A HANDSOME CREATURE : THE BEGINNING MIZO SERIAL KILLER : HMAIKAWR-A

A HANDSOME CREATURE : THE BEGINNING

MIZO SERIAL KILLER : HMAIKAWR-A

By : Aaron Malsawmdawngzuala

******************

 "Duat, kal ve i tum em?" tiin tleirawl kum 19 mi, chhelo zet leh pian thiam tak mai Tluangtei chuan a bialpa, amah aia kum 5 dawna upa, tlangval luck leh chhelo ve tak mai Jeffrey-a chu message ava thawn a. "Kan inkawm ho khat si a, awmho a khat emai. Engtikah nge kan inhmuhkhawm leh dawn pawh a hriat bawk siloh, kal ve ila..a nuam ve alawm." tiin a lo chhang a.

Tluangtei te thianho hi mi 8 vel an ni a, an thian ho zingah hian Tluangtei leh Jeffrey-a chiah te hi inngaizawng an ni a, midang erawh thian pangngai mai chauh an ni. An thian ho hian Whatsapp ah group an nei a, an thian zinga mi khawsa thei deuh ber, Mawitea te huana zan riaka han intihhlim ve an duh a.

Mawitea chuan a rawt chhuak a, chhungte pawhina an khuahkhirh peih tawh loh leh hauh sawt lem lo te vek an ni bawk a, an phur tlang hle mai. "Nia, kan tan pawh chance a ni mai alawm.." tiin smiley emoji tam tak nen Tluangtei chuan a va chhanglet a. Jeffrey-a pawh a phur khawp mai, thawm dim miah lo leh hlauthawng miah lova han in duat vel chu a chak ve tawh ngang aniang.

****************

An chhungte chu an han dil liam liam hlawm a, a then chuan an remti lo nasa kher mai. Amaherawh chu remti lo eng ang pawh nise, an kal lui dawn tho tih hrechiangtu ber te chu an chhungte tho chu an ni. An rinlawk ang ngeiin an phal lemlo chung chu an pariat chuan kal vek tho chu an tum ta a, an chhungte pawh chuan an dang zui peih ta lemlo aniang nge.

Mawitea te huan hi a hla angreng hle a, mahse a hmun erawh a nuam phian thung. Ramhnuai-a kal tur an ni bawk a, an in keng bawr nasa hle mai. Nuam tawl tura kal chu an ni tho nangin, zan hnih khat vel bak riah an tum chuang biklo. Zu pawh an keng hnem narawh e, lirthei erawh pahnih chauh an keng thung.

Mawitea scorpio chuan single lo ho zawng chu an kal a, a plural pahnih Jeffrey-a leh Tluangtei te erawh bike-in an kal thung. A kalkawng hla hle mahse motor tana han tlan harsa lai a awm lemlo, mahse motor luh theih tawh loh chinah erawh thui ve tak chu kea kal angai thung a ni.

********************

Mut mawh hnar mawha an lo neih thin, intihlim tura ramhnuaia riah chhuah hun chu a lo thleng ta. An innghak khawm a, zu pawh an keng tam khawp mai. Mawitea motor-a chuang ho te phei chu over tak an ni, kawngtluan chuan an zai a. Hla ring takin an play a, an sa rak chiam chiam hlawm a.

Darkar fe an tlan hnuah chuan an thleng ta a, "Heta chin hi chu motor a lut thei tawh lo, kea kan kal a ngai tawh." tiin Mawitea chu inla boss ber niawm fahran hian a han hawi kual vel a. An mamawh ang turte chu kengin an inzui thla ta nak nak hlawm a, mahse kawng chhuk tak erawh a ni lem lo.

An riahna hmun tur leh an motor awmna hi inhlat hle mahse, kalkawng hahthlak lutuk a ni lem lo thung. Darkar chanve dawn kea an kal hnu chuan hmun zawl nuam tak mai chu an thleng ta a, "Hei le..hetah hian kan tent tur kan siam anga, sawlai deuh ah sawn lui a awm bawk. Sangha pawh an awm maithei a ni, chuan hetah hian mei kan chhem bawk ang." tiin a huan neitu ber Mawitea chuan a han kawk kual nghal zat zat a.

An thianho hi sawi tak ang khan pariat an ni a, mipa panga leh hmeichhe pathum an ni. An hming hi han tarlang ve hrim hrim ila, Jeffrey-a, Mawitea, Nicky-a, Zorama, Rsa, Tluangtei, Bsi leh Zamzami te an ni. An zinga naupang ber chu Zamzami hi a ni a, kum 18 a ni. A huan neitu ber Mawitea hi a upa ber niin kum 29 a ni.

Vengkhata awm vanga inhmelhriat an nilova, veng in ang awmchhun chu Tluangtei leh Zamzami te chauh hi an ni. Engtin tin emaw an inhmelhriat kual a, veng inhlat em em an ni hlawm lo bawk nen an rilru leh an duhzawng pawh a inmil hlawm hle a ni. Mahni ngaihzawngte theuh hruai chu an han khap ve bur a, thianho ang tak taka riahchhuah an duh vang a ni ber. Mahse Jeffrey-a leh Tluangtei te erawh sawisel theih an nilo, an rinloh taka inngaizawng thut an nih vang pawh a ni mahna.

*****************

Hmunhma vel chu an han tifai a, tichuan zu chu an han phawrh nghal a. A then chu luiah chuan kalin tui an han cheng nghal a, a thenin zu an in nghal bawk a. An thian zinga Ganja heh pahnih Nicky-a leh Zorama te pawh kil khatah an lo nuai mial mial bawk a, an vanglai chu an chen ve chiang khawp mai.

Jeffrey-a leh Tluangtei te pawh hun ala tam an ti aniang chu, an la awmdun mai bik lo. Tluangtei chu a thiante pahnih, Bsi leh Zamzami te bulah chuan va kal vein tui ava cheng ve a. An zinga tlangval senior ber MAwitea leh Jeffrey-a te erawhin zu an lo la in karh karh thung a.

"Sangha han man dawn pawh ni ila, sangha manna tur hmanrua leh thildang engmah kan keng bawk silo. Nangpawh sawi lawk ve thin tur che ania, han man teuh ila, a tuihang hawp a chakawm tehreng nen." tiin Jeffrey-a chu a phun nuah nuah a. "Awww..lui a awm dawn ka ti mawlh mawlh a, khate chu nangmah pawhin nachang hriat ve mai tur alawm. Keite chu sangha ka ei ve duh hleinem, min puh reng reng suh." tiin Mawitea chu a lo nui huah huah a.

***************

Chawhnu lama thleng an ni bawk a, ni pawh a hniam tan der tawh. An vai mai chuan tuiah chuan an cheng a, an hlim tlang hle mai. Khaw thim hma hret chuan an duhtawk ta a, rawng an bawl tan ta a. "Ka zun a chhuak, ka va zung lawk ange." tiin Bsi chuan no khat chu a han tlak leh pawp a, a tho nulh a.

"Kal pui i ngai em?" tiin Rsa chuan a lo fiam zauh va, "Ngailo ngailo...min kalpui lo zawk la min pui a nimai." tiin Bsi chuan a lo vin hlur a, an han nui leh dar dar a. Bsi chuan hmun biru lai deuh chu zawngin an awmna atanga thui ve deuh fe chu ava pan a, midang erawh zu in pahin rawng an bawl a, an titi nasa hle.

Minute 5 vel hnuah chuan Bsi chu a rawn t(r)e ta vak mai a, an phu nasa hlawm kher mai. "Eheee...BS..BS.." tiin Rsa chu a va tlan phei nghal a. Midang ho pawh chu an ding nghal suau mai a, "Ngawi teh u, Rsa nen hian kan va en ang. Tikhan lo awm rawh u, engvak a ni lovang." tiin Mawitea chuan Rsa chu ava zui ve nghal a.

***************

Ngaihtha lemlo tak chuan midang ho chuan an lo nghak thup mai a, Tluangtei leh Zamzami te phei chu an tap titih nghal der mai. Mahse reilote hnuah chuan Mawitea, Rsa leh Bsi te pathum chu an rawn nui phei bawk bawk a. Midang ho pawh chu an lo thaw huai mai a, "Enge ni a?" tiin Nicky-a chuan a lo zawt vat a.

Nui huah huah chung hian Rsa chuan, "Thisen a hmu a, a hlau nghal em em ringawt a. Kan han chhui zel a, ram ar thisen lek a lo nia...a ho tak tak." a han ti a. "Ram ar a? Khawnge ram ar pawh chu?" tiin Zorama chuan a lo zawt a. "A thihna a rei tawh aniang, a rimchhe lutuk." tiin a lo chhang a.

Ngaihthat loh hmel tak hian Nicky-a chuan, "Ehe...anih chuan chu ram ar chu engvanga thi nge ni anga? Sakawlh a awm a nilo maw helai hnaiah hian.." a lo ti ve bawk a. "Lungngai suh...rulin a lo bei thut te pawh a ni mahna..engmah a nilovang." tiin ngaihsam zet hian Jeffrey-a chuan a lo chhang a.

"A ho emai, kan huan ania ka hrechiang ve tawk. Eng sakawlh mah a awm lovang, rul-ngan vel erawh ramhnuai deuh laiah sawn a awm maithei. Chubakah ka lo sawi theihnghilh daih a, sawlai deuh ah sawn ekin a awm reng alawm..hehe sorry aw BS, ka lo sawi theihnghilh daih a." tiin Mawitea chuan Bsi chu a han nuih tlawn vel a.

"I hrechiang takzet amaw? NAng hi kan huan kan huan i tia, i kal khat hmel ropui si.." tiin Zamzami pawh chu a rawn tawngchhuak ve a. "Lo ngawi mai mai teh, naupangte...i pa rual hi mi chhang ve khanglang suh." tiin Mawitea chuan a lo fiam let a, rawn chu an bawl chhunzawm zel a.

"Ramhnuai pilril deuh lamah saw chuan kalloh a him ang, sawi tak ang khan rul an awm maithei a ni. Ka patea te pawh hian an sawi thin a, rul an thah thute pawh an sawi zeuh zeuh alawm. Mahse hlau suh u, helaiah hi chuan an awm teuh lo mai." Mawitea bawk chuan a han ti leh a.

***************

Chaw te an eikham zawh hnu chuan khua chu a thim lek lek tawh a, unau hmel hai hun vel a ni. Thla te chu an han la a, an rui hlawm kher mai. An woofer ken chuan ring takin hla an play a, mei an chhem bawk a. Nicky-a leh Zorama te chuan an riahbuk tur chu an lo buaipui dun malh malh a, a khat tawh chuan thlasik hnah ro chu an han zial leh thin a.

Bsi chuan Zamzami leh Tluangtei thla a laksak lai chuan an hnuga mipa pakhat, palian angreng tak mai chu a hmu fuh hlauh mai a, a phu nasa lutuk chu a au vak a, phone pawh chu a thlauh phah nghe nghe. Mipa ho chu an rawn tlan phei vat a, "Enge ni ta?" an rawn ti nghal chiam chiam hlawm a.

Bsi chuan ahma zawn chu a kawk a, "Sawpa saw tunge?" a ti khur dar dar a. Thinghmun(woods) atang chuan pa pakhat, kum 25-30 bawr vel, hmelchhe lemlo tak, hang lampang, palian tak, ft 6 vela sang hi a rawn chhuak a. Inthiamloh hmel tak hian, "Ka ti hlau che u em ni...ka tihpalh lutuk." a rawn ti a.

"Tunge i nih aw..thianpa?" tiin Mawitea chuan a han zawt a. Rin ai takin a hmel chu a nelawm a, a hlauhawm lemloh khawp mai. "Victor-a ka nia, sawlai deuhah sawn thlam ka nei a." a han ti a. Bsi ber pawh chuan Zamzami beng bulah chuan, "Ka rin aiin a chhelo zek, mahse a class vak loh hmel." tiin a han hrilh ru zauh pek a.

"Anih chu mawle...thlahrang amaw kan lo ti dawn che alawm...enge i tih reng reng a?" tiin Mawitea bawk chuan a han zawt leh a. Victor-a chu a han nui sang a, "Ka chhungte nen kan inhau a, ka pa nen kan han in bakkaih deuh hlek alawm le, ka titau ka han chhuak ve ngawt a. Tihian thlamah kan thlamah ka awm ta hrih a nih hi...in duh chuan lo insawn phei zawk ta che u. Mahnia awm hi chu a nuamlo ve angreng lutuk a, in thawm ka hria a, ka thla a lo muang khawp asin." a han ti deuh luam a.

*****************

Chutia thlam te a lo awm a nih chuan, puanzar hnuai mai maia zan hun hman ai chuan tiin Victor-a thlam lam pan pawh chu an remti ta hlawm a, an bungrua te chu la in Victor-a chu an zui phei ta zawk a. A lo inhlat lemlo khawp mai, "Hetah hian thlam a awm tih pawh ka hre ngailo hrim hrim, thing hmun vek kha niin ka hre mai thin ka ania.." tiin Mawitea chu a han phun nuah nuah a. 

"Ka rin ang vel a ni, nang hian engmah i hre tak tak lo." tiin Zamzami chuan a lo fiam leh zauh pek a. An rin ai daihin Victor-a chu kawm a lo nuam phian mai, a hmel lah chu a tha reuh phian mai a, a nelawm em em mai lehnghal. Bsi phei chuan a star nghal der mai, atira hlau ber si chuan Victor-a titi lai chu chilthli tla lo chauhvin a en dawk dawk mai.

Thlam a sawi lah chu thlam tia han sawi chi pawh a ni lemlo, assam type in pangngai tak hi a ang mah zawk. Inchhung chu rin ai daihin a lo zau angreng hle a, bedroom te pawh a lo awm ve thlap. Chaw ei dawhkan, choka bungrua leh silhmun thlengin a lo kim ve thlap mai.

"Ilo awm hlauh chu a vanneihthlak e, zu i in ve ngai em? I duh chuan kan nei reng ania." Mawitea chuan a han ti leh a. Victor-a chu a nui suk a, chawei dawhkan hnuaia lehkhakhawng bawm chu a han pawt chhuak a. A chhung atang chuan whiskey a rawn phawrh chhuak a, "Induh belh chuan ka nei e.." a han ti a, Bsi lah chuan a lo nuih sang mai.

***************

Zan a lo ni a, thlam kawtah chuan mei an chhem a. Zu bawk chu in lehin an titi a, Victor-a erawh a tawng tam vak lo. Mahse titi pui erawh a nuam angreng hle mai a, Bsi lah chuan ava kuah ang thuak thuak zel a. "Kan thianpa MAwitea ve hi engmah a zawh tlak loh lutuk a, helai hmun hi i hrechiang em, Victor?" tiin Jeffrey-a chuan a han zawt a.

Victor-a chu a han thu tha sauh sauh a, muang cherh chawrh hian, "Hre chiang ve thawkhat e...mahnia awm nuam ti chi ka ni a. Zan thim te hi ka hlau lemlo, ramah pawh ka riak fo mai. Hemi thlamah hian mahnia awm ka duh changin ka riak mai zel a, ka rilru a nat chang apiangin ka kal ziah bawk." a han ti a.

Nicky-a lo rui nawi deuh chuan, "I van huai em em bro, thlahrang te i hlau lo em ni?" tiin a lo nui khi sung a. Victor-a chuan chiang tak hian Nicky-a chu a en a, "Kum 26 ka ni ve tawh a, ka hlauh tur zawng zawng chu kum 25 kal ta khan ka hlau zo vek tawh." nui miah lo hian a han ti a.

"Amak e aw..Lal Nicky...lo uang reng lo teh." tiin Tluangtei chuan Nicky-a chu a lo khap vat a, Nicky-a lah a nui ang vak vak a. "I thlam bul velah hian kan riahna tur hi kan siam mai aniang chu, rem i tih chuan.." Mawitea chuan inthlahrung tak hian Victor-a chu a han dil a.

"Inchhung a zau nuam tho alawm...kan riak khawm vek ang chu le." meng mang hlei lo hian Nicky-a chuan a rawn ti leh hram a, Zorama chuan a lo nghawk sawk mai. Mahse Victor-a chuan, "A sawi dik alawm, thlam chhungah hian lo riak ve zawk rawh u. Ka phal lutuk, kei erawh min hrethiam ula, ka khumah ka mu thung anga, nangni chhuatah.." tiin a han nui a.

"Mutpui chak deuh bik i neih chuan ka awm aw.." tiin Bsi rui ve deuh chhalh tawh bawk si chuan Victor-a chu a han dek zauh a, Victor-a pawh a lai lek lek mai. Zan a lo rei zel a, a tam zawk chu an mu ta a. Victor-a, Mawitea leh Jeffrey-a te erawh meilum bulah thuin an la titi thung a.

*************

Reiloteah chuan Jeffrey-a pawh chuan a mut san ve mai a, Victor-a leh Mawitea chauh an ni ta. "Thianpa, nichin khan hmeichhiate an awm sia..ka sawi duhlo a nih kha..hman kum deuh khan helai hmunah hian inthahna a thleng tawh a. Chuta tang chuan helai hmuna kal thinte hian pa pakhat, chempui kenga vakkual thin an hmuh thu an sawi thin a..mahse a tak a ni nge nilo chu ka hrelo." Victor-a chuan a han ti a.

"Kan huan bul lawk ania, ka va hre ve ngailo ve...chu aia chiang chuan i la hre thei em?" tiin Mawitea chuan a han zawt leh a. "Ka hre hnem vak biklo, ka hriatdan chuan chhungkaw pakhat hi helai hmunah hian kum 20 vel liamta khan an cheng thin a, an chhungkua chuan an inhau reng mai zel a. Vawikhat chu nuber chuan apa chu a that a, chumi hnuah amah a inthat veleh a ni awm e." Victor-a chuan a han ti leh a.

"Nihleh an fapa chu?" tiin Mawitea chuan a lo zawt vat a. "Nia...an fapa chu a bo hmak an ti. Ka pa hian a sawi thin a, ka awih vak lemlo. Helaiah hian huan kan nei ve ta a, kan neih hnu feah chauh ka hria keipawn." tiin a lo chhang leh a. An titi leh deuh hrep hnu chuan mut zai an rel ve ta a, mei pawh chu an timit ta a.

******************

Zanreiah chuan Tluangtei leh Jeffrey-a te chu chance nei turin an chhuak ru ta zal zal mai a, an tum lawk vek a ni kan tih tawh kha. Thlam hnunglam hretah chuan an kal a, thingkung lian tak pakhat hnuaiah chuan ding dunin an inkaih nghal tawn tawn mai. A lum an ti deuh nge mawni, an thawmhnaw te chu an han hlip then a.

Jeffrey-a pawh a duh ang tawk a hmuh hnu chuan a thlan a tla buah mai, thawmhnaw chu an ha dun lehnghal mawlh mawlh a. Chutah Tluangtei chu a t(r)e thawt mai a, Jeffrey-a hnungah chuan a biru nghal. "Enge a? Tinge?" tiin Jeffrey-a chuan a lo zawt vat a.

"Tah sawn...tah sawn...mipakhat.." a ti hluam hluam a. Jeffrey-a chuan ava en a, tumah a hmu ve bawk silo. "Enge i hmuh a?" tiin a zawt leh a. "Mi pakhat...palian deuh mai. Samsei, a hmel kha a rapawm lutuk..." tiin a tap nghal pur mai a. Jeffrey-a pawh chu a ngaih a tha ta lo. "Hawh teh...lut vat teh ang." tiin thlamah chuan an inzui lut leh ta nghal a.

****************

A tuk zingah chuan Victor-a chu hma takah a thova, a chhuak daih mai a. Midang ho erawh dar 10 dawn velah chuan an rawn harh ve pheuh pheuh hlawm a, ahma zana an lo lem hnem deuh vang pawh aniang, an ner nung hlawm mai. Tluangtei chuan ahma zan lawka mi pakhat a hmuh kha a ngaihtuah reng a, a awm a nuam thei ngang lo.

Nicky-a tihloh chu an harh vek tawh a, 11 a ri dawn tawh. Luna tihreh nan tiin athen chuan zu chu an han in leh hram a, hmeichhe ho erawh chuan a melh pawh an melh peih tawh lo. Mawitea pawh chuan a hma zana Victor-a sawi chu a rilru ah a awm reng a, ngaihthat lohna em em neilo mahse a awm a nuam chiah bik lo.

******************

Tluangtei amaha lui bul vela a tei a tei lai chu a bialpa Jeffrey-a chuan ava pan a, "Tinge mahni chauhva ilo vei kual vak vak a? Nizana mi kha i ngaihtuah leh tawh em ni?" tiin ava zawt a. "Ka mit vai pawh a ni maithei, mahse ka hmu ngei kha chuan ka hria a ni." a lo ti nuah nuah a. "Eng ang hmel pu nge?" tiin a han zawt leh a.

"Ka en rei lutuk lo, khatia kan inhak that sawk sawk lai khan kan awmna atanga hla vaklo ah khan thingkung pahnih inkarah a lo ding a, palian tak a ni." tiin a chhang a. Jeffrey-a chu a han ngawi vang vang a, "Anih leh i hmu tih i chiang amaw? A hmel i hmu chiang amaw?" tiin a zawt leh a.

"A hmel kha amak lutuk, avar vek a, mahse a mit erawh a sen vek thung. A mit bul vel kha  adum deuh kuk bawk a, a rawn then vak a, a ha pawh a lang vek. A ha kha mihring pangngai ha aiin a sei zawk a, chuan tam deuh angin ka hmu. A sam a sei a, a phiar deuh bawk amawni...ka mitvai mai chu a nih ka ring chiah lo deuh." a han ti leh a.

A sawi zawng pawh chuan a la hlau a ni tih a hriat em em a, Jeffrey-a erawh chuan a awihsak vak lem lo. "Victor-a hrilh tur  anih chu...khawnge maw a awm reng reng le hepa hi?" tia a han hawikual chuan Victor-a ngei mai chu an bul lawkah chuan a lo ding run mai a. Jeffrey-a pawh a phu zawk mai, "Khai...thianpa, min ti hlau dawn alawm mawle." tiin a han nui deuh huk a.

Nuisang hian Victor-a chuan, "Min zawng em ni? Ka hming i lam ri kha ka rawn hre hman ania.." tiin a rawn pan phei a. "Aaa..nia, zingkar atangin i bo daih sia, khawnge maw i awm ni kan lo ti a." Jeffrey-a chuan a han ti a. "Nia, in tho har dawn tih ka hrechiang sa a. Keichu eng ang pawhin zanah zu in hnem mah ila, ka tho har ngailo hrim hrim." a lo ti leh a.

"Vic, helai hnaiah hian midang i hmu ve thin em? Ka sawi awmzia chu i hmelhriat nilo, midang lo kal ve thin te an awm em?" tiin Tluangtei chuan a lo zawt ve a. Victor-a chu a nui suk a, "Nangmahni hi animai...ka hmelhriatlohte chu..chuan tuna min kohdan kha a nalh angreng hle mai, Vic...a tha dawn e, ka hming ka thlak dawn." tiin a han nui vel huah huah a.

"Englo ania thianpa, nizan khan kan mut vek tawh hnu khan Tluangtei hi a zun a chhuak a, ka va zunpui a. Tluangtei hian mi pakhat maksak deuh a hmuh thu a sawi a, keichuan ka hmu ve chuanglo nangin, hei a ngaih a tha thei ngang lova.." Jefrrey-a chuan a han ti a. Victor-a chuan an pahnih chuan a han en vang vang a, "Zung turin maw? Thildang ti turin in chhuak zawk te a nilo maw?" a han ti deuh kher a, ala nui hauh lo zui.

Hriatthiamloh hmel tak hian Jeffrey-a chuan, "Enge i sawi awmzia? Eng thildang vak nge kan tih anga?" a han ti ve deuh ta khur khur a. "Engmah nilove...in hmusual mai mai aniang..tumah an awm lovang." tiin Victor-a chuan a kalsan daih mai a. Jeffrey-a chuan Tluangtei chu a en a, "Enge awmzia? Enge maw a hriat thut le?" a han ti bul bul a.

Victor-a kal liam chu rum zet leh eiloh hmel tak hian Tluangtei chuan a en zui a, "Keichu hepa hi ka ngaina lo, a hmel saw nelawm viau mahse ka rin zawng a ni lo. Tun lawka min tawngkhum dan te kha ka ten tawp, Bsi lah saw lerh si...a easy si...huiham, kan lo kal kher kher a ni." tiin a phun nuah nuah a.

****************

Victor-a chu thlam lamah chuan ava let leh a, "Ehe...in lo tho ve tawh maw?" a han ti lut a, Nicky-a pawh a lo harh ve ta. "Bro, khawnge i chhuah daih a?" tiin Mawitea chuan a lo zawt nghal vat a. "Zing walk thang ka nia, thlama ka riah changte pawh hian ka walk tho zel." tiin a lo chhang a.

"Hei rawngbawl nan i thuk te hi kan lo hmang ve ngawt pek a, i thinrim em lovang chu maw?" Mawitea bawk chuan a han ti leh a. Nui sang hian, "Khaih khaih...hmang ru hmang ru..chaw te kha min chhum kep em? Ka heh teh mai ania.." a han ti vel a. "Kan chhum teuh mai, zanin hi kan riak leh anga, naktuk lamah kan haw ang kan lo ti deuh a." Mawitea bawk chuan a han ti leh a.

"Awhawww..inva ngaihawm awm ve..anih chuan vawiin chu hlim takin kan hman ho angai a nih chu. Chaw te kha in kham loh chuan chhum belh tur ka ngah ania, inthlahrung suh u." tiin Victor-a chuan a lo chhang a, Tluangtei leh Jeffrey-a te pawh chu an lo phei ve ta a. Rawng chu an bawl zova, chaw chu an ei ta a.

********************

Chhun a lo ni a, tui te chengin an hlim tlang ngei mai. Victor-a erawh kil khatah chuan thuin meizial a zu khu hluah hluah a, a bulah chuan zu a inchhawp bawk a. Bsi chuan a star ruk em em Victor-a chu a en reng a, "Lo cheng vela, Victor...i cool bik e, lo kal rawh." tiin a han sawm vel a.

"Aaa...tihian a nuam zawk..tui ka cheng vak ngailo." tiin a lo chhang mai a. Victor-a hmuh tur ngei chuan Bsi chu a sexy thei ang ber chuan a han awm kual vel a, chutia nula chhelo leh ngo vuah mai ina a taksa a han show khum vel chu Victor-a pawh chuan hmundang a melh phal lo, a zu no tlak pup pup pah chuan a en reng a.

An chenna lui hi ahma ni a an chenna tho kha a ni a, Victor-a thlam atang hian a hla lutuk lemlo nangin kea han kal ve vang vang chu a ngai tho a ni. Zorama chu Victor-a bulah chuan ava thu a, "Bro, motor kan dahna ah khian lirthei dang engmah kan hmu silova..engin nge i kal reng reng a?" tiin ava zawt a.

"Ka thianpa ka inhruai tir a, ka pa hian lirthei ka kenchhuah a phal teuh lo mai." tiin a lo chhang a. "Anih leh engtia haw nge i tum?" tiin a zawt leh a. "Min ngaihtuah hunah chuan ka pa'n min rawn hruai mai ang." tiin a han nui deuh huk a. "Ti daih ila, weed i zu ve ngai em?" tiin Zorama chuan a han zawt a.

Rang tak hian Victor-a chuan, "I nei ami?" a lo ti nghal. "Nei e, i zuk ve duh chuan kan zu dawnnia...Nicky-a ka va ko lawk ang." tiin a phei a. Bsi chuan Victor-a chu ala en reng a, beisei tih hriat tak hian a han siai zeuh va. Tui atang chuan a lo chhuak a, a mal mum tak te chu a han ti lang lui vel a.

Victor-a chu a han signal zeuh va, thlam lam pan chuan a kal a. Tumah thlamah an awm lo tih chu Bsi chuan a hre ran mai a, a star em em leh a duh ruk em em Victor-a nena chance an neih theihna remchang tak a ni tih chu a hai bik lo. Chutia Bsi'n thlam lam a pan lai chu tuman an ngaihsak lemlo, Tluangtei leh Jeffrey-a te pawh an bo leh daih tawh.

Victor-a pawh chuan amah thlem mektu Bsi, nula chhelo leh tituai nalh zet mai chu chhuah a tum hauh biklo, "Thlamah ka va kal lawk ange aw.." tiin a tho a, Bsi chu ava zui phei ta a. Bsi chuan thlam chu  athleng tep tawh a, lehlam a han hawi chu Victor-a chuan a rawn zui tih a hmu ta.

A lawm lutuk chu  anui var var a, a han kal muang deuh va. An inzui zel a, "Lo kal chak rawh.." tiin a au sek mai a, mahse Victor-a chu a kal muang tulh tulh amaw tih mai tur a ni. Chutah amah zui rengtu Victor-a chu a bo ta daih mai, engtik lai khan nge a bo tih pawh a hre hauh lo.

***************

Tluangtei te chance nei pawh chu an duhkhawp an hmu dun tawh a niang chu, an lo inha tha leh sawk sawk a. Lui lamah chuan an va phei ve ta a, an thiante chu an lo la hlim ngei mai. Woofer-ah chuan hla an play a, an lo la lam nasa ngang mai. Zorama leh Nicky-a te pawh an rawn phei a, "Khawnge Victor-a kha?" Zorama chuan a rawn ti a.

"Thlam lamah ka va phei lawk a tih kha nichin kha chuan.." Zamzami chuan a lo ti a. "Aww...weed a zuk duh thu kha a sawi a, Nicky-a ka va koh hlanin a lo phei leh daih anih dawn chu.." a ti a, Nicky-a nen chuan ganja chu an han zu khu leh hluah hluah mai a. Tluangtei chu a hawi kual a, "Khawnge Bsi hi?" a han ti vak a.

"A awm reng kha...khawnge a lo kal hman a?" tiin Rsa chu a inhru fai mawlh mawlh a. "Victor-a kha a zui phei anilo maw, anni pahnih hi an inmelh tai riauvin ka hria." tiin Mawitea chu a han nui huah huah a. "Victor-a lo awm hlauh chu a tihzia teh e, mutna tha kan neih phah a, ruah pawh tla thut se tawm hulna tur kan nei bawk a." tiin Nicky-a chu a lo tawngchhuak ve bawk a.

"Nizan khan a thusawi apiangin i lo chhang zel a, i rui nawi thei bik lutuk." tiin Zamzami bawk chuan a lo khak a. A lu hiah nauh nauh pah chuan Nicky-a chuan, "Nia, weed leh zu ka tihpawlh apiangin ka rui nawi ve ziah...engmah ka hre leh tawh lo." tiin a han khi suk a. "Tihpawlh lo la nimai lawm, i thianpa Zorama pawn a tihpawlh ve tho va, ala buaipui char char zawk che ania." Zamzami bawk chuan a han ti leh deuh tun tun a.

******************

Chutia Victor-a hmel hmuh tur leh a thawm tak ngial pawh hmuh tur awm talo thut mai chu Bsi ngaih a tha lo hle mai a, a hawi kual vak vak ringawt mai a. Thlam lam chu a pan zel ta tho va, a thlen veleh chuan a lut nghal a. Chaw ei dawhkan hnuaia Victor-a beer dahthat chu la in thutthlengah chuan a thu a, beer chu a in khawlh khawlh a.

"A va han mawl tak...khawnge maw a kal leh daih ni?" tiin a phun nuah nuah a. Chuveleh pawn lam atang chuan thawm a hre ta, Victor-a a nih ngei beiseiin kawngka lam ava pan vat a. A chhuak chiah chu a hma zawna lo ding chu Victor-a a ni hauh lo, palian ve tak, ft 6 vela sang, hmai kawr rapawm tak lo vuah hi a lo ding run mai.

A hmaikawr vuah chu ramhuai hmel amaw tih mai tur a ni, a then thu mai a, a mit a sen vek bawk. A sam chu a a dar silo chiah vel hian a sei bawk a, a inphiar bawk a, a hraw em em lenghal. Leather jacket dum da deuh lam hi a ha a, jeans kekawr dum a ha bawk. Mipa boot dum hlarh mai a bun bawk a, kutkawr dum a bun bawk.

Bsi chuan a hlau angreng hle a, "Tu...tunge i nih? Jeffrey..nangmah a mi?" a han ti ringawt a. Mahse chupa chuan a chhang lo, Bsi chu a thlek ngawih ngawih ringawt mai a. Khur dar dar chung chuan Bsi bawk chuan, "Hey...Mawite..Zoram, fiamthu em ni? A nuihzatthlak loh khawp mai aw.." a han ti leh ringawt a.

Mahse chupa chuan ala chhang chuang lo, a mitmu sen rum mai chuan Bsi pian chu a han enkual leh a, a it hmel em em mai lehnghal. Chuta a va pan hnai ta mai a, Bsi hlau lutuk chu a tawlhhnung nghal a. "Lo kal hnai suh...hey..kal rawh.." a ti vak vak a. Mahse chupa chuan a rawn panhnai zel si, Bsi chuan thlam kawngkhar chu a khar nghal vat a, a chhung atangin a kalh nghal bawk.

A mangang ta hle mai, "Jeffrey...U Mawite..min pui ru..RS..Zoram..Nicky.." tiin a thiant mipa hmingte chu a lam kim vek tawh, mahse an awmna a inhlat em avang chuan tuman an hre thei der mai silo. A thiante lah chu woofer play in ring takin an zai a, an thiannu Bsi chuan tanpui a ngai tih an hre hauh silo.

***************

Meng mang hlei lo hian Nicky-a chuan, "Zoram..hmeichhe au ri awm tlata ka hriat chule.." a han ti nuah nuah a, an kai dun leh tawh kher mai. "Hmmh...i bengchhe ri nih chu, i kai fal thei lutuk, ka zuk pui tawh lovang che." tiin a lo la hau let hrep zui. "Nia  ani maithei, zu chu ka in tawh kher lovang, ka tihpawlh apiangin ka buai ziah." tiin a han fawp leh hrawk a.

"Khawnge maw Bsi chu a awm le? Ani hi a lo bo daih te hi a nilo maw?" tiin Tluangtei ngaih chu a tha theih thlawt lo. "Aww...Victor-a bulah a awm aniang chu...lungngai suh." tiin Mawitea chuan a lo chhang mai a. "Kan hmelhriat pawh a nilova, engtin nge in ngaih in tih that em em theih le? Chubakah Victor-a bulah pawh a lo awmlo maithei asin, in ngaih hi a sam leh lutuk." tiin Tluangtei chu a vin hlur tawh mai.

"Nangni pawh inpahnihin in kal hrang a, kan zawng kan zawng bik hleinem che u...tihbuai induhloh ang bawk khan tihbuai an duhlo ve animai lawm." tiin Rsa chu a rawn tawng zauh pek a, "I tawngkam kha fimkhur ve deuh teh...keini leh Victor-a te tehkhin chu kan ni em ni?" Tluangtei thin chu a rim takzet tawh.

"In ninawm e...inhnial reng suh u...mood in ti chhe vek." Zamzami chuan a han ti deuh hlur a, "Nia...hlim deuhvin awm ang u.." tiin MAwitea pawh chuan a rawn khap dai ta hlawm a. Rsa ngaihdan erawh a ni vak lo, "Hmeichhia te te, ka vin e te chu min tih ve khanglang." tiin a phun nuah nuah mai.

**************

Kawngka chu a rawn inchhuih hawng thuai mai a, Bsi chuan dawhkana chemte chu chuh ve nghalin chu hmaikawr vuah pa chu a tin a, "Hey..lo kal suh..lo kal hnai tawh suh." tiin a tap pur tawh mai. Mahse chupa chuan a hlauh loh hmel kher mai, ring zet hian a nui ta uar uar mai a.

Bsi hlau lutuk chu a thlan a tla zawih zawih tawh a, "Tunge i nih..chhuak rawh..MIN CHHAN RUUU.." tiin a au vak vak a, chupa lah chuan a nuih nghek nghek mai a. Tlan chhiat tumin chet a han la dawn a, mahse chupa chuan a kalkawng a lo dal zel bawk si. A tawpah chuan a chemte ken lai chuan vih a han tum ta tawp mai a, mahse a hlawhchham chiang hle.

Mipa tha zawk na na na chu a hneh lo ngang mai, chemte chu a lo man sak a. BAngah chuan a rek bet a, "Min..min chhuah hram rawh.." tiin Bsi chuan mittui tla phung hian a ngen lawm lawm a, hnaitakah chuan chupa chuan a melh a. Chemte chuan Bsi dulah chuan a han thai kual vel a, Bsi chuan zun a cheh hial tawh.

Chutah dim baksak lo hian a dul ah tak chuan a vin tlum ta pawk mai a, chemte chu a bur vu mai. Bsi chu a ang vak vak a, a ka atang chuan thisen a lo chhuak a. Chupa chuan a ka chhungah chuan a kut chu a han zen lut leh tanghal a, Bsi chu au pawh a au thei tawh lo. Reilote hnuah chuan a thaw rang tial tial a, a thi ta der mai.

******************

Tlai dar 2 a ri tawh a, Victor-a leh Bsi te chu hmuh tur an la awm lo. "Khawnge maw an awm reng reng le? Keichu ka ngaih a tha tawh hauh lo.." tiin Tluangtei chu a phun leh bul bul a. "Hawh teh u, ril pawh a tam tawh alawm. Thlam lamah va phei leh tawh zawk ang u, Victor-a te pawh chu an lo awm reng mahna." tiin Mawitea chuan phei a rawt ta a.

An vai chuan thlam lam pan chuan an kal ta a, an titi phei niah niah hlawm a. An thleng tep tawh tihah chuan an hma zawnah tak chuan Victor-a a lo lang thut mai a, an phu nasa hlawm kher mai. "Khai aaa...thianpa, min ti hlau dawn alawm mawle?" Jeffrey-a chuan a han ti a. Victor-a erawh chuan a han en hru hlawm a, "Khawnge in kal dawn a? Ka lo let leh dawn chiah a..." a lo ti a.

"Hei kan duhtawk tawh a, ril a tam tawh bawk nen. Eitur vel kan ngaihtuah ang chu kan lo tia...khawnge i kal reng reng a?" tiin Mawitea chuan a han zawt a. "Nia, ka thang kam ka zu en lawk alawm mawle." tiin Victor-a chuan a chhang a. "Ehe..i awk em?" tiin Nicky-a rui phur chuan a lo zawt vat a.

"Awk teh nang...a ngai ngaiin a lo la awm." tiin Victor-a chu a nui suk a. Rinhlelh hmel tak hian Tluangtei chuan Victor-a chu a en a, "Khawnge Bsi?" a han ti deuh hmuk a. Hriatthiam loh hmel tak hian Victor-a chuan, "Ka hre nang, in bulah a awm lo em ni?" tiin a lo zawt leh a. "In awmdun reng anilawm ni?" tiin Tluangtei chu a han vin deuh hlur a.

Jeffrey-a chuan zaizirin a bialnu Tluangtei chu a lo khap vat a, "Aa englo ania Bro, in bo dun daih sia...i bulah a awm turah kan ngai mai mai mawle.." zaidam tak chuan a ti a. "Thlam ah a kal te a ni lo maw?" tiin Victor-a chuan a han zawt leh hlawm a. "Thlamah te chuan nichin lawk khan ka va kal teh ang i tih kha...i kal leh si nange?" tiin Rsa chuan a lo zawt ve leh a.

"Kal nang...ka thangkam zawk ka zu en leh daih alawm." tiin a lo chhang leh a. "Umm..in hlauthawng hma thei emai. Thlamah chuan a awm aniang, va kal ang u.." tiin Mawitea chuan hma a hruai a, midang chuan an zui ta a. Tluangtei erawh chuan Victor-a chu a la ringhlel reng a, a awm a nuam thei hlawl lo.

*********************

Thlam chu an thleng a, inchhung an han lut chu an kat dawrh hlawm mai. Nicky-a phei chu lehlam hawiin a luak vak mai a, hmeichhe pahnih lah an tap nghal pur mai. An thiannu Bsi chu hruiin a lo inkhai a, inawkhlum ang mai hian lei chhuah tut hian a lo inthen nelh nelh mai. An au tuar tuar hlawm mai a, Bsi ruang chu Victor-a chuan mak tih hmel tak hian a en tlawk tlawk ringawt mai.

Zamzami phei chu a naupang ber a ni bawk nen, a chiai nasa kher mai. Mipa ho chuan theih ang tawkin an han buaipui a, Victor-a leh Mawitea chuan Bsi ruang chu an la thla a. Chhuatah chuan an mut a, mahse nunna anei tawh lo tih chu tuman an hai lo. "Enge awmzia? Engthil nge thleng hi?" tiin Tluangtei chu a rak chel chul mai a.

Jeffrey-a chuan a bialnu Tluangtei chu a kuah a, Bsi ruang chu en pawh a entir phal lo. Zamzami pawh Rsa chuan a kuahbet tlat a, midang zawng leh Victor-a chuan ruang chu an buaipui thung a. Mawitea chu a han ding hluai a, "Tu tih nge? Tu tih nge? Victor enge awmzia?" tiin Vicotr-a chu a vin lek lek ta mai.

"Ka hre biklo...engthil nge thleng hi ka hre bik lo.." tiin Victor-a chuan a chhang a. Tluangtei thinrim chuan, "Nangmah i ni...nangma tih vek a ni...Bsi hi i thah a ni." tiin Victor-a lam chu a va pan a, a awmah chuan ava chum ta vak vak mai. Midang ho chuan an lo pawt bet vat a, Victor-a ngaihdan a ni lo kher mai.

Rum zet hian Tluangtei chu a en a, ama hriat tham lek hian, "A dawt leh chu nangmah i ni ngei ang." tiin a han phun sap a. Mawitea pawh chu a upa ber e tilo chuan a mangang kher mai, "Engtin nge kan tih ang? Aww...avan pawi tak.." a ti vawng vawng mai a. Tap chung hian Zamzami chuan, "Police ko vat ang u.." a lo ti a.

Mahse Victor-a chuan, "Helai hmunah eng signal mah a awm lo, mi phone tur chuan kawngpui lam hnaih deuhvah han chhuah chhoh angai." a lo ti vat a. "Victor...enge awmzia..tu tih nge?" tiin Mawitea bawk chuan a han zawt leh a. "Ka hre biklo...tinge keimah kher min rinhlelh a?" tiin  alungawi ta bik hauh lo mai.

"Helai ram hi i hre chiang ber a, a titu tur awm ang chu i hre ngei ngei ang. Nge ni a nangma tih vek zawk hi em ni? Mawhhh.." tiin Nicky-a chu a pawr tan ta hle mai. Victor-a chu za lo tak hian a nui suk a, "Awww...animawwww? Chutiang chuan maw min lo ngaih a? Helaia awm ho zingah hian keimah chiah hi mihrang ka ni a, chuvang chuan ka tih angah in ngai amaw? Ka that lai i hmu em ni? Nangmah zawk pawh i nilo tih tunge sawi thei?" a ti ve tak sak sak mai a.

Nicky-a thinrim chuan, "Ve khanglang chuan...i pawr ve ngam ami?" tih pah chuan Victor-a chu ava pan hnai a, a va hnek ta siah mai. MAhse Victor-a chuan na ti hmel pawh a pu eih lo, huat hmel zet hian Nicky-a chu a melh run ringawt mai a. Mawitea chuan lo dang vatin, "A tawk a tawk...intibuai lovang u...ngawi vek rawh u..." tiin a khap dai ta hlawm a.

Victor-a chuan Bsi ruang chu a han en vang vang a, "A hrawkah rehna hnu hma a awm a, a dulah hian vawi 2-4 vel vih a ni bawk a nih hi...tualthattu hi kan bul hnaiah hian ala awm ngei ang." a ti a, Zamzami chuan a hlau kher mai. "Kei chu ka haw duh....heta awm hi ka duh tawh lo." tiin a lo rak chhen mai a.

Vin zet hian Nicky-a chuan, "I ninawm...lo ngawi mai mai teh..rilru hah nen, kan vai hian haw kan duh vek..bengchheng lutuk." a lo ti hrep mai a. Mawitea chu a han ngawi vang vang a, "Jeffrey, nang leh Tluangtei leh Zamzami te hian motor kan dahna lam va pan vat ula. Keini mipa hovin hetah kan lo nghak ang che u, signal a awm veleh Police phone nghal bawk ang che u." a ti a.

"Mahse...kalkawng hi ka hrechiang vak hleinem. Mipa pakhat tal lo kal ve leh se, heta mipa lo awm khawm vek pawhin awmzia a nei chuanglo." tiin a lo hnial a. "Mawite, nangmahni huan ania, nangman i hrechiang ber. Jeffrey-a nen hmeichhiate hi motor awmna lamah lo han kalpui ula, police te chu phone vat ang che u." Zorama chuan a lo ti ve bawk a.

"Mahse tualthattu hi helai hnaiah hian ala awm reng awm si a, engtin nge niang? Kan kalkawngah te min lo tibuai ta se, keichu ka hlau ania.." tiin Tluangtei pawh chu a tap pur tawh mai a. Victor-a chuan a lukham hnuaia pistol chu a va la a, "Hei hi keng rawh Mawite, mahse a mu pathum chiah a awm tawh ania." a ti a.

"I kap thiam ringawt ami, Mawite....Victor, nangmah zawk lo kal mai la." Jeffrey-a chuan hlauthawng tak chuan a han ti a, "Nilove..keimah zawk le. Kal ang u, anih loh chuan kan tlaichhe hlauh palh ange." tiin Mawitea chuan pistol chu a la a, Jeffrey-a leh hmeichhe pahnih te nen chuan an motor awmna lam chu an pan ta a.

*******************

Bsi ruang chu puanah an tuam a, thlam kawtah chuan an dah a. Rsa chuan ruang chu a han en vang vang a, "Tu phiangsen nge mawni le? Ka hmuh hun chu a chak lo khawp ang." tiin a inhrosa vak vak a. A bulah chuan ngawi reng hian Victor-a chu a thu a, "Victor, tu tih nge ni ang?" tiin a han zawt leh tawp a.

Victor-a chu a ngawi vang vang a, "Zep lo chuan...hmanah chuan helai hmunah hian thil rapthlak tak a thleng tawh a...mahse kum 20 chuang  aliam tawh." a ti ta mai a. Zorama leh Nicky-a te pawh chu an lo kal hnai vat a, "Eng a? Eng thil maw?" tiin Nicky-a chu a rawn pawr lehnghal khawp mai.

"Nizan in mut hnu khan Mawitea nen khan kan titi leh deuh nual a, in bulah chuan ka sawi ta lova, MAwitea bulah khan ka sawi a. Kum 20 chuang liam ta khan helai hmunah hian chhungkaw pakhat an awm thin a, fapa pakhat an nei a. Mahse chhungkaw nu ber leh pa ber chu vawikhat an inhau nasa lutuk chuan kut an inthlak ta hial a, tichuan a nupui zawk chuan a pasal chu a that ta mai a. A fapa hmuh lai reng chuan amah pawh chu a in vit hlum ve nghal bawk a ni an ti a, mahse thudik a ni nge nilo chu ka hre lo." Victor-a chuan a han ti a.

"Engtin nge i hriat? Chuan an fapa chu engtin nge a awm zel?" tiin Rsa chuan a lo zawt leh vat a. "Ka pa hian min hrilh thin a, ka pa pawhin mi sawi bak a hre bik chuang lo. An fapa chu a bo ta daih a, tun thleng hian a thi nge a dam tih pawh tuman an hre lo. Mahse hman deuh khan helai hmunah hian palian ve tak pakhat chu a vak kual thin e an tia, ram kalte leh ramriak ten an hmu zauh zauh a ni awm e." a han ti leh a.

"Chupa chu a ni ngei ang...khawiah nge maw a awm ni...ka va han sawisa dawn chiang tak em!" tiin Nicky-a chu a inhrosa leh pung pung mai a, hmuhsit hmel tak hian Victor-a chuan a en reng a, a nui ang suk suk zel lehnghal a. "Anih chuan i thil sawi chu thudik lo ni ta se, Bsi thattu chu tunge a nih inzawh vak a ngaih dawnloh chu.." Zorama chuan a lo ti ve bawk a.

"Jeffrey-a te chu ka va ngaihtuah em ve awww....ka awm a nuam thei thlawt lo." tiin Rsa chu a phun leh nuah nuah a. "Rs, tihian lo awm ula..lo kalhrang miah suh ang che u aw." tiin Victor-a chu a ding thut a. "Khawnge i kal dawn?" Rsa chuan a lo ti hu mai. "Khua ala thim lo bawk a, Mawitea te kha ka han zui ve zawk teh ang." a ti ta mai a.

"A tullo lutuk...tualthattu hi helai hnaiah hian ala awm ve i rin thu i sawi zo chiah a, a tih chi loh reng reng." tiin Rsa chuan a lo hnial vat a. "Nilove..hetah chuan mipa pali lai kan awm a, keimah hi awmlo pawh ni ila...pathum tho inla ni dawn. Anni chu mipa pahnih chiah an ni si a, ka ngaihtuah emai, hmeichhia an hruai bawk si." a han ti leh a.

"In venna tur hmanrua tal keng rawh aw...i kal dawn chuan.." Zorama chuan a lo ti ve bawk a. "Nia ka keng dawn alawm, ruang hi heta inlo ven angai a ni. Police te lo thlen hma chu kan duh duh a lo khawih kual ve ngawt chi lah a ni silo, tihian minlo nghak ru." tih pah chuan a chemte hriam tak mai chu a han hum ren rawn a, a kal ta daih mai a.

******************

Kawng chanve pawh an la thleng lo, an hlauthawng bawk si nen chuan Zamzami leh Tluangtei te chu an hah tawh kher mai. Kawng chanve pawh an thlen hma in an tui pai chu an inzo der mai a, tui in tur an nei tawh bawk silo chu an dang a ro tlang kher mai. "Chawl lawk ang u, ka thi dawn.." tiin Zamzami chu a thu sawp nuai a, Tluangtei pawh chu a chau tawh ngang aniang, a thu ve hnawk mai.

"Engtin nge a thlen theih? Tu tih nge ni ang? AWii..keichu ka duhlo...kan thi ve ngei dawn nih hi.." tiin Zamzami chu a tap leh nghal titih der mai a. "Zam, lungngai suh..i bulah kan awm hi. Engtin mah kan awm lovang, tap tawh suh." tiin Mawitea chuan a hnem a. Zamzami chu a rawn hawi chhuak a, Mawitea hnunga mipakhat hmaikawr vuak, sam hraw tak mai lo then thu a hmuh chuan a au vak a, a zuang tho nghal zawk mai.

"Nilo..sawpa saw tunge?" tiin Mawitea phenah chuan a biru nghal a, midang pawh chuan an hmu ve a. An hma zawnah chuan Bsi thattu, Hmaikawr-a ngei mai kha an awmna atanga pen 20 velah chuan a lo ding ve khur mai a nih chu. Tluangtei chuan thei leh theilo hian, "Saw...sawpa saw alawm..sawpa saw alawm..Jef..Jeffrey, sawpa saw alawm ka hmuh chu.." tiin a kawk a, hlauh avang chuan a khur dar dar bawk a.

Victor-a silai pek chuan Mawitea chuan chupa chu a tin a, "Tunge i nih? Sawi rawh..." tiin a han vin deuh thak a. Mahse a chhang lo, a mitmeng sen rum mai chuan Mawitea chu a en vang vang a, a han thlek leh deuh a, hmeichhe pahnihte chuan a chezia chu an rap takzet. Jeffrey-a pawh chuan a bula thing tum chu la in, "Zawnga...tunge i nih kan tih chu?" tiin a lo vin ve bawk a.

Mahse chu tualthattu nunrawng tak chuan a hlauh loh hmel kher mai, chhan pawh a la chhang chuang lo. Chutah anlam pan chuan a lo kal phei ta mai a, "Lo kal hnai suh...anih loh chuan ka kap ang che." tiin Mawitea chuan silai chuan a tin leh a. Mahse engah mah a ngai lo, a lo pan hnai zel mai a.

"Kap rawh...kap mai rawh.." tiin Zamzami chu a hlauthawng kher mai, chupa lah chuan a rawn pan hnai zel si. "Zawnga...ding rawh..ka kap tak tak dawn che ania." a han ti leh a, mahse a ding chuang hauh si lo. Jeffrey-a hlauthawng pawh chuan, "Kap rawh, kap rawh.." a lo ti ve vak vak bawk a, zawimuang chuan an hnung tawlh zel a.

Mawitea pawh chuan a kap ta a, tualthattu leather jacket ah chuan a fuh a, mahse engtin mah a awm lo. A awm bawrah chuan a han kap leh a, engtin mah ala awm chuang lo. A rawn pan hnai zel a, "Kap leh rawh..a chalah sawn kap rawh." tiin Jeffrey-a chu a lo au leh chel chul mai a. "Mu pakhat chiah a awm tawh...." Mawitea chuan a han ti khur dar dar a.

Mahse chupa chuan a rawn pan hnai zel si a, Mawitea chuan a kap leh ta. Mahse engtin mah ala awm chuang lova, hliam pawh a nei eih lo. Silaimu kha chuan a va fuh ngei mai a, mahse a thawmhnaw ah te chuan silaimu kahna hnu hma emaw, thisen emaw pawh engmah a awm eih silo.

Silaimu chu a zo ta a, "Hrep taka.." tih pah chuan pistol chuan Mawitea chuan chupa chu a han vawm ringawt a, ala vawm thelh zui. Hnek a han tum a, mahse a kutah lo mansakin a elh tuar mai a. Ruh tliak tih hriat tak mai hian MAwitea ban chu a ri tuar a, a vun chhanah chuan a rawn pawng chhuak thei hial a.

Jeffrey-a chuan a thing ken lai chuan Hmaikawr-a luah chuan a han hlap pawp mai a, chhete in a hnungtawlh awrh chauh. A rawn hawilet leh a, Jeffrey-a chuan a han hlap leh pawp a. A thingthi ve ta hnawk a, mahse a rawn tho chhuak leh nghal. Vuak leh a han tum chu thing chu a lo man a, Jeffrey-a chu a tlawh thal thuai mai.

Zamzami leh Tluangtei te chuan Jeffrey-a chu an kai tho vat a, Mawitea erawh a ban dawm vang vawng pah chuan a let reng mai a, a na ti lutuk chu a rum vawng vawng mai. Chutah thingtum hmang chuan Mawitea ban ruh tliak lamah chuan Hmaikawr-a chuan a han hlap leh ta siah siah mai a, MAwitea chu a rak nasa kher mai.

A lu ah a hlap leh a, thisen a per chhuai mai. Jeffrey-a chuan a chhan ngam ta ngang lo, "Tlanchhe ru.." tiin an thianpa MAwitea chu an tlanchhiat san ta ringawt a. Hmaikawr-a erawh chuan ala duhtawk hauh lo, Mawitea hmai chu hmuh tlak loh khawp chuan a vaw sawp vek mai a, MAwitea pawh chu a thi leh ta der mai.

*********************

"Victor-a chu awww..a han kal ve ngawt a. Bsi thattu nen hian an han intawng palh ang tih chu ka hlau ngei mai, Mawitea te pawh chu an rei khawp mai." tiin Rsa chu a han phun nuah nuah a, khua a thim tep tawh. "Ho emai, duh leh kal daih rawh se. Duh leh lo that daih rawh se, a inla pawr ve khanglang a." tiin Nicky-a chu a lo la inla pa ngei mai.

"Ve pung pung a che, i mawl thei lutuk. Chubakah kan zingah helai hmun hi Victor-a'n a hre chiang ber a, amah hi kan mamawh ber." tiin Zorama chuan  a lo khap a. An pathum chuan pawnah chuan an la thu reng a, tukthuan an ei bak chu engmah an la ei lo. "Ka ril a tam hle mai, eitur kan dap lawk ange." tiin Rsa chu thlam chhungah chuan alut a, "Keipawh a tam ta khawp mai." tiin Zorama pawh chuan a zui lut ve a.

"Tun anga riltam lo la sawi, mangan mah nakalaia.." tiin Nicky-a chu  aphun bul bul a, meizial chu a han tan a. A zuk lai mek chuan a sira mipakhat kal phei zeuh chu a hmu hman thuak a, a zuang tho nghal. A han hawi kual a, a thiante han auh mai chu a tum hman ut ut a. Mahse ganja a zu deuh reng bawk nen, ala kai deuh bawk nen a hmusual mai mai a nih ringin a thu leh mai a.

Second 10 vel hnuah chuan a ngai ang bawk chuan thlam hnung lam pana kal phei zeuh chu a hmu leh ta, a ding leh nghal vat a. A ngaih a tha ta hauh lo mai, a thiante pahnih pawh chu a la au duh mai chuang lo. A bula thing chu la in thlam hnung lam pan chuan a han phei ve ngawt a, mahse ava thlen chuan tumah an awm lo.

A nui suk a, "Huiham...duh ai chuan ka kai deuh a ni." tiin a lu a han hiat nuah nuah a. Hnunglam a hawi leh chiah chu a hma zawn takah chuan Hmaikawr-a chu a lo awm reng mai, a mitmeng sen rum mai chuan a lo melh khur mai a. A phu nasa lutuk chu a dingngil nghal zawt a, tawng tum chuan a han ang zuau a.

Mahse Hmaikawr-a chuan a rek thut a, leiah chuan a kherh tlu a. A khup chuan Nicky-a ban pahnih chu a thing thit tlat a, theih tawp chuan a han rek leh a. Nicky-a chu a kawng achin hnuai lam bak a ti che thei silo, chu Hmaikawr Paliana lah chu a chak em em mai bawk si. Chutah Hmaikawr-a chuan a jacket ipte atang chuan darthlalang kehnawi tam tak hi a rawn tham chhuak a, Nicky-a ka chhungah chuan a thun ta vek mai.

A hmui chu  ahup sak nghal a, a thut bet tlat bawk a. A tal vel na lamah chuan Nicky-a chuan a ka chhunga darthlalang keh nawi hriam tak tak te chu a dawlh ta nual hlawm a, a hnar atangte chuan thisen a rawn chhuak a. A zawi tial tial a, a zal ta hmak mai. Hmaikawr-a chuan a hmui a hupna chu a thlah a, a ka atang chuan thisen a lo chhuak zawih zawih mai a, Nicky-a pawh chu a thi ve leh ta der mai.

*********************

Thui fe an tlanchhiat tawh hnuah pawh chuan Hmaikawr-a chuan a rawn um zui ta lem lo a ni tih an hria a, Tluangtei, Zamzami leh Jeffrey-a te chu an chawl ta a. An hah lutuk chu an thaw hlawi hlawi hlawm mai a, "Ui, tunge khapa kha...ramhuai em ni?" tiin Zamzami chu a tap hluam hluam a.

"Nilo vang, mihring aniang. A insiam chhe mai mai aniang, hmaikawr avuah a nih kha.." thawk hlawp hlawp pah chuan Jeffrey-a chuan a lo ti a. Tap chung hian Tluangtei chuan, "Bsi a that tawh a, tunah U Mawitea...kan vai hian min thah vek a tum a ni ngei ang." a lo ti ve bawk a. Tiang emaw..hmanrua engemaw tal zawng rawh u, inven nan." tiin Jeffrey-a chuan hmeichhe pahnihte chu a hrilh a.

Zamzami chu a han hawi kual a, "Jeff, kan awmna lai hi khawilai nge...i hria em?" a han ti a. Jeffrey-a pawh chu a hawi kual a, "Kan kalna lam kha  ani tawh lo, khawilai nge ka hre biklo. Khua a thim tan der tawh bawk si, engtin nge kan tih ang awww.." tiin a inngaihtuah vang vang a.

********************

"Nicky-a chu a ril a tam velo amawni le? Enge maw pawnah a tih reng le." thil ei pah chuan Zorama chuan a han ti a. "Ka'n ko lut ange.." tiin Rsa chu a chhuak a. Mahse Nicky-a hmel reng reng hmuh tur a awm lo, a han zawnkual takngial pawh chuan a hmu mai si lo. Thlamah chuan lut lehin, "Zoram, Nicky-a a awmlo ania." tiin ava hrilh a.

Zorama pawh chu a rang a rang chuan a chhuak ve nghal a, an pahnih chuan Nicky-a chu an au vak vak a. Mahse thawm takngial pawh an hre silo, thlam hnuglam pan chuan an kal leh a. Chutah le, an thianpa Nicky-a ruang chu a lo let reng mai. A ka leh hnar atang thisen a chhuak a, a ka chhungah chuan darthlalang kehnawi te pawh chu a lo la awm a.

"Ehe...ani theilo...Nicky." tiin Zorama chu a thingthi nghal a, mahse Nicky-a chuan nunna reng a nei tawh lo. "Nicky, a ni theilo." tiin a tap a, a thianpa Nicky-a ruang chu  a kuah ngawih ngawih mai a. Rsa erawh ngawi rengin a ding a, a hma lam chu mitkhap miah lo hian a en vung vung ringawt a.

Zawi sap hian, "Zoram..Zoram..saw enteh..tunge?" tiin ahma zawn chu a kawk a, Zorama pawh chu a han hawi chhuak a. An hmaah chuan Hmaikawr-a ngei chu a lo ding run mai a, a kut dinglamah chuan chemte a keng bawk. Zorama chu a ding a, "Zawnga, nangmah em ni ka thianpa thattu hi..mawh sawi rawh.." tiin a vin khur khur a.

Mahse Hmaikawr-a erawh chuan a chhang lo, a thlek deuh vak vak ringawt a. Rsa erawh chuan a hlau angreng hle mai a, a khur ru zawih zawih mai. Zorama bawk chuan, "I hre khawp ang..ka that ve dawn che.." tiin ava pan hnai a. Mahse Rsa chuan a lo pawt let a, "Zoram...chemte a ken saw..a that ve mai ang che." tiin a lo dang vat a.

Mahse Zorama thinrim chu a insum zo ta lo, a va tlan phei a. Hmaikawr-a chuan awlsam te hian a lo rek chat a, leiah chuan a theh thal tawp mai. Chuveleh ahmaa Nicky-a thing tum ken chu Rsa chuan a hmu fuh hlauh mai a, a chhar vat a, Hmaikawr-a hnungah chuan a va vaw pawp mai a, chu thing pawh chu a bung hmawk nghe nghe.

Mahse na ti awm ang pawhin a lang lo, a pei deuh khut ringawt. Chutah Rsa chu a rawn melh a, a chemte ken hmang chuan vih a tum ta mai a. A theih ang tawk chuan a lo inveng a, mahse Rsa malpuiah chuan a vit tlum ta thawih mai. Rsa chu a thal tawp a, a na ti lutuk chu a rak chiam chiam mai a.

Zorama pawh chu rawn tho chhuak lehin leia vaivut chu a tham a, Hmaikawr-a mitah tak chuan a vawm vak mai a. Hmaikawr-a chu a mengtha hleithei ta bik lo, a mit chu a tuai vut vut a. Chuveleh a bul hnai vel chu a chemte ken chuan a han vai kual vak vak a, chu chu remchangah la in Zorama chuan Rsa chu a kai tho vat a.

Rsa kuah chung chuan an tlanchhe ta a, mahse Rsa chu a kal hleithei tlat lo. An han tlu bawk dun leh thlawp a, mahse mak tak maiin hnunglam an han en chuan Hmaikawr-a chu a lo bo leh daih tawh. Thlam lamah pawh chuan let ngam tawh lovin thei leh thei lo chuan an han inkuah leh a, ramhnuai lamah chuan an kalna tur ber pawh hre lovin an tlanchhe ta ringawt a.

*****************

Jeffrey-a te chuan kawng chu an bo der mai, an kual an kual ringawt mai a. Chutah khua a rawn thim ta, an awmna lai chu ramhnuai a nih avang chuan a thim bik em em mai lehnghal. An phone light hmang chuan a han enkual a, thosi leh vaihmite karah chuan an kalkawng chu an risk pawp pawp a ni ber mai.

An kal thui zel a, "Ehe, helai hi Victor-a thlam panna kawng kha a ang riauvin ka hria." tiin Jeffrey-a chu a rawn tawng chhuak hlawl mai. "Ui..kan let leh tihna em ni?" Zamzami chuan a lo ti ve bawk a. "A kalkawng hre ber Mawitea lah a thi tawh bawk si...umm..thlam lam chu iva pan phawt mai teh ang." tiin Jeffrey-a chuan hma a han hruai leh a.

"Mahse Jeff, thlamah chuan khapa kha lo awm leh ta se...midang ho pawh alo that vek tawh thei asin." beidawng tak chuan Tluangtei chuan a han ti a. "Nilove...an awm em em ang. Fimkhur takin kan kal dawnnia, min lo zui zel ru." tiin Jeddrey-a chuan a thlamuan hram hram a, hreh tak chung chuan Tluangtei leh Zamzami te chuan an zui ve zel a.

Thui vak lo an kal leh hnuah chuan Victor-a thlam chu an thleng ta tak tak a, Jeffrey-a pawh a thaw huai mai. Muangchang chuan an pan hnai a, "Ehe, Bsi ruang a awm tawh miah lo. Tah sawn kan dah sia, a bo daih." tiin Tlaungtei chuan a hmaa Bsi ruang an dahna lai chu ava kawk a.

Ngaih tha bik hauh lo mahse Jeffrey-a chuan, "An la sawn aniang, min lo zui zel ru." tiin a han thlamuan hram hram zel a, thlam kawngka bul an thleng ta. KAwngka chu Jeffrey-a chuan a han kik karh karh a, "Victor, Nicky...in awm em? Zoram..RS??" tiin a han au vak vak a, mahse a reh diak mai.

Chutia chhangtu an awm tak silovah chuan Jeffrey-a chuan, "Lut tawp mai ang u." a han ti a. "A chhungah hian a lo awm reng ange.." hlauh hmel tak hian Zamzami chuan a lo ti khur leh dar dar a. A tiang ken lai chu hum ngheh sauh sauh pah  chuan Victor-a chuan, "Tawlh hnung ru.." a han ti a.

Chutah kawngka chu a han chhuih hawng thuai mai a, tiang vai vak vak chung chuan Jeffrey-a chu a han lut a. Mahse tumah an awm lo, a lo reh thuap mai. Light bulb tereuhte pakhat chu a lo eng phut ringawt a, rannungin an lo bawm laih laih bawk a. "Kawngka kha chhunglam atangin kalh vat rawh u." Jeffrey-a bawk chuan a han ti a.

Kawngka chu an kalh a, tichuan thlam chhungah chuan an pathum chuan an tawm ta thap hlawm a. "Victor-a te pawh chu khawnge maw an awm le?" tiin Jeffrey-a chu a han phun leh nuap nuap a, "Keichu Victora hi ka la ringhlel fan, kha pa hmaikawr vuah nen khan an pian pawh a in ang chiah chiah in ka hria." a han ti leh hram a.

"Mahse khapa te kha chu a sam a sei a, a inphiar bawk kha. Victor-a te chu mipa sam tawi pangngai ania, chubakah a mitmeng a hring deuh nghulh bawk. Mahse kha misual kha chu a mitmeng pawh a sen vek lehnghal, keichu ramhuai  a nih ka ring zawk mah." Zamzami chuan a lo ti ve bawk a.

***************

Mau hmun niawm takah chuan Zorama leh Rsa chu an inkuah phei hlawk hlawk a, Rsa chuan thisen a hloh tam tawh kher mai. A chau tawh em em a, a kal tha hleithei tawh lo. "Zoram..khawngaihin...chawl lawk ang...ka ke hi ana tawh lutuk." tiin a tap lek lek mai a. Zorama chuan thingkung pakhat bulah chuan a kuah phei a, thingkung hnuaiah chuan an thu chawl ta a.

"Kha..khapa kha tunge?" tiin Zorama chu a thaw hlawp hlawp a. "Ka hre biklo...Bsi thattu pawh kha khapa tho kha a ni ngei ang." tiin Rsa chuan a lo chhang a. "Victor-a pawh a that tawh ani mai lo maw? Keimahni chiah hi kan bang tawh amawnile?" a han ti leh bul bul a. "KA hre lo chupawh...enge thil awmzia hi pakhat mah ka hre lo." Rsa chuan a lo ti leh a.

"RS, hawh teh...kan kal vat angai..a hla tawh lovang. Motor tlan ri niawm tak tak pawh ka hre thei tawh ania, kawngpui kan hnaih tawh dawn niin alang." tiin a tho a, Rsa chu kai thawh a tum a. Mahse Rsa chu a tho thei tlat lo, a ke chu na a ti em em a. "Nilo, Zoram...min kalsan mai rawh." a ti ta ringawt a.

"Nilove thiana, khawiah mah ka kalsan lovang che." tiin Zorama chuan a kutah a vuan tlat a. "Zoram..thianpa..hetah hian ka lo awm ang. Nangin kawngpui han thleng vat la, signal awmna i hmuh veleh Police te i hrilh vat dawnnia." Rsa chuan a lo ti leh a. "Engtin nge ka theih ang? Ka kalsan dawn lo che..kan thi a nih pawhin kan thi dun ang, ka kalsan dawnlo che." tiin Zorama chu a tang tlat mai si.

"Zoram...hetah ka lo awm ang, thawm nei miah lovin ka lo biru anga...min hmu lovang. Han kal vat zawk rawh..ka lo awm reng ang." a ti a. Zorama chuan a hreh hle mai, "Awle...thawm nei miahlo khan lo awm reng rawh aw.. ka lo let leh vat ang." tiin kalsan a han tum a. "Leh lawk aw Zoram." tiin Rsa chuan a ko ding leh a.

"Aw..enge ni?" a lo ti vat a. Inthlahrun hmel tak hian, "Englo, sawi hun lo pawh i ti maithei a. Mahse sawi ngei chu angaiin ka hria, ihmaw..nikuma Esther-i nena in inthen khan maw...Esther-i bula dawt a lo puh tu che kha...keimah ka nia. A chhan chu Esther-i kha ka duh em a, chuvang chuan buaina bul pui ber chu keimah ka ni. Mahse i tawrh nat zia te ka hriat khan ka inchhin em em a, ka insawi ngam tawh bawk silo. Thianpa, zan in hian ka damchhuak dawn em ka hrelo, chuvang chuan ka dam lai ngeia thudik hrilh che ka duh a ni. Min ngaidam rawh aw.." mittui tla teuh chung chuan a han ti a.

Zorama chu a ngawi vang vang a, "A pawi love..ka ngaidam che. Min lo nghak reng rawh aw, ka lo kir leh vat ang." tiin a kalsan ta a. Esther-i an tih hi Zorama bialnu a ni thin a, mahse Rsa hian Esther-i chu a lo ngaihzawn ve avangin Zorama chu dawtin a puh a, midang nei angin Esther-i bulah chuan a sawi ta a, Esther-i chuan a then phah ta nge nge a ni awm e.

*********************

Ngawi renga an thutkhawm lai chuan Victor-a bedroom lamah chuan tui far kauh kauh ri hi an hria a, a tirah chuan engah vak an ngai lo. Mahse chutia a bedroom a tui far koh koh chu Jeffrey-a chuan mak a ti deuh va, ruah a sur bawk silo. "Engemaw far ri kauh kauh chu le..a hrim hrimin bedroom hi kan la check miah lo." a han ti a.

"Tunge maw awm vak se i tih le? Mi an awm anih chuan kan thawm hria in an rawn chhuak em em ang. Chubakah engkim mai hi ka hlau deuh vek hialin ka hria...ka awm a nuam thei lo." Zamzami chuan  alo ti a. "Kan en reng reng teh ang." tiin Jeffrey-a chu a tho a, bedroom lam chu ava pan a.

Kawngka chu a han hawng a, tho tle(flies) thlawk nuai nuai ri a hre thut a, room chhung chu thisen thang rim a lo nam rum rum mai. A lo thim ruih mai a, Jeffrey-a chuan a hnar a hup nghal. Room light chu a han on eng a, chutah a ding ngil nghal zawt mai. A hmui a hup a, a tawlh hnung nghal dawr mai.

Chutia Jeffrey-a mak tih hmel taka a ding khawng reng mai chu Zamzami leh TLuangtei chuan an lo en reng a, "Tinge a? Enge awm a?" tiin Tluangtei chuan a lo zawt nghal vat a. Mahse Jeffrey-a chuan a bialnu zawhna pawh chhang lo chuan, "Nilo..a ni thei lo." tiin a ang hlawi hlawi ringawt a.

Tluangtei leh Zamzami ngaih chu a tha ta hauh lo mai, "Enge awm a?" tiin Tlaungtei chu a va phei a, Zamzami pawh chuan a zui ve nghal a. Mahse Jeffrey-a chuan Tluangtei chu lo dang vatin, "Nilo..en suh.. kal suh u." tiin a pawt bet a. Mahse Zamzami erawh chu ava dak hman hram a, a thil hmuh chuan a ti hlauvin a ti thlabar takzet.

Khum bulah chuan Bsi ruang leh Nicky-a ruang te chu a lo inkhai a, saruak vekin an awmdun lenghal. Tho tle in an lo bawm nuai nuai a, Nicky-a hrawk thler atang chuan thisen chu chhuatah a lo far ri kauh kauh hi a lo ni a. Kawngkhar chu Jeffrey-a chuan a khar vat a, Nilo..ka duh theilo.." tiin Zamzami chu a tap a, Tluangtei pawh chuan a hmu ve hman.

************************

Thim zingah chuan ngawi reng hian Rsa chu a thu reng a, thawm a nei ngam lo. A bul vela hnim te chu a rawn ri leh rek rek thin a, a phu nasa thei kher mai. Rul an awm ang tih te pawh a hlau ve bawk nen, Hmaikawr-a a hlau bawk nen. A thlan chuan a bual huh vek tawh a, zan khawvawt tak mai pawh chu a tan chuan lum tak a ni.

A hliam chu na a ti tawh bawk nen, thisen a hlauh hnem tawh em bawk nen. A chau tawh ngang a niang, a muhil ta der mai a. Minute 10 pawh a la muhil hman lo, a bul hnai vela pen thawm chuan a ti harh a. Hmaikawr-a a nih ngei ringin a hlau kher mai, chutih rual chuan a thianpa Zorama a nih hram a beisei ve hle bawk.

Mahse maw, a va pawi em. Light chuan ahmaiah tak a arawn chhun a, a phu zawk mai. A hlauh ang ngeiin Hmaikawr-a ngei chu a lo ni a, a awmna lam chu ala rawn pan mek zui. A thi ngei dawnin a inhre tawh hial a, a mangang takzet. Tlan chhiat tumin a han inbeng kang a, mahse a malpuia hliam na tak mai chuan a tur ut ut mai bawk si.

A thu leh hnawk a, tih ngaihna dang a awm ta lo. A thihna tur chuan a rawn pan mek si a, a rilru chuan a tawngtai mawlh mawlh mai. A hma zawn takah chuan Hmaikawr-a chu a rawn ding ta, "Khawngaihin....khawngaihin ka thiante kha chu chhuah hram rawh. I duh chuan kei hi min that rawh." thei leh theilo hian a han ti tawk tawk a.

Mahse a chhanglo, a han thlek deuh vang vang a. Rsa bawk chuan, "Enge i duh? I pawi sawi kan nei em ni?" a han ti leh a. MAhse a la chhang chuang lo, a ding ngai chuan ala ding reng a. "Tunge i nih....sawi rawh..tunge i nih?" tiin a han vin leh khur khur ringawt a, enga tan mah ala ngai chuang der lo mai.

Rsa samah chuan a tham thut a, thingkung nghenchhan chuan a din tir a. Chutah na em em hian Rsa hmaiah chuan a han hnek siah mai a, a thal tawp mai. A leather jacket ipte chhunglam atang chuan chemte chu a phawrh a, dim baksak lo hian Rsa beng dinglam chu a han hlep thla hlawk mai a nih chu.

Thisen a chik tuar tuar a, Rsa na ti lutuk chu a tal vak vak mai. Mahse tlangval luhlul ve tak Rsa chuan a thi dawn tho tho tih  ahriat vang nge, khawngaihna a dil chuang bik hauh lo. "Kha zawng kha em ni? Min that ta che...zawnga.." tiin ala cho nasa mai a. Chutah Hmaikawr-a chuan Rsa chu a thutbet a, chemte chuan a tin ta vang vang mai a.

Silai a rawn puak dur a, Hmaikawr-a chu a tlu tawp mai. Silai puak thawm lo chhuahna lam chu hmanhmawh zet chuan Rsa chuan a va en vat a, putar pakhat hi ulhbun kengin a lo ding reng mai a. Chu putar chu rawn pheiin, "Tlangval, i tha maw?" tiin Rsa chu rawn kaihthawh a tum a.

Mahse Rsa chuan a lo hlau deuh nge ni, "Min khawih suh..tunge i nih?" a lo ti vak vak a. "Hlau suh..i him tawh e..hlau reng reng suh." tiin putar chuan a lo thlamuan a. "Tunge i nih a?" tiin Rsa chuan a han zawt leh a. "Sa ka chang a, kah tur ka hmu zo lova, ka haw lamin in thawm ka hria alawm le. Hepa hi tunge a? Engthil nge thleng a?" tiin putar chuan a han zawt let a.

"Ka pu...nakinah ka hrilh ang che. Hepa hi kalsan vat zawk teh ang, ka thiante pawh khawnge an awm ka hrelo. An thi nge an dam pawh ka hrelo, hepa hian a mal te te in min thah a tum a ni." a han ti hluam hluam a. Putar chuan a kai tho a, a benga hliam dawm vawng vawng pah chuan Rsa pawh chu a rawn ding chhuak ve ta a.

Chutah Hmaikawr-a chu a rawn tho leh ta thut mai, chemte chu a lo la hum reng chu niin. Putar chu rawn vih a tum a, mahse Rsa chuan putar chu a lo namsawn hman hlauh a. Putar banah chuan a vit thawi fua mai a, a tha neih zawng zawng hmang chuan Rsa chuan Hmaikawr-a chu a han bawh ve ta ngawt mai a.

Hmaikawr-a pawh chuan chemte chu a thlauh a, putar pawh chuan a silai chu a la thlauh ve leh ta nghal a. Light engmah awmlo bawk nen, thla eng ruai ruai hnuaia inbei an ni bawk nen, a hahthlak duh khawp ang le. Rsa chuan a han hnek ve vak vak a, mahse Hmaikawr-a chuan a lehthal rang ngei mai.

Rsa chu a han thutbet leh a, a hnek ta siah siah mai. Putar chuan hnunglam atang chuan a theihtawp chhuahin a rawn rek ve leh bawk a, mahse putar pawh chu a lo theh thal thuai mai a. An pathum chuan an inchei ta chiam hlawm mai a, Rsa lah hliam a nei bawk nen, putar lah a lo chak em em bik vak silo nen.

An hneh lo dun ngang mai, Rsa leh putar chu an inthal chhawk zak zak mai a. A tawpah chuan putar chuan a silai chu a hmu fuh leh ta hlauh mai le, Rsa a reh beh lai chu remchangah la in silai chu a han kau a. Mahse a mu a awmlo, a bagah a dah daih si. A bang chu a han dap kual leh a, a thim em avang chuan a dap fuh mai bik thei silo.

Hmaikawr-a lah chuan Rsa chu a rek hlum dawn der mai, mahse vanneihthlak takin putar chuan a bag chu a dap fuh ta. Silai mu chu a thun sawk sawk a, hmuchiang lo hle mahse Hmaikawr-a chu a tin a, a han kap ta thuai mai a. A kap fuh leh ta hlauh mai, a eu zawk a, mahse mak tak maiin a rawn ding chhuak lehnghal.

Thinrim hmel em em hian putar awmna lam chu a rawn hawi va ta, mahse putar chuan a silai hmang chuan a luah a lo hlap leh siah mai. Hmaikawr-a chu a thal tawp a, an bul lawka kham awih lutuk lovah chuan a lum thla ta tup tup mai a. Rsa chu a rawn tho a, a thaw hrawk hrawk mai.

"TLangval, i tha maw?" tiin putar chuan ava buaipui nghal a. "Aw..ka tha e...a thi em ni..khawnge a awm?" a lo ti nghal chel chul mai a. "Aw...helai khamah hian a lum thla..a thi em em ang." tiin putar chuan a lo chhang a. "Ka pu, ka thianpa Zorama kan zawn angai...ka thiante dang pawh dam an la awm ang. Khawngaihin min pui rawh....khawngaih takin." tiin a ngen lawm lawm mai a.

********************

Rilru hah tak chuan Jeffrey-a te chu thlam chhungah chuan an tawm thap mai a, "Jeff..engtin nge ni dawn?" tiin Zamzami chu a tap reng tawh mai a. Chutiang bawkin Tluangtei pawh chuan, "Sawi chiang rawh...hetah hian kan awm reng dawn em ni? Kan thiante ruang pahnih bulah hian kan awm reng dawn em ni? Police kan lo nghak tawp mai dawn em ni?" tiin a bialpa Jeffrey-a chu a lo vin ve vak vak bawk a.

"Lo bengchheng suh u...ka ngaihtuah mek a nih hi.." tiin Jeffrey-a chuan a lo vin hrep mai a, an mangang tlang a  ni. Jeffrey-a chu a han ngawi vang vang a, chutah Bsi leh Nicky-a te ruang awmna lam room chu ava pan leh ta mai a. Rang takin Tluangtei chuan a lo dang vat a, "Enge i tih leh dawn? I mawl em ni?" tiin a zawt a.

"Victor-a room chhungah hian engemaw tak a awm ang, min puitheitu tur engemaw hmanrua tal pawh a awm ang. Ka lut dawn, nangni chu hetah hian lo awm rawh u." tih leh luh a rual nghal a. A thiante pahnih ruang lo in khai zul mai chu rap hle mahse a en lo lui tlat a, tichuan Victor-a khum vel chu a han hai ta chiam mai a.

A thingrem te, a khum hnuai te leh mattress hnuai thleng chuan a hai hnawk nuai mai a. Chutah thlalak bawm niawm tak hi a hmu ta, room chu a chhuahsan vat a. Bawm chu hawngin thlalak chu a han en a, "Ehe...Tluangte, Zamzam...lo en ve teh u." tiin a thiante chu a ko nghal a.

Hmeichhe pahnihte pawh chuan thlalak chu an han en ve a, thlalak ah chuan mipa naupang kum 7 mi vel niawm tak leh anu niawm tak, nu hmeltha tak mai thlalak dunna a lo ni hlawm a.  Thlalak chu an en zel a, an nufa thlalak chauh nilovin an bulah chuan pa pakhat a lo lang ve ta tlat mai.

An inkawt niawm tak hmaa thla an lakna te chu an en zel a, mahse chu in chu tuna an thlam awmna mek hi chu a nih loh hmel. Tichuan paper tam tak a lo awm bawk a, paper chu an han en leh a. Paper ah chuan an hmelma pa, Hmaikawr-a lem niawm tak tak te chu a lo inziak nuai mai a, mak an ti hle mai.

"A awmzia chu...Victor-a hian tualthattu hi a hria tihna em ni ang?" tiin Zamzami chu a rawn tawngchhuak hlawl mai a. Jeffrey-a hmel chu thinrimna hlirin a rawn khat ta, "ZAwnga chuh...Victor-a a ni...Victor-a vek a ni. Ani khan min bum a ni....ka that khawp ang." tiin a inhrosa khur khur mai a.

"Jeff..ka hrilh lawk che kha..Victor-a hi ka ring hlawl lo ka tih kha.." Tluangtei chuan a lo ti ve bawk a. Thlam chhung chu a han enkual leh a, tui bottle ruak ho chu a la khawm a. Tui a thunkhat vek a, Victor-a bag khai chu a la leh a. Tui chu bag chhungah chuan a khung malh malh hlawm a, "Chhuak ang u....kha Victor-a ve kha, ka hlau chhete eih lo." a han ti leh pung pung a.

"Khawiah chuan nge maw kan kal ang le?" tiin Zamzami chuan a lo zawt a. "Kan thiante thattu hi ka chhuah dawn lo reng reng, in duh chuan min rawn zui ula, in duhloh chuan thlamah hian lo awm zawk mai rawh u." a han ti leh khur khur a. Thlam chhung chu a han enkual leh a, kil khata chempui tuiek lampang, hriam lemlo tak chu a va la a.

"Anih chuan kal ila nimai lawm.." phur fahran lo chuan Tluangtei chuan a han ti tham tiak a, tichhuan an chhuak ta a. An phone light dim tak mai hmang chuan chu zan thim tak hnuaiah chuan kawng an zawng chawp leh ta hlawm a, zan dar 10 leh a chanve vel a ni hial tawh ang. Bsi, Nicky-a leh Mawitea te chu an thi tawh a, a dawh leh chu tunge ni ta ang le?

******************

Rsa chuan chu putar, amah chhantu chu an chanchin te, an thil tawn te chu a han hrilh ta vek a. Putar pawh chuan mak a lo ti hle mai, "Helai ah tak hi chuan sa ka chang khat khawp a, mahse kal ngailo erawh ka nilo. Amak hle mai, chutiang mi awm ang chu zandangah ka hmu ngai miah lo." a han ti nuah nuah a, he putar hi a hming chu Tlana a ni.

"Pu Tlan, heta tang hian kawngpui kan hnaih tawh em?" tiin Rsa chuan a han zawt leh a, "Hnaih lutuk lo...la chhoh ve deuh fe chu angai ang." tiin a lo chhang a. Thui fe an kal hnuah chuan an hma zawna ruang lo let reng mai chu an hmu fuh ta a, an phu nasa ngei mai. Fimkhur tak chuan ruang chu an han en chiang a, Pu Tlana chuan tunge a nih a hrelo.

Chubakah a hmel chu hmuh tlak awmlo khawpin thisenin a bual khat vek a, a mitmu te chu a rawn pawng chhuak hial a. Mahse a chapal atang te, a kawr hak atang te leh a pian atang te chuan Rsa chuan tunge a nih tih chu chiang takin a hria, a thianpa Mawitea ruang ngei a ni. A thingthi hnawk a, "Nilo..Mawite...tiin a tap ta hawm hawm mai a.

"Tlangval...i hria em ni?" tiin Pu Tlana chuan a han zawt leh a. Tap chung chuan, "Hria e..ka thianpa  anih hi...ava han pawi tak." a ti vawng vawng mai a. Chutah le, an hma zawnah chuan lung lian em em mai hi a rawn thlawk fua mai a, Pu Tlana mitah tak chuan a rawn fuh a, a thal tawp mai.

Rsa chuan ahma zawn chu ava en a, an that tawh amaw an tih, Hmaikawr-a bawk chu  alo ni leh a. Rsa chuan mak a ti ngei mai, mahse mak a tih rual rual chuan a thinrim takzet. Putar silai chu a la lawk a, Hmaikawr-a vuak tum chuan ava bai phei tawk tawk a. "Zawnga leh...i la dam animaw? Ka thah law law che  i duh a nimaw?" tiin a vau phei nasa mai.

Silai dawt chu Rsa chuan a han vuan a, Hmawikawr-a lu zawnah chuan a han vai pawp mai a. Mahse awlsam zet hian a lo dang a, Rsa dulah chuan a tlawh pawp mai a. Rsa chu a thal tual mai, a ke hliamah chuan hmangaihna leh zahngaihna tel hauh lo chuan a hlap ta vak vak mai a. A hmaiah a pet bawk a, a chhuih vak vak bawk a.

Rsa hmai chu thisen hlir hian a khat tawh a, mahse a la tlawm lo cheu aniang chu. Za lo tak hian a han nui lui hram a, "Nep lutuk...i va pa lo ve a...tunge i nih a? I hmel pawh i ti lang ngam dawn nange?" tiin a lo la cho nasa mai. Thei leh theilo hian Rsa chu a inbeng tho leh a, Hmaikawr-a hma zawn takah chuan a thingthi a.

Hmawikawr-a chu a kun hniam a, Rsa chu chiang tak chuan a melh a. "ZAwnga, i hmel te chu han ti lang ve la...kha i hmaikawr thing lutuk khan min ti hlau eih lo, i hria maw?" tih pah chuan a hmaiah chuan a han beng hram a. Chutah zet zawng hmaikawr-a ngaihdan a ni ta hauh lo, a hmaikawr chu zawimuang chuan a phelh ta.

Rsa chuan Hmawikawr-a hmel diktak a han hmu chu a meng bial kawk kawk mai, "Nang..nangmaw?" a ti bah ta nuai mai. Chu Hmaikawr-a, an thianza ho thattu chu tudang nilovin an thian zinga rawn tel thar, Victor-a ngei a ni. "Tinge? Mak i va tih hmel ve...i rinloh deuh ka lo ni leh si animaw?" tiin a nuih vak vak mai a.

Rsa chu a tap lek lek mai, "Vic..Victor..engthil nge i tih hi...nangmah vek maw lo ni a?" a han ti leh a. Victor-a chuan vin zet hian, "Aw ni e..keimah Victor-a, Victor Lalthanmawia....keimah ngei hi tualthattu chu ka ni e. Bsi, Nicky-a leh Mawitea te kha...keimah thah vek an ni." a ti ta phiar phiar mai a.

Thla eng hnuaia Victor-a hmel chu a lang chiang ngang mai, a hmel nelawm tak leh pawisawlo hmel tak te chu tunah chuan a ti hlauhawmtu an ni bawk tawh zawk. Rsa chu a tap ringawt mai, a che thei tawh bawk silo. "Engvang nge? Mawhhh...enge i pawi kan sawi a?" tiin Victor-a chu a han vin vak a.

"Ani reng asin, lo kal tur in nilo asin. Ka ta..ka ramhnuai, ka chenna, ka khawvel chu nangni awmtha duhlo ho hian nawmsip bawl nan in rawn hmang a, ka awmtir mai mai che u in ring em ni? Ni e...ka thlama ka riah tir kher nachhan che u pawh kha maw...in thisen ka duh vanga ni. Thah che u hi ka thil tum ber a ni, ka thisenah hian tualthah duhna hi a bet tlat tawh a ni." tiin a nui uar uar mai a.

Pu Tlana chu a rawn tho tual tual a, "Ava na emmm.." tiin a mit chu a dawm vawng vawng a, thisen a lo chhuak bawk a. Victor-a chuan Pu Tlana chu a han en vang vang a, a nui suk mai. "Nilo..Victor..nilo...ani kah chu chhuah rawh..kan thian zinga mi a ni velo. Khawngaih ani kha chu kaltir rawh..Victor, ka ngen a che." Rsa chuan a ti lawm lawm a.

Mahse chu tlangval hmeltha nunrawng, Victor-a chuan engatan mah angai lo. Pu Tlana bag chhunga chempui lian zet mai chu ala lawk a, dimna tel hauh lo hian Pu Tlana beng dinglam chu a sat thla ve ta hlawk mai a, Pu Tlana, kum 60 zeta upa chuan na a ti in hrehawm a ti ngei mai.

Rsa chuan mittui tla teuh chung chuan, "Nilo..chhuah rawh...Victor..keimah hi min that mai rawh. Kha putar kha chhuah rawh...khawngaihin.." tiin a lo ngen lawm lawm a. Victor-a chuan a ngaihsak eih lo, silai chu ala a. Pu TLana ipte atang bawk chuan a mu chu a la chhuak a, Rsa hmuh tur ngei chuan a han thun tha sauh sauh a.

Pu Tlana let reng lai chu a rap bet a, a chal zawnah chuan a tin a. "Nang hian min kap amaw? Nang hian min thah i tum ve amaw? Pawi ka ti khawp mai Putar, i nupui te, i fate leh i tute chu mangtha na hun tur i nei dawn silo.." a han ti vel a. "Nilo, nilo..kap suh.." tiin thei leh theilo hian Rsa chu a rawn bawkvak phei tawk tawk a.

Victor-a chuan a chaldarah tak mai chuan amah Pu Tlana silai ngei mai chuan a kap ta siah mai a, Pu Tlana chu a thi chiang kher mai. Rsa chu a tap zawih zawih mai, "Zawnga...ramhuai i nih kha...mihring pawh i nilo." tiin Victor-a chu a lo vin nasa mai. Nui chung hian Victor-a chuan, "Ka hria alawm...mihring ka nilo. I sawi dik...ramhuai ka ni e." tih pah chuan silai chu a hum nghet sauh sauh a, Rsa lu ah chuan a hlap pawp mai a, Rsa chu nikhawhrelovin a awm nghal der mai. Victor-a chuan Rsa chu a chawi kang lawp a, ramhnuai pilril lamah chuan a pu phei ta nul nul a.

*****************

Zorama pawh chuan an motor dahna chu a thleng ta a, mahse a beisei loh tak maiin an motor chu a letling zawngin a lo let reng mai a. Jeffrey-a bike pawh chu petrol leak zawih zawih in a lo tlu bawk a, mak a ti kher mai. "Hrep tak chuan...hmela mai mai chuh." tiin a phun nuah nuah mai a.

A thianpa Rsa a ngaihtuah bawk si, phone a han phawrh a. Mahse signal chu chhe te mah a lo la awm chuang lo, mangang tak chuan a hawi kual vak vak ringawt mai a. Mahse an motor awmna atang chuan kawngpui lam chu a hla tawh vak lo tih a hria a, kawngpui lam pan chuan a kal chho leh ta hnak hnak a.

"Amah chauh a ni lovang, heti em em a che rang hi chu mi pakhat chauh thil tih a ni thei lo hrim hrim." tiin thaw hlawp hlawp chung chuan a phun chho mual mual a. Sana a han en a, zing lam dar 1 a ri dawn der tawh mai. Rei fe a kal leh hnuah chuan kawngpuia motor tlan ri a hre ta hlauh mai, a lawm lutuk chu a zuang lo chauh a ni.

Chak tak chuan a kal a, kawngpui chu a thleng ta. A thaw huai mai a, a thingthi hnawk mai. A phone a phawrh a, signal pawh chhete chu a awm ta e. Rang takin police a phone nghal a, mahse ala tlang maithei lo zui. Vawi 5 vel a han try leh hnuah chuan a tlang ta hlauh mai a, "Hello..Police?" a han ti nghal a.

"Hello, Police Station...enge puih theihna che ka neih?" a rawn tih veleh chuan a thla pawh a muang ta sawt mai. "Hello...ka pu, i puih kan ngai a ni. Kei leh ka thiante min thah tum tu an awm a, khawngaihin min pui rawh.." a ti nghal chiam chiam a. Police chuan, "Khawi atangin nge, khawi hmunah nge in awm?" tiin a rawn zawt a.

An awmna hmun chu a sawi thiam mai silo, khawilai tak nge a awmna a hre bawk silo. "Ihh..kawngpuiah..ka pu, ka hrelo...ka awmna ka hrelo." a han ti bah nuai a. Chutih lai chuan chak em em hian truck hi a rawn tlan a, chu truck tlan ri a hriat veleh chuan Zorama chu a hawilet vat a.

Truck chu a rawn tlan zel a, "Lawk aw ka pu.." tiin phone chu disconnect chuanglo chuan a ak daih a, truck chu a lo phar a. "Ding teh...khawngaihin ding teh.." tiin a lo vai lauh lauh a. Mahse chu truck erawh chuan din a tum eihlo, chu mai nilovin Zorama sut tum niawm tak chuan a khalh chak zual sauh zawk.

Chutia a rawn tlan chak tulh tulh mai chu Zorama pawh chuan mak a ti hle a, chutah a hrethiam ta. Chu truck chuan puih a tumlo, sut hlum a tum zawk a ni. Mahse a tlanchhe hman tawh lo, "Niloo.." a ti hman tawk a ni. Truck chuan Zorama chu a su leng lawp mai a, a ke pahnih chu a ruh a tliak ri thawt mai.

Truck atang chuan driver chu a rawn chhuk a, chu driver chu tu dang nilovin Hmaikawr-a, Victor-a ngei a ni. Zorama lam pan chuan a rawn phei a, a la nui ver ver leh ta nghal a. Zorama chu ala thi mai lo, mahse a che hleithei lo. A thisen a chhuak hnem em em a, a ka chhungah chuan thisen hlir a khat bawk.

Victor-a chu a han thu hniam a, Zorama chu enin a han chek tlawk tlawk a. "Tsk tsk...khai aw...ava na dawn em..thianpa, i dam chhuah ka ring miah lo." a han ti vel a. Zorama chuan a chhanglet thei lo nangin thil awmzia chu a man thiam nghal mai, Victor-a thil tih vek a ni. Victor-a bawk chuan, "Enteh Bawiha, hetia thi tho tura na tawrh reng ai chuan ka rawn chil mai ang che aw." ala ti ta deuh deuh a.

Chu tlangval, a hmel en mai pawh a pawisawi lo leh palian tak, mitmeng hring nghulh mai leh zaidam hmel tak mai Victor-a chuan Zorama chu a han en vang vang a, "I ruang buaipui ka peihlo hle mai, kawngpui ilo thleng hman thawt thawt a. Kawngpuiah hian ka thah mai che  angai dawn a nih hi...i ruang pawh tah hian ka hnutchhiah law law mai dawn mawni?"  ahan ti leh nuah nuah a.

Zorama erawh a rum ngut ngut a, rum em em hian Victor-a chu a en tlawk tlawk ringawt mai a. Victor-a bawk chuan, "Umm..pawilo mai rawh se...kawngpuiah hian thi law law mai rawh. Ka buaipui peih lo che...khai aw..ka rawn chil dawn che aw.." tih pah chuan a truck lamah chuan  a let leh ta a.

Tichuan a han start a, tanpuitu mamawh em em Zorama let reng mai chu dimna nei hauh lo chuan a han chil ta a, a ruh a tliak ri bawp bawp mai. Zorama ruang chu hmuh hrehawm khawpin a chhe nasa a, a ban veilam phei chu a bung hial a ni. Fai fuk hlarh hlar pah chuan Victor-a chuan, "Tunah chuan a tawp kan hnaih ta...a nuam dawn e." tiin a nui vur vur a.

***************

Jeffrey-a te pawh chu an kal zel a, a mipa awmchhun chuan hma hruaiin a hnungah chuan hmeichhe pahnihte chuan an zui ve zel a. Kalkawng an hre bawk silo, a thim em em mai bawk si. Chutih lai karin Victor-a lah khawnge a awm an hre silo, an thla a muang hlawl lo a ni. Jeffrey-a erawh mipa a ni bawk a, Victor-a chu thah ngei a tum nghet bur thung.

Rei fe an kal hnuah chuan na tuara rum ngut ngut ri hi an hre ta a, "Chu..chu eng thawm nge?" Zamzami chuan a han ti vat a. Jeffrey-a chuan zaizirin bengchhenglo tur chuan a hrilh dun a, thawm lo chhuahna lam chu an pan zel a. Chutah thingkung phen atang chuan Hmaikawr-a chu a rawn chhuak thut mai a, an phu chiang teh asin.

Mahse Hmaikawr-a chu ahma a ang lo tlat, hliam a tuar mek niin a lang. A rawn bai auh auh a, a kut a phar tawk tawk a. A chauh hmel em em bawk a, mahse Hmaikawr-a ngei chu a ni si. A sam pawh a sei ve a, a inphiar ve bawk. Leather jacket a ha a, a dum vekin a inthuam ve tho bawk si.

Jeffrey-a chuan hlau hauh lo hian a pan phei a, "Victor Hmelchhepa.." tih pah chuan a han tlawh thal tawp mai a. Hmaikawr-a chuan a kut chu thei leh theilo hian a phar chhuak a, a lu a thing vak vak a. "Eng ang pawhin khawngaihna min dil mah la e, ka that dawn tho tho che." tih pah chuan a chempui ken lai chuan Hmaikawr-a dulah leh nghawngah te chuan a sat ta siah siah mai a.

Thisen a per chuai chuai a, Tluangtei pawh chuan a tiang ken lai chuan a lo vaw ve bawk a, Zamzami erawh hlauvin  a ding ngawi reng thung. Hmaikawr-a chu a thi chiang hle, a che eih tawh lo. Jeffrey-a leh Tluangtei te chuan an duhtawk ve thei ta hram a, an hah lutuk chu an thaw hlawi hlawi mai.

Khur dar dar chung chuan Zamzami chuan, "Amah  anilo.." a rawn ti zawi sap a. "Enga? Enge awmzia?" tiin Jeffrey-a chuan a lo zawt vat a. Ring zet hian Zamzami chuan, "Amah a nilo..hepa hi Victor-a a nilo." tiin a tap chhunzawm nghal a. "Engtin nge i hriat?" tiin Tluangtei pawh chuan a lo zawt ve a.

"Victor-a kha ft 6 chuang zeta sang a ni a, mahse hepa hi chu ft 5 leh inches 6 vel bak a nilo. Min bum  ani, midang zawk a ni." tiin Zamzami chuan a lo chhang leh a. Zawimuang chuan  a khabe atang chuan a hmaikawr chu Jeffrey-a chuan a han hlim a, an thil hmuh chuan ava barakhaih tak em.

An thah zawh chiah, Hmaikawr-a emaw an tih chu Victor-a a ni hauh lo. An thianpa ngei, Rsa a ni. "Nilo..tiin Jeffrey-a chu a tawlh hnung dawr a, Tluangtei pawh a thingthi hnawk mai. Zamzami chu a tap vak vak a, "Nilo..RS...a ni theilo." tiin  ahmai a hup a. Tluangtei chuan tap hawm hawm chung chuan, "Tinge a insawi mai loh le? Tinge a tawngchhuah loh a?" a ti vak vak a.

Zamzami chu a thu hniam a, hreh tak chung chuan Rsa ka chu a han kuai kau a. A hmui hup nghalin, "Awii ka duhlo...a tan..a lei a tansak.." a ti ta mai a. An thianpa, an kawm ngeih em em Rsa chu anmahni ngei chuan an sat hlum ta mai chu ania, Jeffrey-a pawh mipa e tilo chuan a insum zo lo, a tap ve ta hawm hawm mai.

Rsa biangah chuan a chul a, "Thianpa, ka tihpalh...min ngaidam rawh..ka tihpalh.." tiin amah leh amah chu a inchum vak vak a. Tluangtei bawk chuan, "A kut hi phuar a ni chuang silova, tinge hmaikawr hi a phelh mai loh le?" a lo ti leh a. Jeffrey-a chuan hmaikawrh chu laksawn a han tum a, mahse Rsa tukhum zawnah chuan a tang tlat mai.

"A tang...a tukhumah hian a bet tlat." a ti a. Rsa ruang chu an han kuai let a, a tukhum vun leh hmaikhawr chu thirzai hian a lo inthui hnan hi  alo ni a, thisen a lo luang zawih zawih mai. Jeffrey-a chu a thinrim takzet, "Zawnga mai mai chuh...ka va han that dawn chiang tak che em." a ti vak vak a.

*****************

Victor-a hian ama pualin Truck a lo nei reng hi a lo ni a, mahse engtia nei thei nge a nih tih erawh hriat a nilo. Number plate a awmlova, a hlui tawh hle bawk. A thlam awmna lamah chuan motor luhthlakna tur kawng hi a lo awm reng bawk a, mahse MAwitea erawh kha chuan  a hre hauh lo tihna  a ni.

Thlam awmna atanga hla vaklo ah chuan Truck chu a dah a, tichuan thlam chu a pan leh ta a. Thlam chhungah chuan a lut a, a han enkual a. A thlalak bawm lo darh nuai mai te chu a hmu a, "Umm...min hre chhuak ta maw? A nuam dawn e, infiam tak tak ila nimai lawm." tiin a nui sak a, bawm chu a dah tha leh a.

A kawr a phelh a, silaiin a kahna hliam hmun hnih lai mai te chu a darthlalang bal zet ah chuan a han en chiang a. "Ava na reuh ve mawle.." a han ti nuah nuah a. A leather jacket hnuaiah khan Victor-a hian bulletproof vest a ha a, mahse chu vest chu ama siamchawp mai mai a nih vang nge, Pu Tlana silai mu kha a lo dang zo chiah lo a ni awm e.

Mahse hlian nasa erawh a nilo, silaimu pawh a vest haklai ah chuan a pahnihin a bet a, a taksa a fuh tep zawk mai chauh a ni. A force a nat em avang khan a tlu mai chauh  ani a, thihna khawp hliam erawh a ni hauh lo thung. Chubakah Victor-a hi pa chak tak mai, tha ngah tak leh sa pelh thiam tak a ni.

Tichuan Bsi ruang leh Nicky-a ruang te chu a la thla leh a, pawnah chuan a hnukchhuak a. Lei a lai khuar a, thuk vak lo  alaih khuar hnuah chuan Bsi zawk chu a phum ta a. Nicky-a ruang dahna tur a laih leh lai tak chuan thawm a hre ta, thawm lo chhuahna lam chu ava hawi vat a. Mahse tumah a hmu lo, a bengchhe ri a nih ringin lei chu a laih zawm leh mawlh mawlh a.

Mahse second 20 hnu velah chuan a ngaite ang bawk chuan tlan ri a hre leh ta, a ngaih a tha ta hauh lo mai. Suahdur chu a dah a, tichuan a chemte pai chu phawrhin thawm lo chhuahna lam chu a pan ta a. Thlam hnunglam atanga lo chhuak ni ngei chuan a hria a, a va pan hnai zel a.

Thla lah chu a eng em em mai a, street light a awm emaw tih hial tur khawpin a eng a ni. Thlam awmna laiin a zir vang pawh a ni mahna, a ramhnuai pilril lai erawh a thim chhah mup thung. Thlam hnunglamah pawh chuan engmah a hmu chuang lo, "Hmmh....thehlei bak va ni suh." tiin a phun sap a.

Lehlam a hawi leh chiah chu a hma zawnah chuan Jeffrey-a a lo awm reng mai, suahdur a lo hum run bawk a. Theih patawp chuan Victor-a luah chuan a han hlap pawp mai a, Victor-a pawh a thal tawp mai. Chuveleh Jeffrey-a chuan a hlap ta vak vak mai a, Victor-a chu a au chel chul mai a.

"Nang hi maw? Nang phiangsen hian maw ka thiante lo that a? Nangmah vangin kan thianpa ngei pawh kan that a, i dam dawn bik lo." tiin a hlap leh siah siah a. Mahse mak tak maiin Victor-a chu a rawn tho leh vat a, Jeffrey-a suahdur kenlai chu a lo man chat mai. An han inchei ta tak tak a, a hliam tuar zawk Victor-a chuan a hneh ngang mai.

Suahdur chu a chhuhsak a, rum zet hian Victor-a chu a melh a. "Mimawl ho....ni e..keimah ka ni. Keima tih vek a ni...enge in tih vak chuan anga? Mawh...min that ang maw? Kei hi min that ang maw?" tiin Jeffrey-a chu a vin vak vak mai a. "Kei hi min that lovang, thah ngai lovin kei chu kum 20 liam ta khan ka thi daih tawh...nangni zawk hi thi tur chu in ni.." tih pah chuan suahdur chu a khupin a do pawp a, a tliak hmawk mai.

Suahdur pangngai tha lenglawng, rit ve tak mai chutia a khupa  ado tliak hmawk thei mai chu Jeffrey-a chuan mak a ti hle a, a chem a lem dawk ringawt. Chutah Victor-a chuan Jeffrey-a chu a kawr awmah a tham a, a dulah chuan a khupin a do ta siah siah mai a. A hnek bawk a, a chhuih zui bawk a.

Tluangtei chuan lo chhan tumin Victor-a hnungah chuan ava zuang kai a, a samah a kek a. Mahse Victor-a chuan awmsam tak hian a lo theh thla thuai a, "Ve mai mai che chuan.." tih pah chuan Tluangtei rawn tho leh chu a beng thal tawp mai. "Hmela.." tiin Jeffrey-a chu a rawn tho leh a.

Victor-a chu hnek a tum a, mahse Victor-a chuan a kutah a lo man sak a. A elh vaka , a ri tuar mai. Jeffrey-a ban ruh chu a ulh tliak ta hmawk mai a, Jeffrey-a na ti lutuk chu a t(r)e nasa ngei mai. "Nilo..Jeff." tiin Tluangtei chu a lo au vak vak bawk a, Victor-a chuan a la duhtawk mai lo. A chemte thlauh chu a hmu fuh hlauh mai a, Jeffrey-a dulah tak chuan a vit leh ta.

"Jefff..awi ka duh theilo." tiin Tluangtei chu a tap vak vak a, Victor-a chu a la nui vak vak zui. Jeffrey-a chu a thaw hrawk hrawk a, a thaw muang telh telh a. Tluangtei chuan va pan a tum a, mahse Victor-a chuan a lo man bet a. "Het het...kal angai lo. Doctor i ni em ni? I ti dam thei dawn chuang em ni? Bawihte...lungngai suh...tikhuan zawi muangin thi zawk rawh se." a han ti vel a.

Tluangtei chu nghet tak hian a man bet a, "Enteh thiannu...i bialpa a ni tih ka hria, chuvang chuan midangte angin rapthlak taka thah ve ka duhlo. Nangmah vang liau liau in nuam takin ka thih tir zawk dawn a nih hi...lawm hle ta che." a han ti leh a. Tluangtei hlau lutuk chu  akhur char char a, a tap pur mai.

Zamzami chuan chulai tak chu remchangah la in chemte chu a chhar a, Victor-a hnungah chuan a va vit tlum ta thawih mai. Victor-a chu a phu zuk a, a na a tih hmel kher mai. Chuveleh Tluangtei maiah chuan nghet takin a vuan a, Tluangtei lu chu a thuai vir ta nawk mai a, a ri tuar mai. Tluangtei chu a let tawp a, a thi chiang hle.

Zamzami chu a au vaka , Victor-a hnungah chuan chemte a bur vu bawk. Thinrim hmel tak hian a hawi let a, a hnunga chemte bur vu mai chu a pawt phawi a, a t(r)e deuh thawt bawk a. Zamzami chuan hlau tak hian, "Nilo...ka tihpalh..min that suh." tiin a ngen a, mahse Victor-a chuan a chhang lo.

Zamzami chu a tlanchhe ta a, mahse a tlan reilo kher mai. Victor-a chuan chemte chu Zamzami ke zawnah chuan ava vawm a, zamzami malah tak mai chuan a bur chat mai. A rak tuar a, a thal nghal tawp. A tluk pah chuan a lu chu a sawh a, a sawhna angreng hle. A lu a hai muai muai a, a hma zawna Victor-a lo ding khur mai chu fiahlo tak hian a hmu a, nikhawhrelovin a awm zui nghal.

****************

Zamzami chu a rawn harh a, a awmna lai chu a han enchiang a. Victor-a thlamah bawk chuan a lo awm a, thutthlengah phuar beh a lo ni a. A hma zawnah chuan amah hnungchhawn zawng hian Victor-a chu a lo ding reng mai a, muang chang chuan a rawn hawi let a. "Nilo..Victor, min chhuah rawh." tiin Zamzami chu a tap lehnghal vak vak a.

Zawimuang hian Victor-a chuan, "Amah tibuai tu rannung te chu a mal te te in a ei zo vek thin a, zalenna..zalenna chu a tem ve ta. A bul atangin...a tir te atangin bul a tan leh a ni. Beiseina ni eng a hmu ve thei ngai dawnlo, kum tamtak a nghak tawh..mahse a hmu ve ngai lovang. A chhan chu a kehchhia  a ni, hmangaihna avangin a thinlung a kehchhia a ni." a han ti charh charh mai a.

Tap chung hian Zamzami chuan, "Enge i sawi awmzia?" tiin a lo zawt a. Victor-a chuan Zamzami en reng chung chuan, "Zawhte ang maiin, ngaihsaktu nei lovin a vakvai a....tanpuitu tumah a neilo.."  a han ti leh a. Zamzami chuan a hrethiamlo kher mai, "Victor, khawngaihin min that suh." tiin  a ngen lawm lawm a.

Victor-a chu choka lamah chuan a va phei a, khawnvar tui bur chu a la a. Thlamah chuan a theh kual ta vak vak mai a, "Mei alh..mei alh karah i thi ang." a la ti zui. "Nilo..Victor..enge i duh...i duh apiang ka tihsak ang che. Min that suh..ka ngen a che." tiin a tap vak vak a. Victor-a chuan khawnvar tui bur chu a paih thuai a, huat hmel em em hian Zamzami chu a melh a.

Vin zet hian, "Engvangin maw? Engvangin maw ka thah loh teh lul ang che? Mawhh...ka nu pawhin ka pa kha a that alawm...engvangin nge tual ka thah loh bik ang?" a ti vak vak mai a. "I nuin i pa a thah avang chuan engvangin nge keini hi min thah ve ngawt ang? I pawi kan sawi em ni?" tiin Zamzami chuan a lo zawt let a.

Victor-a chuan a lu a bu nghauh nghauh a, "Aw...ka pawi in sawi. Hei hi ka zalenna ram a ni a, ka ta chauh a ni. Nangni hian min rawn tibuai a ni, ka pawi in sawi a ni. Ka pa khan ka nu nen nitin min vaw thin a, kum 8 lek ka la ni. Ka nu khan theih tawp chhuahin min hum hram hram thin a, mahse ka pa chuan nasa takin min sawisa a. Tichuan a tawpah chuan ka nu chuan ka pa muhil lai chu chemin a sat a, tichuan ka pa chu a that ta a ni. Ka mit ngei hian ka hmu a, nimin lawka thil thleng ang maiin ka la hrechiang asin." a han ti leh khur khur a.

"Nilo..Victor..chuvang ringawt chuan min that thei lovang." tiin Zamzami chuan a lo ngen leh a. "Ka nu pawh chu amah leh amah a invit hlum ve leh a, kei naupang kum 8 mi lek kha min hnutchhiah a ni. Fahrah runah dah ka ni a, zantin maiin ka nu leh pate thlarau chuan min tihthaih thin. Tualthattu fapa ka ni a, tualthahna chu ka chhunzawm ve zel a ngaih thu min hrilh a ni. Kum 25 a liam a, ka tlanchhuak ta a ni. Ni e, kum 26 mi chauh ka nilo, kum 33 lai ka ni tawh. In bulah khan ka insawi naupang a, tichuan min nel theih nan tiin lem ka chang a ni. A chhan chu nangni ho hi that turin ka nu thlarau khan min hrilh a ni, ka nu, ka hmangaih em em khan min hrilh thin a ni. He thlam hi kan in hlui kha a ni, hetah hian kum 1 em pawh ka la awm tling lo. Mahse nangni hi lo kalin, ka zalenna chu min tihchhiat sak a ni." a han ti leh khur khur a.

Mittui tla zawih zawih hian Zamzami chuan, "Nilove Victor...i hrethiam lo a ni. Tlual i thah a ngailo, i damlo mai chauh a ni. Doctor hnenah ka hruai ang che, i tha leh mai ang. Ka tiam ache, engmah ka sawi lovang. Min chhuah hram rawh..khawngaihin.." tiin a ngen leh a. Victor-a chu a nui suk a, "Mi a emaw min ti em ni? Ka chhuah ang che anga maw?" a han ti leh khur khur a.

"Min phuarna hi phelh la, tichuan i duh ang thalin min that dawnnia...ka tiam a che." ZAmzami chuan a han ti a. Victor-a chu a nui ta var var mai, "A tha e...naupang fel tak i ni." tih pah chuan Zamzami chu a phelh a, hnai takah chuan an indin chilh a. Victor-a chuan a mit chu a han nuai vak vak a, "Ka mit hi ka naupan lai khan a kang a, ka pan min halsak a ni. Mahse nangni laka pangngai taka ka lan theih nan contact lens ka vuah a, hei hi ka mitmeng diktak chu a ni." tiin a lens chu a la thla a.

A mitmeng chu a sen hian a lo sen rum mai, Hmaikawr-a mitmeng sen diktak chu a lo lang ta. Zamzami chuan Victor-a chu a lamah a pawt hnai thut a, a kiss ta bawrh bawrh mai. Victor-a pawh a hrilhhai hle mai, mahse chutia tleirawl chhelo zet maiin a a han kiss ta bawrh bawrh mai chu mipa a lo ni ve bawk nen, a insum zo ta bik lo.

A lo chhanglet vat a, an duhtawh telh telh a. Chutah a Zamzami chuan Victor-a chemte pai lai chu a phawrh thut a, Victor-a dulah tak chuan a vit ta a. Victor-a chuan a pum a dawm vawng vawng a, "Thi rawh...ZAwnga.." tiin Zamzami chuan a vit nawn leh a. MAhse Victor-a chuan a rek thut a, chemte chu a benthlak sak bawk a.

Zamzami chu a beng thal thuai a, "NAng hmeichhe lepchiah nu.." tiin chhuatah chuan a bawhbet a, a rek ta vak mai. Zamzami hmai chu a sen vek tawh a, a thi dawn ta der mai. Chutah Victor-a lu chu a rawn ri pawp a, Zamzami a rehna chu a thlah a, a thal tawp mai. Jeffrey-a a lo ni a, a pum dawm vawng vawng chung chuan a lo ding reng a, a kut lehlamah chuan thingtum lian tak a keng bawk.

"Silai min pe a, a mu atan rubber bullet min pe bawk a. I lo inla fing vel hle mai, i chantawk a nih hi." tih pah chuan a hmaiah chuan a hlap leh siah a, thisen a per chhawk mai. Hlap leh a tum chu Zamzami chuan  alo dang a, "A thi tawh..a thi tawh.." a lo ti a. Zamzami chuan chokaa nawalh chu ava la a, "Chhuak ang." tiin Jeffrey-a nen chuan an chhuak dun ta a.

Nawh alh chu a han nawt alh a, tichuan thlam chu an hal ta a. Jeffrey-a nen chauh chuan an damchhuak ta, thlam alh hluah hluah mai chu an en dun reng a. Khua a var det det tawh a, reiloteah police te pawh an lo thleng ta. Zorama phone kha Victor-a khan a lo chil fuh ve lo a, Police te chuan Zorama phone chu an lo chhui char char hi a lo ni a.

A tawp atawpah chuan Victor-a chu an hneh ta, mahse a damchhuak awmchhun te chu Zamzami leh Jeffreey-a te chauh an ni. "Zam, lehpekah khawnge kan riah chhuah leh ang?" tiin Jeffrey-a chu a nui suk a, "Awii fiamthu pawn sawi tawh suh." tiin Zamzami chuan a lo chhang a.

Police te chuan an pahnih chuan an buaipui vat a, Jeffrey-a chuan a bialnu Tluangtei ruang chu en ngawih ngawih pah hian, "Mangtha aw...duat." tiin a mittui a hru zauh a. Jeffrey-a chu a hliam nasat angreng em avang chuan Ambulance ah chuan an phur a, Zamzami erawh police motorah a chuang dawn thung a ni.

An kal hma chuan Zamzami chuan Jeffrey-a kutah chuan a vuan a, "Engkim a tawp tawh Jeff, kan him tawh e. Kan inhmu leh vat dawnnia...thlamuang tak khan muhil tawh rawn le." tiin  achalah a fawp a, Jeffrey-a chuan a lo nuih sak a. Ambulance chu a tlan liam ta a, Zamzami pawh chu police motorah chuangin an phurliam ta a.

******************

Reife an tlan hnu chuan Police motor khalh mektu, Inspector chuan call a dawng a. "Hello Sir, hei ruang ho chu kan hmu kim thawkhat a. Mahse thlam kang chhungah hian ruang kan hmulo...Victor-a ruang a awm lo." a rawn ti ta mai a, Zamzami chu a meng phawk nasa kher mai, a thaw nghal hlawih hlawih mai a.

*********************

Jeffrey-a chu Ambulance chhungah chuan thlamuang tak hian a mu siai siai a, a bulah chuan nurse pakhat, doctor pakhat leh constable pakhat an awm bawk. Motor chu a ding thut a, doctor chuan, "Tinge ni a? Driver?" tiin a han zawt vat a. "Sir, hei kan hmaa hi mipakhat a ding tlat a. Hmaikawr a vuah lehnghal amaw ni, ka chhuk anga, ka'n buaipui nghal ange." a ti ta mai a.

Jeffrey-a chuan thei leh theilo hian, "Nilo..kal suh u.." a ti vak vak a. Mahse oxygen mask chhana tawng a nih vang nge, a tawng tuman an hrechiang thei lo. "Tal suh..engmah a hlauhawmloh.." tiin doctor chuan a lo man bet a. Chuveleh driver chu a au tuar mai. Constable leh doctor chu an chhuk ve nghal a, mahse an lo let leh tawh lo.

Ambulance chhungah chuan Hmaikawr-a ngei mai chu a rawn lut leh ta, nurse hlau lutuk chu a au chel chul mai a. Hmaikawr-a chuan nurse chu a rek a, motor atang chuan ahnuk chhuak a, a vit nghal mawlh mawlh mai. A rawn lut leh a, Jeffrey-a chu hnai takin a melh a, "Hello thianpa, invuan nghet rawh aw..kan tlachak dawn teh mai ania.." tiin a nui uar nuar a, Jeffrey-a chu a mangang kher mai.

*******************

A TAWP TA