SICCIN-5 (Islamic Horror) Written by : Alper Mestci Translated by : Aaron Malsawmdawngzuala (Based on a true story)

 SICCIN-5

(Islamic Horror)

Written by : Alper Mestci

Translated by : Aaron Malsawmdawngzuala

(Based on a true story)

***************

Pa pakhat chu zan thim tak hnuaiah chuan a fanu Hale-i nen chuan in lhui tawh lampang, lian tak pan chuan an kal dun a. A fanu Hale-i chu a hnung zawk ah kalin a hlauh hmel hle a, mahse apa lah chuan ngaihsak loh hmel zet hian a kal hlat tawlh tawlh a. "Pa, pa min lo nghak teh." tia a koh lawm lawm pawh chuan a nghak duhlo, a kal lui zel tho.

Chu in an thlen dawn chuan Hale-i te pafa chu inchung tukverh atang chuan a pi leh a pute chuan an lo en reng a, Hale-i pa chuan inchhung chu a lut ta. Reilote hnuah chuan Hale-i pawh chuan inchhung chu a lut ve ta a, bati tam tak a lo inchhi fur mai. Hale-i chu a hawi kual a, a hma takah chuan darthlalang lian tak mai hi a lo awm a.

Chutah hmeichhe aw hian, "Hei hi i hmel tak tak a nilo, kan zingah i tel ve tawh. Tunah chuan pa i nei tawh lo, nangmah chauh i ni tawh. He darthlalang kehthem hi la la, i ban kha zai rawh le." a rawn ti ta mai a. Hale-i chuan darthlalang bula glass keh them chu a la kang a, chutah aw bawk chuan, "Ka thusawi hi tha taka i zawm a nih chuan i pa chu a lo let leh ang, inzai rawh le...inzai rawh.." tiin a thlem leh ta a.

Hale-i chuan chu glass kehthem chuan a mit bul chu a zai ta tak tak a, a thi ta zawih zawih mai. Na a ti lutuk chu a t(r)e vak vak a, chutah a hnunlam a han en chu a phu chiang kher mai. Hmeichhe 10 rual vel chuan puan dum sinin Hale-i chu an lo hual thup mai a, an hmai zawnah chuan darthlalang an lo keng fur bawk.

Hale-i chu a mut hmunah chuan a tal vak vak a, a ka(mouth) atang chuan thil dum hnang em em mai hi a rawn chhuak bawk a. A nu chu a rawn kal vat a, "Hale, Hale Bawihte..engti zia nge?" tiin a mangang kher mai. Mahse Hale-i chuan a chhang lo, a muthmunah chuan a er vak vak a, a thaw hrawk hrawk mai bawk a.

****************

HAle-i ni(aunty) Azra-i thawmhnaw dawrah chuan Azra-i pasal hual Selim-a unaunu Ebru-i chu ava leng a, "Azra, chanchin thar engemaw min hrilh tur i neih takin tiin ka rawn leng a." Ebru-i chuan a han ti a. Nuisang chung chuan Azra-i chuan, "Anih chu mawle.." tih ringawt chuan a lo chhang a.

"Min han hrilh la..chanchin lawmawm lam te a awm em?" Ebru-i chuan a han ti leh a. "Ebru, min zawt deuh teh thut bawk si a, ka sawi zak deuh alawm." lai lek lek hian Azra-i chuan a lo ti leh a. "Enge zahna tur awm a? Selim-a lahin engmah min hrilh duh bawk silo. Keimah berin ka tihpui che a nih kha, min han hrilh teh." tiin a zawt leh a.

"Naktuk hi thlathum kan inngaihzawnna tur anniversary a nia, min surprise tur a nei a." Azra-i chuan  ahan ti a. "Awi Azra, ka unaupa hi hetiang em em hian a lo romantic ve a ni tih ka hre ngailo reng reng. Nikuma ka nu in min boral san atang khan Selim-a hi a mizia a dang vek a, ka nu nen khan an chengdn miau si a. A boral ta mai khan min tihnat vek rualin, Selim-a hian a tuar na bik em em a ni. Mahse i lak atanga chutiang thu lawmawm tak ka hre thei chu ka thaw huai mai, chuvang chu ania ka zawh che." Ebru-i chuan a han ti mawlh mawlh a.

Mahse Ebru-i thusawi chu Azra-i chuan a ngaithla hauh lo, a bula Ebru-i fanu in uite a lo infiampui mek chu a en vung vung a, a hmu fiahlo ta telh telh mai. "Azra, i tha maw?" tia Ebru-in a rawn khawih chuan a harh zawk mai. "Ihh..tihpalh lutuk, ka lo inngaihtuah muk lutuk a.." a han ti bah deuh nuai a.

"A pawi hleinem, min chhang mai silova ka mangang hman tep alawm." Ebru-i chuan a han ti a. "Ka chauh lutuk vang aniang, zing atang khan ka la buai char char a." tiin a lo chhang a. "Mu hahchawl mai la.." Erbu-i chuan  ahan ti leh a. Mahse Azra-i chuan, "Ka tha mai ang." tiin a lo chhang leh a.

"Enteh, karleh ah hian ni thum vel cham turin Mudla-ah zin dawn asin, lo kal ve la?" tiin a han sawm a. "Engtin nge ka theih ang, Ebru? Kan Manager Arif-a bulah hian a nupui nena zin dun ka dil ngam i ring em ni? Chubakah heta ka rawn thawhna hi ala rei silo nen.." tiin Azra-i chuan a lo hnial a.

"Lungngai suh, Arif-a chu ka lo titi pui ang, ani pawhin a ngaina che alawm." a han ti leh a. Mahse Azra-i chuan, "A chiloh, ka tan a nuamlo emai." tiin a lo hnial leh a. A phone a rawn ri a, a pasal hual Selim-a a lo ni. "Hello, Selim?" tiin phone chu a han la a. "Enge i tih a, ka duat?" Selim-a chuan a rawn ti a.

"Ebru-i a lo leng a, kan titi a." tiin Azra-i chuan a chhang a. "Zawhna a zawt leh che em ni? Min lo biak rawh.." Selim-a chuan  ahan ti leh a. "Awle, amah pawhin minlo biak ve rawh a ti a nih chu.." tiin Azra-i chu a nui har har a. "Naktukah kan inhmuh dawn kha aw...i la theihnghilh lo tiraw?" tiin a rawn zawt a.

"Engtin nge maw ka theihnghilh bik ang le?" tiin Azra-i chuan a han zawt let a, "Umm a tha a nih chu..kan inhmu dawnnia, nih phawt le." tiin phone chu an dah ta a. "A chanchin kan sawi nasa bawk a, a rawn call mai alawm." tiin Ebru-i chu  alo nui a. "Naktuk zanah kan inhmu dawn a, min rawn remind a nih kha.." tiin Azra-i pawh chu a han nui ve a.

"Ka lawmpui dun khawp mai che u, Azra.." Ebru-i chuan a han ti leh a. Erbu-i unaupa Selim-a hian tlereuh dawr lian tak a nghak thin a, sawi tak ang khan Erbu-i nen hian unau an ni. A nu hian ahma kum lawk khan a boral san a, Selim-a hian a tuar na hle. Erbu-i hian pasal a nei tawh a, fanu pakhat a nei tawh bawk.

Ebru-i pasal hi Arif-a a ni a, Azra-i dawr nghah mek, thawmhnaw dawr neitu ber hi a ni. Azra-i hi nichina hmeichhe naupang kan sawi Hale-i ni(aunty) a ni a, Hale-i hian a ngaina em em a, Azra-i pawh hian a duat hle. Hale-i pa erawh chin hriat lohvin a bo daih mai a, mitam tak chuan a thi tawh niin an ngai a  ni.

****************

Hale-i chuan a naute lem chu a be mawlh mawlh a, "Keimah leh keimah hi ka inhmangaih hlawl lo a ni, ka sam hi ka duhlo bawk. Ka mite te, ka hnar te hi a nalh lo bik si, midang daih niin ka inhre thin." a han ti nuah nuah a. Hale-i sam hi a var vek a, a ngil tha in a sei em em bawk.

Chutah naute lem chuan rawn chhanglet in, "I mawi lutuk, an itsik mai mai che a ni." a lo ti a. "Anu bulah ka mumanga apa ka hmuh thu ka hrilh a, mahse min awih chiah lo niin ka hria." a han ti leh a. Naute lem chuan, "I pa hmel i la hmulo hrim hrim, engtin nge i mumanga mi chu i pa a ni tih i hriat?" tiin a lo zawt leh a.

"APA tiin ka ko miau alawm.." Hale-i chuan a han ti leh a. "Ni e, kha kha i pa ngei a ni." naute lem chuan a rawn ti leh a. "Engtin nge i hriat?" tiin a zawt leh a. Naute lem chuan, "I pa te chu ka hre lutuk alawm, khawiah nge a awm tih pawh ka hria." a ti ta mai a. "Khawnge apa chu a awm?" tiin Hale-i chuan a han zawt leh a.

"Ka kutzungtang hi tan chhum la, ka hrilh ang che." a lo ti a. "Ka thei lovang." tiin Hale-i chuan a hreh hle mai."Tan rawh, tan la ka hrilh ang che. En teh, saw ta saw bakcheh pawh a awm ania. va la rawh, tan vat rawh." tiin a lo hrilh leh a. Hale-i chuan bakcheh chu ava la ta a, naute lem kutzung tang chu a tan ta a.

Chutah thisen a rawn chhuak ta vak mai a, Hale-i chuan mak a ti kher mai. Mahse thawkleh khatah thisen chu a bo leh nghal vek, "Khawnge apa chu a awm?" tiin Hale-i chuan a zawt leh a. "A lo kal thuai ang, a awmna hmun erawh ka hrilh theilo che." tiin naute lem chuan a lo chhang leh ta daih mai.

Hale-i thinrim chuan naute lem chu a paih a, a au ta vak vak mai. Hale-i hian naute lem a biak khan kha naute lem khan a rawn chhanglet tak tak lova, amah tho a ni. Amah leh amah a inbia tihna a nih chu, a aw te thleng chuan a danglam vek a ni. Hale-i hi ramhuai tihbuai mek a ni a, chuvang chuan amah a ramhuai chuan a be thin tihna a ni.

Hale-i au ri chu cancer natna avanga khuma mu mek api leh a awmpuitu anu te chuan an lo hre ve vek a, an mangan hmel hle mai. Hale-i nu chuan, "Ka nu, Hale-i hi a damlo takzet a ni. Zantin mai hian a luak a, a luak lah chu  adum vek lehnghal." a han ti a. Hale-i pi chuan a chhanglo, an rilru a hah dun hmel kher mai.

******************

Azra-i chuan dawr chu a la nghak mek a, Arif-a chu rawn kalin, "Azra, ka haw dawn aw..buaina i neih chuan min rawn call mai dawnnia." a ti a, "Tehreng mai, Pu Arif.." alo ti a, Arif-a chu a kal ta a. Azra-i chuan a phone chu a khawih leh mial mial a, chutih lai chuan dawr chhunglam atanga thawm chuan a ti phu zawk mai.

Inchhung lamah chuan ava lut a, banga carpet puan an zar a symbol pakhat nalh tak mai bulah chuan rannung pakhat hi a lo bet va mai a. Chu symbol chu a han en vang vang a, chutah a bialpa Selim-a hmel a rawn lang thut mai. A hmai a lo var vek a, a mit a eng vek bawk. Hmel rapawm zet hian Azra-i chu a rawn insiamchhiat khum vak mai a, mahse a bo leh nghal daih.

Chutah Azra-i chu a thle deuh zuk zuk a, a khur ta cher cher mai. Rum em em hian a meng a, tukverh lam chu ava pan a. Ahnuglam atang chuan aw pakhat hian, "Azra.." a rawn ti thut mai. Chutah a vahnu Hale-i a lo lang thut mai a, Hale-i hmel chu rapawm tak a ni. A dum vek a, a mitmu chu a lian em em bawk.

Sam dum hrawk tak leh sei tak mai hmang chuan Hale-i chuan Azra-i chu a zial ta vak vak mai a, Azra-i chu a khur hlawk hlawk mai. A hmel pawh chu a rawn dum ve tial tial a, a thaw ta hrawk hrawk mai. Rei fe chutia a awm hnu chuan a thal tawp a, nikhawhrelovin a awm zui nghal a.

An dawr bula mi, pitar pakhat Fatma-i chu a lo kal a, "Awii..engtizia nge?" tiin Azra-i chu a buaipui nghal vat a. Azra-i chu a rawn harh a, a hual kual hru mai. "Ihh..ka lu a hai a, ka tlu ta a ni." a han ti ringawt a. "Lo kal rawh...pawnah boruak thianghlim i dawng teh ang." tiin Azra-i chu pawnlamah chuan a chhuah pui ta a.

Tui chhuan so thianghlim tak mai chuan Azra-i hmai chu phih sakin, "Min ti dam la, min ti thianghlim ang che, Aw LAlber...tidamtu Pathian i nih angin min tidam ve ang che." tiin a phun mawlh mawlh a. Azra-i chu a harh kawk mai, "Ka lawm e, Pi Fatma..i tawngtaina chu chhanin a awm ngei e." tiin lawmthu a hrilh mawlh mawlh a.

"Bawihi, ramhuai sualin a tibuai che niin ka hria. Ka tawngtai sak che anga, i dam leh mai ang. Zanah i mut hmain tawngtai ziah bawk ang che, naktukah i tan liau liau rul-lung (snakestone) ka lo phel sak ang che." Fatma-i chuan a han ti leh a. "Ka lawm e." tiin Azra-i chuan lawmthu chu a hrilh leh a.

****************

Zan a lo ni a, Selim-a pawh inlamah a haw ve ta a. A roomah chuan lutin banga a nu thlalak a tar chu a han en vang vang a, chutih lai chuan thawm ri rek hi a hre ta tlat mai. Hnunglam a han hawi a, chhuatah chuan anu thlalak chu pangang tam em em mai hian an lo bawm luai luai mai a. A hlau lutuk chu a phu zuk a, pangang karah chuan chukchu an vak neuh neuh bawk.

Mahse thawkleh khatah a bo thut mai a, banga thlalak chu a va en leh a, engmah danglamna a awm lo. Dawhkana damdawi bur chu chuh vatin mum 2 vel chu a hmawm pawp a, tui a in nghal khawlh khawlh bawk a. Khumah chuan a thu a, a thla a muang lo takzet. A hawi kual hruk hruk a, a nu thlalak te chu ava en leh zeuh zeuh bawk a.

***************

Azra-i pawh chu a haw ve ta, in a lut chiah chu Hale-i room atanga tap hawm hawm ri chu a hre ta tlat mai. Hale-i room chu hawn a han tum a, mahse chhunglam atangin a inkalh tlat mai a. "Hale, bawihte..tinge i tah a? Lo hawng teh, tinge i kalh a?" tiin Hale-i chu a au vak vak a. Room chhung atang chuan Hale-i chuan tap chung hian, "Ka duhlo, Ani Azra..." a rawn ti a.

Hale-i nu chu a lo kal a, "Engatinge Hale-i saw, ka u?" tiin Azra-i chuan a lo zawt nghal vat a. Hale-i nu chuan, "A nuamsam lova, a duh hunah a lo chhuak ve mai ang. Nizanah mumang thalo tak a nei leh a, nilengin a inkhuh tlat a ni." a lo ti a. Hale-i pi (Azra-i nu) chuan khum atang chuan a melh ngai melh reng chung hian, "Ava mak ngai em.." a lo ti nuah nuah a.

Azra-i chuan va panin, "Nu, enge i an?" tiin abulah chuan a thu a. Azra-i nu chu a thle nguai mai a, "Zahir-a khan kha buara ip te kha a tawn kawm a, a tlanbo ta a ni. HAle-i sawn apa chu a mumangah a hmu thin a, apa chuan buara ipte chu a tawn khawm a, a tlanbo ta a ni. Chhuahna kawngka lam a ngaihtuah lo, chuvang chuan a thinrim a ni. A luak pawh a dum vek a, a nunna a hlan a ni." a ti deuh nuai mai a, Hale-i nu leh Azra-i chuan an hrethiam lo hle mai.

Azra-i chuan anu kut chu vuanin, "Lungngai suh ka nu, engkim a tha vek alawm." tiin a hnem a. Hale-i nu lam chu va hawi lehin, "Ka u, Hale-i'n chaw a ei tawh em?" tiin a zawt a. "Eilo, mahse ei luih tir tum kher duh suh." tiin a lo chhang a. Chuveleh Azra-i nu chu a rawn tap ta kerh kerh mai a, "Tinge i tah a, ka nu?" tiin Azra-i chuan a lo zawt vat a.

Mahse anu chuan a chhang lo, a tap char char ringawt. Hale-i nu chuan, "Azra, kal tawh rawh, keiman ka lo buaipui ange." a ti a, Azra-i chu a kal ta a. A chhuak chiah chu a room zawna mit bui veka Hale-i lo ding chu ava hmu a, "Hale, i tha em? Hawh...inkawm dun lawk ang hmiang. Engthilin nge i rilru lo tina a? Min han hrilh teh." tiin roomah chuan an inzui lut ta a.

*************

Arif-a leh Ebru-i te nupa chuan zanriah an kil dun a, "Arifa-a te chuan a duhsak che alawm, ka lo titi pui ange..tiin Azra-i chu ka hrilh a, mahse ka tan a nuamlo emai a ti tlat a. A zah ve hle mai che, hmeichhe fel tak a ni. Naktuk hi thla thum an inngaihzawnna tur a ni tawh lehnghal a, Selim-a'n a surprize dawn a ni awm e." tiin Erbu-i chuan Azra-i chu a han fak chiam a.

"Nia, Azra-i chu a fel alawm..kan chhungkaw zinga mi a nih thuai ka beisei." Arif-a chuan a lo ti ve bawk a. "Nia, Selim-a pawh a ziaawm phah tawh lutuk." Ebru-i chuan a lo ti ve leh a. Chutih lai chuan an room atang chuan, "Ka duh lo." tia phun nuah nuah ri chu Ebru-i chuan a hre ta a.

A chaw eilai chu tawp chatin, "I hre ve em?" tiin a pasal chu a han melh a. "Engmah ka hrelo." tiin Arif-a chuan a lo chhang a. Erbu-i ngaihtha lo chu roomah chuan ava lut a, a fanu Eilf-i chuan mattress chu chawi kangin khum hnuaia thawmhnaw hai vak vak pah hian, "Ka duh lo, Azra-i hi ka putea hian a nei tur a nilo." tiin a lo phun nuah nuah a.

Mak ti tak chuan Ebru-i chuan a en reng a, "Elif...Bawihte, enge i tih a, lo kal teh.." a han ti a. A sawi zawh hma hma chuan mattress lian leh chah tak mai chu a rawn tla thut a, Elif-i chu a chilh hnan ta. Ebru-i mangang chu a au vak a, chutah a hnunglam atang chuan, "Anu, min ko em ni." tih ri chu a hre leh a.

Hnunglam a han hawi chu a fanu Erif-i tho chu a lo ni, "Elif, khawnge i awm a?" tiin a fanu chu a kuah nghal a. "Bathroom ah ka awm a.." chauh hmel tak hian a lo ti leh a. "Elif, na i nei em ni?" tiin a zawt leh a. Tap tuau hian Elif-i chuan, "Ka hnung ana lutuk, Anu.." tih pah chuan a kawr chu a hlim chho a.

Ebru-i chuan afanu hnungzang chu a han en a, a lo duk thluah mai. "Bawihte, engtin nge i intihnat a?" mangang tak chuan a han ti leh a. "Ka hre biklo." tih ringawt chuan a lo chhang a. Ebru-i ngaih chu a tha lo takzet, "I dam leh mai ang." tiin a fanu chu a kuah ngawih ngawih mai.

***************

Zanlai ah chuan Selim-a chuan phun sep sep thawm a hre tlat mai a, ahma kum lawka boral ta, a nu aw ngei a ni. "Kerem, awww...ka naute Kerem, bawkvak rawh...i va han vanduai bik tak em. Bawihte vak zel rawh, theihtawp chhuah rawh." tiin a phun mawlh mawlh a. Selim-a chu a harh a, a khum zawn a en chiah chu a thuchhuak hlawl mai.

A khum zawn takah chuan hnunglam hawi hian anu thi tawh chu a lo thu vung mai a, abulah chuan naupang pakhat dum vek hi a lo bawkvak bawk a, chu naupang chu Selim-a unaupa, boral tawh ve tho a ni. "Selim, i unaupa hi a lo pian chhuah khan a ke a diklo a, chuvang chuan kein a kal ve thei ngai dawn lo a ni. A thih ni kha i la hria em? Kum 5 chauh ila ni asin. I unaupa a thih khan nang chu i hlim em em a, i mamawh loh thu i sawi thin a ni. I la hre ve em? Selim, i unaupa ka duat em em hi i la theihnghil bik lovang chu tiraw?" tiin anu chuan a vin ta khur khur mai.

Selim-a nu chuan kawr a ha lova, a hnungzang chu a dum thleh thluah mai bawk a. Selim-a chuan  a hlau kher mai, a thaw hrawk hrawk a. Chutah anu bawk chuan, "En rawh..han enchiang teh." tih pah chuan a rawh hawi a. A hnute hliah tur chuan buara bag hi a awm zawnah chuan a dah a, a tap pur mai bawk a.

"Va kal rawh, ka fapa..i unaupa Selim-a hnenah sawn va kal rawh." a ti ta mai a. Chutah a unaupa Kerem-a chu khumah chuan a rawn bawkvak chho ta a, Selim-a chu a au nasa mai. Chutih lai chuan anu bawk chuan, "Engvanga hmangaih lo che nge a nih i zawt dawnnia, Azra-i hi nupuia a nei anih chuan an fa chu nangmah ang bawka rualbanlo an nih tur thute pawh hrilh vek rawh." a la rawn ti khur khur mai a.

Selim-a chu a harh zawk mai a, a mumang vek a lo ni tih a hriat chuan a thaw huai mai. Mahse a khum mawng lam a han en chu chhuatah chuan buara ip chu a lo awm tak tak a, a tho vat a, light a on nghal a. Buara chu a va chhar a, mahse engmah thil danglam a awm lo. A han enchiang leh deuh a, buara ip pakhat ve mai a ni.

****************

Hale-i pi chu a tho thut a, pawnah a chhuak a. Inhnuai lama basement chu a zu pan a, a chhungah chuan a lut a. Bawm pakhat a la chhuak leh a, bawm chu hawngin a chhungah chuan a pasal thi ta coat suit hlui chu a la chhuak a. Hanger nen chuan coat chu bangah chuan a kai a, rum tak hian a melh a.

Chutah a pasal thi tawh aw ngei mai chuan, "I thiamloh vek a ni, nangmah vanga thleng a ni. Khawngaihin tawp tir rawh, tawp tir tawh rawh." a rawn ti ta khur khur mai a. HAle-i pi chuan thinrim hmel tak hian, "Nanghian min tichhe vek a ni.." a lo ti a. Chutah a pasal hmel chu a lo lang thut mai a, a rawn nui vur vur mai.

"Kan zinga mi a ni tawh." a rawn ti leh a. "Zahir-a kha nangmah vanga tlanbo a ni, nangmah vangin." tiin Hale-i pi chuan a han vin leh deuh khur khur a. Chutah a pasal mit chu a rawn sen vek a, "Tawp tir tawh rawh, kan ta a ni tawh." a ti leh a. Hale-i pi thinrim chuan a chemte hum lai chu a lek kang a, ahma zawna a pasal ding chu a vit ta siah mai.

****************

"Ani...aniii.." tia Hale-i au vak vak chuan Azra-i chu a ti harh zawk mai a, rang tak chuan a tho chhuak a. Hale-i room lam chu a pan vat a, mahse a lo inkalh tlat mai a. "Anii..helamah ka awm." a rawn ti leh a, pawn lam atangin a ni. Azra-i chu pawnah chuan a tlan chhuak a, "Hale, Hale..khawnge i awm?" tiin a au vak vak a.

"Anii..api hi...Pi chemte kha dahthla rawh, Anii min pui rawh." tiin Hale-i chu a t(r)e chel chul mai bawk si a, Azra-i chu a mangang kher mai. Chutah an inbula hnim buk kar atang chuan zawi tak hian Hale-i aw ngei mai chuan, "Ani, thil hrilh tur che ka nei ania." tiin a rawn phun ta sur sur mai.

Azra-i chu ava hawi vat a, muangchang chuan ava pan hnai a. "Hale...Hale.." tiin a han ko leh a, chutih lai chuan inhnuai atang chuan Hale-i pi chu a rawn chhuak ta a. Azra-i hmuhloh hlan chuan ngawi rengin inchung lamah chuan a chho leh a, chemte chu a la hum reng bawk. Hale-i aw chuan, "Ani..lo kal hnai zel rawh." tiin a rawn phun leh sap a.

Hni chu a che dut dut a, Azra-i chuan a va hai kiang a. Hale-i naute lem a lo ni a, chuveleh hnim kar atang chuan Azra-i kut chu tu emawni hian a rawn man thut mai. Chutah a hmel a lo lang a, Hale-i a lo ni. A hma chu a dum rang nuai mai a, a han a dum vek bawk. "Ani...hnunglam hawi suh." a ti ringawt a.

Hale-i chuan hnunglam chu a han hawi hram a, chutah Selim-a a lo lang thut mai. A mit a sen vek a, a thinrim hmel em em bawk. Azra-i samah chuan a kek vak a, a phun mawlh mawlh bawk. Chutih lai chuan Hale-i pi chuan kawngka chu a lo chum bur bur a, a mumang ram atang chuan Azra-i chu a harh zawk mai.

Kawngka chu a lo inchum ri tak tak a, rang takin a tho vat a. KAwngka ava hawng chu Hale-i leh api an lo ni reng mai, "Api hi chemte kengin inhnuaiah a lo zu chhuk leh a, ka zu hruai a nih hi." tih pah chuan chemte chu Azra-i hnenah chuan a pe a. Hale-i pi chuan Azra-i chu melhin, "Ipa a lo kal a, kan inbia a ni." a lo ti ve bawk a. "Lo lut ru..." tiin Azra-i chuan a hruai lut a, Hale-i nu pawh chu a rawn harh ve a. 

******************

Atukah chuan Azra-i te dawr bula mi Fatma-i chuan rul-lung chu a lo buaipui mawlh mawlh a, "Hei hi rul-lung an ti a, Mecca khuaah ruah ang maiin a sur thin an ti. Heng lungte hian nunna an nei a, ramhuai an hmu thei a ni. Hetiang rul-lung ang hi mi nazawngin an phel(cut) thiam lo va, kei erawh ka piin min zirtir thin avangin ka thiam ve chauh a ni." tiin Azra-i chu a hrilh mawlh mawlh a.

Lungte pathum chu a han sil fai a, "Azra, mu rawh le. Hlau suh, engmah ana dawn lo." a han ti a. Azra-i pawh chu a mu ta a, lungte pathum, tuikep ang tak mai chu Azra-i chalah chuan a dah a. Chemte hriam tak lak pah chuan, "I taksa a ramhuaite hnathawh chu he chemte hmang hian ka tibo dawn a ni, tichuan khang lungte te kha a rawn keh mai ang." a ti a.

Engemaw chham mual mual pah chuan Azra-i kut te, a hmaite leh a ban te chu chemte chuan na miah silovin dimte hian a han thai zauh zauh va, chutah lungte pathum zinga pakhat chu a rawn keh ta a. "Ka tih reng kha, nangmah ah hian ramhuaiten hna an thawk a ni." a han ti a. Azra-i chuan mak  ati em em a, a thla a muanglo takzet.

*********************

"Anu, uite kha va infiam pui leh ila." tiin Ebru-i fanu Elif-i chuan Azra-i dawrah len leh chu anu hnenah chuan a dil a, anu chuan khum a thlep fel mawlh mawlh a. "Vawiinah chuan kan kal theilo." tiin a lo chhang a, "Engtikah nge kan kal leh dawn?" tiin Elif-i chuan a zawt leh a. "Ka hrelo, i pa ka lo be phawt ang, a buailo hunah kan kal dawnnia." a lo ti leh a.

Elif-i chu a nu hnungchhawn zawng chuan a thu a, chutah lungawiloh hmel tak hian, "Anu, a pute Selim-a hian Azra-i hi nei suh se, ka duhlo." a ti ta mai a. Mak ti tak chuan Elif-i chu anu chuan ava en a, a kawr hnungah chuan khawmual kaikuang liam em em mai hi a lo bet vu mai. "Elif, nilo.." tiin ava tlan phei nghal a. Ava thlen meuh chuan chu kaikuang chu a lo bo leh daih tawh a, "Tinge, anu?" tiin a lo zawt vat a. "Engmah a nilo." tiin Ebru-i chuan a fanu chu a kuah a, a thaw huai mai. 

*******************

Selim-a chuan an zungbun zawrhlai zinga a duh ber chu thlangchhuakin a coat ipteaah chuan a thun nghal a, a phone a lo ri a. A unaunu Erbu-i a lo ni, "Hello Unaunu, enge ni ta?" a han ti a. "Selim, titi pui che ka va duh ve aw..a pawimawh em em chuang lo nangin phone a sawi mai theih a nilova." a lo ti a. "Enge ni ta? Engthil nge a?" tiin Selim-a chuan a lo zawt a."Ilo peng lawk thei angem? Darkar chanve vel bak a nilovang?" Erbu-i chuan a han ti leh a.

"Vawiin chu tihtur ka ngah lutuk a, tlai lamah Azra-i nen kan inhmu dawn bawk si a. A pawimawh lemloh chuan, nidangah titi mai ila." a rawn ti leh a. "Awle, a tha alawm." tiin phone chu an dah ta a. Erbu-i chuan a fanu phone khawih mial mial lai chu va thuthnaihin, "Bawihte, I nu Azra-i hi i ngaina vak lo em ni?" tiin a han zawt a.

"Ngaina e, tinge min zawh a?" tiin Erif-i chuan a lo zawt let a. "I ngaina vaklo amaw ka lo tia, i sawi thin tlatin ka hria a. "Chutiang ka sawi lo reng reng." tiin a fanu chuan a lo chhang leh a. Erbu-i ngaih chu a thalo takzet, "Umm..a that chu." a ti ringawt a. Mahse a hmaa a thil hmuh te chuan a ti hrilhhai takzet a, a thla a muang hlawl lo a ni.

********************

Hale-i pi chu ama room ah chuan a thu a, a melh ngai melh reng pah chuan a phun mawlh mawlh a. "Ani chungah khan an ti ngei dawn e, zawhfel law law an tum a ni. An la dawn a ni, ani kha kan rawn la dawn a ni, a sam te an rawn hal sak dawn a ni." tiin a phun nuah nuah reng a.

Chutah inhnuai lamah chuan a chhuk leh ta a, ketli ruak chu a chhuang a. A chhungah chuan tel bur khat hi a dah bawk a. Chutah ketli chu a rawn sa ta, tel bur plastic pawh chu a rawn sawr tan ta a. Chutih lai chuan Hale-i erawh chu a naute lem nen chuan an lo inbe leh mek a, "Ka Ni Azra-i hian min hmangaih lutuk, nizan ka mumang ka sawi pawh kha a awih ngei ang." Hale-i chuan a han ti a.

Naute lem chuan, "A hmangaih lo che, i bulah sawi mahse dawt vek a ni. I Ni Azra-i hian dawt bak a hrilh ngai lo che, ka ringlo a ni." tiin a lo chhang a. Tel pawh chu a sa tha tawh hle mai, Hale-i pi chuan a ketli chawp chuan a la a, inlamah a chhoh pui ta a. Hale-i chuan naute lem hnenah chuan, "Engvangin nge min hmangaih loh tehlul ang?" tiin a han zawt leh a.

"Ka hmai hi hal la, tichuan ka hrilh ang che." tiin naute lem chuan a chhang ta mai a. "Ka duhlo.." tiin Hale-i chuan a lo hnial tlat a. "Hal rawh..ka hmai hi i hal phawt chuan a chhan ka hrilh ang che." a lo ti leh a. "Mahse, a sa i ti dawn asin." a han ti leh dek dek chu naute lem chuan, "Hal vat rawh..hal rawh." tiin a rawn vin khur khur a.

A bula bati ah chuan naute lem hmai chu a hal ta a, a sawr nasa hle mai. "I pi pawh hian i hmai hi tih kan(burn) a tum a ni." naute lem bawk chuan a rawn ti leh a. Tap tep hian Hale-i chuan, "Ka pi chuan min tina duh hauh lovang." a lo ti a. "I pi hi misual tak a ni, thah che a tum a ni." tiin a lo chhang leh a.

"Ka pi hi misual a nilo, a damlo mai chauh a ni. DAwt i sawi, min bum reng suh." tiin Hale-i chuan a vin vak vak a. "I pi hi misual a ni, hetia i awm nachhan hi amah vang vek a ni. Thah che  atum a ni, a chhan chu nang hi a hlau che a ni." a lo ti leh a. Chutah tel sa tak keng chung chuan Hale-i pi chu a rawn lut ta a, mahse Hale-i chuan a hmu ve lo.

Hale-i chu a pan hnai zel a, "Ka pi hian min hmangaih a ni, min that lovang." tiin Hale-i chu ala tang ve tlat mai. "A hmangaih lo che, nang hi kan ta i ni tawh tih a hria a ni. Chuvang chuan a hlau che a, thah a tum che a ni." a lo ti leh a. "Ka pi hian min that lovang, min that lovang." tiin a la tang tlat a.

A pi lah chuan a rawn pan hnai zel a, Hale-i erawh chuan a hnungchhawn tlat avang chuan a hmu ve der silo. "A that dawn che, i hmai kha tih kan vek a tum a ni. I thi a nih chuan engkim a fel leh vek a ring a ni, ka hmai hi ilamah han her kual teh, thil hmuhtir tur che ka nei." naute lem chuan a rawn ti ta mai a.

Naute lem chu ama lamah chuan a han hawi tir a, a min a lo dum vek mai. Chutah a pi chuan tel chu Hale-i luah chuan a leih ta a, a khu ta vut vut mai. Chutah Hale-i chu a rawn hawi a, a hmai chu a lo kang sawr vek mai. Rum tak hian a pi chu a melh a, a tho thut a, a rek ta mai a. Chhuatah chuan a bawhbet a, api chuan a hlau kher mai.

"Tun tum chu i hlawhtling tawh lovang, kan phal tawh bik lo." tiin HAle-i chuan a vin hrep hrep mai a, api chu a au chel chul mai. Kil khat atang chuan chutia a pi lo tal vak vak, boruak lo vai vak vak a hmuh chuan  Hale-i chuan mak a ti kher mai. "I lo hmu em, i pi chuan thah che a tum a ni. En rawh saw, a bulah sawn nangmah i awm ve a maw a  ti a, a hlauh em saw." tiin naute lem chu a lo nui a.

"Pi engti zia nge?" tiin HAle-i chu ava tlan phei vat a. Api chuan HAle-i a hmu chu mak a tih hmel em em a, "Lo kal rawh le, i roomah kal ang." tiin Hale-i chuan a kai tho va. Anu bazar hawn chuan a rawn hmu a, "Hale, tinge a?" tiin a zawt nghal a. "Eng nilove, api nen hian kan tei harh mai mai a nih hi." tiin a lo chhang a.

*******************

Zanah chuan Selim-a leh Azra-i te chu an inhmu ta ngei a, restaurant ah chuan dinner an eidun a. Selim-a chuan a mumang rapthalk tak te chu hrilin, "Mumang mai mai a ni, ka nu hi nikum khan a boral a...ka la tuar dam thei chiah lo a ni....a chang chuan ka bulah a awm ve tlat te hian ka hre thin." a han ti nuah nuah a.

"Thlamuang taka a chawlh ngei ka beisei." Azra-i chuan a lo ti a. Selim-a chuan, "Amen..ni rawh se. Tinge iva tawng duhlo ve a?" tiin a han zawt a. "I kawng daltu nih hi ka duhlo a ni." tiin a lo chhang a. "I dal hleinem, chutiang sawi suh." Selim-a chuan a lo ti a. "Ka tun hma nun te kha a thalo takzet a ni ngei ang.." Azra-i chuan a han ti leh a.

"Chutiang sawi suh..engkim a tha leh vek dawn alawm." tiin Selim-a chuan a lo chhang leh a. Azra-i chuan an chawlhna restaurant chu a han en kual a, "Helai hmun hi ka kal pel ziah a, a chhungah ka la lut ngai miah lo, a nuam khawp mai." tiin a han nui sang a. "Nia, keipawh ka vawikhat kalna alawm. Azra..thilpek tur che ka nei a..thilpek pawh a ni chiah lo, i ta tur ania. A la hma viau maithei a, mahse hei hi ka pe duh che a ni." tiin a ipte atang chuan rangkachak zungbun chu a han la chhuak a.

Azra-i chu a lawm hle mai, a hnuk a ulh hial a. Selim-a bawk chuan, "Ka thilpek kha i pawm  anih chuan, keipawhin ka ta tur ka nei ve nghal bawk ania. Kha zungbun kha i bun a nih chuan, keipawhin ka bun ve nghal ang. Ka hmangaih che, Azra." a ti a. Azra-i chuan zungbun chu a han en a, a mawi a ti kher mai.

****************

Hale-i nu chuan a fanu Hale-i chu khumah chuan a muttir a, puan sin tirin a chalah a fawp a. A kal tur chiah chu Hale-i chuan a nu banah chuan a lo man a, "Nu, api hian min thah a tum em ni?" tiin a han zawt a. "Tum love...tinge chutiang te i sawi a?" tiin a nu chuan a lo zawt let vat a.

Mahse Hale-i chuan a chhang lo, ngaihtha lemlo tak chuan anu chuan a chhuahsan ta a. Hale-i pi room ah chuan anu chu ava kal a, Hale-i pi chu a lo phun leh ta malh malh mai. "A bo ta, ramhuaiten an tihbuai kha, a kalbo ta. Kum tam tak a liam tawh, a fanu erawh hetah ala awm reng a, mahse ani chuan a hre hauh silo. A en duh miah lova, chhuatah chuan a fanu chu a muttir a, a mit a tuam sak bawk a." tiin amah chuan a phun leh mual mual mai a.

Chutah HAle-i nu lam ava hawi a, "Gulten, Gulten...ka damdawi min pe teh. Min chiu rawh...injection kha min pe vat teh." a han ti a. HAle-i nu chuan pawhdawh-a damdawi chu a la chhuak a, insulin chuan a han hip hrawk a. Tichuan Hale-i pi chu a chiu ta a, Hale-i pi pawh a muhil ve thei ta.

*****************

Selim-a leh Azra-i te chu motor chhungah chuan thu dunin an titi a, "Karian khua a kan in hlui kha hralh tumin an inhnial buai vak vak a, ka u thinrim chuan ka pa chu a vit hlum ta mai a ni. Tichuan ka u chu a tlan bo a, kum 12 chhung chu a chin hriat lohvin a bo tawh a ni. Tuman khawnge a awm an hrelo, ka u nupui chuan hetiang thil hi a thleng dawn tih a hriatlawk thu min hrilh a, tichuan ka pa ruang bulah chuan inkhaw hrelovin ka thal ta tawp mai a ni. Tichuan ka nu chuan ka pa thih hnu chuan chu ina chen chhunzawm zel chu a duh ta lova, ka ni(aunt) te in lamah police te nen kan phei ta a ni. Chuta tang chuan ka pangngai ve leh chauh a ni, Karian khuaah chuan kan let leh tawh ngai lo. Ka u khan a tlanbo lai khan a nupui chuan fa a pai tih reng a hre lo, fa a nei tih pawh a hre lo hrim hrim. Ka ngaihtuah let chang phei chuan Hale-i nun hi ka khawngaih ngawih ngawih a ni, nge ni a ka nun zawk hi khawngaihthlak pawh ka hre lo. Kum naupang tak ni chungin he natna chimawm tak hi a nei a, a pa chu tualthattu niin a chin hriat a ni der bawk silo. Chutiang thil rapthlak tak kan chunga a thlen atang chuan ka nu pawh chu a rilru a buai tan a, chu chu kan chhungkaw chanchin chu a ni e. Damlo pahnih an awm a, hmeichhe pakhat, a pasal awmna hrelo nen, chuan keimah hi ka ni leh mai." tiin Azra-i chuan an chhungkaw chanchin duhawm loh tak mai chu Selim-a hnenah chuan a hrilh a.

********************

Zanlaia chuan Hale-i chu a tho thut a, tukverh lam ava pan a. Tukverh ah chuan dakin an inkawta Selim-a'n a ni Azra-i a lo thlah mek chu a zu hmu a, a room ah chuan a let leh nghal a. Azra-i pawh chuan in lam chu a rawn pan a, a luh hma chuan a zungbun chu phelihin a ak tha a.

Azra-i chu a rawn lut a, Hale-i pawh a lo chhuak lehnghal a. "Ani...zanin chu mudun ila." a lo ti a. "Tehreng mai, lo kal rawh." tiin Azra-i chuan a room lamah a hruai phei a. Hale-i nu Gulten-i pawh a la muhil lo, a mut hmunah chuan a meng reng a. "Ani Azra, nang hi chu i awm lovang tih ka hlau ngawt mai. Ka thian neihchhun i ni, min kalsan miah suh aw.." tia a fanu tawng mual mual ri te chu a lo ngaithla vek a.

***********************

"Anu..anu.." tia a fanu Elif-i'n a au ri chu hria in Ebru-i mutui lai chu a harh zawk mai a, "Elif?" tiin a mutna bul chu a han en vat a. Mahse a fanu chu a lo awm reng reng lo, "Ani Azra-i a lo kal ania.." Elif-i aw bawk chuan a rawn ti leh a. "Elif, Bawihte?" tiin Ebru-i chu a tho vat a, a zawng kual nghal a.

Elif-i aw bawk chuan, "Ka kuttin min seh sak vak vak a, ka kut a thi zawih zawih mai, anu...Anu...Ani Azra-i hetah hian min kalh khum a ni." a rawn ti leh ta mai a. Thawm lo chhuahna chu a han ngaithla chiang a, a khum bula pawhdawh chhung atanga lo chhuak a ni tih a hre ta.

Hlau tak chung chuan ava pan a, "Anu..Azra-i'n ka ha zawng zawng a phawi vek a, a phum a ni." a rawn ti leh a. Ebru-i chuan pawhdawh chu a han hawng a, a chhungah chuan vaivut tam em em le mihring ha(teeth) a lo awm nuai mai. Ebru-i hlau lutuk chu a kat dawrh a, a au vak mai.

Chutah Elif-i aw chu a rawn danglam tan a, puitling aw ang mai hian a thum tulh tulh mai. "Anu, Azra-i hian min ti na a ni." a rawn ti leh chhur chhur mai a. Erbu-i chu a tap zawih zawih tawh mai, darthlalang hma pawhdawh chu a rawn in kik leh ta karh karh mai a. "Azra-i'n ka mit a thui(stitch) phui vek a, ana lutuk.." a rawn ti leh a.

Pawhdawh chu a han hawng leh a, mihring mitmu a lo awm leh ta mai. A khar leh nghal vat a, "Elif..khawnge i awm?" tiin a au chel chul tawh mai a. "Anu...Azra-i hian min tina lutuk..min chhan rawh. Ka duhlo, Azra-i hi ka ngaina lo a ni." a rawn ti leh a.  Thawm lo chhuahna chu a dang leh daih tawh, wardrobe chhung atanga rawn tawng a ni.

Tap chung chuan ava pan leh a, "Anu...hemi chhungah hian Azra-i chuan min khai hlum a ni." a rawn ti leh ta mai a. Wradrobe chu a hawng leh a, thisen hlira khat kawrfual hi a lo inkhai zul mai. A hlau lutuk chu tlan chhiat a tum a, hnunglam a hawi chiah chu Azra-i a lo ding reng mai.

A hmai chu a dang vek a, a bawl tuah tuah bawk. A ha zawng zawng pawh a dum vek, chutah Ebru-i chu a samah a tham vak a. Aw rapthlak zet hian, "I fanu chu kei hian ka laksak che a ni, lei hnuai thuk takah ka phum bo tawh." tiin a insiamchhiat khum vak mai. Ebru-i chu a rak chel chul mai a, chhuatah chuan a tal vak vak a. A pasal Arif-a chu a lo harh a, "Ebru..Ebru...enge ni ta?" tiin light a on a, ava pan vat a. Ebru-i chu a tap zawih zawih mai, a pasal zawhna pawh chu a chhang thei lo.

***************

Selim-a pawh chu inah chuan a haw ve ta a, sitting roomah chuan TV a en a. Thutthleng seiah chuan a mu a, a TV en laiah chuan nu phakhat chuan rilru nat hmel takin thil a lo sawi mawlh mawlh a. "Ka fapa chuan nupui hual a nei a, kum khat leh achanve lai chu innei miah lo chuan an inhual reng a. Chu hmeichhia chuan ka fapa chu a hmangaih takzet, amah pawh a rilru a buai phah hial a ni. Kum 4-5 chhung vel damdawiinah a awm a, a tawpah chuan a chhungte chuan an khaw lamah an thawn haw ta nge nge a ni." tiin a tap tep mai a.

Selim-a chuan maimitchhing chung chuan TV-a chu pitar thusawi a ngaithla reng a, "Vawikhat chu an khuaah ka fapa nen kan va kal a, chu nula chu kan va hmuchhuak ta a.  Unaunu a lo nei a, a hming chu Delek-i a ni. Ka fapa nen chuan an lo inzui ru leh hman daih tawh hi a lo ni a, kumkhat chhung tehmeuh an lo inzui leh hman tawh a nih chu. Ahnuah a rukin an innei a, a nupui hual unaunu chu a nei leh mai chu ania. Chanchin zawng zawng a hriat hnu chuan chunu pawh chu a thinrim hle a, a atzual phah hial a ni." tiin a han sawi chhunzawm leh mawlh mawlh a.

Selim-a chuan a ngaithla tui vak lemlo aniang nge, a tho a, inchung lamah a chhohsan ta daih a. Bathroom ah a kal a, a hmai a phih a. Inhnuaiah chuan a chhuk leh a, TV chu a lo la in on reng a. Dawhkana ahma zana a mumanga a hmuh, buara chu a lo awm a. Buara chu la in a coat chu ha tha sawk sawk a, a chhuak leh ta daih a.

*****************

Selim-a chuan a tlereuh dawr lam chu ava pan a, reiloteah a thleng vat a. Dawr chhung a luh hma chuan a thianpa Seyit-a leng haw chuan rawn hmuin, "Ehee Selim, zan zanah enge i tih dawn a?" tiin a han zawt a. "Ka phone ka theihnghilh a, ka la dawn a nih hi." tiin a lo chhang a. "Anih chu mawle...anih phawt aw." tiin Seyit-a pawh chu a kal ve leh nghal mai a.

Tichuan Selim-a chuan a dawr chhunga lunghlu leh rangkachak te chu a la chhuak a, tlereuh man to tak tak te chu la chhuakin buara ah chuan a khung mawlh mawlh a. Chutia a telreuh a la chhuak lai te chu CCTV chuan a cover vek a, mahse engatan mah a ngai lo. Ngun te, thi(necklace) te, zungbun te leh bengbeh zawng zawngte chu buara ah chuan a khung vek a.

Tichuan dawr atang chuan a chhuak leh a, dawr chu tha takin a kalh fel leh a. Buara chu motor chhungah chuan a dah a, tichuan chak takin a tlan nghal a. Hmun pakhat, reh reih ruih ah chuan a ding a, buara chu la chhuak lehin kawngsira luikawr lo awmah chuan ava kal leh a. Chu kawrah chuan buara chhunga tereuhte chu a bun ruak ta vek mai a, chung lunghlu, pawisa leh tlereuh te chu tui bal tak maiah chuan a thlak fai ta vek mai a nih chu. Amah lah chu a hlim hmel em em a, a nui vur vur mai.

Selim-a chu a harh zawk mai a, a thlan a tla buah buah mai. TV chu a lo la in on reng a, a lo mutthilh san chu niin. A mumang vek ni ngeiin a hria a, a thaw huai mai. Mahse a ke lam a han en a, pheikhawk pum a lo la bun reng mai tih chu a zu hmu a. Dawhkanah chuan buara ruak pawh chu a lo awm ngei mai a, a hlauthawng takzet.

********************

Hale-i phun mual mual chuan Azra-i chu a ti harh a, light a on vat a. Hale-i chu amah hnungchhawn zawngin a lo ding khur hlawk hlawk mai a, bang lam chu a en tlat bawk a. Tawng mak tak tak hmangin a phun mual mual a, Azra-i ngaih chu a thalo takzet. "Hale, enge i tih?" tiin a han bia a, mahse Hale-i chuan a ngaihsak hauh lo.

Azra-i chu a tho a, Hale-i lam chu ava pan a. Chutah le, HAle-i chuan nautelem a lo pawm a, chu naute lem dul chu a lo thler duai mai a. Naute dum atang chuan thisen lo chhuakin vangvat niawm tak lian pui pui maite chu an lo vak nuai nuai bawk a, Azra-i chuan a hlau kher mai.

Bang chu a han en leh a, banah chuan khuaibu lian tak an mai hian thil dum hlawm lian em em mai hi a lo bet vu mai a, a che ngual ngual bawk. "Awii..Hale.." tiin Azra-i chu a tap titih nghal mai a. Chuveleh Hale-i chu a lo hawi a, a hmaiah chuan thisen a lo kai nuai mai. Azra-i hlau lutuk chu a meng phar awn awn mai a, chutah wardrobe kawngka a lo inhawng thut a, rang em em hian a inkhar leh nghal a, Hale-i chu a bo daih mai.

Hnunglam atang chuan Hale-i aw ngei mai chuan, "Henu hi in tihnat kan phallo, in tihbuai kan phallo. Khapa nen khan kan inthen tir dawn, ani kha kan ta a ni." tiin a rawn phun leh sur sur a. Azra-i chuan room kawngka chu ava hawng a, "Hale.." tiin a au leh a. Chutah pitar aw hian, "Sawlai hmun saw a ti bawrhbang vek a ni, hmuntin ah bawlhhlawh a awm, a bal lutuk." a rawn ti chhur chhur mai a.

Chu pitar aw chu tudang nilovin anu(Hale-i pi) aw ngei a ni tih chu Azra-i chuan a hrechiang hle, thawm pawh chu anu room lam atanga lo chhuak a ni. Anu bawk chuan, "Azra, i unaupa kha mi tenawm a ni. Engvanga lungawilo nge ka nih tih min zaet thin a tiraw...nangmah kha in en ta che." a rawn ti leh a. 

Anu room ah chuan ava lut a, a thil hmuh chuan a ti hlau kher mai. Naute lem hmai chauh hi a lo inkhai fur mai a, tukverh bulah chuan Hale-i nu Gulten-i chu a lo thu khur mai bawk a. Gulten-i ka(mouth) atang chuan thi khar hlawm lian tak mai leh sam(hair) hraw tak mai hi a lo uai nuai mai a, a dum nguk mai bawk a.

Room chhungah chuan naute thawmhnaw niawm tak te, thlalak chi hrang hrang, bal leh hlui zet tawh te chu a lo in khai fer fur mai a, a rimchhe em em bawk. Gulten-i thutna bulah chuan anu( Hale-i pi) leh a unaupa tlabo ta, Zahir-a te chu chhuatah an lo thu dun a, thosilen in an inkhuh tlat bawk.

Hlau tak chung chuan Azra-i chuan, "Unaunu, engthil nge thleng hi?" tiin ava bia a. MAhse Guten-i chuan a chhang lo, rum tak hian a lo melh ringawt a. Anu chu a lo la phun mawlh mawlh a, "A bal lutuk, hmuntin mai hi a bal a ni." tiin thinrim hmel tak hian a lo la phun nuah nuah mai.

"Nu, enge i sawi awmzia?" tiin Azra-i chuan a han zawt ve leh a. "Ka thinrim thin thute pawh min hrilh a, min han en ta che...hetianga ka awm min hmu a nih chuan a lung a awi hauh lovang." tiin anu chu a lo ang leh bawrh bawrh mai. Azra-i chu a zu kun hniam a, anu chuan thosilen hnuaia awm reng chung chuan engemawni hi chawhtawlh a tuiah chuan a lo chiah a, a lo nuai vak vak a.

Chutah Hale-i a lo lut ta, Azra-i lam chu a rawn pan ta chhut chhut mai a, mahse Azra-i erawh chuan  ahnungchhawn tlat avangin a hmu lo. Vawilehkhatah Azra-i chuan thosilen chu a han pawt vak a, anu leh a unaupa Zahir-a te chuan an lo melh hraw mai. Hnunglam atang chuan Hale-i chuan, "Ani Azra.." a rawn ti thut mai a, rang takin Azra-i chu a hawilet a. Hale-i chuan a ban a phar a, Azra-i man tum niawm tak chuan a rawn tlan phei ta vak mai.

Azra-i chu a harh zawk mai a, a han hawikual chu Hale-i pi room chhuatah a lo mu reng mai chu niin. Khum lam a han en a, anu chu a lo muhil bawrh bawrh a, rang tak chuan a tlanchhuak nghal vat a. Ama room lam ava pan leh a, Hale-i chu tui tak hian a lo muhil a. A thaw deuh hak a, a rilru chu a mangang takzet.

********************

A tuk zingah chuan Selim-a chu an dawrah chuan a kal leh a, a thianpa Seyit-a nen chuan CCTV footage chu enin a hma zan lawka Selim-a'n tlereuh leh pawisa a lakchhuah lai te, buaraa a khung laite chu an en dun a. "Seyit, awmzia ka hrelo...hetiang thil hi engtin nge a thlen theih?" tiin Selim-a chu a mangang kher mai.

"I mumangah chuan hetiang hian i che tak tak amaw?" tiin Seyit-a chuan a lo zawt let a. "Ka thil hmuh leh thil thleng te hi engmah a awmzia ka hrelo, Seyit. Nizanah pawh khan engtia han tih tur nge ni ang tiin zankhuain ka inngaihtuah tawh, nizana kan inhmuh hnu khan tihian ka awm ta ni berin ka hria." a han ti a.

"Police hnenah thlen mai la.." Seyit-a chuan a lo ti a. Beidawng tak hian Selim-a chuan, "Enge kan va sawi anga? He footage hi kan hmuh dawn em ni?" a lo ti hlur mai a. "Khawiah nge i paih i hria em?" tiin a han zawt leh a. "Ka hrelo, thianpa...ka hrelo tak tak." tiin tap lek lek hian a lo chhang a.

Seyit-a chuan buara chu a han en vang vang a, "He buara ip hi engtin nge i neih pawh i hre bawk silo, mithiam te hnenah he buara ip hi va keng ila, va hmuh tir mai chi a ni. Hrillawkna thalo tak te pawh a lo ni thei asin, ka ngaih a tha miah lo ania." a han ti a. "He buara ip hi tu chu nge maw kan hmuh tir ang le? Tlereuh ho awmna chu min hrilh thei dawn em ni?" Selim-a chuan a han ti leh khur khur a. "Chubak tihdan dang ka hre tawh biklo." Seyit-a chuan a lo ti a. "Tumah bulah hrilh suh aw, nangmah chiah ka hrilh che ania. Midangin an hria a nih vaih chuan, mi a dahna inah min dah a nimai." tih pah chuan CCTV footage chu an en dun reng a.

********************

Ebru-i leh a fanu Elif-i te chu Azra-i dawrah chuan an va kal leh a, Azra-i'n a hmuh chuan a lo nuih sang a. "Aww Unaunu Ebru, lo leng ru.." ahan ti a, mahse nui hauh lo chuan Ebru-i chuan, "Kan pa ka rawn be lawk dawn, kan kal leh nghal vat ang." a lo ti hmuk mai. Chutia Ebru-i'n huat hmel taka a chhang bun deuh hmuk chu Azra-i chuan mak a ti hle mai a, a en zui vawng vawng ringawt a.

********************

Hale-i chu pawnah chhuakin inhnuai basement lamah chuan a zu chhuk a, thingrem lian tak mai chu hawngin a chhungah chuan bawm pakhat hi a lo awm a. Bawm chu a la chhuak a, a han hawng leh a. Bawm chhungah chuan a pi leh pute nupa thlalak a lo awm a, thlalak ho chu a han la chhuak a.

A pa thlalak te, a nu thlalak te leh a pian hmaa an chhungkaw thlalak te a lo ni hlawm a. Chutih lai chuan anu a lo kal a, "Hale, kha bawm kha tinge ilo lakchhuah leh tak a?" tiin a zawt a. Hale-i chuan thlalak en reng pah chuan, "Nu, apa hian ka piang dawn a ni tih hi hre lawk tase a tlan bo bik hauh lovang tiraw?" tiin a han zawt a.

Anu chuan Hale-i samah chuan a chul sak a, "A tlan bo san bik hauh lovang che, ka fanu...i piang dawn tih a hre miau hleinem." tiin a lo chhang a. Hale-i mittui chu a tla zawih zawih a, "Tinge min kalsan?" tiin a zawt leh a. "Kan hre biklo, tumah min hrilh lovin a bo daih a ni." tiin a lo chhang leh a.

"Nileh engtik khan nge ka pu hi a boral?" tiin a zawt leh a. "I pian hma khan a boral daih tawh alawm." tiin a lo chhang leh a. HAle-i chuan a nu chu a han en vang vang a, "Anih chuan an pahnihin min hmu ve hmanlo tihna em ni?" a han ti leh a. "Aw..an hmu hmanlo che." tiin a nu chuan a lo chhang leh a.

Anu chuan a chhuahsan a, chuveleh Hale-i kawchhunga ramhuai chuan Hale-i chu a rawn be leh ta. "I pa nilovin i ni Azra-i zawk hi bo se ka ti ngawt mai." a rawn ti leh ta khur khur mai. "Nilo, ani pawh a tlanbo ka phallo." tiin HAle-i chuan a lo chhang a. Chutah a hnungah chuan ramhuai hmeichhe dum lian zet mai hi a lo lang thut mai a, Hale-i beng bulah chuan, "I pi ang tho khan, i ni Azra-i pawh hian thah ve che a tum a ni." a rawn ti leh chhur chhur a. Hale-i chuan a beng a hup a, "Nilo...min thah a duh lo. Ngawi hmak rawh, min thah a duhlo hrim hrim." tiin a phun mawlh mawlh mai a.

**********************

Hmeichhe Scholar pakhat hnenah chuan Selim-a leh Seyit-a te thiandun chu an va kal ta nge nge a, buara ip pawh chu an keng bawk a. Scholar chuan buara chu chawhtlawh ah a dah a, tui a leih lut a. Tichuan chawhtawlh chhungah bawk chuan tui dum nguk mai chu a leih lut leh a, hmawlh pahnih lai in a a han thai kual vel a.

Thu eng eng emawni chu a chham pah bawk a, hmawlh pahnih chu a ti vir char char bawk a. Rei fe a chham hnu chuan tui thlaah chuan hmeichhe pakhat hi a rawn lang a, scholar chu a rawn melh khur mai. Scholar pasal Hodja chu a rawn lut a, Selim-a te thiandun chuan ngawi rengin an lo en a. Reilote hnuah chuan Hodja chuan Selim-a te thiandun chu a titi pui ta a, "Engmah chu an sawi lo, mahse hming pakhat chu min pe a ni." a ti a. Rang zet hian Selim-a chuan, "Tunge? Enge a hming?" a lo ti nghal vat a.

************************

"Ani..i tha em?" tiin Hale-i chuan Azra-i chu a han zawt a, "Tha e..tinge?" tiin a lo zawt let a. "I nawmloh hmel lutuk a." Hale-i chuan a lo ti leh a. "Ka tha alawm, ka chau deuh mai chauh mawle, nizan ka mu tlem lutuk a." tiin a lo chhang leh a, Hale-i ban ah chuan damdawi a hnawih chhunzawm mawlh mawlh a.

A phone a rawn ri a, Selim-a a lo ni. Lak a han tum chu Hale-i chuan, "Ani...la suh.." a lo ti a. Mak ti tak hian Azra-i chuan, "Engvangin maw?" a han ti a. "La suh..khawngaihin la suh." Hale-i chuan a han ti leh ringawt a. "Awle." tiin Azra-i chuan phone chu a dah ve mai bawk a. "Ka inthlak anga, ka lo let leh ang." tiin Hale-i chu a chhuahsan ta a.

Azra-i chu a room-ah a lut a, Selim-a chu a call leh nghal a. "Hello, Selim...i miss call ka lo hmu a, i tha maw?" a han ti a. "Ka tha vak lo, naktukah kan inhmu thei angem? Thil sawipui duh che ka nei a ni, i hman angem?" Selim-a chuan a rawn ti a. "Engthil nge thleng a?" tiin Azra-i chuan a lo zawt vat a. "Ka hre biklo, phone-ah chuan ka sawithei lo. Naktuk tlaiah ka rawn lam ang che, a tha em?" a rawn ti leh a. "A tha e." tiin Azra-i chuan phone chu a dah ta a. 

**********************

Selim-a chu a muhil tep tawh tihah chuan anu aw ngei mai chuan ring leng lawng hian, "SELIM." a rawn ti vak mai a, a harh chiang kher mai. A thu chhuak nghal hlawl mai a, a khur nghal zawih zawih mai. "Harh rawh...harh rawh...mumang mai mai a ni." tiin a inbeng vak vak a.

Chutah a khum bul lawkah chuan anu chu a lo ding reng mai, "Selim, engvangin nge khang lunghlu te kha kawrah i paih vek a? I unaupa in a hmu vek che a nia, min hrilh vek a ni." tiin a rawn hau ta chiam mai a. A unaupa ramtui leilo, kum tamtak liam ta a thi tawh kha a khum chung lawkah chuan a lo mu ve run mai bawk a.

Mahse thawk lehkhatah anu leh a unaupa te thla chu an bo leh nghal daih mai, rang takin light a va on a. A mit chu a han nuai vak vak a, a thlan a tla buah buah mai. Bathroom ah a lut a, a hmai a phih tur chiah chu ri rek thawm a hre leh ta. A bula european type toilet chu a han en a, comode chhungah chuan rangkachak zungbun te, pawisa te leh tlereuh dangte chu a lo khat nuk mai.

A mumang tho a nih la ringin a han inbeng leh vak vak a, mahse a lo la awm reng bawk si. Rang takin tlereuh ho chu a la chhuak vat a, a lak chhuah zawh dawn tepah chuan comode chhung atang chuan engemawni hian a kut a rawn ban thut mai. A t(r)e tuar a, a ban chu a chanve dawn mai hi chu thil chuan a pawt lut ta mai a.

Chutah comode ah chuan sam dum hraw tak tak mai hi a rawn khat leh ta nuk mai a, Selim-a chu a mangang kher mai. A sir atang chuan anu aw ngei mai chuan, "KA FAPA.." a rawn ti leh ta thut mai a. Rang takin ava hawi a, a sirah chuan anu leh a unaupa te thla chu an lo awm leh vung mai a.

"Selim, min ngaithla duh love, ka thu i zawm duh lova...khanu Azra-i kha kalsan rawh ka tih pawhin engatan mah i ngai lova tiraw?" tiin a rawn vin leh ta vak vak mai. A kut lah chu a la tang reng mai si a, chung sam hraw tak tak te lah chuan a kut chu an rawn zam nuai nuai mai bawk a.

********************

Hale-i chu zanlai ah chuan a tho va, a pi leh pute leh a nu leh pate thlalak hlui chu a en reng a. Room atang chuan a chhuak a, sitting room ava kal phei chu a ding chat mai. A pi leh pute, a nu leh pate chu thlalak a an awmdan chiah chuan an lo thu tlar a. Chutah Hale-i chhunga kawramhuai chuan, "An bulah sawn va kal rawh, nangmah vanga lo kal an nih hi." a lo ti a.

Hale-i pa pawh chuan, "Lo kal rawh, bawihte.." tiin Hale-i chu a lo ko ve bawk a. Chutah an pali chuan Hale-i chu rum em em hian an melh rual thup a, Hale-i chu a phu zawk mai. Tlanchhiat a tum a, ahma zawnah chuan a ni Azra-i chu a lo thu run mai bawk a. Rum em em hian a rawn melh a, Hale-i bulah chuan a pite chu an rawn ding hnai a.

Hale-i chu an man ta mai a, a tal nasa mai. A han hawi chhuak a, insang tak bulah a lo awm leh daih tawh. A chhung luh hma chuan gate pali a lo awm a, a bul zelah chuan ramhuai lian tak, dum run mai, ft 15 dawn lai a sang an lo ding ve run mai bawk a. Hale-i chu a lut a, a chhung chu a lo thim ruih mai.

A kal phei zel a, kil tin atang chuan a nu leh pate, a pi leh pute an rawn lang leh thut thut zel a. "Hale, pui tling i ni tawh...nangmah a i beih let angai." tih ten an lo hrilh a, an pil bo leh nghal zel a. Hale-i chu a phu zawk zawk zel mai a, "I bulah ka awm reng ang." tia a ni Azra-i'n a rawn biak ri te chu a hre bawk a.

A tawpah chuan pindan lung atanga siam pakhat ah chuan a lut a, a lai takah chuan a ni Azra-i chu a thu a, phuar beh a lo ni a, a lu chu puan pan nep taka khuh a lo ni bawk. Hale-i chuan Azra-i lu chu a chul a, a khur nghal cher cher mai. Azra-i pawh chuan a mumang lamah chuan thil rapthlak tak tak te a hmu a, a pa thlarau te a hmu bawk a.

"Ka pa...ka pa.." tiin a rawn au chhuak a. Chutah a harh zawk mai, a hawi kual a, a bulah chuan Hale-i a lo awm a, a sam a lo chul sak a. A thu chhuak nghal a, a roomah chuan a lo awm reng a. "Ani, ngatinge a? Mumang thalo i nei em ni?" tiin Hale-i chuan a lo zawt vat a. "Aw...ka mumang vek a ni." tiin Azra-i chu a thaw hlawp hlawp a.

"Enge i mumangah chuan i hmuh a?" tiin Hale-i chuan a zawt leh a. "Theihnghilh rawh, a ho lutuk." tiin Azra-i chuan a lo chhang a. "Apu i hmu em ni?" a rawn ti ta thut mai. "I pu maw?" a lo ti nghal vat a. Hale-i chuan, "I mutlai khan KA PA tiin i phun vak vak a. tiin a lo chhang a, Azra-i chu a ngai vang vang mai.

***********************

Zingah chuan HAle-i chu basement ah chuan a chhuk leh a, paper ah chuan symbol mak tak hi a ziak a. "A damloh thu min hrilh a, ka tih a nilo tih erawh a hria. An man bet a, an phuar hlawm a. Ani khan hnuai lam atangin a phawrh chhuak a ni, a phawrh chhuak a ni. A ti nawn leh a ni, a ngai ang bawkin a ti leh a ni." tiin Hale-i pi chu ama roomah chuan mu in a phun leh mawlh mawlh a.

Hale-i nu Gulten-i chuan ava pan a, "Engmaw a tih? Eng chu maw  a phawrh chhuah?" tiin ava zawt a. Hale-i pi chuan, "Ka tih a nilo tih a hria, mahse a hrelo." te a lo ti nuai mai. Chutah an pahnih chuan a dak rual thut a, na tuar ang mai hian an au dun ta vak vak mai. An inkarah chuan Hale-i chu hmai dum vek hian a lo awm reng a, an samah chuan a lo kek a.

Mahse darthalang atang chuan HAle-i chu a lang ve theih hauh lo, chutah an sam chu a thlah a, an kun ta lap mai. Muang chang chuan an rawn hawi chhuak dun a, an hlau kher mai. Chutah Hale-i chu hmel pangngai tak hian a rawn lut a, an lo hlau dun kher mai. Hale-i chuan a nu chu a va pan a, a nu chu a lo tap pur mai.

"Nu tap suh, he thil hi ila hria em?" tiin a symbol lem ziah chu a hmuh tir a. Anu chuan a en a, "He thil hi i zai chhiat angai, a nih loh chuan ka pa ang khan ka bo ve ang." a ti a. Hale-i chuan a chhuahsan dun a, anu chu a tap zawih zawih mai. A pi erawh chu a ngawi reng a, hlauh avangin a khur zawih zawih bawk a.

*********************

Ebru-i chuan dawhkana a fanu lemziak mial mial chu enin thingpui a in a, a phone chu phawrhin Selim-a a call a ,mahse Selim-a chuan a chhang thei hauh lo. Dawr nghah pah chuan Azra-i pawh chuan Selim-a chu a lo call ve mek bawk a, mahse a ring quit thak thak zel mai a. Chutah Azra-i hmai ah chu kut dum vek hian a rawn tham thut a, Azra-i chu a thal tawp mai.

Chu amah mantu kut pawh chu tu dang nilovin, ama kut tho a ni. A kut pahnih chu a rawn dum tulh tulh a, a ha a rawn dum tial tial bawk. Reiloteah chuan  areh veleh mai a, Azra-i pawh chu a tho vat a. A hmaa thlalak intar chu a lo inthen nel nel mai a, a hlau kher mai. 

Zan ah chuan Azra-i chu Biak In hmaah chuan dingin a tawngtai mawlh mawlh a, "Lalpa min venghim rawh, ramhuai thiltihtheihna lak ata min chhanhim ang che. Lei leh van siamtu, Lal ber i ni.." tiin a chham mawlh mawlh a. Chutah Biak In dar a rawn ri ta ral ral mai, Pathianin a tawngtaina a chhang ngei a ni tih hriattirna a ni beisiin a hlim khawp mai.

********************

A naute lem hmai kang lai zawng chu Hale-i chuan a chhem thla a, nautelem hmai chu a kaw ta huau mai. Naute lem chu a han en a, "Anu bulah chuan paper chu ka pe e." a han ti a. Naute lem chuan, "I thil duh apiang chu a thleng tawh ang." a lo ti a. "Dawt min hrilh reng suh." tiin Hale-i chuan nautelem chu  a vin vak a. "I pa pawh a lo kal thuai ang," tiin nautelem chuan a lo chhang leh a.

Kawngka a rawn inkik karh karh a, hlau chung chung chuan Gulten-i chuan kawngka lam chu ava pan a. A han hawng chu apsal tlanbo ta, Zehir-a a lo ni reng mai. "Zehir?" tiin Gulten-i chuan a melh hu ringawt a. Mahse Zehir-a erawh chuan rum em em hian a nupui Gulten-i chu a lo melh a, a nui deuh ver ver a.

********************

A ngaihtuah deuh avang chuan Ebru-i chu Selim-a inah chuan ava kal a, kawngka chu a lo inkalh lo hlauh a. A chhungah chuan a han lut a, "Selim?" tiin a han au a, mahse a reh diak mai. Bathroom lamah a han chho a, chhuata kut thi hnuang a Selim-a lo let reng mai chu a hmu thut mai a. "Selim, Selim.." tiin ava pan hnai vat a.

*********************

Azra-i pawh chu a lo haw ve ta a, inchhung a lut chiah chu a hma zawn takah chuan a mumanga a hmuh thih, thutthleng pahnih inhnungchhawn leh puanvar pahnih hi a lo awm a. Anu room lam atang chuan anu aw ngei mai chuan, "Azra, lo kal rawh...hetah kan awm." a rawn ti a.

Azra-i chu a lut a, Gulten-i leh anu chu an lo ding run mai a. Gulten-i chuan a ban a rawn phar chhuak a, "I hnunga kha i u a awm ania." a ti vak a. Azra-i chu a hawilet a, a unaupa Zehir-a a lo awm reng mai. "Ka u.." tiin Azra-i chu a ka hau mai a, chuveleh Zehir-a chuan a hmui hup sakin a man bet ta thut mai.

Thutthlengah chuan a thut luih tir a, Gulten-i chuan syringe rawn la in Azra-i chu a rawn chiu a. Azra-i chu a zawi ta riai riai mai a, a khawhmuh te chu a fiahlo ruai mai. Chutih lai chuan ama room ah chuan Hale-i chuan naute lem chu a lo la be mial mial a, "Apa chuan min be duhlo, tunge ka nih pawh a hrelo." a han ti a.

"Ka thil sawi ang apiang i tih chuan a be ngei ngei ang che." tiin naute lem chuan a lo thlem leh ta a. "I sawi ang apiang ka ti theilo." Hale-i chuan a han ti leh a. "I ti ngei tur a ni, anih chuan ipa hi a bo leh ang." tiin naute lem chuan a vau leh khur khur mai a. "Aih, a bo ka phal tawh lo." tiin Hale-i chu a tap lek lek mai. Naute lem chuan, "Anih chuan ka thu thu in awm ang che." a ti a.

****************************

Gulten-i chuan Azra-i melh reng pah chuan, "Kei leh ka fanu hi i nu leh pa leh i unaupa vang hian kan tuar nasa lutuk. Damlai hremhmun kan tuar hi a ni ringawt, nangni chhungkaw dawi hman vang hian. I pa hian mi tamtak a tuar tir tawh, misual a ni. Mi tam tak chu a dawi hmang hian a ti na a, hliam a tawrh tir thin a ni. Mi a te, mahni intihlum te, mahni fate that ta te hi ka hmu hnem tawh lutuk. A hmelhriat pawh ni miahlo te lakah chuan dawi a hmang a, an nun a ti hrehawm a, chu pawh pawisa vang vek a ni. Mithi ruang te chu a hal a, an vap te chu tuiah pawlhin mi a in luih tir a, chung mite chuan thil sual an tih phah thin a ni. Chuti khawpa sual chu ni mahse, i unaupa erawh hi chu a hmangaih takzet a ni." tih pah chuan a pasal Zehir-a chu ava melh leh a.

Gulten-i bawk chuan sawi zawm zelin, "Keini zawng zawng ai hian i unaupa saw a hmangaih bik a, mahse i unaupa sawn cancer a neih tak atang khan i pa chuan thlarau sual a ko chhuak leh a, i unaupa natna lak bo nan a ti a ni. He natna hi an tidam a nih phawt chuan nanghi ramhuaite hnena hlan che a tiam bawk a ni, i hriatlohvin min hrilh vek a ni. Keini pawh chuan kan pawm ve ta a, i unaupa chhan nan...mahse hun a lo kal zel a, doctor chuan i unaupa chu a dam that thu a sawi leh ta daih mai a. ipa lah chuan ramhuaite chu a lo tiam laklawh tawh si. A thutiam chu a hlen ngei angai a, anih loh chuan ramhuaite chuan min tibuai zel dawn si a ni." a han ti leh bawrh bawrh a.

**********************

Naute lem chuan, "I pu nen khan kan sawi fel vek tawh, i pa chu a dam tha a, mahse i ni Azra-i chu min pe leh duh silo." tiin Hale-i chu a hrilh ve bawk  a. Gulten-i chuan sawi zawm leh zelin, "Khami zan khan kan hrai rui che a, ramhuai te hnena hlan che kan tum ta a. Thutthleng pahnih inhnungchhawn ah chuan Zehir-a nen hian akan thut dun tir che u a, tichuan in hmai chu kan tuam bawk a. I pa chuan thu a chham tan ta a, i nu pawh chemte humin a rawn lut ve bawk a. Tichuan thu chu kan chham ho ta a, mahse i nu chuan nangmah nilovin i pa zawk chu a vit hlum ta a ni. I pa chuan a duh chu a hmu thei mai a, mahse kan thei ve tlat lo. Kha an thutiam kha enga tan mah kan ti velo, i nu in a venghim tlat a ni. Kan pangngai leh meuh chuan i pa chu chhuatah a lo let reng tawh a, i unaupa Zehir-a erawh a bo ta daih a ni. Vawiin thleng khan kan hmulova, mahse tunah chuan hei..kan bulah a awm ve tak hi. Khami ni atang khan i nu chu a rilru a buai ta a, a thah loh che avang khan tun thleng hian  a at phah ta a nih hi." a han ti leh vak vak a.

*************************

Naute lem pawh chuan Hale-i chu lo hrilh ve zelin, "Chuvang chu ani ipa chu kan hruai bo tak ni...heivang hi a ni i pa chu i hmuh ve hman takloh ni. Azra-i chu kan lo beisei reng a, mahse i pi chuan Azra-i nilovin i pu zawk a that ta a ni. I ni Azra-i zawk that ni se chu hetiang buaina hi a thleng lo tur ania." a ti a.

***************************

Gulten-i bawk chuan, "Ka fanu Hale-i pawh nangmah vanga hetiang a awm hi a ni, nangmah vangin amah saw kan dawi ta a ni. Tunah chuan kan rulh let ve hun a ni ta, thutiam hlen hun a ni ta." a han ti leh khur khur a. Azra-i chu a thaw tawk tawk tawh a, "Lalpa, min pui rawh." tiin a phun sap a.

***************************

"Hetia i damloh nachhan chu  i ni Azra-i thih loh vang a ni, hetiang thil thleng te hi i ni vang vek a ni. I ni chu that mai rawh, tichuan engkim a tawp ang." tiin naute lem chuan Hale-i chu a thlem leh a, Hale-i chuan naute lem chu a paih thuai mai. "I pa pawhin a be ve tawh ang che, i ni hi i thah phawt chuan i pa hi i bulah a awm kumkhua tawh ang. I ni dam ve chhung hi chuan i damlo reng ang, that rawh." tiin ama lu chu a dawm a, a au vak vak mai.

******************

Azra-i leh Zehir-a te unau chu thuthleng pahnih inhnungchhawn ah chuan an thutdun tir leh a, an lu chu an tuam sak leh a. Gulten-i chuan ramhuai hming chi hrang hrang te chu a lam a, "Menik, Hedliyac, Timiryat, Shogal." tiin a chham zuah zuah mai a. Chung ramhuai pali hmingte chu a lam nawn char char a, a lam ring telh telh mai.

Hale-i pawh chu a rawn lut ve ta, anu chham ang zel chuan a lo chham ve a, chemte a rawn hum lut bawk. Chutah a pu thlarau pawh chu a rawn lang a, a rawn chhampui ve nghal bawk a. Hale-i chuan a ni Azra-i chu a en vang vang a, a thei ta ngang lo. Tap chung hian, "Ka hmangaih lutuk che, Ani Azra.." a ti a, ama hrawk chu a chemte ken lai chuan a vit ta hrawk mai a, thisen a baw zawih zawih mai.

Chutah thli a rawn thaw vak vak a, Zehir-a leh Azra-i te chu boruakah chuan an kang ta vak mai a. Gulten-i, Hale-i leh a pi leh pute chu an hmai a rawn dum tial tial a, an mit atangin thisen a rawn chhuak a. An hmui a sawi bawi bawi mai a, chutah boruak chu a reh hmak mai. Gulten-i, Hale-i, Zehir-a leh Hale-i pi te chu an thi der mai a, Azra-i chiah chu a damchhuak ta a ni.

*********************

Biak In hmaah chuan Azra-i chu a tawngtai a, "Lalpa, Hale-i thlarau chu i van in nuamah awm tir ve hram ang che aw, a natna te lak kian sak la, venghim ang che. A thil tihsualah ngaidam la, khawngaih hram ang che." tiin a dil mawlh mawlh a. Chuveleh kawl a rawn phe zawk a, khawpui a rawn ri dur dur mai a.

Arsi pakhat chu a rawn eng vat vat a, Hale-i aw ngei mai chuan, "Ani, ka hmangaih che. Min theihnghilh ngai suh ang che aw, Ani.." tiin a rawn chhang a.

********************

(A HNUA AN SAWI LEH DAN)

Nazife-i leh a monu Gulten-i leh afanu Hale-i te chu chumi zan chuan thi a chhar an ni a, Zehir-a erawh hmuh ala ni chuang lo. Thla ruk hnuah chuan Selim-a leh Azra-i te chu an innei ta a, tunah chuan Muola khuaah khawsa mekin thla thuma upa fa an nei ve tawh a, an fanu hming chu Hale-i tiin an phuah nghe nghe a ni.

A TAWP TA