuk.

Abulah chuan ka va thu a, "Tihpalh..ka phone a thi daih alawm..ka hne reng reng lo che." tiin ka kuah a, "I sual si.." tiin min lo nam sawk mai. "Nang i fel alawm, titau suhhh...i fel em khaa.." tiin ka han tlawn leh a, a tawpah chuan a nui ve leh ta mai a. Thlem lungawi a har lo, mahse fiamthua a titau pawh hi keichuan hmuh hrehawm ka ti.

Min tina hle mahse, anat ve ka phallo. Khati khawp khan Marina-i'n a tina tawh a, chutah apa in a thiannu Kimkimi nen innei turin a tilui bawk a. Chumi hnu lawkah apa chuan a boral san leh ta mai bawk si nen, keia tuar ve hi zawng ala nep emai. "Leng reng rawh aw.." tiin a kutah chuan ka vuan a.

"Min ngailo bawk sia, ka inthlahrung." a han ti vel a, a ngeiawm thiam ve ania. "Ka ngai che ka tih kha...lo riak law law la." nui chung chuan ka han ti a. "Nia, avawt bawk sia, ka riak duh tak tak maithei ani, ka haw peih tawhlo emai." tiin a han nui huah huah a.

Inla pangchang tak chuan a malchungah chuan ka han mu vel a, duat tak hian ka samah chuan a chul heuh heuh a. "Ti daih ila, Kimkimi hi enge a chanchin?" a rawn ti deuh thut mai. Kimkimi tal hi chu thik loh ka tum tehreng nen, amak lutuk. Chutia Kimkimi a ngaihtuah niawm taka a rawn sawi chhuak pawh chu ka lo thik leh tlat pek nia, mahse ka tilang tawh lemlo.

"Ka hrelo, in inbe ngailo em ni?" tiin ka lo zawt let a, a lu a thing a. "Be lo, a number a thlak tawh aniang, ka phone pawhin OUT OF SERVICE a inti zel." tiin min chhang a. "Ka hre biklo, keipawh min be ngai biklo." ka lo ti ve leh a. Huiham, ka thiannu ve ber, ahmaa Marcus-a ka tihpui ngei pawh chu ka thik ta chu ania, ava han zialo thin tak.

Dar 12 rik hma hret chuan ka pa chu a lo haw a, Marcus-a pawh chuan haw a tum ve nghal a. Kawngka bul thleng chu ka thlah a, "I phone chu lo off tawh reng reng suh, ka rawn be lehnghal dawn che ania." tiin min han vau lawk khur khur a, "Yes Boss...tehreng mai." ka lo ti a, kan inthlah liam ta a.

***************

Umm..ka nu hming pawh a rawn lang ve leh zeuh mai. Lal Lily chu aw, ka nu te ilo thik mai mai ni. Phek lehlam ka han keu a, Lily leh ka pa inkiss lai thlalak chu ka hmu leh ta. Mahni pa te ngei mai, hmeichhe dang daih nena an inkiss lai thlalak han hmuh chu a thinrim thlak duh viau maithei, mahse kei erawh chuan hmuh anuam ka ti tlat thung.

Achhan chu Lily a ni tlat, ka lehkhabu chhiar mek ah hian a changtunu ber a ni tlat. Phek dang han keu leh ka tum chu current a rawn thim thut mai, ava hunlo tak. Umm, a tlai tawh tho, mu phawt mai teh ang. Naktuk chu a tam thei ang ber ka chhiar tawh ang, a tawpah enge thleng ka hre chak tawh emai.

*****************

Zing khua a lo var leh ta, exer lak chu sawi loh, a thawh pawh ka tho chhuak peih lo. Lukham hnuai a han dap leh ruk ruk a, Lily Hringnun Diary bawk chu ka la chhuak leh ta. Hmai phih chuang miahlo chuan ka hmai chu ka han tuai nawk nawk a, sana ka'n en chu dar 8 a lo pel der tawh mai.

A nula ber ka tho tlai leh ta ber chu a nih hi maw? A va han nikhua loh thlak thin tak em. Ka pa leh ka pi lah hian min duat hlum lo chauh chu a ni mai si a, chuvang aniang ka thau tulh tulh mai ni. Diary chu ka chhiar tui hman tak tak dawn chuang lo, chaw ei hma i han in paih thawl leh phawt mai teh ang.

Ka pa pawh a lo kal leh hman daih tawh, a chang hi chuan kan chhungkua hi pathum chauh ni mah ila kan inbe mang ngai lo hrim hrim. Ngawi reng te hian chaw kan ei a, a chang leh kan titi tui em em a. Chhungkaw sial ve tak chu kan ni, kei aiin ka pa a la luck zawk zui. Ka pi pawh hi a hmeltha tho, tumah ka chhun ve lo aniang.

Ka tih tur zawng zawng ka ti zo ta, ka va hman leh ta em. Room ah ka lut a, ka diary duhlai chuan ka khumah min lo nghak vang tawh mai. Ka ngaihzawng neih ve chhun a ni tawh mai, ka atchilh bur mai a ni. Khumah chuan ka lawn leh a, diary chu ka han ban leh ta a. Ka chhiar tawp ber na atang chuan ka han chhiar tan leh ta a....

*************

Bangalore atangin January ni 24 ah hna thawh tan leh tur a nih thu kan dawng a, ka va han peihlo tak em. Marcus-a ka awm bo san leh vang vang anga, ka ngai leh dawn lutuk hi ka ngaihtuah ngamlo zawk. Ka khua a har leh dawn bawk si, in luah tur zawn chawp nen, ka huphurh ngawih ngawih.

Ka thawh chhunzawm tawh lo mai dawn mawni ka ti hman hial, mahse hna dang hmuh leh a harsa dawn bawk si. Chubakah ka awmloh chhungin Marina-i nen an lo in re-new leh vel ang tih te ka hlau, ni 24 lah chu minute tinin a hnai tial tial mai bawk si a. Ni 24-a hna kan tan a nih chuan inluah tur zawn chhung nen, a kalkawng zawng zawng nen, ni 20 velah chuan ka chhuk ngei ngei a ngai dawn bawk si.

Kar 2 pawh a awm tawh lo, a tam thei ang bera Marcus-a bula ka awm a ngai a ni. Ka thiannu neihchhun tak meuh meuh Rosy bulah chuan engkim ka sawi ta a, "Ka tihreng kha...i inpawm duh lo tlat anih kha...Bawihte, kan chhuk leh hmain i hmangaih thu hi hrilh ngei ngei rawh." min la tizui.

Ka ngam chuanglo, engtikah mah ka hmangaih thu hi ka hrilh ngam pawh ka ring lo. Mipa thar tawn pawh ka chak chuanglo, ka Superman-a hi lo tawng miah lo ila tha tur. Ka ngui bur reng mai a, ka pa pawh chuan engmah min zawt lo mahse ka na tih chu a hre ve reng thin. Ka nat zual a hlauh avangin engmah min zawt ngai lova, Marcus-a kalsan turin min ti ngai hek lo.

A bula ka awm changte chuan ka rilru in, "Marcus, ka hmangaih che..ka hmangaih lutuk che." tiin ka be mawlh mawlh thin. Marina-i chungchang erawh a sawi ngai lova, lam pawh a lam ri tawh ngai hek lo. Mahse a thinglungah chuan kei nilovin Marina-i zawk chuan hmun a chang hnem zawk tih ka hai silo, awmdun hnem viau mah ila Marina-i chu ka thik ngawih ngawih tho.

Ni 24 ah hna kan tan leh tawh dawn tihte chu ka han hrilh a, a hlim lo kher mai. "Anih chuan nitin zantin kan inhmuh angai a nih chu.." a ti a, keipawn chu chu ka duh alawm. Nitin mai chuan kan inhmu a, darkar khat lek pawh nise a bula ka awmloh chuan ka ngai nghal ngawih ngawih zel.

Chhunah an in lamah kan awmdun a, zanah erawh kan inah a rawn leng thin thung. Ka pa lah hi engemaw a hriat ni, Marcus-a  a rawn len tawh hi chuan a len chhuah loh pawhin a mu daih zel. Mahse kan pahnih tan chuan  a nuam daih zawk, kan duh duh danin kan infiam thei a. A thinlung chang ve lo mah ila, a taksa tal ka bulah a awm a, vanduai em em chu ka ni bik love tiin ka inhnem chawp thin.

Ka mitthla ah chuan urlawk zana min han kiss vawng vawng lai te chu a lang chuai chuai zel a, zep lo chuan kiss leh kha ka chak ngawih ngawih. Ka neih theihna tur a nih phawt chuan a fa pai pawh ka hreh lo, chesual mah ila mualpho ka huam thlap tih tur khawpin he mihringpa hi ka hmangaih a ni.

Ka hur herh vang anilo, ka khawloh vang a nilo, ka hmangaih em a, midang tan ka phal ngang lo a ni. Ka bulah chauh awm se ka duh a, hmeichhe dang a melh hlek pawhin ka na zawk zel. Tiang em em hian mipa hi ka hmangaih ka inring ngailo, mahse achang chuan chutiang thleng thleng a ka ngaihtuah chu ka insit leh rum rum thin.

Hun lah chu a liam ve zel mai bawk si a, kan inkalsan hun pawh a hnai ta telh telh mai. Tuk khat ka leng chu rinloh takin a lo awm lo ve khiah mai a, "Thil lei turin ka tir lawk, Vishal ah.." tiin Nu Duhzuali chuan min lo hrilhfiah vat a. Anu nen chuan kan inkawm a, kan titi tui ngei mai. Chutah Nu Duhzuali chuan, "A hrim hrimin Lily, Marcus-a hi i duhzawng a ni ve reng reng em?" a rawn ti thut mai.

Ka thingpui inlai chu ka hnar khu chhuah hial a, a sa tha teh asin. "Aa..ihh..engtia duh in maw?" ka han ti bah nuai a. "Aww...amah hi i duhzawng a ni em?" tiin min han zawt leh a. Chhan thiam a har ngei mai, "Ka hrelo..tinge min zawh deuh teh thut a?" ka han ti leh a. "Thenawmte zawng zawng leh kan chhungte pawhin a bialnu angah an ngai vek che alawm, Bawiha lah chuan ka thiannu alawm a ti tlat bawk si che a.." a han ti a.

Ka na zawk mai, min duh ve ngai dawnlo a ni tih chu ka hre chiang telh telh mai si a. Hei aia hriat chian leh chu ka duh tawh lo, ka hnuk a ulh deuh nghal der mai. Mahse ka nui lui hram hram a, "Nia, thian chauh alawm kan nih." ka han ti leh ringawt a. "Mahse, ka hrelo i tih kha...i duh ve deuh anilo maw?" a rawn ti leh a.

Chhan dan tur ka hre tawh lo, ka lai vek tawh. Ka ngawi reng a, chutih lai chuan Marcus-a pawh chu a rawn thleng ve ta a. "Dawhkana hi ka dah mai aw.." tiin a thil lei te chu dawhkanah chuan a dah a, min rawn hmu chu a hlim hmel kher mai. "Yess..i lo thleng daih tawh animaw, ka duat.." tiin min rawn nuih a.

Kan bulah chuan rawn thu ve in, "Enge inlo sawi a?" a rawn ti a. Anu chuan nui chung hian, "I nupui tur kan lo sawi a, zawnpui i ngai tawh...a hun ve tawh alawm." a han ti a. A ner nung mai, "Hmmh..hei, heta hi..i hmaah hian a thut reng hi.." tih pah chuan min rawn kawk a, fiamthu a ni tih chu hre tho mah ila ka lo hlim veng veng mai.

Nu Duhzuali chu a nui ta huah huah mai a, "Inngaizawng mang silo, in inzui reng bawk si. Lily bialpa a thinrim ange, i ngam dawn mi?" a han ti leh vel a. "Bialpa a nei bawk leu, tunah chuan a bialpa ka ni mai. Hawh Lily, leng daih ang." tiin min pawt tho lawp a. Nu Duhzuali chuan min enzui reng a, Marcus-a hi ka hmangaih takzet a ni tih hi a hmuthiam ve amawni ka ti hial hman.

Kan chhuak dun leh ta a, khua a vawh em avang chuan kan kal kual peih vak ta lova. Kan spot ah bawk chuan thu dun lehin kan inkuah leh rial a, "Sayang, kallo mai la..." a han ti chuai raih mai a. "Keipawhin kalloh mai ka duh, mahse ka kalloh chuan ka hna ka chan mai anga sin." ka lo ti a. "I tello te chuan engtin nge ka awm ang? Ka khua a har dawn emai." tiin a hnuk a ulh lek lek mai.

"Keipawn ka ngai dawn lutuk che, mahse ka kal ngei angai sia...vacation hmangin lo kal ve leh mai la.." ka han ti a, "Ka nu chiah inah a awm dawn asin...Chhungkaw pa ber ka ni tawh sia, ka kalsan thei nang." tiin min chhang a. Kan inkalsan hreh ngawih ngawih a ni, ka mittui chu ka dang zo leh ta lo.

Zawi te te chuan ka inhnit feih feih a, "Induh tawh lo la, ka lo text che emaw, ka lo biak che pawhin rang takin min lo chhang vat zel tawh ang che." tiin ka chalah chuan a rawn fawp zeuh a, ka feel veng veng thei, ka lo maimitchhing tawp. Ka chala a rawn fawp ringawt pawh tiang khawp khan nuam ka ti ania, ka hmuiah min han fawp leh phei se chu, mahse ka duhthusam mai chauh a ni si.

Kalsan ka duhlo ang bawkin ani pawh chuan ka kal a phal ngang lo a ni, "Kan company rawn join ve mai la, kan pute ka lo bia ang." te a ti hial a, mahse chutia han tih rikngawt chu a thlamuan thlak loh bawk si. Chubakah ka pa hian a remti dawnlo lutuk, hreh chung chung chuan ka hnial zel a.

Bangalore atanga min hawsan dawn laia ka ui ang chiah khan tunah hian min ui ve thung a ni, KA HMANGAIH CHE ti a kuah ngawih ngawih mai ka chak. Kuah chu ka kuah thei a, mahse, "Ka hmangaih che.." tih erawh ka sawi ngam si lo. Eng ang pawhin han inkuah nasa thin mah ila, ka tan chuan a nuam famkim thei thlawt lo a ni e.

Tlai a lo ni a, kan in thleng chuan min thlah haw leh ta a. An ina leng tur hian taxi te hi ka hmang leh tawp zel, kan scooty neihchhun hi ka pa hian a lo hmang ve duh bawk thin si a, a buaithlak thei ania. Kawng penga a tlan liam thleng chuan ka thlir zui vawng vawng a, "Tluang deuhvin aw...ka hmangaih che, duhtak." tiin keima hriat tham lek chuan ka phun sap a.

In ka han lut chu ka pa chuan, "E Bawihi...hei inleng i nei ania." a lo ti a. Sitting room lama ka inleng neih chu ka han en chuan inleng ka neih tawh zawng zawnga ka biak chakloh ber a ni hial ang, zurui leh taxi driver hote pawh kha lo leng leh se he mihring ai hi chuan ka be tha zawk ang. Chu ka inleng chu e, mipa a nilo, hmeichhia a ni.

Hmeichhia ah pawh ka hmeichhe huat ber, ka hmangaih ber Marcus-a tina em emtu Marina-i ngei a ni. Min lo la nuih sang zui, "Ka lo nghak reng che a.." a la ti zui, va tlawh pawp ania ka duh ni. Mahse ka pa a awm ve bawk si a, phurlo tak chuan ka han nui lui ve a. "Ka room ah lo lut rawh, kan inkawm dawnnia." tiin room ah chuan ka lut a.

A rawn lut ve mai bawk a, kawngka chu ka kalh nghal. Rum zet hian ka melh a, "Enge i duh?" ka han ti thawr a. Mahse ka rin ang a ni hauh lo, a inthlahrun hmel em em a, ka mitah pawh min en ngam lo. "Thil dil che ka duh a.." a han ti tham tiak a, mahse ka huatna leh ka ngeina a ziaawm phah chuang eih lo.

A chezia vel chu ka ei lo tulh tulh zawk, "Sawi vat rawh...enge i duh?" ka han ti vin leh hlur a. Hreh hmel tak chuan muangchang hian ka hma ah chuan a rawn thingthi ta mai, "Engthil nge i tih a?" ka lo ti vak a. Chutah a tap ta mai a, "Lily, min ngaidam rawh.." a ti ringawt a. Ka hrethiamlo, ka awm a nuamlo vek thei hial.

"Enge ka chungah i tihsual a? Engthilah maw?" tiin ka han zawt leh a. "Marcus-a ka kalsan kha ka inchhir ngawih ngawih a ni, ka lo la hmangaih reng tih hi ka hrelo a ni." a ti ta a, ka hah vek thei. Khumah chuan ka thu hnawk a, "Enge ti tura min duh a?" ka han ti leh ringawt a. Mittui tla phung chuan min rawn en a, "Min pe let leh rawh...midang tan ka phallo a ni. Khawngaih takin ka dil ache, ka hmangaih a ni." a han ti leh hluam hluam a.

Awii, ka tah a chhuak zawk...ka so bawrh bawrh thei hialin ka hria. Huiham, engtia awm tur nge pawh ka hrelo, ka hmaah thingthi meuhvin min rawn dil chu ania. Rum zet chuan ka melh a, "Engtin nge ka tih vak bik chuan anga? Nangmah zawkin i kalsan a, i tina a nih kha..." ka lo ti hlur mai a, ka thawk ahah vek thei.

"Kum 3 chhung teh meuh kan lo inzui tawh a, min duat zia te, min hmangaih ziate leh min care ziate kha ka lo haider thin a, ka inchhir takzet a ni. Min pe let hram rawh....ngaihdam dil tur che leh he thu hrilh tur che hian nilengin ka lo nghak che asin. I duh dan ang angin ka awm anga, i sawi apiang ka ti ang. Mahse hei chauh hi ka ngen ache, Marcus-a hi min pe let hram rawh." a han ti leh a, a tap zawih zawih mai.

Ka puakkeh lo chauh tawh, "Marcus-a hi bungrua ang maia duh duh hnena hlanchhawn theih ani em ni? Nang hian i phu tawh hlawl lo...tunah chuan ka ta a ni tawh." ka ti ve ta hmak mai a. A kun reng a, "Min kalsan thei a nilo..Marcus-a hian min kalsan thei lovang." a rawn ti zawi sap mai.

"Engmaw i sawi a?" ka vin lek lek tawh, min tih thinrim a tum amawni, henu tak hi chu. "Min kalsan theilo mai pawh anilo, min kalsan thianglo." a han ti leh a, ka thinrim tawh ngei mai. Ka ding a, "Engvangin maw? Nangmah zawkin i kalsan a, engvangin nge a kalsan theih loh bik ang che?" tiin ka zawt leh a.

Hetah chiah hian a ni, khawvela ka thu hriat duhloh ber mai chu ka hriat tak ni. Chiang fek fawk hian, "Marcus-a hian minla hmangaih tih ka hria, keipawhin ka la hmangaih a ni. Ka sawi duh lo viau na a, mahse duhthlan tur dang ka nei tawh silo. Lily, Marcus-a nen hian vawi tam tak kan mudun tawh a ni." tiin min hrilh ta anih kha.

Ka tliak hnawp hian ka hria, ka bing mup mai. Ka tap theilo, mahse dan rual lovin ka mittui chu a sur zung zung mai a. Ka tawng theilo, ka hrawkah hian hnawhtu a awm tlat hian ka hria. "Ka tihpalh, mahse i hriat a ngai a ni. I rilru tihnat ka duhlo, mihring ve tho ka nih hi, Lily. Ka hmeichhiat pui i ni a, i nat hi ka duh bik hleinem." tiin ka banah chuan a rawn vuan a.

Rang takin ka lo paih thlak sak nghal a, "Nang..nang leh..Marcus-a...eng..engtin maw i sawi a?" ka ti tawk tawk a, ka sawi hleithei lo. Inthiamloh hmel tak hian a lu a lo bu nghauh a, "A dik alawm, kan mudun fo tawh a ni." a han ti leh a, aww...ava han ngaihnawm loh ber mai em. Sawi tur pawh ka hrelo, "Vawi engzat?" te ka han ti ringawt a nih kha.

Kum 1 kan nih tlin chiah atang khan, ka...ka chhiar seng tawh lo." ala ti deuh deuh a, ka bul hnaiah khan chemte emaw silai emaw chu awm se ka inthat duh hial ang, ka khaw hmuh te chu a fiahlo vekin ka hria. "Ka tihpalh aw, Lily..min ngaihdam hram dawnnia. Abak chu i thu thu a ni e, ka kal ange." tiin min chhuahsan ta a.

Khumah chuan ka bawk a, lukham chuan ka hmai hupin chhuak em em hian ka tap hawm hawm mai a. Ka hmangaih ber, a tellova ka awm theih loh chuan ka mihring huat ber Marina-i chu vawi duailo a lo mutpui tawh amaw? Ani theilo, ka na ngawih ngawih a ni. Hrelo tal zawk ila, mahse tinge kha mihring nu khan min rawn hrilh kher?

Ala hmangaih ve thu a rawn sawi leh ta nghal a, awi ka haw lutuk. Ka pa'n ka tap thawm a hriat ka hlau bawk si, ka tah a chhuak bawk si, avan hrehawm tak. Ni e, kan intawn hma thil daih a ni tih chu ka hria. Inngaizawng an ni a, sex pawh lo hmang rawh se. Mahse hriat kher kha ka duhlo asin, tinge Marcus-a ka tawn atang hian rilru natna hian min umzui char char bik mai le?

Chaw pawh ka ei theilo, thildang ka ngaihtuah thei mawlh lo a ni. Chaw eikham veleh chuan ka pa chu a chhuak nghal daih a, Marcus-a  alo len leh a ring a ni ngei ang. Message ka dawng a, "Ka lo leng dawn.." a rawn ti ta ngei mai a. "Umm." tih bakin ka chhang lo. Dar 8 rik hma hret chuan a lo thleng a, ka phur lo kher mai.

Min be bawrh bawrh a, mahse a rul tawk bakin ka chhang lo. Ka awmdan chuan a ngaih a ti tha ta bik lo aniang, "Tinge i van chauh hmel em em ve? I tap ami? I mit te kha a bui vek ania.." a ti a. "Aih, tap lo..tlai ka haw kha ka mu a, chuvang chu aniang." ka lo ti a. "Ka awihlo, kha i aw pawh a chhang vek alawm. Tunge vel che? Sawi rawh...tunge ti tap che?" tiin ka kutah chuan a rawn vuan a.

Ka insum leh thei ta lo, "Nangman, nangmah hian min vel tap a ni." ka ti ta hrep mai. Ka hnuk a ulh leh nghal a, ka va tahbelh si em. Ka muttui pawh ka dang zo leh ta lo, Marcus-a erawh chuan hriatthiamloh hmel tak chuan min en a. "Keiman maw? Lily, engtin nge ka tih che?" a han ti a, hrehawm a tih hmel hle mai.

Awm ngaihna ka hrelo, Marina-i thil sawi kha ka bengah a rawn ri nawn mawlh mawlh a, ka ding a, ka hmai hupin ka tap leh ta hawm hawm mai. Min rawn kuah a, "Ngati nge, bawihte...ka ngaih i ti thalo ania." tiin min rawn thlem a. Mahse ka lo nam sawn vak a, "Nang hian...nang hian.." tiin ka kutzung chal chuan ka han kawk a, mahse ka sawi zawm hleithei lo.

A hrilhhai kher mai, min en tlawk tlawk ringawt a. "Tihsual ka nei ami? Tinge hetia i awm thut a?" mangan hmel tak chuan a han ti leh a. Chutah vin zet hian, "I bialnu hlui, i duh em em Marina-i chuan vawiin tlai khan vawi tam tak sex in hman tawh thu kan inah ngei rawn kalin min rawn hrilh ani, chu chuan min tina a, min vel tap a ni." ka ti ta vak vak mai a.

A hmel chu mak tihna hlirin a khat a, a ngaihna a hriat loh hmel kher mai. "Marina-i maw..alo kal amaw?" a ti a, a lua dawm vawng vawng mai. A kawr awmah chuan ka tham vak a, "Min hrilh rawh....thudik a ni em? Mawwhh..sawi rawh." tiin ka sawi vak vak a. Ka heh a pet fan fan a, ka mitah pawh a en ngam lo.

Hnuai lam a melh char char a, a zah hmel kher mai. "Sawi rawh, Marcus...sawi rawh, thudik a ni em?" tiin ka zawt leh a, ka aw pawh a chhuak tha hleithei tawh lo. Muang chang chuan a rawn hawi chhuak a, "Aw..a dik e." a rawn ti zawi sap a. Ka thingthi hnawk mai, thudik a ni tih chu hre tawh tho mah ila Marcus-a ka ngei atanga ka han hre leh chuan min tina zual kher mai.

Mahse Marcus-a erawh chuan chuti taka ka lo laknat nachhan chu a hrethiam chuanglo a ni ngei ang, "Mahse, mahse Lily...tinge i thinrim  em em a? Marina-i kher lo pawh, midang te pawh ka lo chetsual pui thei a. Kan inrhiat hma daih te pawhin ngaihzawng te chu ka nei ve fo a, tinge ka chungah i thinrim em em a?" tiin min zawt leh a.

Ka inring hman lo, "A chhan chu ka hmangaih che a ni, Marcus. Ka thinlung zawng zawngin ka hmangaih che, ka ta ni turin ka duh che. Ka pasal ni turin ka duh che, ka ta chauh ni turin ka duh che a ni. Marina-i hi ka thik a, Kimkimi takngial pawh hi ka thik asin." ka ti ta phiar phiar mai a, ka insum zo hman thlawt lo a ni.

Mahse ka han sawi chhuak ta chu na hle tho mah ila ka thawl ve hawk chuan ka hria, mahse ka la sa pup pup tho. A ngawi reng a, mit khap miahlo chuan min en reng a. Tawng a tum eih lo amaw tih tur khawp chuan a ngawi ta vang vang mai, "Tinge? Ka diklo em ni? Ka hmangaih ve theilo che em ni?" tiin ka han zawt leh a, ka zak peih tawh lo, kan nih tur ang kan ni vek tawh tho.

A lu a thing a, "Nilo Lily, chutiang tur a nilo." a ti zawi sap a, ka lo maimitchhing tawp. Ka rin ang chiah a ni, min duh ve dawn chuanglo, a tan chuan thian chauh ka ni si. Maimitchhing chung chuan, "Tinge? A chhan min hrilh rawh...tinge min hmangaih veloh? Tinge min duh veloh?" tiin ka zawt leh a, hetiang em em a tlawm hi ka la nei ngailo asin mawle.

"Lily, ka hmangaih che alawm. Ka thian i ni a, ka unaunu ang chiah i ni. I bula awm reng ka duh a, nang pawh ka bul hnaiah awm reng la ka ti. I tello chuan ka khua a har a, ka hlimna te ka lungngaihna te leh ka lawmna te, engkim ka hrilh ngamna awmchhun i ni. Mahse, chutiang khawpa ka thian, ka kawmngeih em em chu a thianghlimna hawnsak tu tur leh ka khum min tawmpui tu tur angin ka lo la suangtuah ngai miahlo che asin. Nilo Lily, thil dik anilo.Keichuan hmeichhe pakhat ka khawih chhe tawh a, hmeichhe khawihchhait leh chu ka duh tawhlo, nang phei chu ka phal lul lo asin, Lily.." tiin min chhang ta a nih kha.

Ka awrawl tawp chuan ka tap ta hawm hawm mai, "Lily, tihnat che ka duhlo a ni." inthiamlo tak chuan a han ti leh a. "Marcus, Marcus...ka na tawh..ka na zo vek tawh...hei aia nat leh hi ka duh tawh biklo." tiin tap chung chuan ka lo chhang let a. Thingthi chungin ka tap a, anih erawh mittui tla zawih zawihin a ding reng thung.

Ka tho a, ka muttui ka hru a. "A tlai tawh, haw tawh rawh.." ka ti deuh hmuk a. "Lily..khawngaihin.." a tih lai chuan vin zet hian, "Haw tawh rawh ka tih chu..ka mu duh tawh.." tiin pawn thleng chuan ka nam chhuak rawk rawk a, hrehawm a tih hmel kher mai. Hreh hmel tak chuan a kal ta a, en pawh ka enzui duh lo.

Kawngkhar chu ka khar hmak a, ka mu nghal hmak. Ka pa lo haw lai pawh ka hre reng a, mahse ka va tho chhuak peih tawh lemlo. Ka rilru ka siam fel ta, Marcus-a chu ka theihnghilh hmak a ngai a ni. Ka thei angem chu ka hrelo, mahse ka tum ve angai. Naktuk tuk leh khi ni 20 a ni tawh dawn a, hnathawk turin phai lamah ka let leh angai tawh tho bawk a.

Hna chauh ngaihtuah tum ila, zawi zawiin ka theihnghilh ve thei mahna. Min duh lotu leh min hmangaih ve lotu lo hmangaih reng a, lo vawn tlat te chu a nep thlak emai. Duh leh Marina-i nen chuan lo in renew leh se, lo chesual leh engang mahse ka lo buai vena tur a awm tawh lo. Ka thinrim lutuk chu ka rilru in ka ang bawrh bawrh a, chhin khat te mah chhing lo chuan khaw var thleng chuan ka tap char char ringawt mai a ni.

*****************

Eheee...kei hi, Marina-i fanu zawk ka lo ni reng lo maw? Ka duh miah lo ania, ka pa chu...awiiii ka thin a rim lutuk. Ka pi pawh hian a hriatpui vek tihna chu ania, awii..enge awmzia? Lily ang chiahin keipawh ka sa pup pup mai, a hrehawm lutuk. Ka hnuk a ulh ve hial, ka pa hian ka nu chauh nilovin ka mihring huat ber mai Marina-i pawh a lo mutpui amaw?

*****************

"Pi, apa chuan Marina-i a lo mutpui amaw? Enge ka thil chhiar hi awmzia? Tu fa ber nge ka ni?" tiin ka pi roomah chuan lutin ka va ang nghal bawrh bawrh mai. Ka pi chuan minlo en a, a han thaw deuh hak a. "Lo thu teh..hetah hian.." tiin min hui a, abulah chuan ka va thu ve ta a.

"Pi, ka nu hi tu ber nge ni a? Kimkimi nge Lily nge Marina-i?" tiin ka han zawt leh a, tu fa ber nge ka nih ka hre duh a ni. Ka pi chuan zaidam tak hian, "Bawihi, hei vang hi alawm engkim hre tura ka duh che. Lily khan he diary hi min pe a, anihna takah chuan i pa chhiar turin a ti a ni. Mahse i pa chuan a chhiar duh ngailo, a chhan chu hun kal tawh te chu hriat chhuah leh a duh tawh lo a ni." a han ti a.

"Anih chuan tunah hian khawnge Lily chu a awm? A thi tawh em ni?" tiin ka han zawt leh a, ka hnuk a ulh teuh tawh mai. "Ka hrelo bawihi, chhiar zo phawt la, engkim a chiang vek mai ang." tiin min lo chhang leh a. Ka kutah chuan diary chu ka la hum reng a, "Anih chuan ka nu hi tunge?" ka han ti leh a.

"Aww..Lallawmkimi, Kimkimi hi i nu tak tak alawm bawihte.." a ti leh bawk si, "Mahse tinge Marina-i leh ka pa hi an chetsual fo si?" tiin ka tap pur tawh mai. A hrehawm em a ni, mahni pa te ngei maiina ka nu nilo midang a lo chetsual pui chu an nulat tlangval lai daih pawh nise pawm thiam a har a ni.

Zaidam tak hian ka pi chuan, "Chuvang alawm i pa hi i ngaihdam angai a ni, engkim thudik i hriat angai. I pa hi ngaidam hram rawh aw, bawihte?" a han ti leh a, ka mittui ka dang zo tawh lo. "Pi, Lily tal hi hmuh ka duh a ni. A bulah min hruai rawh...a hmangaih em em Marcus-a fanu ka ni tih hi hrilh ka duh a ni." tiin ka pi chu ka kuah a, ka tap tawp.

"A awmna ka hre biklo alawm, Bawihte...engmah ka hrilh thei rihlo che. I zawhna zawng zawng chhana chu diary ah khan a awm a, chhiar zo phawt rawh. A kar laklawha i tawp san daih chuan engmah thil awmzia i hre dawn chuanglo, Marina-i fa i nilova, Lily fa pawh i ni heklo. Ka fapa Marcus Hmingthanzuala leh ka monu, ka duat em em Lallawkimi te fanu neihchhun tak meuh meuh i ni." tiin ka samah chuan a chul a.

Ka thinrim em ani, Marina-i huat sa mah nak alai a, an chetsual fo thu ka han hre leh chu rilru a nuam thei mawlh lo a ni. Mahse Marina-i fanu ka nilo tal a, ka thaw huai mai. "Nakin lawkah thudik chu tu tute ka atangin emaw i hre leh dawn tho si a, chuvang chuan tunah hian engkim hria la ka duh a ni." tiin ka pi chuan min hrilh leh a.

"Anih leh pi, apa chuan diary hi a awmna a hre miahlo tihna ami?" tiin ka han zawt leh a, "Paih turin min ti a, mahse ka dahtha ta tlat a nih kha." tiin min chhang a. "Anih chuan apa chuan Lily hi a hua em ni?" tiin ka zawt leh a. "Haw love, a nunhluite hriatchhuah nawn leh a duh tawh loh vang a ni." a ti a, ngawi reng chuan ka pi room chu ka chhuahsan ta a.

************

"Bawihte, inngaizawng an lo ni ve tawh a, sex an lo hmang te chu a awmlo hran hleinem. Chuvang ringawt a Marcus-a i hua a nih chuan i hmangaih tak tak lo aniang, chubakah a ho emai. Mipa dang an tam alawm, lungngai mah ta che." tiin Rosy chuan a thiam ang tawk chuan min hnem mawlh mawlh a.

"Rose, ka haw hleinem. Ka haw phal reng reng lo, engtin nge ka hmangaih ber chu ka huat theih ang? Ngaidam tur pawhin ka chungah engmah a ti sual hleinem, Marina-i nena sex an lo hman avang khan ka pawi a sawi ta e tihna pawh a nilo. Keimah zawk hi ka inhua ani, a hun kal tawh vanga ka lo thinrim ve ringawt hi ka inhua a ni." tiin ka lo chhang a.

"Bawihte, hahdam rawh. I hmeltha a, i luck bawk a, i pian a nalh bawk a. He mizoram chhungah hian nangmah duhtu che hi an tam lutuk, Marcus-a aia tha kan zawng dawnnia." tiin min tihhlim chu a tum ve nasa mai. "Marcus-a aia tha chu an tam alawm, mahse ka hmangaih ber Marcus-a erawh pakhat chauh a awm si a ni." ka lo ti chuai raih mai a.

A thiam ang tawk chuan Rosy chuan min hnem char char a, tlem chuan ka thawl ve ta hawk in ka hria. "Naktukah engkim lo peihfel vek la, inluah tur pawh khu lama ka thianten min lo zawn hmuh sak tawh ania. Kan pahnih in kan awm tawh dawnnia, lungleng lutuk tur pawh a zia deuh ang." tiin min nuih suk a.

Ava phurawm teh chiam lo tak em, mahse ka pa tan sum ka thawhchhuah ve angai bawk si. Tlai dar 5 velah chuan ka haw a, nui hmel put reng chu har tak a ni tawh. Marcus-a chuan min biak chu a tum nasa a, mahse ka chhang duh lo. Ani nena kan inlaichhina hi tih tawp ka duh, hmalam pan ka duh tawh takzet.

Mahse tunah mai chuan ala har takzet a ni, ka rilu ah a awm reng a, thildang ka ngaihtuah thei mawlh lo. "Ka ngai lutuk che, khawngaih takin inhmu ang...i kal hma vawikhat chiah inbiak ka duh a ni." tiin messege tam tak min lo thawn a, ka reply duh lo lui char char a. "Marcus, ka hmangaih che..ka hmangaih lutuk che." tih te chu ka type a, mahse ka clear leh vek zel.

Zan a lo ni a, pawn verandah ah chuan thuin thla eng chu ka han en a. Ka lung ava han leng tak em, ka hmangaih Marcus-a ka ngai a ni. A tellova awm chu a har dawn tih ka hria, mahse ka kalsan a tul tlat si. Thian la ni tal ila, hlim takin kan la inkawm nimai tur. Keipawh hian tinge maw ka lo duh kher kher le? Ka thiamloh vek a ni.

Hreh chung chungin ka hmangaih thu ka hrilh a, mahse ani chuan a remloh thu min hrilh ta kha ania. Min duh ve miau lotu chu kei, a hmeichhia zawkina va umzui reng chu ka tumlo bur. "Marcus, ani ai khan enge ka thatlohna? Tinge min hmangaih ve mai loh le?" tiin ka tap zawih zawih mai a.

Nu ka nei ve tawh lova, ka nu ang maiin min enkawl a, min duat thin laite khan ka nu chu ka theihnghilh hmak hial thin. Mahse tunah chuan ka nu chu ka ngai tawh takzet a ni, he khawvelah hian la awm ve se chu tunah te hian amalchungah muin ka rilru hahna te ka hrilh anga, min khawngaih ve tho chuan ka ring.

Ka ta ni ve ngailo tur Marcus-a chu kumkhua atan ka mangtha angai ta, hreh tak chung chuan mittui tla zawih zawihin ka engkim, ka hmangaih Marcus-a number, SAYANG tih a ka save chu ka han en vang vang a, maimitchhing chungin ka delete ta. "Marcus, min ngaidam rawh aw....ka hmangaih che..Mangtha le, ka thian duhtak...mangtha."

Atukah chuan sim card thar ka lei a, Rosy leh ka hnathawh puite bak chu ka number ka pe duh lo. Ka thawmhnaw ken turte chu ka han pack fel a, ka simcard hlui erawh chu ka paih bo hmak. Marcus-a bengbeh min leisak pawh chu ken loh ka han tum viau nanga, a man a to bawk a, amah hriatreng nan tiin air-bag ah chuan ka khung ta tho a.

Flight ticket pawh ahma atang daihin kan book fel tawh, kum thar a nih angin nun thar nen bul ka tan tak tak angai tawh a ni. Thawmhnaw ka pack mawlh mawlh lai chuan ka wardrobe chunga teddy bear lian tak, Marcus-a min leisak ngei mai chu a rawn tla nawlh mai.

Ka han en vang vang a, ka hnuk a ulh leh dawn tlat mai. Ka pa a lo lut a, rang takin ka mittui ka hru a. Teddy bear chu ka chhar a, a awmna ngaiah chuan ka dah let leh a. "I keng dawn lo em ni?" tiin ka pa chuan min zawt a. "Aww..hetiang lawm rual kan ni tawh hleinem." tiin nui chungin ka lo chhang a.

Mahse ka pa erawh a thutak hle mai, "Bawihi, i thiannu Rosy-i'n engkim min hrilh a ni." a ti ta mai a, Lalrosy thin hi chu awww.."Ka pa, ka tha alawm." ka lo ti a, mahse ka mittui chu a hmuh hmaih hauh lo. Ka bulah chuan a rawn kal hnai a, "Bawihi, i nu chu a awm tawh lo. Mahse pa ila nei ania, i pa ka la dam hi. I rilru ana anilawm ni? Ka hmaah hian tap ta che, ipa hian ka thlem ang che. I duhtawkin tap rawh..." a ti a.

Insum ava har em, "Nilo..pa..ka tah achhuak lo." ka lo ti a, mahse dawt ka sawi a ni. "Han au vak teh...au vak la...chuan i tah a chhuak mai ang." a ti a. Ka han maimitchhing vang vang a, ka au ta vak vak mai. Ka rilru ah chuan Marcus-a hlir a awm a, ka tah a chhuak zual ngawih ngawih.

A tawpah chuan ring em em hian ka tap ta a, ka insum thei ta ngang lo. Chhuak em em hian insum hauh lo chuan ka tap vak vak mai, ka na ngawih ngawih a ni. "Bawihi, tap rawh...i duh tawkin tap rawh." tiin ka pa chuan min kuah a. Ka tap tawp hleithei lo, "Pa, Marcus-a hian tinge kei hi min duhloh? Tinge kei aiin Marina-i saw a duh zawk? Mawwhh pa.." tiin ka pa awm chu ka chum vak vak a.

Ka pa pawh chu a mittui a tla zawih zawih mai, "I pa ka la dam alawm bawihte, lungngai reng reng suh. Tap bawrh bawrh rawh....ahmaa ilo insumna zawng zawngte kha leihbaw vek rawh." tiin duat takin ka samah chuan a chul a. Ka na takzet a ni, tinge ka ta ni ve thei miahlo tur chu ka lo hmangaih em em mai le?

Kan kal ni tur a lo thleng ta, taxi ah chuan kan bungrua te chu Rosy nen chuan kan dahlut dun mawlh mawlh a. Ka pa pawh chuan minlo pui ve bawk a, ka phur lo takzet a ni. "In thlen veleh minlo call dawnnia aw, tluang takin in kal dawnnia." tiin ka pa chuan min kuah a, hreh tak chung chuan taxi chhungah chuan ka lut ta a.

Kan kal liam ta, ka pa chu ka va han ngai leh dawn tak em. Earphone nen hla ka ngaithla a, ka maimitchhing vang vang a. Ka mitthla ah chuan thildang hmuh tum viau mah ila, Marcus-a lo chu midang an leng ve mawlh lo. Ka mittui  alo tla leh hman tawh aniang, Rosy chuan ka mittui a rawn hru a.

"Ka mit a thip lutuk a.." tiin chhuanlam ka lo siam vat a. Mahse dawt ka sawi tih chu a hre chiang ngang mai, "Nia, a nih ka ring." tiin min lo nuih suk mai. Airport chu kan thleng ta a, ticket vel chu kan buaipui nghal a. Darkar chanve vel nghah ala ngai zui, ka va han kal chaklo tak em.

Kan kal hun a thleng tep a, keini pawh kan lo inpeih fel vat a. Check gate ka va pan tur chiah chu ka hnunglam atang chuan Marcus-a aw ngei mai hian, "Lily.." a rawn ti thut mai. Ka bengchhe ri nise ka ti, mahse a ni hauh lo. Ka va hawi phei chu Marcus-a ngei mai a lo ni a, a thlan a tla nasa kher mai, a sam pawh a huh vek.

"Marcus, enge i lo tih?" ka lo ti vat a, a thaw hluam hluam mai. "Lily, tinge engmah min hrilh lova kal i tum a?" a han ti a, a hah lutuk chuan a awm a dawm vawng vawng mai. "Marcus, nang nen hian engmah sawi tur kan nei tawh lo. Tun atang chuan ka thian i ni tawh lova, ka hmelhriat pawh i ni tawh hek lo." ka lo ti a.

"Lily, kan tlai ange.." tiin Rosy chuan min rawn kai a, "Mangtha aw, MArcus." tiin kan kalsan ta a. Security Check gate ah chuan min check zova, ka va hawi phei a. Min lo la en reng a, a mittui a tla tih pawh chiang takin ka va hmu thei a ni. Mahse let leh thei ka ni tawh lo, hreh tak chung chuan ka kalsan ta.

Hna kan thawh tan ni atangin kar khat lai a lo liam leh ta a, kan Office pawh kan tluang phian mai. Kan Manager chuan ka presentation pek te chu min fak sak thei em em a, "Lily, promotion i hmu har tawh lovang." tia min han hrilh te chu ngaihthlak anuam ngei mai.

Mahse Marcus-a erawh ka la theihnghilh hauh lo, ka theihnghilh lo mai pawh nilovin engtik lai pawhin ka rilru ah ala awm a ni. Ka number a nei tawh miau silova, kan inbe ngai tawh lo hrim hrim. Rosy nen kan awmdun tawh avang chuan han chet vel pawh a awlsam sawt a, mahse a rukin bathroom ah Marcus-a ngaiin ka tap fo mai.

Hun a lo kal zel a, February thla tawp kan lo thleng leh ta der mai. Rosy nen chuan zana zu han indun zeuh zeuh chu kan ching phian lehnghal, ka ruih apiang chuan ka la tap ziah zui, zu han that loh zia hi chu aww... Ka pa nen pawh akhat tawkin kan inbe reng zel a, Marcus-a chanchin erawh kan sawi ngai lo.

Engtin nge a awm tak zel ang le? Marina-i nen khan an ni leh ta angem le? Ngaihtuah tum loh pawh hian a ngaihtuah loh theih loh a ni. He mihringpa theihnghilh nan chuan hun ka va la mamawh hnem dawn tak em, zan tam tak ka mut theihloh phah ziah. Hna kan thawk rim bawk a, ka taksa pawh a chau thei khawp mai.

Thluak kan seng hnem bawk nen, duty hour pel thak thak ten hna ka thawk thin a. Achhan pawh ka taimak fal vang leh kan office thatna tur ka ngaihtuah vang pawh a ni em em hran lo, Marcus-a ka ngaihtuah tawhloh nan mai chauhva ti ka ni. Mahse ka tan chuan awmzia a awm lo khawp mai, ka hah thlawn hi a ni ringawt.

Mahse kan office tan erawh ka hah thlawn lo thung, employee dang hote pawhin min fak thei hle. Zan khat chu kan Manager chuan, "Tumah haw loh tur, office ah hian after party kan nei ang." a ti tlat mai a. Engemaw awmzia ni? Tumah chu kan haw ta lo reng bawk a. Hall ah chuan kan thukhawm a, kan hma taka stage tereute ah chuan kan Manager chu a ding a.

"Zanin hi kan company tan a hun pawimawh tak a ni a, kan office-a employee zinga ka ngainat em em, nula hmeltha tak, Lily Zothanpuii birhtday a ni." a ti ta mai a, ka phu zuk mai. Ka birthday a ni tih reng reng ka hrelo, ka phone number hi tu vak mah ka pek loh vang nge, tuman min rawn wish bawk silo.

FB account ka deactivate bawk si a, ka pa lahin min wish bawk silo. Rosy lah chuan min hrilh bawk silo, a birthday girl ber hian ka theihnghilh hmak anih chu mawle. Stage ah chuan min ko chho a, "Happy Birthday To You.." tiin ka hnathawh puite chu an zai rual thap thap a, min surprise chiang ngang mai.

Kan manger telin kan vai hian kan Office section bika employee hote hi 25 vel kan ni a, 7 vel chu mizo kan ni a, adang zawng chu hnamdang vek an ni. Cake mawi em em mai hi kan thawhpui te zinga mi pahnih, Ritu-i leh Priya-i te chuan an rawn chawi phei a. HAPPY BIRTHDAY LILY tih hi nalh em em hian a lo inziak a.

Kum 24 ka lo tling ve ta der mai, ka upa leh ta sawt e. Keimah berin ka birthday ka lo theihnghilh mai chu a nia, azia lo thin teh e. Zanin zet zawng, ka hlim ve takzet a ni. Manager chuan, "Sawi duh te i nei em?" a han ti vel a, ka lai lek lek mai. "Awii, ka lawm lutuk, in zavaia chungah ka lawm e. Hetia ka tan liau liau a, aruka cake inlo siam te hi ka ringlo hrim hrim..ka lawm e, thiante u." tiin ka han nui leh sen sen a.

Cake chu zai tum chuan chemte chu ka han ban a, "Lawk aw, Lily...thildang surprise tur che kan la nei a ni." a han ti leh a, engtak chu ni leh ang maw. Light chu an han off thim vek a, cake bula bati tihloh chu eng dang a awmlo. Ava han tullo tak, ka zak zawk hial dawn alawm le.

Chutah ka sir atang chuan guitar perh ri ka hria a, a thluk chu ka hriat tawh hnu a ni. "Ka hmangaih che duhlai, ka thinlung zawng zawngin..Bawihte, ka hmangaih che. KA thlang ber che duhlai..kumtluang atan, nang chauh ka thlang ber che." tiin aw nalh tak mai hi a rawn zai bawk.

Ka khur nghal zawih zawih thei, achhan pawh chu hla chu ka hre fo tawh a ni. A zaitu pawh chu ka hria, a aw phei chu kei aia hrechiang an vang ngawt ang. Light a rawn eng a, ka awih theilo. Marcus-a chu guitar kuahin ka lamah muang changin a rawn phei a, ka mumang amaw ka ti hial zawk.

Guitar chu a dahthla a, ka hma zawn takah huan a rawn ding a. Chet pawh ka che eih lo, mit khap lek lo chuan ka melh tlawk tlawk ringawt mai a ni. "Mar..Marcus???" ka lo ti thei tawk. Ka kutah a rawn vuan a, "Happy Birthday, Sayang..." a ti zawi sap a, midang ho chu an lo ngawi thiap mai.

"Hetah enge i rawn tih? Engtin nge ilo kal theih?" ka ti hu mai a, a nui suk mai. "Engtin nge ka hmangaih ber tellovin ka awm theih ang? Vawi tamtak biak che ka tum a, mahse i number ka nei thei ngang silo. Vanneihthlak takin eng tin tin emaw in Manager hi tunge a nih ka hre ta a, ka hnamdang thian neih chhun Pu Verma a lo ni reng a. Abak chu...i hrethiam tawh maiin ka ring." a han ti a.

Ka la bo hu mai, "Aih..ka hrethiamlo..engti turin nge ilo kal?" ka han ti leh a, chutah ka hmaiah chuan a vuan a. "Lily, ka hmangaih che...ka hmangaih takzet che a ni. I tello chuan ka awm theilo, min kalsan lul suh." a ti ta mai a, "Marcus, min hmangaih amaw?" ka aw pawh chu a chhuak tawk tawk a ni.

"Aw Lily, ka hmangaih che. Ka hmangaih lutuk che...in office-a hna thawk ho zawng zawng hmaah hian ka sawi duh a ni. Lily..I LOVE YOU." a han ti leh a, kut anlo beng dur dur mai. Ka lawm bawk si, ka confused tho bawk si, zak bawk si chu ka mit a vai dawn hialin ka hria.

Chutah a thingthi a, zungbun nalh em em mai hi a ipte atang chuan a rawn phawrh a. Ka hmazawnah chuan rawn lek kangin, "Lily, min nei duh angem?" a ti ta mai nih kha. Ka hmui ka hup a, ka thidang lo chauh. Vanram nawm zia tehkhin nan tuna ka awmdan hi hmang ta se, a awmlo hran lovang.

Ka mittui ka dang zo lo, khawvela ka mipa hmangaih ber mai chuan inneih puiah min sawm ta a nih chu. Ka awih theilo, ka mumang ni tlat hian ka hria. Tap chung chuan, "Aw...aw ka nei ang che." tiin ka kut ka lo dawh a. Zungbun chu min buntir ta, inkuah zing viau tawh mah ila, inngaizawng anga kan vawikhat inkuahna a ni.

Zah pawh dawn lo chuan kan inkiss ta ngawih ngawih mai, kut an lo beng a, a va han romantic chiang tak. Mizoram chu nise kha tia han inkiss vel kha ka ngam bik teuh lo, mahse vaichhe ho mai mai bulah chuan kan zak peih vel lo. Mittui tla phung chung chuan ka nuih sen sen a, "Ka hmangaih che, Marcus." ka ti a. Ka beng bulah chuan zawite hian, "AKU SAYANG KAMU..." a rawn ti zawi sap mai.

***************

An ni ta...yesss...an inngaizawng ta e. Ka va han lawm em, Lal MArina, i va han chawh turu tak em. Tunah chuan ahma aiin a ngaihnawm zual dawn e, awii, ka hlim veng veng mai. Engtia awm tur nge pawh ka hrelo, "YESSS.." tiin ka han au vak vak ringawt mai anih kha.

***************

Chaw ei lai chuan ka pa chu ka en reng a, Lily te office chhunga Lily a han zai sak lai vel turte leh an han inkiss vel turte chu ka mitthla a ka nuih a za tlat pek nia. "Khatin mahniin an nui vur vur ngailo, mawl hmel vur vur lutuk." min la ti hrep zui. "Ka nuih chhan hi hre vela chu awm i ti ve thovang." ka lo ti a.

Ka pi pawh alo nui tawp, a hrethiam ni ngei tur a ni. "Hmm, i mawl si, min chhunlo emai." tih pah chuan a han kham hmak a, a titau deuh reuh amawni..."Kan veng tleirawl ah chuan sa i heh ber." ala ti hram zui. A ha a nawt sawk sawk a, "Ka leng dawn, Lalnupui..hmun phiat la, thleng pawh sil vek ang che." tiin a chhuak daih a.

"I pa chu i ngaidam thei angem?" tiin ka pi chuan min han zawt leh a, "Umm...hun kal tawh ani a, ka pian hma daih a thil thleng a ni bawk a. Pawilo mai rawh se, keia lo ngaihdam loh ve ngawt theih pawh va ni suh." tiin ka lo chhang a. "Lily hming hi i pa hriat ah lam ri reng reng suh ang che, anih loh chuan keimah bak min ringhlel dawn chuanglo." ka pi chuan a han ti leh a.

"Engvangin nge a ringhlelh ngawt ang che?" ka lo ti hu mai, "Aww...ka hrilh che tih a hre nghal dawn asin." a ti a, "Umm ka sawi miah lovang." ka ti a. A chang chuan ka pa fa hi ka ni tak tak em aw te ka ti rum rum zel, sawi zing tawh viau mah ila ka han sawi nawn leh teh ang. Hmel ah ka tluk lova, finna lamah ka tluklo hle bawk.

A zuan a zang em em a, keilah ka intha zolo si. Ka nu lah chuti bawk, thlalak ka han en a, in anna hi kan nei thlawt lo. An fa lak mai mai te hi ka lo ni mai ang tihte ania ka hlauh ni, mahse ka ni bik em turah chuan ngailo phawt teh ang. Kan inchhung hi a zau nuam viau nanga, kan thawl mah mah a ni.

Ka pa, kei leh ka pi chauh kan nih avang hian a reh thei khawp mai, mahse pathum chauh mah ni ila chhungkaw inngeih tak kan ni thung. "Pi, apa hian nupui dang neih chungchang hi a sawi tawh reng reng em?" tiin ka han zawt a. "Awii...a duh lo rapthlak. Keimah zawk hian i nausen lai pawh khan nei leh turin ka ti nasa, mahse KIMKIMI LO CHU KA FANU HIAN NU DANG A NEI LO, A NEI NGAI BAWK HEK LOVANG a ti tlat alawm." tiin min chhang a.

A pawi loh tawp chu, nuhrawn neih ka peih lo reng reng. Nu nei lo mah ila, pa ka nei tal alawm. Mahse tuna ka chak ber erawh Lily Zothanpuii hmuh a ni, hmaichhan ngeia ka pa tha taka a lo enkawl thin avang hian lawmthu hrilh ka duh takzet. Han inngaizawng zel se, ka nu lo ni zawk thut mai se te ka ti rum rum thin.

Mahse ka nu thlarau ka zah em a, chutia ka ngaihtuah thin te chu ka inchhir leh hnuhnawh a. Lily diary hian ka rilru a luah khat hneh em a, a diary ziaktu ber a lo ni bawk nen. A hmel lah a tha ropui si a, ka pa nen an innei silo a nih chuan tu nupui tak ni ang maw tiin ka ngaihtuah nasa thei khawp mai.

Pa Chhandama hi a lo leng fo thin a, lo zawh tawp mai te ka duh thin. Mahse ka pi in a phal dawn der silova, a thu ka awih a ngai bawk si. Nge ni a keipawh hi ka hmanhmawh mah mah zawk? Chhiar zo chuang silo hian thil awmzia hriat vat ka duh tho bawk si, ka nikhualo ve hrim hrim a ni.

*****************

Khawvela ka hmangaih ber, ka duh em em leh ka lo atchilh thin em em Marcus-a nen chuan kan inngaizawng ve ta mai chu ania. Ka awih thei ngang lo, anuam bawk si, ka mumang ni tlat hian ka hria. A nuam ka tih zia leh ka lawm zia hi thu in ka sawifiah thiam lo, thuthiam tak chu ni ve ila chuan ka lawm zia lehkhabu-a chhuah tham a ni ngei ang.

Chumi zan chuan Rosy nena kan inluah ah chuan alo kal ve a, "Lo riak rawh aw.." ka han ti nghal ngawt a. Nui chung hian ROsy chuan, "Awii Zothanpui, in ingaizawng ve tan chauh alawm. I pasal angah i ngai nghal ngawt ami?" tiin min rawn kuk fawk mai. Ka lawm em a, ka bialpa bulah riah ve ka chak animai a.

Mahse Marcus-a chuan, "In manager te inah ka thleng a, awm rei chi pawh ka nilo. Keini pawhin hna kan tan leh tep tawh a, Mizoram lama haw leh vat angai." a han tih chuan ka hnual nghal ruih mai. "Ka mu dawn, chance ka pe ang che u..." a han ti a, ka thiannu Rosy hi zawn hmeichhe fing tak a ni. Inthiarfihlim nachang te a hria a, ngaihzawng tha deuh ka la zawn pui ve ang.

Bialpa neih hi nuam ka ti ngai lo, mahse kan hmangaih tak te nena han inngaihzawn chiah chuan a dan a lo dang hle mai. "Kan hnathawh chhung zawng khan kan office chhungah khan ilo awm ve char char tihna ami?" tiin ka zawt a. Min piai zeuh pah hian, "Umm...in manager room ah ka awm char char alawm." tiin min chhang a.

"Anuam e, ka la awih thei thlawt lo...min hmangaih tak tak amaw?" ka han ti leh a. Nghet tak hian min kuah a, "Ka tihpalh aw...chan che ka hlau em a, ka hrilh duhlo che a ni. Anihna takah chuan ka duh che a, ka hmangaih che alawm. A tir chuan ka inhrethiam biklo, mahse urlawk zana kan inkiss atang khan ka hmangaih takzet che a ni tih ka hre chauh a ni." tiin min chhang a.

Ka sik vak mai a, "Suala, tinge min bem mai loh?" ka ti vin hlur mai. "Anaa...min sik suh. Duat, kan inthianthatna a chhiat phah ang tih ka hlau a ni. Chubakah hmeichhe dang ka mutpui tawh bawk si a, i tan ka thianghlim tawk lovin ka inhria a ni." a han ti leh a, awwiii tuai ang mai, a mipa zawkin thianghlimna chungchang han sawi, ka nui tep a ni.

"A nih chuan tunah hian ti ve nghal mai ila.." fiamthu chuan ka han ti a, a ban te chu ka han zut der vel a. A nui huah huah a, "I thiam ve mi?" min la ti zui. A mal chungah chuan ka thu a,  "Min zirtir dawn lawm." tiin a darah chuan ka kuah a. A khi suk ringawt, "Inneih hunah ka zirtir ang che...ila naupang emai." a han ti vel a, awii..ka va han duh tak.

"Ka hmangaih che i ti ringawt a, bem pangngaiin min la bem miahlo ania. Min bem tha leh rawh tunah hian, anih loh chuan ka pawm lovang." tiin ka han titau der vel a. "Umm a nih leh aw...Lily, i hmeltha ka ti..ka bialnu ni rawh." a han ti deuh tawp a, kan han nui duh leh rih a.

Ka lu buk nghat pah chuan, "Umm..ka ni nghal e." nui chung chuan ka lo ti a. "Ka hmangaih che, duhtak." tiin ka biangah chuan a kut pahnih chuan a dawm a, "Keipawn ka hmangaih che." tiin ka lo chhanglet a. Duhthawh tak chuan kan infawp a, zep miahlo chuan insum chu har tak a ni.

Mahse kan thleng thui lemlo, thianghlim taka inngaihzawn chu kan tum ve ve a ni. Marina-i chungchang phei chu kan sawi lo mai pawh nilovin, kan sawi peihlo hrim hrim. Ka la hlauhthawn ber erawh Kimkimi'n a hriat hun tur chu a ni, min dem nasa dawn lutuk hi ka huphurh lawk.

Zing dar 2 velah chuan kan inthlah ve thei ta hram a, ka ngai nghal ngawih ngawih mai. Marcus-a a haw chiah chu room ah chuan ka va lut a, Rosy chuan min lo nuih sang a. "Awiiii...ROSEEEEE.." tiin kan inkuah chiam mai, ka mittui te a tla vel. "Ka lawmpui lutuk che, Bawihte..tunah chuan i hlim tawh em?" a han ti a.

"Umm, ka hlim tawh...ka hlim lutuk, ka hlim mah mah zawk a ni." tiin ka tah nuih vel. "Lunch kan ei laia i lo kal ve duhloh khan kan titi khawm a, Manager-in a rukin min hrilh vek alawm. Ka nuihzat ber chu Marcus-a hmel i hmu thut a, i awmdan kha...i hrilhhai lutuk kha ka khawngaih zawk che." tiin a han nui vak vak a.

"I sual emai, ka lawm tehmai ania. Ka birthday zanah lehnghal, ka birthday ah chuan ala nuam ber ang. Hei aia nuam chu a awm tawh lovang, awmngaihna pawh ka hrelo." tih pah chuan Rosy biang te chu ka va fawp thul. "Kal teh, Marcus-a ka nilo." tiin min lo nam vak a, kan nui dun bawk bawk mai.

Ka day off ni a ni dawn tho va, ka muhil peih vel lo. Ka bialpa thar, la lum vet vet mai, Marcus-a nen chuan kan in-text char char. KAn employee thenkhat te khan video in an lo la a, group ah an rawn dah a. Keimahin ka nui khur chur chur mai, Rosy erawh a day-ff a ni ve dawn silova, a muhil ta a.

"Ka hmangaih che, Duhlai. Ka thinlung zawng zawngin ka hmangaih che. Ka thlang ber che.." tia a rawn zai lai a, ka hmel awmdan mawlh khan ka nuih a tiza tawp thei lo. Ni e, hlim lohna chhan tur ka nei tawh lo. Ka nun ruak tak mai chu hnawh khahin a awm leh ta, Pathianin ka tawngtaina a chhang ka tilo thei lo.

Marcus-a hian min hmangaih a, keimah chauh min thlang a. A thinlung zawng zawngin min hmangaih a, kumkhuaa min hmangaih a intiam bawk. Chutiang chiah chuan keipawhin ka hmangaih a, amah chauh ka thlang a. Ka thinlung zawng zawngin ka hmangaih a, kumkhuaa hmangaih reng turin ka intiam ve bawk a ni.

Khua  alo var a, ka tho tlai teh asin. Ka thawh chuan Rosy chu a lo kal daih tawh, rawn pawh minlo bawl sak vek. Sana ka han en a, dar 11 a lo ri tep tawh. Chaw te eiin ka inbual fai a, Marcus-a lo len hun chu ka nghak ta ngar ngar a. "Ka lo thleng e." tih message ka dawn rual rual chuan door bell ri ka hre nghal.

Phur tak chuan ka va hawng a, ka bialpa duhlai Marcus-a chu rose par tam tawk, mawi em em keng chung chuan a lo ding a. A banah chuan vuan, "Lo lut vat teh." tiin ka pawt lut nghal a. Kawngka ka kalh nghal hmaks, ka zei ve viau chuan ka hria. Rose chu min pek pahin, "Kha..i tan liau liau..Lily par ka zawng a, ka hmuzo silova." a han ti deuh kher a.

Ka lawm lutuk chu ka mittui a tla hial a, ka tahbelh ve hrim hrim tih chu inhriat kha. "Ka lawm e aw, duat. A mawi lutuk, a rimtui bawk si." ka lo ti a. Hnai takah min en a, "Nang ai chuan mawi love, i mawi daih zawk." tih pah chuan min kiss leh ta a, anuam thin mange.

Kan bazar dun leh ta, chhuak dun fo mah ila nidang ai chuan nuam tak a ni. A khat tawk chuan kan inkiss reng a, abak chu kan thleng duh bik lo. Ina kan awmdun loh nachhan pawh hi kan chesual mai ang tih kan hlauh vang a ni, kan fel ve em asin. Thil min leisak teuh teuh a, kan inkhai bawr nasa mai.

Rim taka hna ka thawh avanga ka taksa chau te chu a reh vek hian ka hria, a chhan pawh ka damdawi mumlian ka bulah a awm miau a ni. A tuk leh mai hian Mizoram lamah a haw lehnghal angai dawn a, chuvang chuan vawiin bak chu kan inhmu leh zen zen thei dawn tawh lo.

Restaurant changkang tawkah min hruai a, dinner min treat bawk a. Ka inthlahrung ve lek lek thin, hman atang tawhin ka tan hian pawisa a seng hnem thei lutuk hi a nuamlo letling zawk. Mahse ka bialpa  ani miau a, a tihtur a ti ve a nimai. "Khawvelah in inngaizawng ber." pawh min tise pawi ka tilo, khawvel mai nilovin Universe-a inngaizawng ber kan ni duh zawk hial asin.

Zanah pawh a lo leng leh a, kan inkham thei mawlh lo chu a ni ber e. Mahse ka pa ka la hrilh lo, a chhan chu ka hrilh hreh deuh a ni. Khati khawp khan Marcus-a vangin ka na a, hetia kan inngaizawng leh ta thut hi a pawm thiamlo ang tih ka hlau a ni. Hun te han liam leh deuh se, ka la hrilh em em ang.

A haw a lo hun thleng ta a, hreh tak chunga kan inthlah liam a ngai leh dawn ta. "I thlen veleh minlo be rawh aw..." tiin ka kuah ngawih ngawih mai a, ka tap lehnghal der tawh mai. "Umm, tehreng mai. Lo in enkawl tha la, taima tak khan hna i thawk zel dawnnia." tiin duat takin ka samah chuan a chul a.

"Duat, lo rinawm reng rawh aw...ka lo haw hunah innei ang aw?" tah aw tuau chuan ka han ti a, Rosy a lo nui vel, ka hnek dawn khawp. "Tehreng mai, kan innei ngei ngei dawnnia. Bialpa dang min lo neihsan bik suh aw, min neihsan vaih chuan ka sawisa hrep ang che." tiin min nuih suk a.

"Ka duh teuhlo, ka hmangaih ber che alawm. Tluang deuhin i haw dawnnia, anih phawt le." tiin kan inthlah liam ta a, ka va han ngai leh vawng vawg dawn tak em. Chawlh kan neih ve hun tur lah May thla daih ala ni si a, tunah February chauh ala ni bawk si. Ava la rei nget nget dawn veleh, mahse rinawm taka innghak dun zel turin thu kan tiam tawh khamaw...

Kha ramhuai pitar Marina-i khan minla ti thlamuang chuang hauh lo, kha nu zikzek khan a lo thlem leh hiam hiam mai ang tih mawlh mai chu ka hlau a ni. Mahse ka ring ve tawk a, chutia min phatsan leh nghal mai chu ka ring phal hauh lo. Lily Zothanpuii hian Marcus Hmingthanzuala hi khawvelah a hmangaih ber, a dik em, Sayang?

*****************

Awii an va han cute dun tak em, chhiar a manhla thin e. Engtin tak awmdun zel ang maw? Lily ka hmuh chakna a zual telh telh mai, keimaha zawn chhuah mai ka duh tawh. Tunah te hian enge a tih ve ang le? Ka pa hi ala ngaihtuah chhuak ve thin angem le? Ka role model a ni ringawt tawh.

Bialpa neih ve mai te ka chak rum rum mai, ka pa anga gentleman tawk hi han ni ve ngei bawk se. A tlangval lai chanchin ka hre ve vek tih lah a hre der silo, "Pa, i tlangval laia Marina-i nena inlo mutdun avang khan ka ngaidam che." han tih tawp mai te ka duh, ka ngaidam chiang em a ni.

Marina-i hi rawn inrawlh ve tawh lo hram se ka va ti em, an hlim ve tan dawn chauh a ni si a. Lily hi engtin nge a awm zel ang le? Mahse ka hre vat dawn niin alang, diary pawh a phek a tlem ta khawp mai. Ka chhiar zawh hunah chuan engkim ka hrethiam tawh anga, ka thaw pawh a veng huai tawh ang.

He diary ka chhiar zawh veleh a ka thil tih tum hmasa ber chu Lily zawnchhuah a ni, ka zawng chhuak dawn hi a ni tawp. Mahse a phek a tlem tawh si a, ka nu hming lah a lang khat tawh ropui bawk si. Engtin nge ka pa nen hian an inneih daih theih tih chu ka thil hriat chak ber ala ni tho mai, tuna ka chhiar chinah hi chuan Lily nen hian an inneih mai hmel si a.

Engpawh chu nise a phek a tlem tawh thova, han chhiar zawh nghal mai chu ka la ui ve deuh. Chuvang chuan zanin chu mu leh phawt mai teh ang, natukah ka chhiar zo thei tawh ang. Zanina han chhiar zawh nghal mai chu, ka thil tih tum te ka la ti mai thei dawn chuanglo, i han mu vum leh thur phawt teh ang.

*************

Vawiin chu inrinni a ni bawk a, ka pa pawh office a chawl dawn. Fimkhur taka ka chhiar a ngai dawn, achhan chu a rawn luh thut chuan diary hi a hmu anga, min manchhuak palh ang. Ka chhiar zawh hunah, engkim ka hriatthiam hunah chuan ka thiannu Hannah-i ka sawm anga, Lily hi ka zawng chhuak khawp ang.

Ka thil tih tum dik tak ka han sawi tawh ange, Lily hi ka zawngchhuak anga, ka pa nen hian ka inneih tir leh ngei dawn a ni. Ka pi pawhin min puih duh ngei ka ring, hun rei tak chhung beih fan fan ngai pawh nise, an innei leh ngei ngei tur hi a ni tawp mai. Lily hi ka nu atan ka duh takzet, ka nu thar atan ka iai mawlh lo.

Chaw kan eikham a, tihtur engkim ka tihfel zawh hnu chuan dar 10:30 a lo ri der mai. Ka room kawngka chu ka kalh hmak, khumah lawnin diary chu ka la chhuak leh ta. Phek tlemte bak a awm talo, ka va han chhiar zo ui angreng si em. Mahse engkim avaia ka hriat a hun tawh takzet a ni, chhiar tan ang aww...

***************

Hun a lo liam zel a, kan chawlh hun pawh a hnai ve leh ta tial tial mai. Marcus-a chuan anu alo hrilh tawh a, anu pawhin min lo duh takzet a ni tih ka hriat chuan lawm avangin ka tap hial a ni. Nu ka nei tawh lova, nu thar ka nei leh tur chu ka lawm takzet. Nitin mai chuan Pathian hnenah lawmthu sawiin ka tawngtai a, a ni telin ka hlim telh telh mai.

Nitin zantin Marcus-a nen chuan kan inbia a, kan inngai thei hle mai. Promotion pawh chu ka hmu ta ngei a, ka vanneihna a kal tluang takzet a ni. Inhnial thinrim te, inhauh te leh intihbuai kan nei ngailova, kan inngaih zia thu hlir kan inhrilh reng mai  a ni. Min fuih nasa a, ka tan zantin a tawngtai thin thu min hrilh bawk.

A tawp atawpah chuan May thla kan lo chuang kai ta, haw ka chak tawh zia chu sawi hian a siak lo. Ka pa bulah pawh ka sawi ve ta a, ani pawhin a lo pawm thlap. Kan inneih pawh a phal, hei tluka vanram tlafual a awm thei dawn em ni? Engtik lai mai pawh chuan ka nui khi sung reng mai a, ka thawhpuite pawhin, "I hmel hmuh anuam e." tiin min hrilh fo thin.

Kan haw ve ta ngei a, kan in ka han hmu chiah chu ka lawm lutuk ka hnuk a ulh vel. Ka pa leh Durtlang lama ka nutei te chhung chuan kan inkawtah chuan min lo hmuak a, mahse ka va pan hmasak ber erawh ka pa a ni. "Harsatna te in tawk em lo maw? Bawihte.." tiin min lo zawt nghal a.

"Tawk love, kan tluang khawp mai." tiin ka chhang a. Chumi tlai chuan chaw te pawh kan han eikhawm ngei a, Marcus-a erawh ka la hmu hman lo. Ka thlen tawh thu chu ka hrilh a, mahse an office lamah a buai avangin zanah pawh a rawn len hman dawnloh thu min hrilh a.

"Naktukah nilengin kan inhmu dawnnia.." tiin min hrilh a, ka phur tawh takzet. Zanah chuan kan han in video-call ngei bawk a, a hmelthat zia chu seh nawk nawk mai ka chak. Mahse hna thawh vat vat a ngai si a, kan inbe rei thei lo. Ka chau deuh bawk nen, ka nghak zo ta lova, ka mutsan ta a.

A tuk zingah chuan ka bialpa nena indate tur chuan ka insiam mawlh mawlh a, chutih lai chuan ka pa a lo lut a. "Enteh BAwihi, thil pakhat ngen duh che ka nei a ni." a rawn ti a. "Enge ni ta ka pa?" tiin ka lo zawt vat a. "A remchan veleh Marcus-a hi lo leng se, amah ngei hian min rawn dil se ka ti a ni." a ti tlat mai.

"Pa, engtia dilin maw?" ka lo ti hu mai. "Nupui neih a duh thu che hi hmaichhan ngeiah hian min rawn dil ve se, ka phal dawn chiang sa thova, mahse ka phut ve a ni." a han ti deuh tlat a. A lo nui suk mai, "Umm...ka lo hrilh ang." tiin ka lo chhang a. "In chhuak dun dawn em ni?" a han ti leh a.

"Aw..keimah vang liau liau in chawlh a la a, a project pawh tukin khan office ah hma tawkah ava submit alawm. Ka tan liau liau a mengrei a, ka tan liau liau a tho hma bawk a. A fel asin, ka bialpa hi chu.." tiin ka pasal hual MArcus-a chu ka han fak vel luam a. Ka pa chu a nui huah huah a, "Anih chuan nuam deuh khan le.." tiin min chhuahsan ta a.

Kan in atang chuan ka chhuak ta a, tun ang em em a ka inchei nalh leh ka inchei rei hi ka la hrelo. Darkar 1 chuang ka inchei, chu ai pawh chuan a rei maithei. Bus-Stand bulah chuan a car a lo awm vang tawh a, a car ka hmu ringawt pawh chuan min ti hlim takzet. Car atang chuan a lo chhuak a, awwiii...ava han tha chiang kuang tak em.

Min khap lek lo hian min en a, a romantic thei ang ber chuan ka va pan a. A bulah chuan va dingin, "I van hmeltha tak, Pa-a." ka va ti vel a. "I nalh fe zawk...i hmeltha bawk si...lut vat teh....kan spot ah kal ang." a ti a, motor kawngka chu min hawn sak a. Ka thu lut a, ani pawh chu a rawn lut ve a.

Kan spot lam pan chuan kan kal ta a, "Khawlai te a ni sia, ka kuah ta lo mai che a nih kha.." tiin a nui var var a. "Umm...kan spot kan thlen hunah kan inkuah vak mai dawnnia." tiin ka lo nui har har a. "Ka ngai lutuk che, Sayang." tiin ka kutah chuan a rawn vuan a.

"Kei deuh hian asin ngai che, i hmel ka hmu a, ka dam sawng sawng mai." tiin ka lo chhang a. Kan spot chu kan thleng ta, thutthlengah chuan thu dunin a darah chuan ka lu ka nghat a. "Lily, ka nupui i ni duh tak tak angem?" a han ti a. "Vanram kai ka duh ang bawkin i nupui nih hi ka duh takzet a ni." tiin ka lo chhang a.

"Ka nghak rei tawh bawk che a, min han duhlo leh si vaih teh...i pawngsual tho tho ang che." tiin min han sik vak a. "Ana lutuk...i duh leh tunah hian min pawngsual la, a rem em hi.." tiin ka lo fiam let a. Kan hlim dun kher mai, kan inhmangaih thu chu kan inhrilh tawn reng a.

"E taka, ka pa in lo leng turin a duh che a." tiin ka hrilh a, "Engtikah?" a lo ti hu mai. "I remchan hun hunah a ti, hmanhmawh pawh angai chuang lo." ka lo ti a. "Inneih chungchangah em ni?" tiin min han zawt leh a. "Aw ni tho e, ihmaw..ka pa hian i lo len a, inneih i duh thu i rawn sawi hi a phut ve a." ka han ti chu a ner nung mai.

"Naa...zahthlak duh awm ve..tawngkam ka thiamlo asin." a han ti bul bul a, "I nep lutuk..min hmangaih lo mi?" tiin ka lo kuk fawk mai. "Ania lawm, han dil leh vel kher chu...a phal dawnlo a ni chiang mai." te ala ti ta deuh deuh a, ava han dawihzep tak. "Kan inneih theih nan chuan i rawn dil mawi ve kha angai, amah pawhin a phal dawn chiang sa." ka ti ve hmak.

"Awle..i tan te chuan, mahse..ka zak e." a han ti leh ngawih ngawih a, ka va han beng chak tak. Khua pawh a lum leh tan deuh tawh bawk a, boruak pawh a nuam ngei mai. "Ti daih ila, duat..zu i la in ngai em?" ka han ti deuh thut a. Min en hru mai, "Min hrilh miah lova i kal daih khan ka rilru ana lutuk a, Airport ah lah khan a au ding zo silo che a. Khami hnu khan ka in nasa lutuk, ka cher phah vek alawm." a han ti nuah nuah a.

"Anih leh tunah?" tiin ka lo zawt leh vat a. "Ka in hnuhnun ber chu Bangalore-a ka lo kal kha  animai, in Manager nen khan kan indun a, abak chu ka in leh tawh lo." tiin min chhang a. "I ti tak tak maw?" ka han ti vel a, "Umm...tak tak, dawt ka sawi miah lo." a han ti a.

"Nia ka ring che alawm, pasal zu in mi ka duh lo tih chu i hriat kha.." ka han ti leh a, a nui suk mai. "Keichu nupui beer heh deuh ka duh.." a han ti deuh kher a, ka theihtawp ana in a banah ka han hnek a nih kha. "I sual emai aw..ka in tawh ngai lo bawk." ka ti vin hlur mai a, a nui nasa teh asin.

"Tak taka...tlaiah kan inah kal lawk ang aw..ka nu in a hmu duh che a." a ti a, "Awle.." tiin ka chhang a. Nu Duhzuali pawh ka ngai tawh khawp mai, reilote hnuah ka nu a ni tawh mai dawn chu ania. Nileng chuan kan lengdun leh ta a, akhat tawkin motor chhungah kan inkiss zeuh zeuh bawk.

Tlai a lo ni a, Marcus-a chuan an inah chuan min hruai ta a. Nu Duhzuali'n min lo hmu chiah chu min kuah nghal a, ka tah te pawh a ti chhuak rum rum mai. "Bawiha, i room lamah lo han chho teh...ka fanu nen hian kan titi lawk dawn." tiin Marcus-a chu a tir chho ta a.

"KA FANU" ti a min ko chu ka hnuk a ulh chiang ngei mai, ka mittui a tla hialin ka hria. Ner nung chung chuan, "Hmmph..ni zawk mai ru." tiin Marcus-a pawh chu a chho ve mai bawk a. Nu Duhzuali nen chuan ka thudun a, "I dam maw...in hna lam te in tluang em?" tiin min han zawt hmasa te te a.

"Aw tluang e, promotion ka hmu ve hlauh a." ka lo ti a. "Awhawww..ava lawmawm ve..ka lawmpuia che." tiin min chibai a. "PAthian vang liau liau a ni e, Marcus-a pawhin min tawngtai pui nasa bawk a, a lawmawm khawp mai." ka han ti ve luam a. A nui deuh tet tet a, "Engtin maw Bawiha chuan a rawn chhai vel che a? A thiante'n an chhaih thin a, a zak thei nasa alawm." a han ti a.

Ka lo lai lek lek zawk, "Nia, min thawng khawp mai. A hmel ka hmuh kha ka inring lo hrim hrim a, mahse ka han hmu ta thut kha ka ngaih athalo hman hial alawm." tiin ka nui a, "A zei ve viau asin, ka fapa hi chu.." tiin kan han nui dun bawk bawk a. "Lily, ka fapa hi i nei duh tak tak ang maw?" tiin min zawt ta thut mai.

"Duh e, ka hmangaih a, ka pasal ni turin ka duh a ni." tiin ka lo chhang a. A han thu tha sauh sauh a, "Englo ania...ka fapa hi chu puitling ve tawh viau mahse, a rilru a no em em a. A rilru ana hma bawk si, a mood a fuhloh phei chuan a thinchhe thei lutuk a. Chubakah hna a thawh laklawh phei chuan tuman kan tibuai ngam ngailo, chu chu i hriat lawk angai a ni." a han ti a.

"Chutiang lamah chuan min ngaihtuah suh, kei tak hi ania thinchhia chu. Mahse ka lakah a thinrim ve ngailova, ka thiamloh naah pawh amah zawkin ngaihdam min dil ziah thin zawk asin. Nu Duhzual, lungngai suh...Marcus-a hi neih ngei ka duh a ni." tiin ka chhang a.

"Nu Duhzual tilovin, Ka Nu tiin min ko tawh rawh. Ka fanu i ni vat dawn tho a, i nu ka ni tawh dawn tho. Min han ko teh, ka fanu.." a han ti chu ka insum zo tawh lo. Hun rei tak chhung Nu tia kohtur ka nei tawh lova, mahse ka hmaah ngei chuan ka hmangaih ber Marcus-a nu in a fanu ka nih tawh thu a han sawi chu ka tap lo thei lo a ni.

"Ka nu.." tiin ka kuah a, amah pawh chuan min lo kuah let a. "Kan inchhungah hian pa berin min boral san tawh a, biak tur nei lovin ka khua a har thei em em a. Mahse tunah chuan Pathianin fanu thar min pe leh ta a nih hi..ka van lawm tak em." tiin a tap zawih zawih mai.

A mittui a hru hul a, "Va haw tawh rawh, i pa'n a lo ngaihtuah tawh ang che. A remchan veleh palai kan rawn tir vat dawnnia...Marcus-a chu han ko rawh." a ti a, Marcus-a chu ka han au va. Kan in thleng chuan min thlah a, kan inkawtah chuan kan ding a. "Enge ka nu nen khan in sawi a?" a han ti a.

"Hmmh...naupang hriat ve chi a ni lo." ka lo ti deuh hmuk a. A ngawi vang vanga, "Awle...zaninah law law ka lo kal ang. I pa chu ka rawn dil ang, mahse ka zam hle mai." a han ti khur deuh dar dar a. "Enge maw i hreh em em le? Ahma pawhin i lo len fo kha.." ka lo ti a.

"Aww...amak em alawm. I pa nen hian kan inbe khat ropui si a, hetia ka rawn dil a phut deuh thut hian ka ngaih a ti thalo riau alawm." a han ti deuh tlat a. Na tawkin a hmuiah chuan ka fawp vak a, "Ka hmangaih che, zanah chuan ka lo nghak ang che." tih pah chuan ka chhuak daih a.

"Keipawn ka hmangaih che.." a rawn ti lawm lawm mai a, ani pawh chu a kal liam ve ta a. Inchhung ka lut a, "Pa, zaninah a lo kal dawn a nih chu.." ka ti a. Ka pa chuan min han melh ang ren rawn a, "Ka inla strict dawnnia aw...minlo khap hlek suh ang che." a han ti khur khur a, roomah a lut nghal daih.

Ngaih ava tha teh chiam lo em, engemaw a hriat ni? Engpawh chu nise, inbual phawt mai teh ang. Palai an rawn tirh hun mawlh mai chu ka nghakhlel tawh a ni, inneih vat vat ka chak tawh. Naktuk ah mai hian innei nghal dawn pawh ni ila, rehearsal neih kher ngai pawh ka ti lovang.

Zan a lo thleng ta, Marcus-a chu ka nghak leh ta ngat ngat mai. Dar 8 pelh velah chuan a lo thleng a, a rawn meng dawih nghal em em mai lehnghal. Ka pa pawh a rawn chhuak a, sitting room lamah kan inzui phei hlawm a. Ka pa lah hi enge maw  a hriat ni, Marcus-a bul nilovin abulah min thuttir deuh tlat.

A hranpa in Marcus-a chu thutthleng dangah a thu a, chungte chuan a ti zam lehzual in ka hria. A hmel en reng reng pawhin ka pa chu a hlau tih a hriat em em a, a kun deuh reng mai. "Ehemm.." tiin ka pa chuan ring zet hian a aw a han thian te te a, Marcus-a lah chu a lo phu ang zuk a.

"Han sawi la.." a han ti a, phawk hru hian Marcus-a chu a rawn hawi a, "Engmaw?" a lo ti hu mai. Ka va melhrum vak ringawt, "E..aw..nia.." a han ti bah leh nuai a, ka va han ngei tak. "Engchu maw...nia..i tih rikngawt?" tiin ka pa chuan a han zawt leh khur khur a. "Ihh...inneih hi mawle." a han ti leh ringawt a.

"Eng inneih maw?" tiin ka pa chuan a lo zawt leh a, a nui hui ringawt. "Ihh..Pa Hruai, Lily hi ka nupui atan ka duh a ni." a han ti khur dar dar a. Ka pa chuan a lu a lo bu deuh nghat a. "Anih leh Marcus, Lily hi a hmingpum i hria em?" a han ti leh kher a, ava han tullo tak. Marcus-a lah chuan a zam lutuk vang nge mawni, "Aw..Lily Darnei." te a lo ti vel.

"Engmaw?" ka pa nen chuan kan ti rual thawt. A phu zuk a, "Zothanpuii...Zothanpuii ka tihna." a lo ti nghal vat a, ava han mawl tak. Engvanga Lily Darnei min ti reng reng nge maw  anih le, mawl chhah lutuk. Ka pa chuan  ahan melh leh vang vang a, "Ruihtheih thil i ti ngai em?" tiin a han zawt leh a.

A thlan a tla buah buah mai, "Aww...aih..ka sawi awmzia chu, hmanah chuan ka in ve thin." te a han ti kual leh a. "Engmaw i in thin a?" ka pa chuan a lo ti leh khur khur a. Min melh zeuh zeuh pah chuan zawi te hian, "Ele zuuu..." a ti chuai raih mai. Awii, ka mang a ti ang ngawih ngawih.

"Tunah eng ruihtheih thil nge i tih?" a han ti leh deuh kher a, ka pa pawh hi a..tullo lutuk. "Ihh..meizial ka zu zeuh zeuh a. Zu ka in tawh ngailo, hman..hmani deuh khan.." a ti a, a ngawi leh daih. "Enge hmanni deuh khan..han sawi zo law law la mawle." ka pa chuan a lo ti leh a.

"Hmanni deuh khan...Shikhar ka ei a, chu chu ni leh mai." a han ti chu keipawh ka nui chhuak lek lek, ava han dawih chiang tak. Ka pa hi a hlauh nachhan ber ni a ka rin chu a pa lian ve em a, a thau ropui si a. Chuvang pawh chu a ni mahna, mahse a dawih ka ti thlawt a ni.

"Engtiang chiahin nge i hmangaih?" tiin a han zawt leh a. Marcus-a chu a nui suk a, "Ka thinlung zawng zawngin...amah chauh hi ka thinlung nei tu a ni. A tan chuan engkim ka huam a ni, ka hmangaih zia chu Pathianin min hriatpui. A tan zantin ka tawngtai a, ka nupui a nih ngei theih nan Pathian hnenah ka dil thin." a ti a, ka hnuk a lo ul lek lek mai.

Ka pa chu a han thaw hak a, "Marcus..ka fanu Lily hi ka neihchhun a ni a, a nu leh a u in min thihsan tawh a. Ani lo chu midang ka neilo, ka hmangaih a, a nat ka phallo. Mahse tunah chuan ka fanu hi i ta a ni ta, tha takin enkawl ang che." a ti ta a, ka va han lawm tak em.

Marcus-a pawh a thaw huai mai, "Ka lawm e, a mittui tlak ka phal ngai lovang. Ka tiam ache, tha takin ka enkawl ang." tiin a chhang a. Ka pa chu a ding a, "Ka ring che ania aw, ka fapa." tiin Marcus-a chu a chibai a. "Ka chhuak dawn a, lo leng char char rawh aw.." tiin min chhuahsan ta a.

Ka pa a chhuak chiah chu Marcus-a nen chuan kan in en a, "YESSSS.." tiin kan au dun vak vak a. Kan inkuah a, kan in fawp nghal bawrh bawrh mai. Ava han nuam chiang tak, "Kha kha nimai lawm...har lo emai." ala ti ve khanglang zui. "Awii..i dawih zia kha." tiin ka nuih vak vak ringawt.

Hun a kal zel a, palai te pawh an lo kal ve ta. Engkim a chiang tawh e, Marcus-a nen chuan kan innei dawn tak tak e. Hetiang em em hian a lo hlim theih a ni tih hi ka hre ngailo, mak ka ti hial zawk. Ka pa erawh awmbo san ka hreh ngang mai, hruai luh tel ve hial te ka duh zawk.

A chenpui awmchhun ka ni a, hna avangin phaiah rei tak tak ka awmbo san thin bawk nen. Tunah phei chuan kumkhua a ka awmbo san a ngai tawh dawn bawk si, ka khawngaih ngawih ngawih a ni. Marcus-a thiante pathum, Chhandama, Puia leh Amos-a leh Amosa-a bialnu Zualtei te nen pawh kan inkawm ho leh ta.

Kan innei tur chu min lawmpui hlawm em em a, inneih hma hauhvin thil pek pawh ka dawng nghal nual mai. Inhualna kan neih ni tur a ni a, ava phurawm chiang tak. Kan inneih ni turte pawh chu kan ruat fel vek tawh, mo kawr pawh kan hawh dawnlo, MArcus-a'n a leiin min leisak nghat dawn.

Monu thian kawr tur erawh kan hawh angai, chupawh Marcus-a'n a tum vek tho. Monu thian atan Rosy ka hmang dawn a, Marcus-a chuan Mo neitu thian atan Amos-a a hmang thung dawn a ni. Zing kar atang chuan kan buai hut hut mai, nuam tak a ni nuam tak.

Durtlang lama kan chhungte pawh an lo riak a, kan ri nuai nuai mai. Ka Ni Puii chu ka room ah a lo lut a, "Lily, i thiannu a lo kal a." a rawn ti a. "Tu ka thiannu maw?" tiin ka lo zawt a. "Marina-i ka ni e a tia.." a ti ta mai. Ka ngawi vang vang a, "Umm..lo luh tir rawh." ka lo ti a.

Naupang ho chu ka chhuah tir a, Marina-i chu a lo lut a. Min rawn nuih sang a, "Ka lawmpui ache." a rawn ti zawi sap a. "Ka lawm e..enge i rawn tih ve teh mial a?" tiin tha tak chuan ka lo bia a. Inthiamloh hmel tak hian, "Ngaihdam dil tur che in ka lo kal a...Lily, ka tihpalh takzet a ni. Engkim vang khan min ngaidam rawh aw...Marcus-a hi keichuan ka phu mawlh lo a ni, hlim taka in awmdun ngei ka beisei." a ti a.

"Tehreng mai, Marina...i bialpa hlui Marcus-a hi ka lo enkawl sak ang che." tiin ka han nui har har a. Ani pawh chu nui vein, "Thian kan ni thei tawh angem?" tiin a kut a rawn phar chhuak a. Ka lo kuah tawp, "Ka lawm e, Marina...thian kan ni sa reng alawm, ka lawm lutuk ania.." ka lo ti a.

Marina-i, ka hmelma lian ber. Ramhuai pitar-i tih ngata a hming ka phuahsak nen pawh chuan inhuatna kan nei tawh lo, mahse inneih ni ah  alo kal ve ngamloh tur thu a sawi hlauh thung. Inneih ni ah Marcus-a a rawn kidnap mai ang tih erawh a hlauhawm phian, a ti em lo turah ngai ang.

Mo kawr te chu kan lei a, Rosy ta tur pawh chu kan hawh ve nghal bawk a. Kan hlim kher mai, Amos-a lah tlangval lerh tih takah, Zualtei nei reng chung siin Rosy a lo bem leh hman pek kha. Mahse, Rosy chuan  alo hnar hlauh thung. Zan a lo ni a, Marcus-a chu a rawn leng a.

Kan inkawtah chuan thudun in kan titi dun malh malh a, hetah tak hian ka han surpize ve ta a nih kha. "Inchhungah ka lut lawk dawnnia, ka lo kal leh vat ang." tiin engmah a sawi ve hma chuan ka lut ta daih a. Tichuan ka mo kawr te chu ka han ha sawk sawk a, ka hmaite chu ka chei bawk a.

Min nghak rei ve thawkhat ang, darkar chanve vel ka inchei. Ka duh angin ka inchei theilo lehnghal, a lo haw daih ang tih ka hlau bawk si. Ka va chhuak leh a, min hnungchhawn zawng chuan a lo ding a. "SAYANG.." tiin ka han au a, a lo hawi a. Min hmu chiah chu a mit a tla lo chauh, a ding ngawi reng ringawt.

A nui a, "Lily...i nalh lutuk.,,ka naute." tiin a mittui a tla hial. "Ka mawi tak tak em?" tiin ka han zawt leh a. Min rawn pan hnai a, "I mawi lutuk..ka hmangaih che..ka hmangaih che Lily." tiin min kuah a, duat takin ka hmuiah chuan a rawn fawp a. Ahmain min surprise chiang bawk a, ka han surprise ve a nih kha.

Hemi zan atang hian ani tuna ka diary hi ka ziah tan tak ni, kan intawn tir atanga tun thlengin ka ziak chhuak ta vek a ni. Ti hian kan inneih hnuah pawh ka ziah chhunzawm zel tawh mai dawn a ni, mahse kut chu a kham ve duh khawp mai. Naktuk hi manhlan ni a ni a, a tuk tuk leh kan inneih ni a ni der tawh.

****************

Phek lehlam ka keu a, a lo blank vek. Nilo, phek thum vel emawni kha la awm sia..a blank vek. Enge awmzia? Lily leh ka pa chu an inneih si chuan engtin nge kei hi Lallawmkimi fa ka nih daih theih? Engmah chhiar tur a awm tawh lo, ani theilo. Lily fa zawk ka ni tihna em ni?

Ka khum atang chuan ka zuang tho nghal a, diary keng chung chuan ka pa ka zawng nghal. "Pa...pa.." tiin kan inchhung zawng zawng chu a en chhuak vek a, ka hmu zo lo. A tawpah chuan incung zawlah ka han chho a, ka pa chu meizial zu in lehlam a lo hawi veng veng mai.

"Pa.." tiin ka va ko leh a, meizial chu paih in a lo hawi let a. "Enge ni ta, Bawihte?" a lo ti a. Ka thaw hlawp hlawp a, "Pa, kawnge Lily?" ka ti ta tawp mai. Mak a ti lutuk chu min en reng a, a mengbial kawk kawk mai. "Pa, khawnge Lily Zothanpuii hi a awm?" ka han ti vin leh tuar a.

Phawk hru hian ka pa chuan, "Puite, engtin nge Lily chu i hriat ve a?" tiin min zawt a. Ka inzep peih tawh lo, "Pa, Lily diary hi ka kawl a, zantin ka chhiar thin. In intawn dan te, in inhual dante, engkim ka hre vek. Khawnge tunah amah hi a awm? Kei hi tufa nge ka nih? Lily fanu nge ka nih Kimkimi?" ka ti vin ta vak vak mai.

"I nu hming chu Lallawmkimi a ni, Lily fanu i ni lo." tiin min chhang a. Ka hnuk a ulh, ka mittui a tla teuh tawh bawk. "Anih leh khawnge Lily chu a awm? Min hrilh rawh.." tiin ka pa chu ka vin leh vak a. A ngawi vang vang a, lehlam hawi chung chuan, "Hmun hla takah.." a ti zawi sap ringawt a.

***************

Ka pa chu chhuk a tum a, "Khawi hmun hla takah..." tiin ka lo zawt leh hram a. "Minlo zui rawh.." a ti a, ka zui thla ta a. A room ah chuan min luhpui a, pawhdawh chu a hawng a. Envelop hi a rawn la chhuak a, "Kha...hei hi chhiar rawh. I nu in a damlai a i tana a ziah a nih hi, a puitlin hunah lo pe ang che min ti a." a ti a.

Envelope chu ka la a, "Tinge tunah min pek chauh a?" ka lo ti vin leh hlur mai. "Anihna takah chuan chhiar tir loh che ka duh zawk. Mahse Lily Diary ilo chhiar tawh bawk si a, chuvanga pe mai chauh che ka ni." tiin min chhang a. Ka ngawi reng ringawt a, sawi tur pawh ka hre tawh lo. "Diary kha min lo pe rawh.." a ti a, mahse ka phal lo.

"Aih, Lily awmna ka hriat hma chu ka pe dawn lo che." ka ti ve tlat mai. Min dil lui ta lemlo, "A tha e, lehkha kha chhiar la...i chhiar zawh hunah i hriat duh engkim ka hrilh ang che." a ti a, a chhuak nghal daih. Ka room ah ka phei a, Envelope chu ka hawng a. Paper a lo awm a, a hawrawp ava mawi chiang em.

*************

Bawihte..Puite, ka fanu. He ka lehkhathawn hi i chhiar a nih chuan tunah chuan i lian ve tawh ngawt ang chu tiraw? Mahse he thu ka ziah lai hi chuan nausen mai i la ni a, ka bulah i awm mek bawk. Ka hmangaih lutuk che ania aw, kei chu min ngaihtuah reng reng suh ang che. I pa thu i awih viau pawh ka beisei, i pa nen hian ka hmangaih dun takzet che u a ni tih lo hre bawk rawh aw.

Puite, ka fanu...ahmasain ka enkawl seilian ve thei dawn silo che a, min ngaidam dawnnia. Hmeichhe hrisel lo tak mai ka ni a, kum 12 ka nih atangin lukemia cancer natna ka nei a. Mahse vanneih thlak takin kum 17 ka nih in a reh hmak mai a, a bo hlen tawh turah ngaiin ngaih tha takin ka nun chu ka hmang chho ve zel a.

Mahse Kum 24 ka nih meuh chuan a rawn lang leh ta a, tunah chuan ka thihpui dawn ta a nih hi. Ka pai tan tirh lai che khan kum 23 mi chauh ka la ni a, i pa nen hian kan innei a ni. Tichuan ka cancer natna chu a lo chhuak leh ta a, nang ka pai mek bawk si che a. Tichuan ka neih ni che a lo thleng ta a, chumi ni phei chuan ka chau tawh khawp mai.

Ka sang chhuak zo lo che a, an zai chhuak ta che a ni. Min zaina hliam nen, ka natna nen, rei ka daih tawh dawnlo tih pawh doctor te chuan min hrilh hial a. Khatih hunlai kha khawvela ka lungngaih ber ni a ni asin, ka thi mai tur ai mah chuan ka enkawl thei dawn lo che khan min tina a ni.

Doctor te pawhin him leh hrisel taka ka nei thei che kha mak an ti zawk hial a, Pathian khawngaihna avang liau liau a ni. Thla thum vel lai chu ka la dam chu ania, mahse tuna he thu ka ziah lai mek pawh hian ka chau tawh takzet a ni. Sawi tur tam tak ka nei, mahse ka ziak vek thei ngang silova, min ngaidam dawnnia.

I nu hian ka ngai lawk khawp mai che, i nulat hun turte ka hmuh ve chak tehlul nen. Pasal i neih hunte leh fa i neih hun te thlengin ka lo suangtuah ve hman a, mahse ka hmu hman ve dawn silo che a. Ka na takzet a ni, he ka natna ai mah chuan ka kal vat mai tur hian min tina zawk a ni. Hmeichhe fel tak i nih chhoh zel ka beisei, thian sual kawm miah suh ang che aw.

I pa thu kha awih zel la, i pi thu pawh kha awih hle ang che. Bawihte, i pa nena kan inneih hian ka hlim lo hle a. Achhan pawh i pa hian min hmangaih ve lo a ni, mahse dem reng reng suh ang che. I pa hi chuan hmangaih dang a nei a, mahse chu a hmangaih ber chu a neih theih dawnloh avangin keimah hi min nei ta a ni.

Keimah zawk hian ka duh lova, mahse min hmangaih ve tur thute sawiin inneih puiah min sawm lui ta  a ni. Kei erawh chuan i pa hi hman atang tawhin ka hmangaih em em a, a nupui nih pawh ka chak hle thin. Vawikhat pawh kan innei hman tep a, mahse i pa hian a duhloh avangin kan innei leh ta lo a ni.

Chungte hlei hlei chuan ka inthlahrunna a ti zual a, mahse i pa hian min sawm lui zel a, tichuan kan innei ta a ni. Kan hlim lo ve ve a, mahse a tirah chauh a ni thung. Hun a lo kal zel a, kan inngeih ve tial tial a. Tichuan nupa nun hial te kan lo hmang ve ta a, nang hi ilo piang ta a ni. Mahse ka natna chu a lo chhuak leh ta si a, nangpawh hi ka chhiat mai ang che tih pawh ka hlau thin hle.

Ka cher tial tial a, ka vun pawh a chhe telh telh a. Ka taksa chuan mawina reng a nei tawh lova, ka hmel pawh hmuh tlak a awm tawh lo. Mahse chuti chung chuan ipa hian hmangaihn takin min enkawl a, ka dam leh tur thu min hrilh fo thin. Bawihte, tunah chuan ka tuar zo tawh lo a ni. He ka natna chimawm tak hian ka nunna a la vat dawn tih pawh ka hria, thih hi ka hreh ngawih ngawih asin, Bawihte.

Hun rei tak chhunga ka lo hmangaih ve em em thin, i pa chuan min hmangaih let ve dawn chauh a ni si a. Chutah nang ka lo pai mek bawk che a, ka hlim ve tan dawn chauh asin. Mahse kan nunna hi kan ta a ni miau silova, tihtheih engmah ka nei lo a ni. I thiante pawhin nu i la nei nge nei lo tia an zawh che pawhin vana tangin ka lo en reng thin che tih hi i hrilh thin dawnnia, ka fanu.

A tawpna atan ka hmangaih che, Puite. I pa nen khan ka hmangaih lutuk che u, fel takin awm ang che. Pasal tha tak, Kohhran bel tlat leh ruihtheih thil tilo mi ngat nei ang che. Tichuan i nu hi ka hlim animai, aww...ka fanu. Ka va ngai dawn tak che em, ka kal hreh ngawih ngawih a ni. Mangtha aw...hlim reng ang che.

Nangmah hmangaih em em tu, i nu...Lallawmkimi.

************

Ka thingthi hnawk mai, chhuak em em hian ka tap a. "Nu..nu..nilo, tinge min kalsan? Ala hma lutuk..nu ka van ngai tak che, ka ngai che.." tiin ka tap hawm hawm mai a. Ka pi chu lo lut vatin, "Bawihi, engti zia nge?" mangang tak chuan a rawn ti a. Ka pi chu ka lo kuah a, "Pi, anu ka ngai...tinge anu hian min kalsan hma em em le?"

Ka pi chuan ka kuta ka nu lehkhathawn ka lo hum mek chu min laksak a, "Aww...Bawihte.." tih ringawt chuan min chhang a, min lo kuahlet nghal a. Ka tap lai chu ka bang hmak a, ka mittui hruk pah chuan ka pa room lam chu ka va pan nghal a. "Pa, min hrilh tawh rawh...khawnge Lily? Mawhh..khawnge Lily?" ka ti ta vak vak mai.

Ka pa chu a rawn tho chhuak a, "Ka nu, tinge diary kha ilo pek a?" tiin ka pi zawk chu a hau daih mai. "Thudik a hriat hun ala awm tho tho dawn, engkim a hriat ve a hun tawh a ni. Tlai khaw hnuah hre tase, min dem lutuk ang." a lo ti let ve hrep a. Ka tah a chhuak lehnghal, "Pa, khawngaih takin min hrilh rawh...khawnge Lily?" ka han ti leh lawm lawm a.

****************

MARCUS-A CHANCHIN

College luh ni a ni a, ka vawikhat kal ve na tur a ni. Kum 18 ka tling ve tawh a, 12 pawh 1st division ah ngat ka pass ve kha. Kan class chu tam tak kan ni, mi 100 chuang kan awm. An ri mur mur a, tawngtai rual te pawh kan ang hial zawk. Ka thian kawm ngeih em em pathum, Primary school atanga kal ho ngat ngat, Amosa, Chhandama leh Puia te chu kan awmho leh ta thova.

Class chu kan la tan ta a, a boring ngawih ngawih. Ni hmasa ber te a ni bawk a, 12 a lo rik chuan kan bang dawn der mai. Chhandama te erawh lenkual an la tum cheu a, kei erawh ka lu a nat em avang chuan haw nghal ka tum a. Ka bike ka han ti nung a, ka helmet te ka han khum that lai chuan perfume rimtui em em mai hi a rawn nam phei deuh fua a.

Min kal peltu chu ka han en a, a hnunglam chiah ka hmu hman. Kawr senno a ha a, jeans dum a ha bawk. A pheikhawk erawh ka hre hman ta lo, bus ah chuan a lut a. A hnunglam tukverh bulah chuan a rawn thu a, a hmel chu ka hmu ta. A ngo em em a, a mitmeng mawlh mai kha. A sam chu a thlah a, a dar chen vel a ni.

A hmeltha mai pawh a nilo, a duhawm ngawih ngawih. A hmel innocent tak mai chuan min hip em em a, ka en tlawk tlawk mai. Chutah Bus chu a kal dawn ta mai a, ka phu zuk mai. Chu nu chuan min rawn en a, chutia ka lo en reng mai chu mak a tih hmel takzet. Mahse hmundang ka hawi sawn thei ngang lo, a hmeltha em a ni.

Bus chu a kal ta a, ka zui ve nghal a. Kan in kawnglam ah pawh ka kal tawh lo, bus kalna apiangah chuan ka tlan ve zel a. A din apiangin ka ding ve a, uluk takin a lo chhuk te chu ka en zel a. Achhan chu khanu kha khawiveng nge a nih a, khawilai nge an in a awm tih ka hre duh a ni.

A tawpah chuan a rawn chhuk ve ta, kawngsirah chuan ka ding a, ka en reng a. Bus a kal chiah chu min rawn melh a, ka phu leh zuk mai. Chhuanlamah phone phawrhin mi ka han be der vel a, min rinhlel hmel kher mai. A kal zel a, muang chang chuan ka zui zel a. In pakhat ah a ding chat a, min rawn en leh hram a.

Min thlek deuh vang vang a, tichuan a lut ta. An veng ka hria a, an in awmna ka hre ta. Hetiang hian hmeichhia eng anga hmeltha ka tih leh ka star em em te pawh hi ka la zui ngai lo, mahse henu kher hi chu min zui tir tu an awm tlat a ni. Ka mitthla ah chuan a cham reng mai a, thildang ka ngaihtuah thei mawh lo.

________________

A tukah chuan chunu chu ka zawng leh ta ngat ngat mai, college compound hel meuh chuan ka zawng a, ka hmu zo thak lo. Class tan a lo hun a, ka va han peih tawh lo tak. Ka kalna tur enchiang mang hlei lo chuan class roomah chuan ka han lut a, hmeichhe pakhat ka su chawrh mai.

Ka inthiam lo lutuk chuan, "Ana em?" ka ti vat a, alo hawichhuak a. "Na love....ka tihpalh aw...." a ti chuai raih mai a, ka hmel a hmu chu a tawp hmak mai. Keipawh chuan ka beisei loh lutuk ka hmu tlat, khanu ngei kha a ni, nimin lama ka zui haw ngei kha. "Kan class ah i awm amaw?" ka ti hu mai a.

Ani pawh chuan mak a tih hmel kher mai, "Nang pawh maw?" a lo ti ve hu mai. A zah hmel em em a, "Min hria em ni?" a han ti leh vel a. Ka ngeiawm ka chhuah a, "Nangpawn min hria em ni?" tiin nui chungin ka lo chhang let a. Min hlauh hmel tak chuan a kal daih mai, min chhang duh miah lo.

Teacher an lo la lut lo bawk a, kan la phusa nuai nuai mai. Puia bulah chuan ka va kal a, "Sawnu saw tunge a hming?" tiin ka zawt a. Puia chuan a han melh vang vanga, "Aleee...chhelo vee..tunge a, bro?" tiin minla zawt let zawk zui. "Naa..zawhtlak loh e..a bulah ka thu duh, min pui teh." ka han ti ringawt a.

"ZAwnga, i lerh emai. Engtin nge ka tih vak chuan anga?" a lo ti nuah nuah a. "I zei em kha...mawh..ka bulah lo thuttir tal teh." ka han ti leh a. "Na..khawnge ka thut ve anga?" tiin ka hnungzangah a beng thum dawt a. Chunu bula thu, a thiannu chu ka va kawk tawp a. "Sawnu saw i thutpui dawnnia." ka han ti a.

"Huiham, lerh thlak thin mange." tih pah chuan ava kal phei a. Engemaw ava sawi mual mual a, ka thin a lo phu dep dep mai. Chutah min la rawn kawk zui, ka zak lutuk chu ka sa nghal pup a. Reilote hnuah chuan chunu chuan min rawn melh a, a lo phei ta mai. "Enge?" a rawn ti ringawt a.

Keilah chuan, "Enge?" ka lo ti let ve hu ringawt. "Min ko a ni lawm ni?" a han ti leh a, Puia ka va en a. Min lo siai zeuh a, ka hrethiam ta. Ka han nui lui vel a, "E...nia, ka ko che  alawm." ka tih rual rual chuan Teacher a lo lut a. A thutna lama phei leh a han tum chu Puia chu a lo tho duh ta hauh lo, "Va thu law law rawh..Sir, a lo kal tawh saw.." a lo ti daih.

Awww, ka thianpa han zei zia hi chu, ka lawm thin a ni. Mahse ka bulah chuan a thu duh chuang hauh lo, a la ding reng a. Kan Sir chuan, "Hey...thu ta che." a han ti khur khur a. "Sir, ka thutna ah mi an thu daih a.." a han ti zawi sap a, ava han cute chiang tak em, mahse ka ngei. "Aw..i bula kha thutna a awl reng kha..thu mai la." a lo ti hrep mai.

Ka rilru chuan, "Adik chiah..lo thu vat rawh." ka lo ti ve nasa mai a, mahse ka sawi ri ngam teuh lo. Ala ding reng tho va, Sir chuan a han melh ren rawn a, "Tunge i hming?" tiin a han zawt a. Hlauh hmel tak chuan, "Marina-i.." a ti thawp sat a. Chiang fek fawk hian Sir chuan, "Anih chuan Marina, thu rawh le." a han ti leh a.

A rawn thu ve ta, min melhrum teh asin. Kan class-room hi a zau em em a, thutthleng sei tam tak a awm bawk. Mahse a in ang lova, athen chu pa 5 thutna te, pa 6 thutna te a ni a, mahse ka thutna erawh pahnih chauh lenna a ni thung. Hnunglam ka va hawi a, Puia chuan a mit ko a rawn san zeuh zeuh va.

Min duh emaw, duhlo emaw...thian ah tal chuan ka siam awm emai. A ngawi reng a, ka biak pawhin min chhang duh miah lo. Self introduction kan nei ta a, ka hun a thleng ve ta. Ka hming leh ka veng te chu ka sawi a, ka la zam map lo zui. Ka thu leh a, ka rinlo tak maiin min rawn be ve ta.

"Marcus-a maw i hming?" tiin min han zawt a. Ka lawm lutuk chu ka han khu sung a, "Aww...ni e, Marcus-a..Marcus-a ngei ka nih hi.." ka lo ti nghal zuah zuah a. A nui suk a, "A mawi hle mai." a ti leh ringawt a, ka intithei asin aw... Mahse han biak chhunzawm ka tum a, angaite ang bawk chuan a rul tawk lek lek hian min chhang leh a.

Chumi period chiah chu class kan nei a, a haw theih leh ta der mai. Zeplo chuan ka khamlo, Sir khan nilengin la se ka ti. Achhan pawh Marina-i bula thut kha  anuam ka ti laklawh em a, ka khamlo ngawih ngawih. Sir a chhuak chiah a, rang tawkin a tho nghal vut a. A thiannu thutna lamah a phei nghal a, Puia ava melh rum vak ringawt.

Puia lah chuan Marina-i thiannu chu thian ah a lo siam der tawh aniang chu, an nui dun har har mai. An chhuah pah chuan Marina-i chuan min melhrum kher mai, ka lo la bye bye zui. "Ka zei ve tho em?" tiin Puia chuan min rawn kheuh zeuh va. "Umm..mahse a induh lutuk, min be tha peih lo rap." ka lo ti a.

A nui vak vak a, "I lerh ve em em a, zei chuang mang silo. Keichu kha, ka han nuihpui leh nghal bawk bawk mai kha. Ka hrilh tawp ang che BAwiha, kan ni har lovang khanu nen khan.." a han ti vel ham ham a, ka lo ner khum sak a nih kha. "Min tihpui ang che." ka han ti ringawt a, "Tehreng e, i tan te chuan." tiin a han nui leh hak hak a.

_______________________

Marina-i thiannu hi a lo lerh ve hrim hrim nge ni, Puia nen chuan an inngaih riau mai. Atukah pawh chuan Puia nen chuan an thudun leh a, midang thian a neilo nge ni, MArina-i chu a tum leh ta hmuk mai. Puia lah hma tawkah kalin Marina-i thiannu bulah chuan a va thu leh thak mai a, Marina-i lah ala rawn tlai zui.

Ka bulah bawk chuan a rawn thu leh a, a tum lian teh asin. "Tinge min van ngei hmel em em ve a?" tiin ka han zawt ta tawp a, mahse min chhang lo. Sir a lo lut a, "Vawiin ni atang hian tun semester chhung chu in thutna ah theuh khan nitin in thu ziah tawh ang." ala ti zui, ka lawm zia chu sawi hian a siak lo.

A hmel mawlh mai kha, a ner nung mai. Min melh rum thei em em mai bawk si, keilah chuan ka runluih ngat ngat zel a. Unaupa chak deuh a lo nei anga, min sawisak tir hrep ang tih erawh ka hlau angreng khawp mai. Ka thian neih ve chhun te hian min chhan ngam dawn der silova, a nei lo turah ngai phawt ang.

Kar khat chhung chu kan lo kal ve ta, ka la be tawng tha hleithei chuang lo. A number chu sawi loh, ka sik hlek pawhin min melhrum em em zel mai chu ania. Hetiang chuan kan ni har ngawt ang, mahse chutia han hmangaih ngawih ngawih pawh ka ni bik hleinem, ka duh a, ka star ringawt alawm mawle.

Kar 3 vel kan kal hnu pawh chuan a number pawh ka la hlawh chhuak thei chuanglo, a awmzia ber chu henu hian min duh hlawl lo a ni. Amah anga hmeltha tam takin min star ve luai luai thin kha ania, a induh ngat ngat bik hle mai. A rei zel a, a bula thut ve reng chu a inthlahrun awm hial tawh zawk.

Midang an titi sup sup a, kei erawhin ka bula mi chu ka be tawng ve hleithei bawk silo. Teacher awmloh laiin a thiannu bulah ava thu a, Puia erawh ka bulah arawn phei ve thung thin. Mahse kan Sir Mazuala class a lo thlen apiangin ka bulah a thut zel angai si a, Sir Mazuala hi kan Class Teacher ala ni zui.

____________________

Thla khat lai a lo liam ve takah chuan ka be tawng ve thei ta zeuh zeuh a, mahse ala induh thlawt. Min hlau ni ber hian ka hria, mahse min biak hmasak ve zeuh chang a nei ve tan ta a. Ka biak rei deuhvin min chhang tha duhlo nghal zel a, tih ngaihna avang duh khawp mai. A number erawh ka la dil ngam lo, thianpa Puia te lah an inngaizawng titih der tawh.

Vawikhat chu class ka tlai a, ka lut peih tawh lo law law. Groud-a mahni a ka thut lai chuan Marina-i thiannu Rintei chu a lo kal a, a lo tlai ve tho chu niin. "I tlai ami?" a rawn ti nghal a, "Tlai ang chu mawle, thawh ka hai a." tiin ka lo chhang a. Ka bula rawn thut pah chuan, "Khawimaw ka lo zu ve.." tiin ka meizial  zuk lai chu a rawn ban a.

Ka lo pe ve mai bawk a, ala zu khu hluah hluah zui. Thil ho te te sawiin kan titi tui ta phian a, kawm a nuam reuh khawp mai. Chutia kan titi lai chuan Rintei chuan kan titi kallai subject a rawn thlak thut mai, "Marina-i hi i duh chiang mai." a rawn ti ta mai. "Naa..tunge ti?" te ka lo ti vel a.

"Puia pawn min hrilh vek...a number i duh em?" a han tih zawm leh nghal zat a. "Aih duhlo, keiman ka dil chhuak ve thei mai ang." ka lo ti ve ngwat a, zep lo chuan a awlsam bawk a, ka duh reng. "Bialpa a nei a.." ala ti zui, ka zak lutuk chu ka lum pup pup mai. "Ka duh lo hrim hrim, a chhelo ka ti ringawt alawm." za lo takin ka han nui hui ringawt a.

"Mahse tuna a bialpa hi tuman kan duhpui lo, a hmelchhe sia, a upa bawk sia. Marina-i pawh hian a khawngaih vang deuh niin ka hria, a bem rei ngat ngat bawk a." a han ti leh a. Ka tleirawl chhuah tan tirh han ti ve khanglang ila, kum 16 vel ka nih atang khan ka lerh ve hrim hrim. Bialnu pawh ka nei ve nual hman a, tunah erawh ka single mek thung.

"Tunge a hming?" tiin ka han zawt hram a, "Sanga ania, Lalsangliana.." tiin Rintei chuan min chhang a. Khai a, ka pa hming ang chiah chiah lehnghal. Ka pa erawh 'Sangte' tiin an ko hlauh thung a, a zia tho ve. "Umm..anih chu, tak tak ana, chutin ngaihzawng atana duh pawh ka nilo, ka star reuh em a." tiin ka han chhang ta vel a nih chu.

A awih chiah loh hmel kher mai, "An inthen veleh ka lo hrilh vat ang che." tiin a la nui huah huah zui. Tun Semester chhunga ka ngaihzawn hman ngei ngei a ngai, anih loh chuan Semester dangah kan thudun leh angem tih pawh hriat a ni silo. Kan han titi leh deuh bawrh bawrh hnu chuan 1st period a zo ta, kan lut ve ta a.

Mak ka ti angreng, Marina-i chu a lo thusawn miah lo. Amahin a lo thu a, lehkhabu a lo chhiar melh melh mai. Mak ka tih zual leh em em bawk chu min rawn hmu kha, a nui sang mai. Ka va thu nghal a, "I va tlai ve.." ka tawng hma chuan min rawn tawng khalh ve tlat.

"Nia, thawh ka hai a. First Period tunge lo lut?" tiin ka zawt a. "Miss Teresa-i." a ti a. "Anih leh tunah tunge?" ka han ti leh a, "Miss Amuani..." tiin min lo chhang leh a. Vawiin zet zawng, ava mak zozai ta em. Sir Mazuala class a ni bawk silova, tinge midang class ah pawh a lo thutsawn miah loh ni?

Nidangah chuan Sir Mazuala class a nih loh chuan Rintei bulah a va insawn ziah thin kha ania, tinge vawiin chu ava mak ngai ve? Nge ni a Rintei a tlai ve tho avangin amahin a lo thu zawk, engpawh chu nise amak ka ti ve hrim hrim. Min haw lutuk tawh lo a nih dawn hi tiin ka ngaih chu ka'n ti tha ve ngawt a, a mood a fuh hmel phian lehngal.

Accounting teacher Sir Mazuala zawk a rawn lut ta tlat mai, ka va han hne tawh tak em. A tir kha chuan ka bula MArina-i a thut theih vang khan Sir Mazuala class hi nuam ka ti ber thin a, mahse tunah chuan ka hne tawh khawp mai. A chhan pawh engdang a nilo, a subject hi a boring mai bakah a har em a ni.

Mathematics ning em em in pawl sawm thleng kan kal ve tang tang a, pawl sawmpahnih kan han ni a, maths zir leh hlau em em in Arts kan la ve hram hram a. Tunah Accounting kan zir leh a, chhiarkawp kan han zir leh ta tho si hian ka tah te a ti chhuak rum rum hialin ka hria.

Theihtawpa ulukin ka han ngaithla ve a, mahse ka man der chuang lo. Mahni a ti ve chhin tura min tih pawh chuan Marina-i ta ka copy char char, ala thiam bik em em lehnghal. Kan Sir chuan assignment min pe a, a chhuak ta a. "Keichu ka hrethiam lo reng reng, ka man hlawl lo." ka han ti a.

Marina-i chuan, "Aww..a sawifiah vek kha, i ngaithla lo aniang chu.." a lo ti hmuk mai. "Ka ngaithla a, ka man chuanglo alawm." tiin ka chhang a. "I hriatthiam loh chuan zawh mai tur alawm." a lo ti leh a. Ka ner sak a, "Ka zak alawm." ka han ti ve deuh hmuk a. "Thiam lo nih i zah chhung chuan i inzir thiam lovang, thiam silo, thiam anga awm te hi ka huat zawng tak." a han ti deuh zek mai a.

"Aa..nia, ni tho mai." te ka ti kual vel ta mai mai a, ka zak ve reng. "Assignment te kha i thiam dawn em ni?" tiin min han zawt leh a. "Thiam nang, pawilo..tihdan a awm mai ang." ka lo ti a. A phone a phawrh a, "I number sawi rawh.." a ti ta mai. Ka phu zuk thei hial, "Maw?" ka ti hu ringawt.

"I number sawi rawh...i whatsapp number?" a han ti leh a, ka la hawi a hru mai. "Engatan?" ka lo ti leh hu mai. Vin lek lek hian, "Aww...ka rawn hrilhfiah ang che, tunah chuan hun a awm hrih si lova. Assignment hi zanah ka rawn hrilhfiah ang che, i duh lo ami?" a han ti leh a.

Ka lawm lutuk chu zuan vak mai ka chak, "Ekhai a, duh ee.." tiin ka number chu ka sawi nghal zuah zuah a, ka nui vur vur mai. "Zanah ka rawn text mai ang che, assingment hi mark kan khawl ve na ber ania, a pawimawh alawm." a han ti leh a, chuti taka min han ngaihtuah deuh thut chu ngaih a thalo hial zawk dawn alawm le.

________________

Tlai a lo ni leh ta a, ban a lo hun leh ta. Ka bike, han ti ila ka pa bike zawk ania...ka pa bike chu ka han ti nung a. Rintei a lo kalphei a, "Vawiin chu inva inbe nasa vel ve a, ka lo hmu reng che u alawm." a rawn ti a. "Hehe nia, number kan inpe a.." intithei ru tak chuan ka lo ti a.

"Wow..chu ava nuam awm vel ve a.." tiin min han chhaih vel a, ka lo nuih deuh sak kha. "Mahse, bialpa a nei tlat mai hi buaina ani ta." a han ti leh chu ka nui lai pawh ka tawp chiang teh asin. "A ho emai, star te chu a thiang alawm." ka lo ti mai a. "Diktak chuan maw, i hming hi a sawi ve deuh chhen zel tunlai chu.." a han ti mai chu ka thinphu a rang dup dup ngei mai.

"Tak tak maw? Engtin?" ka lo ti nghal vat a, mahse amah Marina-i chu a lo kal a. "Rin, kal ila...." a rawn ti a. Ka hre chak asin le, mahse sawi zawm chi a ni tawh der silo. Min rawn en a, "Anih aw..Marcus." tiin min rawn bye bye a. Ka hlim veng veng mai, ring lenglawng hian, "Zanin chu aww.." kan ti vak mai a nih kha.

An rawn hawi deuh nualin ka hria, min melhrum rap mai. Ava tih chiloh tak e aww, zanin hian min rawn text duh loh phah mai ang tih te ka hlau. Zan a lo ni a, min text hun chu ka nghak ta ngar ngar mai. Whastapp group hi kan class bik hian kan nei tho a, mahse khawi ber hi nge amah ka hre thin lo a ni.

Hming lang lo leh dp neilo an tam si a, a tawng ve ngai awm pawh ka hre silo. Chuvang chuan a number ka la neilo mai chauh a ni, group ah chuan a awm ve ngei chu ka ring. Dar 8 a lo ri a, number hriatloh atang chuan message ka dawng ta. "Hi.." a rawn ti ringawt a. "Hi.." tih bawk chuan ka lo reply a.

"Keimah Marina-i aw..." a rawn ti a, a number kha ka save rang teh asin. "Awle...chaw i ei tawh em?" te ka han ti leh te te a. "Ei tawh e, hei assignment kha ka ti dawn chiah a..i hman tawh em?" a rawn ti nghal chung chung a, la inbiak deuh rih ka chak tehreng nen. "Aw...ka hman e." tiin ka chhang a, min hrilhfiah ta a.

Chhete chuan ka man ve deuh, atawpah phei chuan phone call meuhvin kan inhrilh fiah ta a. Sir Mazuala assignment vang liau liau in a number ka nei thei ta chu ania, Sir MAzuala chu fakin awm rawh se. Kan inhrilh fe hnuah chuan a vaiin hrethiam kher lo mah ila ka man ve ta deuh, assignment pawh chu kan ti zo ve thei ta hram a.

"Ka lawm lutuk e.." tiin kan in call zawh hnu chuan ka va text leh a, mahse a reh daih. Minute 20 vel hnuah chuan, "Keipawh le...abak i hriatthiam theih loh kha chu naktukah hun a awm chuan kan inhrilh leh mai dawnnia." tiin min rawn reply a, nuam tak a ni. "I mu nghal dawn mi?" tiin ha han zawt a, "Aw..zing thawhhma ka ngai a...ka walk thin a." tiin min chhang a.

Ka va la kham lo si em, chubakah a pian a nalh tawh tho a, zing walk kher pawh angai amawni ti rilru nuah nuah pah chuan, "Awle muttui le.." ka ti a, min reply tawh lo. Biak tur neilo chu ka nilo, mahse Marina-i lo chu tumah ka be peih silo. Mutthilh ve chu ka tum ta a, hla ngaihthlak pah chuan ka mu ve ta a.

Ka muhil tep tawh tih ah chuan message ka dawng leh a, amah anih chu ring kher lo mah ila ka han check ve hrim hrim a. Amah ngei a lo ni, "Vawiin kha i ti zahthlak e.." a rawn ti a, "Engchu maw?" tiin ka reply nghal vat a. "ZANIN CHU AW..i ti vak a, i mawlh thei lutuk." a rawn ti leh a, thinrim hmai sen vek emoji pathum a rawn dah tel bawk.

"Aww..a ho e, enge a zahthlakna?" tiin ka han reply leh a, "Aww..miin min ngai diklo anga sin." a rawn ti leh a, ka inthiamlo angreng khawp mai. "Ka tihpalh lutuk.." ka va ti ta ringawt a. "Ka thinrim kher lo ania aw..hehe." a rawn ti leh a, a dp a rawn thlak nghal bawk.

Ka han en chu mit ka khap lo rei vang vang hle mai, hmeltha tak ani hmeltha tak. Eng photo apps mah a hmang lova, make up a hmanglo bawk. Mahse a hmel chu tha tak a ni, han in lockdown pui mai pawh ka iai hauh lo. Ka download a, ka save nghal hmak. "Keipawh ka duh aiin ka lo tawng ring a, zialo tak tak." tiin zawngte hmai hup 3 nen ka va thawn let a.

"A pawi love, ka sawi mai mai mawle..muttui tak tak le.." a rawn ti leh a, "Umm muttui le." tiin ka reply a, a zan khatna atan chuan a tawk thawkhat viau chuan ka hria. Naktuk ni leh vat vat tawh se ka ti, anuam hi ka ti emai keizawng. Dar 1 pelh deuh hret hnuah chuan ka muhil ve ta a, ka mumangah kan lo inngaizawng vel.

_____________________

Atukah chuan hma takah ka kal a, ka hmuh chak tawh zia chu. Ka bike chu ka han park tha a, gate lam ka pan phei ta a. Gate bulah lawk chuan ka duat Marina-i chu a lo kal phei ve mek a, ka va pan nghal a. A rawn hawi a, a ding chat mai. Min lo nghak ve ngei anih chu, amak ka ti zawk.

"I van hma em em?" ka va ti a, minlo nuih sen sen mai. "Nia, nangpawh...thawh i hai lo ve khiah animaw?" tiin min han nuih vel har har a. A hmel hmuh anuam takzet, "Hailo ve khiah  anih hi, alarm ka set tawh a." tiin ka lo chhang a, gate ah chuan kan han inzui lut dun ve ta ngei a nih kha.

Ka awm a nuam veng veng, ka hlim lutuk chu ka khi deuh vur vur rengin ka hria. Class room kan han thleng a, ala hma bawka tuvak mah an lo la thleng lo. Kan thu dun a, Accounting chungchang chu min han hrilh leh hrep a nih kha. Mahse a nuam thove, a aw lah a mawi bawk si.

Tichuan nileng mai chuan kan inkawm a, vawiin zet zawng nidang ai chuan nuam tak a ni. Kan thil sawi erawh a ho angreng hle, mahse a tawng duh ve barh barh tawh khawp mai. Lunch Break a lo ni a, canteen ah chuan kei leh Puia leh Rintei te nen kan pali chuan thil kan ei hova.

Rintei pawhin min rawn melh zeuh zeuh reng mai, ka che fuh tan a ti ve deuh aniag e. Ban a lo hun leh ta a, vawiin chu thlah haw tum chhin teh ang. Puia pawhin Rintei chu a lo thlah haw dawn mek bawk a, Marina-i'n College Bus a pan phei lai chu ka va umzui vat a.

"Marina, iihh...englo.." ka han ti a, ka lai nghal der mai. "Enge?" tiin min lo en a, ka zam tulh tulh zawk. "In in awmna ka hre thova, kan inhlat em em chuang lova, ka lo thlah dawn che ami niang?" ka han ti ve ta thawr mai a. A nui sen sen a, "Hria ang..kan in awmna te chu.." tiin min han fiam zeuh chu a zahthlak duh angreng khawp mai.

"Hehe, nia...ihh..ka thlah ang che aw.." ka han ti leh a, ka thlan a tla velin ka hria. "A ngawi vang vang a, "Ni dangah le.." tiin min nuih a, bus lam chu ava pan phei leh ta a. Bus kawngka bulah dingin min rawn en leh a, min rawn bye bye a, ka lo nuih deuh sak. Zak viau mah ila, ka che chhe em love.

Bus chu a kal ta a, ka hnungah chuan Puia chuan min rawn beng thak mai. Nuih vur vur pah chuan, "Pawi thin ve...a duh nange?" tiin min rawn chhaih a, "Ka nuih a za vak lo ania awww.." tiin ka lo melh khur mai. Rintei pawh chu lo kal vein, "Ihmaw...ka hrilh tawp ang che. A duh ve deuh che in ka hria, i hming hi alam ri ngun lutuk ka tih kha." a rawn ti ve bawk a.

"Engtin..engtin nge min sawi?" tiin ka lo zawt vat a, Puia'n min lo nuih nasa mai. "A fel reuh lutuk, ka rin ang a nilo. Tunlai chu ka be ve zeuh zeuh...te a ti thin a, nizana in inbiak te pawh min hrilh alawm. Tukin pawh khan MARCUS-A NEN KAN LO KAL DUN A..tiin min hrilh a, a zawi zing ta khawp mai che." a han ti a, nuam ve duh reuh khawp mai.

"Anih engtin nge i lo chhan thin?" ka han ti leh hram a, a nui ringawt. "I duhzawng a ni em tiin ka zawt tawh.." a ti leh a, ekhai..Rintei hi a tangkai dawn khawp mai. "Chuan..chuan..engtin zel?" ka lo ti leh chung chung a, "Aaa..ka sawi duhlo, i tap palh ang." ala ti zui, thu lawmawm lam a nih chu a rinawm ta hauh lo mai.

"Apawi lo, sawi rawh..a ho emai." tiin ka zawt lui thova, ka hre duh hrim hrim bawk. "Ka duh ai chuan a tawngthei mah mah, fiamthu a duh bawk sia, a cool lo bawk si. Chubakah U Sanga ka lo chhang ve laklawh tawh bawk sia, bialpa neih ka nin zia hi...a ti." tiin min chhang a, a zahthlak em em love.

"I mizia i thlak angai anih chu, bro." tiin Puia chuan min nghawk zeuh a, ve lutuk hian a. "Athat che, Rinte...i number min lo pe teh..i tangkai dawn riau mai." tiin ka han nui vel a, "Puia hian  anei reng alawm." tiin min lo chhang a. Hmela mai mai chuh, nei reng si...a han sawi duhlo vel a.

_________________

Zan a lo thleng a, Marina-i biak chakna chuan ka khat lehnghal. Va biak hmasak ka hreh deuh bawk si, mahse min rawn biak hmasak chu ka ring chiah bawk silo. A mipa zawk ka nia, bul ka tan hmasak angai a ni. "Lehkha zir mi?" tiin ka va text a, mahse a seen lo mai pawh nilovin one tick chiah a ni.

A last seen a hide bawk si, ka nghak ngat ngat a, dar 9 a rik thleng pawh chuan chhanletna ka dawng lo. Lehkha zir chu KAHA SE hi a ni ringawt, ka peihlo mai pawh nilovin ka tum lo hrim hrim. Computer-ah chuan games ka khel ta ringawt a, phone chu ka charge a.

Dar 10 vel a pelh hnu chuan ka phone chu ka va check leh a, Marina-i messege chu awmlo mahse private message erawh alo tam khawp mai. Rintei messege pawh a lo awm ve a, "Lalmarcus, enge i tih? Marina-i bem mai mai mi?" a rawn ti vel a, ka nui chhuak huk mai.

"Min tihpui teh....a bialpa chu then vat rawh se.." fiamthu ti tak deuh chuan ka va ti a, "Awii dik tak chuan maw..U Sanga ai hian nangmah hi ka duhpui fe che mawle." a rawn ti a. "U Sanga in tia, a upa viau ami?" tiin ka han zawt a. "Aw..kum 26 vel a ni tawh, senior tep tawh zawk." tiin min chhang a.

Lo upa ve deuh ila awww, min duh ve phah angem le? Kum 1 chauhvin kan inthlau a, a lo duh upa ve hrim hrim emawni.. "A duh ve viau em, Marina-i hian?" tiin ka han zawt leh a. "Duh vak nang, chubakah an lenchhuah dun awm pawh hi ka hre ngai lo." tiin min chhang leh a.

"Umm nih chu, nih leh Puia nen hian inni em?" tiin ka han zawt ta daih a, a reh vang vang mai. Minute 10 hnu velah chuan, "Awwiii teuhlo mai, thian alawm kan nih." a rawn ti ta daih mai, ka rindan vel a ni. Puia hi chu awww...hmeichhia hi a han chhai ve viau thin tak na a, atawpah chuan thiantha ah bawk hian a chhuah leh tho zel.

Mahse amah Puia pawhin a bialnu angin a sawi ngai chuang lova, ka zawt ngai lem lo bawk. Rei fe kan han inbiak hnu chuan, "Muttui phawt aw.." a rawn ti a, kei erawh ka mut ala hun lo. Dar 11 a pel a, messege ka dawng leh ta. "Kan Section in pickle kan zuar a, ka haw ve chiah...YMA thil a ni sia, ka kal lo hreh sia." Marina-i messege ngei a ni.

"Ehee...in van zuar rei awm em em ve, a tlai tawh tawh nen." ka lo ti a. "Nia, phone ka charge daih a..ka thiannu te inah kan lengkawi leh a, ka haw tlai phah nih hi." tiin min chhang a. Engmah vak pawh kan sawi leh hman ta lo, "Ka chau lutuk, ka'n mu phawt ange..naktukah kan inhmu dawnnia." tiin a mu leh ta hmak mai.

_________________

A ni telin Marina-i nen chuan kan inhnaih ve telh telh mai a, mahse ka thlah a la duh thak lo. Puia'n Rintei  a thlah ziah chung pawh chuan Bus in ala haw ngat ngat tho, ka sawm apiangin min hnial zel. Han bem mai chu ka chak tawh khawp mai a, mahse ka la ngam chiah bawk silo. Min lo duh lo palh tase, ka zak dawn lutuk hi biak pawh ka be ngam tawh lovang.

Thianpa Puia ang deuhvin thian tha ah hian ka chhuah thei hram ang tih chu a hlauhawm khawp mai, mahse eng tik niah emaw chuan ka bem ve ngam turah ngai ang. A bialpa nen lah chuan an la inthen miah lo lehnghal a, chuvang chuan ka thlah a duhlo te pawh a ni mahna. Kei lah chuan ka duh tulh tulh mai si a, min duh ve ang pawhin a awm chuang lo.

A hma ai ngawt chuan kan innel ve tawh hle a, mahse zanrei tak thleng thlenga han intext tih vel chu a la awm chuang lo. A chang phei chuan min ning amawni aw tih tur khawp hian a rul tawk te te bakin min chhang ngai lova, a inthlahrunawm duh thin khawp mai. Ka hmuh loh hlek chuan ka ngai thei em em a, ka mumangah erawh chuan kan inngaizawng tawh thung.

Mahse mang ram mai chauh a ni si, atakah hian thleng thei tak ang maw tiin tan ka han la leh sauh sauh a. A theih tawp chhuah in Rintei pawhin min pui thin a, mahse a bialpa Sanga nen a han inthen tir tawp erawh a nuam lo ve deuh bawk si. Ka duh em a, lo inthen phah mahse a pawi ka ti lutuk lo maithei a ni.

__________________

Tlai khat kan class bang chu bus lam a pan lehnghal a, ka sawm lui peih tawh bik lo. Ka bike chu ka han ti nung vut vut a, chutih lai chuan bus atang chuan a rawn chhuk a. Inthlahrun hmel tak hian, "Ihh..kan senior te an bang tlai dawn a.." a rawn ti ringawt a. "Chuan..." nuih suk pah chuan ka lo ti a.

"Englo ania...dar 4 daih ah an bang dawn a..." a han ti leh a, "Chuannn.." ka lo ti zel a. Ka mitah pawh a en ngam lo, "Ihh....bus hi a chhuak tlai dawn a, ka nghak peihlo e...phurh tur i neih loh chuan min lo thlah thei angem?" zah hmel tak chuan a han ti a, aww...a ri a va mawi em. Bike atang chuan ka chhuk a, a seat chu fai em em hian ka han hru nawn leh a.

Min lo en vung vung a, bike-a lawn leh pah chuan, "Umm...lo chhuang rawh le." tiin ka han nuih zeuh a. Ani pawh chu a lo nui sang mai, "Van over tak." tiin a rawn chuang a, ka tlan muang teh asin aw. An in kha duh aiin kan thleng hma deuh chu a ni, "La round hrih ila.." han tih mai pawh a chakawm rum rum khawp mai.

"Ka lawm lutuk aw...Marcus." tiin ka tawng ve hma hma chuan inchhung ah a lut nghal daih, ava han ti ho tak. Ka haw ve ta nghal a, ka rilru ah a awm reng mai. Thianpa Chhandama ang deuha a break han hmeh ve zuk zuk erawh ka tum lo, khatiang kha chu a thing tlat. Ka duh ber leh ka vei em em nena bike-a han inphurh chu a nuam kher mai, ka muhil leh thei dawnlo a nih hi.

__________________

Zan a lo ni leh ta a, vawiin tlai lama ka hlim deuh vang nge, lehkha ka han zir ve tlat pek a nih kha. Internal Test kan neih dawn avang chuan ka zir ngawrh ve hle a, achhan pawh ka fail ziah vang a ni. 1st Semester Exam kan nei tep tawh a, Internal Test pawh a vawthumna a ni tawh dawn.

VAwi hnih ka fail a, Marina-i erawh a ti tha ber a la ni ve ve a, a zahthlak ve reng. Ka thatchhiat vang mai mai ania, ka duh chuan ka thiam thei ve lutuk, chhiarkawp tihloh chu. Phone call ka dawng a, ka zir laklawh em avang chuan ka la duh lo ve ngei. Dar 11 velah chuan ka duh tawk ve ta a, ka va han pass dawn chiang tak em.

Ka phone chu ka han en a, ka meng phawk hru mai. Min rawn call tu kha tudang nilovin ka Marina-i ngei mai a lo ni a, ka va han ui si em. Call let ka tum a, mahse sana ka han en chuan a tlai tawh angreng bawk si. Whatsapp ah chuan ka lut a, "Enge ni ta?" tiin ka va thawn a. Mahse reply-na ka dawng lo, a seen lo bawk.

Rei fe ka nghah hnuah pawh ala seen chuanglo, a mu tawh a nih ringin Yotube ah Wrestling ka en ta daih a. Ka en tui thei lo, a khat tawk chuan ka message a hmu tawh nge la hmulo tih chu ka va check deuh chhen mai a. DAr 12 leh achanve rik hma hret chuan min rawn reply ta, "Lehkha i zir leh zir loh ka rawn zawt dawn che a, hei..keichu ka zir zo chiah."

Mi fate han taimak bik zia hi chu aww...tinge maw mi fate ka lo nih ve loh le, a pawi tak tak a ni. "I van zir rei bik em em , dar 11 vel thleng khan ka zir a." tiin ka reply a...

"Ehe, i zir maw? I van fel ve, chuvang em ni ka call pawh i chhan loh a?"

"Aw ni e, ka lo en lo hrim hrim a.."

"Umm, i mut a chhuak tawh em?"

"Chhuak nang aw..nangmah a chhuak tawh ami?" tia ka han zawh chuan a reh leh ta daih mai, avan ho thei tak. Minute 10 vel hnuah chuan, "Muttui phawt mai aw.." a rawn ti leh ringawt a, tute emaw tih dan ang deuhvin..ka va khamlo thin tak em. Ui viau mah ila, "Muttui le.." tiin ka han reply leh ta hram a ni.

_________________

Atukah chuan first period atangin kan test ta nghal a, ka lo zir ve nasa bawk a, ka ziak zat zat mai. Internal test ah hi chuan kan thudun lova, Sir Mazuala hian kan thutna a sawn vek zel a, tichuan question in anglo vek min pe a, groupah min then hrangin in inthutpawlh tir vek zel. Han in entawn dawn mah ila, thut puite nena question chhan tur a in an miau loh avang chuan entawnin awmzia a awm lo.

Class 12 pawh 1st ah ngat pass kha ka nia, ka thiamsa ka han ziak tak tak mai chu ka zo hmasa ber. "Marcus, pawnah lo va awm rawh i duh chuan..." Sir Mazuala chuan a ti a, intithei ru tak chuan ka han hawi deuh lah a, ka chhuak ta a. Ground ah chuan keimahin ka thu a, a reh tlawk tlawk kher mai.

Rei vaklo hnuah chuan Rintei a lo chhuak veleh a, "I thiam em?" a rawn ti nghal a. "Thiam ve tho, nizan chu ka zir ve nual a." tiin ka lo chhang a. "Awii..ka theihnghilh vek kei chu...mahse ka pass tho chu ka ring." a ti nuah nuah a. Kan han titi leh luam a, Rintei hi chu a tawng duh bawk a, titi pui a nuam ve hrim hrim.

Chutia kan titi mawlh mawlh lai chuan Rintei chuan, "E taka...Marina-i hian a duh chiang che alawm." a rawn ti thut mai. Ka lawm zia chu, "Engtin nge i hriat?" ka lo ti nghal vat a. "Tukinah kan rawn kal rual a, NIZAN CHU MARCUS-A NEN KAN INBE LEH A, LEHKHA A ZIR REI VE REUH LUTUK...KA NUIH A TIZA TAWP...te a ti vel, nitin hian i hming a lam reng tawh mai." a han ti a, ka zuang lo chauh a ni.

"Tak tak maw...Rinte, min duh ve i ring tak tak em?" tiin ka han zawt leh a, "Awii...a sawi tha duhlo mai mai a ni. U Sanga a lo chhang thawt thawt hi chu a inchhir ve khawp ang, a duh zawk che tih hi ka chiang map." a la ti ta deuh deuh a, nuam tak a ni. "Mahse, keimah vanga an inthen phah chuan ka tan anuam dawn lo e, ka inthlahrung." te ka han ti kual vel a.

"Lungngai reng reng suh, ka tihpui char char ang che. U Sanga te zawng, a thing si, a lerh si, a thian kawmte lah an thing bawk si, i hmeltha fe zawk." a han ti leh a, Rintei chu a hmaia chuks hlup mai ka duh hial, ava han tangkai tak em, he nu zet hi chu. Rintei bawk chuan, "A tirah pawh chhang suh kan ti mawlh mawlh a, mahse a bem rei ngat ngat em a, a chhang ta mai chauh kha ania. A duh tak tak pawn ka hrelo, a hne thin ngawt ang." a han ti leh a.

"Lo zawt leh chhin teh, min duh nge duh lo tih hi.." ka han ti leh a, "Tehreng mai, ka lo zawt ang." tiin min chhang a. Ka awm a nuam leh ta sawt e, ka khi leh ta ver ver mai. Rei vaklo hnuah chuan amah Marina-i ngei mai chu a rawn chhuak ve ta a, kan lam pan chuan a lo kal a. "Saw saw saw...kan sawi kan sawi a, kan sawi chhuak nawlh mai alawm." tiin Rintei chu a nui huah huah a.

A rawn nui phei sen sen mai a, ava han tha chungchuang tak em. "Enge in lo sawi vel a?" tih pah chuan kan bulah chuan a rawn thu a, "Engvak nilove...hei Marcus-a hi bialnu tur ka lo zawnpui a.." tiin Rintei chu a lo nui a. Marina-i chuan min han melh zeuh a, "Ani te chu a luck emai, Miss Teresa-i pawn a star ania.." tih pah chuan min han nghawk zeuh a.

A sawi takah chuan Miss Teresa-i hian min star tak tak a, ka hne ania aww...a hmel chu a chhe hran lo, a pian pawh a nalh. Kan college mipa ho pawhin an star hlawm tawp, mahse a upa tawh mah mah a ni. Chubakah min be peih lutuk a, kan teacher a ni bawk nen ka duhzawng a ni hauh lo.

Marina-i ka duh em vang pawh a ni mahna, ka engah vak hian a thawk lo hrim hrim. "Ninawm...min star bawk lo. Chubakah ka duh lo hrim hrim, a senior tawh emai." ka lo ti deuh hmuk a, an nui dun bawk bawk a. Rintei chuan, "Marina-i nen hian ni daih ula in inhmeh ngawt ang, in height zawng zawng nen hian.." tih pah chuan min rawn siai zauh va, zei a inti ve hlarh hlarh ania.

"Min duh lovang, ani ang mi luck te chuan.." tiin Marina-i chu a lai lek lek a, "Ka duh rapthlak che.." tia han chhan mai chu ka chak khawp mai. Mahse sawi tur ka hrelo, ka nui ringawt. Thildang sawiin kan titi ho leh a, midangte pawh chu an rawn chhuak ta sup sup mai. Class ah chuan kan lut leh a, class chu kan neih chhunzawm leh nghal a.

_______________

Hemi tlai pawh hian ka thlah leh a, a nuam thin khawp mai. Zana inbiak pawh kan thulh ngai ta meuh lo, lehkha zir turin min ti ziah lehnghal. Amah vang liau liau hian lehkha ka zir taimak ve deuh phah a, a tha phian mai. Result alo chhuak a, amah aiin ka la ti tha zui. "I duh chuan ilo thiam thei hle mai.." tiin min nuih vak vak lehngal.

Tlai tin deuh thaw ka thlah takah chuan kan class-mate hote pawhin min ringhlel tan a, a then chuan min chhaih vak vak zel. Mahse mak deuh chu maw, a haw ngai miah lo. Kei phei chuan haw lem lo tak ka ni, ka intithei hial zawk thin. Zantin kan inbe ta a, mahse ngaihzawng lampang ang chuan engmah ka la sawipui ngam chuang lo.

November thla kan lo thleng leh ta der mai a, exam pawh a hnai ta khawp mai. Lehkha zir ngun zual deuh deuh turin min fuih reng a, keipawhin ka zir ngun phah reng bawk. Mahse ka awm ti nuamlo tu ber erawh a bialpa nen an la inthen miah lo chu a ni, keia lo inthen tir ngawt theih ni hek suh.

__________________

Kan in exam ta a, har ka ti lem lo. Accounting subject a hnuhnung bera kan nei tur te chuan thla a ti muang sawt mai, mahse ka huphurh takzet. December a lo ni leh a, hun a kal chak ngei mai. In exam lai pawh chuan kan intext reng thova, mahse lehkha zir kan thulh ngai chuang lo. Accounting kan tih a lo hun ta, ka va han zir peihlo tak em.

Theih tawp chhuah chuan ka han ti ve leh tang tang a, pass na tur khawp chu ka thiam ve tho chuan ka inhria. Mahse hriatthiam theih miahloh ka nei a, ka va zawt ta tawp a. "Chawk dun ila nimai lawm, naktuk saturday a ni thova, kan inah tumah an awm dawnlo, i peih chuan ilo phei dawnnia." a han ti ta mai a.

Ka va han lawm chiang tak, ka phei dawn hi a ni tawp mai ni. A tuk ah chuan ka va phei ta a, kekawr bul chhingte hi a lo la ha zui. A ngo suah suah bawk a, a khal reuh bawk nen. Pian nalh bawk, hmeltha bawk chu hmuh anuam kher mai. Keimah zawk ka lai lek lek, mahse engah vak a ngai lo a ni chek ang chu, han inkhuh eih pawh  a tum chuanglo.

Tichuan ka hriatthiam loh laite chu min hrilh a, reife kan inhrilh hnu chuan ka hrethiam ve tan deuh chuan ka hria. Keimahin min han chawh tir vel a, min hrilhfiah chu  a tum nasa ngang mai. Mahse mipa ve tho ka ni a, zirlai ah chauh  rilru pek chu a har ve angreng khawp mai. Dar 2 velah chuan kan chawk zo ta a, keipawh haw ka tum ta.

Kawngka bul thleng min thlah a, kawngka ka hawng tur chiah chu, "E..ihmaw Marina.." tia ka han hawilet chu min lo din hnaih mah mah aniang. Tum lo deuhin kan in kiss ta thut mai, ka thin  aphu nghal dup dup. Ka awmsawn nghal a, kan in en reng ringawt. Chutah amah bawk chuan min pawt hnai leh a, amah zawk chuan min kiss hmasa leh ta.

Mak ka ti lutuk chu ka mumang amaw ka ti hial zawk, amah zawkin min kiss leh nghal chu ka awih lo lutuk. Mipa ta na na na chu ka duhthawh telh telh a, a biangah chuan ka dawm vawng vawng a. Mahse amah zawk chuan min han nam deuh a, keipawh chu ka lo tawp ve nghal. Engmah kan sawi lo, kan ngawi dun char char.

Ka mitah pawh a en ngamlo, "Ihh...anih aw.." tiin a room lamah  a kal daih, "Marina...enge awmzia?" tiin ka va um zui a. Mahse a room chu a kalh tlat mai, ka va kham lo tak em. A ngawi reng mai bawk si a, "Anih...kan inhmu leh dawnnia." tiin ka chhuahsan ve ta a. Ka haw pah te chuan ka han insik vak vak a, ka mumang chu a ni silo.

____________________

Zanah pawh chuan ka text engmah a reply duh lova, a seen ringawt zel. Ka call a, a la duh bawk silo. A hnu deuhah chuan, "Lehkha zir rawh.." tih ringawt chu min rawn thawn a. "Awle, nangpawh le." tiin ka reply ta tawp a, min chhang let zui ta lo. Rilru pe lemlo tak chuan ka han chawk ve leh mual mual a, ka phone a rawn ri leh ta.

Marina-i a nih ngei beisei in ka han en vat a, mahse Rintei zawk a lo ni. "Hello.." ka tih rual rual chuan, "AWIIII..LAL MARCUS...in inkiss alaw?" a rawn ti chel chul mai a, ka beng a kiu vawng vawng mai. "Aaa..Rinte, ka hrethiam biklo. Kan inkiss palh amaw, chuan chumi hnuah kan inkiss chhunzawm leh a. Kan ti dawn tan chauh a, amah khan room ah min luhsan leh daih a." ka lo ti a.

Phur zet hian, "Atha lutuk...ihmaw...a duh che..ka chiang map. Aman min rawn hrilh alawm, I DUH TAK TAK EM NI tiin ka zawt a, UMM KA DUH ALAWM.. tiin min chhang. Mahse U Sanga ber hi ania buaina chu, mahse lungngai reng reng suh...tihdan a awm mai ang." a rawn ti leh ham ham a, Huiham...Sang Luliana mai mai chuh.

_________________

Sunday ah pawh nilengin kan inbe lo, keipawhin biak ka tum tawh lem lo. Tichuan kan in exam ni hnuhnung ber kan lo thleng ta, a hmel hmuh leh mawlh mai chu ka chak tawh. Rin aiin a rawn chhuak har lem lova, ka zo hmasa ber. A hmel hmuh beisei rilru deuh tak chung chuan haw mai ta mai lo chuan ground ah chuan ka tei ka tei a, a reh reih ruih kher mai.

Midang ho pawh an rawn zo ve ta sup sup a, mahse MArina-i hmel erawh ka la hmu lo. A rawn chhuak mai silo nen, haw mai chu ka tum ta a. Ka bike lam ka pan lai tak chuan Rintei nen an rawn chhuak dun a, ka ding chat mai. Rintei chuan, "I chhang tha em?" tiin min rawn zawt a, "Umm tha nimai." tih ringawt chuan ka lo chhang a.

Marina-i chu ka va en leh a, "Nang i chhang tha em, Marina?" tiin ka han zawt a, a lai kher mai. En pawh min en lo chuan, "Tha nimai." a lo ti ringawt a. "Marcus, vawiin chu Marina-i hi thlah haw rawh aw...sawidun tur in ngah ang." tiin bus ah a lut daih a, Marina-i chuan a thiannu chu  a melh rum kher mai.

"Kan kal dawn mi?" tiin bike ah chuan ka chuang a, min chhang chuang miah lo chuan a rawn lawn ve mai a. Tichuan kan tlan ta a, kan ngawi dun leh ta reng mai. "Tah hian ding lawk teh.." a ti thut mai a, kan college campus la ni tho si, kawng reh lai takah chuan kan ding ta a. "Khitah khian kal lawk ang." a ti leh a, abula tlang ah chuan min chhoh pui leh a.

Thuawih tak chuan ka zui zel a, a fianrial thei ang berah chuan kan ding dun ta vang mai. A tap lek lek a, "Kan awmdan hi ka hrethiam lo, MArcus...nang hian min duh em?" a han ti ta anih kha, "Aw duh e..hman atang khan.." tiin ka lo chhang vat a. A ngawi vang vang a, "Ka inthiamlo a ni...a hrehawm ka ti." tiin a kun reng a.

A khabe ah chuan ka han dawm chho a, "Timaw? Ngati nge?" tiin ka han zawt a. "Kan inphurh thin thute leh kan inkawm nasat zia te hi miin U Sanga an lo hrilh a, hmanni khan min hau hrep a. Chutia min hau hrep mai chu ka thin a rim a, kan inthen ta a ni. Mahse ngaihdam min rawn dil leh a, ka ngaidam duh angem tia ka inngaihtuah lai takin ka rilruah nangmah hi ilo awm a. Marcus, ka duhna che hi a rei tawh a, ka hrethiam har mai chauh a ni. Kan inkiss khan ka duh zia che chu ka hre chiang leh tawlh tawlh a ni, mahse kan awmdan hi ka hrethiamlo. U Sanga lakah ka inthlahrung bawk si, miin lerh tiin min sawi sup sup anga, chu chu ka duh lo a ni." tiin a inhnit feih feih a.

Ka thaw deuh hak a, "Marina, ka mitah hian min han en teh." tiin dim te chuan ka kuai dak a, ka mitah tak chuan min en a. "Min duh ve em?" tiin ka zawt a. "Umm.." tih ringawt chuan min chhang a. "Anih chuan tunah hian ka bem ang che, Marina..ka bialnu i ni duh angem?" tiin ka theihtawp chhuah chuan ka han inla Romeo vel ta a.

A lu a lo bu a, a mittui a rawn luang thla a. Ka pawm a, duhtawh tak chuan kan inkiss ta bawrh bawrh mai a. Hemi ni atang hian ka duh em em leh ka lo vei em em Marina-i nen chuan kan inngaizawng ve ta a, ka hlima ka hlim zia kha. Kan inkuah ngawih ngawih a, "Min zawh hun hi ka lo ngaichang ru reng thin asin." tiin min fawp leh vawng vawng mai.

_____________________

Marina-i nen chuan kan inngaizawng ta a, kan inhmangaih hle bawk. Kan thikthu pawh a chhe dunin han inhauh bawr bawrh chang pawh kan ngah ve thin khawp mai. A thiannu ber Rintei pawh a chang chuan a thik hial thin, chutiang bawkin keipawh thikthu ka pe na ve hle bawk. Exam chawlh chhung zawng chuan kan inhmu nitin mai thin a, kan inhmuh loh hlek chuan kan inngai nghal ngawih ngawih zel.

Christmas leh kumthar pawh kan hmang dun a, kan inzui reng zel. Ka rin ai daihin beer a lo in thei phian lehnghal a, mahse engah vak ka ngai lo. Keipawh hian zu ka in ve deuh reng thova, a chang chuan min hau nasa thin khawp mai. Vawi tam tak chu ka han fight ve deuh thuak thuak thin a, mahse a indang tlat zel.

Keipawhin han tih luih chhunzawm ka tum ngai chuang lo, ka hmangaih zual sauh zawk. Kum thar ni ah pawh tlai chaw lo ei turin ka sawm a, a tir chuan han hnial viau mahse ka sawm luih tlat avang chuan a remti ve thei ta hram a. Ka nu leh pate pawh ka hmelhriat tir deuh thlap a, an duhzawng tak a ni.

A bialpa hlui Sanga nen pawh buaina kan han neih deuh nak nak kha, mahse sawi lo zawk mai teh ang, a zahthlak dawn emai. A hunlai a ni bawk a, exam chawlh lai lo ni bawk nen. Nitin mai chu kan inhmu ta a, sunday ah pawh nise inkhawm banah ka leng tho zel. A chhungte pawhin min iai bik lemlo chuan ka hria, anu phei chuan min be tha thei lutuk ringawt.

_____________________

College kan luh leh meuh chuan kan inngaizawng tih chu hria an lo tam tawh kher mai, mak an ti em em hran lo. Mak an tih ber zawk chu khati khawpa hmeichhe ngawi chawi leh zakzum em em kha, kei mi thawveng zet leh fiamthu duhtak hian ka han chhai thlu thei hi a ni. Inhmeh min ti hlawm em em a, an tawngkam mawi mai mai a ni em tih erawh ka hre hauh lo.

Lehkha zir kawngah kan inpui tawn nasa em em a, class test ah leh Internal exam ah pawh kan ti tha dun thei khawp mai. Ka tawng hi vannei ka inti takzet, lehkha ka zir tam phah mai bakah ruihtheih thil ka tih tlem phah bawk a. Zu in reng chu ka ni chuanglo nangin, a awm hi chuan ka hnial hran ngai lemlo.

1st Semester exam result a rawn chhuak ta a, ka pass dawn tih chu chiang sa tho mah ila ka ti tha lovang tih ka hlau ber. Pakhatna a ni ta ngei a, ka rinlawk ang chiah a ni. Kei erawh pangana ka ni thung a, 100 chuang zinga pangana han nih chu a ropui viau tho ve. Marina-i hi tawng lo ila chu hei ai hian ka tichhe ngei ang, ka fail hial maithei zawk a ni.

__________________

Zankhat chu leng turin min sawm a, "Anute an zin vek dawn a, karkhat chhung chu au mami nen chauh hian kan awm dawn. Lo leng rawh, rei deuh a lo len theih." tiin min rawn hrilh a. Len ka tum loh zan tak a ni a, mahse ka rilru ka va thlak rang chiang em. Ka inbual fai a, rang takin ka insiam a, ka va leng nghal.

A U nen chuan an lo awm a, "Ehe..lo leng rawh, Marcus." tiin a u chuan min lo dawngsawng a. Thingpuite min lum sak a, reife chu kan han titi a. Dar 9:30 a rik meuh chuan  a u Mami pawh chuan nachang a hre ve ta hlauh mai, "Tikhan lo inkawm rawh u, keichu ka mu dawn." tiin a room lam a pan ta a.

Inthlahlel takin kan infawp nghal ngawih ngawih a, kan inhmangaih thu leh kan inngaih zia thu chu kan inhrilh tawn char char bawk a. Nitin inhmu tho mah ila, kan inngai tawp hleithei lo chu a ni ber e. Reife kan han inkawm hnu chuan 11 a lo ri ta reng mai, haw zai rel ka tum ve ta a. "Ka haw tawh mai ange, a tlai tawh emai." tia ka han ding chiah chu ruah a rawn sur ta buan buan mai a.

"Yess...ila haw thei lo." tih pah chuan min pawt thu leh nghal a, min kuah nghal. A sur hunlo nge a hun takah a sur zawk pawh ka hrethiam lo, ka han nghak leh ta vang vang phawt a. Dar 12 a pelh hnuah pawh chuan ban a tum reng reng lo mai a, a sur nasa tulh tulh zawk hian ka hria. "Lo riak ve mai la.." tiin min sawm a, mahse ka ngam chiah lo.

"A chiloh....kan in-crange palh ang." tiin ka han nui a, mahse a ruk tak chuan mipa ka nihna angin chak lo bik chu ka ni hauh lo. Mahse ka hmangaih em a, khawihchhiat ka phallo a ni. "Keiman ka veng dawn che alawm, ti hi chuan i haw thei chuang lovang." tiin min ngaihtuah hmel em em a, hnial chu har ve tak a ni.

Ka chhungte phone-in ka thiante ina riak mai tur ang chuan ka insawi ta a, tichuan room ah kan inzui lut ta a. Ka rilru tak chuan ka hlauthawng angreng hle mai a, a mipa zawk chu ka dawih tlat pek a nih chu. "Thutthlengah hian ka mu mai ange.." ka han ti a, a phallo nasa mai. Tichuan a vawikhatna atan khum khatah chuan kan mudun ta a, mipa leh hmeichhia mudun ta na na na chu kan inkiss nghal bawrh bawrh mai.

Ka insum tang tang a, "Mu tawh raw...alarm ka set anga, zingah hma deuh a kan thawh angai ania." tiin ka phone ah chuan alarm chu ka set ta a. "A vawt e, min kuah lum la.." tiin min rawn nek tal tal a, nghet tak chuan ka kuah a. Ka thisen a lum ta hle mai a, ka mipatna pawh chu a rawn harh vang ta khawp mai.

Kan inkiss leh a, kan duhthawh telh telh. A tawpah chuan a awmbawr te thleng chuan ka chul ta a, ka kut a hlei tan ti viau mai. Mahse a indang lo hrim hrim, a awm ngai chuan a awm reng a. A tawp a tawpah chuan kan insum zo talo, kan chesual ta nge nge a. Ka rin ang ngeiin ala virgin a, na a ti kher mai.

Keipawh ka vawikhatna ve tho a nih vang nge, ka mumang ang ruai hian ka hria. Kan zawh hnu chuan adama leh evi suit nen inkuah rial chuan kan mudun a, kan innuih suk ringawt. Zawite hian, "Ka hmangaih che." tiin ka hmuiah chuan a rawn fawp zeuh va, "Keipawn ka hmangaih che." tiin ka lo chhang a.

_________________

A chhungte lo la haw chuang bawk silo nen, sex hman chu kan zawngchhang ta tlat mai. Hun a lo kal zel a, chance kan neih apiang chuan hman zel tur amaw kan ti hial tawh zawk. Kan inhmangaihna tinghettu ni se ka ti em em a, a hma aiin ka hmangaih zual sauh zawk. "Min hmuist em? I laka ka inphal mai nachhan chu ka hmangaih em vang che a ni...min kalsan miah suh aw, Marrcus." tiin nitin mai chuan min hrilh thin a.

Kalsan chu sawi loh, amah zawk hian min kalsan daih mai ang tih chu ka hlau mah zawk. Kan nghet tual tual a, thikthu pawh ahma aiin a chhe lehzual. Rintei ka biak that deuh hlek phei chuan a titau hial zel a, kan inthlem nasa thin ania. Lehkha zir lamah pawh hma kan sawn zel a, second semester exam pawh kan zo leh ta der mai.

Result a lo chhuak leh a, pakhatna tho a ni leh. Keipawh hma ka sawn ve leh deuh a, pathumna ka ni. Kan vengah pawh Marina-i nen chuan kan lar ta hle mai a, kan in lamah ka hruai phei zing reng bawk a. Rintei phei chuan, "In innei ngei ngei ang." a han ti hial a nih kha, inneih ngei pawh kan tum reng bawk.

__________________

Mahse hun a lo kal zel a, thil zep a nei ang tlat hian ka hre ta a. Thian thar tu tu emaw a nei a, min hrilh miah lovin a chhuak zing ta khawp mai. 4th Semester kan in exam dawn hnaih vel phei kha chuan zana min biak miahloh chang te a nei ta a, mahse ngaihthatlohna em em pawh ka la nei chuang lo.

Min then mai dawn angte hian ka ngaihtuah a, a mizia chu a dang ta riauvin ka hria. Inhmuh puia ka sawm pawhin min hnial ta zel mai a, a ngaihna ka hrelo takzet. Inlamah a buai tur thute, dawr thil lak a ngaih thute leh damdawiina a pu a awmpui tur thute chu a sawi thin a. Mahse vawikhat chu in lama a buai tur thu a sawi ni tak chuan Chhandama'n bazarah hmeichhe pakhat leh mipa pakhat nen an pathuma anlo inzui lai a hmuh thu min hrilh ta tlat mai a, ka sa zak mai.

Mahse engmah ka la sawi duhlo, zan a lo thlen chuan leng turin min sawm ta ngei a. Ka ringhlel ngal viau chuanglo, ngaihtha lo viau pawh ka ni chuanglo. Mahse dawt min hrilh chu mak ka ti em em a, chhan tha tak a awm ngei ka ring bawk. A chhungte an mut reh hnu chuan, "Vawiin chu inlamah i awm tawp silova.." ka han ti ta a.

"Hmm..anih leh khawnge ka awm?" a lo ti hu a. "Bazarah i thiante nen in kal daih kha, ka thianten an hmu che u alawm." tiin ka chhang a. Zawi sap hian, "Nia, min kalpui rawh a ti tlat a...ka ning ania Lalsiami hi chu..."  ahan ti nuah nuah a. "Tunge chu chu, ka va hre ve lo ve?" ka lo ti leh vat a.

"Ka thiannu...i hre kher lovang. A bialpa  awm ve reng a, inkalpui tir ve mai tur ania." a han ti leh a, ka ringlo chu a ni miahlo, mahse ka ngaih a tha vak lo. "Tinge min hrilh lohva? Min hrilh ve hrim hrim tur alawm." ka lo ti leh a. Min kuah a, "Tihpalh duat, in lama kan buai zawh vek hnuah chauh alawm ka kal. Min rawn sawm deuh thut bawk sia, ka hrilh ta lo mai che a nih kha." tiin min chhang a.

_______________

A ni telin min hlat tial tial mai chuan ka hria a, ka thla  amuang tawhlo takzet. Kan inhmuh changte pawhin ahma a nuam a tih ang khan a awm tawh lo, haw a rawt chhen zel. A phone ka khawih hlek pawh chuan min laksak nghal zel, kei erawh chu duhtawkin min check sak ziah tho. Thinrimna a zawng reng a, hmeichhe thik tur a zawng reng bawk.

Mipa dang nen an inphurh thute thleng chuan thiante hnen atangin ka hre leh zel a, kan inhauh phah ta fo mai. Ani chuan vengdanga a thianpa angin a sawi zel a, a tir chuan ka awih ve mai. Mahse kan boruak a chhe tulh tulh a, thinrim hmaisena inhauh chang kan nei tam ta fo mai. Ka rinna a tlahniam a, ka rilru a hah takzet tawh.

Kan inhauh apiangin min be duhlo hmak zel a, vawi 20 chuang pawh call mah ila a la duh ngailo hrim hrim. Hetih hunlai hi thalai ten FB kan la uar em em lai leh Whatsapp kan hriat tan tirh lai kha a ni a, Marina-i nen hian FB password kan inhrilh a, kan inluh sak fo thin. Mahse chutia kan boruak a han chhiat deuh atang chuan a password chu a thlak hmak a, ka thinrim chuan ka thlak ve hmak.

Rintei ka zawh lahin engmah a hriat bikloh thu leh kawm pawh an inkawm ngai vak tawhlo thute chu min hrilh a, ka rilru a hah ngei mai. Mahse kan la inzui reng tho a, sex pawh remchang kan hmuh chuan kan la hmang fo tho. "Ka hmangaih che." tiin nitin chuan min hrilh reng thin tho a, mahse a thinlung zawng zawngin a sawi tawh lo niber hian ka hria.

_____________

Exam chawlh a ni leh ta a, tun tum phei chu inhmu khat tak kan ni. Engtik lai mai pawh chuan kan inhau reng mai a, ka tawt up up reng mai. Thlamuang taka awmlai ka nei ngai ta meuh lo, keilah lo thinchhe ve bawk nen. Buaina hrang hrang kan nei ta fo mai a, sawilan vek sen pawh a ni lo.

"Inthen mai ang..." tih tawngkam chu a hmang ngun ta malh malh khawp mai, kei erawh chuan then ka tum lo. Inla mipa takin, "Ka nei ang che, nanglo chu hmeichhe dang ka chetsual pui ngai lovang. Nang chauh ka nei ang che, ka tiam a che." tiin thu ka lo tiam ve tawh a, ka thutiamah chuan din ve reng chu ka tum tlat a ni.

Mahse kan boruak erawh a rit ta khawp mai, aan ina len ka tum apiangin chhuanlam a siam ziah a. A mipa zawk hian ka dawh hram hram tawh chu a ni ber e, mahse mi ka atang chauhva ka hriat thin a nih avang chuan chutia mipa dang laka min phatsan mai chu ka ring phal bik lo. Inhmuh reng chu a ning ve ta deuh aniang e, ka biak loh chuan min biak a tum tawh thak lo.

_____________

Vawikhat chu petrol la turin ka chhuak a, chumi pah chuan wine shop ah ka kal bawk a. Whiskey um hnih ak puar lung chung chuan ka haw leh ta a, hemi ni pawh hian inhmu tur chuan ka sawm reng a, mahse damdawiina a in entir tur thu a sawi a ni. ST Mart bul petrol pump ka han thleng chu ka thil hmuh chuan min tina zawk mai, MArina-i chu mipa pakhat hian bike ah a lo phur a.

A huat lemloh hmel kawp mai lehnghal, a bei hle hle hi a ni ringawt. Chutah min hmu chiah chu a phu zawk a, a thu ngil nghal at mai a. Mahse ka ding duh lemlo, ngawi reng chuan ka tlan ta zel a. In ka thleng a, a so hian ka so bulh bulh mai. Ka roomah ka lut a, ka lu chu a puakkeh mai dawn hian ka hre hial.

Ka room kawngkhar chu ka kalh a, tichuan ka zu lei chu ka phawrh a. Chhandama leh Puia te nen kan pathuma zana kan inho tur chu a ni nachungin a chanve dawn lai chu ka in ta mai a, um khat dang ala awm tho a, kan kham tho turah ngai phawt teh ang. Ka phone ah chuan messege ka dawn nghal a, "Marcus, thinrim suh aw.." tih hi a rawn thawn a.

Ka thinrim a ti zual tulh tulh zawk, "Engvangin nge ka thinrim anga, tihsual i nei em ni?" ka va ti let deuh kher a, "Kan inah kalin min rawn sawm a, ka hnial hreh alawm." a rawn ti leh a. "A nih chu...keipawn ka sawm ve tho che a, i hnial sia...in ina lo kal ve kher angai tihna animaw?" ka han ti leh deuh sak a.

"Chutin ti suh...ka thianpa alawm." a rawn ti leh a, ka reply peih tawh lo. Ka rui hle mai, mahse ruih lungpuam a tap bui bui ang chi kha ka ni ve hauh lo ania. "Marina....Zawng Marina...lerh lutuk." te ka ti ta vel khan ka hria, ka thinrim em a ni. Min rawn call a, mahse ka la duh lo ve tlat. Then nghal mai erawh ka tum chuanglo, mahse tun tum chu ka enliam mai mai tawh lovang.

_________________

Zanah chuan zu chu kan inho leh ta a, keipawh ka han in leh teuh tho kha. Chhandama leh Puia te bulah chuan engkim chu ka hrilh ta vek a, "Marcus, keichu Marina-i hi ka ring tawh hlawl lo a ni. Hmanni pawh khan ka sawi duhlo mai mai a, mipa dang nen an inkai lai ka hmu alawm." a ti ta mai a.

Zu chu rui viau tho mah ila ka harh kawk thei hian ka hria, ka na zawk mai. Puia pawh chuan, "Bro, Rintei pawhin a mizia a dang lutuk a ti. Chubakah mipa dang biak a nei tlat hian a hriat thu min hrilh bawk a, i rilru a nat ka hlau em a keipawhin ka sawi duhlo mai mai alawm." a lo ti ve bawk a.

Ni e, ka rilru chu a na takzet. Hetiang khawp hian min lo bum thei ang tih ka ring ngailo, sex kan hman avang khan kan nghet zual sauh dawn maw ka ti a, mahse a ni hauh silo. Ka thiante bulah pawh chuan sawi tur avang ta hle mai, za lo tak chuan ka nui lui a. "A ho emai, duh leh minlo kawp ve khanglang rawh se. Ani ai tha an tam emai." tiin ka han tawng ve pung pung a.

Mahse a ruk tak chuan ho ka tilo, ho ka tihloh zia leh ka rilru natzia hre tute pawh ka bula mite, ka thian tha tak pahnih Chhandama leh Puia te ngei hi an ni ang. Ka natzia chu an hmutlang vek tih ka hrethei, mahse engmah min sawipui chhunzawm bik duh chuang lo. High School kallai a ngaihzawng ka neih ang kha  ani tawh silo, Marina-i hi chu ka thinlung zawng zawngin ka hmangaih a ni,

_________________

Tlai khat chu kan inhmu leh ta a, kan inhau nasa khawp mai. "Min hmangaih tak tak lo anih hi?" min la ti zawk zui, hmeichhia chu nilo se ka hnek chiang viau ang. Eng ang pawhin han hau mah ila, chhuanlam a siam zel tho. "I lo mak khawp mai.." ka han ti leh ringawt thin a, kan boruak chu rit tak a ni.

Titau chung chuan min hawsan nghal nal nal a, umzui pawh ka tum lemlo. Thenkhat chuan nep pawh min ti maithei a, mahse a then hmasatu nih erawh ka tum lo bur thung. Zanah pawh kan inbe lo char char a, zep lo chuan ka ngai takzet a ni. Ka thiante pawh ka kawm ngai mang talo, kum khat chiah kan la inzui a, tihian min lerhsan nghal mai chu a nia.

______________________

Thenawmnu thar Lily chu a chhelo phian mai, khatiang em em a mizo nula sang tha kha ka la hmu ngai lo. Vawi khat na na na chu han CK pui ka chak rum rum hial, mipa ve tho ka nih hi, min lo dem suh u. Kan han inkawm chho a, kawm lah chu a nuam phian lehnghal. A nun a nem in a zaidam hmel em em a, ka duhzawng tak a ni.

Mahse han ngaihzawn ngawt erawh ka tum hauh lo, ngaizawng neih kha ka peih hrih lo a ni. Zanlaiah hian verandah-a zawi te te a keimah a zai hi ka ching reuh va, ama room verandah atang hian min lo ngaithla thin tih pawh ka hre reng. Mahse a bulah chuan hria angin ka awm duh hauh lo thung, amah pawhin a sawi ngai lem lo.

Amah hrim hrim hi a nelawm a, mi care thiam tak a nih ka ring. Kan inlen pawh reng a, chaw pawh kan eidun ta fo mai. Mak ka tih em em chu ka haw dawna min ngai lutuk kha a ni, ka rilru tak chuan ka hlim veng veng mai. Mahse vanneihthlak takin kan pu chuan leave extend ka dil chu min pawmsak a, Airport pawh thlen hma hma chuan ka let leh nghal a nih kha.

Kan landlord pawhin min khak nual, mahse Lily ka hmu leh thei tur chu ka lawm a ni. Ka ngaizawng hauh lova, ka hmangaih hek lo bawk. Mahse ani hi chu mi special tak a ni, zun a nei tlat hian ka hria. Bialpa a lo nei reng ang tih te chu ka hlau zawk, mahse a neih loh thu min hrilh khan ka lo thaw huai ve ringawt.

_____________________

Kan inkawm rei telh telh a, kan innel tulh tulh mai. Zantin mai chuan kan inkawm a, ka theih tawpin a hna lama pawh ka pui thin. Ka pui han tih ah ka thiam ang tawkin ka fuih ve hram hram thin a, ani pawhin zu in tam lo turin min zilh fo. Beer erawh kan indun zing malh malh khawp mai, mahse ka ngaihnep phah chuang hauh lo.

Office a kal hlan te chuan ka ngai thei em em a, a bula awm ka thlahlel ngawih ngawih zel. Lily hi ka tan hian a pawimawh takzet tawh a ni, amah hian pawimawhna riau a nei tlat hian ka hria. Ka sawifiah thiamlo, ka bulah awm reng turin ka duh a ni. Ka hlauh ber erawh chu kan inngaizawng ang tih mawlh mai chu a ni, a chhan chu ka na peih tawh lo.

Ka hmangaih a nih vaih chuan ka la serious leh awm ropui sia, a mipa zawk hi ka lung a leng leh dawn lutuk chu ka huphurh a ni. Ngaihzawng enin ka en duh lova, hmeichhia a nihna anga hmangaih ka tum lo bawk. Ka thiantha tak ang chuan ka hmangaih takzet, mahse ngaihzawng enin ka en ngai hauh lo.

Hun a lo kal zel a, keipawh ka haw a hun ta. Ka ngai dawn lutuk chu ka tah  a chhuak hial zawk, ani pawhin min ngai dawn hle niin a lang, min kuah vawng vawng mai. Khatih lai khan Uber driver khan ka bialnu amaw a ti hrim hrim ang, mahse engmah chu minzawt chuang hlei lova. Ka nunah mi thar pawhimawh tak a lo lang leh ta, chu chu Lily ngei hi a ni.

____________________

Mizoram lama ka haw hnu pawh chuan ka ngai thin em em a, ka hna chu ka chhunzawm ve leh ta a. Ka haw tirh lah khan ka phone a la bo zui a, ka mangang teh asin. Inthlahrung tawkin ngaihdam ka han dil a, min lo ngaidam ve mai bawk a. Lily ka duh reuh na em em chu a nui hmel mawlh hi a ni, a chang chuan Marina-i hi ka theihnghilh ve tep zel.

Zantin kan inbia a, kan inbe rei thei khawp mai. Mahse a hna lamah a hah ve thei thin si a, a chang chuan ka inthlahrung ve thin khawp mai. An chawlh hun thleng vat vat se, inhmuh leh mawlh mai chu ka chak tawh a ni. Zawi zawiin Marina-i vanga ka natna te chu Lily chuan a tidam ve zel a, mahse theihnghilh mai chu ala har a ni.

Ka thiante pawh ka kawm khat ta hle mai, Amosa hi ka hmu leh zauh thin tih loh chu inkawm ho kan nei ngai ta meuh lo. Kan veng awmna a inhnaih em em silo nen, mahse Kimkimi chu ka la hmu zauh zauh tho. Kimkimi kher hi chu kawmloh a har a ni, nupui ka hmuhzawh ngang lo chuan ka nei daih maithei a ni.

Zan khat chu Lily chuan amah bemtu an thawhpui pakhat hnenah a bialpa angin min lo sawi a ni awm e, kan nui dun nasa teh asin. Fiamthu te hi rawn thawh ve talh hi a tum thin a, a nuihzatthlak loh lutuk kha ka nuih aza zawk thin. Thil ho te te ah a nui peih em em a, chutak chu a duhawmna a ni.

_________________

Ka nu leh pate bulah pawh chuan Lily chanchin chu ka sawi nasa thin khawp mai a, ka pa lah hian, "Nupui atan a tlak angem?" a lo ti ve hman chhen lehnghal. Kimkimi hi chu an la duh tih chu ka hre reng, keilah hian ka duh der mai silo. Kimkimi pawh hian min neih a duh bik ka ring lo, ani nen hi chuan kan inkawmngeih em bawk a ni.

"I selfie thlalak i rawn thawn hma chu ka mu dawnlo.." tiin zankhat chu ka titau tlat mai, ka ruih vang tho a ni. Khatih hunlai khan whatsapp video call a la awm ve lova, whatsapp message leh thlalak inthawn chauh kha a ni mai. Tichuan a selfie thlalak chu min rawn thawn a, aww..ava duhawm tak em.

Zep miah lo chuan ka ngaizawng amawni aw tiin ka inzawt fo thin, tiang em em a hmeichhe dang ka vei theih hi ka inring ngai lo. A pian a nalh zawh zawh ropui si a, amah a changkang bawk si. Bangalore-a ka awm laia vawikhat a off-day ni a kan bazar dun khan pheikhawk sang inches hnih a rawn bun mai a nih kha, kan inchen chiah chiah mawle.

Min hnem tur leh min pui turin Pathian hian Lily hi a rawn tir nimaiin ka hria, mahse tute emaw ang deuhvin ka vantirhkoh chu ka ti kher lo ania. Amah vang hian ka nui hnem leh ta malh malh hle a, ka mizia a thlak hlawk ka ti mai. Ahma ang bawkin ka tawng duh leh a, ka chhungte pawhin mak an ti tih chu ka hre reng.

Anni chauh a nilo, ka hnathawh puite pawhin mak an ti. A tir chuan mi cool tak leh tawng tlem tak, nui khat tak ang vekin min hria a. Mahse Lily nena kan intawn atang kha chuan ka tawng duh leh tawh khawp mai, ka thianpa pakhat phei chuan ka rui amaw a tih hial kha. Mahse an va hrelo tak em, chutiang vang ni hauh lovin Lily Zothanpuii ka neih vang chauh a ni.

___________________

Hun a lo kal zel a, Lily pawh a lo haw ta. A tuk atang chuan kan chhuakdun nghal a, keini pawh kan office kan chawl leh der tawh. Kan inah ka hruai lut a, ka nu leh pate pawh a nel thiam nghal khawp mai. "Awii kan inchhungah chuan Lily hming hi a ri zing khawp mai." tiin ka nu chu a han nui huah huah a.

Lily chuan min rawn melh zeuh a, ka lo lai lek lek vel. Nitin mai chuan kan inzui leh ta a, kan hlim dun khawp mai. Thenawm khawveng te phei chuan ka bialnu amaw an lo ti leh der tawh, ka nu leh pate erawh chuan engmah an sawi lem lo. Lily bulah hian Marina-i chungchang ka sawi tam vak lova, a chhan pawh ka sawi peih loh vang a ni.

Zan khat chu ka pa chuan min titi pui a, "Lily hi i bialnu amaw tia...a ni nange?" tiin min zawt a. "Ni nang, ka thiannu alawm." tiin ka lo chhang a. "Mo thar kan nei dawn e tiin kan lo lawm ve em em a, ava ho thin e awww.." a han ti nuah nuah a. Ka nu pawh chuan, "A hmelthat kha bawih a, hna nei, hlawh nei lehnghal." a lo ti ve bawk a.

Mahse engmah ka sawi chhunzawm pui peih lo, ka la naupang emai, nupui ka la nei peih lo. Chhandama, Amosa leh Puia te nen pawh chuan kan inkawm ho leh a, chutia ka mize inthlak hlawk an hmuh chuan mak an ti ve hle tih ka hria. Chistmas a lo hnai ve zel bawk nen, kan lengchhuak ngun malh malh hlawm khawp mai.

Lily leh Kimkimi chu rin aiin an inkawm ngeih phian mai a, a lawmawm ang reng phian mai. Kimkimi pawh chuan a hmeichhiat pui kawm tur a nei ve chu a hlim ngang mai, achang chuan Lily pawh hian Kimkimi vang hian inhmuh puia ka sawm chang pawhin min hnial fo. Ka thiante pathum ve lah hian, "Nih pui rawh, Marcus..a chhe lo si." an lo ti ve chhen bawk a, a hahthlak thei ania.

_______________________

Lily pawh chuan Kimkimi chu min sawipui fo ta mai a, ka ngaih atha lo hman lek lek. Mahse sawi tak ang khan Kimkimi chu engtikah mah ka ngaizawng dawn lo, ka thiannu kha a ni maiu a. Zantin deuhthaw kan chhuak hova, kan vanglai nun chu chen ve tak kan ni. Chhandama lah hi a han rui nawi thei em em khawp a, a luck lo ber si hi.

Kan thian ho hi mipa pali leh hmeichhe pahnih kan ni a, kan single vek anih chu. Lily pawh hi bialpa chungchang ka sawi pui ve thin a, engmah a sawi tha duh ngai lo. Kimkimi min tihpui char char ringawt a, tinge maw Kimkimi pawh chu neih tura min tih sup sup hlawm mai le? Kimkimi lah chu min duh ang pawhin a awm chuang lova, engmah a sawi ngai lem lo.

Zan lamah chuan kan thian hovin kan leng a, mahse chhun lamah erawh Lily nen kan pahnih chahvin nitin kan inhmu thin thung. Inngaizawng ang maiin kan leng kual a, kan ni amaw lo ti mahse tumah ka dem lo. Ka nu leh pate hian inngaizawng se min lo ti viau aniang, ka thiante bulah an lo sawi vel.

______________________

Vawikhat chu Lily nen bawk chuan MC ah kan bazar dun a, Teddy Bear lian deuh mai chu a ngen tlat pek a. Pawisa ui ru viau chung chuan ka lei sak a, a lawm thiam khawp mai. Kan haw tur chu Amos-a kan hmu a, kan han titi leh rih a. Mahse ka hma zawna lo kal mek te chuan ka nui lai an ti tawp chat mai, ka thin a phu nghal dup dup thei.

Kum 2 chuang zet ka hmuh tawh loh, khawnge a awm tih pawh ka hriat tawh lo. Ka hmangaih thin em em leh mipat hmeichhiatna ka hmanpui hmasak ber, min tina em em tu Marina-i chu ka hmu leh ta. A bula chuan mipa pakhat a awm ve bawk a, a bialpa a ni ngei ang. Ani pawh chuan min rawn melh vung vung a, mak a tih hmel ve khawp mai.

Ka ding ngawi reng a, ka hmu thut khan min ti hrilhhai ni berin ka hria. Lily chuan ka banah ala vuan reng thova, Amosa ka va en a, a lo ner nung ringawt. Marina-i pawh chu a ding chat a, kan in en dun ta ngar ngar mai. Ahma ai chuan a lo cher deuh a, a pian pawh ahma ai daihin a nalh tawh zawk.

A sam a lo sei tawh hle bawk a, ahma aiin a lo ngo tawh bawk. Min rawn pan hnai a, Amos-a chuan a lo bia a. A awkward duh khawp mai, ka lai vek thei. Min rawn be ngei chuan ka hria a, mahse enge a sawi pawh ka lo ngaihtuah lo. Chutah ka thin a rawn rim thar thut a, Lily chu ka kuah nghet nghal sauh a.

"Kal ila.." tiin Lily chu ka nghawk zeuh va, kan kalsan ta a. Ka rilru ah chuan a rawn thar lo thei lo, ka ngaihtuah zui vawng vawng mai. Lily nen pawh chuan chumi ni chuan kan inbe ta mang lo, ka inthiam lo takzet. Ka haw chu ka roomah ka lut a, Marina-i vang chuan ka thin a rim thar ta em em mai a.

Min tihnat dan te, min phatsan dan te leh min kalsan dante chu ka ngaihtuah let a, ka haw so bawrh bawrh. Mahse chu chuan ka lo la hmangaih reng a ni tih min hriat tir leh lawi bawk si, ka va han inhaw tak em. Chaw pawh ka ei loh phah hial, ka nunah hian pawimawhna a lo la nei thuk kher mai.

______________________

Ka phone pawh ka en lo, ngawi rengin ka chhuak leh a. Tum lawk pawh awm miah lo chuan Kimkimi te inah ka leng lut tawp. Verandah ah chuan kan thu dun a, beer ka in teuh. Lily nilova Kimkimi ka hmuh zawk nachhan chu Lily aiin Marina-i nena kan chungchang min hriatpui hnem zawk a, inbunruak lawk ka duh vang mai chauh a ni.

Kimkimi hnenah chuan engkim ka hrilh a, a thiam ang tawkin min hnem a. "Ngaihtuah duh tawh suh, i thiante kan awm hi.." tiin min hnem a, ka duh aiin ka leng rei phian lehnghal. Rui deuh phelh phawlh chuan ka haw ve ta a, ka phone ka en chu Lily message leh miss call a lo awm thla tuar mai.

Ka phone nghal a, a lo mu tawh a. Inhmuh puiah ka sawm a, ala duh lo zui. Ka rui deuh tawh bawk nen, an in lam chu ka pan ta tho va. Ka duh tawkin Kimkimi bulah ka inbun ruak tawh bawk a, Lily chu ka ngai leh tawh takzet a ni. A duhlo chung chu ka sawm chhuak lui a, an garage ah chuan zanlaiah kan inhmu ru ta a.

Ngaihzawng ni miah silo, mahni thiannu a ruka inhmuh puia ka sawm vawikhatna a ni. Kan inngaih zia thute chu kan sawi dun a, kan inkuah ngawih ngawih mai. Nitin inhmu chung hian kan inngai em em zel mai chu a nih hi, a engemaw romantic riauvin ka hria. MAhse ka ngaihzawng a, ka bialnu atan ka duh nghal e ka tihna chu a ni hauh lo ania.

___________________

A tuk zingah chuan thu duhawm loh tak mai ka dawng ta, chu chu ka pa in Kimkimi nena kan inneih tur thu min hrilh kha a ni. Min rawn hmasa lova, chutia thuthlukna a lo siam ta mai chu ka ngaihndan a nilo hle a, ka thinrim hle bawk. Marina-i ka la ngaihtuah reng vanga Kimkimi nena min inneih tir a, Marina-i theihnghilh tir min tum a ni.

"Ka theihnghil em em ang, nupui neih ka la duh lo." ka tih pawh chuan ka pa chuan a thuthlukna a sawhsawn duh hauh lo, Kimkimi pa nen pawh an lo sawi dun vek tawh lehnghal. Ka lungawi lo em em a, ka room ah ka inlah hnan tlat. An rawn kik pawhin ka hawng duh lo, a tawpah phei chuan Chhandama ten an rawn kik tawh vel.

Mahse tumah ka hawn duh chuang lo, ka luhlul ve tlat. Tlai lam a lo ni leh ta a, ka insum zo tawh lo. Ka chhuak a, ka pa bulah chuan ka va ding a. "Ka nei chuang lovang, min tilui suh." ka zu ti ve ta siah siah mai. Kan han inhnial tak tak a, kan thawm pawh a ring tha khawp mai. Mahse ka rin loh lutuk maiin ka pa chuan min beng ta a nih chu, ka mittui a per sawk mai.

Ka rilru ana em em a, ka nu bulah chuan ka tap tawp. Ka pa hian kut vawikhat mah min la thlak ngai lo, mahse nupui ka neih duh loh vang ringawtin min thlak kha ana ka ti. Ka zu in pawh min man fiva, mahse kut min thlak ngai lo. A chang chuan  ahrelo der thin, mahse heivang ringawta min beng ta mai chu mak ka ti takzet.

Ka nu bulah chuan Kimkimi neih ka duh loh thu chu ka sawi a, ka dil leh ngat ngat a. Ka nu chuan ka dilna chu min pawmsak a, mahse ka pa ber hi a ni. Mahse zan a lo thleng a, Kimkimi zawk chuan min neih a duhloh thu chu Kimkimi pa chuan a rawn sawi ta hlauh mai a. Ka lawm lutuk tho nangin, ka pa chu ka la be duh hauh lo.

_______________________

Mahse hemi zan hian Kimkimi thuruk chu ka hre ta a, Kimkimi hian Marina-i ka tawn hma daih atangin min lo hmangaih reng tawh a ni. Ka khawngaih em em a, ka inthiamlo bawk. Kan inneih tur thu a lo hriat ve khan ani erawh a lo hlim em em zawk a, hrehawm ka ti khawp mai. Ka hlim famkim lo, Kimkimi hi ka khawngaih takzet a ni.

Ka nun chu a nguai leh tan ta a, pawn ka chhuak ngai leh ta meuh lo. Lily nen pawh kan inhmu zeuh zeuh ringawt a, zanah phei chuan kan inhmu ngai tawh lo hrim hrim. Chutih lai karin Kimkimi lah chu anu te khaw lamah Christmas leh kumthar hmang turin ala zin daih zui, min hrilh miah lo lenghal a, a zin tukah Puia hnen atangin ka hre ve chauh.

______________________

Ina awm reng chu ka ning ta deuh a, vawikhat chu ka chhuak harh ve ta a. Tihtur em em pawh ka nei hran lo, ka inkhalh chhuak ve ringawt. Dawr pakhatah ka lut a, Cigarette ka lei a. Ka chhuak leh tur chiah chu Marina-i nen kan inhmu thut mai, kan ding ngawi dun char char ringawt.

Thil a rawn lei ve a, eng tak nge a lei pawh ka hre leh tawh lo. Kal ta mai lo chuan pawnah chuan ka ding reng a, a rawn chhuak a. "I dam maw?" a han ti a, ka lo nui suk ringawt. "I vang hle mai." a han ti leh a, zep lo chuan ka ngai takzet a ni. "Nia..ka chhuak vak ngai lova.." tiin ka lo chhang mai a.

"Khawnge i kal a?" tiin min zawt leh a, "Aa..ka chhuak vel mai mai." ka han ti leh a. "Anih chu..." a ti zawi sap a. Kal mai chu kan tumlo ve ve, kan la ding dun reng. Chutah, "Titi lawk ang hmiang." kan ti rual a, kan nui ringawt. "Nia.." a lo ti vat a, tichuan ka bialnu hlui, ka ngaih em em leh ka huat em em ni bawk si chu kum 2 hnuah ka bike hnungah ngei chuan ka phur leh ta.

_______________

"Bike pawh ala ngai, nangmah pawh ila ngai bawk...a lunglen thlak hle mai." tiin min nuih suk a, ala hmeltha takzet. "Hehe...enge i tih thin reng reng a?" tiin ka han zawt a. "Ka nih chak ber thin designer ka ni ve tawh a, phai ah ka awm char char a. Mizoramah business start ve ka tum deuh a, tan ka la ve mek a nih hi." tiin min chhang a.

Ka bialnu hlui ni tawh mahse designer a nih chak zia kha a sawi reng thin a, chutia a nih chak ber a han ni thei chu ka lawmpui takzet tho. Sawi tur avang duh khawp mai, "I dam tha reng reng amaw?" ka han ti leh a, "Umm dam tha e...news ka lo hria a.." a han ti leh a. "Eng news maw?" ka lo ti hu mai.

"I bialnu chu a chhelo khawp mai, kei ai daihin a chhelo a nih kha.." tiin a han nui huah huah a. "Tumaw? Awihawm loh eee.." ka lo ti deuh nung a, "Aww..hmanni ami kha, MC a mi kha..i bialnu a nilo a mi?" a han tih takah chuan Lily chungchang a sawi tih ka hre ta. Ka nui a, "Lily anih kha...ka best friend anih kha.." tiin ka lo chhang a.

A han ner deuh nung a, "Aa..mipa leh hmeichhia best friend a nih theih loh hrim hrim." a lo ti deuh hmuk. "A theih aniang chu...ka thiantha ber a ni tlat alawm." tiin ka chhang a. "Inkawm zel ula...a tawpah in inngaizawng daih mai ang, ka hrilh tawp ang che." a han ti vel a, "Ka hrilh tawp ang che." tih tawngkam hi chu a uar ve khawp mai.

"Anih tak chu...kan la hria ang chu." tiin ka lo nui mai a, "Marcus, min hua em?" a han ti daih mai a. Chhan dan tur ka hrelo hman tep, "Aaa...engvangin nge ka huat ngawt ang che?" tiin ka zawt let ta tawp a. Inthiamloh hmel tak hian, "Ka tina em em che si a, min huat hluah hluah ka lo ring a." a han ti tham tiak a.

Ka han thaw deuh hak a, "Marina, i duhthlanna ania, sawitheih engmah ka nei hleinem. A hrim hrimin bialpa pawh i nei chhelo tawh khawp mai, min lo ngaizawng ve thin kha i zak rum rum hial lo maw?" ka han ti ve deuh kher a. Min melhrum nasa, "I over ea...min lo kawp a, kan inthen daih...hmanni deuh khan." a han ti a.

Keilah ka ngeiawm ka chhuah a, "Aww..alo nimaw? Tikhan a natzia chu i hrethiam ve tawh em?" ka han ti ve ta sak a. Za lo tak chuan a nui a, "Nia, a lo na khawp mai. Ka rin tehreng nen, a lo lerh em a ni. Mahse ka phu tawk chiah aniang, keipawhin ka lerhsan che a, tunah chuan ka tuar ve ta a nih hi." a han ti a, khawngaihna chhe te mah ka nei chuang lo.

Ka thinlung chuan la ngaiin a hming la lam fo thin mahse, ka rilru chuan chawh a ti ngawih ngawih. Ka chhang lova, kan ngawi dun ta reng a. Amah bawk chuan, "Kan inhmuh hmasak ber kha ila hria em?" a han ti a. "Umm...bus ah i chaung a, in inthleng ka rawn zui che kha..." tiin ka nui a.

"Kum tamtak a lo liam leh ta reng mai, bialnu dang i nei tam hman awm.." tiin min han chhaih vel a, "Nang angin ka lerh lo." ka lo ti deuh hmuk. Rei fe kan titi hnu chuan, "Anih leh Lily khan bialpa a nei em?" tiin min zawt leh a. "Ka hre nang, neih pawh ka hrelo." ka lo ti ringawt a. "Hmmph..i bestfriend a nih te chuan hriat tur alawm." a han leh a.

Lily nena kan intawn dante, kan inkawm chhoh dante leh kan inngaih zia te chu ka hrilh a. Lily chanchin anih tawh chuan ka tui thei khawp mai, ka hmangaih em em leh tun thleng pawh a ka la theihnghilh theihloh Marina-i bulah tak ngial pawh ka insum zo lo chu a nih hi. Ngaihnawm tih hmel tak hian a lo ngaithla dauh dauh a, kan inngaihzawn laia thawnthu ka hrilh thin lai te chu ka hrechhuak uar uar mai.

"Marcus, Lily hi i duh tiraw?" a rawn ti thut mai, ka tawng lai chu ka tawp chat. "Tinge min zawh a?" ka lo ti vat a. A nui leh suk a, "A hriat vek alawm, hmeichhe dang chungchang khatiang em em a i sawi nasat ka la hre ngai lo. I duh a, i hmangaih a ni...a dik em?" a han ti a, enge a chhan pawh ka hrelo, ka thinrim deuh tun ringawt.

"Engmah i hrelo, ka duh lo bawk. Thian ang chuan ka hmangaih a, mahse ngaihzawng enin ka en lo hrim hrim." ka ti deuh khur khur a. "Engmah ka hrelo amaw? Min hmangaih zia kha chu ka hre ve asin." a han ti leh a. Vin lek lek hian, "Ka hmangaih loh che...hmangaih tak tak che ni ila tun thleng hian ka la umzui ang che, tun thleng hian i bulah ka la awm reng ang." ka ti deuh hrep.

A mittui a tling teuh tih chu ka hmu thei, "Min lo hmangaih miah lo amaw?" a ti khur dar dar a. "Aw...ka duh em em che a, ka hmangaih che amaw ka lo ti mai mai a ni." ka lo ti leh deuh hmuk mai. "Umm..nia a dik ang. Kan kal tawh dawn mi niang?" a ti a, ngawi reng chuan ka ding a. Kan inphur leh ta a, an inthleng pawh ka thlah duh ta vel lo anih kha.

_____________

Kan haw pah khan Amosa kan la hmu zui a, ka hmulo der tawp. Ka rin ang ngeiin Lily bulah a lo sawi a, atukah Lily a lo leng a, min hau hrep. Mahse hemi ni hian feelings mak deuh mai ka nei tlat pek a, Lily nen khan khumah kan infiam a, tumloh deuhin kan inkiss palh ta anih kha. Ka za chhuak vek a, nuam tihna riau ka nei tlat.

Chutia mipat hmeichhiatna lam chu a ni hauh lo, mahse ka awmdan kha a danglam takzet a ni. Ka lai lutuk khan ngaihtuah lo ang deuhin ka fiam chhunzawm leh a, ani pawh khan eng teh vakah a ngai lo niin ka hria. A haw hnu pawh khan ka inngaituah a, Marina-i sawi vang kha nge ni, ka rilruah a awm reng mai.

A hmui nem zia kha, han fawh leh zeuh chu ka iai hauh lo. Mahse ka thiannu a ni a, thil thleng palh mai a ni. Chubakah mipa ka ni a, ani hmeichhia  ani a. Mipa dik takin hmeichhe chhelo zet leh pian fuh tak a hmuia a kiss a nih chuan eng ang pawhin lo inthian tha mahse, feeling engemaw tal chu a nei ve dawnlo em ni tiin ka inhnem chawp ta tawp mai a ni.

_______________

Amosa pawh hma a lo sawn ve zel a, a ex Zualtei a lo renew pui ve leh hlauh mai. Tikhan kan thian zingah single lo pakhat chu a awm ta, abak zawng erawh kan la single tluang zel e. Bialnu nei lo mah ila ka bulah Lily a awm a, ka hlim em em tho. Zualtei pawh chuan Lily nen kan lo inngaizawng emaw a ti a, kan nuih hrep phah kha.

Urlawk zan a ni a, kan hmang nuam khawp mai. Mahse keimah vanga Kimkimi a rawn tel ve thei talo erawh a pawi ka tiin ka ngai takzet, mahse aman hmundanga hman chu a duh miau bawk si. Zinglam a nih meuh chuan Chhandama leh Puia te chu an chatthla der tawh, Amosa erawh Zualtei nen an chhuak bo leh daih.

Lily chu an in thleng ka thlah a, abula awm ka la kham chuang lo. Ka tana a awm reng thin avang te, ka lunngaih changa min hnem thin avang te leh ka chaklohna hria a min fuih reng thin avangte chuan lawmthu ka hrilh a, ka zu in hnem deuh avang chuan ka la kai bur lehnghal.

"Min kiss la.." tia a rawn fiamthu chuan ka beng a verh zawk mai, a chhan chu kiss kha ka chak leh tlat pek a nih chu. Ka lo rui ve deuh tawh bawk nen, engmah sawi set sawt lovin ka han kiss leh ta  anih kha. Ka rui viau nangin engmah hrelo ka ni hauh lo, ka zurui chu puh tho mah ila, ka rilru a harhfim vek tho.

Tun tum zet zawng a nuam khawp mai, kiss nuam tak a ni. "Ti kha animai alawm.." tiin ka han nui vel a, diktak chuan min beng pawp ang tih ka hlau ru takzet. Mahse a lai lek lek a, motor atang chuan a chhuak daih. A thinrim ang tih chu ka hlau khawp mai, mahse vanneihthlak takin a thinrim lo hlauh.

_________________

A tuk zingah chuan number hriatloh atangin text ka dawng a, "Inhmu ang.." tih ringawt hi a lo ni. "Tunge aw?" tiin ka han reply nghal vat a, "Marina-i.." a rawn ti thut mai. Ka thin a phu nghal dup dup, eng tak chu duh nimaw tiin reply mai nachang pawh hrelo chuan ka inngaihtuah vung vung a.

Ka reply har em vang chuan min rawn call ta a, "Hello.." ka han ti dek dek chu, "Marcus, inhmu ang...i inkhawm bik lo tiraw? Khawngaihin inhmu lawk ang."  a rawn ti deuh chiam chiam mai a, ka ngaih a ti tha lo lek lek zawk. Lily pawh ka wish hman lo, "Awle..kan inhmu dawnnia." tiin chuti khawpa min hmu chak chu enge a duh pawh hriat a chakawm alawm.

________________

"Lily hi i hmangaih lo tak tak tiraw?" a han ti ringawt a, Lily bawk chu. "Enge i saiw duh ber chu ni a?" tiin ka lo zawt let a. "Ka zawhna che chu chhang rawh..Lily hi i bialnu a nilo tiraw?" a ti leh a, "Umm..nilo." tiin ka chhang a. Ka kutah a rawn vuan a, "Marcus, keimah bak min hmangaih lo tih ka hria a ni...khawngaihin min ngaidam la, bul tan tha leh ang." tiin min ngen ta lawm lawm mai.

Mak ka ti lutuk chuan, "Marina, ruih i nei a ni lo maw?" ka ti ringawt a. A tap a, "Aih..ka ruilo, Marcus..min ngaidam rawh..ka ngai takzet che ani, i tello chuan ka awm thei lo." a han ti leh a, pentawng luna nen chuan a inhmeh lo kher mai, ka thin  arim lek lek zawk. "Marina, enge i hriat a? Chutiang sawi a hun tawh lo lutuk..engkim a tawp vek tawh." ka lo ti deuh hlur a.

A lu a thing a, "Aih a tawp lo, a tawp tur a nilo. Ka phal lo, a tawp ka phal lo." a ti chiam chiam a, min kuah bawk a. Tih ngaihna pawh ka hre lo, "Marina...tinge hetia i awm? I rui a nih kha...va haw rawh..i duh chuan ka va thlah ang che." ka ti a, mahse a duh lo nasa mai. Tap pur chung chuan, "Ka rui lo, ka rui hlawl lo. Marcus Hmingthanzual, keihian ka la hmangaih che a ni." a ti vak vak mai.

Chutah zet zawng ka thinrim ve ta, "Kha thu kha sawi tawh suh...tun thleng thleng a dawt min hrilh hi a ngai tawh lo. Ka hrilh ang che...kan inkar hi a tawp tawh a, a titawptu pawh nangmah i ni. Nang hian min hmangaih lo, chuan keipawh hian ka hmangaih tawh biklo che. Nilo..chupawh a nilo, ka hmangaih lo hrim hrim che." tiin ka vin hrep a.

Kal ka tum chiah chu, "Nimin tlaiah Lily te inah ka kal a, ka la hmangaih thu che hi ka va hrilh a ni." a rawn ti thut mai a, ka ding nghal chat. Rang takin ka hawi let a, "Engmaw i sawi a? Lily te inah i kal amaw?" ka thinrim lutuk chu ka tawt up up mai. "Aw...nangmah hi min pe let turin ka va dil a ni." a la ti ta deuh deuh.

Mipa chu nise ka hnek nasa tawh ngawt ang, ka luna pawh a reh vek thei. "Mawli, engvangin nge Lily chu iva dil a? Lily saw ka nu a ni em ni? Ka pa a ni em ni? Min siamtu ami? Enge a ni kher i va dil a? Min va ti mualpho ve, min tih mualpho zel ila tum em ni? Eng ang mihring nge i nih a?" tiin ka au chel chul tawh mai, ka insum zo tawh ngang lo a ni.

A aia vin hian, "Achhan chu saw nu Lily, i thiannu thar sawn a duh che in a hmangaih takzet che a ni. Chutiang chiah chuan nangpawh hian i duh ve reng a ni, chuvang chuan a rilru a nat loh nan tiin ka va dil a ni." a la ti ta deuh deuh, ka kut ka hum ruh nasa tawh ngang mai. "Ka bialnu a nilo...ka hmangaih lo." ka han ti leh khur khur a.

"Ni e, i bialnu a nilo. Mahse a ni thuai ang, chu chu ka tuar ngam lo ani." tiin ka hmaah chuan a thingthi ta mai a, "Marcus, min ngaidam hram rawh. Ka la hmangaih reng che a ni, min kalsan lo hram rawh." tiin min ngen leh ta a. Thaw ava ipik tak em, he mihringnu zet hi chuan min tibuai hneh ve chiang a ni.

"Anka nem chu tawk rawh se.." tia han kalsan hmak chu duh viau mah ila, ka ti ta lem lo. Ka kai tho a, "Marina, min ngaidam rawh. Ka ring tawhlo che a ni...min hrethiam dawnnia." zaidam tak chuan ka ti a, ka kalsan ta a. Mahse min ko zui lem lo, a tap char char tih erawh ka hre thei.

Khawngaih viau mah ila ahma khan ani pawhin min khawngaih bik lova, chuvang chuan ka hnem dawn bik lo reng reng. Ka ring tawh lo reng bawk a, mahse ka thinlung hi chuan ala ngai a ni tih chu zep rual a nilo. A hrim hrimin engtin nge Lily te in pawh chu a lo hriat ve reng reng ni, Lal Amosa hian a lo hrilh lehpek aniang.

_________________

Lily te inah chuan ka leng tlang nghal a, kan inthlah laia ka kiss te chu ka han hrelo der vel a. "Ka lo rui ve tawh bawk sia, ka dang phal bik lo che a nih kha.." tia min chhan lai te khan ka lai lutuk kha a mitah pawh ka en ngam lo, mahse ka hrelo der tlat. Marina-i chu ka sawi chhuak ta a, ngaihdam ka dil bawk a, ala thinrim em em zui.

Mahse hemi ni hian khawvela ka thil duh loh ber mai a thleng ta, ka pa chuan rinloh tak maiin min boral san thut mai. Ka na ngawih ngawih a, ka kehchhe vek a ni ber mai. MArina-i'n min kalsan laia ka nat te kha chu nep te a ni, tunah chuan ka nu nen chauh kan awm ta. Mahse Lily chu ka bul hnaiah a awm reng a, min kalsan ngai lo.

Kan inah a lo riak lova, chuzawng chu a nimai. Zing atangin min awmpui a, zanah a lo kal bawk a. Chuti khawpa min ngaihtuahtu Lily chu a ni telin ka hmu tha tual tual mai a, ka ngaizawng deuh reuh tlat hian ka hre hial. Duh chu ni ila kan chesual zing khawp ang, mahse ka thiannu ve ngawih ngawih kha a ni miau bawk si.

A bulah chuan ka duhtawkin ka tap ngam a, duat takin a thiam ang tawkin min lo hnem thin. Lawmthu sawisen loh tak meuh meuh ka ba a ni, ka dam chhung pawh hian ka rulh let zawh ka ringlo. Ka bula a awmloh hlek chuan ka ngaih nghal em em zel a, damlo awmpuitu ang maiin engkim min ngaihtuah sak vek thin.

______________

Kumhlui thlah zan pawh kan pahnih chauhvin kan hmang a, kan lengchhuak em em hran lo. Mahse kumdang aia a nawmlohna a awm chuang lo, ka bulah Lily a awm tlat. Amah nen chuan khawi hmunah pawh awmdun ila, a mipa zawk ni si hi ka thla a muang veng veng zel. Kan biangah chuan kan in chuks fo a, mahse hmuiah kher chuan kan in chuks leh ta miah lo thung.

Ka nu ka khawngaih em em a, nitin mai chuan a tap kerh kerh reng a. Mahse ka nu chuan keimah ber hi min khawngaih let ve leh chhawng zawk, chuvang chuan Lily bulah pawh hian a theih anga tam ka bula awm turin a hrilh thin tih pawh ka hria. Ka pa nen khan khatia kan inhauh hrep hnu khan kan la inbe leh ta miah lova, chu chuan min ti na zual a ni.

_______________

Zan khat chu Lily chuan min vah harh pui a, veng hrang hrangah kal in veng chei te chu kan en dun a. Keipawh tlem chuan ka thawl ve ta deuh, ka rilru hahna leh ka tawt up up te pawh chu a zia chho ve zel a. Kawngsira thutthlenga kan thutdun lai chuan Marina-i bawk chu kan hmu leh ta, Rintei te nen an lo la kal ho zui.

Ka hmulo der a, mahse min rawn pan tho. "Inbe lawk ang." ala rawn ti ta deuh deuh a. Mahse ka lo hnal a, Lily chu ka bialnu angin ka sawi bawk. Khami zan khan Marina-i khan damdawi a rui tih chiang takin ka sawi ngam, a mit pawh a sen chur mai. Chungte hlei hlei chuan ka rilru a tina ngawih ngawih a, mahse ka ngaihsak lo lui tlat.

Kan haw hnuah pawh chuan Lily bulah ka bialnu anga ka sawi avangte chuan ngaihdam ka dil a, mahse a lawm vak hmeloh kher mai. Ka rilru na pawh a ziaawm dawn chauh va, ka mood a fuhloh phah leh vek tawh. Loh theih lovin Lily pawh ka thlah haw leh angai ta a, abula awm chu ka la kham lo takzet a ni.

_______________

Atukah chuan kan chhuak dun leh a, tun tum chu hmangaihna lam kan sawi ve ta tlat mai. Mahse mak tak maiin a thinrim thut a, Marina-i chungchang ka sawichhuak miah lo chung chuan Marina-i vang chuan min vin ta hrep mai. Restaurant a kan chawlh lai a ni a, chawl ve midang ho chuan min rawn en sup sup lehnghal.

Ka zak angreng hle a, ka thin a rim lek lek bawk. Mahse zaidam tak chuan ka be zel a, a thin lah chu a rim tulh tulh thung. Atawpah phei chuan pawnah a chhuak daih a, ka zak lutuk chu ka khur hial thei. Min en hru hlawm lehnghal a, Lily lah chu a tap titih bawk si. A ngaihna hrelo zet chuan kan thil eiman chu cashier hnenah ka va pe a, ka chhuak ve ta a.

Ka lungawi bik miahlo, chhan awm miah lovin tikhan a thinrim vak ringawt kha ka lawm lo. Mahse min thlamuantu, min hnemtu leh min awmpuitu ka neihchhun tak meuh, ka ngaih em em ka thiannu Lily kha a ni maiu a, ka thinrim duh hauh lo. Ka tihsual engmah hrelo mah ila ngaihdam ka dil a, kan inkuah a, min ngaidam ve ta mai ni turah ka ngai tawp.

_______________

Tlai a kan haw hnu chuan ka call a, mahse a la thei miah lo. Message tam tak ka thawn teuh bawk a, engmah a tlang thei lo. A reh hmak mai chu mak ka ti em em a, ka ngaih atha lo takzet. Zan a lo thleng a, mahse a la reh hmak mai bawk si. Ka nghah vang vang hnu chuan ka insum thei tawh lo, ka ngai bawk si chu an in lamah chuan ka va kal ta tawp a.

Kawngka ka han kik chu apa chuan a lo hawng a, "Ehe..nangmaw? Lo leng rawh..." tiin min sawm lut a. "Pa Hruai, khawnge Lily?" tiin ka han zawt a, "A roomah a awm ang, ka'n ko ange." tiin a ko ta a. Lily'in min hmu chu mak a tih hmel hle mai, mahse ka lung a awi chiah lo thung. A buai chuang tawp silova, reh vung vung tho bawk si.

Apa chu a leng daih a, tichuan inah chuan kan pahnih chauh chuan kan awm ta a. Chumi zan atang chuan an ina len chu ka ching chho ta hle a. Chhun lamah kan inah kan awmdun a, achang leh kan chhuak dun a. Zan lamah erawh ka leng phei ve thung a, apa lah chu ka len apiang hian a chhuak ziah lehnghal.

____________

Bangalore lama a hna a chhunzawm hun a lo hnai leh ta a, ka ngai lawk nghal em em a. A theih anga tam kan inhmu a, mahse ka kham ngai chuang lo. Kal lo mai se ka ti em em a, mahse a kal angai bawk si. Zankhat chu ka leng leh a, a ngai te bawk chuan apa chu a chhuak leh daih mai.

Eng enge maw sawia kan titi hrep hnu chuan a thinrim leh tan ta a, chutah a tap leh titih ta nghal mai. Marina-i chungchang bawk chu a rawn sawi chhuak leh a, a aw key pawh a ring takzet. Chutah Marina-i nena sex kan lo hman fo tawh thute chu a rawn sawi chhuak ta mai a, mak ka ti takzet.

Marina-i chuan Lily bulah kan thuruk engkim a lo sawi chhuak vek tih leh kan lo chetsual fo thin thute chu a lo hrilh vek tih ka hre leh ta a, ka thin a rim kher mai. Tichuan hemi zan hian ka thiannu, ka hmangaih em em, a tellova ka awm theih loh Lily Zothanpuii chuan min hmangaih thu chu min hrilh ta a, chhanlet dan tur ka hrelo.

Ka hmangaih velo anilo, ka duh lo pawh a nilo. Ka duh takzet a, ka hmangaih em em bawk. Mahse kan inthianthatna chu a chhe ve mai ang tih ka hlau a, Marina-i ang khan min kalsan ve mai ang tih ka hlau a ni. Achhan chu Marina-i khan kan inngaihzawn hma kha chuan min kalsan ngai lova, kan inkawm nasa hle thin.

Mahse kan inngaizawng chiah a, midang lakah min phatsan leh ta mai si a. Khatiang khan Lily hian min kalsan ve leh si se, ka na dawn lutuk. Thian kan ni thei ngai tawh dawn bawk silo, a bula mipa awm apiang chu apa thleng pawhin ka thik hlur tawh mai dawn si a. Ni e, Lily nen hian inngaizawng chiah ila chu Marina-i aimah khan ka hmangaih zawk ngei ang.

Mahse thian nih zel ka duh zawk thu chu ka hrilh ta a, a lungawilo kher mai. "Chhuak rawh.." tiin kawngka thleng chuan min nam chhuak rawk rawk a, ka zawi vek thei hialin ka hria. Tah chu ka tap hauh lo, mahse dan rual lohvin ka mittui erawh a sur zung zung mai. Phur fahran lo tak chuan ka haw ta a, aww..ava hrehawm lehzel em.

___________________

Atuk ah pawh chuan nilengin ka be theilo leh a, an inlama va pan tawp erawh ka ngam chiah bik der silo. Ka ngai em em a, message lah engmah a seen thei bawk silo. Min block amawni aw te ka ti hman hial a, ka call lahin switch off a inti zel bawk si. Mahse ka call chu lo chhang ta pawh nise, enge ka sawi ang tih pawh chu ka hre chuang lo.

Ka duh ber chu abula awm a ni tawp mai, abak duh ka nei lo. Lily hian min lo hmangaih reng mai chu mak ka ti em em a, Marina-i chungchang vanga a lo thinrimna chhan te pawh kha ka hrethiam chiah a ni. Tikhawpa min duat a, min buaipui thin laite khan ka lo hrethiam ngai lova, tiang em em a min lo hmangaih hi ka ring pha ngai lo.

__________________

A tukah chuan call ka dawng a, Amosa a lo ni. "Bawiha, Lily kha tinge i thlah loh?" a rawn ti ta mai. "Enga? Khawiah? A kal tawh dawn mi?" ka lo ti nghal chel chul mai a. "Ehee...vawiin ah a kal a, ka thlah hman biklo. Kalkawngah kan inhmu zuai a, min hrilh chauh alawm." a rawn ti leh ta mai a, ka zuang tho nghal zawk mai.

"A rei tawh em? Tunah an thlawk chhuak tawh angem?" tiin ka han zawt leh a. "Ka hrelo, ka hmuhna chu darkar 1 vel lai aliam leh tawh ang." a rawn ti leh a, phone chu ka dah nghal. Rang takin ka insiam sawk sawk a, ka bike la chhuakin Lengpui Airport lam chu ka pan nghal vang vang a.

Ka tlan chak lutuk ngai lemlo, mahse hemi ni tluka ka tlan chak kha ka la hrelo. Ka tlu tep tep thin tihpawh ka hria, mahse Lily chu ka nan hmanloh ka hlau em a ni. Airport chu ka thleng a, ka han zawng ta tak tak mai a. Mipui an tam bawk nen, Lily hmel reng reng ka hmu lo. Passenger ho kal khawmna ah lah security an awm bawk si, ka mangang takzet.

Mahse Lily chu va hmu pawh ni ila, enge ka sawi chuan ang? "Keipawn ka hmangaih che." pawh va ti ringawt mah ila, a tlai zo tawh vek dawn bawk si. Ka kal chhan ni ta ber zawk chu vawikhat chiah  ahmel hmuh leh hrim hrim kha ka duh a ni, sawitur engmah ka hre chuang lo.

Ka thlan a tla buah buah tawh a, ka kawr hma pawh a huh vek tawh. Atawpah chuan ka hmu ta a, check gate lam a lo pan dawn chiah a ni. Ka va tlan vat a, "Lily.." ka va ti ringawt a. Min hmu chu mak a tih hmel kher mai, "Marcus, enge hetah ilo tih a?" a lo ti hu mai a. Sawitur engmah ka hre leh chuang lo, ka thaw hlawp hlawp ringawt.

"Min hrilh miah lohvin kal i tum amaw?" ka han ti leh ringawt a, a kal mai tur chu ka phal ngang lo a ni. Mahse loh theih lohvin min kalsan tho chu a ngai si a, a kal liam thleng chuan ka en zui vawng vawng a. Ka mal leh ta ngawih ngawih mai, ka mittui a tla a, muang chang chuan ka let leh ta a.

___________________

A number a thlak a ni ngei ang, biak theihna engmah ka nei tawh lo. Lily chuan min kalsan ta tak tak a ni tih ka hria, ka nun chu a ruak vek tawh. Ka pa boral avanga ka natna pawh a la reh lo, Marina-i vanga ka natna pawh ala reh lo, mahse tunah chuan min hnemtu ber Lily pawhin min kalsan ve ta.

Mahse tu thiamloh mah a nilo, keima thiamloh vek a ni. Min hmangaih em em lai khan kei erawh Marina-i ngaiin ka lo tap vel a, ka va han inchhir tak em. Ka rilru ana em em a, zu ka in leh phah ta a. Zantin mai chu ka in a, ka nu pawh a mangang thei hle. Ka cher chak em em a, chaw ka eiduh ngai lo.

Zu leh sehmeh chu ka chaw a ni ta ber mai a, ka pum lah ana zing em em mai lehnghal. Ka khua a har em em a, Lily ka ngai takzet a ni. Mak deuh mai chu Lily-i'n min kalsan atang khan Marina-i chu ka ngaihtuah leh tawh mang lo hrim hrim, ka rilru ah chuan Lily chiah a leng a ni ber mai.

Biak duh viau mah ila, biak theihna engmah ka nei silo. FB a khawih tawh silo, instagram ah lah min block daih amawni, ka zawng hmu zo tawh hauh lo. A number thar ka nei ve bawk silo, ka thiante zingah pawh tuman an nei bawk silo. Zantin mai chu Lily ngaiin ka tap ka tap ta mai a, ka nun chu ka ning ngawih ngawih.

_________________

Zan khat phei chu ka rui lungpuam chuan inthah ka tum pek alawm mawle, zu ka in teuh a, tichuan intihlum tur chuan ka han chhuak ve ta rawih a nih kha. Kawng chung lamah ka kal a, ka zuanthlakna tur kawng hnuai lam chu ka han en a, ka lu a hai vel. Rui viau mah ila han tih dawn tak tak chuan ka ngam leh lo deuh a, zu bawk chu ka han in leh a.

Footpath ah chuan ka han lawn kang a, hnuailam chu ka han melh leh vang vang a. Thli a thaw vuk vuk a, ka maimitchhing tawp. Mahse ka ngam ta ngang lo, zu in leh dawn pawh ni ila ka nei tawh lo. Luna bur leh kai em em chung si chuan ka haw leh ta nulh nulh mai a, bike ka la kenglo khanglang zui a, kein ka han haw ta tauh tauh a nih kha.

Inti hlum tura chhuak ve siah chuan ka rin aiin ka haw leh hma khawp mai, ka inngaihtuah a, ka zak angreng hle bawk. Kan in thlen hma deuh chuan inngaizawng pakhat lo inhau chu ka hmu a, an thawm a ring kher mai. Zan a rei tawh bawk nen, thenawm khawvengte an ti harh mai ang tihte chu ka lo hlauhpui zawk.

An inhau nasa khawp mai, atawpah phei chuan mipa zawk chuan a beng vel. Chutia mipa zawkina hmeichhia kut a thlak chu ka lo sa zak mai, ka hmelhriat te chu ni hauh lo mahse chu tlangval han zilh deuh hlak tur chuan ka lo kai phur tawh bawk nen, ka va pan phei ta a. Hmeichhia chu a tap a, mipa zawk lah chuan a la nam vak vak zui.

Chunu chuan min hmuh veleh min rawn kuah a, "Min chhan rawh.." tiin ka kawrah chuan a pawt ta tlat a. Chutah a bialpa chuan hmuhsit hmel zet hian, "Khamaww...i lerh zia kha..mipa hmelhriat miahloh pawh ilo kuah chawt thei ania..thianpa min lo hrethiam dawnnia." tiin min han nui vel a.

Ka tawng hma bawk chuan chunu chuan, "I zak em? Ka hmelhriat anih hi aw...ka bialpa ka sawi ka sawi chu amah hi a nih hi.." a ti ta mai a, keimah zawk chuan, "Maw?" ka lo ti hu mai. Ka kawngah chuan a sik vak a, min signal ani tih ka hrethiam nghal. A bialpa chu a thinrim kher mai, "Sangte...lo kal rawh..ka thin i ti rim ange.." tiin a han vau pung pung a.

Chutah ka inla changtupa ve tan ta, ka kut chu ka han elh ri vel tuar tuar a. Rum zeta melh pah chuan, "Hey...a sawi kha i hrelo ami? Kal rawh..ka bialnu a nih hi.." ka han ti ve ta sak sak mai a, rui lo ila chu ka ti ngam bik kher lo maithei. Mahse min ngam chiah lo aniang, a tap tep ringawt.

Min kawh pah hian, "Ila hre viau ang." tiin a kal nal nal a, ka nuih aza angreng. A kal liam chiah chu chunu chuan min thlah nghal a, "Thianpa, ka tihpalh lutuk aw.." tiin ngaihdam min dil nghal a. "Apawi love...ka khawihna che em?" tiin ka han zawt a, "Umm..zeplo chuan kut min thlak nasa lutuk a.." a ti a, a inhnit feih feih a.

Hmeichhe khal tak a ni a, a hmel lah chu a tha reuh phian. "Marcus-a ka nia.." tiin ka han chibai a, "Sangtei ka nia...ka lawm e aw.." a han ti a, a nui mawi reuh khawp mai. "I bialpa em ni?" tiin ka zawt leh a. "Umm..damdawi  a heh lutuk a, hmeichhe dang min kawpsan reng bawk a. Ka hrechhuak zel sia, atawpah chuan then ka duh ta a. Mahse min vau reng a, kut min thlak vak vak zel a..." a han ti a, a tap deuh pur lehnghal.

"Ava zia lo ve aw.." tih ringawt chuan ka lo chhang a. "Thianpa, pawi i tih loh chuan kan in thleng min thlah thei angem? Kha pa khan min lo la chang reng ang tih ka hlau, ka pa phei chuan min rawn call nasa tawh lutuk." a han ti leh a. Keipawh chuan ka lo remti ve a, tichuan ke chuan ka thlah ta a.

_________________

"Bialpa thar pawh ka nei tak tak lo, ka sawi ve mai mai a nih kha. Chuan khatia ka bialpa thar anga ka sawi che pawh khan i lakah ka inthlahrung lutuk tho, mahse kut min thlak leh mai ang tih ka hlau si a, ka haw a phal bawk silova, tikhan ka ti ta tawp a ni." tiin a inthlahrun hmel em em a.

"Apawi reng reng lo....a hun takah ka lo thleng a nih chu.." tiin ka han nui vel a. "Anih nang, engti tura chhuak nge i nih reng reng a?" tiin min han zawt ve a. Keilah chuan ngaihtuah chiang mang hlei lo chuan, "Inthat turin.." ka han ti ringawt a nih kha. A ding chat a, "Engmaw?" a ti hu mai.

Ka nui huk a, "Tak tak ana, ka rilru mangang lutuk in tih thawven nan tiin ka chhuak mai mai." ka han ti leh a. "Enge i chungah thleng a?" tiin min zawt a. "I ngaithla peih lovang." ka lo ti a. Kawngsira thutthleng ah chuan min pawt thu a, "Ka pa chuan min vaw dawn tawh tho tho, tlai law law ang. Han sawi teh...hmagaihna vang em ni?" a han ti leh a.

"Um ni e...i ngaithla peih takzet ang maw?" ka han ti leh a. "Sawi rawh...min chhan bawk sia, ka ngaihthlak sak ang che." tiin a nui var var a. Tichuan Marina-i nena kan chungchang te, Lily nena kan inkawm chhoh dante leh ka pa boral tawh thute...ka chanchin engkim chu ka hmelhriat miahloh hnenah chuan ka hrilh ta vek a, Lily-i'n min kalsan dan thleng chuan ka hrilh ta a.

A ngawi vang vang a, "Marcus, Lily chu i hmangaih ve a nih chu.." a ti ringawt a. "Aaa..nia, mahse kan inthianthatna a chhe mai ang tih ka hlau a.." ka han ti a. Sangtei chuan, "I mawl lutuk...chu tluka hmangaihtu che chu i tawng leh tawh lo maithei ania...i hmangaih thu chu hrilh rawh." a ti leh a.

"Mahse, a phone number pawh ka nei tawh lo. Min be duh tawh bawk silo, Bangalore ah a awm daih bawk si." ka han ti nuah nuah a. "Hmmphh..chutiang lek. Tihdan dap mai rawh, mipa i nih kha. I hmangaih thu hrilh ngei ngei ang che, USA ah a awm hleinem, khulai Bangalore mai ah khuan alawm a awm, in intawnna ah ngei khan. A tul chuan i zu pan mai tur a ni, min tiam rawh.." tiin a kut chu a rawn dawh a.

Sangtei thil sawi avang chuan ka harh kawk mai, "Awle..ka hrilh ngei ngei ang." tiin ka chibai a, kan inthlah liam ta a ni. Inthah tuma chhuak kha ka nia, Lily ka hmangaih thu hrilh turin ka haw leh chu ania. Ni e, Lily hi keipawhin ka hmangaih ve tho a, inhmangaih ve ve kan ni a, engvang teh lulin nge kan inngaihzawn loh tehlul ang ni?

Chu nula Sangtei ka tawng hlauh chu ka vannei letling ta hle mai, mahse ka huphurh deuh tho. Hna kan la tan ve lo bawk a, Bangalore lama ka liam thlak leh ngei chu a ngai dawn ta. Engpawh thleng se, engpawh tawk dawn ila, min chhanglet lovin midang lo nei tawh pawh nise, Lily chu ka hmangaih thu tal chu ka hrilh ve dawn hi a ni tawp  mai.

____________________________

Ka nu bulah pawh chuan ka hmangaih ber chu tudang nilovin Lily ngei mai chu a ni tih ka hrilh ve ta a, ani pawhin min lo lawmpui khawp mai. Lily hmu tur leh ka hmangaih thu hrilh tura Bangalore-a kal chu ka dil nghal bawk a, a lo phal ve mai bawk. Tichuan ka thian dangte pawh chu ka hrilh kual a, min lawmpui hlawm khawp mai.

Ticket pawh ka book fel vek tawh, zan khat chu Lily ka ngai bawk si, ka hmu chak tawh bawk si chu ka tih tur hrelo ka lengchhuak mai mai a. Ka haw dawn tep ah chuan waiting shed-a amah chauhva Marina-i lo thu chu ka va hmu a, a hlim loh hmel kher mai. Ka va pan a, "I va mal ve a?" ka va ti a.

Min hmu chu mak a tih hmel hle mai, "Nang maw?" a lo ti hu mai. "Ka lo thu ve thei angem?" ka han ti a, a lu a lo bu nghat a. "Enge i tih a?" tiin ka han zawt a. A nui suk a, "Ka lung a leng lutuk a, ka tei chhuak mai mai." tiin min chhang a. "Tunge i ngaih a?" ka han ti leh hram a. "Ngaih em em pawh ka neilo, ka lung a leng ve tawp." a lo ti leh ringawt a.

Kan ngawi dun vang vang a, "I sawi dik e.." ka han ti a. "Engmaw?" a lo ti vat a. "Marina, i sawi ang ngeiin Lily chu ka lo hmangaih tak tak a ni." ka han ti leh a. A nui a, "Min theihnghilh thei tawh dawn tihna em ni?" a han ti a. "Ka hrelo, mahse Lily chu tunah ka bulah a awm ve silova." ka lo ti a.

"Marcus, engtiang chiahin nge i hmangaih?" tiin min zawt a. "Ka sawithiam lo Marina, ka thinlung zawng zawngin ka hmangaih a ni. Ka rilru ah a awm reng a, ka ngai em em bawk. Vana arsi te zingah khian tel ve ta ila, Lily tan chauh ka eng thin ang. Ka nunna hi tawp dawn pawh nise, Lily chu ka hmangaih reng thovang. Chutiang khawp chuan, chutiang khawp chuan ka hmangaih a ni, MArina.." tiin ka tawngkam thiam ang ang chu ka han chham ve a.

A mittui a tla a, "Tihpalh aw, Marucs. Ka tina che a, ka phatsan che a, Lily bulah pawh thil tullo tak tak ka sawi a. I duh chuan min sawisa la, kut min thlak rawh. Ka haw lovang, haw thei pawh ka nilo. Keimah vang vek a ni, min ngaidam hram ang che. I nuna inrawlh tawh miah lo tur ka ni tih ka hria, mahse ka la tihbuai reng che avangin min ngaidam dawnnia." tiin a tap a.

Za lo deuh chuan ka nui a, "Umm...ngaihdam nghal i ni e." ka lo ti a. "Min theihnghilh angem?" a han ti leh a. "Ka theihnghilh kher lo che anga, mahse ka hre reng tawh ang che." tiin ka lo chhang a. "Marcus, hei hi kan inhmuh tawpna tur ni tawh rawh se aw...ka ngai ngawt ang che." a ti a, ka khawngaih ve lek lek.

"Keipawn ka ngai ngawt ang che, hlim reng ang che aw.." ka lo ti ve a. "Mahse Lily chu engtin nge i hmuh tak ang, i hmangaih ve a ni tih pawh ala hre ve awm silova." a han ti leh a. "Ka kal dawn...ka kal dawn alawm. Ka hmangaih a ni tih hi ka hrilh dawn....a hmaichhanah ngei." ka lo ti a.

Ka kutah a vuan a, "Ka lawmpui lutuk che u, hlim reng ang che u aw...chuan Lily pawh ngaihdam min lo dilsak dawnnia, duhsakna ka hlan a che u." a ti a. Min tinatu, ka thinlung hliam tu, min phatsantu, ka hmangaih em em ni thin Marina-i chu a tawp a tawpah chuan ka kalsan tak tak dawn ta, "Marina, kan intawng hi ka inchhir hauh lo, thil tam tak min zirtir a ni. Ka lawm e, ka lawm lutuk ania." ka ti a, ka hnuk a ulh ve lek lek.

"A tawp nan vawikhat chiah kan inkuah thei angem?" a han ti leh a, a nui hmel chu ala mawi reng tho mai. Kan inkuah a, a tap zawih zawih a, keipawh chu ka mittui a tla ve nual mai. "Mangtha le...Marcus.." tiin min kalsan ta a, a ngaihawm ve reuh dawn hle mai. A kal liam thleng chuan ka en a, keipawh chu ka haw ve ta a.

________________________

Lily te thawhna a an Manager chu ka hmelhriat a lo ni reng mai tihte chu ka hre leh zel a, a va han fuh dawn em. Zam rilru tak chung si chuan ka kal ve ta a, an Manager te inah chuan ka thleng nghal bawk a. A hanthawkte zinga mi, mizo nula Lily Zothanpuii chu ka hmangaih thute, ka hmuh duh thute chu ka hrilh ta vek a.

Ani lah chu a lo phur lutuk, Lily chu a taimak zia leh a fel zia te chu sawiin a fak chiam mai a. Plan kan siam dun ta a, a birthday a lo hnai tawh bawk nen. A birhthday ah ngei mai chuan mi zawng zawng hmaa propose tur chuan min hrilh a, vairam a ni tho, ka zak lem lo. A birthday ni ah chuan an Manager Verma-a office ah chuan ka awm nileng thak a, ka tihdan tur te ka lo zir lawk vel.

Lily hnathawh puite pawh chuan an hre lawk vek a, Lily chiahin a hrelo. Ka han bem dan vel kha chu in hre vek tho, sawi kher tawh lo mai ang. Ama birthday pawh a hrelo chu ania, ka bialnu thar tur ve hi...mahse ka hmangaih tho. Khami zana min hmangaih thu a sawi a, kan infawh khan vanrama awm ang maiin ka inhre hial.

___________________________

Lily nen chuan kan awmdun leh ta, khawvel hi a famkim hi a ni tawp mai. A off-day a lo ni leh kher bawk nen, nileng mai chuan kan lengdun a. Mahse chetsual pui erawh ka tum hauh lo, thianghlim taka nupuia neih ka duh a ni. Awm rei thei ka ni bawk silo nen, hna kan kal ve leh tawh bawk si.

Ka haw san leh ta a, ka va ngai leh dawn tak em. Tunah chuan inngaizawng kan ni ta, bialnu thar ka nei leh ta. Hmangaih ber ngaihzawn chu a lo nuam takzet, kan innei dawn lehnghal. Rinawm takin ka lo nghak a, rinawm fia fia tak ka ni. Thla tam tak ka lo nghah chhung khan hmeichhia tumah ka be ngailo, ka hnathawhpuite leh ka nu a nimai.

Lily, ka nupui hual pawh chu a lo haw ve ta. Kan inneih tur thute chu a lar nghal hle a, ka thiante pawhin min lawmpui takzet bawk. Ka phur lutuk chuan pawisa pawh ka renlo hle mai, Lily mo kawr pawh kan hawh lo, a leiin kan lei. "Engatan nge kan tih leh vak chuan anga?" a ti nung nung a, mahse ka leisak tho.

Mo neitu thiana tan chu Chhandama, Amosa leh Puia te chuan an han inchuh ngei bawk a, atawpah chuan Amosa chu an hnial hneh ta lo a ni. Keichuan han thlan bik vak tur ka hrelo, Amosa hmel hi a zia ve ber a, ka lawm tho ve. Mahse ka zah deuh leh ka lungawiloh deuh chu Lily pa, ka puzawn nimai tur Pa Hruia'n misual ang maia zawhna min han zawt vel khur khur kha  a ni.

_________________________

Nitin mai chuan kan la inhmu tho a, kan inkham hleithei lo chu a ni ber e. Lily nen hian kan inkawm tirh atang khan SAYANG tih in kan inko thin a, a awmzia chu DUHTAK tihna a ni. Hetia ka koh kher nachhan hi chu hote mai ania, Marina-i vanga ka nat lai khan Indonesian movie pakhat SAYANG tih chu ka en fuh a, a changtunu leh changtupa te kha Sayang tih hlirin an inko a, mawi ka tih em vang mai mai a ni.

Lily chuan a thian atan Rosy a hman tur thu min hrilh a, Amosa han lawm zia chu. Rosy hi Lily aiin tlemin a hniam deuh hret a, mahse hmeichhe sang tak chu a ni ve tho mai. Lily nen erawh kan inchen deuh thuak a, chhe te bakin ka sang biklo. Pheikhawh sang a bun phei chua kan inchen chiah chiah zel, mahse ka ti lehpek thin ang, ka hmangaih tho.

_______________________

Zan khat chu leng turin min sawm a, ka va leng ta a. Pawnah chuan kan thudun a, kan titi a. Reife kan inkawm hnu chuan a tho thut a, "Thil hmuh tir tur che ka nei a, lo nghak lawk rawh aw." a ti ringawt a. "Engthil maw?" ka lo ti vat a. "A rei lovang, minute 10 vel." a ti a, inchhungah chuan a lut daih.

Minute 10 chu a liam a, alo la chhuak lo. Ka phone lah chuan, "Ka hman tep, lo la haw suh." a ti zel bawk si, darkar chanve vel lai a liam leh tawh. Ka lungawilo hman lek lek, haw ka tum chu ka tho a. Hnunglam atang chuan, "SAYANG.." a rawn ti chuai raih mai. Ka va hawi phei a, awww..hetiang em em a hmeichhe hmeltha hi he khawvelah hian an lo awm thei a nimaw ka ti rum rum hial.

Ka nupui hual, ka hmangaih em em Lily chu ka mo kawr leisak nen ngei mai chuan ka hma zawnah chuan a lo ding a. VAntirhkoh hian thla nei lo se, chutiang vel chu a ni. A hmui sen hlarh mai te chuan a nui hmel chu a ti mawi zual em em a, a diar chhan atanga a rawn meng te chuan min khawih zawk hian ka hria.

Ka hmaah chuan a lo kal hnai a, "Enge ka an?" a han ti a. "Bawihte...i mawi lutuk.." tiin ka lo kuah nghal, abak sawi tur ka hre lo. "Ka lawm takzet, kan innei tur hi ka lawm...Lily, ka hmangaih che." ka ti a. "Keipawn ka hamngaih che, MArcus." tiin min lo kuah let a, inthlahlel tak chuan kan inkuah vawng vawng mai.

_________________________

Inneih ni pawh a lo hnai tial tial a, han inhmuh reng pawh a nuam chiah lo. Vawikhat chu inah keimahin ka awm a, ka nu erawh a leng thung. Kawngka chu a rawn inkik dat dat a, Lily a nih ngei ringin ka va hawng a. Mahse a lo ni hauh lo, chawhmeh zuar daih a lo ni. Tlem azawng chu ka han leisak thova, tichuan a kal leh ta a.

Minute 10 hnu velah chuan a rawn inkik leh a, phur lo tak chuan ka va hawng a. "Lo leng ...." tih chiah ka sawi hman, ka tawp chat mai. Ka hmaa hmeichhe ding chu ka en vung vung a, amah pawh chuan min lo en a. Ka nupui ni hman tep, ka thian tha tak, a ruka min lo hmangaih thin em em tu Kimkimi, Lallawmkimi a lo ni reng mai.

Rei fe chu inbelo chuan kan awm char char a, "Min luh tir dawn lo em ni?" a han ti a. Ka harh zawk mai, "E aw..lo lut rawh." ka ti bah deuh nuai a. Diktak chuan ka hmu ngamlo a ni, Lily ka duh ngailoh thu ka sawina ber chu Kimkimi hi a ni a, Lily lahin thian chauh kan nih thu a hrilh ziah bawk kha ania.

Mahse tunah Lily nen kan innei leh ta mai dawn si, min dem ang tih ka hlau ngawih ngawih. A nuamlo duh kher mai, ka room ah chuan ka ko lut a. "I dam maw? Engtik khan nge i lo haw a?" ka han ti a. Nui lui tih hriat tak hian a khi suk a, "Mo lawm turte a awm sia, ka lo haw ve a nih hi." a han ti a.

Ka lai kher mai, "Nia...i ril te a tam em?" te ka han ti thul, Kimkimi ka kawm thin dan chu ka theihnghilh vek tawh ni berin ka hria. "Tam love...ilo dam zawk maw?" a han ti a. "Umm..dam alawm." tih ringawt chuan ka lo chhang leh a. Kan han ngawih dun leh vang vang hnuah chuan thutak hmel zet hian min rawn melh a...

"Lily maw? Ngati teh daih nge?"

"Kim, ihh..a thui lutuk, sawi vek sen pawh a nilo."

"A tawi thei ang berin min han hrilh ve tal teh...i hmangaih ngailo amaw ka tia.."

"Ka sawifiah thiamlo...ka hmangaih tih ka hre tlai em a ni."

"Hre tlai a? Chutiang a awm thei dawn em ni?"

(A lung a awi hauh lo tih ka hria..)

"Min lo hmangaih zia te, min duat ziate kha ka hrechhuak tlai em a ni." ka han ti leh ringawt a. A tum deuh ta hmuk mai, "I thiannu ka ni ve thova, keipawh khan ka duat ve lo che em ni? Ka hmangaih ve tho che asin, mahse tinge ani kher?" a ti ta mai a. Hrehawm ka ti ngei mai, "Kim, thinrim suh.." ka ti leh ringawt.

A han thaw deuh hak a, "Ka thinrim hleinem...a chhan ka hre duh mai chauh ania. Min hrilh duh loh pawn a pawi chuang lo, ka lawmpui takzet che u." a ti a, a tho thut a. "Ka kal ange...Lily pawh ka hmu chak tawh lutuk, in inhmeh dawn e." tiin min han nuih sen sen a. Anuamlo kher mai, "Kim...a pawi khawp mai." ka han ti leh ringawt a.

Nui chung hian min kuah a, "Hey...i mawl em ni? Ka thin a rim hleinem, nangte chu ka thian chauh alawm i nih. Chubakah e, ka duh ve lo hrim hrim che. Pasal neih pawh ka la duh bawk lo, i hlauthawng hma thei lutuk." tih pah chuan min piai vak a. KAwngka bul thleng chuan ka thlah a, "In nu aiin ka rawn chhelo ang, inneih ni chu.." tiin a nui huah huah a, a kal liam ta a.

_______________________

Kei leh Lily leh Kimkimi te chu a tukah chuan kan inhmu khawm ta ngei a, Lily nen chuan kan inthlahrung takzet. A tir chuan kan ngawi deuh thup a, "In phur tawh awm e." tiin Kimkimi chu a rawn tawng chhuak ta a. Lily chuan min rawn en a, "Nia." ka lo ti ringawt. "Lily, a tawp atawpah chuan Marcus-a chu i chang ta nge nge e." Kimkimi bawk chuan a han ti leh a.

"Nia, Kim...ihh..min huat phah lo ang tiraw?" inthlahrung tak chuan Lily chuan a han ti a. Nui huah huah chung hian Kimkimi chuan, "I mawl emai...hmangaihna hi kan duh hun hun a awmtir theih a ni hleinem. Nangpawn a tir chuan Marcus-a hi i hmangaih lova, mahse tunah chuan pasal atan hial i nei dawn ta chu ania. Lungngai suh, i pasal hual Marcus-a ve hi e, a lerh emai..ka duh teuh lo." a han ti a.

Za lo deuh chuan kan lo nui dun a, "Dik chiah...hmeichhe pathumin kan ngaizawng a, a tawpah a thiannu daih min thlang a. A lerh tak tak ania, a tahbelh si." tiin Lily pawh chu a han nui ve huah huah a. "Nakinah a awmloh hunah kan rel hrep dawnnia." Kimkimi chuan min rawh melh zeuh pah chuan  a han ti leh a.

"Kim, i thinrim lo takzet maw?" ka han ti leh a, "I ninawm....thinrim lo, ka lawmpui lutuk che u. Min zawt leh a nih vaih chuan in inneih hunah Marina-i ka thurual pui anga, kan rawn kidnap ang che." tiin min han melh khur a. Lily pawh chuan min rawn kheuh zeuh a, anuam lo ve bawk em a ni.

"Ka nute khuaa ka zin khan zeplo chuan ka na takzet alawm, Marucs-a theihnghilh tum hian nasa takin ka bei ve thin a. Mahse hun rei tak pawh a lo ngai lem lo, single kha a lo nuam em a ni. In inneih tur thu ka lo hriat ve pawh khan mak tihna em em ka neilo, Marina-i chu nise ka thinrim viau ang. Marcus, ka lawmpui lutuk che. I thiannu tak tak chu Lily nilovin keimah zawk hi alawm, kan pahnih chuan thian kan ni reng ang." tiin min nuih sang a.

"Ka van lawm tak...kan lawm lutuk ania aw, Kim...i hmeltha sawt mai." tiin ka han fiam vel a, min melhrum teh asin. Darkar khat vel kan titi hnu chuan Kimkimi chu a haw ta a, Lily nen chuan kan lengdun leh ta a. Mahse kan lengrei em em lo, darkar 2 vel hnuah kan haw ve leh nghal mai.

_______________________________

Man hlan ni a ni a, kei erawh chu kal ve loh tur an ti tlat sia ka kal ve ta lo mai. A tuk tuk lehah kan innei tawh mai dawn chu ania, ka awm thiam lo. Ka phur rual rual in ka zam ve deuh, ka helhhawlh a ni ber mai. Ka hlim viau rualin ka pa chu ka ngai em em a, la dam ve se, a fapa neichhun leh a duat em em hian MArina-i kalsanin ka hmangaih ber Lily ka nei tawh dawn tih hi hre ve se chu ka chungah a thinrim tawh hauh lovang.

Ka hlim rual rualin ka pa ngaiin ka la tap fova, ka nu pawh a rukin a tap ve fo thin tih pawh ka hria. Amos-a lah mi lerh tih takah Lily mo thian tur Rosy chu a lo bem hman thawt thawt a, alo la duhlo zui. Zualtei ka hrilh tep a, mahse ka khawngaih a ka hrilh leh ta lo mai. Chhandama leh Puia erawh angai te bawkin an la single reng a, a phur phurah an la tang zui.

____________________________

Naktuk lawk chu kan inneih ni a ni ta der mai, ka va han phur tawh tak em. Reharsal nei turin Pastor quarter lam kan pan tham tham a, kan Pastor pawh ka hmu khat hle mai, ka inkhawm khat bawk a. Kei leh Lily, Rosy leh Amos-a te chu kan thu tlar thap mai a, vawikhatna vek a ni bawk nen zam a awl duh khawp mai.

Kan han ti chhin vel a, Amos-a a lo nui tut tut zel a, kan ti tha ngun asin. Rosy chuan kalna tur ala neih avangin min haw san vat a, Amos-a pawh Zualtei te inah a leng nghal daih. Lily nen bawk chuan kan inzui leh ta a, inneih dawn tawh ah pawh kan la lengchhuak dun reng mai zawng a nih hi.

Mahse tun tum zet chu kan inhnial buai ta tlat mai, chupawh thil hote vang a ni. Marina-i chungchang a rawn sawi chhuak a, keilah enge a chhan pawh ka hrelo, ka lo thinrim hlur mai. "Ka sawi chhuah chhan pawh inhnial ka duh vang anilo, ngaihdam min rawn dil a, thian ni tawh turin min rawn sawm a, chuzawng chu a nimai." tiin a insawi fiah a.

Mahse Marina-i hming a lam leh chu ka thin a rim tlat, a hun tawh lo lutuk. Ka thinrimna a ho viau tih pawh ka hria, mahse ka thinrim laklawk tlat mai bawk si. Min thlem char char hnu pawh chuan ka lungawi duh ta hauh lo mai a, Setana thlemna te pawh a ni maithei a ni. A tawpah chuan a titau ve ta a, kan titau ta ve ve a nih chu.

A tuk lawkah kan innei dawn a, kan han inhau nghal der mai chu ania. "Haw ang." ka ti vin hlur a, mahse a duh lo. "I rilru a te emai, taxi ka lo haw mai ang." tiin min chhang hmuk mai. "Hmmp..a that chu.." tiin motorah chuan ka lut a, en pawh ka en duh lo. Motor tukverh bulah chuan a rawn ding a, "Min haw san tak tak i tum a mi?" a rawn ti a.

"Taxi in ka lo haw ang i tih kha...ka ruala haw i peih lo anih kha." ka lo ti ve hmak a, min melhrum kher mai. Ka tlan nghal a, min enzui vawng vawng ringawt. Inah ka lut a, ka room ah chuan ka tlang chho nghal a. Ka inchhir leh der tawh, ava han tullo tak. Ka thinrim hian insum nachang ka hre ngailo hi ka buaina ber a ni, a hmaa ka duat theih tehreng nen.

________________________

Tlai dar 3 leh a chanve vel a ni tawh a, Lily chuan ka message min chhang duh miah lo. Ka call a, a ring quit thak thak mai a. A thinrim hle a ni tih ka hrethiam nghal, ka inchhir takzet. Thil ho te ah kan inhau a, keimah zawk ka han titau hmasa chu ania, ka va han zahpuiawm tak.

Kan inthlem lungngawi ve leh mai chu ka ring tho va, inneih loh phah hialna tur ang phei chuan ka ngai lo hrim hrim. Dar 4 rik dawnah chuan call ka dawng ta a, rang lutuk hian ka phone chu ka en nghal a. Ka beisei ang ngeiin Lily chu a lo ni ngei e, "Hello.." inthlahrung tak chuan ka han ti a.

Mahse min rawn chhang lettu chu mipa aw daih a ni, "Hello...Marcus-a maw?" a rawn ti thum ta bul bul mai a. Ka ngaih a thalo nghal takzet, "Aw ni e...tunge a?" tiin ka zawt nghal vat a. "Englo ania, hemi phone neitu hi a accident a..." a rawn ti ta mai a, ka ding nghal zawt mai. Ka thinphu a rang tulh tulh a, ka thaw te a hah mai dawnin ka hria.

"Enga? Khawi..khawiah nge a awm?" ka ti nghal chel chul mai a. "TRM Hospital (phuahchawp) ah..." a rawn ti leh a. Ka lu ka dawm vawng vawng a, "A ngaihtuahawm viau em?" tiin ka han zawt leh a. "Aw..a ngaihtuahawm angreng khawp mai." a la rawn ti ta deuh deuh a.

"Eng...engtin nge a accident?" tiin ka tap lek lek tawh mai. "A kawng cross laiin motorin a su alawm mawle." tiin a rawn sawi leh a. Phone chu ka dah a, ka thingthi hnawk mai. Khatiang thil ho mai maiah khan lo inhau lo ila, tha takin lo haw dun mai ila chu hetiang thil hi a thleng lo tur.

___________________________

"A kawng achin hnualam ruh hi hmun 5 ah a tliak a, a damchhuah a rinawmloh. A lu hi a sawhna angreng bawk si a, lo dam chhuak leh ta pawh nise ke-in a kal thei tawh lovang." tia Operation room atanga doctor thu rawn sawi chu ava ngaihnawm loh teh lul em, ka a vek dawnin ka hria. "Biak theih ala nilo, a harh chhuah hun tur pawh ka sawi thei lo." a la ti ta deuh deuh va.

Ka nu chuan a mittui a hru a hru tawh mai a, kei erawh ka melh ngai melhin ka thu reng thung. Kimkimi chuan ka kutah vuanin a theih tawp chuan min hnem mawlh mawlh a, mahse awmzia a nei lo hle mai. Ka indem em em a, mahse ka thiante erawh chuan min hnem hram hram thung.

________________________

Ni 2 zet chu harh chhuak miah lovin ICU ah chuan a awm reng a, loh theih lohvin kan inneih tur pawh chu kan thulh phah ta a ani. Nilengin ka awmpui a, ka kalsan phal ngang lo a ni. Mahse Lily pa, Pa Hruaia chuan min be tha duh hauh lova, ka chungah a thinrim a ni ngei ang.

Mahse ka dem hauh chuang lo, ka thiamloh a ni miau a. Ka awmpui erawh a phal aniang chu, engtin mah min ti ngai lo. Mahse min be mang lo hrim hrim a, ka biak pawhin a rul tawk bakin min chhang ngai lo. A lo harh hun ka nghakhlel em em a, engpawh thleng se, ke-in kal thei tawh dawnlo pawh nise nupuia neih ngei chu ka la tum fan a ni.

________________________

A ni thum niah chuan a rawn harh chhuak ta a, a rawn tal deuh vak vak mai. Rang takin doctor ka ko vat a, doctor leh nurse te chu an rawn lut a. Hlauh hmel tak hian a hawi kual a, "Lily...Lily..keimah ka nih hi, Marcus-a..Marcus-a ka nih hi." tiin a kutah vuanin ka be mawlh mawlh a.

Ka kut chu a thing thla a, min en hlauh hmel tak hian min en vung vung a. "Tunge i nih?" min ti ta mai a, ka na zawk mai. Pa Hruaia a hmu a, "Pa...Pa..khawnge ka awm?" tiin a tap nghal a. Pa Hruaia chuan Lily chu a kuah nghal vat a, "Bawihte, hlau suh...i bula hi ka awm alawm." tiin a hnem nghal mawlh mawlh a.

Ka va han hrilhhai tak em, ka bing mup hian ka hria. Ka nu chuan, "Lily bawihte...min hria em?" a han ti ve leh a. Mahse Lily chuan a lo melh hru ringawt, midangte chu a enkual a. Apa bulah chuan, "Hemite hi tute nge? Enge ka chungah thleng?" a ti chel chul mai a. Doctor chuan kan vaia chhuak vek turin min ti a, kan chhuak ta vek a.

__________________________

"A hriatna a hloh a ni, apa leh Rosy chiah hi a hria a, midang tumah a hrelo che u. A rawn damchhuak leh hi chu thilmak tak a ni, mahse a hriatna hi a nei let leh angem tih erawh Pathian chauhvin a hria. A hun kal tawhte hriattir tuma hrilh vak vak khan a rilru a tibuai thei a, a at phah hial thei a ni. Chuvangin engmah hrilh lo ula, zawi muangin thil awmzia in hrilh zawk dawnnia." tiin doctor chuan min hrilh a, rilru ava na tak em.

A dam chhuak hrim hrim chu ka lawm a, mahse min hre talo kha ana ka ti takzet. "Lungngai suh, Bawiha...zawimuangin a tha chho ve zel anga, in innei em em ang." tiin ka nu chuan min hnem a. Mahse Pa Hruaia chuan, "Inneihna chu a thleng lovang, ka fanu hi i neih ka phallo, Marcus." a ti ta tlat mai a.

"Engemaw i sawi le, U Hruai...Lily chu eng ang pawhin damlo mahse, ka fapa nen hi chuan a nihna ang angin kan pawm vek asin, chutin sawi lul suh." a lo ti vat a. Mahse Lily pa chuan, "A nupui hual pawh venghim zolo hian an inneih hunah phei chuan engvangin nge a venhim zawh tehlul ang? Chubakah tunah phei chuan a hriatna a hlauh lehnghal, min hrethiam rawh u." a ti ta tlat mai.

Engmah sawi tur ka hrelo, Lily pa khan a sawi dik a ni...Lily pawh chu ka venghim zo lo leh ta a nih hi. Ka chhungte leh Lily pa te chu an han inhnial nak nak a, mahse Pa Hruaia chuan a thuthlukna chu a sawh sawn duh hauh lo. "Ka fanu nen hian hmun dangah kan khawsa anga, kei apa ngei hian ka enkawl ang. Tuma tanpuina ka mamawh lo, chu chu Lily pa ka nihna anga ka thuthlukna a ni." a ti ta hmak hmak mai a.

Ka nu mangang chuan, "Bawiha, engemaw tal sawi ve ta che." tiin min sawi vak vak a, sawi tur reng ka hrelo. Inthlahrung tak chuan Lily pa chu ka en a, "Pa Hruai, sawi tur engmah ka nei lo...i thu thu ni rawh se." ka ti ta tawp a, ka tlawm chiang a ni. "Bawiha..nilo." tiin ka nu chu a tap a, "Nu tap suh...Lily hi keimah vanga hetia awm a ni." ka ti a, pawnah ka chhuak nghal a.

___________________________

Kar khat lai a lo liam leh ta, kan chhungkaw buaina chu vengtinin an lo hre leh hman tawh a, ka zak takzet. Nitin mai hian Kimkimi chu a lo leng a, a thiam ang tawkin min rawn hnem thin. Ka pa ka ngai zual em em a, ka tap ka tap ta mai a. Chaw pawh ka ei thei ngai lo, Lily te pafa lah chu khaw dangah an awm ta daih bawk si.

Ka rilru ana em em a, Lily theihnghilh chu thil harsa tak a ni. Marina-i theihnghilh theihloh tih vel te kha chu nep te hi a ni ringawt, Lily ngaihtuah loh lai hi ka nei ngailo hrim hrim. Ka ngai em em a, mahni inthah tumna rilru te pawh ka pu leh tan ta. Mahse ka nu ka khawngaih em avang chuan ka insum leh hram hram thin, thih daih mai ka duh a ni.

A tawpah chuan ngaihdan ka siam fel ve ta, hetia ka awm reng chuan ka nu nen hian damchhungin hlim lo tak leh khawhar takin kan awm reng dawn. Chuvang chuan ka nu dam lai ngeia nupui neih ve ngei chu ka tum ta a, midang chhai kual leh vel erawh ka tum hauh lo. Lily chu engtikah mah ka nei thei tawh dawn lo tih chu thil chiang sa a ni a, chuvang chuan hmalam ka pan ve angai.

_______________________

Kimkimi chu leng turin ka sawm a, thil sawi pui ka dun vang a ni. Kimkimi chu ka en a, "Kim, min nei duh angem?" ka ti ta tawp mai. Phawk hru hian min en a, "Marcus, i a ta em ni?" a ti hu mai a. Za lo tak hian ka nui suk a, "Umm..ka a zo tawh. Ka a vek tawh..." tiin ka chhang a. "Marcus, i tuarna lutuk a nih kha...engtin nge kan inneih theih ang? I ti awm ang lo emai." a han ti a.

"Kim, ka nu hi ka khawngaih a ni. Ka pa in min boral san tawh a, tunah Lily in min kalsan leh a, tunge ka nih pawh a hre tawh hauh silo. Ka nu thil duh ber chu a damlai ngeia nupui ka neih a, fa ka neih hi a ni. Kim, a awm anglo i ti maithei a, mahse ka zawt duh che a ni. Min la hmangaih reng em? Kei mimawl hi min la hmangaih em?" tiin ka zawt ta tawp mai a.

Ani pawh chu a hnuk a ulh a, "Aw Marcus, ka hmangaih reng che alawm. Mahse Lily kha ka thian tha tak a ni a, in inhmangaihna kha ka pawm thlap. Mahse Lily theihnghilh nan leh i rilru dam nan chauhva pasal atana ka nei che a nih chuan thil dik a nilo, kan inhmangaih a ngai asin." a han ti a.

A kutah chuan ka vuan a, "Lungngai suh...ka duat viau ang che. Ka hmangaih ang che...engtin nge ka hre biklo, mahse theihtawp ka chhuah ang." ka ti ta tawp a, ni e...ka a zo vek tawh a ni. A ngawi reng a, a mittui a tla zawih zawih mai a. A hmaah chuan ka thingthi a, "Kim, min nei duh angem?" ka ti ta a. 

Tap zawih zawih chung chuan, "Aw...ka nei ang che." tiin min chhang ta a. Mahse kan hlim lo ve ve, kan inkuah a, kan tap dun hawm hawm mai. Lawm avanga tap kan ni lova, lungngaih vang leh beidawn lutuk vanga tap kan ni zawk. Duhthlan tur dang ka nei lo a ni, tupawhin min lo dem mahse, a pawi ka ti lo.

_____________________

Kimkimi nen chuan kan innei dawn ta nge nge a, min sawiseltu leh min reltu pawh an tam narawh e. Ka hmaichhanah sawi lo mahse beng ka nei ve a, min demtute pawh tute nge an nih ka hre vek. Mahse engahmah ka ngai duhlo lui zel a, ka thuthlukna chu sawh sawn ka tum bik lo.

Ni khat chu ka nu chuan lehkhabu chhah tha tak mai hi min rawn pe a, "Kha...hei hi Lily Pa khan an kal hma khan min pe a, Lily diary a nih hi. Lily hian a hun kaltawh thil engmah a kawl  aphal lova, i bengbeh pek te, mo kawr te, naute lem te leh tlereuh dangte pawh a rawn dah kir leh vek a ni. A tir khan ka sawi duhlo anih kha..ka room ah sawn ka dah vek." a ti a.

Ka nui suk ringawt, ka room ah chuan ka lut nghal daih a. Diary chu ka chhiar deuh thuak thuak a, uluk taka chhiar pawh ka duh lo. Lily ka ngaihna a zual mai mai dawn a, chuvang chuan rang takin ka nu chu ka pe let leh nghal a. "Nu, paih rawh.." ka ti ringawt a. "Eng a?" a lo ti hu mai.

"Nu, Lily chu ka tan a thi tawh...apa ngei pawhin ka tan a pha lova, tihtheih ka neilo. Tunah chuan ka nupui tur chu Kimkimi a ni tawh a, a ni reng bawk ang. Lily chu ka nei thei tawh dawn hleinem, mahse Kimkimi hian min hmangaih em em a, hmang atangin min hmangaih tawh. Midang tawn thar leh ka duh tawh lo, min hmangaih em em tu Kimkimi hi ka nei dawn a ni." ka ti ve ta hmak mai a.

"Anih leh thildang ho saw..." a han ti leh a. "Paih rawh..anih loh pawn midang pe mai rawh...engmah saw kan inchhungah hian a awm tur a nilo." ka ti a, ka nu pawh chuan min chhang tawh lem lo. A paih ta vek aniang chu ka ti mai a, engmah ka hmuh chhunzawm tawh lo.

Ka inlak hausak vang leh ka neih em em vang pawh a nilo, Lily min ti hrechhuaktu tur thil engmah awmlo se ka tih vang a ni. A awmlo chung pawhin engtikah mah ka theihnghilh tawh dawnlo chu ania, ka hringnun hi chu ava han fairlo tak em. Hun a lo kal zel a, Kimkimi nen chuan kan innei ta a ni.

______________________

Kan inneih atanga thla 2-naah chuan Kimkimi chu a damlo ta vak mai a, khum betin a na der mai. Kan in entir vat a, thu lungchhiatthlak bawk a ni leh ta. Ka nupui Kimkimi chuan Leukemia natna chimawm tak a lo nei reng mai hi alo ni a, rei  adaih tawh loh tur thu chu doctor chuan min hrilh leh ta a.

Kan haw leh hnu chuan Kimkimi chu ka kuah a, ka tap tawp. Mahse chu ti em em chuan a la lang chuang lova, a hmel pawh tha tak ala ni. "Ka tana tha tura Pathian ruat a ni, Marcus....ka hlauthawng lo, mahse ka ngai dawn lutuk che hian min ti lungngai zawk a ni." tiin duat takin min fawp a.

Hun a lo kal zel a, rin ai tak chuan Kimkimi chu a damtha angreng phian mai. Thla engemaw zat a liam leh hnu chuan ka nupui Kimkimi chu a ruak lo tih te kan han hre ve leh zel a, rilru pawh a hlim ve ta deuh. Mahse chu cancer natna chimawm tak chuan Kimkimi chu a rawn eichhe leh tan ta a, a cher tulh tulh mai.

Duat takin ka enkawl a, ka hmangaih nge hmangaih lo chu ka hrelo, mahse ka hmangaih thu chu nitin ka hrilh fo thin. Tikhawp hian tuar nasa in chau thin hle mahse, nui hmel a pu reng a, a tuarchhel takzet. Lily hming ka lam ri ngai lova, a dam huna kan zin kualna tur vel te ka hrilh fo thin.

______________________

"I thi dawn lo, min kalsan ka phallo." tiin ka thlamuan fo thin a, amah enkawl nan pawh pawisa kan seng hnem ta hle mai. Mahse engmah ka ui lo, rei min dampui dawnlo tih chu hre tho mah ila a theih anga rei chu a nunna chelh rih ka duh a ni. Hun a lo kal zel a, naute pawh a rawn lian ve ta telh telh a.

A tawpah chuan a vei ve tan ta, kan va han buai tak em. A hrisel lo bawk si, a vun pawh a dang ve tial tial tawh a. Nau a neih dawn phei kha chuan doctor khan a damchhuah a rin vakloh thute pawh min hrilh hial a, lo inring lawk turin min hrilh bawk. Mahse mak tak maiin naute chu felfai takin an zaichhuak a, hmeichhia  a ni nghe nghe. Naute pawh a hrisel a, Kimkimi pawh a damchhuak.

Mahse thla engemaw zat a ral leh hnu chuan Kimkimi pawh chu a chau zual leh ta telh telh a. Vawikhat chu paper leh pen min dil a, theih leh theilo hian thu a ziak a. Ka kuta min pek pah chuan, "Marcus, kei hi ka lo boral ta a nih pawhin ka fanu hi tha takin lo enkawl la, a lo thanlen deuh hunah he ka lehkha hi i chhiar tir dawnnia." tiin min chah a.

Chumi zan chuan Kimkimi chuan min ko va, ka kutah a vuan a. Men pawh a meng tha hleithei tawh lo, a cher hian a cher em em tawh bawk. Theih leh theilo hian, "Marcus, ka hmangaih che." a ti tawk tawk a. "Keipawn ka hmangaih che, duhtak..." tiin ka lo chhang a. "Tha takin ka fanu hi lo enkawl rawh aw...in pahnihin ka hmangaih che u, ka ngai ngawt ang che u." a ti zawi sap a, min kalsan zui ta a ni.

___________________________

***************************

"Pa khawnge Lily chu tunah a awm?" tiin ka pa chanchin ka hriat zawh vek hnuah chuan ka pa chu ka han zawt leh ngat a. "Bawihte, khaw hla takah an awm...khami hnu atang khan ka hmu leh tawh lo hrim hrim." tiin min chhang a. "Ka kal duh a ni, ka hmu duh a ni." tiin tap chungin ka pa chu ka ngen lawm lawm a.

Ka pi chu lo kal hnaiin, "Bawiha, ka ngen a che. Tun chiah hi ka ngen ang che, i fanu hi va kal pui rawh." a lo ti ve bawk a. Ka pa chu a han ngawi vang vang a, "Awle, i thawmhnaw zu pack fel la, naktukah ka motorin kan kal dawnnia." a ti ta hlauh mai. "Ka lawm e aw..pa." tiin ka kuah vawng vawng a.

***************************

Zingkar atangin kan chhuak a, nileng deuh thaw kan tlan hnu chuan khaw thim hma hret chuan khua chu kan thleng ta. In lian ve tak pakhat bulah chuan kan ding a, motor atang chuan kan chhuak a. Pawnah chuan nu pakhat, kum 35-40 bawr vel niawm tak hi wheel chair nen pangpar tui a lo pe mial mial a.

A hmel chu la tha tak a ni, a nui seng reuh va, a duhawm ngawih ngawih. A hmel em reng reng pawh chuan a zaidam tih a hriat em em a, chunu chu Lily ngei a ni. An awmna khua hi ka pa hian Pa Chhandama hnen atangin a lo hre hlauh va, an in awmna tak kan hriat theihna chhan chu mi kan zawh kual hrep vang a ni.

Ka pa nen chuan kan va pan a, Lily chuan min lo en a. A lo nui sang a, "Enge in duh a? Lo leng ru.." tiin a rawn innawr hnai a. Ka pa chu a zam tih a hriat khawp mai, "Aaa...englo, keini hiii.." a han ti bah deuh nuai a. Hnunglam atang chuan mipa aw thum deuh hian, "Marcus.." a rawn ti a. Ka pa nen chuan kan va hawi rual a, patliing upat hmel ve tawh tak, lian angreng tak mai hi a lo ni a.

"Pa Hruai...ihh..englo.." tiin ka pa chu a han tawng bah leh nuai a. Mahse Pu Hruaia chuan, "Lawk aw.." tiin a rawn kal hnai a. Lily bulah chuan zaidam tak hian, "Lily...hei hi Marcus-a chu a nih hi.." tiin ka pa chu a kawk a. Lily chuan ka pa chu a rawn en a, "Marcus...nangmah hi maw Marcus-a chu.." tiin a mittui a tla nghal zawih zawih mai a.

Ka pa chuan mak a tih hmel kher mai, kei pawhin mak ka ti. "Mahse Pa Hruai, Lily hian engtin nge min hriat a?" tiin a zawt hu mai a. "Min ngaidam rawh ka fapa...thudik engkim ka hrilh vek tawh a ni. In inhmangaihna thuk zia te, in chanchin zawng zawng hi engkim ka hrilh thin a ni. Ani pawhin tunge i nih chu ala hrechhuak chuang lova, mahse a hmuh chak thu che hi nitin a sawi thin asin. Kimkimi nena inneih thute pawh kan lo hria a, ka inchhir tak zet a ni." tiin Pu Hruaia chuan ka pa chu ngaihdam a dil a.

Ka pa chuan Lily chu ava pan a, a kutah a vuan a. "Lily...i lo dam thin maw?" a ti a, "Um....ka hmu che chu ka va han hlim tak." tiin Lily chuan a lo kuah a. Pu Hruaia chuan ka pa darah chuan a rawn vuan a, "Marcus, ka fanu hi ila nei duh angem?" a han ti a. Ka pa chuan min rawn melh a, ka lo siai zeuh.

"Duh e...tupawn engtin min lo sawi mahse..Lily chauh hi ka ngaihtuah tawh ang." tiin a chhang a. Pu Hruaia chuan min rawn en a, "Saw saw..." a han ti ringawt a. Ka pa chuan a lu a lo bu nghat a, "Ka fanu...Puitei a nih saw." a lo ti a. Pu Hruaia chuan min rawn pan a, "Bawihte, i pu ka nih hi.." tiin ka samah chuan a chul a.

"Chuan maw...saw saw i nu atan i pawm thei angem?" tiin min zawt leh a. Ka lo nui a, "Umm..ka nu angah ka lo ngai hmiah tawh asin." ka han ti vel a, zaktheilo min ti maithei a ni. Lily pawh chuan, "Lo kal teh, Puite.." a rawn ti a, ka va kal hnai a. Kan inkuah a, "I nu atan min duh tak tak angem?" tiin min zawt veleh a.

"Umm.." tih ringawtin ka lo chhang a. "Anih min han ko chhin teh." a han ti leh a. Inthlahrung deuh, zak deuh chung si chuam, "Nu..lo haw tawh la.." ka ti a. Kan hlim tlang hle mai, keimah vang liau liau va intawng leh an ni tih hi chu min pawmpui ve hlawm ngei ka ring. Chutia hlim taka kan awm lai chuan ka bul lawkah hian ka nu, Kimkimi awm ve ang tlat hian ka hria a.

"Ka lawm e, ka fanu..i ti tha e." tiin min rawn hrilh ni tlat hian ka hria. Ka pa leh Lily..nilo..ka nu a ni tawh zawk mah ang chu. Ka nu thar leh ka pa te chu an a tawp atawpah chuan an innei ve ta nge nge a, ka nu Lily pawh ka pa nghakin a lo la nula char char chu ania, alo nula senior der tawh chu ania.

Mahse a pawi ka ti lo, ka lawm tho. Nu leh pa ka nei leh ta, chupawh ka mihring duh em em, ka ngaihsan leh ka star em emte pahnih, Marcus Hmingthanzuala leh Lily Zothanpuii te ngei an ni. Aizawl lamah kan haw leh a, thla 3 hnuah ka nu thar Lily leh ka pa te chu an innei ta ve ta tak tak ta.

*********************

THE END