KHAWVELA IN HRANG LAR ZUAL 10 TE

 KHAWVELA IN HRANG LAR ZUAL 10 TE

Translated by : Aaron Malsawmdawngzuala

Source : HouseBeautiful Website

***************

1 : THE LEMP MANSION (St.LOUIS MISSOURI)

St. Louis-a in pakhat, The Lemp Masion tia a hming an vuah hi America rama in hrang an sawi tam tak te zingah chuan a lar ber pawl a ni awm e. He Mansion hi kum 1860 bawr vel a sak a ni a, a neitu hi William Lemp a ni. Room 33 lai mai a awm a, a hmun hma vel te pawh nuam tak a ni nghe nghe.

Amaherawh chu he in hian chanchin duhawmloh tak mai a nei a, vanduaithlak tak maiin an fapa Federick Lemp chu a thi hlauh mai. A thih hnu reilote, kum 1904 khan chhungkaw pa ber William Lemp chu an bed room ah a inthat ve leh a ni. Kum reilote hnuah a nupui pawh chu cancer natna avangin an inchhungah ngei chuan a boral ve leh a, kum 1922 khan an fapa upa ber, William Lemp Jr. chu apa inthahna room ngeiah chuan amah leh amah a inkap hlum ve leh a ni.

Chu mai ala nilo, kum 1949 khan Wlliam-a fapa te zinga naupang ber dawttu, Chrales Lemp chuan an ui vulh lai chu inhnuai basment ah a vaw hlum a, chumi hnu lawkah ama room ah let lehin apa leh a u te tih ang bawkin a inkap hlum veleh a ni. Hemi kum veng hian an in chu Sawrkarin boarding house atan a thlak a, chuta tang chiah chuan he Mansion hi a hrang tan ta niin an sawi.

He ina thleng te chuan hmuh theih siloh thawm ri an hre hnem thin hle a, kawngka mahnia inhawng te, tap vak vak thawm te leh silai puak rite an hriat thin thu an sawi a ni. Tunah chuan he in hi restaurant a ni tawh a, a la hrang reng em tih erawh hriat a nilo.

2 : THE VILLISCA AXE MURDER HOUSE (VILLISCA)

June 10th, 1912 khan Josiah leh Sarah Moore te nupa chu an chenna in, Villisca Iowa ah thi a chhar an ni a, thah ngei an ni tih Police te chuan an nemnghet nghal a ni. An fate pali leh an thiante pahnih, hemi zana an ina riakte pawh chu thah vek an ni a, tun thleng hian an thihna hi chhuichhuah ala nilo.

He an chenna in hi khawvela hmun hrang lar zualte zingah chhiar tel niin Paranormal Investigators te chuan chhui chian an chak hle thin a, he ina riak a, fiah tumtu te chuan zan khat riah man Dollar 400 lai an chawi angai hial a ni. Villisca Axe Murder House Website te tarlan dan chuan zanlaiah thawm a ri nasa thei em em a, tap ri te, nui ri te, bungrua tla ri te leh leihlawn inhnuk ri niawm tak te an hriat thin thu an sawi.

Tin, Kum 2014 khan Paranormal Investigator pakhat chuan Investigation tih tumin he in hrangah hian amahin a riak a, a tuk zingah thi a hmuh a ni. Police te sawi dan chuan he Investigator hi amah leh amah invithlum ni ngeiin an rin thu an sawi a, mahse thudik tak erawh hriat a nilo thung.

3 : JEAN HARLOW HOUSE (LOS ANGELES, CALIFORNIA)

He inah hian kum 1932 khan Actress Jean Harlow leh a pasal Paul Bern te chu an cheng a, Paul Bern hian a nupui Jean-i hi kut a thlak nasa thin viau niin an sawi. An awmpuipa sawi dan chuan Paul Bern hi zankhat chu darthlalangah a in en vung vung a, tichuan a luah tak amah leh amah a inkap hlum ringawt a ti a ni. 

Mahse an awmpuipa hian Police te call hmasa lovin MGM lam zawk a call a, heivang hian mitam tak chuan Paul Bern hi mahni inthat nilovin an awmpuipa thah zawk a nih an ring deuh fur hlawm a ni. Thenkhat erawh chuan Paul Bern-a bialnu hlui thil tih anih an ring zawk mah a, a chhan chu Bern-a thih hnu lawk hian a bialnu hlui hi luiah zuangthla in a thi ve nghal a ni awm e.

A pasal thih hnu hian Jean-i chuan in hi a chhuahsan a, mahse kum reilote hnuah kum 26 mi niin a thi ve lehnghal a, a thihchhan erawh hriat a ni talo thung. Kum 1963 khan he in hi celebrity hairstylist pakhat Jay Sebring chuan a lei a, a bialnu Hollywood Actress Sharon Tate nen an chengdun a ni.

Mahse reilote hnuah Sharon Tate-i chuan bialpa dang, Roman Polinski chu neiin Jay Sebring hi a chhuahsan ta a ni. Hemi hnu reiloteah hian Sharon Tate leh a bialpa hlui Jay Sebring te chu American Serial Killer Charles Manson-a pawlte chuan thatin hetih hunlai hian Sharon Tate-i hi kum 26 chiah a ni a, Jean Harlow nen an kumzat a inang chiah a ni.

Sharon Tate hian a thih hma, Jay Sebring nena an chendun lai hian an inah chuan thil mak tak tak leh thawm rapthlak tak tak a hriat thin thu a sawi a, interview a neih naah pawh a sawi chhuak nghe nghe a ni. Master Bedroom-a amah a a mut laiin a room kawngka bulah mite (midget) tak mai pakhat, hmel rapzawm zetin a lo melh reng thu te, hallway-a thla niawm tak, inawkhlum ang maia lo inkhai te a hmuh thin thu a sawi tel bawk a ni.

4 : HOTEL MONTE VISTA (FLAGSTAFF, ARIZONA)

He Hotel hi kum 1927 khan Community Hotel atan an sa a, pawisa khelh nan te leh intihlim nan an hmang tlangpui thin a ni. He Hotel-a room No. 220 a thleng, mikhual pakhat chuan a room-a TV chu amahin a rawn in on thin thute, amahin a in hmehsawn thin thute a sawi a. He room veka thleng mikhual dang te chuan an mutthilh laiin kut vawt thlur maiin an hmai a rawn zut thin thute an sawi bawk.

Tin, bell boy niawm takin kawngka a rawn kik a, "ROOM SERVICE" tiin a rawn au a, mahse kawngka an va hawn chuan tumah an hmu leh ngailo niin an sawi thin bawk. Chumai ala nilo, basement lamah tap thawm an hre fo thin bawk a, mahse an zu enfiah chuan engmah an hmu ngai lo thung a ni.

5 : MYRTLES PLANTATION (St. FRANCISVILLE, LOUISIANA)

He in hi kum 1796 a sak a ni a, a hran nasat em avang hian tun thleng hian ala lar hle a ni. He inhrang hian thawnthu pakhat a nei a, nu pakhat a hming Chloe chu he inah hian chhiahhlawh a ni thin a. A in neitute chuan an tiduhdah em em thin a, vawikhat phei chu a pute titi a lo ngaithla ru a ni awm a. An man chhuak leh si a, a beng chu an hlehthlak sak a ni awm e.

Chloe thinrim chuan phuba a la ve ta a, an fanu te pahnih birthday cake ah chuan tur a tleh a, chung hmeichhe naupangte pahnih chu an thih phah ta a ni. A thil tih avang chuan Chloe chu khai hlum a ni a, heta tang hian a thlarau chuan chu in chu a chenchilh reng thin niin an sawi a ni. He inah hian i thleng duh emaw, i chhuichiang duh anih chuan zan khat riah man hi dollar 175 lai a ni e.

6 : HOTEL CECIL (LOS ANGELES, CALFORNIA)

He Hotel ah hian thihna tamtak a thleng tawh thin a, chung zinga tun thlenga sawi hlawhte chu... Truck pakhatin mipakhat, he hotel bang nena a sutchilh hlum tak te, 1944 kuma nu pakhatin a fa hrin zawh chiah building atanga a paih hlum tak te leh 1960 chho vela chhawng chung ber atanga mahni intihluma zuangthla tam tak te kha an ni awm e.

Kum 1962 khan nu pakhat chu he Hotel chhawng 9 na atangin chuan a zuangthla a, kawngpuia kawng lo cross mek pakhat chu zu delhin an pahnih chuan an thi nghal a ni. An sawi leh dan chuan he building-ah hian nu pahnih chu mahni inthat in a rualin an zuang thla a, an pasal te mutthilh lai ve ve a ni bawk.

Kum 1964 khan mi inluah pakhat, Goldie Osgood chu he Hotel-ah tho hian rawng taka thah a ni a, tu thah nge a nih tih chu tun thleng hian chhuichhuah a la nilo bawk. Tourist pakhat, Elisa Lam, kum 22 mi chu he hotel ah hian a thleng a, chin hriat lohvin a bo hmak bawk a ni. Elisa Lam bo hnu kar khat velah chuan Hotel guest te chuan an tui in chu a rimchhia tiin an complain nasa hle a, a thawktu ten inchung-a tuizem an han en chuan Elisa Lam-i ruang chu tuichhungah chuan an hmu ta a ni.

Tin, hemi hnu reiloteah hian Elisa Lam-i chu Hotel elivator a a chuang lai CCTV footage hlui chu an hmu chhuak leh a, he footage ah hian Elisa-i awmdan chu hriatthiam a har hle a. Hlauh a nei ngei niin a lang a, a biru kual zuk zuk bawk a ni. Police te chuan thutawp siamin Elisa Lam chu tihpalh thil vanga tuizema tla hlum niin an sawi a, mahse mipui tam zawk te chuan an pawm lo hle thung.

7 : LUI FAMILY MANSION (TAIWAN)

He Mansion hi kum 1929 a sak niin Baroquw Style-a design a ni a, Minxiong Ghost House tia sawi thin a ni. He in neitu chhungkua te chuan kum 1950 bawr vel khan an in hi an chhuahsan a, chuta tang chuan he in hi luahtu awmlovin tun thlengin a ruak ta a ni. Thu hretuten an sawi dan chuan he in a an awmpuinu pakhat chu employee pakhat Liu Rong Yu nen an inngaizawng a, an inngaihzawn thu chu an manchhuah hnuin an awmpuinu chu tuikhuah ah zuang thla in a inthat ta a ni.

Tichuan an awmpuinu thla chu a hrang tan ta a, chumi ina chengte chu a tihthaih thin a, an chhuahsan phah ta hial a ni awm e. Mi thenkhat te chuan an awmpuinu hi mahni a inthat nilovin, tuikhuah ah chuan namthla tu an awm a nih ngei an rin thu an sawi a, thuchiang tak erawh tun thlengin hriat ala nilo thung.

Hemi hnu kum reiloteah Koumintang of China, KMT member thenkhat te chuan he in hi an luah leh a, chhan mumal awm lovin mahnia inthat an awm ta pheuh pheuh mai a, an awmpuinu thla pawh chu an hmuh thin thu tourist thenkhat te chuan an sawi thin bawk a ni.

8 : LOS FELIZ MURDER MANSION (LOS ANGELES, CALIFORNIA)

20th Century hunlai vel khan he in hi Dr. Harold Perelson-a te chhungkaw chenna a ni thin a, December 6th, 1959 khan an pa ber Dr Harold-a hian a nupui chu a muhil lai tuboh in a chhu hlum a. Chumi hnuah acid in(drink) in amah leh amah chu a inthat ve nghal bawk a ni, a thih hma hian a fate pathum chu a rikrap chiam bawk a ni awm e.

A fanu upa ber chu a luah na takin a vua a, heta a fanu t(r)e ri hian a unau dangte a ti harh a, thil thleng an hmuh chuan hlauvin in atang chuan an tlanchhuak ta a ni. Dr. Harold-a hi doctor thiam tak leh taima tak a ni thin a, a research leh production ah te chuan pawisa tamtak a invest thin a. Syringe thar te siam chhuakin amah pawh a hlawk hle a, mahse bum a tawk hlauh mai a, investigator te chuan thiamloh chan tirin pawisa tam tak an chawi tir ta a ni awm e.

Chuvanga rilru buai ta leh  nupui that ta mai chu a nih an ring ber a, thenkhat erawh chuan thildang inthup a awm a nih an ring bawk. Kum 2 hnuah he in hi Enriquez chhungkua ten an lei a, kum tam fe an luah hnuah an fapa chuan kum 2016 khan nupa pakhat hnenah a hralh ve leh ta a ni.

Mahse he in hi a hrang ngei a ni tih photographer tam tak te chuan an sawi a, a luah tu nupa te pawh chuan reilote hnuah chhuahsanin an zuar ve leh nghal vat a ni awm e.

9 : VILLA DE VECCHI (ITALY)

Lake Como bula awm, Villa D Vecchi hi "HOUSE OF WITCHES" tih hialin an sawi thin a, Count Felix De Vecchi te chhungkaw chenna a ni. Kum 1854-57 bawr vela sak a ni a, he in hi kum reilo te bak an luah thei ta lo. An insatute zinga Architect pakhat chu chhan hriat lohvin a thi ringawt mai a, a hnuah an chhungkaw nu ber, Count Felix-a nupui chu thah  ani veleh a, chumi hnu lawkah an fanu chu chin hriat lovin a bo ringawt bawk a ni.

Coun Felix hian a fanu chu a zawng nasa hle a, mahse a hmu zo silo beidawng chu a inthat ve leh a ni. Count Felix-a nupui hi tu thah nge a ni tih hriat a nilova, an fanu pawh hi tun thlenga hmuh ala ni lo bawk. He thil thlen hnu hian Felix-a unaupa chuan in chu a nupui fanau te nen an luah chhunzawm a, Indopui pahnihna zawh thleng khan an luah a ni.

10 : THE CRESCENT HOTEL (EUREKA SPRINGS, AKANSAS)

Kum 1937 khan he Hotel hi Millionaire Investor pakhat, Norman G Baker chuan a lei a, doctor anga insawiin hotel chu damdawiin ah a thlak a, cancer damdawi hmuchhuak angin a insawi bawk a ni. Norman hian purple rawng hi a ngaina em em a, a dawmdawiin hawn thar pawh chu a chhung zawng zawng pawh purple rawng vekin a chei a, tun thleng hian he in chimney rawng hi ala danglam lo a ni.

Cancer natna nei tamtak in an rawn pan khawm a, mahse tumah a lo ti dam thei hauh lo. Doctor pawh a lo ni hek lo, anihna an hriatchhuah meuh chuan a lo tlanbo tawh a, damlo tamtak te pawh a lo that tawh a ni an ti. Tunah chuan he in hi Hotel a ni tawh a, a hrang nasa hle niin an sawi bawk.

An sawi dan chuan khabe hmul ngah tak mai pakhat, hmanlai England Lal te thuamhnaw ang ha leh hmeichhe naupang kum 5 mi vel niawm tak inzui det det hi an hmu thin a, mahse mi an tina ngai lem lo thung a ni an ti.

**************************